VOA News: ព័ត៌មាន: “សមាជិកគណបក្សសម រង្ស៊ីផ្តាច់ខ្លួនចូលគណបក្សសិទ្ធិមនុស្ស” plus 3 more |
- សមាជិកគណបក្សសម រង្ស៊ីផ្តាច់ខ្លួនចូលគណបក្សសិទ្ធិមនុស្ស
- នគរបាលជាតិតាមប្រមាញ់ប្រធានក្រុមហ៊ុនជ្រើសរើសពលករទៅធ្វើការនៅម៉ាឡេស៊ី
- ការស៊ើបអង្កេតជាបន្ទាន់គួរត្រូវធ្វើលើការិយាល័យសហចៅក្រមស៊ើបអង្កេត
- ព័ត៌មានអន្តរជាតិ៖ ១២ តុលា
| សមាជិកគណបក្សសម រង្ស៊ីផ្តាច់ខ្លួនចូលគណបក្សសិទ្ធិមនុស្ស Posted: 12 Oct 2011 11:20 AM PDT មន្ត្រីជាន់ខ្ពស់គណបក្ស សម រង្សីចំនួន១០នាក់ប្រចាំខេត្តកំពង់ចាម នៅថ្ងៃអង្គារនេះ បានប្រកាសផ្តាច់ខ្លួនចេញពីគណបក្ស សម រង្សី មកចូលរូមគណបក្សសិទ្ធិមនុស្ស។ មន្ត្រីទាំង១០នាក់រូបរួមមានលោក វ៉ាន់ ស៊ីវឿន អនុប្រធានក្រុមប្រឹក្សាគណបក្សខេត្ត លោក ប្រាក់ វណ្ណឌី ប្រធានផ្នែកទំនាក់ទំនងសាធារណៈគណបក្សខេត្ត លោក ហុក លីហក់ ប្រធានក្រុមប្រឹក្សាគណបក្សស្រុកត្បូងឃ្មុំ និងអ្នកដទៃទៀតមានតួនាទីជាប្រធានក្រុមប្រឹក្សាស្រុកតំបែរ ស្រុកកងមាស ស្រុកស្រីសន្ធរ ស្រុកព្រៃឈរ។ លោក ហុក លីហក់ ប្រធានក្រុមប្រឹក្សាគណបក្សស្រុកត្បូងឃ្មុំ ខេត្តកំពង់ចាម បាននិយាយថា លោកមិនក្បត់គណបក្ស សម រង្សីទេ ប៉ុន្តែគណបក្ស សម រង្សី បានធ្វើឲ្យលោកឈឺចាប់។ «ខ្ញុំស្រឡាញ់ណាស់គណបក្ស សម រង្សី ប៉ុន្តែវាជារឿងបុគ្គលវិញ មិនមែនជារឿងជាតិ មិនមែនជារឿងលទ្ធិប្រជាធិបតេយ្យ បក្ខពួកនិយម និងអយុត្តិធម៌។ ខ្ញុំត្រូវតែមករួបរួមជាមួយគណបក្សសិទ្ធិមនុស្ស ដើម្បីប្រមូលផ្តុំកម្លាំងអ្នកប្រជាធិបតេយ្យ ដើម្បីយកជ័យជម្នះជូនប្រជាពលរដ្ឋ និងប្រទេសជាតិ នៅពេលបោះឆ្នោតខាងមុខនេះ»។ លោក ប្រាក់ វណ្ណឌី ប្រធានផ្នែកទំនាក់ទំនងសាធារណៈគណបក្សប្រចាំខេត្តកំពង់ចាមបានបញ្ជាក់ថា លោកជាមនុស្សញៀននយោបាយ។ លោកមិនអាចបោះបង់ចោលអាជីពនយោបាយរបស់លោកទេ។ «យើងធ្វើនយោបាយចង់បានប្រជាធិបតេយ្យ បើឥឡូវ គណបក្សអត់ប្រជាធិបតេយ្យ យើងគិតយ៉ាងណាទៀត»។ លោក សម រង្សី មេដឹកនាំគណបក្ស សម រង្សី បានថ្លែងប្រាប់ វីអូអេខ្មែរពីប្រទេសបារាំងមកថា លោកមិនមានកង្វល់នឹងការចាកចេញរបស់សកម្មជនគណបក្ស សម រង្សីទាំងនេះទេ ពីព្រោះពួកគាត់ជាមនុស្សអសកម្ម។ «យើងអត់មានការភ្ញាក់ផ្អើលទេពីព្រោះយើងបានសម្គាល់នៅក្នុងជួរគណបក្សសម រង្សី ប៉ុន្មានខែប៉ុន្មានឆ្នាំកន្លងមកនេះ ឃើញថា មានមនុស្សមួយចំនួនតូចដែលជាថ្នាក់ដឹកនាំគណបក្សសម រង្សី ថ្នាក់មូលដ្ឋាន ថ្នាក់ខេត្តបួនដប់នាក់ ដែលអសកម្ម មិនធ្វើការ រវើរវាយ យកជើងរាទឹកដោយប្រការណាមួយ។ ដូច្នេះ យើងបានដកតួនាទីពីអ្នកទាំងអស់នោះ»។ លោក ឡាវ ម៉ុងហៃ អ្នកវិភាគឯករាជ្យ បានថ្លែងថា ការផ្លាស់ប្តូរពីគណបក្សនយោបាយមួយទៅ គណបក្សនយោបាយមួយមិនអាចទាក់ទាញការគាំទ្រពីអ្នកគាំទ្រគណបក្សប្រជាជនកម្ពុជាទេ ប៉ុន្តែបានធ្វើមានបែកសំឡេងអ្នកគាំទ្រក្នុងចំណោមគណបក្សប្រឆាំងទាំងពីរគឺគណបក្ស សម រង្សី និងគណបក្សសិទ្ធិមនុស្ស។ «ការផ្លាស់ប្តូរនេះនឹងធ្វើឲ្យគណបក្សដែលគេរត់ចេញ ចុះទន់ខ្សោយ ហើយមានការផ្តល់កម្លាំងទៅគណបក្សដែលទទួលយក។ នេះជាដំណើការលទ្ធិប្រជាធិបតេយ្យ។ មនុស្សម្នាក់ៗមានសិទ្ធិសេរីភាពក្នុងការជ្រើសរើសយកជំហរនយោបាយ និងគណបក្សនយោបាយ»។ លោក នី ចរិយា ប្រធានផ្នែកស៊ើបអង្កេតនៃសមាគមសិទ្ធិមនុស្សអាដហុក បានបញ្ជាក់យ៉ាងដូច្នេះថា៖ «បើសិនជាយើងនៅតែរត់ចេញរត់ចូល គណបក្សប្រឆាំងប្រាកដជាខ្សោយហើយ។ ប៉ុន្តែបើសិនជាគណបក្សទាំងពីរមានចូលរួមគ្នាវិញ ស្ថានភាពនយោបាយនឹងអាចមានការផ្លាស់ប្តូរធំដោយសារតែការយកចិត្តទុកដាក់របស់ប្រជាពលរដ្ឋទៅលើការចូលរួមនៃការបោះឆ្នោត ដោយលោកយល់ថាប្រហែលជាសំឡេងឆ្នោតរបស់លោកនៅពេលនេះមានតម្លៃ»។ លោក នី ចរិយា បានលើកឡើងថា ករណីគណបក្សហ៊្វុនស៊ិនប៉ិច និងគណបក្សសម រង្សី មានការរត់ចេញរត់ចូល ប៉ុន្តែទីបំផុត គណបក្សទាំងពីរនេះបានចុះទន់ខ្សោយ និងបរាជ័យទាំងពីរ ហើយអ្វីដែលបានកើតឡើងនៅពេលនេះវាបានកើតឡើងពីពេលមុនរួចមកហើយៗវាជាការបរាជ័យតាំងពីពេលមុនមកដែរ៕ This posting includes an audio/video/photo media file: Download Now |
| នគរបាលជាតិតាមប្រមាញ់ប្រធានក្រុមហ៊ុនជ្រើសរើសពលករទៅធ្វើការនៅម៉ាឡេស៊ី Posted: 12 Oct 2011 09:50 AM PDT នគរបាលកំពុងតាមស្វែងរកចាប់ខ្លួនលោកសម ពិសី នាយកក្រុមហ៊ុន ធី&ភី ខូអិលធីឌី (T&P Co., Ltd.) ដែលជាទីភ្នាក់ងារជ្រើសរើសពលករកម្ពុជាទៅបម្រើការងារនៅប្រទេសម៉ាឡេស៊ីអំពីបទបង្ខាំងមនុស្សដោយខុសច្បាប់ បទជ្រើសរើសអនីតិជនដោយខុសច្បាប់ និងបទក្លែងឯកសារ។ ដីកាតាមចាប់ខ្លួនលោកសម ពិសីនេះ បានធ្វើឡើងបន្ទាប់ពីនគរបាលបានឆ្មក់ចូលទៅក្នុងក្រុមហ៊ុនធី&ភី ខូអិលធីឌី នៅក្នុងខេត្តកំពង់ឆ្នាំងកាលពីចុងសប្តាហ៍ ដើម្បីសង្គ្រោះក្មេងស្រីក្រោមអាយុ១៨ឆ្នាំចំនួន៣០នាក់ដែលកំពុងទទួលការបណ្តុះបណ្តាលឲ្យបម្រើការតាមផ្ទះនៅប្រទេសម៉ាឡេស៊ី។ លោកឧត្តមសេនីយ៍ទោ ប៊ិត គឹមហុង ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃបានថ្លែងថា លោកបានស្នើសុំទៅនាយកដ្ឋានអន្តោប្រវេសន៍ និងបានបញ្ជូនដីកាទៅមន្ត្រីអន្តោប្រវេសន៍ច្រកទ្វាព្រំដែនទាំងអស់ដើម្បីចាប់ខ្លួនលោក សម ពិសី តាមដីកាបញ្ជាឲ្យចាប់ខ្លួនរបស់តុលាការ បើលោកប៉ុនប៉ងឆ្លងដែនដើម្បីរត់គេចពីការចោទប្រកាន់។ លោកឧត្តមសេនីយ៍ត្រី ជីវ ផល្លី អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃ បានថ្លែងថា លោក សម ពិសី នាយកក្រុមហ៊ុន ធី&ភី ខូអិលធីឌីនេះត្រូវតែទទួលខុសត្រូវចំពោះមុខច្បាប់ទាក់ទងនឹងការជ្រើសរើសអនីតិជន ការក្លែងឯកសារ និងការបង្ខាំងមនុស្សដោយខុសច្បាប់។ «យើងសង្ស័យថាប្រធានក្រុមហ៊ុននេះនៅភ្នំពេញ។ ប៉ុន្តែឥឡូវ យើងមានដីកាហើយ។ យើងកំពុងតែតាមស្វែងរកគាត់ ដើម្បីនាំខ្លួនទៅតុលាការ ហើយចាត់ការតាមផ្លូវច្បាប់។ យើងនឹងតាមប្រមាញ់គាត់ តាមរកគាត់ មិនអត់ឱនឲ្យគាត់រួចផុតពីសំណាញ់ច្បាប់ទេ។ ប៉ុន្តែឥឡូវ គាត់កំពុងគេចខ្លួន។ អញ្ចឹង យើងកំពុងតែរកគាត់»។ លោក ពេញ វិបុល ព្រះរាជអាជ្ញាអមសាលាដំបូងខេត្តកំពង់ឆ្នាំ បានចេញដីកាបញ្ជាឲ្យចូលខ្លួនចុះថ្ងៃទី១០ ខែតុលា ដោយចោទប្រកាន់លោក សម ពិសី នាយកក្រុមហ៊ុន ធី&ភី ខូអិលធីឌី អំពីបទបង្ខាំងមនុស្សដោយខុសច្បាប់។ លោកឧត្តមសេនីយ៍ ជីវ ផល្លី បានបញ្ជាក់តាមសម្តីដើមថា៖ «យើងកំពុងសុំទៅព្រះរាជអាជ្ញា ដើម្បីឲ្យចោទប្រកាន់លោកពិសី ពីបទល្មើសទៀតបន្ថែម គឺបទជ្រើសរើសអនីតិជនដោយខុសច្បាប់ និងបទក្លែងឯកសារ បន្ទាប់ពីនគរបាលបានរកឃើញ»។ លោកឧត្តមសេនីយ៍ ជីវ ផល្លី បានបន្តថា នគរបាលបានចាប់ឃុំខ្លួនជនសង្ស័យបួននាក់ពាក់ព័ន្ធនឹងអំពើខុសច្បាប់របស់ក្រុមហ៊ុន ធី&ភី ខូអិលធីឌីនេះ រួមមានឈ្មោះ ឡុង សីណា អាយុ ៣០ឆ្នាំ តំណាងក្រុមហ៊ុននៅមជ្ឈមណ្ឌលបណ្តុះបណ្តាលក្នុងខេត្តកំពង់ឆ្នាំង ត្រូវបានចោទអំពីបទបង្ខាំងមនុស្សដោយខុសច្បាប់ចំពោះការចាក់សោរក្មេងស្រីក្នុងបន្ទប់ ខណៈដែលមេខ្យល់ឈ្មោះ ប៉ែន សំអាង អាយុ៤៥ឆ្នាំត្រូវបានចោទប្រកាន់អំពីបទក្លែងបន្លំឯកសារ និងមានបំណងបញ្ជូនមនុស្សឆ្លងដែនដោយខុសច្បាប់។ អ្នកស្រី ខឹម ស្រី អាយុ៤៥ឆ្នាំ និងអ្នកស្រី សឿន សី អាយុ៤៤ឆ្នាំដែលជាម្តាយរបស់អនីតិជនពីរនាក់ ក្នុងចំណោម៣០នាក់ ត្រូវបានចោទប្រកាន់អំពីបទក្លែងបន្លំឯកសារបន្ថែមអាយុកូនរបស់ខ្លួន។ លោក មឿន តុលា ប្រធានផ្នែកកម្មវិធីសិទ្ធិការងារនៃមជ្ឈមណ្ឌលច្បាប់សម្រាប់សហគមន៍បានថ្លែងថា អាជ្ញាធរត្រូវស្វែងរកចាប់ខ្លួនអ្នកទទួលខុសត្រូវរបស់ក្រុមហ៊ុននេះមកដាក់ទោសឲ្យខាងតែបាន។ ក្រុមហ៊ុននេះត្រូវតែបិទដើម្បីជាគំរូមួយដល់ក្រុមហ៊ុនផ្សេងៗ និងជាការកែប្រែមុខមាត់របស់កម្ពុជា។ «ការជ្រើសរើសពលករឲ្យទៅធ្វើការនៅប្រទេសម៉ាឡេស៊ីនេះ ដោយសារតែកង្វះនៃការការពារ និងកង្វះនៃការត្រួតពិនិត្យឲ្យដិតដល់។ យើងឃើញថា ការជ្រើសរើសពលករនេះ ហាក់ដូចជាធ្លាក់ទៅជាទម្រង់នៃការជួញដូរមនុស្ស»។ លោក អាន ប៊ុនហាក់ ប្រធានសមាគមនៃទីភ្នាក់ងារជ្រើសរើសពលករកម្ពុជា បានថ្លែងថាទង្វើខុសច្បាប់របស់ក្រុមហ៊ុន ធី&ភីខូអិលធីឌីនេះ អាចធ្វើឲ្យមានការភ័យខ្លាចដល់ពលករដែលមានបំណងទៅធ្វើការក្រៅប្រទេសតាមរយៈក្រុមហ៊ុនជ្រើសរើសពលករផ្សេងៗទៀត និងធ្វើឲ្យប៉ះពាល់ដល់ផលប្រយោជន៍របស់ក្រុមហ៊ុនជ្រើសរើសពលករត្រឹមត្រូវដទៃទៀត។ «សមាគមបានធ្វើការណែនាំសឹកបបូរមាត់ហើយអំពីបញ្ហាអនីតិជន និងបញ្ហាបង្ខាំងមនុស្សនេះ។ ក៏ប៉ុន្តែករណីនេះនៅតែកើតឡើង។ ដូច្នេះយើងពិតជាមានការសោកស្តាយចំពោះអំពើរបស់ក្រុមហ៊ុននេះ»។ លោក ហូ វុទ្ធី អនុប្រធាននាយកដ្ឋានការងារនៃក្រសួងការងារ បានបញ្ជាក់ថាក្រុមហ៊ុននេះត្រូវបានបិទ៕ This posting includes an audio/video/photo media file: Download Now |
| ការស៊ើបអង្កេតជាបន្ទាន់គួរត្រូវធ្វើលើការិយាល័យសហចៅក្រមស៊ើបអង្កេត Posted: 12 Oct 2011 08:46 AM PDT នាយកមជ្ឈមណ្ឌលឯកសារកម្ពុជា លោក ឆាំង យុគ បានអំពាវនាវដល់អង្គការសហប្រជាជាតិនៅថ្ងៃពុធនេះឲ្យចាត់វិធានការឲ្យបានម៉ឺងម៉ាត់បំផុតប្រឆាំងនឹងការចោទប្រកាន់ស្ដីពីអំពើពុករលួយនៅក្នុងការិយាល័យសហចៅក្រមស៊ើបអង្កេតនៃសាលាក្ដីខ្មែរក្រហម ដើម្បីអ្វីមួយដែលលោកហៅថា ជាការស្ដារកិត្តិយសរបស់សាលាក្ដីនេះឡើងវិញពីការអាប់ឱនដោយសារការចោទប្រកាន់ពីការជ្រៀតជ្រែកនិងចំណោទនៃភាពពុករលួយ។ លោក ឆាំង យុគ បានស្នើយ៉ាងដូច្នេះដោយសំអាងលើមូលហេតុនៃការលាឈប់ពីការងាររបស់សហចៅក្រមស៊ើបអង្កេតអន្ដរជាតិ លោក ស៊ីកហ្វ្រ៊ីត ប៊្លុង។ លោក ប៊្លុងដែលបានប្រកាសលាលែងពីការងារជាសាធារណៈកាលពីថ្ងៃច័ន្ទ ហើយលោកបានលាតត្រដាងថា មានការជ្រៀតជ្រែកផ្នែកនយោបាយពីរដ្ឋាភិបាលកម្ពុជាចូលក្នុងកិច្ចការស៊ើបអង្កេតរបស់លោកក្នុងសំណុំរឿងចុងក្រោយ ០០៣ និង០០៤។ លោក ឆាំង យុគ ដែលមជ្ឈមណ្ឌលរបស់លោកបានរួមចំណែកក្នុងការផ្ដល់ឯកសារស្ដីពីរបបខ្មែរក្រហមជាច្រើនដល់សាលាក្ដីពិសេស បានលើកឡើងនៅក្នុងសេចក្ដីថ្លែងការណ៍ជាសាធារណៈថា ការលាឈប់ពីការងាររបស់លោកចៅក្រម ស៊ីកហ្វ្រ៊ីត ប៊្លុង ជារូបភាពកាន់តែអាក្រក់បន្ថែមលើគម្រោងការអាក្រក់ និងការប៉ាន់ប្រមាណលើអំពើពុករលួយដែលកើតមាននៅក្នុងការិយាល័យសហចៅក្រមស៊ើបអង្កេតរួចទៅហើយនោះ។ នាយកមជ្ឈមណ្ឌលឯកសារកម្ពុជាដដែលបានគូសបញ្ជាក់ថា ជាការណ៍ចាំបាច់បំផុតដែលអង្គការសហប្រជាជាតិចាត់ការឲ្យបានម៉ឺងម៉ាត់ដើម្បីស្ដារទំនុកចិត្តនិងកេរ្តិ៍ឈ្មោះរបស់សាលាក្ដីខ្មែរក្រហម។ លោក ឆាំង យុគ បានទទូចថា មិនត្រូវឲ្យមានការលាឈប់ពីការងាររបស់ចៅក្រមដោយពុំមានការស៊ើបអង្កេតលើអ្វីដែលបានលើកឡើងនោះឡើយ។ «ដំណើរការហ្នឹងមានភាពពុករលួយ មានន័យថា មានភាពមិនប្រក្រតី។ ដូច្នេះចាំបាច់ត្រូវតែស៊ើបអង្កេតដោយឯករាជ្យ។ ហើយការលាលែងដោយមិនបានធ្វើការស៊ើបអង្កេតនេះមិនមែនជាទម្លាប់ល្អរបស់អង្គការសហប្រជាជាតិទេ។ ការលាលែងមិនមែនជាដំណោះស្រាយហើយមិនត្រូវឲ្យការលាលែងនេះកន្លងទៅផុតដោយគ្មានការស៊ើបអង្កេត»។ អង្គការគំនិតផ្ដួចផ្ដើមយុត្តិធម៌សង្គមសេរី OSJI របស់សហរដ្ឋអាមេរិក កាលពីឆ្នាំ២០០៧ បានបរិហារអំពើពុករលួយនៅសាលាក្ដីខ្មែរក្រហមខាងភាគីកម្ពុជា។ ហើយបន្ទាប់មកកម្មវិធីអភិវឌ្ឍន៍អង្គការសហប្រជាជាតិ(UNDP)បានបង្កកលុយជំនួយបរទេសដល់ភាគីកម្ពុជាចំនួន ៧២ម៉ឺនដុល្លារអាមេរិក។ កាលពីខែកញ្ញា លោក អ៊ុត ឈន អគ្គសវនាករនៃអាជ្ញាធរជាតិសវនកម្មកម្ពុជាដែលត្រូវបានតែងតាំងជាទីប្រឹក្សាឯករាជ្យរបស់សាលាក្ដីខ្មែរក្រហមសម្រាប់ធ្វើការត្រួតពិនិត្យលើការចោទប្រកាន់ស្ដីពីអំពើពុករលួយក្នុងសាលាក្ដីខ្មែរក្រហមបានអះអាងថា លោកមិនបានរកឃើញបញ្ហាធ្ងន់ធ្ងរទាក់ទងនឹងការចោទប្រកាន់ពីភាពមិនប្រក្រតី និងអំពើពុករលួយក្នុងសាលាក្ដីខ្មែរក្រហមនោះទេ។ លោកឆាំង យុគ បានដាស់តឿនថា ប្រសិនបើមិនមានការចាត់ការពីអង្គការសហប្រជាជាតិនោះទេ អង្គភាពក្នុងសាលាក្ដីខ្មែរក្រហមទាំងមូលរួមទាំងអង្គការសហប្រជាជាតិខ្លួនឯងផងនឹងជាប់ប្រឡាក់ប្រឡូសក្នុងការស៊ុមគ្រលុំជាមួយរដ្ឋាភិបាល។ តែលោកយូ ប៊ុនឡេង សហចៅក្រមស៊ើបអង្កេតកម្ពុជាបានចេញសេចក្ដីថ្លែងការណ៍មួយដែរនៅថ្ងៃពុធនេះដោយបញ្ជាក់ថា លោកបានធ្វើការសហការជាមួយនឹងដៃគូអន្តរជាតិលោកស៊ីកហ្វ្រ៊ីត ប៊្លុងក្នុងការស៊ើបអង្កេតសំណុំរឿង០០៣និង០០៤ដោយឯករាជ្យពីការជ្រៀតជ្រែកនានា។ លោកនេត្រ ភក្ដ្រា អ្នកនាំពាក្យសាលាក្ដីខ្មែរក្រហមខាងភាគីកម្ពុជាអះអាងថា សហចៅក្រមកម្ពុជានិងបន្ដជំហរបែបនេះតទៅទៀត។ «គាត់នឹងបន្ដឯករាជ្យភាព ហើយនឹងប្រយុទ្ធប្រឆាំងទៅនឹងរាល់ការប៉ុនប៉ងជ្រៀតជ្រែកនានាពីមជ្ឈដ្ឋានខាងក្រៅ និងមជ្ឈដ្ឋានខាងក្នុងខាងសហចៅក្រមស៊ើបអង្កេត»។ ក្នុងពេលជាមួយគ្នានេះដែរ ក្រសួងការបរទេសកម្ពុជាក៏បានបញ្ជាក់ជំហរបស់ខ្លួនឡើងវិញថា រដ្ឋាភិបាលខ្មែរមិនដែលជ្រៀតជ្រែក ហើយក៏នឹងមិនជ្រៀតជ្រែកចូលកិច្ចការផ្ទៃក្នុងរបស់សាលាក្ដីខ្មែរក្រហមដែរ។ ហើយរដ្ឋាភិបាលកម្ពុជាគោរពឯករាជ្យភាពរបស់តុលាការនេះ ក៏ប៉ុន្ដែសេចក្ដីថ្លែងការណ៍ដដែលនៅតែព្រមានជាប្រយោលថា ខ្លួនមានសិទ្ធិរក្សានូវ«សន្តិភាព និងការផ្សះផ្សានៅក្នុងប្រទេស»៕ This posting includes an audio/video/photo media file: Download Now |
| Posted: 11 Oct 2011 09:53 PM PDT ព័ត៌មានចុងក្រោយបំផុត៖ សហរដ្ឋអាមេរិក៖ ក្រសួងការបរទេសសហរដ្ឋអាមេរិកបានចេញការប្រកាសដ៏ប្រុងប្រយ័ត្នមួយទូទាំងពិភពលោកសម្រាប់ប្រជាពលរដ្ឋអាមេរិកអំពីលទ្ធភាពនៃសកម្មភាពប្រឆាំងសហរដ្ឋអាមេរិកបន្ទាប់ពីការចោទប្រកាន់ប្រឆាំងជនជាតិអ៊ីរ៉ង់ពីរនាក់ពីការឃុបឃិតជាមួយរដ្ឋាភិបាលទីក្រុងតេហេរ៉ង់ (Tehran) ដើម្បីសម្លាប់ឯកអគ្គរដ្ឋទូតប្រទេសអារ៉ាប៊ីសាអូឌីតប្រចាំនៅសហរដ្ឋអាមេរិក។ អារ៉ាប៊ីសាអូឌីត៖ លោក Abdel Al – Jubeir ឯកអគ្គរាជទូតនៃប្រទេសអារ៉ាប៊ីសាអូឌីតប្រចាំសហរដ្ឋអាមេរិក ជាទិសដៅនៃផែនការឃាតកម្មដែលគាំទ្រដោយប្រទេសអ៊ីរ៉ង់ ជាអ្នកការទូតដ៏មានបទពិសោធន៍ដែលល្បីល្បាញបំផុតក្នុងប្រទេសលោកខាងលិច។ វៀតណាម/ឥណ្ឌា៖ ប្រធានាធិបតីវៀតណាម ជុង តាន សាង (Truong Tan Sang) បានស្ថិតក្នុងរដ្ឋធានីញូវដែលីនៃប្រទេសឥណ្ឌាដែលជាផ្នែកមួយនៃដំណើរបំពេញទស្សនកិច្ចផ្លូវរដ្ឋរយៈពេល៤ថ្ងៃ ដែលមានគោលបំណងពង្រឹងចំណងទាក់ទងខាងពាណិជ្ជកម្មនិងវិស័យការពារប្រទេស។ ភូមា៖ ក្រុមប្រឆាំងនិងអង្គការសិទ្ធិមនុស្សភូមា ប្រាប់ឲ្យដឹងថា រដ្ឋាភិបាលបានដោះលែងពួកអ្នកទោសនយោបាយមួយចំនួននៅថ្ងៃពុធនេះ រួមមានទាំងអ្នកកំប្លែងដ៏មានប្រជាប្រិយភាពម្នាក់ផង។ សហរដ្ឋអាមេរិក៖ សហរដ្ឋអាមេរិកប្រាប់ឲ្យដឹងថា សមាជិកម្នាក់នៃឆ្មាំការពារបដិវត្តន៍អ៊ីរ៉ង់ បានត្រូវជាប់សង្ស័យពីការមានតួនាទីក្នុងការរៀបចំផែនការដែលត្រូវបានគេបញ្ចេញឲ្យដឹងកាលពីថ្ងៃអង្គារ ដើម្បីធ្វើឃាតឯកអគ្គរាជទូតនៃប្រទេសអារ៉ាប់ប៊ីសាអូឌីតប្រចាំនៅសហរដ្ឋអាមេរិក។ ហ្វីលីពីន៖ ប្រធានាធិបតី Benigno Aquino នៃប្រទេសហ្វីលីពីនមានប្រសាសន៍ថា លោកនឹងមិនយល់ព្រមឲ្យមានពិធីបុណ្យសពផ្លូវរដ្ឋដល់ខ្មោចជនផ្តាច់ការប្រធានាធិបតី Ferdinand Marcos ទេ។ ចិន/រុស្ស៊ី៖ ប្រធានាធិបតីចិន ហ៊ូ ជីនតាវ បានស្វាគមន៍នាយករដ្ឋមន្រ្តី Vladimir Putin នៃប្រទេសរុស្ស៊ីដែលជាមិត្តភក្តិចាស់របស់ចិននៅថ្ងៃពុធនេះ។ ប្រធានាធិបតីចិនបានប្រាប់នាយករដ្ឋមន្រ្តីរុស្ស៊ីថា ដំណើរបំពេញទស្សនកិច្ចរយៈពេល២ថ្ងៃរបស់លោកមកកាន់ទីក្រុងប៉េកាំង បានធ្វើទំនាក់ទំនងជឿនលឿនរវាងប្រទេសទាំងពីរ។ អង់គ្លេស៖ ការិយាល័យស្ថិតិជាតិនៃប្រទេសអង់គ្លេសបានប្រាប់ឲ្យដឹងនៅថ្ងៃពុធនេះថា អត្រាអត់ការងារនៅក្នុងប្រទេសបានឡើងដល់៨ភាគរយជាលើកទីមួយនៅក្នុងរយៈពេល១៥ឆ្នាំ។ <!--AV--> ព័ត៌មាននៅពេលមុននេះ៖ <!--IMAGE-RIGHT--> វៀតណាម៖ Nguyen Phu Trong ប្រធានបក្សកុម្មុយនីស្តវៀតណាម បានចាប់ផ្តើមបំពេញទស្សនកិច្ចរយៈពេល៥ថ្ងៃទៅកាន់ប្រទេសចិនដែលបានកើតមានឡើងប៉ុន្មានសប្តាហ៍ បន្ទាប់ពីភាគីទាំងពីរបានព្រមព្រៀងគ្នាបង្កើនការចរចាដើម្បីកាត់បន្ថយការតានតឹងខាងយោធាដែលកំពុងកើនឡើងនៅក្នុងសមុទ្រចិនខាងត្បូង។ អ៊ីរ៉ង់៖ សហរដ្ឋអាមេរិកប្រាប់ឲ្យដឹងថាខ្លួនបានបំបែកផែនការរបស់អ៊ីរ៉ង់ធ្វើឃាតុកម្មឯកអគ្គរដ្ឋទូតប្រទេសអារ៉ាប់ប៊ីសាអូឌីតប្រចាំនៅសហរដ្ឋអាមេរិក។ ប៉ាឡេស្ទីន៖ វិទ្យុអ៊ីស្រាអែល ប្រាប់ឲ្យដឹងថា រដ្ឋាភិបាល បានឈោងដល់កិច្ចព្រមព្រៀងជាមួយជាមួយក្រុមកងជីវពលប៉ាឡេស្ទីនហាម៉ាស ដើម្បីដោះលែងទាហានអ៊ីស្រាអែល Gilad Shalit។ លីប៊ី៖ ពួកអ្នកប្រយុទ្ធរបស់រដ្ឋាភិបាលអន្តរកាលលីប៊ី និយាយថា ពួកគេបានបង្កើនការត្រួតត្រាទីស្នាក់ការធំៗរបស់ប៉ូលីសក្នុងទីក្រុង Sirte ដែលជាទីក្រុងកំណើតរបស់អតីតមេដឹកនាំ Moammar Gadhafi ហើយពួកគេកំពុងខិតចូលកាន់តែជិតដើម្បីត្រួតត្រាទីក្រុងនោះទាំងស្រុង។ អេហ្ស៊ីប៖ ឧបនាយករដ្ឋមន្រ្តីអេហ្ស៊ីបបានលាចេញពីតំណែងកាលពីថ្ងៃអង្គារ ពេលដែលការប៉ះទង្គិចអំពើហិង្សារវាងកងកម្លាំងសន្តិសុខនឹងអ្នកកាន់សាសនាគ្រឹស្ត Coptic ដែលបានសម្លាប់មនុស្ស២៦នាក់។ រុស្ស៊ី៖ ប្រទេសរុស្ស៊ីបានរិះគន់ប្រទេសអ៊ុយក្រែនចំពោះការកាត់ទោសអតីតនាយករដ្ឋមន្រ្តីលោកស្រី Yulia Tymoshenko ឲ្យជាប់ពន្ធនាគារ៧ឆ្នាំចំពោះការប្រើប្រាស់អំណាចហួសក្នុងទំនាក់ទំនងកិច្ចព្រមព្រៀងឧស្ម័នដែលលោកស្រីបានចរចាជាមួយប្រទេសជិតខាងនៅឆ្នាំ២០០៩។ អ៊ីរ៉ង់៖ ប្រធានាធិបតីអ៊ីរ៉ង់ Mahmoud Ahmadinejad បានរិះគន់ការវាយនឹងរំពាត់កាលពីពេលថ្មីៗនេះដល់និស្សិតម្នាក់ដែលត្រូវបានកាត់ឲ្យជាប់ទោសចំពោះការប្រមាថមើលងាយលោក មួយថ្ងៃបន្ទាប់ពីពួកសកម្មជនគណបក្សប្រឆាំងនិយាយថាសិល្បការនីអ៊ីរ៉ង់ម្នាក់ក៏បានត្រូវកាត់ទោសដោយការវាយ៩០រំពាត់ចំពោះតួនាទីរបស់នាងនៅក្នុងខ្សែភាពយន្តមួយដែលរិះគន់រដ្ឋាភិបាល។ សហរដ្ឋអាមេរិក៖ ការកាត់ទោសអតីតមន្រ្តីយោធាសូវៀតម្នាក់ដែលគេចាត់ថាជាអ្នកជំនួញមរណភាពបានត្រូវគេកំណត់ចាប់ផ្តើមធ្វើនៅថ្ងៃអង្គារក្នុងទីក្រុងញូយ៉កដោយមានគណៈវិនិច្ឆ័យជ្រើសរើស។ សហរដ្ឋអាមេរិក៖ ប្រធានាធិបតីសហរដ្ឋអាមេរិក បារ៉ាក់អូបាម៉ា មានប្រសាសន៍ថា លោកបានរង់ចាំសមាជិកសភាដើម្បីជួយលោកក្នុងការជំរុញសេដ្ឋកិច្ចឲ្យជឿនលឿនទៅមុខ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
