VOA News: ព័ត៌មាន: “ភាពចម្រូងចម្រាសរវាងសហព្រះរាជអាជ្ញាចំពោះការស៊ើបអង្កេតសំណុំរឿង០០៣” plus 5 more |
- ភាពចម្រូងចម្រាសរវាងសហព្រះរាជអាជ្ញាចំពោះការស៊ើបអង្កេតសំណុំរឿង០០៣
- អ្នកជំនាញនិងជនសង្ស័យប្រតិកម្មចំពោះទស្សនៈចម្រូងចម្រាស់ក្នុងសាលាក្តីខ្មែរក្រហម
- រដ្ឋសភាកម្ពុជាធ្វើវិសោធនកម្មច្បាប់បោះឆ្នោត
- សហព្រះរាជអាជ្ញានៃសាលាក្តីខែ្មរក្រហមខែ្វងគំនិតគ្នាលើបទឧក្រិដ្ឋកម្មសង្រ្គាមសំណុំរឿង០០៣
- អតីតព្រះរាជអាជ្ញាជាប់ពន្ធនាគារ១៩ឆ្នាំ
- លោករាជ សម្បតិ្តលាចាកលោក តែគុណសម្បត្តិ និងស្នាដៃរបស់លោកនៅតែត្រូវបានចងចាំ
| ភាពចម្រូងចម្រាសរវាងសហព្រះរាជអាជ្ញាចំពោះការស៊ើបអង្កេតសំណុំរឿង០០៣ Posted: 13 May 2011 02:35 PM PDT កាលពីថ្ងៃច័ន្ទ និងថ្ងៃអង្គារដើមសប្ដាហ៍នេះ សហព្រះរាជអាជ្ញាជាតិ និងអន្ដរជាតិបានបង្ហាញជំហរខ្វែងគ្នាសាជាថ្មីចំពោះសំណុំរឿង០០៣។ សហព្រះរាជអាជ្ញាអន្ដរជាតិ លោក អ៊ែនឌ្រូ ខេលី (Andrew Caley) បានស្នើឲ្យសហចៅក្រមស៊ើបអង្កេតធ្វើការបន្ថែមទៀតលើសំណុំរឿងនេះ ហើយបានស្នើឲ្យបង្ហាញព័ត៌មានជាច្រើន ទៀតដែលមានសារៈសំខាន់សម្រាប់មហាជន ដែលព័ត៌មាននោះរួមបញ្ចូលទាំងអត្តសញ្ញណជនសង្ស័យទៀតផង។ ក៏ប៉ុន្ដែសហព្រះរាជអាជ្ញាជាតិលោកស្រី ជា លាង បានជំទាស់ថា ជនជាប់សង្ស័យដែលគេមិនទាន់ស្គាល់អត្តសញ្ញាណជាផ្លូវការនៅឡើយនោះថា ពួកគេមិនស្ថិតក្នុងយុត្តាធិការសម្រាប់នាំខ្លួនយកមកកាត់ទោសទេហើយការកាត់ទោសសំណុំរឿងចំនួនពីរ ដែលកំពង់តែដំណើរការនៅក្នុងពេលបច្ចុប្បន្ននេះគឺគ្រប់គ្រាន់ហើយ។ អ្នកសង្កេតដំណើរការសាលាក្ដីខ្មែរក្រហមបញ្ជាក់ថា ការជំទាស់របស់ភាគីកម្ពុជានៅពេលដែលសហចៅក្រមស៊ើបអង្កេតបានប្រកាសអំពីការបិទបញ្ចប់ការស៊ើបអង្កេតនៅក្នុងសំណុំរឿង០០៣នេះ គឺបង្ហាញឲ្យឃើញថា ភាគីជាតិនៅក្នុងសាលាក្ដីខ្មែរក្រហម ដើរតាមលំអាននយោបាយរដ្ឋាភិបាលកម្ពុជា។ ជំហរបែបនេះគឺជាឧបសគ្គមួយដែលធ្វើឲ្យសំណុំរឿង០០៣ និង០០៤ មានភាពមិនច្បាស់លាស់។ បណ្ឌិតឡៅ ម៉ុងហៃ មានប្រសាន៍នៅថ្ងៃសុក្រនេះថា ភាពចម្រូងចម្រាស់ដោយសារតែរដ្ឋា ភិបាលកម្ពុជាជ្រៀតចូលកិច្ចការផ្ទៃក្នុងរបស់សាលាក្ដីខ្មែរក្រហម។ លោកបានបា្រប់វីអូអេខ្មែរថា៖ «ខ្ញុំថា រឿងនេះមានការពិបាកនឹងបដិសេធថា អត់មានការជ្រៀតជ្រែក ពីព្រោះជហររបស់រាជ រដ្ឋាភិបាលហើយនឹងជំហររបស់សហព្រះរាជអាជ្ញាកម្ពុជាដូចអត់ខុសគ្នា។ ដូចកន្លែងខ្លះខ្ញុំស្តាប់ទៅដូច សម្តីតែមួយ»។ ការលើកឡើងពីការជ្រៀតជ្រែករបស់រដ្ឋាភិបាលកម្ពុជាក្នុងការកាត់ទោសអតីតមេដឹកនាំជាន់ខ្ពស់ខ្មែរក្រហមមិនមែនជាលើកទី១ទេ។ ការចោទប្រកាន់បែបនេះបានក្លាយជាកង្វល់មួយសម្រាប់ការកាត់ទោសអតីតមេដឹកនាំខ្មែរក្រហម។ លោក ឡៅ ម៉ុងហៃ មើលឃើញថា ប្រសិនបើការជ្រៀតជ្រែកបែបនេះនៅតែបន្ដ វានឹងអាចធ្វើឲ្យប៉ះពាល់ដល់ការកាត់ទោសសំណុំរឿង០០៣ ហើយថាតើការកាត់ក្ដីក្នុងសំណុំរឿងនេះអាចនឹងកើតមានដែរឬទេ។ លោកហង្ស ឆាយ៉ា នាយកប្រតិបត្តិនៃវិទ្យាសា្ថនខ្មែរដើម្បីលទ្ធិប្រជាធិបតេយ្យយល់ឃើញថា ការជំទាស់របស់រដ្ឋាភិបាលកម្ពុជា និងភាគីកម្ពុជានៅក្នុងសាលាក្ដីខ្មែរក្រហមដោយសារតែការភ័យខ្លាចចំពោះផលប៉ះពាល់ដល់គោលនយោបាយផ្សះផ្សារជាតិ បន្ទាប់ពីរដ្ឋាភិបាលខ្មែរបានចុះកិច្ចសន្យាជាមួយពួកខ្មែរក្រហមដើម្បីបញ្ចប់សង្រ្គាមនៅឆ្នាំ១៩៩៨។ លោកបន្តថា៖ «ត្រូវប្រយ័ត្នដែរពីព្រោះផ្នែកខាងយោធាអតីតខ្មែរក្រហម គឺមាននៅក្នុងហ្នឹង ហើយគេមិនចង់ឲ្យមានការប៉ះពាល់អារម្មណ៍ ឬក៏អ្វីដោយសារការលើកឡើងក្នុងសំណុំរឿង០០៣ និង០០៤ ដោយប៉ះ ពាល់ និងអ្វីដែលរដ្ឋាភិបាលបានធ្វើតាំងពីឆ្នាំ១៩៩៨»។ លោកនាយករដ្ឋមន្ដ្រី ហ៊ុន សែន ធ្លាប់បានថ្លែងប្រាប់លោកអគ្គលេខាធិការអង្គការសហប្រជាជាតិបាន គីមួន ថា កម្ពុជាមិនត្រូវការកាត់ទោសជនសង្ស័យក្នុងសំណុំរឿង០០៣ និង០០៤ទេ។ រដ្ឋាភិបាលកម្ពុជា និងសហព្រះរាជអាជ្ញាជាតិធ្លាប់បានលើកឡើងថា ការចាត់ការសំណុំ រឿងទាំងនេះអាចនឹងបំផ្លាញសន្ដិសុខជាតិដ៏ផុយស្រួយ។ អ្នកនាំពាក្យសាលាក្ដីខ្មែរក្រហមទាំងពីររូបគឺលោក ឌឹម សុវណ្ណារុំ និងលោក ឡាស អលសិន (Lars Olsen) មានប្រសាសន៍ថា ការចេញសេចក្ដីថ្លែងការណ៍ខ្វែងគ្នារវាងសហព្រះរាជអាជ្ញានៅក្នុងសាលាក្ដីខ្មែរក្រហមនៅពេលនេះ គឺគ្រាន់តែជាសេចក្ដីថ្លែងការណ៍ផ្ទាល់ខ្លួនរបស់ពួកគាត់ ហើយនឹងមិនអាចរារាំងការសម្រេចនៅពេលខាងមុខរបស់សហចៅក្រមស៊ើបអង្កេតនោះទេ។ លោក ឌឹម សុវណ្ណារុំ បញ្ជាក់ថា ទោះជាមានការសម្រេចយ៉ាងណារបស់សហចៅក្រមស៊ើបអង្កេតនៅពេលខាងមុខនេះ សហព្រះរាជអាជ្ញាដែលមិនពេញចិត្តអាចនឹងប្ដឹងឧទ្ធរណ៍បាន។ ឡោកបានបញ្ជាក់ថា៖ «នីតិវិធីបន្តគឺជាការងាររបស់ការិយាល័យសហចៅក្រមស៊ើបអង្កេត តើការិយាល័យសហចៅ ក្រមស៊ើបអង្គេត និងឆ្លើយទៅតាមការស្នើសុំនេះយ៉ាងដូចម្តេច វិជ្ជាមាន ឬក៏បដិសេធ។ សហព្រះរាជ អាជ្ញាអាចប្តឹងទៅសាលាឧទ្ឋរណ៍ អង្គបូរេជំនុំជម្រះ ហើយសូមជម្រាបថា អ្វីដែលបានប្រកាសកន្លងមកគ្រាន់តែជាសេចក្តីថ្លែងការណ៍របស់សហព្រះរាជអាជ្ញាជាតិ និងសហព្រះរាជអាជ្ញាអន្តរជាតិ»។ រហូតមកទល់ពេលនេះ ជនសង្ស័យក្នុងសំណុំរឿង០០៣ នៅតែមិនទាន់ត្រូវបានបង្ហាញជាសាធារណៈនៅឡើយ។ ក៏ប៉ុន្ដែបើយោងតាមការបង្ហាញក្រៅផ្លូវការ ជនសង្ស័យអាចមានចំនួនពីរនាក់ដែលគេស្គាល់ថា ជាអតីតមេបញ្ជាការកងទព័ជើងទឹកខ្មែរក្រហមលោកមាស មុត និងលោក ស៊ូ ម៉េត អតីតមេបញ្ជាការកងទ័ពអាកាស។ លោក ឡៅ ម៉ុងហៃ មានប្រសាសន៍ថា ការសម្រេចលើសំណុំរឿង ០០៣ យ៉ាងណានោះនឹងជះឥទ្ធិពលដល់ការដោះស្រាយសំណុំរឿង០០៤ ដែលស្ថិតក្នុងភាពចម្រូងចម្រាស់ដូចគ្នា។ ជនសង្ស័យក្នុងសំណុំរឿងចុងក្រោយនេះមានចំនួនបីនាក់។ លោកស្រី គ្លែរ ដាហ្វី (Clair Duffy) អ្នកសម្របសម្រួលរបស់អង្គការសង្គមយុត្តិធម៌សង្គមសេរី (OSJI) នៅកម្ពុជា និងដែលជាអ្នកឃ្លាំមើលដំណើរការសាលាក្ដីខ្មែរក្រហមមួយរូបមានប្រសាសន៍ប្រកបដោយការព្រួយបារម្ភថា សំណុំរឿង ០០៣ និង០០៤ នៅតែមានលទ្ធភាពត្រូវទាត់ចោលដោយសាលាក្ដីខ្មែរក្រហម។ ក៏ប៉ុន្ដែលោកស្រី គ្លែរ ដាហ្វ៊ី ទាមទារថា បើទោះជាហេតុផលបែបណាក៏ដោយ សាលាក្ដីខ្មែរក្រហមត្រូវតែបង្ហាញអំពីតម្លាភាពរបស់ខ្លួន។ សូមបញ្ជាក់ថា ក្នុងអំឡុងពេលដែលកំពង់រង់ចាំការដោះស្រាយសំណុំរឿង០០៣ សាលាក្ដីខ្មែរក្រហមគ្រោងនឹងប្រកាសសាលដីកាលើការកំណត់ទោសឌុច ដែលជាអតីតប្រធានគុកទួលស្លែងជាចុងក្រោយនៅខែក្រោយនេះ។ ជាមួយគ្នានេះដែរ សវនាការបឋមក្នុងសំណុំរឿង០០២ ដែលមានជនជាប់ចោទចំនួនបួននាក់ ដែលសុទ្ធសឹងជាអតីតមេដឹកនាំកំពូលខ្ពស់បំផុតខ្មែរក្រហមនឹងត្រូវធ្វើឡើងចាប់ពីថ្ងៃទី២៧រហូតទៅដល់ថ្ងៃទី៣០ខែក្រោយនេះដែរ។ បន្ទាប់មកការកាត់ទោសពេញអង្គនឹងអាចប្រព្រឹត្តិនៅខែសីហា ឬខែកញ្ញា ឆ្នាំ២០១១នេះ៕ This posting includes an audio/video/photo media file: Download Now |
| អ្នកជំនាញនិងជនសង្ស័យប្រតិកម្មចំពោះទស្សនៈចម្រូងចម្រាស់ក្នុងសាលាក្តីខ្មែរក្រហម Posted: 13 May 2011 02:24 PM PDT ក្រុមអ្នកឃ្លាំមើលនៅស.រ.អា.និងជនសង្ស័យមានប្រតិកម្មចំពោះការប្រទាញប្រទង់ចុងក្រោយមួយក្នុងសាលាក្តីខ្មែរក្រហម ដែលចូលរួមដោយអ.ស.ប.ទាក់ទងនឹងការនាំខ្លួនជនសង្ស័យបន្ថែមមកជំនុំជម្រះទោស។ ការទាត់ចោល ឬក៏ការនាំខ្លួនពួកអតីតមេដឹកនាំខ្មែរក្រហមបន្ថែម៥នាក់ទៀត ក្នុងសំណុំរឿងលេខ០០៣ និង០០៤ មកជំនុំជម្រះទោស បានក្លាយជាការមិនចុះសម្រុងគ្នាជាថ្មីទៀតរវាងសហព្រះរាជអាជ្ញាខ្មែរ និងបរទេស ដោយសំអាងហេតុ ផលរៀងៗខ្លួន។ ក៏ប៉ុន្តែ ការប្រទាញប្រទង់ចុងក្រោយនេះបង្កឲ្យមានប្រតិកម្មពីក្រុមអ្នកឃ្លាំមើលសាលាក្តីក្នុងប្រទេសអាមេរិក និងជនដែលគេចាត់ទុកថា ជា ជនសង្ស័យបន្ថែមក្នុងសំណុំរឿងទាំងនេះផងដែរ។ សហព្រះរាជអាជ្ញាបរទេសលោក អាន់ឌ្រូ ឃេលី (Andrew Cayley) បានចាត់ទុក ថា សំណុំរឿង០០៣ និង០០៤ ស្ថិតក្នុងយុត្ថាធិការនៃសាលាក្តីខ្មែរក្រហម ហើយលោកបង្ហាញឲ្យឃើញនូវបទឧក្រិដ្ឋកម្មនានា ការកាប់សម្លាប់ ការធ្វើទារុណកម្ម ដាក់គុក អំពើអមនុស្សធម៌ផ្សេងៗ ខណៈពេលដែលលោកចង្អុលបង្ហាញចំៗទៅលើទីតាំងជាច្រើននៃឧក្រិដ្ឋកម្មដែលបានកើតឡើង។ លោកឃេលីបានអះអាងថា លោកនឹងស្នើសុំឲ្យសហចៅក្រមស៊ើបអង្កេតកោះហៅនិងសួរចម្លើយជនសង្ស័យនានា ពិនិត្យបន្ថែមទៅលើទីតាំងឧក្រិដ្ឋកម្ម កន្លែងកប់សាកសព ស្តាប់ចម្លើយសាក្សី ដាក់ភស្តុតាងបន្ថែមក្នុងសំណុំរឿង ទោះបីជាសហចៅក្រមស៊ើបអង្កេតបានជូនដំណឹងអំពីការបញ្ចប់ការស៊ើបសួរសំណុំរឿង០០៣ ហើយលោក មានពេលតែ១៥ថ្ងៃក៏ដោយ។ ទោះជាយ៉ាងណាក៏ដោយ អំឡុងពេលសហចៅក្រមស៊ើបអង្កេតកំពុងរង់ចាំការស្នើសុំពីលោកអាន់ឌ្រូ ឃេលី សហព្រះរាជអាជ្ញាអន្តរជាតិនោះ លោកស្រីជា លាង សហព្រះរាជអាជ្ញាជាតិ បានបង្ហាញជំហរ ជំទាស់នឹងដៃគូរបស់លោកស្រី ដោយនិយាយថា ជនសង្ស័យមានឈ្មោះក្នុងសំណុំរឿង០០៣មិនមែនជាមេដឹកនាំជាន់ខ្ពស់ និងមិនមែនជាអ្នកទទួលខុសត្រូវខ្ពស់បំផុត ហេតុដូច្នេះមិនស្ថិតនៅក្នុងយុត្ថាធិការដែលសាលាក្តីខ្មែរក្រហមត្រូវយកមកធ្វើការកាត់សេចក្តីឡើយ។ ការជំទាស់របស់លោកស្រីជា លាងត្រូវគេគិតថា ស្របជាមួយនឹងជំហររបស់លោកនាយករដ្ឋមន្ត្រីហ៊ុន សែន ដែលរារាំងការនាំខ្លួនជនសង្ស័យបន្ថែមទៀតមកកាត់ទោស ដោយឈរលើហេតុផលថា វាអាចប៉ះពាល់ដល់សន្តិភាព។ ចំហរនេះផ្ទុយពីការយល់ឃើញរបស់ភាគីអ.ស.ប.ដែលចង់រកយុត្តិធម៌ជូនជនរងគ្រោះ។ លោក Jame Goldston នាយកអង្គការច្បាប់មួយមានមូលដ្ឋាននៅស.រ.អា. ឈ្មោះ Open Society Justice Initiative (OSJI) បានចាត់ទុកថា ជំហរផ្ទុយគ្នារបស់សហព្រះរាជអាជ្ញានោះទំនងជាការសម្រចចិត្តតាមការជំរុញផ្នែកនយោបាយ ការសើរើឡើងវិញដដែលៗនូវជំហររបស់រដ្ឋាភិបាលកម្ពុជាជាលទ្ធផលដែលគេអាចកំណត់ទុកជាមុន ដែលលោកបញ្ជាក់ថា ជាសេចក្តីរាយការណ៍គួរឲ្យបារម្ភ។ «ប្រសិនបើរឿងនេះត្រូវបញ្ជាក់មែន សេចក្តីរាយការណ៍ទាំងនេះអាចនឹងធ្វើឲ្យ ខូចខាតដល់មុខមាត់ និងការណ៍ពិតនៃឯករាជ្យភាព ហើយនឹងភាពមិនលំអៀង។ ឯករាជ្យភាពនិងភាពមិនលំអៀងនេះគឺជារឿងសំខាន់ចំពោះសុចរិតភាពនៃតុលាការទាំងឡាយ»។ លោកGoldstonបានអះអាងថា សាលាក្តីខ្មែរក្រហមពុំបានធ្វើឲ្យសំណុំរឿងលេខ០០៣និង០០៤មានតម្លាភាពទេ ដែលលោកចាត់ទុកថា គឺជាបញ្ហារំខាន។ «អ្វីដែលយើងដឹងប្រាកដនោះគឺថា មិនមានការស៊ើបអង្កេតត្រូវបានធ្វើឡើងនៅ ឯទីតាំងផ្ទាល់ទេ ក្នុងសំណុំរឿងទាំងនេះ ហើយក៏គ្មានជនសង្ស័យណាត្រូវសាក សួរដែរ។ រឿងនេះទំនងជាមានការខ្វះចន្លោះខ្លាំងក្នុងការបំពេញតាមបទដ្នាន អន្តរជាតិនានា ចំពោះការស៊ើបអង្កេតលើបទឧក្រិដ្ឋ»។ លោកPeter Maguire ជាសាស្ត្រាចារ្យនៃសាកលវិទ្យាល័យក្នុងប្រទេសអាមេរិក និងជាអ្នកនិពន្ធសៀវភៅ «Facing Death in Cambodia» ដែលសរសេរអំពីរបប ខ្មែរក្រហម។ លោកបានអះអាងថា៖ តុលាការខ្មែរក្រហម ដែលចូលរួមដោយ អ.ស.ប. មិនដំណើរការល្អទេ គឺវាស្ថិតក្រោមសម្ពាធរបស់រដ្ឋាភិបាល។ លោកថ្លែងថា ជាការឆាប់ពេក ដែលនិយាយអំពីការកាត់ទោសជនសង្ស័យបន្ថែមទៀតនៅពេលនេះ។ «នៅទីបំផុតអ.ស.ប.នឹងលោត នៅពេលលោកនាយករដ្ឋមន្ត្រីហ៊ុន សែនប្រាប់ឲ្យ ពួកគេលោត។ តែសំណើរបស់ពួកគេជាអង្គហេតុដែលបានបង្កើតឡើងយ៉ាងល្អក្នុងដំណាក់កាលនេះ»។ លោកបានបន្ថែមដែរថា លទ្ធផលចុងក្រោយគឺជារឿងងាយទេគឺថា ប្រសិនបើ តុលាការខ្មែរក្រហមមិនអាចកាត់ទោសមេដឹកនាំខ្មែរក្រហមកំពូលៗ នៅពេលដែលពួកគេនៅរស់ ដូច្នេះជារឿងយុត្តិធម៌ណាស់ក្នុងការវិនិច្ឆ័យថា តុលាការចម្រុះនេះធ្វើកំប្លុកកំប្លែងតាមនីតិវិធី ដែលមិនគួរត្រូវព្យាយាមធ្វើតទៅទៀតនោះ។ លោក David Tolbert ជានាយកអង្គការច្បាប់របស់ស.រ.អា.មួយឈ្មោះមជ្ឈមណ្ឌល អន្តរជាតិសម្រាប់យុត្តិធម៌អន្តរកាល (ICTJ) ហើយធ្លាប់ជាអ្នកជំនាញការពិសេស នៃអ.ស.ប.សម្រាប់កិច្ចការខ្មែរក្រហម។ លោកបានប្រាប់ VOA ខេមរៈភាសាតាមរយៈអ៊ីម៉េលថា៖ យោងទៅតាមឧក្រិដ្ឋកម្មដែលបានកើតឡើង ភាគីព្រះរាជអាជ្ញាអន្តរជាតិទំនងជាមានសំអាងមាំទាំ។ ក៏ប៉ុន្តែនៅពេលមានការមិនចុះសម្រុងគ្នារវាងសហព្រះរាជអាជ្ញាទាំងពីរនោះ ការសម្រេចចុងក្រោយគឺស្ថិតនៅលើអង្គបុរេ ដែលមានចៅក្រមខ្មែរ៣រូប និងបរទេស២រូប។ លោកបានអះអាងថា៖ «យើងនឹងត្រូវពិនិត្យមើលថា តើអ្វីនឹងកើតមានឡើង។ ក៏ប៉ុន្តែវាបានបង្ហាញចេញមកហើយថា សហព្រះរាជអាជ្ញាអន្តរជាតិមានអំណះអំណាងខ្លាំងដែលថា ជនសង្ស័យក្នុងករណី០០៣ និង០០៤ ឋិតក្នុងលក្ខណៈវិនិច្ឆ័យជាជនទទួលខុសត្រូវខ្ពស់បំផុត»។ ជនសង្ស័យ៥នាក់នេះស្ថិតនៅក្នុងសំណុំរឿង០០៣និង០០៤។ ឈ្មោះជនទាំង៥នាក់នេះត្រូវអ្នកដាក់ពាក្យតាំងខ្លួនជាដើមបណ្តឹងរដ្ឋប្បវេណីគឺកញ្ញាសេង ធារី បង្ហាញក្រៅផ្លូវការថ្មីៗនេះ មុនពេលតុលាការប្រកាសដឹង។ អ្នកទាំង៥នាក់នេះរួមមានលោកស៊ូ ម៉េត ដែលត្រូវគេស្គាល់ថា ជាអតីតមេបញ្ជាការទ័ពអាកាសខ្មែរក្រហម លោកមាស មុត ជាអតីតមេបញ្ជាការកងទ័ពជើងទឹក អ្នកស្រីអ៊ឹម ចែម ជាអតីតគណៈស្រុកព្រះនេតព្រះ តាអាន អតីតមេបញ្ជាការតំបន់៤១នៅកំពង់ធំ និងតា ទិត អតីតមេបញ្ជាការតំបន់១៣ នៅគីរីវង្ស ខេត្តតាកែវ។ ជនទាំង២នាក់ក្នុងចំណោម៥នាក់ ដែលវីអូអេអាចទាក់ទងបាននោះ បានបដិសេដថា ខ្លួនមិនជាប់ពាក់ព័ន្ធនឹងអំពើឧក្រិដ្ឋកម្មដែលកើតឡើងក្នុងសម័យខ្មែរក្រហមទេ។ អ្នកស្រីអ៊ឹម ចែមបានថ្លែងប្រាប់ VOA តាមទូរស័ព្ទកាលពីថ្ងៃអង្គារ ដោយអះអាងថា៖ អ្នកស្រីគ្មានក្តីបារម្ភទេ ដោយសារមិនមានអ្វីពាក់ព័ន្ធនឹងការចោទប្រកាន់នានា ហើយម្យ៉ាងទៀតអ្នកស្រីអះអាងថា រដ្ឋាភិបាលលោក នាយករដ្ឋមន្ត្រីហ៊ុន សែនផ្តល់ការជឿជាក់ថា នឹងមិនយកអ្នកផ្សេងបន្ថែមទៀតទៅតុលាការជំនុំជម្រះទោសទេ។ «តែខាងសម្តេចនាយកហ៊ុន សែនគាត់ការពារ។ គាត់ថា ឲ្យយកតែ៥នាក់មុនប៉ុណ្ណឹងទេ។ កុំព្រួយកុំ(ភ័យ)អី អត់ឲ្យយកទៀតទេណា៎។ អញ្ចឹងហើយគេទុកចិត្តគាត់។ ពាក្យគាត់ហ្នឹង គាត់ដូចថា នៅចាំការពារពាក្យគាត់រហូត ហើយធ្វើឲ្យប្រជាពលរដ្ឋកក់ក្តៅចំពោះគាត់ដែរ»។ អ្នកស្រីអ៊ឹម ចែមជាសមាជិកក្រុមប្រឹក្សាឃុំមួយរូបខាងគណបក្សប្រជាជនកម្ពុជា ក្នុងស្រុកអន្លង់វែង ខេត្តឧត្តរមានជ័យ ដែលជាអតីតតំបន់រឹងមាំចុងក្រោយរបស់ខ្មែរក្រហម។ អ្នកស្រីព្រមានថា ការនាំខ្លួនជនសង្ស័យបន្ថែមទៀតទៅកាន់តុលាការនឹងនាំឲ្យ មានអស្ថិរភាព ដោយសារ មានបងប្អូន កូនចៅ អ្នកភូមិជាច្រើននាំគ្នាចូលធ្វើយោធាការពារទឹកដីប្រឆាំងនិងកងទ័ពថៃនៅតាមព្រំដែន។ អ្នកស្រីចែមបាន បញ្ជាក់ថា អ្នកស្រីមិនធ្លាប់ត្រូវតុលាការកោះហៅទៅសាកសួរទេ។ អ្នកស្រីបញ្ជាក់ថា ទោះមានការកោះហៅពីតុលាការ ក៏អ្នកស្រីនឹងមិនទៅបំភ្លឺដែរ។អ្នកស្រីសំអាងថា អ្នកស្រីមិនបានដឹងរឿងអ្វីក្នុងសម័យខ្មែរក្រហមទេ។ «ខ្ញុំបកស្រាយកាលជំនាន់នោះ ព្រោះអី ពេលប្រទេសកម្ពុជាទាំងមូលកើតសង្រ្គាមគឺខ្មែរក្រហមទាំងអស់គ្នាហ្នឹង។ រីឯបញ្ហាពាក់ព័ន្ធនយោបាយអី ខ្ញុំអត់ដឹងដែរ។ ខ្ញុំនៅក្រោមបញ្ជា ក្រោមការដឹកនាំរបស់គេដែរ»។ លោកមាស មុតបានថ្លែងប្រាប់ VOA ផ្នែកខេមរភាសា ដោយអះអាងថា លោក មិនមានការទាក់ទងនឹងអំពើឧក្រិដ្ឋកម្មទេ ហើយក៏ពុំធ្លាប់ត្រូវកោះហៅទៅសាក សួរអ្វីដែរ។ លោកបានព្រមានដែរថា បើមានការចាប់ខ្លួនលោកទៅកាន់តុលាការនោះ វានឹងមានអស្ថិរភាព ព្រោះថា អតីតកងទ័ពខ្មែរក្រហម ដែលកំពុងការពារ ទឹកដីជាមួយថៃនៅសមរភូមិជាយដែន នឹងមិនសុខចិត្តទេ។ «ខ្ញុំឃើញអញ្ចេះថា ដោយសារស្ថានភាពតាមព្រំដែនក៏វាមិនទាន់ជាល្អណាស់ ណា ហើយកិច្ចការងារអភិវឌ្ឍប្រទេសជាតិក៏វាកំពុងដំណើរការល្អ ហើយប្រសិនណាយើងមានការកកូរកកាយអញ្ចឹង ទោះតិច ទោះច្រើន វានឹងប៉ះហើយដល់អារម្មណ៍របស់កម្លាំងមួយចំនួននៅក្នុងកងខេមរភូមិន្ទដែលកំពុងតែឈរជើង ធ្វើជារបងការពារនៅតាមព្រំដែន ណា៎។ ឯចំពោះផ្ទាល់ខ្លួនខ្ញុំ ខ្ញុំមែនទែន ខ្ញុំអត់មានការព្រួយបារម្ភអីទេ ពីព្រោះអី ពីព្រោះខ្ញុំធ្វើកន្លងមក តស៊ូកន្លងមក ក៏ដើម្បីជាតិ ដើម្បីប្រជាជន ហើយខ្ញុំអត់ដែលទៅប្រឆាំង អត់ដែលទៅវ៉ៃតប់អីនរណាក្រៅពីពួកដែលមករំលោភឈ្លានពានទឹកដីរបស់ខ្លួនទេ។ ហើយបើគេចោទខ្ញុំពីបទឧក្រិដ្ឋកម្មសង្គ្រាមអីៗ ខ្ញុំយល់ឃើញថា អញ្ចឹងអ្នកការពារទឹកដីប្រទេសតូចតាច ដែលប្រឈមមុខការពារទឹកដី អាហ្នឹងសុទ្ធតែឧក្រិដ្ឋកម្មសង្គ្រាមទាំងអស់ឬ? ហើយនែ អាមេរិកទម្លាក់គ្រាប់បែកលើស្រុកខ្មែរប្រាំសែនតោន នៅស្រុកយួន១លាន៥ ឬ ៦សែនតោន ហ្នុងវាមិនឧក្រិដ្ឋសង្រ្គាមផង? មកឧក្រិដ្ឋកម្មសង្រ្គាមអីតែខ្មែរ ការពារទឹកដីរបស់ខ្លួន? អាហ្នឹងខ្ញុំយល់ឃើញអញ្ចឹង»។ លោកមាស មុតថ្លែងយ៉ាងដូច្នេះក្រោយពីលោកបានទទួលទូរស័ព្ទទាក់ទងមក រូបលោកជាច្រើននៅពេលប៉ុន្មានថ្ងៃចុងក្រោយនេះ។ ពួកគេជាអ្នកធ្លាប់ស្គាល់លោក ជាអ្នកធ្លាប់នៅក្រោមបង្គាប់ ជាទាហ៊ានដែលបាន ឮការផ្សព្វផ្សាយព័ត៌មានអំពីការប៉ុនប៉ងនាំខ្លួនពួកអតីតកម្មាភិបាលខ្មែរក្រហមទៅតុលាការ។ លោកមាស មុតជាអតីតទីប្រឹក្សាក្រសួងការពារជាតិ មានឋានន្តរសក្តិឧត្តមសេនីយ៍ទោ។ លោកបានចូលនិវត្តមួយឆ្នាំមកហើយ។ លោកMark Wenig អ្នកនាំពាក្យស្ថានទូតស.រ.អា.ប្រចាំប្រទេសកម្ពុជាបានថ្លែងថា ស.រ.អា.ប្តេជ្ញាជួយដល់ប្រទេសកម្ពុជាដើម្បីជំនុំជម្រះទោសជនទាំងឡាយណាដែលជាមេដឹកនាំជាន់ខ្ពស់ ជាអ្នកទទួលខុសត្រូវខ្ពស់បំផុតនៃអំពើឃោរឃៅនានា។ «យើងគោរពតាមកិច្ចប្រឹងប្រែងបន្តរបស់សាលាក្តីដើម្បីនាំមកនូវយុត្តិធម៌សម្រាប់ជនរងគ្រោះ ហើយនឹងធ្វើឲ្យប្រសើរឡើងនូវការគោរពច្បាប់ ហើយនឹងជំនឿទុកចិត្តលើសុចរិតភាពនៃដំណើរការច្បាប់របស់តុលាការ»។ទោះជាយ៉ាងណាក៏ដោយ នៅក្នុងសេចក្តីប្រកាសព័ត៌មានកាលពីថ្ងៃ១២ឧសភា កញ្ញាសេង ធារីប្រធានសមាគមជនរងគ្រោះកម្ពុជា បានរិះគន់មន្ត្រីតុលាការខ្មែរក្រហមផ្នែកអ.ស.ប.ទាក់ទងនឹងចំណាត់ការមិនសមរម្យសម្រាប់ជនរងគ្រោះ។ កញ្ញាសុំឲ្យមន្ត្រីកំពូលរបស់អ.ស.ប.ប្រចាំសាលាក្តីគឺលោកKnut Rosandhaug និងលោក Siegfried Blunk សហចៅក្រមស៊ើបអង្កេតអន្តរជាតិ ចុះចេញពីតំណែង។ មានជនរងគ្រោះមិនដល់៥នាក់ផងដែលបានដាក់ពាក្យតាំងខ្លួនជាដើមបណ្តឹង រដ្ឋប្បវេណី ក្នុងរយៈពេលតក់ក្រហល់ ដែលជនរងគ្រោះមានពេលដល់ត្រឹមថ្ងៃទី១៨ ឧសភាប៉ុណ្ណោះ ដើម្បីដាក់ពាក្យប្តឹងតាំងខ្លួនជាដើមបណ្តឹងរដ្ឋប្បវេណី។ ជនរងគ្រោះមិនត្រូវគេប្រកាសឲ្យដឹងពីដំណើរការនីតិវិធីក្នុងករណីនេះ ដូចក្នុងករណី០០១ និង០០២ទេ។ លោកJame Goldstone បានអះអាងថា ជនរងគ្រោះមិនត្រូវគេប្រាប់ឲ្យដឹងដើម្បី ត្រៀមខ្លួនចូលរួមនោះទេ ដែលលោកសង្កត់ធ្ងន់ថា នេះជាបញ្ហា។ «ចំពោះហេតុផលទាំងឡាយនេះ ជនរងគ្រោះនៃឧក្រិដ្ឋកម្មនានា ដែលត្រូវស៊ើបអង្កេតក្នុងសំណុំរឿងលេខ០០៣ និង០០៤ គួរមានព័ត៌មាននិងឱកាសគ្រប់គ្រាន់ដើម្បីចូលរួម។ យើងសង្ឃឹមថា តុលាការនឹងផ្តល់ការយល់ព្រមនឹងសំណើរបស់សហព្រះរាជអាជ្ញាអន្តរជាតិ ដើម្បីបន្តពន្យាពេលសម្រាប់ជនរងគ្រោះដាក់ពាក្យសុំរបស់គេដើម្បីឲ្យមានការពិចារណានេះ»។ លោកDavid Toldbert បានសង្កេតឃើញថា មានការចាត់ចែងមិនត្រឹមត្រូវចំពោះ បញ្ហាជនរងគ្រោះ ដែលលោកបានអះអាងតាមប្រសាសន៍ដើមរបស់លោកថា៖ វាជារឿងចំអកមួយ ប្រសិនបើការចូលរួមរបស់ជនរងគ្រោះត្រូវគេរិតត្បិតក្នុងបរិបទនេះ។ នៅពាក់កណ្តាលឆ្នាំ២០១១នេះ សាលាក្តីកាត់ទោសខ្មែរក្រហមគ្រោងនឹងកាត់ ទោសករណី០០២ ដែលមានអតីតមេដឹកនាំកំពូលៗ៤នាក់ ហើយដែលកំពុងជាប់ឃុំឃាំងពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មប្រល័យពូជសាសន៍។ ជនទាំង៤នាក់នោះមាន នួន ជា អៀង សារី ខៀវ សំផន អៀង ធីរិទ្ធ ដែលជាមេដឹកនាំរបបកម្ពុជាប្រជាធិបតេយ្យដែលទទួលខុសត្រូវចំពោះការស្លាប់ពលរដ្ឋខ្មែរស្លូតត្រង់ជិត២លាននាក់ក្នុងចន្លោះឆ្នាំ១៩៧៥ដល់១៩៧៩៕ This posting includes an audio/video/photo media file: Download Now |
| រដ្ឋសភាកម្ពុជាធ្វើវិសោធនកម្មច្បាប់បោះឆ្នោត Posted: 13 May 2011 08:26 AM PDT រដ្ឋសភាកម្ពុជាបានយល់ព្រមបង្កើនថ្ងៃថែមទៀតសម្រាប់ការពិនិត្យបញ្ជីឈ្មោះ ការចុះឈ្មោះអ្នកបោះឆ្នោត និងការប្តឹងតវ៉ាអំពីភាពមិនប្រក្រតីនៃការបោះឆ្នោត ដើម្បីធានាឱ្យបាននូវដំណើរការបោះឆ្នោតនៅកម្ពុជាឱ្យកាន់តែប្រសើរត្រឹមត្រូវ និងយុត្តិធម៌ជាងមុន។ ការយល់ព្រមលើការធ្វើវិសោធនកម្មចំនួន១៣មាត្រានៃច្បាប់បោះឆ្នោតតំណាងរាស្ត្រនេះ បានតម្រូវឱ្យការពិនិត្យបញ្ជីឈ្មោះ និងការចុះឈ្មោះអ្នកបោះឆ្នោត បានបង្កើនពីចំនួន១៥ថ្ងៃទៅ៣០ថ្ងៃ និងបានបង្កើនរយៈពេលនៃការប្តឹងតវ៉ា ឬការប្តឹងជំទាស់បញ្ជីឈ្មោះបោះឆ្នោតពី៥ថ្ងៃទៅ១០ថ្ងៃ សម្រាប់ការបោះឆ្នោតក្រុមប្រឹក្សាឃុំ សង្កាត់នៅឆ្នាំ២០១២ និងការបោះឆ្នោតតំណាងរាស្ត្រនៅឆ្នាំ២០១៣។ ការយល់ព្រមលើមាត្រា១៩០ថ្មីនៃច្បាប់បោះឆ្នោតក្រុមប្រឹក្សាឃុំសង្កាត់ បានផ្លាស់ប្តូរការកំណត់ថ្ងៃបោះឆ្នោតក្រុមប្រឹក្សាឃុំសង្កាត់ពីថ្ងៃអាទិត្យដើមខែមេសាមកថ្ងៃទី៣ ខែមិថុនា ឆ្នាំ២០១២។ លោក សក់ សេដ្ឋា រដ្ឋលេខាធិការក្រសួងមហាផ្ទៃ បានថ្លែងនៅក្នុងសម័យប្រជុំសភាថា ការធ្វើវិសោធនកម្មនេះគឺជាការបង្ហាញអំពីឆន្ទៈនយោបាយរបស់រដ្ឋាភិបាល និងរដ្ឋសភាសំដៅកែលម្អដំណើរការបោះឆ្នោត។ លោក កុយ ប៊ុនរឿន តំណាងរាស្ត្រគណបក្សសម រង្សី បានបញ្ជាក់យ៉ាងដូច្នេះថា៖ «កំណែទម្រង់នេះមិនមានអ្វីក្រៅពីពង្រឹងការចុះបញ្ជីឈ្មោះបោះឆ្នោតទេ។ វាមិនទាន់មានប្រសិទ្ធភាពទេ បើគណៈកម្មាធិការជាតិ រៀបចំការបោះឆ្នោតនៅតែរក្សាបញ្ជីឈ្មោះបោះឆ្នោតដដែល»។ លោកហង្ស ពុទ្ធា នាយកប្រតិបត្តិនៃគណៈកម្មាធិការអព្យាក្រិត្យ និងមិនលំអៀងនៅកម្ពុជា បានថ្លែងថា ការធ្វើវិសោធនកម្មនេះជាជំហានវិជ្ជមាន ប៉ុន្តែទាមទារឲ្យមានការពិនិត្យជាក់ស្តែងស្តីពីលទ្ធផលកើតចេញពីស្ថាប័នបោះឆ្នោតនេះ។ លោកបានប្រាប់វីអូអេខ្មែរថា៖ «ខ្ញុំគិតថា វាជាការធ្វើវិសោធនកម្មមួយសំដៅធ្វើឱ្យមានគុណភាពកាន់តែល្អឡើងនូវដំណើរការបោះឆ្នោត ក៏ដូចជាការចុះឈ្មោះបោះឆ្នោតដែរ។ សម្រាប់ការបន្ថែមថ្ងៃចុះឈ្មោះ និងការបន្ថែមថ្ងៃដោះស្រាយពាក្យបណ្តឹងនេះ ខ្ញុំគិតថា នេះជាហេតុផលវិជ្ជមានមួយដែលបង្ហាញពីឆន្ទៈរបស់គណៈកម្មាធិការជាតិរៀបចំការបោះឆ្នោតក្នុងការដោះស្រាយនូវបញ្ហាដែលជាកង្វះខាតរបស់ខ្លួនកន្លងមក។ ខ្ញុំអាចនិយាយបានថា នេះ ជាការកែទម្រង់មួយហើយ ជាការធ្វើវិសោធនកម្មមួយហើយ។ ប៉ុន្តែការពិតយើងនឹងតាមសង្កេត មើលបន្ថែមទៀតថា តើធ្វើវិសោធនកម្មបែបនេះនឹងទទួលផលបែបណា»។ លោកគល់ បញ្ញា នាយកប្រតិបត្តិនៃគណៈកម្មាធិការឃ្លាំមើលការបោះឆ្នោតដោយសេរី និងយុត្តិធម៌បានថ្លែងថា ការបង្កើនពេលវេលាតែមួយមិនមែនជាដំណោះស្រាយ ដើម្បីធានាថា ប្រជាពលរដ្ឋមិនបាត់ឈ្មោះនៅក្នុងបញ្ជីឈ្មោះបោះឆ្នោតនោះទេ ប៉ុន្តែវាអាចជួយសម្រួលខ្លះ។ លោកបញ្ជាក់ថា៖ «ការធ្វើវិសោធនកម្មនេះជាជំហានមួយវិជ្ជមាន។ ការថែមពេលវេលានេះមានសារៈសំខាន់ ដើម្បីធ្វើឱ្យរឿងចុះឈ្មោះបោះឆ្នោតបញ្ជីឈ្មោះបោះឆ្នោត និងការដោះស្រាយទំនាស់បោះឆ្នោតទទួលបានលទ្ធផល ល្អប្រសើរជាងមុន»។ លោកទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត បានបញ្ជាក់ថា ការចុះឈ្មោះបោះឆ្នោតត្រូវត្រៀមពីឥឡូវនេះទៅ ហើយវាបង្កលក្ខណៈងាយស្រួលដល់ការពិនិត្យបញ្ជីឈ្មោះ និងចុះឈ្មោះបោះឆ្នោត។ គណបក្សប្រឆាំងបានប្តឹងអំពីភាពមិនប្រក្រតីជាច្រើនករណីទាក់ទងនឹងដំណើរការបោះឆ្នោត និងបញ្ជីឈ្មោះអ្នកបោះឆ្នោត ហើយអ្នកបោះឆ្នោតច្រើនរាប់រយនាក់បានបាត់ឈ្មោះរបស់ពួកគេពីបញ្ជីឈ្មោះអ្នកបោះឆ្នោតនៅក្នុងការបោះឆ្នោតជ្រើសតំណាងរាស្ត្រឆ្នាំ២០០៨៕ This posting includes an audio/video/photo media file: Download Now |
| សហព្រះរាជអាជ្ញានៃសាលាក្តីខែ្មរក្រហមខែ្វងគំនិតគ្នាលើបទឧក្រិដ្ឋកម្មសង្រ្គាមសំណុំរឿង០០៣ Posted: 13 May 2011 06:57 AM PDT សហព្រះរាជអាជ្ញានៃសាលាក្តីខែ្មរក្រហមនៅទីក្រុងភ្នំពេញមានការខ្វែងគំនិតគ្នានៅសប្តាហ៍នេះបន្ទាប់ពីសហចៅក្រមស៊ើបអងេ្កតនិយាយថា ពួកគេបានបពា្ចប់កិច្ចការរបស់ពួកគេរួចរាល់ហើយលើសំណុំរឿង០០៣ប្រឆាំងនឹងអតីតមេបញ្ជាការកងទព័ជាន់ខ្ពស់ចំនួន២នាក់។ Robert Carmichael រាយការណ៍រឿងនេះពីទីក្រុងភ្នំពេញ កនែ្លងដែលអ្នករិះគន់ចោទប្រកាន់រដ្ឋាភិបាលលើបទជ្រៀតជ្រែកនៅក្នុងការចោទប្រកាន់លើមន្រ្តីជាន់ខ្ពស់។ តុលាការខែ្មរក្រហមនៅទីក្រុងភ្នំពេញបានខ្វែងគំនិតគ្នាជាយូរមកហើយ ក្នុងការសម្រេចថាតើអតីតកម្មាភិបាលប៉ុន្មាននាក់នឹងត្រូវចោទប្រកាន់។ សហព្រះរាជអាជ្ញាអន្តរជាតិ លោក អេនឌ្រូ ខេលី (Andrew Cayley) បាននិយាយកាលពីឆ្នាំមុនថា លោករំពឹងចង់ឃើញមនុស្សមិនលើសពីដប់នាក់ទេឈរនៅក្នុងតុលាការដើម្បីទទួលខុសត្រូវលើតួនាទីដែលគេចោទក្នុងការស្លាប់របស់មនុស្សអស់ប្រមាណ២លាននាក់នៅក្នុងអំឡុងរបបខែ្មរក្រហមនៅចន្លោះឆ្នាំ១៩៧៥ រហូត ដល់១៩៧៩។ ប៉ុនែ្តសហសេវិកកម្ពុជារបស់លោក គឺលោកស្រី ជា លាង បានប្រឆាំងការចោទប្រកាន់បនែ្ថមលើសពី៥នាក់។ ម្នាក់ក្នុងចំណោមអ្នកទាំងអស់នោះគឺ សមមិត្ត ឌុច អតីតប្រធានគុកទួលស្លែងដែលសាលាក្តីរកឃើញថា មានទោសកាលពីឆ្នាំមុនពីបទឧក្រិដ្ឋកម្មសង្រ្គាម និងបទឧក្រិដ្ឋកម្មប្រឆំាងមនុស្សជាតិ។ ការសមេ្រចទោសរបស់គាត់នៅក្នុងបណ្តឹងឧទ្ធរណ៍នៅឡើយ។ ចំណែកបួននាក់ទៀតដែលឋិតនៅក្នុងសំណុំរឿង០០២ ជាមេដឹកនាំចលនាខ្មែរក្រហមកំពូលៗដែលនៅរស់រានមានជីវិតនៅឡើយ។ ដំណើរការរឿងក្តីរបស់ពួកគាត់រំពឹងថា នឹងចាប់ផើ្តមនៅឆ្នាំនេះ។ ប៉ុនែ្តនៅពេលដែលសំណុំរឿងកំពុងតែដំណើរការទៅមុខ រាជរដ្ឋាភិបាលកម្ពុជាបានធ្វើការប្រឆាំងជាយូរមកហើយលើការចោទប្រកាន់សំណុំរឿងទី៣ និងទី៤ ដែលជាប់ទាក់ទងនឹងជនសង្ស័យ៥នាក់ទៀត។ ព្រះរាជអាជ្ញាមាននាទីក្នុងការវាយតម្លៃការស៊ើបអង្កេតរបស់តុលាការ និងកំណត់ថាតើមានភស្តុតាងគ្រប់គ្រាន់ក្នុងការដំណើរការរឿងក្តីដែរឬទេ។ សប្តាហ៍នេះសហព្រះរាជអាជ្ញាអន្តរជាតិ ខេលី បាននិយាយថា គឺច្បាស់ណាស់ថា មានកិច្ចការជាច្រើនចាំបាច់ត្រូវអនុវត្តលើសំណុំរឿង០០៣។ «ប្រសិនបើអ្នកសួរខ្ញុំថាតើ ត្រូវការការស៊ើបអង្កេតប៉ុន្មានទៀត ខ្ញុំនឹងប្រើពាក្យសមញ្ញថា នៅមានសេចក្តីត្រូវការធ្វើការស៊ើបអង្កេតចាំបាច់ជាច្រើនដែលត្រូវបំពេញក្នុងករណីនេះ»។ ប្រទេសកម្ពុជានៅជាប្រទេសផ្តាច់ការនៅឡើយ ហើយការប្រឆាំងរបស់រដ្ឋាភិបាលនឹងសំណុំរឿង00៣និង 00៤បានប៉ះពាល់ជាខ្លាំងដល់បុគ្គលិកកម្ពុជានៃតុលាការនេះ ដែលពួកគេភាគច្រើនបដិសេធមិនព្រមធ្វើការទាក់ទងនឹងសំណុំរឿងនេះទេ។ នៅសប្តាហ៍នេះ ចៅក្រមស៊ើបអង្កេតក្នុងសំណុំរឿង០០៣បានបិទការស៊ើបអង្កេតរបស់ពួកគេ ហើយប្រគល់សំណុំរឿងនេះជូនទៅព្រះរាជអាជ្ញារួចហើយ។ លោក ខេលី បានពន្យល់ ពីការងារមួយចំនួនដែលចាំបាច់ត្រូវធ្វើយ៉ាងដូច្នេះថា៖ «ខ្ញុំមិនចាត់ទុកថា ការស៊ើបអង្កេតនេះត្រូវបានបញ្ចប់ទេ ហើយខ្ញុំបានស្នើឲ្យមានវិធានការណ៍មួយចំនួនដែលមានរួមទាំងការសម្ភាសន៍ជនសង្ស័យដែលបានរៀបរាប់ឈ្មោះនៅក្នុងការបញ្ចូនរឿងទៅស៊ើបសួរដំបូង និងវិធានការណ៍មួយចំនួនទៀតរួមទាំងការស៊ើបអងេ្កតនៅទីតាំងនានាដែលបទឧក្រិដ្ឋបានកើតផ្ទាល់ និងដែលដើមឡើងបានផ្តល់ឈ្មោះដោយព្រះរាជអាជ្ញានៅក្នុងការបញ្ចូនរឿងទៅស៊ើបសួរ ដែលមិនត្រូវបានធ្វើការស៊ើបអង្កេតទាល់តែសោះ»។ អធិប្បាយរបស់លោក ខេលី ហាក់ដូចជាបញ្ចាក់ពីការសាយភាយពាក្យចចាមអារាមថា ចៅក្រមស៊ើបអង្កេតពិតជាបានបំពេញការងារបន្តិចបន្តួចក្នុងសំណុំរឿងទី៣នេះ។ ប៉ុន្តែ បន្ទាប់សហសេវិកកម្ពុជារបស់ លោក ខេលី លោកស្រី ជា លាង បានចេញសេចក្តីថែ្លងការបញ្ចាក់ថា សំណុំរឿងទី៣គួរតែត្រូវបិទ។ លោកស្រី ជា លាង បាននិយាយថា គាត់បានត្រួតពិនិត្យសំណុំរឿងនេះហើយបានសម្រេចថា ជនសង្ស័យដែលមិនបញេ្ចញឈ្មោះទាំងនោះមិនមែនជាមេដឹកនាំជាន់ខ្ពស់ ហើយក៏មិនមែនជាអ្នកទទួលខុសត្រូវខ្ពស់បំផុតក្នុងបទឧក្រិដ្ឋនានាដែលប្រព្រឹត្តដោយខ្មែរក្រហមដែរ ហេតុនេះអ្នកទាំងនោះ ស្ថិតនៅក្រៅយុត្តាធិការរបស់តុលាការ ថាជាជនដែលត្រូវបានចោទប្រកាន់នោះ។ យោងតាមព្រះរាជអាជ្ញា រាជរដ្ឋាភិបាលនិង ចៅក្រមស៊ើបអង្កេត កម្ពុជា ទាំងអស់គ្នាកំពុងជម្រុញឲ្យបិទសំណុំរឿងទី៣នេះ ចំណែកឯអ្នកតាមដានជាច្រើនវិញសង្ស័យថា ការចោទប្រកាន់នឹងមិនបន្តដំណើរការទៅមុខទេ។ ជម្រើសចុងក្រោយរបស់ លោក ខេលី ដែលជាព្រះរាជអាជ្ញាអន្តរជាតិសម្រាប់សំណុំរឿងទី៣នេះគឺធ្វើបណ្តឹងឧទ្ធរណ៍ប្រឆាំងនឹងការបិទនេះទៅចៅក្រម ៥ រូប។ ចៅក្រមបីនាក់គឺជាភាគីកម្ពុជា ហើយអ្នកតាមដានដំណើរការកាត់ក្តីជឿជាក់ថាចៅក្រមនឹងទំនងជាបដិសេធចោលសំណុំរឿងនេះ៕ ប្រែសម្រួលដោយ ហ៊ុយ សម្ផស្ស This posting includes an audio/video/photo media file: Download Now |
| អតីតព្រះរាជអាជ្ញាជាប់ពន្ធនាគារ១៩ឆ្នាំ Posted: 12 May 2011 03:18 PM PDT នៅថ្ងៃព្រហស្បតិ៍នេះ តុលាការខេត្តពោធិសាត់បានកាត់ទោសអតីតព្រះរាជអាជ្ញាតុលាការខេត្តឱ្យជាប់ពន្ធនាគារចំនួន១៩ឆ្នាំអំពីបទបង្ខាំងមនុស្សខុសច្បាប់ និងជំរិតទារប្រាក់។ លោកតុប ច័ន្ទសេរីវុធ អតីតព្រះរាជអាជ្ញាអមតុលាការខេត្តពោធិសាត់ ត្រូវបានចាប់ខ្លួនជាមួយអង្គរក្សពីរនាក់របស់លោកនៅខែវិច្ឆិកា ឆ្នាំ២០១០ ពីបទពុករលួយ ជំរិតទារប្រាក់ និងបង្ខាំងមនុស្សខុសច្បាប់។ លោកឌុច ចន្ថា ចៅក្រមជំនុំជម្រះបានប្រកាសសាលក្រមនៅចំពោះមុខជនជាប់ចោទថាតុលាការបានសម្រេចផ្តន្ទាទោសឈ្មោះ តុប ច័ន្ទសេរីវុធ ឱ្យជាប់ពន្ធនាគារចំនួន១៩ឆ្នាំ រស់ សំណាង ១៧ឆ្នាំ ឈិន វុទ្ធី ១៥ឆ្នាំ និងពេជ្រ គុណយូ ដែលបានរត់គេចខ្លួន ឱ្យជាប់ពន្ធនាគារចំនួន១៨ឆ្នាំ អំពីបទពុករលួយ ជំរិតទារប្រាក់ និងបង្ខាំងមនុស្សខុសច្បាប់។ លោក ហ៊ន បូរី មេធាវីមួយរបស់ជនជាប់ចោទ តុប ច័ន្ទសេរីវុធ បានថ្លែងថា លោកមិនពេញចិត្តនឹងសេចក្តីសម្រេចរបស់តុលាការនេះទេ។ លោកបានប្រាប់វីអូអេខ្មែរថា៖ «វាមិនជាលទ្ធផលល្អសម្រាប់មេធាវីទេ។ វាមិនយុត្តិធម៌សម្រាប់គាត់ (តុប ច័ន្ទសេរីវុធ)។ គេដាក់ទោស កូនក្តីរបស់យើងមិនមានភាពយុត្តិធម៌។ បើគាត់បានប្រព្រឹត្តកំហុសឆ្គងមែនគាត់មិនគួរដាក់ពន្ធនាគារយូរដូច្នេះទេ»។ លោក ឈួន ស៊ីផាន់ មេធាវីការពារក្តីជនជាប់ចោទឈិន វុទ្ធី និងរស់ សំណាង បានថ្លែងថា ការសម្រេចសេចក្តីរបស់តុលាការនេះមានភាពអយុត្តិធម៌សម្រាប់កូនក្តីរបស់លោក ហើយលោកមិនអាចទទួលយកបាននូវសេចក្តីសម្រេចនេះទេ។ លោកស៊ីផាន់ ថ្លែងថា៖ «ចំពោះខ្ញុំៗអត់យល់ស្របជាមួយសាលក្រមរបស់តុលាការទេ ពីព្រោះអំពើរបស់កូនក្តីខ្ញុំខុសប្រក្រតីមែន ប៉ុន្តែពួកគេធ្វើទៅតាមនីតិវិធីរបស់ច្បាប់ ដែលបានចែងហើយការដាក់ទោសនេះក៏ធ្ងន់ធ្ងរពេកដែរ»។ លោក ចាន់ សុវ៉េត ប្រធានផ្នែកត្រួតពិនិត្យការរំលោភសិទ្ធិមនុស្សនៃសមាគមសិទ្ធិមនុស្ស អាដហុក បានថ្លែងថា តុលាការបានផ្តល់យុត្តិធម៌ដល់អំពើល្មើសច្បាប់របស់អតីតព្រះរាជអាជ្ញា តុប ច័ន្ទសេរីវុធ និងបក្ខពួករបស់គាត់។ លោកសុវ៉េតបានប្រាប់វីអូអេថា៖ «ថ្ងៃនេះ ការសម្រេចសេចក្តីរបស់តុលាការខេត្តពោធិសាត់នេះមានភាពយុត្តិធម៌ និងសមរម្យល្មម។ ការសម្រេចផ្តន្ទាទោសប៉ុណ្ណឹង យើងគិតថា វាយុត្តិធម៌ហើយ»។ លោក ចាន់ សុវ៉េត បានបញ្ជាក់ថា ការផ្ទន្ទាទោសអ្នកមានអំណាចរូបនេះ គឺជាការលើកកម្ពស់ស្មារតីរបស់ប្រជាពលរដ្ឋឱ្យជឿជាក់តុលាការ និងជាសារមួយជូនដល់អ្នកប្រព្រឹត្តអំពើពុករលួយ ឱ្យបោះបង់ចោលអំពើខុសច្បាប់របស់ពួកគេ។ ក្រុមមេធាវី បាននិយាយថា កូនក្តីរបស់អស់លោកនឹងធ្វើការប្តឹងឧទ្ទរណ៍។ គួរត្រូវបានរំលឹកថា លោកអតីតឧត្តមសេនីយ៍ឯក ម៉ឹក តារា អតីតអគ្គលេខាធិការអាជ្ញាធរប្រយុទ្ធប្រឆាំងគ្រឿងញៀន និងលោកជា ឡេង អតីតប្រធានការិយាល័យប្រឆាំងគ្រឿងញៀននៃក្រសួងមហាផ្ទៃ ព្រមទាំងលោកហ៊ុន ហ៊ាន អតីតស្នងការប៉ូលីសខេត្តបន្ទាយមានជ័យ និងអតីតស្នងការរងរបស់លោក គឺលោកឈាង សុន ត្រូវបានចាប់ខ្លួន និងចោទប្រកាន់ពីបទពុករលួយ និងការជួញដូរគ្រឿងនៅក្នុងខែមករា ឆ្នាំ២០១១។ This posting includes an audio/video/photo media file: Download Now |
| លោករាជ សម្បតិ្តលាចាកលោក តែគុណសម្បត្តិ និងស្នាដៃរបស់លោកនៅតែត្រូវបានចងចាំ Posted: 13 May 2011 01:52 PM PDT តើអ្វីទៅដែលជាកេរដំណែល ដែលនៅសេសសល់ពីលោករាជ សម្បត្តិ បុរសដែលធ្លាប់មានប្រជាប្រិយភាពម្នាក់នេះ។ គ្មានអ្នកណាម្នាក់នៅជុំវិញខ្លួនរបស់គាត់ដែលធ្លាប់ស្គាល់គាត់អាចរកកំហុសរបស់គាត់មកលាតត្រដាងនៅពេលនេះបានទេ ក៏ប៉ុន្តែដំបូន្មាន និងការប្តេជ្ញាចិត្ត ភាពរឹងមាំ មិត្តភាព ភាពកក់ក្តៅ ដែលគាត់បានផ្តល់ដល់ក្រុមគ្រួសារ និងមនុស្សជំនាន់ក្រោយ គឺជា កេរដំណែលពិតប្រាកដ ដែលលោករាជ សម្បត្តិ បានបន្សល់ទុក។ មកពីឃុំក្រោលគោ ស្រុកស្វាយជ្រុំ ខេត្តស្វាយរៀង លោករាជ សម្បត្តិ បានបណ្តុះខ្លួនឯងឲ្យក្លាយជាបញ្ញាជនដ៏គំរូម្នាក់ប្រកបដោយភាពល្បីល្បាញ និងទទួលបានការគោរពពីគ្រប់មជ្ឈដ្ឋាន។ គំរូល្អរបស់លោកនៅតែបន្តនៅក្នុងសង្គមខ្មែរ ទោះបីជាលោកលាចាកលោកទៅក្នុងអាយុ៤៧ឆ្នាំ កាលពីយប់ថ្ងៃពុធនៅមន្ទីរពេទ្យកាលម៉ែតក្រុងភ្នំពេញដោយសារជម្ងឺលើសឈាម។ នៅក្នុងពិធីបុណ្យនៅថ្ងៃព្រហស្បតិ៍នេះ នៅឯគេហដ្ឋានរបស់លោក អ្នកចូលរួមគ្រប់ៗគ្នាមានទឹកមុខស្រងូតស្រងាត់ និងកៀមក្រំ។ បងប្រុសបង្កើតរបស់លោករាជ សម្បត្តិ គឺលោក រាជ សំណាង អតីតស្នងការប៉ូលីសខេត្តមណ្ឌលគីរី បានយំអណ្តើតអណ្តក់នៅពេលដែលលោករំឭកអនុស្សាវរីយ៍ដែលលោកមានជាមួយប្អូនប្រុសបង្កើតរបស់លោក។ លោក សំណាងបញ្ជាក់ថា៖ «ធ្លាប់រស់នៅពីក្មេងជាមួយគ្នា រហូតដល់ចាស់យើងនៅជាមួយគ្នាទៀត។ ប៉ុល ពតសម្លាប់ម៉ែ យើងបានរស់ដោយលំបាក តែមកដល់ឥឡូវស្រួល បែជាយើងស្លាប់»។ លោក រាជ សម្បត្តិ មានបងប្អូនចំនួនប្រាំមួយនាក់ គឺសុទ្ឋតែប្រុស។ លោកជាកូនទី៥។ ឪពុករបស់លោកដែលជាអតីតមេឃុំម្នាក់នៅក្នុងខេត្តស្វាយរៀងត្រូវពួកខ្មែរក្រហមសម្លាប់ជាមួយនឹងម្តាយរបស់លោក។ លោកបានក្លាយជាកូនកំព្រា។ លោករាជ សម្បត្តិ បានសង្វាតរៀនសូត្រដោយខ្លួនឯង ហើយបានទទួលអាហាររូបករណ៍ទៅសិក្សា នៅប្រទេសឥណ្ឌានៅទសវត្សរ៍ឆ្នាំ១៩៨០ផ្នែកកសិកម្ម គឺនៅទីនោះហើយ ដែលលោកចាប់អារម្មណ៍នៅក្នុង វិស័យសារព័ត៌មាន ហើយលោកក៏បានប្រឹងប្រែងស្វែងសិក្សាទៅលើវិស័យសារព័ត៌មាននេះ ។ លោករាជ សម្បត្តិបានចូលបម្រើការជាអ្នកយកព័ត៌មានឲ្យទីភ្នាក់ងារព័ត៌មានបារាំងAFP នៅឆ្នាំ១៩៩១។ ក្រោយពីទទួលសញ្ញាប័ត្រអនុបណ្ឌិតផ្នែកសារព័ត៌មាននៅសាកលវិទ្យាល័យខូឡំបៀ សហរដ្ឋអាមេរិក លោករាជ សម្បត្តិ បានក្លាយជាគ្រូបង្រៀនផ្នែកវិជ្ជាជីវៈព័ត៌មាន នៅឆ្នាំ២០០១ រហូតដល់លោកទទួលមរណភាព។ លោកទៀង សុភៈវិជ្ជា ប្រធានស្តីទីនៃសិក្ខាល័យប្រព័ន្ឋផ្សព្វផ្សាយ និងសារគមនាគមន៍នៃសាលាកលវិទ្យាល័យភូមិន្ទភ្នំពេញ មានប្រសាសន៍ដោយទឹកភ្នែករលីងរលោងនៅពេលខ្លះថា លោករាជ សម្បតិ្ត គឺជាអតីតគ្រូបង្រៀនដ៏ល្អម្នាក់កម្ររកបាន។ «យើងពិបាករកគ្រូណាមកជំនួសគាត់ ពីព្រោះគាត់គឺជាមនុស្សម្នាក់ដែលពោពេញទៅដោយបទ ពិសោធន៍ ចំណេះដឹង យកចិត្តទុកដាក់នៅក្នុងការបង្រៀន ស្រឡាញ់សិស្ស ចង់ឲ្យសិស្សចេះពិតប្រាកដ។ហើយគាត់មិនត្រឹមតែបង្រៀនទេគាត់តែងតែផ្សារភ្ជាប់រវាងការបង្រៀន និងការអនុវត្ត។ ជូនកាលគាត់បង្រៀនពាក់កណ្តាល គាត់យកសិស្សទៅក្រៅពាក់កណ្តាល ដើម្បីឲ្យឃើញផ្ទាល់។ នេះហើយ ជាការួមចំណែកដ៏ធំ ពីព្រោះសិស្សនេះហើយ ថ្ងៃក្រោយជាធនធានមនុស្សក្នុងវិស័យសាព័ត៌មាន ផ្នែកសាព័ត៌មាន ដើម្បីជួយឲ្យប្រទេសយើងមានការរីកចម្រើន។ ចំពោះខ្ញុំការបង្រៀននេះ គឹជាការរួមចំណែកយ៉ាងធំ ដើម្បីធ្វើឲ្យមានការផ្លាស់ប្តូរសង្គមយើង និងការជឿនលឿនក្នុងសង្គមយើង»។ រយៈពេល១០ឆ្នាំ លោករាជ សម្បត្តិ បានចូលរួមបណ្តុះបណ្តាលនិស្សិតផ្នែកព័ត៌មានប្រមាណជាង២០០នាក់។ អតីតនិស្សិតរបស់លោកមួយចំនួន បានបំពេញការងារជាអ្នកយកព័ត៌មាន មួយចំនួនទៀតបំពេញការងារផ្នែកទំនាក់ទំនង ផ្នែកព័ត៌មាននៅបណ្តាអង្គការក្រៅរដ្ឋាភិបាល។ អតីតនិស្សិតរបស់លោកចំនួនបួនរូបកំពុងធ្វើជាសាស្រ្តាចារ្យជំនួយផ្នែកព័ត៌មានបច្ចុប្បន្ននេះ។ លោកទូច យិនមុនី ជាគ្រូជំនួយម្នាក់កំពុងឈរនៅលើផ្លូវដើរចូលអគារសិក្សាមួយកន្លែងដែលលោករាជ សម្បត្តិ ធ្លាប់ដើរឆ្លងកាត់នៅទីនេះ។ លោក យិនមុនីបានប្រាប់វីអូអេខ្មែរថា៖ «ដោយសារគាត់អប់រំយើងឲ្យខំ ពីព្រោះយើងជាអ្នកស្រែចម្ការដូចគាត់ដែរ គាត់ជាអ្នកមានដើមកំណើតមកពីស្រែដូចគ្នា ហើយគាត់តស៊ូ ហើយគាត់ប្រាប់ថា មុនីត្រូវខំរៀនដើម្បីអនាគត។ គាត់ថា ក្នុងនាមជានិស្សិតក្រីក្រម្នាក់ យើងត្រូវព្យាយាមខំប្រឹង អ្វីដែលអាចធ្វើបានខំប្រឹងធ្វើ។ តួយ៉ាងដូចគាត់តែងប្រាប់ថា គាត់ធ្លាប់រត់កង់ឌុប។ នេះជាការតស៊ូរបស់គាត់»។ ដូចលោកយិន មុនី ដែរ កញ្ញាធី ហៀង គឺជាមន្រ្តីទំនាក់ទំនងនៃអង្គការសម្ព័ន្ឋភាពដើម្បីតម្លាភាពចំណូលធនធាន និងជាអតីតនិស្សិតរបស់លោករាជ សម្បត្តិ នៅឆ្នាំសិក្សា២០០៣ និង២០០៤។ កញ្ញាធី ហៀង ពោលដោយក្តុកក្តួល រំឭកអំពីដំបូន្មានល្អៗរបស់លោករាជ សម្បត្តិថា៖ «តាមពិតទៅ យើងទើបឃើញមុខគ្នាមុននេះបន្តិច។ ហើយដល់ពេលពួកខ្ញុំ ឮរឿងហ្នឹងទៅ មានអារម្មណ៍ថាទើបជួបគ្នាថ្មីៗ។ ការបាត់បង់គាត់ គឺជាការបាត់បង់ធំសម្រាប់ពួកខ្ញុំជាសិស្ស ។ អ្វីដែលសំខាន់នោះគឺភាពស្មោះត្រង់របស់គាត់ ភាពល្អរបស់គាត់ ភាពស្លូបបូតរបស់គាត់ និងចរិតល្អគាត់ បានផ្តល់មកឲ្យពួកយើង គឺពួកយើងមានអារម្មណ៍ថា កោតសរសើរមែនទែន។ ការបាត់បង់ជីវិតរបស់គាត់គឺបន្សល់ទុកនូវអ្វីដែលល្អសម្រាប់កូនសិស្សយើងទាំងអស់គ្នា ហើយអ្នកដែលស្គាល់ ជាពិសេសបើសិនអ្នកណាដែលស្គាល់ គាត់ជិតស្និទ្ធគឺមានអារម្មណ៍ថា គឺជាការបាត់បង់ដ៏ធំបំផុត»។ លោករាជ សម្បត្តិ ក្លាយជាមន្រ្តីអ្នកនាំពាក្យសាលាក្តីខ្មែរក្រហមបន្ទាប់ពីលោកក្លាយជាសាស្រ្តាចារ្យព័ត៌មាន។ ក្រោយមកទៀត លោកបានឡើងតំណែងជាប្រធានផ្នែកកិច្ចការសាធារណៈនៃសាលាក្តីនេះ។តួនាទីនេះគឺជាសម្ពាធមួយយ៉ាងធំដល់សុខភាពរបស់លោក ដែលលោកមានជម្ងឺលើសឈាមអស់ រយៈពេលជាច្រើនឆ្នាំមកហើយ។ ករណី០០៣ និង០០៤ ដ៏ស្មុគស្មាញ ដែលកំពុងតែមានភាពប្រទាញប្រទង់រវាងអង្គការសហប្រជាជាតិ និងភាគីកម្ពុជានៅក្នុងសាលាក្តី គឺជាបន្ទុកមួយផ្នែកទៀតដល់ការងាររបស់លោក។ លោករាជ សម្បត្តិ បានឡើងសម្ពាធឈាមយ៉ាងខ្លំាង និងឆាប់រហ័សបំផុតនៅក្នុងបន្ទប់ការងាររបស់ លោក កាលពីថ្ងៃអង្គារ គឺប៉ុន្មាននាទីប៉ុណ្ណោះមុន និងលោកត្រូវចាកចេញពីកន្លែងធ្វើការសំដៅមកផ្ទះ។លោកបានផ្តល់បទសម្ភាសន៍ជាមួយវីអូអេខ្មែរនៅក្នុងគ្រាចុងក្រោយបំផុតកាលពីថ្ងៃច័ន្ទ។ សំឡេងរបស់លោកនៅតែស្វាហាប់នៅឡើយ។ លោកកែរ មន្ឋិត ដែលអតីតយកព័ត៌មានដ៏ល្បីល្បាញ និងដែលជាអ្នកប្រឡូកក្នុងការងារជាមួយលោករាជ សម្បត្តិ យ៉ាងជិតស្និទ្ឋ នៅក្នុងគ្រាដ៏លំបាកនៅដើមទសវត្សរ៍១៩៩០ បានស្រក់ទឹកភ្នែក ហើយបន្លឺពាក្យពេចន៍ដ៏សោកស្តាយថា៖ «ទាំងខ្ញុំ ទាំងអ្នកដទៃទៀត ដែលធ្លាប់ស្គាល់គាត់ គឺមានអនុស្សាវរីយ៍ជាច្រើនជាមួយគាត់។ គាត់ជាអ្នកកាសែតដ៏ចំណានម្នាក់ ហើយដ៏កម្រម្នាក់នៅស្រុកយើង ជាមនុស្សប៉ិនប្រសប់ក្នុងការប្រមូលព័ត៌មាន ដើម្បីយកមកផ្សព្វផ្សាយ។ គាត់ចេះចែករំលែកអ្វីដែលគាត់ដឹង គាត់ចេះឲ្យអ្នកជំនាន់ថ្មី ដែលចង់ប្រឡូកនៅក្នុងវិស័យនេះ ហើយក៏ជាមនុស្សគំរូម្នាក់សម្រាប់ជំនាន់ក្រោយនៅក្នុងវិស័យសារព័ត៌មាន។ អនុស្សាវរីយ៍ផ្សេងទៀតគឺគាត់ទន្ទឹមនឹងអាជីពដ៏ចំណាន់របស់គាត់ គឺគាត់ចូលចិត្តធ្វើឲ្យគេសប្បាយក្អាកក្អាយ»។ នៅថ្ងៃព្រហស្បតិ៍នេះ សាលាក្តីខ្មែរក្រហម សមាគមជនរងគ្រោះដោយរបបខ្មែរក្រហម លោកនាយក រដ្ឋមន្រ្តីហ៊ុន សែន បានចេញសេចក្តីរំលែកទុក្ខចំពោះមរណភាពរបស់លោករាជ សម្បត្តិ។ សពរបស់លោករាជ សម្បត្តិនឹងត្រូវបានបូជានៅថ្ងៃអាទិត្យទី១៥ ខែឧសភា នេះ នៅក្នុងទីក្រុងភ្នំពេញ។ ភរិយារបស់លោក គឺលោកស្រីឈូយ ចាន់ធី នឹងត្រូវមើលការខុសត្រូវកូនចំនួនបីនាក់ និងគ្រប់គ្រងគ្រួសារបន្តទៀត៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
