VOA News: ព័ត៌មាន: “សហព្រះរាជអាជ្ញាគាំទ្រការបង្ហាញជនសង្ស័យក្នុងរឿងក្តី០០៣” plus 2 more |
- សហព្រះរាជអាជ្ញាគាំទ្រការបង្ហាញជនសង្ស័យក្នុងរឿងក្តី០០៣
- គណបក្សប្រឆាំងនឹងរៀបចំបាតុកម្មសម្រាប់កម្មកររោងចក្រ
- របាយការណ៍អង្កេត៖ គ្រូមានទុទិដ្ឋិនិយមខ្លាំងចំពោះគុណភាពអប់រំកម្ពុជា
| សហព្រះរាជអាជ្ញាគាំទ្រការបង្ហាញជនសង្ស័យក្នុងរឿងក្តី០០៣ Posted: 09 May 2011 11:44 AM PDT លោក អ៊ែនឌ្រូ ខេលី (Andrew Cayley) សហព្រះរាជអាជ្ញាអន្ដរជាតិបានស្នើសុំឲ្យសហចៅក្រមស៊ើបអង្កេតនៃសាលាក្ដីខ្មែរក្រហមបង្ហាញអត្តសញ្ញាណរបស់ជនសង្ស័យក្នុងសំណុំរឿង០០៣ដ៏ចម្រូងចម្រាស ហើយទាមទារឲ្យធ្វើការស៊ើបអង្កេតសំណុំរឿងនេះឲ្យបានស៊ីជម្រៅជាបន្ថែមទៀត។ សហព្រះរាជអាជ្ញាអន្តរជាតិបញ្ជាក់ថា នេះគឺជាការទាមទារដើម្បីផលប្រយោជន៍ក្នុងការផ្ដល់ព័ត៌មានដល់សាធារណជនអំពីការវិវត្តន៍របស់សាលាក្ដីខ្មែរក្រហម ដោយខ្លួនយល់ឃើញថា ការស៊ើបអង្កេតក្នុងសំណុំរឿងនេះមិនទាន់ពេញលេញនៅឡើយ។ ក្រុមមន្ដ្រីអង្គការសង្គមស៊ីវិលកាលពីថ្ងៃសុក្រសប្ដាហ៍មុន បានលើកឡើងផងដែរថា សាលាក្ដីខ្មែរក្រហមខ្វះការជូនដំណឹងដល់សាធារណៈជនពាក់ព័ន្ធនឹងសំណុំរឿង០០៣ និងសំណុំរឿង០០៤។ កាលពីថ្ងៃទី២៩ខែមេសា សហចៅក្រមស៊ើបអង្កេតសាលាក្ដីខ្មែរក្រហមបានប្រកាសថា ខ្លួនបានបិទការស៊ើបអង្កេតក្នុងសំណុំរឿង០០៣រួចរាល់ហើយ ដោយមានសំណុំឯកសារភស្ដុតាងចំនួន ២.០០០ដែលមានជាង៤៨.០០០ទំព័រ។ ក៏ប៉ុន្ដែសហចៅក្រមទាំងពីរមិនបានបង្ហាញពីភិនភាគនៃជនសង្ស័យដែលនៅក្រោមយុត្តាធិការនៃការស៊ើបអង្កេតនោះទេ។ លោក អ៊ែនឌ្រូ ខេលី បានថ្លែងនៅក្នុងសេចក្ដីប្រកាសព័ត៌មាននៅថ្ងៃច័ន្ទនេះថា សហព្រះរាជអាជ្ញាអន្ដរជាតិស្នើសុំឲ្យកោះហៅ និងសួរចម្លើយជនសង្ស័យនានាដែលមានឈ្មោះក្នុងដីកាបញ្ជូនរឿងឲ្យស៊ើបសួរលើសំណុំរឿងលេខ០០៣ព្រមទាំងកំណត់អត្តសញ្ញាណអ្នកទាំងនោះថា ពួកគេស្ថិតនៅក្រោមការស៊ើបសួរ។ នៅក្នុងនោះដែរសហព្រះរាជ្ញាសញ្ជាតិអង់គ្លេសដដែល បានស្នើឲ្យសហចៅក្រមស៊ើបអង្កេតស្ដាប់ចម្លើយសាក្សីសក្ដានុពលបន្ថែមទៀត និងស្ដាប់ចម្លើយឡើងវិញនូវសាក្សីដែលបានកំណត់ក្នុងសំណុំរឿង០០២។ បន្ថែមពីនោះសហព្រះរាជអាជ្ញាអន្តរជាតិ ក៏បានស្នើឲ្យសហចៅក្រមស៊ើបអង្កេតពិនិត្យបន្ថែមលើទីតាំងឧក្រិដ្ឋកម្មរួមទាំងកន្លែងកប់សាកសព ដាក់ភស្ដុតាងបន្ថែម និងសាកសួរបន្ថែមអំពីការចូលរួមរបស់ជនសង្ស័យក្នុងឧក្រិដ្ឋកម្មនានា។ លោករាជ សម្បត្តិ ប្រធានផ្នែកទំនាក់ទំនងកិច្ចការសាធារណៈរបស់សាលាក្ដីខ្មែរក្រហមមានប្រសាសន៍ថា សហចៅក្រមស៊ើបអង្កេតមិនទាន់បានទទួលសំណើរបស់សហព្រះរាជអាជ្ញាអន្ដរជាតិនៅឡើយ។ លោកបានប្រាប់វីអូអេខ្មែរថា៖ «សហចៅក្រមស៊ើបអង្គេត គាត់បានជម្រាបថា មិនទាន់ឃើញគាត់ផ្ញើអ្វីទេ មកដល់ពេលហ្នឹង។ យើងអត់ដឹងជំហរចៅក្រមស៊ើប គាត់ព្រមធ្វើទៅតាមការស្នើសុំ ឬក៏គាត់មិនព្រមធ្វើតាមការស្នើសុំ។ អញ្ចឹងកិច្ចការនេះ វាត្រូវទៅឧទ្ធរណ៍»។ សូមបញ្ជាក់ថា ការស្នើសុំឲ្យស៊ើបអង្កេតបន្ថែម និងបង្ហាញអត្តសញ្ញាជនសង្ស័យក្នុងសំណុំរឿង០០៣របស់សហព្រះរាជអាជ្ញាអន្ដរជាតិពុំមានការគាំទ្រពីភាគីកម្ពុជាទេ។ លោកស្រី ជា លាង សហព្រះរាជអាជ្ញាជាតិ បានជំទាស់នឹងការស្នើឲ្យមានការស៊ើបអង្កេតជនសង្ស័យបន្ថែមក្នុងសំណុំរឿង០០៣ និង០០៤ ដែលគេមើលឃើញថា គឺជាការដើរតាមជំហរបស់រដ្ឋាភិបាល។ លោក រាជ សម្បត្តិ បញ្ជាក់ថា លោកស្រីជា លាង នៅតែរក្សាជំហរនេះដដែល។ នៅក្នុងសេចក្ដីថ្លែងការណ៍របស់ខ្លួនលោក អ៊ែនឌ្រូ ខេលី បានលើកឡើងថា ឧក្រិដ្ឋកមុ្មនៅក្នុងសំណុំរឿង០០៣ ត្រូវបានគ្របដណ្តប់លើឧក្រិដ្ឋកម្ម និងព្រឹត្តិការណ៍ឧក្រិដ្ឋកម្មនានាក្នុងសំណុំរឿង០០២ ដូចជា មន្ទីរសន្ដិសុខស២១ ការដ្ឋានសាងសង់ព្រលានយន្ដហោះខេត្តកំពង់ឆ្នាំង ការបោសសម្អាតភូមិភាគបូព៌ា ភូមិភាគកណ្ដាល ភូមិភាគឧត្តរថ្មី ការវាយលុកលុយចូលប្រទេសវៀតណាម បូករួមទាំងឧក្រិដ្ឋកម្មនៅមន្ទីរសន្ដិសុខក្នុងតំបន់ភ្នំពេញ ខេត្តកំពង់សោម រតនគិរី និង ការចាប់ខ្លួនជនបរទេសជាដើម។ រហូតមកទល់ពេលនេះ មានអតីតជនរងគ្រោះនៃសម័យខ្មែរក្រហម និងសាច់ញាតិជនរងគ្រោះសរុបចំនួនពីរនាក់បានបើកកកាយអត្តសញ្ញាណលោក មាស មុត អតីតមេបញ្ជាការកងទ័ពជើងទឹកខ្មែរក្រហម និងលោក ស៊ូ ម៉េត អតីតមេបញ្ជាការកងទ័ពអាកាសខ្មែរក្រហមថា ពួកគេស្ថិតជាជនសង្ស័យក្នុងសំណុំរឿង០០៣។ ក៏ប៉ុន្ដែសាលាក្ដីខ្មែរក្រហមបានបង្ហាញថា ពុំទាន់មានជនសង្ស័យណា ម្នាក់ត្រូវបានចោទប្រកាន់ក្នុងសំណុំរឿងនេះទេ៕ This posting includes an audio/video/photo media file: Download Now |
| គណបក្សប្រឆាំងនឹងរៀបចំបាតុកម្មសម្រាប់កម្មកររោងចក្រ Posted: 09 May 2011 01:36 PM PDT តាមរយៈសន្និសីទវីដេអូជាមួយសមាជិកគណបក្សសម រង្ស៊ី ប្រចាំរាជធានីភ្នំពេញកាលថ្ងៃអាទិត្យនេះ លោក សម រង្ស៊ី មេដឹកនាំគណបក្សប្រឆាំង ដែលបច្ចុប្បន្ននេះកំពុងស្នាក់នៅក្រៅប្រទេសបានព្រមានថានឹងដឹកនាំធ្វើមហាបាតុកម្មមួយ ដើម្បីរកដំណោះស្រាយឲ្យក្រុមកម្មកររោងចក្រមិថុនា។ លោកសម រង្ស៊ី ថ្លែងតាមរយៈសន្និសីទវីដេអូយ៉ាងដូច្នេះថា៖ «ត្រូវប្រមូលកម្មកររោងចក្រមិថុនាទាំងអស់ ប្រមូលកម្មកររោងចក្រនានាដែលចង់សម្តែងសាមគ្គីភាពដល់រោងចក្រមិថុនា អ្នករងគ្រោះទាំងអស់។ យើងត្រូវធ្វើបាតុកម្មមួយទៅមុខស្ថានទូតអាមេរិក»។ ការប្រកាសធ្វើមហាបាតុកម្មរបស់លោកសម រង្ស៊ី បានធ្វើឡើងបន្ទាប់ពីក្រុមកម្មករកម្មការីនីនៃ រោងចក្រកាត់ដេរសម្លៀកបំពាក់មិថុនាបានធ្វើកូដកម្មអស់រយៈពេលជាងមួយខែមកហើយ ដើម្បីទាមទារ ថៅកែរោងចក្រឲ្យបើកប្រាក់អតីតភាពការងាររបស់ពួកគេ។ កាលពីថ្ងៃអាទិត្យម្សិលមិញនេះ ក្រុមកម្មករបានសម្រេចបិទកំណាត់ផ្លូវសហព័ន្ធរុស៊្សី ដែលមានទីតាំងនៅពីមុខរោងចក្រមិថុនា ដែលធ្វើឲ្យចរាចរបានកកស្ទះជាច្រើនម៉ោង។ ក៏ប៉ុន្តែក្រោយមកប៉ូលីសប្រដាប់ដោយអាវុធ ខែល និងដំបងឆក់ ព្រមទាំងឧស្ម័នបង្ហូរទឹកភ្នែកបានវាយបំបែកក្រុមកម្មករ។ នេះបើតាមការអះអាងរបស់សាក្សីដែលបានឃើញផ្ទាល់ភ្នែក និងមន្រ្តីការពារសិទ្ធិមនុស្ស។ យ៉ាងតិចមានក្រុមកម្មករចំនួនពីរនាក់ត្រូវបានប៉ូលីសចាប់ខ្លួន ហើយក្រោយមកបានដោះលែងវិញបន្ទាប់ពីក្រុមកម្មករនៅព្រឹកថ្ងៃច័ន្ទនេះបានទៅតវ៉ានៅពីមុខស្នងការប៉ូលីសក្រុងភ្នំពេញ។ លោក សម រង្ស៊ី មេដឹកនាំគណបក្សប្រឆាំងបានមានប្រសាសន៍ថា ការធ្វើមហាបាតុកម្មនេះគឺ ដើម្បីដាក់សម្ពាធដល់រដ្ឋាភិបាល ក៏ដូចជាថៅកែរោងចក្រឲ្យបញ្ឈប់ការធ្វើទារុណកម្ម និងផ្តល់ប្រាក់អតីតភាពដល់ក្រុមកម្មករ។ ក្រុមកម្មករនៅរោងចក្រមិថុនាមួយចំនួនបាននិយាយថា ប្រសិនណាបើលោកសម រង្ស៊ី ដឹកនាំធ្វើ មហាបាតុកម្មពួកគេនឹងចូលរួមពីព្រោះការទាមទារអស់រយៈពេលមួយខែប្រាំបីថ្ងៃកន្លងមកនេះ មិនទទួលបានលទ្ធផលទេ។ កម្មកររោងចក្រម្នាក់បានប្រាប់វីអូអេថា៖ «ប្រហែលជាចូលរួម។ មិនដឹងយ៉ាងម៉េចដែរ ខ្ញុំវាមិនទាន់ដឹងដែរពីព្រោះខ្ញុំធ្វើកូដកម្មអត់មានខុសច្បាប់ទេ។ អញ្ចឹងកម្មករខាងខ្ញុំទាំងអស់គ្នាត្រូវតែចូលរួម។ ខ្ញុំដឹងថា ជាគណបក្សប្រឆាំងហើយ តែនៅតែចូលរួម ព្រោះដើម្បីលុយពួកខ្ញុំ»។ រោចក្រកាត់ដេរសម្លៀកបំពាក់មិថុនា ដែលមានទីតាំងនៅក្នុងខណ្ឌសែនសុខ រាជធានីភ្នំពេញបាន បិទទ្វារមួយរយៈ បន្ទាប់ពីភ្លើងឆាប់ឆេះកាលពីចុងខែមីនា ហើយក្រោយមកក្រុមកម្មករបានបន្តធ្វើកូដកម្ម ដើម្បីទាមទារប្រាក់អតីតភាពការងាររហូតមកដល់បច្ចុប្បន្ននេះ។ លោកខៀវ សាវុធ អនុប្រធាននាយកដ្ឋានវិវាទការងាររបស់ក្រសួងការងារ បានមានប្រសាសន៍ថា ជម្លោះនេះក្រសួងការងារ បានបញ្ជូនទៅក្រុមប្រឹក្សាអាជ្ញាកណ្តាល ដើម្បីដោះស្រាយហើយ។ លោកបានប្រាប់វីអូអេខ្មែរថា៖ «យើងបានដោះស្រាយសម្របសម្រួលហើយ តែនៅមិនសះជាគ្នា។ ក៏ប៉ុន្តែឥឡូវ តាមរយៈឯកឧត្តមរដ្ឋមន្រ្តីដាក់ទៅក្រុមប្រឹក្សាអាជ្ញាកណ្តាលដោះស្រាយបន្ត»។ លោក អ៊ី សំភី ប្រធានផ្នែកបណ្តុះបណ្តាល និងទំនាក់ទំនងនៃក្រុមប្រឹក្សាអាជ្ញាកណ្តាលបានមាន ប្រសាសន៍ថា លោកបានទទួលពាក្យបណ្តឹងរួចហើយ និងក្រុមប្រឹក្សាអាជ្ញាកណ្តាល និងបើកសវនាការ នៅថ្ងៃអង្គារ៍។ លោកថ្លែងថា៖ «និយាយទៅ បើតាមនីតិវិធីគឺទាក់ទងទៅសំណុំរឿងហ្នឹង ក្រុមប្រឹក្សាអាជ្ញាកណ្តាល គាត់នឹងចេញសេចក្តីបង្គាប់នៅក្នុងខែ៦ (ថ្ងៃទី០២ ខែមិថុនា ឆ្នាំ២០១១)»។ លោក មឿង តុលា ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍បានមានប្រសាសន៍ថា ថៅកែរោងចក្រត្រូវតែផ្តល់សំណងជំងឺចិត្តដល់ក្រុមកម្មករ។ លោកបន្តទៀតថា៖ «សម្រាកប្រចាំឆ្នាំវាមានដប់ប្រាំបីថ្ងៃ ក្នុងមួយឆ្នាំ។ អញ្ចឹងក្នុងរយៈពេលមួយឆ្នាំចុងក្រោយកម្មករ គាត់អត់បានប្រើប្រាស់អស់ទេ គេត្រូវទូទាត់ជាប្រាក់វិញ»។ លោក មឿង តុលា បានមានប្រសាសន៍ទៀតថា ការដឹកនាំធ្វើមហាបាតុកម្មរបស់គណបក្សប្រឆាំង គឺជារឿងល្អមួយ ក៏ប៉ុន្តែមិនមែនជាដំណោះស្រាយទេ៕ This posting includes an audio/video/photo media file: Download Now |
| របាយការណ៍អង្កេត៖ គ្រូមានទុទិដ្ឋិនិយមខ្លាំងចំពោះគុណភាពអប់រំកម្ពុជា Posted: 09 May 2011 11:12 AM PDT សមាគមគ្រូបង្រៀនកម្ពុជាឯករាជ្យឲ្យដឹងនៅថ្ងៃច័ន្ទនេះថា គុណភាពនៃការអប់រំនៅតាមសាលារៀនរដ្ឋនៅកម្ពុជាបានធ្លាក់ចុះដល់កម្រិតប្រកាសអាសន្ន។ របាយការណ៍អង្កេតលើវិស័យអប់រំឆ្នាំ២០១១របស់សមាគមគ្រូបង្រៀនកម្ពុជាឯករាជ្យបានធ្វើសម្ភាសន៍គ្រូបង្រៀនចំនួន៧២៦នាក់នៅក្នុង១៧ខេត្តក្រុង ដូចជា រាជធានីភ្នំពេញ ខេត្តកំពង់ចាម សៀមរាប ព្រៃវែង បាត់ដំបង ស្វាយរៀង កណ្តាល បន្ទាយមានជ័យ ពោធិ៍សាត់ជាដើម ចាប់ពីថ្ងៃទី១ដល់ថ្ងៃទី១៥ខែមិនាឆ្នាំ២០១១។ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានថ្លែងប្រាប់ក្រុមអ្នកយកព័ត៌មាន ថា អ្នកផ្តល់ចម្លើយ៤៥,៥ភាគរយបានឆ្លើយថា ការអប់រំគ្មានការអភិវឌ្ឍ និង៣៩,៤ភាគរយថា ការអប់រំគ្មានគុណភាពទេ។ ប៉ុន្តែជាង១៤ ភាគរយបានឆ្លើយថា ការអប់រំមានការអភិវឌ្ឍច្រើន។ លោករ៉ុង ឈុនថ្លែងថា៖ «យើងមានការព្រួយបារម្ភជុំវិញបញ្ហាគុណភាពនៃការអប់រំនៅកម្ពុជា។ គុណភាពនៃការអប់រំនៅកម្ពុជាបានមកដល់កន្លែងមួយប្រកាសអាសន្នហើយ»។ របាយការណ៍អង្កេតនេះបានបង្ហាញថា អ្នកផ្តល់ចម្លើយ៥២ភាគរយឆ្លើយថា ការដំឡើងប្រាក់បៀវត្សរ៍គឺជាការចាំបាច់ពីព្រោះប្រាក់បៀវត្សរ៍ធ្វើឱ្យប៉ះពាល់ដល់គុណភាពនៃការអប់រំ។ អ្នកផ្តល់ចម្លើយ១៥ភាគរយថា ត្រូវការតម្លាភាព និងការផ្លាស់ប្តូរនាយកសាលាដែលដឹកនាំមិនល្អ។ របាយការណ៍អង្កេតនេះបានបញ្ជាក់ថា បញ្ហាបីធំៗប៉ះពាល់ដល់ការបង្រៀនរបស់គ្រូគឺ២៤ភាគរយបានបណ្តាលមកពីប្រាក់ខែ ១៧ភាគរយបានបណ្តាលមកពីអំពើពុករលួយ និង១៥ភាគរយបាន បណ្តាលមកពីការខ្វះខាតសម្ភារៈ និងការមិនបានបណ្តុះបណ្តាលគ្រូ។ របាយការណ៍នេះបានរកឃើញថា អ្នកផ្តល់ចម្លើយ៨៥ភាគរយមិនបានចូលរួមធ្វើសេចក្តីសម្រេច ចិត្ត ក្នុងនោះ៣៧ភាគរយបាននិយាយថា នាយកសាលាមិនចង់ធ្វើការប្រឹក្សាជាមួយពួកគេ និង២៥ភាគរយបានលើកឡើងអំពីការរើសអើងប្រឆាំងនឹងពួកគេ។ របាយការណ៍នេះក៏បានបន្ថែមថា អ្នកផ្តល់ចម្លើយជាង៤៣ភាគរយមិនទាន់បានយល់ច្បាស់ និងមិនធ្លាប់ឮអំពីផែនការយុទ្ធសាស្ត្រអប់រំនៅឡើយ និង៥៦ភាគរយបានដឹងអំពីផែនការយុទ្ធសាស្ត្រអប់រំនោះ។ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានថ្លែងថា លទ្ធផលអង្កេតនេះជា ឯកសារមួយសម្រាប់ឱ្យក្រសួងអប់រំធ្វើជាមូលដ្ឋានក្នុងការកែលំអរបញ្ហាអប់រំនៅកម្ពុជា ហើយរបាយការណ៍នេះត្រូវបានបញ្ជូនទៅក្រសួងអប់រំនៅថ្ងៃនេះ។ លោក អ៊ូ អេង អគ្គនាយកនៃអគ្គនាយកដ្ឋាននៃក្រសួងអប់រំបានបដិសេធការរកឃើញរបស់របាយការណ៍អង្កេតលើវិស័យអប់រំឆ្នាំ២០១១របស់សមាគមគ្រូបង្រៀនកម្ពុជាឯករាជ្យ។ លោកអ៊ូ អេង បានប្រាប់វីអូអេខ្មែរថា៖ «សេចក្តីប្រកាសរបស់គាត់អត់ត្រឹមត្រូវទេ។ អត់ពិតទេ។ ក្រសួងអប់រំអត់ទទួលយកបានទេ ហើយវិស័យអប់រំនៅកម្ពុជាមិនធ្លាក់ចុះដល់ថ្នាក់ដូចគាត់និយាយនោះទេ»៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
