VOA News: ព័ត៌មាន: “សហព្រះរាជអាជ្ញាកម្ពុជាជំទាស់ការស៊ើបអង្កេតសំណុំរឿង០០៣” plus 2 more |
- សហព្រះរាជអាជ្ញាកម្ពុជាជំទាស់ការស៊ើបអង្កេតសំណុំរឿង០០៣
- ការស្ទង់មតិ៖ ពលរដ្ឋខ្មែរខ្វះការយល់ដឹងអំពីការផ្លាស់ប្តូរអាកាសធាតុ
- អង្គការសិទ្ធិមនុស្សនិងគណៈកម្មាធិការសិទ្ធិមនុស្សរបស់រដ្ឋាភិបាលបង្កើតក្រុមការងាររួម
| សហព្រះរាជអាជ្ញាកម្ពុជាជំទាស់ការស៊ើបអង្កេតសំណុំរឿង០០៣ Posted: 10 May 2011 01:48 PM PDT សហព្រះរាជអាជ្ញាកម្ពុជា លោកស្រី ជា លាង បានជំទាស់ជាថ្មីម្តងទៀតនៅថ្ងៃអង្គារ៍នេះ ចំពោះការតាមស៊ើបអង្កេតនិងចាប់ខ្លួនជនសង្ស័យនៅក្នុងសំណុំរឿង០០៣យកមកកាត់ទោស ដោយសារលោកស្រី សំអាងថា ពួកគេមិនស្ថិតនៅក្នុងយុត្តាធិការរបស់សាលាក្តីខ្មែរក្រហមនោះទេ។ តាមការលើកឡើងក្រៅផ្លូវការរបស់ជនរងគ្រោះ និងសាច់ញាតិជនរងគ្រោះដោយរបបខ្មែរក្រហម ចំនួនពីរនាក់បានឲ្យដឹងថា ជនសង្ស័យនៅក្នុងសំណុំរឿងទីបីនេះ មានពីររូប គឺលោកមាស មុត ដែលជា អតីតមេបញ្ជាការកងទ័ពជើងទឹកខ្មែរក្រហម និងលោក ស៊ូ ម៉េត អតីតមេបញ្ជាការកងទ័ពអាកាស។ លោកស្រី ជា លាង បានលើកឡើងនៅក្នុងសេចក្តីប្រកាសព័ត៌មាននៅថ្ងៃអង្គារន៍នេះថា ជនសង្ស័យ ដែលត្រូវបានលើកឡើងនៅក្នុងសំណុំរឿង០០៣មិនមែនជាមេដឹកនាំជាន់ខ្ពស់ហើយក៏មិនមែនជាអ្នកទទួលខុសត្រូវខ្ពស់បំផុតនៃរបបខ្មែរក្រហមនោះដែរ។ ពោលគឺមានតែជនពីរក្រុមនេះទេ ដែលសាលាក្តី ខ្មែរក្រហមអាចធ្វើការស៊ើបអង្កេតនិងតាមចាប់ខ្លួនយកមកកាត់ទោសបាន។ សេចក្តីសំអាងខាងលើនេះ ធ្វើឡើងមួយថ្ងៃបន្ទាប់ពីសហព្រះរាជអាជ្ញាអន្តរជាតិ លោក អាន់ឌ្រូ ខេលី (Andrew Cayley) បានស្នើសុំជាឯកតោភាគីឲ្យសហចៅក្រមស៊ើបអង្កេតធ្វើការស៊ើបអង្កេតជាបន្ថែមទៀត និងបង្ហាញអត្តសញ្ញាណជនសង្ស័យនៅក្នុងសំណុំរឿង០០៣ បន្ទាប់ពីសហចៅក្រមស៊ើបអង្កេតបាន ប្រកាសថា ខ្លួនបានស៊ើបអង្កេតសំណុំរឿងនេះ ចប់សព្វគ្រប់រួចហើយ។ រដ្ឋាភិបាលរបស់ប្រទេសកម្ពុជា បានជំទាស់យ៉ាងខ្លាំងក្លាទៅ និងការតាមស៊ើបអង្កេតនៅក្នុងសំណុំ រឿង០០៣ និងសំណុំរឿង០០៤ ដែលមានជនសង្ស័យសរុបចំនួនប្រាំនាក់ ដែលស្នើដោយសហព្រះរាជ អាជ្ញាបរទេសនោះ។ សហព្រះរាជអាជ្ញាកម្ពុជា លោកស្រី ជា លាង ក៏បានបង្ហាញជំហរស្របគ្នាជាមួយរដ្ឋាភិបាលខ្មែរដែរ ដែលត្រូវគេលើកយកមករិះគន់មិនចេះចប់អំពីការជ្រៀតជ្រែកផ្នែកនយោបាយរបស់រដ្ឋាភិបាលទៅលើ សាលាក្តីខ្មែរក្រហម។ លោកស្រី Clair Duffy អ្នកសម្របសម្រួលរបស់អង្គការយុត្តិធម៌សង្គមសេរី OSJI របស់សហរដ្ឋ អាមេរិក ដែលកំពុងតែតាមឃ្លាំមើលដំណើរការសាលាក្តីខ្មែរក្រហមមានប្រសាសន៍ថា ការបង្ហាញជំហរ របស់លោកស្រីជា លាង មិនមានអ្វីគួរឲ្យភ្ញាក់ផ្អើលនោះទេ។ «ខ្ញុំគិតថា វាច្បាស់ណាស់ថា មានការជ្រៀតជ្រែកពីរដ្ឋាភិបាលកម្ពុជាក្នុងសំណុំរឿង០០៣ និង០០៤ ហើយខ្ញុំគិតថាសេចក្តីថែ្លងការណ៍របស់អ្នកស្រី ជា លាង មិនបានបន្ថែមអ្វីថ្មីទៅលើជំហររបស់អ្នកស្រី ដែលយើងដឹងរួចទៅហើយនោះទេ គឺតាំងពីពេលដែលសំណុំរឿងទាំងពីរត្រូវបានបញ្ជូនទៅស៊ើបអង្កេតនោះ»។ សហព្រះរាជអាជ្ញាអន្តរជាតិ និងសហព្រះរាជអាជ្ញាជាតិ បានខ្វែងគំនិតគ្នាយ៉ាងខ្លាំងក្លាចំពោះការបង្គាប់ឲ្យមានការស៊ើបអង្កេតនៅក្នុងសំណុំរឿង០០៣និង០០៤។ សហចៅក្រមស៊ើបអង្កេតជាតិ ក៏បានបង្ហាញអំពីការមិនចូលរួមរបស់ខ្លួននៅក្នុងការស៊ើបអង្កេតនេះ ដែរ។ ដូច្នេះសហចៅក្រមស៊ើបអង្កេតអន្តរជាតិ បានសម្រេចធ្វើការស៊ើបអង្កេតជាលក្ខណៈឯកតោភាគីទៅ លើសំណុំរឿងទាំងពីរនេះ៕ This posting includes an audio/video/photo media file: Download Now |
| ការស្ទង់មតិ៖ ពលរដ្ឋខ្មែរខ្វះការយល់ដឹងអំពីការផ្លាស់ប្តូរអាកាសធាតុ Posted: 10 May 2011 12:51 PM PDT ការស្ទង់មតិថ្មីមួយបង្ហាញថា ប្រជាជនកម្ពុជាភាគច្រើនមិនយល់អំពីមូលហេតុពិតប្រាកដនៃការប្រែប្រួលអាកាសធាតុ ដោយសារពួកគេមានកង្វះព័ត៌មានច្បាស់លាស់ទាក់ទងនឹងការប្រែប្រួលអាកាសធាតុ។ របាយការណ៍ស្ទង់មតិថ្មីនេះធ្វើ់ឡើងដោយអង្គការ BBC World Service Trust ហើយបានបង្ហាញថា ប្រជាជនកម្ពុជាភាគច្រើនធ្លាប់ឮពាក្យថា«ការប្រែប្រួលអាកាសធាតុ» ឬ «ការកើនឡើងកម្តៅផែនដី» ប៉ុន្តែពួកគេមិនទាន់យល់ច្បាស់អំពីមូលហេតុដែលបណ្តាលឲ្យមានបាតុភូតទាំងនេះនៅឡើយទេ។ ការស្ទង់មតិដែលបានផ្សព្វផ្សាយជាសាធារណៈក្នុងទីក្រុងភ្នំពេញនៅថ្ងៃអង្គារ៍នេះ បានរកឃើញថា ៨៤%ក្នុងចំណោមអ្នកឆ្លើយសំណួរទាំងអស់ ធ្លាប់ឮពាក្យ «ការប្រែប្រួលអាកាសធាតុ» ហើយ៧០% នៃពួកគេ ធ្លាប់ឮពាក្យ «ការកើនឡើងកម្តៅផែនដី» តាមរយៈប្រព័ន្ធផ្សព្វផ្សាយនិងការនិយាយតៗគ្នា ប៉ុន្តែពួកគេភាគច្រើនបកស្រាយពន្យល់ពាក្យទាំងនេះ ដោយផ្សាភ្ជាប់ជាមួយនឹងជំងឺ បញ្ហាដាំដុះ គ្រោះរាំងស្ងួត កំណើនសីតុណ្ហភាព ទិន្នផលធ្លាក់ចុះ និងកង្វះទឹកប្រើប្រាស់ជាដើម។ មានអ្នកឆ្លើយតបតិចតួចណាស់ដែលបានពន្យល់ពីការប្រែប្រួលអាកាសធាតុដោយផ្សាភ្ជាប់ទៅនឹងការបំពុលចេញពីរោងចក្រឧស្សាហកម្មនិងការប្រើប្រាស់យានជំនិះ។ អ្នកឆ្លើយតបភាគច្រើនមិនបានពន្យល់មូលហេតុនៃការប្រែប្រួលអាកាសធាតុថា បណ្តាលមកពីការបញ្ចេញឧស្ម័នផ្ទះកញ្ចក់សាកលនោះទេ ប៉ុន្តែពួកគេ ពន្យល់ថាមូលហេតុនោះគឺមកពីការកាប់បំផ្លាញព្រៃឈើនៅក្នុងប្រទេសកម្ពុជា។ ការសិក្សាដែលផ្តល់ថវិកាដោយក្រសួងបរិស្ថានកម្ពុជាក្រោមការគាំទ្ររបស់អង្គការOxfam, Danida និងកម្មវិធីអភិវឌ្ឍសហប្រជាជាតិ UNDP បានស្ទាបស្ទង់ការយល់ឃើញរបស់ប្រជាជនកម្ពុជាចំនួន២.៤០១នាក់ ដែលជាកសិករ អ្នកនេសាទ គ្រូបង្រៀន ពាណិជ្ជករ ស្រ្តីមេផ្ទះ និងធ្វើបទសម្ភាសន៍បែបស៊ីជម្រៅជាមួយបុគ្គលសំខាន់ៗចំនួន១០១នាក់មកពីផ្នែកប្រព័ន្ធផ្សព្វផ្សាយ ឧស្សាហកម្ម និងជាមន្រ្តីរដ្ឋាភិបាលថ្នាក់ជាតិនិងថ្នាក់ខេត្ត នៅទូទាំង២៤ខេត្ត-ក្រុងនៃប្រទេសកម្ពុជា។ លោក Charles Hamilton នាយកអង្គការ BBC World Service Trust ប្រចាំប្រទេសកម្ពុជា បានថ្លែងនៅក្នុងកម្មវិធីផ្សព្វផ្សាយរបាយការណ៍ស្ទង់មតិនេះថា មានចន្លោះប្រហោងនិងការយល់ខុសជាច្រើនអំពីការប្រែប្រួលអាកាសធាតុនេះ ដោយសារកង្វះព័ត៌មានដែលមានលក្ខណៈងាយយល់សម្រាប់ប្រជាសហគមន៍មូលដ្ឋានទាក់ទងនឹងបញ្ហាប្រែប្រួលអាកាសធាតុនេះ។ «យើងត្រូវប្រើភាសាឲ្យចំ ហើយសាមញ្ញ មិនមែនស្មុគស្មាញ ដូចជាការនិយាយអំពីការកាត់បន្ថយឬការបន្ស៊ាំទៅនឹងការប្រែប្រួលអាកាសធាតុជាដើម។ តើវាមានន័យយ៉ាងដូចម្តេចចំពោះកសិករឬអ្នកនេសាទ? អ្នកទាំងនេះហើយគួរតែជាទស្សនិកជនសំខាន់របស់យើងនៅក្នុងប្រទេសកម្ពុជា ពោលគឺអ្នកដែលមានការអប់រំនៅមានកម្រិត ដែលត្រូវការព័ត៌មានច្បាស់លាស់ថាតើវាមានន័យយ៉ាងដូចម្តេចចំពោះជីវិតរស់នៅរបស់ពួកគេ។ ដូច្នេះព័ត៌មានចាំបាច់ត្រូវតែមានការពាក់ព័ន្ធនឹងពួកគេ។» លោកទេសរដ្ឋមន្ត្រី ម៉ុក ម៉ារ៉េត រដ្ឋមន្ត្រីក្រសួងបរិស្ថាន មានប្រសាសន៍ថារបាយការណ៍ស្ទង់មតិនេះគឺជាមូលដ្ឋានព័ត៌មានដ៏ចាំបាច់មួយសម្រាប់រដ្ឋាភិបាលនិងអ្នកពាក់ព័ន្ធនានា ដើម្បីយកទៅប្រើប្រាស់ក្នុងការរៀបចំកសាងផែនការយុទ្ធសាស្ត្រនិងសកម្មភាពផ្សព្វផ្សាយបន្ថែម ដើម្បីលើកកម្ពស់ចំណេះដឹងរបស់ប្រជាជនកម្ពុជាទូទៅ។ «សេចក្តីសន្និដ្ឋាននិងអនុសាសន៍នានាដែលបានតាក់តែងឡើងក្នុងរបាយការណ៍នេះ នឹងជំរុញលើកកម្ពស់ចំណេះដឹងសាធារណជនទូទៅនៅកម្ពុជានិងជំរុញឲ្យមានការចូលរួមការអនុវត្តការឆ្លើយតបទៅនឹងការប្រែប្រួលអាកាសធាតុឲ្យកាន់តែសមស្រប ច្បាស់លាស់ សកម្មនិងមានប្រសិទ្ធិភាព។» ប៉ុន្តែលោកទេសរដ្ឋមន្ត្រី ម៉ុក ម៉ារ៉េត មិនបានឆ្លើយតបឲ្យចំទៅនឹងសំណួររបស់អ្នកសារព័ត៌មានថា តើក្រសួងរបស់លោកនឹងមានសកម្មភាពជាក់ស្តែងណាមួយ ដើម្បីបញ្ជ្រាបការអប់រំឬលើកកម្ពស់ចំណេះដឹងដល់ប្រជាពលរដ្ឋកម្ពុជានោះទេ។ យ៉ាងណាក៏ដោយ លោក ប្រាយអ៊ិន ឡន់ (Brian Lund) នាយកអង្គការ Oxfam ប្រចាំតំបន់អាស៊ីខាងកើត បានថ្លែងថា ការអប់រំ និងព័ត៌មាន ដើរតួនាទីយ៉ាងសំខាន់ក្នុងការផ្តល់អំណាចនិងធ្វើឲ្យប្រជាពលរដ្ឋកម្ពុជា អាចបន្ស៊ាំខ្លួនទៅនឹងការប្រែប្រួលអាកាសធាតុនិងអាចស្តារខ្លួនឯងឡើងវិញបន្ទាប់ពីរងផលប៉ះពាល់ ដើម្បីធានាដល់ការអភិវឌ្ឍប្រកបដោយនិរន្តរភាពរបស់ពួកគេ៕ This posting includes an audio/video/photo media file: Download Now |
| Posted: 10 May 2011 11:47 AM PDT ក្រុមមន្ត្រីបាននិយាយនៅថ្ងៃអង្គារនេះថា គណៈកម្មាធិការសិទ្ធិមនុស្សរបស់រដ្ឋាភិបាល និង សមាគមការពារសិទ្ធិមនុស្សអាដហុក (Adhoc) បានព្រមព្រៀងគ្នាបង្កើតក្រុមការងារមួយដើម្បីធ្វើការស៊ើបអង្កេតលើករណីជម្លោះដីធ្លី ដែលកំពុងតែកើតមានយ៉ាងចម្រូងចម្រាស់នៅក្នុងប្រទេសកម្ពុជា។ លោក ឱម យិនទៀង ប្រធានគណៈកម្មាធិការសិទ្ធិមនុស្សរបស់រដ្ឋាភិបាល បានថ្លែងក្នុងពិធីបើកសិក្ខាសាលាស្តីពីស្ថានភាពបច្ចុប្បន្ននៃបញ្ហាដីធ្លី និងយន្តការដោះស្រាយនៅសណ្ឋាគារកាំបូឌីយ៉ាណា (Cambodiana) ថា ក្រុមការងារនេះមានភារកិច្ចចុះទៅស្រាវជ្រាវរកការពិតក្នុងករណីជម្លោះដីធ្លីនីមួយៗសម្រាប់ធ្វើជាជំនួយការដល់អ្នកមានអំណាចដោះស្រាយ។ «ខ្ញុំបានព្រមព្រៀងជាមួយលោក ធន សារ៉ាយ ថា គណៈកម្មាធិការសិទ្ធិមនុស្សរបស់រដ្ឋាភិបាលនិងសមាគមសិទ្ធិមនុស្ស Adhoc របស់លោក ធន សារ៉ាយ រួមគ្នាជាក្រុមការងារ ចុះដោះស្រាយ ចុះពិនិត្យករណីទំនាស់ដីធ្លីនីមួយៗ ហើយយើងធ្វើរបាយការណ៍រួមគ្នា។ ការយល់ឃើញរបស់សមាគមសិទ្ធិមនុស្ស Adhoc និងគណៈកម្មាធិការសិទ្ធិមនុស្សរបស់រដ្ឋាភិបាល ចុះក្នុងរបាយការណ៍រួមគ្នានេះ។ វាមិនមែនមានន័យថា ធ្វើក្រុមការងារជាមួយគ្នាត្រូវតែនិយាយភាសាតែមួយទេ។ ប៉ុន្តែក្រុមការងារនេះចុះទៅមើលបញ្ហាដូចគ្នា»។ លោក ឱម យិនទៀង បានបន្តថា នេះជាវិធីដោះស្រាយជាក់ស្តែងលើជម្លោះដីធ្លីនេះ ហើយការរកឃើញ អំពីមូលហេតុនៃជម្លោះដីធ្លីនេះ នឹងដាក់ជូនគណៈកម្មាធិការដោះស្រាយជម្លោះដីធ្លីរដ្ឋាភិបាលនិង តុលាការ ដើម្បីពិចារណា។ «យើងធ្វើកាតព្វកិច្ចរបស់យើងចប់។ ប៉ុន្តែយើងមិនតម្រូវឱ្យគេគោរពតាមការសម្រេចរបស់យើង ពីព្រោះ យោបល់របស់យើងមិនមែនជាសាលក្រមទេ។ ការសម្រេចចិត្តរបស់យើងគឺជាពន្លឺ»។ ការបង្ក្រាបហិង្សារបស់ប៉ូលីសទៅលើអ្នកភូមិបឹងកក់កាលពីថ្ងៃទី២១ខែមេសាឆ្នាំ២០១១៖
ជនរងគ្រោះពីទំនាស់ដីធ្លីក្នុងខេត្តព្រះសីហនុ៖ លោក ធន សារ៉ាយ ប្រធានសមាគមសិទ្ធិមនុស្ស Adhoc បានថ្លែងថា ការធ្វើការរួមគ្នានេះ គឺជាការល្អជាងការវាយប្រហារគ្នាទៅវិញទៅមក។ លោក ធន សារ៉ាយ បានបញ្ជាក់ថា យើងចង់ផ្តល់ឱ្យអាជ្ញាធរនូវការរកឃើញ សក្ខីកម្ម និង អនុសាសន៍ របស់យើងក្នុងការដោះស្រាយបញ្ហាជម្លោះដីធ្លី។ យើងទុកឱ្យតុលាការឬអាជ្ញាធរដោះស្រាយជម្លោះដីធ្លី ឬ រដ្ឋាភិបាលដោះស្រាយនូវអ្វីដែលយើងបានរកឃើញ។ «យើងរួមគ្នាដើម្បីរកការពិតមួយ។ យើងបានជួយដល់រឿងករណីដ៏ស្មុគស្មាញខ្លះដែលវាជាការល្អ។ កិច្ចសហការនេះខ្ទប់មាត់របស់យើងមិនឱ្យនិយាយទេ។ យើងនៅតែរក្សាសិទ្ធិក្នុងការនិយាយអ្វីនោះទេ។ បើក្រុមការងារនេះដំណើរការល្អ វាចំណេញដល់ជនរងគ្រោះ»។ លោកតំណាងរាស្ត្រ យ៉ែម បុញ្ញឫទ្ធិ អគ្គលេខាធិការគណបក្សសិទ្ធិមនុស្ស បានថ្លែងថា ក្រុមការងារនេះ ជាជំហ៊ានល្អ ហើយវាអាចមានប្រសិទ្ធិភាព បើភាគីទាំងពីរមានឆន្ទៈពិតប្រាកដដើម្បី ដោះស្រាយបញ្ហាជម្លោះដីធ្លីនេះ។ «យើងទុកឱកាសឱ្យគាត់ (ភាគីទាំងពីរ) ធ្វើការមួយជំហ៊ានសិន ប៉ុន្តែក្តីសង្ឃឹមរបស់យើងហាក់ដូចជា មានតិចតួចណាស់ ដោយសារមូលហេតុមិនទទួលស្គាល់ការពិតនៃបញ្ហា»។ លោក នី ចរិយា ប្រធានផ្នែកស៊ើបអង្កេតនៃសមាគមសិទ្ធិមនុស្ស Adhoc បានថ្លែងថា បញ្ហាជម្លោះដីធ្លីគឺជាកង្វល់ដ៏ធំនៅកម្ពុជា ដោយសមាគមសិទ្ធិមនុស្សទទួលបានបញ្ហាជម្លោះដីធ្លីប្រមាណ២០០ករណីនិងការចាប់ខ្លួនអ្នកតវ៉ារឿងជម្លោះដីធ្លីជាង៣០០នាក់នៅក្នុងឆ្នាំ២០១០៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
