VOA News: ព័ត៌មាន: “មរណភាពលោករាជ សម្បត្តិ ត្រូវគេចាត់ទុកថាជាការបាត់បង់ដ៍ធំសម្រាប់កម្ពុជា” plus 4 more |
- មរណភាពលោករាជ សម្បត្តិ ត្រូវគេចាត់ទុកថាជាការបាត់បង់ដ៍ធំសម្រាប់កម្ពុជា
- បទព្រហ្មទណ្ឌមិនគួរត្រូវបានប្រើប្រឆាំងនឹងអ្នកតវ៉ាជម្លោះដីធ្លី
- ជំងឺរបស់លោករាជ សម្បត្តិ មិនប៉ះពាល់នឹងដំណើរការសាលាក្តីខ្មែរក្រហមទេ
- ដើមបណ្តឹងទាមទារឱ្យតុលាការបញ្ចេញព័ត៌មានថែមទៀត
- ខ្មែរអាមេរិកាំងត្រៀមស្នើឱ្យសភាអាមេរិកាំងជួយ
| មរណភាពលោករាជ សម្បត្តិ ត្រូវគេចាត់ទុកថាជាការបាត់បង់ដ៍ធំសម្រាប់កម្ពុជា Posted: 11 May 2011 06:47 PM PDT លោក រាជ សម្បត្តិ អ្នកនាំពាក្យសាលាក្តីខ្មែរក្រហមបានទទួលមរណភាពកាលពីយប់ថ្ងៃពុធទី១១ ឆ្នាំ២០១១ ដោយសារជំងឺលើសឈាម ឬដាច់សរសៃឈាម។ ជាមួយគ្នានឹងការចូលរួមមរណទុក្ខដ៏ក្រៀមក្រំ ហើយនឹងការចងចាំគុណសម្បត្តិ ដ៏ច្រើនរបស់លោករាជ សម្បត្តិផងនោះ អ្នកយកព័ត៌មានកម្ពុជាមិត្តភក្តិ និងមន្ត្រីរដ្ឋាភិបាលបានចាត់ទុកថា មរណភាពនេះគឺជាការបាត់បង់ដ៏ធំសម្រាប់កម្ពុជា។ លោក រាជ សម្បត្តិ អាយុ៤៧ឆ្នាំមានកូន៣នាក់ ធ្លាប់ធ្វើជាអ្នកយកព័ត៌មាននៃទីភ្នាក់ងារព័ត៌មានបារាំងAFP តាំងពីទសវត្ស៩០ ធ្លាប់ធ្វើជាគ្រូបណ្តុះបណ្តាល វិស័យព័ត៌មាននៅសាកលវិទ្យាល័យភូមិន្ទភ្នំពេញ បន្ទាប់ពីលោកបានទទួលសញ្ញាប័ត្រអនុបណ្ឌិតផ្នែកសារព័ត៌មាននៅសាកលវិទ្យាល័យខូឡំប៊ៀ (Columbia University) ស.រ.អា. ដ៏ល្បីល្បាញ។ កាលពីឆ្នាំ២០០៦ លោកបានចូលបម្រើការងារជាអ្នកនាំពាក្យសាលាក្តីខ្មែរក្រហម បន្ទាប់មកត្រូវបានដំឡើងឋានៈជាប្រធានផ្នែកការិយាល័យកិច្ចការសារធារណៈនៃសាលាក្តីខ្មែរក្រហម។ លោកកឹម គុណវឌ្ឍន៍ អគ្គនាយកទូរទស្សន៍ជាតិកម្ពុជាដែលចូលរួមបណ្តុះ បណ្តាលវគ្គវិជ្ជាជីវៈសារព័ត៌មានជាមួយលោករាជ សម្បត្តិ បានថ្លែងទាំងក្រៀមក្រំថា៖ មរណភាពលោករាជ សម្បត្តិគឺជាការបាត់បង់ដល់កម្ពុជា ជាពិសេសផ្នែកធនធានមនុស្ស។ «អ្វីដែលយើងសោកស្តាយខ្លាំងបំផុតនោះគឺសមត្ថភាពបុគ្គល ហើយនឹងបទ ពិសោធន៍ពោរពេញទៅដោយសមត្ថភាពនៅក្នុងវិស័យព័ត៌មានហើយក្នុងវិស័យ ផ្សព្វផ្សាយ។ ជាពិសេសនោះគឺការបម្រើរយៈពេលបីឆ្នាំកន្លងទៅនៅឯសាលាក្តី ខ្មែរក្រហមដែលលោករាជ សម្បត្តិបានបម្រើវិស័យនេះយ៉ាងសក្តិសមនិងមាន ប្រសិទ្ធិភាព ដោយបានផ្តល់ភាពងាយស្រួលនិងផ្តល់ទំនាក់ទំនងដល់គ្រប់សារ ព័ត៌មានទាំងអស់ ដល់អ្នកសារព័ត៌មានជាតិនិងអន្តរជាតិ ដែលខ្ញុំចង់និយាយថា ផ្តល់ការគាំទ្រយ៉ាងខ្លាំងដល់ទូរទស្សន៍ជាតិកម្ពុជានៅគ្រប់វេទិកានៃដំណើរការនៃ សាលាក្តីខ្មែរក្រហម»។ លោកគុណវឌ្ឍន៍បានបរិយាយថា លោករាជ សម្បត្តិជាមនុស្សរស់រាយ ជាអ្នក មានសមត្ថភាពអាចធ្វើឲ្យស្ថានការណ៍ស្ងប់ រវាងអ្នកដើមចោទ និងចុងចោទក្នុង សាលាក្តីខ្មែរក្រហម។ លោក ទៀង សុភៈវិជ្ជា ប្រធានស្តីទីនៃសិក្ខាល័យប្រព័ន្ធផ្សព្វផ្សាយនិងសារគមនាគមន៍នៃសាកលវិទ្យាល័យភូមិន្ទភ្នំពេញ បានសម្តែងការសោកស្តាយចំពោះមរណភាពលោករាជ សម្បត្តិដោយថ្លែងថា លោករាជ សម្បត្តិជាអ្នកកាសែតដ៏ល្បីក្នុងចំណោមអ្នកល្បីដែលមានចំនួនតិចក្នុងប្រទេសកម្ពុជា ហើយមានចំណេះដឹងខ្ពស់ខាងកាសែត និងជាអ្នកនាំពាក្យដ៏ល្បីសម្រាប់សាលាក្តីខ្មែរក្រហម។ «ការបាត់បង់គាត់គឺជាការបាត់បង់ដ៏ធំ គឺជាការបាត់បង់ធនធានមនុស្សមួយដ៏ធំសម្រាប់ជាតិក៏ដូចជាសម្រាប់សាលាក្តីខ្មែរក្រហមក៏ដូចវិស័យសារព័ត៌មានក៏ដូចសាលាព័ត៌មានទាំងមូលដែរ បាទ»។ លោក សុភៈវិជ្ជាបានបរិយាយថា លោករាជ សម្បត្តិជាមនុស្សល្អរស់រាយ ចូល ចិត្តលែងសើចច្រើន ចូលចិត្តសប្បាយ តែហ្មត់ចត់នឹងការងារ ។ លោក សុភៈវិជ្ជាបានដកស្រង់ការរៀបរាប់របស់គ្រួសារលោករាជ សម្បត្តិមកបញ្ជាក់ថា៖ គាត់មានជំងឺលើសឈាមយូរហើយ តែមិនធ្លាប់ធ្វើទុក្ខខ្លាំងទេ៖ «គ្រួសារនិងបងប្អូនគាត់ប្រាប់ថា គាត់មានជំងឺលើសឈាមជិត១០ឆ្នាំ ហើយ ប៉ុន្តែវាអត់មានបញ្ហាធ្វើទុក្ខអ្វីទាំងអស់កន្លងមក ហើយជាអកុសល បង(រាជ សម្បត្តិ) គាត់អត់ដែលលេងកីឡា គាត់អត់ដែលបារម្ភរឿងអីទាំងអស់ តែគាត់មានជំងឺហ្នឹង។ បើតាមខ្ញុំដឹង គាត់ធ្លាប់លេបថ្នាំការពារជំងឺលើសឈាមរហូត ហើយដល់ពេលហ្នឹង វាខ្លាំង វាដាច់តែម្តងបាទ»។ លោករាជ សម្បត្តិត្រូវគេបញ្ជូនចូលទៅព្យាបាលនៅមន្ទីរពេទ្យកាល់ម៉ែត្រកាល ពីថ្ងៃអង្គារ បន្ទាប់ពីលោកធ្លាក់ខ្លួនឈឺសន្លប់មិនដឹងខ្លួន។ មួយថ្ងៃបន្ទាប់មក លោកបានស្លាប់ មុនពេលដែលគេប្រុងប្រៀបបញ្ជូនទៅព្យាបាលនៅប្រទេសថៃ។ កិច្ចការរបស់លោករាជ សម្បត្តិចុងក្រោយមួយដែល VOA បានសម្ភាសគឺ បេសកកម្មរបស់លោកទៅកាន់ខេត្តបាត់ដំបងកាលពីថ្ងៃព្រហស្បតិ៍ សប្តាហ៍មុន ដើម្បីចូលរួមចែកចាយសៀវភៅស្តីពីដំណើរការសាលាក្តីខ្មែរក្រហមដល់សិស្សានុសិស្សនៅទីនោះ។ ស្របពេលជាមួយគ្នាដែរ លោកបានចូលរួមជាមួយអង្គការPeace Corps របស់ស.រ.អា.ដើម្បីបង្រៀនភាសាអង់គ្លេសនៅខេត្តបាត់ដំបងផង ដែរ។ ថ្លែងប្រាប់VOAតាមទូរស័ព្ទពីខេត្តបាត់ដំបងកាលពីសប្តាហ៍មុន លោកសម្បត្តិ បានបញ្ជាក់ថា៖ លោកត្រៀមជួបសិស្សានុសិស្ស៤០០០នាក់ក្នុងសាកលវិទ្យាល័យបាត់ដំបង ដើម្បីអប់រំនិងពន្យល់អំពីដំណើរការសាលាក្តីខ្មែរក្រហម ប្រវត្តិនៃការកកើតរបបប្រល័យពូជសាសន៍ ជំហររបស់រដ្ឋាភិបាលកម្ពុជា និងអ.ស.ប.ក្នុងរឿងកាត់ទោសខ្មែរក្រហម។ «នៅបាត់ដំបងនេះ ពីល្ងាចមិញ តាមសំណើររបស់ជនជាតិអាមេរិកាំង ដែលជាគ្រូបង្រៀន Peace Corp នៅក្នុងស្រុកឯកភ្នំ ខេត្តបាត់ដំបង យើងបានជួប សិស្សានុសិស្សជិត៥០០នាក់។ ដោយឡែកសិស្សានុសិស្សនៅក្នុងសាលាហ្នឹងជាង១០០០នាក់ ដែលគេកំពុងរៀនហ្នឹង យើងបានផ្តល់សៀវភៅ១០០០ក្បាលសម្រាប់សាលាវិទ្យាល័យឯកភ្នំ។ ហើយសាលាដ៏ទៃទៀត ដែលមានUS Peace Corpsទៅបង្រៀនក្រោមការឧបត្ថមរបស់ស.រ.អា.ហ្នឹង ក៏បានស្នើជាច្រើនដូចជានៅខាងវាលរិញ នៅខាងខេត្តបន្ទាយមានជ័យ ហើយឥឡូវនេះគាត់មកខេត្តបាត់ដំបង។ អញ្ចឹងគឺយើងធ្វើគ្រប់កន្លែងណា៎ ហើយសិស្សានុសិស្សគេសប្បាយអបអរ។ ដោយឡែកមួយទៀត នៅព្រឹកថ្ងៃ ស្អែក យើងនឹងជួបនិស្សិតចំនួន៤០០០នាក់នៅសាកលវិទ្យាល័យបាត់ដំបង ដើម្បីនិយាយអំពីការវិវត្តន៍របស់អង្គជំនុំជម្រះវិសាមញ្ញក្នុងតុលាការកម្ពុជា ហើយយើងមិនបញ្ចប់ទេ។ កិច្ចការនេះ គឺយើងព្យាយាមធ្វើឲ្យបានច្រើនជាអតិបរមា តាមដែលយើងធ្វើទៅបាន»។ ខាងលើនេះជាអត្ថាធិប្បាយរបស់លោករាជ សម្បត្តិចុងក្រោយ ដែលនិយាយអំពីកិច្ចការរបស់លោកមុនមរណភាព។ លោក ខៀវ កូឡា អ្នកអត្ថាធិប្បាយទូរទស្សន៍ CTN បានថ្លែងថា មរណភាព របស់លោករាជ សម្បត្តិគឺជាការបាត់បង់ដ៏ធំហើយពិបាករកអ្នកជំនួស។ «ការបាត់បង់លោកសម្បត្តិនេះគឺជាការបាត់បង់ដ៏ធំនៅក្នុងវិស័យសារព័ត៌មាន កម្ពុជា ព្រោះថា លោក រាជ សម្បត្តិបានឧទ្ទិសជីវិតលោកសម្រាប់ការបម្រើអ្នកសារព័ត៌មានកម្ពុជា ហើយក្នុងឋានៈជាប្រធានការិយាល័យកិច្ចការសាធារណៈ អ្នកនាំពាក្យសាលាក្តីខ្មែរក្រហម លោកបានខិតខំ ខ្នះខ្នែងជាអតិបរមាដើម្បីបម្រើអ្នកសារព័ត៌មានជាតិ និងអន្តរជាតិ ដោយគ្មានគិតពីយប់ ថ្ងៃ ក្តៅ រងារ ត្រជាក់ទេ»។ សាលាក្តីកាត់ទោសខ្មែរក្រហមបានចេញសេចក្តីប្រកាសព័ត៌មានភ្លាមៗអំពីមរណភាពរបស់លោករាជ សម្បត្តិ ដោយបង្ហាញពីការសោកស្តាយជាពន់ពេក៕ This posting includes an audio/video/photo media file: Download Now |
| បទព្រហ្មទណ្ឌមិនគួរត្រូវបានប្រើប្រឆាំងនឹងអ្នកតវ៉ាជម្លោះដីធ្លី Posted: 11 May 2011 03:46 PM PDT តំណាងសហគមន៍ជនរងគ្រោះជម្លោះដីធ្លីនៅទូទាំងប្រទេសកម្ពុជាបានផ្តល់អនុសាសន៍នៅថ្ងៃពុធនេះថា តុលាការគួរតែបញ្ឈប់ការចោទប្រកាន់ព្រហ្មទណ្ឌប្រឆាំងនឹងអ្នកតវ៉ាជម្លោះដីធ្លី។ តំណាងសហគមន៍ និងតំណាងរដ្ឋាភិបាលប្រមាណ១០០នាក់បានជួបជុំគ្នារយៈពេលពីរថៃ្ងក្នុងសិក្ខាសាលាមួយ ដើម្បីពិភាក្សាស្ថានភាពបច្ចុប្បន្ននៃបញ្ហាដីធ្លី និងយន្តការដោះស្រាយដែលបានបញ្ចប់ដោយមានអនុសាសន៍មួយចំនួនដូចជា គួរបញ្ឈប់ការផ្តល់សម្បទានសេដ្ឋកិច្ចដែលមានទំហំធំជាងច្បាប់កំណត់ ការពន្លឿនការចុះបញ្ជីជាប្រព័ន្ធសម្រាប់ដីសហគមន៍របស់ជនជាតិដើមភាគតិចដើម្បីធានាសិទ្ធិរបស់ពួកគេរស់នៅក្នុងសង្គមស្របតាមច្បាប់ និងអាចបញ្ចៀសបាននូវជម្លោះផ្សេងៗដែលចាំបាច់ និងមិនគួរបន្តចាប់ខ្លួនឬ ចោទប្រកាន់ពីបទព្រហ្មទណ្ឌចំពោះរឿងរ៉ាវពាក់ព័ន្ធនឹងវិវាទដីធ្លីនោះទេ។ លោក សុក សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា បានថ្លែងនៅក្នុងការបិទសិក្ខាសាលារយៈពេលពីរថ្ងៃនៅថ្ងៃនេះថា រដ្ឋាភិបាលគួរពិចារណាយុទ្ធសាស្ត្រនានា ដើម្បីជៀសវាងការអភិវឌ្ឍណាដែលនាំឱ្យប៉ះពាល់ដល់សិទ្ធិមនុស្ស និងរំលោភសិទ្ធិមនុស្ស។ លោកថ្លែងថា៖ «ជាក់ស្តែងមានបញ្ហាសំខាន់ៗ មួយចំនួនដែលបានលើកឡើងដោយតំណាងសហគមន៍ ដើម្បីជំរុញឱ្យមានការដោះស្រាយបញ្ហារបស់គាត់ដែលបានរងគ្រោះ ដូចជា ការបង្កហិង្សា ការចាប់ខ្លួនតំណាង សហគមន៍អំពីបទព្រហ្មទណ្ឌដែលជាប់ពាក់ព័ន្ធនឹងវិវាទដីធ្លី ការរំលោភអំណាចរបស់អាជ្ញាធរមូលដ្ឋាន ដោយការធ្វេសប្រហែស ឬដោយកំហុសនីតិវិធី»។ អ្នកស្រី ទេព វ៉ាន្នី តំណាងសហគមន៍បឹងកក់បាននិយាយក្នុងសិក្ខាសាលាថា អ្នកស្រីគ្មានជំនឿលើ តុលាការទេ។ អ្នកស្រីថ្លែងដូច្នេះថា៖ «អាជ្ញាធរបានចាប់ពួកខ្ញុំនៅតំបន់យកទៅដាក់ឃុំឃាំង។ ពួកខ្ញុំអត់កាន់ដុំថ្មគប់គេផង គេបង្ខំឱ្យផ្តិតមេដៃថា ពួកខ្ញុំកាន់ដុំថ្មគប់ពួកគេ។ អញ្ចឹងពួកខ្ញុំអត់ជំនឿហើយ។ វាអាចប្រឈមនឹងការជាប់ពន្ធនាគារទៀតចំពោះអ្នករងគ្រោះ ដោយសារដីធ្លី និងការប្រឈមនឹងការបណ្តេញចេញដោយបង្ខំពីលំនៅដ្ឋាន»។ លោក យាន ស៊ីណា អនុរដ្ឋលេខាធិការក្រសួងយុត្តិធម៌ បានថ្លែងថា អាជ្ញាធរមូលដ្ឋាន អង្គការមិនមែនរដ្ឋាភិបាល និងដៃគូរអភិវឌ្ឍន៍ ជួយពន្យល់ណែនាំពលរដ្ឋកុំឱ្យកាន់កាប់ដីរដ្ឋដែលមិនស្របច្បាប់។ លោកស៊ីណាថ្លែងថា៖ «អាជ្ញាធរមូលដ្ឋាន អង្គការមិនមែនរដ្ឋាភិបាល និងដៃគូអភិវឌ្ឍន៍ ពន្យល់ណែនាំប្រជាពលរដ្ឋកុំឱ្យពួកគាត់រារាំងដល់ការអនុវត្តសាលក្រម ឬ សាលដីការបស់តុលាការ។ ក្នុងករណីដែលមានការរារាំងការ អនុវត្តសាលក្រម ឬសាលដីការបស់តុលាការ ការដុតបំផ្លាញសម្ភារៈគ្រឿងចក្រ នាំឱ្យមានការចាប់ខ្លួន និងឃាត់ខ្លួនប្រជាពលរដ្ឋ ហើយធ្វើឱ្យប្រជាពលរដ្ឋចោទប្រកាន់តុលាការថា ចាប់ប្រជាពលរដ្ឋដែល ពាក់ព័ន្ធនឹងជម្លោះដីធ្លី។ ការចាប់ ឬឃាត់ខ្លួនប្រជាពលរដ្ឋរបស់តុលាការមិនមែនជា ការចាប់ខ្លួនពាក់ព័ន្ធនឹងជម្លោះដីធ្លីទេ»។ គណៈកម្មាធិការសិទ្ធិមនុស្សរបស់រដ្ឋាភិបាល និងសមាគមសិទ្ធិមនុស្សអាដហុក បានព្រមព្រៀងគ្នាបង្កើតក្រុមការងាររួមមួយ ដើម្បីស៊ើបអង្កេតរឿងជម្លោះដីធ្លីសម្រាប់ធ្វើរបាយការណ៍ លើកអនុសាសន៍ជូនរដ្ឋាភិបាលធ្វើការដោះស្រាយ៕ This posting includes an audio/video/photo media file: Download Now |
| ជំងឺរបស់លោករាជ សម្បត្តិ មិនប៉ះពាល់នឹងដំណើរការសាលាក្តីខ្មែរក្រហមទេ Posted: 12 May 2011 07:28 AM PDT អ្នកដែលតាមដានសភាពការណ៍សាលាក្តីខ្មែរក្រហមមួយចំនួនតូចបានលើកឡើងថា ជំងឺលើសឈាមរបស់លោក រាជ សម្បត្តិ ដែលជាប្រធានផ្នែកកិច្ចការសាធារណៈរបស់សាលាក្តីខ្មែរក្រហម ដែលកើតឡើងភ្លាមៗកាលពីថ្ងៃអង្គារ៍ ទី១០ ខែឧសភា ឆ្នាំ ២០១១នេះ អាចនឹងធ្វើឲ្យរាំងស្ទះដល់ដំណើរការកាត់ទោសនៃសំណុំរឿង០០២របស់ពួកខ្មែរក្រហម ។ សាលាក្តីប្រល័យពូជសាសន៍សម្រាប់កាត់ទោសអតីតមេដឹកនាំខ្មែរក្រហមនឹងបើកសវនាការជំនុំជម្រះសំណុំរឿង០០២នៅខែមិថុនាខាងមុខនេះ។ សំណុំរឿង០០២នេះ មានជនជាប់ចោទដែលជាមេដឹកនាំខ្មែរក្រហមកំពូលៗចំនួនបួនរួប រួមមាន លោកខៀវ សំផន អតីតប្រមុខរដ្ឋ លោកនួន ជា អតីតប្រធានរដ្ឋសភា និងលោកអៀង សារី អតីតរដ្ឋមន្រ្តីក្រសួងការបរទេសព្រមទាំងភរិយារបស់លោក គឺអ្នកស្រីអៀង ធីរិទ្ឋិ អតីតរដ្ឋមន្រ្តីក្រសួងសង្គមកិច្ច។ លោកឌឹម សុវណ្ណារុំ អ្នកនាំពាក្យសាលាក្តីខ្មែរក្រហម បានមានប្រសាសន៍នៅថ្ងៃពុធនេះថា ដំណើរការកាត់ទោសសំណុំរឿង០០២នេះ និងប្រព្រឹត្តិទៅដូចធម្មតា។ លោកបានបន្តថា អង្គជំនុំជម្រះសាលាក្តីខ្មែរក្រហមមានមន្រ្តីសំខាន់ចំនួនបួនរូបផ្សេងទៀត ដែលអាចធ្វើកិច្ចការទាំងផ្នែករដ្ឋបាល និងផ្នែកច្បាប់ ពេលលោករាជ សម្បត្តិ កំពុងមានជំងឺ។ លោកសុវណ្ណារុំ បានប្រាប់វីអូអេខ្មែរថា៖ «ផ្នែកកិច្ចការសាធារណៈ យើងមានមន្រ្តីអ្នកនាំពាក្យរហូតដល់ទៅបួនរូប ខាងផ្នែកអង្គការ សហប្រជាជាតិពីររូប ហើយខាងផ្នែកជាតិពីររូប។ អញ្ចឹងពេលដែលលោករាជ សម្បត្តិ គាត់កំពុងតែ ទទួលស្ថានភាពជំងឺអញ្ចឹង ខ្ញុំ ឌឹម សុវណ្ណារុំ ដែលជាមន្រ្តីអ្នកនាំពាក្យរួមជាមួយសហការីរបស់ខ្ញុំ លោក ឡាស៍ អលសិន (Lars Olsen) និងយូកូ ម៉ៃដា (Yuko Maeda) និងមន្រ្តីផ្នែកកិច្ចការសាធារណៈនឹងបន្តកិច្ចការដែលយើងបានចាត់ចែងរួចហើយដែលជាការងារជាប្រព័ន្ឋ»។ លោក ឆាំង យុ ប្រធានមជ្ឈមណ្ឌលឯកសារកម្ពុជា ដែលមជ្ឈមណ្ឌលនេះ តែងតែសហការជា មួយនឹងសាលាក្តីខ្មែរក្រហមបានមានប្រសាសន៍ថា មជ្ឈមមណ្ឌលឯកសារនឹងជួយបំពេញកង្វះខាតបន្ថែមទៀតនៅ ក្នុងខណៈដែលលោករាជ សម្បត្តិ កំពុងមានជំងឺ។ លោក យុ បានប្រាប់វីអូអេខ្មែរថា៖ «អ្វីដែលសំខាន់ គឺយើងធ្វើការជាមួយអង្គភាព ហើយអញ្ចឹងអង្គភាពនៅដដែល។ អញ្ចឹងដំណើរ ការវានៅតែទៅមុខ។ ចំពោះការផ្សព្វផ្សាយទៅសាធារណៈជន យើងពង្រឹងបន្ថែមទៀត ដោយសារថា រយៈកាលកន្លងមកគឺថា យើងបានបណ្តាក់គ្នាធ្វើការនៅតាមមូលដ្ឋានផ្សេងៗ ហើយឥឡូវនេះ យើង អាចបន្ថែមពង្រឹងរយៈពេលមួយ ដែលយើងអាចបំពេញនូវការខ្វះចន្លោះបានដែរ»។ លោកឡុង បញ្ញាវុធ មន្រ្តីសម្របសម្រួលកម្មវិធីនៃគម្រោងយុត្តិធម៌នៅកម្ពុជាបានមានប្រសាសន៍ ថា មិនមានចំណុចណាមួយប៉ះពាល់ដល់ដំណើរការរបស់សាលាក្តីខ្មែរក្រហមទេ ក្នុងពេលដែលលោក រាជ្ប សម្បត្តិ កំពុងមានជំងឺនោះ ។ លោកឡុង បញ្ញាវុធ បានមានប្រសាសន៍ទៀតថា សាលាក្តីខ្មែរក្រហម និងមានបុគ្គលិក ដើម្បី កាន់ការងារជំនួសលោករាជ សម្បតិ្ត។ លោកបញ្ញាវុធថ្លែងថា៖ «ទី១ គាត់ជាមន្រ្តីកិច្ចការសាធារណៈ។ ក៏ប៉ុន្តែក្នុងហ្នឹង គាត់មានបុគ្គលិកដទៃទៀតដែរ ដែលអាចទទួលខុសត្រូវបាន។ ហើយគេអាចរៀបចំ។ គេអាចបន្ថែមបុគ្គលិកបន្ថែមទៀតបាន»។ ចំណែកលោកបណ្ឌិតឡៅ ម៉ុងហៃ អ្នកវិភាគឯករាជ្យមួយរូបបាននិយាយថា សាលាក្តីខ្មែរក្រហម និងមានផលប៉ះពាល់តិចតួចពីព្រោះការជំនួសមនុស្សមិនមែនដូចគ្រឿងម៉ាស៊ីនទេ។ លោកបានប្រាប់វីអូអេខ្មែរថា៖ «គឺមានការផ្លាស់ប្តូរ ក្រែងលោដូចថា វាមិនទៅរលូន។ ដូចដែលគាត់ចាប់ពីអ៊ើយកាន់ការរហូត លើកលែងតែគាត់មានឧបការីដែលមានជំនាញសឹងប្រហែលគាត់ និងមានបទពិសោធន៍ប្រហាក់ ប្រហែលគ្នាទើបជំនួសអាហ្នឹងបានចេះតែរលូនទៅទៀត»។ លោករាជ សម្បត្តិ អាយុ៤៨ឆ្នាំ បានចូលបម្រើការងារនៅសាលាក្តីខ្មែរក្រហមតាំងពីឆ្នាំ១៩៩៦។ លោករាជ សម្បត្តិ មានឈ្មោះបោះសំឡេងនៅក្នុងប្រទេស និងឆាកអន្តរជាតិ ដោយសារតែលោកជា អតីតអ្នកនាំពាក្យរបស់សាលាក្តីខ្មែរក្រហមដ៏ចំណានមួយរូប មុនពេលដែលលោកត្រូវបានតែងតាំងជា ប្រធានផ្នែកកិច្ចការសាធារណៈ ។ លោកឌឹម សុវណ្ណារុំ បានមានប្រសាសន៍ទៀតថា សាលាក្តីខ្មែរក្រហម បានបង្កើតមូលនិធិមួយ ដើម្បីជួយសង្រ្គោះដល់លោករាជ សម្បត្តិ ហើយអស់លោកអ្នកអាចផ្តល់មូលនិធិតាមរយៈគណនីលេខ២១៤០២៨៦ របស់ធនាគារ ANZ Royal៕ This posting includes an audio/video/photo media file: Download Now |
| ដើមបណ្តឹងទាមទារឱ្យតុលាការបញ្ចេញព័ត៌មានថែមទៀត Posted: 11 May 2011 04:15 PM PDT ដើមបណ្តឹងរដ្ឋប្បវេណីដ៏សកម្មម្នាក់នៃករណី០០៣ និង ០០៤ ដ៏ចម្រូងចម្រាស គឺកញ្ញាសេង ធារី បានរិះគន់សាលាក្តីខ្មែរក្រហមថា ពុំបានផ្តល់ព័ត៌មានគ្រប់គ្រាន់សម្រាប់ជនរងគ្រោះជាពិសេសដើមបណ្តឹងរដ្ឋប្បវេណី ដោយចាត់ទុកថា មាន នីតិវិធីស្មុគស្មាញញាំញីដោយសម្ពាធនយោបាយ។ នេះបើតាមការអះអាងរបស់កញ្ញា សេង ធារីក្នុងសេចក្តីប្រកាសព័ត៌មាន។ កញ្ញាសេង ធារី ដែលមានឪពុកម្តាយត្រូវសម្លាប់ក្នុងរបបខ្មែរក្រហមនៅទសវត្សរ៍ ១៩៧០នោះ បានអះអាងថាសហចៅក្រមស៊ើបអង្កេតបានខកខាន ក្នុងការជូនដំណឹងដល់សាធារណជនឱ្យបានគ្រប់គ្រាន់និងទាន់ពេលវេលា ជាពិសេស អ្នកដាក់ពាក្យតាំងខ្លួនជាដើមបណ្តឹងរដ្ឋប្បវេណី។ កញ្ញា សេង ធារីបានបញ្ជាក់ថាមានការលំបាកចំពោះភាពស្មុគស្មាញនៃគំនាបនយោបាយ ការបំភិតបំភ័យ ការខ្វះព័ត៌មាន ដែលផ្តល់ដោយអង្គជំនុំជម្រះ វិសាមញ្ញក្នុងតុលាការកម្ពុជា (ECCC) ចំពោះជនរងគ្រោះកម្ពុជាសាមញ្ញ។ «នៅក្នុងករណី០០៣ពួកគាត់អត់ទាន់បានទទួលជនរងគ្រោះម្នាក់សោះជាដើមបណ្តឹងរដ្ឋប្បវេណី។ បើអញ្ចឹងរឿងហ្នឹងវាហួសហេតុពេកគាត់បានឈ្លានពាន តួនាទី គាត់នៅក្នុងភាពហួសហេតុក្នុងអ្វីដែលគាត់យកលេសថាមានភាពសម្ងាត់ វាអត់ស្របនឹងសភាពការណ៍»។ កញ្ញា សេង ធារីដែលកំពុងប្តឹងឧទ្ធរណ៍រឿងតួនាទីជាដើមបណ្តឹងរដ្ឋប្បវេណី បានអះអាងថា បើទោះបីជាមានព័ត៌មានគ្រប់គ្រាន់ ក៏នៅតែប្រើប្រាស់ពេលវេលា និង ធនធាននានាដើម្បីដាក់ពាក្យព្រមគ្នាសម្រាប់ជនរងគ្រោះ ដែលមានចំណេះដឹង ជនរងគ្រោះដែលបានទទួលព័ត៌មានច្បាស់លាស់។ លោក រាជ សម្បត្តិ អ្នកនាំពាក្យសាលាក្តីខ្មែរក្រហមបានចាត់ទុកថាជាកិច្ចការរបស់សហចៅក្រមស៊ើបអង្កេត ដែលគេមិនអាចជ្រៀតជ្រែកបាន។ «អ្នកណាក៏អាចដាក់ពាក្យធ្វើជាដើមបណ្តឹងរដ្ឋប្បវេណីបានដែរឬក៏បណ្តឹងធម្មតាបានដែរ ប្រជាជនកម្ពុជាទូទៅ។ ដោយឡែកអ្នកដែលបានដាក់ពាក្យបណ្តឹងពីមុនមានពីរនាក់។ ហើយការិយាល័យសហចៅក្រមស៊ើបអង្កេតបានទទួលអស់ហើយ អញ្ចឹងហើយ កិច្ចការហ្នឹងគឺអត់មានអីត្រូវជម្រាបតទៅទៀត ព្រោះយើងបានយើងបានជម្រាបសាម៉ីខ្លួនគេអ្នកដាក់ពាក្យហ្នឹងហើយ»។ ទោះជាយ៉ាងណាក៏ដោយលោកបន្ថែមសេចក្តីថាសាលាក្តីបានធ្វើកិច្ចការដែល មានការកោតសរសើរច្រើន ក្រៅពីចាត់ទុកការរិះគន់នានា ថាជារឿងធម្មតា ក្នុងសង្គមប្រជាធិបតេយ្យ។ កញ្ញាសេង ធារី ជាអ្នកដាក់ពាក្យតាំងខ្លួនជាដើមបណ្តឹងរដ្ឋប្បវេណី ដើម្បីតទល់ ផ្លូវច្បាប់ នឹងអតីតមេដឹកនាំខ្មែរក្រហម៥នាក់ ក្នុងករណី០០៣ និង ករណី០០៤ ដែលកញ្ញាបានបង្ហាញឈ្មោះជាសាធារណៈ ហើយសង្ស័យថាមាន ជាប់ទាក់ទង នឹងអំពើឧក្រិដ្ឋកម្មក្នុងសម័យខ្មែរក្រហម។ បើតាមសេចក្តីប្រកាសព័ត៌មានរបស់ កញ្ញា សេង ធារី ជនទាំង៥នាក់នោះមាន លោក មាស មុត លោក ស៊ូ ម៉េត អ្នកស្រី អ៊ឹម ចែម តាអាន តាទិត ដែលកញ្ញាសេង ធារីដាក់ពាក្យតតាំងមុនពេលតុលាការ ខ្មែរក្រហមមិនទាន់បញ្ជាក់អត្តសញ្ញាណជនដែលត្រូវស៊ើបអង្កេតទាំង ឡាយ នោះ។ ក៏ប៉ុន្តែ មានជនពីរនាក់យ៉ាងតិចក្នុងចំណោម៥នាក់ ដែល វីអូអេ ព្យាយាម ទាក់ទងកន្លងមកបានបដិសេធថាខ្លួនមិនបានជាប់ពាក់ព័ន្ធនឹងការ ចោទប្រកាន់។ ជនទាំងពីរគឺ លោក ឧត្តមសេនីយ៍ទោ មាស មុត ជាទីប្រឹក្សា ក្រសួងការពារជាតិ នឹង អ្នកស្រី អ៊ឹម ចែម ប្រធានក្រុមប្រឹក្សាឃុំមួយនៃស្រុក អន្លង់វែង ខេត្តឧត្តរមានជ័យ។ លោក រាជ សម្បត្តិបានសម្តែងការសោកស្តាយចំពោះការប្រកាសឈ្មោះជនទាំងប្រាំរូប។ «ដោយឡែករឿងសហព្រះរាជអាជ្ញាបរទេសដែលគាត់សុំឲ្យស៊ើបអង្កេតបន្ថែមអី ហ្នឹងគឺសហចៅក្រមស៊ើបអង្កេតគាត់បានជូនដំណឹងហើយកាលពីសប្តាហ៍មុន និយាយពីការស៊ើបអង្កេតចប់ហើយ០០៣ អញ្ចឹងយើងមិនមែនចៅក្រម យើង ទុកឲ្យចៅក្រមធ្វើការ ពីព្រោះយើងក៏ចង់បានការគោរពច្បាប់ដែរ។ បើគាត់ធ្វើការ យើងចេះតែទៅចាក់រុកឆ្កឹះឆ្កៀលគាត់បានន័យថាយើងជ្រៀតជ្រែកតុលាការ»។ ប្រមុខដឹកនាំរដ្ឋាភិបាលកម្ពុជាបានប្រកាសរារាំងការចោទប្រកាន់អតីតមេដឹកនាំ ខ្មែរក្រហមបន្ថែមលើសសំណុំរឿង០០១ នឹង ០០២ ដោយព្រួយបារម្ភពីការប៉ះពាល់សន្តិភាពរបស់ប្រទេស ដែលរដ្ឋាភិបាលធ្លាប់បានសន្យាជាមួយអតីត មេដឹកនាំខ្មែរក្រហមថាមិនយកទោសពៃរ៍អ្នកដែលធ្វើសមាហរណកម្មតាំងពីឆ្នាំ១៩៩៦នោះ។ ចៅក្រមជាតិនិងអន្តរជាតិធ្លាប់ប្រទាញប្រទង់គ្នាហើយធ្វើឲ្យនីតិវិធី ករណី០០៣ និង០០៤ នេះ មិនដំណើរការទៅមុខលឿនដូចការរំពឹងទុក បន្ទាប់ពីមានការជំទាស់របស់រដ្ឋាភិបាល។ ទោះជាយ៉ាងណាក៏ដោយលោក យុ ឆាំង នាយកមជ្ឈមណ្ឌលឯកសារកម្ពុជា នៅក្នុងសេចក្តីប្រកាសព័ត៌មានមួយកាលពីថ្ងៃព្រហស្បតិ៍បានអំពាវនាវសុំឱ្យ មានតម្លាភាពនិងឯករាជ្យភាពចំពោះករណី០០៣និង០០៤ ដែលលោកចាត់ទុក ថាជារឿង មិនអាចជៀសវាងបានចំពោះយុត្តិធម៌ជូនពលរដ្ឋ កម្ពុជាដែលរងគ្រោះ ដោយរបបឃោរឃៅខ្មែរក្រហម។ លោកថ្លែងដូច្នេះក្រោយពីមួយសប្តាហ៍ដែលការិយាល័យសហចៅក្រមស៊ើប អង្កេត បានប្រកាសពីការបញ្ចប់ការស៊ើបអង្កេតករណី០០៣ ដែលមិនបាន បញ្ជាក់ជាសាធារណៈពីឧក្រិដ្ឋកម្មដែលបានស៊ើបអង្កេត សូម្បីតែជនរងគ្រោះ ជាដើមបណ្តឹងរដ្ឋប្បវេណី។ លោកបានអះអាងថាការិយាល័យសាធារណៈនៃតុលាការ ខ្មែរក្រហមពុំបានពន្យល់ប្រជាពលរដ្ឋអំពីអត្តន័យនិងផលវិបាកនានា នៃការវិវត្តន៍នៃករណីបន្ថែមទេ។ «យើងសង្ឃឹមថាតុលាការខ្មែរក្រហម ECCC នឹងប្រកាន់យកបទដ្ឋានខ្ពស់បំផុត ចំពោះឯករាជ្យភាពផ្លូវច្បាប់។ ការសម្រចរបស់តុលាការត្រូវតែធ្វើឡើង ដោយ ឯករាជ្យពីសម្ពាធនយោបាយ និង តាមការបកស្រាយដោយត្រង់ចំពោះ វិធានផ្ទៃ ក្នុងរបស់តុលាការ។ ជាងនេះទៅទៀត យើងសុំឲ្យតុលាការបន្តជូនដំណឹងគ្រប់ គ្រាន់ដល់ពលរដ្ឋកម្ពុជា អំពីកិច្ចការរបស់ខ្លួន»។ សាលាក្តីកាត់ទោសខ្មែរគ្រោងនឹងកាត់ទោសករណី០០២ ដែលមានអតីតមេដឹក នាំខ្មែរក្រហមកំពូល៤នាក់នៅពាក់កណ្តាលឆ្នាំនេះ ពីបទឧក្រិដ្ឋកម្មសង្គ្រាម ប្រឆាំងនឹងមនុស្សជាតិ ប្រល័យពូជសាសន៍ជាដើម ដែលត្រូវស្តីបន្ទោសពីការ ស្លាប់ពលរដ្ឋខ្មែរជិត២លាននាក់ចន្លោះឆ្នាំ១៩៧៥ ដល់ឆ្នាំ១៩៧៩។ តុលាការបានកាត់ទោសករណី០០១ គឺកាំង ហ្កេកអ៊ាវ ហៅឌុច រួចហើយ៕ This posting includes an audio/video/photo media file: Download Now |
| ខ្មែរអាមេរិកាំងត្រៀមស្នើឱ្យសភាអាមេរិកាំងជួយ Posted: 11 May 2011 04:39 PM PDT ពលរដ្ឋខ្មែរអាមេរិកាំងស្វះស្វែងរកជំនួយគាំទ្រពីសភាសហរដ្ឋអាមេរិកដើម្បីជួយដល់កម្មវិធីលើកកម្ពស់សុខមាលភាពជនអន្តោប្រវេសន៍ ឬជនភៀសខ្លួនខ្មែរជាច្រើនសែននាក់ដែលគេចខ្លួនពីប្រទេសកម្ពុជាក្នុងសម័យខ្មែរក្រហមមកកាន់ប្រទេសអាមេរិក។ «ខ្មែរយើងមកសហរដ្ឋអាមេរិក៣០ឆ្នាំហើយ។ សហរដ្ឋអាមេរិកអត់បានដឹងថាខ្មែរយើងមានជំងឺអ្វីខ្លះ ទេ។ ហើយខ្ញុំចង់ជម្រាបថាកាលកំពុងរស់នៅក្នុងសឹកសង្គ្រាមខ្មែរយើង មានការបង្រៀនមួយគឺថា កាលណាយើងនិយាយគឺថាយើងត្រូវស្លាប់ដូច្នេះមកដល់ សហរដ្ឋអាមេរិក ដែលជាស្រុកថ្មីមួយរបស់យើងហ្នឹងគឺថាវប្បធម៌របស់គេគឺថាកាលណា យើងអត់និយាយក៏យើងស្លាប់។ដូច្នេះហើយបានជាយើងខ្ញុំទាំងអស់គ្នាព្រមទាំង បងប្អូនខ្មែរយើងទាំងអស់ធ្វើការនៅសហរដ្ឋអាមេរិកនេះបានរួមគ្នាថាទៅជួបសភាយើង ដើម្បីបង្រៀនគេថា នរណាជាជនជាតិខ្មែរ។ បើមិនអញ្ចឹងទៅគេអត់ស្គាល់យើងទេ»។ គម្រោងនេះផ្តួចផ្តើមគំនិតដោយលោក ស្រី គួច ធានវី នាយិកាសមាគមគាំទ្រ សុខភាពខ្មែរ មកពីរដ្ឋ Connecticut និង លោកស្រី Dani Morton សកម្មជនម្នាក់ មកពីទីក្រុង Seattle រដ្ឋវ៉ាស៊ីនតោន ហើយនឹងបណ្តាញអង្គការផ្សេងៗទៀត។ សកម្មជនទាំងពីរ បានធ្វើដំណើរមកកាន់រដ្ឋធានី Washington DC ចុងសប្តាហ៍ មុនដើម្បីបញ្ចុះបញ្ចូលឲ្យមានការគាំទ្រពី អ្នកមានមុខមាត់ផ្សេងទៀតផងដែរ។ ជាពិសេស នៅក្នុងកិច្ចប្រជុំរៃអង្គាសប្រាក់មួយដែលរៀបចំដោយ អង្គការ Refugee International កាលពីល្ងាចថ្ងៃព្រហស្បតិ៍ ក្នុងពេលប្រារព្ធខួបលើក ទី៣២ របស់អង្គការនេះផងដែរ។ សកម្មជនទាំងពីរ គ្រោងនឹងជួបជាមួយ សមាជិក ឬបុគ្គលិក សភា នៅថ្ងៃ២៤ ដល់ ថ្ងៃទី២៥ ឧសភានេះដើម្បីបញ្ចុះ បញ្ចូល និង ផ្តល់ការបង្រៀនអំពីផលវិបាកនានាដែលពលរដ្ឋខ្មែរអាមេរិកាំង កំពុងជួបប្រទះ។ លោកស្រី ធានវីមានស្រុកកំណើតនៅខេត្តបាត់ដំបងបានភៀសខ្លួនមកកាន់សហរដ្ឋអាមេរិកតាំងពីឆ្នាំ១៩៨១តាមរយៈជំរំខាវអ៊ីដាង ប្រទេសថៃ ហើយមករស់នៅក្នុងរដ្ឋ Connecticut ។ លោក ស្រីបានអះអាងថា ពលរដ្ឋខ្មែរឬជនភៀសខ្លួនខ្មែររាប់ម៉ឺន សែននាក់ ដែលបានគេចចេញពីសម័យសង្គ្រាមមកកាន់សហរដ្ឋអាមេរិក មានជំងឺជាច្រើនដូចជា ទឹកនោមផ្អែម ជំងឺផ្លូវចិត្ត ជំងឺឡើងឈាម ជាដើម។ សមាគមរបស់លោកស្រីត្រូវគេដឹងថាបានបើកជួយពលរដ្ឋខ្មែរតាំងពីឆ្នាំ១៩៨២ម្ល៉េះ ដោយមានជំនួយពីអសប នឹង ពីទីភ្នាក់ងារសុខាភិបាលរបស់សហរដ្ឋអាមេរិកាផងដែរ។ លោក ស្រី ដានី ម័រតុន សកម្មជនម្នាក់ដែលធ្វើការជិតដិតជាមួយនឹងបញ្ហាខ្មែរ បានថ្លែងថាគំនិតផ្តួចផ្តើមក្នុងការជួបក្រុមសមាជិកសភាគឺមួយផ្នែកដើម្បីស្វែងរក ថវិកាដើម្បីគាំទ្រដល់គម្រោងនានាដែលត្រូវជួយពលរដ្ឋខ្មែរតាមសហគមន៍នានា ក្នុងប្រទេសអាមេរិក។ «មានការលំបាកគ្រប់ផ្នែក ដែលយើងបានឃើញនៅក្នុងសហគមន៍ខ្មែរ សំខាន់ បំផុតគឺផ្នែកមិនចេះភាសា (អង់គ្លេស) មិនដឹងពីរបៀបរបបទាក់ទង»។ លោកស្រីបានកត់សម្គាល់ថាពលរដ្ឋខ្មែរមានទំនាក់ទំនងតែជាមួយអាជ្ញាធរថ្នាក់ មូលដ្ឋាន តែមិនមែនថ្នាក់ជាតិទេដែលពលរដ្ឋខ្មែរទាំងអស់ត្រូវធ្វើកិច្ចការរួមគ្នា សាមគ្គីគ្នាដើម្បីធ្វើការជួយដល់ពលរដ្ឋខ្មែរ ជាអតីតជនភៀសខ្លួន។ លោកស្រី ដានី ម័រតុនធ្លាប់ជាជនភៀសខ្លួនខ្មែរនៅជំរំខាវអ៊ីដាងដែរ មុនធ្វើដំណើរមកកាន់សហរដ្ឋអាមេរិកកាលពីឆ្នាំ១៩៨១។ លោកស្រីមានស្រុកកំណើតនៅខេត្តមណ្ឌលគីរី៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
