VOA News: ព័ត៌មាន: “សាលាក្រុងផ្អាកឱសានវាទបណ្តេញអ្នកភូមិបឹងកក់ចេញពីផ្ទះសម្បែង” plus 2 more |
- សាលាក្រុងផ្អាកឱសានវាទបណ្តេញអ្នកភូមិបឹងកក់ចេញពីផ្ទះសម្បែង
- ក្រុមប្រឹក្សាការងារបានសម្រេចដំឡើងប្រាក់ខែដល់កម្មកររោងចក្រកាត់ដេរ
- តុលាការកំពូលសម្រេចថាមេដឹកនាំគណបក្សប្រឆាំងត្រូវជាប់ពន្ធនាគារ២ឆ្នាំក្នុងរឿងព្រំដែន
| សាលាក្រុងផ្អាកឱសានវាទបណ្តេញអ្នកភូមិបឹងកក់ចេញពីផ្ទះសម្បែង Posted: 07 Mar 2011 11:59 AM PST ភ្នំពេញ៖ អ្នកតវ៉ាច្រើនរយតំណាងឱ្យប្រជាពលរដ្ឋបឹងកក់ជាង១៥០០គ្រួសារបាននាំគ្នាតវ៉ានៅមុខសាលាក្រុងភ្នំពេញប្រឆាំងនឹងការដាក់ឱសានវាទបណ្តេញពួកគាត់ចេញពីផ្ទះសម្បែងនិងបានបង្ខំឱ្យ អាជ្ញាធរសាលាក្រុងភ្នំពេញផ្អាកការបណ្តេញនេះជាបណ្តោះអាសន្នសិន។ អ្នកភូមិបឹងកក់ទាមទារដីទំហំ១៥ហិចតាក្នុងចំណោមដីសរុប១៣៣ហិចតាសម្រាប់ការអភិវឌ្ឍនៅនឹងកន្លែង។ មន្ត្រីសាលាក្រុងភ្នំពេញនឹងយកសំណើនេះជូនទៅជូនលោកអភិបាល។ នៅថ្ងៃច័ន្ទនេះ សាលាក្រុងភ្នំពេញបានប្រកាសផ្អាកការបណ្តេញអ្នកភូមិបឹងកក់ចេញពីផ្ទះសម្បែង ដែលនឹងចូលជាធរមាននៅក្នុងសប្តាហ៍នេះ ខណៈដែលប្រជាពលរដ្ឋបឹងកក់បានប្រមូលផ្តុំគ្នានៅ មុខសាលាក្រុងភ្នំពេញ ដើម្បីតវ៉ាប្រឆាំងនឹងការកំណត់ឱសានវាទបណ្តេញពួកគាត់ចេញពីតំបន់បឹងកក់។ សាលាខណ្ឌដូនពេញ កាលពីសប្តាហ៍មុន បានដាក់ឱសានវាទរយៈពេលប្រាំពីរថ្ងៃសម្រាប់ការ បណ្តេញអ្នកភូមិបឹងកក់ដែលនឹងចូលជាធរមាននៅថ្ងៃពុធខាងមុខនេះ ហើយក្នុងករណីប្រជាពលរដ្ឋមិនអនុវត្តតាមសេចក្តីជូនដំណឹងនេះទេ សាលាខណ្ឌដូនពេញនឹងចាត់វិធានការតាមផ្លូវច្បាប់យ៉ាងតឹងរ៉ឹងបំផុត ពិសេសមិនទទួលខុសត្រូវលើការបាត់បង់ ឬការខូចខាតសម្ភារៈរបស់ប្រជាពលរដ្ឋឡើយ។ អ្នកភូមិបឹងកក់ប្រមាណ២០០នាក់ តំណាងឱ្យប្រជាពលរដ្ឋបឹងកក់ជាង១៥០០គ្រួសារ បាននាំគ្នាតវ៉ានៅមុខសាលាក្រុងភ្នំពេញ ប្រឆាំងនឹងឱសានវាទបណ្តេញពួកគាត់ចេញពីផ្ទះសម្បែង។ លោកកើត ឆែ នាយករងផ្នែករដ្ឋបាលសាលាក្រុងភ្នំពេញ បានថ្លែងប្រាប់អ្នកតំណាង១០នាក់របស់អ្នកតវ៉ានៅតំបន់បឹងកក់ក្នុងការជួបពិភាក្សានៅសាលាក្រុងភ្នំពេញថា សាលាក្រុងភ្នំពេញបានផ្អាកការបណ្តេញប្រជាពលរដ្ឋបឹងកក់សិន ហើយត្រួតពិនិត្យមើលផលប៉ះពាល់នៃការកសាងផ្លូវ។ អ្នកស្រីលី ស្រីមុំ តំណាងប្រជាពលរដ្ឋបឹងកក់ បាននិយាយប្រាប់ក្រុមអ្នករាយការណ៍ព័ត៌មានក្រោយពីការពិភាក្សាជាមួយមន្ត្រីសាលាក្រុងភ្នំពេញថា អ្នកភូមិបឹងកក់បានទទួលយកការផ្អាកការបណ្តេញ ចេញនេះ ប៉ុន្តែនៅតែទទូចស្នើសុំដីទំហំ១៥ហិចតានៃផ្ទៃដីសរុប១៣៣ហិចតាសម្រាប់ធ្វើការអភិវឌ្ឍ នៅនឹងកន្លែងសម្រាប់ប្រជាពលរដ្ឋជាង១៥០០គ្រួសារ។ «ឥឡូវនេះ គាត់នឹងផ្អាកការបណ្តេញប្រជាពលរដ្ឋ។ ខ្ញុំយល់ថា ការអភិវឌ្ឍនេះគ្មានតម្លាភាពសម្រាប់ ប្រជាពលរដ្ឋទេ ព្រោះថា ប្រជាពលរដ្ឋមានផ្ទះ គេអភិវឌ្ឍរហូតដល់គាត់អត់ផ្ទះ។ អញ្ចឹង ខ្ញុំចង់ឱ្យរាជ រដ្ឋាភិបាលក៏ដោយ សាលារាជធានីភ្នំពេញក៏ដោយ សូមឱ្យគិតផលប្រយោជន៍របស់ប្រជាពលរដ្ឋជាធំ»។ លោកកើត ឆែបានបញ្ជាក់ថា លោកនឹងបញ្ជូនសំណើសុំអភិវឌ្ឍន៍នៅនឹងកន្លែងចំនួន១៥ហិចតានេះ ទៅជូនលោកឯកឧត្តមកែប ជុតិមា អភិបាលសាលាក្រុងភ្នំពេញនៅថ្ងៃពុធ ហើយបានសន្យាជូនដំណឹងដល់អ្នកភូមិបឹងកក់ តាមរយៈប្រធានភូមិអំពីលទ្ធផលនេះ នៅពេលក្រោយ។ អ្នកស្រីលី ស្រីមុំបាននិយាយយ៉ាងដូច្នេះថា «បើគ្មានដំណោះស្រាយ និងគ្មានបើកការចរចាជាមួយ ប្រជាពលរដ្ឋទេ ពួកខ្ញុំនៅថ្ងៃច័ន្ទនឹងមកជួបឯកឧត្តមកែប ជុតិមាម្តងទៀត»។ លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានថ្លែងថា ករណីបឹងកក់នេះគឺជាការរំលោភ ច្បាប់ និងរំលោភសិទ្ធិមនុស្សដ៏ធ្ងន់ធ្ងរ ដែលអាចបណ្តាលឱ្យមានអស្ថិរភាពនៅក្នុងសង្គម។ «ការពន្យារពេល (ការបណ្តេញចេញ)នេះមិនដោះស្រាយ(បញ្ហា)ទេ ពីព្រោះទោះបីមានការពន្យារ ពេលក៏ដោយ ក៏ប្រជាពលរដ្ឋរងគ្រោះនូវការរំលោភសិទ្ធិរបស់គាត់ដែរ។ ជាទូទៅ គាត់រស់នៅដោយ ការភ័យខ្លាចដដែល ទោះបីជាពន្យារពេល ឬមិនពន្យារពេលក៏ដោយ។ ការរំលោភសិទ្ធិមនុស្សបាន រំលោភទៅលើប្រជាពលរដ្ឋរួចទៅហើយដែលធ្វើឱ្យគាត់មានការភ័យខ្លាច ដោយសារយើងមិនយកច្បាប់មកប្រើ។ ដល់ពេលឥឡូវនេះ ទោះបីជាមានការពន្យារពេល ក៏វានៅតែជាការរំលោភសិទ្ធិមនុស្សដែរ ពីព្រោះយើងទុកឱ្យគាត់មានការភ័យខ្លាច។ រឿងនៅបឹងកក់នេះ រឿងពន្យារពេល (ការបណ្តេញចេញ)នេះមិនមែនជាដំណោះស្រាយទាល់តែសោះ។ វាគ្រាន់តែជាការព្យាយាមបន្ធូរ សម្រាលបរិយាកាសបន្តិចបន្តួចតែប៉ុណ្ណោះ។ ប៉ុន្តែចុងបញ្ចប់ ការរំលោភសិទ្ធិរបស់គាត់នៅតែជាការរំលោភសិទ្ធិរបស់គាត់ដដែល»។ នៅក្នុងឆ្នាំ២០០៧ រដ្ឋាភិបាលបានផ្តល់កិច្ចសន្យាជួលរយៈពេល៩៩ឆ្នាំ ដែលមានតម្លៃទឹកប្រាក់៧៩ លានដុល្លារអាមេរិកទៅឱ្យក្រុមហ៊ុនអភិវឌ្ឍន៍ Shukaku Inc. របស់លោកឡាវ ម៉េងឃីន សមាជិក ព្រឹទ្ធសភារបស់គណបក្សគ្រប់គ្រងអំណាច CPP ធ្វើការអភិវឌ្ឍទីក្រុងទំនើប។ សម្រាប់ជាថ្នូរនឹងការចាកចេញ រដ្ឋាភិបាលបានផ្តល់៨៥០០ដុល្លារអាមេរិកក្នុងមួយគ្រួសារ ឬទៅតាំងទីលំនៅថ្មីនៅជាយទីក្រុងភ្នំពេញ ឬការអភិវឌ្ឍនៅនឹងកន្លែង៕ This posting includes an audio/video/photo media file: Download Now |
| ក្រុមប្រឹក្សាការងារបានសម្រេចដំឡើងប្រាក់ខែដល់កម្មកររោងចក្រកាត់ដេរ Posted: 07 Mar 2011 11:39 AM PST ភ្នំពេញ៖ កម្មកររោងចក្រកាត់ដេរ និងរោងចក្រវាយនភណ្ឌដទៃទៀតនឹងទទួលបានប្រាក់ឧបត្ថម្ភបន្ថែមទៀតចាប់ពីខែមិនានេះតទៅ។ កាលពីព្រឹកថ្ងៃច័ន្ទនេះ ក្រុមប្រឹក្សាការងារទើបតែបានសម្រេចដំឡើងប្រាក់ខែ ប្រាក់បន្ថែមម៉ោង និងប្រាក់អតីតភាពការងារដល់កម្មករ។ ចាប់ពីខែមិនានេះតទៅ កម្មករ កម្មការិនីរោងចក្រកាត់ដេរសម្លៀកបំពាក់ និងរោងចក្រដែលបម្រើឲ្យវិស័យនាំចេញដទៃទៀត នឹងទទួលបានការដំឡើងប្រាក់ខែពីរដុល្លារជាបន្ថែមទៀតក្នុងមួយខែប្រសិនបើពួកគេធ្វើការដោយពុំមានការឈប់សម្រាកដោយប្រការណាមួយ។ ជាងនេះទៀត ក្រុមកម្មករនឹងទទួលបានប្រាក់ឧបត្ថម្ភអាហារចំនួន២០០០រៀល ឬស្មើនឹងប្រហាក់ប្រហែល០,៥០សេនដុល្លារអាមេរិកសម្រាប់ធ្វើការបន្ថែមម៉ោង រួមទាំងនឹងទទួលបានប្រាក់ឧបត្ថម្ភសម្រាប់អតីតភាព ការងារពីពីរដុល្លារហូតដល់១១ដុល្លារក្នុងមួយខែ ប្រសិនបើកម្មករបំពេញការងារចាប់ពីពីរឆ្នាំរហូត ដល់១១ឆ្នាំយ៉ាងតិច។ នេះគឺជាសេចក្ដីសម្រេចរបស់ក្រុមប្រឹក្សាការងារកាលពីព្រឹកថ្ងៃច័ន្ទនេះ។ ក្រុមប្រឹក្សាការងាររួមមានក្រសួងការងារនិងបណ្ដុះបណ្ដាលវិជ្ជាជីវៈ តំណាងថៅកែឧស្សាហកម្មកាត់ដេរ និងតំណាងសហជីពកម្មករ។ សេចក្ដីសម្រេចនេះធ្វើឡើង បន្ទាប់ពីការដំឡើងប្រាក់ឈ្នួលអប្បបរមាដល់ក្រុមកម្មករ កាលពីខែកក្កដា ឆ្នាំ២០១០ ចំនួនប្រាំដុល្លារសម្រាប់កម្មករក្នុងរយៈពេលសាកល្បងនិងធ្វើឲ្យប្រាក់ឧបត្ថម្ភចំនួន១១ដុល្លារដល់កម្មករពេញសិទ្ធិនេះ ទៅជាប្រាក់ខែផ្លូវការ។ ក៏ប៉ុន្ដែការដំឡើងប្រាក់ខែនោះត្រូវបានជំទាស់ដោយក្រុមសហជីពកម្មករ ដោយសារតែពួកគេលើកឡើងថា ការតំឡើងប្រាក់ឈ្នួលនោះនៅតិចតួច ហើយមិនសមស្របតាមការឡើងថ្លៃទំនិញនៅលើទីផ្សារទេ។ លោកអាត់ ធន់ ប្រធានសម្ព័ន្ធសហជីពប្រជាធិបតេយ្យ កម្មករកាត់ដេរកម្ពុជា ហៅកាត់ថា CCAWDU មានប្រសាសន៍ថា លោកនៅមិនទាន់ពេញចិត្តចំពោះការសម្រេចនេះនៅឡើយទេ។ «លទ្ធផលនេះនៅមិនទាន់ដល់កម្រិតដែលយើងពេញចិត្តទេ។ គោលការណ៍របស់យើងគឺយើងចរចាឲ្យបាន ៣ដុល្លារ (ក្នុងមួយខែ) ទើបជាការពេញចិត្ត»។ ដោយឡែក លោកជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជា លើកឡើងថា លោកអាចទទួលយកចំណុចមួយចំនួនក្នុងចំណោមអត្ថប្រយោជន៍ទាំងបីចំណុចខាងលើនេះ។ «យើងខ្ញុំអាចទទួលយកបានចំណុចមួយចំនួន ហើយចំណុចមួយចំនួនទៀត សុំឲ្យក្រុមប្រឹក្សាការងារធ្វើការពិចារណាឡើងវិញ»។ ចំណុចដែលលោកជា មុន្នីទាមទារឲ្យមានការគិតគូរឡើងវិញនោះគឺការផ្ដល់ប្រាក់អតីតភាពការងាររបស់កម្មករដែលអាចបាន១២ដុល្លារក្នុង១ខែ ក្រោយពីការបំពេញការងារអស់រយៈពេល១១ឆ្នាំ គឺមិនមែន១១ដុល្លារដូចពេលនេះទេ។ លោកជា មុន្នីចាត់ទុកថា ការសម្រេចរបស់ក្រុមប្រឹក្សាការងារនៅ ពេលនេះ គឺដើម្បីបញ្ចៀសកូដកម្មរបស់ក្រុមកម្មករដែលទាមទារដំឡើងប្រាក់ខែ។ ក្រុមសហជីពគំរាមធ្វើកូដកម្មក្នុងខែមិនានេះ ប្រសិនបើរោងចក្រកាត់ដេរមិនព្រមបន្ថែមប្រាក់ផលប្រយោជន៍ដល់កម្មករទេនោះ។ កម្មកររោងចក្រនៅក្នុងប្រទេសកម្ពុជាមានចំនួនប្រមាណជា៣៦០០០០នាក់និងមានរោងចក្រប្រមាណជិត៣០០រោងចក្រ នេះបើយោងតាមតួលេខផ្លូវការ។ លោកខេន លូ (Ken Loo) អគ្គលេខាធិការសមាគមរោងចក្រកាត់ដេរកម្ពុជា ហៅកាត់ថា GMAC មានប្រសាសន៍ថា សេចក្ដីសម្រេចរបស់ក្រុមប្រឹក្សាការងារនៅថ្ងៃនេះធ្វើឡើងបន្ទាប់ពីមានការចរចាគ្នាជាច្រើនរវាងថៅកែរោងចក្រនិងសហជីពកម្មករ ហើយលោកជឿថា សេចក្ដីសម្រេចនេះនឹងនាំមកនូវផលប្រយោជន៍រួម។ «នេះគឺជាការជឿនលឿនទៅមុខមួយ ហើយយើងសង្ឃឹមថា វានឹងជួយធ្វើឲ្យមានភាពប្រសើរឡើងនូវស្ថានភាពទំនាក់ទំនងរវាងរោងចក្រនិងកម្មករ ហើយវានឹងជួយធ្វើឲ្យសង្វាក់ផលិតកម្មប្រសើរឡើង ថែមទៀតផងដែរ»។ វិស័យវាយនភណ្ឌគឺជាវិស័យចលករសម្រាប់កំណើនសេដ្ឋកិច្ចកម្ពុជាយ៉ាងសំខាន់មួយ។ ទឹកប្រាក់បានពីការនាំចេញក្នុងវិស័យនេះមានទំហំជាង២០០០លានដុល្លារកាលពីឆ្នាំមុន៕ This posting includes an audio/video/photo media file: Download Now |
| តុលាការកំពូលសម្រេចថាមេដឹកនាំគណបក្សប្រឆាំងត្រូវជាប់ពន្ធនាគារ២ឆ្នាំក្នុងរឿងព្រំដែន Posted: 07 Mar 2011 10:14 AM PST តុលាការជាន់ខ្ពស់នៃប្រទេសកម្ពុជាកាលពីថ្ងៃអង្គារបានសម្រេចដំកល់សាលដីការរបស់សាលាឧទ្ធរណ៍ចំពោះករណីលោកសម រង្ស៊ីមេដឹកនាំគណៈបក្សប្រឆាំងដោយសម្រេចឲ្យលោកជាប់ពន្ធនាគាររយៈពេល២ឆ្នាំដដែល។ សាលក្រមបានកើតមានឡើងបន្ទាប់ពីលោកបានដកតម្រុយព្រំដែនជាមួយប្រទេសវៀតណាមកាលពីជាង១ឆ្នាំមុនដោយលោកបានអះអាងកសិករកម្ពុជាបានបាត់បង់ទឹកដីទៅប្រទេសជិតខាងមានអំណាចជាងរបស់ខ្លួន។ ចៅក្រមតុលាការកំពូលបាននិយាយកាលពីថ្ងៃអង្គារថាលោកសម រង្ស៊ីមេដឹកនាំគណបក្សប្រឆាំង ត្រូវតែទទួលទោសរយៈពេល២ឆ្នាំដែលត្រូវបានសម្រេចកាលពីឆ្នាំទៅដោយសាលាឧទ្ធណ៍។ លោកសម រង្ស៊ី ដែលរស់នៅនិរទេសខ្លួនក្នុងប្រទេសបារាំង បានត្រូវតុលាការកាត់ឲ្យជាប់ទោសពីការញុះញង់ឲ្យមានការរើសអើងខាងជាតិសាសន៍ហើយនឹងធ្វើឲ្យខូចខាតទ្រព្យសម្បតិ្តសាធារណៈក្នុងឧបទ្ទវហេតុកាលពីខែតុលាឆ្នាំ២០០៩នៅព្រំដែនជាមួយប្រទេសវៀតណាម។ សមាជិកជាន់ខ្ពស់ខ្លះរបស់គណបក្សសម រង្ស៊ី ឬ SRP និយាយកាលពីថ្ងៃអង្គារថាសាលក្រមនេះមិនធ្វើឲ្យមានការភ្ញាក់ផ្អើលទេ។ លោកសុន ឆៃ សមាជិកសភាជើងចាស់ម្នាក់របស់គណបក្សសម រង្ស៊ី SRP បាននិយាយថាតុលាការបានធ្វើតាមបញ្ជារបស់គណបក្សកាន់អំណាច។ «មិនមានការភ្ញាក់ផ្អើលទេ យើងទាំងអស់បានទស្សន៍ទាយថាតុលាការកំពូលនឹងរក្សាសាលក្រមដោយបញ្ជូនលោកសម រង្ស៊ីឲ្យជាប់ពន្ធនាគារ២ឆ្នាំ។ហើយយើងមិនមានសេចក្តីសង្ឃឹមថាប្រព័ន្ធយុត្តិធ៌មក្នុងប្រទេសកម្ពុជាឬតុលាការខ្លួនឯង នឹងអាចធ្វើកំណែទម្រង់ណាមួយដើម្បីបង្កើនទំនុកចិត្តខ្លះពីសាធារណៈជនក្នុងថ្ងៃអនាគតទេ»។ លោកសុន ឆៃ ថ្លែងថាគោលបំណងរបស់គណបក្សគ្រប់គ្រងអំណាចគឺធ្វើឲ្យប្រាកដថាលោកសម រង្ស៊ី មិនអាចចូលរួមក្នុងការបោះឆ្នោតលើកក្រោយ ដែលត្រូវគេគ្រោងធ្វើឡើងនៅឆ្នាំ២០១៣។ សេចក្តីសម្រេចនៅថ្ងៃនេះ មានន័យថា លោកសមរង្ស៊ីមានឱកាសតិចតួចណាស់ ក្នុងការចូលរួមការបោះឆ្នោត លើកលែងតែមានការសម្របសម្រួលខាងនយោបាយមួយ។ លោកសុន ឆៃ ថ្លែងបន្តទៀតថា សហគមន៍អន្តរជាតិ ដែលបានវិនិយោគទុនប្រាក់រាប់ពាន់លានដុល្លាដើម្បីឲ្យមានស្ថេរភាពនយោបាយក្នុងប្រទេសកម្ពុជា មិនយល់ពីស្ថានភាពធ្ងន់ធ្ងរ។ «ពួកគេហាក់ដូចជាយល់ច្រឡំថារឿងក្តីរបស់លោកសម រង្ស៊ីជារឿងក្តីបុគ្គលដែលវាមិនបានឆ្លុះបញ្ចាំងពីតម្រូវការដើម្បីរក្សាបរិយាកាសប្រជាធិបតេយ្យនៅក្នុងប្រទេសទេ។ នេះជាកំហុសដ៏ធំមួយ។ ប្រទេសម្ចាស់ជំនួយ ជាពិសេសប្រទេសលោកខាងលិច ដែលបានផ្តល់ជំនួយយ៉ាងច្រើនដល់ប្រទេសកម្ពុជាគួរតែ ពិនិត្យមើលបញ្ហាលោកសម រង្ស៊ីឲ្យបានហ្មត់ចត់»។ ក្នុងអំឡុងពេលនៃដំណើរបំពេញទស្សនៈកិច្ចកាលពីពេលថ្មីៗនេះរបស់លោកទៅកាន់ទីក្រុងភ្នំពេញ លោក Surya Subedi បេសកជនខាងសិទ្ធិមនុស្សរបស់អង្គការសហប្រជាជាតិបានមានប្រសាសន៍ថា មន្រ្តីរដ្ឋាភិបាល គួរមានការអត់ឱនកាន់តែច្រើនឡើង ហើយគួរឈប់ប្រើប្រាស់តុលាការប្រឆាំងនឹងអ្នករិះគន់របស់ខ្លួន។ មេដឹកនាំគណបក្សប្រឆាំងសម រង្ស៊ី បានប្រឈមមុខបញ្ហាផ្លូវច្បាប់កាន់តែច្រើនឡើង។ កាលពីឆ្នាំទៅលោកបានត្រូវតុលាការកាត់ឲ្យជាប់ពន្ធនាគារ១០ឆ្នាំបន្ទាប់ពីលោកបានបង្ហាញផែនទីនៅសន្និសិទសាព័ត៌មាន ដែលរដ្ឋាភិបាលអះអាងថាមិនបង្ហាញព្រំដែនត្រឹមត្រូវរវាងវៀតណាមនិងកម្ពុជា។ រដ្ឋាភិបាលនិយាយនៅពេលនោះថា សកម្មភាពរបស់លោក ស្មើនិងការផ្សាយព័ត៌មានមិនពិតនិងក្លែងក្លាយឯកសារសាធារណៈ។ បញ្ហាព្រំដែនជាមួយប្រទេសវៀតណាមជាបញ្ហារសើបមួយសម្រាប់រដ្ឋាភិបាល។ លោកនាយករដ្ឋមន្រ្តីហ៊ុន សែន រក្សាទំនាក់ទំនងជិតស្និទ្ធជាមួយរដ្ឋាភិបាលក្រុងហាណូយ ហើយប្រជាពលរដ្ឋកម្ពុជាជាច្រើន មិនទុកចិត្តប្រទេសជិតខាងដែលមានអំណាចខ្លាំងជាងនេះទេ៕ ប្រែសម្រួលដោយ ជឹង ប៉ូជីន This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
