Koh Santipheap Daily |
- រដ្ឋអ៊ីលីណយរបស់អាមេរិកលុបចោលទោសប្រហារជីវិត
- រុស្ស៊ី ៖ ការនាំចេញអាវុធនឹងមានទឹកប្រាក់ដល់9,5ពាន់លានដុល្លារក្នុងឆ្នាំ2011
- ក្រុមហ៊ុនវៀតណាមផ្តល់សារជាតិពិសេសសម្រាប់ថែបំប៉នដំណាំស្រូវ
- ព្រះមហាក្សត្រម៉ារ៉ុក ប្រកាសពីការកែទម្រង់រដ្ឋធម្មនុញ្ញ
- មហាសេដ្ឋីម៉ិចស៊ិក លោកកាឡូស ស្លីម បន្តតំណែងជាអ្នកមានបំផុតលើពិភពលោក
- នគរបាលឃាត់ខ្លួនជនសង្ស័យជួញដូរថ្នាំញៀន២នាក់
- ខឹងឪពុកម្តាយវាយធ្វើបាបតស៊ូចេញពីខេត្តកំពង់ចាមលោតទឹកសម្លាប់ខ្លួន
- លោកអែល បារ៉ាដេ ចង់ឈរឈ្មោះជាបេក្ខជនប្រធានាធិបតីអេហ្ស៊ីប
- ក្មេងប្រុសហ្វីលីពីនម្នាក់អាយុ17ឆ្នាំ កម្ពស់22អ៊ីញ ស្វះស្វែងរកតំណែងឯតទគ្គកម្មជាបុរសទាបបំផុត
- យុវជនម្នាក់មកការបងត្រូវក្រុមក្មេងស្ទាវចាក់ស្លាប់
- មានជំងឺផងក្រីក្រផងលេបថ្នាំ២០គ្រាប់ប៉ុនប៉ងធ្វើអត្តឃាត
- ជុំវិញកិច្ចប្រជុំJBCត្រៀមធ្វើនៅប្រទេសឥណ្ឌូណេស៊ី កម្ពុជាបានដើរមុនភាគីថៃមួយជំហានទៀតក្នុងការសម្រេចចិត្ត
- សម្ពោធផ្លូវ និងសមិទ្ធផលគម្រោងស្ថាបនាភូមិសុវត្ថិភាពក្រោមកិច្ចសហការរវាង CMAC និង JMAS
- សមាគមសិល្បករខ្មែរនាំយកអំណោយជូនកងកម្លាំងសមរភូមិមុខ
- សម្តេចព្រះវនរ័ត ណយ ច្រឹក ៖ ព្រះពុទ្ធយកធម៌ មនុស្សយកកិត្តិយស
- គណៈបញ្ជាការឯកភាពខណ្ឌដង្កោរាយអន្ទាក់ឆែកអាវុធជាតិផ្ទុះ ចាប់ម៉ូតូ-រថយន្ត ច្រើនគ្រឿង
- ពុតត្បុតអ្នកឈ្លានពាន ការចង់អូសបន្លាយពីបទឈប់បាញ់គ្នា គឺដើម្បីបញ្ឆេះសង្គ្រាមប៉ុណ្ណោះ
- ស្រូវជាង១ពាន់តោនក្លាយជាចំណីព្រះអគ្គីកណ្តាលរាត្រី
- ភ្លៀងកក់ខែមួយមេមានព្យុះ ផ្ទះនិងសាលារៀនប៉ើងដំបូល ខ្លះរលំ នៅស្រុកជើងព្រៃនិងកងមាស
- មុនចូលរោងការ៣ថ្ងៃ នាងជាប្រពន្ធមកអូស.កប្តីត្រឡប់ទៅផ្ទះវិញ
| រដ្ឋអ៊ីលីណយរបស់អាមេរិកលុបចោលទោសប្រហារជីវិត Posted: 09 Mar 2011 11:05 PM PST  រដ្ឋអ៊ីលីណយបានលុបចោលវិញនូវទោសប្រហារជីវិតក្រោយពីការពិភាក្សាយ៉ាងតានតឹងរយៈពេល២ទសវត្សដោយឈរលើមូលដ្ឋានដែលថា ប្រព័ន្ធយុត្តិធម៌មួយនេះអាចសម្លាប់មនុស្សស្លូតត្រង់ដោយការភ័ន្តច្រឡំ ។ រដ្ឋអ៊ីលីណយបានក្លាយជារដ្ឋទី១៦របស់សហរដ្ឋអាមេរិកដែលលុបចោលវិញនូវទោសប្រហារជីវិត ។ ការលុបចោលច្បាប់នេះអាចសង្គ្រោះបុរស១៥នាក់ ដែលប្រឈមមុខនឹងការប្រហារជីវិតពីបទចោទប្រកាន់ផ្សេងៗ ។  |
| រុស្ស៊ី ៖ ការនាំចេញអាវុធនឹងមានទឹកប្រាក់ដល់9,5ពាន់លានដុល្លារក្នុងឆ្នាំ2011 Posted: 09 Mar 2011 11:01 PM PST ម៉ាស៊ីនឃោសនាក្នុងស្រុករាយការណ៍កាលពីថ្ងៃទី៩ មីនា ថា ក្រុមហ៊ុន ROSOBORON-EXPORT ជាក្រុមហ៊ុននាំចេញអាវុធរុស្ស៊ីបានលាតត្រដាងពីផែនការនាំចេញអាវុធរបស់ខ្លួនក្នុងឆ្នាំ២០១១ ថា នឹងមាន៩,៥ពាន់លានដុល្លារ។  |
| ក្រុមហ៊ុនវៀតណាមផ្តល់សារជាតិពិសេសសម្រាប់ថែបំប៉នដំណាំស្រូវ Posted: 09 Mar 2011 10:44 PM PST រាជធានីភ្នំពេញ ៖ ក្រុមហ៊ុន RVAC ខេត្តកៀងយ៉ាង ប្រទេសវៀតណាម ដែលជាក្រុមហ៊ុនផលិតជីគីមី និងផលិផលមានលក្ខណៈធម្មជាតិសម្រាប់បំប៉នដល់រុក្ខជាតិ តាមរយៈសមាគមគ្រួសារខ្មែរអភិវឌ្ឍន៍កាលពីថ្ងៃទី៨ មីនា ២០១១ បាននាំយកសារជាតិគីមីពិសេសសម្រាប់ថែបំប៉នដំណាំស្រូវ និងប្រើប្រាស់លើស្រូវសន្ទូងប្រគល់ដល់មន្ទីរកសិកម្មរាជធានីភ្នំពេញ ។  |
| ព្រះមហាក្សត្រម៉ារ៉ុក ប្រកាសពីការកែទម្រង់រដ្ឋធម្មនុញ្ញ Posted: 09 Mar 2011 10:44 PM PST  ព្រះមហាក្សត្រម៉ារ៉ុក ព្រះចៅម៉ូហាម៉េដ ទី៦ ទ្រង់ប្រកាសកាលពីយប់ថ្ងៃទី៩ មីនា ពីការកែទម្រង់រដ្ឋធម្មនុញ្ញ និងការបង្កើតគណៈកម្មការមួយទទួលបន្ទុករៀបចំសំណើនានារហូតដល់ខែមិថុនា ។  |
| មហាសេដ្ឋីម៉ិចស៊ិក លោកកាឡូស ស្លីម បន្តតំណែងជាអ្នកមានបំផុតលើពិភពលោក Posted: 09 Mar 2011 10:36 PM PST លោកកាឡូស ស្លីម ជាមហាសេដ្ឋីផ្នែកទូរគមនាគមន៍ល្បីឈ្មោះម្នាក់នៅតែរក្សាតំណែងជាអ្នកមានបំផុតនៅលើពិភពលោក ដោយទ្រព្យសម្បត្តិរបស់លោកកើនឡើងជាង១ភាគ៣ ។ នេះបើតាមការឱ្យដឹងតាមរយៈបញ្ជីឈ្មោះអ្នកមានបំផុតលើពិភពលោកចងក្រងដោយទស្សនាវដ្តី Forbes ដែលជាទស្សនាវដ្តីល្បីឈ្មោះមួយរបស់សហរដ្ឋអាមេរិក ។  |
| នគរបាលឃាត់ខ្លួនជនសង្ស័យជួញដូរថ្នាំញៀន២នាក់ Posted: 09 Mar 2011 10:36 PM PST   រាជធានីភ្នំពេញ ៖ ជនសង្ស័យជួញដូរថ្នាំ ញៀន២នាក់ត្រូវនគរបាលព្រហ្មទណ្ឌនៃអធិការដ្ឋាននគរបាលខណ្ឌដូនពេញ ឃាត់ខ្លួនជាបន្តបន្ទាប់នៅចំណុចខុសគ្នាកាលពីថ្ងៃទី៩ និងទី១០ មីនា ២០១១ ខណៈពេលដែលពួកគេកំពុងជួញដូរជាក់ស្តែង ។  |
| ខឹងឪពុកម្តាយវាយធ្វើបាបតស៊ូចេញពីខេត្តកំពង់ចាមលោតទឹកសម្លាប់ខ្លួន Posted: 09 Mar 2011 10:36 PM PST  រាជធានីភ្នំពេញ ៖ ស្ត្រីវ័យក្មេងម្នាក់បានខិតខំតស៊ូធ្វើដំណើរចេញពីខេត្តកំពង់ចាម មកលោតទឹកសម្លាប់ខ្លួនពីលើស្ពានជ្រោយចង្វា រាជធានីភ្នំពេញ កាលពីវេលាម៉ោង៧និង៥៥នាទីយប់ថ្ងៃទី៩ មីនា តែមិនទាន់បានលោតផង ត្រូវប៉ូលិសជួយឃាត់ទាន់ពេលវេលា ។ ស្ត្រីរូបនេះឈ្មោះស៊ុំ ស្រីតូ ហៅហ្សាហ្វីយ៉ា អាយុ២០ឆ្នាំ ជាសិស្សវិទ្យាល័យប៊ុន រ៉ានី ហ៊ុន សែន អម្ពរវ័ន មានទីលំនៅភូមិរកាខ្នុរទី៦ ឃុំរកាខ្នុរ ស្រុកក្រូចឆ្មារ ខេត្តកំពង់ចាម ។  |
| លោកអែល បារ៉ាដេ ចង់ឈរឈ្មោះជាបេក្ខជនប្រធានាធិបតីអេហ្ស៊ីប Posted: 09 Mar 2011 07:28 PM PST  លោកម៉ូហាម៉េដ អែលបារ៉ាដេ ប្រកាសកាលពីយប់ថ្ងៃទី៩ មីនា តាមទូរទស្សន៍ឯកជនមួយថា លោកមានបំណងឈរឈ្មោះសំរាប់ការបោះឆ្នោតប្រធានាធិបតីអេហ្ស៊ីបដែលត្រូវធ្វើនាឆ្នាំនេះ។  |
| Posted: 09 Mar 2011 07:28 PM PST  ក្មេងប្រុសជនជាតិហ្វីលីពីនម្នាក់នេះអាយុ១៧ឆ្នាំ ប៉ុន្តែមានកម្ពស់ត្រឹមតែ២២អ៊ីញប៉ុណ្ណោះ។ ប្រសិនបើក្រឡេកមើលលើរូបរាងរបស់ក្មេងប្រុសនេះ គេច្បាស់ជាគិតថា គេអាយុយ៉ាងច្រើនណាស់១ឆ្នាំប៉ុណ្ណោះ ។ ក្មេងប្រុសអភ័ព្វនេះឈ្មោះ Junrey Balawing រស់នៅតំបន់ Zamboanga del Norte បច្ចុប្បន្នឪពុកម្តាយរបស់គេកំពុងស្វះស្វែងរកការទទួលស្គាល់ពីអង្គការកំណត់ហេតុឯតទគ្គកម្មពិភពលោក (ហ្គីណេសប៊ុក) ជាបុរសតូច ហើយទាបបំផុតនៅលើពិភពលោកសម្រាប់រូបគេ ។  |
| យុវជនម្នាក់មកការបងត្រូវក្រុមក្មេងស្ទាវចាក់ស្លាប់ Posted: 09 Mar 2011 07:24 PM PST  រាជធានីភ្នំពេញ ៖ យុវជនវ័យ២២ឆ្នាំម្នាក់បានស្លាប់ក្នុងមន្ទីរពេទ្យកាល់ម៉ែត កាលពីវេលាម៉ោង៣និង៣០នាទីទៀបភ្លឺថ្ងៃទី១០ មីនា២០១១ ក្រោយពីយុវជននោះត្រូវក្រុមក្មេងស្ទាវចាក់មួយកាំបិត ខណៈកើតទំនាស់ពាក្យសម្តីពេលរាំធុងបាស់ ក្នុងពិធីមង្គលការរបស់បងប្រុសបង្កើតនៅភូមិកណ្តាល ឃុំសាឡុង ស្រុកខ្សាច់កណ្តាល ខេត្តកណ្តាល ។ សាច់ញាតិយុវជនរងគ្រោះបាននិយាយឱ្យដឹងថា យុវជនរងគ្រោះដែលត្រូវក្រុមក្មេងស្ទាវនៅឃុំសាឡុង ចាក់ស្លាប់មានឈ្មោះអ៊ិន សំណាង អាយុ២២ឆ្នាំ ទីលំនៅក្នុងភូមិម្រះព្រៅ ឃុំត្រពាំងស្តៅ ស្រុករមាសហែក ខេត្តស្វាយរៀង។ នៅថ្ងៃកើតហេតុ ជនរងគ្រោះដែលជាកូនពៅ និងសាច់ញាតិបានមកចូលរួមពិធីមង្គលការរបស់បងប្រុសបង្កើតក្នុងភូមិកណ្តាល ឃុំសាឡុង ស្រុកខ្សាច់កណ្តាល ខេត្តកណ្តាល ពេលនោះភាពសប្បាយរីករាយ និងអបអរសាទរគូស្វាមីភរិយាថ្មី បានដំណើរការយ៉ាងរលូន ។ លុះយប់ឡើងមានចាក់រាំធុងបាស់ ដើម្បីកំដររោងការ និងកិច្ចស្វាគមន៍ដល់មិត្តភក្តិដែលចូលរួមបទញាក់កន្ទ្រាក់ពេញនិយមរបស់យុវវ័យពីមួយបទទៅមួយបទយ៉ាងសប្បាយ ដោយមានកូនកម្លោះ កូនក្រមុំឡើងរាំ ដើម្បីបើកពិធីសប្បាយភាពជូនញាតិមិត្តផងដែរ ។ នៅវេលាម៉ោងជាង១១យប់នាថ្ងៃដដែល យុវជនរងគ្រោះឈ្មោះអ៊ិន សំណាង បានឡើងរាំជាមួយមិត្តភក្តិ ហើយពេលនោះមានយុវជនមួយក្រុមទៀតដែលគេស្គាល់ជាក្រុមស្ទាវប្រចាំឃុំសាឡុង ចូលរាំបទញាក់ និងជាន់ជើងភាគីជនរងគ្រោះក៏កើតទំនាស់ពាក្យសម្តីដាក់គ្នាទៅវិញទៅមក ភ្លាមនោះម្ចាស់រោងការសុំឱ្យបញ្ឈប់ទំនាស់ និងបន្តការរាំទៀត ។ ក្រោយមកយុវជនរងគ្រោះឈប់រាំហើយដើរទៅផ្ទះស្នាក់នៅ លុះចេញផុតពីរោងការបន្តិចស្រាប់តែមានក្មេងស្ទាវពីរនាក់ជិះម៉ូតូមកក្បែរជនរងគ្រោះ រួចជនម្នាក់ដែលអង្គុយខាងក្រោយលោតចុះពីលើម៉ូតូដកកាំបិតចាក់ចំក្រោមឆ្អឹងជំនីរខាងឆ្វេងមួយកាំបិតបណ្តាលឱ្យដេកដួលលើដី ព្រមទាំងស្រែកឱ្យសាច់ញាតិជួយ រីឯជនដៃដល់នាំគ្នាគេចខ្លួនបន្សល់ទុកម៉ូតូនៅកន្លែងកើតហេតុ ។ សាច់ញាតិជនរងគ្រោះបានបញ្ចាក់ថា ភ្លាមៗនោះយុវជនរងគ្រោះត្រូវបានបញ្ជូនទៅមន្ទីរពេទ្យកាល់ម៉ែត ដើម្បីសង្គ្រោះជីវិត ក៏ប៉ុន្តែដោយសារមុខរបួសធ្ងន់ធ្ងរ ជនរងគ្រោះបានស្លាប់នៅវេលាម៉ោង៣និង៣០នាទីទៀបភ្លឺឈានចូលថ្ងៃទី១០ មីនា ក្រោមសំឡេងស្រែកយំពីក្រុមគ្រួសារ ព្រោះយុវជនដែលស្លាប់នេះគឺជាកូនពៅមកចូលរួមមង្គលការបងប្រុសជាកូនទីប្រាំ ។ សពយុវរងគ្រោះត្រូវបានគេដឹកយកទៅធ្វើបុណ្យនៅឯស្រុកកំណើត រីឯជនដៃដល់ត្រូវបានស្គាល់អត្តសញ្ញាណ ហើយពេលនេះសមត្ថកិច្ចកំពុងស្រាវជ្រាវ៕  |
| មានជំងឺផងក្រីក្រផងលេបថ្នាំ២០គ្រាប់ប៉ុនប៉ងធ្វើអត្តឃាត Posted: 09 Mar 2011 07:09 PM PST  រាជធានីភ្នំពេញ ៖ ស្ត្រីម្នាក់ដែលមានជំងឺប្រចាំកាយច្រើនមុខ និងម្យ៉ាងជីវភាពខ្វះខាតផង ពិបាកចិត្តពេកក៏បានលេបថ្នាំអស់២០គ្រាប់ ដើម្បីសម្លាប់ខ្លួន កាលពីវេលាម៉ោង៦និង៣០នាទីព្រឹកថ្ងៃទី៦ មីនា នៅភូមិត្រពាំងសំព័រ សង្កាត់គោករកា ខណ្ឌដង្កោ ។ ស្ត្រីម្នាក់នេះឈ្មោះវ៉ន សាវឿន អាយុ២៩ឆ្នាំ មុខរបរលក់បង្អែម ប្តីឈ្មោះជិន ណុំ អាយុ៤០ឆ្នាំ មានកូន២នាក់ និងមានស្រុកកំណើតនៅភូមិលង្វែក ឃុំឧកញ៉ាប៉ាង ស្រុកកំពង់ត្រឡាច ខេត្តកំពង់ឆ្នាំង ។ តាមសាច់ញាតិរបស់ស្ត្រីរូបនេះបានឱ្យដឹងថា កាលនៅស្រុកកំណើតនាងធ្វើការនៅរោងចក្រកាត់ដេរ តែដោយសារមានជំងឺក៏ឈប់ធ្វើការទៅ ចំណែកប្តីដើរលក់ការ៉េម តែប្រាក់ចំណូលដែលរកបានមិនអាចទ្រទ្រង់ចិញ្ចឹមគ្រួសារបាន ក៏មកសុំស្នាក់នៅផ្ទះបងស្រីឈ្មោះជិន ថន អាយុ៤៥ឆ្នាំ នៅភូមិត្រពាំងសំព័រ សង្កាត់គោករកា ខណ្ឌ ដង្កោ ។ ការមករស់នៅជាមួយបងស្រីនេះ ស្ត្រីរងគ្រោះលក់បង្អែម រីឯប្តីដើរទិញអេតចាយ ។ ប្រភពព័ត៌មានពីបងស្រីឈ្មោះជិន ថន បានឱ្យដឹងថា នាងវ៉ន សាវឿន មកស្នាក់នៅជាមួយគាត់នេះលក់បានលុយបន្តិចបន្តួចគ្រាន់តែផ្គត់ផ្គង់គ្រួសារមិនចង់គ្រប់ផង ហើយខ្លួននាងមានជំងឺប្រចាំកាយច្រើនមុខទៀត ដូចជា ឈឺក្រពះ និងដុះសាច់ច្រមុះ ។ ថ្មីៗនេះនាងបានទៅមើលអេកូនៅមន្ទីរពេទ្យជិតវត្តភ្នំ គ្រូពេទ្យប្រាប់ថា នាងមានគីសនៅដៃស្បូន ត្រូវវះកាត់ចេញ ហើយគ្រូពេទ្យបានឱ្យថ្នាំផ្សះមួយចំនួនមកនាងទុកលេបចំនួនជាង២០គ្រាប់ លុះពេលមកដល់ផ្ទះវិញ នាងពិបាកចិត្តពេកក៏គិតខ្លីបែបនេះទៅ ។ ការដឹងថានាងលេបថ្នាំ ដោយសារបាត់ប្រពន្ធយូរពេក មិនឃើញចុះពីលើផ្ទះ ប្តីក៏ឡើងទៅលើផ្ទះមើលប្រពន្ធ ស្រាប់តែឃើញប្រពន្ធបែកពពុះមាត់ស្កុល ហើយរកមើលថ្នាំដែលគ្រូពេទ្យឱ្យនាងលេបរាល់ថ្ងៃនោះមិនឃើញ ក៏ប្រញាប់ប្រញាល់ស្រែកហៅឱ្យគេជួយ ដោយធ្វើទឹកស្ករលាយជាមួយក្រូចឆ្មារឱ្យនាងផឹកនៅតែមិនបាត់ទៀត ក៏បញ្ជូននាងទៅព្យាបាលនៅមន្ទីរពេទ្យព្រះកុសុមៈ៕  |
| Posted: 09 Mar 2011 07:04 PM PST យោងតាមកាសែតបាងកកប៉ុស្តិ៍របស់ថៃផ្សាយជាភាសាអង់គ្លេសនៅថ្ងៃទី៩ មីនា ឱ្យដឹងថា នាយករដ្ឋមន្ត្រីថៃលោកអាប់ភីស៊ីត វ៉េចាជីវ៉ា សង្ឃឹមថា កិច្ចប្រជុំគណៈកម្មាធិការព្រំដែនចម្រុះ (JBC) ដែលត្រូវរៀបចំឡើងនៅក្នុងប្រទេសឥណ្ឌូណេស៊ីនាពេលខាងមុខនេះនឹងជាចំណុចចាប់ផ្តើមមួយ ដើម្បីបន្ធូរបន្ថយភាពតានតឹងនៅតាមបណ្តោយព្រំដែនរវាងប្រទេសថៃ និងប្រទេសកម្ពុជា ។ លោកអាប់ភីស៊ីត បានលើកឡើងដូច្នេះក្រោយពីភាគីកម្ពុជាបានឯកភាពចំពោះកិច្ចប្រជុំនេះដែលស្នើឡើងដោយប្រធានអាស៊ានដោយត្រូវរៀបចំធ្វើនៅថ្ងៃទី២៤និង២៥ មីនាខាងមុខ។ កាសែតបាងកកប៉ុស្តិ៍បានដកស្រង់សម្តីលោក Thani Thongpha Kdi អ្នកនាំពាក្យក្រសួងការបរទេសថៃ ដែលថ្លែងកាលពីថ្ងៃទី៨ មីនា កន្លងមកថា រដ្ឋមន្ត្រីការបរទេសឥណ្ឌូណេស៊ីលោកម៉ាធី ណាតាឡេហ្គាវ៉ា ជាប្រធានអាស៊ាន បានជម្រាបក្រសួងការបរទេសថៃថា កម្ពុជាបានឯកភាពរួចហើយចំពោះការចូលរួមកិច្ចប្រជុំ JBC ដែលស្នើឡើងនោះ ។ ដំបូងកិច្ចប្រជុំ JBC ត្រូវគ្រោងរៀបចំធ្វើនាចុងខែកុម្ភៈ កន្លងមក ប៉ុន្តែបានពន្យារពេលវិញ ដោយភាគីថៃអះអាងថា កម្ពុជាចង់ឱ្យមានអន្តរាគមន៍ពីសហគមន៍អន្តរជាតិសិន ។ កាសែតថៃដដែលនេះបានដកស្រង់សម្តីលោកអាប់ភីស៊ីត ដែលថ្លែងថា «ខ្ញុំសង្ឃឹមថា កិច្ចប្រជុំនេះនឹងជួយបន្ធូរបន្ថយភាពតានតឹងរវាងប្រទេសទាំងពីរ» ។ ប្រភពព័ត៌មានពីកាសែតបាងកកប៉ុស្តិ៍ឱ្យដឹងទៀតថា លោកនាយករដ្ឋមន្ត្រីអាប់ភីស៊ីត ក៏នឹងមិនជំទាស់ដែរ ប្រសិនបើកិច្ចប្រជុំ JBC ត្រូវរៀបចំធ្វើឡើងក្រោមការសង្កេតរបស់តំណាងអាស៊ាន ឬប្រធានអាស៊ាន។ ទីភ្នាក់ងារព័ត៌មានផ្លូវការចិនស៊ីនហួកាលពីថ្ងៃទី៨ មីនា បានដកស្រង់សម្តីលោកកុយ គួង អ្នកនាំពាក្យក្រសួងការបទេស និងសហប្រតិបត្តិការអន្តរជាតិកម្ពុជាដែលថ្លែងថា លោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានផ្ញើលិខិតមួយច្បាប់ជូនរដ្ឋមន្ត្រីការបរទេសឥណ្ឌូណេស៊ី លោកម៉ាធី ណាតាឡេហ្គាវ៉ា ដែលក្នុងលិខិតនោះលោកឧបនាយករដ្ឋមន្ត្រីសរសេរថា កិច្ចប្រជុំ JBC និងកិច្ចប្រជុំ GBC ត្រូវតែរៀបចំឡើងដោយមានការចូលរួមពីប្រធានអាស៊ាន ឬតំណាងអាស៊ាន យ៉ាងហោចណាស់ក៏នៅក្នុងពិធីបើកកិច្ចប្រជុំដែរ ហើយនៅពេលកិច្ចប្រជុំចប់ ភាគីទាំងពីរកម្ពុជា និងថៃត្រូវតែរាយការណ៍អំពីលទ្ធផលនៃកិច្ចប្រជុំនេះជូនប្រធានអាស៊ាន ។ យោងតាមរបាយការណ៍របស់ស្ថានទូតកម្ពុជាប្រចាំប្រទេសឥណ្ឌូណេស៊ី ប្រមុខការទូតឥណ្ឌូណេស៊ី លោកម៉ាធី ណាតាឡេហ្គាវ៉ា បានសម្រេចស្នើឱ្យមានកិច្ចប្រជុំគណៈកម្មាធិការព្រំដែនទូទៅនិងគណៈកម្មការចម្រុះបោះបង្គោលព្រំដែនកម្ពុជា-ថៃ នៅថ្ងៃទី២៤ និងថ្ងៃទី២៥ មីនា នៅក្នុងក្រុង Bogorក្បែរទីក្រុងហ្សាការតា។ លោកកុយ គួង អ្នកនាំពាក្យក្រសួងការបរទេស កម្ពុជាត្រូវបានដកស្រង់សម្តីថា នៅក្នុងលិខិតឆ្លើយតបទៅរដ្ឋមន្ត្រីការបរទេសឥណ្ឌូណេស៊ី លោកឧបនាយករដ្ឋមន្ត្រីហោ ណាំហុង បានស្នើទៅប្រធានអាស៊ានថា ត្រូវមានវត្តមានរដ្ឋមន្ត្រីការបរទេសឥណ្ឌូណេស៊ី ឬអ្នកតំណាងយ៉ាងហោចណាស់នៅពេលបើកកិច្ចប្រជុំនៃជំនួបគណៈកម្មាធិការព្រំដែនទូទៅ ដែលដឹកនាំដោយរដ្ឋមន្ត្រីការពារជាតិ និងកិច្ចប្រជុំគណៈកម្មាធិការចម្រុះព្រំដែនកម្ពុជា-ថៃ ។ ក្រុមអ្នកវិភាគបានមើលឃើញថា ទោះបីជាពេលនេះភាគីថៃបានព្រមក្តី ក៏បង្ហាញថា កម្ពុជាបានដើរមុនថៃមួយជំហានទៀតហើយ នៅពេលដែលគេនៅមិនទាន់បានដឹងអំពីការឆ្លើយតបរបស់រដ្ឋាភិបាលថៃ ភ្លាមៗនោះ ។ រដ្ឋាភិបាលកម្ពុជាបានប្រកាសជំហរច្បាស់លាស់នៅពេលនេះ បន្ទាប់ពីការចរចាទ្វេភាគីកន្លងមក ហាក់ដូចជាមិនបានការអ្វីទាំងអស់ក្នុងការដោះស្រាយជម្លោះព្រំដែននេះ ហើយបានប្រកាសថា ចាប់ពីពេលនេះទៅ កម្ពុជាឈប់ប្រើប្រាស់យន្តការទ្វេភាគីដោយគ្មានភាគីទី៣ទៀតហើយ ។ ការចរចា ឬការពិភាក្សាត្រូវប្រព្រឹត្តទៅមួយទល់មួយរវាងកម្ពុជានិងថៃមែន ប៉ុន្តែការពិភាក្សាត្រូវមានការដឹងឮពីភាគីទី៣ គឺឥណ្ឌូណេស៊ី ។ កិច្ចចរចាទ្វេភាគី រវាងគណៈកម្មាធិការព្រំដែនកម្ពុជានិងថៃ បានផ្អាកតាំងពីឆ្នាំ២០០៩មក ។ ការកោះប្រជុំជាថ្មីនៅក្នុងប្រទេសឥណ្ឌូណេស៊ីនាចុងខែមីនាខាងមុខនេះ គឺដោយមានភាគីទី៣ ចូលរួមដឹងឮទើបកិច្ចចរចាដំណើរការទៅបាន ។ ក្រសួងការបរទេសកម្ពុជា នៅថ្ងៃទី៨ មីនា បានទទួលយកជាផ្លូវការហើយនូវសំណើរបស់រដ្ឋមន្ត្រីក្រសួងការបរទេសឥណ្ឌូណេស៊ី លោកម៉ាធីណាតាឡេហ្គាវ៉ា ជាប្រធានអាស៊ាន កាលពីថ្ងៃទី៧ ខែមីនា កន្លងទៅនេះ ដែលបានកោះឱ្យមានកិច្ចប្រជុំទ្វេភាគីរវាងគណៈកម្មាធិការព្រំដែនកម្ពុជា និងថៃ ក្រោមការតាមដានដោយភាគី៣ នៅក្នុងប្រទេសឥណ្ឌូណេស៊ីខាងមុខនេះ។ កិច្ចប្រជុំនោះ គេបានចែកជា២ផ្នែកដោយឡែកពីគ្នា គឺទី១-ជាកិច្ចប្រជុំគណៈកម្មាធិការព្រំដែនចម្រុះរវាងកម្ពុជានិងថៃ និងទី២-ជាកិច្ចប្រជុំគណៈកម្មាធិការកិច្ចការព្រំដែនទូទៅ រវាងកម្ពុជានិងថៃ ដោយចាប់ផ្តើមធ្វើពីថ្ងៃទី២៤ ខែមីនា ដល់ថ្ងៃទី២៥ ខែមីនា ឆ្នាំ២០១១ នៅក្នុងទីក្រុងBogor ជិតទីក្រុងហ្សាការតា ប្រទេសឥណ្ឌូណេស៊ី ។ ប្រធានគណៈកម្មាធិការកិច្ចការព្រំដែននៃប្រទេសកម្ពុជា លោកវ៉ា គឹមហុង ត្រូវបានដកស្រង់ប្រសាសន៍ដោយវិទ្យុផ្សាយជាខេមរភាសាថា លោកបានត្រៀមខ្លួនទៅចូលរួមនៅក្នុងកិច្ចប្រជុំនោះហើយ ។ «សម្តេចតេជោលោកឯកភាពហើយ លោកឱ្យទៅហើយ ។ បញ្ហាគឺទាក់ទងនឹងរឿងព្រំដែនរវាងប្រទេសទាំង២ ដែលនឹងត្រូវលើកឡើង» ។ គួររំលឹកថា កាលពីថ្ងៃទី២២ ខែកុម្ភៈកន្លងទៅនេះ រដ្ឋមន្ត្រីក្រសួងការបរទេសឥណ្ឌូណេស៊ី លោកម៉ាធី ណាតាឡេហ្គាវ៉ា ក្នុងនាមជាប្រធានអាស៊ាន បានកោះហៅជាបន្ទាន់មួយឱ្យមានកិច្ចប្រជុំថ្នាក់រដ្ឋមន្ត្រីការបរទេសអាស៊ាន នៅក្នុងទីក្រុងហ្សាការតា ប្រទសឥណ្ឌូណេស៊ី ដើម្បីរកដំណោះស្រាយបទឈប់បាញ់គ្នារវាងកងទ័ពកម្ពុជា និងថៃ ដែលបានផ្ទុះឡើងកាលពីថ្ងៃទី៤ ខែកុម្ភៈ រហូតដល់ថ្ងៃទី៧ ខែកុម្ភៈកន្លងទៅនេះ ។ ការកោះប្រជុំជាបន្ទាន់នោះ គឺក្រោយពេលដែលក្រុមប្រឹក្សាសន្តិសុខអង្គការសហប្រជាជាតិបានកោះប្រជុំជាបន្ទាន់ កាលពីថ្ងៃទី១៤ ខែកុម្ភៈ តាមសំណើរបស់កម្ពុជា ប្រឆាំងនឹងការឈ្លានពានរបស់កងទ័ពថៃ ។ លោកវ៉ា គឹមហុង បានបញ្ជាក់ថា កិច្ចប្រជុំទ្វេភាគីនៃគណៈកម្មាធិការព្រំដែនកម្ពុជានិងថៃ បានផ្អាកតាំងពីខែមេសា ឆ្នាំ២០០៩មក ដោយសារតែកំណត់ហេតុយល់ព្រមគ្នាចំនួន៣ មិនត្រូវបានសភាថៃផ្តល់សច្ចាប័នឡើយរហូតដល់ពេលនេះ ដូច្នេះហើយទើបកម្ពុជាចង់បានឱ្យមានភាគីទី៣ចូលរួមក្នុងកិច្ចប្រជុំខាងមុខ ។ កំណត់ហេតុយល់ព្រមទាំង៣នោះ មានដូចជា ការរំសាយកងទ័ពថៃឈ្លានពានកម្ពុជា នៅតំបន់ប្រាសាទព្រះវិហារ ការចុះរាវរកបង្គោលព្រំដែនចាស់ៗចំនួន៧៣ ការធ្វើផែនទីឱ្យបានច្បាស់លាស់ និងការខណ្ឌសីមា ជាអាទិភាពនៅតំបន់ប្រាសាទព្រះវិហារជាដើម ។
កាសែតឌឹណេស្សិន នៅថ្ងៃទី៩ មីនា ឆ្នាំ២០១១ ផ្សាយឱ្យដឹងថា ក្រុមសម្ព័ន្ធភាពប្រជាជនដើម្បីលទ្ធិប្រជាធិបតេយ្យ ហៅក្រុមអាវលឿងប្រកាសថា ពួកគេមានផែនការដាក់ជូនលិខិតមួយច្បាប់ទៅស្ថានទូតឥណ្ឌូណេស៊ីប្រចាំទីក្រុងបាងកកនៅថ្ងៃទី១០ មីនា ទាមទារកុំឱ្យប្រទេសឥណ្ឌូណេស៊ីជ្រៀតជ្រែកកិច្ចការផ្ទៃក្នុងរបស់ថៃ ។ លោក Panthep Pourpongpan ជាអ្នកនាំពាក្យក្រុមអាវលឿងនិយាយថា ក្រុមអាវលឿងប្រឆាំងដាច់ខាតចំពោះការជ្រៀតជ្រែកណាមួយរបស់ឥណ្ឌូណេស៊ីដែលជាប្រធានអាស៊ានក្នុងកិច្ចការផ្ទៃក្នុងរបស់ថៃ ។ តាមប្រភពព័ត៌មានពីកាសែតថៃឱ្យដឹងទៀតថា នៅថ្ងៃទី១០ មីនា ក្រុមអាវលឿង នឹងប្រមូលផ្តុំគ្នានៅបរិវេណខាងមុខស្ថានទូតឥណ្ឌូណេស៊ីដើម្បីដាក់ជូនលិខិតនោះ ៕  |
| សម្ពោធផ្លូវ និងសមិទ្ធផលគម្រោងស្ថាបនាភូមិសុវត្ថិភាពក្រោមកិច្ចសហការរវាង CMAC និង JMAS Posted: 09 Mar 2011 06:44 PM PST      ខេត្តបាត់ដំបង ៖ កាលពីព្រឹកថ្ងៃទី៧ មីនា នៅសាលាបឋមសិក្សាជ្រចាប់ផេះ កុម៉ាតស៊ុ ស្ថិតក្នុងភូមិជាមន្ត្រី ឃុំត្រែង ស្រុករតនៈមណ្ឌល មានប្រារព្ធពិធីសម្ពោធផ្លូវ និងសមិទ្ធផលគម្រោងស្ថាបនាភូមិសុវត្ថិភាព ដោយកិច្ចសហប្រតិបត្តិការរវាង CMAC និងអង្គការ JMAS ក្រោមអធិបតីភាពលោកប្រាក់ សុខុន រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានអាជ្ញាធរមីនកម្ពុជា ។ ចូលរួមក្នុងពិធីនោះមាន លោក KAWAMURA HIROSHI ភារធារីស្តីទីស្ថានទូតជប៉ុនប្រចាំកម្ពុជា លោកប្រាជ្ញ ច័ន្ទ អភិបាលខេត្ត លោកអភិបាលរងខេត្តប៉ៃលិន ពោធិ៍សាត់ និងបន្ទាយមានជ័យ មន្ត្រីរាជការពាក់ព័ន្ធនានាជុំវិញខេត្ត កងកម្លាំងប្រដាប់អាវុធ មន្ត្រី CMAC អភិបាល អភិបាលរងស្រុក លោកមេឃុំ មេភូមិ និងប្រជាពលរដ្ឋយ៉ាងច្រើនកុះករ ។ លោកហេង រតនា អគ្គនាយកស៊ីម៉ាក់ បានមានប្រសាសន៍រាយការណ៍ឱ្យដឹងថា ក្នុងកិច្ចសហប្រតិបត្តិការនេះមានថវិកាសរុប៨០ម៉ឺនដុល្លារ ក្នុងនោះមួយផ្នែកគឺជាការងារបោសសំអាតមីន និងមួយផ្នែកធំទៀត គឺជាការងារអភិវឌ្ឍន៍សហគមន៍សម្រាប់គម្រោងឆ្នាំ២០០៩-២០១០ ។ ជាមួយនេះ បានធ្វើការបោសសំអាតជាដីសម្បទានសង្គមកិច្ចសម្រាប់សាងសង់លំនៅឋានចំនួន៦២ហិកតា ក្នុងលទ្ធផលសរុបសម្រាប់គាំទ្រការអភិវឌ្ឍចំនួន៧៤ហិកតា ដើម្បីជួយគាំទ្រដល់ប្រជាពលរដ្ឋខ្វះខាតដីធ្លី ចំនួន៥៥០គ្រួសារ ក្នុងភូមិសាស្ត្រភូមិជាមន្ត្រី និងភូមិគីឡូ ស្រុករតនមណ្ឌល ដែលយើងធ្វើពិធីប្រគល់នៅថ្ងៃនេះ។ ក្នុងនោះស៊ីម៉ាក់បានរុករកឃើញគ្រាប់មីនគ្រប់ប្រភេទចំនួន១៤៧គ្រាប់ និងយុទ្ធភ័ណ្ឌមិនទាន់ផ្ទុះចំនួន៣៦គ្រាប់ ។ ដោយឡែក ឆ្នាំ២០១០-២០១១ ដែលត្រូវបញ្ចប់នៅខែកក្កដា ឆ្នាំ២០១១ ខាងមុខ ហើយដែលបាននិងកំពុងធ្វើការបោសសំអាតផ្ទៃដីកសិកម្មសម្រាប់ប្រជាពលរដ្ឋទូទៅចំនួន៨០ហិកតា រហូតមកដល់ពេលនេះយើងរុករកឃើញគ្រាប់មីនគ្រប់ប្រភេទជាង១០០គ្រាប់ និងយុទ្ធភ័ណ្ឌមិនទាន់ផ្ទុះជាង២០គ្រាប់។ លើសពីនេះទៀត គឺការកសាងអគារសិក្សាបានចំនួន៣ខ្នង មាន១២បន្ទប់ ព្រមទាំងបំពាក់សម្ភារ ខ្លោងទ្វារ បង្គន់អនាម័យ និងទង់ជាតិ ។ ធ្វើផ្លូវក្រាលក្រួសក្រហមបានចំនួន៣ខ្សែមានប្រវែង១០គីឡូម៉ែត្រ ព្រមទាំងដាក់លូបង្ហូរទឹកចំនួន២៣កន្លែង ធ្វើស្ពានប្រវែង១២ម៉ែត្រ ជីកស្រះទឹកសហគមន៍ទំហំ២៥ម៉ែត្រគុណ៣០ម៉ែត្រ បានចំនួន១៤កន្លែង អណ្តូងស្នប់ចំនួន១១ និងស៊ីទែនទឹកចំណុះ៥.០០០លីត្រចំនួន១ ។ លោកភារធារីស្តីទីស្ថានទូតជប៉ុន បានមានប្រសាសន៍ថា អង្គការ JMAS បានចាប់ផ្តើមសកម្មភាពការងាររបស់ខ្លួននៅប្រទេសកម្ពុជា ចាប់តាំងពីឆ្នាំ២០០២ ហើយមានសកម្មភាពសហប្រតិបត្តិការរួមជាមួយស៊ីម៉ាក់ ដូចជាការបោសសំអាតគ្រាប់យុទ្ធភ័ណ្ឌមិនទាន់ផ្ទុះ និងដោះមីនសហគមន៍មូលដ្ឋាន ។ ចាប់តាំងពីឆ្នាំ២០០៨មក មានការចាប់ផ្តើមគម្រោងថ្មីមួយទៀត ដែលយើងបាននិងកំពុងសហការការងារបច្ចុប្បន្ន គឺជាគម្រោងស្ថាបនាភូមិសុវត្ថិភាព ដោយមានការគាំទ្រឧបត្ថម្ភពីរដ្ឋាភិបាលជប៉ុន និងក្រុមហ៊ុន KOMATSU រួមមានការឧបត្ថម្ភជាថវិកា គ្រឿងចក្រ និងម៉ាស៊ីនផ្សេងៗ។ គម្រោងនេះបានទទួលការគាំទ្រ និងសហការគ្នាយ៉ាងសកម្មពីសំណាក់បងប្អូនប្រជាពលរដ្ឋ និងមន្ត្រីបុគ្គលិកស៊ីម៉ាក់ទាំងអស់ ហើយក្នុងរយៈពេល៣ឆ្នាំកន្លងមកនេះ យើងបោសសំអាតមីនរួចបានលើផ្ទៃដីប្រមាណ២០០ហិកតា ធ្វើផ្លូវជីកប្រឡាយសងខាងផ្លូវ ជីកអណ្តូង និងជីកស្រះស្តុកទឹកចំនួន៣កន្លែង ព្រមទាំងសាងសង់អគារសិក្សា ។ យើងនៅតែជួយគាំទ្រការកសាងភូមិសុវត្ថិភាព៣កន្លែង ហើយបច្ចុប្បន្នក៏ដូចអនាគត យើងនៅតែបន្តធ្វើការអភិវឌ្ឍទៅមុខជានិច្ច ។ លោកប្រាក់ សុខុន បានថ្លែងអំណរគុណដល់កិច្ចសហប្រតិបត្តិការភាពជាដៃគូរវាងស្ថាប័ន CMAC និងអង្គការ JMAS ដែលបានខិតខំប្រឹងប្រែងយកចិត្តទុកដាក់ប្រកបដោយឆន្ទៈរបស់រាជរដ្ឋាភិបាលនៃព្រះរាជាណាចក្រកម្ពុជា ជាមួយបណ្តាប្រទេសជាដៃគូអភិវឌ្ឍន៍ ។ កិច្ចសហប្រតិបត្តិការផ្ទាល់របស់មន្ត្រី បុគ្គលិក CMAC បានដើរតួនាទីយ៉ាងសំខាន់ក្នុងការទប់ស្កាត់ និងកាត់បន្ថយអត្រាគ្រោះថ្នាក់ដោយសារមីន និងយុទ្ធភ័ណ្ឌមិនទាន់ផ្ទុះ ដែលនៅរាយប៉ាយលើទីលានសមរភូមិប្រយុទ្ធ បន្សល់ទុកពីសម័យសង្គ្រាមដ៏រ៉ាំរៃ ។ យើងបានប្រែក្លាយផ្ទៃដីដ៏មានសក្តានុពលទាំងនេះសម្រាប់ការស្តារឡើងវិញនូវហេដ្ឋារចនាសម្ព័ន្ធ អភិវឌ្ឍន៍សេដ្ឋកិច្ចសង្គមឆ្លើយតបទៅនឹងតម្រូវការចាំបាច់ និងលើកស្ទួយជីវភាពរស់នៅរបស់ប្រជាពលរដ្ឋស្របតាមគោលនយោបាយកាត់បន្ថយភាពក្រីក្ររបស់រាជរដ្ឋាភិបាល ។ ក្នុងឱកាសនោះដែរ ក៏មានការប្រគល់ប័ណ្ណដីតាំងទីលំនៅថ្មីចំនួន៥៥០គ្រួសារ និងបំពាក់មេដាយអ្នកមានស្នាដៃល្អ និងឧបត្ថម្ភដល់សិស្សានុសិស្សចំនួន៣០០នាក់ ក្នុងម្នាក់ៗទទួលបានសៀវភៅ១ក្បាល ប៊ិច១ដើម ខ្មៅដៃ១ដើម និងថវិកា២.០០០រៀល យុវជនកាយឫទ្ធិ ៧០នាក់ យុវជនកាកបាទក្រហម៧០នាក់ ម្នាក់ៗទទួលបានថវិកា១០.០០០រៀល តាជី យាយជី ៣០នាក់ ម្នាក់ៗទទួលបានកំណាត់ស១ដុំ ថវិកា១០.០០០រៀល ជនពិការ២០នាក់ ម្នាក់ៗទទួលបានអាវយឺត១ និងថវិកា៤ម៉ឺនរៀល និងប្រជាពលរដ្ឋ៥០០នាក់ ក្នុងម្នាក់ៗទទួលបានអាវយឺត១ និងថវិកា១០.០០០រៀល ៕  |
| សមាគមសិល្បករខ្មែរនាំយកអំណោយជូនកងកម្លាំងសមរភូមិមុខ Posted: 09 Mar 2011 06:41 PM PST    ខេត្តព្រះវិហារ ៖ សមាគមសិល្បករខ្មែរដឹកនាំដោយលោក ម៉ិញ សុធីវណ្ណ កាលពីថ្ងៃទី៣ មីនា ឆ្នាំ២០១១ កន្លងមកនេះ បាននាំយកអំណោយជាសំភារមួយចំនួនទៅផ្តល់ជូនកងកម្លាំងនគរបាលដែលកំពុងឈរជើងយ៉ាងអង់អាចក្លាហានការពារទឹកដីចំណុចបញ្ជាការស្រាលអន្លង់ស្វាយ តំបន់ប្រាសាទព្រះវិហារ។ ចូលរួមដំណើរនាឱកាសនោះរួមមានអ្នកនាងយុគ ចិន្តា អនុប្រធានសមាគមសិល្បករខ្មែរ និងជាពិធីការិនីស្ថានីយទូរទស្សន៍ CTN, អ្នកនាងឈួន សុវណ្ណឆៃ, អ្នកនាង ចន ច័ន្ទលក្ខិណា, លោកយុត្ថារ៉ា ឆានី និងលោកយូ ឌីស្កូ។ លោកម៉ិញ សុធីវណ្ណ បានឱ្យដឹងថា សំភារដែលនាំយកទៅជូនកងកម្លាំងសមរភូមិមុខនាពេលនោះរួមមាន ត្រីងៀត៦០០គីឡូក្រាម, ឆៃប៉ូវ ១.២០០គីឡូក្រាម, សាច់ក្រក៦០០គីឡូក្រាម និងធុងសម្រាប់ដាក់ទឹកចំនួន៥០។ លោកបញ្ជាក់ថា សំភារទាំងអស់នោះគឺបានមកពីចំណូលសប្បុរសជនដែលចូលរួមក្នុងពិធីប្រគំតន្ត្រីរាត្រីសមោសរកាលពីថ្ងៃទី៩ កុម្ភៈ ឆ្នាំ២០១១ កន្លងមក។ សំភារទាំងនោះមានចំនួនតិចតួចណាស់បើប្រៀបធៀបទៅនឹងតម្រូវការរបស់កងទ័ពដ៏អង់អាចក្លាហានដែលកំពុងឈរជើងយ៉ាងរឹងមាំការពារបូរណភាពទឹកដីនៅសមរភូមិជួរមុខ ប៉ុន្តែជាការបង្ហាញឱ្យឃើញនូវទឹកចិត្ត និងការចូលរួមចំណែកការពារទឹកដីរបស់បងប្អូននៅសមរភូមិក្រោយ សំខាន់សិល្បករ សិល្បការិនីខ្មែរយើងដែលជានិច្ចកាលនឹករលឹកគិតគូរ និងកោតសរសើរចំពោះបងៗកងទ័ពសមរភូមិមុខ ព្រមទាំងខិតខំអស់ពីកម្លាំងកាយចិត្ត ដើម្បីស្វែងរកជាថវិកា និងសំភារផ្តល់ជូនកងទ័ពជាបន្តបន្ទាប់ទៀត។ លោកម៉ិញ សុធីវណ្ណ អំពាវនាវដល់សិល្បករ សិល្បការិនីខ្មែរគ្រប់រូបសូមចូលរួមជាថវិកា និងសំភារតាមលទ្ធភាពរបស់ខ្លួនមកសមាគមសិល្បករខ្មែរ ឬទៅផ្ទាល់ក៏បាន ជូនដល់កងទ័ពនៅសមរភូមិមុខ ដើម្បីជាការលើកទឹកចិត្ត និងជួយរំលែកការលំបាករបស់បងប្អូនយុទ្ធជនដ៏អង់អាចក្លាហានរបស់យើង។ លោកគិតថា ការចែករំលែកទាំងឡាយរបស់សិល្បករ សិល្បការិនី គឺជាការបង្ហាញនូវទឹកចិត្តអង់អាចក្លាហានក្នុងការការពារទឹកដីកម្ពុជាយើង បើទោះជាយើងមិនបានទៅកាន់សមរភូមិមុខដោយផ្ទាល់ក៏ដោយចុះ៕  |
| សម្តេចព្រះវនរ័ត ណយ ច្រឹក ៖ ព្រះពុទ្ធយកធម៌ មនុស្សយកកិត្តិយស Posted: 09 Mar 2011 06:36 PM PST  ខេត្តកំពង់ចាម ៖ «ព្រះពុទ្ធយកធម៌ មនុស្សយកកិត្តិយស ព្រះពុទ្ធយកទៀនធូប មនុស្សយកទ្រព្យ»។ នេះជាព្រះថេរដីការបស់សម្តេចព្រះវនរ័ត ណយ ច្រឹក ព្រះសង្ឃនាយករងទី៣នៃព្រះរាជាណាចក្រកម្ពុជាប្រទានឱវាទក្នុងពិធីបិទអនុសំវច្ឆរមហាសន្និបាតមន្ត្រីសង្ឃទូទាំងខេត្ត ដើម្បីផ្សព្វផ្សាយខ្លឹមសារសង្ឃប្រកាសអនុសំវច្ឆរៈទូទាំងប្រទេសលើកទី១៩កាលពីរសៀលថ្ងៃទី៧ មីនា ២០១១ ស្ថិតនៅវត្តនគរបាជ័យក្នុងស្រុកកំពង់សៀម។ លោកស្រី កានឿន ប្រធានមន្ទីរធម្មការ និងសាសនាខេត្តបញ្ជាក់ថា សង្ឃសន្និបាតដែលបានប្រារព្ធនាឱកាសនេះមានគោលដៅសំខាន់ពីរយ៉ាងគឺ ១-ដើម្បីផ្សព្វផ្សាយសង្ឃប្រកាសរួមនៃអនុសំវច្ឆរៈមហាសន្និបាត មន្ត្រីសង្ឃទូទាំងប្រទេសលើកទី១៩ ដែលបានប្រព្រឹត្តទៅកាលពី ខែមករា ២០១១ ។ ចំណុចទី២-ដើម្បីពិភាក្សាដាក់ចេញនូវវិធានការ និងទិសដៅជាក់ស្តែងមួយចំនួនសំដៅអនុវត្តឱ្យមានប្រសិទ្ធភាពសង្ឃប្រកាសរួមអនុសំវច្ឆរៈមហាសន្និបាតមន្ត្រីសង្ឃលើកទី១៨ ពង្រឹងរចនាសម្ព័ន្ធដឹកនាំគ្រប់គ្រងរបស់មន្ត្រីសង្ឃខេត្ត លើកស្ទួយការប្រតិបត្តិធម៌វិន័យរបស់ព្រះពុទ្ធសាសនា និងបណ្តាទិសផ្សេងទៀតសំរាប់អនុវត្តឆ្នាំ២០១១ និងឆ្នាំបន្ត។ នៅខេត្តកំពង់ចាមមានវត្តសរុបចំនួន៥៨១វត្ត ព្រះសង្ឃសរុបចំនួន៦.៨២៤អង្គ ចែកចេញជាពីរគណៈគឺ ១-គណៈមហានិកាយចំនួន៥៦វត្ត មានព្រះសង្ឃសរុប៦.៥៥៦អង្គ ក្នុងនោះសាមណេរចំនួន៤.៣២៦អង្គ, ២-គណៈធម្មយុត្តិកនិកាយចំនួន១៦វត្ត មានព្រះសង្ឃសរុបចំនួន២០៥អង្គ ក្នុងនោះសាមណេរចំនួន១៣២អង្គ។ ខាងអ៊ិស្លាមមានព្រះវិហារ១១៩ ស៊ូរ៉ាវ២១៨ មានប្រជាជនអ៊ិស្លាមចំនួន១៤២.១៣១នាក់ រស់នៅក្នុងភូមិចំនួន១៤៩ភូមិ ក្នុងស្រុក-ក្រុងទាំង១៧។ ខាងគ្រឹស្តសាសនា មានព្រះវិហារស្នាក់ការចំនួន៨១ ចែកជាប្រូតេស្តង់ចំនួន៧៣ កាតូលិកចំនួន៤ សាលារៀនសាសនាចំនួន១៦ និងមានសាសនិកចំនួន២.៨៥៣នាក់។ សម្តេចព្រះវនរ័ត ណយ ច្រឹក ព្រះសង្ឃនាយករងទី៣នៃព្រះរាជាណាចក្រកម្ពុជាមានថេរដីកាថា ត្រូវតែគោរពមេគណខេត្ត ព្រះវិន័យធម៌ នៅពេលដែលមានកិច្ចការណាមួយនោះត្រូវតែនិមន្តទៅទំនាក់ទំនងជាមួយមន្ទីរធម្មការ និងសាសនាខេត្តឱ្យបានល្អប្រសើរ។ វត្តណាដែលរឹងមាំវត្តនោះមានសេចក្តីសុខ និងមានអ្នកតូច អ្នកធំចូលមកកុះករដែលនឹងនាំមកនូវការរីកចំរើនដល់ពុទ្ធបរិស័ទចំណុះជើងវត្ត ។ សម្តេចព្រះវនរ័ត ណយ ច្រឹក មានថេរដីកាបញ្ជាក់ថា នៅពេលណាដែលកើតមានបញ្ហាទំនាស់ណាមួយបន្តិចបន្តួចនៅក្នុងវត្តអារាមត្រូវតែចេះដោះស្រាយចៀសវាងកុំឱ្យបញ្ហាលំបាកនោះទៅដល់ថ្នាក់លើ។ ពេលដែលត្រូវកសាងអ្វីមួយនៅក្នុងវត្តត្រូវតែហៅព្រះសង្ឃ៤ទៅ៥អង្គមកឱ្យជួយដឹងឮ ព្រមទាំងមានលោកតាអាចារ្យផងដែរទើបមិនមានបញ្ហា ៕  |
| Posted: 09 Mar 2011 06:27 PM PST   រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌដង្កោ ដឹកនាំដោយលោកអភិបាលខណ្ឌគិត សុផា បានចុះធ្វើការត្រួតពិនិត្យអាវុធជាតិផ្ទុះ ជាតិស្រវឹង អ្នកជិះម៉ូតូអត់កញ្ចាក់ អត់ស្លាកលេខ ជាពិសេសរថយន្តអត់ស្លាកលេខ ឬពាក់ស្លាកលេខបណ្តោះអាសន្ន ប៉ុន្តែហួសកាលកំណត់ និងត្រួតពិនិត្យជនណាដែលធ្វើដំណើរមានភាពមិនប្រក្រតី។ ប្រតិបត្តិការខាងលើនេះបានធ្វើឡើងកាលពីវេលាម៉ោង៦ល្ងាចថ្ងៃទី៩ មីនា ២០១១ លើកំណាត់មហាវិថីសហព័ន្ធរុស្ស៊ី ត្រង់ចំណុចផ្សារសេនជូរីប្លាហ្សា ភូមិតាងួន សង្កាត់កាកាប ខណ្ឌដង្កោ ហើយកម្លាំងដែលចេញប្រតិបត្តិការដើម្បីសន្តិសុខ សណ្តាប់ធ្នាប់នេះសរុបជាង៥០នាក់ ក្នុងនោះមានកម្លាំងប៉ូលិស ប៉េអឹម ខាងសណ្តាប់ធ្នាប់ និងមន្ត្រីសាលាសង្កាត់-ខណ្ឌផងដែរ។ ការត្រួតពិនិត្យនេះ សមត្ថកិច្ចបានឃាត់ខ្លួនបុរសម្នាក់ដែលផឹកស្រាស្រវឹងស្រែកឡូឡាបញ្ចេញឫកពារច្រងេងច្រងាងដាក់សមត្ថកិច្ច យកទៅឃុំនៅព្រហ្មទណ្ឌនៃអធិការដ្ឋានខណ្ឌ។ ឃាត់រថយន្តអត់ស្លាកលេខ១៣គ្រឿង និងម៉ូតូអត់មួក និងកញ្ចក់២០គ្រឿងដោយរថយន្តធ្វើការផាកពិន័យនៅនឹងកន្លែង ចំណែកម៉ូតូយកទៅរក្សាទុកនៅអធិការដ្ឋាននគរបាលខណ្ឌ ដើម្បីឱ្យម្ចាស់ចូលទៅដោះស្រាយតាមច្បាប់នៅថ្ងៃបន្តបន្ទាប់ ។ ដោយឡែកមានរថយន្តខ្នាតធំមួយគ្រឿងដឹកខ្សាច់ធ្វើអាជីវកម្ម ប៉ុន្តែពាក់ស្លាកលេខ «ខ.ម» ត្រូវបានឃាត់យ៉ាងតឹងរ៉ឹង ចាត់ការតាមច្បាប់...៕  |
| ពុតត្បុតអ្នកឈ្លានពាន ការចង់អូសបន្លាយពីបទឈប់បាញ់គ្នា គឺដើម្បីបញ្ឆេះសង្គ្រាមប៉ុណ្ណោះ Posted: 09 Mar 2011 06:18 PM PST សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានខិតខំជំរុញសេចក្តីព្រាងកិច្ចព្រមព្រៀង (TOR) ផ្ញើជូនលោក Marty Natalegawa រដ្ឋមន្ត្រីការបរទេសឥណ្ឌូណេស៊ី ឱ្យបានឆាប់រហ័សបំផុតវិញ តាមសំណូមពររបស់ភាគីឥណ្ឌូណេស៊ី ជាប្រធានកិច្ចប្រជុំអាស៊ានថ្ងៃទី ២២ កុម្ភៈ ឆ្នាំ២០១១ ជាអាជ្ញាកណ្តាលដែលយល់ព្រមបញ្ជូនអ្នកសង្កេតការណ៍ឥណ្ឌូណេស៊ីតាមសំណើសុំពីភាគីកម្ពុជា-ថៃ ក្នុងកិច្ចចាំឃ្លាំមើលបទឈប់បាញ់គ្នា ដើម្បីតាមដានតើអ្នកណាជាអ្នកបង្កជម្លោះមុននោះ? សម្តេចតេជោនាយករដ្ឋមន្ត្រីកម្ពុជា ក្នុងគោលបំណងដោះស្រាយជម្លោះដោយសន្តិវិធីបានបញ្ជាក់នូវគោលជំហរបើកចំហដ៏ធំទូលាយឥតលក្ខខណ្ឌ ក្នុងការទទួលអ្នកសង្កេតការណ៍ឥណ្ឌូណេស៊ី ដើម្បីពង្រឹងបទឈប់បាញ់គ្នាជាស្ថាពរ និងជាអចិន្ត្រៃយ៍នៅក្នុងអធិបតេយ្យភាព បូរណភាពដែនដីកម្ពុជាចំនួន១៤ចំណុច ស្ថិតនៅតាមបណ្តោយព្រំដែនកម្ពុជា-ថៃ ។ ផ្ទុយទៅវិញ ថៃដែលមានលោកអាប់ភីស៊ីត ជានាយករដ្ឋមន្ត្រីនោះ បានគេចវេះក្នុងការដាក់អ្នកសង្កេតការណ៍បរទេសឱ្យចូលពិនិត្យជាក់ស្តែងនៅតំបន់ប្រាសាទព្រះវិហារ ដែលស្ថិតនៅក្នុងទឹកដីកម្ពុជាសុទ្ធសាធ ដូចមានផែនទីបារាំង-សៀម បញ្ជាក់ក្នុងឧបសម្ព័ន្ធ១ នៃសាលដីកាតុលាការយុត្តិធម៌អន្តរជាតិថ្ងៃទី ១៥ មិថុនា ឆ្នាំ១៩៦២ នៅក្រុងឡាអេ ស្រាប់ ។ លោកនាយករដ្ឋមន្ត្រីថៃបានគេចវេះពីស្រមោលនៃឧក្រិដ្ឋកម្មដែលខ្លួនបានប្រព្រឹត្តកាលពីថ្ងៃទី៤-៧ កុម្ភៈ ឆ្នាំ២០១១ គ្រប់ពេល ។ ទន្ទឹមនឹងនេះដែរ ថៃបានចាប់ផ្តើមកសាងផ្លូវយុទ្ធសាស្ត្រយោធានៅព្រំដែនថៃ-កម្ពុជា កាលពីថ្ងៃសុក្រ ទី៤ មីនា ឆ្នាំ២០១១ ពីចំណោត PhaMorlDang ទៅកាន់ SaTrao ដែលជាអាងស្តុកទឹកបុរាណនៅភាគខាងជើងប្រាសាទព្រះវិហារ ជាទីតាំងនគរបាលល្បាតព្រំដែនដែលថៃបានផ្អាកសាងសង់ផ្លូវនោះ កាលពីថ្ងៃទី៤ កុម្ភៈ ឆ្នាំ ២០១១ ជាថ្ងៃប្រយុទ្ធគ្នាដំបូង ដើម្បីចូលទៅដណ្តើមកាន់កាប់វត្តកែវសិក្ខាគិរីស្វារៈម្តងទៀត ។ ថៃក៏មានគម្រោងធ្វើសមយុទ្ធយោធានៅតំបន់ព្រំដែនថៃ-កម្ពុជា ក្នុងរូបភាពបង្ហាញសាច់ដុំដែលគេអាចគិតថា ជាការព្រួយបារម្ភដល់ប្រជាពលរដ្ឋទាំងពីរពីផលប៉ះពាល់យា៉ងខ្លាំងដល់សន្តិសុខរបស់ពួកគាត់ ។ សមយុទ្ធយោធាមានទ្រង់ទ្រាយធំ ក្នុងនោះមានកងទ័ពទាំងបីប្រភេទ ទាំងជើងគោកមានរថក្រោះ កាំភ្លើងធំ កងទ័ពជើងទឹកមាននាវាចម្បាំង និងកងទ័ពជើងអាកាសមានយន្តហោះចម្បាំងរួមគ្នាផង (Bangkok Post ថ្ងៃទី៦ មីនា ២០១១) ។ ទង្វើរបស់ថៃក្នុងការរារាំងអ្នកសង្កេតការណ៍ឥណ្ឌូណេស៊ី និងការគំរាមបង្កសង្គ្រាមឈ្លានពានកម្ពុជាទាំងកំរោល មិនគោរពគោលការណ៍អន្តរជាតិនៃសេចក្តីសម្រេចរបស់ក្រុមប្រឹក្សាសន្តិសុខសហប្រជាជាតិថ្ងៃទី១៤ កុម្ភៈ ឆ្នាំ២០១១ នៅក្រុងញូវយ៉ក និងសេចក្តីសម្រេចរបស់អាស៊ាន ថ្ងៃទី២២ កុម្ភៈ ឆ្នាំ២០១១ នៅក្រុងហ្សាការតា នោះ ថៃពិតជាបានរំលោភបំពានល្មើសនឹងធម្មនុញ្ញ អ.ស.ប រួចហើយ ។ រីឯអ្នកសង្កេតការណ៍បរទេសដែលទៅត្រួតពិនិត្យដល់ទីកន្លែងប្រាសាទព្រះវិហារនោះ ពិតជាបានយកការណ៍ស្រង់ព័ត៌មានមើលឃើញនូវបំណែកគ្រាប់ផ្លោង គ្រាប់បែកចង្កោម និងសោកនាដកម្មដោយកងទ័ពថៃបាញ់ផ្លោងទៅលើវត្តកែវសិក្ខាគិរីស្វារៈ និងប្រាសាទព្រះវិហារជាបេតិកភណ្ឌពិភពលោក បណ្តាលឱ្យមានការខូចខាតជាដំណំ ព្រមទាំងបន្សល់ទុកនូវស្លាកស្នាមដ៏ព្រៃផ្សៃនៃឧក្រិដ្ឋជនថៃឈ្លានពានកម្ពុជាក្នុងគោលបំណងអាក្រក់ជាប្រវត្តិសាស្ត្រ ដើម្បីកំទេចកេរមរតកវប្បធម៌ជាសម្បត្តិរបស់មនុស្សជាតិ ។ គ្រប់ល្បិចកលទុច្ចរិតរបស់ថៃ មិនអាចបិទបាំងសហគមន៍អន្តរជាតិអំពីអំពើឧក្រិដ្ឋកម្មប្រឆាំងមនុស្សជាតិ ប្រឆាំងសាសនា និងប្រឆាំងសម្បត្តិវប្បធម៌របស់មនុស្សជាតិ បង្កឡើងដោយភាគីថៃទៅលើភាគីកម្ពុជាបានទេ ។ ជាពិសេសចំពោះអ្នកស្នេហាសន្តិភាព ស្នេហាកេរមរតកវប្បធម៌របស់មនុស្សជាតិនៃគណៈប្រតិភូអនុព័ន្ធយោធាអមស្ថានទូតបរទេសប្រចាំកម្ពុជា ដែលបានអញ្ជើញទៅអង្កេតពិនិត្យជាក់ស្តែងដល់ទីកន្លែងនូវការខូចខាតជាដំណំរបស់វត្តកែវសិក្ខា គិរីស្វារៈ និងប្រាសាទព្រះវិហារជាបេតិកភណ្ឌពិភពលោកនៅថ្ងៃទី៣ មីនា ឆ្នាំ២០១១ ជាដំបូងគេ ក្នុងនាមសហគមន៍អន្តរជាតិនាពេលថ្មីៗនេះពិតប្រាកដជាមានមនោសញ្ចេតនា ក្រៀមក្រំ ក្តុកក្តួល សោកស្តាយក្នុងចិត្តក្រៃលែង ចំពោះទស្សនីយភាពដ៏សែនរន្ធត់ខ្លោចផ្សានៃសោកនាដកម្ម និងវិនាសកម្មដោយស្នាដៃដ៏ថោកទាបព្រៃផ្សៃយង់ឃ្នងនៃថ្នាក់ដឹកនាំប្រទេសមួយ ឥតមានការទទួលខុសត្រូវចំពោះមនុស្សជាតិទាំងមូលនោះ ។ តំណាងឱ្យប្រជាជនកម្ពុជា និងពិភពលោកទាំងមូល គណៈប្រតិភូសេនានុព័ន្ធខាងលើ ដោយឈរលើគតិយុត្តិមានភស្តុតាងគ្រប់គ្រាន់ ពិតជាបានរាយការណ៍ជូនក្រុមប្រឹក្សាសន្តិសុខសហប្រជាជាតិ តុលាការយុត្តិធម៌អន្តរជាតិ អង្គការយូណេស្កូ និងគណៈកម្មាធិការបេតិកភណ្ឌពិភពលោក ដើម្បីមានវិធានការសមស្របក្នុងការអនុវត្តសាលដីកាតុលាការយុត្តិធម៌អន្តរជាតិ អនុសញ្ញាការពារ និងរក្សាសម្បត្តិវប្បធម៌ក្នុងករណីមានជម្លោះប្រដាប់អាវុធ (១៤ ឧសភា ឆ្នាំ១៩៥៤) និងអនុសញ្ញាស្តីពីការការពារបេតិកភណ្ឌធម្មជាតិ និងវប្បធម៌ពិភពលោក (១៦ វិច្ឆិកា ឆ្នាំ១៩៧២) ឱ្យមានប្រសិទ្ធភាពតទៅ ៕ ដោយទិត សារុនរ៉េត ទីប្រឹក្សាអមរាជបណ្ឌិត្យសភាកម្ពុជា  |
| ស្រូវជាង១ពាន់តោនក្លាយជាចំណីព្រះអគ្គីកណ្តាលរាត្រី Posted: 09 Mar 2011 05:57 PM PST      ខេត្តកំពង់ធំ ៖ អគ្គីភ័យបានលេបត្របាក់រោងម៉ាស៊ីនកិនស្រូវមួយកន្លែង ដែលមានទំហំ៤៥ម៉ែត្រ គុណ៣៤ម៉ែត្រ មានដំបូល និងជញ្ជាំងប្រក់ និងបាំងស័ង្កសី ហើយមានផ្ទុកស្រូវជាងមួយពាន់តោន។ ទោះបីជាបែបណា គេពុំទាន់ដឹងអំពីមូលហេតុពិតប្រាកដ ដែលបណ្តាលឱ្យមានគ្រោះអគ្គីភ័យនោះទេ។ ហេតុការណ៍នេះកើតឡើងកាលពីវេលាម៉ោង១២រំលងអធ្រាត្រ ថ្ងៃទី៨ ឈានចូលថ្ងៃទី៩ មីនា នៅចំណុចភូមិឈើទាល ឃុំកំពង់ចិនខាងត្បូង ស្រុកស្ទោង។ ក្រោយពេលកើតហេតុប្រហែលមួយម៉ោងទើបរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តបានទៅដល់២គ្រឿងជួយបាញ់ទឹកពន្លត់។ តាមរបាយការណ៍របស់សមត្ថកិច្ចស្រុកស្ទោងឱ្យដឹងថា រោងម៉ាស៊ីនកិនស្រូវនេះមានម្ចាស់ចំនួន២នាក់ ម្នាក់ឈ្មោះជីវ ហុងតាំង ភេទប្រុស អាយុ៦៣ឆ្នាំ និងម្នាក់ទៀតឈ្មោះងួន ឈុនហួង ភេទប្រុស អាយុ៥៨ឆ្នាំ ពួកគេទាំង២នាក់រស់នៅភូមិ-ឃុំកើតហេតុខាងលើ។ តាមប្រភពព័ត៌មានជំហានដំបូងឱ្យដឹងថា ស្រូវក្នុងរោងម៉ាស៊ីននេះត្រូវភ្លើងឆេះអស់ប្រហែល២០ភាគរយ ចំណែករោង និងម៉ាស៊ីនកិនស្រូវត្រូវភ្លើងឆេះខ្ទេច នៅសល់តែគំនរស្រូវ ដែលត្រូវភ្លើងឆេះងំរហូតដល់ម៉ោង៩ព្រឹក ថ្ងៃទី៩ មីនា រថយន្តពន្លត់អគ្គីភ័យទាំង២គ្រឿងកំពុងតែបូមទឹកស្ទឹងស្ទោងទៅបាញ់ពន្លត់គំនរស្រូវដែលនៅឆេះហ៊ុយៗមិនទាន់រលត់ទាំងស្រុងនៅឡើយ។ កាលពីដំបូងគេច្រកស្រូវនេះដាក់បាវ ឬការុង តម្រួតដាក់លើគ្នាក្នុងរោងម៉ាស៊ីន លុះពេលភ្លើងឆេះសំបកការុងធ្វើអំពីជ័រអស់ គេឃើញតែគំនរស្រូវប៉ុណ្ណោះ។ ម្ចាស់រោងម៉ាស៊ីនឱ្យដឹងថា ស្រូវក្នុងរោងម៉ាស៊ីនមានចំនួនជាងមួយពាន់តោនជាប្រភេទស្រូវម្លិះ ពួកគាត់ទិញអស់ប្រាក់ជាង២លានដុល្លារ។ ទាក់ទិននឹងអគ្គីភ័យនេះដែរ មានប្រភពខ្លះធ្វើការសន្និដ្ឋានថា អាចបណ្តាលមកពីទុស្សេចរន្តអគ្គិសនី។ ប្រភពខ្លះទៀតថា អាចបណ្តាលមកពីបំពង់សឺម៉ាំងម៉ាស៊ីនកិនស្រូវក្តៅខ្លាំងពេក ហើយមានផ្កាភ្លើងប៉ើងទៅប៉ះ បណ្តាលឱ្យឆេះតិចៗរហូតរាលដាលឆេះខ្លាំងទើបបង្កឱ្យមានអគ្គីភ័យឆេះឡើង ពីព្រោះនៅពេលថ្ងៃមុនកើតហេតុ រោងម៉ាស៊ីននេះមានកិនស្រូវច្រើនខុសប្លែកធម្មតា។ លុះដល់ពេលល្ងាចទើបម្ចាស់រោងម៉ាស៊ីន និងកម្មករនាំគ្នាចាក់សោរោង ហើយនាំគ្នាមកយាមនៅក្រៅរោងម៉ាស៊ីន។ លុះពេលភ្លើងឆេះពេញបន្ទុកហើយទើបពួកគេដឹង ក៏នាំគ្នាផ្អើលឆោឡោឡើងតែម្តង។ តាមមន្ត្រីការិយាល័យព័ត៌មានស្រុកស្ទោងឱ្យដឹងថា ការខូចខាតសរុបអស់ប្រហែលមួយលានដុល្លារ ពីព្រោះគ្រាន់តែក្បាលម៉ាស៊ីនកិនស្រូវមានតម្លៃជាង១០ម៉ឺនដុល្លារ និងឆេះស្រូវអស់មួយចំនួនធំ ព្រមទាំងឆេះសំភារផ្សេងៗអស់ជាច្រើនទៀត។ ក្នុងគ្រោះអគ្គីភ័យនេះ ពុំបណ្តាលឱ្យមានគ្រោះថ្នាក់ដល់ជីវិតមនុស្ស ឬឆេះរាលដាលដល់ផ្ទះអ្នកជិតខាងឡើយ៕  |
| ភ្លៀងកក់ខែមួយមេមានព្យុះ ផ្ទះនិងសាលារៀនប៉ើងដំបូល ខ្លះរលំ នៅស្រុកជើងព្រៃនិងកងមាស Posted: 09 Mar 2011 05:50 PM PST ខេត្តកំពង់ចាម ៖ ស្របពេលដែលអាកាសធាតុកំពុងតែក្តៅហែងនៅក្នុងរដូវប្រាំង ស្រាប់តែព្រះពិរុណបានបង្អុរធ្លាក់មួយមេលាយឡំទៅដោយខ្យល់ព្យុះយ៉ាងកំណាចកាលពីវេលាម៉ោង៧ និង៣០នាទីយប់ ថ្ងៃទី៨ មីនា ២០១១ ជះកំហឹងមកលើស្រុកជើងព្រៃ និងស្រុកកងមាស ជាហេតុបណ្តាលឱ្យផ្ទះរបស់ប្រជាពលរដ្ឋ សាលារៀន រងការខូចខាត ដែលខ្លះរលំ និងខ្លះរបើកដំបូលអស់ចំនួន២២ខ្នង តែមិនបណ្តាលឱ្យប្រជាពលរដ្ឋណាម្នាក់រងរបួស ឬស្លាប់នោះទេ គ្រាន់តែងាប់គោ១ក្បាលដែលចងនៅខាងក្រោមផ្ទះ។ លោកវរសេនីយ៍ត្រីហេង វុទ្ធី អធិការនគរបាលស្រុកជើងព្រៃបានឱ្យកោះសន្តិភាពដឹងថា នៅស្រុកជើងព្រៃ ភ្លៀងបានធ្លាក់មកលាយឡំដោយខ្យល់ព្យុះបោកបក់មកលើឃុំចំនួន៣រួមមានឃុំសូទិព្វ ឃុំខ្នុរដំបង និងឃុំព្រៃចារ រយៈពេលប្រហែលជាកន្លះម៉ោងដោយមានផ្លេកបន្ទោរខ្វែងខ្វាត់ពេញលើអាកាសវេហាស៍។ លោកអធិការនគរបាលស្រុកជើងព្រៃបានបន្តថា ក្នុងហេតុការណ៍គ្រោះធម្មជាតិនេះបណ្តាលឱ្យផ្ទះរបស់ប្រជាពលរដ្ឋរងការខូចខាតសរុបទាំងអស់ចំនួន២០ខ្នងរួមមាន១-ផ្ទះរបស់ឈ្មោះតែម ហឿន ភេទប្រុស អាយុ៤២ឆ្នាំ រស់នៅភូមិសូទិព្វឃុំសូទិព្វ ទំហំ៥គុណ៦ម៉ែត្ររលំ, ២-ផ្ទះរបស់ឈ្មោះយ៉ន យ៉ាន់ ភេទប្រុស នៅភូមិខ្នុរដំបង ឃុំខ្នុរដំបង ទំហំ៩គុណ១២ម៉ែត្រ ធ្វើពីឈើរបើកដំបូល, ៣-ផ្ទះរបស់ឈ្មោះឡន ឡេន ភេទប្រុស មានទំហំ៤គុណ៥ម៉ែត្រប្រក់ស័ង្កសីរលំ, ៤-ផ្ទះរបស់ឈ្មោះម៉េង កៀម ភេទប្រុស មានទំហំ៤គុណ៥ម៉ែត្ររលំ, ៥-ផ្ទះរបស់ឈ្មោះហឿន ធឿន ភេទប្រុស ទំហំ៦គុណ៨ម៉ែត្រប្រក់ស័ង្កសី របើកដំបូល, ៧-ផ្ទះរបស់ឈ្មោះអុល អាត ភេទប្រុស ទំហំ៥គុណ៩ម៉ែត្រប្រក់ស្លឹករលំ, ៨-ផ្ទះរបស់ឈ្មោះដួង ចន្ធូ ភេទស្រី ទំហំ៦គុណ៨ម៉ែត្រប្រក់ស័ង្កសីរបើកដំបូល, ៩-ផ្ទះរបស់ឈ្មោះហ៊ិន ស៊ុយ ភេទប្រុស ទំហំ៥គុណ៥ម៉ែត្ររបើកដំបូល, ១០-ផ្ទះរបស់ឈ្មោះមឿន ម៉ៃ ភេទ ប្រុស ទំហំ៤គុណ៥ម៉ែត្រ របើកដំបូល, ១១-ផ្ទះរបស់ឈ្មោះមិន ម៉ៃ ទំហំ៤គុណ៥ម៉ែត្ររលំ, ១២-ផ្ទះរបស់ឈ្មោះស៊ាម ប្រុស ប្រក់ស័ង្កសី ទំហំ៤គុណ៥ម៉ែត្ររបើកដំបូល, ១៣-ផ្ទះរបស់ឈ្មោះឌឿន បូ ភេទប្រុស ប្រក់ស្លឹក ទំហំ៥គុណ៥ម៉ែត្ររលំ, ១៤-ផ្ទះរបស់ឈ្មោះតូ តូច ភេទប្រុស ប្រក់ស័ង្កសីទំហំ៣៥គុណ៤ម៉ែត្ររបើកដំបូល, ១៥-ផ្ទះរបស់ឈ្មោះឈាវ ជ្រុង ភេទប្រុស ប្រក់ស័ង្កសីទំហំ៤គុណ៦ម៉ែត្រ រលំ, ១៦-ផ្ទះរបស់ឈ្មោះទ្រី ទ្រឿន ភេទប្រុស ប្រក់ស័ង្កសីទំហំ៥គុណ៧ម៉ែត្ររលំ, ១៧-ផ្ទះរបស់ឈ្មោះហ៊ុំ ហេន ភេទប្រុស នៅភូមិសៀមប៉ោយ ឃុំព្រៃចារ ទំហំ៤គុណ៦ម៉ែត្ររលំ, ១៨-ផ្ទះរបស់ឈ្មោះអ៊ឹម ឡុំ ភេទប្រុស អាយុ៦៤ឆ្នាំ របើកដំបូល, ១៩-ផ្ទះរបស់ឈ្មោះរស់ វី ភេទប្រុស អាយុ២៨ឆ្នាំ ប្រក់ស័ង្កសីទំហំ៤គុណ៤ម៉ែត្ររបើកដំបូល, ២០-ផ្ទះរបស់ឈ្មោះម៉ៅ កុល ភេទប្រុស អាយុ៣៤ឆ្នាំ រស់នៅភូមិព្រៃចារ ឃុំព្រៃចារ ប្រក់ស័ង្កសីទំហំ៤គុណ៥ម៉ែត្ររបើកដំបូល ព្រមទាំងបានងាប់គោអស់១ក្បាលផងដែរក្នុងពេលដែលប្រជាពលរដ្ឋចងនៅខាងក្រោមផ្ទះដោយផ្ទះរលំសង្កត់លើ។ ចំណែកលោកវរសេនីយ៍ត្រីសូ សារិទ្ធ អធិការនគរបាលស្រុកកងមាសបានប្រាប់ឱ្យដឹងដែរថា នៅវេលាម៉ោង៨យប់ថ្ងៃទី៨ មីនា ភ្លៀងបានបង្អុរធ្លាក់ចុះលាយឡំទៅដោយខ្យល់ព្យុះមកលើភូមិស្វាយកំពាន់ទី២ ឃុំខ្ចៅ ស្រុកកងមាស ជាហេតុបណ្តាលឱ្យផ្ទះរបស់ប្រជាពលរដ្ឋឈ្មោះគិន ហឿន ភេទប្រុស អាយុ៤៣ឆ្នាំ មានទំហំ៥គុណ៦ម៉ែត្រ ត្រូវរលំ ហើយសាលារៀនហ៊ុនសែន ខ្ចៅក៏ត្រូវបានរបើកដំបូលអស់មួយចំនួនផងដែរ ៕  |
| មុនចូលរោងការ៣ថ្ងៃ នាងជាប្រពន្ធមកអូស.កប្តីត្រឡប់ទៅផ្ទះវិញ Posted: 09 Mar 2011 05:47 PM PST  ខេត្តកំពត ៖ ពិតជាគួរឱ្យឈឺចាប់ណាស់ សម្រាប់ស្ត្រីជាភរិយាកាលបើដឹងថា ប្តីជាទីស្រឡាញ់ និងជាទីពឹងរបស់ខ្លួនលួចរៀបការប្រពន្ធថ្មីមួយទៀត ហើយវាក៏ជាការបង្កឱ្យមានក្តីអាម៉ាស់មួយដល់នារីដែលចាញ់បោក ព្រោះតែគេភូតកុហកថា នៅកម្លោះ ឬពោះម៉ាយ ចូលមកចែចូវសុំបើកទ្វារបេះដូង និងព្រមព្រៀងរៀបការ ផ្ទុយទៅវិញ គឺជាការបោកប្រាស់ផ្លូវចិត្តមួយដ៏ធ្ងន់ធ្ងរ ។ តើនេះជាកំហុសនរណា? រឿងរ៉ាវលួចរៀបការប្រពន្ធថ្មីរបស់ប្តីកំហូចត្រូវបានប្រពន្ធរារាំងមុនពេលអង្ករក្លាយជាបាយ គឺមានន័យថា មុនប្តីកំហូចចូលរោងការ៣ថ្ងៃ។ រឿងរ៉ាវប្តីកំហូចនេះត្រូវបានដឹងថា បុរសឈ្មោះបាន នីម អាយុ៣១ឆ្នាំ មានស្រុកកំណើតនៅភូមិផ្សារដែក លើឃុំផ្សារដែក ស្រុកពញាឮ ខេត្តកណ្តាល បានទៅធ្វើជាកងសន្តិសុខឱ្យរោងចក្រកាត់ដេរមួយនៅសង្កាត់ភ្នំពេញថ្មី រាជធានីភ្នំពេញ ហើយភូតកុហកនារីម្នាក់ជាកម្មការិនីកាត់ដេរមានស្រុកកំណើតនៅភូមិចម្លង ជ្រៃ ឃុំស្តេចគង់ខាងលិចស្រុកបន្ទាយមាសថា ខ្លួនមិនមានប្រពន្ធទេ សុំស្រឡាញ់នាងរៀបការពេញច្បាប់ ក៏មានការត្រូវរ៉ូវគ្នា ។ ការបោកប្រាស់នាងកម្មការិនីនេះបានបង្ហាញលិខិតបញ្ជាក់ពីចៅសង្កាត់ភ្នំពេញថ្មី រួមទាំងមេភូមិបាយ៉ាប និងមេ៥០ខ្នងទី៥ថា ឈ្មោះបាន នីម ពិតជានៅលីវ ។ ទោះបីជាបែបណាក្តី លិខិតនោះមិនដឹងថា ក្លែងបន្លំ ឬពិតទេ ។ ដោយសារឃើញមានការអះអាងពីអាជ្ញាធរសង្កាត់ភ្នំពេញថ្មីបែបនេះហើយ ទើបអាជ្ញាធរឃុំស្តេចគង់មិនជំទាស់ ហើយដាក់ថ្ងៃមង្គលការនៅថ្ងៃទី៦កើត ខែផល្គុន ត្រូវនឹងថ្ងៃទី១០ មីនា ។ ឪពុកម្តាយខាងស្រីពិតជាមានចិត្តរីករាយបានដើរហៅភ្ញៀវជិតឆ្ងាយ និងបញ្ជាទិញម្ហូបអាហារ ជួលភ្លេង ជួលសំអាងការ និងរកមេបាចាស់ទុំមកចូលរួមពិធីមង្គលការកូនប្រុសស្រី។ ប៉ុន្តែអ្វីដែលស្មានមិនដល់នោះ ស្រាប់តែនៅព្រឹកថ្ងៃទី៤ មីនា ស្ត្រីម្នាក់ឈ្មោះអ៊ុក ជាអាយុ៣០ឆ្នាំ រួមទាំងកូនស្រីឈ្មោះមាន ស្រីនុច អាយុ៩ឆ្នាំ ចេញពីឃុំផ្សារដែក ទៅកាន់ឃុំស្តេចគង់ សួររកប្តីរបស់ខ្លួនដែលជិតចូលរោងការជាមួយស្រីថ្មី ។ ស្ត្រីរូបនេះបានបង្ហាញរូបថតជាភស្តុតាងនៃមង្គលការរបស់ខ្លួនជាមួយប្តីកំហូចនេះ គឺជារូបថតរៀបការពេញច្បាប់ ។ ជាមួយនេះក៏មានលិខិតពីលោកមេឃុំផ្សារដែកចារបញ្ជាក់ផងដែរ ។ ស្ត្រីជាប្រពន្ធនិយាយប្រាប់អាជ្ញាធរឃុំស្តេចគង់ថា មុនពេលលួចមករៀបការនេះប្តីរបស់នាងបានបញ្ចុះបញ្ចូលនាងឱ្យដើរចងការលុយគេយកទៅសូកគេធ្វើការ។ ដោយមិនដឹងល្បិចប្តីនោះនាងព្យាយាមចងការគេបានចំនួន៦០០ដុល្លារឱ្យប្តី ហើយគេបែរជាយកមកជូនខាងស្រីជាជំនូនរៀបការទៅវិញ ។ ស្ត្រីជាប្រពន្ធបន្តថា ទោះបីជាគេប្រាប់ថា ប្តីនាងលួចការស្រីថ្មីក៏ដោយ ក៏នាងមិនជឿដែរ លុះដឹងថា គេពិតជាលួចរៀបការមែននោះ ទើបនាងសុំឱ្យលោកមេឃុំផ្សារដែកទូរស័ព្ទទៅស្មៀន ឃុំស្តេចគង់ សុំឱ្យបញ្ចប់ពិធីមង្គលការនេះជាបន្ទាន់ ។ លោកអេង អ៊ីវ មេឃុំស្តេចគង់រួមទាំងស្មៀនឃុំបានបន្ទោសទៅលើលោកចៅសង្កាត់ ភ្នំពេញថ្មីថា ហេតុអ្វីក៏ហ៊ានបញ្ជាក់ពីភាពនៅលីវ របស់បុរសឈ្មោះបាន នីម ។ តាមពិតគេគ្រាន់តែមកស្នាក់នៅធ្វើការប៉ុណ្ណោះ គួរតែពិនិត្យឱ្យច្បាស់ ។ មង្គលការមួយទៀតដែលបានប្រារព្ធឡើងនៅថ្ងៃទី៦ មីនា នៅភូមិអង្គសុរភី ឃុំអង្គសុរភី ស្រុកកំពង់ត្រាច មានមនុស្សម្នាចូលរួមយ៉ាងច្រើនកុះករ ។ អ្វីដែលជាការកត់សម្គាល់នោះ គឺជាមង្គលរវាងកម្លោះសង្ហា និងនាងក្រមុំខ្វិន ។ កូនកម្លោះឈ្មោះញឹម ហំ មានរូបរាងស្អាតបាតដូចគេឯងដែរ បានស្ម័គ្រចិត្តរៀបការជាមួយនាងជាកូនក្រមុំឈ្មោះស៊ីវ ម៉ីម៉ី ពិការដៃជើងតាំងពីនៅតូច ។ បច្ចុប្បន្ននាងដើរមិនរួចទេ ។ តាមសំដី ក្រុមសាច់ញាតិខាងកូនក្រមុំថា កូនកម្លោះញឹម ហំ បានមកស៊ីឈ្នួលធ្វើចំការឱ្យលោកស៊ីវ សាវុធ ឪពុកកូនក្រមុំនៅភ្នំកូនសត្វ ឃុំកូនសត្វស្រុកទឹកឈូ ។ ដោយសារឪពុកម្តាយខាងស្រីមើលឃើញថា ញឹម ហំ អាចផ្តល់ទំនុកចិត្ត និងសង្ឃឹមទៅថ្ងៃអនាគត ក្នុងការថែទាំកូន ស្រីពិការរបស់ខ្លួនបានក៏លើកនាងឱ្យគេ ។ អ្នកភូមិចាត់ទុកថា កូនកម្លោះមានសំណាង ទោះបីយកប្រពន្ធពិការក្តី ព្រោះនាងមានពូជពង្សជាអ្នកមានគួរសមនៅភ្នំពេញ ។ ពេលហែជំនូនកូនកម្លោះមកដល់ផ្ទះកូនក្រមុំនាងត្រូវឪពុកត្រកងបីឱ្យកូនកម្លោះបំពាក់កម្រងផ្កា ។ បន្ទាប់ពីបំពាក់ហើយកូនកម្លោះបានបីកូនក្រមុំទៅក្នុងបន្ទប់វិញ ។ ពេលកាត់សក់យកសិរីឪពុកបានបីនាងកូនក្រមុំចេញមក ហើយពេលរួចរាល់ហើយកូនកម្លោះបីនាងចូលបន្ទប់វិញ ។ ក្នុងពិធីកាត់ផ្លែឈើ កូនប្រុសបានបីត្រកងនាងម៉ីម៉ី៣ជុំ ស្របពេលក្រុមភ្ញៀវបញ្ចេញសំលេងហ៊ោរំពងរោងការ ។ តាមការកត់សំគាល់មើលកាយវិការគឺឪពុកកូនក្រមុំបីកូនសមជាងកូនប្រសា ព្រោះគាត់ថ្នឹកបីកូនស្រីពិការនេះ២០ឆ្នាំមកហើយ ។ មង្គលការដ៏កម្រមួយនេះ គ្មានអ្នកណាសើចចំអកអ្វីទេ គឺគ្រប់គ្នាអាណិតកូនក្រមុំ ដែលមានរូបរាងស្អាតបាត បែរជាខ្វិនទៅណាមកណាមិនរួច ហើយបួងសួងឱ្យនាងទទួលបានការថ្នាក់ថ្នមពីចៅមាណពចាំចំការនេះរៀងរហូតទៅចុះ ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
