Koh Santipheap Daily |
- ស្ត្រី៨រូបចូលរួមបង្ហាញវប្បធម៌ប្រពៃណីខ្មែរថ្ងៃទី៨មីនា
- ពិសពីងពាងមួយប្រភេទព្យាបាលអាការអសមត្ថភាពផ្លូវភេទបុរស
- វីរ៉ា ស៊ុមខ្វាមឃីត ធូរស្បើយពីជំងឺវិញហើយ
- តម្លៃប្រេងចុះបន្តិចវិញក្រោយឮថាពួក OPEC ពិភាក្សាគ្នាពីការបង្កើនផលិតកម្ម
- រញ្ជួយដីកម្រិត៧,២រីស្ទ័រកើតឡើងនៅភាគខាងជើងជប៉ុនញ័ររង្គើដល់ក្រុងតូក្យូ និងព្រមានពីរលកស៊ូណាមី
- ជប៉ុនអនុម័តទណ្ឌកម្មប្រឆាំងលីប៊ី
- សាលាឧទ្ធរណ៍បដិសេធការសុំនៅក្រៅឃុំរបស់អតីតព្រះរាជអាជ្ញាតុប ច័ន្ទសិរីវុធ
- ពិសពីងពាងមួយប្រភេទព្យាបាលអាការអសមត្ថភាពផ្លូវភេទបុរស
- កម្ពុជាត្រៀមរួចរាល់សម្រាប់កិច្ចប្រជុំគណៈកម្មាធិការព្រំដែននៅឥណ្ឌូនេស៊ី...ភាគីថៃមិនទាន់ឆ្លើយតប
- ពួកបះបោរលីប៊ី ទុកពេល៧២ម៉ោងឱ្យលោកកាដាហ្វី ចាកចេញ
- សម្តេចតេជោហ៊ុន សែន កំពុងអញ្ជើញជាអធិបតីសម្ពោធបើកការដ្ឋានផែស្ងួតនៅឃុំបន្ទាយដែក
- ផ្ទះមួយខ្នងត្រូវគ្រោះអគ្គីភ័យឆាបឆេះអស់ម៉ដ្ឋគ្មានសល់តែមួយប៉ព្រិចភ្នែក
- តុលាការក្រុងប៉ារីសលើកពេលកាត់ទោសអតីតប្រធានាធិបតីលោកហ្សាក់ ស៊ីរ៉ាក់
- កងកម្លាំងរបស់លោកកាដាហ្វីបន្តការវាយបកលើទីក្រុងទាំងឡាយកាន់កាប់ដោយពួកបះបោរ
- តុលាការក្រុងគែរសម្រេចរក្សាការផ្អិបទុកទ្រព្យសម្បត្តិបរស់លោកមូបារ៉ាក់
- ឈើគ្រញូង៣៣កំណាត់ស្មើ៧៦០គីឡូក្រាមចាប់បាននៅផ្លូវជាតិលេខ៥
- ពិធីបុណ្យតន្ត្រីឆ្នេរកែបរៀបចំដោយជនបរទេស
- វ៉ាឌី ភាលីង ពិធីការិនី បង្ហាញមុខលើវេទិកាតន្ត្រី បន្ទាប់ពីវះកាត់កែច្រមុះ
- ដឹកលើសទម្ងន់ឡើងចំណោតមិនរួចក្រឡាប់បះជើង
- សម្តេចតេជោ ៖ លោករដ្ឋមន្ត្រីតាមក្រសួងនិងស្ថាប័ននានាកុំឱ្យមានស្ថានភាពប្តីស័ក្តិ៣ ប្រពន្ធស័ក្តិ៤ កូនស័ក្តិ៥
| ស្ត្រី៨រូបចូលរួមបង្ហាញវប្បធម៌ប្រពៃណីខ្មែរថ្ងៃទី៨មីនា Posted: 08 Mar 2011 11:35 PM PST  រាជធានីភ្នំពេញ ៖ អាចថា ជាលើកទី១ដែលមជ្ឈមណ្ឌលវប្បធម៌បារាំង បានរៀបចំពិព័រណ៍ផ្ទាំងគំនូរស្នាដៃស្ត្រីចំនួន៨រូបដែលបង្ហាញអំពីលក្ខណៈនៃវប្បធម៌ប្រពៃណីខ្មែរ និងអបអរសាទរចំពោះខួបលើកទី១០០ទិវាអន្តរជាតិនារី៨ មីនា ។ លោកអូលីវីយេ ប្លង់សុង (Olivier Plan chon) នាយកមជ្ឈមណ្ឌលវប្បធម៌បារាំងបានថ្លែងថា ការរៀបចំពិព័រណ៍នាពេលនេះ គឺដើម្បីឱ្យទស្សនិកជនបានឃើញនូវសមត្ថភាពរបស់ស្ត្រីខ្មែរក្នុងការបង្កើតស្នាដៃថ្មីៗ សំខាន់ការបង្ហាញនូវខ្លឹមសារនៃវប្បធម៌ប្រពៃណីខ្មែរ ។ តាមពិត ទៅ ការងារខ្លះរបស់ស្ត្រីខ្មែរយើងគឺល្អជាងមនុស្សប្រុសទៅទៀត ដែលគួរឱ្យកោតសរសើរផងដែរ ។ ការរៀបចំពិព័រណ៍បែបនេះ គឺសំដៅចូលរួមអបអរខួបលើកទី១០០ នៃទិវាអន្តរជាតិនារី ៨ មីនា ។ លោកអូលីវីយេ ប្លង់សុង បានបញ្ជាក់ថា ស្ត្រីខ្មែរចំនួន៨រូបដែលចូលរួមក្នុងពិព័រណ៍នេះគឺម្នាក់ៗមានរូបភាពច្នៃប្រឌិតពី៤ ទៅ៥ផ្ទាំង ហើយសុទ្ធសឹងតែមានអត្ថន័យបែបវប្បធម៌ និងប្រពៃណី ។ ស្ត្រីទាំង៨រូបនេះរួមមានឈ្មោះប៊ុត ច័ន្ទអនោជា, ខ្ចៅ ទូច, ចាន់ ពិសី, ភិន សោភ័ណ, នួន បូរីណា, ងួន សាកល, ទេស វណ្ណា និងយ៉ឹម ម៉ាលីន ។ ផ្ទាំងគំនូរទាំងអស់សុទ្ធសឹងបង្ហាញនូវវប្បធម៌ និងប្រពៃណីប្លែកៗពីគ្នាដូចជាប្រពៃណីនៃការរៀបអាពាហ៍ពិពាហ៍, ពិធីចូលម្លប់ដែលប្តូរពីជីវិតកុមារីទៅជាមនុស្សពេញវ័យ វប្បធម៌គោរពព្រះពុទ្ធសាសនា គោរពគ្រួសាររបស់ស្ត្រី, ជីវិតស្ត្រីដែលរស់នៅក្នុងភាពឯករាជ្យ និងសេរីភាពប្រកបដោយសុភមង្គល រួមទាំងរូបភាពដែលបង្ហាញពីតួនាទីស្ត្រីក្នុងសង្គម និងត្រូវគោរពបំផុត ។ ពិព័រណ៍ខាងលើនេះ ចាប់បើកពីថ្ងៃទី៧ មីនា ឆ្នាំ២០១១ ដែលមានរយៈពេលជាងមួយខែ និងបើកឱ្យទស្សនិកជនចូលទស្សនាដោយមិនគិតថ្លៃ ។ កញ្ញាចាន់ ពិសី អតីតសិស្សអង្គការហ្វាពន្លឺសិល្បៈ ដែលមានផ្ទាំងគំនូរចូលរួមក្នុងពិព័រណ៍បាននិយាយថា នេះជាលើកទី១របស់នាងក្នុងការបង្ហាញស្នាដៃគំនូរបែបវប្បធម៌ និងប្រពៃណី ។ ប្រធានបទ ដែលនាងចូលរួមនាពេលនេះគឺ «ស្ត្រីចូលម្លប់» ដែលចង់បង្ហាញអំពីទំនៀមទម្លាប់នៃការចូលម្លប់របស់ស្ត្រីខ្មែរនាសម័យដើម ។ នាងយកផ្ទាំងគំនូរនោះដើម្បីពន្យល់ឱ្យស្ត្រីខ្មែរបានដឹងពីពិធីចូលម្លប់ ដែលប្តូរពីជីវិតកុមារីទៅជាមនុស្សពេញវ័យក្រមុំ ដែលបច្ចុប្បន្នមិនសូវមានការប្រារព្ធធ្វើទៀតទេ ។ នាងបញ្ជាក់ថា រយៈពេលនៃការចូលម្លប់អាចមានច្រើនសបា្តហ៍ និងមានគោលបំណងបង្ហាត់បង្រៀនស្រីពេញក្រមុំឱ្យត្រៀមខ្លួនដើរតួនាទីជាម្តាយ និងទទួលខុសត្រូវទុកដាក់ផ្ទះសម្បែង ។ អ្វីជាសំខាន់នោះ គឺនាងចង់ឱ្យយុវវ័យខ្មែរនាជំនាន់នេះបានស្វែងយល់ និងស្គាល់អំពីវប្បធម៌ប្រពៃណីខ្មែរនាសម័យមុន ៕  |
| ពិសពីងពាងមួយប្រភេទព្យាបាលអាការអសមត្ថភាពផ្លូវភេទបុរស Posted: 08 Mar 2011 11:22 PM PST  យល់ដឹង ៖ អ្នកវិទ្យាសាស្ត្រនៃមហាវិទ្យាល័យវេជ្ជសាស្រ្តរដ្ឋហ្សកហ្ស៊ី សហរដ្ឋអាមេរិក ប្រទះឃើញពីងពាងពូជចេក ដែលមានឈ្មោះថា Phoneutria Nigriventer ជាប្រភេទពីងពាងរស់នៅតំបន់អាមេរិកកណ្តាល និងអាមេរិកខាងត្បូងដោយពិសរបស់វាមានឥទ្ធិពលធ្វើឱ្យអវយវៈភេទឡើងរឹងរយៈពេល៤ម៉ោង និងអាចប្រើប្រាស់សម្រាប់ព្យាបាលអវយវៈភេទមិនដំណើរការបាន តាមរយៈការពិសោធន៍នាពេលកន្លងមក ដោយប្រើម៉ូលេគុលមួយចំនួនរបស់ពិសពីងពាងប្រភេទនេះ ។ លោកសាស្ត្រាចារ្យកេននី នូនេស ជាមនុស្សម្នាក់ក្នុងចំណោមអ្នកស្រាវជ្រាវ បង្ហើបឱ្យដឹងថា ពិសរបស់ពីងពាងពូជនេះ អាចបង្កឱ្យកើតអាការរោគជាច្រើនប្រភេទរួមទាំងបាត់បង់លក្ខណៈធ្វើការរបស់សាច់ដុំអាការឈឺចាប់ធ្ងន់ៗ ពិបាកដកដង្ហើម និងប្រសិនបើមិនបានទទួលថ្នាំបំបាត់ពិស អាចឈានឆ្ពោះទៅរកការស្លាប់បាត់បង់ជីវិតដោយសារខ្វះអុកស៊ីហ្សែនបាន ។ ក្រៅពីអាការជំងឺទាំងនេះ ពិសរបស់វាថែមទាំងអាចប្រើសម្រាប់ព្យាបាលអាការអវយវៈភេទមិនដំណើរការបានផងដែរ ។ គួរបញ្ជាក់ថា តាមការពិសោធន៍នាពេលកន្លងមក ក្រុមវេជ្ជបណ្ឌិតបានប្រើម៉ូលេគុលដែលមានឈ្មោះថា “PnTx2” របស់ពិសពីងពាងខាងលើ ប្រើទៅលើសត្វកណ្តុរពិសោធន៍ដែលមានអវយវៈភេទអត់ដំណើរការ បង្ហាញឱ្យឃើញថា កណ្តុរខាងលើមានអាការរឹងផ្នែកផ្លូវភេទ និងការពិសោធន៍នេះធ្វើឱ្យមានការរំពឹងទុកថា អាចយកទៅប្រើផលិតថ្នាំវីយ៉ាហ្គ្រាថ្មីសម្រាប់បំបាត់អាការភេទដែលអសមត្ថភាពរបស់បុរស ។ លើសពីនេះទៀត ក្រុមវេជ្ជបណ្ឌិតនៅមានជំនឿចិត្តថា ពិសពីងពាងពូជចេក ឬពូជ “Phoneutria nigriventer” អាចព្យាបាលអាការភេទរបស់ស្ត្រីដែលចុះខ្សោយបាន ប៉ុន្តែនៅមិនទាន់មានការសិក្សាស្រាវជ្រាវលើផ្នែកនេះ នៅឡើយ៕  |
| វីរ៉ា ស៊ុមខ្វាមឃីត ធូរស្បើយពីជំងឺវិញហើយ Posted: 08 Mar 2011 10:44 PM PST  រាជធានីភ្នំពេញ ៖ អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោកគួយ ប៊ុនសន បានថ្លែងឱ្យដឹងថា ទណ្ឌិតជនជាតិសៀមឈ្មោះវីរ៉ា ស៊ុមខ្វាមឃីត ដែលកំពុងជាប់ឃុំក្នុងពន្ធនាគារព្រៃសនោះ បានធូរស្បើយពីជំងឺផ្តាសាយវិញហើយ ។  |
| តម្លៃប្រេងចុះបន្តិចវិញក្រោយឮថាពួក OPEC ពិភាក្សាគ្នាពីការបង្កើនផលិតកម្ម Posted: 08 Mar 2011 10:44 PM PST តម្លៃប្រេងឆៅបានចុះបន្តិចវិញកាលពីថ្ងៃទី៨ មីនា នៅទីផ្សារក្រុងញូវយ៉ក ក្រោយការប្រកាសអំពីការពិភាក្សាគ្នារវាងបណ្តាប្រទេសជាសមាជិកនៃអង្គការបណ្តាប្រទេសនាំប្រេងចេញហៅកាត់ថា OPEC លើលទ្ធភាពនៃការបង្កើនផលិតកម្មប្រេងដើម្បីទប់ការឡើងថ្លៃប្រេងខ្ពស់ទាក់ទិនដល់សភាពការណ៍នៅលីប៊ី។  |
| Posted: 08 Mar 2011 10:40 PM PST យោងតាមទីភ្នាក់ងារព័ត៌មាន AP នៅថ្ងៃទី៩ មីនា ២០១១ នេះឱ្យដឹងថា ការរញ្ជួយដីដ៏មានឥទ្ធិពលមួយកម្រិត៧,២រីស្ទ័រ បានកើតឡើងនៅតំបន់ឆ្នេរសមុទ្រ ភាគខាងជើងប្រទេសជប៉ុន ធ្វើឱ្យអគារទាំងឡាយក្នុងទីក្រុងតូក្យូញ័ររង្គើ ហើយទីភ្នាក់ងារឧតុនិយមរបស់ប្រទេសជប៉ុនបានចេញការព្រមានផងដែរថា ការរញ្ជួយដីដ៏ខ្លាំងក្លានេះនឹងកើតមានរលកស៊ូណាមី សម្រាប់ភាគឦសានប្រទេស ។ ទោះបីជាបែបណា ពុំទាន់មានរបាយការណ៍ស្តីអំពីអ្នកស្លាប់ ឬរបួស និងការខូចខាតនៅឡើយទេ ចំណែកមន្ត្រីនានាក៏កំពុងវាយតម្លៃពីស្ថានការណ៍នៃបាតុភូតរញ្ជួយដីនេះនៅឡើយដែរ ។  |
| ជប៉ុនអនុម័តទណ្ឌកម្មប្រឆាំងលីប៊ី Posted: 08 Mar 2011 10:40 PM PST ប្រទេសជប៉ុនកាលពីថ្ងៃទី៨ មីនា បានសម្រេចអនុម័តលើទណ្ឌកម្មប្រឆាំងប្រទេសលីប៊ី ក្នុងនោះមានដូចជាការផ្អិបទ្រព្យសម្បត្តិ និងការហាមប្រាមលើការធ្វើដំណើរប្រឆាំងអតីតមេដឹកនាំប្រទេសនេះ ជាពិសេសលោកមូអាម៉ា កាដាហ្វី ដើម្បីឱ្យស្របទៅតាមដំណោះស្រាយមួយរបស់អង្គការសហប្រជាជាតិ ដែលសម្រេចបានកាលពីខែមុន ។  |
| សាលាឧទ្ធរណ៍បដិសេធការសុំនៅក្រៅឃុំរបស់អតីតព្រះរាជអាជ្ញាតុប ច័ន្ទសិរីវុធ Posted: 08 Mar 2011 10:39 PM PST រាជធានីភ្នំពេញ ៖ កាលពីព្រឹកថ្ងៃទី៩ មីនា ២០១១ សាលាឧទ្ធរណ៍បានប្រកាសបដិសេធការសុំនៅក្រៅឃុំរបស់អតីតព្រះរាជអាជ្ញាអមសាលាដំបូងខេត្តពោធិ៍សាត់ លោកតុប ច័ន្ទសិរីវុធ ដោយសារតែសាលាឧទ្ធរណ៍មិនបានឃើញឯកសារស្នើការពាររបស់មេធាវីជនជាប់ចោទដាក់មកសាលាឧទ្ធរណ៍ ហើយបានតម្កល់សាលក្រមសាលាដំបូងខេត្តពោធិ៍សាត់ ចាត់ទុកជាបានការដដែល ។ ការបើកសវនាការនេះបានធ្វើឡើងដោយលោកចៅក្រមជួន ស៊ុនឡេង អនុប្រធានសាលាឧទ្ធរណ៍ ព្រះរាជអាជ្ញាលោកប៉ាន់ គឹមលាង និងមានវត្តមានមេធាវីការពារជនជាប់ចោទផងដែរ ។  |
| ពិសពីងពាងមួយប្រភេទព្យាបាលអាការអសមត្ថភាពផ្លូវភេទបុរស Posted: 08 Mar 2011 10:22 PM PST អ្នកវិទ្យាសាស្ត្រនៃមហាវិទ្យាល័យវេជ្ជសាស្រ្តរដ្ឋហ្សកហ្ស៊ី សហរដ្ឋអាមេរិក ប្រទះឃើញពីងពាងពូជចេក ដែលមានឈ្មោះថា Phoneutria Nigriventer ជាប្រភេទពីងពាងរស់នៅតំបន់អាមេរិកកណ្តាល និងអាមេរិកខាងត្បូងដោយពិសរបស់វាមានឥទ្ធិពលធ្វើឱ្យអវយវៈភេទឡើងរឹងរយៈពេល៤ម៉ោង និងអាចប្រើប្រាស់សម្រាប់ព្យាបាលអវយវៈភេទមិនដំណើរការបាន តាមរយៈការពិសោធន៍នាពេលកន្លងមក ដោយប្រើម៉ូលេគុលមួយចំនួនរបស់ពិសពីងពាងប្រភេទនេះ ។ លោកសាស្ត្រាចារ្យកេននី នូនេស ជាមនុស្សម្នាក់ក្នុងចំណោមអ្នកស្រាវជ្រាវ បង្ហើបឱ្យដឹងថា ពិសរបស់ពីងពាងពូជនេះ អាចបង្កឱ្យកើតអាការរោគជាច្រើនប្រភេទរួមទាំងបាត់បង់លក្ខណៈធ្វើការរបស់សាច់ដុំអាការឈឺចាប់ធ្ងន់ៗ ពិបាកដកដង្ហើម និងប្រសិនបើមិនបានទទួលថ្នាំបំបាត់ពិស អាចឈានឆ្ពោះទៅរកការស្លាប់បាត់បង់ជីវិតដោយសារខ្វះអុកស៊ីហ្សែនបាន ។ លើសពីនេះទៀត ក្រុមវេជ្ជបណ្ឌិតនៅមានជំនឿចិត្តថា ពិសពីងពាងពូជចេក ឬពូជ “Phoneutria nigriventer” អាចព្យាបាលអាការភេទរបស់ស្ត្រីដែលចុះខ្សោយបាន ប៉ុន្តែនៅមិនទាន់មានការសិក្សាស្រាវជ្រាវលើផ្នែកនេះ នៅឡើយ៕  |
| Posted: 08 Mar 2011 07:39 PM PST រាជធានីភ្នំពេញ ៖ ទីភ្នាក់ងារព័ត៌មានផ្លូវការចិនស៊ីនហួ ថ្ងៃទី៨ មីនា ២០១១ ម្សិលមិញ បានដកស្រង់សម្តីលោកកុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា ថ្លែងថា ប្រទេសឥណ្ឌូណេស៊ីដែលជាប្រធានអាស៊ានផ្លាស់ប្តូរវេនបានស្នើឱ្យមានកិច្ចប្រជុំរដ្ឋមន្ត្រីការពារប្រទេសកម្ពុជា-ថៃ និងកិច្ចប្រជុំគណៈកម្មាធិការព្រំដែនពីថ្ងៃទី២៤ ដល់ថ្ងៃទី២៥ មីនា ខាងមុខនេះ នៅក្នុងទីក្រុងបូហ្គ័រ ប្រទេសឥណ្ឌូណេស៊ី ។ លោកកុយ គួង ថ្លែងឱ្យដឹងទៀតថា រដ្ឋមន្ត្រីការបរទេសឥណ្ឌូណេស៊ីលោកម៉ាធី ណាតា ឡេហ្គាវ៉ា កាលពីថ្ងៃទី៧ មីនា កន្លងមក បានផ្ញើលិខិតមួយច្បាប់មកកម្ពុជាស្នើរៀបចំកិច្ចប្រជុំគណៈកម្មាធិការព្រំដែនទូទៅ (GBC) និងកិច្ចប្រជុំគណៈកម្មាធិការព្រំដែនចម្រុះ (JBC) ទទួលបន្ទុកកំណត់ព្រំដែនគោករវាងប្រទេសកម្ពុជា និងប្រទេសថៃ នៅក្នុងទីក្រុងបូហ្គ័រ ។ ទីភ្នាក់ងារព័ត៌មានស៊ីនហួ បានដកស្រង់សម្តីលោកកុយ គួង ថ្លែងទៀតថា កាលពីព្រឹកថ្ងៃទី៨ មីនា ២០១១ ម្សិលមិញនេះ លោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា បានឆ្លើយតបរួចហើយចំពោះសំណើនេះគឺកម្ពុជាឯកភាពចំពោះកាលបរិច្ឆេទនៃកិច្ចប្រជុំនោះ ។ លោកកុយ គួង ថ្លែងបន្តទៀតថា «នៅក្នុងលិខិតមួយច្បាប់ផ្ញើជូនលោកណាតា ឡេហ្គាវ៉ា លោកឧបនាយករដ្ឋមន្ត្រីហោ ណាំហុង បានសរសេរថា កិច្ចប្រជុំនោះត្រូវតែរៀបចំឡើងដោយមានការចូលរួមពីប្រធានអាស៊ាន ឬតំណាងអាស៊ាន យ៉ាងហោចណាស់ក៏បានចូលរួមក្នុងពិធីបើកកិច្ចប្រជុំដែរ ។ នៅពេលកិច្ចប្រជុំចប់ កម្ពុជា និងថៃ ត្រូវតែរាយការណ៍ពីលទ្ធផលនៃការប្រជុំជូនទៅប្រធានអាស៊ាន»។ កម្ពុជាសង្ឃឹមទៀតថា ថៃនឹងឯកភាពចំពោះសំណើបើកកិច្ចប្រជុំនោះដែរ ។ ទោះបីជាបែបណា ខាងភាគីថៃមិនទាន់ឆ្លើយតបយ៉ាងណាចំពោះសំណើរបស់ប្រធានអាស៊ាននោះនៅឡើយទេ៕  |
| ពួកបះបោរលីប៊ី ទុកពេល៧២ម៉ោងឱ្យលោកកាដាហ្វី ចាកចេញ Posted: 08 Mar 2011 07:37 PM PST  ប្រធានក្រុមប្រឹក្សាជាតិលីប៊ី CNL របស់លីប៊ី (ពួកបះបោរ) ប្រកាសកាលពីថ្ងៃទី៨ មីនា ថា ពួកបះបោរនឹងពុំកាត់ទោសលោកមូអាម៉ា កាដាហ្វី ពីបទឧក្រិដ្ឋដែលលោកបានប្រព្រឹត្តឡើយ ក្នុងលក្ខខណ្ឌដែលលោកព្រមចាកចេញពីអំណាចក្នុងរយៈពេល៧២ម៉ោង ។ តាមទូរទស្សន៍កាតា អាល់ហ្សាហ្ស៊ីរ៉ា លោក MOUSTAFA ABDELDJEÏL អតីតរដ្ឋមន្ត្រីក្រសួងយុត្តិធម៌លីប៊ី ដែលរត់ចោលជួរចូលរួមជាមួយពួកបះបោរ ហើយជាប្រធានរបស់ CNL ថ្លែងថា ប្រសិនបើលោកកាដាហ្វី ព្រមចាកចេញពីលីប៊ី ក្នុងរយៈពេល៧២ម៉ោង ហើយបញ្ចប់ការវាយប្រហារ នោះយើងនឹងមិនធ្វើការកាត់ទោសលោកពីបទឧក្រិដ្ឋទាំងឡាយឡើយ ។ អតីតរដ្ឋមន្ត្រីរូបនេះគូសបញ្ចាក់ទៀតថា ឱសានវាទនេះនឹងពុំពន្យារពេលឱ្យហួសពី៧២ម៉ោងឡើយ ។ CNL ត្រូវបានបង្កើតឡើងនៅទីក្រុងបេនហ្គាហ្ស៊ី ជាទីក្រុងធំទី២ របស់ប្រទេសលីប៊ី ស្ថិតនៅភាគខាងកើតប្រទេស ៕  |
| សម្តេចតេជោហ៊ុន សែន កំពុងអញ្ជើញជាអធិបតីសម្ពោធបើកការដ្ឋានផែស្ងួតនៅឃុំបន្ទាយដែក Posted: 08 Mar 2011 07:32 PM PST  រាជធានីភ្នំពេញ ៖ ព្រឹកពុធ ថ្ងៃទី៩ មីនា នេះសម្តេចតេជោនាយករដ្ឋមន្ត្រីហ៊ុន សែន បានអញ្ជើញជាអធិបតីក្នុងពិធីសម្ពោធបើកការដ្ឋានសាងសង់ចំណតរថយន្តកុងតឺន័រ (ផែ ស្ងួត) របស់កំពង់ផែស្វយ័តរាជធានីភ្នំពេញ ដែលមានទីតាំងស្ថិតនៅតាមបណ្តោយផ្លូវជាតិលេខ១ ក្នុងភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល ។ សូមបញ្ជាក់ថា ការសាងសង់ចំណតរថយន្តកុងតឺន័ររបស់កំពង់ផែស្វយ័តរាជធានីភ្នំពេញ នាពេលនេះ សាងសង់ឡើងក្រោមកម្ចីឥណទានពីប្រទេសចិនមានទឹកប្រាក់ចំនួន២៨,២២លានដុល្លារអាមេរិក នឹងត្រូវសាងសង់ប្រើរយៈពេល៣០ខែ ។ ចំពោះប្រសាសន៍សំខាន់ៗ របស់សម្តេចអគ្គមហាសេនាបតីតេជោហ៊ុន សែន កោះសន្តិភាពនឹងផ្សាយជូនលោកអ្នកនៅវេលាម៉ោងក្រោយៗជាបន្តបន្ទាប់ទៀត ៕  |
| ផ្ទះមួយខ្នងត្រូវគ្រោះអគ្គីភ័យឆាបឆេះអស់ម៉ដ្ឋគ្មានសល់តែមួយប៉ព្រិចភ្នែក Posted: 08 Mar 2011 07:23 PM PST រាជធានីភ្នំពេញ ៖ លំនៅឋានប្រជាពលរដ្ឋមួយខ្នងត្រូវអគ្គីភ័យឆាបឆេះអស់ម៉ដ្ឋទាំងស្រុងតែមួយប៉ព្រិចភ្នែកប៉ុណ្ណោះ នៅចំណុចភូមិព្រែកថ្មី សង្កាត់ព្រែកថ្មី ខណ្ឌមានជ័យ កាលពីវេលាម៉ោង៤និង១០នាទីល្ងាចថ្ងៃទី៨ មីនា ២០១១ ។ ម្ចាស់លំនៅឋានខាងលើនេះ ឈ្មោះហៃ រដ្ឋា ភេទប្រុស អាយុ៣១ឆ្នាំ មុខរបរជាកសិករដាំបន្លែ ។ តាមប្រភពព័ត៌មានទាក់ទិននឹងគ្រោះមហន្តរាយខាងលើនេះ បានឱ្យដឹងថា អគ្គីភ័យបង្កឡើងបណ្តាលមកពីទុស្សេចរន្តអគ្គិសនី ហើយទ្រព្យសម្បត្តិក្នុងផ្ទះទាំងប៉ុន្មានត្រូវក្លាយជាចំណីអគ្គីភ័យទាំងស្រុងតែម្តង ។ សូមបញ្ជាក់ថា លំនៅឋានខាងលើនេះធ្វើអំពីឈើប្រក់ក្បឿងមានទំហំទទឹង៥ម៉ែត្រ និងបណ្តោយ៨ម៉ែត្រ ។ ក្នុងហេតុការណ៍គ្រោះអាសន្នខាងលើនេះប្រជាពលរដ្ឋបាននាំគ្នាដួសទឹកតាមផ្ទះជួយជះពន្លត់អណ្តាតភ្លើងក្រាបទៅវិញខ្លះ ហើយបន្តិចក្រោយមកទើបរថយន្តពន្លត់អគ្គីភ័យ២គ្រឿងមកដល់បាញ់ពន្លត់បន្ថែមទៀត បណ្តាលឱ្យអណ្តាតភ្លើងរលត់សូន្យសុងពុំឆាបឆេះដល់លំនៅឋានផ្សេងៗទៀតឡើយ ៕  |
| តុលាការក្រុងប៉ារីសលើកពេលកាត់ទោសអតីតប្រធានាធិបតីលោកហ្សាក់ ស៊ីរ៉ាក់ Posted: 08 Mar 2011 07:14 PM PST  តុលាការឧក្រិដ្ឋកម្មក្រុងប៉ារីស ប្រទេសបារាំង បានប្រកាសកាលពីថ្ងៃទី៨ មីនា ថា ខ្លួននឹងលើកពេលការកាត់ទោសអតីតប្រធានាធិបតីបារាំង លោកហ្សាក់ស៊ីរ៉ាក់ ទៅខែមិថុនា ខាងមុខ ដោយទុកពេល២ខែ ដើម្បីសម្រេចថា តើលោកហ្សាក់ស៊ីរ៉ាក់ មានទោសកំហុស តាមការចោទប្រកាន់ ឬក៏អត់ តាំងពីឆ្នាំ១៩៩០មក ។ លោកហ្សាក់ ស៊ីរ៉ាក់ អាយុ៧៨ឆ្នាំ ត្រូវបានចោទប្រកាន់ពីបទពុករលួយ និងពីបទបង្កើតការងារក្លែងក្លាយ និងប្រើប្រាស់ថវិការដ្ឋមិនត្រឹមត្រូវនៅពេលលោកកាន់តំណែងជាអភិបាលក្រុងប៉ារីស នៅឆ្នាំ១៩៩០ ។ រដ្ឋអាជ្ញាសាធារណៈបានដាក់ពាក្យបណ្តឹងប្តឹងលោកហ្សាក់ស៊ីរ៉ាក់ ក្រោយពីលោកហ្សាក់ស៊ីរ៉ាក់ បាត់បង់អភ័យឯកសិទ្ធិជាប្រធានាធិបតីបារាំង កាលពីឆ្នាំ២០០៧ កន្លងមក ធ្វើឱ្យលោកក្លាយជាអតីតប្រធានាធិបតីបារាំងដំបូងគេ ស្ថិតក្រោមការស៊ើបអង្កេតចាប់តាំងពីមេដឹកនាំបារាំង លោក Marshal Philippe Petain ត្រូវបានកាត់ទោសពីបទក្បត់ជាតិ ក្រោយសង្គ្រាមលោកលើកទី២មក ។ យោងតាមការសន្និដ្ឋាននៃការបើកសវនាការកាលពីខែតុលា ឆ្នាំ២០១០ កន្លងមក បទចោទប្រកាន់ករណីទី១ពាក់ព័ន្ធជាមួយបុគ្គលិកជាប់កិច្ចសន្យាជាមួយសាលាក្រុងប៉ារីស២១នាក់ ហើយលោកហ្សាក់ ស៊ីរ៉ាក់ ក៏ត្រូវចោទប្រកាន់ពីបទកិបកេងប្រាក់ និងពីបទរំលោភបំពានការទុកចិត្តដែរ ។ លោកស៊ីរ៉ាក់ ថ្លែងថា រូបលោកនឹងបង្ហាញខ្លួនក្នុងតុលាការ បើទោះបីជាលោកមានបញ្ហាសុខភាពក៏ដោយ ។ តាមច្បាប់របស់ប្រទេសបារាំង ប្រសិនបើត្រូវកាត់ឱ្យជាប់ទោស លោកស៊ីរ៉ាក់ ប្រឈមមុខនឹងទោសជាប់ពន្ធនាគាររយៈពេល១០ឆ្នាំ និងពិន័យជាប្រាក់១៥០.០០០អឺរ៉ូ ប្រហែល២១០.២៨០ដុល្លារអាមeរិក ។ លោកហ្សាក់ ស៊ីរ៉ាក់ ជាឥស្សរជននយោបាយដ៏មានប្រជាប្រិយភាពបំផុតមួយរូបរបស់ប្រទេសបារាំង ហើយកាន់តំណែងជាអភិបាលក្រុងប៉ារីសចាប់ពីឆ្នាំ១៩៧៧ ដល់ឆ្នាំ ១៩៩៥ ហើយជាប់ពាក់ព័ន្ធជាមួយរឿងអាស្រូវពុករលួយ ប៉ុន្តែលោកមិនដែលទទួលការកាត់ទោសដោយសារលោកបានក្លាយជាប្រធានាធិបតីចាប់ពីឆ្នាំ១៩៩៥ ដល់ឆ្នាំ២០០៧ ៕  |
| កងកម្លាំងរបស់លោកកាដាហ្វីបន្តការវាយបកលើទីក្រុងទាំងឡាយកាន់កាប់ដោយពួកបះបោរ Posted: 08 Mar 2011 07:09 PM PST  ការវាយប្រហារប្រឆាំងពួកបះបោររបស់កងកម្លាំងលោកកាដាហ្វីបានបន្តទៀតកាលពីថ្ងៃទី៨ មីនា នៅភាគខាងកើតប្រទេស ព្រមទាំងនៅទីក្រុង ZAOUIAH ភាគខាងលិចក្រុងទ្រីប៉ូលី។  |
| តុលាការក្រុងគែរសម្រេចរក្សាការផ្អិបទុកទ្រព្យសម្បត្តិបរស់លោកមូបារ៉ាក់ Posted: 08 Mar 2011 07:04 PM PST  តុលាការឧក្រិដ្ឋកម្មក្រុងគែររបស់អេហ្ស៊ីប កាលពីថ្ងៃទី៨ មីនា បានសម្រេចតម្កល់ការផ្អិបទុកទ្រព្យសម្បត្តិរបស់លោកហូស្នី មូបារ៉ាក់ អតីតប្រធានាធិបតីអេហ្ស៊ីប និងតម្កល់ទុកការហាមប្រាមលើការធ្វើដំណើរប្រឆាំងលោកមូបារ៉ាក់ ខណៈពេលប្រទេសអេហ្ស៊ីបធ្វើដំណើរឆ្ពោះទៅរកការជម្រុញឱ្យមានការចោទប្រកាន់ពីបទពុករលួយប្រឆាំងមេដឹកនាំដែលត្រូវបណ្តេញចេញពីតំណែងរូបនេះ ។ មេធាវីរបស់លោកមូបារ៉ាក់ លោក Samir Shishtaaci និយាយថា លោកនឹងប្តឹងឧទ្ធរណ៍ប្រឆាំងការសម្រេចនេះ ។ តាមប្រភពព័ត៌មានថា តុលាការកំពូលរបស់អេហ្ស៊ីប ពេលនេះ កំពុងពិចារណាមើលពីការលុបចោលឋានៈសម្ងាត់ដែលការពារលោកមូបារ៉ាក់ ។ លោកហូស្នី មូបារ៉ាក់ ដែលត្រូវបានបណ្តេញចេញពីតំណែងកាលពីខែកុម្ភៈកន្លងមក ត្រូវគេជឿថា កំពុងរស់នៅក្នុងនិវេសនដ្ឋានរបស់លោកនៅទីក្រុងរមណីយដ្ឋានជាប់សមុទ្រក្រហម Sharm el sheikh រួចកំពុងប្រឈមមុខនឹងការចាប់ខ្លួនយកមកសួរចម្លើយ ក្នុងករណីចោទប្រកាន់ពីបទពុករលួយ។ អគ្គមេធាវី លោក Abdel Maguid Mahmoud បានចេញបញ្ជាឱ្យផ្អិបទុកទ្រព្យសម្បត្តិរបស់លោកមូបារ៉ាក់ និងគ្រួសាររបស់លោកកាលពីថ្ងៃទី២៨ កុម្ភៈ កន្លងមក និងហាមលោកមិនឱ្យចាកចេញពីប្រទេស ។  |
| ឈើគ្រញូង៣៣កំណាត់ស្មើ៧៦០គីឡូក្រាមចាប់បាននៅផ្លូវជាតិលេខ៥ Posted: 08 Mar 2011 06:57 PM PST   ខេត្តកំពង់ស្ពឺ ៖ ឈើគ្រញូងចំនួន៣៣កំណាត់មានទំងន់៧៦០គីឡូក្រាម ស្មើនឹង០,៥៨៤ម៉ែត្រគូប ដែលដឹកតាមរថយន្តកាមរី ស៊េរី៩២ ពណ៌ស្លែមួយគ្រឿងបានត្រូវរដ្ឋបាលព្រៃឈើសង្កាត់ឧដុង្គ សហការជាមួយផ្នែករដ្ឋបាលព្រៃឈើកំពង់ស្ពឺ និងកងរាជអាវុធហត្ថស្នាក់ការសន្តិសុខ៥៥១ ចាប់បាននៅវេលាម៉ោង៨និង៣០នាទីព្រឹក ថ្ងៃទី៧ មីនា នៅតាមផ្លូវជាតិលេខ៥ ចំណុចភូមិស្រះកែវ ឃុំវត្តចាស់ ស្រុកឧដុង្គ ។ ឈើគ្រញូងនេះត្រូវបានគេដឹកចេញមកពីតំបន់មួយក្នុងស្រុកក្រគរ ខេត្តពោធិ៍សាត់ ឆ្ពោះចូលទៅរាជធានីភ្នំពេញ ។ ប្រធានសង្កាត់រដ្ឋបាលព្រៃឈើឧដុង្គ លោកឌុច វ៉ាន់ឌី និងប្រធានស្នាក់ការសន្តិសុខ៥៥១ លោកអ៊ឹម ភ័ណ្ឌ បានឱ្យដឹងថា រថយន្តកាមរី ស៊េរី៩២ ពណ៌ស្លែ មួយគ្រឿង ពាក់ស្លាកលេខបាត់ដំបង 2A-0151 ផ្ទុកឈើគ្រញូងចំនួន៣៣កំណាត់ ត្រូវបានកម្លាំងសង្កាត់រដ្ឋបាលព្រៃឈើឧដុង្គ សហការជាមួយកងរាជអាវុធហត្ថស្នាក់ការសន្តិសុខ៥៥១ ស្ទាក់ចាប់បានយ៉ាងប្រផិតប្រផើយបំផុត ។ រថយន្តពណ៌ស្លែនេះត្រូវបានចាប់បញ្ជូនទៅសង្កាត់រដ្ឋបាលព្រៃឈើឧដុង្គ ដើម្បីត្រួតពិនិត្យហើយទាំងឈើ ទាំងរថយន្តត្រូវបានរក្សាទុកបណ្តោះអាសន្ននៅទីនោះ។ លោកឌុច វ៉ាន់ឌី ថ្លែងថា ការដឹកឈើនេះពួកគេពុំខ្លាចមេព្រៃទេ ទោះបីជាឃាត់បែបណាក៏នៅតែពុំព្រមឈប់ឱ្យធ្វើការត្រួតពិនិត្យត្រឹមត្រូវដែរ តែដោយមានកិច្ចសហការជាមួយកងរាជអាវុធហត្ថស្នាក់ការ៥៥១ ជួយអន្តរាគមន៍គ្រប់សភាពការណ៍ ទើបទប់ស្កាត់បានខ្លះៗ និងមួយចំនួនក៏មានការឆែកឆេរផងដែរ ។ លោកបញ្ជាក់ថា នេះជាការចាប់បានលើកទី២ ដែលកាលពីប៉ុន្មានថ្ងៃមុនក៏ចាប់បានរថយន្ត និងឈើមួយចំនួនដែរ តែជនល្មើសគេចខ្លួនរួច ៕  |
| ពិធីបុណ្យតន្ត្រីឆ្នេរកែបរៀបចំដោយជនបរទេស Posted: 08 Mar 2011 06:30 PM PST     ខេត្តកំពត ៖ ជនជាតិបរទេសជាច្រើននាក់បានចូលរួមក្នុងពិធីបុណ្យមួយដែលគេសរសេរថា «បុណ្យតន្ត្រីឆ្នេរកែប»។ ពិធីបុណ្យនេះគេបានប្រារព្ធកាលពីរសៀលថ្ងៃទី៥ មីនា នៅឆ្នេរកែប ។ អ្នកសង្កេតការណ៍បានមើលឃើញថា អ្នកចូលរួមបុណ្យតន្ត្រីឆ្នេរកែបនេះភាគច្រើន គឺជនជាតិបរទេស ហើយនៅរសៀលនោះគេមិនឃើញវត្តមានមន្ត្រីផ្លូវការណាមួយចូលរួមទេ ។ មន្ត្រីផ្នែកទេសចរណ៍គួរតែចូលរួមជួយលើកទឹកចិត្តដល់អ្នកផ្តើមបុណ្យបែបនេះ ផ្ទុយទៅវិញមានតែក្រុមតន្ត្រី និងព្រះសង្ឃសូត្រមន្តប្រោះព្រំទឹកមន្តដល់ជនជាតិបរទេសប្រុស ស្រីដែលអង្គុយនៅលើឆ្នេរខ្សាច់កែបប៉ុណ្ណោះ។ លោកអាចារ្យដែលចេះភាសាបរទេសបាននិយាយថា ពិធីបុណ្យតន្ត្រីឆ្នេរកែបនេះ គឺជនបរទេសទាំងអស់ដែលជាម្ចាស់ផ្ទះសំណាក់បានរួមគ្នាធ្វើឡើងឱ្យឈ្មោះថា បុណ្យតន្ត្រីឆ្នេរកែប។ លោកគ្រូអាចារ្យនិយាយថា បុណ្យនេះពួកគេចង់បង្ហាញថា ខេត្តកែបគឺជាខេត្តមួយសំបូរទៅ ដោយរមណីយដ្ឋាន និងកន្លែងកំសាន្តនានាមានសភាពស្ងៀមស្ងាត់ និងមួយផ្នែកទៀតពួកគេអាចទាក់ទាញអ្នកទេសចរបរទេសឱ្យកាន់តែច្រើនមកកំសាន្តឆ្នេរកែបប្រទេសកម្ពុជាតាមការ ផ្សាយនេះ។ លោកស្រី ជា យាន់ដាន់ ជាជនបរទេស និងជាម្ចាស់ផ្ទះសំណាក់ឆ្នេរបានប្រាប់កោះសន្តិភាពថា នេះជាលើកទី១ហើយដែលមានការរួមគ្នាធ្វើពិធីបុណ្យនៅជាប់ឆ្នេរកែបនេះ។ ការធ្វើបុណ្យនេះបង្ហាញប្រាប់អ្នកទេសចរផ្សេងៗឱ្យមកចូលរួម ម្យ៉ាងវិញទៀតបង្ហាញពីភាពសប្បាយរីករាយរបស់ពួកគេដែលបញ្ជាក់ថា ខេត្តកែបមានសន្តិសុខល្អ។ លោកស្រីជាយាន់ដាន់ និយាយថា ពិធីបុណ្យនេះចំណាយលុយអស់ច្រើន ប៉ុន្តែនេះជាមុខមាត់របស់ខេត្តកែបដែរ។  |
| វ៉ាឌី ភាលីង ពិធីការិនី បង្ហាញមុខលើវេទិកាតន្ត្រី បន្ទាប់ពីវះកាត់កែច្រមុះ Posted: 08 Mar 2011 06:19 PM PST   រាជធានីភ្នំពេញ ៖ កញ្ញាវ៉ាឌី ភាលីង ក្នុងវ័យ១៩ឆ្នាំ ជាកញ្ញាឯកលេខ២ កម្មវិធីយុវតារា ឆ្នាំ២០០៧របស់ស្ថានីយទូរទស្សន៍បាយ័ន ។ ក្រោយមកនាងក្លាយជាតារាសម្តែងកាយវិការខារ៉ាអូខេ និងជាអ្នកចម្រៀងកិត្តិយសតាមកម្មវិធីប្រគំតន្ត្រីរបស់ស្ថានីយទូរទស្សន៍នានា ។ ក្នុងឆ្នាំ២០១១នេះ ក្រោយពីវះកាត់កែច្រមុះរួចរាល់នាងបានពង្រីកអាជីពមួយទៀតធ្វើជាពិធីការិនីក្នុងកម្មវិធីតន្ត្រីយុវវ័យរីករាយរបស់ស្ថានីយទូរទស្សន៍អប្សរា ប៉ុសិ៍្តលេខ១១ដែលផ្សាយផ្ទាល់រាល់ល្ងាចថ្ងៃអាទិត្យ ។តាមការកត់សំគាល់កញ្ញាវ៉ាឌី ភាលីង ក្រោយពីវះកាត់ធ្វើច្រមុះឱ្យមានក្តោង និង ចុងស្រួចមកកាន់តែ មានរូបសម្ផស្សស្រស់ ស្អាតថែមទៀតទៀត ។ នាងរំលឹកឱ្យដឹងថា ចាប់តាំងពីនាងឈានជើងចូលប្រឡូកក្នុងវិស័យសិល្បៈតាមរយៈការប្រឡងប្រជែងក្នុងកម្ម វិធីយុវតារានៅឆ្នាំ២០០៧មក នាងធ្លាប់ចូល រួមសម្តែងកាយវិការខារ៉ាអូខេឱ្យផលិតកម្ម ជាច្រើនទាំងក្នុង និងក្រៅប្រទេស ។ ជាមួយ គ្នានេះដែរ នាងធ្លាប់ចូលរួមសម្តែងរឿងភាគ ឱ្យស្ថានីយទូរទស្សន៍បាយ័ន២រឿងគឺរឿង «ភូមិខ្ញុំស្រស់ឆើតឆាយ» និងរឿង «ដឹងទេថា ខ្ញុំនៅរង់ចាំអ្នក» ។ ក្នុងឆ្នាំ២០១១នេះនាងបានចូលរួមសម្តែងក្នុងរឿង «នាងឈូកស» ដែល កំពុងចាក់ផ្សាយតាមកញ្ចក់ទូរទស្សន៍ប៉ុសិ៍្តលេខ៥រាល់សបា្តហ៍ ។ កញ្ញាវ៉ាឌី ភាលីង ក្រៅពីមានការគាំទ្រពីសំណាក់ប្រិយមិត្តទស្សនិកជននៅក្នុងប្រទេស កន្លងមក ក៏មានការគាំទ្រពីបងប្អូនខ្មែរដែលរស់នៅឯក្រៅប្រទេសផងដែរ ។ ដូចនេះហើយកន្លងមក នាងធ្លាប់ចេញទៅបង្ហាញទេពកោសល្យ និងទឹកដមសម្លេងយ៉ាងពីរោះរណ្តំចិត្តជូនបងប្អូនខ្មែរដែលរស់នៅប្រទេសបារាំងកាលពីឆ្នាំ២០១០ ផងដែរ ។ ចំពោះរឿងស្នេហាវិញ កញ្ញាវ៉ាឌី ភាលីងនិយាយថា ថ្វីបើនាងទទួលជោគ ជ័យលើអាជីពសិល្បៈមែន តែជីវិតស្នេហា របស់នាងបានបរាជ័យដោយគូសង្សាររបស់ នាង និងរូបនាងបានចែកផ្លូវគ្នាដើររយៈពេល២ឆ្នាំមកហើយ ។ ពេលនេះបេះដូងរបស់ នាងនៅទំនេរ ៕  |
| ដឹកលើសទម្ងន់ឡើងចំណោតមិនរួចក្រឡាប់បះជើង Posted: 08 Mar 2011 06:13 PM PST    ខេត្តកណ្តាល ៖ រថយន្តមួយគ្រឿងដឹកខ្សែកាបធ្ងន់លើសចំណុះ ខណៈពេលព្យាយាមបើកឡើងចំណោតមិនរួចក៏រអិលថយក្រោយក្រឡាប់ផ្ញារជើងទ្រមេឃសង្កត់ម៉ូតូដែលជិះពីក្រោយ ប៉ុន្តែសំណាងល្អម្ចាស់ម៉ូតូគ្រាន់តែរងរបួសស្រាល។ អ្នកបើកបររថយន្តដែលរងរបួសស្រាល ក្រោយកើតហេតុបានគេចខ្លួនបាត់។ ហេតុការណ៍ក្រឡាប់រថយន្តជើងទ្រមេឃកើតឡើងកាលពីវេលាម៉ោង២និង៥០រសៀល ថ្ងៃទី៧ មីនា នៅក្នុងព្រែកវត្តកោះខែល ភូមិកោះខែល ឃុំកោះខែល ស្រុកស្អាង។ រថយន្តនោះម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3B-3003 ដឹកដុំកងខ្សែកាបដែលនៅក្បាលរថយន្តបិទឡូហ្គោ HUY ជាសញ្ញាសំគាល់របស់ក្រុមហ៊ុន។ សាក្សីនៅកន្លែងកើតហេតុឱ្យដឹងថា រថយន្តបើកពីត្បូងទៅជើង គឺពីស្រុកកោះធំសំដៅទៅភ្នំពេញ លើផ្លូវជាតិលេខ២១B ដឹកដុំកងខ្សែកាប។ ពេលទៅដល់ស្ពានលេខ២៧ រថយន្តបើកតាមផ្លូវវាង ព្រោះស្ពានកំពុងធ្វើថ្មី ហើយឡើងចំណោតព្រែកមិនរួចក៏រអិលថយក្រោយមកវិញក្រឡាប់តែម្តង។ សាក្សីបន្តទៀតថា ស្របពេលនោះបុរសម្នាក់បើកម៉ូតូម៉ាកស្មាស់រេវ៉ូ ពណ៌ខ្មៅ ស៊េរីឆ្នាំ២០០៥ ពីក្រោយ ពេលឃើញសភាពការណ៍មិនស្រួលបានផ្តួលម៉ូតូចោលរួចផុតពីគ្រោះថ្នាក់។ រថយន្តនោះបានក្រឡាប់សង្កត់លើម៉ូតូកៀបជាប់បណ្តាលឱ្យក្រពឹតខូចខាតស្ទើរទាំងស្រុង។ ម្ចាស់ម៉ូតូភ័យព្រលឹងចុងសក់ ព្រោះរថយន្តក្រឡាប់ស្ទើរតែសង្កត់ខ្លួនជាមួយម៉ូតូដែរ គឺបានគេចផុតតែបន្តិចប៉ុណ្ណោះ។ ម្ចាស់ម៉ូតូឈ្មោះអ៊ឹម វ៉ូចនា ភេទប្រុស អាយុ២៧ឆ្នាំ រស់នៅភូមិក្រពើហា សង្កាត់ព្រែកប្ញស្សី ក្រុងតាខ្មៅ រងរបួសស្រាល។ ចំណែករថយន្តនោះខូចខាតក្រពឹតទ្រុង និងផ្នែកខាងមុខ។ តំណាងម្ចាស់រថយន្តបានចេញមុខដោះស្រាយជាមួយម្ចាស់ម៉ូតូគឺសង២០០ដុល្លារ ដើម្បីបញ្ចប់រឿង៕  |
| Posted: 08 Mar 2011 06:09 PM PST រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានព្រមានថា «លោករដ្ឋមន្ត្រីក្រសួង ស្ថាប័ននានាកុំឱ្យមានស្ថានភាពប្តីស័ក្តិបី ប្រពន្ធស័ក្តិ៤ កូនស័ក្តិ៥។ ខ្ញុំបានស្តាប់ឮនូវការត្អូញត្អែរពីក្រសួងខ្លះ ដោយសារប្រពន្ធចូលទៅលូកដៃជ្រៅពេកក្នុងក្រសួង» ។ សម្តេចតេជោនាយករដ្ឋមន្ត្រីបានព្រមានបែបនេះកាលពីរសៀលថ្ងៃទី៧ ខែមីនា នៅវិមានសន្តិភាពទីស្តីការនាយករដ្ឋមន្ត្រីក្នុងឱកាសប្រារព្ធពិធីអបអរសាទរទិវាអន្តរជាតិនារី៨ មីនា ឆ្នាំ២០១១ ខួបលើកទី១០០។ សម្តេចតេជោនាយករដ្ឋមន្ត្រីមានប្រសាសន៍ថា ខ្ញុំសូមស្នើឱ្យលោករដ្ឋមន្ត្រីនានាផ្អាកប្រពន្ធឱ្យសំរាកនៅឯផ្ទះទៅ នៅត្រឹមតែផ្ទះបានហើយ កុំទៅជ្រុលហួស។ គេស្អប់ប្តីដោយសារប្រពន្ធទៅលូកដៃទៅធ្វើរដ្ឋមន្ត្រីស្អីគេដែរ។ បើមិនដូច្នេះទេ អស់លោកសាកល្បងលមើល ប្រថុយទៀតលមើល។ មន្ត្រីរាជការនៅក្រោមឱវាទគេរអ៊ូរទាំរហូតឮចូលត្រចៀកខ្ញុំខ្លាំងជ្រុល។ បញ្ហាមកពីប្រពន្ធរបស់អស់លោកជាអ្នកបង្កើត ខ្ញុំសូមផ្តាំទុកឱ្យហើយ! ឥឡូវមានកន្លែងខ្លះ គឺស្ថាប័ននោះក្លាយទៅជាកន្លែងចាត់ការរបស់ប្រពន្ធនៅកន្លែងហ្នឹងសូមដកខ្លួនថយទៅមិនមែនជារឿងរបស់លោកជំទាវទេ ។ លោកជំទាវដើរតួនាទីជួយប្តីបាន តែកុំចាត់ចែងលើការងាររបស់ប្តីនៅក្រសួង។ សម្តេចបន្តថា មិនមែនអស់លោក លោកជំទាវធ្វើអ្វីខ្ញុំមិនដឹងនោះទេ ថ្ងៃនេះខ្ញុំត្រូវនិយាយ ព្រោះមានមនុស្សមួយចំនួនបានបង្ហាញពីការត្អូញត្អែរ ប្តីផងប្រពន្ធផង កូននោះផង ត្រួតត្រានៅក្នុងក្រសួងដូច្នេះល្មមដកខ្លួនចេញទៅបាន សម្តេចថ្លែងថា ជួនកាលគេ«បាទ»នៅទល់មុខហ្នឹង ប៉ុន្តែគេ«បាទ» មិនមែន«បាទ»ដោយក្តីគោរពស្រឡាញ់យើងទេ«បាទ» ទាំងទើសទាល់ ដល់ក្រោយខ្នងគេជេរបញ្ជូនថែមទៀតផង។ និយាយត្រង់ៗតែម្តង។ ទិវាបុណ្យខួបនារីត្រូវនិយាយលើកនារី ប៉ុន្តែក៏មាននារីខ្លះត្រូវតែនិយាយផងដែរ និយាយឱ្យហើយ ព្រោះក្រែងលោថ្ងៃក្រោយមិនបានមកកន្លែងហ្នឹងទៀត ព្រោះពេលណាមហាជនគេស្រែកច្រើនពេកខ្ញុំក៏ត្រូវបង្ខំចិត្តដែរ បង្ខំចិត្តឡើងជ្រញ់ដកពីតំណែងដែរ ករណីហ្នឹង។ សម្តេចតេជោនាយករដ្ឋមន្ត្រីបានលើកឡើងពីករណីប្រពន្ធលោករដ្ឋមន្ត្រីថា សូមជួយប្តីក្នុងការងារ តែកុំឱ្យចាត់ចែងទៅលើស្ថាប័ននោះ។មានកន្លែងខ្លះជេរគេតែម្តង ជេរគេតាំងពីអ្នកបើកបររថយន្ត។ មិនមែនធម្មតាទេ ព័ត៌មានច្រើនណាស់ យកមន្ត្រីបុគ្គលិកទៅបំរើការនៅឯផ្ទះ។ លើកកំរិតសមត្ថភាពស្ត្រីឱ្យខ្ពស់ឡើង ក៏ប៉ុន្តែលើកកុំឱ្យទៅខុសជំនាញ ខុសមុខងារ រហូតទៅដល់លូកដៃចាត់ចែងការងាររបស់ប្តីនោះទេ។ សុំផ្តាំផ្ញើប៉ុណ្ណឹង ជាប្រធានស្ថាប័ននីតិប្រតិបត្តិត្រូវតែនិយាយ បើយើងមិននិយាយទុកឱ្យមន្ត្រី ខុសថ្ងៃក្រោយ។ បើមិនជឿហៅប្រាំនាក់ចូលបន្ទប់ម្តង សួរលមើលចេញអស់រលីង។ រឿងនេះវាអាចប៉ះពាល់មនុស្សមួយចំនួនទៀត ក៏ប៉ុន្តែវាក៏ត្រូវចិត្តមនុស្សមួយចំនួនធំដែរ ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
