Koh Santipheap Daily |
- ខ្មាន់កាំភ្លើងបើកការវាយប្រហារបន្តបន្ទាប់នៅក្រុងការ៉ាជីប៉ាគីស្ថានស្លាប់7នាក់
- ឆេះក្លឹបកំសាន្តមួយនៅតៃវ៉ាន់ស្លាប់9នាក់
- និស្សិតម្នាក់បើករថយន្តបុកគ្នាជាមួយម៉ូតូស្លាប់ម្នាក់ របួសធ្ងន់២នាក់
- 7នាក់ត្រូវចាប់ខ្លួនពីបទជួញដូរគ្រឿងញៀនដកហូតម៉ាទឹកកក39កញ្ចប់
- និស្សិតស្រីអាយុ20ឆ្នាំធ្វើប្រមុខប៉ូលិសក្រុងម៉ិចស៊ិកមួយរត់ទៅអាមេរិក
- រថយន្តបឺសពន្លះជាមួយកាំមីញ៉ុងនៅភាគខាងត្បូងប្រេស៊ីលស្លាប់26នាក់
- កងកម្លាំងលោកកាដាហ្វី ប៉ងវាយដណ្តើមយកក្រុង ZAOUIAH ពួកបះបោររុលទៅទិសខាងលិច
- អារ៉ាប៊ីសាអូឌីតព្រមានថា ខ្លួននឹងមិនអត់ឱនដល់បាតុកម្ម
- ប្រទេសរុស្ស៊ីជ្រើសរើសបានបវរកញ្ញាប្រចាំឆ្នាំ2011
- នាយករដ្ឋមន្ត្រីឡាវនឹងបំពេញទស្សនកិច្ចរយៈពេល២ថ្ងៃនៅកម្ពុជាទី៧ ដល់៨ មីនា
- ក្លឹបអ្នកកាសែតកម្ពុជានឹងរៀបចំវេទិកាតុមូលស្តីពីសារព័ត៌មាន និងតួនាទីលើកកម្ពស់សិទ្ធិមនុស្ស
- បាញ់៧គ្រាប់ប្លន់លុយពីជនជាតិចិនយកអស់៤ពាន់ដុល្លារ ខណៈទើបឈ្នះ ល្បែង
- បង្ក្រាបក្រុមចែកចាយគ្រឿងញៀនបាន៤នាក់
- សាលាខណ្ឌដូនពេញចុះបិទការដ្ឋានសំណង់សង្ស័យបង្កអគ្គីភ័យឆេះផ្ទះពីរល្វែង
- ថ្ងៃអាទិត្យជាថ្ងៃណាត់ជួបជុំ ក្រុមអ្នកបញ្ជល់មាន់នៅឯកភ្នំ សង្វៀន៣កន្លែងម្ចាស់តែមួយ
- នាងក្រមុំបត់ជើងក្នុងព្រៃកៅស៊ូ បុរសកំហូចឃើញផ្ទុះកាមតណ្ហា ស្ទុះទៅចាប់នាងប៉ុនប៉ងរំលោភ
- ទាហានប៊ូរុនឌីជាង40នាក់ ស្លាប់នៅសូម៉ាលី
- ប្រធានាធិបតីយេម៉ែនអះអាងថា នឹងបន្តតំណែងរហូតដល់ឆ្នាំ2013
- បារាំងនឹងទទួលស្គាល់រដ្ឋប៉ាឡេស្ទីនមួយក្នុងខែកញ្ញា
- ពលការិនីម្នាក់ទៀតដេកស្លាប់ក្នុងក្រុមហ៊ុនធី & ភី ទីដែលពលការិនីមុនលោតពី លើអគារបាក់ជើងទាំង២
| ខ្មាន់កាំភ្លើងបើកការវាយប្រហារបន្តបន្ទាប់នៅក្រុងការ៉ាជីប៉ាគីស្ថានស្លាប់7នាក់ Posted: 05 Mar 2011 11:16 PM PST  ប៉ូលិស៥នាក់បានត្រូវស្លាប់ និង២នាក់ទៀតរងរបួសនៅពេលខ្មាន់កាំភ្លើងមិនស្គាល់អត្តសញ្ញាណបើកការវាយប្រហារកាលពីយប់ថ្ងៃទី៥ មីនា កន្លងមក ប្រឆាំងមជ្ឈមណ្ឌលហ្វឹកហ្វឺនប៉ូលិសនៅក្នុងទីក្រុងកំពង់ផែការ៉ាជី ភាគខាងត្បូង ប្រទេសប៉ាគីស្ថាន ។ ទីភ្នាក់ងារព័ត៌មានក្នុងស្រុកមួយរាយការណ៍ថា ការវាយប្រហារនោះកើតឡើងនៅវេលាម៉ោង១១និង៣០នាទីម៉ោងក្នុងស្រុកនៅតំបន់ប្រជុំជន Baldia ដោយខ្មាន់កាំភ្លើងបានបាញ់រះទៅលើប៉ូលិសបន្ទាប់មករត់គេចខ្លួនពីកន្លែងកើតហេតុ ។  |
| ឆេះក្លឹបកំសាន្តមួយនៅតៃវ៉ាន់ស្លាប់9នាក់ Posted: 05 Mar 2011 11:16 PM PST មនុស្សយ៉ាងហោចណាស់៩នាក់បានស្លាប់ បាត់បង់ជីវិត និង១១នាក់ទៀតរងរបួសនៅក្នុងគ្រោះអគ្គីភ័យឆេះក្លឹបកំសាន្តមួយនៅក្នុងទីក្រុងតៃជុង កោះតៃវ៉ាន់ កាលពីព្រឹកថ្ងៃទី៦ មីនា ។ មន្ត្រីនានានិយាយថា មូលហេតុនៃការកើតគ្រោះអគ្គីភ័យនេះពាក់ព័ន្ធជាមួយនឹងការសម្តែងក្នុងក្លឹបនោះ ដែលបង្កឱ្យទុស្សេខ្សែភ្លើង ។ គ្រោះអគ្គីភ័យត្រូវបានពន្លត់ភ្លាមៗ ហើយសពជនរងគ្រោះត្រូវបានរកឃើញនៅតាមជាន់នានានៃអគារក្លឹបកំសាន្តនោះ ។ ទាក់ទិនទៅនឹងគ្រោះអគ្គីភ័យនេះមនុស្ស២នាក់ត្រូវបានចាប់សួរចម្លើយ ៕  |
| និស្សិតម្នាក់បើករថយន្តបុកគ្នាជាមួយម៉ូតូស្លាប់ម្នាក់ របួសធ្ងន់២នាក់ Posted: 05 Mar 2011 11:10 PM PST     រាជធានីភ្នំពេញ ៖ មនុស្សម្នាក់បានស្លាប់ បាត់បង់ជីវិតភ្លាមៗនៅនឹងកន្លែង ហើយ២នាក់ផ្សេងទៀតបានរងរបួសធ្ងន់ធ្ងរ ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយដែលបានកើតឡើងនៅចំណុចផ្លូវលេខ១៦៣ កែងនឹងលេខ៣៥០ សង្កាត់បឹងកេងកងទី៣ ខណ្ឌចំការមន កាលពីវេលាម៉ោង១០និង៤០នាទីយប់ថ្ងៃទី៥ មីនា ២០១១ ។ ឧប្បត្តិហេតុនៃគ្រោះថ្នាក់ចរាចរណ៍ខាងលើបង្កឡើងដោយសាររថយន្តម៉ាកកាមរី ពណ៌ស ពាក់ស្លាកលេខ ភ្នំពេញ 2F-0317 បើកបរដោយឈ្មោះហ៊ី សាយ័នវីរៈ ភេទប្រុស អាយុ២៤ឆ្នាំ ជានិស្សិត ស្នាក់នៅបណ្តោះអាសន្នក្នុងសង្កាត់អូឡាំពិក ខណ្ឌចំការមន បានបុកជាមួយអ្នកជិះ ម៉ូតូមួយគ្រឿងឌុបគ្នា៣នាក់ បណ្តាលឱ្យអ្នកបើកបរម៉ូតូម្នាក់ដួលបោកក្បាលស្លាប់ភ្លាមៗនៅកន្លែងកើតហេតុ និង២នាក់ទៀតរងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យកាល់ម៉ែត។ តាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុ អ្នកបើកបររថយន្តខាងលើបានបើករថយន្តធ្វើដំណើរលើកំណាត់ផ្លូវលេខ១៦៣ ក្នុងទិសដៅពីជើងទៅត្បូង លុះដល់ចំណុចផ្លូវកែងលេខ៣៥០ ក៏វាក់ជាមួយអ្នកជិះ ម៉ូតូម៉ាកអាយខុន ពណ៌ផ្កាឈូក ដែលជិះឌុបគ្នា៣នាក់ បណ្តាលឱ្យអ្នកជិះម៉ូតូដួលបោកក្បាលស្លាប់ និងរបួសធ្ងន់ទាំងអស់គ្នា ។ ដោយឡែករថយន្តជ្រុលល្បឿនទៅបុករ៉ឺម៉កម៉ូតូដែលឈប់ចតស្ងៀមនៅចិញ្ចើមផ្លូវខាងឆ្វេង ហើយជ្រុលល្បឿនទៅបុកផ្ទះលេខ៤៣២ ក្បែរកន្លែងកើតហេតុនោះបណ្តាលឱ្យខូចខាតទ្វារផ្ទះអស់មួយចំហៀងទើបរថយន្តអស់ល្បឿនឈប់ស្ងៀមលែងទៅមុខរួច។ ក្រោយពេលកើតហេតុ សមត្ថកិច្ចជំនាញបានចុះទៅវាស់វែងស្ទូចយករថយន្តបង្កហេតុ និងម៉ូតូអ្នករងគ្រោះទៅរក្សាទុកនៅក្នុងការដ្ឋាននគរបាលរាជធានីភ្នំពេញ ដើម្បីចាត់ការតាមច្បាប់ ។ លើសពីនេះទៅទៀត សមត្ថកិច្ចក៏បានឃាត់ខ្លួនអ្នកបើកបររថយន្តបង្កឈ្មោះហ៊ី សាយ័នវីរៈ នាំទៅកាន់ការិយាល័យជំនាញដើម្បីចាត់ការតាមច្បាប់ផងដែរ ។ សូមបញ្ជាក់ថា អ្នកស្លាប់ក្នុងហេតុការណ៍គ្រោះថ្នាក់ចរាចរណ៍ខាងលើនេះឈ្មោះអេម សុភារុន អាយុ២២ឆ្នាំ មានស្រុកកំណើតនៅខេត្តកំពង់ធំ ហើយស្នាក់នៅបណ្តោះអាសន្នក្នុងរាជធានីភ្នំពេញ ។ ប៉ូលិសដែលចុះទៅពិនិត្យហេតុការណ៍ខាងលើនេះពុំទាន់បានដឹងថា ភាគីទាំងសងខាងក្នុងហេតុការណ៍គ្រោះថ្នាក់ចរាចរណ៍ធ្វើដំណើរចេញពីណាបំណងឆ្ពោះទៅណាឡើយ ទាំងកណ្តាលអធ្រាត្រដូច្នេះ ។ ប៉ុន្តែប៉ូលិសនិយាយថាភាគីទាំងសងខាងស្រវឹងស្រាដូចគ្នា ៕  |
| 7នាក់ត្រូវចាប់ខ្លួនពីបទជួញដូរគ្រឿងញៀនដកហូតម៉ាទឹកកក39កញ្ចប់ Posted: 05 Mar 2011 10:55 PM PST   រាជធានីភ្នំពេញ ៖ ជនសង្ស័យចំនួន៧នាក់ត្រូវបានចាប់ខ្លួនបន្តបន្ទាប់ពីបទជួញដូរគ្រឿងញៀននៅខណ្ឌប្ញស្សីកែវ និងខណ្ឌទួលគោក ក្នុងរវាងថ្ងៃទី៤ និងទី៥ មីនា ហើយក៏បានដកហូតម៉ាទឹកកកបានចំនួន៣៩កញ្ចប់ផងដែរ។  |
| និស្សិតស្រីអាយុ20ឆ្នាំធ្វើប្រមុខប៉ូលិសក្រុងម៉ិចស៊ិកមួយរត់ទៅអាមេរិក Posted: 05 Mar 2011 10:55 PM PST  នាង MARISOL VALLES និស្សិតស្រីម្នាក់ដែលត្រូវបានតែងតាំងជាប្រមុខប៉ូលិសក្រុង PRAXEDIS GUADALUPE GUER-RERO ជាទីក្រុងមួយមានប្រជាជន១០.០០០នាក់ ស្ថិតនៅភាគខាងកើតរដ្ឋ CHIHUAHUA កាលពីខែតុលាកន្លងមកនេះ ព្រោះតែគ្មាននរណាហ៊ានឈរឈ្មោះធ្វើប្រមុខប៉ូលិសទីក្រុងនេះទីបំផុតនាងបានសម្រេចសុំសិទ្ធិជ្រកកោននៅសហរដ្ឋអាមេរិក ក្រោយការគំរាមកំហែងនានាមក ។  |
| រថយន្តបឺសពន្លះជាមួយកាំមីញ៉ុងនៅភាគខាងត្បូងប្រេស៊ីលស្លាប់26នាក់ Posted: 05 Mar 2011 10:39 PM PST មន្ត្រីនានានិយាយថា រថយន្តបឺសដឹកអ្នកដំណើរមួយគ្រឿងបានបុកគ្នាជាមួយរថយន្តកាំមីញ៉ុងដែលដឹកឈើពេញមួយគ្រឿងនៅតំបន់ភាគខាងត្បូងប្រទេសប្រេស៊ីល កាលពីថ្ងៃទី៥ មីនា កន្លងមក បណ្តាលឱ្យស្លាប់មនុស្ស២៦នាក់ និង២១នាក់ទៀតរងរបួសដោយមួយចំនួនរបួសធ្ងន់ធ្ងរ ។ ប៉ូលិសនៅក្នុងរដ្ឋ Santa Catarina ភាគខាងត្បូងប្រទេសប្រេស៊ីលនិយាយថា រថយន្តបឺសធ្វើដំណើរពីត្បូងទៅជើងនៅលើដងផ្លូវមួយដោយរថយន្តបឺសនេះដឹកអ្នកដំណើរពេញទៅចូលរួមក្នុងព្រឹត្តិការណ៍មួយ ហើយរថយន្តកាំមីញ៉ុងនោះធ្វើដំណើរផ្ទុយគ្នាបានបុកគ្នាពេញទំហឹងលាន់ដូចរន្ទះ ។ ភាគច្រើននៃអ្នកស្លាប់ជាអ្នកធ្វើដំណើរតាមរថយន្តបឺស ។  |
| កងកម្លាំងលោកកាដាហ្វី ប៉ងវាយដណ្តើមយកក្រុង ZAOUIAH ពួកបះបោររុលទៅទិសខាងលិច Posted: 05 Mar 2011 10:39 PM PST  ពួកបះបោរលីប៊ីនិយាយថា បានវាយរុញច្រានកាលពីថ្ងៃទី៥ មីនា នូវការវាយប្រហារ២លើករបស់កងកម្លាំងលោកមូអាម៉ា កាដាហ្វី លើទីក្រុង ZAOUÏAH ចម្ងាយ៥០គីឡូម៉ែត្រ ខាងលិចទីក្រុងទ្រីប៉ូលី ចំណែកពួកឧទ្ទាមវិញ បានលើកគ្នាពីទិសខាងកើតរុលឆ្ពោះទៅកាន់ទីក្រុងកំណើតរបស់លោកកាដាហ្វី គឺទីក្រុង SYRTE។ រដ្ឋធានីគឺជាទិសដៅរបស់ពួកឧទ្ទាមដែលកាលពីថ្ងៃទី៤ មីនា កន្លងមកនេះ បានវាយដណ្តើមត្រួតត្រាទីក្រុងកំពង់ផែ RAS LANOUF និងទីតាំងប្រេងកាតសំខាន់របស់ក្រុងនេះ ។ ពួកឧទ្ទាមក៏និយាយដែរថា បានដណ្តើមយកទីក្រុង BEN DJAOUAD ចម្ងាយ៥២៥គីឡូម៉ែត្រ ខាងកើតក្រុងទ្រីប៉ូលី ហើយលើកគ្នាសំដៅទីក្រុង SYRTE ជាទីក្រុងកំណើតលោកកាដាហ្វី ។  |
| អារ៉ាប៊ីសាអូឌីតព្រមានថា ខ្លួននឹងមិនអត់ឱនដល់បាតុកម្ម Posted: 05 Mar 2011 10:35 PM PST  អាជ្ញាធរអារ៉ាប៊ី សាអូឌីត ឱ្យដឹងកាលពីថ្ងៃទី៥ មីនា ថា ខ្លួននឹងមិនអត់ឱនដល់បាតុកម្មណាមួយឡើយ បន្ទាប់ពីបាតុកម្មមានកម្រិតនានាដែលកើតមានរយៈពេលប៉ុន្មានថ្ងៃចុងក្រោយនេះនៅក្នុងប្រទេសមក ។ ក្រសួងមហាផ្ទៃអារ៉ាប៊ីសាអូឌីត រំលឹកថា ច្បាប់របស់ប្រទេសហាមឃាត់ទាំងស្រុងនូវបាតុកម្ម គ្រប់ប្រភេទដោយបញ្ជាក់ថា កងកម្លាំងសន្តិសុខនឹងរាំងខ្ទប់គ្រប់រូបភាពនៃការបង្កចលាចលប៉ះពាល់ដល់សណ្តាប់ធ្នាប់សាធារណៈ ។  |
| ប្រទេសរុស្ស៊ីជ្រើសរើសបានបវរកញ្ញាប្រចាំឆ្នាំ2011 Posted: 05 Mar 2011 10:35 PM PST  នាង Natalya Kantemurova អាយុ១៩ឆ្នាំ កម្ពស់១,៧៥ម៉ែត្រ បានទទួលជ័យជំនះក្នុងការប្រកួតជ្រើសរើសបវរកញ្ញាប្រចាំឆ្នាំ២០១១ របស់ប្រទេសរុស្ស៊ី ។ ពិធីប្រកួតត្រូវបានរៀបចំឡើងនៅក្នុងទីក្រុងម៉ូស្គូ កាលពីថ្ងៃទី៥ មីនា កន្លងមក ។ នាង Natalya Kantemurova ជានារីស្រស់ស្អាតម្នាក់រស់នៅក្នុងទីក្រុងម៉ូស្គូ បានយកឈ្នះលើនារី៥០នាក់ មកពីទូទាំងប្រទេសរុស្ស៊ី ដែលបានចូលរួមក្នុងការប្រកួតនោះដែរ ។  |
| នាយករដ្ឋមន្ត្រីឡាវនឹងបំពេញទស្សនកិច្ចរយៈពេល២ថ្ងៃនៅកម្ពុជាទី៧ ដល់៨ មីនា Posted: 05 Mar 2011 10:32 PM PST រាជធានីភ្នំពេញ ៖ នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ លោកថងស៊ីង ថមម៉ាវង្ស នឹងមកបំពេញទស្សនកិច្ចផ្លូវការរយៈពេល២ថ្ងៃនៅប្រទេសកម្ពុជានាថ្ងៃទី៧ ដល់ថ្ងៃទី៨ មីនា ឆ្នាំ២០១១ ខាងមុខនេះ ។ នេះបើយោងតាមគេហទំព័រជាភាសាអង់គ្លេសរបស់ក្រសួងការបរទេស និងសហប្រតិបត្តិការអន្តរជាតិរបស់ប្រទេសកម្ពុជាចេញផ្សាយឱ្យដឹងនាពេលកន្លងមក ។  |
| Posted: 05 Mar 2011 10:32 PM PST រាជធានីភ្នំពេញ ៖ យោងតាមសេចក្តីប្រកាសព័ត៌មានថ្ងៃទី៥ មីនា ២០១១ ដែលកោះសន្តិភាពទទួលបានឱ្យដឹងថា ដោយមានការឧបត្ថម្ភពីប្រតិភូសហភាពអឺរ៉ុបប្រចាំនៅកម្ពុជាក្លឹបអ្នកកាសែតកម្ពុជានឹងរៀបចំវេទិកាពិភាក្សាក្រោមប្រធានបទ (សារព័ត៌មាន និងតួនាទីក្នុងការលើកកម្ពស់សិទ្ធិមនុស្ស) គ្រោងនឹងធ្វើនៅថ្ងៃទី១០ មីនា ២០១១ នៅសណ្ឋគារឡឺរ៉ូយ៉ាល់ ដើម្បីឱ្យអ្នកសារព័ត៌ មានបានយល់ដឹង និងពិភាក្សាបន្ថែមលើស្ថានភាពសិទ្ធិមនុស្សនៅកម្ពុជា ព្រមទាំងតួនាទីរបស់អ្នកសារព័ត៌មានក្នុងការលើកកម្ពស់សិទ្ធិមនុស្ស ជាពិសេសសិទ្ធិស្ត្រី សិទ្ធិកុមារជាដើម ។  |
| បាញ់៧គ្រាប់ប្លន់លុយពីជនជាតិចិនយកអស់៤ពាន់ដុល្លារ ខណៈទើបឈ្នះ ល្បែង Posted: 05 Mar 2011 07:38 PM PST រាជធានីភ្នំពេញ ៖ បុរសជនជាតិចិនម្នាក់បានរងរបួសយ៉ាងធ្ងន់ធ្ងរដោយសារអំពើបាញ់ប្រហារប្លន់យកកាបូបប្រាក់ពីសំណាក់ខ្មាន់កាំភ្លើងមិនស្គាល់អត្តសញ្ញាណមួយក្រុមបាញ់ត្រូវចំនួន៣គ្រាប់ បណ្តាលឱ្យរងរបួសយ៉ាងធ្ងន់ធ្ងរនៅតាមបណ្តោយផ្លូវលេខ២៨២ សង្កាត់បឹងកេងកងទី១ ខណ្ឌចំការមន ស្ថិតនៅចំណុចមុខក្លឹបមេហ្គា កាលពីវេលាម៉ោង១១និង៣០នាទីយប់ថ្ងៃទី៤ កុម្ភៈ ឆ្នាំ២០១១ ។ បុរសរងគ្រោះក្នុងអំពើបាញ់ប្រហារខាងលើ ឈ្មោះយោវ យ៉ុនយ៉ាង អាយុ៣៤ឆ្នាំ ស្នាក់នៅស្រុកខ្មែរ ក្នុងនាមជាភ្ញៀវទេសចរ និងជួលផ្ទះស្នាក់គេនៅសង្កាត់វាលវង់ ខណ្ឌ៧មករា ។ មុនពេលកើតហេតុ ឈ្មោះយោវ យ៉ុនយ៉ាង បានជិះម៉ូតូទុក ទុក (កង់បី) មួយគ្រឿងចេញពីលេងល្បែងនៅកាស៊ីណូ ជាមួយនារីជនជាតិចិនម្នាក់ទៀតជាមិត្តភក្តិនឹងគ្នា ។ លុះធ្វើដំណើរមកដល់មុខក្លឹបមេហ្គា ឈ្មោះយោវ យ៉ុនយ៉ាង និងមិត្តស្រីឈ្មោះយូ លី ក៏បានឱ្យម៉ូតូកង់បីឈប់ ហើយចុះពីលើម៉ូតូបំណងចូលច្រៀងខារ៉ាអូខេនៅក្លឹបមេហ្គា ។ ប៉ុន្តែខណៈនោះ ស្រាប់តែមានជនមិនស្គាល់អត្តសញ្ញាណ២នាក់ជិះម៉ូតូម៉ាក C125 ពណ៌ខ្មៅ មួយគ្រឿងមកឈប់ទន្ទឹម ហើយដកអាវុធខ្លីភ្ជង់ប្លន់យកកាបូបប្រាក់ពីឈ្មោះយូលី ជាហេតុបណ្តាលឱ្យឈ្មោះយោវ យ៉ុនយ៉ាង ឃើញក៏ស្ទុះ ទៅជួយ ហើយត្រូវក្រុមចោរបាញ់ចំនួន៧គ្រាប់ បណ្តាលឱ្យរងរបួស ត្រូវឈ្មោះយោវ យ៉ុនយ៉ាង ចំនួន៣គ្រាប់ ចំជើងទាំងសងខាង បច្ចុប្បន្នកំពុងសម្រាកព្យាបាលរបួសនៅមន្ទីរពេទ្យកាល់ម៉ែត ។ តាមប្រភពព័ត៌មានពីសមត្ថកិច្ចមូលដ្ឋានបានឱ្យដឹងថា ក្នុងអំពើបាញ់ប្រហារខាងលើនេះក្រុមចោរប្លន់យកបានប្រាក់ពីឈ្មោះយោវ យ៉ុនយ៉ាង ចំនួន៤ពាន់ដុល្លារ ជាប្រាក់ដែលទើបឈ្នះល្បែងនៅកាស៊ីណូ ៕  |
| បង្ក្រាបក្រុមចែកចាយគ្រឿងញៀនបាន៤នាក់ Posted: 05 Mar 2011 07:25 PM PST  រាជធានីភ្នំពេញ ៖ ក្រុមចែកចាយ និងប្រើប្រាស់គ្រឿងញៀនចំនួន៤នាក់ ដែលជាបងប្អូន និងម្តាយមីង ត្រូវប៉ូលិសខណ្ឌឫស្សីកែវ សហការជាមួយមន្ត្រីតុលាការចាប់ខ្លួនកាលពីវេលាម៉ោង១១ព្រឹកថ្ងៃទី៥ មីនា ២០១១ បន្ទាប់ពីឆែកឆេរបន្ទប់ជួលរបស់ពួកគេនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ រកឃើញគ្រឿងញៀន ប្រភេទម៉ាទឹកកកចំនួន១៤ កញ្ចប់តូច និង១កញ្ចប់ធំ ។ ជនសង្ស័យដែលត្រូវចាប់ខ្លួន ១-ឈ្មោះអ៊ិន ស្រ៊ុន ហៅដេត ភេទប្រុស អាយុ២៣ឆ្នាំ ២-ឈ្មោះអ៊ិន សុទ្ធារី ហៅសិដ្ឋ ភេទប្រុស អាយុ១៨ឆ្នាំ ជាសិស្ស ៣-ឈ្មោះអ៊ិន ទេព ហៅសយ ភេទប្រុស អាយុ១៩ឆ្នាំ ជាសិស្ស និង៤-ឈ្មោះអ៊ិន ចាន់ថុល ភេទស្រី អាយុ៤២ឆ្នាំ អ្នកទាំង៤នាក់ត្រូវជាបងប្អូន និងម្តាយមីង មានទីលំនៅផ្ទះជួលលេខ១៦១E ជាផ្ទះដែលត្រូវសមត្ថកិច្ចឆេកឆេររកឃើញគ្រឿងញៀន ។ ដោយមានការស្រាវជ្រាវពីប៉ូលិសប៉ុស្តិ៍ និងខណ្ឌឫស្សីកែវទើបដឹងថា ជនសង្ស័យជាមុខសញ្ញា សមត្ថកិច្ចមានការសង្ស័យ ហើយសហការជាមួយមន្ត្រីតុលាការឆែកឆេរ និងឃាត់ខ្លួនតែម្តង ៕  |
| សាលាខណ្ឌដូនពេញចុះបិទការដ្ឋានសំណង់សង្ស័យបង្កអគ្គីភ័យឆេះផ្ទះពីរល្វែង Posted: 05 Mar 2011 07:15 PM PST  រាជធានីភ្នំពេញ ៖ កាលពីព្រឹកថ្ងៃទី៥ មីនា ២០១១ សាលាខណ្ឌដូនពេញ បានបង្កើតគណៈកម្មការចម្រុះដឹកនាំដោយលោកហែម ឫទ្ធី នាយករងរដ្ឋបាលខណ្ឌដូនពេញ ចុះបិទការដ្ឋានសំណង់លេខ១៧ ផ្លូវលេខ១៣៦ សង្កាត់ផ្សារកណ្តាលទី១ សង្ស័យបង្កអគ្គីភ័យឆេះផ្ទះពីរល្វែង កាលពីថ្ងៃព្រហស្បតិ៍ និងធ្វើឱ្យយុវតីម្នាក់រងរបួស ។ លោកហែម ឫទ្ធី បានឱ្យដឹងថា កាលពីថ្ងៃទី៣ មីនា ២០១១ វេលាម៉ោង៩និង៣០នាទីមានករណីអគ្គីភ័យឆាបឆេះនៅផ្ទះលេខ៧២Eo និងផ្ទះលេខ៧៣Eo ផ្លូវលេខ១៣៦ ភូមិទី១០ សង្កាត់ផ្សារកណ្តាលទី១ ខណ្ឌដូនពេញ ដែលមានមនុស្សចំនួន៧គ្រួសារ កំពុងរស់នៅបង្កឡើងដោយការដ្ឋានសំណង់ដីឡូត៍លេខ១៧ ផ្លូវលេខ១៣៦ សង្កាត់ផ្សារកណ្តាលទី១ ខណ្ឌដូនពេញ ដែលមានឈ្មោះទេស អែតដា ភេទប្រុស និងឈ្មោះវាំង វណ្ណី ភេទស្រី ជាប្រពន្ធ ។ នៅថ្ងៃកើតហេតុ មេជាងបានប្រើកម្មករឱ្យរៀបចំពុម្ព ដើម្បីចាក់ធ្នឹមសំណង់ ដោយពុំមានការប្រុងប្រយ័ត្ន ធ្វើឱ្យពុម្ពដែកធ្លាក់មកលើឈ្មោះឡោ ម៉ារ៉ានី ភេទស្រីអាយុ២០ឆ្នាំ ជាសិស្ស បណ្តាលឱ្យបែកក្បាលត្រូវបានបញ្ជូនទៅមន្ទីរពេទ្យព្រះកេតុមា ក្រោយមកខ្សែភ្លើង ដែលបានដាច់នោះក៏បានទុស្សេបង្កជាអគ្គីភ័យឆាបឆេះផ្ទះលេខ៧៣Eo រួចរាលមកដល់ផ្ទះលេខ៧១Eo ។ ក្នុងហេតុការនេះផ្ទះពីរល្វែងសង់អំពីថ្មក្រោម លើ ឈើត្រូវបានខូចខាតទាំងស្រុង គឺផ្ទះលេខ៧១Eo ដែលអ្នកជួលឈ្មោះប៉ែន ម៉ាឡា ភេទស្រី អាយុ៤១ឆ្នាំ អ្នកលក់ដូដែលជួលពីម្ចាស់ដើមឈ្មោះលី គឹមអាន ជាអ្នកសារព័ត៌មាន និងផ្ទះលេខ៧៣Eo មានម្ចាស់ឈ្មោះឡោ វ៉ាន់ថា ភេទប្រុស អាយុ៥៨ឆ្នាំ ជាអាជីវករលក់មាសនៅផ្សារអូឫស្សី ។ លោកនាយករងរដ្ឋបាលខណ្ឌដូនពេញបានបញ្ជាក់ថា សាលាខណ្ឌដូនពេញបានចេញសេចក្តីសំរេចលេខ២១៥សសរ/អណ១ចុះ ថ្ងៃទី៤ មីនា ២០១១ សំរេចបិទការដ្ឋានសំណង់ក្បាលដីលេខ១៧ផ្លូវលេខ១៣៦ សង្កាត់ផ្សារកណ្ដាលទី១ ខណ្ឌដូនពេញ ជាបណ្ដោះអាសន្ន ដោយមូលហេតុធ្វេសប្រហែសបង្កអោយមានរបួសស្នាមដល់មនុស្ស និងអគ្គីភ័យ កើតឡើងបណ្ដាលអោយឆេះផ្ទះលេខ៧១ និង៧៣Eo ផ្លូវលេខ១៣៦ សង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ៕  |
| ថ្ងៃអាទិត្យជាថ្ងៃណាត់ជួបជុំ ក្រុមអ្នកបញ្ជល់មាន់នៅឯកភ្នំ សង្វៀន៣កន្លែងម្ចាស់តែមួយ Posted: 05 Mar 2011 07:07 PM PST  ខេត្តបាត់ដំបង ៖ ក្រុមអ្នកញៀននឹងល្បែងបញ្ជល់មាន់រាប់សិបនាក់ត្រូវគេរាយការណ៍ថា មកពីគ្រប់ទិសទី បានណាត់ជួបជុំគ្នាស្ទើររៀងរាល់ថ្ងៃអាទិត្យ ដើម្បីបញ្ជល់មាន់នៅក្នុងអាណាចក្រតំបន់ទេសចរណ៍ប្រាសាទបុរាណឯកភ្នំ ក្នុងឃុំពាមឯក ស្រុកឯកភ្នំ ។ តាមការផ្តល់ព័ត៌មានពីប្រជាពលរដ្ឋនៅតំបន់នោះបានប្រាប់កោះសន្តិភាពតាមទូរស័ព្ទថា ទីតាំងសង្វៀនបញ្ជល់មាន់នោះស្ថិតនៅក្នុងភូមិគោកដូង ឃុំពាមឯក ស្រុកឯកភ្នំ នាភាគខាងជើងប្រាសាទឯកភ្នំ ដែលម្ចាស់សង្វៀនឈ្មោះមាស ។ អ្នកភូមិនិយាយថា ឈ្មោះមាស បានបង្កើតឱ្យមានសង្វៀនបញ្ជល់មាន់ចំនួន៣កន្លែងដើម្បីចល័តនៅពេលមានសភាពការណ៍មិនល្អ រាប់ទាំងសង្វៀននៅកណ្តាលវាលស្រែមួយកន្លែងផង ។ ប៉ុន្តែអាជ្ញាធរ ឬសមត្ថកិច្ចមូលដ្ឋានហាក់ដូចជាត្រូវដង ត្រូវផ្លែគ្នាក្នុងអំពើអបាយមុខនេះ បើដូច្នេះមែន តើគោលការណ៍ភូមិ-ឃុំមានសុវត្ថិភាពពេលនេះនៅឯណា? ជាក់ស្តែង នៅព្រឹកថ្ងៃទី២៧ កុម្ភៈ គេឃើញក្រុមអ្នកញៀននឹងល្បែងនេះបានចាប់ផ្តើមជួបជុំគ្នាតាំងពីព្រឹក ដោយខ្លះមានស្ពាយមាន់ជល់មកជាមួយផង បានប្រមូលផ្តុំគ្នាជាង៥០នាក់ នៅកន្លែងសង្វៀនភូមិគោកដូង ។ ចំណែកមធ្យោបាយធ្វើដំណើរមានម៉ូតូ កង់ ផ្ញើតាមផ្ទះអ្នកស្រុក ។ បើតាមសាក្សីនៅកន្លែងបញ្ជល់មាន់និយាយថា នៅម៉ោងប្រហែល១២ថ្ងៃត្រង់ពួកគេបានភ្ញាក់ផ្អើលមួយប្រាវ ដោយសារតែមានអ្នកកាសែតចូលទៅលួចថត ។ គ្រានោះត្រូវសង្ស័យថា អាចមានអ្នកផ្តល់សញ្ញាឱ្យក្រុមអ្នកលេងផ្លាស់ទីកន្លែងភ្លាមៗទៅបញ្ជល់កណ្តាលវាលស្រែវិញ មិនមែនរឿងអ្នកកាសែតទៅថតទេ ។ លោកវិត វឿត នាយប៉ុស្តិ៍នគរបាលឃុំពាមឯក បានបដិសេធថា គ្មានកន្លែងបញ្ជល់មាន់ទេ នៅក្នុងមូលដ្ឋានរបស់លោកពេលនេះ ប៉ុន្តែពីមុនធ្លាប់មានមែន ។ ចំណែកលោកយៀម ប៊ុនលឿប អធិការស្រុកឯកភ្នំវិញ ក៏បានបដិសេធយ៉ាងដូច្នេះដែរ ។ លោកអធិការបានបញ្ជាក់ថា កន្លងមកនៅភូមិគោកដូងនេះវាគ្រាន់តែជាកន្លែងសាកល្បងមាន់លេងតែប៉ុណ្ណោះ ហើយកាលណោះលោកបានបញ្ជាឱ្យលោកមេឃុំហាមឃាត់បញ្ឈប់ហើយ ប៉ុន្តែពេលនេះបើនៅតែមានលេងទៀត ចាំលោកស្រាវជ្រាវសិន ។ ប្រជាពលរដ្ឋនៅក្នុងមូលដ្ឋាននិយាយថា កន្លែងបញ្ជល់មាន់នេះបានបើកលេងច្រើនខែមកហើយ និងមានទ្រង់ទ្រាយធំបំផុត ភាគច្រើនពួកគេជួបជុំគ្នាក្នុងថ្ងៃអាទិត្យ ។ អ្នកភូមិបានបញ្ជាក់ថា សង្វៀនបញ្ជល់មាន់នេះ បើគ្មានអាជ្ញាធរ ឬសមត្ថកិច្ចផ្តល់សញ្ញាភ្លើងខៀវទេ ពួកគេមិនអាចដំណើរការបានឡើយ ព្រោះសកម្មភាពល្បែងជក់ចិត្តនេះអ៊ូអរខ្លាំងណាស់ ៕  |
| នាងក្រមុំបត់ជើងក្នុងព្រៃកៅស៊ូ បុរសកំហូចឃើញផ្ទុះកាមតណ្ហា ស្ទុះទៅចាប់នាងប៉ុនប៉ងរំលោភ Posted: 05 Mar 2011 07:02 PM PST  ខេត្តកំពង់ចាម ៖ កម្លាំងប៉ុស្តិ៍រដ្ឋបាលឃុំតាអុង បានឃាត់ខ្លួនបុរសម្នាក់ឈ្មោះបាន ប៊ន់ អាយុ២៩ឆ្នាំ រស់នៅភូមិ៣៤ ឃុំតាអុង ស្រុកចំការលើ កាលពីវេលាម៉ោង៩និង៣០នាទីព្រឹកថ្ងៃទី១ មីនា ២០១១ ពីបទប៉ុនប៉ងរំលោភនាងក្រមុំម្នាក់អាយុ១៨ឆ្នាំ ក្នុងខណៈពេលនាងទៅបត់ជើងនៅក្នុងឡូត៍កៅស៊ូលេខ១២ ខាងកើតភូមិ៣៣ ចម្ងាយប្រមាណ៣៥០ម៉ែត្រ ។ តាមលោកអនុសេនីយ៍ឯក អ៊ិត ដារ៉ា អធិការនគរបាលស្រុកចំការលើ បានឱ្យដឹងថា ក្នុងខណៈពេលដែលនាងក្រមុំម្នាក់នោះជិះម៉ូតូចេញពីផ្ទះទៅបត់ជើងនៅក្នុងឡូត៍កៅស៊ូនាព្រឹកថ្ងៃនោះ ស្រាប់តែបុរសកំហូចកូន៣ម្នាក់នេះលបលួចមើលឃើញ ហើយទ្រាំមិនបានក៏ស្ទុះចូលទៅបំណងចាប់រំលោភ ព្រមទាំងបានប្រវាយប្រតប់គ្នាទៀតផង ។ ប៉ុន្តែសំណាងល្អមានអ្នកដទៃ ជិះម៉ូតូឆ្លងកាត់កន្លែងនោះ និងឮសូរសំឡេងស្រែកឱ្យជួយជាហេតុធ្វើឱ្យបុរសកំហូចរត់គេចខ្លួនបាត់ស្រមោលតែម្តង។ លោកអធិការបានបន្តថា បន្ទាប់មកនាងរងគ្រោះក៏បានជិះម៉ូតូត្រឡប់មកផ្ទះវិញតែដោយមិនឃើញម្តាយក៏ទៅតាមរកម្តាយរហូតដល់កន្លែងបុណ្យសពរបស់អ្នកភូមិនៅភូមិ៣៣ ហើយរ៉ាយរ៉ាប់ប្រាប់អំពីហេតុការណ៍ដែលបានកើតឡើង។ ខណៈនោះស្ត្រីជាម្តាយបានទៅប្តឹងលោកមេភូមិ៣៣ឱ្យជួយអន្តរាគមន៍ ហើយលោកមេភូមិក៏បានផ្តល់ដំណឹងនេះមកនគរបាលប៉ុស្តិ៍រដ្ឋបាលឃុំតាអុងជាបន្ទាន់ ដើម្បីស្វែងរកតាមចាប់ខ្លួនបុរស ឈ្មោះប៊ន់។ នៅវេលាម៉ោង៩និង៣០នាទីព្រឹកថ្ងៃដដែលនោះដែរ រូបលោក បានបញ្ជាឱ្យលោកនាយប៉ុស្តិ៍រដ្ឋបាលកោះហៅជនសង្ស័យឈ្មោះបាន ប៊ន់ មកសួរនាំជុំវិញករណីចោទប្រកាន់របស់នាងរងគ្រោះ ហើយបុរសនោះក៏បានឆ្លើយសារភាពពីទង្វើរបស់ខ្លួនថា ពិតជាបានប្រព្រឹត្តដូច្នោះមែន ទើបសមត្ថកិច្ចសំរេចឃាត់ខ្លួនបញ្ជូនមកកាន់អធិការដ្ឋាននគរបាលស្រុកចំការលើ ។ នៅចំពោះមុខសមត្ថកិច្ច ជនសង្ស័យឈ្មោះ បាន ប៊ន់ បានឆ្លើយសារភាពថា នៅម៉ោង៦ព្រឹកថ្ងៃទី១ មីនា រូបគេបានជិះម៉ូតូម៉ាក Kriss Angkor ពណ៌ក្រហម ចេញពីផ្ទះនៅភូមិ៣៤ ដើម្បីទៅថែមប្រេងម៉ាស៊ីននៅផ្ទះរបស់ឈ្មោះលី នៅភូមិបុសខ្នុរ លុះប្រហែលម៉ោងជិត៨ព្រឹកបានត្រឡប់មកផ្ទះវិញ។ ពេលមកដល់ត្រង់ឡូត៍កៅស៊ូខាងកើតភូមិ៣៣ ប្រទះឃើញមនុស្សស្រីម្នាក់អាយុប្រហែល១៨ឆ្នាំ មិនស្គាល់ឈ្មោះទេ តែដឹងថា ជាអ្នកភូមិ៣៣ ជិះម៉ូតូម៉ាក DH ពណ៌ក្រហម ។ ខណៈឃើញបែបនេះខ្លួនបានជិះទៅតាមមើល ម្យ៉ាងដោយកន្លែងនោះស្ងាត់ក៏បានទុកម៉ូតូចោលហើយដើរតាមបានប្រហែល ជា៥០ម៉ែត្រ ឃើញស្រ្តីនោះបំរុងឡើងជិះម៉ូតូទើបខ្លួនទៅចាប់ប៉ងរំលោភ តែ ត្រូវនាងស្រែកជេរយ៉ាងខ្លាំង ជាហេតុធ្វើឱ្យរូបគេមានការភិតភ័យក៏ស្ទុះរត់មកកន្លែងទុកម៉ូតូវិញ ហើយជិះគេចខ្លួន ។ លោកអធិការនគរបាលស្រុកចំការលើបាន បញ្ជាក់ថា យោងតាមពាក្យបណ្តឹងរបស់ស្ត្រីជាម្តាយរបស់នាងរងគ្រោះ ទើបសមត្ថកិច្ចសម្រេចបញ្ជូនជនឈ្មោះប៊ន់ ទៅសាលាដំបូងខេត្តហើយលោកចៅក្រមថាន់ ឡេង ក៏បានចេញដីកាឃុំខ្លួន ដោយចោទប្រកាន់ពីបទប៉ងរំលោភសេពសន្ថវៈ ៕  |
| ទាហានប៊ូរុនឌីជាង40នាក់ ស្លាប់នៅសូម៉ាលី Posted: 05 Mar 2011 06:46 PM PST ប្រភពព័ត៌មានយោធារាយការន៍កាលពីថ្ងៃទី៥ មីនា ថា ទាហានប៊ូរុនឌីដែលចូលរួមក្នុងបេសកកម្មរក្សាសន្តិភាពនៅសូម៉ាលីជាង៤០នាក់ បានត្រូវស្លាប់ ហើយជាង១០០នាក់ ត្រូវរបួស ក្នុងឱកាសនៃប្រតិបត្តិការមួយនាពេលថ្មីៗនេះ ប្រឆាំងនឹងពួកឧទ្ទាម ។ ក៏ប៉ុន្តែរដ្ឋាភិបាលប៊ូរុនឌី ពុំបានអះអាងពីតួលេខនេះឡើយ ។ ប្រទេសប៊ូរុនឌី និងអ៊ូហ្គង់ដា ជាប្រទេសអាហ្វ្រិក២ ដែលចូលរួមក្នុងេបសកកម្មរក្សាសន្តិភាពរបស់សហភាពអាហ្វ្រិកនៅសូម៉ាលី AMISON ។ ចាប់តាំងពីខែធ្នូ ឆ្នាំ២០០៧ មក ប៊ូរុនឌី បានបញ្ជូនទាហាន៤កងវរសេនាតូចមកកាន់សូម៉ាលី ដើម្បីជួយទ្រទ្រង់ដល់រដ្ឋាភិបាលបណ្តោះអាសន្នសូម៉ាលី ។ កងទាហានរបស់ AMISOM ជាកម្មវត្ថុនៃការវាយប្រហារជាច្រើនពីសំណាក់ពួកឧទ្ទាមនៃក្រុមអាល់សាបាអាប ៕  |
| ប្រធានាធិបតីយេម៉ែនអះអាងថា នឹងបន្តតំណែងរហូតដល់ឆ្នាំ2013 Posted: 05 Mar 2011 06:46 PM PST  ប្រធានាធិបតីយេម៉ែន លោកអាលីអាប់ឌុលឡាហ៍ សាឡេហ៍ កាលពីថ្ងៃទី៥ មីនា កន្លងមក បានអះអាងបញ្ជាក់សាជាថ្មីម្តងទៀតថា រូបលោកនឹងនៅបន្តតំណែងរហូតដល់អាណត្តិរបស់លោកផុតនៅឆ្នាំ២០១៣ ហើយលោកបានច្រានចោលការទាមទារឱ្យមានការធ្វើអន្តរកាលរបស់ក្រុមប្រឆាំង ដើម្បីឱ្យលោកចុះចេញពី តំណែងនៅឆ្នាំ២០១១ ។ នេះបើតាមការរាយការណ៍ឱ្យដឹងដោយទីភ្នាក់ងារព័ត៌មានផ្លូវការ Saba របស់យេម៉ែន ។  |
| បារាំងនឹងទទួលស្គាល់រដ្ឋប៉ាឡេស្ទីនមួយក្នុងខែកញ្ញា Posted: 05 Mar 2011 06:46 PM PST អ្នកចរចាប៉ាឡេស្ទីន លោកណាប៊ីល សាអាត អះអាងកាលពីថ្ងៃទី៥ មីនា ថា បានទទួលការសន្យារបស់បារាំងដែលថា បារាំងនឹងទទួលស្គាល់រដ្ឋប៉ាឡេស្ទីនមួយដែលដែនដីទាំងឡាយរបស់ខ្លួនត្រូវអ៊ីស្រាអែលកាន់កាប់កាលពី ឆ្នាំ១៩៦៧ ក្នុងខែកញ្ញាខាងមុខនេះ ។  |
| Posted: 05 Mar 2011 06:40 PM PST  រាជធានីភ្នំពេញ ៖ ពលការិនីម្នាក់បានដេកស្លាប់ក្នុងបន្ទប់របស់ក្រុមហ៊ុននាំពលករចេញទៅក្រៅប្រទេសមួយ ដែលមានរឿងច្របូកច្របល់បង្កឱ្យមានការភ្ញាក់ផ្អើល និងរិះគន់យ៉ាងខ្លាំងពីសំណាក់អ្នកជិតខាងដែលដឹងរឿងនេះ កាលពី វេលាម៉ោង២រំលងអធ្រាត្រឈានចូលថ្ងៃទី៦ មីនា ២០១១...រហូតមកដល់ព្រឹកព្រលឹមថ្ងៃ ដដែល គេនៅមិនទាន់ដឹងមូលហេតុពិតប្រាកដនៃការស្លាប់នៅឡើយទេ ដោយសារតែរង់ចាំប៉ូលិសចក្ខុចុះពិនិត្យសពឱ្យបានត្រឹមត្រូវសិន ។ ក្រុមហ៊ុនដែលមានពលការិនីដេកស្លាប់នេះឈ្មោះធី & ភី Co.,Ltd (ក្រុមហ៊ុនជួយរកការងារជូនពលករ-ពលការិនីខ្មែរនៅក្រៅប្រទេស) អគារលេខ៣៤ ផ្លូវលេខ២៧១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ។ ពលការិនីដែលដេកស្លាប់នេះឈ្មោះស៊ឹង ស៊ីណា អាយុ៣៥ឆ្នាំ មានស្រុកកំណើតនៅខេត្តតាកែវ...មុនពេលឈានដល់ស្លាប់ គឺនៅវេលាម៉ោង១រំលងអធ្រាត្រឈានចូលថ្ងៃទី៦ មីនា ២០១១ ស្ត្រីពលការិនីបានស្រែកថ្ងូរត្អូញត្អែរថា ចុកទ្រូងខ្លាំងណាស់! សូមជួយផង...ប៉ុន្តែគ្មានអ្នកណាយកចិត្តទុកដាក់សោះ ជាពិសេសខាងក្រុមហ៊ុននេះតែម្តងធ្វើព្រងើយកន្តើយ រហូតដល់ម៉ោង២រំលងអធ្រាត្រថ្ងៃដដែល ស្ត្រីពលការិនីម្នាក់នេះក៏ដាច់ខ្យល់ស្លាប់តែម្តង ។ ពេលភ្ញាក់ផ្អើលពលការិនីដូចគ្នាបានរិះគន់ថា ពេលស្ត្រីរូបនេះ (ស៊ឹង ស៊ីណា) ស្រែកថ្ងូរថា ឈឺទ្រូង...ប្រសិនបើខាងក្រុមហ៊ុនចាត់បញ្ជូនទៅមន្ទីរពេទ្យឱ្យបានលឿនបន្តិច នាងគឺមិនស្លាប់ទេ...នេះមកពីមិនមានអ្នកយកចិត្តទុកដាក់ ។ តាមប្រភពព័ត៌មានឱ្យដឹងថា បន្ទាប់ពីពលការិនីស្លាប់ហើយ ទើបគេឃើញខាងបុគ្គលិកក្រុមហ៊ុនធ្វើការដឹកចេញទៅកាន់មន្ទីរពេទ្យ ប៉ុន្តែយ៉ាងណា នាងស្លាប់បាត់ទៅហើយ រួចហើយក៏ដឹកចូលក្រុមហ៊ុនវិញ ។ ករណីឡិបឡប់បែបនេះ ប៉ូលិសមូលដ្ឋានបានឃាត់ខ្លួនបុគ្គលិកក្រុមហ៊ុនធី & ភី នេះ២នាក់គឺ ម្នាក់ជាអ្នកបើកបរ និងម្នាក់ទៀតជាអ្នកមើលការខុសត្រូវលើពលករ...នៅវេលាព្រឹកម៉ោង៨ថ្ងៃដដែល គេឃើញប៉ូលិសចក្ខុបានទៅដល់កន្លែងកើតហេតុ និងកំពុងពិនិត្យសពពលការិនីនៅឡើយ ។ សូមបញ្ជាក់ថា មុននេះ៤-៥ថ្ងៃក្រុមហ៊ុនធី& ភីនេះ ក៏មានពលការិនីម្នាក់បានសម្រេចលោតពីលើអគារជាន់ទី២ ចុះមកក្រោមបណ្តាលឱ្យបាក់ជើងទាំងសងខាងផងដែរ បន្ទាប់ពីនាងនឹកកូនខ្លាំងពេក ហើយមិនត្រូវបានខាងក្រុមហ៊ុនអនុញ្ញាតឱ្យចេញទៅក្រៅ...ការស៊ើបអង្កេតមិនទាន់បញ្ចប់ផង ឥឡូវចូលដល់ករណីស្លាប់ពលការិនីម្នាក់ទៀតនេះពិតជារឿងជាន់រឿងមែន៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
