Koh Santipheap Daily |
- លោកនាយករដ្ឋមន្ត្រីឡាវ នឹងជួបសំដែងការគួរសមជាមួយសម្តេចហេង សំរិន វេលាម៉ោង៣និង៣០នាទីរសៀល
- ព្រឹកនេះសម្តេចតេជោហ៊ុន សែន ស្វាគមន៍ជួបសវនាការជាមួយនាយករដ្ឋមន្ត្រីឡាវ នៅវិមានសន្តិភាពទីស្តីការនាយករដ្ឋមន្ត្រី
- ឆ្នាំ២០០៨ដល់ឆ្នាំ២០១៥ជាយុទ្ធសាស្ត្រកម្ពុជាគ្មានគ្រឿងញៀន
- រដ្ឋមន្ត្រីការបរទេសជប៉ុនសុំលាលែងព្រោះរឿងអំណោយខុសច្បាប់
- ទូរគមនាគមន៍កម្ពុជាអបអរទិវាសិទ្ធិនារីអន្តរជាតិ៨មីនា
- ចិននឹងលុបបំបាត់ចោលភាពក្រីក្រនៅត្រឹមឆ្នាំ2020
- សមត្ថកិច្ចទប់ស្កាត់ក្មេងទំនើងកាប់ចាក់គ្នាកន្លែងលេងល្ខោនក្នុងវត្តទួលពិសិដ្ឋ
- ពិធីការមួយនៅឥណ្ឌាចំណាយប្រាក់ដល់ទៅ15លានអឺរ៉ូ
- សភាពការណ៍នៅលីប៊ី ៖ កងទ័ពរដ្ឋាភិបាលបន្តការវាយបកពួកបះបោរដែលដកថយពីក្រុងនានា
- នាយករដ្ឋមន្ត្រីប៉ាឡេស្ទីនស្នើបង្កើតរដ្ឋាភិបាលបង្រួបបង្រួមមួយ
- ព្រួតគ្នាវាយស្ត្រីម្នាក់ប៉ូលិសចាប់បានបីនាក់ តុលាការឃុំខ្លួនម្នាក់
- ទីតាំងពលការិនីលួចរត់ធ្លាក់បាក់ជើង ពេលនេះស្លាប់ស្ត្រីម្នាក់ទៀត
- បាញ់៧គ្រាប់ប្លន់លុយពីជនជាតិចិនចំនួន៤ពាន់ដុល្លារ តាមប្រភពព័ត៌មានថាអ្នករងគ្រោះចេញពីបនល្បែង
- ២នាក់ប្តីប្រពន្ធឡានបុកកិនប្តីស្លាប់ ប្រពន្ធរងរបួសធ្ងន់
- សមត្ថកិច្ចបន្តឆែកឆេរលំនៅឋានមេខ្លោងផលិតថ្នាំញៀនហុង អេនឌី រកឃើញទូដែក និងរថយន្តទំនើប
- ក្រុងកែបអភិវឌ្ឍន៍ អ្នកនៅលើផ្លូវគ្មានដីសង់ផ្ទះប្រឈមនឹងការចាកចេញ
- ស្ត្រីប្រមឹកវាយសំពងកូនប្រុសជាប់ចំណងរងរបួសធ្ងន់ធ្ងរ
- ប្រទះឃើញសាកសពបុរស២នាក់ សមត្ថកិច្ចសង្ស័យជាការសម្លាប់ដោយគំនុំ
- អ្នកសង្កេតការណ៍ឥណ្ឌូណេស៊ី គំរោងមាន១៤កន្លែងនិងរយៈពេល១២ខែ តែកម្ពុជាអាចបន្ថែមច្រកនិងរយៈពេល
- ដាស់តឿនមន្ត្រីប៉ូលិសដែលយកលុយពីពួកជួញគ្រឿងញៀន ត្រូវភ្ញាក់រលឹកបំពេញតួនាទីជាសមត្ថកិច្ចនិងដកខ្លួនឱ្យឆ្ងាយ
| Posted: 06 Mar 2011 07:57 PM PST រាជធានីភ្នំពេញ ៖ យោងតាមមន្ត្រីរដ្ឋសភាបានថ្លែងឱ្យដឹងថា លោកថង ស៊ីងថមម៉ាវង្ស នាយករដ្ឋមន្ត្រីឡាវ នឹងដឹកនាំគណៈប្រតិភូជាន់ខ្ពស់នៃសាធារណរដ្ឋប្រជាធិបតេយ្យប្រជាមានិតឡាវជួបសំដែងការគួរសម និងសវនាការជាមួយសម្តេចហេង សំរិន ប្រធានរដ្ឋសភានៅវេលាម៉ោង៣និង៣០នាទីរសៀលថ្ងៃទី៧ មីនា ២០១១ ។ នៅក្នុងដំណើរទស្សនកិច្ចរបស់លោកនាយករដ្ឋមន្ត្រីឡាវក្នុងប្រទេសកម្ពុជា តាមការអញ្ជើញរបស់សម្តេចនាយករដ្ឋមន្ត្រីហ៊ុន សែន នាពេលនេះ លោកថងស៊ីង ថមម៉ាវង្ស នឹងចូលក្រាបបង្គំគាល់ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅឯព្រះបរមរាជវាំងក្នុងរាជធានីភ្នំពេញ ។ ក្រៅពីនោះលោកនាយករដ្ឋមន្ត្រីឡាវ នឹងចូលជួបសម្តែងការគួរសម និងសវនាការដាច់ដោយឡែកពីគ្នា ជាមួយប្រធានព្រឹទ្ធសភា សម្តេច ជា ស៊ីម និងប្រធានរដ្ឋសភា សម្តេចហេង សំរិន ៕  |
| Posted: 06 Mar 2011 07:56 PM PST រាជធានីភ្នំពេញ ៖ នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ លោកថងស៊ីង ថមម៉ាវង្ស បានមកដល់រាជធានីភ្នំពេញ ក្នុងដំណើរបំពេញទស្សនកិច្ចផ្លូវការរយៈពេល២ថ្ងៃនៅប្រទេសកម្ពុជានាថ្ងៃទី៧ ដល់ថ្ងៃទី៨ មីនា ឆ្នាំ២០១១ ហើយនៅវេលាម៉ោងជាង៩ព្រឹកថ្ងៃទី៧ មីនា ២០១១ នេះ លោកត្រូវបានទទួលស្វាគមន៍ជួបសវនាការជាមួយសម្តេចតេជោហ៊ុន សែន នាយករដ្ឋមន្ត្រីកម្ពុជា នៅវិមានសន្តិភាពទីស្តីការនាយករដ្ឋមន្ត្រី ។ នៅក្នុងដំណើរទស្សនកិច្ចរបស់លោកនាយករដ្ឋមន្ត្រីឡាវក្នុងប្រទេសកម្ពុជា តាមការអញ្ជើញរបស់សម្តេចនាយករដ្ឋមន្ត្រីហ៊ុន សែន នាពេលនេះ លោកថងស៊ីង ថមម៉ាវង្ស នឹងចូលក្រាបបង្គំគាល់ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅឯព្រះបរមរាជវាំងក្នុងរាជធានីភ្នំពេញ ។ ក្រៅពីនោះលោកនាយករដ្ឋមន្ត្រីឡាវ នឹងចូលជួបសម្តែងការគួរសម និងសវនាការដាច់ដោយឡែកពីគ្នា ជាមួយប្រធានព្រឹទ្ធសភា សម្តេច ជា ស៊ីម និងប្រធានរដ្ឋសភា សម្តេចហេង សំរិន ៕  |
| ឆ្នាំ២០០៨ដល់ឆ្នាំ២០១៥ជាយុទ្ធសាស្ត្រកម្ពុជាគ្មានគ្រឿងញៀន Posted: 06 Mar 2011 07:51 PM PST  ខេត្តកំពង់ចាម ៖ «ថ្នាំញៀនប្រភេទមេតំហ្វេតាមីនចំនួន៣៦.៦១៣គ្រាប់ និងកម្ទេចថ្នាំ១កញ្ចប់ទម្ងន់២២៩,៧ក្រាម ថ្នាំញៀនមេតំហ្វេតាមីនម្សៅពណ៌សចំនួន១៣៨កញ្ចប់ និង១កញ្ចប់ទៀតទម្ងន់២១,៣ក្រាម កញ្ឆាក្រៀមចំនួន៣កេស ទម្ងន់១៤,៥គីឡូក្រាម និងឧបករណ៍វេចខ្ចប់ជក់មួយចំនួន ត្រូវបានដុតបំផ្លាញចោលនាពេលកន្លងមក»។ នេះជាប្រសាសន៍របស់លោកវរសេនីយ៍ឯកជឹម សេងហុង ស្នងការរងនគរបាលខេត្តទទួលផែនកណ្តាលយុត្តិធម៌ ថ្លែងនៅក្នុងសាលប្រជុំសាលាខេត្ត កាលព្រឹកថ្ងៃទី៣ មីនា ២០១១ ក្នុងឱកាសប្រជុំត្រួតពិនិត្យលទ្ធផលបង្ក្រាបគ្រឿងញៀនឆ្នាំ២០១០ និងទិសដៅអនុវត្តឆ្នាំ២០១១ ។ លោកវរសេនីយ៍ឯកជឹម សេងហុង បានថ្លែងថា ក្នុងឆ្នាំ២០១០កន្លងទៅ សកម្មភាពប្រើប្រាស់បំពានគ្រឿងញៀនប្រភេទថ្នាំទឹកកកម្សៅក្រាមពណ៌ស តាមការសង្កេតឃើញអ្នកប្រើប្រាស់មានការប្រែប្រួល(ខែខ្លះថយចុះខែខ្លះកើនឡើង) ប្រៀបធៀបទៅនឹងឆ្នាំ២០០៩ មានអ្នកប្រើប្រាស់សរុបចំនួន៤៨១លើ៣០១នាក់ (ស្រីចំនួន២នាក់) ។ ដោយការខិតខំប្រឹងប្រែងរបស់អាជ្ញាធរគ្រប់ជាន់ថ្នាក់ បានយកចិត្តទុកដាក់សហការគ្នាបណ្តុះបណ្តាលលើកកំពស់ដល់មន្ត្រីអនុវត្តច្បាប់ និងពង្រីកប្រព័ន្ធការងារផ្សព្វផ្សាយបានទូលាយដល់សហគមន៍ មិនតែប៉ុណ្ណោះបានផ្តល់ឯកសារគោលជាច្រើនសំរាប់ថ្នាក់មូលដ្ឋានពិចារណាស្វែងយល់បន្ថែម។ ក្នុងឆ្នាំ២០១០ មន្ត្រីអនុវត្តច្បាប់បានបង្រ្កាបចំនួន៦០ករណីលើ១៦៩នាក់ (ស្រី១៤នាក់)រឹបអូសវត្ថុតាងរួមមានថ្នាំញៀនគ្រាប់ចំនួន២.៦៧២គ្រាប់ ថ្នាំញៀនម្សៅក្រាមចំនួន២២៣កញ្ចប់(កញ្ចប់ធំ១២កញ្ចប់) និង១កញ្ចប់ទៀតទម្ងន់៨៧ក្រាម ។ កញ្ឆាស្រស់ចំនួន៧៣៩ដើម កញ្ឆាក្រៀមចំនួន១៤៨គីឡូក្រាម ជញ្ជីងអេឡិចត្រូនិក៣គ្រឿង អាវុធកា៥៤មួយដើម គ្រាប់ចំនួន៩គ្រាប់ រថយន្ត២គ្រឿង(រថយន្តធុនតូច) ម៉ូតូចំនួន២គ្រឿង សំណាកថ្នាំ២កញ្ចប់ ព្រមទាំងឧបករណ៍សេពគ្រឿងញៀនមួយចំនួនទៀត។ ក្នុងនោះដែរបានបញ្ជូនទៅកាន់សាលាដំបូងខេត្តចំនួន២០ករណី សើ្មនឹងមុខសញ្ញា២៩នាក់ (ស្រី៥នាក់) អនុវត្តដីការបស់សាលាដំបូងខេត្តចំនួន៥ដីកា ស្មើ៥មុខសញ្ញា បង្រ្កាបធ្វើកិច្ចសន្យាអប់រំចំនួន៤០ករណីសើ្ម១២៣នាក់ (ស្រី៩នាក់) បញ្ជូនទៅព្យាបាលចំនួន១២នាក់ ។ លោកលន់ លឹមថៃ អភិបាលរងខេត្តបានថ្លែងថា ក្នុងនាមតំណាងឱ្យលោក ហ៊ុន ណេង អភិបាលខេត្ត ប្រធានគណៈកម្មាធិការត្រួតពិនិត្យគ្រឿងញៀនខេត្តនិងក្នុងនាមរូបលោកផ្ទាល់ សូមវាយតំលៃខ្ពស់ចំពោះលទ្ធផលដែលសម្រេចបាន និងសូមកោតសរសើរដោយស្មោះចំពោះលេខាធិការដ្ឋានគ្រឿងញៀនខេត្ត ដែលជាសេនាធិការឱ្យខេត្តក៏ដូចជាសមាជិក-សមាជិការនៃគណៈកម្មាធិការខេត្តទាំងអស់ ដែលមានមនសិការទទូលខុសត្រូវនិងសហការអនុវត្តបានល្អទាំងលើការផ្សពផ្សាយ ការផ្តល់ព័ត៌មាន ការបណ្តុះបណ្តាលនិងលើកិច្ចប្រតិបត្តិការបង្ការទប់ស្កាត់បង្រ្កាបបទល្មើសគ្រឿងញៀន។ សកម្មភាពទាំងនោះបានឆ្លុះបញ្ចាំងយ៉ាងច្បាស់លាស់អំពីការខិតខំប្រឹងប្រែងចាត់ចាំងអនុវត្តផែនការប្រៀបសមរភូមិប្រឆាំងគ្រឿងញៀនរបស់រាជរដ្ឋាភិបាល ដែលបានកំណត់ថា ឆ្នាំ២០០៨ដល់ឆ្នាំ២០១៥ គឺកម្ពុជាគ្មានគ្រឿងញៀន៕  |
| រដ្ឋមន្ត្រីការបរទេសជប៉ុនសុំលាលែងព្រោះរឿងអំណោយខុសច្បាប់ Posted: 06 Mar 2011 07:50 PM PST  រដ្ឋមន្ត្រីការបរទេសជប៉ុន លោក SEIJI MAEHARA ប្រកាសពីការសុំលាលែងពីតំណែងរបស់លោកកាលពីថ្ងៃទី៦ មីនា បន្ទាប់ពី លោកទទួលស្គាល់ថា បានទទួលអំណោយជាប្រាក់ពីនារីជនជាតិបរទេសម្នាក់រស់នៅក្នុងប្រទេសជប៉ុនដែលផ្ទុយនឹងច្បាប់របស់ជប៉ុន។ លោក SEIJI MAEHARA អាយុ៤៨ឆ្នាំ ទើបកាន់តំណែងនេះបាន៦ខែប៉ុណ្ណោះ។ ជាមនុស្សលេចធ្លោម្នាក់ក្នុងផ្ទៃនៃគណបក្សប្រជាធិបតេយ្យជប៉ុន PDJ ដែលកំពុងកាន់អំណាចលោក SEIJI ត្រូវបានចាត់ទុកថា ជាអ្នកអាចបន្តតំណែងពីនាយករដ្ឋមន្ត្រីលោកណាអូតូកាន។ បន្ទាប់ពីបដិសេធរឿងនោះក្នុងគ្រាដំបូង លោក SEIJI MAEHARA ទទួលស្គាល់ថា លោកបានទទួលអំណោយជាប្រាក់ចំនួន៥០.០០០យេន(៤៣៤អឺរ៉ូ) ពីនារីម្នាក់ក្នុងចំណោមនារីដែលលោកស្គាល់ដែលនារីនោះជាជនជាតិកូរ៉េខាងត្បូងរស់នៅប្រទេសជប៉ុនចាប់តាំងពី ច្រើនឆ្នាំមកហើយ។ ច្បាប់ស្តីពីហិរញ្ញវត្ថុរបស់បណ្តាគណបក្សនយោបាយហាមឃាត់ដល់បណ្តាអ្នកទទួលខុសត្រូវខាងនយោបាយជប៉ុនមិនឱ្យទទួលយកអំណោយពីពលរដ្ឋ ឬមនុស្សទាំងឡាយមានដើមកំណើតបរទេស។  |
| ទូរគមនាគមន៍កម្ពុជាអបអរទិវាសិទ្ធិនារីអន្តរជាតិ៨មីនា Posted: 06 Mar 2011 07:45 PM PST  រាជធានីភ្នំពេញ ៖ ទូរគមនាគមន៍កម្ពុជាកាលពីថ្ងៃទី៤ មីនា មានរៀបចំពិធីអបអរសាទរទិវាសិទ្ធិនារីអន្តរជាតិ៨មីនា ខួបលើកទី១០០ ក្រោមអធិបតីភាពលោកសូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា ។ មានមតិសំណេះសំណាលនៅក្នុងឱកាសនោះ លោកសូរ ឃុន បានណែនាំឱ្យស្ត្រីទូរគមនាគមន៍ទាំងអស់ត្រូវចេះអភិវឌ្ឍន៍ខ្លួនឯងតាមរយៈការខិតខំរៀនសូត្រលើកកម្ពស់ការយល់ដឹង និងជំនាញវិជ្ជាជីវៈការងារ ដើម្បីលើកកម្ពស់តម្លៃស្ត្រី ។ ការពិតការទទួលស្គាល់តម្លៃស្ត្រីនៅក្នុងប្រទេសកម្ពុជា មិនមែនទើបតែមានរយៈពេល១០០ឆ្នាំកន្លងមកនេះនោះទេ កម្ពុជាមានប្រវត្តិទទួលស្គាល់និងលើកកម្ពស់តម្លៃស្ត្រីតាំងពីបុរាណកាលមកម៉្លេះ មកទល់នឹងបច្ចុប្បន្នចំនួនស្ត្រីក្នុងទីផ្សារការងារកាន់តែច្រើនឡើងៗតាំងពីថ្នាក់ទាបរហូតដល់ថ្នាក់ខ្ពស់់ក៏មានមិនតិចដែរ ។ តំណាងស្ត្រីទូរគមនាគមន៍កម្ពុជាបានថ្លែងថា ឥទ្ធិពលរបស់ស្ត្រីជាកត្តាដ៏សំខាន់មួយដែលអាចធានាបានដល់ការរីកចម្រើនលើគ្រប់វិស័យ និងមានន័យត្រួសត្រាយផ្លូវផងដែរ សម្រាប់ផ្តល់ឱកាសដល់នារីកម្ពុជាទាំងបច្ចុប្បន្ន និងអនាគត និងមានលទ្ធភាពគ្រប់គ្រាន់សម្រាប់អភិវឌ្ឍន៍ខ្លួនគាត់ឱ្យមានសមត្ថភាព ទេពកោសល្យ និងមុខជំនាញ វិជ្ជាជីវៈដែលជាមធ្យោបាយដ៏ប្រសើរបំផុតសម្រាប់ផ្សព្វផ្សាយ ពីកិត្តិយសនារីកម្ពុជាទាំងបច្ចុប្បន្ន និងអនាគត ។ លើសពីនេះទៀត សំឡេងរបស់ស្ត្រីឆ្លុះបញ្ចាំងចេតនាពិតប្រាកដដែលមានដូចជាអ្នកមើលថែទាំគ្រួសារ អ្នកគ្រប់គ្រង និងជាអ្នកឧបត្ថម្ភផ្គត់ផ្គង់ ហើយមានភាពច្បាស់លាស់ ក្នុងគម្រោងអភិវឌ្ឍន៍ជាតិនៅគ្រប់លំដាប់ថ្នាក់ ជាពិសេសក្នុងគម្រោងអភិវឌ្ឍន៍ភូមិ-ឃុំ កាត់បន្ថយភាពក្រីក្រ លុបបំបាត់ភាពក្រតោកយ៉ាក សុខភាពទន់ខ្សោយ ក្រខ្សត់ចំណេះដឹង និងតួនាទីអន់ថយ ។ ការយកចិត្តទុកដាក់ពីរាជរដ្ឋាភិបាលបានផ្តល់អាទិភាពខ្ពស់ក្នុងការលើកកម្ពស់តួនាទីនិងស្ថានភាពរបស់ស្ត្រីដោយមានការយកចិត្តទុកដាក់ ជំរុញការកសាងសមត្ថភាពស្ត្រីលើគ្រប់ផ្នែក កែប្រែឥរិយាបថ ប្រើអំពើហិង្សាគ្រប់រូបភាពប្រឆាំងនឹងស្ត្រីភេទ ហើយនឹងសមធម៌ដើម្បីឱ្យស្ត្រីមានលទ្ធភាពគ្រប់គ្រាន់ ក្នុងការចូលរួមយ៉ាងសកម្ម និងដោយស្មើភាពក្នុងដំណើរការកសាងប្រទេស ដែលបច្ចុប្បន្ននារីយើងមានការរីកចម្រើនគួរឱ្យកត់សម្គាល់ ។ តំណាងស្ត្រីទូរគមនាគមន៍កម្ពុជាបានថ្លែងបន្តថា កន្លងមក រាជរដ្ឋាភិបាលបានយកចិត្តទុកដាក់លើកកម្ពស់ស្ថានភាពស្ត្រី ក្នុងតួនាទីធ្វើសេចក្តីសម្រេចចិត្តនៅក្នុងវិស័យសាធារណៈ និងឯកជនតាមរយៈការរៀបចំគោលនយោបាយ និងកម្មវិធីបង្កើនចំនួនមន្ត្រី និងសមត្ថភាពរបស់គេ ជាក់ស្តែងសមាមាត្រស្ត្រីក្នុងជួររាជរដ្ឋាភិបាលកើនឡើង មានស្ត្រីមួយរូបជាឧបនាយករដ្ឋមន្ត្រី ២រូបជារដ្ឋមន្ត្រី ជារដ្ឋលេខាធិការ១៦រូប អនុរដ្ឋលេខាធិការ ៣៨រូប ។ ក្នុងជួរអាជ្ញាធរដែនដីមានស្ត្រីជាអភិបាលរងខេត្ត-ក្រុង ស្ត្រីជាអភិបាលស្រុក ចំណែកស្ត្រីក្នុងក្រុមប្រឹក្សាឃុំ-សង្កាត់ មានការកើនឡើងលទ្ធផលដ៏ត្រចះត្រចង់ ជាសក្ខីភាពបង្ហាញពីការយកចិត្តទុកដាក់របស់សម្តេចអគ្គមហាសេនាបតីតេជោហ៊ុន សែន ជានាយករដ្ឋមន្ត្រី និងរាជរដ្ឋាភិបាល ក្នុងការឈានទៅសម្រេចគោលនយោបាយសមភាពយេនឌ័រ។ ដោយឡែកនៅទូរគមនាគមន៍កម្ពុជា មានការគាំទ្រ និងយកចិត្តទុកដាក់ពីលោកប្រតិភូរាជរដ្ឋាភិបាល ទទួលបន្ទុកជាអគ្គនាយកនៃទូរគមនាគមន៍កម្ពុជា យើងមានថ្នាក់ដឹកនាំជានារី ចាប់ពីប្រធានផ្នែក ប្រធានការិយាល័យ រហូតដល់ប្រធាននាយកដ្ឋាន និងអនុប្រធាននាយកដ្ឋាន ៕  |
| ចិននឹងលុបបំបាត់ចោលភាពក្រីក្រនៅត្រឹមឆ្នាំ2020 Posted: 06 Mar 2011 07:40 PM PST  នាយករដ្ឋមន្ត្រីចិន លោកវេន ជាបាវ ថ្លែងកាលពីថ្ងៃទី៦ មីនា ថា ចិនមានបំណងលុបបំបាត់ភាពក្រីក្រឱ្យអស់ត្រឹមឆ្នាំ២០២០ ហើយពេលនេះចិនកំពុងតាមដានបន្ទាត់ភាពក្រីក្ររបស់ពលរដ្ឋដើម្បីជួយពលរដ្ឋក្រីក្រ ។  |
| សមត្ថកិច្ចទប់ស្កាត់ក្មេងទំនើងកាប់ចាក់គ្នាកន្លែងលេងល្ខោនក្នុងវត្តទួលពិសិដ្ឋ Posted: 06 Mar 2011 07:40 PM PST  ខេត្តកំពង់ចាម ៖ យោងតាមបញ្ជាររបស់ លោកឧត្តមសេនីយ៍ត្រីនួន សាមិន ស្នងការនគរបាលខេត្ត កម្លាំងអធិការដ្ឋាននគរបាលស្រុកត្បូងឃ្មុំ បានយកចិត្តទុកដាក់និងអនុវត្តន៍តាមជាប់ជាប្រចាំ ។ ជាក់ស្តែងគ្រាន់តែយប់ថ្ងៃទី៣ មីនា និងម៉ោង១ រំលងអធ្រាត្រ ឈានចូលព្រឹកថ្ងៃទី៤ មីនា សមត្ថកិច្ចបង្រ្កាបបានក្រុមក្មេងទំនើងចំនួន២ក្រុមដែលមានគ្នាចំនួនដល់ទៅ៩នាក់ ដកហូតបានកាំបិតបុ័ងតោ១ បញ្ជូនមកកាន់អធិការដ្ឋាននគរបាលស្រុកត្បូងឃ្មុំ។ តាមលោកអនុសេនីយ៍ឯកឡុង សារិន អធិការរងនគរបាលស្រុកត្បូងឃ្មុំ ទទួលផែនយុត្តិធម៌បានប្រាប់កោះសន្តិភាពឱ្យដឹងថា ដោយអនុវត្តន៍តាមគោលនយោបាយភូមិ-ឃុំមានសុវត្ថិភាព កំលាំងប៉ុស្តិ៍រដ្ឋបាលឃុំមង់រៀវ បានចេញល្បាតតាមដងផ្លូវសាធារណៈនានានៅវេលាម៉ោង១២យប់អាធ្រាត្រ ថ្ងៃទី៣មីនា នៅត្រង់ចំនុចភូមិមង់រៀវ ឃុំមង់រៀវ បានឃាត់ក្មេងទំនើង២នាក់ក្នុងនោះមានម្នាក់ឈ្មោះឡូយ ម៉េងលាង ភេទប្រុស អាយុ២០ឆ្នាំ និងម្នាក់ទៀតឈ្មោះអ៊ាន ទួត ភេទប្រុស ហៅតុង អាយុ១៧ឆ្នាំ និងដកហូតបានកាំបិត១ដែលដាក់សៀតនៅនឹងចង្កេះរបស់ជនទី១ដែលធ្លាប់ត្រូវបានអប់រំចាប់ម្តងរួចមកហើយនាពេលកន្លងមក ។ លោកអធិការរងរូបនេះបានបន្តថា ដោយឡែកនៅវត្តទូលពិសិដ្ឋ ស្ថិតនៅភូមិដូង ឃុំថ្មពេជ្រ ស្រុកត្បូងឃ្មុំ មានរៀបចំបុណ្យផ្កាសាមគ្គីសាមគ្គីដោយមានល្ខោនបាសាក់បានសំដែងជូនទស្សនារយៈពេល៣យប់ជាប់ៗគ្នា ចាប់ពីថ្ងៃទី១ មីនា និងរហូតបន្តមកថ្ងៃទី៣ មីនា និងមានប្រជាពលរដ្ឋមកពីគ្រប់ទិសទីរីករាយទស្សនាយ៉ាងច្រើនកុះករ ។ ប៉ុន្តែនៅវេលាម៉ោង១រំលងអធ្រាត្រឈានចូលព្រឹកថ្ងៃទី៤មីនា ស្រាប់តែមានក្រុមក្មេងទំនើង២ក្រុមមានគ្នាប្រហែលជិត២០នាក់មានទំនាស់ចាប់ផ្តើមក្របួច.កអាវគ្នា ជាហេតុធ្វើឱ្យមានការភ្ញាក់ផ្អើល ។ ភ្លាមៗនោះត្រូវបានកំលាំងនគរបាលដែលឈរជើងការពារក្នុងបរិវេណវត្តបានចេញមកអន្តរាគមន៍ឃាត់មិនឱ្យមានទំនាស់ តែក្រុមក្មេងទំនើងទាំងនោះ ហាក់បីដូចជាមិនខ្លាចចំពោះសមត្ថកិច្ចទាល់តែសោះបានសង្រ្គឺតធ្មេញដាក់គ្នាដូចខ្លាគ្រហឹម ។ លោកនាយប៉ុស្តិ៍រដ្ឋបាលឃុំថ្មពេជ្របានទូរស័ព្ទមកកាន់លោកវរសេនីយ៏ ហ៊ាង ហ៊ត់ អធិការនគរបាលស្រុកត្បូងឃ្មុំដើម្បីសុំគោលការណ៍ និងទទូលបានបញ្ជារពីលោកវរសេនីយ៍ឯក ជឹម សេងហុង ស្នងការរងនគរបាលខេត្តទទួលផែនការិយាល័យកណ្តាលយុត្តិធម៌កម្លាំងស្រុកបានចេញទៅជួយដោយបានឃាត់ក្មេងទំនើងបាន៧នាក់រួមមាន១-ឈ្មោះស្រ៊ា សិដ្ឋ ភេទប្រុសអាយុ០ឆ្នាំ ២-ឈ្មោះលីម ឆៃលី ភេទប្រុសអាយុ១៩ឆ្នាំ ៣-ឈ្មោះឈាត ឆាយ ភេទប្រុស អាយុ១៩ឆ្នាំ ៤-ឈ្មោះរូន ណោ ភេទប្រុសអាយុ២០ឆ្នាំ ៥-ឈ្មោះសុខ ណាងភេទប្រុសអាយុ២៩ឆ្នាំ ៦-ឈ្មោះ ណាង ស៊ីណា ភេទប្រុស អាយុ២៣ឆ្នាំ ៧-ឈ្មោះវៃ ស៊ីថន ភេទប្រុសអាយុ២៥ឆ្នាំ ទាំងអស់គ្នារស់នៅឃុំបឹងព្រូលនិងឃុំរកាពប្រាំស្រុកត្បូងឃ្មុំ ។ លោកអនុសេនីយ៍ឯក ឡុង សារិន អធិការរងនគរបាលស្រុកត្បូងឃ្មុំបានបញ្ជាក់ថា ក្រុមក្មេងទំនើងទាំងនេះសុទ្ធតែមានឈ្មោះនៅក្នុងបញ្ជីរគ្រប់គ្រង់របស់សមត្ថកិច្ចផងដែរ ។ ផ្អែកតាមបញ្ជាររបស់លោកស្នងការនគរបាលខេត្តក្រុមក្មេងទាំងដែលបានបង្រ្កាបទាំង៩នាក់នេះត្រូវបានធ្វើការអប់រំ ដោយឱ្យឪពុកម្តាយមកធានានឹងមិនឱ្យមានលើកក្រោយទៀតទេបើពុំនោះនឹងចាត់ការតាមច្បាប់ ៕  |
| ពិធីការមួយនៅឥណ្ឌាចំណាយប្រាក់ដល់ទៅ15លានអឺរ៉ូ Posted: 06 Mar 2011 07:35 PM PST នៅប្រទេសឥណ្ឌាមានពិធីរៀបការដ៏ធំបំផុតមួយដែលផ្អើលពួកអ្នកកាសែតឥណ្ឌានាំគ្នាចុះទៅយកព័ត៌មានឱ្យបានលម្អិត ពិសេសលើពិធីជប់លៀងទទួលភ្ញៀវ ។ លោកឡាលីត តាន់វ៉ារ បានរៀបការនាពេលថ្មីៗនេះជាមួយគូដណ្តឹងនាងយ៉ូហ្ស៊ីតា ចាអ៊ូណា ពូរីយ៉ា ក្នុងគេហដ្ឋានគ្រួសារជនបទមួយ ស្ថិតនៅជិតទីក្រុងញូវដែល្លី ។ គេមានការភ្ញាក់ផ្អើលយ៉ាងខ្លាំងពេលឮពីការប្រកាសតួលេខទាក់ទិនដល់ចំនួនភ្ញៀវដែលអញ្ជើញចូលរួមហូបការ ដែលមានរវាងពី១៨.០០០ទៅ៣០.០០០នាក់ និងសេចក្តីរាយការណ៍ថា គ្រាន់តែការរៀបចំកន្លែងរៀបការនេះគេប្រើពេលអស់៤០ថ្ងៃ និងប្រើមនុស្សដល់១.០០០នាក់ ។ កូនកម្លោះអាយុ២៦ឆ្នាំ ពាក់ខ្សែ.កធ្វើពីក្រដាសប្រាក់យ៉ាងច្រើន ហើយបានទទួលជាពិសេសនូវឧទ្ធម្ភាគចក្រមួយគ្រឿងជាកាដូ ។ ប្រាកដណាស់ នោះគឺមហាអាពាហ៍ពិពាហ៍មួយដែលពុំធ្លាប់មានដូចសោះនៅឥណ្ឌាធ្វើឱ្យសារព័ត៌មានឥណ្ឌាចេញផ្សាយព្រោងព្រាត ។ ម្ហូបអាហារដែលទទួលភ្ញៀវមាន១០០មុខខុសៗគ្នា ហើយក្នុងពិធីរៀបការមានដាក់តាំងអេក្រង់ទូរទស្សន៍យ៉ាងធំចំនួន១២ ។គ្រាន់តែជាងកោរពុកមាត់ ពុកចង្ការឱ្យកូនកម្លោះទទួលបានកាដូដល់ទៅ៥.៥០០ដុល្លារ ដែលបានចូលរួមក្នុងការរៀបចំ រួចកាសែត TIMES OF INDIA ប៉ាន់ប្រមាណតម្លៃនៃការរៀបការនេះថា មានចំនួនប្រមាណជា២២លានដុល្លារ ឬ១៥លានអឺរ៉ូ ។ ចំណែកឪពុករបស់កូនកម្លោះនិយាយប្រាប់សារព័ត៌មានថា «ខ្ញុំពុំយល់សោះ ហេតុអ្វីក៏ការរៀបការនេះល្បីខ្លាំងម៉្លេះ ។ រាល់ការវាយតម្លៃក្នុងម៉ាស៊ីនឃោសនាសុទ្ធតែជាពាក្យចចាមអារ៉ាម។ នេះជាពិធីរៀបការសាមញ្ញមួយប៉ុណ្ណោះ។ ឪពុកកូនកម្លោះនិយាយថា កូនកម្លោះជាអ្នកនយោបាយល្បីមួយរូប និងជាអ្នកមានចំណែកឪពុករបស់កូនក្រមុំ ជាអតីតអ្នកនយោបាយម្នាក់នៅរដ្ឋធានីឥណ្ឌា ។ មុនពេលរៀបការ មនុស្ស២.០០០នាក់ ក៏បានអញ្ជើញចូលរួមក្នុងពិធីមួយដែរ ដោយក្នុងឱកាសនោះទទួលបានរូបនំធ្វើពីប្រាក់សុទ្ធមួយ និងសម្លៀកបំពាក់មួយកំប្លេ ព្រមទាំងប្រាក់៥០០ដុល្លារសម្រាប់ភ្ញៀវម្នាក់ៗ ។ គ្រួសារកូនក្រមុំទទួលអនាគតកូនប្រសាប្រុសជាមួយកាដូមួយមានទឹកប្រាក់៥លានដុល្លារ ៕  |
| សភាពការណ៍នៅលីប៊ី ៖ កងទ័ពរដ្ឋាភិបាលបន្តការវាយបកពួកបះបោរដែលដកថយពីក្រុងនានា Posted: 06 Mar 2011 07:34 PM PST  កងកម្លាំងស្មោះត្រង់នឹងលោកមូអាម៉ា កាដាហ្វី បានបន្តកាលពីថ្ងៃទី៦ មីនា នូវការវាយបករបស់ខ្លួនប្រឆាំងពួកបះបោរដែលប៉ុនប៉ងផ្តួលរំលំរដ្ឋអំណាចបច្ចុប្បន្ន។ ការប្រយុទ្ធគ្នាដ៏សំខាន់នាថ្ងៃទី៦ មីនា កើតមាននៅទីក្រុង MISTRATA ចម្ងាយ២០០គីឡូម៉ែត្រខាងកើតទីក្រុងទ្រីប៉ូលី។ ពួកស្និទ្ធលោកកាដាហ្វី បានវាយរុញច្រានពួកឧទ្ទាមនៅតាមផ្លូវថ្នល់ទៅកាន់ទីក្រុង SYRTE ដែលជាទីក្រុងកំណើតរបស់លោកកាដាហ្វី។ ជាមួយនឹងការប្រើប្រាស់រថក្រោះ និងកាំភ្លើងធំនោះជាការវាយលុកយ៉ាងសាហាវបំផុតរហូតមកទល់ពេលនេះ ដោយពួកអ្នកគាំទ្រលោកកាដាហ្វី ដើម្បីដណ្តើមត្រួតត្រាវិញនូវទីក្រុង MISRATA ។ គ្រូពេទ្យម្នាក់រៀបរាប់ពី មនុស្សស្លាប់១៨នាក់ក្នុងការប៉ះទង្គិចគ្នា។ កងទ័ពលីប៊ីក៏បន្តផងដែរនូវការវាយលុកលើទីក្រុង ZAOUIAH តាំងពីថ្ងៃទី៥ មីនាមកដោយប្រើរថក្រោះ យន្តហោះប្រដេញ និងឧទ្ធម្ភាគចក្រ។ កងទ័ពលោកកាដាហ្វីក៏ប្រកាសផងដែរពីការដណ្តើមត្រួតត្រាតំបន់មួយនៅជុំវិញទីក្រុងបេនហ្គាហ្ស៊ី ដែលពួកអ្នកកាសែតបានបដិសេធ។ ទោះបីជាទទួលបរាជ័យនាពេលមុននេះក្តីក៏របបលោកកាដាហ្វីបានប្រារព្ធធ្វើពិធីអបអរសាទរដល់ជោគជ័យរបស់ខ្លួនដែរក្្នុងទីក្រុងទ្រីប៉ូលី។ កាលពីព្រឹកថ្ងៃទី៦ មីនា ពួកអ្នកគាំទ្រលោកកាដាហ្វីជាច្រើនពាន់នាក់បានលើកគ្នាមកកាន់ដងវិថីទាំងឡាយដោយគ្រវីទង់ជាតិ និងបាញ់ទៅលើមេឃ។ ដើម្បីលើកទឹកចិត្តដល់ពួកអ្នកគាំទ្រ រដ្ឋអំណាចបានលុបចោលពន្ធដាជាច្រើន។ ពួកស្និទ្ធលោកកាដាហ្វី ក៏ទទួលបានជោគជ័យដែរក្នុងការវាយបណ្តេញពួកឧទ្ទាមចេញពីទីក្រុង BIN DJAOUAD ចំងាយ១៦០គីឡូម៉ែត្រខាងកើតទីក្រុង SYRTE ។ កងទ័ពស្និទ្ធលោកកាដាហ្វីកាលពីថ្ងៃទី៦ មីនា បានធ្វើការបាញ់ផ្លោង និងវាយប្រហារតាមជើងគោកប្រឆាំងទីក្រុងជាច្រើនត្រួតត្រាដោយពួក  |
| នាយករដ្ឋមន្ត្រីប៉ាឡេស្ទីនស្នើបង្កើតរដ្ឋាភិបាលបង្រួបបង្រួមមួយ Posted: 06 Mar 2011 07:23 PM PST  លោក Salam Fayyad ដែលនឹងត្រូវតែងតាំងជានាយករដ្ឋមន្ត្រីប៉ាឡេស្ទីន ថ្លែងកាលពីថ្ងៃទី៦ មីនា ថា ក្រោយពីរូបលោកបានសិក្សាអំពីការខុសឆ្គងដែលនាំដល់ការបែកបាក់របស់ប៉ាឡេស្ទីនកាលពីឆ្នាំ២០០៧មកនោះ លោកបានស្នើឱ្យមានការបង្កើតរដ្ឋាភិបាលបង្រួបបង្រួមមួយដែលរាប់បញ្ចូលទាំងក្រុមហាម៉ាស់ និងក្រុមហ្វាតាហ៍ ។ លោក Salam ថ្លែងដូច្នេះក្នុងអំឡុងពេលនៃបទសម្ភាសន៍មួយជាមួយទីភ្នាក់ងារសារព័ត៌មានចិនស៊ីនហួ ។  |
| ព្រួតគ្នាវាយស្ត្រីម្នាក់ប៉ូលិសចាប់បានបីនាក់ តុលាការឃុំខ្លួនម្នាក់ Posted: 06 Mar 2011 07:14 PM PST  ខេត្តកណ្តាល ៖ ស្ត្រីម្នាក់បានរងរបួសយ៉ាងដំណំដោយសារតែក្រុមគ្រួសារមួយនៅផ្ទះជិតគ្នា ព្រួតវាយដោយសារតែខឹងស្ត្រីរូបនេះជះទឹកដាក់ ខណៈភាគីផ្ទះជិតគ្នាម្នាក់បានស្តោះទឹកមាត់ចំអកឡកឡឺយ ។ ហេតុការណ៍ប្រទូស្តរ៉ាយមួយគ្រួសារព្រួតគ្នាវាយលើស្ត្រីម្នាក់កើតឡើងកាលពីវេលាម៉ោង១០និង៣០នាទី ថ្ងៃទី៥ មីនា នៅខាងមុខផ្ទះស្ត្រីរងគ្រោះឈ្មោះម៉ៅ សុផារី អាយុ៤៨ឆ្នាំ រស់នៅភូមិតាខ្មៅ សង្កាត់តាខ្មៅ ក្រុងតាខ្មៅ ។ ចំណែកភាគីក្រុមជនសង្ស័យមានគ្នា៦នាក់ ប៉ុន្តែប៉ូលិសឃាត់ខ្លួនបានតែ៣នាក់ ១-ឈ្មោះប៊ូ ភំ ភេទប្រុស អាយុ៦៣ឆ្នាំ ២-ឈ្មោះមាស ធារ៉ា ភេទប្រុស អាយុ២៤ឆ្នាំ និង៣-ឈ្មោះភំ ភួង ភេទប្រុស អាយុ២០ឆ្នាំ ។ ចំណែក៣នាក់ទៀតមិនត្រូវបានចាប់ខ្លួន ១-ឈ្មោះភំ សុខា ភេទស្រី អាយុ២៣ឆ្នាំ ២-ឈ្មោះហែម វណ្ណា ភេទស្រី អាយុ៥២ឆ្នាំ និង៣-ឈ្មោះសួង មករា ភេទប្រុស អាយុ៣០ឆ្នាំ អ្នកទាំងអស់គ្នារស់នៅផ្ទះជិតគ្នា ជាមួយជនរងគ្រោះ ។ តាមសំដីស្ត្រីរងគ្រោះបានប្រាប់ប៉ូលិសថា នៅថ្ងៃកើតហេតុគាត់ជាជនរងគ្រោះនៅផ្ទះតែម្នាក់ឯង ។ នៅពេលកើតហេតុឈ្មោះប៊ូ ភំ បានដើរកាត់មុខផ្ទះគាត់ ហើយបានខាកស្តោះទឹកមាត់នៅខាងមុខផ្ទះជាច្រើនដង ដែលគាត់ចាត់ទុកថា ជាការចំអកឡកឡឺយ ។ ពេលនោះគាត់បានចេញពីក្នុងផ្ទះមកសួរឈ្មោះប៊ូ ភំ ថា ចុះហេតុអ្វីបានជាដើរកាត់មុខផ្ទះ ខ្ញុំហើយខាកស្តោះទឹកមាត់ តែរហូតអ៊ីចឹង ។ សួរចប់ជនរងគ្រោះក្តៅចិត្តស្រាប់ផង បានដើរទៅដងទឹកមួយផ្តិលយកមកជះដាក់ឈ្មោះប៊ូ ភំ បណ្តាលឱ្យទទឹក ពេលនោះក៏មានការប្រវាយប្រតប់គ្នារវាងអ្នកទាំងពីរកើតឡើង ។ ខណៈនោះដែរក្រុមគ្រួសាររបស់ឈ្មោះប៊ូ ភំ មានគ្នា៦នាក់បានចេញមកព្រួតគ្នាវាយទៅលើរូបគាត់ ខ្លះបោចសក់ ខ្លះទៀតវាយដោយដៃ និងទាត់ធាក់ បណ្តាលឱ្យរូបគាត់តែម្នាក់ឯងរងរបួសយ៉ាងដំណំ ប៉ោងមុខមាត់ ។ ក្រោយពីកើតហេតុ ជនរងគ្រោះត្រូវបានគេបញ្ជូនទៅសំរាកព្យាបាលនៅមន្ទីរពេទ្យជ័យជំនះ ស្រុកតាខ្មៅ។ ចំណែកបក្សពួកក្រុមគ្រួសារដែលព្រួតគ្នាវាយគេនេះត្រូវបានប៉ូលិសក្រុងតាខ្មៅ ហៅទៅធ្វើការសាកសួរហើយធ្វើការឃាត់ខ្លួន៣នាក់ គឺ១-ឈ្មោះប៊ូ ភំ ២-ឈ្មោះមាស ធារ៉ា និង៣-ឈ្មោះភំ ភួង ។ មន្ត្រីប៉ូលិសបានឱ្យដឹងទៀតថា ជនសង្ស័យទាំង៣នាក់ បានកសាងសំណុំរឿងបញ្ជូនទៅកាន់សាលាដំបូងខេត្តកណ្តាល ចាត់ការបន្តទៀតតាមច្បាប់។ នៅរសៀលថ្ងៃទី៥ មីនា ក្នុងចំណោមជនសង្ស័យទាំងបីនាក់ ត្រូវបានឃុំខ្លួនតែម្នាក់ទេ គឺឈ្មោះប៊ូ ភំ ដែលចេញដីកាសម្រេចឃុំខ្លួនដោយលោកខូវ ចាន់ថូ ចៅក្រមស៊ើបសួរនៃសាលាដំបូងខេត្តកណ្តាល ៕  |
| ទីតាំងពលការិនីលួចរត់ធ្លាក់បាក់ជើង ពេលនេះស្លាប់ស្ត្រីម្នាក់ទៀត Posted: 06 Mar 2011 07:10 PM PST    រាជធានីភ្នំពេញ ៖ ពលការិនីម្នាក់ស្លាប់នៅលើទីតាំងផ្ទះល្វែងជាន់ទី២ របស់ក្រុមហ៊ុនធី & ភី ខូលអិលធីឌី ដែលជាក្រុមហ៊ុនរកការងារជូនពលការិនីខ្មែរទៅធ្វើការនៅបរទេស ដែលមានទីតាំងស្ថិតនៅផ្ទះលេខ៣៤ ផ្លូវ២៧១ ភូមិបឹងឈូក សង្កាត់ទឹកថ្លា ខណ្ឌសែនសុខ កាលពីវេលាម៉ោង២ អធ្រាត្រឈានចូលថ្ងៃទី៦ មីនា ។ នេះជាហេតុការណ៍មួយថ្មីទៀតបន្ទាប់ពីពលការិនីម្នាក់ដែលនឹកកូនពេក សុំច្បាប់មិនបានក៏ប្តូរជីវិតសម្រូតខ្លួនចុះតាមទុយោទឹកធ្លាក់បាក់ជើង កាលពីថ្ងៃទី២ មីនា មុននេះ ។ ប៉ូលិសបាននាំខ្លួនមនុស្សពាក់ព័ន្ធ៣នាក់ ជុំវិញការស្លាប់ពលការិនីនេះមានអ្នកបើកបររថយន្តម្នាក់ និងអ្នកមើលការខុសត្រូវក្រុមហ៊ុន២នាក់ ទៅធ្វើការសាកសួរនៅអធិការដ្ឋាន ក៏ប៉ុន្តែជនទាំង៣នាក់ ពុំត្រូវបានប៉ូលិសឃាត់ខ្លួន ឬចោទប្រកាន់ពីបទអ្វីឡើយ ។ តែទោះបីជាយ៉ាងណា ប៉ូលិសនិយាយថា កំពុងតែកសាងសំណុំរឿងបញ្ជូនទៅតុលាការ ដើម្បីចាត់ចែងរបៀបណា ខណៈពេលដែលក្រុមហ៊ុននេះចេះតែកើតមានរឿងរ៉ាវអាក្រក់បន្តបន្ទាប់បែបនេះ ។ នៅកន្លែងកើតហេតុជាទីដែលពលការិនីម្នាក់ស្លាប់ ពួកអ្នកមើលការខុសត្រូវក្រុមហ៊ុនបានប្រើកម្លាំងជិត១០នាក់ ជាមនុស្សកាចមករារាំង និងបណ្តេញមិនឱ្យអ្នកកាសែតយកព័ត៌មានឡើយ ។ ជុំវិញករណីពលការិនីស្លាប់ខាងលើ លោកម៉ក់ ហុង អធិការប៉ូលិសខណ្ឌសែនសុខ បានប្រាប់កោះសន្តិភាពថា ពលការិនីនេះឈ្មោះស៊ឹង ស៊ីណា អាយុ៣៧ឆ្នាំ មានស្រុកកំណើតនៅភូមិវាលគ្រៀល ស្រុកកំពង់សៀម ខេត្តកំពង់ចាម មានកូន៣នាក់ ស្រីម្នាក់ ប្រុស២នាក់ ហើយបានមកស្នាក់នៅក្នុងក្រុមហ៊ុននេះប្រមាណជាង៤ខែមកហើយ ដោយរង់ចាំទៅស៊ីឈ្មួលបំរើគេនៅប្រទេសម៉ាឡេស៊ី ។ លោកបន្តថា ការស្លាប់របស់ពលការិនីនេះ ដោយសារគាំងបេះដូង (ខ្យល់គរ) នេះ បើតាមការពិនិត្យរបស់គ្រូពេទ្យ។ លោកបញ្ជាក់ទៀតថា មនុស្ស៣នាក់ដែលប៉ូលិសនាំខ្លួនទៅសាកសួរគឺ ១-ឈ្មោះពៅ ថុន អ្នកបើកបររថយន្ត ២-ឈ្មោះឆាយ ហាក់ និង៣-ឈ្មោះជិន សុវណ្ណ ជាអ្នកមើលការខុសត្រូវក្រុមហ៊ុន ដោយពួកគេជាអ្នកដឹកសពស្ត្រីរងគ្រោះចេញពីទីតាំងក្រុមហ៊ុនបំណងទៅមន្ទីរពេទ្យ ប៉ុន្តែមិនទាន់ដល់មន្ទីរពេទ្យផង ក៏ដឹកត្រឡប់មកវិញ ទើបរាយការណ៍ប្រាប់ប៉ូលិស។ ត្រង់ចំណុចនេះ ជំហានដំបូងប៉ូលិសបានសង្ស័យថា បើមនុស្សស្លាប់ហើយម៉េចក៏ដឹកទៅមន្ទីរពេទ្យ មិនទុកនៅក្នុងផ្ទះក្រុមហ៊ុន ហើយរាយការណ៍ប្រាប់ប៉ូលិសដើម្បីទៅពិនិត្យ។ ប៉ុន្តែអ្នកទាំងបីបាននិយាយដោះសារថា ការដែលពួកគេដឹកស្ត្រីរងគ្រោះនេះទៅមន្ទីរពេទ្យ ដើម្បីជួយសង្គ្រោះ តែដល់ឃើញស្ត្រីនេះស្លាប់ហើយក៏ដឹកមកផ្ទះវិញ។ ចំពោះមន្ត្រីប៉ូលិសផ្នែកបច្ចេកទេសពិនិត្យសាកសពបានឱ្យដឹងថា ក្រោយការពិនិត្យលើខ្លួនសាកសពស្ត្រីរងគ្រោះ គឺពុំបានរកឃើញស្លាកស្នាមអ្វីគួរឱ្យកត់សំគាល់នោះទេ ។ ប៉ុន្តែទោះបីជាយ៉ាងណា គ្រូពេទ្យបានបូមឈាមសាកសពយកទៅពិនិត្យមើលថែមទៀត ថា តើស្ត្រីរងគ្រោះនេះអាចមានជាតិពុល ឬយ៉ាងណានោះ? ចំណែកលោកឃួង ស្រេង អភិបាលខណ្ឌសែនសុខ បានប្រាប់កោះសន្តិភាពដែរថា លោកបានបញ្ជាឱ្យប៉ូលិសកសាងសំណុំរឿងបញ្ជូនទៅតុលាការចំពោះរឿងទាំងប៉ុន្មានដែលកើតមានបន្តបន្ទាប់នេះ ហើយតុលាការជាអ្នកសម្រេចយ៉ាងណាជាឆន្ទានុសិទ្ធិរបស់តុលាការ។ គួរបញ្ជាក់ថា ក្រុមហ៊ុន T&P ខាងលើនេះ បានកើតបញ្ហាចំនួន២ដង ក្នុងរយៈពេលមិនទាន់បានមួយសប្តាហ៍ផង ហើយថែមទាំងធ្វើឱ្យអាជ្ញាធរមានសមត្ថកិច្ចឈឺក្បាលថែមទៀតផង ។ បើទោះបីជាយ៉ាងណា ប្រភពព័ត៌មានបានបង្ហើបឱ្យដឹងថា ពលការិនីជាច្រើននាក់ត្រូវគេផ្ទុកឱ្យរស់នៅលើផ្ទះល្វែងជាន់ទី២ ដោយការចេញចូលមានការឆែកឆេរពីអ្នកយាមទ្វារមានភាពប្រយ័ត្នប្រយែងខ្លាំងណាស់ ។ បើមើលទិដ្ឋភាពពីខាងក្រៅនោះវិញ ជុំវិញរបងនេះត្រូវបានគេហ៊ុមព័ទ្ធដោយសំណាញ់ដែក និងបន្លាលួស និងមានជញ្ជាំងស័ង្កសីបិទពីចំហៀងថែមទៀតផងដែលគេមើលពីក្រៅទៅសង្ស័យមន្ទីរឃុំឃាំងអ្វីមួយ៕  |
| បាញ់៧គ្រាប់ប្លន់លុយពីជនជាតិចិនចំនួន៤ពាន់ដុល្លារ តាមប្រភពព័ត៌មានថាអ្នករងគ្រោះចេញពីបនល្បែង Posted: 06 Mar 2011 06:42 PM PST រាជធានីភ្នំពេញ ៖ បុរសជនជាតិចិនម្នាក់បានរងរបួសយ៉ាងធ្ងន់ធ្ងរដោយសារអំពើបាញ់ប្រហារប្លន់យកកាបូបប្រាក់ពីសំណាក់ខ្មាន់កាំភ្លើងមិនស្គាល់អត្តសញ្ញាណមួយក្រុមបាញ់ត្រូវចំនួន៣គ្រាប់។ ហេតុការណ៍នេះកើតឡើងនៅតាមបណ្តោយផ្លូវលេខ២៨២ សង្កាត់បឹងកេងកងទី១ ខណ្ឌចំការមន កាលពីវេលាម៉ោង១១និង៣០នាទីយប់ ថ្ងៃទី៤ ឆ្នាំ២០១១។ បុរសរងគ្រោះក្នុងអំពើបាញ់ប្រហារខាងលើឈ្មោះយោវ យ៉ឺនយ៉ាង អាយុ៣៤ឆ្នាំ ជាភ្ញៀវទេសចរ ជួលផ្ទះស្នាក់នៅសង្កាត់វាលវង់ ខណ្ឌ៧មករា។ មុនពេលកើតហេតុឈ្មោះយោវ យ៉ឺនយ៉ាង បានជិះម៉ូតូកង់បីមួយគ្រឿងចេញពីលេងល្បែងជាមួយនារីជនជាតិចិនម្នាក់ទៀតជាមិត្តភក្តិ។ លុះធ្វើដំណើរទៅដល់មុខក្លឹបមេហ្គា ជនជាតិចិនទាំង២ក៏បានឱ្យម៉ូតូកង់បីឈប់ ហើយ ចុះពីលើម៉ូតូបំណងចូលច្រៀងខារ៉ាអូខេ នៅក្នុងក្លឹបមេហ្គា ខណៈពេលនោះស្រាប់តែមានជនមិនស្គាល់អត្តសញ្ញាណ២នាក់ជិះម៉ូតូម៉ាក C125 ពណ៌ខ្មៅមួយគ្រឿង មកឈប់ទន្ទឹម ហើយដកកាំភ្លើងខ្លីភ្ជង់ប្លន់យកកាបូបប្រាក់ពីឈ្មោះយូ លី ជាហេតុបណ្តាលឱ្យឈ្មោះយោវ យ៉ឺនយ៉ាង ឃើញក៏ស្ទុះទៅជួយ ហើយត្រូវក្រុមចោរបាញ់រះចំនួន៧គ្រាប់បណ្តាលឱ្យរបួសឈ្មោះយោវ យ៉ឺនយ៉ាវ ចំនួន៣គ្រាប់ចំជើងទាំងសងខាង។ បច្ចុប្បន្នកំពុងសំរាកព្យាបាលរបួសនៅមន្ទីរពេទ្យកាល់ម៉ែត។ តាមប្រភពព័ត៌មានពីសមត្ថកិច្ចមូលដ្ឋានបានឱ្យដឹងថា ក្នុងអំពើបាញ់ប្រហារខាងលើនេះក្រុមចោរប្លន់យកបានប្រាក់ពីឈ្មោះយូ លី ចំនួន៤.០០០ដុល្លារ ដែលម្ចាស់ប្រាក់និយាយថា ទើបតែឈ្នះល្បែងពីកាស៊ីណូមិនទាន់បានចាយផង។ ពេលនេះសមត្ថកិច្ចកំពុងធ្វើការស្រាវជ្រាវករណីនេះហើយ ព្រោះវាទាក់ទិនដល់អ្នកទេសចរ៕  |
| ២នាក់ប្តីប្រពន្ធឡានបុកកិនប្តីស្លាប់ ប្រពន្ធរងរបួសធ្ងន់ Posted: 06 Mar 2011 06:29 PM PST    រាជធានីភ្នំពេញ ៖ បុរសម្នាក់ស្លាប់បាត់បង់ជីវិតភ្លាមៗ និងស្ត្រីម្នាក់ទៀតជាប្រពន្ធរងរបួសធ្ងន់ ដោយសាររថយន្តខ្នាតធំប៉ះពារ និងកិននៅលើកំណាត់ផ្លូវលេខ២៧១ មុខមន្ទីរពេទ្យមិត្តភាពខ្មែរ-សូវៀត ស្ថិតក្នុងសង្កាត់ទំនប់ទឹក ខណ្ឌចំការមន កាលពីវេលាម៉ោង៦និង១០នាទីព្រឹកថ្ងៃទី៧ មីនា ឆ្នាំ២០១១ ។ ហេតុការណ៍ដ៏រន្ធត់នេះបង្កឡើងដោយរថយន្តកូរ៉េម៉ាកហ៊ីយ៉ាន់ដាយ ពណ៌ខៀវ សណ្តោងកន្ទុយដឹកគ្រឿងចក្រឈូសឆាយដី (អាប៊ុល) បានបើកបរជ្រែគេឯងទាំងសណ្តោងកន្ទុយច្រងេងច្រងាង បណ្តាលឱ្យប៉ះម៉ូតូបុរសរងគ្រោះដួលអ្នកជិះម៉ូតូខ្ទាតចូលកង់រថយន្តកិនស្លាប់ភ្លាមៗយ៉ាងអាណោចអាធ័មបំផុត ។ រីឯស្ត្រីជាប្រពន្ធបានរងរបួសធ្ងន់ធ្ងរត្រូវបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ។ បុរសដែលស្លាប់ក្នុងហេតុការណ៍គ្រោះថ្នាក់ចរាចរណ៍នេះពុំទាន់ស្គាល់អត្តសញ្ញាណនៅឡើយទេ ហើយស្ត្រីជាប្រពន្ធវិញក៏ពុំទាន់និយាយស្តីអ្វីរួចដែរ ដោយសាររបួសធ្ងន់ធ្ងរពេក ។ តាមប្រភពព័ត៌មានជំហានដំបូងបានឱ្យដឹងថា មុនពេលកើតហេតុបុរសរងគ្រោះបានជិះម៉ូតូម៉ាកគុបជ្រុង C70 ពណ៌ស្លែ ឌុបប្រពន្ធធ្វើដំណើរលើដងផ្លូវលេខ២៧១ ក្នុងទិសដៅពីត្បូងទៅជើង លុះដល់ចំណុចកើតហេតុ ក៏ជួបហេតុការណ៍គ្រោះថ្នាក់ចរាចរណ៍ដោយចៃដន្យតែម្តង ។ សូមបញ្ជាក់ថា អ្នកបើកបររថយន្តខាងលើនេះត្រូវបានសមត្ថកិច្ចឃាត់ខ្លួនក្រោយពេលព្យាយាមរត់គេចពីកន្លែងកើតហេតុក្នុងបំណងមិនទទួលខុសត្រូវលើកំហុសរបស់ខ្លួន ៕  |
| Posted: 06 Mar 2011 06:19 PM PST  រាជធានីភ្នំពេញ ៖ យោងតាមការស៊ើបអង្កេតរបស់សមត្ថកិច្ចជំនាញនៃស្នងការដ្ឋានរាជធានីភ្នំពេញ សហការជាមួយនគរបាលនាយកដ្ឋានសន្តិសុខក្រសួងមហាផ្ទៃ មន្ត្រីមូលដ្ឋាន និងមន្ត្រីតុលាការនៅល្ងាចថ្ងៃទី៦ មីនា ២០១១ បានចុះឆែកឆេរលំនៅឋានរបស់ឧក្រិដ្ឋជនហុង អេនឌី មេខ្លោងផលិតគ្រឿងញៀនមួយកន្លែងទៀតស្ថិតនៅភូមិក្បាលទំនប់ សង្កាត់បឹងទំពុន ខណ្ឌមានជ័យ ។ ប្រតិបត្តិការខាងលើនេះ សមត្ថកិច្ចរកឃើញមានទូដែកមួយ និងរថយន្តម៉ាក LEXUS 470 ថ្មីមួយគ្រឿងទៀត ។ ក្រៅពីនេះ ពុំឃើញមានអ្វីគួរឱ្យកត់សម្គាល់ឡើយ សូម្បីតែមនុស្សក្នុងលំនៅឋានក៏ពុំមានដែរ ។ ចំពោះលំនៅឋាន និងសម្ភារដែលសមត្ថកិច្ចបានចុះអនុវត្តខាងលើនេះត្រូវបានតុលាការចេញដីការឹបអូស និងបិទទ្វារផ្ទះទាំងស្រុងតែម្តង ។ ដោយឡែកទូដែកត្រូវបញ្ជូនទៅរក្សាទុកនៅក្រសួងមហាផ្ទៃ និងបង្កើតគណៈកម្មការសម្រេចគាស់មើលនៅព្រឹកថ្ងៃទី៧ មីនា ២០១១ នេះ ។ សូមបញ្ជាក់ថា កាលពីព្រឹកថ្ងៃទី២ មីនា ២០១១ កន្លងទៅនេះ សមត្ថកិច្ចប៉ូលិសប្រឆាំងគ្រឿងញៀនរាជធានីភ្នំពេញ ដឹកនាំដោយលោកវរសេនីយ៍ទោ យឹម សុជាតិ សហការជាមួយអាជ្ញាធរដែនដីមានប៉ូលិសមូលដ្ឋាន មន្ត្រីសាលាខណ្ឌមានជ័យ និងមន្ត្រីតុលាការបានចុះទៅធ្វើការឆែកឆេរផ្ទះប្រពន្ធរបស់ឈ្មោះហុង អេនឌី មេខ្លោងផលិត-ជួញដូរគ្រឿងញៀននៅក្នុងសង្កាត់បឹងទំពុន និងផ្ទះម្តាយក្មេកនៅសង្កាត់ចាក់អង្រែក្រោម ខណ្ឌមានជ័យ ។ ប្រតិបត្តិការឆែកឆេរលំនៅឋានទាំង២កន្លែងនេះមួយកន្លែងនៅសង្កាត់ចាក់អង្រែក្រោមជាលំនៅឋានរបស់ម្តាយក្មេកហុង អេនឌី ហើយមួយកន្លែងនៅសង្កាត់បឹងទំពុន ជាលំនៅឋានរបស់ប្រពន្ធហុង អេនឌី ។ ការឆែកឆេរទីតាំងនេះនៅសង្កាត់ចាក់អង្រែក្រោម សមត្ថកិច្ចរកពុំឃើញមានវត្ថុតាងល្មើសអ្វីឡើយ ។ ប៉ុន្តេដោយឡែកលំនៅឋាននៅបឹងទំពុន សមត្ថកិច្ចរកឃើញរថយន្តទំនើបៗ ២គ្រឿងទៀត គឺ១-ម៉ាកឡិចស៊ីស ពណ៌ខ្មៅ RX 300 និង១គ្រឿងទៀតម៉ាក ឡិចស៊ីស ពណ៌ខ្មៅ ស៊េរី៤៧០ ត្រូវបានសមត្ថកិច្ចរក្សទុក ។ ជន៣នាក់ដែលត្រូវបានឃាត់ខ្លួនឈ្មោះហុង អេនឌី ភេទប្រុស អាយុ៥១ឆ្នាំ ២-ឈ្មោះណៃ ស្រីនី ភេទស្រី អាយុ១៩ឆ្នាំ និង៣-ឈ្មោះណៃ វ៉ាន់ណែត ភេទប្រុស អាយុ១៦ឆ្នាំ ។ ជនទាំង៣នាក់នេះមានឈ្មោះហុង អេនឌី ជាមេខ្លោងផលិត និងជាម្ចាស់ទីតាំងផលិតថ្នាំញៀនចំតួ តែម្តង ត្រូវបានប៉ូលិសប្រឆាំងគ្រឿងញៀននៃស្នងការដ្ឋានរាជធានីភ្នំពេញ សហការជាមួយមន្ត្រីអាជ្ញាធរមូលដ្ឋានតំណាងព្រះរាជអាជ្ញារាជធានី ដឹកនាំដោយលោកវរសេនីយ៍ទោយឹម សុជាតិ ប្រធានការិយាល័យប្រឆាំងគ្រឿងញៀននៃស្នងការដ្ឋានរាជធានី ព័ទ្ធចាប់ខ្លួនកាលពីវេលាម៉ោងជាង១១យប់ ថ្ងៃទី២៨ កុម្ភៈ ២០១១ នៅផ្ទះដីឡូត៍គ្មានលេខមួយកន្លែង ក្រុមទី៤ សង្កាត់វាលស្បូវ ខណ្ឌមានជ័យ ប្រមូលបានសារធាតុផ្សំផលិតគ្រឿងញៀន និងឧបករណ៍ប្រើប្រាស់ជាច្រើន ហើយនៅព្រឹកនេះទៀត គឺថ្ងៃទី១ មីនា សមត្ថកិច្ចកំពុងបន្តការឆែកនៅផ្ទះខាងលើដដែល ។ ក្នុងការរុករកវត្ថុតាង និងឧបករណ៍ផលិតថ្នាំញៀនខាងលើនេះ សមត្ថកិច្ចចម្រុះបានដកហូតរថយន្ត២គ្រឿង ម៉ាកទួរីស១២កៅអី ១គ្រឿង ម៉ាកមែរសឺដែស១គ្រឿង ។ លើសពីនេះទៅទៀត ដកហូតបានឧបករណ៍ផលិតថ្នាំញៀនមួយកំប្ល៉េ ។ ដោយឡែក សារធាតុផ្សំដែលសមត្ថកិច្ចដកហូតបានមាន Pseudo ethed Zine 210ក្រាម Hydro Chloricacid ៥០កេស ស្មើនឹង១.១០០ដប Sodium Chloride ៥កេសស្មើ៦២ដប Sulfuri acide ១៥២កេស ស្មើ១៥២០ដប អាវុធខ្លីម៉ាកប្រាហា១ដើម បង់១មាន៣គ្រាប់ ។ ម៉ូតូម៉ាកអាយខនមួយគ្រឿង ម្សៅខ្មៅលាយរួចមួយធុង ព្រមទាំងសំភារៈប្រើប្រាស់មួយចំនួនធំទៀត៕  |
| ក្រុងកែបអភិវឌ្ឍន៍ អ្នកនៅលើផ្លូវគ្មានដីសង់ផ្ទះប្រឈមនឹងការចាកចេញ Posted: 06 Mar 2011 06:04 PM PST   ខេត្តកែប ៖ លំនៅឋានពលរដ្ឋជាច្រើនគ្រួសារនៅភូមិកែប សង្កាត់កែប ក្រុងកែប ត្រូវបានសាងសង់នៅលើដងផ្លូវសាធារណៈយ៉ាងច្រើនស្អេកស្កះ ដែលមតិសាធារណៈបានស្តីបន្ទោសទៅលើអាជ្ញាធរថា មិនគួរឱ្យពលរដ្ឋមកសាងសង់លំនៅឋានច្រើនបែបនេះទេ ព្រោះការសាងសង់មានរាប់រយគ្រួសារសុទ្ធតែនៅលើផ្លូវសាធារណៈក្នុងក្រុង ។ ដោយអាជ្ញាធរខេត្តចាប់ផ្តើមរៀបចំធ្វើការអភិវឌ្ឍន៍ហេដ្ឋារចនាសម្ព័ន្ធឡើងវិញនេះ សំណង់នៅលើផ្លូវសាធារណៈក្នុងទីរួមខេត្ត ត្រូវបណ្តេញចេញក្នុងពេលឆាប់ៗនេះហើយ ។ ប្រជាពលរដ្ឋម្នាក់ឈ្មោះឆេង នីម ភេទស្រី អាយុ២៦ឆ្នាំ បានធ្វើផ្ទះនៅលើទ្រូងផ្លូវជាតិ បានប្រាប់ថា គាត់មករស់នៅភូមិកែបនេះតាំងពី ឆ្នាំ២០០០។ ស្ត្រីរូបនេះបាននិយាយថា គាត់មានស្រុកកំណើតនៅឯស្រុកត្រាំកក់ ខេត្តតាកែវ បច្ចុប្បន្នប្តីជាមេគ្រួសារធ្វើការនៅសាលាខេត្តកែប រីឯគាត់ជាប្រពន្ធលក់ដូរបន្តិចបន្តួចនៅតាមឆ្នេរកែប ពេលមានរដូវបុណ្យទានម្តងម្កាល។ ស្ត្រីរូបនេះបាននិយាយថា គាត់មានការព្រួយបារម្ភដែរ ព្រោះដឹងថា បានរស់នៅលើផ្លូវសាធារណៈ តែបើអាជ្ញាធរបណ្តេញចេញមិនដឹងជាពួកគាត់ទៅរស់នៅទីណាទេ ព្រោះកន្លងមកសង់ផ្ទះលើផ្លូវអត់មានអ្នកណាហាមឃាត់ឡើយ។ លោកគិត ហ៊រ ប្រធានសហគមន៍ពលរដ្ឋគ្មានដីធ្លីបានប្រាប់កោះសន្តិភាពថា ប្រជាពលរដ្ឋដែលសាងសង់លំនៅឋាននៅលើផ្លូវសាធារណៈក្នុងភូមិកែប សង្កាត់កែបនេះមានចំនួន១៧២គ្រួសារ។ លោកប្រធានសហគមន៍បានបញ្ជាក់ថា ពលរដ្ឋដែលរស់នៅគ្មានអ្វីជាពឹងទេ គឺមកពីគ្រប់ទិសទី ។ លោកគិត ហ៊រ មានប្រសាសន៍បញ្ជាក់ថា លោកមានសំណើមួយទៅមូលនិធិអភិវឌ្ឍន៍កាត់បន្ថយភាពក្រីក្រនៅភ្នំពេញ ដើម្បីសុំថវិកាមួយចំនួនមកជួយប្រជាពលរដ្ឋ ដែលរស់នៅលើផ្លូវសាធារណៈមានលទ្ធភាពអាចចាកចេញ។ លោកម៉ម ទូច ប្រធានមន្ទីរសាធារណៈការខេត្តកែប មានប្រសាសន៍ថា ផ្លូវចាស់-ថ្មីនៅក្រុងកែបត្រូវធ្វើការអភិវឌ្ឍន៍ឡើងវិញនៅឆ្នាំ២០១១ និង២០១២ ខាងមុខនេះ នឹងត្រូវឈូសឆាយទាំងអស់ ចំណែកការពាក់ព័ន្ធនឹងលំនៅឋានរបស់ពលរដ្ឋមកសង់នៅបែបអនាធិបតេយ្យ លើផ្លូវបែបនេះគឺខាងអាជ្ញាធរខេត្តជាអ្នកចាត់ចែងដោះស្រាយ។ ពលរដ្ឋម្នាក់ទៀតឈ្មោះឃីន សារ៉េត និងប្រពន្ធឈ្មោះឆាយ ស្រី អាយុ៤២ឆ្នាំ រស់នៅលើផ្លូវសាធារណៈជាប់នឹងរបងមន្ទីរសូរិយោដីខេត្តបានប្រាប់ថា គាត់មករស់នៅខេត្តកែបនេះតាំងពីឆ្នាំ១៩៩១ កាលនោះ គាត់ធ្វើជាទាហាន ។ បុរសរូបនេះនិយាយថា បច្ចុប្បន្ននេះគាត់មានកូនប្រុស-ស្រី៦នាក់ទៅហើយ និងគ្មានដីមួយចំរៀកសម្រាប់ចែកកូនទេ ហើយបើអាជ្ញាធរបណ្តេញចេញទៀតពួកគាត់ពិតជាវេទនា លោកណុប សំអុន ចៅសង្កាត់កែបមានប្រសាសន៍ថា សំណង់អនាធិបតេយ្យដែលបានសង់នៅខុសច្បាប់នេះត្រូវបានផ្អាកឈប់ឱ្យពលរដ្ឋសាងសង់បន្តហើយ។ គេបានកត់សម្គាល់ឃើញថា កន្លងមកពលរដ្ឋរស់នៅក្នុងអគារបឹងហ្គាឡូជាប់នឹងសាលាខេត្តត្រូវបានអាជ្ញាធរបណ្តេញឱ្យចេញទាំងបង្ខំផងដែរ ប៉ុន្តែមិនដឹងថាករណីនេះអាជ្ញាធរនឹងដោះស្រាយដោយវិធីណាទេ៕  |
| ស្ត្រីប្រមឹកវាយសំពងកូនប្រុសជាប់ចំណងរងរបួសធ្ងន់ធ្ងរ Posted: 06 Mar 2011 05:59 PM PST  ខេត្តស្វាយរៀង ៖ អំពើហិង្សាមួយគួរឱ្យរន្ធត់ដែលស្ត្រីជាម្តាយស្រវឹងស្រាបាត់បង់ស្មារតីបានយកព្រនង់ឫស្សីប៉ុនកដៃវាយសំពងទៅលើកូនប្រុសចំពីលើក្បាលបីព្រនង់បែកហូរឈាមស្រោចពេញផ្ទៃមុខ ត្រូវបានម្តាយមីងដឹកតាមម៉ូតូនាំទៅកាន់មន្ទីរពេទ្យខេត្តដើម្បីសង្គ្រោះ។ ប្រការគួរឱ្យកត់សំគាល់គឺកូនប្រុសដែលរងគ្រោះ ខណៈត្រូវជាប់ចំណងទៀតទើបមិនអាចគេចរួចពីព្រនង់ដែលម្តាយវាយមកលើ។ ករណីនេះបានកើតឡើងកាលពីថ្ងៃទី៥ មីនា វេលាម៉ោង២រសៀល នៅភូមិព្រៃពោធិ ឃុំដូនស ស្រុកស្វាយជ្រំ។ បើតាមស្ត្រីឈ្មោះម៉ែន សុគន្ធា អាយុ៤៣ឆ្នាំ ត្រូវជាម្តាយមីងបានប្រាប់កោះសន្តិភាពថា កូនប្រុសរងគ្រោះឈ្មោះម៉ែន សុភី អាយុ២៣ឆ្នាំ ត្រូវបានម្តាយឈ្មោះសេង សារិត អាយុ៤៥ឆ្នាំ យកព្រនង់ឫស្សីប៉ុនកដៃវាយសំពងលើក្បាលចំនួនបីព្រនង់បែករយះដល់ឆ្អឹងចំនួន៣កន្លែងដេរជាង៣០ថ្នេរ និងចំស្មាឆ្វេងមួយព្រនង់ បាក់ម្រាមដៃស្តាំមួយ សន្លប់នៅនឹងកន្លែង ហើយក៏ត្រូវរូបគាត់ជាម្តាយមីងដឹកទៅកាន់មន្ទីរពេទ្យខេត្តដើម្បីសង្គ្រោះ។ ស្ត្រីជាម្តាយមីងបានបន្តទៀតថា មុនពេលកើតហេតុ ស្ត្រីជាម្តាយបានផឹកស្រាស្រវឹងអួទីនួរ រីឯកូនដែលរងគ្រោះក៏ផឹកស្រាស្រវឹងដែរ តែផឹកនៅកន្លែងផ្សេងគ្នា។ ពេលដែលបុរសជាកូនផឹកស្រវឹងក៏ឡើងទៅលើផ្ទះដេក តែពេលនេះមានមិត្តភក្តិក្នុងភូមិដែលផឹកស្រាជាមួយគ្នាមកបបួលដើរលេងទៀត តែប្អូនប្រុសឃើញបងស្រវឹងជោគដូច្នេះក៏ឃាត់មិនឱ្យទៅតាមមិត្តភក្តិនោះទេ គឺឃាត់ឱ្យដេក។ ដោយបងប្រុសមិនព្រមស្តាប់ចេះតែដើរទ្រេតទ្រោតរកចុះពីលើផ្ទះក៏ត្រូវប្អូនប្រុសបង្កើតចាប់ចងទៅនឹងសសរក្រឡោងផ្ទះ ហើយបងប្រុសដែលស្រវឹងក៏អង្គុយដេកលក់នៅសសរផ្ទះនោះទៅ។ លុះមួយសន្ទុះក្រោយមកក៏ឃើញស្ត្រីជាម្តាយស្រវឹងមកពីនាយដើរឡើងទៅលើផ្ទះមិនដឹងជាបានព្រនង់មកពីណា ស្រាប់តែវាយសំពងលើកូនដូចជាខឹងពីអង្កាល់ណាមកអត់មានមូលហេតុសោះ វាយកូនរហូតសន្លប់ទាំងក្នុងចំណង ទើបប្តីនិងប្អូនប្រុសដឹងទាន់រត់ឡើងទៅជួយចាប់ កុំអីមិនដឹងជាយ៉ាងណាឡើយ។ ស្ត្រីជាម្តាយប្រមឹកខួបរូបនេះមានកូន៥នាក់ ស្រី២នាក់ តែងតែផឹកស្រាស្រវឹងរាល់ថ្ងៃ ហើយជេរប្រមាថប្តី និងកូនគ្មានញញើតទេ ព្រមទាំងធ្លាប់កាប់ប្តីរងរបួសដៃម្តង និងវាយកូនស្រីគ្មានចូលផ្ទះបានទេ។ កូនស្រីទាំងពីរនាក់រស់នៅជាមួយម្តាយមីង និងម្តាយធំ និងនៅជាមួយតែកូនប្រុសៗ។ និយាយរួមពួកគេសុទ្ធសឹងត្រូវព្រនង់គ្រប់ៗគ្នា ។ រីឯមុខរបរកូនៗ និងប្តីរកស៊ីរែកដី ជីកស្រះឱ្យគ ។ ចំណែកប្តីឈ្មោះម៉ែន សាមី អាយុ៤៧ឆ្នាំ បានត្រឹមតែនិយាយមិនចេញ ៕  |
| ប្រទះឃើញសាកសពបុរស២នាក់ សមត្ថកិច្ចសង្ស័យជាការសម្លាប់ដោយគំនុំ Posted: 06 Mar 2011 05:56 PM PST    ខេត្តក្រចេះ ៖ សាកសពបុរសពីរនាក់ ត្រូវបានគេប្រទះឃើញនៅក្នុងព្រៃក្បែរភូមិដោយនៅលើសពមានស្នាមកាប់ និងវាយជាច្រើនកន្លែង ហើយត្រូវសមត្ថកិច្ចធ្វើការសន្និដ្ឋានថា ការស្លាប់របស់ជនរងគ្រោះជាករណីឃាតកម្ម ។ ក្រោយពីចុះធ្វើការស្រាវជ្រាវរយៈពេល៣ថ្ងៃក្រោយមក ប៉ូលិសបានឃាត់ខ្លួនជនម្នាក់មកធ្វើការសួរនាំដោយសង្ស័យថា អាចមានជាប់ពាក់ព័ន្ធក្នុងករណីនេះ ។ មន្ត្រីប៉ូលិសការិយាល័យព្រហ្មទណ្ឌកម្រិតធ្ងន់បានឱ្យដឹងកាលពីថ្ងៃទី៥ មីនា ថា សពបុរសរងគ្រោះត្រូវបានគេប្រទះឃើញកាលពីយប់ថ្ងៃទី២៨ កុម្ភៈ នៅចំណុចកាបី (តំបន់៤) ក្នុងភូមិសាស្ត្រឃុំ២ធ្នូ ស្រុកស្នួល ដែលជាតំបន់ពុំសូវមានផ្ទះប្រជាពលរដ្ឋរស់នៅច្រើន ។ ជនរងគ្រោះទាំងពីរនាក់ត្រូវបានគេស្គាល់អត្តសញ្ញាណថា ម្នាក់ឈ្មោះប៊ុត ខ្មៅ អាយុ២៧ឆ្នាំ មានទីលំនៅក្នុងឃុំត្រពាំងផ្លុង ស្រុកពញាក្រែក ខេត្តកំពង់ចាម និងម្នាក់ទៀតឈ្មោះសាត អាត អាយុ២៥ឆ្នាំ មានទីលំនៅភូមិកន្ទួត ឃុំកោងកាង ស្រុកពញាក្រែក ខេត្តកំពង់ចាម តែទាំង២នាក់បានមកធ្វើជាកម្មកររថយន្តដឹកដំឡូង និងរស់នៅចំណុចកើតហេតុខាងលើ ។ មន្ត្រីប៉ូលិសព្រហ្មទណ្ឌកម្រិតធ្ងន់ខេត្តបានឱ្យដឹងថា ឆ្លងតាមការចុះស្រាវជ្រាវឃើញថា កាលពីថ្ងៃកើតហេតុ ជនរងគ្រោះទាំង២នាក់ និងមិត្តភក្តិបានផឹកស្រាស្រាវឹងជោកជាំ រហូតដល់យប់ក៏នាំគ្នាទៅដេកនៅផ្ទះមិត្តភក្តិម្នាក់ទៀត ហើយទៅដល់ផ្ទះមិត្តភក្តិនោះជនរងគ្រោះទាំង២នាក់ជាមួយនឹងម្ចាស់ផ្ទះបានប្រកែកគ្នាពីរឿងបាត់ឈើ ដោយជនរងគ្រោះទាំង២ចោទថា ម្ចាស់ផ្ទះនេះលួចឈើរបស់គេ ។ ក្រោយពីការប្រកែកគ្នារួចមក ជនរងគ្រោះ និងម្ចាស់ផ្ទះបាននិយាយគ្នាលេងធម្មតា ហើយក៏មិនបានដេកនៅផ្ទះនោះដែរ ដោយនាំគ្នាដើរត្រឡប់មកវិញទាំងសភាពស្រវឹងឈ្ងោកមុខ ។ ប្រភពដដែលបានឱ្យដឹងទៀតថា បន្ទាប់ពីពួកគេទាំង២នាក់ដើរត្រឡប់មកវិញ ក៏បាត់ដំណឹងឈឹងទៅ លុះស្អែកឡើងក៏ឃើញជនរងគ្រោះទាំងពីរនាក់ស្លាប់ក្នុងព្រៃក្បែរភូមិ ដោយនៅលើរាងកាយមានស្នាមកាប់ និងវាយជាច្រើនកន្លែង ។ សមត្ថកិច្ចសន្និដ្ឋានថា ជនល្មើសអាចមានគ្នាពីរនាក់ធ្វើសកម្មភាពកាប់ និងវាយជនរងគ្រោះដែលមានសភាពស្រវឹងដាបទៅហើយ ។ លោកវរសេនីយ៍ត្រីចាន់ សុខគីម នាយការិយាល័យប្រឆាំងបទល្មើសព្រហ្មទណ្ឌកម្រិតធ្ងន់បានឱ្យដឹងទៀតថា ក្រោយពេលកើតហេតុ កម្លាំងប៉ូលិសបានចុះធ្វើការស្រាវជ្រាវ លុះដល់ថ្ងៃទី៣ មីនា ក៏បានឃាត់ខ្លួនជនសង្ស័យម្នាក់ឈ្មោះទូច សាមែន ដែលជាម្ចាស់ផ្ទះ និងជាជនដែលមានទំនាស់ជាមួយនឹងជនរងគ្រោះទាំង២នាក់កាលពីល្ងាចមុនកើតហេតុ រួចនាំមកកាន់ការិយាល័យដើម្បីធ្វើការសាកសួរតាមនីតិវិធីជំនាញ ។ មិនទាន់មានប្រភពព័ត៌មានឱ្យដឹងថា ក្រោយពីឃាត់ខ្លួនជនសង្ស័យ ហើយតើទទួលបានចម្លើយបែបណានៅឡើយទេ ៕  |
| Posted: 06 Mar 2011 05:42 PM PST ខេត្តកំពត ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា កាលពីថ្ងៃទី៤ មីនា ឆ្នាំ២០១១ រដ្ឋមន្ត្រីការបរទេសឥណ្ឌូណេស៊ីបានផ្ញើសំបុត្រមករដ្ឋមន្ត្រីការបរទេសកម្ពុជា រដ្ឋមន្ត្រីការបរទេសថៃ និងបញ្ជូនទៅរដ្ឋមន្ត្រីការបរទេសអាស៊ានទាំងអស់ហើយ គ្មានអីអាថ៌កំបាំងទៀតទេ ។ សម្តេចតេជោនាយករដ្ឋមន្ត្រីបានមានប្រសាសន៍បែបនេះកាលពីព្រឹកថ្ងៃទី៥ មីនា ឆ្នាំ២០១១ ក្នុងឱកាសដែលសម្តេច និងលោកជំទាវបណ្ឌិតអញ្ជើញជាអធិបតីដ៏ខ្ពង់ខ្ពស់ក្នុងពិធីសំណេះសំណាលសួរសុខទុក្ខយោធិនពិការ និងសម្ពោធវិទ្យាល័យ ប៊ុន រ៉ានី ហ៊ុន សែន កោះស្លា ដែលមានពីរជាន់ ១២បន្ទប់ និងអគារសម្ភពមួយខ្នងនៅក្នុងភូមិអភិវឌ្ឍន៍យោធិនពិការកោះស្លាស្រុកឈូក ខេត្តកំពត ។ សម្តេចេតជោនាយករដ្ឋមន្ត្រីមានប្រសាសន៍បន្តថា ក្នុងលិខិតនោះគឺបញ្ជាក់ថា កម្ពុជាបានទទួលយកទាំងស្រុងថែមទាំងបញ្ជាក់ពីចំណុចនៃតំបន់ត្រូវសង្កេតការណ៍ និងពេលវេលា។ ចំណុចសង្កេតការណ៍មាន១៤កន្លែង និងពេលវេលាសម្រាប់សង្កេតការណ៍មាន១២ខែ ។ កម្ពុជា បើក ច្រកបន្ថែមទៀត ពេលវេលាអាចត្រូវបន្តសម្រាប់សង្កេតការណ៍ ទីកន្លែងអាចនឹងត្រូវបន្ថែមទៀត ។ លោករដ្ឋមន្ត្រីការបរទេសឥណ្ឌូណេស៊ី បញ្ជាក់ថា លោកមានការយល់ដឹងថា ភាគីថៃមិនជំទាស់ទេ ប៉ុន្តែកំពុងពិចារណា...។ សម្តេចតេជោនាយករដ្ឋមន្ត្រីបញ្ជាក់ទៀតថា ខាងឥណ្ឌូណេស៊ី កំពុងរៀបចំឱ្យមានគណៈកម្មការព្រំដែនទូទៅ និងគណៈកម្មការបោះបង្គោលព្រំដែនកម្ពុជា-ថៃនៅឯទីក្រុងហ្សាការតា។ តែភាគីថៃវិញនៅតែនិយាយទ្វេភាគីៗ ។ សម្តេចមានប្រសាសន៍ថា ទ្វេភាគីក៏ទ្វេទៅ ព្រោះទីបំផុតវាគង់តែសម្រេចទ្វេភាគីហ្នឹងទេ ។ ប៉ុន្តែតើអ្នកដែលកោះហៅឱ្យទៅប្រជុំហ្នឹងឈ្មោះអី? ទន្ទឹមនេះសម្តេចតេជោព្រមានថា នែ កុំចរចាបិទទ្វារគំរាមអត់ទេណា...? អត់បានទេ ទៅហ្សាការតាទាំងអស់គ្នា ឥណ្ឌូណេស៊ីកំណត់ពេលទៅ រដ្ឋមន្ត្រីការពារជាតិ និងរដ្ឋមន្ត្រីការពារជាតិទៅប្រជុំ ប្រធានគណៈកម្មការព្រំដែន និងប្រធានគណៈកម្មការព្រំដែនទៅប្រជុំនៅទីនោះ ហើយឥណ្ឌូណេស៊ីធ្វើម្ចាស់ផ្ទះ និងធ្វើជាអាជ្ញាកណ្តាល ។ សម្តេចតេជោនាយករដ្ឋមន្ត្រីមានប្រសាសន៍ថា ថៃខ្លួនឯងជាអ្នកប្រកាសទទួលយកអ្នកសង្កេតការណ៍ឥណ្ឌូណេសីុ ដល់កម្ពុជាស្វាគមន៍ថៃបែរជាថា កំពុងពិចារណាម្តង ហើយប្រដៅគេឱ្យទទួលយកទៀត ។ សម្តេចសង្កត់ថា ខ្ញុំមិនចង់ឃើញសង្គ្រាមទេ នេះគឺជាលទ្ធផលនៃសង្គ្រាម ហើយខ្លួនខ្ញុំក៏ជាលទ្ធផលនៃសង្គ្រាមដែរ តើខ្ញុំចង់ពិការ ឬអ្វី...? ខ្យល់ថ្មីបោកបក់ទៅលើជំលោះប្រដាប់អាវុធរវាងថៃ-កម្ពុជា ការចូលរួមរបស់ភាគីទីបី។ នេះគឺជាការកត់សំគាល់ក្នុងទស្សនវិភាគរបស់លោកសាស្ត្រាចារ្យ ប៉ែន ងឿន ទីប្រឹក្សាជាន់ខ្ពស់ និងជាសមាជិកនៃគណៈកម្មាធិការសិក្សានៃសាកលវិទ្យាល័យបញ្ញាសាស្ត្រ ។ លោកបានឆ្លុះបញ្ចាំងឱ្យឃើញថា ជំលោះរវាងថៃ-កម្ពុជា ដែលបង្កឡើងដោយសកម្មភាពឈ្លានពានរបស់ថៃម្តងហើយម្តងទៀត បានក្លាយទៅជាបញ្ហាអន្តរជាតិចាប់តាំងពីជំនួបក្រុមប្រឹក្សាសន្តិសុខអង្គការសហប្រជាជាតិនៅក្នុងទីក្រុងញូវយ៉ក កាលពីថ្ងៃទី១៤ កុម្ភៈ ឆ្នាំ២០១១ ហើយបន្ទាប់មកមានការប្រឹងប្រែងជួយសម្រុះសម្រួលពីសំណាក់ប្រទេសឥណ្ឌូនេស៊ី ដែលបច្ចុប្បន្នជាប្រធានសមាគមអាស៊ាននៅក្នុងកិច្ចប្រជុំរដ្ឋមន្រ្តីការបរទេសអាស៊ាន កាលពីថ្ងៃទី២២ កុម្ភៈ។ ចេញពីក្រុមប្រឹក្សាសន្តិសុខអង្គការសហប្រជាជាតិនៅក្នុងទីក្រុងញូវយ៉ក ឆ្លងកាត់មហាសមុទ្រអាត្លង់ទិច ទៅដល់សហភាពអឺរ៉ុប សភាអឺរ៉ុបបានថ្កោលទោសចំពោះការវាយប្រហារដ៏ធ្ងន់ធ្ងរដែលកើតឡើងកាលពីថ្ងៃទី៤ ដល់ថ្ងៃទី៧ កុម្ភៈ ព្រមទាំងស្វាគមន៍ចំពោះកិច្ចប្រឹងប្រែងទាំងឡាយរបស់រដ្ឋមន្រ្តីការបរទេសឥណ្ឌូនេស៊ី Marty Natalewaga ដែលបានសម្របសម្រួលឲ្យមានជំនួបរវាងរដ្ឋមន្រ្តីការបរទេសអាស៊ានទាំងដប់ បើទោះបីជាមានការបដិសេធពីមុនមករបស់នាយករដ្ឋមន្រ្តី អាភីស៊ីត វាចាជីវ៉ា ចំពោះគំនិតនៃការចូលរួមរបស់អាស៊ានក្នុងការដោះស្រាយជំលោះនេះក៏ដោយ។ លទ្ធផលកិច្ចប្រជុំទីក្រុងហ្សាការតានោះ គឺកម្ពុជា និងថៃបានយល់ព្រមអនុញ្ញាតឱ្យជនស៊ីវិលឥណ្ឌូនេស៊ី និងកងទ័ពមិនប្រដាប់ដោយអាវុធបំពេញមុខងារជាអ្នកសង្កេតការណ៍ក្នុងតំបន់ខ្សែព្រំដែនដែលកងអង្គភាពកងទ័ពប្រដាប់អាវុធកម្ពុជា និងកងអង្គភាពកងទ័ពប្រដាប់អាវុធថៃកំពុងឈរជើង។ វាគួរឱ្យកត់សំគាល់ដែរថា ជំហររបស់កម្ពុជាត្រូវបានបញ្ជាក់ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាថា នៅក្នុងខ្សែបន្ទាត់ព្រំដែនរបស់ភាគីកម្ពុជា អ្នកសង្កេតការណ៍ឥណ្ឌូនេស៊ីមានសេរីភាពពេញលេញក្នុងការចេញចូល គឺមានន័យថា ពួកគាត់ចង់ទៅកន្លែងណាក៏បាន ពេលណាក៏បាន ហើយពួកគាត់ចង់មើលអ្វីក៏បានឱ្យតែពួកគាត់ចង់មើល។ ដូចគ្នានេះដែរ សហគមន៍អន្តរជាតិរួមមាន ក្រុមប្រឹក្សាសន្តិសុខអង្គការសហប្រជាជាតិសមាគមអាស៊ាន និងសហភាពអឺរ៉ុបបានភ្ញាក់ស្រឡាំងកាំងដោយឮថា រហូតមកដល់ថៃ្ងទី១ មីនា ឆ្នាំ២០១១ «ថៃនៅមិនទាន់មានផែនការច្បាស់លាស់ថា នៅពេលណានឹងអនុញ្ញាត្តឲ្យអ្នកសង្កេតការណ៍ចូល» ដូចបានចុះផ្សាយដោយកាសែតដឺណេហ្សិន កាលពីថ្ងៃទី១ មីនា ឆ្នាំ២០១១ ក្រោមចំណងជើងថា ថៃធ្វើឲ្យអាក់ខានដល់អ្នកទស្សនាប្រាសាទ។ កាសែតដដែលនេះ បានរាយការណ៍ផងដែរថា មេបញ្ជាការយោធា លោក Prayuth Chan-ocha បាននិយាយថា «ថៃនឹងមិនអនុញ្ញាត្តឲ្យអ្នកសង្កេតការណ៍ឥណ្ឌូនេស៊ី មានការចេញចូលដោយសេរីទៅកាន់តំបន់ព្រំដែនមានជម្លោះក្បែរប្រាសាទព្រះវិហារទេ» ហើយថា រដ្ឋមន្រ្តីការពារជាតិ និងរដ្ឋមន្ត្រីការបរទេសថៃ «រហូតមកដល់ពេលនេះ មិនទាន់បានស្រុះស្រួលគ្នាអំពីតួនាទីរបស់អ្នកសង្កេតការណ៍ទៀតផង»។ គ្មានអ្វីគួរឲ្យសង្ស័យនៅក្នុងចិត្តរបស់សហគមន៍អន្តរជាតិទេថា ថៃបានប៉ុនប៉ងធ្វើឲ្យអាក់ខានដល់ការរៀបចំបែបបទការងាររបស់អ្នកសង្កេតការណ៍ឥណ្ឌូនេស៊ី ដែលនឹងត្រូវបានបញ្ជូនទៅកាន់ប្រទេសថៃ និងកម្ពុជា ដោយរដ្ឋមន្រ្តីការបរទេសឥណ្ឌូនេស៊ី Marty Natalegawa ដែលជាប្រធានសមាគមអាស៊ានបច្ចុប្បន្នខណៈដែលកម្ពុជាបានឆ្លើយតបយ៉ាងវិជ្ជមាន។ នៅក្នុងអត្ថបទមួយចេញផ្សាយដោយការសែតដឺណេហ្សិន កាលពីថ្ងៃទី១ មីនា ឆ្នាំ២០១១ ក្រោមចំណងជើងថា «ជម្លោះព្រំដែនអាចជាឱកាសមួយដើម្បីកំណត់ឡើងវិញនូវសមត្ថភាព និងតួនាទីសមាគមអាស៊ាន» លោក Alexander Mohr ជំនាញការផ្នែកទំនាក់ទំនងអន្តរជាតិ និងជាដៃគូរទំនាក់ទំនងអន្តរជាតិនៅឯក្រុមហ៊ុនទំនាក់ទំនងជាមួយរដ្ឋាភិបាលអឺរ៉ុប Alber & Geiger ក្នុងទីក្រុងប្រ៊ុចសែល ហើយ ជាអតីតអ្នកធ្វើបឋកថាស្តីពីទំនាក់ទំនងអន្តរជាតិនៅឯសកលវិទ្យាល័យរបស់បារាំងឈ្មោះ«វិទ្យាស្ថានសិក្សានយោបាយក្រុងប៉ារីស» ប្រទេសបារាំងបានសន្និដ្ឋានថា «ការចូលពាក់ព័ន្ធពីភាគីទីបីអាចជាសក្តានុពលដ៏ធំក្នុងការដោះស្រាយបញ្ហារវាងប្រទេសទាំងពីរ ហើយក្នុងពេលជាមួយគ្នានេះ កំណត់ឡើងវិញនូវសមត្ថភាព និងតួនាទីរបស់សមាគមអាស៊ាននៅក្នុងតំបន់សម្រាប់រយៈពេលវែង»។ ជាការពិតណាស់ នៅពេលមនុស្សជាច្រើនមកពីក្រុមប្រឹក្សាសន្តិសុខអង្គការសហប្រជាជាតិផង សមាគមអាស៊ានផង និងសហភាពអឺរ៉ុបផង រហូតដល់បុគ្គលឯកជនអន្តរជាតិបានដឹងពីឬសគល់នៃជម្លោះរវាងថៃនិងកម្ពុជា ដូចដែលសម្តេចតេជោ ហ៊ុន សែន បានមានប្រសាសន៍ប្រកបដោយគតិបណ្ឌិតថា «យើងកំពុងធ្វើដំណើរចេញពីទីងងឹត ហើយយើងកំពុងតែមកដល់ទីភ្លឺ» ដំណោះស្រាយជម្លោះរវាងថៃ និងកម្ពុជា ត្រូវការការពាក់ព័ន្ធពីភាគីទីបីជាចាំបាច់មិនអាចខានបានឡើយ។ នៅពេលដែលយើងកំពុងនិយាយ ដំណើរការនេះកំពុងតែបោះជំហានទៅមុខ។  |
| Posted: 06 Mar 2011 05:33 PM PST  រាជធានីភ្នំពេញ ៖ លោកគិត សុផា អភិបាលខណ្ឌដង្កោ បានធ្វើការដាស់តឿនជាចំហដោយនិយាយពិតនិយាយត្រង់ដល់មន្ត្រីប៉ូលិសតាមបណ្តាប៉ុស្តិ៍នានាទូទាំងខណ្ឌ ចំពោះអ្នកដែលធ្លាប់មានការពាក់ព័ន្ធជាមួយក្រុមជួញដូរ ឬចែកចាយ និងប្រើប្រាស់គ្រឿងញៀន ដូចជាការយកលុយកាក់ពីអ្នកទាំងនោះត្រូវតែភ្ញាក់រលឹកឡើង បំពេញតួនាទី និងកាតព្វកិច្ចរបស់ខ្លួនជាសមត្ថកិច្ចឡើងវិញ និងបង្ក្រាបក្រុមជនទុច្ចរិតគ្រឿងញៀននោះឱ្យអស់ដើម្បីយកស្នាដៃ។ ប្រសិនបើមិនមានការភ្ញាក់រលឹក ហើយនៅតែបណ្តោយខ្លួនឱ្យមានការពាក់ព័ន្ធនឹងជនខាងលើទៀត នោះនឹងត្រូវចាប់ខ្លួនដោយគ្មានការលើកលែង ដូចជនទាំងនោះដែរ។ លោកគិត សុផា បានមានប្រសាសន៍ដាស់តឿនបែបនេះ នៅក្នុងកិច្ចប្រជុំបូកសរុបលទ្ធផលអនុវត្តការងារឆ្នាំ២០១០ និងទិសដៅឆ្នាំ២០១១ របស់រដ្ឋបាលខណ្ឌដង្កោ ដែលបានធ្វើកាលពីល្ងាចថ្ងៃទី៤ មីនា ឆ្នាំ២០១១ នៅសាលប្រជុំធំសាលាខណ្ឌ។ អញ្ជើញចូលរួមនៅក្នុងកិច្ចប្រជុំនោះមានលោកអភិបាលរងខណ្ឌ មន្ត្រីការិយាល័យជុំវិញខណ្ឌ លោកចៅសង្កាត់ ចៅសង្កាត់រង កងកម្លាំងប្រដាប់អាវុធ ព្រមទាំងមេភូមិគ្រប់ភូមិក្នុងខណ្ឌ។ នៅក្នុងឱកាសនោះ លោកចៅសង្កាត់ ចៅសង្កាត់រង ព្រមទាំងមន្ត្រីការិយាល័យជំនាញជុំវិញខណ្ឌ បានឡើងធ្វើបទអន្តរាគមន៍លើរបាយការណ៍លទ្ធផលអនុវត្តការងារនៅក្នុងសង្កាត់ និងការិយាល័យរបស់ខ្លួនរាយការណ៍ដល់អង្គប្រជុំទាំងមូលបានដឹង ជាពិសេសលទ្ធផលហេដ្ឋាចរនាសម្ព័ន្ធ និងសន្តិសុខសណ្តាប់ធ្នាប់។ បន្ទាប់ពីចប់បទអន្តរាគមន៍របស់អាជ្ញាធរសង្កាត់ និងមន្ត្រីការិយាល័យនានារួចមក លោកគិត សុផា បានមានមតិបូកសរុបបិទអង្គប្រជុំដោយលើកឡើងពីចំណុចសំខាន់ៗជាច្រើន ក្នុងនោះអ្វីដែលគួរឱ្យចាប់អារម្មណ៍ គឺការដាស់តឿនដល់សមត្ថកិច្ចប៉ូលិសដែលធ្លាប់មានការពាក់ព័ន្ធជាមួយក្រុមជួញដូរគ្រឿងញៀន គួរតែឆាប់ភ្ញាក់រលឹក។ មិនតែប៉ុណ្ណោះ លោកបានណែនាំដល់លោកចៅសង្កាត់ រួមជាមួយស្មៀនសង្កាត់ និងមេភូមិទាំងអស់ ត្រូវប្រុងប្រយ័ត្ន និងពិនិត្យឱ្យបានហ្មត់ចត់លើការងារអត្រានុកូលដ្ឋាន។ លោកអភិបាលខណ្ឌបន្តទៀតថា ដូច្នេះអ្នកជាប់ពាក់ព័ន្ធទាំងឡាយគួរតែភ្ញាក់រលឹក និងបំពេញតួនាទីជាប៉ូលិសឱ្យបានត្រឹមត្រូវ ប្រសិនបើមិនព្រមកែខ្លួនទេនឹងត្រូវចាប់ខ្លួនដូចអ្នកជួញដូរទាំងនោះដែរហើយ។ ដោយឡែកលោកចៅសង្កាត់ ស្មៀន និងមេភូមិទាំងអស់គួរតែពង្រឹងឡើងវិញលើការងារអត្រានុកូលដ្ឋាន ជាពិសេសមុននឹងបញ្ជាក់ពីនរណាម្នាក់នៅលីវឱ្យគេទៅរៀបការត្រូវពិនិត្យតាមដានឱ្យបានហ្មត់ចត់បំផុត ចៀសវាងបញ្ជាក់ខុស។ ថ្មីៗកន្លងមកនេះខុសម្តងហើយ ដោយសារអាជ្ញាធរសង្កាត់កាកាប និងមេភូមិតាងួន បញ្ជាក់ខុសឱ្យបុរសម្នាក់មានកូនដល់ទៅ៣នាក់ ហើយចុះចោលប្រពន្ធ និងកូនមករៀបការប្រពន្ធថ្មីដោយមិនទាន់មានការលែងលះគ្នា ធ្វើឱ្យប្រពន្ធ និងកូនមកតវ៉ាដល់រោងការ និងធ្វើឱ្យកើតមានវិប្បដិសារីខ្លាំងណាស់ ដែលនេះគឺជាការធ្វេសប្រហែសបំផុត ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
