Koh Santipheap Daily |
- ក្មេងស្រីពីរនាក់ស្ទើរតែក្លាយជាទំនិញគេយកទៅលក់
- ជិះម៉ូតូបុកគូទរថយន្តចតស្ងៀមស្លាប់ម្នាក់ របួសធ្ងន់ម្នាក់
- ប្រឆាំងសាលាឧទ្ធរណ៍ដែលសម្រេចឱ្យវាយរបងផ្សារព្រែកព្នៅ
- វិទ្យុជាតិកម្ពុជា-វៀតណាមសហការគ្នាពង្រីកវិសាលភាពផ្សព្វផ្សាយឱ្យកាន់តែទូលំទូលាយ
- បើករថយន្តបុកបង្គោលភ្លើងបាក់អស់មួយដើមទាំងថ្ងៃ
- នែបនិត្យស្នេហាជិត១ឆ្នាំម្តាយប្តឹងកងរាជអាវុធហត្ថតាមចាប់ដល់ផ្ទះសំណាក់ក្លាយជាអ្នកទោស
- តាមស្រឡាញ់៣ឆ្នាំ រៀបការរួច យប់ផ្សំដំណេកនាងចង.កស្លាប់ចោលប្តីយំបោកខ្លួន
- កម្ពុជា និងកូរ៉េរួមគ្នាពង្រីកតំបន់ធម្មជាតិបៃតង
- ឪពុកចុងចាប់រំលោភបានសម្រេចពីរដងមិនបានសម្រេចពីរដងប្តឹងប៉ូលិសចាប់ខ្លួន
- ពលរដ្ឋខ្មែរ១០នាក់ ដែលគេចពីគ្រាប់កាំភ្លើងទាហានសៀមបានត្រឡប់ចូលផ្ទះវិញអស់ហើយ
- ព្រះអគ្គីលេបត្របាក់ម៉ូតូ-កង់ និងរោងស្នាក់នៅរបស់កម្មកររោងចក្រ Best Way ក្រុងបាវិត
- រញ្ជួយដីខ្លាំង៨,៩រីស្ទ័រនៅជប៉ុនមានរលកយក្សស៊ូណាមីកំពស់ដល់១០ម៉ែត្របោកកំទេចអ្វីៗទាំងអស់
- ក្រុមចោរប្លន់ប្រដាប់ដោយកាំភ្លើង AK នៅផ្សារពង្រ និងប្លន់តាមខេត្តនានាត្រូវចាប់ខ្លួន និងបង្ហាញមុខ
- ឆក់ស្បោងលុយរាប់ម៉ឺនដុល្លារទើបបើកពីធនាគារ ខណៈរថយន្តធូរកង់នៅមុខកន្លែងធ្វើការ
- ក្រុមតំណាងរាស្ត្រគណបក្សសម រង្ស៊ី ចុះពិនិត្យក្រុមហ៊ុន ធី & ភី ដែលមានពលការិនីស្លាប់ និងរំដោះក្មេងស្រី
- យេម៉ែន ៖ ប្រធានាធិបតីសាេឡហ៍ស្នើរដ្ឋធម្មនុញ្ញថ្មីមួយ
- រោងចក្រដំឡើងរថយន្តដំបូងគេនៅព្រះរាជាណាចក្រកម្ពុជាដំណើរការ
- កូនប្រុសលោកកាដាហ្វី សន្យាពីការវាយលុកទ្រង់ទ្រាយធំមួយ
- បាតុកម្មនៅឥណ្ឌាទាមទារបង្កើតរដ្ឋថ្មីមួយ
- ក្រុមអាវលឿងគំរាមកាន់កាប់វិមានរដ្ឋាភិបាលដូចកាលពីឆ្នាំ2008
| ក្មេងស្រីពីរនាក់ស្ទើរតែក្លាយជាទំនិញគេយកទៅលក់ Posted: 11 Mar 2011 03:06 AM PST  រាជធានីភ្នំពេញ ៖ ក្មេងស្រីជំទង់ពីរនាក់បាននាំគ្នាជិះម៉ូតូដោយអត់ពាក់មួកសុវត្ថិភាព និងអត់កញ្ចក់មើលក្រោយ លួចចេញពីផ្ទះឯខេត្តកំពង់ចាមមកភ្នំពេញ ដែលត្រូវគេសង្ស័យថា មានគេល្បួងប្រុងនាំយកទៅលក់ ប៉ុន្តែសំណាងល្អពេលទៅដល់ចំណុចគោលដៅប៉ូលិសខណ្ឌដង្កោឈរជើង ប៉ូលិសក៏បានឃាត់ដើម្បីសួរនាំ ។ ពេលនោះពួកគេបាននិយាយកុហកប៉ូលិសថា ពួកគេចាកចេញពីស្រុកកំណើតមកភ្នំពេញដើម្បីរកការងារធ្វើដោយឪពុកម្តាយដឹងឮទាំងអស់ លុះក្រោយពេលប៉ូលិសឃាត់បានប៉ុន្មានម៉ោងស្រាប់តែលេចមុខបុរសម្នាក់ និងស្ត្រីម្នាក់ជិះម៉ូតូកង់៣មួយគ្រឿងទៅសួររកដោយអះអាងថា ពួកគេបានលួចចាកចេញពីផ្ទះរយៈពេល១យប់១ថ្ងៃមកហើយ ។ បុរស-ស្ត្រីទាំងពីរនាក់ គឺជាឪពុកម្តាយរបស់ក្មេងស្រីជំទង់ម្នាក់ក្នុងចំណោមពួកគេទាំងពីរនាក់នោះ ហើយបន្ទាប់ពីរកកូនឃើញពួកគាត់ក៏បានជួលម៉ូតូកង់៣ដឹកត្រឡប់ទៅផ្ទះវិញ ។ ហេតុការណ៍នេះបានកើតឡើងកាលពីវេលាម៉ោង៩ព្រឹក ថ្ងៃទី១១ មីនា ឆ្នាំ២០១១ នៅលើមហាវិថីសហព័ន្ធរុស្ស៊ីកែងផ្លូវលេខ២០០៤ ភូមិតាងួន សង្កាត់កាកាប ខណ្ឌដង្កោ។ ក្មេងស្រីជំទង់ទាំងពីរនាក់នេះ ម្នាក់ឈ្មោះសុទំ ប៉ាត់ទីម៉ា អាយុ១៥ឆ្នាំ ជាសិស្សថ្នាក់ទី៨ វិទ្យាល័យបែកអន្លូង ឪពុកឈ្មោះសែន សុទំ អាយុ៤៩ឆ្នាំ ម្តាយឈ្មោះកែវ គឹមលន អាយុ៤៤ឆ្នាំ មានទីលំនៅភូមិគីឡូ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម ចំណែកឯក្មេងស្រីម្នាក់ទៀតឈ្មោះត្រេង ធី អាយុ១៥ឆ្នាំដែរ តែបានលាក់លៀមមិនប្រាប់ឈ្មោះឪពុកម្តាយទេ និងមានទីលំនៅក្នុងភូមិជាមួយគ្នា។ តាមប្រភពព័ត៌មានបានឱ្យដឹងថា នៅមុនពេលមានការឃាត់សួរនាំគេបានឃើញក្មេងស្រីជំទង់២នាក់នេះ ជិះម៉ូតូម៉ាកវ៉េវ១គ្រឿងពណ៌ខ្មៅ អត់ស្លាកលេខ និងអត់ពាក់មួកសុវត្ថិភាព ប្រឡាក់ដីក្រហមស្រមក ។ ពួកនាងធ្វើដំណើរក្នុងទិសដៅពីលិចទៅកើត លុះទៅដល់ចំណុចគោលដៅប៉ូលិសខាងលើ ប៉ូលិសក៏បានឃាត់ដើម្បីធ្វើការសាកសួរ ។ មុនដំបូងពួកនាងបានភូតកុហកថា ដើររកការងារធ្វើ ប៉ុន្តែបន្ទាប់ពីមើលទៅមិនគួរឱ្យទុកចិត្ត ទើបប៉ូលិសនាំទៅកាន់ប៉ុស្តិ៍កាកាប ដើម្បីសួរនាំបន្តទៀត ។ ក្រោយពេលប៉ូលិសសួរនាំតាមជំនាញ ទើបធ្លាយរឿងមានបុរសម្នាក់ទិញទូរស័ព្ទ១គ្រឿង ឱ្យពួកនាងប្រើ ប៉ុន្តែទូរស័ព្ទនោះបុរសខាងលើបានឱ្យមិត្តភក្តិរបស់នាងយកទៅឱ្យគឺ មិនបានយកទៅឱ្យផ្ទាល់ដៃទេ ហើយបុរសនោះបានផ្តាំថា ពេលដែលរូបគេហៅចូលនិយាយគ្នារួច សុំឱ្យពួកនាងលុបលេខរបស់ខ្លួនចោលទៀតផង ។ ប្រភពដដែលបន្តថា លុះនៅថ្ងៃទី១០ មីនា ពួកនាងទាំងពីរនាក់បាននាំគ្នាចាកចេញពីស្រុកកំណើត ដើម្បីទៅជួបបុរសអ្នកទិញទូរស័ព្ទឱ្យនោះ ហើយនៅព្រឹកថ្ងៃទី១១ មីនា ខណៈទៅដល់ខាងលិចផ្សារពោធិចិនតុងក៏ត្រូវប៉ូលិសឃាត់តែម្តង ។ ទោះបីជាបែបណា ក្មេងស្រីជំទង់ទាំងពីរនាក់នោះនិយាយកុហកច្រើនណាស់ ហើយបានព្យាយាមលាក់លៀមអត្តសញ្ញាណបុរសដែលទិញទូរស័ព្ទឱ្យទៀតផង ។ ប៉ូលិសសង្ស័យថា ក្មេងស្រីទាំងពីរនាក់នេះត្រូវបុរសអ្នកទិញទូរស័ព្ទឱ្យនោះល្បួងនាំយកទៅលក់ដោយកុហកពួកនាងថា នាំមកធ្វើការនៅភ្នំពេញ។ ម្យ៉ាងទៀតតាមការសាកសួរពួកនាងចេញពីស្រុកមកមានគ្នា៤នាក់ ដោយមិនឱ្យឪពុកម្តាយក្រុមគ្រួសារដឹងទេ ដែលនេះគឺជាការរៀបចំរបស់ជនម្នាក់នោះ ហើយពេលមកដល់ភ្នំពេញ ក្មេងស្រី២នាក់ទៀត បានបែកទៅកន្លែងផ្សេងនៅសល់ពួកនាង២នាក់ ក៏នាំគ្នាជិះម៉ូតូគ្មានទិសដៅ ហើយក៏ត្រូវឃាត់សួរនាំតែម្តង ។ ចំណែកឪពុកម្តាយក្មេងស្រីនោះបាននិយាយថា ពួកគាត់បានចាកចេញមកភ្នំពេញ ដើម្បីព្យាបាលជំងឺនៅមន្ទីរពេទ្យកាល់ម៉ែត រយៈពេល៣ខែមកហើយ ដោយទុកកូនស្រីឱ្យនៅជាមួយបងប្អូនឯស្រុក ។ ពួកគាត់មិនដែលដឹងថា កូនស្រីប្រើទូរស័ព្ទទេ ព្រោះកន្លងមកកូនស្រីគ្មានទូរស័ព្ទឡើយ ហើយនៅថ្ងៃកើតហេតុបងរបស់ពួកគាត់បានទូរស័ព្ទប្រាប់ថា កូនរបស់គាត់បានបាត់ពីផ្ទះ១យប់ហើយមិនដឹងទៅណា ។ ប្រភពដដែលបានបន្តទៀតថា ពេលនោះពួកគាត់មានការខ្វល់ខ្វាយយ៉ាងខ្លាំង លុះក្រោយមកទើបទទួលដំណឹងថា កូនស្រីត្រូវប៉ូលិសខណ្ឌដង្កោ ចាប់ឃាត់ទើបនាំគ្នាមកសុំយកកូនត្រឡប់ទៅផ្ទះវិញ ។ ចំណែកឯបុរសជាឪពុកខឹងកូនស្រីខ្លាំងណាស់ និងបានយកទូរស័ព្ទដែលជនមិនស្គាល់មុខទិញឱ្យកូនស្រីនោះទៅបោកកំទេចចោលទៀតផង ៕  |
| ជិះម៉ូតូបុកគូទរថយន្តចតស្ងៀមស្លាប់ម្នាក់ របួសធ្ងន់ម្នាក់ Posted: 11 Mar 2011 02:59 AM PST    ខេត្តពោធិ៍សាត់ ៖ បុគ្គលិកក្រុមហ៊ុនទូរស័ព្ទHello ពីរនាក់បានជិះម៉ូតូឌុបគ្នាទៅបុកគូទរថយន្តដែលចតស្ងៀមលើចិញ្ចើមថ្នល់បណ្តាលឱ្យអ្នកបើកស្លាប់ភ្លាមៗ ឯនារីដែលរួមដំណើររងរបួសធ្ងន់ត្រូវគេបញ្ជូនទៅសង្គ្រោះបន្ទាន់នៅមន្ទីរពេទ្យ។ គ្រោះថ្នាក់ចរាចរណ៍នេះកើតឡើងលើផ្លូវជាតិលេខ៥ត្រង់ចំណុចមុខទីស្នាក់ការគណបក្សប្រជាជនកម្ពុជាស្ថិតក្នុងភូមិសាលាគំរូ សង្កាត់ព្រៃញី ក្រុងពោធិ៍សាត់ កាលពីវេលាម៉ោង៤ និង៣០នាទីរសៀល ថ្ងៃទី១០ មីនា ២០១១។ ប៉ូលិសចរាចរក្រុងពោធិ៍សាត់ឱ្យដឹងថា រថយន្តនោះជារថយន្តកង់៦ចំណុះពីរតោនកន្លះពណ៌ផ្ទៃមេឃ ពាក់ស្លាកលេខទ០០៨៥ភព៣។ ចំណែកជនរងគ្រោះ២នាក់នោះម្នាក់ឈ្មោះម៉ឹង នៅ ភេទប្រុស អាយុ២០ឆ្នាំ ជាអ្នកបើកម៉ូតូបានស្លាប់នៅនឹងកន្លែងកើតហេតុ និងម្នាក់ទៀតរួមដំណើរជាមួយឈ្មោះឈាន មករា ភេទស្រី អាយុ២០ឆ្នាំ បានផុងមុខនឹងដែកទ្រុងរថយន្តចេញឈាមគួរឱ្យរន្ធត់ត្រូវគេបញ្ជូនទៅកាន់មន្ទីរពេទ្យ តែសង្ឃឹមរស់តិចបំផុត។ ទាំងពីរនាក់នេះរស់នៅភូមិបេង ឃុំស្នាអន្សា ស្រុកក្រគរ ជាបុគ្គលិកបំរើការងារឱ្យក្រុមហ៊ុន Hello ជិះម៉ូតូសេ១២៥ ស៊េរី២០០៤ ពណ៌ខ្មៅ ពាក់ស្លាកលេខពោធិ៍សាត់១A៧១៧៣។ តាមសាក្សីនៅកន្លែងកើតហេតុនិយាយថា គេឃើញរថយន្តនោះធ្វើដំណើរពីកើតទៅលិច ហើយឈប់នៅពីមុខទីស្នាក់ការគណបក្សតាំងពីម៉ោងប្រហែល១០ទៅ១១ព្រឹក។ ពេលនោះមានមនុស្ស២នាក់ទំនងជាអ្នកបើកបរ និងព្រូបានជួសជុលរហូតដល់ម៉ោងប្រហែល២ទៅ៣រសៀលទើបចេញទៅបាត់ទុករថយន្តនៅទីនោះ។ លុះក្រោយមកកើតមានគ្រោះថ្នាក់នៅទីនោះតែម្តង។ ទោះបីពុំមានអ្នកឃើញហេតុការណ៍ច្បាស់លាស់ក៏ដោយ ប៉ុន្តែតាមការពិនិត្យជាក់ស្តែងសមត្ថកិច្ចសន្និដ្ឋានថា អ្នកបើកម៉ូតូអាចចាំងពន្លឺថ្ងៃមើលរថយន្តចតពីមុខមិនឃើញ ខណៈគេបើកក្នុងល្បឿនលឿនហួសកំណត់ ហើយមិនពាក់មួកសុវត្ថិភាព ។ ម្យ៉ាងទៀតពេលជនរងគ្រោះជិះម៉ូតូទៅដល់ចំណុចនោះអាចមានរថយន្តតូច-ធំមកពីមុខ ហើយមិនអាចគេចទៅណាបានក៏ងាកចង្កូតមកវិញបុករថយន្តដែលចតខាងស្តាំដៃនោះពេញទំហឹងតែម្តង។ សមត្ថកិច្ចឱ្យដឹងថា នៅមុននោះប្រហែលកន្លះម៉ោង នៅចំណុចខាងកើតកន្លែងកើតហេតុនោះចំងាយប្រហែល២០០ម៉ែត្រមានអ្នកជិះម៉ូតូឌុបគ្នា៣នាក់ជិះទៅបុកគល់ឈើបណ្តាលឱ្យសន្លប់ទាំងអស់គ្នា ។ បន្ទាប់ពីគេនាំយកជនរងគ្រោះមិនទាន់ដល់មន្ទីរពេទ្យស្រួលបួលផងស្រាប់តែមានគ្រោះថ្នាក់កើតឡើងមួយករណីទៀត ។ ប្រភពព័ត៌មានឱ្យដឹងថា រថយន្តដែលចតស្ងៀមលើចិញ្ចើមថ្នល់នោះជារថយន្តដឹកទឹកកកនៅក្រវាត់ក្រុងត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលក្រុងពោធិ៍សាត់ដើម្បីដោះស្រាយទៅតាមនីតិវិធី ៕  |
| ប្រឆាំងសាលាឧទ្ធរណ៍ដែលសម្រេចឱ្យវាយរបងផ្សារព្រែកព្នៅ Posted: 11 Mar 2011 02:56 AM PST  រាជធានីភ្នំពេញ ៖ អាជីវករផ្សារព្រែកព្នៅបានកើនឡើងរហូតដល់៧០០នាក់ហើយដែលកើតទុក្ខមិនសុខចិត្ត ចំពោះការសម្រេចរបស់សាលាឧទ្ធរណ៍លុបចោលសាលក្រមសាលាដំបូងរាជធានីភ្នំពេញដែលអនុញ្ញាតឱ្យរក្សារបងរបស់អាជីវករសង់ឡើងដើម្បីខណ្ឌចែករវាងផ្សារឯកជន និងផ្សាររដ្ឋនោះ ។ ម្យ៉ាងទៀតក្រុមអាជីវករបានព្រមានប្តឹងការចាញ់ក្តីនេះទៅសម្តេចនាយករដ្ឋមន្ត្រីហ៊ុន សែន និងឧត្តមក្រុមប្រឹក្សានៃអង្គចៅក្រម ព្រមទាំងព្រះមហាក្សត្រប្រយោជន៍ដើម្បីជួយអន្តរាគមន៍រកយុត្តិធម៌ពិតប្រាកដដល់អាជីវករក៏ដូចជាប្រយោជន៍រួមរបស់ជាតិទាំងមូលផងដែរ ។ ក្រុមអាជីវករប្រកាសថា ដាច់ខាតមិនឱ្យរំលាយរបងផ្សារដែលសាងសង់រួចហើយនោះទេ និងហ៊ានយកឈាមទៅប្តូរ បើសិនជាជនណាហ៊ានចេញមុខទៅវាយរបងខណ្ឌផ្សាររដ្ឋ និងឯកជននេះ ។ កាលរសៀលថ្ងៃទី៩ មីនា ឆ្នាំ២០១១ សាលាឧទ្ធរណ៍បានប្រកាសសាលដីកាបដិសេធសាលក្រមរបស់សាលាដំបូងរាជធានីភ្នំពេញ ដោយឱ្យម្ចាស់ដីឡូត៍ (ផ្សារឯកជន) ឈ្នះក្តីមួយរយភាគរយតែម្តង ពោលគឺឱ្យអាជីវករលក់ដូរ៧០០នាក់ នៅផ្សាររដ្ឋព្រែកព្នៅចាញ់ ក្តីយ៉ាងអាម៉ាស់បំផុត ។ ប៉ុន្តែស្របពេលដែលសាលាឧទ្ធរណ៍ប្រកាសឱ្យចាញ់នោះ ភ្លាមៗក្រុមអាជីវករទាំងក្មេងចាស់ប្រុស-ស្រីបាននាំគ្នាទៅឈរនៅមុខសាលាឧទ្ធរណ៍ស្រែកខ្លាំងៗថា «មន្ត្រីសាលាឧទ្ធរណ៍ពុករលួយ កាត់ក្តីឱ្យបុគ្គលម្នាក់ពីរនាក់ឈ្នះ អាជីវកររាប់រយនាក់ចាញ់ ព្រោះតែផលប្រយោជន៍» ។ ស្ត្រីឈ្មោះគុជ ប៊ុនធី អាជីវករលក់គ្រឿងទេសបានអះអាងថា ពួកគាត់មិនសុខចិត្តចំពោះការកាត់ក្តីរបស់មន្ត្រីសាលាឧទ្ធរណ៍ដោយអយុត្តិធម៌បែបនេះឡើយ ព្រោះជាច្រើនឆ្នាំកន្លងមកហើយ ដែលម្ចាស់ដីឡូត៍ឈ្នះក្តីនេះ គាបសង្កត់អាជីវករដោយបង្ខំឱ្យបង់លុយ គឺគ្រាន់តែលក់បន្លែ១កញ្ច្រែងទាររហូតដល់៥.០០០រៀលឯណោះ ។ ពួកគាត់លក់ដូរនៅមុខឬក្នុងដីឡូត៍ពិបាកវេទនាប្រមាណ១០ឆ្នាំមកហើយ ទើបតែនៅក្រោយផ្សារព្រែកព្នៅរបស់រដ្ឋកើតឡើង ពួកគាត់មកលក់ដូរនៅក្នុងផ្សារនេះបានមានជីវភាពធូរស្រាលដោយសារតែផ្សាររដ្ឋយកថ្លៃឈ្នួលថោកបំផុត គឺ១ថ្ងៃត្រឹមតែ៨០០រៀលប៉ុណ្ណោះ ។ គាត់បន្តថា ក្រុមអាជីវករនឹងផ្តិតមេដៃប្តឹងដល់ទីបញ្ចប់ ដោយមិនរាថយចំពោះម្ចាស់ដីឡូត៍នេះទេ ព្រោះសកម្មភាពរបស់ក្រុមអាជីវករគឺជាការការពារផលប្រយោជន៍រួម មិនដូចការសម្រេចរបស់សាលាឧទ្ធរណ៍បែរជាការពារផលប្រយោជន៍បុគ្គល១នាក់ ២នាក់ទៅវិញ។ ចំពោះសាលក្រមរបស់សាលាដំបូងរាជធានីភ្នំពេញជាការត្រឹមត្រូវបំផុត ហើយបើសិនមិនធ្វើរបងខណ្ឌដីទេ ច្បាស់ជាបាត់ដីរដ្ឋថែមទៀត ៕  |
| វិទ្យុជាតិកម្ពុជា-វៀតណាមសហការគ្នាពង្រីកវិសាលភាពផ្សព្វផ្សាយឱ្យកាន់តែទូលំទូលាយ Posted: 11 Mar 2011 02:50 AM PST  រាជធានីភ្នំពេញ ៖ ព្រឹកថ្ងៃទី១១ មីនា ២០១១ សម្តេចតេជោនាយករដ្ឋមន្ត្រីហ៊ុន សែន បានអនុញ្ញាតឱ្យលោកវូ វ៉ាន់ហៀន ប្រធានវិទ្យុសំឡេងសាធារណរដ្ឋសង្គមនិយមវៀតណាម ចូលជួបសម្តែងការគួរសម និងពិភាក្សាការងារ ក្នុងកិច្ចសហប្រតិបត្តិការរវាងវិទ្យុវៀតណាម និងវិទ្យុជាតិកម្ពុជា នៅវិមានសន្តិភាពទីស្តីការនាយករដ្ឋមន្ត្រី។ លោកវូ វ៉ាន់ហៀន បានជម្រាបជូនសម្តេចតេជោនាយករដ្ឋមន្ត្រីថា ទស្សនកិច្ចរបស់គណៈប្រតិភូវិទ្យុវៀតណាមនៅកម្ពុជានាពេលនេះ គឺដើម្បីសហការជាមួយក្រសួងព័ត៌មានកម្ពុជា។ កាលពីថ្ងៃទី១០ មីនា កន្លងមកនេះ លោកបានប្រគល់សម្ភារមួយចំនួនជូនដល់ស្ថានីយវិទ្យុជាតិកម្ពុជានៅខេត្តសៀមរាប។ ឥឡូវនេះ វិទ្យុជាតិកម្ពុជា និងវិទ្យុសំឡេងវៀតណាមកំពុងតែធ្វើសហប្រតិបត្តិការជាមួយគ្នាដើម្បីស្រាវជ្រាវ និងតម្លើងប្រព័ន្ធ FM និង AM មួយទៀត។ នៅក្នុងន័យនេះ កាលណាតម្លើងប្រព័ន្ធនេះហើយ វិទ្យុជាតិកម្ពុជា នឹងអាចផ្សព្វផ្សាយយ៉ាងទូលំទូលាយគ្របដណ្តប់ទូទាំងប្រទេសតែម្តង។ លោកវូ វ៉ាន់ហៀន ក៏បានជម្រាបជូនសម្តេចតេជោនាយករដ្ឋមន្ត្រីផងដែរថា វិទ្យុសំឡេងវៀតណាម ត្រៀមខ្លួនជានិច្ចដើម្បីជួយដល់វិទ្យុជាតិកម្ពុជា ក៏ដូចជាការបណ្តុះបណ្តាលធនធានមនុស្សជាដើម។ ជាការឆ្លើយតប សម្តេចតេជោនាយករដ្ឋមន្ត្រី ហ៊ុន សែន បានថ្លែងអំណរគុណចំពោះវិទ្យុសំឡេងវៀតណាមដែលតែងតែជួយដល់វិទ្យុជាតិកម្ពុជា ទាំងជំនួយបច្ចេកទេស ទាំងការបណ្តុះបណ្តាលធនធានមនុស្ស។ ក្នុងន័យនេះផងដែរ សម្តេចតេជោនាយករដ្ឋមន្ត្រីសូមជំរុញឱ្យមានការពង្រីក និងពង្រឹងកិច្ចសហប្រតិបត្តិការនេះកាន់តែធំឡើង ហើយសូមឱ្យជួយបណ្តុះបណ្តាលធនធានមនុស្សកម្ពុជាឱ្យបានកាន់តែច្រើនថែមទៀត។ ទន្ទឹមនេះសម្តេចតេជោនាយករដ្ឋមន្ត្រី ធ្វើការណែនាំដល់វិទ្យុជាតិ ធ្វើយ៉ាងណាឱ្យនាំមុខក្នុងការផ្សព្វផ្សាយអំពីចរាចរណ៍ ឧតុនិយម និងស្ថានភាពផ្លូវថ្នល់នៅពេលមានទឹកភ្លៀងលិចម្តងៗ ដើម្បីជួយដល់ចរាចរណ៍៕  |
| បើករថយន្តបុកបង្គោលភ្លើងបាក់អស់មួយដើមទាំងថ្ងៃ Posted: 11 Mar 2011 02:46 AM PST  រាជធានីភ្នំពេញ ៖ បង្គោលភ្លើងគោមបំភ្លឺផ្លូវសាធារណៈមួយដើមស្ថិតនៅតាមបណ្តោយមហាវិថីព្រះមុនីវង្ស សង្កាត់បឹងកេងកងទី១ ខណ្ឌចំការមន បានបាក់ត្រឹមគល់ដួលទៅគងលើដើមត្របែកព្រៃដោយសាររថយន្តបុក។ គ្រោះថ្នាក់ចរាចរណ៍នេះកើតឡើងនៅវេលាម៉ោង១២និង៤០នាទីថ្ងៃត្រង់ថ្ងៃទី១១ មីនា ឆ្នាំ២០១១ ។ តាមប្រភពព័ត៌មាននៅកន្លែងកើតហេតុឱ្យដឹងថា បុរសឈ្មោះញឹម ឈាង អាយុ៥២ឆ្នាំ ស្នាក់នៅសង្កាត់បឹងទំពុន ខណ្ឌមានជ័យ បានបើករថយន្តម៉ាកCRV ពណ៌សំបកឪឡឹក ពាក់ស្លាកលេខ ភ្នំពេញ2A-1785 លើដងមហាវិថីព្រះមនីវង្ស ក្នុងទិសដៅពីជើងទៅត្បូង លុះដល់ចំណុចកើតហេតុជ្រុលចង្កូតទៅបុកបង្គោលភ្លើងបាក់តែម្តង ។ លោកញឹម ឈាង ឱ្យដឹងថា ពេលគាត់បើករថយន្តដល់ចំណុចនោះឃើញមនុស្សពោះធំម្នាក់ដើរកាត់មុខ ដូច្នេះហើយទើបគាត់ទាញចង្កូតគេចបណ្តាលឱ្យកើតគ្រោះថ្នាក់នេះតែម្តង។ ទោះជាយ៉ាងណាក្តី ក្រោយពេលហេតុការណ៍កើតឡើង គាត់ពុំឃើញមានមនុស្សណាឆ្លងកាត់មុខរថយន្តឡើយ ។ បញ្ហានេះគាត់និយាយថា ទំនងជាខ្មោចលងគាត់ ។ ផ្ទុយទៅវិញ បើតាមប្រភពព័ត៌មានផ្សេងៗទៀតនិយាយថា លោកញឹម ឈាង ងក់ទើបបើករថយន្តបុកបង្គោលភ្លើងបែបនោះ៕  |
| Posted: 11 Mar 2011 02:43 AM PST  ខេត្តកណ្តាល ៖ បុរសជនជាតិវៀតណាមម្នាក់ត្រូវសមត្ថកិច្ចកងរាជអាវុធហត្ថឃាត់ខ្លួនកាលពីថ្ងៃទី១០ មីនា ២០១១ ដោយយោងតាមពាក្យបណ្តឹងរបស់ម្តាយនារីរងគ្រោះដែលចោទថាបានចាប់កូនស្រីដាក់រថយន្តនាំយកទៅរំលោភ សេពសន្ថវៈកាលពីវេលាម៉ោង៨ និង៤០នាទីព្រឹកថ្ងៃទី៧ មីនា ២០១១ នៅចំណុចភូមិព្រែកល្វា ឃុំពញាឮ ស្រុកពញាឮ ប៉ុន្តែបុរសជាប់ចោទបានអះអាងថា មិនមែនជារឿងចាប់រំលោភសេពសន្ថវៈនោះទេ គឺជារឿងស្នេហាផ្អែមល្អែមដែលពួកគេបានស្និទ្ធស្នាលនឹងគ្នាអស់រយៈពេលជិតមួយឆ្នាំមកហើយ។ លោកអេង ហ៊ី មេបញ្ជាការរង និងជាប្រធានមន្ទីរស្រាវជ្រាវ និងយុត្តិធម៌នៃបញ្ជាការដ្ឋានកងរាជអាវុធហត្ថខេត្តឱ្យដឹងថា ជនសង្ស័យដែលឃាត់ខ្លួនឈ្មោះង្វៀន យ៉ុងធឹក ភេទប្រុស អាយុ៣៦ឆ្នាំ មានប្រពន្ធរស់នៅភូមិជ្រោយដង ឃុំសំរោងធំ ស្រុកកៀនស្វាយ មុខរបរលក់ទិញ-ត្រី ។ ចំណែកនារីរងគ្រោះអាយុ១៨ឆ្នាំ រស់នៅឃុំរកាកោង ស្រុកមុខកំពូល ។ លោកប្រធានការិយាល័យបានឱ្យដឹងទៀតថា ការឃាត់ខ្លួនបុរសជនជាតិវៀតណាមឈ្មោះ ង្វៀន យ៉ុងធឹក ធ្វើឡើងតាមពាក្យបណ្តឹងរបស់ ម្តាយនារីក្រមុំរងគ្រោះឈ្មោះឌឿក ដែលបានប្តឹងថា កាលពីវេលាម៉ោង៨ និង៤០នាទីព្រឹកថ្ងៃ ទី៧ មីនា ឆ្នាំ២០១១ ឈ្មោះង្វៀន យ៉ុងធឹក បានចាប់អូសដៃកូនក្រមុំគាត់ចូលក្នុងរថយន្តរបស់គេខណៈគាត់ និងកូនស្រីកំពុងដើរតាមផ្លូវមកដល់ចំណុចភូមិព្រៃល្វា ឃុំពញាឮ ស្រុកពញាឮ និងមានបក្សពួក២នាក់ទៀតនៅក្នុងរថយន្តម៉ាកកាមរី ស៊េរីឆ្នាំ១៩៨៩ ហើយបើកមកភ្នំពេញ បាត់នាំយកទៅរំលោភសេពសន្ថវៈ ។ ប៉ុន្តែបើតាមចម្លើយរបស់ជនសង្ស័យឈ្មោះង្វៀន យ៉ុងធឹក ប្រាប់សមត្ថកិច្ចថា ខ្លួននិងឈ្មោះ ង្វៀន ថាវ ធ្លាប់ទំនាក់ទំនងស្នេហានឹងគ្នាជិត១ឆ្នាំមកហើយ និងធ្លាប់នែបនិត្យជាមួយនាងជាញឹកញាប់ផងដែរនៅនឹងផ្ទះរបស់នាងពេលម្តាយនាងមិននៅ ។ នៅថ្ងៃកើតហេតុថ្ងៃទី៧ មីនា ពេលខ្លួនជិះរថយន្តតាមផ្លូវបានឃើញនាងដើរជាមួយម្តាយនៅស្រុកពញាឮ ពេលនោះខ្លួនក៏បានឈប់រថយន្តសួរនាំនាង ខណៈនោះនាងបានសុំខ្លួនដោយសារមកភ្នំពេញ ពេលមកដល់ភ្នំពេញនាងក៏បានចុះពីលើរថយន្តហើយខ្លួនក៏បើកទៅកាន់ជ្រៃធំ ស្រុកកោះធំ។ លុះព្រឹកឡើងថ្ងៃទី៨ មីនា ដដែលក៏ត្រូវនាងទូរស័ព្ទមកខ្លួនសួរថា នៅឯណា? ខ្លួនក៏ប្រាប់ថា នៅជ្រៃធំ ស្រុកកោះធំ ពេលនោះខ្លួនក៏បានណាត់នាងឱ្យមកជួបនៅទីនោះពេលនាងមកដល់ ខ្លួនបានជួលផ្ទះសំណាក់នៅជ្រៃធំ ស្នាក់នៅជាមួយគ្នាដោយឱ្យតម្លៃផ្ទះសំណាក់ចំនួន៥០ដុល្លារ ប៉ុន្តែស្នាក់នៅបានតែពីរថ្ងៃប៉ុណ្ណោះ ក៏ត្រូវម្តាយនាងតាមរកឃើញ និងហៅកងរាជអាវុធហត្ថចាប់ខ្លួនតែម្តង ៕  |
| តាមស្រឡាញ់៣ឆ្នាំ រៀបការរួច យប់ផ្សំដំណេកនាងចង.កស្លាប់ចោលប្តីយំបោកខ្លួន Posted: 11 Mar 2011 02:40 AM PST   ខេត្តបាត់ដំបង ៖ ក្រោយពីពិធីមង្គលការត្រូវបានបញ្ចប់ និងក្រោយពីសាច់ញាតិ និងភ្ញៀវកិត្តិយសវិលត្រឡប់ទៅលំនៅឋានរៀងៗខ្លួនរួចមក គេសង្ឃឹមគ្រប់ៗគ្នាថា គូស្វាមីភរិយាថ្មោងថ្មីដែលទើបរៀបការរួចនេះនឹងបាននែបនិត្យយ៉ាងសុខសាន្តក្នុងរាត្រីទឹកឃ្មុំ ដែលគូស្នេហ៍នេះបានអត់ធ្មត់ និងរង់ចាំយ៉ាងអន្ទះសាអស់រយៈពេល៣ឆ្នាំមកហើយ ។ ផ្ទុយទៅវិញ រាត្រីទឹកឃ្មុំបែរជាក្លាយទៅជារាត្រីសោកសៅ និងរន្ធត់ចិត្តក្រៃលែង ដោយសារតែនាងកូនក្រមុំបានធ្វើអត្តឃាតដោយចង.កសម្លាប់ខ្លួនមុនពេលចូលបន្ទប់ផ្សំដំណេក ធ្វើឱ្យស្វាមីរបស់នាងនិងឪពុកម្តាយយំសោកបោកខ្លួនដូចអកព្រាត់គូ ។ លោកក្រឹង រ៉ាមី នាយប៉ុស្តិ៍នគរបាលស្តីទីអូរដំបងមួយបានប្រាប់កោះសន្តិភាពអំពីមូលហេតុគួរឱ្យភ្ញាក់ផ្អើលនេះថា បានកើតឡើងនៅក្រុមទី៦ ភូមិសំរោងកោង ឃុំអូរដំបង១ ស្រុកសង្កែ ហើយនាងបានចង.កសម្លាប់ខ្លួននៅវេលាម៉ោង៩និង១៥នាទីយប់ថ្ងៃទី១០ មីនា គឺជារាត្រីដែលនាង និងស្វាមីត្រូវផ្សំដំណេក ក្រេបទឹកឃ្មុំក្រោយពីបញ្ចប់ពិធីមង្គលការរបស់ពួកគេ ក្នុងរយៈពេល២ថ្ងៃរួចមក ។ លោកមេប៉ុស្តិ៍ស្តីទីរូបនេះបានប្រាប់ទៀតថា នារីធ្វើអត្តឃាតឈ្មោះរិទ្ធ សំណាង អាយុ២០ឆ្នាំ និងស្វាមីរបស់នាងដែលទើបរៀបការនេះឈ្មោះសុខ ជា អាយុ២៣ឆ្នាំ ។ ជុំវិញហេតុការណ៍ដ៏សោកសៅនេះ ម្តាយកូនក្រមុំ អ្នកស្រីគឿន នី អាយុ៥៤ឆ្នាំ បានរៀបរាប់ប្រាប់សមត្ថកិច្ចថា គាត់បានរៀបចំពិធីមង្គលការឱ្យកូនប្រុស-ស្រីនេះនៅថ្ងៃទី៩ និងបង្ហើយនៅរសៀលថ្ងៃទី១០ មីនា លុះនៅយប់ផ្សំដំណេក ស្រាប់តែកូនស្រីគាត់ធ្វើអត្តឃាតខ្លួនឯង ដោយគ្មានអ្នកណាដឹងពីមូលហេតុ ពិតប្រាកដឡើយ ។ អ្នកស្រីគឿន នី បានពោលទាំងទឹកភ្នែកថា នៅក្នុងរាត្រីនោះ ខណៈដែលនាងកំពុងមើលទូរទស្សន៍ នាងពោលថា ឈឺពោះ...ហើយបានប្រាប់ស្វាមីបរស់នាងថា ទៅរកបត់ជើងបន្តិចសិន... លុះពេលចុះពីផ្ទះក៏ទៅបាត់រហូត...គឺរហូតរកឃើញសពចង.កនៅនឹងដើមឈើក្រោយផ្ទះ ៕  |
| កម្ពុជា និងកូរ៉េរួមគ្នាពង្រីកតំបន់ធម្មជាតិបៃតង Posted: 11 Mar 2011 02:31 AM PST  រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានប្រាប់ឱ្យដឹងថា នៅក្នុងជំនួបពិភាក្សាការងារជាមួយសម្តេចតេជោនាយករដ្ឋមន្ត្រី ហ៊ុន សែន នាព្រឹកថ្ងៃទី១១ មីនា នៅវិមានសន្តិភាពទីស្តីការនាយករដ្ឋមន្ត្រី លោក HAN SEUNG SOO បេសកជនពិសេសរបស់លោកប្រធានាធិបតីសាធារណរដ្ឋកូរ៉េ បានជម្រាបជូនសម្តេចតេជោនាយករដ្ឋមន្ត្រីថា គោលបំណងលោកមកកាន់ព្រះរាជាណាចក្រកម្ពុជានៅពេលនេះ គឺមាន៖ ១-ពាំនាំផ្តាំផ្ញើការសាកសួរសុខទុក្ខអំពីថ្នាក់ដឹកនាំជាន់ខ្ពស់របស់កូរ៉េ ជូនដល់សម្តេចតេជោនាយករដ្ឋមន្ត្រី ហ៊ុន សែន។ ២-ដើម្បីបានសហប្រតិបត្តិការ និងចុះហត្ថលេខាលើអនុស្សរណៈកិច្ចសហប្រតិបត្តិការលើវិស័យបរិស្ថាន រវាងក្រសួងបរិស្ថាន និងវិទ្យាស្ថានស្រាវជ្រាវបៃតងរបស់កូរ៉េ។ លោក HAN SEUNG SOO បានបន្តថា សាធារណរដ្ឋកូរ៉េមានចំណាប់អារម្មណ៍យ៉ាងខ្លាំងនៅក្នុងការបង្កើតធម្មជាតិបៃតង ហើយវិទ្យាស្ថានជាតិរបស់កូរ៉េស្រាវជ្រាវធម្មជាតិបៃតងនេះបានកកើតឡើងរយៈពេល២ឆ្នាំកន្លងមកហើយ និងមានបំណងចែករំលែកបទពិសោធន៍លើបញ្ហានេះមានកម្ពុជាផងដែរ។ ជាការឆ្លើយតប សម្តេចតេជោនាយករដ្ឋមន្ត្រី ហ៊ុន សែន បានថ្លែងអំណរគុណចំពោះការផ្តាំផ្ញើសាកសួរសុខទុក្ខ និងបានសម្តែងនូវការអបអរសាទរចំពោះការចុះហត្ថលេខាលើអនុស្សរណៈរវាងក្រសួងបរិស្ថានកម្ពុជា និងវិទ្យាស្ថានស្រាវជ្រាវកូរ៉េ។ សម្តេចមានប្រសាសន៍ថា កម្ពុជាមានចំណាប់អារម្មណ៍យ៉ាងខ្លាំងទៅលើបញ្ហានេះ ហើយកម្ពុជាគឺជាប្រទេសមួយកំពុងអភិវឌ្ឍន៍ ហើយការអភិវឌ្ឍនោះកម្ពុជាមានភាពបៃតងរបស់កម្ពុជាផ្ទាល់។ ប៉ុន្តែទោះជាយ៉ាងណាក៏ដោយ កម្ពុជាក៏មានការប្រុងប្រយ័ត្នដែរ ព្រោះថា ភាពបៃតងនេះនឹងអាចធ្លាក់ចុះ និងការឡើងកំដៅដោយភាពស្ងួត ដូច្នេះកម្ពុជាបានចែកតំបន់ការពារ ក៏ដូចជាតំបន់អភិវឌ្ឍន៍ និងមានការដាំដើមឈើឡើងវិញដើម្បីធ្វើយ៉ាងណាពង្រីកវិសាលភាពតំបន់ធម្មជាតិ និងតំបន់ដាំដុះសាជាថ្មីឱ្យបានកាន់តែធំឡើង៕  |
| ឪពុកចុងចាប់រំលោភបានសម្រេចពីរដងមិនបានសម្រេចពីរដងប្តឹងប៉ូលិសចាប់ខ្លួន Posted: 11 Mar 2011 02:26 AM PST  ខេត្តឧត្តរមានជ័យ ៖ បុរសជាឪពុកចុងម្នាក់ឈ្មោះថោង វណ្ណៈ អាយុ៤៦ឆ្នាំ ត្រូវបានសមត្ថកិច្ចឃាត់ខ្លួន បន្ទាប់ពីកូនស្រីដែលទើបមានអាយុ១៤ឆ្នាំ ដាក់ពាក្យប្តឹងចោទប្រកាន់ពីបទចាប់រំលោភសេពសន្ថវៈលើរូបនាងចំនួន៤លើក បានសម្រេច២លើក មិនបានសម្រេច២លើក។ ហេតុការណ៍នេះបានកើតឡើងកាលពីវេលាម៉ោង៨ព្រឹក ថ្ងៃទី៨ មីនា ២០១១ នៅក្រុងសំរោង។ លោកវរសេនីយ៍ត្រី នួន អេត អធិការក្រុងសំរោង បានឱ្យកោះសន្តិភាពដឹងថា ក្មេងស្រីរងគ្រោះបានដាក់ពាក្យបណ្តឹងចោទប្រកាន់ឪពុកចុងរបស់នាងថា បានចាប់រំលោភសេពសន្ថវៈលើរូបនាងចំនួន៤លើកបានសម្រេច២លើក មិនបានសម្រេច២លើក ។ បន្ទាប់ពីបានទទួលពាក្យបណ្តឹងរួចមក លោកបានបញ្ជាឱ្យកម្លាំងប៉ូលិសក្រុងចុះទៅឃាត់ខ្លួនជនសង្ស័យជាឪពុកចុងនោះនាំយកមកអធិការដ្ឋានក្រុងសំរោងដើម្បីធ្វើការសាកសួរ ។ លោកវរសេនីយ៍ត្រីបានបន្តទៀតថា ក្មេងស្រីរងគ្រោះបានរៀបរាប់ប្រាប់សមត្ថកិច្ចថា នាងត្រូវឪពុកចុងចិត្តតិរច្ឆានរូបនេះចាប់រំលោភនៅនឹងផ្ទះចំនួន២លើក ខណៈពេលម្តាយរបស់នាងមិននៅ តែមិនបានសម្រេចទេ ហើយរូបនាងក៏មិនបានចាំថ្ងៃខែដែរ។ បន្ទាប់មករូបនាងត្រូវឪពុកចុងដដែលនេះចាប់រំលោភបានសម្រេចចំនួន២លើក ដែលលើកទី១នៅក្នុងព្រៃចំការ លើកទី២នៅក្នុងផ្ទះដែលម្ចាស់គេទុកចោល ទើបរូបនាងសម្រេចចិត្តដាក់ពាក្យប្តឹងឱ្យសមត្ថកិច្ចចាប់ខ្លួនឪពុកចុងរូបនេះយកទៅផ្តន្ទាទោសតាមច្បាប់ ហើយរឿងដាក់ពាក្យបណ្តឹងនេះ សូម្បីតែម្តាយរបស់នាងក៏នាងមិនឱ្យដឹងដែរ។ ជនសង្ស័យឈ្មោះថោង វណ្ណៈ បានឆ្លើយសារភាពថា ខ្លួនពិតជាបានចាប់រំលោភកូនស្រីចុងប្រាកដមែន តែនាងមិនបានខូចខាតផ្លូវភេទទេ ដោយសារខ្លួនចាប់រំលោភមិនបានស៊ីជំរៅឡើយ។ ទោះបីជាបែបណាក៏ដោយ យោងតាមពាក្យបណ្តឹងរបស់ក្មេងស្រីរងគ្រោះ និងយោងទៅតាមចម្លើយសារភាពពីជនសង្ស័យជាឪពុកចុងសមត្ថកិច្ចបានកសាងសំណុំរឿងបញ្ជូនទៅកាន់សាលាដំបូងខេត្តឧត្តរមានជ័យ ហើយត្រូវតុលាការសម្រេចឃុំខ្លួនបុរសនេះដាក់ពន្ធនាគារខេត្តសៀមរាបបណ្តោះអាសន្ន រង់ចាំសវនាការផ្តន្ទាទោសទៅតាមផ្លូវច្បាប់៕  |
| ពលរដ្ឋខ្មែរ១០នាក់ ដែលគេចពីគ្រាប់កាំភ្លើងទាហានសៀមបានត្រឡប់ចូលផ្ទះវិញអស់ហើយ Posted: 11 Mar 2011 02:23 AM PST ខេត្តបន្ទាយមានជ័យ ៖ ប្រជាពលរដ្ឋខ្មែរ១០នាក់ ដែលបាត់ខ្លួនក្រោយការរត់គេចពីការបាញ់រះរបស់ទាហានព្រំដែនសៀមកាលពីថ្ងៃពុធ ទី៩ មីនា កន្លងមកនេះ បានវិលត្រឡប់មកដល់លំនៅឋានដោយសុវត្ថិភាពវិញអស់ហើយ ។ បើតាមអ្នកយកព័ត៌មានកោះសន្តិភាពប្រចាំខេត្តបន្ទាយមានជ័យ ក៏បានបញ្ជាក់ឱ្យដឹងនៅរសៀលថ្ងៃសុក្រ ទី១១ មីនា នេះដែរថា បុរសម្នាក់ដែលទាហានសៀមបាញ់បាក់ភ្លៅរបួសធ្ងន់ និងបានចាប់ខ្លួនបញ្ជូនទៅទឹកដីសៀមនោះ មិនទាន់ដឹងដំណឹងយ៉ាងណានោះនៅឡើយទេ ។ នៅពេលទាក់ទងតាមទូរស័ព្ទដើម្បីសុំសេចក្តីអត្ថាធិប្បាយជុំវិញព័ត៌មាននេះ អភិបាលស្រុកបន្ទាយអំពិល លោកចាប ហាត បានបង្វែរសំណួរឱ្យទៅសួរលោកអធិការស្រុកវិញ ។ ចំណែកលោកហុង ចម្រើន អធិការស្រុកបន្ទាយអំពិល ខេត្តឧត្តរមានជ័យ មិនអាចទាក់ទងបានទេ នៅរសៀលថ្ងៃសុក្រនេះ ដោយទូរស័ព្ទរបស់លោកភ្ជាប់បានហើយ ប៉ុន្តែប្រព័ន្ធទូរស័ព្ទពិបាកឆ្លើយឆ្លង ។ គួររំលឹកថា កាលពីវេលាម៉ោង៤និង៣០នាទីរសៀលថ្ងៃពុធ ទី៩ មីនា កន្លងមកនេះ នៅចំណុចជប់អង្គញ់ក្នុងទឹកដីឃុំគោកមន ស្រុកបន្ទាយអំពិលទាហានឈុតខ្មៅសៀម បានធ្វើការបាញ់រះទៅលើប្រជាពលរដ្ឋខ្មែរ បណ្តាលឱ្យមនុស្សម្នាក់របួសធ្ងន់ក្រោយមកត្រូវចាប់ខ្លួន និងបាត់ខ្លួនម្នាក់ ហើយមនុស្ស១១នាក់ទៀត ក្នុងនោះក៏មានរបួសស្រាលម្នាក់បានរត់រួចមកដល់ភូមិវិញ ។ ពលរដ្ឋខ្មែរឈ្មោះឈឿន ញូង ភេទប្រុស អាយុ៣៨ឆ្នាំ បានរងរបួសបាក់ភ្លៅ ហើយត្រូវទាហានឈុតខ្មៅសៀមចាប់ខ្លួន ចំណែកអ្នករបួសស្រាលឈ្មោះហៀច ភេទប្រុស អាយុ២៧ឆ្នាំ ត្រូវបានគេបញ្ជូនទៅព្យាបាលនៅមន្ទីរពេទ្យបង្អែកស្រុកមង្គលបុរី ខេត្តបន្ទាយមានជ័យ ។ រីឯប្រជាពលរដ្ឋ១០នាក់ផ្សេងទៀត បានរត់គេចខ្លួនរួចពីការបាញ់សម្លាប់ដោយកាំភ្លើងពីក្រុមទាហានសៀម ៕  |
| ព្រះអគ្គីលេបត្របាក់ម៉ូតូ-កង់ និងរោងស្នាក់នៅរបស់កម្មកររោងចក្រ Best Way ក្រុងបាវិត Posted: 11 Mar 2011 02:08 AM PST   ខេត្តស្វាយរៀង ៖ ភ្លើងបានឆាបឆេះម៉ូតូអស់ចំនួន២៦គ្រឿង និងកង់រាប់សិបគ្រឿង ព្រមទាំងសំលៀកបំពាក់ របស់របរ កន្ទេល មុងភួយ ដែលជារបស់កម្មករស្នាក់នៅក្នុងរោងចក្រអស់យ៉ាងច្រើនគួរឱ្យសោកស្តាយ កាលពីថ្ងៃទី១០ មីនា ២០១១ វេលាម៉ោង៣ និង៥០នាទីរសៀល នៅរោងចក្រដំឡើងកង់របស់ក្រុមហ៊ុន Best Way តំបន់សេដ្ឋកិច្ចពិសេសបាវិតនៅភូមិតាពៅ សង្កាត់បាវិត ក្រុងបាវិត។ ទាក់ទិនករណីនេះកម្មករម្នាក់សុំមិនបញ្ចេញឈ្មោះប្រាប់កោះសន្តិភាពថា អគ្គីភ័យនេះបណ្តាលមកពីទុស្សេខ្សែភ្លើង ក៏ប៉ុន្តែអ្វីដែលកម្មករខឹងនោះ គឺពេលភ្លើងឆាបឆេះម៉ូតូ កង់ និងទ្រព្យសម្បត្តិ សំលៀកបំពាក់ កន្ទេល មុង ភួយរបស់ពួកគេ បែរជាពួកសន្តិសុខក្រុមហ៊ុនចាក់សោរោងចក្រមិនឱ្យកម្មករ កម្មការិនីចេញទៅជញ្ជូនយកទ្រព្យរបស់ខ្លួនចេញពីភ្លើងទេ ។ ភ្លើងឆាបឆេះអស់រយៈពេលជាង១០នាទីទើបបាញ់ទឹកពន្លត់បាន។ ភ្លើងបានឆេះរោងដាក់កង់ម៉ូតូ និងកន្លែងកម្មករស្នាក់នៅក្បែរអគាររោងចក្រក្នុងបរិវេណរោងចក្រ Best Way រហូតដល់ម៉ោងសំរាក ម៉ោង៦ល្ងាចទើបឱ្យកម្មករចេញពីក្នុងរោងចក្រ។ សន្តិសុខក្រុមហ៊ុនបានរារាំងមិនឱ្យអ្នកយកព័ត៌មានចូលទៅជិតទីធ្លាតំបន់សេដ្ឋកិច្ចពិសេស ឬរោងចក្រឡើយ លុះពេលអ្នកយកព័ត៌មានទៅរកការបំភ្លឺពីសមត្ថកិច្ចទើបបើកឱ្យក្រុមកម្មករ កម្មការិនីចេញពីរោងចក្រ។ បើតាមមន្ត្រីរោងចក្រ Best Way ប្រាប់ឱ្យដឹងថា ម៉ូតូ២៦គ្រឿង ក្នុងមួយគ្រឿងមានតម្លៃចាប់ពី ៥០០ដុល្លារដល់១.៥០០ដុល្លារ រីឯកង់ និងសំលៀកបំពាក់មួយចំនួនធំមិនដឹងជាគិតជាទឹកប្រាក់ប៉ុន្មានទេ ។ កម្មករពុំមានតំណាងសហជីពដើម្បីជួយចូលដោះស្រាយជាមួយក្រុមហ៊ុន Best Way ទេ ទើបមានការព្រួយបារម្ភ និងសូមអំពាវនាវសុំឱ្យក្រសួងការងារទៅជួយធ្វើអន្តរាគមន៍ដោះស្រាយសំណងដល់កម្មករតាមតម្លៃទំហំការខូចខាត និងមានភាពយុត្តិធម៌ផង។ រហូតដល់ព្រឹកថ្ងៃទី១១ មីនា កម្មករបានធ្វើកូដកម្មមិនចូលធ្វើការ និងក្រោយមកកម្មករដែលមិនបានទទួលផលប៉ះពាល់បានសំរេចចិត្តចូលធ្វើការវិញ។ ទាក់ទិនករណីនេះកោះសន្តិភាពព្យាយាមទូរស័ព្ទទៅលោកអ៊ូ សាខឿន តំណាងក្រសួងការងារនៅប្រចាំតំបន់សេដ្ឋកិច្ចពិសេសដែរ តែលោកបានបិទទូរស័ព្ទ៕  |
| រញ្ជួយដីខ្លាំង៨,៩រីស្ទ័រនៅជប៉ុនមានរលកយក្សស៊ូណាមីកំពស់ដល់១០ម៉ែត្របោកកំទេចអ្វីៗទាំងអស់ Posted: 11 Mar 2011 01:58 AM PST                  ការរញ្ជួយដីយ៉ាងខ្លាំងបំផុតមួយមានកម្លាំងដល់ទៅ៨,៩រីស្ទ័រ កើតមាននាថ្ងៃទី១១ មីនា នៅភាគឦសាន ប្រទេសជប៉ុនបង្កឱ្យមានស៊ូណាមីយ៉ាងសាហាវកំពស់ដល់ទៅ១០ម៉ែត្រ ដែលកំទេចរាល់អ្វីៗទាំងអស់តាមផ្លូវវាយប្រហាររបស់រលកយក្សទាំងនេះ ដែលមានទាំងផ្ទះ អគារទាំងឡាយ រថយន្ត កសិដ្ឋាន និងនាវា... ។ ទូរទស្សន៍រដ្ឋជប៉ុន NHK និយាយពីមនុស្ស ស្លាប់ និងរបួសជាច្រើននាក់ពិសេសដោយសារការបាក់ដីនៅភាគខាងជើងប្រទេស ។ ការរញ្ជួយដីបង្កឱ្យមានអគ្គីភ័យក្នុងនោះមានអគារស្តុកប្រេងមួយនៃរោងចក្រចំរាញ់ប្រេងកាតនៅ CHIBA ជិតក្រុងតូក្យូ ។ ទូរទស្សន៍បង្ហាញពីរូបភាពនានានៃស្ពានក្រុងសេនដៃជាទីក្រុងមួយមានប្រជាជន១លាននាក់ស្ថិតនៅភាគខាងជើង ត្រូវរងការវាយប្រហារដោយរលកយក្សមានកំពស់១០ម៉ែត្រ ។ រលកយក្សមួយទៀតមានកំពស់៧ម៉ែត្រ កើតមានបន្ទាប់ពីរលកយក្សកំពស់១០ម៉ែត្រនោះ ។ ការប្រកាសអាសន្នស៊ូណាមីត្រូវបានធ្វើក្នុងផ្នែកមួយយ៉ាងធំនៃឆ្នេរសមុទ្រប៉ាស៊ីហ្វិកនៅកោះ ហុនស៊ូជាកោះសំខាន់មួយរបស់ជប៉ុន ។ នៅតៃវ៉ាន់ និងនៅឥណ្ឌូណេស៊ីក៏មានការប្រកាសអាសន្នស៊ូណាមីដែរ ។ សាលាក្រុងវ៉ាកាយ៉ាម៉ា បានចេញបញ្ជាឱ្យជម្លៀសមនុស្ស២០.០០០នាក់ ជាការបង្ការចំពោះរលកស៊ូណាមីថ្មីៗទៀត ។ ការរញ្ជួយដីនេះកើតមាននាវេលាម៉ោង៥ និង៤៦នាទីម៉ោងសាកលនៅចម្ងាយ១៣០គ.ម ខាងកើតទីក្រុងសេនដៃក្នុងដែនទឹកនៃកោះហុនស៊ូ ក្នុងជម្រៅ២៤គ.មក្រោមសមុទ្រ ។ នៅទីក្រុងតូក្យូអគារទាំងឡាយញ័ររញ្ជួយយ៉ាងខ្លាំង ។ ក្រសួងការពារប្រទេសជប៉ុនបានបញ្ជាឱ្យយន្តហោះយោធា៨គ្រឿងហោះឡើង ដើម្បី ពិនិត្យការខូចខាត ។ មជ្ឈមណ្ឌលនុយក្លេអ៊ែរ និងរោងចក្រចំរាញ់ប្រេងកាតជាច្រើនត្រូវបិទ ហើយរោងចក្រស្លដែកមួយកំពុងត្រូវភ្លើងឆេះ។ ការរញ្ជួយដីដែលកើតនាវេលាម៉ោង៣រសៀលម៉ោងក្នុងស្រុក ម៉ោង៧ព្រឹកម៉ោងនៅបារាំងធ្វើឱ្យអគារទាំងឡាយនៅក្រុងតូក្យូញ័រ រង្គើរយ៉ាងខ្លាំង ។ ការរញ្ជួយខ្លាំងដំបូងមានរយៈពេលជាង២នាទីធ្វើឱ្យអគារទាំងឡាយញ័ររង្គើរចាប់ពីកំពស់១ម៉ែត្រទៅ ។ ប៉ុន្មាននាទីក្រោយមក មានការរញ្ជួយខ្លាំងមួយទៀត ។ ភ្លាមៗក្រោយការរញ្ជួយដីនេះអ្នករបួសជាច្រើនត្រូវបានជំរឿនឃើញ ។ កំពង់ផែ និងព្រលានយន្តហោះត្រូវបិទក្នុងផ្នែកមួយយ៉ាងធំរបស់ ការរញ្ជួយដីនេះញ័រកក្រើករហូតដល់ក្រុងប៉េកាំង ស្ថិតនៅចំងាយ២.៥០០គ.ម នាភាគខាងលិច ។ បណ្តានិយោជិតដែលធ្វើការក្នុងអគារខ្ពស់ទាំងឡាយក្នុងរដ្ឋធានីចិនរាយការណ៍ពីការញ័ររង្គើរ តែពុំបានរាយការណ៍ពីអ្នកត្រូវរបួសឡើយ ។ នៅកណ្តាលក្រុងតូក្យូ ដំបូលអគារមួយបានបាក់ដែលក្នុងអគារនោះមាននិស្សិត៦០០នាក់ កំពុងចូលរួមក្នុងពិធីប្រគល់សញ្ញាបត្របណ្តាលឱ្យនិស្សិតច្រើននាក់ត្រូវរបួស ។ ជប៉ុនបានបញ្ជូននាវាទាំងឡាយ ព្រមទាំងកងនាវាចម្បាំងទៅកាន់តំបន់ MIYAGI ដែលរងការប៉ះពាល់ដោយការរញ្ជួយដីខ្លាំងនោះ ។ ក្នុងតំបន់រងការប៉ះពាល់ដោយរលកយក្ស រូបភាពទាំងឡាយថតតាមឧទ្ធម្ភាគចក្របង្ហាញតំបន់រស់នៅរបស់ប្រជាជនត្រូវទឹកលិចទាំងស្រុង ផ្លូវថ្នល់ទាំងឡាយត្រូវរលកវាយប្រហារហើយរថយន្ត ឬនាវាត្រូវកម្លាំងរលកបោកនាំយកទៅជាមួយ ។ គេនៅពុំទាន់ដឹងថា តើមានជនរងគ្រោះប៉ុន្មាននាក់ឡើយបង្កឡើងដោយគ្រោះមហន្តរាយនេះ ឬតើប្រជាជនអាចមានពេលរត់ភៀសខ្លួនចេញទាន់ ឬយ៉ាងណាឡើយ ។ ការខូចខាតពិតជាមានទំហំធំធេងបំផុតរហូតដល់នៅតំបន់ឆ្ងាយពីចំណុចកណ្តាល ។ អគ្គិសនីត្រូវដាច់ រួចតំបន់ជាច្រើននាភាគខាងជើងជប៉ុនរងការប៉ះពាល់ ជាពិសេសដល់អគារប្រមាណជា៤លានក្នុងតំបន់ក្រុងតូក្យូ ។ ការប្រកាសអាសន្នស៊ូណាមី ត្រូវបានធ្វើស្ទើរតែនៅគ្រប់តំបន់ទាំងអស់នៃឆ្នេរមហាសមុទ្រប៉ាស៊ីហ្វិកក្នុងនោះរួមមានអូស្ត្រាលី និងអាមេរិក ខាងត្បូង ។
អ្នកស្រាវជ្រាវផ្នែកភូមិសាស្ត្រសហរដ្ឋអាមេរិកនិយាយថា រលកស៊ូណាមី ដែលកើតឡើងដោយការរញ្ជួយដីនោះអាចបង្កការខូចខាតដល់តំបន់ឆ្នេរសមុទ្រនៅរដ្ឋហាវ៉ៃរបស់អាមេរិក ដូច្នេះត្រូវចាត់វិធានការជាបន្ទាន់ដើម្បីជួយសង្គ្រោះជីវិតមនុស្ស និងទ្រព្យសម្បត្តិ ។ គ្រោះរញ្ជួយដីលើកចុងក្រោយដែលកើតឡើងនៅប្រទេសជប៉ុននេះជាការរញ្ជួយដីធ្ងន់ធ្ងរបំផុតចាប់តាំងពីការរញ្ជួយដីកម្រិត៩រីស្ទ័រ កើតឡើងនៅខេត្ត Aceh ប្រទេសឥណ្ឌូណេស៊ី កាលពីថ្ងៃទី២៦ ធ្នូ ឆ្នាំ២០០៤ កន្លងមក បណ្តាលឱ្យកើតរលកយក្សស៊ូណាមី ស្លាប់មនុស្សជាច្រើនម៉ឺននាក់ នៅក្នុងប្រទេសជាច្រើន ជាប់មហាសមុទ្រឥណ្ឌា ។ ក្រោយពីទទួលបានព័ត៌មានថា មានបាតុភូតគ្រោះរញ្ជួយដីដ៏មានឥទ្ធិពលនៅប្រទេសជប៉ុន ប្រទេសកូរ៉េខាងត្បូងបានបញ្ជូនអ្នកជួយសង្គ្រោះមួយក្រុមទៅកាន់ប្រទេសជប៉ុន ដើម្បីជួយក្នុងប្រតិបត្តិការជួយសង្គ្រោះ ។
ការរញ្ជួយដីថ្ងៃទី១១ មីនា នៅភាគឦសានប្រទេសជប៉ុនជាការរញ្ជួយដីខ្លាំងបំផុតមួយក្នុងប្រវត្តិសាស្ត្ររបស់ប្រទេសនេះ ចាប់តាំងពី១៤០ឆ្នាំមកហើយ រួចក៏ជាការរញ្ជួយដីយ៉ាងសាហាវបំផុតមួយនៃសតវត្សដែរ ។ យោងតាមវិទ្យាស្ថានភូមិវិទ្យាអាមេរិក USGS ថា ការរញ្ជួយដីនេះមានកម្លាំងដល់ទៅ៨,៩រីស្ទ័រ ។ នេះជាការរញ្ជួយដីខ្លាំងជាងការរញ្ជួយដីនៅកានតូ មានកម្លាំង៧,៩រីស្ទ័រ ដែលបណ្តាលឱ្យមនុស្សស្លាប់១៤០.០០០នាក់ ក្នុងតំបន់ក្រុងតូក្យូ កាលពីថ្ងៃទី១ កញ្ញា ឆ្នាំ១៩២៣ ។ ក្នុងឆ្នាំ១៩៣៣ ការរញ្ជួយដីកម្លាំង៨,១រីស្ទ័រ បណ្តាលឱ្យមនុស្សស្លាប់ជាង៣.០០០នាក់ នៅឆ្នេរសមុទ្រភាគឦសានប្រទេសជប៉ុនដែរ ។ ក្នុងឆ្នាំ ១៩៩៥ ការរញ្ជួយដីនៅក្រុងកូបេ មានកម្លាំង៧,២រីស្ទ័រ បណ្តាលឱ្យមនុស្សស្លាប់ជាង៥.០០០នាក់ ហើយបង្កការខូចខាតដល់១០០ពាន់លានដុល្លារ ដែលនេះជាគ្រោះមហន្តរាយធម្មជាតិដែលញ៉ាំងឱ្យមានខូចខាតច្រើនបំផុតនៃប្រវត្តិសាស្ត្រ ៕  |
| Posted: 11 Mar 2011 01:29 AM PST    ខេត្តកំពង់ឆ្នាំង ៖ ព្រឹកថ្ងៃទី១១ មីនា ប៉ូលិសព្រហ្មទណ្ឌកំរិតធ្ងន់នៃស្នងការដ្ឋាននគរបាលខេត្តបានធ្វើសន្និសីទសារព័ត៌មានបង្ហាញជនសង្ស័យ៧នាក់ដែលជាប់ពាក់ព័ន្ធក្នុងអំពើប្លន់ប្រដាប់អាវុធ កាលពីចុងខែកុម្ភៈកន្លងទៅនៅផ្សារពង្របានលុយជាង១ម៉ឺនដុល្លារដោយសុវត្ថិភាព។ ក្នុងការបង្ហាញជនសង្ស័យទាំង៧នាក់នេះ ប៉ូលិសក៏បានបង្ហាញភស្តុតាងយ៉ាងច្រើនដែលពាក់ព័ន្ធក្នុងអំពើលួចប្លន់នោះផងដែរ ជនសង្ស័យ ទាំងនេះតែងតែបង្កអសន្តិសុខលួចប្លន់ប្រជាពលរដ្ឋឆ្លងខេត្តឥតឈប់ឈរ ហើយស្នាដៃរបស់ប៉ូលិសនេះធ្វើឱ្យប្រជាពលរដ្ឋមានការសាទរយ៉ាងខ្លាំងដោយបានលើកគ្នាទៅចោមរោមមើលកកកុញ។ ជនសង្ស័យទាំង៧នាក់ មាន១-ឈ្មោះអៀ តាល់ ហៅហេង អាយុ២៩ឆ្នាំ នៅភូមិតាកែវក្រោម ឃុំបឹងកន្ទួត ស្រុកក្រគរ ខេត្តពោធិ៍សាត់, ២-ឈ្មោះទិន ចយ ហៅឆយ អាយុ៤៩ឆ្នាំ នៅភូមិសារវ័ន្ត ឃុំស្នាអន្សា ស្រុកក្រគរ ខេត្តពោធិ៍សាត់, ៣-ឈ្មោះមុត ផាន់នី អាយុ២០ឆ្នាំ នៅភូមិតោ្នតញី ឃុំតាលន់ ស្រុកស្អាង ខេត្តកណ្តាល, ៤-ឈ្មោះប៉ុក ស៊ីធឿន អាយុ៣១ឆ្នាំ នៅ ភូមិស្ថានីយ ឃុំស្វាយអាត់ ស្រុកសំពៅមាស ខេត្តពោធិ៍សាត់, ៥-ឈ្មោះសុខ ចាន់រិទ្ធ អាយុ៣០ឆ្នាំ នៅភូមិទួលតាឯក ឃុំទួលតាឯក ខេត្តបាត់ដំបង, ៦-ឈ្មោះវ៉ែន វាសនា ហៅឃុន ឃីម អាយុ៤២ឆ្នាំ នៅភូមិកណ្តាល ឃុំក្បាលត្រាច ស្រុកក្រគរ ខេត្តពោធិ៍សាត់ និង៧-ឈ្មោះឡេង អ៊ីម ហៅដួង អ៊ឹម ហៅហ៊ឹម ហៅសល់ អាយុ៤២ឆ្នាំ រស់នៅភូមិស្តុកឈូក ឃុំទំនប់ធំ ស្រុកពញាឮ ខេត្តកណ្តាល។ ក្រោយឃាត់ខ្លួនជនសង្ស័យទាំង៧នាក់នេះ ប៉ូលិសដកហូតសំភារបំរើឱ្យចោរកម្មមានកាំភ្លើង AK បត់២ដើម គ្រាប់១៨គ្រាប់ និងបង់មួយដែល១ដើមដកហូតបានពីផ្ទះឈ្មោះវ៉ែន វាសនា។ គោយន្ត១គ្រឿង ម៉ាស៊ីនភ្លើងមួយ កន្ត្រៃកាត់ដែក២ ដែកគាស់១ ថ្នាំបំពុលឆ្កែ១ថង់ ម៉ូទ័រស្វាន៣គ្រឿង សោម៉ូតូ៦ ប្រដាប់កាច់សោម៉ូតូ២ ស្លាកលេខម៉ូតូ៤ កន្ត្រកម៉ូតូ១០ កញ្ចក់ម៉ូតូ៥គូ ឡាំងកូនសោ១ប្រអប់ ក្បាំងម៉ូតូ២ ដែកដូយ១ ស៊ីមទូរស័ព្ទ១៣ ប្រដាប់កែច្នៃលេខម៉ូតូ១ ម៉ូតូចំនួន៣គ្រឿង និងគ្រឿងបន្លាស់ម៉ូតូជាច្រើនទៀត។ សំភារខាងលើនេះបានដកហូតនៅផ្ទះឈ្មោះឡេង អ៊ឹម ដែលជាមេខ្លោង។ ក្រៅពីនេះម៉ូតូចំនួន៤គ្រឿងទៀតក៏បានដកហូតពីក្រុមនេះផងដែរដែលសរុបម៉ូតូទាំងអស់មានចំនួន៧គ្រឿង៕  |
| ឆក់ស្បោងលុយរាប់ម៉ឺនដុល្លារទើបបើកពីធនាគារ ខណៈរថយន្តធូរកង់នៅមុខកន្លែងធ្វើការ Posted: 11 Mar 2011 01:06 AM PST    រាជធានីភ្នំពេញ ៖ បុគ្គលិកអង្គការតាប៊ីថា ខេមបូឌា ម្នាក់ត្រូវជនមិនស្គាល់មុខមានគ្នា២នាក់ចូលទៅឆក់ស្បោងលុយ៤ម៉ឺនដុល្លារ រួចហើយជិះម៉ូតូគេចខ្លួនទៅបាត់ ខណៈបុគ្គលិកម្នាក់នេះទើបវិលត្រឡប់មកពីបើកប្រាក់ពីធនាគារ ហើយចុះពីលើរថយន្តដែលសំចតនៅមុខទីស្នាក់ការអង្គការតាប៊ីថា ខេមបូឌា ស្ថិតនៅផ្ទះលេខ២៣៩ ផ្លូវលេខ៥១ កែងផ្លូវលេខ៣៦០ សង្កាត់បឹងកេងកងទី១ ខណ្ឌចំការមន វេលាម៉ោង១១និង២០នាទីថ្ងៃទី១១ មីនា ២០១១ ។ តាមប្រភពព័ត៌មានទាក់ទិននឹងអំពើឆក់ស្បោងលុយដុល្លារខាងលើនេះ ឱ្យដឹងថា មុនពេលកើតហេតុ ស្ត្រីឈ្មោះយី វណ្ណារី អាយុ៥១ឆ្នាំ បានជិះរថយន្តម៉ាកស្តារិច ពណ៌.ស ធ្វើដំណើរត្រឡប់មកពីបើកប្រាក់នៅធនាគារកម្ពុជាសាធារណៈ ស្ថិតនៅតាមបណ្តោយផ្លូវភ្លោះវត្តភ្នំ ក្នុងភូមិសាស្ត្រខណ្ឌដូនពេញ ចំនួន៥២.០០០ដុល្លារ ដើម្បីយកមកទិញសម្ភារផ្សេងៗផ្គត់ផ្គង់ក្នុងអង្គការទាំងមូល ។ ខណៈពេលមកដល់មុខស្នាក់ការអង្គការ ត្រូវជនមិនស្គាល់មុខម្នាក់ស្លៀកពាក់ស៊ីវិលដើរសំដៅមករករថយន្តរបស់គាត់ធ្វើដូចជាមនុស្សស្អាតបាតធម្មតា ។ ប៉ុន្តែខណៈពេលដែលស្ត្រីឈ្មោះយី វណ្ណារី បើកទ្វាររថយន្តចុះដី ដោយដៃយួរស្បោងប្រាក់ទើប បើកពីធនាគារផងនោះ ស្រាប់តែជនស៊ីវិលដែលដើរតម្រង់មករកគាត់ ស្ទុះឆក់កាបូបប្រាក់ពីដៃ ដោយថែមទាំងប្រតាយប្រតប់គ្នាបន្តិចផង...ពេលបានកាបូបប្រាក់ហើយចោរក៏រត់ឡើងម៉ូតូគ្នារបស់គេ ដែលបញ្ឆេះចាំជាស្រេចនោះគេចខ្លួនបាត់តែម្តង ។ សូមបញ្ជាក់ថា ប្រាក់នៅក្នុងកាបូបនោះ៤ម៉ឺនដុល្លារ ។ ដោយឡែកប្រាក់១២.០០០ដុល្លារ និងសៀវភៅធនាគារជ្រុះនៅកន្លែងកើតហេតុ ដូច្នេះមានន័យថា លុយទាំងអស់៥២.០០០ដុល្លារ ត្រូវចោរឆក់យកទៅបាត់អស់៤ម៉ឺនដុល្លារ ៕  |
| Posted: 11 Mar 2011 12:37 AM PST  រាជធានីភ្នំពេញ ៖ តំណាងរាស្ត្រគណបក្សសម រង្ស៊ី មានលោកស្រីមូរ សុខហួរ, សុន ឆ័យ, យឹម សុវណ្ណ និងអភិបាលខណ្ឌសែនសុខ លោកឃួង ស្រេង បានចុះទៅពិនិត្យមើលក្រុមហ៊ុន ធី & ភី (ក្រុមហ៊ុននាំពលករ-ពលការិនីទៅធ្វើការនៅក្រៅប្រទេស) ដែលធ្លាប់មានពលការិនីដេកស្លាប់ និងពលការិនីខ្លះទៀតលោតពីលើអគារ រងរបួសធ្ងន់ធ្ងរ និងការចុះពិនិត្យមើលក្រុមហ៊ុននេះផងដែរ គឺក្រុមតំណាងរាស្ត្រ និងលោកអភិបាលខណ្ឌបានស្វះស្វែងរំដោះក្មេងស្រីម្នាក់ (ពលការិនីមិនទាន់គ្រប់អាយុ) ចេញពីក្រុមហ៊ុននេះ ផងដែរ។ លោកអភិបាលខណ្ឌសែនសុខឃួង ស្រេង បានមានប្រសាសន៍ថា ការស្លាប់របស់ពលការិនី និងការលោតពីលើអគារបណ្តាលឱ្យរងរបួស គឺបង្ហាញច្បាស់ណាស់ថា ក្រុមហ៊ុនខ្វះ ការយកចិត្តទុកដាក់ចំពោះពលការិនីដែលស្នាក់នៅត្រៀមចេញទៅបម្រើការនៅក្រៅប្រទេស ។ ចំពោះការបិទអាជីវកម្មដំណើរការរបស់ក្រុមហ៊ុននេះ គឺអាជ្ញាធររង់ចាំការសម្រេចពីតុលាការ តែប៉ុណ្ណោះ។ លោកសុន ឆ័យ តំណាងរាស្ត្រមកពីគណបក្សសម រង្ស៊ី បានប្រាប់ថា ការចុះមកក្រុមហ៊ុន ភី & ធី នេះគឺដើម្បីរំដោះក្មេងស្រីដែលចង់ត្រឡប់ទៅផ្ទះវិញ បន្ទាប់មកពិនិត្យមើលលក្ខណសម្បត្តិរបស់ក្រុមហ៊ុននេះថា តើមានបរិស្ថានយ៉ាងម៉េច? ក្រុមហ៊ុនធ្វើការជាមួយពលការិនីដោយរបៀបម៉េច និងពិនិត្យទៅលើពលការិនីដែលមកស្នាក់នៅក្នុងក្រុមហ៊ុននេះ ។ លោកសុន ឆ័យ បានមានប្រសាសន៍ថា ការចុះមកអង្កេតរបស់ក្រុមអ្នកតំណាងរាស្ត្រនាពេលនេះគឺឃើញថា ក្រុមហ៊ុននេះមិនមានភាពប្រក្រតីទេ មានក្មេងស្រីមិនទាន់គ្រប់អាយុ និងមានការធ្វើរបងព័ទ្ធជុំវិញដូចជាគុកព្រៃ.ស។ ការស្លាប់របស់នារីម្នាក់កាលពីប៉ុន្មានថ្ងៃមុននេះ មិនមែនស្លាប់ដោយសារគាំងបេះដូងនោះទេ គឺស្លាប់ដោយសារថប់ខ្យល់ច្រើនជាង ព្រោះពេលក្រុមអ្នកតំណាងរាស្ត្រចូលពិនិត្យបន្ទប់ស្នាក់នៅរកឃើញថា គ្រប់បន្ទប់មានមនុស្សដេក៣០នាក់ ហើយបន្ទប់នោះតូចចង្អៀត គឺមានក្លិនមិនល្អ ថប់ខ្យល់ អាចបណ្តាលឱ្យពលការិនីទាំងនោះពលបរិស្ថានសន្លប់ និងខ្យល់គរដួលស្លាប់ក៏មាន៕  |
| យេម៉ែន ៖ ប្រធានាធិបតីសាេឡហ៍ស្នើរដ្ឋធម្មនុញ្ញថ្មីមួយ Posted: 11 Mar 2011 12:32 AM PST ប្រធានាធិបតីយេម៉ែន លោកអាលី អាប់ដាល់ឡាហ៍ សាឡេហ៍ បានស្នើកាលពីថ្ងៃទី១០ មីនា ពីការតាក់តែងរដ្ឋធម្មនុញ្ញថ្មីមួយដែលធានាឯករាជភាពរបស់សភា និងរបស់តុលាការ ក៏ប៉ុន្តែបាតុករជាច្រើនពាន់នាក់ដែលមានកំហឹងនៅតែបន្តហែក្បួនតាមដងវិថីដើម្បីទាមទារការចាកចេញពីអំណាចរបស់លោក។  |
| រោងចក្រដំឡើងរថយន្តដំបូងគេនៅព្រះរាជាណាចក្រកម្ពុជាដំណើរការ Posted: 11 Mar 2011 12:11 AM PST      រាជធានីភ្នំពេញ ៖ រោងចក្រខ្មែរដំឡើងរថយន្តទី១ គឺជារោងចក្រដំឡើងរថយន្តដំបូងគេបង្អស់នៅក្នុងព្រះរាជាណាចក្រកម្ពុជា នាសម័យនេះ ដែលមានទីតាំងស្ថិតនៅតាមបណ្តោយផ្លូវជាតិលេខ៣ ក្នុងចម្ងាយប្រហែលជាង១គីឡូម៉ែត្រប៉ុណ្ណោះពីអាកាសយានដ្ឋានអន្តរជាតិភ្នំពេញ ។ ក្រុមហ៊ុនមួួយនេះគឺជាក្រុមហ៊ុនធ្វើអាជីវកម្មរួមចំនួន៣ គឺកម្ពុជា ចិនប៉េកាំង និងចិនហុងកុង ដែលបានប្រើប្រាស់ទុនសរុបចំនួន១៥លានដុល្លារសហរដ្ឋអាមេរិក ។ លោក Li Shi Yong ប្រធានគ្រប់គ្រងរោងចក្រខ្មែរដំឡើងរថយន្តទី១ នេះបានឱ្យដឹងថា រថយន្តទាំងនេះបានផលិតឡើងតាមបច្ចេកវិទ្យាទំនើបទាន់សម័យ ការរចនាម៉ូដ និងរូបរាងរថយន្តទាំងមូល ស្អាតសង្ហា មានភាពរឹងមាំ ធន់បានយូរ ស៊ីប្រេងតិច និងការបញ្ចេញផ្សែងមកខាងក្រៅរបស់ម៉ាស៊ីនមិនបំពុលបរិស្ថានឡើយ។ លោកបានបញ្ជាក់ថា មុននឹងមានការផលិតរថយន្តនេះឡើង ក្រុមហ៊ុនបានកំណត់គោលនយោបាយជាចំបង គឺសំដៅលើការដឹកជញ្ជូន ដូច្នេះគ្រប់លក្ខណៈរបស់រថយន្តត្រូវតែមានភាពរឹងមាំ ព្រោះតម្រូវការប្រជាកសិករចូលចិត្តធ្វើម៉េចដឹកឱ្យបានច្រើន ។ តាមការឱ្យដឹងពីលោកប្រធានផ្នែកទីផ្សារធំជាងគេរបស់ក្រុមហ៊ុនខ្មែរដំឡើងរថយន្តទី១ ថា ក្រុមហ៊ុនធំដែលជាក្រុមហ៊ុនមេមានទីតាំងស្ថិតនៅទីក្រុងប៉េកាំង ប្រទេសចិន បានដំណើរការតាំងពីឆ្នាំ១៩៥៨មកម៉្លេះ ។ ក្រុមហ៊ុននេះមានភាគហ៊ុនរវាងរដ្ឋ និងឯកជនរបស់ចិន កម្លាំងផលិតក្នុង១ឆ្នាំជាង១លានគ្រឿង និងបានលក់ចែកចាយនៅពាសពេញពិភពលោក ។ ប្រទេសកម្ពុជា គឺជាសាខាទី៤ហើយបន្ទាប់ពីរោងចក្រដ៏ធំរបស់ចិនមួួយនេះបានដំឡើងនៅរុស្ស៊ី ម៉ារ៉ុក និងវៀតណាម ហើយនាអនាគតមានគម្រោងទៅបង្កើតនៅអឺរ៉ុប និងអាមេរិកខាងជើងជាបន្តទៀត ។ មូលហេតុដែលនាំឱ្យក្រុមហ៊ុនចិនសម្រេចចិត្តមកបង្កើតរោងចក្រដំឡើងរថយន្តនៅកម្ពុជាលើកនេះ ត្រូវបានលោកប្រធានទីផ្សារឱ្យដឹងថា គឺលោកបានមើលឃើញកម្ពុជាមានស្ថិរភាពនយោបាយ មានសេដ្ឋកិច្ចរីកចម្រើនយ៉ាងឆាប់រហ័ស ហើយក៏ដើម្បីបង្កើតការងារសម្រាប់ប្រជាពលរដ្ឋខ្មែរទៀតផង ។ អ្វីដែលជាចំណុចសំខាន់ផ្សេងទៀតនោះ គឺការមើលឃើញការនាំចូលរថយន្តជជុះ មិនធានាសុវត្ថិភាពហើយបំពុលបរិស្ថានទៀតផង ។ រយៈពេលជាង៣ខែមកនេះ រោងចក្របានបញ្ចេញលក់រថយន្តគ្រប់ប្រភេទអស់ជាង១០០គ្រឿងហើយ ។ រោងចក្របានធានាការដំឡើងឱ្យបាន១ម៉ឺនគ្រឿងក្នុង១ឆ្នាំ នាពេលអនាគត ។ រោងចក្រខ្មែរដំឡើងរថយន្តទី១នេះ បានចុះបញ្ជីនិងចាប់ដំណើរការតាំង ពីឆ្នាំ២០០៩មកម៉្លេះ ។ សម្រាប់អតិថិជនដែលបានជាវរថយន្តពីក្រុមហ៊ុននេះទៅ គឺមានធានានូវសេវាកម្មច្រើនយ៉ាង ដូចជាសេវាកម្មថែទាំជួសជុលឱ្យតែស្ថិតនៅក្នុងឆ្នាំកុងត្រាដែលមានរយៈពេល២ឆ្នាំ ឬស្មើនឹង៥ម៉ឺនគីឡូម៉ែត្រ បើទោះជាមានបញ្ហានៅទីណាក៏ដោយ គឺក្រុមហ៊ុននឹងបញ្ជូនអ្នកឯកទេសទៅដល់ភ្លាម ឬបើមានត្រង់កន្លែងណានៃគ្រឿងរថយន្តមិនត្រឹមត្រូវអាចយកមកដល់រោងចក្រជួសជុលកែលម្អឡើងវិញភ្លាមៗតែម្តង ៕  |
| កូនប្រុសលោកកាដាហ្វី សន្យាពីការវាយលុកទ្រង់ទ្រាយធំមួយ Posted: 11 Mar 2011 12:08 AM PST  លោកសៃអ៊ីហ្វអាល់ អ៊ីស្លាម កូនប្រុសម្នាក់ ក្នុងចំណោមកូនប្រុសរបស់លោកមូអាម៉ា កាដាហ្វី ថ្លែងកាលពីថ្ងៃទី១០ មីនា ថា ពេលនៃការវាយលុកទ្រង់ទ្រាយធំមួយប្រឆាំងពួកបះបោរលីប៊ីបានមកដល់ហើយ ។ ក្នុងបទសម្ភាសន៍មួយជាមួយរ៉យទ័រលោកសៃអ៊ីហ្វ អាល់អ៊ីស្លាម ថ្លែងថា ពេលវេលានៃការរំដោះមកដល់ហើយ ។ ពេលវេលាគឺការបញ្ចេញសកម្មភាព ។ ពេលនេះយើងកំពុងតែរុលទៅមុខ។  |
| បាតុកម្មនៅឥណ្ឌាទាមទារបង្កើតរដ្ឋថ្មីមួយ Posted: 11 Mar 2011 12:08 AM PST  ប៉ូលិសឥណ្ឌាបានប្រើឧស្ម័នបង្ហូរទឹកភ្នែកកាលពីថ្ងៃទី១០ មីនា នៅទីក្រុងហ៊ីដឺរ៉ាបាដ ប្រឆាំងនឹងពួកបាតុករជាច្រើនពាន់នាក់ដែលទាមទារបង្កើនរដ្ឋថ្មីមួយនៅភាគខាងត្បូងឥណ្ឌា ។  |
| ក្រុមអាវលឿងគំរាមកាន់កាប់វិមានរដ្ឋាភិបាលដូចកាលពីឆ្នាំ2008 Posted: 11 Mar 2011 12:07 AM PST កាសែតបាងកកប៉ុស្តិ៍នៅថ្ងៃទី១១ មីនា ផ្សាយឱ្យដឹងថា លោកចម្លងស្រីមឿង ជាមេដឹកនាំក្រុមជ្រុលនិយមសៀមអាវលឿង កាលពីថ្ងៃទី១១ មីនា បានគំរាមថា នឹងដឹកនាំក្រុមបាតុ ករអាវលឿងសម្រុកចូលប្រមូលផ្តុំក្នុងវិមានរដ្ឋាភិបាល ប្រសិនបើក្រុមបាតុករអាវលឿងត្រូវបានបំបែកចេញពីកន្លែងប្រមូលផ្តុំបច្ចុប្បន្នរបស់ពួកគេដោយប៉ូលិសនោះ ។  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
