Koh Santipheap Daily |
- ខណ្ឌប្ញស្សីកែវឆ្នាំ២០១០មានបទល្មើសព្រហ្មទណ្ឌ៦១លើកថយចុះចំនួន៥៣លើក
- រដ្ឋាភិបាលអូស្ត្រាលីផ្តល់៥០០.០០០ដុល្លារ ដើម្បីអនុវត្តគម្រោងស្រាវជ្រាវពីអំពើហិង្សាលើស្ត្រីពិការ
- ការវាយបកយ៉ាងធំរបស់កងកម្លាំងស្និទ្ធរដ្ឋាភិបាលលីប៊ីប្រឆាំងពួកបះបោរ
- ការប្រយុទ្ធបង្ហូរឈាមគ្នានៅស៊ូដង់ខាងត្បូងរវាងកងទ័ព និងពួកឧទ្ទាម
- លោកកាដាហ្វី ព្រលយពាក្យថា លោកនឹងចុះចេញពីតំណែងបើមានការធានា
- ពិធីការមួយនៅឥណ្ឌាចំណាយប្រាក់ដល់ទៅ15លានអឺរ៉ូ
- អូតង់ពិនិត្យពីការជ្រើសរើសខាងយោធានៅលីប៊ី
- លោកអូបាម៉ា ៖ ការប្រើកម្លាំងយោធាប្រឆាំងលីប៊ីអាចធ្វើទៅបាន
- ប្រទេសរុស្ស៊ីជ្រើសរើសបានបវរកញ្ញាប្រចាំឆ្នាំ2011
- គណៈប្រតិភូអាជ្ញាធរជាតិអប្សរាចុះសួរសុខទុក្ខយុទ្ធជនរងរបួសនៅមន្ទីរពេទ្យ
- មជ្ឈិមបូព៌ាជ្រួលច្របល់ភ្ញៀវទេសចរធ្លាក់ចុះគួរកត់សម្គាល់
- កម្មករផ្នែកប្រេងនៅកូឡុំប៊ី23នាក់ត្រូវបានចាប់ពង្រត់
- នាយប៉ូលិសស្រីដំបូងគេរបស់ម៉ិចស៊ិកត្រូវបណ្តេញចេញពីតំណែង
- នាយករដ្ឋមន្ត្រីឡាវធ្វើទស្សនកិច្ចផ្លូវការនៅកម្ពុជា
- ឃាត់ខ្លួនប្តីប្រពន្ធពីរគូជាបងថ្លៃប្អូនថ្លៃនឹងគ្នាពីបទជួញដូរថ្នាំញៀន
- នៅច្រកទ្វារអន្តរជាតិប៉ោយប៉ែតត្រីទឹកសាបនាំទៅថៃមានចំនួនច្រើន
- ផលិតកម្មវិស្ណុភាពយន្តត្រូវតួសម្តែងចោទអត់ឱ្យលុយ
- តាមប្រមាញ់ទីតាំងមេខ្លោង សមត្ថកិច្ចរកឃើញរថយន្តទ្រុងក្លាស្សេបង្កប់ឧបករណ៍ផលិតគ្រឿងញៀន
- រុះរើតូបអាជីវករនៅផ្សារកំពង់ប្រណាកជម្រះបញ្ជី ប្រធានស៊ីដាច់កូនចៅ
- មន្ត្រីរដ្ឋបាលព្រៃឈើព្រមាន ប្តឹងទៅតុលាការខេត្តប្រឆាំង មន្ត្រីយោធាដឹកឈើគ្រញូង
| ខណ្ឌប្ញស្សីកែវឆ្នាំ២០១០មានបទល្មើសព្រហ្មទណ្ឌ៦១លើកថយចុះចំនួន៥៣លើក Posted: 07 Mar 2011 11:31 PM PST   រាជធានីភ្នំពេញ ៖ បទល្មើសព្រហ្មទណ្ឌនៅឆ្នាំ២០១0 ក្នុងខណ្ឌប្ញស្សីកែវ បានកើតឡើងចំនួន៦១លើក បើប្រៀបធៀបនឹងឆ្នាំ២០០៩ គឺថយចុះចំនួន៥៣លើក។ នេះបើតាមរបាយការណ៍បូកសរុបលទ្ធផលអនុវត្តការងារឆ្នាំ២០១០ របស់សាលាខណ្ឌប្ញស្សីកែវនៅក្នុងឱកាសបើកសន្និបាតបូកសរុបលទ្ធផលការងារឆ្នាំ២០១០ និងទិសដៅការងារឆ្នាំ២០១១ ដែលបានប្រារព្ធធ្វើនៅសាលាខណ្ឌកាលពីព្រឹកថ្ងៃទី៧ មីនា ឆ្នាំ២០១១ ក្រោមអធិបតីភាពលោកឃ្លាំង ហួត អភិបាលខណ្ឌ ។ លោកនុត ពុធដារ៉ា អភិបាលរងខណ្ឌប្ញស្សីកែវបានអានសុន្ទរកថា បើកសន្និបាតឱ្យដឹងថា សន្និបាតបូកសរុបលទ្ធផលអនុវត្តការងារឆ្នាំ២០១០ និងទិសដៅការងារឆ្នាំ២០១១របស់សាលាខណ្ឌប្ញស្សីកែវ ដែលបានរៀបចំឡើងនៅពេលនេះ គឺសំដៅឆ្លុះបញ្ចាំង និងរំលេចឱ្យឃើញពីស្នាដៃ និងបណ្តាសមិទ្ធផលជាច្រើនដែលសម្រេចបានលើកិច្ចសហការអនុវត្តប្រកបដោយ ប្រសិទ្ធភាពក្នុងការការពារសន្តិសុខ សុវត្ថិភាព ការរៀបចំសណ្តាប់ធ្នាប់ របៀបរៀបរយសាធារណៈជូនប្រជាពលរដ្ឋ បង្ក្រាបបានទាន់ពេលនូវសកម្មភាពចោរលួច ឆក់ ប្លន់ ទប់ស្កាត់ និងបង្ក្រាបសកម្មភាពក្មេងទំនើង ល្បែងស៊ីសងគ្រឿងញៀន អំពើល្មើសច្បាប់នានា ការជួញដូរមនុស្ស ជួញដូរផ្លូវភេទដោយអនុវត្តតាមគោលនយោបាយ «ភូមិ-សង្កាត់មានសុវត្ថិភាព» រួមទាំងការពង្រឹងច្បាប់ចរាចរណ៍ផ្លូវគោកដែលកំពុងតែត្រូវបានអនុវត្តយ៉ាងម៉ឺង លោកស្រីកែវ ច័ន្ទស៊ុនណារី នាយិការដ្ឋបាលសាលាខណ្ឌប្ញស្សីកែវ បានអានរបាយការណ៍បូកសរុបលទ្ធផលអនវុត្តការងារឆ្នាំ២០១០ និងទិសដៅការងារឆ្នាំ២០១១ឱ្យដឹងថា សកម្មភាពបទល្មើសព្រហ្មទណ្ឌនៅក្នុងខណ្ឌប្ញស្សីកែវកើតឡើងចំនួន៦១លើកប្រៀបធៀបនឹងឆ្នាំ២០០៩ ថយចុះចំនួន៥៣លើក បណ្តាលឱ្យស្លាប់មនុស្សចំនួន៤នាក់ របួសធ្ងន់៤នាក់ របួសស្រាល៤នាក់ នៅក្នុងនោះបទល្មើសឧក្រិដ្ឋកើតឡើង២៤លើក (ថយចុះ២៣លើក) និងបទល្មើសមជ្ឈិមកើតឡើងចំនួន៣៧លើក (ថយចុះ៣០លើក) ។ ចំពោះលទ្ធផលកិច្ចប្រតិបត្តិការបង្ក្រាបបទល្មើសព្រហ្មទណ្ឌគ្រប់ប្រភេទ យើងទទួលបានលទ្ធផលល្អដោយបង្ក្រាបសរុបចំនួន១០២លើក ឃាត់ខ្លួនបានចំនួន១២៨នាក់ បញ្ជូនទៅកាន់សាលាដំបូងរាជធានីភ្នំពេញ ។ លោកឃ្លាំង ហួត បានណែនាំដល់មន្ត្រីក្រោមឱវាទឱ្យយកចិត្តទុកដាក់អំពីសេចក្តីសុខ សុវត្ថិភាព ជូនប្រជាពលរដ្ឋគ្រប់មូលដ្ឋានញៀន ធ្វើយ៉ាងណាគ្មានអំពើលួច ឆក់ ប្លន់ គ្មានការប្រើប្រាស់អាវុធខុសច្បាប់ គ្មានការប្រើប្រាស់គ្រឿង គ្មានការជួញដូរស្ត្រី និងកុមារ និងជួញដូរផ្លូវភេទ គឺការអនុវត្តគោលនយោបាយភូមិ-សង្កាត់មានសុវត្ថិភាព ។ លោកឃ្លាំង ហួត បានបញ្ជាក់ថា មិនអនុញ្ញាតឱ្យមន្ត្រីណាមួយមានការពាក់ព័ន្ធនឹងថ្នាំញៀនឡើយ ហើយបើមានការពាក់ព័ន្ធគឺគ្មាននរណាអាចជួយបានទេ ។ លោកឃ្លាំង ហួត បានស្តីបន្ទោសដែរថា មន្ត្រីប៉ូលិសឥឡូវមេច្រើនជាងកូនចៅ ហើយមន្ត្រីប៉ូលិសខ្លះពេលមានភ្លើងឆេះទើបឃើញមុខ។ លោកក៏បានសំណូមពរដល់លោកអធិការខណ្ឌប្ញស្សីកែវ ត្រូវអនុវត្តឱ្យម៉ឺងម៉ាត់ កុំស្លូតពេកប្រយ័ត្នគេហៅថា អធិការស៊ីមពីរ ៕  |
| Posted: 07 Mar 2011 11:11 PM PST រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ស្ថានទូតអូស្ត្រាលីប្រចាំនៅកម្ពុជា កាលពីថ្ងៃទី៧ មីនា ឆ្នាំ២០១១ បានឱ្យដឹងថា រដ្ឋាភិបាលប្រទេសអូស្ត្រាលីបានផ្តល់ថវិកាចំនួន៥០០.០០០ដុល្លារអាមេរិក ដល់សាកលវិទ្យាល័យម៉ូណាស ដើម្បីអនុវត្តគម្រោងស្រាវជ្រាវមួយស្តីពីអំពើហិង្សាដែលទាក់ទងនឹងបញ្ហាយេនឌ័រលើស្ត្រីពិការនៅកម្ពុជា ។  |
| ការវាយបកយ៉ាងធំរបស់កងកម្លាំងស្និទ្ធរដ្ឋាភិបាលលីប៊ីប្រឆាំងពួកបះបោរ Posted: 07 Mar 2011 11:11 PM PST  សហគមន៍អន្តរជាតិនៅតែពុំទាន់ចុះសំរុងគ្នាលើការធ្វើអន្តរាគមន៍យោធានៅលីប៊ី។ ការប្រយុទ្ធគ្នាមានការកើនឡើងពីមួយថ្ងៃទៅមួយថ្ងៃដែលកងកម្លាំងស្និទ្ធលោកកាដាហ្វី បានធ្វើការវាយបកក្នុងតំបន់ឈូងសមុទ្រ SYRTE។ នាថ្ងៃទី៧ មីនា មានការវាយប្រហារតាមអាកាសប្រឆាំងកំពង់ផែប្រេង RAS LANOUF ។ ទន្ទឹមនឹងនេះមានការខិតខំប្រឹងប្រែងនានាដើម្បីប៉ុនប៉ងជួយដល់ប្រជាជនស៊ីវិល និងទប់ស្កាត់ការរត់ភៀសខ្លួនរបស់ពួកគេ។  |
| ការប្រយុទ្ធបង្ហូរឈាមគ្នានៅស៊ូដង់ខាងត្បូងរវាងកងទ័ព និងពួកឧទ្ទាម Posted: 07 Mar 2011 11:11 PM PST  អ្នកនាំពាក្យម្នាក់របស់កងទ័ពប្រជាជនរំដោះស៊ូដង់ SPLA រាយការណ៍កាលពីថ្ងៃទី៧ មីនា ថា តុល្យការនៃការប្រយុទ្ធគ្នារវាងកងទ័ពស៊ូដង់ខាងត្បូង និងពួកជីវពលឧទ្ទាម ក្នុងរដ្ឋ HAUT NIL អ្នកស្លាប់ឡើងដល់៧២នាក់ ។ អ្នកនាំពាក្យរូបនេះក៏រាយការណ៍ផងដែរ ពីមនុស្សស្លាប់២១នាក់ ក្នុងការប្រយុទ្ធគ្នានៅតំបន់ JONGLEY ។  |
| លោកកាដាហ្វី ព្រលយពាក្យថា លោកនឹងចុះចេញពីតំណែងបើមានការធានា Posted: 07 Mar 2011 07:48 PM PST  តាមប្រភពព័ត៌មានមួយថា មេដឹកនាំលីប៊ីលោកមូអាម៉ា កាដាហ្វី ពេលនេះបានត្រៀមខ្លួនរួចជាស្រេច ដើម្បីចុះចេញពីតំណែងក្រោយពីកាន់អំណាចអស់រយៈពេល៤១ឆ្នាំមក ។ ប្រភពព័ត៌មានពីបណ្តាញទូរទស្សន៍អារ៉ាប់អាល់ហ្សាហ្ស៊ីរ៉ា ឱ្យដឹងថា លោកកាដាហ្វី បានស្នើឱ្យមានការប្រជុំសភា ដើម្បីឯកភាពគ្នាឱ្យមានអន្តរកាល ដើម្បីត្រួសត្រាយផ្លូវសម្រាប់លោកចុះចេញពីតំណែង ។ លោកកាដាហ្វី បានព្រលយពាក្យថា រូបលោកបានត្រៀមខ្លួនរួចជាស្រេចដើម្បីចុះចេញពីតំណែង ប្រសិនបើក្រុមប្រឹក្សាឧទ្ទាមផ្តល់ឱ្យលោកនូវប្រាក់មួយចំនួន ហើយសន្យាថា មិនកាត់ទោសរូបលោក ។ ប៉ុន្តែទោះបីជាបែបណាក្តី សំណើរបស់លោកកាដាហ្វី ត្រូវបានច្រានចោលដោយក្រុមប្រឹក្សាឧទ្ទាមដោយអះអាងថា សំណើនេះរបស់លោកកាដាហ្វី គ្រាន់តែចង់យករួចខ្លួនប៉ុណ្ណោះ ។ ជាមួយគ្នានេះ កាសែតជាភាសាអារ៉ាប់២ កាសែតមួយមានមូលដ្ឋាននៅក្នុងទីក្រុងឡុង និងមួយទៀតមានមូលដ្ឋាននៅក្នុងប្រទេសអារ៉ាប់រួម កាលពីថ្ងៃទី៧ មីនា កន្លងមក បានចេញផ្សាយព័ត៌មានមួយថា លោកកាដាហ្វី ពេលនេះកំពុងស្វែងរកផ្លូវរត់គេចខ្លួន ។ កូនប្រុសរបស់លោកកាដាហ្វីម្នាក់ព្រមានថា លីប៊ី នឹងកើតមានសង្គ្រាមស៊ីវិល ប្រសិនបើឪពុកលោកចុះចេញពីតំណែង ៕  |
| ពិធីការមួយនៅឥណ្ឌាចំណាយប្រាក់ដល់ទៅ15លានអឺរ៉ូ Posted: 07 Mar 2011 07:47 PM PST  នៅប្រទេសឥណ្ឌាមានពិធីរៀបការដ៏ធំបំផុតមួយដែលផ្អើលពួកអ្នកកាសែតឥណ្ឌានាំគ្នាចុះទៅយកព័ត៌មានឱ្យបានលម្អិត ពិសេសលើពិធីជប់លៀងទទួលភ្ញៀវ ។ ចំណែកឪពុករបស់កូនកម្លោះនិយាយប្រាប់សារព័ត៌មានថា «ខ្ញុំពុំយល់សោះ ហេតុអ្វីក៏ការរៀបការនេះល្បីខ្លាំងម៉្លេះ ។ រាល់ការវាយតម្លៃក្នុងម៉ាស៊ីនឃោសនាសុទ្ធតែជាពាក្យចចាមអារ៉ាម។ នេះជាពិធីរៀបការសាមញ្ញមួយប៉ុណ្ណោះ។ ឪពុកកូនកម្លោះនិយាយថា កូនកម្លោះជាអ្នកនយោបាយល្បីមួយរូប និងជាអ្នកមានចំណែកឪពុករបស់កូនក្រមុំ ជាអតីតអ្នកនយោបាយម្នាក់នៅរដ្ឋធានីឥណ្ឌា ។ មុនពេលរៀបការ មនុស្ស២.០០០នាក់ ក៏បានអញ្ជើញចូលរួមក្នុងពិធីមួយដែរ ដោយក្នុងឱកាសនោះទទួលបានរូបនំធ្វើពីប្រាក់សុទ្ធមួយ និងសម្លៀកបំពាក់មួយកំប្លេ ព្រមទាំងប្រាក់៥០០ដុល្លារសម្រាប់ភ្ញៀវម្នាក់ៗ ។ គ្រួសារកូនក្រមុំទទួលអនាគតកូនប្រសាប្រុសជាមួយកាដូមួយមានទឹកប្រាក់៥លានដុល្លារ ៕  |
| អូតង់ពិនិត្យពីការជ្រើសរើសខាងយោធានៅលីប៊ី Posted: 07 Mar 2011 07:42 PM PST  យោងតាមប្រធានាធិបតីលោកបារ៉ាក់ អូបាម៉ា ថា អង្គការអូតង់បានពិនិត្យពីការជ្រើសរើសខាងយោធាដែលទាក់ទិនដល់ប្រទេសលីប៊ី។ លោកអូបាម៉ាក៏ព្រមានផងដែរដល់បណ្តាសហការីរបស់លោកមូអាម៉ា កាដាហ្វី ដែលត្រូវគិតដល់អំពើហឹង្សាទាំងឡាយ។ ចំណែកពួកអ្នកការទូតបារាំង និងអង់គ្លេសកំពុងធ្វើការលើគំរោងដំណោះស្រាយមួយរបស់អ.ស.បដើម្បីបង្កើតតំបន់ហាមមិនឱ្យមានការហោះហើរពីលើដែនអាកាសរបស់លីប៊ី។ សហភាពអឺរ៉ុបបានរៀបចំទណ្ឌកម្មខាងហិរញ្ញវត្ថុថ្មីៗប្រឆាំងលីប៊ី ដែលសំដៅជាពិសេសលើ LIBYAN INVESTMENT AUTHORITY (LIA) ជាមូលនិធិមួយរបស់រដ្ឋាភិបាលដែលគ្រប់គ្រងចំណូលប្រេងកាតរបស់ប្រទេស។ អ.ស.ប និងអង្គការក្រៅរដ្ឋាភិបាលជាច្រើនបានធ្វើការអំពាវនាវជាបន្ទាន់មួយរកមូលនិធិ១៦០លានដុល្លារសំរាប់ជំនួយមនុស្សធម៌ដល់ជនរងគ្រោះដោយសារជម្លោះនៅលីប៊ី។ ក្នុងសេចក្តីថ្លែងការណ៍មួយ បន្ទាប់ពីកិច្ចប្រជុំនៅទីក្រុងអាប៊ូដាប៊ី បណ្តាប្រទេសអារ៉ាប់នៅ តំបន់ឈូងសមុទ្រពែរ្ស៍ប្រកាសគាំទ្រចំពោះការបង្កើតដោយអ.ស.បនូវតំបន់ហាមហោះហើរមួយពីលើដែនអាកាសលីប៊ី។ ប្រមុខការទូតលីប៊ី លោកមូសាតូសា បានចោទប្រកាន់ប្រទេសបារាំង អង់គ្លេស និងសហរដ្ឋអាមេរិកថា កំពុងធ្វើសកម្មភាពសំដៅពុះបំបែកប្រទេសលីប៊ី។ អង្គការអូតង់បានប្រមូលយន្តហោះស៊ើបការណ៍ធុន AWACS ឱ្យហោះសង្កេតការណ៍នៅលីប៊ី២៤ម៉ោងលើ២៤ម៉ោង។ នេះជាការប្រកាសកាលពីថ្ងៃទី៧ មីនា របស់លោក IVO DAALDER ឯកអគ្គរដ្ឋទូតអាមេរិកប្រចាំអូតង់។ ក្នុងឱកាសនៃសន្និសីទសារព័ត៌មានមួយអ្នកការទូតរូបនេះថ្លែងថា ការសំរេចចិត្តនេះត្រូវបានប្រកាន់យកដើម្បីកែលំអសមត្ថភាពស៊ើបការណ៍របស់បណ្តាយន្តហោះធុន AWACS របស់អូតង់ដោយហោះស៊ើបការណ៍២៤ម៉ោងលើ២៤ម៉ោង និង៧ថ្ងៃលើ៧ថ្ងៃ។ យើងចង់តាមដានឱ្យដឹងប្រាកដតើមានអ្វីខ្លះកើតមានក្នុងប្រទេសនោះ ៕  |
| លោកអូបាម៉ា ៖ ការប្រើកម្លាំងយោធាប្រឆាំងលីប៊ីអាចធ្វើទៅបាន Posted: 07 Mar 2011 07:40 PM PST  ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា ថ្លែងថា អាមេរិក និងបណ្តាប្រទេសជាសម្ព័ន្ធមិត្តអង្គការអូតង់នៅតែកំពុងពិចារណាមើលពីការឆ្លើយតបដោយប្រើកម្លាំងយោធាចំពោះអំពើហិង្សានៅប្រទេសលីប៊ី ។ លោកអូបាម៉ា លើកឡើងដូច្នេះនៅក្នុងឱកាសនៃការជួបពិភាក្សាគ្នាជាមួយនាយករដ្ឋមន្ត្រីអូស្ត្រាលី លោកស្រីជូលៀ ហ្គីឡាត ដែលកំពុងស្នាក់នៅក្នុងក្រុងវ៉ាស៊ីនតោន ។ ថ្លែងនៅក្នុងខុទ្ទកាល័យ Oval លោកប្រធានាធិបតីអូបាម៉ា ថ្លែងថា សហរដ្ឋអាមេរិកនឹងឈរខាងពលរដ្ឋលីប៊ីនៅពេលពួកគេប្រឈមមុខនឹងអំពើហិង្សា ដែលមិនអាចទទួលយកបាន ។ ទន្ទឹមពេលគ្នានេះ លោកអូបាម៉ា បានផ្ញើលិខិតមួយច្បាប់ជូនទៅមេដឹកនាំលីប៊ី លោកកាដាហ្វី ដែលក្នុងលិខិតនោះលោកអូបាម៉ា ថ្លែងថា លោកកាដាហ្វី និងអ្នកគាំទ្រលោកត្រូវតែទទួលខុសត្រូវចំពោះអំពើហិង្សាក្នុងប្រទេស ។ លោកអូបាម៉ា ថ្លែងកាលពីថ្ងៃទី៧ មីនា ថា អំពើហិង្សាប្រឆាំងពលរដ្ឋលីប៊ី ជារឿងមិនអាចទទួលយកបានឡើយ ហើយលោកបានព្រមានថា អ្នកដែលជាប់ពាក់ព័ន្ធជាមួយនឹងអំពើហិង្សានេះត្រូវតែទទួលខុសត្រូវចំពោះទង្វើរបស់ខ្លួន ។ លោកប្រធានាធិបតីថ្លែងទៀតថា អូស្ត្រាលីនឹងចូលរួមជាមួយសហរដ្ឋអាេមរិកក្នុងការដាក់ទណ្ឌកម្មប្រឆាំងរដ្ឋាភិបាលលីប៊ី ដោយលោកថ្លែងបន្ថែមទៀតថា សហរដ្ឋអាមេរិកនៅតែបន្តតាមដានអំពើហិង្សា និងស្ថានការណ៍នៅក្នុងប្រទេសលីប៊ី ៕  |
| ប្រទេសរុស្ស៊ីជ្រើសរើសបានបវរកញ្ញាប្រចាំឆ្នាំ2011 Posted: 07 Mar 2011 07:38 PM PST  នាង Natalya Kantemurova អាយុ១៩ឆ្នាំ កម្ពស់១,៧៥ម៉ែត្រ បានទទួលជ័យជំនះក្នុងការប្រកួតជ្រើសរើសបវរកញ្ញាប្រចាំឆ្នាំ២០១១ របស់ប្រទេសរុស្ស៊ី ។ ពិធីប្រកួតត្រូវបានរៀបចំឡើងនៅក្នុងទីក្រុងម៉ូស្គូ កាលពីថ្ងៃទី៥ មីនា កន្លងមក ។ នាង Natalya Kantemurova ជានារីស្រស់ស្អាតម្នាក់រស់នៅក្នុងទីក្រុងម៉ូស្គូ បានយកឈ្នះលើនារី៥០នាក់ មកពីទូទាំងប្រទេសរុស្ស៊ី ដែលបានចូលរួមក្នុងការប្រកួតនោះដែរ ។ នាង Natalya និយាយថា នាងមានក្តីរីករាយណាស់ ដែលពេលនេះនាងបានក្លាយជាបវរកញ្ញាប្រចាំឆ្នាំ២០១១ របស់ប្រទេសរុស្ស៊ី ។ ក្រោយពីបានទទួលជ័យជំនះជាបវរកញ្ញាប្រចាំឆ្នាំ២០១១ របស់ប្រទេសរុស្ស៊ី នាង Natalya នឹងធ្វើជាបេក្ខនារីតំណាងប្រទេសរុស្ស៊ី សម្រាប់ចូលរួមក្នុងការប្រកួតជ្រើសរើសបវរកញ្ញាជាលក្ខណៈអន្តរជាតិដែលនឹងរៀបចំឡើងនាពេលខាងមុខនេះ ៕  |
| គណៈប្រតិភូអាជ្ញាធរជាតិអប្សរាចុះសួរសុខទុក្ខយុទ្ធជនរងរបួសនៅមន្ទីរពេទ្យ Posted: 07 Mar 2011 07:34 PM PST  ខេត្តសៀមរាប ៖ គណៈប្រតិភូអាជា្ញធរជាតិអប្សរាដឹកនាំដោយលោកប៊ុន ណារិទ្ធិ អគ្គនាយកអាជា្ញធរអប្សរា កាលពីព្រឹកថ្ងៃទី៣ ខែ មីនា ឆ្នាំ២០១១កន្លងទៅ បានចុះសួរសុខទុក្ខ និងនាំយកអំណោយរបស់លោកបណ្ឌិតសភាចារ្យ សុខ អាន ឧបនាយករដ្ឋមន្ដ្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ទៅជូនដល់វីរយុទ្ធជនដែលរងរបួសដោយសារសង្គ្រាមឈ្លានពានពីសំណាក់ទាហានសៀមថ្ងៃទី៤ដល់ថ្ងៃទី៧ ខែកុម្ភៈ ឆ្នាំ២០១១ និងគ្រោះថ្នាក់ក្រឡាប់រថយន្ដកំពុងសំរាកព្យាបាលនៅក្នុងមន្ទីរពេទ្យយោធភូមិភាគ៤ ។ ថ្លែងនៅក្នុងឱកាសចុះសួរសុខទុក្ខវីរយុទ្ធជនរងរបួសដែលកំពុងសំរាកព្យាបាលនៅក្នុងមន្ទីរពេទ្យយោធភូមិភាគ៤នោះ លោកប៊ុន ណារិទ្ធិ អគ្គនាយកអាជា្ញធរអប្សរាមានប្រសាសន៍ថា ក្នុងនាមអាជា្ញធរអប្សរាសូមសម្ដែងនូវការកោតសរសើរនិងដឹងគុណខ្ពស់ចំពោះវីរភាពដ៏អង់អាចក្លាហានរបស់វីរយុទ្ធជនរបស់យើងទាំងអស់ដែលឈរជើងការពារនៅគ្រប់ទិសមុខព្រួញសមរភូមិមុខ ជាពិសេសតំបន់សមរភូមិព្រះវិហារ ដែលបានប្រឹងប្រែងអស់ពីកម្លាំងកាយចិត្ដធ្វើការប្រយុទ្ធតតាំងក្នុងបុព្វហេតុការពារបូរណភាពដែនដីសុវណ្ណភូមិរបស់យើង ពីការរំលោភឈ្លានពានពីសំណាក់យោធាសៀម ស្ថិតក្រោមមហិច្ឆតារបស់លោកអាប់ភីស៊ីត នាយករដ្ឋមន្ដ្រីល្មោភសង្គ្រាម និងជាឧក្រិដ្ឋជនសង្គ្រាម ។ លោកបានបន្ថែមទៀតថា យើងទាំងអស់គ្នាជាពលរដ្ឋខ្មែរមានការឈឺចាប់ជាទីបំផុតចំពោះទង្វើឈ្លានពានរបស់យោធាសៀមមកលើប្រទេសកម្ពុជា ដែលព្យាយាមធ្វើការវាយ ប្រហារដោយអាវុធជាច្រើនលើកមកហើយជាពិសេសនៅថ្ងៃទី៤ដល់ថ្ងៃទី៧ ខែកុម្ភៈកន្លងទៅនេះ បណ្ដាលឱ្យជនស៊ីវិលក៏ដូចជាវីរយុទ្ធជនយើងស្លាប់ និងរងរបួស។ ហើយដើម្បីសម្ដែងនូវការដឹងគុណចំពោះវីរភាពដ៏អង់អាចក្លាហាននេះ ថ្ងៃនេះក្នុងនាមពលរដ្ឋខ្មែរ និងក្នុងនាមសមរភូមិក្រោយ យើងបានចុះមកសួរសុខទុក្ខដោយនាំមកជាមួយនូវអំណោយរបស់លោកបណ្ឌិតសភាចារ្យ សុខ អាន ឧបនាយករដ្ឋមន្ដ្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ដ្រី មកប្រគល់ជូនផងដែរ។ កន្លងមកអាជា្ញធរអប្សរាក៏បានចូលរួមឧបត្ថម្ភជាថវិកា និងគ្រឿងឧបភោគបរិភោគជាច្រើនលើកច្រើនសាមកហើយដល់កងទ័ពសមរភូមិមុខតាមរយៈអាជា្ញធរខេត្ដសៀមរាប។ យោងតាមប្រធានមន្ទីរពេទ្យយោធភូមិភាគ៤ បានឱ្យដឹងថា បច្ចុប្បន្នមានយុទ្ធជនចំនួន៥៩រូបបាននិងកំពុងស្នាក់នៅសម្រាកព្យាបាលនៅក្នុងមន្ទីរពេទ្យយោធភូមិភាគ៤នោះ ដោយក្នុងនោះ២៣រូបជាអ្នកជំងឺទូទៅ ១៣រូបជាវីរយុទ្ធជនរងរបួសក្នុងសង្គ្រាមឈ្លានពានពីសំណាក់ចោរសៀមកាលពីអំឡុងថ្ងៃទី៤ដល់ថ្ងៃទី៧ ខែ កុម្ភៈ ឆ្នាំ២០១១ នៅសមរភូមិព្រះវិហារ និង២៣រូបទៀតរងរបួសនៅក្នុងឧប្បត្ដិហេតុគ្រោះថ្នាក់ចរាចរណ៍ កាលពីពេលកន្លងទៅ ។ ប្រធាននាយកដ្ឋានផ្សព្វផ្សាយនៃអគ្គនាយកដ្ឋានអាជា្ញធរជាតិអប្សរា លោកជ្រុន សុផល ដែលបានរួមដំណើរចុះសួរសុខទុក្ខវីរយុទ្ធជនរងរបួសនោះបានមានប្រសាសន៍ថា នៅក្នុងឱកាសចុះសួរសុខទុក្ខនោះគណៈប្រតិភូក៏បាននាំយកអំណោយមួយចំនួនរបស់លោកបណ្ឌិតសភាចារ្យ សុខ អាន ឧបនាយករដ្ឋមន្ដ្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ដ្រីជូនដល់វីរយុវជនទាំង៥៩រូប ដែលកំពុងតែសម្រាកព្យាបាលរបួស និងជំងឺនៅក្នុងមន្ទីរពេទ្យយោធភូមិភាគ៤ ដោយក្នុងម្នាក់ៗទទួលបានឃីតមួយកញ្ចប់ និងថវិកាចំនួន៥ម៉ឺនរៀល។ ដោយឡែកក្រុមគ្រូពេទ្យចំនួន៥០នាក់ ម្នាក់ៗទទួលបានថវិកា១ម៉ឺនរៀលផងដែរ។ សូមបញ្ជាក់ថា កាលពីព្រឹកថ្ងៃទី៧ ខែកុម្ភៈ លោក ស្រី ម៉ៅល្អ ប្រធាននាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការនៃអាជា្ញធរអប្សរា ក៏បានដឹកនាំមន្ដ្រីក្រោមឱវាទ ចុះមកសួរទុក្ខនិងចែកអំណោយដល់វីរយុទ្ធជនរងរបួសទាំងនោះដោយម្នាក់ៗទទួលបានថវិកា១៩ម៉ឺនរៀល ក្នុងនោះដែរ លោករដ្ឋលេខាធិការផៃ ស៊ីផាន អ្នកនាំពាក្យទីស្ដីការគណៈរដ្ឋមន្ដ្រីក៏បានឧបត្ថម្ភ៨ម៉ឺនរៀល ដល់យុទ្ធជនម្នាក់ៗផងដែរ ៕  |
| មជ្ឈិមបូព៌ាជ្រួលច្របល់ភ្ញៀវទេសចរធ្លាក់ចុះគួរកត់សម្គាល់ Posted: 07 Mar 2011 07:26 PM PST  គណៈកម្មាធិការផ្នែកទេសចរណ៍របស់ប្រទេសហ្ស៊កដានីបានបញ្ជាក់កាលពីថ្ងៃទី៦ មីនា ថា ភ្ញៀវទេសចរបរទេសលុបចោលការធ្វើដំណើរចូលភូមិភាគអារ៉ាប់ស្ទើរតែទាំងអស់ ដោយសណ្ឋាគារនៅហ្ស៊កដានីត្រូវលុបចោលបន្ទប់ស្នាក់នៅច្រើនជាង៥០%នៅសល់តែភ្ញៀវទេសចរក្នុងតំបន់ ខណៈពេលប្រាក់ចំណូលក្នុងប្រទេសហ្ស៊កដានីលើវិស័យទេសចរណ៍ក្នុងមួយឆ្នាំមានប្រហែល១៤% ឬប្រហែល១.០០០លានដុល្លារអាមេរិក។ នៅក្នុងរបាយការណ៍បញ្ជាក់ឱ្យដឹងថា ភ្ញៀវទេសចរមកពីប្រទេសបារាំង គឺជាក្រុមចម្បងរបស់ប្រទេសហ្ស៊កដានី ខណៈពេលភ្ញៀវទេសចរបរទេសលុបចោលការធ្វើដំណើរដែលចាត់ទុកថា ជាការបាត់ចំណូលក្នុងប្រទេស។ ភ្ញៀវទេសចរមកពីបារាំងសំលឹងឃើញថា ព្រះមហាក្សត្រអាប់ឌុលឡានៃប្រទេសហ្ស៊កដានីកំពុងទទួលរងការផ្តួលអំណាចដូចព្រះមហាក្សត្រម៉ារ៉ុក ។ ចំណែកស្ថានភាពទេសចរណ៍របស់ប្រទេសស៊ីរីក៏ប្រឈមមុខនឹងបញ្ហាអ្នកទេសចរត្រូវផ្អាកធ្វើដំណើរច្រើនដូចគ្នា ដោយបានធ្លាក់ចុះប្រហែល១១ទៅ១២% រីឯការលុបចោលការកក់បន្ទប់ស្នាក់នៅក្នុងសណ្ឋាគារបានថយចុះប្រហែល៣៥ទៅ៤០% ។ បច្ចុប្បន្នរដ្ឋាភិបាលអាមេរិកបានប្រកាសអាសន្នដល់ប្រជាពលរដ្ឋរបស់ខ្លួនត្រូវចៀសវាងធ្វើដំណើរទៅទស្សនកិច្ចនៅប្រទេសយេម៉ែន ព្រោះស្ថានការណ៍ក្នុងតំបន់នៅមានភាពគ្រោះថ្នាក់ក្រោយពីកើតហេតុក្រុមអាល់កៃដាសំលាប់មន្ត្រីប្រតិបត្តិការពិសេសចំនួន៤នាក់នៅកណ្តាលក្រុងសាណា ៕  |
| កម្មករផ្នែកប្រេងនៅកូឡុំប៊ី23នាក់ត្រូវបានចាប់ពង្រត់ Posted: 07 Mar 2011 07:24 PM PST កម្មករផ្នែកប្រេងយ៉ាងហោចណាស់២៣នាក់ត្រូវបានចាប់ពង្រត់កាលពីថ្ងៃទី៧ មីនា កន្លងមក ដោយពួកទ័ពព្រៃនៃកងកម្លាំងបដិវត្តន៍កូឡុំប៊ី (FARC) នៅតំបន់ព្រៃ Vichada ភាគអាគ្នេយ៍ប្រទេសកូឡុំប៊ី ។ ប្រភពព័ត៌មានមួយបានប្រាប់ស្ថានីយវិទ្យុ RCN របស់កូឡុំប៊ីថា កម្មករទាំងនោះត្រូវបានចាត់តាំងឱ្យស្វែងរកឧស្ម័នអុីដ្រូកាបូននៅតំបន់ព្រៃនោះ ដែលជាកន្លែងលាក់ខ្លួនរបស់កងកម្លាំងបដិវត្តន៍កូឡុំប៊ី ។  |
| នាយប៉ូលិសស្រីដំបូងគេរបស់ម៉ិចស៊ិកត្រូវបណ្តេញចេញពីតំណែង Posted: 07 Mar 2011 07:24 PM PST  នាង Marisol Valles Garcia អាយុ២០ឆ្នាំ ដែលត្រូវបានតែងតាំងជានាយប៉ូលិសប្រចាំរដ្ឋ Praxedis Guerrevo ប្រទេសម៉ិចស៊ិក ត្រូវបានបណ្តេញចេញពីតំណែងវិញហើយ ដោយសារនាងមិនបានធ្វើការកាលពីថ្ងៃទី៧ មីនា កន្លងមក រយៈពេលមួយថ្ងៃ ក្រោយពីពេលវេលាឈប់សម្រាកដែលត្រូវផ្តល់ឱ្យនាងត្រូវផុតកំណត់ ។ មុននេះមានរបាយការន៍នានាថា នាង Garcia បានចាកចេញពីប្រទេសម៉ិចស៊ិកដើម្បីស្វះស្វែងរកសិទ្ធិជ្រកកោននៅសហរដ្ឋអាមេរិក ដោយសាររងការគំរាមកំហែងជាច្រើនក្នុងប្រទេស ។  |
| នាយករដ្ឋមន្ត្រីឡាវធ្វើទស្សនកិច្ចផ្លូវការនៅកម្ពុជា Posted: 07 Mar 2011 07:23 PM PST    រាជធានីភ្នំពេញ ៖ តាមការអញ្ជើញរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី៧ ខែមីនា លោក THONG SING THAMMAVONG នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវបានដឹកនាំគណៈប្រតិភូជាន់ខ្ពស់អញ្ជើញមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា។ លោកនាយករដ្ឋមន្ត្រីឡាវនឹងអញ្ជើញចូលគាល់ព្រះករុណា ព្រះមហាក្សត្រ អញ្ជើញចូលជួបសំដែងការគួរសមជាមួយសម្តេចអគ្គមហាធម្មពោធិសាល ជា ស៊ឹម ប្រធានព្រឹទ្ធសភា សម្តេចអគ្គមហាពញាចក្រីហេង សំរិន ប្រធានរដ្ឋសភា និងចូលជួបពិភាក្សាការងារជាមួយសម្តេចតេជោហ៊ុន សែន។ នៅក្នុងជំនួបពិភាក្សាការងារជាមួយសម្តេចតេជោនាយករដ្ឋមន្ត្រីហ៊ុន សែន នៅវិមានសន្តិភាពទីស្តីការនាយករដ្ឋមន្ត្រីរយៈពេលជិតពីរម៉ោង លោកខៀវ កាញារីទ្ធ រដ្ឋមន្ត្រីក្រសួងព័ត៌មានបានប្រាប់ឱ្យដឹងថា សម្តេចតេជោនាយករដ្ឋមន្ត្រីបានស្វាគមន៍ អបអរសាទរលោក THONSING THAMMAVONG ដែលត្រូវបានជ្រើសតាំងជាឯកច្ឆន្ទជានាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ។ ការអញ្ជើញមកបំពេញទស្សនកិច្ចរបស់លោកនាយករដ្ឋមន្ត្រីឡាវនេះ គឺជាជំហានថ្មីមួយទៀតក្នុង ការពង្រឹងមិត្តភាព កិច្ចសហប្រតិបត្តិការរបស់កម្ពុជា-ឡាវ ជាពិសេសនៅឆ្នាំនេះដែលជាឆ្នាំទី៥៥នៃការភ្ជាប់ទំនាក់ទំនងនៃប្រទេសទាំងពីរ។ លោកនាយករដ្ឋមន្ត្រីឡាវបានថ្លែងអំណរគុណចំពោះការជូនពររបស់សម្តេចនាយករដ្ឋមន្ត្រីហ៊ុន សែន ។ លោកបានឧទ្ទេសនាមជាពីរចំណែក គឺចំណែកទី១ លោកឧទ្ទេសនាមអំពីកិច្ចសហប្រតិបត្តិការរវាងកម្ពុជា-ឡាវ។ ចំណែកទី២ ឧទ្ទេសនាមអំពីសភាពការណ៍ប្រទេសឡាវ។ លោកនាយករដ្ឋមន្ត្រីឡាវមានប្រសាសន៍ថា ចំពោះកិច្ចសហប្រតិបត្តិការរវាងកម្ពុជា-ឡាវនេះ គឺលោកមានការរីករាយដោយបានឃើញកន្លងមកកិច្ចសហប្រតិបត្តិការគ្រប់ជាន់ថ្នាក់រវាងកម្ពុជា និងឡាវមានការរីកចំរើនជាបន្តបន្ទាប់។ ពិតមែនតែប្រទេសទាំងពីរនៅមានជួបការលំបាកក្តី ប៉ុន្តែឃើញនៅក្នុងកិច្ចសហប្រតិបត្តិការនេះក្នុងស្មារតីជាអ្នកភូមិផងរបងជាមួយ គឺធ្វើឱ្យមានផលប្រយោជន៍ដល់ប្រទេសទាំងពីរ និងប្រជាជនទាំងពីរ។ លោកបានថ្លែងការរីករាយចំពោះកិច្ចសហប្រតិបត្តិការទ្វេភាគីរវាងក្រសួងការពារប្រទេស និងផ្នែកសន្តិសុខបណ្តាខេត្តដែលនៅជាប់ព្រំដែនកម្ពុជា-ឡាវដែលបានសហប្រតិបត្តិការគ្នាល្អដើម្បីធ្វើឱ្យព្រំដែនកម្ពុជា-ឡាវជាព្រំដែនមួយមានសន្តិភាព កិច្ចសហប្រតិបត្តិការ និងបង្កលក្ខណៈក្នុងការធ្វើពាណិជ្ជកម្មរវាងប្រជាជនទាំងពីរ និងធ្វើឱ្យបាត់ឧក្រិដ្ឋកម្មឆ្លងដែន គ្រឿងញៀន និងចូលរួមក្នុងការអភិរក្សព្រៃឈើ ទប់ទល់នឹងការបំផ្លាញធម្មជាតិ បង្ការជម្ងឺរាតត្បាត និងបានពង្រីកវិស័យទេសចរណ៍រវាងប្រទេសទាំងពីរ។ លោកនាយករដ្ឋមន្ត្រីឡាវថ្មីបានសម្តែងនូវការរីករាយចំពោះការរីកចំរើននៃការបោះបង្គោលព្រំដែន ហើយឃើញថា ភាគីទាំងពីរបានសំរេចក្នុងស្មារតីជាបងជាប្អូនជួយគ្នានៅកន្លែងណាមានការលំបាកគឺបានជួយគ្នាដោះស្រាយក្នុងស្មារតីជាអ្នកភូមិផងរបងជាមួយផង ជាបងប្អូនផង។ ពាក់ព័ន្ធទៅនឹងចំណុចដែលសេសសល់ លោកនាយករដ្ឋមន្ត្រីឡាវ ជំរុញឱ្យភាគីទាំងពីរបន្តចរចាដោះស្រាយដើម្បីបោះបង្គោលព្រំដែនឱ្យបានឆាប់រហ័ស។ លោកបានសុំស្នើឱ្យយកចំណុចដុងក្រឡដើម្បីស្ថាបនាបង្គោលព្រំដែនជាអនុស្សាវរីយ៍មួយជាមិត្តភាពដើម្បីកំណត់ថា ប្រទេសទាំងពីរបានរួមគ្នាដោះស្រាយការបោះបង្គោលព្រំដែននេះដោយជោគជ័យ។ ទន្ទឹមនេះដែរ លោក THONSING បានប្រាប់ថា ខាងឡាវបានរៀបចំបង្គោលបញ្ជូនអគ្គិសនីកម្លាំង១១៥គីឡូវ៉ុលមកដល់ព្រំដែន ហើយដើម្បីឱ្យខាងកម្ពុជារៀបចំបន្តទទួលអគ្គិសនី ។ ទន្ទឹមនេះផងដែរលោកបានសំដែងការរីករាយអំពីការដែលបានសហការគ្នាលើទំនាក់ទំនងទូរគមនាគមន៍តភ្ជាប់កាបអុបទិក។ ទាក់ទងទៅនឹងការដោះដូរនៅតាមព្រំដែនសូមឱ្យគិតគូរពី ការបន្ធូរបន្ថយពន្ធនៅក្នុងតំបន់ត្រីកោណអភិវឌ្ឍន៍ រៀបចំបែបបទក្នុងការឆ្លងកាត់ប្រទេសទាំងពីរនេះឆ្ពោះទៅប្រទេសទី៣ដើម្បីសំរួលធ្វើយ៉ាងណាឱ្យការធ្វើដំណើរនោះមានល្បឿនបានឆាប់រហ័សជាទីបំផុត។ នៅក្នុងការងារអប់រំ លោកនាយករដ្ឋមន្ត្រីថ្មីឡាវបានសំដែងការរីករាយជាទីបំផុតចំពោះការបង្កើនសិស្សរវាងកម្ពុជា និងឡាវទៅវិញទៅមក ហើយឡាវនឹងខិតខំដើម្បីធ្វើយ៉ាងណាជំរុញប្រាក់បៀវត្សដល់និស្សិតកម្ពុជាដែលរៀននៅឡាវឱ្យបានទៀងទាត់។ ដោយសារឆ្នាំនេះជាខួបទី៥៥នៃទំនាក់ទំនងការទូតកម្ពុជា-ឡាវ លោក THONSING បានស្នើសុំឱ្យសហការគ្នារៀបចំជាកម្មវិធីរំលឹកទិវានេះដោយផ្អែកលើស្ថានភាពជាក់ស្តែងរបស់ប្រទេសនីមួយៗ។ ទោះបីជាមានការរីកចំរើនក្តី លោក THONSING បានជំរាបសម្តេចតេជោថា ប្រទេសឡាវនៅមានការប្រឈមមុខជាច្រើន ក្នុងនោះប្រជាជនឡាវភាគច្រើនគឺរស់នៅតំបន់ព្រៃភ្នំដាច់ស្រយាល ហើយនិងរស់នៅដោយរណបធម្មជាតិ ដូច្នេះគឺជាការលំបាកមួយរបស់ប្រទេសឡាវ។ ចំពោះទិសដៅខាងមុខ លោកនាយករដ្ឋមន្ត្រីឡាវមានប្រសាសន៍ថា គឺធ្វើយ៉ាងណាពង្រឹងស្ថិរភាពនយោបាយ និងសង្គម ហើយនិងជំរុញកំណើនសេដ្ឋកិច្ចឱ្យឡើងបាន៨%ក្នុងមួយឆ្នាំ ។ ចំពោះទិសដៅសហស្សវត្សនៃអង្គការសហប្រជាជាតិប្រទេសឡាវនឹងខិតខំធ្វើឱ្យបាននៅឆ្នាំ២០២០ខាងមុខនេះ។ លោកខៀវ កាញារីទ្ធ បានបន្តទៀតថា សម្តេចតេជោនាយករដ្ឋមន្ត្រី ហ៊ុន សែន បានថ្លែងការអបអរសាទរចំពោះការរីកចំរើននៃសេដ្ឋកិច្ចរបស់ឡាវដោយមានកំណើន៧,៩%នេះដែលជាកំណើនមួយខ្ពស់នៅក្នុងតំបន់។ សម្តេចសង្ឃឹមថា ឡាវនឹងអាចសំរេចបានផែនការសេដ្ឋកិច្ចដែលបានដាក់នៅពេលខាងមុខ និងជូនពរឱ្យសន្និបាតលើកទី៩គណបក្សប្រជាជនបដិវត្តន៍ឡាវទទួលបានជោគជ័យ។ កន្លងមកនេះសម្តេចតេជោនាយករដ្ឋមន្ត្រីក៏បានលើកបញ្ជាក់ថា ក្រៅពីទំនាក់ទំនងរវាងរដ្ឋ និងរដ្ឋទំនាក់ទំនងរវាងរដ្ឋាភិបាលទាំងពីរ គឺមានការប្រជុំថ្នាក់ជាន់ខ្ពស់គណបក្សនៃប្រទេសទាំងពីរ គឺគណបក្សឡាវ និងគណបក្សប្រជាជនកម្ពុជាដែលជាការបង្ហាញឱ្យឃើញថា ប្រទេសទាំងពីរនេះគឺមានទំនាក់ទំនងជិតស្និទ្ធទាំងផ្នែករដ្ឋ ទាំងផ្នែកបក្ស។ សម្តេចតេជោនាយករដ្ឋមន្ត្រីក៏បានលើកផងដែរអំពីសភាពការណ៍ប្រទេសកម្ពុជាវិស័យសេដ្ឋកិច្ចពីឆ្នាំ២០០៤ដល់២០០៧ កម្ពុជាមានកំណើន៤% ប៉ុន្តែដោយសារវិបត្តិសេដ្ឋកិច្ចកម្ពុជាបានធ្លាក់ចុះ ហើយនៅឆ្នាំ២០១០នេះសេដ្ឋកិច្ចកម្ពុជាទើបតែនឹងបានឡើង៥,៥% ហើយកម្ពុជាសង្ឃឹមថា នៅឆ្នាំ២០១១ អាចនឹងឡើងដល់៦% នេះដោយសារវិស័យកាត់ដេរ កសិកម្ម និងទេសចរណ៍មានការរីកចំរើន ប៉ុន្តែវិស័យអចលនទ្រព្យនៅមិនទាន់មានការរីកចំរើននៅឡើយ។ ចំពោះវិស័យកសិកម្មនៅកម្ពុជានៅឆ្នាំនេះ សម្តេចតេជោនាយករដ្ឋមន្ត្រី បញ្ជាក់ថា កម្ពុជាបានធ្វើស្រូវវស្សា១០៤%នៃផែនការ ស្រូវប្រាំងធ្វើបាន១១៨%នៃផែនការដែលធ្វើឱ្យកម្ពុជាបានសល់ស្រូវសំរាប់នាំចេញ៣.៨០០.០០០តោនគិតជាអង្ករ២.៥០០.០០០តោន ដូច្នេះកម្ពុជាសព្វថ្ងៃនេះខិតខំផលិតស្រូវឱ្យបានច្រើន និងដើម្បីនាំចេញអង្ករឱ្យបានច្រើន។ ដោយសារកន្លងមកនេះកម្ពុជាខ្វះម៉ាស៊ីនកិនស្រូវធ្វើឱ្យ៧០%នៃស្រូវកម្ពុជាសល់នាំទៅវៀតណាម ហើយ៣០%នាំទៅប្រទេសថៃ។ សព្វថ្ងៃនេះកម្ពុជាកំពុងរៀបចំដើម្បីបង្កើនគុណភាពម៉ាស៊ីនកិនស្រូវដើម្បីជំរុញអង្ករនាំចេញទៅក្រៅ ហើយបច្ចុប្បន្ននេះកម្ពុជាបានជោគជ័យក្នុងការដណើ្តមទីផ្សារនៅអឺរ៉ុប ប៉ុន្តែទន្ទឹមនេះកម្ពុជាស្ថិតក្នុងស្ថានភាពផុយស្រួយមួយក្រោយពីវិបត្តិសេដ្ឋកិច្ចដែលកំពុងស្តារនេះ គឺកម្ពុជាមានបញ្ហាព្រំដែនដែលបានកើតឡើង ។ សម្តេចតេជោនាយករដ្ឋមន្ត្រីបានលើកឡើងថា នេះគឺមិនមែនជាការចៃដន្យទេ គឺជាចេតនាព្រាងទុកមួយរបស់ថ្នាក់ដឹកនាំជាន់ខ្ពស់នៃប្រទេសថៃ ។ ដូច្នេះ ហើយកម្ពុជាឈរលើគោលការណ៍មួយ គឺមិនចង់ធ្វើសង្គ្រាមជាមួយប្រទេសណាទេ ប៉ុន្តែការឈ្លានពានមកនេះដែលចាំបាច់កម្ពុជាត្រូវតែតបតវិញ ។ ទោះបីជាកម្ពុជាបានប្រឹងចរចាទ្វេភាគីរាប់ឆ្នាំកន្លងមកហើយ ប៉ុន្តែកម្ពុជាមិនបានជោគជ័យ ដូច្នេះហើយកម្ពុជាត្រូវបង្ខំចិត្តត្រូវតែអូសថៃទៅក្រុមប្រឹក្សាសន្តិសុខ អ.ស.ប និងបន្ទាប់មកទៅអាស៊ាន ។ សម្តេចតេជោនាយករដ្ឋមន្ត្រីបានបញ្ជាក់ជាថ្មីម្តងទៀតថា ជំហររបស់កម្ពុជា គឺការចរចាលើបញ្ហាជំលោះព្រំដែននេះ គឺជាការចរចាពហុភាគី។ ប៉ុន្តែការចរចាវិស័យសេដ្ឋកិច្ច ទេសចរណ៍ គឺចរចាទ្វេភាគី ។ សម្តេចបានជំរាបភាគីឡាវថា កម្ពុជាបញ្ចូនឯកសារទៅទីក្រុងឡាអេ ដើម្បីធ្វើការបកស្រាយឡើងវិញ លើសាលក្រមរបស់តុលាការនេះ ។ នៅលើកិច្ចសហប្រតិបត្តិការកម្ពុជា-ឡាវ សម្តេចតេជោបានលើកសំណូមពរមួយចំនួនគឺ តភ្ជាប់ខ្សែកាបអុបទិកដូចគ្នា។ សម្តេចសុំឱ្យតភ្ជាប់នៅត្រង់ចំណុចនៅត្រពាំងក្រៀល ដើម្បីអាចតភ្ជាប់កាបអុបទិក រវាងប្រទេសទាំងពីរដែលអាចឱ្យមានប្រព័ន្ធ VIDEO CONFERENCE ដែលធ្វើឱ្យខេត្ត និងខេត្ត ឬថ្នាក់ក្រសួងអាចធ្វើសន្និសីទទាក់ទងគ្នាបានដែលជាការងាយស្រួលក្នុងកិច្ចទំនាក់ទំនងនៃប្រទេសទាំងពីរ ។ ចំពោះបណ្តាញអគ្គិសនីដែលឡាវបានបញ្ចូនមកដល់ស្ទឹងត្រែងនោះ សម្តេចនាយករដ្ឋមន្ត្រីបានថ្លែងអំណរគុណដែលបានបង្កលក្ខណៈងាយស្រួលដល់ប្រជាជាតិកម្ពុជា ។ សម្តេចបានសម្តែងការរីករាយចំពោះការចុះហត្ថលេខាលើអនុស្សរណៈនៃការយោគយល់គ្នារវាងក្រសួងព័ត៌មានកម្ពុជា-ឡាវ លើសេវាកម្មផ្លូវគោក និងអនុស្សរណៈការយោគយល់គ្នាលើវិស័យវប្បធម៌ និងវិចិត្រសិល្បៈដែលធ្វើឱ្យកិច្ចសហប្រតិបត្តិការរវាងប្រទេសទាំងពីរនេះកាន់តែស៊ីជម្រៅថែមទៀត ។ សម្តេចតេជោនាយករដ្ឋមន្ត្រីបានលើកសរសើរអំពីការសម្រេចពីការដឹកជញ្ជូនតាមរថយន្តទេសចរណ៍ ពីសៀមរាប-ប៉ាក់សេ ជាជំហានថ្មីមួយទៀតក្នុងការបង្កើនទេសចរណ៍។ ចំពោះរឿងអាហារូបករណ៍សម្តេចបានទទួលថា កម្ពុជាអាច ទទួលបន្ថែមបន្តទៅទៀត ប៉ុន្តែបច្ចុប្បន្ននេះកម្ពុជាកំពុងតែសាងសង់អន្តេវាសិកដ្ឋាន ហើយបានលើកថា មិនចាំបាច់ស្នើទេ បើប្រទេសណាអាចទទួលលទ្ធភាពបានច្រើនទទួលច្រើន។ ចំពោះការដឹកជញ្ជូនផ្លូវគោកសម្តេចតេជោនាយករដ្ឋមន្ត្រី បានស្នើសុំឱ្យធ្វើដូចវៀតណាម បើខាងឡាវពិនិត្យហើយ កម្ពុជាមិនបាច់ពិនិត្យទេ បើកម្ពុជាពិនិត្យហើយគឺខាងឡាវមិនបាច់ពិនិត្យទេ ធ្វើយ៉ាងនេះមានលក្ខណៈងាយស្រួលបង្កើនការដឹកជញ្ជូនឱ្យបានឆាប់។ ចំពោះទិវាកិច្ចទំនាក់ទំនងការទូតលើកទី៥៥ កម្ពុជា-ឡាវ សម្តេចបានស្នើឱ្យគួរតែចាប់ធ្វើដំបូង គឺរៀបចំសម្ពោធបង្គោលព្រំដែនអនុស្សាវរីយ៍កម្ពុជា-ឡាវ នៅដុងក្រឡ គឺសុំឱ្យនាយករដ្ឋមន្ត្រីទាំង២ ចូលរួមសម្ពោធ។ ទី២ គឺសុំឱ្យរៀបចំជាផ្សារណាត់-សិល្បៈផ្សេងៗទៀតនៃចំណងទាក់ទងនៃប្រទេសយើងទាំង២។ សុំឱ្យភាគីឡាវពង្រីកយន្តការនៃកិច្ចសហប្រតិបត្តិការនៃតំបន់ត្រីកោណអភិវឌ្ឍកម្ពុជា-វៀតណាម-ឡាវ។ សម្តេចបានសំដែងការអរគុណប្រទេសឡាវដែលជួយព្យាបាលប្រជាជនកម្ពុជានៅជាប់ព្រំដែន រដ្ឋាភិបាលឡាវបានបញ្ជូនប្រាក់៥ម៉ឺនដុល្លារជួយដល់ប្រជាជនរងគ្រោះនៅកោះពេជ្រ។ សម្តេចបានសម្តែងនូវការរីករាយ ដោយការបានបោះបង្គោល៨៨%ហើយ ដូច្នេះកន្លែងណានៅមិនទាន់បោះ គឺសុំបន្តសហការគ្នាឱ្យបានឆាប់រហ័ស។ ជាកិច្ចឆ្លើយតប លោក THONGSING THAMAVONG នាយករដ្ឋមន្ត្រីថ្មីឡាវបានបញ្ជាក់ថា រដ្ឋាភិបាលឡាវ បានតាមដានដោយយកចិត្តទុកដាក់អំពីសភាពការណ៍កម្ពុជា-ថៃ ហើយបានទទួលស្គាល់ថា ប្រទេសកម្ពុជាគឺជាអ្នករងគ្រោះដោយសារតែវិបត្តិផ្ទៃក្នុងរបស់ថៃ។ តាមពិតកម្ពុជាមិនគួរមានរឿងបែបហ្នឹងទេ ព្រោះរឿងអ្វីៗដែលកម្ពុជាបានលើកគឺជាការងារមួយដែលស្របច្បាប់ ដូច្នេះលោកសូមស្នើដល់រាជរដ្ឋាភិបាលកម្ពុជា ដែលកន្លងមកនេះបានយកជំហរមួយដ៏ត្រឹមត្រូវ ហើយបានប្រកាន់ខ្ជាប់នូវច្បាប់អន្តរជាតិ និងនិយាមអន្តរជាតិ ធ្វើឱ្យសហគមន៍អន្តរជាតិទាំងអស់បានគាំទ្រដល់ជំហររបស់ប្រទេសកម្ពុជានេះ។ ប្រទេសឡាវនឹងខិតខំថែមទៀតដើម្បីប្រឹងប្រែងយ៉ាងណាជួយធ្វើឱ្យសភាពការណ៍រវាងកម្ពុជា-ថៃបានធូរស្រាល។ លោកនាយករដ្ឋមន្ត្រីឡាវបានអញ្ជើញសម្តេច និងលោកជំទាវ ព្រមទាំងនាំគណៈប្រតិភូជាន់ខ្ពស់ទៅទស្សនកិច្ចនៅប្រទេសឡាវនៅពេលវេលាមួយសមស្រប។ សម្តេចនាយករដ្ឋមន្ត្រីទទួលយកហើយនឹងពិចារណាផងដែរ និងសម្រេចនៅពេលណាសមស្រប។ កម្ពុជា-ឡាវមានការងារច្រើននៅឆ្នាំ២០១២ ខាងមុខ គឺឡាវត្រូវធ្វើជាប្រធានកិច្ចប្រជុំអាស៊ាន-អឺរ៉ុប កម្ពុជាទទួលធ្វើជាម្ចាស់ផ្ទះនៃកិច្ចប្រជុំអាស៊ាន ហើយកម្ពុជាក៏ត្រូវរៀបចំបោះឆ្នោតសមាជិកព្រឹទ្ធសភា និងការបោះឆ្នោតមូលដ្ឋាន៕  |
| ឃាត់ខ្លួនប្តីប្រពន្ធពីរគូជាបងថ្លៃប្អូនថ្លៃនឹងគ្នាពីបទជួញដូរថ្នាំញៀន Posted: 07 Mar 2011 07:21 PM PST  ខេត្តពោធិ៍សាត់់ ៖ ជនសង្ស័យ៤នាក់ជាប្ដីប្រពន្ធនិងជាបងថ្លៃប្អូនថ្លៃនឹងគ្នាត្រូវសមត្ថកិច្ចឃាត់ខ្លួនបញ្ជូនទៅកាន់សាលាដំបូងខេត្តបន្ទាប់ពីឆែកឆេរក្នុងលំនៅដ្ឋានរកឃើញថ្នាំញៀនប្រភេទយ៉ាបាពណ៌ក្រហមចំនួន១២១គ្រាប់កន្លះ កាលពីថ្ងៃទី៥ មីនា ។ ជនសង្ស័យទាំង៤នាក់មាន១-ឈ្មោះយិន ភាន ហៅហ៊ាន ភា ភេទប្រុស អាយុ៣២ឆ្នាំ ២-ឈ្មោះអ៊ុត តុន ភេទស្រី អាយុ៣២ឆ្នាំ ត្រូវជាប្រពន្ធ ៣-ឈ្មោះអ៊ឹម ខុន ភេទប្រុស អាយុ៤៨ឆ្នាំ និង៤-ឈ្មោះអ៊ុត តាក់ ភេទស្រី អាយុ៣៧ឆ្នាំជាប្រពន្ធ។ ទាំង៤នាក់ជាបងថ្លៃប្អូនថ្លៃនឹងគ្នារស់នៅភូមិរវៀងឃុំសំរោងស្រុកភ្នំក្រវាញខេត្តពោធិ៍សាត់ ។ តាមប្រភពពីលោកអនុសេនីយ៍ឯកសូ សាហុង អធិការរងនគរបាលស្រុកភ្នំក្រវាញទទួលបន្ទុកការងារយុត្តិធម៌ឱ្យដឹងថា ជនសង្ស័យទាំង៤នាក់ខាងលើគឺជាមុខសញ្ញាជួញដូរថ្នាំញៀនដែលសមត្ថកិច្ចតាមស៊ើបអង្កេតរកភស្តុតាងដើម្បីដាក់បន្ទុកជាយូរមកហើយ។ កន្លងមកពួកគេមិនសូវនៅផ្ទះជាប់លាប់ទេចេញ-ចូលៗដូចអំពិលអំពែក ប៉ុន្តែលើកនេះឃើញនៅយូរ ភ្នាក់ងារបានរាយការណ៍មកសមត្ថកិច្ចហើយក៏សុំយោបល់ពីលោកស្នងការនគរបាលខេត្តដើម្បីសុំដីកាពីលោកព្រះរាជអាជ្ញាអមសាលាដំបូងខេត្ត ទើបនៅថ្ងៃទី៥ មីនា សមត្ថកិច្ចចុះទៅឆែកឆេរក្នុងលំនៅដ្ឋានជនសង្ស័យ រកឃើញថ្នាំញៀនប្រភេទយ៉ាបាចំនួន១២១គ្រាប់កន្លះពណ៌ក្រហមដាក់ក្នុងដបជរ័ដែលគេលាក់ទុកកប់ក្នុងដីក្រោមផ្ទះ។ បន្ទាប់ពីរកឃើញវត្ថុតាងហើយ សមត្ថកិច្ចក៏ធ្វើការឃាត់ខ្លួនជនសង្ស័យប្ដីប្រពន្ធទាំងពីរគូរនេះតែម្ដង។ នៅ ចំពោះមុខសមត្ថកិច្ចជនសង្ស័យឈ្មោះអ៊ឹម ខុន ប្រពន្ធឈ្មោះអ៊ុត តាក់ ជាបងថ្លៃបានបដិសេធថាខ្លួនគ្រាន់តែជាម្ចាស់ផ្ទះប៉ុណ្ណោះ ប៉ុន្តែមិនបានដឹងថាប្អូនថ្លៃរកស៊ីជួញដូរថ្នាំញៀននោះទេ ។ ចំណែកជនសង្ស័យឈ្មោះយិន ភាន ហៅហ៊ាន ភា បានសារភាពថា ខ្លួននិងប្រពន្ធបានបោះបង់មុខរបរផ្សេងហើយមករកស៊ីជួញដូរថ្នាំញៀននេះដោយសារមុខរបរនេះកាក់កបខ្លាំង។ ចាប់ពីខែតុលាឆ្នាំ២០១០ មកដល់ដើមខែមីនា ឆ្នាំ២០១១នេះខ្លួនបានចែកចាយថ្នាំញៀនចំនួន៥លើក ហើយលក់ទៅឱ្យអ្នកចូលព្រៃកាប់ឈើ អារឈើ អ្នកបើករថយន្តដឹកឈើ និងកម្មករក្រុមហ៊ុនផ្សេងៗ ដែលថ្នាំញៀនប្រភេទយ៉ាបានេះជួយមិនឱ្យងងុយដេក និងធ្វើការមិនចេះអស់កំលាំង។ ថ្នាំញៀននេះខ្លួនទិញមកពីខេត្តប៉ៃលិន និងផ្សារឡែមខេត្តបាត់ដំបង។ជនសង្ស័យទាំង៤នាក់សមត្ថកិច្ចបានកសាងសំណុំបែបបទបញ្ជូនទៅសាលាដំបូងខេត្តនារសៀលថ្ងៃទី៧ មីនានេះដើម្បីផ្ដន្ទាទោសតាមច្បាប់ ៕  |
| នៅច្រកទ្វារអន្តរជាតិប៉ោយប៉ែតត្រីទឹកសាបនាំទៅថៃមានចំនួនច្រើន Posted: 07 Mar 2011 07:04 PM PST  ក្រុងប៉ោយប៉ែត ៖ នៅច្រកទ្វារអន្តរជាតិប៉ោយប៉ែតដែលជាច្រកសេដ្ឋកិច្ចធំមួយជាមួយប្រទេសថៃ ឈ្មួញបាននាំត្រីទឹកសាបទៅលក់នៅប្រទេសថៃពី២០ទៅ៣០តោននៅខែកុម្ភៈកន្លងមកខុសពីខែធ្នូ ឆ្នាំ២០១០ និងខែមករា កន្លងទៅមានពី៤០ទៅ៥០តោន។ មន្ត្រីសង្កាត់រដ្ឋបាលជលផលក្រុងប៉ោយប៉ែតបានឱ្យដឹងថា នៅច្រកទ្វារអន្តរជាតិប៉ោយប៉ែតទោះជាសភាពការណ៍នៅតាមខ្សែបន្ទាត់ព្រំដែនយ៉ាងណាក៏ដោយ ក៏ផ្នែកសេដ្ឋកិច្ចនៅតែដំណើរការដោយមានការដោះដូរទំនិញជាធម្មតា។ ជាក់ស្តែងបើនិយាយពីត្រីសាច់ដែលនាំចូលទៅលក់នៅប្រទេសថៃ រាល់ថ្ងៃនេះ មានចំនួន៥ក្រុមហ៊ុន គឺ១-ក្រុមហ៊ុនហ៊ុតជ្រា, ២-គឹម ស្រ៊ាង, ៣-ប៊ុត ចាន់ធូ, ៤-ញឹម ហៀង និង៥-រដ្ឋ ដូរ៉េ ។ មន្ត្រីដដែលបន្តថាត្រីដែលនាំចូលទៅប្រទេសថៃ មានតាមរដូវគឺនៅខែធ្នូ និងខែមករា ក្នុង១ខែមានពី៤០ទៅ៥០តោន ដោយឡែកនៅខែកុម្ភៈក្នុង១ខែពី២០ទៅ៣០តោន ក្នុងនោះត្រីរស់ ក្នុង១ថ្ងៃជិត១តោន។ ត្រីដែលនាំចេញជាប្រភេទត្រីរ៉ស់ ត្រីតាឱន ត្រីអណ្តែង ត្រីកែស ត្រីឆ្លូញ ត្រីប្រមា ត្រី ចង្វាពោត ដែលឈ្មួញទិញពីខេត្តជុំវិញបឹងទន្លេសាប មានខេត្តសៀមរាប កំពង់ធំកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ។ មន្ត្រីសង្កាត់រដ្ឋបាលជលផលបានបន្តទៀតថា ក្រៅពីត្រីដែលនាំចូលនៅប្រទេសថៃ ក្រុមហ៊ុនទាំង៥បាននាំចូលពីថៃមកកម្ពុជាវិញ នូវត្រីក្លាស្សេទឹកកកមានត្រីប្រា ត្រីឆ្ពិន និងត្រីកាម៉ុងក្នុង១ខែពី៥ទៅ១០តោន ៕  |
| ផលិតកម្មវិស្ណុភាពយន្តត្រូវតួសម្តែងចោទអត់ឱ្យលុយ Posted: 07 Mar 2011 06:52 PM PST រាជធានីភ្នំពេញ ៖ រឿង ចន្ទចាកវេហាស៍ របស់ផលិតកម្មវិស្ណុភាពយន្តដែលបានចេញថតតាំងពីថ្ងៃទី៧ ខែកុម្ភៈ ឆ្នាំ២០១១ រហូតមកដល់ពេលនេះជិតចប់ហើយ ដោយមានលោកជ័យ រិទ្ធា ជាអ្នកនិពន្ធ និងដឹកនាំរឿង និងជាអ្នកកាន់កាមេរ៉ាថត។ ទោះជាយ៉ាងក្តី កាលពីថ្ងៃទី៥ ខែមីនា ឆ្នាំ២០១១ កញ្ញាសុវណ្ណ លីនដា ជាតារាថ្មីទើបរះដែលបានចូលរួមសម្តែងនៅក្នុងរឿង ចន្ទចាកវេហាស៍ នេះដែរ ជាតួអង្គឈ្មោះលីនដាឱ្យដឹងថា ក្នុងសាច់រឿងនាងត្រូវថត៤ថ្ងៃចប់ តែអ្វីដែលគួរឱ្យសោកស្តាយនោះ គឺពេលនាងសុំបើកលុយ លោកជ័យ រិទ្ធា មិនបើកឱ្យទេ ដោយប្រាប់ថា លោកគ្មានលុយឱ្យទេ។ សំរាប់កំរៃរបស់នាង គឺក្នុង១ថ្ងៃ៤ម៉ឺនរៀល ឬ១០ដុល្លារដូច្នេះនាងថតរយៈពេល៤ថ្ងៃស្មើនឹង៤០ដុល្លារ ។ កញ្ញាលីនដានិយាយថា កាលពីលោកជ័យ រិទ្ធា ឱ្យនាយតឿហៅនាងទៅសម្តែងដូចជាងាយស្រួលណាស់ តែពេលសម្តែងហើយស្រាប់តែមិនបើកលុយឱ្យទៅវិញ ។ ដូច្នេះនាងសុំឱ្យផលិតកម្មកាត់ត្រង់ឈុតឆាកដែលនាងសម្តែងរយៈពេល៤ថ្ងៃនោះចេញ ។ នាងចំណាយប្រាក់ទិញសំលៀកបំពាក់ល្អៗ និងជិះម៉ូតូទៅសម្តែងចំណាយសាំងអស់ជាច្រើន និងចំណាយពេលវេលាអស់រយៈពេល៤ថ្ងៃ បែរជាគ្មានបានប្រាក់កំរៃបន្តិចសោះ ។ នាងសុំបើកប្រាក់ពីលោកជ័យ រិទ្ធា ត្រូវលោកប្រាប់ថា គ្មានលុយបើកឱ្យទេ ចំណែកនាយតឿជាអ្នកហៅនាងទៅថតពេលនាងទូរស័ព្ទទៅសួរមិនលើកទេ ។ កញ្ញាលីនដា និយាយទៀតថា លោកជ័យ រិទ្ធា បានឱ្យដឹងថា «លោកបើកផលិតកម្មប៉ុនណាប៉ុនណី រឿងអីគ្មានលុយបើកឱ្យតួក្នុងមួយថ្ងៃ១០ដុល្លារនោះ តែបើតួប្រាប់មុនថា យកលុយគាត់បើកឱ្យភ្លាម»។ តាមពិតកាលពីហៅនាងថតនាយតឿអ្នកចាត់ការទូទៅនិយាយថា ចាំគេបើកលុយឱ្យ តែពេលថតចប់ស្រាប់តែក្រុមការងាររបស់ផលិតកម្មវិស្ណុ និយាយដេញដោលគ្នាពី មួយទៅមួយគ្មានអ្នកទទួលខុសត្រូវ។ បើមិនចង់ឱ្យលុយតួសម្តែងហេតុអីពេលហៅទៅថតមិនប្រាប់ឱ្យហើយ ឬសួរតួសម្តែងថាតើមកថតយកលុយឬអត់? ការចោទប្រកាន់តែម្ខាងរបស់នាងលីនដាបែបនេះទៅលើផលិតកម្មវិស្ណុយើងមិនចាត់ទុកថា វាជាការពិត ឬយ៉ាងណានោះទេ ។ ជាធម្មតាបញ្ហាមួយដែលកើតឡើងគូភាគីតែងតែនិយាយយកត្រូវរៀងខ្លួន ឬទំលាក់កំហុសទៅភាគីម្ខាង។ ជួនកាលបញ្ហាដែលកើតឡើងរវាងតួសំដែង និងផលិតកម្មនេះអាចមានហេតុផលណាមួយខុសពីការលើកឡើងរបស់នាងលីនដា ៕  |
| តាមប្រមាញ់ទីតាំងមេខ្លោង សមត្ថកិច្ចរកឃើញរថយន្តទ្រុងក្លាស្សេបង្កប់ឧបករណ៍ផលិតគ្រឿងញៀន Posted: 07 Mar 2011 06:45 PM PST     រាជធានីភ្នំពេញ ៖ ការស្រាវជ្រាវ និងស៊ើបអង្កេតយ៉ាងក្តៅគគុកមួយរបស់សមត្ថកិច្ចជំនាញនៃស្នងការដ្ឋាននគរបាលរាជធានីភ្នំពេញ សហការជាមួយនគរបាលនាយកដ្ឋានសន្តិសុខក្រសួងមហាផ្ទៃ និងតុលាការត្រូវបានធ្វើឡើងជុំវិញអចលនទ្រព្យរបស់មេខ្លោងផលិតគ្រឿងញៀនឈ្មោះហុង អេនឌី ទោះបីជាលំនៅឋាន២កន្លែងត្រូវបានទទួលការឆែកឆេរហើយក្តី ក៏នៅរសៀលថ្ងៃទី៦ និងព្រឹកថ្ងៃទី៧ មីនា លំនៅឋាន២កន្លែងទៀតត្រូវបានធ្វើការឆែកឆេរ ។ លំនៅឋានទី៣ ដែលត្រូវបានឆែកឆេរនៅរសៀលថ្ងៃទី៦ មីនា ស្ថិតនៅក្នុងភូមិក្បាលទំនប់ សង្កាត់បឹងទំពុន ខណ្ឌមានជ័យ ។ ប្រតិបត្តិការខាងលើនេះសមត្ថកិច្ចបានឆែកឆេរលំនៅឋានតាមដីកាឆែកឆេររបស់សាលាដំបូងរាជធានី បានរកឃើញមានទូដែកមួយ និងរថយន្តម៉ាក LEXUS ៤៧០ ថ្មីមួយគ្រឿងទៀត។ ក្រៅពីនេះពុំឃើញមានអ្វីគួរឱ្យកត់សំគាល់ឡើយ សូម្បីតែមនុស្សក្នុងលំនៅឋានក៏ពុំមានដែរ ។ ចំពោះលំនៅឋាន និងសម្ភារដែលសមត្ថកិច្ចបានចុះអនុវត្តការឆែកឆេរត្រូវបានតុលាការចេញដីការឹបអូស និងបិទទ្វារផ្ទះទាំងស្រុងតែម្តង ។ដោយឡែកទូដែកតុលាការបានសម្រេចឱ្យគាស់ត្រួតពិនិត្យនៅព្រឹកថ្ងៃទី៧ មីនា។ សូមរំលឹកថា ឈ្មោះហុង អេនឌី ត្រូវសមត្ថកិច្ចចាប់ខ្លួនកាលពីថ្ងៃទី១ មីនា នៅក្នុងដីឡូត៍គ្មានលេខ ភូមិស្វាយតាអុក សង្កាត់វាលស្បូវ ខណ្ឌមានជ័យ ហើយបច្ចុប្បន្នត្រូវបានតុលាការចេញដីការឃុំខ្លួននៅពន្ធនាគារព្រៃសកាលពីល្ងាចថ្ងៃទី៥ មីនា ។ នៅព្រឹកថ្ងៃទី៧ មីនា ទូដែកដែលសមត្ថកិច្ចដកហូតបាននៅក្នុងផ្ទះហុង អេនឌី នៅភូមិក្បាលទំនប់ សង្កាត់បឹងទំពុន នោះ គណៈកម្មការចំរុះរួមមួយបានគាស់ពិនិត្យមើលនៅអង្គភាពនាយកដ្ឋានសន្តិសុខផ្ទៃក្នុងក្រសួងមហាផ្ទៃ តែពុំមានអ្វីឡើយ សូម្បីតែលុយមួយសេនក៏គ្មានដែរ។ ចំពោះបញ្ហានេះប្រភពព័ត៌មានមួយបង្ហើបថា ក្រុមគ្រួសារហុង អេនឌី ដឹងរឿងមុន បានប្រមូលលុយ និងមាសប្រាក់ចេញអស់ពីក្នុងទូដែក ។ នៅព្រឹកថ្ងៃទី៧ មីនា ដោយមានការដឹកនាំពីតំណាងអយ្យការអមសាលាដំបូងរាជធានីភ្នំពេញ លោកគួច ចំរើន អភិបាលខណ្ឌមានជ័យ លោកហ៊ី ណារិន អធិការនគរបាលខណ្ឌ លោកជឹម ស៊ីថា អធិការរងនគរបាលខណ្ឌ លោកម៉ែន ហេងទិត្យ អធិការរងនគរបាលខណ្ឌ និងលោកតេង ស៊ីណូ អធិការរងដែរនោះ បានចុះឆែកឆេរលំនៅឋានរបស់ឈ្មោះហុង អេនឌី មួយកន្លែងថ្មីទៀតស្ថិតនៅភូមិព្រែកថ្មី សង្កាត់ព្រែកថ្មី ខណ្ឌមានជ័យ គឺជាផ្ទះទី៥ ។ កិច្ចប្រតិបត្តិការដដែលខាងលើនេះ សមត្ថកិច្ចរកពុំឃើញមានមនុស្សណាម្នាក់នៅក្នុងលំនៅឋាននោះទេ ។ ដោយសារតែបញ្ហានេះក្រុមសមត្ថកិច្ចបានបង្ខំចិត្តយកកន្ត្រៃកាត់ដែកកាត់ផ្តាច់សោទីតាំងខាងលើដោយកម្លាំងបាយ។ ក្នុងនោះដែរសូម្បីតែរថយន្តឃ្លុបដែលបំពាក់ឧបករណ៍ផលិតថ្នាំញៀនក៏ត្រូវសមត្ថកិច្ចកាត់សោទ្វារដែក ទើបដឹងថា មានឧបករណ៍ផលិតថ្នាំញៀន និងសារធាតុញៀនផ្សេងៗទៀតនៅក្នុងរថយន្តនោះ ។ សូមបញ្ជាក់ថា ទីតាំងផលិតថ្នាំញៀននៅភូមិព្រែកថ្មី សង្កាត់ព្រែកថ្មី ដែលទើបត្រូវបានផ្ទេរចូលមកក្នុងការគ្រប់គ្រងរដ្ឋបាលរបស់សាលារាជធានីភ្នំពេញនោះ គឺជាទីតាំងទី៤ ហើយដែលសមត្ថកិច្ចចុះអនុវត្តរឹបអូសយកមកតម្កល់ទុក។ ចំពោះទីតាំងទាំង៤កន្លែង ដែលសមត្ថកិច្ចអនុវត្តកន្លងមក ទី១ គឺដីឡូត៍នៅភូមិស្វាយតាអុក សង្កាត់វាលស្បូវ ទី២ ផ្ទះល្វែងនៅភូមិសន្សំកុសល សង្កាត់បឹងទំពុន ទី៣ ផ្ទះល្វែងនៅភូមិក្បាលទំនប់ សង្កាត់បឹងទំពុន និងទី៤ គឺដីឡូត៍ធំនៅភូមិព្រែកថ្មីខាងលើតែម្តង ។ ចំពោះទីតាំងទាំង៤កន្លែងនោះ សុទ្ធតែបំពាក់កាមេរ៉ាចាប់រូបភាពគ្រប់ជ្រុងទាំងអស់។ ទីតាំងទាំងនោះសម្រាប់មនុស្សធម្មតាល្មមៗ ពុំមានលទ្ធភាពទិញយកមកធ្វើជាកម្មសិទ្ធិឡើយ ៕  |
| រុះរើតូបអាជីវករនៅផ្សារកំពង់ប្រណាកជម្រះបញ្ជី ប្រធានស៊ីដាច់កូនចៅ Posted: 07 Mar 2011 06:19 PM PST         ខេត្តព្រះវិហារ ៖ សមត្ថកិច្ចចំរុះមួយក្រុមរបស់គណៈកម្មការសុរិយោដីខេត្ត កាលពីថ្ងៃទី៧ មីនា វេលាម៉ោង៨និង៣០នាទីព្រឹក បានធ្វើការរុះរើតូបរបស់អាជីវករនៅផ្សារកំពង់ប្រណាក ដោយសំអាងថា មានការជូនដំណឹងជាច្រើនលើកច្រើនសាមកហើយ។ ការអនុវត្តរុះរើតូបដែលអាជ្ញាធរចាត់ទុកថា ជាសំណង់អនាធិបតេយ្យនៅលើដីទំនាស់នេះ ដឹកនាំដោយលោកស ថាវី អភិបាលរងខេត្ត និងលោកឡុង ស៊ីថា ព្រះរាជអាជ្ញារងអមសាលាដំបូងខេត្ត និងមានការចូលរួមពីសំណាក់លោកតូច វង្ស អភិបាលក្រុងព្រះវិហារ ចៅសង្កាត់កំពង់ប្រណាក មន្ត្រីរៀបចំដែនដីខេត្ត ដោយក្នុងនោះមានមន្ត្រីជំនាញពាក់ព័ន្ធ និងកម្លាំងកងរាជអាវុធហត្ថខេត្ត ប៉ូលិសស្នងការដ្ឋានខេត្ត-ក្រុងព្រះវិហារ សរុបជិត១.០០០នាក់។ ការបើកយុទ្ធនាការរុះរើសំណង់តូបផ្សារនេះត្រូវបានក្រុមមន្ត្រីអះអាងថា អនុវត្តតាមដីកាលេខ១៤ ចុះថ្ងៃទី១៦ កក្កដា ឆ្នាំ២០១០ របស់គណៈកម្មការសុរិយោដីថ្នាក់ខេត្ត និងលិខិតលេខ១៣២ របស់អាជ្ញាធរដោះស្រាយទំនាស់ដីធ្លីចុះថ្ងៃទី១៣ វិច្ឆិកា ឆ្នាំ២០០៩ និងយោងសារាចរណែនាំលេខ០១ ស្តីពីអនុវត្តនីតិវិធីលើសំណុំរឿងវិវាទដីធ្លីរបស់អនុគណៈកម្មការសុរិយោដីរាជធានី-ខេត្ត ចុះថ្ងៃទី២១ មករា ឆ្នាំ២០១០ យោងលិខិតលេខ៩៨៤ ចុះថ្ងៃទី៨ វិច្ឆិកា ឆ្នាំ២០១០ របស់គណៈកម្មការសុរិយោដីថ្នាក់ជាតិ ស្តីពីសេចក្តីសម្រេចជូនដំណឹងចូលជាស្ថាពរ។ ជុំវិញការរុះរើសំណង់តូបផ្សារ២៦ល្វែង នៅក្នុងផ្សារកំពង់ប្រណាកនេះ លោកស ថាវី អភិបាលរងខេត្ត និងជាប្រធានក្រុមការងារបានមានប្រសាសន៍ប្រាប់អ្នកយកព័ត៌មាន និងអាជីវករនៅក្នុងផ្សារកំពង់ប្រណាកនាព្រឹកនោះឱ្យដឹងថា ពេលនេះខេត្តបានសម្រេចធ្វើការរុះរើ ហើយការអនុវត្តរុះរើនេះក៏ព្រោះតែមានការប្តឹងតវ៉ាពីមន្ត្រីរាជការនៃមន្ទីរឧស្សាហកម្ម រ៉ែ និងថាមពលខេត្តជាច្រើនឆ្នាំមកហើយ តែដោះមិនចេញ។ អ្នកដឹងប្រវត្តិពីដីផ្សារនេះបានឱ្យដឹងថា ការពិតមន្ទីរឧស្សាហកម្ម រ៉ែ និងថាមពលខេត្តព្រះវិហារ កាលពីទសវត្សឆ្នាំ១៩៩០ បន្ទាប់ពីមានការបោះឆ្នោតនាអាណត្តិទី១ ក្នុងឆ្នាំ១៩៩៣ អាជ្ញាធរខេត្តបានសម្រេចយកដីនោះទៅធ្វើជាផ្សារវិញម្តងដោយសារឃើញដីនោះមានទំហំធំស្ថិតនៅកណ្តាលខេត្ត ។ ក៏ប៉ុន្តែពេលនោះអាជ្ញាធរខេត្តក៏បានសម្រេចធ្វើសម្បទានដីផ្សារនោះជារួមទៅឱ្យមន្ទីរឧស្សាហកម្មខេត្ត ចំនួន៤៥ឡូត៍ ដើម្បីឱ្យអង្គភាពចែកទៅឱ្យមន្ត្រីរាជការក្នុងមន្ទីរឱ្យបានសមរម្យ។ ក្រោយពីទទួលបានដីឡូត៍ទាំងអស់ខាងលើបែរជាប្រធានមន្ទីរឧស្សាហកម្មខេត្តលោកសំ លាងនី យកដីទាំងអស់ខាងលើបែងចែកដោយខ្លួនឯង មិនមានការស្មើភាពទើបធ្វើឱ្យមន្ត្រីរាជការក្នុងមន្ទីរឧស្សាហកម្មខេត្តប្តឹងលោកប្រធាន សំ លាងនី ទៅអាជ្ញាធរខេត្តសុំឱ្យជួយធ្វើការបែងចែកដីនេះដល់ពួកគេឱ្យបានស្មើភាពនៅក្នុងឆ្នាំ១៩៩៨។ ប៉ុន្តែតាមដែលគេបានដឹង ការតវ៉ារបស់មន្ត្រីក្រោមឱវាទរបស់លោកសំ លាងនី តាំងពីពេលនោះមក ទោះជាខំប្តឹងដល់សម្តេចតេជោរហូតមានចំណារសុំឱ្យអតីតអភិបាលខេត្តព្រះវិហារ លោកព្រាប តាន់ ធ្វើការត្រួតពិនិត្យ និងបែងចែកដីនោះដល់មន្ត្រីរាជការឱ្យបានសមរម្យយ៉ាងណាក៏ដោយ ពេលនោះអាជ្ញាធរខេត្តដោះមិនចេញ ទីបញ្ចប់គឺពួកមន្ត្រីរាជការទាំងនោះក៏នៅតែមិនទទួលបានភាពយុត្តិធម៌ដដែល។ ទើបពួកគេនៅតែបន្តការប្តឹងទាមទារទៅអាជ្ញាធរជាតិដោះស្រាយទំនាស់ដីធ្លីសុំឱ្យធ្វើការដោះស្រាយ និងបែងចែកដីសម្បទានរបស់ខេត្តឱ្យពួកគាត់ជាបន្តទៀតរហូតមកដល់ពេលនេះ។ លោកសំ លាងនី ប្រធានមន្ទីរឧស្សាហកម្ម ខេត្តបានឱ្យដឹងថា ដីក្នុងផ្សារដែលគាត់បានជួលទៅឱ្យអាជីវករទាំងអស់នោះគឺជាដីរបស់គាត់ទាំងអស់មិនមែនជាដីរបស់អ្នកណាម្នាក់ឡើយ ។ លោកបានបញ្ជាក់ថា លោកបានបែងចែកឱ្យកូនចៅ ហើយរូបគាត់បានប្រមូលទិញយកវិញនៅឆ្នាំ១៩៩៨ ។ លោកសំ លាងនី នៅបានបញ្ជាក់ប្រាប់អ្នកយកព័ត៌មានថា លោកនឹងដាក់ពាក្យប្តឹងពីអាជ្ញាធរខេត្តដែលបានរុះរើសំណង់ចេញពីលើដីដែលលោកជួលឱ្យអាជីវករទៅតុលាការ ។ មានការកត់សំគាល់ថា ដីផ្សារដែលកំពុងមានការរុះរើ គឺមានទំនាស់រាប់ឆ្នាំមកហើយ។ តាមមន្ត្រីរាជការនៃមន្ទីរឧស្សាហកម្មខេត្តបានឱ្យដឹងថា ដីទំនាស់ក្នុងផ្សារកំពង់ប្រណាកមួយកន្លែងនេះគឺមកទល់ពេលនេះមានរយៈពេលប្រមាណ១៣ឆ្នាំហើយដែលដោះមិនចេញ ដោយ កន្លងទៅពួកគាត់ជាមន្ត្រីរាជការក្នុងមន្ទីរឧស្សាហកម្មខេត្ត ស្ថិតក្រោមឱវាទលោកសំ លាងនី មានគ្នាចំនួន១៣នាក់ប៉ុណ្ណោះ និងកន្លងមកពួកគេទាំងអស់គ្នាបានសុំឱ្យលោកសំ លាងនី ជាប្រធានបែងចែករបបដីសម្បទានដែលខេត្តប្រគល់ជូន៤៥ឡូត៍តែម្នាក់ពីរឡូត៍ក្នុងចំនួន១៣នាក់តែប៉ុណ្ណោះ។ ទីបំផុតក្នុងដី៤៥ឡូត៍ត្រូវបានលោកសំ លាងនី ឱ្យពួកគាត់តែ៦ឡូត៍សំរាប់គ្នា១៣នាក់ ហើយពួកគេបានបដិសេធថា កន្លងទៅពួកគាត់ជាកូនចៅមិនបានលក់ដីមួយឡូត៍ណាទៅឱ្យលោកប្រធានទេ។ ដោយខ្លះបានឱ្យដឹងថា ពួកគាត់ខ្ចីអង្ករលោកប្រធានពីរទៅបីបាវស្រាប់តែក្រោយមកលោកប្រធានបានប្រាប់ថា គឺជាថ្នូររួចគ្នានឹងដីមួយឡូត៍។ ដូច្នោះទើបពេលនោះធ្វើឱ្យពួកគេប្តឹងសុំឱ្យអាជ្ញាធរជួយរកយុត្តិធម៌។ លោក ស ថាវី អភិបាលរងខេត្តជាប្រធានក្រុមសមត្ថកិច្ចចុះអនុវត្តបានឱ្យដឹងទៀតថា ពេលនេះដីទំនាស់ក្នុងផ្សារ ដែលបានតំរូវឱ្យអាជីវកររុះរើសំណង់ដែលបានសង់នៅលើដី ទំនាស់ចេញនោះ គឺក្នុងគោលបំណងយកដីដែលមានទំនាស់យូរឆ្នាំនោះទៅរក្សាគ្រប់គ្រងដោយអាជ្ញាធរខេត្ត និងដើម្បីធ្វើការពិនិត្យបែងចែកឱ្យមានភាពយុត្តិធម៌ដល់មន្ត្រីរាជការឡើងវិញ ហើយដីណាក្រៅពីទំនាស់ត្រូវឱ្យអាជីវករដាក់ពាក្យទៅគណៈកម្មការផ្សារដែលគ្រប់គ្រងដោយសាលាខេត្តដើម្បីសង់តូបលក់ដូរជាថ្មីឡើងវិញ។ លោកម៉ែន វុត្ថា អនុប្រធានមន្ទីររៀបចំដែនដីខេត្តជាប្រធានលេខាធិការដ្ឋាននៃគណៈកម្មការសុរិយោដីខេត្តបានឱ្យដឹងដែរថា ដីដែលមានទំនាស់ដ៏រាំុរ៉ៃអស់រយៈពេលជាង១០ឆ្នាំកន្លងមកនេះ ត្រូវបានដកហូតនិងធ្វើការរុះរើសំណង់ចេញ ដោយឡែកដីឡូត៍ណាដែលជាចំណែកលោកសំ លាងនី ប្រធានមន្ទីរឧស្សាហកម្មខេត្ត គឺត្រូវប្រគល់ទៅឱ្យលោកសំ លាងនីវិញ ចំណែកណាដែលត្រូវប្រគល់ឱ្យទៅមន្ត្រីរាជការក្រោមឱវាទ គឺត្រូវប្រគល់ទៅឱ្យពួកគាត់នាពេលខាងមុខនេះ។ ជុំវិញការរុះរើនេះបានប៉ះពាល់ដល់អាជីវករផងដែរ ទោះបីជាដី ជាទីតាំង ជាដីទំនាស់ក្តីក៏ពួកគេមានការបង់ខាតក៏បាននាំគ្នាតវ៉ាសុំឱ្យអាជ្ញាធរខេត្តចេញសំណង ប៉ុន្តែអាជ្ញាធរខេត្តបញ្ជាក់ប្រាប់អាជីវករទៅវិញថា អាជ្ញាធរខេត្តមិនចេញសំណងឱ្យទេ ដោយសំអាងថា នៅលើដីទំនាស់ខាងលើនេះអាជ្ញាធរបានហាមឃាត់ជាច្រើនឆ្នាំមកហើយ ដោយឱ្យរង់ចាំការដោះស្រាយចប់រួចរាល់សិនទើបអាចដំណើរការឱ្យសាងសង់ ឬជួលឱ្យអាជីវករលក់ដូរជាធម្មតា។  |
| មន្ត្រីរដ្ឋបាលព្រៃឈើព្រមាន ប្តឹងទៅតុលាការខេត្តប្រឆាំង មន្ត្រីយោធាដឹកឈើគ្រញូង Posted: 07 Mar 2011 06:16 PM PST  ខេត្តសៀមរាប ៖ មន្ត្រីខណ្ឌរដ្ឋបាលព្រៃឈើសៀមរាប បានថ្លែងព្រមានមន្ត្រីយោធាមួយរូប ដែលយករថយន្តរបស់អង្គភាពទៅប្រព្រឹត្តបទល្មើសដឹកជញ្ជូនឈើគ្រញូងឱ្យចូលខ្លួនមកដោះស្រាយតាមការជូនដំណឹង បើពុំដូច្នោះទេ នឹងរៀបចំសំណុំរឿងប្តឹងទៅតុលាការដើម្បីចាត់ការទៅតាមច្បាប់ស្តីពីព្រៃឈើ។ ការថ្លែងព្រមានឱ្យមន្ត្រីយោធារូបនេះចូលខ្លួនមកដោះស្រាយនោះធ្វើឡើងកាលពីរសៀលថ្ងៃទី៦ មីនា ឆ្នាំ២០១១ បន្ទាប់ពីសមត្ថកិច្ចខណ្ឌរដ្ឋបាលព្រៃឈើបានចាប់ឃាត់រថយន្តមួយគ្រឿងរបស់មន្ត្រីយោធាម្នាក់ កាលពីវេលាម៉ោង៦និង១០នាទីព្រឹកថ្ងៃទី៥ មីនា ឆ្នាំ២០១១ នៅតាមបណ្តោយផ្លូវលេខ៦៧ ភូមិខ្នាររង្វាស់ ឃុំឃុនរាម ស្រុកបន្ទាយស្រី ខេត្តសៀមរាប ខណៈធ្វើសកម្មភាពដឹកឈើគ្រញូងខ្នាតធំៗចំនួន៤ដុំស្មើនឹងកន្លះម៉ែត្រគូប (ប្រាំផ្លាន) ចេញពីស្រុកអន្លង់វែង ខេត្តឧត្តរមានជ័យ ចូលមកខេត្តសៀមរាប ក៏ប៉ុន្តែម្ចាស់បានរត់គេចខ្លួនបាត់ ។ លោកម៉ែន វុទ្ធី មន្ត្រីខណ្ឌរដ្ឋបាលព្រៃឈើសៀមរាបដែលបានចុះទៅធ្វើកំណត់ហេតុ បង្ក្រាបរថយន្តនោះបាននិយាយថា រថយន្តដឹកឈើគ្រញូងនេះមានម៉ាកអ៊ីស៊ុយហ្ស៊ុយ ពាក់ស្លាកលេខ ខេមរភូមិន្ទ ០៧. ២-២១៧៥ ពណ៌ត្រេអុី ។ ក្រោយពីធ្វើការរឹបអូស បានរកឃើញអត្តសញ្ញាណប័ណ្ណប្រជាជនមួយសន្លឹក អត្តសញ្ញាប័ណ្ណកងយោធពលខេមរភូមិន្ទមួយសន្លឹក និងលិខិតអនុញ្ញាតប្រើប្រាស់អាវុធមួយសន្លឹក ។ លោកម៉ែន វុទ្ធី បានថ្លែងឱ្យដឹងថា ទាក់ទិនទៅនឹងករណីបង្ក្រាបរថយន្តយោធាដឹកឈើគ្រញូងនេះខណ្ឌរដ្ឋបាលព្រៃឈើកំពុងតែបន្តអនុវត្តទៅតាមនីតិវិធី ដោយយើងបានចេញសេចក្តីជូនដំណឹងទៅឱ្យមន្ត្រីយោធាម្នាក់ដែលរត់គេចខ្លួននោះចូលមកដោះស្រាយ បើពុំដូច្នេះទេ យើងនឹងរៀបចំសំណុំបែបបទប្តឹងទៅតុលាការដើម្បីផ្តន្ទាទោសតាមច្បាប់ស្តីពីព្រៃឈើ ។ សូមរំឮកថា កាលពីដើមឆ្នាំ២០១០កន្លងទៅ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោហ៊ុន សែន បានធ្វើការព្រមានដល់កងកម្លាំងប្រដាប់អាវុធទាំងអស់ ជាពិសេសកងទ័ពឱ្យដកខ្លួនចេញពីការរកស៊ីឈើប្រណីតល្មើសច្បាប់។ សម្ដេចបានព្រមានថា នឹងមិនអត់ឱនឱ្យមន្ដ្រីយោធាណាក៏ដោយដែលមានការពាក់ព័ន្ធនឹងបទល្មើសព្រៃឈើ បើទាះជាអ្នកនោះមានឋានន្តរស័ក្តិត្រឹមណាក៏ដោយ។ គួរបញ្ជាក់ផងដែរថា កាលពីថ្ងៃទី២៨ កុម្ភៈ ឆ្នាំ២០១១ កន្លងទៅ សមត្ថកិច្ចរដ្ឋបាលព្រៃឈើ សៀមរាបក៏បានបង្ក្រាបរថយន្ដហ្សេអឹមសេ ពណ៌ត្រេអ៊ូ មួយគ្រឿង ដឹកឈើគ្រញូងចំនួនជាង៤ម៉ែត្រគូបពីស្រុកអន្លង់វែង ខេត្ដឧត្ដរមានជ័យដែរ។ កាលនោះមន្ដ្រីយោធាមួយរូបដែលជាអ្នកបើកបររថយន្ដត្រូវបានចាប់ខ្លួនបញ្ជូនទៅតុលាកាដើម្បីធ្វើការចោទប្រកាន់ ហើយពេលនេះស្ថិតនៅក្នុងការឃុំខ្លួននៅឡើយ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
