VOA News: ព័ត៌មាន: “ចៅក្រមមិនឆ្លើយតបនឹងការព្រួយបារម្ភអំពីរឿងក្តី០០៤” plus 3 more |
- ចៅក្រមមិនឆ្លើយតបនឹងការព្រួយបារម្ភអំពីរឿងក្តី០០៤
- សហជីពកម្មករផ្តល់អនុសាសន៍ដល់សេចក្តីព្រាងច្បាប់សហជីព
- ក្រសួងអប់រំមិនបញ្ជូនសិស្សពូកែទៅប្រឡងនៅបរទេស
- សហគមន៍មូលដ្ឋាននៅមិនមានជំនឿលើផែនការស្រោចស្រង់គម្របព្រៃឈើ
| ចៅក្រមមិនឆ្លើយតបនឹងការព្រួយបារម្ភអំពីរឿងក្តី០០៤ Posted: 13 Jul 2011 12:40 PM PDT សហចៅក្រមស៊ើបអង្កេតនឹងមិនឆ្លើយតបនឹងលិខិតចំហរបស់ក្រុមជនរងគ្រោះពីការលើកទំនប់បឹងត្រពាំងថ្ម ខេត្តបន្ទាយមានជ័យទេ។ លិខិតចំហបង្ហាញពីការព្រួយបារម្ភអំពីសំណុំរឿង០០៤ដ៏ចម្រូងចម្រាស់។ ក៏ប៉ុន្ដែ សាលាក្តីខ្មែរក្រហមឲ្យដឹងថា សហចៅក្រមស៊ើបអង្កេតនៅតែបន្ដស៊ើបអង្កេតសំណុំរឿងនេះនៅឡើយ។ កាលពីថ្ងៃទី២៩ មិថុនា ប្រជាពលរដ្ឋចំនួនប្រាំរូបដែលអះអាងថា ខ្លួនតំណាងឲ្យជនរងគ្រោះដោយរបបខ្មែរក្រហមចំនួន៥៥០គ្រួសារ ក្នុងឃុំជីក ឃុំប៉ាយចា និងឃុំភ្នំជីក ស្រុកភ្នំស្រុក ខេត្តបន្ទាយមានជ័យ បានផ្ញើលិខិតចំហមួយច្បាប់ជូនសហចៅក្រមស៊ើបអង្កេតលោកយូ ប៊ុនឡេង និងលោកស៊ីកហ្វ្រ៊ីក ប៊្លុង ដោយស្នើឲ្យសហចៅក្រមស៊ើបអង្កេតជំរុញការងាររបស់ខ្លួនលើសំណុំរឿង០០៤ ប្រកបទៅដោយឯករាជ្យភាព។ ក្រុមប្រជាពលរដ្ឋអះអាងថា ខ្លួនគឺជាជនរងគ្រោះនៅក្នុងការលើកទំនប់អាងត្រពាំងថ្មដែលនៅទីនោះមានប្រជាពលរដ្ឋយ៉ាងតិចចំនួន៣២.០០០នាក់ត្រូវពួកខ្មែរក្រហមកេណ្ឌយកទៅធ្វើការដោយបង្ខំក្នុងចន្លោះឆ្នាំ១៩៧៧ និងឆ្នាំ១៩៧៩។ មនុស្សជាច្រើនពាន់នាក់បានស្លាប់ និងត្រូវបានសម្លាប់នៅទីនោះ។ ក្រុមប្រជាពលរដ្ឋបានសរសេរនៅក្នុងលិខិតចំហថា ពួកគេព្រួយបារម្ភថា សំណុំរឿង០០៤ ដែលគ្របដណ្ដប់វិសាលភាពលើតំបន់អាងត្រពាំងថ្មនេះត្រូវទាត់ចោល។ ពួកគេបានស្នើសុំតាំងខ្លួនជាដើមបណ្ដឹងរដ្ឋប្បវេណីនៅក្នុងសំណុំរឿងនេះ។ សារអេឡិចត្រូនិចពីការិយាល័យសហចៅក្រមស៊ើបអង្កេតដែលវីអូអេខ្មែរទទួលបាននៅថ្ងៃនេះបញ្ជាក់ថា សហចៅក្រមស៊ើបអង្កេតនឹងមិនឆ្លើយតបលិខិតចំហបែបនេះទេដោយហេតុថា ការស៊ើបអង្កេតគឺជាការសម្ងាត់ ហើយសហចៅក្រមស៊ើបអង្កេតកំពុងតែស៊ើបអង្កេត។ ឧក្រិដ្ឋកម្មដែលក្រុមប្រជាពលរដ្ឋបានលើកឡើងក្នុងលិខិតចំហទាក់ទងនឹងសំណុំរឿង០០៤នោះ គឺជាផ្នែកមួយរបស់សំណុំរឿង០០២ដែលកំពុងរង់ចាំការបើកសវនាការ។ លោកហុង គឹមសួន ដែលជាមេធាវីតំណាងដើមបណ្ដឹងរដ្ឋប្បវេណីចំនួនប្រាំមួយរូបក្នុងសំណុំរឿង០០៣ និង០០៤ និងដែលបានជួយសម្រួលលិខិតចំហនេះទៅកាន់ការិយាល័យសហចៅក្រមស៊ើបអង្កេតមានប្រសាសន៍ថា រូបលោកនិងក្រុមប្រជាពលរដ្ឋម្ចាស់លិខិតចំហនឹងរង់ចាំតាមដានការវិវត្តន៍នៃសំណុំរឿង០០៤នេះតទៅទៀត។ លោកថ្លែងដូច្នេះថា៖ «យើងជូនព័ត៌មានតាមការកង្វល់របស់ប្រជាពលរដ្ឋដែលគាត់ឮថា តុលាការនេះនឹងច្រានចោលករណី០០៤ ទើបគាត់ធ្វើលិខិតចំហដើម្បីឲ្យដឹងថា ពួកគាត់មានកង្វល់ គាត់ចង់ចូលរួមបន្ដក្នុងករណី០០៤ នេះ។ ប្រជាពលរដ្ឋក៏គាត់ចាំមើលដែរថា ប្រសិនបើមិនមានការបោះបង់ ឬក៏ច្រានចោលករណី០០៤ទេ ពួកគាត់នឹងត្រៀមខ្លួនចាំចូលរួមក្នុងនាមជាដើមបណ្ដឹងរដ្ឋប្បវេណី ឬជាសាក្សី»។ សាលាក្តីខ្មែរក្រហមបានបញ្ចប់ការកាត់ក្ដីសំណុំរឿង០០១ កាលពីខែមិនា ឆ្នាំ២០១១នេះនៅអង្គជំនុំជម្រះតុលាការកំពូលដោយរង់ចាំតែការប្រកាសសាលដីការតែប៉ុណ្ណោះ។ សំណុំរឿង០០២ដែលមានមេដឹកនាំកំពូលខ្មែរក្រហមចំនួនបួននាក់គ្រោងនឹងបើកសវនាការពេញអង្គសេចក្ដីនៅខែកញ្ញាឆ្នាំនេះ។ ក្រុមអ្នកតាមឃ្លាំមើលសាលាក្ដីខ្មែរក្រហមបានបន្ទោសថា ការស៊ើបអង្កេតឬក៏ព័ត៌មានស្ដីពីសំណុំរឿង០០៣ និង០០៤ បានស្ថិតនៅក្នុងភាពសម្ងាត់ជាខ្លាំង ហើយជនរងគ្រោះមិនអាចទទួលព័ត៌មានជាដុំកំភួន និងជាក់លាក់សម្រាប់ចូលរួមនៅក្នុងដំណើរការរឿងក្ដីនេះទេ។ កាលពីពាក់កណ្ដាលខែមិថុនា សហព្រះរាជអាជ្ញាបរទេស លោក អ៊ែនឌ្រូ ខេលី បានស្នើឲ្យសហចៅក្រមស៊ើបអង្កេតបន្ថែមការស៊ើបអង្កេតរបស់ខ្លួនលើសំណុំរឿង០០៤ ទាក់ទងទៅនឹងឧក្រិដ្ឋកម្មដែលត្រូវបានប្រព្រឹត្តលើជនជាតិខ្មែរកម្ពុជាក្រោមនៅក្នុងខេត្តតាកែវ និងនៅក្នុងខេត្តពោធិ៍សាត់៕ This posting includes an audio/video/photo media file: Download Now |
| សហជីពកម្មករផ្តល់អនុសាសន៍ដល់សេចក្តីព្រាងច្បាប់សហជីព Posted: 13 Jul 2011 02:56 PM PDT មេដឹកនាំសហជីពនៅថ្ងៃពុធនេះបានផ្តល់អនុសាសន៍ដល់រដ្ឋាភិបាលឱ្យលុបចោល និងកែសម្រួលមាត្រារឹតបន្តឹងសិទ្ធិសេរីភាពសហជីពមួយចំនួននៅក្នុងច្បាប់សហជីពថ្មីមួយដ៏ចម្រូងចម្រាស់។ ពួកគេព្រមានធ្វើមហាបាតុកម្ម បើអនុសាសន៍ទាំងនោះត្រូវបានបដិសេធ។ សហជីពបានទាមទារឱ្យមានការលុបចោលមាត្រាចំនួន១២ និងកែសម្រួលមាត្រាយ៉ាងតិច៣៥នៃសេចក្តីព្រាងច្បាប់ដែលមានមាត្រាសរុបចំនួន៩១ ដើម្បីជៀសវាងការរឹតបន្តឹងសិទ្ធិសេរីភាពសហជីព ការរំលាយសហជីព ការដាក់ទណ្ឌកម្មមេដឹកនាំសហជីព ការធ្វើរបាយការណ៍ហិរញ្ញវត្ថុ និងរបាយការណ៍សកម្មភាពជូនក្រសួងការងារ និងមាត្រាមួយចំនួនដែលតម្រូវឱ្យសហជីពបំពេញលក្ខណៈសម្បត្តិ។ មេដឹកនាំសហជីពចំនួនប្រាំពីររូបបានបញ្ជាក់នៅក្នុងសេចក្តីថ្លែងការណ៍រួមថាបើអនុសាសន៍របស់សហជីពមិនត្រូវបានដាក់បញ្ចូលទៅក្នុងសេចក្តីព្រាងច្បាប់សហជីពនេះទេ សហជីពនឹងមិនគាំទ្រ និងមិនចុះហត្ថលេខាលើសេចក្តីព្រាងច្បាប់នេះទេ ហើយធ្វើយុទ្ធនាការតស៊ូមតិទាំងថ្នាក់ជាតិ និងអន្តរជាតិ ដើម្បីឱ្យមានការគាំទ្រចំពោះកិច្ចខំប្រឹងប្រែងរបស់សហជីព។ សហព័ន្ធសហជីពនៅកម្ពុជាមានចំនួនជាង៤០។ លោក អាត់ ធន់ ប្រធានសម្ព័ន្ធសហជីពស៊ីខៅឌូ បានថ្លែងថា រដ្ឋាភិបាលនឹងមិនបោះបង់ចោលអនុសាសន៍នានាដែលត្រូវបានលើកឡើងរបស់សហជីពនោះទេ។ លោកបានប្រាប់វីអូអេខ្មែរថា៖ «សហជីពកម្មករដែលការពារសិទ្ធិកម្មករ នឹងធ្លាក់ចុះ ឈានទៅដល់ការគ្មានសហជីពដែលការពារសិទ្ធិកម្មករទៀត បើរដ្ឋាភិបាលមិនដាក់បញ្ចូលអនុសាសន៍របស់សហជីពនៅក្នុងសេចក្តីព្រាងច្បាប់នោះ»។ លោករ៉ុង ឈុន ប្រធានសហព័ន្ធសហជីពកម្ពុជា បានថ្លែងថា សេចក្តីព្រាងច្បាប់នេះនឹងធ្វើឱ្យសហជីពខ្សោយ ហើយមេដឹកនាំសហជីពនឹងត្រូវបានបំបិទមាត់ និងប្រឈមនឹងការជាប់ពន្ធនាគារ។ លោក ឈុន ថ្លែងថា៖ «ច្បាប់នេះត្រូវធានាសិទ្ធិសេរីភាពរបស់សហជីព។ យើងមិនមែនបង្កើតច្បាប់មួយលេងសើចមកដាក់បន្ទុកលើអ្នករៀបចំសហជីព និងសិទ្ធិសេរីភាពរបស់សហជីពនោះទេ។ នេះជាគោលបំណងសហជីពចង់បាន។ ជីវិតស្ថាប័នសហជីពផុយស្រួយ និងងាយនឹងលុបបំបាត់ បើភាគីនិយោជក ឬភាគីក្រសួងពាក់ព័ន្ធណាមួយមិនសប្បាយចិត្ត។ ច្បាប់នេះ ធាតុពិតរឹតបន្តឹងសិទ្ធិសេរីភាពរបស់សហជីពមែន»។ លោកហាំង ស៊ីថា សមាជិកគណៈកម្មការតាក់តែងសេចក្តីព្រាងច្បាប់សហជីពនេះ បានបញ្ជាក់ក្នុងការពិគ្រោះយោបល់ថា៖ «សេចក្តីព្រាង ច្បាប់នេះមិនបានធ្វើឱ្យសហជីពខ្សោយនោះទេ ប៉ុន្តែវាជាឧបករណ៍ណែនាំតម្រង់ទិសដល់សហជីព ហើយសេចក្តីព្រាងច្បាប់នេះមិនមែនតំណាងឱ្យផលប្រយោជន៍បុគ្គលណាមួយទេ»។ លោក អ៊ុំ មាន រដ្ឋលេខាធិការក្រសួងការងារបានថ្លែងនៅក្នុងពិធីបិទសិក្ខាសាលាពិគ្រោះយោបល់ត្រីភាគីលើសេចក្តីព្រាងច្បាប់ស្តីពីសហជីពយ៉ាងដូច្នេះថា៖ «ក្រសួងសូមទទួលយកការចូលរួមមតិដ៏ឧត្តុងឧត្តមរបស់ឯកឧត្តម លោកជំទាវ អស់លោក លោកស្រី ដើម្បីទុកជាធាតុចូលក្នុងការពិនិត្យរៀបចំកែសម្រួលសេចក្តីព្រាងច្បាប់ស្តីពីសហជីពនៃសហគ្រាស គ្រឹះស្ថាន ហើយបន្ទាប់ពីការកែសម្រួលរួច ក្រសួងនឹងបញ្ជូនសេចក្តីព្រាងច្បាប់នេះទៅទីស្តីការគណៈរដ្ឋមន្ត្រី ដើម្បីពិនិត្យឆ្លងបន្ត»។ លោក វង សូត រដ្ឋមន្ត្រីក្រសួងការងារ បានថ្លែងកាលពីថ្ងៃអង្គារថា ក្រសួងការងារនឹងមិនលម្អៀងទៅរកភាគីណាមួយឡើយ ប៉ុន្តែទោះយ៉ាងនេះក្តី ក៏ច្បាប់នេះពុំអាចបំពេញចិត្តទៅតាមអ្វីដែលភាគីពាក់ព័ន្ធស្នើឡើងបានមួយរយភាគដែរ៕ This posting includes an audio/video/photo media file: Download Now |
| ក្រសួងអប់រំមិនបញ្ជូនសិស្សពូកែទៅប្រឡងនៅបរទេស Posted: 13 Jul 2011 02:41 PM PDT បន្ទាប់ពីមិនបានបញ្ជូនសិស្សពូកែផ្នែកគណិតវិទ្យាទៅចូលរួមប្រកួតនៅប្រទេសហូឡង់ ក្រសួងអប់រំត្រូវបានរកឃើញថា មិនបានបញ្ជូនសិស្សពូកែទៅប្រកួតនៅបរទេសចំនួន១១នាក់ហើយដែលក្នុងនោះរួមមានសិស្សពូកែផ្នែកគណិតវិទ្យានិងរូបវិទ្យា។ នេះបើតាមការបញ្ជាក់របស់គ្រូបង្រៀនមួយរូបដែលស្នើសុំមិនបញ្ចេញឈ្មោះ។ លោកគ្រូម្នាក់នេះបញ្ជាក់ប្រាប់វីអូអេខ្មែរថា៖ «កាលពីខែមុនមានការប្រឡងរូបវិទ្យា ដែលត្រូវទៅប្រឡងនៅប្រទេសអ៊ីស្រាអែល។ គេអត់បានបញ្ជូនទៅ»។ សិស្សពូកែផ្នែករូបវិទ្យាចំនួន៥នាក់បើតាមគម្រោងនឹងត្រូវបញ្ជូនទៅប្រឡងនៅអ៊ីស្រាអែលកាលពីដើមខែមិថុនា កន្លទៅនេះក៏ប៉ុន្តែបានខកខានទៅវិញ។ ក្រសូងអប់រំបានជូនដំណឹងប្រទេសហូឡង់កាលពីពេលថ្មីៗនេះថា ខ្លួនមិនបានបញ្ជូនសិស្សទៅចូលរួមប្រឡងគណិតវិទ្យាទេ តែក៏មិនបានបញ្ជាក់ពីហេតុផលច្បាស់លាស់ដែរ។ ហូឡង់គ្រោងនឹងរៀបចំការប្រឡងប្រជែងសិស្សពូកែគណិតវិទ្យាជាលក្ខណៈអន្តរជាតិនៅថ្ងៃទី២៨ ខែកក្កដា ឆ្នាំ២០១១ នេះដោយមានសិស្សចំនួន១០០ប្រទេសចូលរួម ដែលក្នុងនោះមានកម្ពុជាផងដែរ។ ការប្រកាសលុបចោលនេះបានធ្វើឲ្យសិស្សដែលបានរៀនត្រៀមខកចិត្ត និងបានរិះគន់ក្រសួងអប់រំថា មិនបានយកចិត្តទុកដាក់ក្នុងការផ្តល់ឱកាសឲ្យពួកគេបង្ហាញសមត្ថភាពនៅលើឆាកអន្តរជាតិ។ រហូតមកដល់ថ្ងៃពុធនេះ មិនមានការបញ្ជាក់ណាមួយពីក្រសួងអប់រំអំពីមូលហេតុនៃការមិនបញ្ជូនសិស្សពូកែទៅប្រឡងនៅបរទេសនៅឡើយទេ។ លោក អ៊ឹម សិទ្ឋី រដ្ឋមន្ត្រីក្រសួងអប់រំមិនអត្ថាធិប្បាយទេ ដោយលោកបានបញ្ជាក់ថា លោកកំពុងជាប់រវល់ប្រជុំ។ «ជាប់ប្រជុំ។ យើងធ្វើការងារ។ មកសម្ភាសន៍ស្អី»។ ខណៈដែលក្រសួងអប់រំមិនបានបញ្ជូនសិស្សទៅប្រឡងសិស្សពូកែនៅបរទេសនោះ មន្ត្រីរបស់ក្រសួងមួយចំនួនត្រូវបានចោទប្រកាន់ថា មិនបានផ្តល់ប្រាក់ឧបត្ថម្ភដល់សិស្សផ្នែកគណិតវិទ្យាចំនួនប្រាំមួយរូបដែលបានមករៀនបំប៉នបន្ថែមនៅក្នុងរដ្ឋធានីភ្នំពេញចាប់ពីដើមខែមករារហូតដល់ចុងខែមិថុនា។ លោកគ្រូបង្រៀនមួយរូបដែលស្នើមិនបញ្ចេញឈ្មោះបានបញ្ជាប់ថា សម្រាប់សិស្សដែលត្រូវមករៀនបំប៉នបន្ថែមនឹងត្រូវបានប្រាក់ឧបត្ថមចំនួន២០ដុល្លារក្នុងមួយថ្ងៃសម្រាប់ម្នាក់ៗ។ ក៏ប៉ុន្តែមន្រ្តីរបស់ក្រសួងអប់រំបានផ្តល់ប្រាក់សម្រាប់តែថ្លៃបាយបីពេលតែប៉ណ្ណោះ។ លោកគ្រូបានបន្ថែមថា បើគិតចំនួនសិស្សប្រាំមួយនាក់ក្នុងរយៈពេលប្រាំមួយខែ សិស្សទាំងនោះត្រូវបាត់បង់ប្រាក់ចំនួនជាង២០.០០០ដុល្លារអាមេរិក។ លោកគ្រូបានប្រាប់វីអូអេថា៖ «នៅក្នុងស្រុក នៅពេលដែលគេឲ្យសិស្សមកបំប៉ននៅភ្នំពេញ ខ្ញុំលួចសួរគេទើបដឹងថា គេបានចុះហត្ថលេខាពីរតនាគារជាតិម្នាក់បាន២០ដុល្លារជារៀងរាល់ថ្ងៃ។ ប៉ុន្តែអ្វីដែលយើងទទួលបានសិស្សម្នាក់ទទួលបានមួយថ្ងៃបាយបីពេល ហើយការធ្វើដំណើរទៅបំប៉ននៅសាកលវិទ្យាល័យភូមិន្ទភ្នំពេញហ្នឹង គេចូលលុយគ្នាជិះទុកៗ»។ លោកគ្រូដែលសុំមិនបញ្ចេញឈ្មោះ ដោយហេតុផលសន្តិសុខនោះបានបញ្ជាក់ថា មិនដឹងប្រាក់ឧបត្ថម្ភទាំងអស់នោះ ក្រសួងអប់រំមិនផ្តល់ឲ្យ ឬក៏ខាងរតនាគារមិនទាន់បញ្ជូនឲ្យ។ ប៉ុន្តែលោក កែ ប៊ុនឡេង ប្រធានរតនាគាក្រុងភ្នំពេញបានបញ្ជាក់ថា លោកបានចុះហត្ថលេខាបញ្ជូនចេញរួចរាល់ហើយរាល់ប្រាក់ឧបត្ថម្ភផ្សេងៗរបស់ក្រសួងអប់រំ។ លោកបញ្ជាក់ថា៖ «បញ្ហារឿងលុយ ពេលមកដល់ ខ្ញុំជូនហើយ។ ខ្ញុំមកនៅនេះ១១ឆ្នាំហើយ។ ខ្ញុំមិនដឹងគៀងគរយកលុយហ្នឹងទៅទុកធ្វើអ្វី។ អត់ទេ។ រឿងប្រាក់ខែ រឿងប្រាក់ម៉ោង រឿងប្រាក់ឧបត្ថម្ភទៅរៀននេះគេហៅថាប្រាក់អាហារូបករណ៍របស់និស្សិត។ អញ្ចឹងទេអត់ទេ។ អត់មានលុយអញ្ចឹង អាចថាទើនៅនឹងក្រសួងក៏មិនដឹង»។ លោកប៊ុនឡេងបានបញ្ជាក់ទៀតថា លោកមិនដែលធ្វើឲ្យរាំងស្ទះដល់ប្រាក់ដែលត្រូវបញ្ជូនចេញនោះទេ៕ This posting includes an audio/video/photo media file: Download Now |
| សហគមន៍មូលដ្ឋាននៅមិនមានជំនឿលើផែនការស្រោចស្រង់គម្របព្រៃឈើ Posted: 13 Jul 2011 11:34 AM PDT នៅពេលដែលមានរបាយការណ៍ស្តីពីការកាប់បំផ្លាញព្រៃឈើយ៉ាងរង្គាលតាមរយៈស្របច្បាប់និងខុសច្បាប់ ហើយរដ្ឋាភិបាលកម្ពុជាទោះបីជាខ្លួនមិនបានទទួលស្គាល់ការចោទប្រកាន់នេះក៏ដោយ ក៏បានបង្ហាញការប្រឹងប្រែងរបស់ខ្លួនតាមរយៈការដាក់ចេញនូវគោលនយោបាយមួយដើម្បីស្រោចស្រង់គម្របព្រៃឈើឡើងវិញ។ គោលនយោបាយនេះ ដែលជាកម្មវិធីព្រៃឈើជាតិសម្រាប់រយៈពេល២០ឆ្នាំដោយគិតចាប់ពីឆ្នាំ២០១០ទៅ។ គោលនយោបាយដែលមានចំនួន១៦៤ទំព័រដែល វីអូអេ សំឡេងសហរដ្ឋអាមេរិក បានទទួលបានលើកឡើងនូវយុទ្ធសាស្រ្តជាច្រើនសម្រាប់ការគ្រប់គ្រងព្រៃឈើឱ្យមាននិរន្តរភាព ដែលរួមមានអភិបាលកិច្ចល្អលើវិស័យព្រៃឈើ ការរៀបចំផែនការការប្រើប្រាស់ដីធ្លី ការការពារបរិស្ថាននិងអភិរក្សធនធានព្រៃឈើ ជម្រើសរបបគ្រប់គ្រងព្រៃឈើនិងយុទ្ធសាស្រ្តផ្សេងៗទៀត។ <!--IMAGE-->លោក ថន សារ៉ាត់ អនុប្រធាននាយកដ្ឋានរដ្ឋបាល ផែនការ និង ហិរញ្ញវត្ថុរបស់រដ្ឋបាលព្រៃឈើបាននិយាយថាយើងមានកម្មវិធីជាតិចំនួន៦ ដើម្បីកែទម្រង់វិស័យព្រៃឈើ។ លោកបានបញ្ជាក់ថា កម្មវិធីទាំងនោះរួមមាន៖ កំណត់ព្រំប្រទល់ព្រៃឈើ ចំណាត់ថ្នាក់និងចុះបញ្ជិកា អភិរក្សធនធានព្រៃឈើនិងជីវចម្រុះ ការអនុវត្តច្បាប់និងអភិបាលកិច្ច សហគមន៍ព្រៃឈើ អភិវឌ្ឍសមត្ថភាព និងថវិកាដែលបានមកពីព្រៃឈើយកទៅថែរក្សាព្រៃឈើវិញ។ «យើងបានគិតគូរថាប្រសិនជាកម្មវិធីព្រៃឈើជាតិប្រមូលចំណូលចូលថវិកាជាតិ ថវិកាជាតិនឹងផ្ដល់និរន្តរភាពថវិកាចំណាយ ដើម្បីបម្រើគម្រោងតាមបែបបទបច្ចេកទេស និងគណនេយ្យត្រឹមត្រូវនិងតម្លាភាព។ យកប្រាក់ដែលបានមកពីការគ្រប់គ្រងព្រៃឈើយកទៅប្រើប្រាស់ ដើម្បីថែរក្សាព្រៃឈើនិងបង់ចំណូលចូលថវិកាជាតិនិងបើកជាបៀវត្សរ៍ពេញលេញជូនមន្ត្រីរាជការ»។ ព្រៃឈើរបស់ប្រទេសកម្ពុជាបានគ្របដណ្តប់លើផ្ទៃដីប្រមាណជា៧០%រហូតត្រឹមទសវត្សរ៍ទី៦០។ ក៏ប៉ុន្ដែលោក ឈុត វុទ្ធី នាយកអង្គការការពារធនធានធម្មជាតិបានអះអាងថាព្រៃឈើកម្ពុជានៅសល់ប្រមាណពី៣០%ទៅ៤០%តែប៉ុណ្ណោះ។ លោកបានទស្សន៍ទាយថា ក្នុងរយៈពេលចុងឆ្នាំ២០១១នេះ ឈើប្រណិតៗនឹងត្រូវហិនហោចខ្ទេចខ្ទីអស់ប្រសិនបើពុំមានវិធានការទប់ស្កាត់។ ឈើប្រណិតៗដូចជាក្រញូង បេង នាងនួន ជាដើមកំពុងទទួលរងការកាប់បំផ្លាញយ៉ាងខ្លាំងក្លារយៈពេលប៉ុន្មានឆ្នាំចុងក្រោយនេះ ហើយដែលគេភ្ជាប់ការកាប់បំផ្លាញនេះមួយផ្នែកទៅនឹងអរិភាពព្រំដែនរវាងប្រទេសកម្ពុជានិងប្រទេសថៃ។ ប្រទេសចិន និងប្រទេសវៀតណាមគឺជាទីផ្សារយ៉ាងសំខាន់ដែលកំពុងស្រូបយកផលិតផលព្រៃឈើពីកម្ពុជា។ កម្មវិធីព្រៃឈើថ្នាក់ជាតិដដែលបន្ថែមថា ប្រទេសកម្ពុជាបានទទួលជោគជ័យគួរឲ្យកត់សម្គាល់ក្នុងការថែរក្សាធនធានព្រៃឈើដែលគ្របដណ្តប់ជាង៥៩ភាគរយស្មើនឹងជាង១០,៨លានហិកតានៃផ្ទៃប្រទេស។ ការតវ៉ាពីការកាប់បំផ្លាញព្រៃឈើត្រូវបានលេចឮជាប្រចាំក្នុងប្រទេសកម្ពុជាដើម្បីឆ្លើយតបទៅនឹងការរិះគន់លើការកាប់បំផ្លាញព្រៃឈើរបស់អង្គការឃ្លាំមើលបរិស្ថានរបស់ប្រទេសអង់គ្លេស Global Witness រាជរដ្ឋាភិបាលកម្ពុជា បានបណ្ដេញអង្គការនេះចេញពីទឹកដីរបស់ខ្លួន។ អង្គការនេះ ដែលបានសរសេររបាយការណ៍មួយស្ដីពី ការកាប់បំផ្លាញព្រៃឈើយ៉ាងបង្ហិនបង្ហោចក្នុងប្រទេសកម្ពុជាក្រោមចំណងជើងថា Family's Tree ឬហៅ ជាភាសាខ្មែរថា «សែស្រឡាយលក់ជាតិ»។ របាយការណ៍នោះបានបង្ហាញពីសមាជិកក្រុមគ្រួសារលោកនាយករដ្ឋមន្ដ្រីហ៊ុន សែន ដែលប្រឡូកប្រឡាក់ក្នុងការកាប់បំផ្លាញព្រៃឈើមានតម្លៃនៅកម្ពុជា។ ក្នុងរយៈពេលចុងក្រោយនេះ សហគមន៍ព្រៃឈើបានព្យាយាមធ្វើការតវ៉ាចំពោះការកាប់បំផ្លាញព្រៃឡង់ដែលជាព្រៃឈើដ៏ធំលាតសន្ធឹងពីខេត្តព្រះវិហារ កំពង់ធំ ខេត្តក្រចេះ និងខេត្តស្ទឹងត្រែង ក៏ប៉ុន្ដែ នៅតែពុំមានការដោះស្រាយពីក្រុមអាជ្ញាធរនោះទេ។ យ៉ាងណាក៏ដោយនៅក្នុងឯកសារនៃកម្មវិធីព្រៃឈើជាតិបានបង្ហាញពីការប្រឈមជាច្រើនក្នុងការការពារព្រៃឈើភាគច្រើននៃប្រជាជននៅជនបទពឹងផ្អែកលើការចូលព្រៃរុករកអនុផលព្រៃឈើ។ ជាពិសេស សម្រាប់អាហារ ថាមពល អុស កូនឈើតូចៗ និងសសរ ប្រមូលជ័រ ឃ្វាលគោ ក្របី ប្រមូលរុក្ខជាតិថ្នាំ បុរាណ និងមានជំនឿអារក្សអ្នកតាជាដើម។ ថ្វីបើយ៉ាងនេះក្ដី វិធានការរបស់រដ្ឋាភិបាលក្នុងការស្តារព្រៃឈើឡើងវិញត្រូវបានប្រជាពលរដ្ឋក្នុងសហគមន៍ព្រៃឈើនិងមន្ត្រីអង្គការឃ្លាំមើលការរំលោភបរិស្ថានមិនមានជំនឿទៅលើកម្មវិធីព្រៃឈើជាតិនេះ។ លោកស្វាយ ភឿន អាយុ៥០ឆ្នាំរស់នៅភូមិបាលហាល ឃុំរីករាយ ស្រុករវៀង ខេត្តព្រះវិហារមិនបានសម្តែងការគាំទ្រទៅនឹងកម្មវិធីការពារព្រៃឈើរបស់រដ្ឋាភិបាលទេ លោកលើកឡើងថា ព្រៃឡង់ក្នុងខេត្តរបស់លោកកំពុងរងការបំផ្លាញរបស់ក្រុមហ៊ុនឯកជនចំនួនពីរ គឺក្រុមហ៊ុន CRCK និងក្រុមហ៊ុន PNT។ ក្រុមហ៊ុនទាំងពីរនេះ បានទទួលអាជ្ញាប័ណ្ណដីសម្បទានសេដ្ឋកិច្ចពីរដ្ឋាភិបាលនៅតំបន់ព្រៃឡង់កាលពីឆ្នាំ២០០៩នៅលើផ្ទៃដី៤៥០.០០០ហិកតានៅក្នុងខេត្តចំនួនបួនគឺខេត្តកំពង់ធំ ព្រះវិហារ ក្រចេះ និង ខេត្តស្ទឹងត្រែង។ ក៏ប៉ុន្តែក្រុមហ៊ុនមិនបានគោរពកិច្ចសន្យារបស់ខ្លួនទេ។ «ខ្ញុំមិនជំនឿទេ។ មិនជំនឿត្រង់ថារដ្ឋាភិបាលបានសម្រេចឱ្យទៅចម្ការឈើដាំផង។ ជាពិសេសពួកខ្ញុំជាសហគមន៍ហ្នឹងពួកខ្ញុំបដិសេធទាំស្រុងហើយបើរដ្ឋាភិបាលរាប់គិតទាំងចម្ការឈើដាំអញ្ចឹងនោះ»។ លោកជុំ យីម អាយុ២៦ឆ្នាំនៅភូមិស្រែវាលខាងកើតឃុំដងកាំបិទស្រុកសណ្តាន់ខេត្តកំពង់ធំបាននិយាយថា ចម្ការឈើដាំមិនដូចព្រៃធម្មជាតិទេ។ «តាមលក្ខណៈយើងមើលទៅ កាលណាយើដាំកូនឈើឡើងវិញវាអត់មានសត្វព្រៃ ផ្លែឈើ បន្លែ វាកើតពីប្រពៃណីពីបុរមដូនតា»។ លោក ឈុត វុទ្ធី បានបញ្ជាក់ថាការកែទម្រង់ព្រៃឈើឡើងវិញលុះត្រាតែអ្នកជំនាញពាក់ព័ន្ធទាំងអស់ស្រឡាញ់ធនធានធម្មជាតិតែបើពួកគេជាពាណិជ្ជករមិនអាចធ្វើទៅបានទេ។ «នៅប្រទេសយើងអ្នកធ្វើការរដ្ឋផងពាណិជ្ជករផង កន្លែងនេះហើយជាកំហុសឆ្គងមួយដែលយើងមិនបានត្រួតពិនិត្យ។ នៅប្រទេសជឿនលឿនឬក៏ប្រទេសផ្សេងអ្នកធ្វើការរដ្ឋអត់ធ្វើពាណិជ្ជករបានទេ»។ លោកឈុត វុទ្ធី បន្ថែមថា ក្រុមហ៊ុនដែលទទួលបានដីសម្បទានសេដ្ឋកិច្ចបានរួមចំណែកក្នុងការកាប់បំផ្លាញព្រៃឈើកម្ពុជាយ៉ាងរិចរិល។ ប្រទេសកម្ពុជាបច្ចុប្បន្នមានក្រុមហ៊ុនសម្បទានព្រៃឈើចំនួន៤៤ក្រុមហ៊ុន ដែលកំពុងដំណើរការបច្ចុប្បន្ននេះនៅក្នុងខេត្តកំពង់ធំ ព្រះវិហារ ក្រចេះ ស្ទឹងត្រែង កំពង់ឆ្នាំង កំពង់ស្ពឺ រតនៈគីរី និងមណ្ឌលគីរី ហើយក្រុមហ៊ុនសម្បទានដីសេដ្ឋកិច្ចមួយចំនួនទៀត ដូចជា ក្រុមហ៊ុនមកពី ប្រទេសចិននិងប្រទេសវៀតណាម បានទទួលសិទ្ធិវិនិយោគពង្រីកដីរាប់សែនហិកតាសម្រាប់ការអភិវឌ្ឍដំណាំកសិកម្មដូចជា ដំណាំកៅស៊ូជាដើម៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
