VOA News: ព័ត៌មាន: “ដើមបណ្តឹងនៅសាលាក្តីខ្មែរក្រហមបញ្ចេញឈ្មោះជនសង្ស័យបីនាក់ទៀត” plus 3 more |
- ដើមបណ្តឹងនៅសាលាក្តីខ្មែរក្រហមបញ្ចេញឈ្មោះជនសង្ស័យបីនាក់ទៀត
- រដ្ឋមន្ត្រីការពារជាតិទៅចិនដើម្បីពិភាក្សាការងារយោធា
- ពិព័រណ៌សិក្សានឹងជួយណែនាំនិស្សិតពីអាជីពការងារ
- ឧត្ដមសេនីយ៍ថៃអំពាវនាវឲ្យអ្នកគាំទ្ររាជាធិបតេយ្យទៅបោះឆ្នោត
| ដើមបណ្តឹងនៅសាលាក្តីខ្មែរក្រហមបញ្ចេញឈ្មោះជនសង្ស័យបីនាក់ទៀត Posted: 20 Jun 2011 09:57 AM PDT មេធាវីខ្មែរសញ្ជាតិអាមេរិកាំងម្នាក់ គឺកញ្ញាសេង ធារី បានទៅមុខមួយជំហានទៀតនៅថ្ងៃច័ន្ទនេះក្នុងការត្រៀមដាក់ពាក្យសុំតាំងខ្លួនជាដើមបណ្ដឹងរដ្ឋប្បវេណីសម្រាប់សំណុំរឿង០០៤ ដោយបានអំពាវនាវឲ្យជនរងគ្រោះក្នុងសម័យខ្មែរក្រហមដទៃផ្សេងទៀតចូលរួមដាក់ពាក្យស្នើសុំនេះដូចគ្នាឲ្យបានច្រើន។ នៅក្នុងលិខិតចំហមួយច្បាប់នៅថ្ងៃនេះ អតីតនាយិកាមជ្ឈមណ្ឌលអភិវឌ្ឍន៍សង្គម បច្ចុប្បន្នជានាយិកាសមាគមជនរងគ្រោះក្នុងរបបខ្មែរក្រហមនៅកម្ពុជា បានប្រកាសថា នាងនឹងដាក់ពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីក្នុងសំណុំរឿងចុងក្រោយនេះប្រឆាំងនឹងអតីតកម្មាភិបាលខ្មែរក្រហមចំនួនបីនាក់ដែលនាងបង្ហាញឈ្មោះចំៗជាថ្មីម្ដងទៀត។ ជនទាំងនោះរួមមានលោកស្រី អ៊ឹម ចែម តាទិត និងតា ថា។ កញ្ញា សេង ធារី បានសរសេរចោទប្រកាន់នៅក្នុងលិខិតចំហនោះថា ជនទាំងបីទទួលខុសត្រូវចំពោះការសម្លាប់រង្គាលប្រជាពលរដ្ឋកម្ពុជាចន្លោះពីឆ្នាំ១៩៧៥ ដល់ឆ្នាំ១៩៧៩ នៅតាមតំបន់ ដែលពួកគេកាន់កាប់អំណាច។ កញ្ញា សេង ធារី បានសរសេរក្នុងលិខិតនោះថា នាងស្នើឲ្យសហចៅក្រមស៊ើបអង្កេតធ្វើការស៊ើបអង្កេតអំពីពិរុទ្ធភាពរបស់ជនទាំងបីទាក់ទងទៅនឹងតំបន់ឧក្រិដ្ឋកម្មនៃមន្ទីរសន្ដិសុខវត្តធ្លក និងមន្ទីរសន្ដិសុខ បឹង រ៉ៃ ក្នុងខេត្តស្វាយរៀង ដែលនៅមន្ទីរសន្ដិសុខទាំងពីរមានជនរងគ្រោះចន្លោះពី២០.០០០ ទៅ៣០.០០០នាក់ត្រូវបានសម្លាប់។ អតីតអ្នកទោសកុមារនៅសម័យខ្មែរក្រហមរូបនេះ បានបង្ហាញនូវព័ត៌មានពិស្ដារបន្ថែមទៀតទាក់ទងទៅនឹងទីកន្លែងឧក្រិដ្ឋកម្មនៅភូមិភាគឧត្តរ ភូមិភាគនីរតី និងនៅភូមិភាគបូព៌ា។ កញ្ញាសេង ធារី អះអាងថា ជនជាប់សង្ស័យទាំងបីក្នុងសំណុំរឿងទី៤នេះ មានការជាប់ពាក់ព័ន្ធក្នុងឧក្រិដ្ឋកម្មនៅទីកន្លែងទាំងនោះ។ កញ្ញានាយិកាសមាគមជនរងគ្រោះក្នុងរបបខ្មែរក្រហមនៅកម្ពុជា បានដាក់ពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីសម្រាប់សំណុំរឿង០០៣កាលពីពេលថ្មីៗនេះ ក៏ប៉ុន្ដែនាងត្រូវសហចៅក្រមស៊ើបអង្កេតទាត់ចោលហើយនាងកំពុងតែប្ដឹងសារទុក្ខ។ សាលាក្ដីខ្មែរក្រហមគ្រោងនឹងបើកសវនាការបឋមសម្រាប់សំណុំរឿងទីពីររយៈពេលបួនថ្ងៃចាប់ពីថ្ងៃច័ន្ទសប្ដាហ៍ក្រោយនេះទៅ។ សំណុំរឿងដ៏មានសារៈសំខាន់បំផុតមួយនេះមានជនជាប់ចោទដែលកំពុងស្ថិតក្នុងការឃុំឃាំងបណ្ដោះអាសន្នចំនួនបួននាក់ គឺនួន ជា ខៀវ សំផន អៀង សារី និងអៀង ធីរិទ្ធ។ កញ្ញា សេង ធារី បានអំពាវនាវដល់ជនរងគ្រោះក្នុងសម័យខ្មែរក្រហមឲ្យយកឱកាសនេះបំពេញពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីសម្រាប់សំណុំរឿង ០០៣ និងសំណុំរឿង០០៤ឲ្យហើយ។ លោកឌឹម សុវណ្ណារុំ មន្ដ្រីទទួលបន្ទុកកិច្ចការសាធារណៈរបស់សាលាក្ដីខ្មែរក្រហមបានប្រតិកម្មទៅនឹងការបើកកកាយអត្តសញ្ញាណជនជាប់សង្ស័យក្នុងសំណុំរឿងទាំងពីចុងក្រោយថា ជាការរំលោភលើគោលការណ៍លក្ខការណ៍របស់តុលាការ។ ហើយលោកបានព្រមានថា កញ្ញាសេង ធារី ត្រូវតែទទួលការខុសត្រូវចំពោះផលវិបាកណាមួយដែលអាចកើតចេញពីសេចក្ដីថ្លែងការណ៍របស់នាង។ «រាល់ការណ៍ដែលយើងបង្ហាញអត្តសញ្ញាណរបស់ជនសង្ស័យនេះ គឺជាការរំលោភទៅលើគេហៅថាសច្ចធារណ៍នៃនិរទោស រហូតមកដល់ពេលបច្ចុប្បន្ននេះ ទាំងសំណុំរឿង០០៣ទាំងសំណុំរឿង០០៤ យើងទាំងអស់គ្នាដឹងថា មានជនសង្ស័យចំនួនប្រំារូប ក៏ប៉ុន្តែរហូតមកដល់ពេលនេះ សហចៅក្រមស៊ើបអង្កេតពុំដែលបានជម្រាបជូនពីឈ្មោះរបស់ជនសង្ស័យនោះឡើយ»។ ទោះជាយ៉ាងណា លោក ឡាត់ គី អ្នកសម្របសម្រួលកម្មវិធីសាលាក្ដីខ្មែរក្រហមរបស់អង្គការការពារសិទ្ធិមនុស្សអាដហុក យល់ថា កញ្ញាសេង ធារី ទំនងជាមិនគួរប្រឈមនឹងបញ្ហាអ្វីកើតឡើងពីសេចក្ដីថ្លែងក្នុងលិខិតចំហរបស់នាងឡើយ។ លោក ឡាត់ គី គាំទ្រការចេញលិខិតបែបនេះ។ «ខ្ញុំយល់ថា វាជាមធ្យោបាយមួយផងដែរ ដើម្បីជំរុញឲ្យតុលាការពិចារណាទៅលើសំណុំរឿងមួយនេះ»។ សូមបញ្ជាក់ថា រដ្ឋាភិបាលកម្ពុជាបានជំទាស់ជាខ្លាំងក្លាមិនចង់ឲ្យមានការចាត់ការលើសំណុំរឿង ០០៣ និង សំណុំរឿង ០០៤នេះទេ។ អង្គការសង្គមស៊ីវិលបានបង្ហាញជាចំហថា ខ្លួនមានកង្វល់ថា សាលាក្ដីខ្មែរក្រហមអាចនឹងបោះបង់សំណុំរឿងទាំងពីរដោយស្ងាត់កំបាំងបំផុត៕ This posting includes an audio/video/photo media file: Download Now |
| រដ្ឋមន្ត្រីការពារជាតិទៅចិនដើម្បីពិភាក្សាការងារយោធា Posted: 20 Jun 2011 11:47 AM PDT លោកឧបនាយករដ្ឋមន្រ្តីទៀ បាញ់ រដ្ឋមន្រ្តីក្រសួងការពារជាតិកម្ពុជានៅថ្ងៃច័ន្ទនេះ បានដឹកនាំគណៈប្រតិភូមួយក្រុមដើម្បីទៅបំពេញទស្សនកិច្ចនៅប្រទេសចិនចំនួនមួយសប្តាហ៍ក្នុងគោលបំណងដើម្បីពិភាក្សារវាងរដ្ឋមន្រ្តីនៃក្រសួងការពារជាតិនៃប្រទេសទាំងពីរ។ ថ្លែងប្រាប់ក្រុមអ្នកសារព័ត៌មាននៅឯព្រលានយន្តហោះអន្តរជាតិភ្នំពេញ លោកឧបនាយករដ្ឋមន្រ្តី ទៀ បាញ់ បានមានប្រសាសន៍ថា លោកគ្រោងនឹងជួបជាមួយមន្រ្តីជាន់ខ្ពស់រដ្ឋាភិបាលចិននិងលោកលាង គួងលី (Liang Guanglie) រដ្ឋមន្រ្តីក្រសួងការពារជាតិរបស់ប្រទេសចិន។ លោកឧបនាយករដ្ឋមន្រ្តីទៀ បាញ់ មិនបានមានប្រសាសន៍លម្អិតអំពីដំណើរទស្សនកិច្ចរបស់លោកទេ។ ក៏ប៉ុន្តែលោកបានមានប្រសាសន៍ថា ភាគីចិន និងកម្ពុជា នឹងពិភាក្សាអំពីបញ្ហាវិស័យយោធា។ «ទស្សនកិច្ចរបស់គណៈប្រតិភូ គឺបញ្ជាក់ច្បាស់ហើយ គឺយោធាហើយរវាងក្រសួងការពារជាតិ ធ្វើយ៉ាងណាក៏ដោយ គឺវាមានមួយផ្នែកហើយ ដែលពិភាក្សាគ្នា»។ ដំណើរទស្សនកិច្ចរបស់គណៈប្រតិភូក្រសួងការពារជាតិកម្ពុជា បានកើតមានឡើងបន្ទាប់ពីកម្ពុជាបានបញ្ជូនជនជាតិចិនចំនួន១៨៧នាក់ទៅកាន់ប្រទេសរបស់ខ្លួនវិញ ក្រោយពីបានសម្ងំលាក់ខ្លួនប្រព្រឹត្តបទឧក្រិដ្ឋនៅក្នុងប្រទេសកម្ពុជា។ ប្រតិបត្តិការបង្រា្កបនោះបានធ្វើឡើងជាលក្ខណៈអន្តរជាតិក្នុងពេលតែមួយរវាងប្រទេសកម្ពុជា ថៃ ចិនតៃវ៉ាន់ ឥណ្ឌូនេស៊ី និងម៉ាឡេស៊ីហើយបានធ្វើឡើងកាលពីដើមខែនេះ។ ជនជាតិចិនទាំង១៨៧នាក់នេះ ត្រូវបានចោទប្រកាន់ពីបឧក្រិដ្ឋកម្មឆ្លងដែន ដោយបានយកប្រទេសកម្ពុជាធ្វើជាទីតាំងសម្រាប់ធ្វើការគំរាមកំហែងជំរិតទារប្រាក់នៅឯក្រៅប្រទេស។ លោកគឹម ស៊ូភិរិទ្ធ អ្នកតំណាងរាស្រ្ត និងជាអ្នកនាំពាក្យស្តីទីរបស់គណបក្សសម រង្ស៊ី បានមានប្រសាសន៍ថា ដំណើរទស្សនកិច្ចរបស់គណៈប្រតិភូកម្ពុជាលើកនេះទំនងជាអាចនាំមកនូវជំនួយយោធាបន្ថែមទៀតពីប្រទេសចិន។ «ប្រទេសចិនជានិច្ចកាលតែងតែផ្តល់នូវផ្នែកជំនួយយោធាមកប្រទេសកម្ពុជា។ យើងឃើញមានរថយន្តជាហូរហែ ហើយក៏អាចមានទំនាក់ទំនងក្នុងការទិញដូរសម្ភារៈ និងគ្រឿងសព្វាវុធមួយចំនួនព្រោះខ្ញុំដឹងថា សម្ភារៈសឹកមួយចំនួននៅប្រទេសយើង គឺសុទ្ធតែរបស់ដែលវាសល់ពីសម័យចិននៅមានអំណាចឥទ្ធិពលលើប្រទេសកម្ពុជា»។ កាលពីអំឡុងខែឧសភា រដ្ឋាភិបាលចិនបានផ្តល់ឯកសណ្ឋានយោធាចំនួន៥០.០០០សម្រាប់ ដើម្បីជាផ្នែកមួយនៃទំនាក់ទំនងយោធានៃប្រទេសទាំងពីរ។ នៅឆ្នាំ២០១០ប្រទេសចិនបានផ្តល់សម្ភារៈយោធាចំនួន២៥៧គ្រឿង ដើម្បីជំនួសឲ្យជំនួយយោធារបស់សហរដ្ឋអាមេរិកដែលសន្យាថានឹងផ្តល់មកកម្ពុជាប៉ុន្តែត្រូវបានផ្អាកទៅវិញដោយសារហេតុផលសិទ្ធិមនុស្ស។ ក្នុងចំណោមជំនួយយោធាទាំងនោះមានរថយន្តចំនួន២០០គ្រឿង រថយន្តសម្រាប់មេបញ្ជាការចំនួន៣០គ្រឿង រថយន្តពេទ្យចំនួន២០គ្រឿង និងរថយន្តដឹកគ្រឿងបន្លាស់ចំនួន៥គ្រឿង។ ប្រទេសចិននិងកម្ពុជាមានទំនាក់ទំនងជិតស្និទ្ធជាមួយគ្នាតាំងពីយូរយារណាស់មកហើយ។ ជំនួយយោធារបស់ប្រទេសចិនមកកម្ពុជាបានកើតមានឡើងបន្ទាប់ពីកម្ពុជាមានជម្លោះព្រំដែនដ៏រ៉ាំរ៉ៃ ជាមួយនឹងប្រទេសថៃ។ លោកឧបនាយករដ្ឋមន្រ្តីទៀ បាញ់ ធ្លាប់បានមានប្រសាសន៍ថា កម្ពុជាត្រូវការអាវុធយុទ្ធភណ្ឌទំនើបៗដើម្បីការពារបូរណភាពទឹកដី៕ This posting includes an audio/video/photo media file: Download Now |
| ពិព័រណ៌សិក្សានឹងជួយណែនាំនិស្សិតពីអាជីពការងារ Posted: 20 Jun 2011 11:03 AM PDT អតីតនិស្សិតអាហាររូបករណ៍ហ្វូលប្រាយថ៍ (Fulbright) ចំនួន១៣០នាក់គ្រោងនឹងតាំងពិព័រណ៌សិក្សាដ៏មានសារៈសំខាន់មួយនៅក្នុងទីក្រុងភ្នំពេញនៅថ្ងៃអាទិត្យដើម្បីជួយណែនាំដល់សិស្សដែលទើបបញ្ចប់ថ្នាក់វិទ្យាល័យឱ្យជ្រើសរើសមុខជំនាញនិងអាជីពការងារត្រឹមត្រូវសម្រាប់អនាគត។ សមាគមអតីតនិស្សិតអាហាររូបករណ៍សហការជាមួយនឹងក្រសួងអប់រំយុវជននិងកីឡាដើម្បីតាំងពិព័រណ៌សិក្សាស្តីពីការជ្រើសរើសជំនាញ និងអាជីពការងារឆ្នាំ២០១១នៅវិទ្យាស្ថានជាតិអប់រំនាថ្ងៃទី២៦ ខែមិថុនា ដោយមានការគាំទ្រហិរញ្ញវត្ថុពីក្រសួងការបរទេសសហរដ្ឋអាមេរិក។ លោកធាម រតនៈ ប្រធានសមាគមនិស្សិតអាហាររូបករណ៍ហ្វូលប្រាយថ៍បានថ្លែងប្រាប់ក្រុមអ្នករាយការណ៍ព័ត៌មានថា ពិព័រណ៌សិក្សានេះនឹងផ្តល់ឱ្យសិស្សដែលបញ្ចប់ការសិក្សាថ្នាក់វិទ្យាល័យនៅឆ្នាំ២០១១ នូវព័ត៌មានគ្រប់គ្រាន់អំពីជម្រើសក្នុងការជ្រើសរើសមុខជំនាញសម្រាប់ចូលរៀនថ្នាក់មហាវិទ្យាល័យពន្យល់អំពីទីផ្សារការងារ និងប្រភេទការងារដែលស័ក្តិសមបំផុតសម្រាប់ពួកគេនាពេលអនាគត។ លោក ធាម រតនៈ បានបញ្ជាក់ថា អតីតនិស្សិតអាហាររូបករណ៍ធ្វើការណែនាំសិស្សឱ្យធ្វើការសម្រេចចិត្ត ជ្រើសរើសយកមុខជំនាញឱ្យត្រូវនឹងចំណង់ចំណូលចិត្ត និងតម្រូវការរបស់និយោជក។ «ខ្ញុំជឿថាវាល្អ ពីព្រោះថាអ្នកជំនាន់មុខដែលទទួលការជោគជ័យ ធ្លាប់ទៅរៀនស្រុកក្រៅមកវិញ យើងទទួលបានការងារល្អ ហើយអាចណែនាំទៅប្អូនៗជំនាន់ក្រោយ។ ប្រធានបទសំខាន់គឺការជ្រើសរើស ជំនាញឱ្យបានត្រឹមត្រូវ និងការខំរៀនដើម្បីត្រៀមអាហាររូបករណ៍។ គាត់អាចយល់ដឹងពីការរើសជំនាញ ហើយគាត់អាចសួរនាំពីបទពិសោធន៍ការងារ»។ ចាប់ពីឆ្នាំ១៩៩៤ដល់បច្ចុប្បន្ន ប្រទេសកម្ពុជាមានអតីតនិស្សិតអាហាររូបករណ៍ហ្វូលប្រាយថ៍របស់សហរដ្ឋអាមេរិក ចំនួន១៣០នាក់ដែលកំពុងបម្រើការនៅតាមស្ថាប័នសាធារណៈ និងឯកជន មានជំនាញផ្នែកអប់រំការគ្រប់គ្រងជំនួញ កសិកម្ម បច្ចេកវិទ្យាព័ត៌មាននិងច្បាប់។ លោក ធាម រតនៈ បានបញ្ជាក់ថា បញ្ហារបស់និស្សិតកម្ពុជាក្នុងការជ្រើសរើសជំនាញ និងអាជីពការងារ ហើយពិព័រណ៌សិក្សាស្តីពីជំនាញ និងអាជីពការងារឆ្នាំ២០១១ ដែលក្នុងពិព័រណ៌នេះ សាកលវិទ្យាល័យរដ្ឋនិងឯកជននានានឹងបង្ហាញពីអត្ថប្រយោជន៍ដែលសាកលវិទ្យាល័យរបស់ពួកគេអាចផ្តល់ជូនសិស្សដែលទើបនឹងរៀនចប់វិទ្យាល័យ។ ប្រទេសកម្ពុជាកំពុងតែជួបប្រទះនូវកង្វះខាតកម្មវិធីអប់រំបណ្តុះបណ្តាលធនធានមនុស្ស។ ដោយសង្កេតឃើញថាសិស្សដែលទើបតែបញ្ចប់ការសិក្សាពីវិទ្យាល័យ មានការយល់ដឹងតិចតួចអំពីការជ្រើសរើសមុខជំនាញសម្រាប់សិក្សានៅថ្នាក់មហាវិទ្យាល័យ ដើម្បីឱ្យត្រូវនឹងគោលបំណងសម្រាប់អាជីពអនាគត។ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានថ្លែងថា ការចង្អុលបង្ហាញអំពីអនាគតទីផ្សារការងារសម្រាប់សិស្សដែលបញ្ចប់ថ្នាក់វិទ្យាល័យស្ទើរតែគ្មានសោះក្នុងការជ្រើសរើសយកមុខជំនាញនេះ៖ «យើងមានការព្រួយបារម្ភ ចំពោះយុវជនរៀនបញ្ចប់ថ្នាក់ទី១២និងនិស្សិតរៀនបញ្ចប់នៅតាមមហាវិទ្យាល័យ ដែលចេញមកវិញ គ្មានការងារធ្វើភាគច្រើន។ នេះជាចំណុចខ្វះខាតរបស់រដ្ឋាភិបាលដែលមិនបានបង្កើតការងារទុកឱ្យយុវជនក្រោយពីបញ្ចប់ការសិក្សា»។ លោក រ៉ុង ឈុន បានបន្តថា សិស្សដែលបញ្ចប់ថ្នាក់វិទ្យាល័យ មិនមានបទពិសោធន៍ឬ យល់ដឹងស៊ីជម្រៅក្នុងការជ្រើសរើសមុខជំនាញ មិនបានស្វែងយល់ស៊ីជម្រៅទៅលើមុខជំនាញ និងទីផ្សារការងារទេ។ «បើមានការតាំងពិព័រណ៌តម្រង់ទិសដល់យុវជន យើងគិតថា វាជាការណ៍ល្អប្រសើរមួយ ដើម្បីឱ្យគាត់រៀនចំគោលដៅទីផ្សារការងារតែម្តងងាយស្រួល នៅពេលគាត់បញ្ចប់ពីមហាវិទ្យាល័យទៅ គាត់អាចស្វែងរកការងារបានធ្វើ»។ លោកស្រី ខារ៉ូល រ៉ុដលី (Carol Rodley) ឯកអគ្គរដ្ឋទូតសហរដ្ឋអាមេរិកប្រចាំកម្ពុជា និងលោក អ៊ឹម សិទ្ធី រដ្ឋមន្ត្រីក្រសួងអប់រំយុវជន និងកីឡាគាំទ្រ នឹងចូលរួមក្នុងកម្មវិធីតាំងពិព័រណ៌សិក្សានេះ៕ This posting includes an audio/video/photo media file: Download Now |
| ឧត្ដមសេនីយ៍ថៃអំពាវនាវឲ្យអ្នកគាំទ្ររាជាធិបតេយ្យទៅបោះឆ្នោត Posted: 20 Jun 2011 11:48 AM PDT អគ្គមេបញ្ជាការយោធាថៃបានបញ្ចេញឥទ្ធពល ក្នុងការបោះឆ្នោតជាតិដោយអំពាវនាវដល់សាធារណជនឲ្យបោះឆ្នោតឲ្យ«មនុស្សល្អ»ណា ដែលគាំទ្ររាជាធិបតេយ្យ។ អត្ថាធិប្បាយរបស់លោកឧត្ដមសេនីយ៍ អាចបកស្រាយថា ជាការវាយប្រហារដោយបិតបាំងមកលើគណបក្សជំទាស់។ នៅក្នុងការផ្សាយតាមទូរទស្សន៍ពេលយប់ជ្រៅទៅកាន់ជនជាតិថៃទូទៅ ប្រទេសអគ្គមេបញ្ជាការកងទ័ពថៃ ឧត្ដមសេនីយ៍ ប្រយុទ្ធ ចាន់ អូចាហថ្លែងថា ពលរដ្ឋថៃទាំងអស់គួរទៅបោះឆ្នោតតែលោកព្រមានថា បើប្រជាពលរដ្ឋថៃបោះឆ្នោតតាមបែបផែនចាស់ដូចពីលើកមុន ហើយជ្រើសគណបក្សដដែល ឬ ក៏មិនទៅបោះឆ្នោតប្រទេសជាតិនឹងមិនមានការផ្លាស់ប្ដូរអ្វីទេ។ ឧត្ដមសេនីយ៍ប្រយុទ្ធបានអំពាវនាវឲ្យពលរដ្ឋថៃបោះឆ្នោតគាំទ្រ«មនុស្សល្អ»ដែលគាំទ្ររាជាធិបតេយ្យ។ ឧត្ដមសេនីយ៍ប្រយុទ្ធ ចាន់ អូចាហ ថ្លែងថាសេវាសន្ដិសុខរកឃើញថាមានភស្ដុតាងបង្ហាញនូវការវាយប្រហារទៅលើរាជា ធិបតេយ្យ ជាពិសេសរាយឈ្មោះអ្នកគាំទ្រយ៉ាងតិចម្នាក់នៃអតីតនាយករដ្ឋមន្ដ្រីថាក់ស៊ីនស៊ីណាវ៉ាត្រ។ លោកនិយាយថាមានសកម្មភាពមិនស្របច្បាប់កាន់តែច្រើនពាក់ព័ន្ធនឹងការប្រមាថមើលងាយព្រះមហាក្សត្រ ជាពិសេសនៅក្នុងយុទ្ធនាការឃោសនារកសម្លេងឆ្នោត ដែលភ្ជាប់ក្រុមមូយរស់នៅក្រៅប្រទេស។ លោកថ្លែងថាលោកនិយាយដូច្នោះ ដោយសារតែជនទាំងនោះមានកំហុសតាមការចោទប្រកាន់ជាច្រើនដែលព្យាយាម ប្រមាថរាជាធិបតេយ្យ និងមានការពាក់ព័ន្ធទៅនឹងក្រុមមនុស្សជាច្រើនទៀត។ លោកថ្លែងទៀតថា អាជ្ញាធរមិនអាចអនុញាតឲ្យជនទាំងនោះបំពានលើច្បាប់បានឡើយ។ ច្បាប់តឹងរឹងរបស់ប្រទេសថៃប្រឆាំងនៃការប្រមាថមើលងាយ រាជាធិបតេយ្យទទូលទណ្ឌកម្មជាប់គុក រហូតដល់១៥ឆ្នាំ បានត្រូវទិតៀនថាយកទៅរំលោភប្រើប្រាស់ដើម្បីប្រយោជន៍នយោបាយ។ ឧត្ដមសេនីយ៍ប្រយុទ្ធបានចោទថា មានមេដឹកនាំមួយចំនួនរបស់គណបក្សជំទាស់របស់ក្រុមអាវក្រហម ដែលជាអ្នករៀបចំការដើរតវ៉ានៅលើផ្លូវកាលពីឆ្នាំមុនប្រឆាំងរដ្ឋាភិបាលប្រជាធិបតេយ្យ ដែលជាការប្រមាថមើលងាយព្រះមហាក្សត្រ។ ឧត្ដមសេនីយ៍ប្រយុទ្ធបានដឹកនាំការវាយបង្ក្រាបយោធាដែលបញ្ចប់បាតុកម្ម។ ការប្រយុទ្ធគ្នារវាងយោធានិងក្រុមបាតុករ ដែលខ្លះមានអាវុធបានបណ្ដាលឲ្យមនុស្សស្លាប់៩០នាក់ ភាគច្រើនជាជនស៊ីវិល។ គណបក្សលោកថាក់ស៊ីនបានយកជ័យជម្នះលើការបោះឆ្នោត៤ លើកចុងក្រោយតែយោធាថៃ បានទម្លាក់លោកចេញពីដំណែងនៅក្នុងរដ្ឋប្រហារយោធាក្នុងឆ្នាំ២០០៦ ហើយបានចោទប្រកាន់លោកថាក់ស៊ីន ថាជាអ្នកកាន់អំណាចផ្ដាច់ការ ស៊ីសំណូក និង មិនស្មោះត្រង់ចំពោះរាជាធិបតេយ្យ។ លោក ថាក់ស៊ីន បដិសេធការចោទប្រកាន់ទាំងនោះ។ រួចលោកថាក់ស៊ីនបានគេចចេញពីប្រទេស ដើម្បីចៀសវាងការចាប់ដាក់គុកតាមបទប្រព្រឹត្ដអំពើពុករលួយ។ ប្អូនស្រីរបស់លោកថាក់ស៊ីន យីងលូក ស៊ីណាវ៉ាត្រដឹកនាំគណបក្សជំទាស់ភឿថៃ។ អ្នកធ្វើអត្ថាធិប្បាយនយោបាយថៃបានសម្ដែងការព្រួយបារម្ភថា បើគណបក្សភឿថៃឈ្នះឆ្នោត យោធាអាចធ្វើរដ្ឋប្រហារម្ដងទៀត។ មេបញ្ជាការយោធាបានបដិសេធលទ្ធភាពដូច្នោះ។ ទោះបីជាបានធ្វើអត្ថាធិប្បាយនយោបាយដូច្នោះក៏ដោយ ឧត្ដមសេនីយ៍ប្រយុទ្ធថ្លែងថា យោធានៅតែរក្សាភាពអព្យាក្រិត្យក្នុងការបោះឆ្នោតនៅថ្ងៃទី៣ខែកក្កដា។ យោធារបស់ប្រទេសថៃធ្លាប់មានប្រវត្ដិសាស្រ្ដដ៏យូរអំពីការចូលជ្រៀតជ្រែកក្នុងនយោបាយ ដោយបានប្រព្រឹត្ដរដ្ឋប្រហារ១៨ដង រួចមកហើយចាប់តាំងពីប្រទេសថៃចាកចេញពីរាជាធិបតេយ្យផ្ដាច់ការទៅរករាជាធិបតេយ្យ អាស្រ័យលើរដ្ឋធម្មនុញ្ញ។ ប្រែសម្រួលដោយ អ៊ូ ធួក This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
