VOA News: ព័ត៌មាន: “នៅទិវាកាន់ទុក្ខប្រជាពលរដ្ឋខ្មែររំពឹងយុត្តិធម៌ពីសាលក្តីខ្មែរក្រហម” plus 3 more |
- នៅទិវាកាន់ទុក្ខប្រជាពលរដ្ឋខ្មែររំពឹងយុត្តិធម៌ពីសាលក្តីខ្មែរក្រហម
- អាមេរិកបង្ហាត់ប៉ូលីសកម្ពុជាអំពីការបង្ក្រាបឧក្រិដ្ឋកម្ម
- អ្នកតាំងទីលំនៅបឹងកក់ស្នើបង្កើតគណៈកម្មការចម្រុះដោះស្រាយបញ្ហាដីធ្លី
- អង្គការសង្គមស៊ីវិលបារម្ភអំពីរឿងក្តី០០៣និង០០៤
| នៅទិវាកាន់ទុក្ខប្រជាពលរដ្ឋខ្មែររំពឹងយុត្តិធម៌ពីសាលក្តីខ្មែរក្រហម Posted: 20 May 2011 01:07 PM PDT អ្នកក្រុងភ្នំពេញដែលអះអាងថា បានទទួលរងការឈឺចាប់ដោយរបបខ្មែរក្រហមបានលើកឡើងនៅថ្ងៃសុក្រនេះថា ពួកគេកំពង់តែរង់ចាំយុត្តិធម៌ពីការកាត់ទោសអតីតមេដឹកនាំជាន់ខ្ពស់បំផុតខ្មែរក្រហមចំនួនបួននាក់នៅក្នុងសំណុំរឿង០០២។ សាលាក្ដីខ្មែរក្រហមគាំទ្រដោយអង្គការសហប្រជាជាតិគ្រោងនឹងបើកសវនាការបឋមចំនួនបួនថ្ងៃកាត់ទោសជនជាប់ចោទទាំងបួននាក់នៅថ្ងៃទី២៧រហូតទៅដល់ថ្ងៃទី៣០ខែមិថុនាខាងមុខ។ ការកាត់ទោសពេញអង្គចំពោះពួកគេអាចនឹងប្រព្រឹត្តិទៅក្នុងអំឡុងខែសីហាឆ្នាំ២០១១នេះ។ ជនសង្ស័យទាំងបួននាក់រួមមានខៀវ សំផន អតីតប្រមុខរដ្ឋកម្ពុជាប្រជាធិបតេយ្យ នួន ជាអតីតប្រធានសភាកម្ពុជាប្រជាធិបតេយ្យ អៀង សារី អតីតរដ្ឋមន្ដ្រីការបរទេស និងប្រពន្ធរបស់គាត់អៀង ធីរិទ្ធ អតីតរដ្ឋមន្ដ្រីក្រសួងសង្គមកិច្ចកម្ពុជាប្រជាធិបតេយ្យ។ ថ្លែងនៅក្នុងពិធីកាន់ទុក្ខនៃជនរងគ្រោះដោយរបបខ្មែរក្រហមដែលត្រូវបានប្រារព្ធឡើងនៅសារមន្ទីរបឹងជើងឯកជាយក្រុងភ្នំពេញ តំណាងប្រជាពលរដ្ឋក្រុងភ្នំពេញម្នាក់ក្នុងចំណោមអ្នកចូលរួមប្រមាណជា៣.០០០នាក់ បានប្រកាសថា ការកាត់ទោសអតីតមេដឹកនាំកំពូលខ្មែរក្រហមទាំងនេះនឹងក្លាយទៅជាប្រវត្តិសាស្រ្ដសម្រាប់ជនរងគ្រោះ។ «ក្នុងសំណុំរឿង០០២ពិតជាផ្ដល់នូវឱកាសដ៏សំខាន់ជាប្រវត្តិសាស្ដ្រមួយក្នុងការបង្ហាញឲ្យឃើញថា របបកម្ពុជាប្រជាធិបតេយ្យបានធ្វើការសម្រេចចិត្តដ៏ល្ងង់ខ្លៅដែលបង្កឲ្យមានការស្លាប់បាត់បង់ជីវិតរបស់ប្រជាជនកម្ពុជាប្រមាណជាងបីលាននាក់»។ ទិវាកាន់ទុក្ខនៃជនរងគ្រោះដោយរបបខ្មែរក្រហមនៅថ្ងៃទី២០ឧសភានេះត្រូវបានស្គាល់ថា ជាទិវាចងកំហឹងដែលត្រូវបានរៀបចំជារៀងរាល់ឆ្នាំដោយគណបក្សប្រជាជនកម្ពុជាដែលកំពុងកាន់អំណាច។ អតីតមេដឹកនាំកំពូលខ្មែរក្រហមទាំងបួននាក់ត្រូវចោទប្រកាន់ពីឧក្រិដ្ឋកម្មសង្រ្គាម ឧក្រិដ្ឋកម្ម ប្រឆាំងមនុស្សជាតិនិងប្រល័យពូជសាសន៍។ ការចោទប្រកាន់ទាំងនេះទាក់ទងទៅនឹងការស្លាប់របស់ប្រជាពលរដ្ឋកម្ពុជាយ៉ាងតិចចំនួន១,៧លាននាក់ក្នុងអំឡុងពេលដែលពួកគេកាន់អំណាចចន្លោះពីឆ្នាំ១៩៧៥ដល់ឆ្នាំ១៩៧៩។ លោក ទឹម ហូ អាយុ ៧៥ ឆ្នាំ គឺជាអ្នកក្រុងភ្នំពេញម្នាក់ដែលមានដើមកំណើតពីខេត្តកំពង់ចាម។ លោកមានប្រសាសន៍ថា លោកចង់ឃើញអតីតមេដឹកនាំខ្មែរក្រហមទាំងបួននាក់ត្រូវបានផ្ដន្ទាទោសឲ្យបានធ្ងន់ធ្ងរបំផុត។ «បងប្អូនខ្ញុំស្លាប់អស់១៥គ្រួសារ។ ការឈឺចាប់ជាមួយពួកអាខ្មែរក្រហមនេះរកអ្វីប្រៀបមិនបានទេ។ ចង់តែឲ្យដាក់ទោសពួកវាឲ្យបានច្រើនឆ្នាំ បើដាក់ទោសតិចឆ្នាំមិនសូវសប្បាយចិត្តទេ»។ ទោះជាយ៉ាងណាក៏ដោយក៏លោក ឡាស អលសិន (Lars Olsen) មន្ដ្រីផ្នែកទំនាក់ទំនងកិច្ចការច្បាប់របស់សាលាក្ដីខ្មែរក្រហមមានប្រសាសន៍ថា ការសម្រេចដាក់ទោសទៅលើជនសង្ស័យ គឺជាឆន្ទានុសិទ្ធរបស់ក្រុមចៅក្រមក្នុងសាលាក្ដីខ្មែរក្រហមដោយផ្អែកលើមូលដ្ឋានភស្ដុតាងនិងអំណះអំណាងក្នុងការកាត់ក្ដី។ ក៏ប៉ុន្ដែនៅក្នុងពេលនេះ ជនសង្ស័យនៅតែមានសិទ្ធិដែលត្រូវសន្មតថា មិនទាន់មានទោសនៅឡើយ៕ This posting includes an audio/video/photo media file: Download Now |
| អាមេរិកបង្ហាត់ប៉ូលីសកម្ពុជាអំពីការបង្ក្រាបឧក្រិដ្ឋកម្ម Posted: 20 May 2011 12:16 PM PDT នៅថ្ងៃសុក្រនេះ សហរដ្ឋអាមេរិកបានប្តេជ្ញាធ្វើឱ្យកាន់តែប្រសើរឡើងនូវទំនាក់ទំនងនិងកិច្ចសហប្រតិបត្តិការរវាងនគរបាលជាតិកម្ពុជា និងការិយាល័យស៊ើបអង្កេតសហព័ន្ធអេហ្វប៊ីអាយ (FBI)របស់សហរដ្ឋអាមេរិកដើម្បីប្រយុទ្ធប្រឆាំងនឹងឧក្រិដ្ឋកម្មឆ្លងដែននានា។ លោក ភែទ្រិក ហ្គិប្បុនស៍ (Patrick Gibbons) តំណាងការិយាល័យស៊ើបអង្កេតសហព័ន្ធអេហ្វប៊ីអាយរបស់សហរដ្ឋអាមេរិកប្រចាំកម្ពុជាបានថ្លែងប្រាប់ក្រុមអ្នកយកព័ត៌មាននៅអគ្គស្នងការនគរបាលជាតិថា អាមេរិកនឹងបន្តធ្វើការប្រកបដោយន័យស្ថាបនាជាមួយនគរបាលជាតិកម្ពុជាដើម្បីប្រយុទ្ធប្រឆាំងនឹងអំពើឧក្រិដ្ឋកម្មគ្រប់រូបភាពនៅកម្ពុជា។ លោក ភែទ្រិក ហ្គិប្បុនស៍ បានថ្លែងថា ខ្លួនបានធ្វើករណីជាច្រើនទាក់ទងនឹងអនាគតនៃបទឧក្រិដ្ឋកម្មនានា ទេសចរណ៍ផ្លូវភេទលើកុមារ និងការជួញដូរគ្រឿងញៀន។ កិច្ចសហប្រតិបត្តិការល្អជាច្រើនជាមួយនគរបាលជាតិកម្ពុជា រួមមានទំនាក់ទំនងប្រកបដោយតម្លាភាព និងបើកចំហដូចជាការទាក់ទងនឹងការប្រយុទ្ធប្រឆាំងនឹងគ្រឿងញៀននិងការផ្លាស់ប្តូរព័ត៌មានដើម្បីទប់ស្កាត់ឧក្រិដ្ឋកម្ម។ មន្ត្រីការិយាល័យស៊ើបអង្កេតសហព័ន្ធអេហ្វប៊ីអាយទើបតែបានបញ្ចប់ការបណ្តុះបណ្តាលមុខជំនាញស្តីពីការសម្ភាសន៍ និងការសួរចម្លើយដល់មន្ត្រីនគរបាល និងកងរាជអាវុធហស្ថជាតិកម្ពុជាចំនួន៤០នាក់។ លោក ភែទ្រិក ហ្គិប្បុនស៍ សង្ឃឹមថា ការបណ្តុះបណ្តាលមុខជំនាញដែលអេហ្វប៊ីអាយបានផ្តល់ជូននេះនឹងបន្តទៅអនាគតទៀត។ «យើងសង្ឃឹមថានឹងបន្តកិច្ចសហប្រតិបត្តិការល្អ ខណៈដែលយើងដើរឆ្ពោះទៅរកទំនាក់ទំនងដ៏ធំធេងក្នុងពេលអនាគត។ សំខាន់ជាងនេះ ការបណ្តុះបណ្តាលត្រូវបានធ្វើឡើងថ្មីៗនេះនៅទីនេះ ស្តីពីជំនាញបច្ចេកទេសសម្ភាសន៍ ដើម្បីពង្រឹងទំនាក់ទំនងរវាងនគរបាលជាតិកម្ពុជា និងការិយាល័យស៊ើបអង្កេតសហព័ន្ធអេហ្វប៊ីអាយ ហើយបង្កើនសមត្ថភាពមន្ត្រីអនុវត្តច្បាប់នៅទីនេះនៅកម្ពុជា»។ លោកឯក សុខ ផល អគ្គស្នងការរងនគរបាលជាតិបានថ្លែងប្រាប់អ្នកយកព័ត៌មានថា ការបណ្តុះបណ្តាលមុខជំនាញបច្ចេកទេសស្តីពីការសម្ភាសន៍ និងការសួរចម្លើយនេះមានសារៈសំខាន់ណាស់ ដើម្បីបង្កើនសមត្ថភាពដល់សមត្ថកិច្ចកម្ពុជាក្នុងការទប់ស្កាត់បទឧក្រិដ្ឋឆ្លងដែន។ លោកថ្លែងថា៖ «មកដល់ថ្ងៃនេះនិងថ្ងៃមុខ នគរបាលជាតិកម្ពុជានៅតែមានទិសដៅធ្វើកិច្ចសហការជិតស្និទ្ធជាមួយភ្នាក់ងារអេហ្វប៊ីអាយដើម្បីបង្ក្រាបបទល្មើសនិងបទឧក្រិដ្ឋឆ្លងដែនទាំងអស់។ ការប្រយុទ្ធប្រឆាំងនឹងបទឧក្រិដ្ឋឆ្លងដែន ទាមទារឱ្យមានការយល់ដឹង និងសមត្ថភាពរបស់នគរបាលជាតិ និងកងរាជអាវុធហស្ថរបស់យើង»។ លោកឧត្តមសេនីយ៍ឯក សុខ ផល បានបញ្ជាក់ថា លោកនាយករដ្ឋមន្ត្រី ហ៊ុន សែន បានដាក់បទបញ្ជាឱ្យគ្រប់អង្គភាពទាំងអស់ធ្វើកិច្ចសហប្រតិបត្តិការជាមួយការិយាល័យស៊ើបអង្កេត អេហ្វប៊ីអាយ ក្នុងការបង្ក្រាបគ្រប់បទល្មើស។ លោក សុខ ផល បានបន្តថា នគរបាលជាតិកម្ពុជាបានសហការជាមួយការិយាល័យស៊ើបអង្កេតអេហ្វប៊ីអាយរបស់សហរដ្ឋអាមេរិក ក្នុងការបង្ក្រាបឧក្រិដ្ឋកម្មចំនួនប្រាំពីរករណី រួមមានការជួញដូរគ្រឿងញៀនមួយករណី និងការជួញដូរផ្លូវភេទលើកុមារចំនួនប្រាំមួយករណីនៅចន្លោះពីឆ្នាំ២០០១ដល់បច្ចុប្បន្ន៕ This posting includes an audio/video/photo media file: Download Now |
| អ្នកតាំងទីលំនៅបឹងកក់ស្នើបង្កើតគណៈកម្មការចម្រុះដោះស្រាយបញ្ហាដីធ្លី Posted: 19 May 2011 04:53 PM PDT នៅថ្ងៃព្រហស្បតិ៍នេះ ប្រជាពលរដ្ឋតំបន់បឹងកក់បានស្នើសុំអាជ្ញាធរក្រុងភ្នំពេញឱ្យបង្កើតគណៈកម្មការចម្រុះមួយដើម្បីពិភាក្សាវិធីវាស់វែងក្បាលដីរបស់ពួកគេសម្រាប់ការអភិវឌ្ឍនៅនឹងកន្លែង។ ការសម្រេចនេះបានធ្វើឡើងបន្ទាប់ពីធនាគារពិភពលោកបានជំរុញឱ្យកម្ពុជាដោះស្រាយការប្រឈមពាក់ព័ន្ធនឹងប្រជាពលរដ្ឋរាប់ពាន់នាក់ដែលប្រឈមនឹងការបណ្តេញចេញពីផ្ទះសម្បែងពួកគេដោយបង្ខំ។ អ្នកស្រី ទេព វណ្ណី តំណាងសហគមន៍បឹងកក់បានថ្លែងប្រាប់វីអូអេខ្មែរថា៖ «នៅរសៀលនេះ ប្រជាសហគមន៍បឹងកក់របស់ខ្ញុំទាំងអស់គ្នា ពិភាក្សារៀបចំឯកសារមួយដាក់ទៅសាលាក្រុងនៅថ្ងៃស្អែក។ ឯកសារនេះមានអត្ថន័យថា សុំឱ្យសាលាក្រុង គណៈកម្មការសុរិយោដី និងអាជ្ញាធរចុះមកវាស់វែងដីលម្អិតឱ្យប្រជាពលរដ្ឋជាក់ស្តែងដើម្បីឱ្យដំណើរការអភិវឌ្ឍឱ្យបានឆាប់រហ័ស»។ អ្នកស្រី លី ស្រីមុំ តំណាងសហគមន៍បឹងកក់ម្នាក់ទៀតបាននិយាយថា ប្រជាពលរដ្ឋបឹងកក់កំពុងស្វែងរកការជួបជាមួយអាជ្ញាធរក្រុងដើម្បីពិភាក្សាគម្រោងអភិវឌ្ឍន៍នៅនឹងកន្លែងនេះ។ «យើងបានលម្អិតឯកសារចំនួន៧៤៤ក្បាលដី ស្មើនឹងផ្ទៃដី១០ហិកតា ស្មើនឹងប្រជាពលរដ្ឋ១.៥០០គ្រួសារ។ យើងលម្អិតក្បាលដីឱ្យគាត់(សាលាក្រុងភ្នំពេញ)ហើយ។ យើងចង់បើកការចរចាបញ្ចប់វិវាទដីធ្លី ដែលបានកន្លងមកបួនឆ្នាំហើយ ដែលមិនទាន់មានការដោះស្រាយនេះ»។ សហគមន៍បឹងកក់បានដាក់សំណើសុំជួបពិភាក្សាជាមួយមន្ត្រីសាលាក្រុងភ្នំពេញនៅថ្ងៃទី៩ខែឧសភានេះ ប៉ុន្តែរហូតមកដល់ពេលនេះមិនទាន់មានការឆ្លើយតបពីសាលាក្រុងនៅឡើយទេ។ សេចក្តីថ្លែងការណ៍របស់ធនាគារពិភពលោកកាលពីថ្ងៃច័ន្ទបានបញ្ជាក់ថា ម្ចាស់ដីទាំងនោះនៅតែព្យាយាមចរចាលើកិច្ចព្រមព្រៀងមួយជាមួយរដ្ឋាភិបាលអំពីដីដ៏មានតម្លៃនៅជុំវិញតំបន់បឹងកក់។ ធនាគារពិភពលោកបានកត់សម្គាល់ថា ធនាគារកំពុងលើកទឹកចិត្តឱ្យភាគីទាំងអស់សម្រេចដោះស្រាយ និងក្នុងរយៈពេលអន្តរកាលនេះនឹងតាមឃ្លាំមើលយ៉ាងដិតដល់នូវការរីកចម្រើននៃការចរចានេះ។ ក្នុងរយៈពេលប្រាំពីរឆ្នាំ កម្មវិធីធនាគារពិភពលោកដែលមានទឹកប្រាក់ចំនួន២៤លានដុល្លារអាមេរិកត្រូវបានបង្កើតឡើងដើម្បីពង្រឹងកម្មសិទ្ធិទ្រព្យសម្បត្តិនៃម្ចាស់ដីនៅបឹងកក់ ដែលជាកន្លែងដែលរដ្ឋាភិបាលបានបណ្តេញប្រជាពលរដ្ឋចេញដោយគ្មានសំណងគ្រប់គ្រាន់។ ធនាគារពិភពលោកឲ្យដឹងថា រដ្ឋាភិបាលបានប្រាប់ធនាគារថា រដ្ឋាភិបាលកំពុងតែចាត់វិធានការណ៍មួយចំនួនដើម្បីធ្វើឱ្យដំណើរការតាំងទីលំនៅជាថ្មីនៅកម្ពុជាប្រសើរឡើង។ លោកកែប ជុតិមា អភិបាលក្រុងភ្នំពេញ បានថ្លែងនៅក្នុងការជួបជាមួយតំណាងបឹងកក់ថ្មីៗនេះថា អាជ្ញាធរនឹងចុះទៅធ្វើការវាស់វែងក្បាលដីរបស់អ្នកភូមិបឹងកក់។ ក្នុងខែមិនា អធិការកិច្ចផ្ទៃក្នុងធនាគារពិភពលោកបានបញ្ជាក់ថា កម្មវិធីដីធ្លីបានធ្វើឱ្យមានគុណវិបត្តិ និងបានរំលោភគោលនយោបាយធនាគារ។ អ្នកស្រី លី ស្រីមុំ បាននិយាយថា ការលើកឡើងរបស់ធនាគារពិភពលោកនេះគឺជារឿងល្អ ព្រោះគម្រោងដីធ្លីរបស់ធនាគារនេះបានធ្វើឱ្យប៉ះពាល់ដល់ប្រជាពលរដ្ឋនៅតំបន់បឹងកក់ ធ្វើឱ្យបាត់បង់សិទ្ធិកាន់កាប់ដីធ្លី ធ្វើឱ្យមានកំហុសចំពោះប្រជាពលរដ្ឋបឹងកក់។ «គាត់ (ធនាគារពិភពលោក) ត្រូវមានកាតព្វកិច្ចតាមដានពីសកម្មភាពប្រជាពលរដ្ឋនៅតំបន់បឹងកក់ក្នុងការចរចាជាមួយសាលារាជធានី ឱ្យប្រាកដប្រជាថា សាលារាជធានីផ្តល់ការអភិវឌ្ឍឱ្យប្រជាពលរដ្ឋនៅតំបន់បឹងកក់នូវជម្រើសថ្មីនេះពិតប្រាកដ ឬមិនពិតប្រាកដ។ ខ្ញុំសុំឱ្យគាត់ធ្វើការបន្តការគាំទ្រនេះ រហូតដល់ប្រជាពលរដ្ឋតំបន់បឹងកក់មានលំនៅដ្ឋានសមរម្យ។ ការគាំទ្ររបស់ធនាគារពិភពលោកនេះមានតម្លាភាព និងយុត្តិធម៌ចំពោះប្រជាពលរដ្ឋ។ ក្នុងឆ្នាំ២០០៧ រដ្ឋាភិបាលបានជួលដីតំបន់បឹងកក់ទៅឱ្យក្រុមហ៊ុន Sukaku Inc.ធ្វើការអភិវឌ្ឍក្នុងតម្លៃ៧៩លានដុល្លារអាមេរិកសម្រាប់រយៈពេល៩៩ឆ្នាំ៕ This posting includes an audio/video/photo media file: Download Now |
| អង្គការសង្គមស៊ីវិលបារម្ភអំពីរឿងក្តី០០៣និង០០៤ Posted: 19 May 2011 04:15 PM PDT ក្រុមសង្គមស៊ីវិលសរុបចំនួន២៤ព្រួយបារម្ភចំពោះការវិវត្តចុងក្រោយនៃសំណុំរឿង០០៣ និង០០៤ ដ៏ចម្រូងចម្រាសនៅថ្ងៃព្រហស្បតិ៍ ហើយបានទទូចឲ្យសាលាក្ដីខ្មែរក្រហមបញ្ចេញព័ត៌មានទាក់ទងនឹងសំណុំរឿងទាំងនេះជាសាធារណៈឲ្យបានឆាប់រហ័ស និងពេញលេញដើម្បីជាប្រយោជន៍សម្រាប់ជនរងគ្រោះ។ កង្វល់នេះកើតឡើងស្របពេលដែលមានការលើកឡើងជាបន្តបន្ទាប់ថា សាលាក្ដីខ្មែរក្រហមអាចនឹងបោះបង់ចោលរឿងក្ដីទាំងពីរនេះ។ នៅក្នុងសេចក្តីថ្លែងការណ៍រួមរបស់ខ្លួននៅថ្ងៃនេះ ក្រុមសង្គមស៊ីវិលដែលមានអង្គការអាដហុក អង្គការក្រុមអ្នកច្បាប់ការពារសិទ្ធិកម្ពុជា និងវិទ្យាស្ថានខ្មែរដើម្បីលទ្ធិប្រជាធិបតេយ្យជាដើមបានកត់សម្គាល់ថា ការវិវត្តន៍របស់សំណុំរឿង០០៣ និងសំណុំរឿង០០៤ ធ្វើឲ្យមានការមន្ទិលសង្ស័យអំពីឯករាជ្យភាពរបស់ចៅក្រម។ កាលពីថ្ងៃពុធម្សិលមិញនេះ សហចៅក្រមស៊ើបអង្កេតបានបញ្ជាឲ្យសហព្រះរាជអជ្ញាអន្ដរជាតិលោក អ៊ែនឌ្រូ ខេលី (Andrew Caley) ដកព័ត៌មានសំខាន់ៗទាក់ទងទៅនឹងឧក្រិដ្ឋកម្ម និងតំបន់ឧក្រិដ្ឋកម្មក្នុងសំណុំរឿង០០៣ ដែលលោកបានលើកឡើងក្នុងសេចក្ដីថ្លែងការណ៍របស់ខ្លួនជាសាធារណៈកាលពីថ្ងៃទី៩ ឧសភា។ សហចៅក្រមស៊ើបអង្កេតបានហៅសេចក្ដីថ្លែងការណ៍នោះថា បានធ្វើឲ្យប៉ះពាល់ដល់ភាពសម្ងាត់ក្នុងការស៊ើបអង្កេត។ លោក អ៊ែនឌ្រូ ខេលី គឺជាប្រភពតែមួយគត់ដែលបានបង្ហើបព័ត៌មានជាក់ស្ដែងខ្លះៗទាក់ទងនឹងសំណុំរឿង០០៣នេះ។ ក៏ប៉ុន្ដែនៅក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះ ក្រុមអង្គការក្រៅរដ្ឋាភិបាលបានថ្លែងថា ព័ត៌មានដែលសហព្រះរាជអាជ្ញាខាងភាគីអង្គការសហប្រជាជាតិទម្លាយចេញនោះមិនទាន់គ្រប់គ្រាន់ និងចំពេលវេលាសម្រាប់ជួយដល់សង្គមស៊ីវិលឲ្យបំពេញមុខងាររបស់ខ្លួនក្នុងការជួយសម្រួលដល់ការចូលរួមរបស់ជនរងគ្រោះក្នុងដំណើរការក្ដីនៅឡើយ។ ហេតុដូច្នេះពួកខ្លួនស្នើឲ្យមាន ការផ្ដល់ព័ត៌មានកាន់តែឆាប់រហ័ស និងពេញលេញជាបន្ថែមទៀត ដើម្បីឲ្យពួកខ្លួនចូលរួមចំណែកការពារ និងតំណាងផលប្រយោជន៍របស់ជនរងគ្រោះក្នុងសំណុំរឿង០០៣និង០០៤ ប្រកបដោយប្រសិទ្ធិភាពបាន។ អង្គការទាំងនោះបានលើកឡើងថា ប្រជាពលរដ្ឋកម្ពុជាមានសិទ្ធិដឹងឮអ្វីៗដែលបានកើតឡើងក្នុងអតីតកាលក្នុងសម័យកម្ពុជាប្រជាធិបតេយ្យ ហើយពួកគេក៏មានសិទ្ធិទទួលបានយុត្តិធម៌ ដែលបង្ហាញចេញជាពិសេសតាមរយៈការចូលរួមយ៉ាងពេញលេញរបស់ពួកគេក្នុងដំណើរការនីតិវិធីនៃសាលាក្ដីខ្មែរក្រហម។ ក្រុមអង្គការក្រៅរដ្ឋាភិបាលដដែលបានអំពាវនាវឲ្យសហគមអន្ដរជាតិចេញអន្ដរាគមន៍ក្នុងករណីនេះ។ លោក ឌឹម សុវណ្ណារុំ អ្នកនាំពាក្យម្នាក់របស់សាលាក្ដីខ្មែរក្រហមមានប្រសាសន៍ថា សាលាក្ដីខ្មែរក្រហមបានឈរលើគោលការណ៍ឯករាជ្យរបស់ខ្លួន ហើយចៅក្រមស៊ើបអង្កេតមិនអាចផ្ដល់ព័ត៌មានណាមួយជាសាធារណៈដែលធ្វើឲ្យប៉ះពាល់ដល់ការស៊ើបអង្កេតរបស់ខ្លួននោះឡើយ។ «សហចៅក្រមស៊ើបអង្កេតយល់អំពីកង្វល់ និងតម្រូវការផ្នែកព័ត៌មាន ក៏ប៉ុន្ដែលោកក៏ត្រូវគោរពនូវតួនាទីឯករាជ្យ និងភាពស្ងាត់នៃការងារស៊ើបអង្កេតរបស់លោកដែរ»។ រដ្ឋាភិបាលកម្ពុជាបានជំទាស់យ៉ាងខ្លាំង និងជាចំហដោយខ្លួនមិនចង់ឲ្យសំណុំរឿង០០៣ និង០០៤ លេចចេញជារូបរាងនោះ។ សំណុំរឿងនេះមានជនសង្ស័យសរុបចំនួនប្រាំនាក់ហើយដែលប្រភពខ្លះបានលើកឡើងថា ពួកគេជាប់ពាក់ពន្ធ័នឹងការស្លាប់របស់ប្រជាពលរដ្ឋកម្ពុជាយ៉ាងតិចចំនួន ១សែននាក់។ កាលពីថ្ងៃទី២៩ ខែមេសា សហចៅក្រមស៊ើបអង្កេតទើបតែបានប្រកាសថា ខ្លួនបានបញ្ចប់ការស៊ើបអង្កេតសំណុំរឿង០០៣ ប៉ុន្ដែមិនបានបង្ហាញព័ត៌មានពិស្ដារ ឬការបោះជំហានសម្រាប់សំណុំរឿង ០០៤នោះទេ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
