VOA News: ព័ត៌មាន: “តុលាការខ្មែរក្រហមប្រកាសកាលបរិច្ឆេទសវនាការបឋមសំណុំរឿង០០២” plus 1 more |
| តុលាការខ្មែរក្រហមប្រកាសកាលបរិច្ឆេទសវនាការបឋមសំណុំរឿង០០២ Posted: 16 May 2011 12:51 PM PDT អង្គជំនុំជម្រះសាលាដំបូងនៃសាលាក្ដីខ្មែរក្រហមនៅថ្ងៃច័ន្ទនេះ បានជូនដំណឹងជាផ្លូវការថាខ្លួននឹងបើកសវនាការបឋមសំណុំរឿង០០២ ដ៏មានសារៈសំខាន់នៅថ្ងៃទី២៧រហូតដល់ថ្ងៃទី៣០ខែមិថុនា ខាងមុខនេះ ដើម្បីកំណត់របៀបវារៈបើកសវនាការពេញអង្គ ដែលមន្ដ្រីសង្គមស៊ីវិលចាត់ទុកថានេះគឺជាការចាប់ផ្តើមនៃការកាត់ទោសអតីតមេដឹកនាំកំពូលខ្ពស់បំផុតនៃរបបខ្មែរក្រហម។ របបនេះដែលបានបង្កឲ្យប្រជាពលរដ្ឋកម្ពុជាស្លាប់ប្រមាណ១លាន៧សែននាក់ ចន្លោះពីឆ្នាំ១៩៧៥ដល់ឆ្នាំ១៩៧៩។ នៅក្នុងសេចក្ដីជូនដំណឹងរបស់ខ្លួន ប្រធានអង្គជំនុំជម្រះសាលាដំបូង លោកចៅក្រម និល ណុន បានបញ្ជាក់ថា ក្នុងអំឡុងសវនាការរយៈពេលបួនថ្ងៃនេះ សាលាដំបូងនឹងពិនិត្យទៅលើចំនួនសាក្សីអ្នកជំនាញ និងចំនួនភាគីដើមបណ្ដឹងរដ្ឋប្បវេណីដែលមានចំនួនសរុប១.០៩៤នាក់។ សាលាដំបូងក៏នឹង ពិនិត្យផងដែរលើអញ្ញត្រកម្មទាក់ទងទៅនឹងវិធានទី៨៩ នៃវិធានផ្ទៃក្នុងដែលរួមមានការទាក់ទងទៅនឹងយុត្តធិការនិងសេចក្ដីសម្រេចរបស់សាលាដំបូងជាដើម។ មួយវិញទៀតអង្គជំនុំជម្រះសាលាដំបូងក៏នឹងធ្វើការបញ្ជាក់ជាបឋមអំពីការទាមទារសំណងដែលរួមមានសំណងជាសមូហភាព និងសំណងផ្លូវចិត្ត។ លោកចៅក្រមនិល ណុន បានបញ្ជាក់បន្ថែមថា សវនាការពេញអង្គសេចក្ដីនៃសំណុំរឿង០០២អាចនឹងប្រព្រឹត្តិទៅនៅក្នុងអំឡុងខែសីហាឆ្នាំ២០១១នេះ។ សំណុំរឿង០០២ មានជនជាប់ចោទចំនួនបួននាក់ ដែលសុទ្ធសឹងជាមេដឹកនាំកំពូលៗនៃរបបកម្ពុជា ប្រជាធិបតេយ្យ។ នួន ជា អតីតប្រធានសភាខ្មែរក្រហម ខៀវ សំផន អតីតប្រមុខរដ្ឋ អៀង សារី អតីតឧបនាយករដ្ឋមន្ដ្រី និងជារដ្ឋមន្ដ្រីក្រសួងការបរទេសនិងប្រពន្ធរបស់គាត់ អៀង ធីរិទ្ធ អតីតរដ្ឋមន្ដ្រីក្រសួងសង្គមកិច្ច ត្រូវចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្រ្គាម ឧក្រិដ្ឋកម្មនៃបទប្រល័យពូជសាសន៍។ លោក ឌឹម សុវណ្ណារុំ អ្នកនាំពាក្យសាលាក្ដីខ្មែរក្រហមមានប្រសាសន៍ថា ការកាត់ទោសអតីតមេដឹកនាំខ្មែរក្រហមទាំងបួនរូបនឹងក្លាយជាការបកស្រាយនូវអាថ៌កំបាំងនានាក្នុងសម័យដែលពួកគេគ្រប់គ្រងអំណាច។ «ប្រជាពលរដ្ឋដែលកន្លងមកឆ្ងល់ថា ហេតុអ្វីបានជារបបហ្នឹង មានការសម្លាប់មនុស្ស មានការធ្វើទុក្ខបុកម្នេញ សំណួរដែលពួកគាត់តែងតែសួរនោះ ចម្លើយអាចនឹងត្រូវបង្ហាញតាមរយៈសវនាការជាសាធារណៈដែលនឹងចាប់ផ្ដើមជាផ្លូវការនៅខែសីហា ឬខែកញ្ញាឆ្នាំ២០១១តទៅ»។ ដោយឡែកលោក ឆាំង យុ នាយកមជ្ឈមណ្ឌលឯកសារកម្ពុជាអធិប្បាយថា ការបើកសវនាការបឋមនៅខែក្រោយនេះប្រៀបដូចជាការចាប់ផ្ដើមកាត់ទោសពួកអតីតមេដឹកនាំខ្មែរក្រហមដែរ។ «និយាយឲ្យខ្លីទៅករណីសំណុំរឿង០០២ បានចាប់ផ្តើមដំណើរការហើយ នៅក្នុងខែក្រោយនេះជា ការកាត់ក្តីដ៏សំខាន់មួយ ជាប្រវត្តិសាស្រ្តមួយ ជាលក្ខណៈនយោបាយស៊ីជម្រៅមួយ ហើយប្រជាជន ទាំងអស់នៅតែបន្តការឃ្លាំមើល ជាដំណើរការមួយដែលបង្ហាញអំពីសមត្ថភាពរបស់អង្គការសហប្រជាជាតិក្នុងការរៀបចំដំណើរការនេះ»។ ជាមួយគ្នានេះ លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្ដីការគណរដ្ឋមន្ដ្រីយល់ថានេះ ជាដំណាក់កាលដ៏មានសារៈសំខាន់ និងប្រវត្តិសាស្ដ្រ។ «គឺជាករណីមួយដ៏មានសារៈសំខាន់ ហើយជាប្រវត្តិសាស្រ្តនៃសាលាក្តីខ្មែរក្រហម ដែលរាជរដ្ឋាភិបាលវាយតម្លៃខ្ពស់ចំពោះការខំប្រឹងប្រែងរបស់សាលាក្តីខ្មែរក្រហមនេះឯងដើម្បីប្រជាពលរដ្ឋដែលទទួលរងគ្រោះចំពោះរបបដែលហៅថាប្រល័យពូជសាសន៍»។ សូមបញ្ជាក់ថា មានដើមបណ្ដឹងរដ្ឋប្បវេណីសរុបចំនួនជាង២.០០០នាក់ដែលត្រូវទទួលស្គាល់ ដោយសហចៅក្រមស៊ើបអង្កេត។ ក៏ប៉ុន្ដែមានតែដើមបណ្ដឹងរដ្ឋប្បវេណីមួយចំនួនតែប៉ុណ្ណោះ ដែល ត្រូវបានបញ្ជូនឈ្មោះទៅកាន់អង្គជំនុំជម្រះសាលាដំបូង ដើម្បីធ្វើការសម្រេចដោយយោងទៅលើ លទ្ធភាពរបស់ពួកគេនៅក្នុងការចូលរួមដំណើរការផ្ទាល់ក្នុងសវនាការ៕ This posting includes an audio/video/photo media file: Download Now |
| សមយុទ្ធរវាងកម្ពុជាស.រ.អា.និងប្រទេសផ្សេងទៀតចាប់ផ្តើម Posted: 16 May 2011 12:24 PM PDT មន្ត្រីយោធាកម្ពុជាបានថ្លែងនៅថ្ងៃច័ន្ទនេះថា បុគ្គលិកយោធាជាង៤០០នាក់ពីសហរដ្ឋអាមេរិក ប្រទេសកម្ពុជា ប្រទេសឥណ្ឌូនេស៊ី ប្រទេសម៉ាឡេស៊ី និងប្រទេសម៉ុងហ្គោលី បានចាប់ផ្តើមរៀបចំកិច្ចការរបស់ខ្លួននៅថ្ងៃច័ន្ទនេះ សម្រាប់ការបើកធ្វើលំហាត់ហ្វឹកហ្វឺនជំនាញថែរក្សាសន្តិភាពនៅក្នុងប្រទេសកម្ពុជានៅថ្ងៃពុធសប្តាហ៍នេះ។ លំហាត់យោធាសម្រាប់បណ្តុះបណ្តាលការថែរក្សាសន្តិភាព ដែលដឹកនាំដោយសហរដ្ឋអាមេរិកនេះ ត្រូវបានរៀបចំធ្វើនៅមូលដ្ឋានយោធាក្នុងស្រុកភ្នំស្រួច ខេត្តកំពង់ស្ពឺ ចាប់ពីថ្ងៃទី១៨ដល់ថ្ងៃទី២៧ខែឧសភានេះ។ លោកឧត្តមសេនីយ៍ត្រី កែន សូសាវឿន នាយករងនៃនាយកដ្ឋានប្រតិបត្តិការសន្តិភាពនៅមជ្ឈមណ្ឌលជាតិសម្រាប់ថែរក្សាសន្តិភាព បានថ្លែងប្រាប់ វីអូអេ ខ្មែរ ថា បុគ្គលិកយោធាសហរដ្ឋអាមេរិកចំនួន១៣៩នាក់ កងទ័ពកម្ពុជាចំនួន៣៧៣នាក់ និងកងទ័ពប្រមាណ៣០នាក់ទៀតមកពីប្រទេសឥណ្ឌូនេស៊ី ប្រទេសម៉ាឡេស៊ី ប្រទេសម៉ុងហ្គោលី និងអង្គការសហប្រជាជាតិ ត្រូវចូលរួមនៅក្នុងលំហាត់នេះ។ «ខ្ញុំរើអីវ៉ាន់ចូលផ្ទះហើយ រៀបចំទុកដាក់ហើយ ដល់ថ្ងៃទី១៨ យើងធ្វើការបើកការហ្វឹកហាត់ជាផ្លូវការ»។ លោកឧត្តមសេនីយ៍ឯកឈុំ សុជាតិ អ្នកនាំពាក្យក្រសួងការពារជាតិបានថ្លែងប្រាប់ វីអូអេ ខ្មែរ យ៉ាងដូច្នេះថា៖ «សមយុទ្ធអំពីការបណ្តុះបណ្តាលថែរក្សាសន្តិភាព និងមនុស្ស។ សំខាន់យើងប្រមូលផ្តុំបញ្ហាគ្រប់គ្រង សន្តិភាព និងមនុស្សធម៌។ យើងប្រឹងប្រែងអស់លទ្ធភាពរបស់យើង ហើយយើងមានសមត្ថភាពធ្វើបានប៉ុណ្ណឹង។ វាជាមោទនភាពណាស់»។ លោកឧត្តមសេនីយ៍ឯកឈុំ សុជាតិ បានបញ្ជាក់ថា កងទ័ពទាំងអស់នឹងត្រូវហ្វឹកហាត់រួមគ្នា ដើម្បីត្រៀមរៀបចំសម្រាប់បេសកកម្មថែរក្សាសន្តិភាពនាពេលអនាគត ហើយសមយុទ្ធហ្វឹកហាត់នេះត្រូវផ្តោតទៅ លើមុខជំនាញសំខាន់ៗមួយចំនួន គឺការបញ្ជាការសមរភូមិន្ទ វិស្វកម្មទាក់ទងនឹងការជួសជុលមន្ទីរពេទ្យ ផ្ទះសម្បែង សាលារៀន និងការសង្គ្រោះទាក់ទងនឹងមនុស្សធម៌។ លោកឧត្តមសេនីយ៍ឯកឈុំ សុជាតិបានថ្លែងថា សមយុទ្ធថែរក្សាសន្តិភាពនេះ គឺជាបទពិសោធន៍មួយល្អណាស់សម្រាប់ប្រទេសកម្ពុជា ហើយសមយុទ្ធនេះបង្ហាញនូវការរីកចម្រើនរបស់រដ្ឋាភិបាលនិង កងយោធពលខេមរភូមិន្ទ និងបង្ហាញនូវសន្តិសុខ និងសន្តិភាពនៅក្នុងប្រទេសកម្ពុជា។ «ខ្ញុំគិតថា ការធ្វើសមយុទ្ធនេះសំខាន់បំផុតបង្កើននូវកិច្ចសហប្រតិបត្តិការរវាងកងទ័ពសហរដ្ឋអាមេរិក និងកងយោពលខេមរភូមិន្ទ។ នេះបញ្ហាសំខាន់ណាស់គឺបង្កើននូវកិច្ចសហប្រតិបត្តិការមិត្តភាពរវាងកងទ័ពសហរដ្ឋអាមេរិក និងកម្ពុជា ហើយយើងបានផ្លាស់ប្តូរបទពិសោធន៍រវាងគ្នាទៅវិញទៅមក»។ ការធ្វើសមយុទ្ធនេះគឺជាការធ្វើសមយុទ្ធ ឆ្មាំអង្គរឆ្នាំ២០១១ លើកទីពីរ បន្ទាប់ពីប្រទេសកម្ពុជាបានធ្វើ សមយុទ្ធបែបនេះនៅក្នុងឆ្នាំ២០១០ ដែលជាផ្នែកមួយនៃការផ្តួចផ្តើមគំនិតប្រតិបត្តិការថែរក្សាសន្តិភាព ពិភពលោក ដែលគាំទ្រដោយសហរដ្ឋអាមេរិក សំដៅអភិវឌ្ឍសមត្ថភាពនានាផ្នែកថែរក្សាសន្តិភាពរបស់ប្រទេសកំពុងអភិវឌ្ឍ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
