VOA News: ព័ត៌មាន: “អ្នករួចជីវិតពីគុកទួលស្លែងទន្ទឹងចង់ចាំយុត្តិធម៌ពីការកាត់ទោសខ្មែរក្រហម” plus 4 more |
- អ្នករួចជីវិតពីគុកទួលស្លែងទន្ទឹងចង់ចាំយុត្តិធម៌ពីការកាត់ទោសខ្មែរក្រហម
- កម្ពុជាធ្វើច្បាប់ថ្មីមួយសម្រាប់គ្រប់គ្រងសហជីពកម្មករ
- តុលាការក្រុងភ្នំពេញសម្រេចចោទជនសង្ស័យរកស៊ីថ្នាំញៀន
- រលកយក្សស៊ូណាមីអាចបន្ថយជំនួយជប៉ុនសម្រាប់អន្តរជាតិ
- សវនាការបណ្ដឹងឧទ្ធរណ៍របស់ឌុចគ្រោងធ្វើរយៈពេលបីថ្ងៃ
| អ្នករួចជីវិតពីគុកទួលស្លែងទន្ទឹងចង់ចាំយុត្តិធម៌ពីការកាត់ទោសខ្មែរក្រហម Posted: 15 Mar 2011 02:12 PM PDT អ្នករួចជីវិតពីការកាប់សម្លាប់នៅក្នុងគុកទួលស្លែងដែលកាន់តែមានវ័យចំណាស់កំពុងទន្ទឹងរកយុត្តិធម៌ចុងក្រោយពីការកាត់ទោសឌុច នៅចុងខែមិនានេះ។ ការចង់ឃើញឌុចត្រូវនាំខ្លួនយកមកកាត់ទោសជាចុងក្រោយ ការរង់ចាំលទ្ធផលនៃសេចក្ដីសម្រេចផ្ដន្ទាទោសឌុច ការទាមទារឲ្យមានការដាក់ទោសឌុចឲ្យបានធ្ងន់ធ្ងរបំផុត កំពុងតែដក់ជាប់ក្នុងអារម្មរណ៍របស់អតីតអ្នកទោសគុកទួលស្លែងដែលនៅរស់រានមានជីវិតទាំងបីនាក់ គឺលោកវ៉ាន់ ណាត លោក ប៊ូ ម៉េងនិងលោកជុំ ម៉ី។ អស់រយៈពេលជាង៣១ឆ្នាំមកហើយ ដែលអតីតអ្នកទោសរបស់អង្គការខ្មែរក្រហមទាំងបីនាក់ បានរង់ចាំថ្ងៃនេះ គឺថ្ងៃកាំង ហ្គិចអ៊ាវ ដែលមានឈ្មោះយ៉ាងល្បីល្បាញជា ឌុច ត្រូវផ្តន្ទាទោសជាចុងក្រោយដោយពុំអាចតវ៉ាបាន។ នោះគឺជាការសម្រេចក្ដីរបស់អង្គជំនុំជម្រះតុលាការកំពូល។ តុលាការកំពូលរបស់សាលាក្ដីខ្មែរក្រហមនឹងបើកសវនាការដើម្បីសម្រេចលើបណ្ដឹងឧទ្ធរណ៍របស់ឌុច និងភាគីជាប់ពាក់ព័ន្ធ នៅថ្ងៃទី ២៨ ខែមិនា រហូតដល់ថ្ងៃទី៣០ ឬ៣១ខែមិនានេះ។ លោកប៊ូ ម៉េង ដែលប្រពន្ធរបស់គាត់ត្រូវសម្លាប់ក្នុងគុកទួលស្លែងដែរ មានប្រសាសន៍ថា ការផ្ដន្ទាទោសឌុចឲ្យជាប់គុកអស់មួយជីវិតគឺជាថ្នាំដែលនឹងជួយព្យាបាលរបួសផ្លូវចិត្តរបស់លោកបានមួយផ្នែក។ «ខ្ញុំរង់ចាំយ៉ាងអន្ទះសារ។ ខ្ញុំចង់ចូលរួមដោយផ្ទាល់ ចង់ស្ដាប់សាលក្រមជាចុងក្រោយបង្អស់នេះ ថាតើនឹងយ៉ាងម៉េច? ប៉ុន្ដែខ្ញុំសំណូមពរថា កំហុសរបស់ឌុចហ្នឹងធ្ងន់ណាស់។ បើឲ្យខ្ញុំធូរស្បើយ លុះណាតែឌុចជាប់គុកមួយជីវិត ដូចខ្ញុំសំណូមពរ»។ ជាមួយគ្នានេះ លោកជុំ ម៉ី បច្ចុប្បន្នជាប្រធានសមាគមជនរងគ្រោះដោយរបបកម្ពុជាប្រជាធិបតេយ្យក្សេមក្សាន្ត (Victims Association of Ksemksan )និងជាអតីតអ្នកទោសគុកទួលស្លែងម្នាក់ទៀត ក៏យល់ដូចគ្នាដែរថា តុលាការកំពូលរបស់សាលាក្ដីខ្មែរក្រហមគួរតែដាក់ទោសឌុចឲ្យជាប់ពន្ធនាគារអស់មួយជីវិត។ «ការដាក់ទោសអស់មួយជីវិតគឺទុកជាគម្រូសម្រាប់ប្រវត្តិសាស្ដ្រ សម្រាប់ក្មេងៗជំនាន់ក្រោយ។ យើងខ្លាចក្មេងដើរតាមរបបបីឆ្នាំប្រាំបីខែម្ភៃថ្ងៃនេះទៀត។ យើងគិតមើល សម្លាប់គេអស់រាប់ម៉ឺន រាប់ពាន់ មានទោសតែ១៩ឆ្នាំ តើសម ឬមិនសម? ហើយយើងប្រកាសថា តុលាការនេះជាតុលាការគម្រូសម្រាប់ពិភពលោក។ ចុះគម្រូយ៉ាងម៉េចបើឌុចជាប់គុកតែ១៩ឆ្នាំហ្នឹង?» សម្រាប់លោកវ៉ាន់ ណាត បើទោះបីជាឌុចត្រូវទទួលទោសតិច ឬក៏ច្រើន ក៏លោកនៅតែចាត់ទុកថា នោះគឺជាយុត្តិធម៌ដែលលោកបានរង់ចាំសម្រាប់ការកាត់ទោសចុងក្រោយនេះ។ «ក្នុងចិត្តខ្ញុំរាល់ថ្ងៃ ខ្ញុំរំពឹងថា ក្នុងប្រវត្តិសាស្ដ្រ គឺឌុចត្រូវតែមានទោស ទោះបីតិច ឬច្រើន។ ខ្ញុំនឹងឯកភាពយកលទ្ធផលនោះទាំងអស់ដោយយល់ឃើញថា នេះជាយុត្តិធម៌សម្រាប់ខ្ញុំជាជនរងគ្រោះ។ សព្វថ្ងៃខ្ញុំរង់ចាំលទ្ធផលនេះដើម្បីឲ្យដឹងច្បាស់ថា តើគាត់មានទោសកម្រិតណា។ ដូច្នេះខ្ញុំរង់ចាំតែពេលនោះ ដើម្បីឲ្យច្បាស់ក្នុងចិត្ត»។ មានអ្នកទោសយ៉ាងតិចចំនួន១២៣៨០នាក់ត្រូវបានសម្លាប់បន្ទាប់ពីការធ្វើទារុណកម្មក្នុងគុកទួលស្លែង ឬមន្ទីរស២១។ មានតែអ្នកទោសប្រមាណជា១០នាក់ប៉ុណ្ណោះដែលនៅរស់រានមានជីវិត។ ក្នុងនោះអតីតអ្នកទោសមួយចំនួនបានស្លាប់បាត់បង់ជីវិតទៅហើយក្នុងពេលដែលសាលាក្ដីខ្មែរក្រហមមិនទាន់លេចរូបរាងនៅឡើយ។ ឌុច ដែលឆ្នាំនេះមានអាយុ៦៨ឆ្នាំហើយនោះ ត្រូវចោទប្រកាន់ពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មនៃការធ្វើទារុណកម្ម និងមនុស្សឃាត បន្ទាប់ពីការកាត់ទោសចន្លោះពីខែមិនារហូតដល់ខែកញ្ញាឆ្នាំ២០០៩។ អង្គជំនុំជម្រះសាលាដំបូងបានសម្រេចផ្ដន្ទាទោសឌុចឲ្យជាប់ពន្ធនាគារ៣៥ឆ្នាំ ក៏ប៉ុន្ដែទោសនេះត្រូវកាត់កងនៅសល់ត្រឹមតែ១៩ឆ្នាំប៉ុណ្ណោះ។ សហព្រះរាជអាជ្ញា ជនរងគ្រោះ និងមេធាវីតំណាងឲ្យដើមបណ្ដឹងរដ្ឋប្បវេណីបានជំទាស់ទៅនឹងការដាក់ទោសនេះ ដោយលើកឡើងថា គឺជាកម្រិតទោសដែលមិនសមល្មមនឹងបទឧក្រិដ្ឋរបស់ឌុចនោះទេ។ កាលពីព្រឹកថ្ងៃអង្គារ ក្រុមមេធាវីតំណាងឲ្យដើមបណ្ដឹងរដ្ឋប្បវេណីបានជួបប្រជុំគ្នាដើម្បីរកវិធីសាស្ដ្រផ្សេងសម្រាប់ការពារប្រយោជន៍អតីតជនរងគ្រោះនៅគុកទួលស្លែង និងក្រុមគ្រួសាររបស់ពួកគេ។ លោកហុង គឹមសួន មេធាវីតំណាងឲ្យដើមបណ្ដឹងរដ្ឋប្បវេណីម្នាក់ក្នុងក្រុម២ បានលើកឡើងថា ក្រុមមេធាវីនឹងសង្កត់ធ្ងន់លើការទាមទារសំណង រួមទាំងការទាមទារឲ្យមានការទទួលស្គាល់ជនរងគ្រោះដែលត្រូវទាត់ចោលពីបញ្ជីដើមបណ្ដឹងរដ្ឋប្បវេណី។ «ដើមបណ្ដឹងរដ្ឋប្បវេណីទាំងឡាយ ដែលចៅក្រមបដិសេធនោះ បានត្រៀមនិយាយឡើងវិញ ព្រមទាំងត្រៀមនិយាយអំពីសំណងផ្លូវចិត្ត និងសំណងសមូហភាពឡើងវិញ»។ លោកជុំ ម៉ីលើកឡើងថា គួរតែមានការសម្រេចធ្វើស្ដូបមួយនៅសារមន្ទីរទួលស្លែងដែលជាអតីតគុកទួលស្លែង ដើម្បីចារឹកឈ្មោះជនរងគ្រោះទាំងអស់នៅលើនោះ។ ឌុចត្រូវចាប់ខ្លួនដោយរដ្ឋាភិបាលកាលពីខែឧសភា ឆ្នាំ១៩៩៩ ហើយក្រោយមកត្រូវបញ្ជូនទៅដាក់ឃុំឃាំងបណ្ដោះអាសន្នក្រោមការគ្រប់គ្រងរបស់សាលាក្ដីខ្មែរក្រហមវិញ។ ជនជាប់ចោទរូបនេះមានតួនាទីគ្រប់គ្រងគុកទួលស្លែងមន្ទីរស២៤ ឬគុកព្រៃសនិងបឹងជើងឯកដែលជាទីលានពិឃាតអ្នកទោស។ ទំរាំមកដល់ថ្ងៃនេះ អតីតជនរងគ្រោះដោយផ្ទាល់ក្នុងគុកទួលស្លែងទាំងបីនាក់មានវ័យកាន់តែចាស់ជរាទៅហើយ។ លោកជុំ ម៉ីបានឈានដល់វ័យ៨០ឆ្នាំនៅឆ្នាំនេះ។ ដោយឡែកលោកវ៉ាន់ ណាតមានអាយុ៦៦ឆ្នាំ ប៉ុន្ដែលោកមានសភាពទ្រុឌទ្រោមដោយសារតែលោកមានជំងឺប្រចាំកាយ។ រីឯលោកប៊ូ ម៉េងក៏មានវ័យជាង៦០ឆ្នាំទៅហើយដែរ។ ទោះជាយ៉ាងណា ពួកគាត់អះអាងថា ពួកគាត់នឹងធ្វើដំណើរទៅទស្សនាការកាត់ទោសនៅអង្គជំនុំជម្រះតុលាការកំពូលដោយផ្ទាល់។ ក្រុមមេធាវី និងជនរងគ្រោះបានលើកឡើងដូចគ្នាថា សេចក្ដីសម្រេចរបស់អង្គជំនុំជម្រះតុលាការកំពូលគឺជាតម្លៃយុត្តិធម៌របស់ជនរងគ្រោះនៅទួលស្លែង ហើយគឺជាគម្រូនៃការផ្ដល់យុត្តិធម៌ដល់ជនរងគ្រោះដោយរបបខ្មែរក្រហម ជាពិសេសសម្រាប់សំណុំរឿង០០២ ដែលគ្រោងនឹងបើកសវនាការនៅក្នុងខែមិថុនាឆ្នាំនេះ។ ម្យ៉ាងវិញទៀត វាក៏អាចជាគម្រូយុត្តិធម៌សម្រាប់សំណុំរឿង០០៣ និង០០៤ ប្រសិនបើអាច កើតមានក្នុងពេលខាងមុខនេះ៕ សូមលោក អ្នករង់ចាំស្ដាប់សេចក្ដីរាយការណ៍ភាគទីបីដែលជាភាគបញ្ចប់របស់លោក គង់ សុឋានរិទ្ធ នៅថ្ងៃស្អែក។ លោក គង់ សុឋានរិទ្ធ នឹងធ្វើបទសម្ភាសន៍ដោយផ្ទាល់ជាមួយលោកកង ឫទ្ធារី សហមេធាវីការពារក្ដីឲ្យឌុច និងការរៀបចំការការពារក្ដីរបស់មេធាវីចុងចោទ។ សូមអគុណ! This posting includes an audio/video/photo media file: Download Now |
| កម្ពុជាធ្វើច្បាប់ថ្មីមួយសម្រាប់គ្រប់គ្រងសហជីពកម្មករ Posted: 15 Mar 2011 01:21 PM PDT ប្រទេសកម្ពុជាកំពុងតាក់តែងច្បាប់ថ្មីមួយសម្រាប់គ្រប់គ្រងសហជីពកម្មករ។ ក្រុមមេដឹកនាំសហជីពបានហៅសេចក្តីព្រាងច្បាប់នេះថា ជាឧបករណ៍ច្បាប់សម្រាប់រារាំងសិទ្ធិសេរីភាពនៃការបង្កើតសហជីព ការចូលរួមសហជីព និងការធ្វើសកម្មភាពរបស់សហជីព។ ប៉ុន្តែមន្ត្រីរដ្ឋាភិបាលបានបដិសេធការអះអាងនេះដោយបញ្ជាក់ថា សេចក្តីព្រាងច្បាប់នេះមានបំណងធ្វើឱ្យមានភាពសុខដុមនៅក្នុងសង្គម។ ក្រសួងការងារកំពុងតែតាក់តែងសេចក្តីព្រាងច្បាប់ស្តីពីសហជីពកម្មករដើម្បីគ្រប់គ្រងលើសហជីពជាច្រើននៅក្នុងប្រទេសកម្ពុជា។ ក្រុមមេដឹកនាំសហជីពកម្មករនៅថ្ងៃអង្គារនេះបានសម្តែងការព្រួយបារម្ភអំពីការប្រើសេចក្តីព្រាងច្បាប់នេះដើម្បីប្រឆាំងនឹងសហជីពណាដែលមិនធ្វើតាមបន្ទាត់នយោបាយរបស់រដ្ឋាភិបាល។ សេចក្តីព្រាងច្បាប់ស្តីពីសហជីពដែលមាន៩២មាត្រាបានចែងថា ចំពោះលក្ខខណ្ឌតម្រូវឱ្យស្នើសុំចុះបញ្ជី បញ្ជីរាយនាមនៃសមាជិកដែលបានបង់ភាគទានយ៉ាងហោចណាស់២០ភាគរយ ឬសមាជិកចំនួន២០ភាគរយដែលបានអនុញ្ញាតឱ្យកាត់ប្រាក់ឈ្នួល ដើម្បីបង់ភាគទាន។ សហជីពត្រូវរាយការណ៍ពីសកម្មភាពការងារទៅក្រសួងការងារជាទៀងទាត់ បើមិនដូច្នេះទេ ក្រសួងការងារនឹងមានសិទ្ធិព្យួរ ឬបញ្ចប់សកម្មភាពរបស់សហជីព។ សហជីពនឹងត្រូវបានរំលាយដោយសេចក្តីសម្រេចរបស់តុលាការ នៅពេលមានពាក្យបណ្តឹងពីជនពាក់ព័ន្ធទីបី ឬក្រសួងការងារ។ មេដឹកនាំសហជីព ដែលបានរកឃើញថា មានការរំលោភលើលក្ខខណ្ឌដែលបានចែងនៅក្នុងមាត្រាច្បាប់នេះនឹងត្រូវពិន័យរហូតដល់២៥០០ដុល្លារអាមេរិក និងជាប់ពន្ធនាគាររហូតដល់បីឆ្នាំ។ លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានថ្លែងប្រាប់ក្រុមអ្នករាយការណ៍ព័ត៌មាននៅសណ្ឋាគារសាន់វ៉េថា ច្បាប់នេះមានការរឹតបន្តឹងយ៉ាងខ្លាំងទៅលើសិទ្ធិសេរីភាពក្នុងការបង្កើតសហជីព ការចូលរួមសហជីព និងការធ្វើសកម្មភាពសហជីព។ «ខ្ញុំគិតថា បើច្បាប់នេះនឹងត្រូវបានអនុម័តដោយគ្មានការបញ្ចូលអនុសាសន៍របស់សហជីពទេ សហជីពកម្មករមិនមានវត្តមាននៅកម្ពុជា នាពេលអនាគត ប៉ុន្តែមានតែសហជីពដែលគាំទ្រដោយថៅកែរោងចក្រប៉ុណ្ណោះ។ ការតវ៉ាដើម្បីដំឡើងប្រាក់ឈ្នួល ល័ក្ខខ័ណ្ឌការងារ សុខភាព និងសេរីភាពសហជីពនឹងមិនមានទៀតទេ»។ លោករ៉ុង ឈុន ប្រធានសហភាពសហជីពកម្ពុជា បានបញ្ជាក់ថា ច្បាប់នេះនឹងបិទមាត់មេដឹកនាំសហជីព មិនស្និទ្ធនឹងរដ្ឋាភិបាល បើច្បាប់នេះមិនបានធ្វើការកែលំអរនោះ។ «មាត្រា១២ ១៩ ២០ ២១ ២៧ ២៩ ៣០ និង៣៩បានរឹតបន្តឹងសិទ្ធិសេរីភាពសហជីព ធ្ងន់ធ្ងរណាស់ ដែលផ្ទុយពីអនុសញ្ញាពលកម្មអន្តរជាតិ និងរដ្ឋធម្មនុញ្ញកម្ពុជា»។ លោកមឿន តុលា មន្រ្តីទទួលបន្ទុកកិច្ចការអប់រំច្បាប់សម្រាប់សហគមន៍ បានថ្លែងថាសេចក្តីព្រាងច្បាប់នេះជាប្រព័ន្ធនៃចំណងច្បាប់ ដើម្បីបង្កើតសហជីព និងបានផ្តល់អំណាចយ៉ាងធំធេងដល់ក្រសួងការងារ ក្នុងការចុះ ឬមិនចុះបញ្ជីការ។ «ក្រសួងមានសិទ្ធិបដិសេធការសុំបញ្ជីការរបស់សហជីព និងព្យួរបញ្ជីការរបស់សហជីព និងដកហូតបញ្ជីការរបស់សហជីព និងប្តឹងទៅតុលាការ ដើម្បីលុបចោលបញ្ជីការរបស់សហជីព និងគាបសង្កត់ថ្នាក់ដឹកនាំសហជីពដែលអាចប្រឈមនឹងការជាប់ពន្ធនាគារ»។ លោកហួយ ហានសុង អនុរដ្ឋលេខាធិការក្រសួងការងារ បានថ្លែងថា សេចក្តីព្រាងច្បាប់នេះមានបំណងធ្វើឱ្យមានភាពសុខដុមនៅក្នុងសង្គម និងមិនមានបំណងគាបសង្កត់លើភាគីណាមួយទេ ហើយសេចក្តីព្រាងច្បាប់កំពុងតែដំណើរការតាក់តែងនៅក្នុងដៃរបស់ក្រសួងការងារ។ ប្រទេសកម្ពុជាមានសហជីពកម្មករចំនួន៦២។ សហជីពខ្លះមានជំហរទៅរករដ្ឋាភិបាល និងថៅកែរោងចក្រ នេះបើយោងតាមក្រុមមេដឹកនាំសហជីព៕ This posting includes an audio/video/photo media file: Download Now |
| តុលាការក្រុងភ្នំពេញសម្រេចចោទជនសង្ស័យរកស៊ីថ្នាំញៀន Posted: 15 Mar 2011 01:03 PM PDT តុលាការក្រុងភ្នំពេញបានចោទប្រកាន់ជនជាតិវៀតណាម៥រូប និងជនជាតិលាវមួយរូប ពីបទជួញដូរថ្នាំញៀនខុសច្បាប់ រួចបានបញ្ជូនទៅឃុំខ្លួននៅពន្ធនាគារព្រៃស។ ក្រុមមន្ត្រីប៉ូលិស និងមន្ត្រីបង្ក្រាបគ្រឿងញៀនបាននិយាយថានឹងបន្តស្វែងរកជនសង្ស័យបន្ថែមទៀតពាក់ព័ន្ធនឹងការជួញដូរថ្នាំញៀននេះ។ តុលាការក្រុងភ្នំពេញនៅថ្ងៃអង្គារនេះ បានចោទប្រកាន់ជាផ្លូវការទៅលើជនជាតិវៀតណាមចំនួនប្រាំរូប និងជនជាតិលាវចំនួនមួយរូប ពីបទជួញដូរថ្នាំញៀនខុសច្បាប់ រួចហើយបានបញ្ជូនខ្លួនទៅឃុំឃំាងនៅក្នុងពន្ធនាគារព្រៃសភ្លាមៗ ដើម្បីរង់ចាំជំនុំជម្រះទោសក្រោយពីបានធ្វើការសាកសួរអស់រយៈពេលចំនួនពីរថ្ងៃ នេះបើតាមការបញ្ជាក់របស់មន្ត្រីតុលាការ។ លោក ហ៊ីង ប៊ុនជា ព្រះរាជអាជ្ញារងនៃតុលាការក្រុងភ្នំពេញ បាននិយាយថា ជនបរទេសទាំងប្រាំមួយរូបនេះត្រូវចោទប្រកាន់ពីបទជួញដូរថ្នាំញៀនខុសច្បាប់ដូចៗគ្នាទៅតាមមាត្រាទី៣៣នៃក្រមព្រហ្មទណ្ឌថ្មី។ ដោយឡែកជនជាតិឡាវមួយរូប ដែលជាមេខ្លោងក្នុងការជួញដូរថ្នាំញៀនស្រវឹងនេះ ត្រូវចោទប្រកាន់មួយករណីទៀតពីបទមិនរាងចាល ហើយបានប្រពឹ្រត្តបទឧក្រិដ្ឋជាថ្មី។ លោកបានមានប្រសាសន៍ទៀតថា ប្រសិនបើតុលាការរកឃើញថា មានទោសកំហុសពួកគេអាចប្រឈមមុខការជាប់ទោសរយៈពេលពី២០ឆ្នាំរហូតដល់មួយជីវិត អាស្រ័យទៅលើបរិមាណសារធាតុគ្រឿងញៀនទាំងនោះ។ «កោសលវិច្ច័យយើងអត់ទាន់ចេញ។ ក៏ប៉ុន្តែបរិមាណវាច្រើន ហើយបរិមាណគ្រឿងញៀនមានរហូតដល់ជាង១១គីឡូក្រាម។ បើសិនជាគិតភាគរយក្នុងមួយក្រាមនោះ វាមានភាពសុទ្ធប៉ុន្មានភាគរយ ហើយគុណតាមហ្នឹងទៅ។ បើចំនួនវាកាន់តែច្រើន អាហ្នឹងទោសកាន់តែធ្ងន់។ កម្រិតអតិប្បរមានៃទោសវាមាន២០ ដល់៣០ឆ្នាំនិងដល់អស់មួយជីវិត»។ កាលពីសប្តាហ៍មុនអាជ្ញាធរប៉ូលិសរបស់ក្រសួងមហាផ្ទៃបានចាប់ខ្លួនជនបរទេសចំនួនប្រាំមួយរូប ក្នុងនោះរួមមានជនជាតិឡាវមួយរូបនិងជនជាតិវៀតណាមចំនួនប្រាំរូបពីបទសង្ស័យថា ជាប់ពាក់ព័ន្ធនឹងការរត់ពន្ធថ្នាំញៀនខុសច្បាប់។ អាជ្ញាធរបានរឹបអូសថ្នាំញៀនប្រភេទមេតាំហ្វេតាមីនចំនួនជាង១០គីឡូក្រាម គឺប្រមាណជាង៨ម៉ឺនគ្រាប់ និងមេតាំហ្វេតាមីនទឹកកកចំនួនជាង៣គីឡូក្រាម។ លោកឧត្តមសេនីយ៍ឯកកង សុខន អគ្គស្នងការរងនគរបាលជាតិ បាននិយាយថា យើងកំពុងស្វែងរកចាប់ខ្លួនជនសង្ស័យបន្ថែមទៀតពាក់ព័ន្ធនឹងការជួញដូរថ្នាំញៀនទាំងនេះ។ លោកនាយករដ្ឋមន្រ្តីហ៊ុន សែន កាលពីថ្ងៃច័ន្ទ បានដាក់បទបញ្ជាដល់អាជ្ញាធរគ្រប់មូលដ្ឋាន ទាំងអស់ឲ្យចាត់វិធានការ ដើម្បីបង្រ្គាបថ្នាំញៀនស្រវឹង។ លោកបានមានប្រសាសន៍ទៀតថា ប៉ុន្មានថ្ងៃនេះការបង្ក្រាបគ្រឿងញៀន គឺបានវាយចំគោលដៅមួយចំនួនធំ ហើយលោកបានព្រមានដល់អ្នកដែលពាក់ព័ន្ធកុំប្រព្រឹត្តល្មើសច្បាប់ ក្រែងជាប់គុក មុនចូលឆ្នាំខ្មែរ។ លោកឧត្តមសេនីយ៍ឯកកង សុខនបានមានប្រសាសន៍ថា កម្ពុជាគឺជាប្រទេសឆ្លងកាត់ដោយសារការរត់ពន្ធថ្នាំញៀនពីបរទេស។ «បាទ វាពិតប្រាកដហើយ ប្រទេសយើងនេះជាប្រទេសរងគ្រោះ ជាប្រទេសឆ្លងកាត់ភាគច្រើន។ អាហ្នឹងសូមដឹងប៉ុណ្ណឹងសិនចុះ»។ កាលពីអំឡុងខែមករា អាជ្ញាធរបានចាប់ខ្លួនលោកឧត្តមសេនីយ៍ត្រីហ៊ុន ហ៊ាន អតីតស្នងការប៉ូលិសខេត្តបន្ទាយមានជ័យ និងលោកឧត្តមសេនីយ៍ឯកមឹក តារា អគ្គនាយកនៃអាជ្ញាធរជាតិប្រយុទ្ធប្រឆាំងនឹងគ្រឿងញៀនរបស់ក្រសួងមហាផ្ទៃ ពីបទជាប់ពាក់ព័ន្ធនឹងការរត់ពន្ធថ្នាំញៀនខុសច្បាប់ផងដែរ។ កាលពីដើមឆ្នាំ២០១០ យោងតាមស្ថិតិរបស់មន្ទីរប្រឆាំងគ្រឿងញៀន ដែលបានចេញផ្សាយនៅតាមបណ្តាសារព័ត៌មានមួយចំនួនបានឲ្យដឹងថា យ៉ាងតិចមានចំនួន៣០០ករណីត្រូវបានបង្រ្កាបដោយប៉ូលិស និងមានជនសង្ស័យចំនួន៩០០នាក់បានត្រូវបញ្ជូនទៅកាន់តុលាការ៕ This posting includes an audio/video/photo media file: Download Now |
| រលកយក្សស៊ូណាមីអាចបន្ថយជំនួយជប៉ុនសម្រាប់អន្តរជាតិ Posted: 15 Mar 2011 12:23 PM PDT ប្រទេសជប៉ុនកំពុងតែវាជួបប្រទះគ្រោះមហន្តរាយធម្មជាតិយ៉ាងធំធេងបំផុតចាប់តាំងពីសង្គ្រាមលោកលើកទីពីរ ហើយប្រទេសនេះកំពុងធ្វើការវាយតម្លៃការខូចខាត។ លោកនាយករដ្ឋមន្ត្រីហ៊ុន សែនបានថ្លែងថា ការរញ្ជួយដី និងរលកយក្ស Tsunami ដ៏ខ្លាំងក្លានេះបានធ្វើឱ្យខូចខាតដល់សេដ្ឋកិច្ចជប៉ុន និងប៉ះពាល់ដល់ជំនួយជប៉ុនសម្រាប់គម្រោងអភិវឌ្ឍន៍នៅបរទេស ដែលរួមមានប្រទេសកម្ពុជា។ នៅពេលដែលប្រទេសជប៉ុនកំពុងបន្តវាយតម្លៃការខូចខាតដោយមហន្តរាយរញ្ជួយដី និងរលកយក្យ Tsunami យ៉ាងអាក្រក់បំផុត នៅថ្ងៃច័ន្ទនេះ ក្រុមមន្ត្រីរដ្ឋាភិបាលនិងអង្គការមិនមែនរដ្ឋាភិបាល បានគិតពិចារណានូវភាពមិនច្បាស់លាស់នៃជំនួយ ដែលប្រទេសជប៉ុនជាអ្នកផ្តល់ជំនួយដ៏ធំសម្រាប់ប្រទេសកម្ពុជា។ លោកនាយករដ្ឋមន្ត្រីហ៊ុន សែនបានថ្លែងនៅក្នុងពិធីប្រគល់សញ្ញាប័ត្រនៅសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ចថា វិនាសកម្មដោយការរញ្ជួយដី និងរលកយក្ស Tsunami នៅក្នុងប្រទេសជប៉ុនគឺធ្ងន់ធ្ងរណាស់ ហើយបានបណ្តាលឱ្យមានការបាត់បង់ធំធេងណាស់ ទាំងជីវិតមនុស្ស និងទ្រព្យសម្បត្តិ។ «ការខូចខាតនេះមានទ្រង់ទ្រាយធំ ហើយវាជះឥទ្ធិពលទៅដល់សេដ្ឋកិច្ចជប៉ុន ហើយក៏អាចជះឥទ្ធិពលទៅលើការអនុវត្តកាតព្វកិច្ចអន្តរជាតិរបស់ជប៉ុននៅក្រៅប្រទេសផងដែរ រាប់ទាំងយើង»។ លោកនាយករដ្ឋមន្ត្រីហ៊ុន សែនបានថ្លែងថា នៅថ្ងៃអង្គារស្អែក លោក Masafumi Kuroki ឯកអគ្គរាជទូតជប៉ុនប្រចាំកម្ពុជា នឹងចុះហត្ថលេខាផ្តល់ជំនួយ៩៤លានដុល្លារអាមេរិកដល់ប្រទេសកម្ពុជាសម្រាប់ប្រព័ន្ធការពារទឹកជំនន់ និងចែកចាយទឹកនិងសកម្មភាពបោសសម្អាតមីន។ លោក Masafumi Kuroki ឯកអគ្គរាជទូតជប៉ុនប្រចាំនៅកម្ពុជា បានថ្លែងថា ប្រទេសជប៉ុននៅតែបន្តផ្តល់ជំនួយដល់ប្រទេសកម្ពុជា បើទោះបីជាប្រទេសជប៉ុនបានជួបប្រទះគ្រោះមហន្តរាយធម្មជាតិដ៏អាក្រក់ក៏ដោយ។ ប្រជាពលរដ្ឋជប៉ុនចំនួន១.៥៩៨នាក់ត្រូវបានសម្លាប់ និង១.៧២០នាក់ផ្សេងទៀតបានបាត់ខ្លួនដោយការរញ្ជួយដី និងរលកយក្ស Tsunami ដ៏មហន្តរាយនេះ។ លោកយ៉ង់ សាំងកុមារ ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (CEDAC) បានថ្លែងថា អង្គការរបស់លោកទទួលបានមូលនិធិប្រមាណ៨០០០០០ដុល្លារអាមេរិកពីសម្បុរសជនជប៉ុនរយៈពេលពីរឆ្នាំ (២០១១-២០១២) សម្រាប់គម្រោងជំរុញជំនាញកសិកម្ម និងការយល់ដឹងពីតម្លៃនៃការសិក្សារបស់កូននៅក្នុងខេត្តកំពង់ស្ពឺ ហើយកំពុងរៀបចំសំណើគម្រោងដែលមានទឹកប្រាក់ចំនួន៤០.០០០ដុល្លារអាមេរិកសម្រាប់បណ្តុះបណ្តាលកសិករទូទៅនៅក្នុងខេត្តកំពង់ឆ្នាំង។ «យើងយល់ឃើញថា បញ្ហារញ្ជួញផែនដីនិងរលកយក្ស Tsunami ដែលប្រទេសជប៉ុនកំពុងជួបប្រទះនេះ យើងមានការព្រួយបារម្ភថា វាអាចប៉ះពាល់ដែលអាចបញ្ឈប់ ឬក៏ផ្អាកជំនួយ»។ លោកជាម ច័ន្ទសោភ័ណ ប្រធានមន្ទីរកសិកម្មខេត្តបាត់ដំបង បានថ្លែងថា លោកបានពិភាក្សាជាមួយមន្ត្រីរបស់លោកអំពីលទ្ធភាពទទួលបានថវិកាបន្តទៀតពីប្រទេសជប៉ុន ដោយសារប្រទេសជប៉ុនបានជួបប្រទះនឹងគ្រោះធម្មជាតិដ៏ធ្ងន់ធ្ងរ ដែលមិនធ្លាប់មានចាប់តាំងពីសង្គ្រាមលោកលើកទីពីរ និងដោយសារឆ្នាំសារពើពន្ធរបស់ប្រទេសជប៉ុនមិនទាន់បានអនុវត្តនៅឡើយទេ។ «វាអាចមានផលប៉ះពាល់ដល់ប្រទេសកម្ពុជា។ យើងមិនអាចទស្សទាយបានមុនទេ ប៉ុន្តែនេះជាការព្រួយបារម្ភរបស់ខ្ញុំដែលវាអាចប៉ះពាល់បច្ច័យអាក្រក់មកលើគម្រោងរបស់យើង»។ លោកហ៊ឹម សុផល ប្រធានមន្ទីរអប់រំខេត្តព្រៃវែង បានថ្លែងថា លោកបានលើកសំណើគម្រាងកសាងសាលារៀនបីដែលមានទឹកប្រាក់ជាង១៥០.០០០ដុល្លារអាមេរិក ហើយប្រទេសជប៉ុន បានសន្យាផ្តល់ថវិកា និងបានមកសិក្សារួចហើយ។ «ខ្ញុំគ្រាន់តែមើលឃើញព្រឹត្តិការណ៍រលកយក្ស Tsunami នេះ ខ្ញុំមានការព្រួយបារម្ភ ព្រោះម្ចាស់ជំនួយរបស់យើងកំពុងតែជួបមហន្តរាយនៅក្នុងប្រទេសគាត់។ អញ្ចឹងមានការព្រួយបារម្ភខ្លះ ដែលថា វាអាចមិនបានសម្រេចតាមបំណងរបស់យើង»។ យោងតាមតួលេខរបស់រដ្ឋាភិបាលបានឱ្យដឹងថា ក្នុងរយៈពេលរវាងពីឆ្នាំ១៩៩២ដល់ឆ្នាំ២០០៩ ប្រទេសជប៉ុនគឺជាប្រទេសផ្តល់ជំនួយដ៏ធំជាងគេតែមួយគត់របស់ប្រទេសកម្ពុជា ដោយបានផ្តល់ជំនួយជាង១៨ភាគរយនៃជំនួយអភិវឌ្ឍន៍នៅបរទេស ឬប្រមាណ១.៨៣០លានដុល្លារអាមេរិក៕ This posting includes an audio/video/photo media file: Download Now |
| សវនាការបណ្ដឹងឧទ្ធរណ៍របស់ឌុចគ្រោងធ្វើរយៈពេលបីថ្ងៃ Posted: 15 Mar 2011 07:39 AM PDT នៅថ្ងៃទី២៨ ខែមិនានេះ អង្គជំនុំជម្រះតុលាការកំពូលរបស់សាលាក្ដីខ្មែរក្រហមនឹងបើកសវនាការបណ្ដឹងឧទ្ធរណ៍របស់ឌុចរយៈពេលបីថ្ងៃ។ អតីតប្រធានគុកទួលស្លែងរូបនេះត្រូវកាត់ទោសអស់រយៈពេលប្រាំមួយខែកាលពីឆ្នាំ២០០៩។ ការកាត់ក្ដីក្នុងសំណុំរឿង០០១ដើម្បីសម្រេចលើបណ្ដឹងឧទ្ធរណ៍របស់ឌុចនៅអង្គជំនុំជម្រះតុលាការកំពូលរបស់សាលាក្ដីខ្មែរក្រហមនឹងមានរយៈពេលដ៏ខ្លីបំផុតត្រឹមតែបីថ្ងៃប៉ុណ្ណោះ។ រីឯការកាត់ក្ដីអតីតប្រធានគុកទួលស្លែងដ៏ទារុណកម្មរូបនេះក្នុងដំណាក់កាលអង្គជំនុំជម្រះសាលាដំបូងវិញ គឺមានរយៈពេលរហូតដល់ប្រាំមួយខែ ពោលគឺការកាត់ក្ដីបានដំណើរការរយៈពេល៧៧ថ្ងៃ។ សាលាក្ដីខ្មែរក្រហមបានកំណត់បើកការជំនុំជម្រះស្ដីពីបណ្ដឹងឧទ្ធរណ៍ក្នុងសំណុំរឿងឌុច ពីថ្ងៃទី២៨រហូតដល់ថ្ងៃទី៣០ ខែមិនានេះ ឬយ៉ាងយូរបំផុតនឹងបន្ដរហូតដល់ថ្ងៃទី៣១ មិនា ប្រសិនបើមានភាពចាំបាច់។ លោកឡាស់ អលសិន មន្ដ្រីផ្នែកទំនាក់ទំនងកិច្ចការច្បាប់របស់សាលាក្ដីខ្មែរក្រហមមានប្រសាសន៍ថា ការកាត់ក្ដីលើបណ្ដឹងឧទ្ធរណ៍នេះមានកម្រិតមែនទែន ហើយនឹងពុំមានការចូលរួមរបស់សាក្សី និងអ្នកជំនាញដោយផ្ទាល់នោះទេ។ «មានចំណោទមួយចំនួនក្នុងការកាត់ក្ដីស្ដីពីបណ្ដឹងឧទ្ធរណ៍នេះ។ យើងមិនចាំបាច់ស្ដាប់ចម្លើយរបស់គ្រប់សាក្សី និងអ្នកជំនាញការ ដែលបានបង្ហាញខ្លួននៅក្នុងការកាត់ក្ដីកាលពីអង្គជំនុំជម្រះសាលាដំបូងនោះ ទេ។ ជាងនេះទៀត ភាគីនានាបានដាក់សារណាជាលាយលក្ខណ៍អក្សរទៅកាន់អង្គជំនុំជម្រះតុលាការ កំពូល រួចហើយ»។ មានអ្នកទោសយ៉ាងតិចចំនួន១២.៣៨០នាក់ត្រូវបានធ្វើទារុណកម្ម និងសម្លាប់ចោលនៅគុកទួលស្លែង ឬមន្ទីរស ២១ ក្រោមការគ្រប់គ្រងរបស់ឌុចជាងបីឆ្នាំ ពីឆ្នាំ១៩៧៥ដល់ឆ្នាំ១៩៧៩។ សាលាដំបូងបានផ្ដន្ទាទោសឌុចឲ្យជាប់ពន្ធនាគាររយៈពេល៣៥ឆ្នាំ ក្រោមបទចោទប្រកាន់អំពីឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មនៃអំពើធ្វើទារុណកម្ម និងមនុស្សឃាត។ ប៉ុន្ដែឌុចត្រូវសម្រាលទោស ហើយនឹងត្រូវឆ្លងកាត់ការជាប់ទោសក្នុងពន្ធនាគារត្រឹមតែ១៩ឆ្នាំប៉ុណ្ណោះ។ សហព្រះរាជអាជ្ញាទាំងពីរបានជំទាស់ការផ្តន្ទាទោសនេះដោយទាមទារឲ្យតុលាការកំពូលផ្តន្ទាទោសឌុចអស់មួយជីវិត ឬយ៉ាងហោចណាស់ផ្តន្ទាទោសឲ្យជាប់ពន្ធនាគាររយៈពេល៤៥ឆ្នាំ ដោយមិនមានការបន្ធូរបន្ថយទោសឡើយ។ ដំណាលគ្នានោះ មេធាវីតំណាងឲ្យដើមបណ្ដឹងរដ្ឋប្បវេណីបានប្ដឹងទាមទារសំណងផងដែរ។ លោកឡាស អលសិនបញ្ជាក់ថា តុលាការកំពូលនឹងធ្វើការសើររើចំណុចទាំងនេះឡើងវិញ។ «ជាគោលការណ៍ក្រុមចៅក្រមនឹងពិនិត្យឡើងវិញ ថាតើឌុចគឺជាអ្នកទទួលខុសត្រូវជាន់ខ្ពស់ម្នាក់ដែរ ឬយ៉ាងណា ហើយនឹងពិនិត្យតួនាទីរបស់ឌុច។ ហើយបន្ទាប់មក ក្រុមចៅក្រមនឹងពិនិត្យឡើងវិញអំពីការផ្ដន្ទាទោសឌុច និងការសម្រេចលើភាពអាចទទួលយកបាននៃដើមបណ្ដឹងរដ្ឋប្បវេណី និងសំណងជំងឺចិត្ត»។ យោងតាមកម្មវិធីរបស់សាលាក្ដីខ្មែរក្រហមបានបង្ហាញថា ការកាត់ក្ដីនៅតុលាការកំពូលនៅថ្ងៃទី២៨ មិនា ដែលជាថ្ងៃទីមួយនឹងត្រូវផ្តោតទៅលើយុត្តាធិការរូបវន្ដ មានន័យថា ការស្ដាប់របាយការណ៍ពីភាគីសហព្រះរាជអាជ្ញា ការស្ដាប់ឌុចនិយាយដោយផ្ទាល់ របាយការណ៍របស់សហមេធាវីការពារក្ដី និងរបាយការណ៍ពីមេធាវីតំណាងឲ្យដើមបណ្ដឹងរដ្ឋប្បវេណី។ រីឯថ្ងៃទីពីរគឺជាការកាត់ក្ដីផ្ដោតទៅលើឧក្រិដ្ឋកម្មប្រឆាំងមនុស្សជាតិ និងពិនិត្យឡើងវិញលើការផ្ដន្ទាទោសឌុច រីឯថ្ងៃទីបី ការកាត់ក្ដីនឹងត្រូវផ្តោតលើបណ្ដឹងដែលភាគីនីមួយៗទាមទារ។ គួររំឭកថា នៅក្នុងបណ្ដឹងទៅកាន់អង្គជំនុំជម្រះនៅតុលាការកំពូល សហព្រះរាជអាជ្ញាបានលើកឡើងថា ការផ្តន្ទាទោសឌុចត្រឹមតែ៣៥ឆ្នាំមិនយុត្តិធម៌ទេ ហើយមានកំហុសផ្លូវច្បាប់ក្នុងការសម្រេចទោសឌុច។ សហមេធាវីការពារក្ដីឲ្យឌុចបានទាមទារឲ្យតុលាការកំពូលធ្វើការដោះលែងកូនក្ដីរបស់ខ្លួនឲ្យមានសេរីភាពឡើងវិញ ដោយឡែកខាងភាគី ក្រុមមេធាវីតំណាងឲ្យដើមបណ្ដឹងរដ្ឋប្បវេណីបានស្នើលទ្ធភាពដាក់ឯកសារបន្ថែមប្រឆាំងឌុច រួមទាំងទាមទារឲ្យមានការទទួលស្គាល់ឡើងវិញនូវបណ្តឹងជនរងគ្រោះដែលត្រូវបានទាត់ចោលពីបញ្ជីឈ្មោះនៃដើមបណ្ដឹងរដ្ឋប្បវេណីដោយសាលាដំបូង។ យោងតាមលោកឌឹម សុវណ្ណារុំ អ្នកនាំពាក្យសាលាក្តីខ្មែរក្រហមខាងភាគីកម្ពុជា បានឲ្យដឹងថា មេធាវីតំណាងឲ្យដើមបណ្តឹងរដ្ឋប្បវេណីមានតែចំនួនបីក្រុមប៉ុណ្ណោះ នៅក្នុងសវនាការក្នុងតុលាការកំពូលនេះ មូលហេតុដោយសារថា មេធាវីដើមបណ្តឹងរដ្ឋប្បវេណីក្រុមទីមួយមិនបានប្តឹងឧទ្ធរណ៍នោះឡើយ៕ សូមលោកអ្នករង់ចាំស្ដាប់សេចក្ដីរាយការណ៍ភាគទីពីរជាបន្ដទៀត។ លោកគង់ សុឋានរិទ្ធ នឹងធ្វើសេចក្ដីរាយការណ៍អំពីសេចក្ដីប្រាថ្នារបស់អតីតអ្នកទោសគុកទួលស្លែងចំពោះការផ្តន្ទាទោសឌុច និងការរៀបចំរបស់ក្រុមមេធាវីសម្រាប់ប្រយោជន៍ជនរងគ្រោះ។ សូមអរគុណ! This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
