Koh Santipheap Daily |
- បញ្ហាព្រំដែនកម្ពុជា-ថៃមិនមែនជាវិវាទធម្មតានោះទេ គឺជាសង្គ្រាមឈ្លានពានយកទឹកដីតែម្តង
- ចាប់ខ្លួនយុវជនពីរនាក់ព្រួតគ្នាវាយដណ្តើមទូរស័ព្ទដៃ
- សម្តេចតេជោ ៖ បើចង់ធ្វើនាយករដ្ឋមន្ត្រីត្រូវចេះនីតិវិធីប្តឹងទៅក្រុមប្រឹក្សា សន្តិសុខអង្គការសហប្រជាជាតិឱ្យច្បាស់លាស់
- ភ្លើងឆេះផ្ទះអ្នកលក់គ្រឿងទេសជាយក្រុងលេបត្របាក់អស់
- ការរញ្ជួយដី និងស៊ូណាមីនៅជប៉ុនអ្នកស្លាប់អាចកើនឡើងដល់ជាង១ម៉ឺននាក់
- ច្រករបៀងមួយនៅស្រុកម៉ាឡៃ បើកចំហមិនហាមឃាត់
- អតីតប្រធានាធិបតីហៃទី លោក Jeam Aristide នឹងវិលត្រឡប់ចូលស្រុកវិញ
- នៅជប៉ុនចំនួនអ្នកស្លាប់ចេះតែកើននិងការភ័យខ្លាចចំពោះវិទ្យុសកម្មនុយក្លេអ៊ែរក៏ខ្លាំងដែរ
- បាញ់ប្រហារទម្លាយកញ្ចក់រថយន្ត ពេលម្ចាស់កំពុងដេក របួសធ្ងន់ ជាការប៉ងធ្វើឃាតដោយរឿងគំនុំ
- រថយន្តកាមរីដឹកឈើគ្រញូងចាប់ប្រគល់ឱ្យប៉ូលិសសេដ្ឋកិច្ច
- អ្នកនាំពាក្យក្រសួងការបរទេសអាមេរិកសុំលាលែងចេញពីតំណែង
- លោកអភិបាលខណ្ឌដង្កោព្រមានដល់មន្ត្រីសង្កាត់នានាដែលយក លុយពីឡានដឹកដីធ្វើម៉ុងខ្មោច និងយកលុយពីពលរដ្ឋក្រីក្រត្រូវបញ្ឈប់
- ចាប់ខ្លួនក្មេងប្រុសលួចលុយ និងសំភារក្នុងសមាគមជនឥតទីពឹង
- ២នាក់លួចម៉ូតូមកពីស្រុកអូររាំងឪមកអស់លក្ខណ៍នៅក្រុងសួង
- ជិះម៉ូតូបុករថយន្តគ្មានប្រណីក្ស័យខ្លួនឯង២នាក់សង្ស័យស្រវឹង
- បង្កើតមណ្ឌលសេវាកម្មយុត្តិធម៌និងយន្តការដោះស្រាយវិវាទក្រៅតុលាការ
- ជាងផ្សារដំបូលសំយាបមុខផ្ទះត្រូវចរន្តឆ្លងឆក់ស្ទើរតែស្លាប់
- នាងក្រមុំខ្មែររងគ្រោះព្រោះបុរសសៀមចាប់រំលោភ
- បង្ក្រាបគ្រឿងញៀនធំមួយនៅក្នុងសង្កាត់ទួលសង្កែ ឆែកលំនៅឋានទាំងយប់ ចាប់ខ្លួន៦នាក់ ដកហូតថ្នាំញៀនជាង១៣គ.ក្រ
- ក្រុមអ្នកនេសាទសមុទ្រខ្មែរ មិនចេញនេសាទខ្លាចស៊ូណាមី ធ្វើឱ្យម្ហូបអាហារសមុទ្រឡើងថ្លៃ
| បញ្ហាព្រំដែនកម្ពុជា-ថៃមិនមែនជាវិវាទធម្មតានោះទេ គឺជាសង្គ្រាមឈ្លានពានយកទឹកដីតែម្តង Posted: 14 Mar 2011 12:34 AM PDT រាជធានីភ្នំពេញ ៖ សម្តេចតេជោនាយករដ្ឋមន្ត្រីហ៊ុន សែន បានលើកឡើងថា បញ្ហាវិវាទព្រំដែនរវាងប្រទេសជិតខាងគ្នានៅលើសាកលលោក តែងកើតមានប្រហែល៥០% ហើយការដោះស្រាយត្រូវប្រើពេលវេលាយូរ...ប៉ុន្តែចំពោះបញ្ហាព្រំដែនកម្ពុជា-ថៃ មិនមែនជាវិវាទធម្មតានោះទេ គឺជាការឈ្លានពានសង្គ្រាមឈ្លានពានយកទឹកដីកម្ពុជា ធ្វើឱ្យស្លាប់ រងរបួស ខូចខាតទ្រព្យសម្បត្តិ ហេដ្ឋារចនាសម្ព័ន្ធ និងសម្បត្តិវប្បធម៌បេតិកភណ្ឌពិភពលោក ។ សម្តេចតេជោហ៊ុន សែន បានមានប្រតិកម្មបែបនេះ ក្នុងឱកាសអញ្ជើញជាអធិបតីពិធីប្រគល់សញ្ញាបត្រដល់និស្សិតទទួលជ័យលាភីនៃសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ចនៅវិទ្យាស្ថានជាតិអប់រំ ៕  |
| ចាប់ខ្លួនយុវជនពីរនាក់ព្រួតគ្នាវាយដណ្តើមទូរស័ព្ទដៃ Posted: 14 Mar 2011 12:15 AM PDT  ខេត្តកណ្តាល ៖ យុវជនពីរនាក់បានធ្វើសកម្មភាពព្រួតវាយយុវជនម្នាក់ទៀតដណ្តើមយកទូរស័ព្ទដៃម៉ាកណូគា (ចិន) ហើយត្រូវប៉ូលិសប៉ុស្តិ៍សង្កាត់កំពង់សំណាញ់ ចាប់ខ្លួនភ្លាមៗកាលពីវេលាម៉ោង៣និង១០នាទីរសៀល ថ្ងៃទី១២ មីនា នៅលើផ្លូវលំ ស្ថិតក្នុងភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ។ មន្ត្រីប៉ូលិសបានឱ្យដឹថា យុវជនទាំងពីរនាក់នេះម្នាក់ឈ្មោះសុខ កក្កដា អាយុ១៩ឆ្នាំ រស់នៅភូមិកំពង់សំណាញ់ ជាសិស្ស និងម្នាក់ទៀតឈ្មោះបាន ប៊ុនធឿន អាយុ១៧ឆ្នាំ រស់នៅភូមិថ្មី សង្កាត់តាខ្មៅ ក្រុងតាខ្មៅ ជាសិស្សដែរ ។ ចំណែកយុវជនរងគ្រោះឈ្មោះកែវ ឧត្តម អាយុ១៧ឆ្នាំ រស់នៅភូមិថ្មី សង្កាត់តាខ្មៅ ជាសិស្សដូចគ្នា។ ជនរងគ្រោះបានរៀបរាប់ប្រាប់ប៉ូលិសថា មុនពេលកើតហេតុម្តាយបានប្រើឱ្យទៅភូមិកំពង់សំណាញ់ លុះត្រឡប់មកវិញជិះកង់ជាមួយមិត្តភក្តិម្នាក់អាយុស្របាលគ្នាតាមផ្លូវលំក្នុងភូមិកំពង់សំណាញ់ ដោយមានទូរស័ព្ទដៃមា៉កណូគៀ (ចិន) ដាក់ក្នុងហោប៉ៅអាវចាក់ចម្រៀងស្តាប់ផង។ ពេលនោះក៏បានជួបពួកជនទាំងពីរនាក់ជិះម៉ូតូ C50 គុបមូលឌុបគ្នាមកដល់ទន្ទឹមខ្លួន ស្រាប់តែពួកគេនាំគ្នាព្រួតវាយខ្លួនត្រូវចំនួន៣ដៃ ហើយដណ្តើមយកទូរស័ព្ទដៃ។ ពេលនោះខ្លួនបានខំខ្ទប់ហោប៉ៅ ហើយរត់តាមផ្លូវ ឯពួកជនសង្ស័យបានដេញប្រវាយប្រតប់យកទូរស័ព្ទ ប៉ុន្តែយកមិនបានទេ ខណៈនោះដែរខ្លួនក៏បានស្រែកថា ចោរៗ ដើម្បីឱ្យអ្នកភូមិជួយ ហើយអ្នកភូមិក៏បានរាយការណ៍ប្រាប់ប៉ូលិសប៉ុស្តិ៍ទៅចាប់ខ្លួនអ្នកទាំងពីរតែម្តង ។ ក្រោយពីត្រូវចាប់ខ្លួន ជនឈ្មោះបាន ប៊ុនធឿន ឆ្លើយសារភាពថា ខ្លួនពិតជាបានវាយឈ្មោះកែវ ឧត្តម ប្រាកដមែន ចំណែកឈ្មោះសុខ កក្កដា មិនបានវាយទេ គ្រាន់តែជួយដេញ ។ ជនសង្ស័យទាំងពីរនាក់ត្រូវបានបញ្ជូនមកកាន់អធិការដ្ឋានក្រុងតាខ្មៅ ដើម្បីកសាងសំណុំរឿងចាត់ការបន្តតាមច្បាប់ ៕  |
| Posted: 13 Mar 2011 11:56 PM PDT រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី បានមានប្រតិកម្មតបទៅកាន់មេគណបក្សប្រឆាំងមួយអំពីការប្តឹងទៅកាន់អង្គការសហប្រជាជាតិ ដែលមេគណបក្សប្រឆាំងនោះលើកឡើងថា គេឱ្យយោបល់ប្តឹងបែបនេះយូរមកហើយ អត់ព្រមធ្វើតាមទេ ទុកឱ្យអ្វីៗ (ជម្លោះកម្ពុជា-ថៃ) អូសបន្លាយមានបញ្ហាកាន់តែយូរ...ដោយសម្តេចបានឆ្លើយតបត្រឡប់ទៅវិញថា សូមឱ្យចេះរៀនអំពីនីតិវិធីខ្លះផង ។  |
| ភ្លើងឆេះផ្ទះអ្នកលក់គ្រឿងទេសជាយក្រុងលេបត្របាក់អស់ Posted: 13 Mar 2011 11:56 PM PDT រាជធានីភ្នំពេញ ៖ ផ្ទះមួយខ្នងស្ថិតក្នុងដីឡូត៍ត្រូវអគ្គីភ័យឆាបឆេះយ៉ាងសន្ធោសន្ធៅអស់ទាំងស្រុង បង្កឱ្យមានការភ្ញាក់ផ្អើល និងតក់ស្លុតយ៉ាងខ្លាំង ពីសំណាក់អ្នករងគ្រោះ និងអ្នករស់នៅក្បែងខាង ខណៈការជញ្ជូនទ្រព្យសម្បត្តិគេចចេញពីចំណីភ្លើងបានតិចតួចបំផុត កាលពីវេលាម៉ោង១២និង១០នាទីថ្ងៃទី១៤ មីនា ២០១១ នៅភូមិព្រៃរមាសទី២ សង្កាត់បឹងធំ ខណ្ឌដង្កោ។  |
| ការរញ្ជួយដី និងស៊ូណាមីនៅជប៉ុនអ្នកស្លាប់អាចកើនឡើងដល់ជាង១ម៉ឺននាក់ Posted: 13 Mar 2011 08:59 PM PDT                                                                                    ទូរទស្សន៍រដ្ឋជប៉ុន NHK រាយការណ៍កាលពីថ្ងៃទី១៣ មីនា ដោយដកស្រង់សម្តីនាយប៉ូលិសខេត្ត Miyagi របស់ជប៉ុនថា គិតត្រឹមថ្ងៃទី១៣ មីនា ចំនួនអ្នកស្លាប់ ដោយសារគ្រោះធម្មជាតិរញ្ជួយដីដ៏ខ្លាំងកម្រិត៨,៩រីស្ទ័រ បង្កឱ្យមានស៊ូណាមី ដែលកើតឡើងនៅភាគឦសាន និងភាគខាងកើតប្រទេសជប៉ុនកាលពីថ្ងៃទី១១ មីនា កន្លងមក អាចកើនឡើងដល់ជាង១០.០០០នាក់ ហើយជាង១០.០០០នាក់ទៀតបាត់ខ្លួន ។ ការរញ្ជួយដីនេះជាបាតុភូតរញ្ជួយដីដ៏ខ្លាំងបំផុតពុំធ្លាប់កើតឡើយនៅប្រទេសជប៉ុន ។ ទីភ្នាក់ងារព័ត៌មានក្យូដូរបស់ជប៉ុនរាយការណ៍ថា កាលពីព្រឹកថ្ងៃទី១៣ មីនា នាយករដ្ឋមន្ត្រីជប៉ុន លោកណាអូតូ កាន បានចេញការណែនាំមួយជម្រុញឱ្យបង្កើនកងកម្លាំងស្វ័យការពារទៅកាន់តំបន់ដែលរងគ្រោះដោយសារការរញ្ជួយដីឱ្យបាន១០០.០០០នាក់ សម្រាប់ប្រតិបត្តិការជួយសង្គ្រោះ ។ ជាមួយគ្នានេះ កាលពីព្រឹកថ្ងៃទី១៣ មីនា លោកនាយករដ្ឋមន្ត្រីណាអូតូ កាន បានកោះធ្វើកិច្ចប្រជុំបន្ទាន់មួយដើម្បីវាយតម្លៃពីការខូចខាត បង្កឡើងដោយការរញ្ជួយដីនេះ ។ ក្នុងឱកាសនៃកិច្ចប្រជុំនោះ លោកណាអូតូ កាន ថ្លែងថា «ខ្ញុំស្នើឱ្យមានកិច្ចខិតខំប្រឹងប្រែងដើម្បីជួយសង្គ្រោះជីវិតអ្នកនៅរស់ឱ្យបានច្រើនតាមការដែលអាចធ្វើទៅបាន» ។ ទីភ្នាក់ងារព័ត៌មានក្យូដូឱ្យដឹងទៀតថា ការរញ្ជួយដីដ៏មានឥទ្ធិពលនោះបង្កការបំផ្លិចបំផ្លាញដល់អគារធំៗចំនួន២០.៨២៨ផងដែរ ។
បន្ទាប់ពីការរញ្ជួយដីយ៉ាងខ្លាំងបំផុតពុំធ្លាប់ដែលមាននៅជប៉ុន ការព្រួយបារម្ភយ៉ាងខ្លាំងក្លាបំផុតគឺចំពោះសភាពការណ៍ក្នុងមជ្ឈ មណ្ឌលនុយក្លេអ៊ែរ ២នៅហ្វូគូស៊ីម៉ា ចម្ងាយ២៥០គីឡូម៉ែត្រ ខាងជើងក្រុងតូក្យូ ។ ការផ្ទុះមួយកើតមាននៅមជ្ឈមណ្ឌលនុយក្លេអ៊ែរ ហ្វូគូស៊ីម៉ា ទីមួយ ។ ដំបូល និងជញ្ជាំងរបស់អគាររេអាក់ទ័រ នៅទីនោះបានបាក់ ។ វិទ្យុសកម្មមានខ្ពស់ជាងកម្រិតមធ្យមនៅទីតាំងនោះ ។ អាជ្ញាធរអះអាងថា គ្រោះថ្នាក់វិទ្យុសកម្មមានកម្រិត៤ ក្នុងចំណោមកម្រិត៧ ។ ចំណែករេអាក់ទ័រទី២ មានសញ្ញានៃបញ្ហាជាមួយគ្រោះថ្នាក់នៃការផ្ទុះ ។ គ្រាប់ស្ករអ៊ីយ៉ូតត្រូវបានចែកចាយដល់ប្រជាជនទាំងឡាយ ។ ពួកអ្នករស់នៅ ក្នុងរង្វង់២០គីឡូម៉ែត្រ ជុំវិញទីតាំងនុយក្លេអ៊ែរ នោះត្រូវជម្លៀសចេញ ។ មនុស្ស៣នាក់ ដែលទទួលការធ្វើតេស្តរកឃើញវិទ្យុសកម្ម ។ តុល្យការបណ្តោះអាសន្ននៃគ្រោះរញ្ជួយដីនេះអ្នកស្លាប់ និងបាត់ខ្លួនឡើងដល់១.៨០០នាក់។ សាកសពមនុស្សរវាងពី៣០០ទៅ៤០០នាក់ ត្រូវបានរកឃើញក្នុងកំពង់ផែមួយនាភាគឦសានជប៉ុន ។ ហើយអាជ្ញាធរបានបាត់ដំណឹងពីប្រជាជនប្រមាណជា១០.០០០នាក់នៅមីណា មីសាន់រីកូ ជាទីក្រុងកំពង់ផែមួយនៅភាគឦសាន ដែលរងការប៉ះពាល់ខ្លាំងជាងគេដោយការរញ្ជួយដី និងរលកយក្សស៊ូណាមី ។ រដ្ឋាភីបាលជប៉ុននិយាយថា នេះជាការរញ្ជួយខ្លាំងបំផុតនៅជប៉ុនចាប់តាំងពីសករាជ MEIJI (ឆ្នាំ១៨៦៨ ដល់ឆ្នាំ១៩១២) មក ហើយ គេគិតថា មនុស្សជាច្រើនពាន់នាក់ត្រូវស្លាប់ ។ កងទ័ពជប៉ុនបានរកឃើញសាកសពមនុស្សពី៣០០ទៅ៤០០នាក់ នៅកំពង់ផែរីគូ ហ្សេនតាកាតា ។ លើសពីនេះទៀត សាកសពមនុស្សរវាងពី២០០ទៅ៣០០នាក់ត្រូវបានរកឃើញនៅកន្លែង កំសាន្តមាត់សមុទ្រសេនដាយ (ក្រុងមីយ៉ាហ្ស៊ី) ក្រោយរលកយក្សស៊ូណាមី កម្ពស់១០ម៉ែត្រនៅទីនោះ ។ គ្រោះថ្នាក់នុយក្លេអ៊ែរចំបងនៅមជ្ឈមណ្ឌលនុយក្លេអ៊ែរហ្វូគូ ស៊ីម៉ាលេខ១ ស្ថិតនៅភាគឦសានជប៉ុនដែរ គឺការផ្ទុះកើតឡើងនាថ្ងៃទី១២ មីនា វេលាម៉ោង១៥និង៣៦នាទីម៉ោងក្នុងស្រុក ដែលតាមទូរទស្សន៍រដ្ឋ NHK ថា បណ្តាលឱ្យមនុស្សរបួសជាច្រើននាក់ក្នុងចំណោមនិយោជិត។ ក្នុងករណីមានពពកវិទ្យុសកម្ម វិទ្យុសកម្មនេះ នឹងអាចប៉ះពាល់ដល់ឧបទ្វីបកាំឆាត់ការ របស់រុស្ស៊ី យ៉ាងហោចណាស់ក៏រយៈពេល១៤ម៉ោងដែរ ។ ក្រុងមីណាមី សាន់រីគូ មានប្រជាជន១៧.០០០នាក់ អាជ្ញាធរនិយាយថា បាត់ដំណឹងពីមនុស្សប្រមាណជា១០.០០០នាក់ ។ ក្នុងទីក្រុងនេះ ហាក់ដូចជានៅសល់អគារតែ៣ប៉ុណ្ណោះ មន្ទីរពេទ្យមួយ និងទីតាំងរៀបការមួយកន្លែង ព្រមទាំងអគារមួយទៀត ក្រៅពីនោះត្រូវបំផ្លាញខ្ទេច ។
នាយករដ្ឋមន្ត្រីជប៉ុន លោកណាអូតូ កាន កាលពីថ្ងៃទី១៣ មីនា រងការរិះគន់យ៉ាងខ្លាំង ចំពោះការបញ្ចេញប្រតិកម្មដែលគេយល់ថា យឺតយ៉ាវពេករបស់រដ្ឋាភិបាលលោក ចំពោះការផ្ទុះមជ្ឈមណ្ឌលនុយក្លេអ៊ែរមួយ ក្រោយការរញ្ជួយដីនៅភាគឦសានប្រទេស។ ក្នុងអត្ថាធិប្បាយមួយកាសែតជប៉ុនយ៉ូមីអ៊ូរី ជាកាសែតធំបំផុតវាយតម្លៃថា រដ្ឋាភិបាលផ្តល់ព័ត៌មានយឺតពីបញ្ហាទាំងឡាយនៃការផ្ទុះ ក្នុងមជ្ឈមណ្ឌលនុយក្លេអ៊ែរ ហ្វូគូស៊ីម៉ាលេខ១ ដែលការផ្ទុះបានកម្ទេចដំបូល និងជញ្ជាំងអគារ ដែលមានរេអាក់ទ័រទីមួយ ក៏ប៉ុន្តែពុំបណ្តាលឱ្យបែករេអាក់ទ័រនេះឡើយ ។ ការធ្លាយវិទ្យុសកម្មកើតមានជុំវិញមជ្ឈមណ្ឌលនុយក្លេអ៊ែរនេះ ក៏ប៉ុន្តែរដ្ឋាភិបាលប៉ុនប៉ងសម្រាលការភ័យខ្លាចរបស់ប្រជាជន ដោយអះអាងថា ពុំមានគ្រោះថ្នាក់នៃការបែកធ្លាយរេអាក់ទ័រឡើយ និងថា កម្រិតវិទ្យុសកម្មមានការថយចុះក្រោយការផ្ទុះ។ កាសែតយូមីអ៊ូរីគូសបញ្ជាក់ថា ៥ម៉ោងក្រោយការផ្ទុះទើបរដ្ឋាភិបាលផ្តល់រាល់ព័ត៌មាន ទាក់ទិនដល់ការផ្ទុះដែលបង្កឱ្យមានការព្រួយបារម្ភខ្លាំងក្នុង ចំណោមប្រជាជនមូលដ្ឋាន ។ យោងតាមពួកអ្នកឯកទេសអាមេរិកខាងបរមាណូថា ការប្រើប្រាស់ទឹកសមុទ្រសម្រាប់បាញ់ឱ្យត្រជាក់ដល់រេអាក់ទ័រ នុយក្លេអ៊ែរមួយដូចដែលជប៉ុនបានធ្វើក្នុងមជ្ឈមណ្ឌលនុយក្លេ អ៊ែរហ្វូគូស៊ីម៉ា ដែលរងការខូចខាតឧបករណ៍បាញ់ទឹកឱ្យត្រជាក់ដោយសារការរញ្ជួយដីគឺ ជាសកម្មភាពដោយអស់សង្ឃឹមមួយដែលអាចបង្កគ្រោះមហន្តរាយនុយ ក្លេអ៊ែរដូចនៅ TCHERNOBYL ។ អ្នកជំនាញការជាច្រើនព្យាករណ៍ថា គ្រោះថ្នាក់នុយក្លេអ៊ែរដូចនៅជប៉ុនក្រោយការរញ្ជួយដីនេះ នឹងអាចធ្វើឱ្យប៉ះពាល់ដល់ការជម្រុញសាខាថាមពលនេះក្នុងប្រទេស ជាច្រើន ។ លោក ROBERT ALVAREZ អ្នកឯកទេសខាងរំសាយគ្រឿងសព្វាវុធនុយក្លេអ៊ែរ និយាយថា សភាពការណ៍ក្លាយទៅជាគ្រោះថ្នាក់ដែលគេនឹកស្មានមិនដល់ ព្រោះពេលមានអាសន្នបែបនេះ គេពុំមានលទ្ធ ភាពបញ្ជូនទឹកសាបសម្រាប់បាញ់ឱ្យត្រជាក់ដល់រេអាក់ទ័រ ហើយពេលចង់ធ្វើឱ្យមានស្ថិរភាពគេងាកមកប្រើដោយអស់សង្ឃឹមនូវ ទឹកសមុទ្រជំនួសវិញ ។ បន្ទាប់ពីមនុស្ស៣នាក់រងការប៉ះពាល់ដោយវិទ្យុសកម្ម កាលពីថ្ងៃទី១២ មីនា មក មនុស្ស១៩នាក់ទៀតរងការប៉ះពាល់ដោយវិទ្យុសកម្មមកពីមជ្ឈមណ្ឌល នុយក្លេអ៊ែរហ្វូគូស៊ីម៉ាដែរ៕  |
| ច្រករបៀងមួយនៅស្រុកម៉ាឡៃ បើកចំហមិនហាមឃាត់ Posted: 13 Mar 2011 08:57 PM PDT    ខេត្តបន្ទាយមានជ័យ ៖ ច្រករបៀងមួយស្ថិតនៅក្នុងភូមិចំបក់ ឃុំបឹងបេង ស្រុកម៉ាឡៃ គេឃើញបើកចំហឱ្យពលករឆ្លងទៅទឹកដីសៀមដោយសេរី ហើយសមត្ថកិច្ចនៅទីនោះដែលមាន២អង្គភាពត្រូវបានស្តីបន្ទោសថា មិនបានហាមឃាត់ផ្ទុយទៅវិញ បែរជាដាក់កុងត្រូលអង្គុយចាំយកលុយទៅវិញ ។ ច្រករបៀងក្នុងភូមិចំបក់មួយនេះនៅចំណុចជាយភូមិដែលមានសមត្ថកិច្ចធ្វើប៉ុស្តិ៍ដាក់កុងត្រូល ហើយក៏មានរថយន្តជាច្រើនគ្រឿងសំរាប់រង់ចាំស៊ីឈ្នួលដឹកពលករដែលចេញពីដីសៀមមកវិញដែរ ប្រៀបដូចជាចំណតរថយន្តទៅហើយ ។ បើតាមប្រភពពីប្រជាពលរដ្ឋបានឱ្យដឹងថា ច្រកខាងលើនេះ គឺ មានពលករចំណាកស្រុកឆ្លងទៅមកទឹកដីសៀមរៀងរាល់ថ្ងៃ ហើយពលករទាំងនោះ គឺមកពីតាមបណ្តាខេត្តផ្សេងៗ ។ កាលពីមុនពលករត្រូវបានគេដឹកតាមរថយន្តនីស្សាន់យ៉ាងចំហជិះពេញៗចូលដល់ជាយភូមិ ប៉ុន្តែបច្ចុប្បន្នគេឈប់ដឹកតាមរថយន្តនីស្សាន់ឱ្យឃើញគគ្រឹកគគ្រេងទៀតហើយ គឺប្តូររូបភាពដឹកតាមរថយន្តកាមរីវិញ ទាំងទៅទាំងមកពីចំណុចច្រករបៀងនោះ ។ ពលករមួយក្រុមដែលចេញពីទឹកដីសៀមមានទាំងកាបូបខោអាវមានទាំងកូនតូចផង បានប្រាប់ថា ពួកគាត់ ទើបតែវិលមកពីស៊ីឈ្នួលដាំកូនឈើនិងដំឡូងឱ្យសៀម តាមភូមិក្នុងស្រុកខ្លងហាត ។ ពួកគាត់ចូលទៅទឹកដីសៀមក៏តាមច្រកនេះដែរ ហើយការឆ្លងទៅមកមិនមានការហាមឃាត់ទេ គឺពួកគាត់បង់តែលុយម្នាក់២០បាតទាំងទៅទាំងមកជាការស្រេច ។ ប៉ូលិសការពារព្រំដែនគោកវរសេនាតូចលេខ៨១៥ ប្រចាំនៅមាត់ច្រកចេញចូលព្រំដែនបានប្រាប់ថា ពលករដែលចេញចូលទៅដីសៀមភាគច្រើន គឺទៅព្រឹកវិលល្ងាច ។ ចំណែកឯមន្ត្រីយោធាសឹករងស្រុកម៉ាឡៃមួយរូបសុំមិនបញ្ចេញឈ្មោះនិយាយថា ពលករដែលឆ្លងទៅមកទឹកដីសៀមគឺលំបាកទប់ស្កាត់ណាស់ ព្រោះភូមិអ្នកស្រុក ស្ថិតតាមព្រំដែន នៅពេលពលករលួចចេញទៅសៀមគឺងាយស្រួលជាទីបំផុត។ គេកត់សំគាល់ថា ដោយសារគ្មានការទប់ស្កាត់ពីសំណាក់សមត្ថកិច្ចតាមខ្សែបន្ទាត់ព្រំដែនក្នុងស្រុកម៉ាឡៃ ចំពោះពលករចំណាកស្រុកដែលឆ្លងទៅមកទឹកដីសៀមនេះឯង ទើបពលករខុសច្បាប់ត្រូវអាជ្ញាធរ និងសមត្ថកិច្ចសៀមចាប់បញ្ជូនមកវិញ ជារៀងរាល់ថ្ងៃឥតឈប់ឈរតាមច្រកទ្វារអន្តរជាតិប៉ោយប៉ែត ដោយក្នុងមួយថ្ងៃៗមិនក្រោម២០០នាក់ទេ ៕  |
| អតីតប្រធានាធិបតីហៃទី លោក Jeam Aristide នឹងវិលត្រឡប់ចូលស្រុកវិញ Posted: 13 Mar 2011 08:49 PM PDT  អតីតប្រធានាធិបតីហៃទី ដែលត្រូវបណ្តេញចេញពីតំណែង លោក Jean Bertrand Aristide នឹងវិលត្រឡប់ចូលស្រុកវិញក្នុងរយៈពេលប៉ុន្មានថ្ងៃខាងមុខនេះ ក្រោយពីរស់នៅនីរទេសអស់រយៈពេល៧ឆ្នាំមក ។ នេះបើតាមការឱ្យដឹងដោយមន្ត្រីអាហ្វ្រិកខាងត្បូងម្នាក់ ។ មន្ត្រីដដែលបានឱ្យដឹងទៀតថា លោក Jean Bertrand Aristide រស់នៅនីរទេសក្នុងប្រទេសអាហ្វ្រិកខាងត្បូង ។ តាមប្រភពព័ត៌មានថា គោលបំណងរបស់លោក Jean Bertrand Aristide ក្នុងការវិលត្រឡប់ចូលស្រុកវិញនេះគឺដើម្បីឈរឈ្មោះជាបេក្ខជនសម្រាប់ការបោះឆ្នោតជ្រើសរើសប្រធានាធិបតី ។ ប៉ុន្តែមន្ត្រីហៃទី និងមន្ត្រីអាមេរិកអះអាងថា ការវិលត្រឡប់ចូលស្រុកវិញរបស់លោក Aristide អាចបង្កផលប៉ះពាល់ដល់ដំណើរការបោះឆ្នោត ដែលនឹងរៀបចំឡើងនៅថ្ងៃទី២០ មីនា ខាងមុខនេះ ។ កាលពី៣សប្តាហ៍កន្លងទៅ អ្នកគាំទ្រលោក Aristide ជាច្រើនពាន់នាក់បានប្រមូលផ្តុំគ្នាធ្វើបាតុកម្មនៅទីក្រុងព័រអូប្រាំង រដ្ឋធានីហៃទី ដោយសច្ចាថា ពួកគេនឹងបង្កការអាក់ខានដល់ដំណើរការបោះឆ្នោតប្រសិនបើលោក Aristide មិនវិលត្រឡប់ចូលស្រុកវិញដើម្បីចូលរួមការបោះឆ្នោតទេ ៕  |
| នៅជប៉ុនចំនួនអ្នកស្លាប់ចេះតែកើននិងការភ័យខ្លាចចំពោះវិទ្យុសកម្មនុយក្លេអ៊ែរក៏ខ្លាំងដែរ Posted: 13 Mar 2011 08:41 PM PDT   ការគំរាមកំហែងដោយគ្រោះថ្នាក់នុយក្លេអ៊ែរបន្តកើននៅជប៉ុន ។ នាយករដ្ឋមន្ត្រីជប៉ុនលោកណាអូ តូកាន ថ្លែងកាលពីថ្ងៃទី១៣ មីនា ថា «ខ្ញុំចាត់ទុកសភាពការណ៍បច្ចុប្បន្នជាមួយការរញ្ជួយដី ស៊ូណាមី និងមជ្ឈមណ្ឌលនុយក្លេអ៊ែរទាំងឡាយថា ជាវិបត្តិយ៉ាងធ្ងន់ធ្ងរបំផុតពុំធ្លាប់មាន៦៥ឆ្នាំមកហើយក្រោយសង្គ្រាមលោកលើកទី២ សម្រាប់ប្រទេសជប៉ុន» ។ ទីភ្នាក់ងារថាមពលបរមាណូអន្តរជាតិរាយការណ៍ថា ការប្រកាសអាសន្ននុយក្លេអ៊ែរត្រូវបានធ្វើ ខណៈដែលរេអាក់ទ័រនុយក្លេអ៊ែរចំនួន១៤ក្នុងមជ្ឈមណ្ឌលនុយក្លេអ៊ែរ៤របស់ជប៉ុនរងការប៉ះពាល់ដោយសារការរញ្ជួយដីដែលពេលនេះប្រកាសថា មានកម្រិតដល់ទៅ៩រីស្ទ័រនោះ។ ទោះបីជាអាជ្ញាធរសន្តិសុខនុយក្លេអ៊ែរជប៉ុនអះអាងថា មជ្ឈមណ្ឌលនុយក្លេអ៊ែរទាំងនោះត្រូវបានបញ្ឈប់ដំណើរក្តី និងថា ពុំមានការធ្លាយវិទ្យុសកម្មណាមួយទៀត ក៏ដោយក៏មានហេតុផលនៃការព្រួយបារម្ភនានាដែរ ។ អាជ្ញាធរបានស្នើដល់មនុស្សទាំងឡាយដែលរស់នៅជុំវិញ មជ្ឈ មណ្ឌលនុយក្លេអ៊ែរទាំងនេះឱ្យជម្លៀសខ្លួនចេញឆ្ងាយយ៉ាងតិច១០គីឡូម៉ែត្រ ពីទីតាំងនុយក្លេអ៊ែរទាំងនោះ ។ TEPCO ជាក្រុមហ៊ុនអគ្គិសនីក្រុងតូក្យូដែលធ្វើអាជីវកម្មលើមជ្ឈមណ្ឌលនុយក្លេអ៊ែរហ្វូគូស៊ីម៉ាបញ្ជាក់ថា ការខូចខាតសំភារទាំងឡាយញ៉ាំងឱ្យគ្មានលទ្ធភាពធ្វើឱ្យត្រជាក់ដល់រេអាក់ទ័រ២នៃមជ្ឈមណ្ឌលនុយក្លេអ៊ែរទីមួយនៅហ្វូគូស៊ីម៉ា ។ សហគ្រាសនេះនិយាយថា ពុំមានភ្លើងគ្រប់ គ្រាន់ សម្រាប់ធ្វើឱ្យរេអាក់ទ័រត្រជាក់ ព្រោះប្រព័ន្ធ បាញ់ទឹកឱ្យត្រជាក់ត្រូវឈប់ដើរដោយស្វ័យប្រវត្តិពេលមានការរញ្ជួយដី ។ មជ្ឈមណ្ឌលនុយក្លេអ៊ែរ២នៅជប៉ុនញ៉ាំងឱ្យមានការព្រួយបារម្ពចំពោះវិទ្យុសកម្ម ។ មនុស្ស ២១៥.០០០នាក់ត្រូវបានជម្លៀសចេញក្នុងរង្វង់២០គ.ម ជុំវិញមជ្ឈមណ្ឌលនុយក្លេអ៊ែររទាំងនេះដែលស្ថិតនៅចម្ងាយ២៥០គ.មពីទីក្រុងតូក្យូ ដែលមានប្រជាជន៣៥លាននាក់ ។ រេអាក់ទ័រនុយក្លេអ៊ែររបស់ជប៉ុនសរុបដល់ទៅ១១ក្នុងចំណោមរេអាក់ទ័រទាំងអស់៥០ត្រូវបញ្ឈប់ចាប់តាំងពីការរញ្ជួយដីមកបណ្តាលឱ្យមានការធ្លាក់ចុះយ៉ាងខ្លាំងក្នុងការផ្គត់ផ្គង់អគ្គិសនី ។ កាលពីយប់ថ្ងៃទី១៣ មីនា វិទ្យាស្ថានការពារវិទ្យុសកម្ម និងសន្តិសុខនុយក្លេអ៊ែរ IRSN ប្រកាសថា ការបញ្ចេញវិទ្យុសកម្មយ៉ាងច្រើន កើតមានដំណាលគ្នានឹងការផ្ទុះកាលពីថ្ងៃទី១២ មីនា នូវអគាររេអាក់ទ័រទីមួយនៃមជ្ឈមណ្ឌលនុយក្លេអ៊ែរហ្វូគូស៊ីម៉ា ។ ម្យ៉ាងវិញទៀត រដ្ឋាភិបាលជប៉ុនបានព្រមានចំពោះគ្រោះថ្នាក់ថ្មីនៃការផ្ទុះក្នុងមជ្ឈមណ្ឌលនេះមកពីការកើនឡើងនៃសម្ពាធ អ៊ីដ្រូហ្សែនក្នុងអគាររេអាក់ទ័រទី៣ ។ នៅមជ្ឈមណ្ឌលនុយក្លេអ៊ែរ អូណាហ្គោវ៉ា ការប្រកាសអាសន្នដំបូងត្រូវបានធ្វើកាលពីថ្ងៃទី១៣ មីនា ។ ការកើនឡើងនៃវិទ្យុសកម្មត្រូវបានកត់សំគាល់ឃើញក្នុងមជ្ឈមណ្ឌលនុយក្លេអ៊ែរនេះ។ មួយវិញទៀត បញ្ហាកើតមានក្នុងប្រព័ន្ធធ្វើឱ្យត្រជាក់នៃរេអាក់ទ័រទី២របស់នៃមជ្ឈមណ្ឌលនុយក្លេអ៊ែរតូកៃដែលឧបករណ៍បាញ់ទឹកឱ្យត្រជាក់ឈប់ដំណើរការ ។ មជ្ឈមណ្ឌលនេះស្ថិតនៅចំងាយ១២០គ.ម ភាគឦសានក្រុងតូក្យូ ៕  |
| បាញ់ប្រហារទម្លាយកញ្ចក់រថយន្ត ពេលម្ចាស់កំពុងដេក របួសធ្ងន់ ជាការប៉ងធ្វើឃាតដោយរឿងគំនុំ Posted: 13 Mar 2011 08:34 PM PDT    ខេត្តក្រចេះ ៖ ស្នូរកាំភ្លើងអាកាបានផ្ទុះឡើងចំនួនបីគ្រាប់ផ្ទួនៗគ្នាទាំងកណ្ដាលយប់ស្ងាត់ បណ្ដាលឱ្យរថយន្ដកាមេរីមួយគ្រឿងត្រូវបែកកញ្ចក់ និងបុរសម្នាក់ដែលដេកក្នុងរថយន្ដត្រូវរងរបួសធ្ងន់ ដោយការផ្ទុះអាវុធនេះ ត្រូវបានសមត្ថកិច្ចសន្និដ្ឋានថា ជារឿងប៉ុនប៉ងមនុស្សឃាត ដោយសារគំនុំ។ ហេតុការណ៍ផ្ទុះអាវុធនេះ បានកើតឡើងកាលពីវេលាម៉ោង១១យប់ថ្ងៃទី១១ មីនា ទៅលើបុរសរងគ្រោះឈ្មោះខាន់ សង្ហា អាយុ៤០ឆ្នាំ ជាមន្ដ្រីយោធាបំរើការងារនៅវរៈសេនាតូចការពារព្រំដែនគោកលេខ២០៤ ខណៈពេលដែលជនរងគ្រោះដេកក្នុងរថយន្ដម៉ាកកាមរីគូថស្វិត ពណ៌ស ដែលឈប់ចតស្ងៀមនៅខាងមុខផ្ទះស្ថិតនៅភូមិតាសោម ឃុំស្វាយជ្រៈ ស្រុកស្នួល។ ជនរងគ្រោះត្រូវបានខ្មាន់កាំភ្លើងលបបាញ់ចំនួនបីគ្រាប់តាមកញ្ចក់ក្រោយរថយន្ដធ្លាយទៅដល់កញ្ចក់មុខបណ្ដាលឱ្យបែកកញ្ចក់រថយន្ដខ្ទេច និងត្រូវចំជនរងគ្រោះមួយគ្រាប់ពីក្រោយបណ្ដាលឱ្យរងរបួសធ្ងន់ ត្រូវក្រុមគ្រួសារបញ្ជូនទៅធ្វើការសង្គ្រោះនៅមន្ទីពេទ្យក្នុងរាជធានីភ្នំពេញ។ ក្រោយពេលបង្កសកម្មភាពរួចខ្មាន់កាំភ្លើងបានគេចខ្លួនបាត់ភ្លាមដោយសុវត្ថិភាព ពុំមានបន្សល់ទុកនូវវត្ថុតាងណាមួយសម្រាប់សមត្ថកិច្ចចុះធ្វើការអង្កេតស្រាវជ្រាវនោះទេ។ កំលាំងជំនាញស្នងការដ្ឋាននគរបាលខេត្ដបានចុះទៅពិនិត្យដល់កន្លែងកើតហេតុ គឺរកឃើញតែសំបកគ្រាប់កាំភ្លើងធុនអាកាចំនួនបីគ្រាប់ រីឯនៅលើពូករថយន្ដមានស្នាមធ្លុះដោយក្បាលគ្រាប់ និងប្រឡាក់ឈាម។ ចំណែកកញ្ចក់រថយន្ដខាងក្រោយត្រូវបែកសុះខ្ទេច។ លោកវរសេនីយ៍ត្រី ចាន់ សុខគីម នាយការិយាល័យប្រឆាំងបទល្មើសព្រហ្មទណ្ឌកំរិតធ្ងន់ បានឱ្យដឹងទៀតថា នៅក្នុងហេតុការណ៍ផ្ទុះអាវុធរបស់ខ្មាន់កាំភ្លើងទៅលើជនរងគ្រោះនេះគឺសមត្ថកិច្ចអាចសន្និដ្ឋានជាជំហានដំបូងថា បណ្ដាលមកពីរឿងគំនុំ។ ចំណែកការស្រាវជ្រាវស្វែរកលើមុខសញ្ញាជនដៃដល់ គឺកំលាំងនគរបាលក៍កំពុងតែចុះធ្វើការស្រាវជ្រាវយ៉ាងស្វិតស្វាញផងដែរ៕  |
| រថយន្តកាមរីដឹកឈើគ្រញូងចាប់ប្រគល់ឱ្យប៉ូលិសសេដ្ឋកិច្ច Posted: 13 Mar 2011 08:30 PM PDT  ខេត្តបន្ទាយមានជ័យ ៖ រថយន្តកាមរីដឹកឈើគ្រញូងចំនួន៨ដុំ ត្រូវបានកម្លាំងប៉ូលិសស្រុកមង្គលបុរី ដេញតាមប្រមាញ់រហូតម្ចាស់ភ័យស្លន់ស្លោររត់ចោលរថយន្តដ៏ទំនើបគេចខ្លួនបាត់ស្រមោល ។ ការបង្ក្រាបនេះបានធ្វើឡើងនៅ វេលាម៉ោង៣រសៀល ថ្ងៃទី១១ មីនា ឆ្នាំ២០១១ នៅចំណុចភូមិត្រាង ឃុំបន្ទាយនាង ស្រុកមង្គលបុរី ។ លោកវរសេនីយ៍ត្រី ផុន សាលីម អធិការនគរបាលស្រុកមង្គលបុរី បានឱ្យដឹងថា ដោយការចង្អុយណែនាំពីលោកឧត្តមសេនីយ៍ស្នងការក្នុងការទប់ស្កាត់ និងបង្ក្រាបនូវរាល់បទល្មើស ព្រមទាំងការផ្តល់ព័ត៌មានពីប្រជាពលរដ្ឋបានទាន់ពេល លោកបានចាត់តាំងកម្លាំងធ្វើការល្បាតស្រាវជ្រាវ។ ពេលអ្នកបើករថយន្តដឹកឈើគ្រញូងឃើញកម្លាំងសមត្ថកិច្ចល្បាត ក៏ព្យាយាមបើករថយន្តគេចចូលទៅភូមិត្រាង ឃុំបន្ទាយនាង ហើយរត់គេចខ្លួនបាត់ ទើបកម្លាំងរបស់លោកបាននាំយករថយន្តនោះមកកាន់អធិការដ្ឋាន និងធ្វើការប្រគល់ឱ្យសមត្ថកិច្ចប៉ូលិសប្រឆាំងបទល្មើសសេដ្ឋកិច្ចក្រសួងមហាផ្ទៃ និងប៉ូលិសប្រឆាំងបទល្មើសសេដ្ឋកិច្ចខេត្ត ដើម្បីចាត់ការបន្ត ។ លោកវរសេនីយ៍ត្រី ចាប សុផាឫទ្ធិ នាយការិយាល័យប្រឆាំងបទល្មើសសេដ្ឋកិច្ចនៃ ស្នងការដ្ឋាននគរបាលខេត្ត និងលោកវរសេនីយ៍ទោ យិន ពិសិទ្ធ អនុប្រធានការិយាល័យប្រឆាំងបទល្មើសសេដ្ឋកិច្ចនៃនាយកដ្ឋានប្រឆាំងបទល្មើសសេដ្ឋកិច្ចបានឱ្យដឹងថា ពួកឈ្មួញទុច្ចរិតដែលរកស៊ីលួចដឹកឈើគ្រញូង ច្រើនតែប្រើប្រាស់រថយន្តទំនើបៗហើយស្លាកលេខរថយន្តទៀត គឺពួកគេប្រើប្រាស់មិនតិចជាង២ទេ ដើម្បីបំភ័ន្តភ្នែកសមត្ថកិច្ច។ ជាក់ស្តែងដូចរថយន្តដែលសមត្ថកិច្ចបង្ក្រាបបាននេះ ជាប្រភេទរថយន្តកាមរីឆ្លាម ពណ៌ស ស៊េរីឆ្នាំ២០០២ ដឹកឈើគ្រញូងចំនួន៨កំណាត់ និងមានស្លាកលេខចំនួន២ គឺស្លាកលេខទី១ ភ្នំពេញ 2I-1653 និងទី២ ភ្នំពេញ 2M-6703 ។ លោកវរសេនីយ៍ទោ យិន ពិសិទ្ធ បានបន្តថា ឈើគ្រញូងទាំង៨កំណាត់ និងរថយន្តបានប្រគល់ឱ្យជំនាញមេព្រៃខេត្តបន្ទាយមានជ័យរក្សាទុក។ ឈើគ្រញូងទាំង៨កំណាត់នោះបើតាមការវាស់វែងក្នុង១កំណាត់ស្មើនឹង២ម៉ែត្រ គិតសរុបគឺស្មើ០,៧៨៤ម៉ែត្រគូប ៕  |
| អ្នកនាំពាក្យក្រសួងការបរទេសអាមេរិកសុំលាលែងចេញពីតំណែង Posted: 13 Mar 2011 08:26 PM PDT  អ្នកនាំពាក្យក្រសួងការបរទេសសហរដ្ឋអាមេរិក លោក Philip Crowley បានសុំលាលែងចេញពីតំណែងកាលពីថ្ងៃទី១៣ មីនា កន្លងមក ដោយសារការធ្វើអត្ថាធិប្បាយរបស់លោកស្តីអំពីការប្រព្រឹត្តរបស់ទាហានអាមេរិក ដែលត្រូវសង្ស័យថា ធ្វើឱ្យលិចធ្លាយឯកសារការទូតសម្ងាត់របស់អាមេរិក ។ រដ្ឋមន្ត្រីការបរទេសអាមេរិក លោកស្រីហ៊ីល ឡារី គ្លីនតុន ថ្លែងថា លោកស្រីមានការសោកស្តាយណាស់ ដែលលោក Philip Crowley ជាអ្នកនាំពាក្យក្រសួងការបរទេស និងជាឧបការីទទួលបន្ទុកកិច្ចការសាធារណៈ សុំលាលែងចេញពីតំណែង ហើយថា លោកស្រីទទួលយកការសុំលាលែងនេះទាំងការសោកស្តាយជាទីបំផុត ។ លោក Philip Crowley ត្រូវបានដកស្រង់សម្តីដែលថ្លែងក្នុងសេចក្តីថ្លែងការណ៍មួយថា «បើពិនិត្យមើលពីផលប៉ះពាល់ដោយសារការអត្ថាធិប្បាយរបស់ខ្ញុំ គឺខ្ញុំត្រូវតែទទួលខុសត្រូវចំពោះបញ្ហានេះ ដូច្នេះខ្ញុំគ្មានអ្វីក្រៅពីដាក់ពាក្យសុំលាលែងចេញពីតំណែងដើម្បីលុបលាងទោសកំហុសរបស់ខ្ញុំឡើយ» ។ លោក Crowley បានថ្លែងនៅវិទ្យាស្ថានបច្ចេកវិទ្យារដ្ឋម៉ាសាជូសេតថា ការប្រព្រឹត្តរបស់អតីតអ្នកវិភាគចារកម្ម ដែលត្រូវកាត់ទោសដាក់ពន្ធនាគារជារឿងឆ្កួតៗ គួរឱ្យអស់សំណើច ។ អ្នកវិភាគចារកម្មរូបនេះត្រូវបានចាប់ខ្លួនកាលពីខែឧសភា ឆ្នាំ២០១០ កន្លងមក ពីបទចោទប្រកាន់ «ដោនឡូត» ឯកសារការទូតសម្ងាត់របស់អាេមរិកជាច្រើនពាន់ឯកសារ ស្តីអំពីសង្គ្រាមនៅអ៊ីរ៉ាក់ និងអាហ្វហ្គានីស្ថាន ហើយផ្តល់ឯកសារទាំងនេះទៅឱ្យគេហទំព័រ Wikileaks ៕  |
| Posted: 13 Mar 2011 08:19 PM PDT  រាជធានីភ្នំពេញ ៖ លោកគិត សុផា អភិបាលខណ្ឌដង្កោ បានព្រមានខ្លាំងៗដល់លោកមេភូមិ និងអាជ្ញាធរសង្កាត់មួយដែលតែងតែយកលុយពីរថយន្តដឹកដីដោយគ្រាន់តែដឹក៤ទៅ៥ឡានសំរាប់ពូនផ្នូរប៉ុណ្ណោះ។ ជាពិសេសជាងនេះទៅទៀតអ្នកដែលយកលុយពីប្រជាពលរដ្ឋក្រីក្រដែលមានលុយបន្តិចបន្តួចសាងសង់របងផ្ទះ ឬសំណង់តូចតាចនោះត្រូវបញ្ឈប់ជាបន្ទាន់ ព្រោះធ្វើឱ្យប្រជាពលរដ្ឋមានការយល់ច្រឡំដល់គណៈអភិបាលខណ្ឌថា ជាអ្នកប្រើឱ្យទៅយក តែកន្លងមកគណៈអភិបាលខណ្ឌមិនដែលបានប្រើឱ្យធ្វើបែបនេះឡើយ។ លោកបន្តថា លោកមេភូមិ លោកចៅសង្កាត់គ្រប់រូបត្រូវពិនិត្យមើលឱ្យបានច្បាស់ទៅលើប្រជាពលរដ្ឋក្រីក្រពិតប្រាកដពេលពួកគាត់សាងសង់របងផ្ទះ ឬសំណង់តូចតាចគួរសំរួលឱ្យពួកគាត់ធ្វើទៅ ឱ្យតែពួកគាត់ធ្វើត្រឹមត្រូវតាមច្បាប់កំណត់ដូចជាការទុកគំលាត ឬចំណីផ្លូវតាមច្បាប់កំណត់របស់ភូមិបានហើយ។ ជាងនេះទៅទៀតចំពោះច្បាប់សាងសង់លោកមេភូមិត្រូវកាន់ទៅជួបលោកឱ្យតែអ្នកក្រីក្រពិតប្រាកដលោកនឹងចុះហត្ថលេខា ដោយមិនឱ្យបង់ប្រាក់ឡើយ។ ដោយឡែកការផ្ទេរសិទ្ធិដីធ្លីវិញក៏ត្រូវតែជួយសំរួលដល់ប្រជាពលរដ្ឋក្រី ក្រដែរ។ លោកមេភូមិ ឬចៅសង្កាត់ត្រូវជួយពន្យល់ណែនាំដល់ប្រជាពលរដ្ឋកុំឱ្យពួកគាត់ប្រគល់ឯកសារដល់អ្នកផ្សេងរត់ការដែលនាំឱ្យគេទារថ្លៃរត់ការខ្ពស់ធ្វើឱ្យពួកគាត់ខាតបង់ថវិកាច្រើន ហើយលោកមេភូមិឬលោកចៅសង្កាត់គួរតែជួយកាន់ឯកសារទៅសាលាខណ្ឌជូនពួកគាត់។ លោកអភិបាលខណ្ឌដង្កោថ្លែងបែបនេះនៅក្នុងពេលលោកសំណេះសំណាលជាមួយសមាជិក សមាជិកាគណបក្សប្រជាជនកម្ពុជា សង្កាត់ កន្ទោក និងសង្កាត់បឹងធំដែលសង្កាត់ទាំងពីរនេះទើបចាត់បញ្ចូលមកក្រោមការគ្រប់គ្រងរបស់ខណ្ឌដង្កោ កាលពីពេលថ្មីៗកន្លងមក។ ពិធីសំណេះសំណាលនោះបានប្រព្រឹត្តទៅកាលពីវេលារសៀលថ្ងៃទី១១ ខែមីនា ឆ្នាំ២០១១ នៅក្នុងវត្តស្ងួនពេជ្រ ភូមិស្ងួនពេជ្រ សង្កាត់កន្ទោក ខណ្ឌដង្កោ រាជធានីភ្នំពេញ។ លោកគិត សុផា បានផ្តាំផ្ញើឱ្យសមាជិក សមាជិកាទាំងអស់នោះសាមគ្គីភាពគ្នា ត្រូវមើលសមាជិកដែលបាត់បង់សមត្ថភាពកុំបោះបង់ចោលពួកគេ និងមិនត្រូវរើសអើងជាមួយពួកគេទេ។ ជាងនេះទៅទៀតត្រូវចេះអូសទាញសមាជិកពីខាងក្រៅ និងចេះផ្សព្វផ្សាយពីគោលនយោបាយរបស់គណបក្ស ជាពិសេសផ្សព្វផ្សាយពីលទ្ធផលការងារ ការកសាងហេដ្ឋារចនាសម្ព័ន្ធ និងផ្សព្វផ្សាយពីនយោបាយភូមិ-ឃុំមានសុវត្ថិភាព។ លោកបានស្នើសុំឱ្យសមាជិកទាំងអស់ត្រូវតែស្មោះត្រង់នឹងគណបក្ស និងត្រូវតែរាយការណ៍ជាបន្ទាន់ បើដឹងថា កន្លែងណាមានការលេងល្បែងស៊ីសង ឬសេពគ្រឿងញៀន។ សមាជិក សមាជិកាទាំងអស់ប្តេជ្ញាចិត្តបោះឆ្នោតជូនគណបក្សប្រជាជនកម្ពុជា និងគាំទ្រសម្តេចអគ្គ មហាសេនាបតីតេជោហ៊ុន សែន ជាបេក្ខភាពនាយករដ្ឋមន្ត្រីជារៀងរហូត។ ក្នុងពិធីនោះក៏បានផ្តល់ឱ្យសមាជិក សមាជិកាដែលចូលរួមក្នុងម្នាក់សារុង១ និងប្រគល់ថវិកាដល់គណបក្សសង្កាត់នីមួយៗ២០ម៉ឺនរៀល ដែលអំណោយនេះឧបត្ថម្ភដោយលោកកែប ជុតិមា៕  |
| ចាប់ខ្លួនក្មេងប្រុសលួចលុយ និងសំភារក្នុងសមាគមជនឥតទីពឹង Posted: 13 Mar 2011 08:14 PM PDT  រាជធានីភ្នំពេញ ៖ ក្មេងប្រុសជំទង់មា្នក់ត្រូវប្រធានសមាគមជនឥតទីពឹង ឬហៅថាសមាគមមែកឈើចាប់ខ្លួនប្រគល់ទៅឱ្យប៉ូលិសប៉ុស្តិ៍កំបូលពីបទលួចលុយរបស់ជនជាតិបរទេសចំនួន៤.០០០ដុល្លារ ព្រមទាំងទូរស័ព្ទដៃ និងសំភារផ្សេងៗមួយចំនួនទៀត។ ការឃាត់ខ្លួនក្មេងប្រុសជំទង់នោះកាលពីវេលាម៉ោង៧ព្រឹក ថ្ងៃទី១៣ ខែមីនា ឆ្នាំ២០១១ នៅក្នុងសមាគមស្ថិតនៅក្នុងភូមិលិចវត្ត សង្កាត់កំបូល ខណ្ឌដង្កោ រាជធានីភ្នំពេញ។ ក្មេងប្រុសជំទង់រូបនោះឈ្មោះសំ តុលា អាយុ១៦ឆ្នាំ ជាក្មេងកំព្រាស្នាក់នៅក្នុងសមាគមជនឥតទីពឹង និងមានស្រុកកំណើតក្នុងភូមិកោះដាច់ សង្កាត់កោះដាច់ ខណ្ឌឫស្សីកែវ រាជធានីភ្នំពេញ។ ចំណែកឯជនរងគ្រោះឈ្មោះជែម ភេទប្រុស អាយុប្រហែលជាង៣០ឆ្នាំ ជាជនជាតិសិង្ហបុរីបាត់លុយចំនួន៤.០០០ដុល្លារ ទូរស័ព្ទដៃ៣គ្រឿង ព្រមទាំងសំភារជាច្រើនទៀត។ តាមប្រភពព័ត៌មានឱ្យដឹងថា បុរសជនជាតិសិង្ហបុរីនោះបានស្នាក់នៅក្នុងសមាគមដើម្បីត្រៀមធ្វើផ្ទះ ធ្វើអគារឱ្យសមាគមជនឥតទីពឹង ហើយតាមគំរោងគឺស្នាក់នៅទីនោះរយៈពេល១០ថ្ងៃទៀត។ ដោយឡែកនៅវេលាយប់ថ្ងៃទី១២ មីនា ខណៈបុរសសិង្ហបុរីដេកលង់លក់នៅក្នុងសមាគមហើយពុំដឹងថាបិទទ្វារខ្ទាស់គន្លឹះ ឬអត់ទេក៏ត្រូវក្មេងប្រុសជំទង់នោះចូលទៅលួចយកកាបូបលុយ និងសំភារអស់គ្មានសល់។ លុះព្រឹកឡើងដឹងបាត់ក៏មានការភ្ញាក់ផ្អើល ហើយពុំមាននរណាដឹងថា ក្មេងប្រុសជំទង់នោះគឺជាអ្នកលួចឡើយ ។ ប្រធានសមាគមបានប្រមូលក្មេងៗ និងអ្នកនៅក្នុងសមាគមទាំងអស់ទៅជួបជុំគ្នាសួរនាំ និងពិនិត្យមើលទឹកមុខ ។ ដោយសារក្មេងប្រុសជំទង់នោះធ្លាប់លួចទូរស័ព្ទនៅក្នុងសមាគមរូបគេមានទឹកមុខខុសពីគេឯង ទើបត្រូវប្រធានសមាគមឃាត់ខ្លួនប្រគល់ឱ្យប៉ូលិសតែម្តង។ មន្ត្រីប៉ូលិសឱ្យដឹងថា ក្រោយពេលឃាត់ខ្លួនក្មេងប្រុសនោះសារភាពពីកំហុសរបស់គេ។ គេឆ្លើយថា ក្នុងចំណោមលុយ៤.០០០ដុល្លារនោះគេចាយអស់ចំនួន១.០០០ដុល្លារហើយ ឯលុយ៣.០០០ដុល្លារទៀតរូបគេយកទៅលាក់ទុកក្នុងបង្គន់។ ពេលប៉ូលិសនាំគេទៅរកលុយនោះ គេប្រាប់ប៉ូលិសថា មិនមែនលាក់ក្នុងបង្គន់ទេ គឺលាក់នៅក្នុងគុម្ពឫស្សីជិតសមាគម។ ខណៈប៉ូលិសនាំគេទៅរកលុយនោះគេបែរជាប្រាប់ប៉ូលិសថា មិនមែននៅក្នុងគុម្ពឫស្សីទេ គឺរូបគេមិនហ៊ានចាយក៏ហែកលុយចោល រួចបោះចូលទៅក្នុងបង្គន់អស់ហើយ។ ប៉ូលិសមិនជឿការនិយាយបែបនោះទេ ហើយព្យាយាមសួរដេញដោលទើបគេប្រាប់ថា លុយនៅសល់ និងសំភារផ្សេងៗ រូបគេយកទៅផ្ញើបងប្អូននៅក្នុងភូមិសាឡូង សង្កាត់កំបូល។ ប្រភពដដែលបន្តថា ប៉ូលិសតាមទៅរកនៅទីនោះទៀត ប៉ុន្តែពេលទៅដល់ម្ចាស់ផ្ទះអត់ដឹងរឿងអ្វីទាំងអស់គឺក្មេងប្រុសរូបនោះនិយាយកុហក និងធ្វើចរិតដូចមនុស្សមិនគ្រប់ទឹក។ លើសពីនេះគេបានឆ្លើយដាក់យុវជន២នាក់ទៀតថា ជាអ្នករួមគំនិតជាមួយគេ។ ពេលប៉ូលិសនាំខ្លួនយុវជន២នាក់នោះមកសាកសួរ ពួកគេបដិសេធថា អត់បានដឹងឡើយ។ ពេលនេះប៉ូលិសកំពុងលួងលោមឱ្យក្មេងប្រុសនោះប្រគល់លុយឱ្យម្ចាស់ដើមវិញ ប៉ុន្តែពុំដឹងថា គេព្រមប្រគល់ ឬអត់ទេ ៕  |
| ២នាក់លួចម៉ូតូមកពីស្រុកអូររាំងឪមកអស់លក្ខណ៍នៅក្រុងសួង Posted: 13 Mar 2011 08:03 PM PDT  ខេត្តកំពង់ចាម ៖ ជនសង្ស័យចំនួន២នាក់ក្នុងចំណោមបក្សពួក៣នាក់ បានត្រូវកម្លាំងនគរបាលក្រុងសួងឃាត់ខ្លួនកាលពីវេលាម៉ោង១១ព្រឹកថ្ងៃទី១២ មីនា ២០១១ នៅភូមិសួងកើត សង្កាត់សួង ក្រុងសួង ខណៈយកម៉ូតូសេ១២៥មួយគ្រឿង ពណ៌ខ្មៅ ស៊េរី២០១០ មកលក់មិនមានឯកសារអ្វីទាំងអស់ ហើយក្រោយមកទើបធ្លាយជាករណីកាច់សោ.កម៉ូតូយកមកពីស្រុកអូររាំងឪ និងបានបញ្ជូនមកកាន់អធិការដ្ឋាននគរបាលក្រុងសួងដើម្បីសួរនាំ ។ លោកវរសេនីយ៍ត្រីលាង អេង អធិការនគរបាលក្រុងសួងបានប្រាប់ថា មានអ្នកទិញម៉ូតូម្នាក់បានរាយការណ៍មកកាន់រូបលោកថា មានមនុស្សចំនួន៣នាក់ជិះម៉ូតូ១គ្រឿងខាងលើ យកមកលក់ដោយមិនមានលិខិតស្នាម តែមិន ទាន់និយាយពីតម្លៃទេ ហើយដោយមានការ សង្ស័យក៏បានទូរស័ព្ទមកប្រាប់ ។ ក្រោយពី ទទួលបានព័ត៌មាននេះភ្លាម រូបលោកបានចាត់ឱ្យកម្លាំងក្រោមឱវាទចុះទៅសហការជាមួយនឹងប៉ុស្តិ៍រដ្ឋបាលសង្កាត់សួងទៅកាន់កន្លែងនោះជាបន្ទាន់ ។ ពេលសមត្ថកិច្ចទៅដល់ ជនម្នាក់ឈ្មោះឆូយ បានរត់គេចខ្លួនបាត់និងឃាត់ខ្លួនបាន២នាក់ គឺឈ្មោះជឿន ការូ ភេទប្រុស អាយុ២១ឆ្នាំ រស់នៅភូមិព្រៃ ឃុំជាំក្រវៀន ស្រុកមេមត់ និងឈ្មោះថន សុក ភេទប្រុស អាយុ២០ឆ្នាំ រស់នៅភូមិបង្ហោយហួស ឃុំ-ស្រុកជាមួយគ្នា ព្រមទាំងបានដកហូតម៉ូតូ១គ្រឿងធុនសេ១២៥ បញ្ជូនមកកាន់អធិការដ្ឋានក្រុងសួង ។ ក្រោយពីត្រូវឃាត់ខ្លួនក្រុមនេះឆ្លើយសារភាពថា ម៉ូតូនេះត្រូវបានឈ្មោះឆូយ ជាអ្នកកាច់សោ.កយកមកពីស្រុកអូររាំងឪ ។ ចំណែកលោកអនុសេនីយ៍ឯកញ៉ែម សុខុម អធិការនគរបាលស្រុកអូររាំងឪវិញបានប្រាប់ថា ម៉ូតូសេ១២៥ នេះជាកម្មសិទ្ធិរបស់បុរសឈ្មោះ សៅ សុផា អាយុ៣២ឆ្នាំ រស់នៅភូមិលេខ២ ឃុំគងជ័យ ស្រុកអូររាំងឪ ត្រូវបានក្រុមសាច់ញាតិជិះចេញពីផ្ទះមកលេងផ្ទះមិត្តភក្តិនៅក្នុងភូមិ ជាមួយគ្នា កាលពីវេលាម៉ោង៦និង៤០នាទីល្ងាចថ្ងៃទី៥មីនា ហើយពេលឈប់បានចាក់សោត្រឹមត្រូវ ប៉ុន្តែគ្រាន់តែចូលទៅបានបន្តិចប៉ុណ្ណោះ ក៏ត្រូវក្រុមចោរកាច់សោ.កជិះយកទៅបាត់។ បន្ទាប់មកម្ចាស់ម៉ូតូបានប្តឹងមករូបលោកដើម្បីឱ្យជួយអន្តរាគមន៍តាមរក ហើយក្នុងប្រតិបត្តិការតាមរកនោះបានទាក់ទងជាមួយនឹងស្រុក៦ដែលមានភូមិសាស្រ្តនៅជាប់ជាមួយស្រុកអូររាំងឪ តែមិនទទូលបានលទ្ធផលទេ ព្រោះយប់ទៅហើយ ។ នារសៀលថ្ងៃទី១២ មីនា ស្រាប់តែលោកអធិការនគរបាលក្រុងសួងបានទូរស័ព្ទមកប្រាប់ពីការចាប់បានជនសង្ស័យ២នាក់ដោយដកហូតបានម៉ូតូ១គ្រឿងដូចខាងលើ និងបានប្រាប់លេខម៉ាស៊ីនម៉ូតូផងនោះ ធ្វើឱ្យ ស្គាល់ថា ពិតជាម៉ូតូដែលបានបាត់កាលពីថ្ងៃទី៥ មីនានោះមែន ។ លោកវរសេនីយ៍ឯកជឹម សេងហុង ស្នងការរងនគរបាលខេត្ត ទទួលផែនកណ្តាលយុត្តិធម៌មានប្រសាសន៍ថា ក្នុងពេលកម្លាំងនគរបាលក្រុងសួងចាប់ជនសង្ស័យទាំង២នាក់ ក្នុងចំណោមបក្សពួក៣នាក់ដំបូងគេមិនដឹងថាម៉ូតូនោះត្រូវបានកាច់សោ.កយកមកពីទីណានោះទេ ។ ប៉ុន្តែតាមចម្លើយសារភាពនិងការប្រកាសសួររក ក្រោយមកទើបដឹងថា ម្ចាស់ម៉ូតូដែល បាត់នោះរស់នៅស្រុកអូររាំងឪ ហើយជនសង្ស័យទាំង២នាក់រួមទាំងវត្ថុតាងត្រូវបានប្រគល់ឱ្យទៅអធិការដ្ឋាននគរបាលស្រុកអូររាំងឪចាត់ការទៅតាមច្បាប់ ៕  |
| ជិះម៉ូតូបុករថយន្តគ្មានប្រណីក្ស័យខ្លួនឯង២នាក់សង្ស័យស្រវឹង Posted: 13 Mar 2011 07:52 PM PDT  ខេត្តបាត់ដំបង ៖ ឧប្បត្តិហេតុគ្រោះថ្នាក់ចរាចរដ៏រន្ធត់មួយកាលពីវេលាម៉ោង៣រសៀលថ្ងៃទី១២ មីនា រវាងរថយន្តនិងម៉ូតូត្រង់ចំណុចផ្លូវកោងមួយកន្លែង ស្ថិតក្នុងភូមិប៉ោយស្វាយ ឃុំតាគ្រាម ស្រុកបាណន់ បានបណ្តាលឱ្យអ្នកជិះម៉ូតូ២នាក់ស្លាប់ភ្លាមៗ នៅកន្លែងកើតហេតុ ដែលគេសង្ស័យថា ភាគីអ្នកជិះម៉ូតូទំនងជាស្រវឹងផង។ ក្នុងឧប្បត្តិហេតុនេះគេមិនទាន់ស្គាល់អត្តសញ្ញាណអ្នកស្លាប់ទាំង២នាក់ដែលជិះម៉ូតូនៅឡើយទេ រីឯអ្នកបើកបររថយន្តធុនធ្ងន់ក៏មិនស្គាល់ដែរ ព្រោះក្រោយពេលជួបគ្រោះថ្នាក់តៃកុងបានដាក់មេប្រូចបាត់ស្រមោល ។ តាមការបំភ្លឺពីសាក្សីបាននិយាយដែរថា អ្នកជិះម៉ូតូទំនងជាស្រវឹងដោយបោះពួយពីទិសខាងកើតក្នុងល្បឿនលឿនបំផុត លុះដល់ចំណុចផ្លូវកោងទៅខាងស្តាំ អ្នកជិះបត់អត់ទាន់ក៏ជ្រុលទៅបុករថយន្តដឹកថ្មមកពីមុខនៅខាងឆ្វេងដៃខ្លួនពេញទំហឹងលាន់ដូចរន្ទះ ដួលចូលក្រោមរថយន្តបណ្តាលឱ្យរថយន្តកិនខ្ទេចទាំងម៉ូតូទាំងមនុស្ស ។ ទោះជាបែបណា មន្ត្រីនគរបាលបានបញ្ជាក់ថា គេបានដឹកសាកសពបុរស២នាក់ដែលមិនទាន់ស្គាល់ឈ្មោះទៅតំកល់ទុកក្នុងវត្តតាគ្រាមដើម្បីរង់ចាំសាច់ញាតិមកទទួល រីឯម៉ូតូនិងរថយន្ត សមត្ថកិច្ចបានយកទៅរក្សាទុកនៅការិយាល័យចរាចរជើងគោកខេត្តដើម្បីដោះស្រាយ ៕  |
| បង្កើតមណ្ឌលសេវាកម្មយុត្តិធម៌និងយន្តការដោះស្រាយវិវាទក្រៅតុលាការ Posted: 13 Mar 2011 07:49 PM PDT   រាជធានីភ្នំពេញ ៖ លោកសេង សុវណ្ណារ៉ា អនុរដ្ឋលេខាធិការក្រសួងយុតិ្តធម៌បានថ្លែងថា ក្នុងរយៈពេល៣ឆ្នាំ គិតពីខែមករា២០០៧ ដល់ឆ្នាំ២០១០ បន្ទាប់ពីក្រសួងយុតិ្តធម៌បង្កើតមណ្ឌលសេវាកម្មយុត្តិធម៌សាកល្បងថ្នាក់ក្រុង-ស្រុកចំនួន២០មក យើងទទួលបានវិវាទចំនួន ៦.១០៦ករណី ក្នុងនោះសម្រុះសម្រួលផ្សះផ្សាបានសម្រេចចំនួន២.៣១៩ករណី មិនបានសម្រេច២៧០ករណី បញ្ជូនតាមនីតិវិធី១៨៦ករណី ដកពាក្យបណ្តឹង២៥ករណី និងទំនាស់ កំពុងចាត់ការចំនួន៣.៣០៦ករណី ។ លោកសេង សុវណ្ណារ៉ា បានថ្លែងឱ្យដឹងបែបនេះក្នុងពេលលោកអញ្ជើញចូលរួមជាអធិបតីក្នុងពិធីផ្សព្វផ្សាយពីការបង្កើតមណ្ឌលសេវាកម្មយុត្តិធម៌ និងយន្តការដោះស្រាយវិវាទក្រៅប្រព័ន្ធតុលាការ នៅសាលារាជធានីភ្នំពេញកាលពីរសៀលថ្ងៃទី១០ មីនា ២០១០ ។ លោកអនុរដ្ឋលេខាធិការបានឱ្យដឹងទៀតថា ក្នុងចំណោមវិវាទ ឬទំនាស់ខាងលើនោះមានទំនាស់ដីធ្លីចំនួន២.៤៥២ករណី បរិហារកេរិ៍្ត ឬជេរប្រមាថ ៧៧៤ករណី អំពើហិង្សាក្នុងគ្រួសារ១.០០១ករណី សុំលែងលះ៣៩៧ករណី ជំពាក់ប្រាក់៨១១ករណី មរតក៤៩ករណីធ្វើឱ្យខូចទ្រព្យសម្បត្តិ១៥០ករណី ទំនាស់បិទផ្លូវ និងព្រំដី១៥៦ករណី ទាមទារអាហារកិច្ចចិញ្ចឹមកូន៣៩ករណី ផ្តាច់ពាក្យរៀបអាពាហ៍ពិពាហ៍២២ករណី និងទំនាស់តូចតាចចំនួន២៥៥ករណី ។ លោកអនុរដ្ឋលេខាធិការសេង សុវណ្ណរ៉ា បានបញ្ជាក់ថា ក្រសួងយុត្តិធម៌ និងក្រសួងមហាផ្ទៃដែលជាសេនាធិការឱ្យរាជរដ្ឋាភិបាលបានបង្កើតឱ្យមានមណ្ឌលសេវាកម្មយុត្តិធម៌ថ្នាក់ក្រុង ស្រុក សាកល្បងចំនួន២០ និងគណៈកម្មាធិការដោះស្រាយទំនាស់ឃុំ-សង្កាត់ចំនួន៥៦ នៅក្នុងខេត្តចំនួន៦ មានខេត្តកំពង់ស្ពឺ កំពង់ឆ្នាំង បាត់ដំបង សៀមរាប រតនគិរី និងខេត្តមណ្ឌលគិរី ។ ដោយឡែកក្នុងឆ្នាំ២០១០ ក្រសួងយុត្តិធម៌បានបង្កើតសេវាកម្មយុតិ្តធម៌បន្ថែមចំនួន១០ក្រុង-ខណ្ឌ គឺក្រុងកំពតនៃខេត្តកំពត ក្រុងព្រៃវែង នៃខេត្តព្រៃវែង និងរាជធានីភ្នំពេញមានខណ្ឌចំនួន៨ ដែលត្រូវផ្សព្វផ្សាយនាពេលនេះ ។ នៅក្នុងឱកាសនោះ លោកប៉ា សុជាតិវង្ស អភិបាលរងរាជធានីភ្នំពេញបានមានប្រសាសន៍ថា នេះជាការបង្ខិតសេវាយុត្តិធម៌ឱ្យកាន់តែជិតប្រជាពលរដ្ឋ ដើម្បីរួមចំណែកកាត់បន្ថយភាពក្រីក្រ ជូនប្រជាពលរដ្ឋ ជាពិសេសកាត់បន្ថយការកកស្ទះសំណុំរឿងតូចតាចនៅតាមសាលាដំបូងរាជធានី-ខេត្ត និងអាជ្ញាធរមូលដ្ឋានឱ្យកាន់តែប្រសើរឡើង៕  |
| ជាងផ្សារដំបូលសំយាបមុខផ្ទះត្រូវចរន្តឆ្លងឆក់ស្ទើរតែស្លាប់ Posted: 13 Mar 2011 07:31 PM PDT  ខេត្តកំពង់ស្ពឺ ៖ ជាងផ្សារដែកម្នាក់បានត្រូវចរន្តអគ្គិសនីឆក់នៅជាប់ច្រងាងនឹងជណ្ដើរដូចទោចយោលទោង ខណៈពេលកំពុងផ្សារដំបូលសំយាបស័ង្កសីមុខផ្ទះនៅភូមិដុតកំបោរ ឃុំព្រះនិព្វាន ស្រុកគងពិសី កាលពីវេលាម៉ោងប្រមាណ៤ និង៣០នាទីរសៀលថ្ងៃទី១០ មីនា កន្លងមកនេះ ។ យុវជនជាជាងផ្សារដែកម្នាក់នេះឈ្មោះម៉ី សម្ផស្ស អាយុ២៥ឆ្នាំ មានស្រុកកំណើតនៅភូមិត្រាស់សាលា ឃុំត្រពាំងគ ស្រុកសំរោងទង បច្ចុប្បន្នស្នាក់នៅកន្លែងសិប្បកម្មផ្សារទ្វារបង្អួចក្នុងភូមិដើមប្ញស ឃុំដើមប្ញស ស្រុកកណ្ដាលស្ទឹង ខេត្ដកណ្ដាល ។ យុវជនរូបនេះបានឱ្យដឹងថា ខ្លួនមកស្នាក់នៅស៊ីឈ្នួលផ្សារដែកឱ្យថៅកែដោយគិតតម្លៃតាមការ៉េ ។ នៅថ្ងៃកើតហេតុ ខ្លួនបានទៅផ្សារដំបូលសំយាបផ្ទះឱ្យគេជាមួយមិត្ដភក្ដិម្នាក់នៅឯភូមិដុតកំបោរ ឃុំព្រះនិព្វាន ស្រុកគងពិសី លុះផ្សាររួចហើយក៏ចុះពីជណ្ដើរដោយមានកាន់ដែកនៅនឹងដៃផង ប៉ុន្ដែមិនដឹងប៉ះនឹងអ្វីទេ ស្រាប់តែបណ្ដាលឱ្យឆក់ភ្លៅខាងឆ្វេងនិងដៃខាងឆ្វេងឆេះខ្លោច រួចឆក់ជាប់នឹងជណ្ដើរនោះ ទើបមិត្ដភក្ដិស្ទុះទៅពន្លត់ម៉ាស៊ីនរួចជួយទាញចេញពីជណ្ដើរយកទៅដាក់លើប៉ៅអ៊ី ។ យុវជនរងគ្រោះបន្ដទៀតថា ពេលត្រូវឆក់ដំបូងនៅដឹងខ្លួននៅឡើយទេ លុះពេលគេជួយលើកយកទៅដាក់លើប៉ៅអ៊ីក៏សន្លប់តែម្ដង លុះពេលដឹងខ្លួនវិញ ត្រូវមិត្តភក្តិប្រាប់ថា ភ្លាមៗនោះបានបញ្ជូនទៅព្យាបាលនៅមន្ទីរពេទ្យខេត្ដ រួចទើបបញ្ជូនបន្តមកព្យាបាលនៅមន្ទីរពេទ្យព្រះកុសុមៈទៀត ។ តាមមិត្ដភក្ដិដែលទៅផ្សារដែកជាមួយឈ្មោះអ៊ុន ប៉ែន អាយុ២៥ឆ្នាំ មានស្រុកកំណើតនៅភូមិកញ្ច្រប់ ឃុំព្រះនិព្វាន បានឱ្យដឹងថា ពេលទៅផ្សារដែកនោះ ខ្លួនឈរផ្សារនៅខាងក្រោម ចំណែកម៉ី សម្ផស្ស ឡើងផ្សារលើជណ្ដើរ។ ខណៈពេលកំពុងផ្សារនោះមិនដឹងមូលហេតុអ្វីទេ ស្រាប់តែខ្លួនដែលកំពុងឈរផ្សារនោះក៏ឆក់ដែរ តែមិនមានគ្រោះថ្នាក់ទេ ដោយសារឈរនៅខាងក្រោមមានកម្លាំងអាចរើបម្រះបាន ។ បើតាមការអះអាងពីឈ្មោះអ៊ុន ប៉ែន ថា ការឆក់នេះក៏អាចបណ្ដាលមកពីឆ្លងចរន្ដអគ្គិសនីពីបង្គោលខ្សែកាបដែលនៅជិតសំយាបនោះប្រមាណ២ម៉ែត្រប៉ុណ្ណោះ ។ ចំណែកតាមការសន្និដ្ឋានមួយទៀតថា ដោយសារពេលកំពុងផ្សារនោះ កម្លាំងម៉ាស៊ីនដែលបញ្ឆេះមានចរន្ដ AC&DC ប៉ះគ្នាបង្កើតជាកម្លាំងដ៏ខ្លាំងមួយ ។ ខណៈពេលមកដល់មន្ទីរពេទ្យព្រះកុសុមៈ គ្រូពេទ្យបានវះសាច់ដែលខ្លោចចេញខ្លះដើម្បីបង្ហូរឈាមដែលកកចេញ ចំណែកភ្លៅក៏ឆេះខ្លោចបន្ដិចដែរ ។ រីឯថៅកែសិប្បកម្មធ្វើទ្វារបង្អួចនោះក៏បានមកមើលជនរងគ្រោះដល់មន្ទីរពេទ្យនិងចេញថ្លៃព្យាបាលឱ្យផងដែរ ។ បើតាមអ្នកបច្ចេកទេសខាងផ្នែកអគ្គិសនីបានឱ្យដឹងថា ខ្សែកាបដែលរត់កាត់ដំបូលនោះជាខ្សែស្រាតមានកម្លាំងដល់ទៅ៣៨០ ហើយជាប្រភេទខ្សែហ្វា កាលណាមានចរន្ដខាងក្រោមជាម៉ាស់ ទើបបង្កឱ្យមានចរន្ដឆក់គ្នាបែបនេះ ហេតុដូច្នេះហើយទើបពេលពន្លត់ម៉ាស៊ីន ក៏លែងឆក់ដែរ ៕  |
| នាងក្រមុំខ្មែររងគ្រោះព្រោះបុរសសៀមចាប់រំលោភ Posted: 13 Mar 2011 07:24 PM PDT  ក្រុងប៉ោយប៉ែត ៖ ស្ត្រីក្រមុំខ្មែរម្នាក់បានអះអាងថា នាងត្រូវឪពុកមាថ្លៃជាជនជាតិសៀមចាប់រំលោភបានសម្រេច កាលពីវេលាម៉ោង២រំលងអធ្រាត្រ ឈានចូលថ្ងៃទី១៣ មីនា និងរត់មកទឹកដីខ្មែរវិញទាំងយប់ឆ្លងកាត់បន្ទាត់ព្រំដែន ហើយនៅព្រឹកថ្ងៃទី១៣ មីនា ឪពុកម្តាយរបស់នាងបាននាំមកដាក់ពាក្យបណ្តឹងនៅប៉ុសិ៍្តប៉ូលិសរដ្ឋបាលអូរបីជាន់ឱ្យជួយរកយុត្តិធម៌ ។ នាងក្រមុំរងគ្រោះដែលមានអាយុ១៧ឆ្នាំបានប្រាប់ថា នាងត្រូវឪពុកមាថ្លៃជាជនជាតិសៀមចាប់រំលោភនៅក្នុងភូមិណងចាន់ ឃុំណូនម៉ាក់មុន ស្រុកគោកធ្យូង ខេត្តស្រះកែវ ខណៈម្តាយមីងនាងមិននៅផ្ទះដោយរវល់មកទិញស្រូវនៅឯខេត្តបាត់ដំបង ។ មុនហេតុការណ៍កើតឡើង គឺនៅម៉ោងប្រហែល២រំលងអធ្រាត្រ ខណៈនាងកំពុងដេក ស្រាប់តែឪពុកមាជាជនជាតិសៀមនោះមកគោះទ្វារផ្ទះ ដោយកុហកថា ភ្លេចកាបូបលុយក្នុងផ្ទះ ហើយនាងក៏បើកទ្វារឱ្យចូល ។ បន្ទាប់ពីបើកទ្វារស្រាប់តែឪពុកមាសៀមនោះចាប់នាងមួល.ក ប្រាប់ថា មិនឱ្យស្រែក ហើយដោយសារភ័យខ្លាច ព្រោះគ្មានអ្នកណាម្នាក់នៅជិត ក៏ទ្រាំរហូតគេរំលោភបានសម្រេច ។ នាងប្រាប់ថា ក្រោយពីត្រូវរំលោភហើយនាងក៏លួចចេញតាមបង្អួចរត់មកដីខ្មែរវិញ ទាំងយប់ ។ ចំណែកឪពុកម្តាយនាងក្រមុំរងគ្រោះបានប្រាប់ថា កូនស្រីគាត់បានទៅរស់នៅជាមួយម្តាយមីងគេប្រហែលមួយសបា្តហ៍ហើយ ដើម្បីជួយការងារផ្ទះ ព្រោះប្អូនស្រីគាត់រវល់ដើរទិញស្រូវនៅក្នុងដីខ្មែរយកទៅលក់នៅដីសៀម ។ ឪពុកនារីរងគ្រោះបន្តថា ប្អូនស្រីគាត់ឈ្មោះ ខឿត សុភាព បានប្តីជាជនជាតិសៀម ឈ្មោះណាយ ប៊ុនលាង ធាងឡាយ ហើយទៅរស់នៅក្នុងទឹកដីសៀម ក្នុងភូមិខាងលើជាច្រើនឆ្នាំមកហើយ ។ មុនពេលគាត់នាំកូនមកប្តឹងប៉ូលិសប៉ុស្តិ៍ នៅទីនេះ គឺពួកគាត់បានទៅផ្ទះកើតហេតុក្នុងភូមិសៀមដែរ ប៉ុន្តែមិនឃើញប្អូនថ្លៃអប្រិយនោះនៅផ្ទះទេ ។ តាមឪពុកម្តាយនាងក្រមុំរងគ្រោះបានឱ្យដឹងទៀតថា មកដល់ព្រឹកថ្ងៃទី១៣ មីនា ប្អូនស្រីគាត់ខឿត សុភាព ក៏ពុំទាន់វិលត្រឡប់ពីដើរទិញស្រូវនៅឯខេត្តបាត់ដំបងនៅឡើយដែរ ។ ចំណែកនាងរងគ្រោះប្រាប់ថា ក្រោយពីត្រូវឪពុកមាជាជនជាតិសៀមនោះចាប់រំលោភ នាងក៏បានដើរកាត់ពីភូមិណង់ចាន់ ចេញតាមច្រករបៀងទំនប់ដាច់ ស្ថិតក្នុងភូមិទំនប់ដាច់រហូតដល់ម៉ោង៧ព្រឹកទើបមកដល់ដីខ្មែរ ។ លោកខាំ យ៉ាន នាយរងប៉ុសិ៍្តអូរបីជាន់បានប្រាប់កោះសន្តិភាពថា ជាគោលការណ៍របស់ថ្នាក់លើ គឺក្រោយពីធ្វើកំណត់ហេតុរួច ត្រូវឱ្យលោកកសាងសំណុំរឿងបញ្ជូនទៅថ្នាក់លើ ដើម្បីមានវិធានការបន្ត ព្រោះអ្នកប្រព្រឹត្តជាជនជាតិសៀម ៕  |
| Posted: 13 Mar 2011 07:18 PM PDT រាជធានីភ្នំពេញ ៖ តាមប្រភពព័ត៌មានក្រៅផ្លូវការ និងជាជំហានដំបូងបានឱ្យដឹងថា ជនជាតិវៀតណាម និងជនជាតិឡាវ ចំនួន៦នាក់ ត្រូវបានចាប់ខ្លួន និងដកហូតបានថ្នាំញៀនប្រភេទយ៉ាម៉ាចំនួន៤៤សុង ស្មើនឹង៨៨.០០០គ្រាប់ ម៉ាទឹកកកចំនួន៣ដុំ ស្មើនឹង៣គីឡូក្រាម នៅក្នុងប្រតិបត្តិការបង្ក្រាបគ្រឿងញៀន និងឆែកឆេរលំនៅឋានលេខ៦Eo ក្រុមទី១២ ភូមិទួលគោក សង្កាត់ទួលសង្កែ ខណ្ឌឫស្សីកែវ កាលពីវេលាម៉ោង១១និង១៥នាទីយប់ ថ្ងៃទី ១១ មីនា ។ ការបង្ក្រាបគ្រឿងញៀនទ្រង់ទ្រាយធំមួយនេះ ធ្វើឡើងដោយសមត្ថកិច្ចមន្ទីរប្រឆាំងគ្រឿងញៀនក្រសួងមហាផ្ទៃ សហការជាមួយប៉ូលិសខណ្ឌឫស្សីកែវ ក្រោមការដឹកនាំដោយលោកសុខ រឿង ព្រះរាជអាជ្ញារងអមសាលាដំបូងរាជធានីភ្នំពេញ ។ ទោះបីជាយ៉ាងណាពុំមានព័ត៌មានដែលត្រូវបានអះអាងជាផ្លូវការ ទាក់ទិននឹងការបង្ក្រាបគ្រឿងញៀននេះនៅឡើយទេ ដោយសារសមត្ថកិច្ចកំពុងធ្វើការស្រាវជ្រាវរកចាប់ខ្លួនបក្សពួកដែលពាក់ព័ន្ធបន្តទៀត ។ តាមព័ត៌មានក្រៅផ្លូវការដដែលឱ្យដឹងថា នៅវេលាម៉ោង១១និង១៥នាទីយប់ ថ្ងៃទី១១ មីនា សមត្ថកិច្ចចំរុះរបស់មន្ទីរប្រឆាំងគ្រឿងញៀនក្រសួងមហាផ្ទៃបានចុះសហការជាមួយប៉ូលិសខណ្ឌឫស្សីកែវ និងប៉ុស្តិ៍ទួលសង្កែ ក្រោមការដឹកនាំរបស់លោកព្រះរាជអាជ្ញារង សុខ រឿន បានឆ្មក់ចូលឆែកឆេរលំនៅឋានលេខ 6Eo ស្ថិតនៅក្រុមទី១២ ភូមិទួលគោក សង្កាត់ទួលសង្កែ ខណ្ឌ ឫស្សីកែវ ។ តាមព័ត៌មានបន្តទៀតថា មុនពេលចុះឆែកឆេរលំនៅឋាន សមត្ថកិច្ចបានធ្វើការស្រាវជ្រាវចាប់ខ្លួនបានបក្សពួកជួញដូរគ្រឿងញៀន ហើយក៏បាននាំទៅឆែកឆេរលំនៅឋានខាងលើទាំងយប់តែម្តង ។ តាមប្រភពដដែលបានឱ្យដឹងថា នៅក្នុងការឆែកឆេរនេះសមត្ថកិច្ចដកហូតបានថ្នាំញៀនប្រភេទយ៉ាម៉ានិងម៉ាទឹកកក ។ ក្រៅពីនោះសមត្ថកិច្ចដកហូតរថយន្តម៉ាកមែរសឺដេស ចំនួន២គ្រឿង ម៉ូតូមួយគ្រឿង និងថវិកាមួយចំនួន ព្រមទាំងឃាត់ខ្លួនមនុស្សចំនួន៦នាក់ ។ វត្ថុតាងគ្រឿងញៀនរួមជាមួយជនដែលត្រូវឃាត់ខ្លួន សមត្ថកិច្ចបញ្ជូនទៅកាន់មន្ទីរប្រឆាំងគ្រឿងញៀនក្រសួងមហាផ្ទៃ ដើម្បីស្រាវជ្រាវបន្តទៀត។ នេះជាការបង្ក្រាបទ្រង់ទ្រាយធំមួយទៀតគួរឱ្យកត់សំគាល់នៅក្នុងយុទ្ធនាការបង្ក្រាបគ្រឿងញៀនដែលកំពុងតែប្រព្រឹត្តទៅយ៉ាងក្តៅគគុកទូទាំងប្រទេសនេះ ៕  |
| ក្រុមអ្នកនេសាទសមុទ្រខ្មែរ មិនចេញនេសាទខ្លាចស៊ូណាមី ធ្វើឱ្យម្ហូបអាហារសមុទ្រឡើងថ្លៃ Posted: 13 Mar 2011 07:04 PM PDT  ខេត្តព្រះសីហនុ ៖ ក្រៅតែពីអ្នកនេសាទគ្រួសារ ឬទូកនេសាទតូចៗដែលនេសាទនៅក្បែរឆ្នេរដីគោក បណ្តាទូកនេសាទធំៗដែលធ្លាប់ចេញទៅនេសាទក្នុងលំហសមុទ្រទឹកជ្រៅនៅក្នុងខេត្តព្រះសីហនុ បានលុបចោលការចេញទៅនេសាទដូចសព្វមួយដង ដោយសារតែខ្លាចជួបហេតុការណ៍អាក្រក់ក្រោយពេលមានសេចក្តីរាយការណ៍មកថា នៅប្រទេសជប៉ុនមានការរញ្ជួយដី និងរលកយក្សស៊ូណាមី ហើយអាចនឹងរាលដាលមកដល់ឆ្នេរសមុទ្រក្បែរខាងនៅតាមបណ្តាប្រទេសមួយចំនួនក្នុងតំបន់ទៀតផង។ ក្រុមអ្នកនេសាទនៅទំនប់រលកនាំគ្នានិយាយថា បើទោះបីជាក្រសួងធនធានទឹក និងឧត្តុនិយមប្រកាសថា នៅសមុទ្រកម្ពុជានឹងពុំមានព្យុះស៊ូណាមីកើតឡើងរាលដាលពីប្រទេសជប៉ុនមកដល់យ៉ាងណាក្តី ក៏ការព្រួយបារម្ភនៅតែកើតមានចំពោះអ្នកនេសាទដែលធ្លាប់ចេញទៅនេសាទក្នុងសមុទ្រទឹកជ្រៅ មានចម្ងាយឆ្ងាយពីដីគោក។ ទោះជាយ៉ាងនេះក្តី ការនេសាទជាលក្ខណៈគ្រួសារ ឬទូកនេសាទតូចៗដែលធ្វើការនេសាទជិតឆ្នេរដីគោកនៅមានសកម្មភាពខ្លះដែរ ដែលប្រការទាំងអស់នេះហើយទើបធ្វើឱ្យទិន្នផលនេសាទសមុទ្រថយចុះក្នុងរយៈពេលប៉ុន្មានថ្ងៃចុងក្រោយនេះនៅលើទីផ្សារ បណ្តាលឱ្យអាជីវករ អ្នកលក់ដូរម្ហូបអាហារសមុទ្រដំឡើងថ្លៃ ពិសេសគឺបង្គា ក្តាម មឹក និងត្រីគ្រប់ប្រភេទសុទ្ធតែឡើងថ្លៃដូចគ្នា។ មន្ត្រីជលផលខេត្តព្រះសីហនុដែលតាមដានព្រឹត្តិការណ៍នេះជាប្រចាំបានទទួលស្គាល់ថា ពិតជាមានការខកខានក្នុងការចេញទៅនេសាទក្នុងសមុទ្រខាងក្រៅ ពីបណ្តាទូកនេសាទភាគច្រើនប្រាកដមែន ទើបធ្វើឱ្យទិន្នផលសមុទ្រក្នុងទីផ្សារមានចំនួនតិច ហើយអ្វីៗនឹងវិលត្រឡប់ទៅកាន់សភាពធម្មតាវិញនៅពេលដែលព័ត៌មានស្តីពីការព្រួយបារម្ភពីរលកយក្សស៊ូណាមីត្រូវបានបញ្ចប់៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
