Koh Santipheap Daily |
- ជនជាតិអ៊ីស្រាអែល៥នាក់ស្លាប់ក្នុងតំបន់និគមជនមួយនៅស៊ីសហ្ស៊កដានី
- ក្រោយឈ្លោះជាមួយប្តីបន្តិចបន្តួច ស្ត្រីម្នាក់ដុតខ្លួនឯងស្លាប់ចោលកូន៤នាក់
- កម្ពុជាចូលរួមរំលែកទុក្ខ និងផ្តល់វិភាគទាន១០ម៉ឺនដុល្លារដល់មហាសោកនាដកម្មនិងមហន្តរាយរញ្ជួយដីនៅជប៉ុន
- រញ្ជួយដី និងស៊ូណាមី នៅជប៉ុនប្រតិបត្តិការជួយសង្គ្រោះយ៉ាងធំ និងមានការគំរាមកំហែងនុយក្លេអ៊ែរ
- គ្រោះថ្នាក់ក្រឡាប់រថយន្តបឺសនៅក្រុងញូវយ៉កស្លាប់១៥នាក់
- លោកយាយអាមេរិកម្នាក់អាយុ១១៤ឆ្នាំជាប់ឯតទគ្គកម្មពិភពលោកជាស្ត្រីអាយុវែងជាងគេ
- កងទ័ពលោកកាដាហ្វីវាយដណ្តើមយកបានជាបន្តបន្ទាប់នូវទីក្រុងដែលពួកបះបោរកាន់កាប់
- រញ្ជួយដីដ៏ខ្លាំងនៅជប៉ុនអ្នកស្លាប់ និងបាត់ខ្លួនមានចំនួនជាង1.800នាក់
- ពិធីចែកអំណោយនិងប្រគល់ផ្ទះ២ខ្នងជូនជនពិការឈ្នះចលនា៣ល្អ
- បុគ្គលិកអង្គការក្រៅរដ្ឋាភិបាល២ ម្នាក់កាង ម្នាក់កាក់អ្នកដឹកឈើ ក្លាយជាការប្រទូស្តរ៉ាយ របួសម្នាក់
- សូមជួយណែនាំម្ចាស់កុំដាក់ទណ្ឌកម្មខ្ញុំធ្ងន់ធ្ងរបែបនេះពេក
- លោកទេសរដ្ឋមន្ត្រី ចម ប្រសិទ្ធ សង់ប៉ុស្តិ៍យាមដល់សមត្ថកិច្ចការពារសុវត្ថិភាព
- អស់ឈើក្រាក់កាប់ឈើអុសរស់រាប់ពាន់ម៉ែត្រគូបធ្វើអាជីវកម្ម
| ជនជាតិអ៊ីស្រាអែល៥នាក់ស្លាប់ក្នុងតំបន់និគមជនមួយនៅស៊ីសហ្ស៊កដានី Posted: 12 Mar 2011 11:30 PM PST បុរសប៉ាឡេស្ទីនម្នាក់ កាលពីព្រឹកថ្ងៃទី១២ មីនា បានសម្លាប់ជនជាតិអ៊ីស្រាអែល៥នាក់ ក្នុងនោះមានកុមារ៣នាក់ ដោយសារកាំបិតក្នុងតំបន់និគមជនជ្វីហ្វនៅស៊ីសហ្ស៊កដានី ។ នេះជាការអះអាងរបស់កងទ័ពអ៊ីស្រាអែល ។ លោកអេហ៊ូដ បារ៉ាក់ រដ្ឋមន្ត្រីការពារប្រទេសអ៊ីស្រាអែលបានសន្យាពីការប្រើរាល់មធ្យោបាយចាំបាច់ដើម្បីតាមចាប់ពួកអ្នកទទួលខុសត្រូវលើការសម្លាប់មនុស្សនេះ ។ នាយករដ្ឋមន្ត្រីអ៊ីស្រាអែលលោកបេនចាមីន នេតាន់យ៉ាហ៊ូ បានធ្វើអត្ថាធិប្បាយថា នេះជាអំពើយ៉ាងកំសាកមួយដែលវាយប្រហារលើគ្រួសារស្លូតត្រង់មួយ ឪពុកម្តាយ និងពួកកូនៗដែលកំពុងដេកលង់លក់ក្នុងផ្ទះ ។ លោកបន្តថា អ៊ីស្រាអែលនឹងពុំអាចនៅស្ងៀមបាន ចំពោះអំពើមនុស្សឃាតដ៏គួរឱ្យស្អប់ខ្ពើមនេះ ហើយនឹងបញ្ចេញសកម្មភាពម៉ឺងម៉ាត់នានា ដើម្បីធានាសន្តិសុខដល់ប្រជាជនស៊ីវិល ហើយដាក់ទោសពួកឃាតក។ អាជ្ញាធរប៉ាឡេស្ទីនបានជួយស្វែងរកពួកអ្នកទទួលខុសត្រូវ ៕  |
| ក្រោយឈ្លោះជាមួយប្តីបន្តិចបន្តួច ស្ត្រីម្នាក់ដុតខ្លួនឯងស្លាប់ចោលកូន៤នាក់ Posted: 12 Mar 2011 11:12 PM PST    ខេត្តបាត់ដំបង ៖ ស្ត្រីម្នាក់បានយកកណ្តាប់ចំបើងមកគរដុតសម្លាប់ខ្លួនឯង បណ្តាលឱ្យស្លាប់ដូចបំណង ផ្អើលអ្នកភូមិទៅចោមរោមមើល ដើម្បីចង់ដឹងពីមូលហេតុ កាលពីវេលាម៉ោង៩និង១៥នាទីព្រឹកថ្ងៃទី១៣ មីនា ២០១១ នៅក្រុម៥ ភូមិដំបូកខ្ពស់ ឃុំអូរដំបង២ ស្រុកសង្កែ។ ស្ត្រីម្នាក់នេះឈ្មោះច្រប លួត អាយុ៤៩ឆ្នាំ រស់នៅភូមិ-ឃុំកើតហេតុខាងលើ មានប្តីឈ្មោះចាន់ ណែម អាយុ៥២ឆ្នាំ កូន៤នាក់ ក្នុងនោះប្រុស៣នាក់...ស្ត្រីរងគ្រោះបានយកកណ្តាប់ចំបើងទៅគរលើដងខ្លួននៅឯក្រោយផ្ទះ ដោយពុំមាននរណាឃើញហេតុការណ៍នេះឡើយ រួចហើយកេះដែកកេះដុត បណ្តាលឱ្យគំនរចំបើងឆាបឆេះវឹបឡើងសន្ធោសន្ធៅ ស្ត្រីរូបនេះក៏ស្លាប់ដោយត្រូវឆេះរួញក្រញង់តែម្តង សំណាងហើយដែលភ្លើងចំបើងមិនរាលដាលឆេះដល់ផ្ទះតទៅទៀត ។ ប៉ុន្តែប៉ុន្មាននាទីក្រោយមក ក៏មានក្មេងប្រុសក្បែរខាងម្នាក់ បានដើរទៅកន្លែងឆេះហុយៗនោះ ដោយឆ្ងល់ថា តើគេដុតអ្វី?...ពេលនោះក៏ឃើញសពស្ត្រីច្រប លួត ឆេះស្លាប់រួញក្រញង់ទៅហើយ ក្មេងនោះក៏រត់ទៅប្រាប់ឪពុកម្តាយ ទើបផ្អើលតៗគ្នាដល់អ្នកភូមិមកចោមរោមមើលយ៉ាងអ៊ូអរ ។ យោងតាមលោកចាន់ ណែម ប្តីស្ត្រីរងគ្រោះបានឱ្យដឹងថា ខណៈពេលដែលប្រពន្ធរបស់គាត់ដុតខ្លួនឯង រូបគាត់មិននៅផ្ទះទេ គឺជាប់រវល់ទៅផ្សារទិញម្ហូប...។ មុនពេលកើតហេតុដុតខ្លួននេះ ប្រពន្ធរបស់គាត់ និងរូបគាត់មានរឿងឈ្លោះទាស់ទែងគ្នាខ្លះៗដែរ ប៉ុន្តែមិនជាធំដុំប៉ុន្មាន ហើយក៏មិននឹកស្មានថា ប្រពន្ធរបស់គាត់ឈានដល់ការប្រព្រឹត្តបែបនេះដែរ...មួយរយៈនេះប្រពន្ធរបស់គាត់ហាក់មានអារម្មណ៍មិននឹងន៎ សតិមិនគ្រប់គ្រាន់... ។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព .  |
| Posted: 12 Mar 2011 08:20 PM PST   សាររំលែកទុក្ខរបស់រាជដ្ឋាភិបាលកម្ពុជាចុះថ្ងៃទី១២ មីនា ២០១១ សម្តេចតេជោនាយករដ្ឋមន្រ្តីហ៊ុន សែន បានសម្តែងភាពក្តុកក្តួលក្រៃលែង និងសូមចូលរួមរំលែកទុក្ខក្រៀមក្រំដល់រាជរដ្ឋាភិបាលជប៉ុន ក៏ដូចប្រជាពលរដ្ឋជប៉ុនដែលជួបឧប្បត្តិហេតុគ្រោះធម្មជាតិរញ្ជួយដី-រលកយក្សស៊ូណាមី បង្កឱ្យមនុស្សស្លាប់-របួសច្រើននាក់ ខូចខាតហេដ្ឋារចនាសម្ព័ន្ធ និងទ្រព្យសម្បត្តិច្រើនលើសលប់...ជាមួយនេះរដ្ឋាភិបាលកម្ពុជាបានចូលរួមផ្តល់វិភាគទាន១០ម៉ឺនដុល្លារដល់សោកនាដកម្ម និងមហន្តរាយរញ្ជួយដី-រលកយក្សស៊ូណាមីនៃប្រទេសជប៉ុនផងដែរ ។  |
| Posted: 12 Mar 2011 08:04 PM PST    បន្ទាប់ពីការរញ្ជួយដីយ៉ាងខ្លាំងបំផុតពុំធ្លាប់ដែលមាននៅជប៉ុន ការព្រួយបារម្ភយ៉ាងខ្លាំងក្លាបំផុតគឺចំពោះសភាពការណ៍ក្នុងមជ្ឈមណ្ឌលនុយក្លេអ៊ែរ ២នៅហ្វូគូស៊ីម៉ា ចម្ងាយ២៥០គីឡូម៉ែត្រ ខាងជើងក្រុងតូក្យូ ។ ការផ្ទុះមួយកើតមាននៅមជ្ឈមណ្ឌលនុយក្លេអ៊ែរ ហ្វូគូស៊ីម៉ា ទីមួយ ។ ដំបូល និងជញ្ជាំងរបស់អគាររេអាក់ទ័រ នៅទីនោះបានបាក់ ។ វិទ្យុសកម្មមានខ្ពស់ជាងកម្រិតមធ្យមនៅទីតាំងនោះ ។ អាជ្ញាធរអះអាងថា គ្រោះថ្នាក់វិទ្យុសកម្មមានកម្រិត៤ ក្នុងចំណោមកម្រិត៧ ។ ចំណែករេអាក់ទ័រទី២ មានសញ្ញានៃបញ្ហាជាមួយគ្រោះថ្នាក់នៃការផ្ទុះ ។ គ្រាប់ស្ករអ៊ីយ៉ូតត្រូវបានចែកចាយដល់ប្រជាជនទាំងឡាយ ។ ពួកអ្នករស់នៅ ក្នុងរង្វង់២០គីឡូម៉ែត្រ ជុំវិញទីតាំងនុយក្លេអ៊ែរ នោះត្រូវជម្លៀសចេញ ។ មនុស្ស៣នាក់ ដែលទទួលការធ្វើតេស្តរកឃើញវិទ្យុសកម្ម ។ តុល្យការបណ្តោះអាសន្ននៃគ្រោះរញ្ជួយដីនេះអ្នកស្លាប់ និងបាត់ខ្លួនឡើងដល់១.៨០០នាក់ ។ សាកសពមនុស្សរវាងពី៣០០ទៅ៤០០នាក់ ត្រូវបានរកឃើញក្នុងកំពង់ផែមួយនាភាគឦសានជប៉ុន ។ ហើយអាជ្ញាធរបានបាត់ដំណឹងពីប្រជាជនប្រមាណជា១០.០០០នាក់នៅមីណាមីសាន់រីកូ ជាទីក្រុងកំពង់ផែមួយនៅភាគឦសាន ដែលរងការប៉ះពាល់ខ្លាំងជាងគេដោយការរញ្ជួយដី និងរលកយក្សស៊ូណាមី ។ រដ្ឋាភីបាលជប៉ុននិយាយថា នេះជាការរញ្ជួយខ្លាំងបំផុតនៅជប៉ុនចាប់តាំងពីសករាជ MEIJI (ឆ្នាំ១៨៦៨ ដល់ឆ្នាំ១៩១២) មក ហើយ គេគិតថា មនុស្សជាច្រើនពាន់នាក់ត្រូវស្លាប់ ។ កងទ័ពជប៉ុនបានរកឃើញសាកសពមនុស្សពី៣០០ទៅ៤០០នាក់ នៅកំពង់ផែរីគូ ហ្សេនតាកាតា ។ លើសពីនេះទៀត សាកសពមនុស្សរវាងពី២០០ទៅ៣០០នាក់ត្រូវបានរកឃើញនៅកន្លែងកំសាន្តមាត់សមុទ្រសេនដាយ (ក្រុងមីយ៉ាហ្ស៊ី) ក្រោយរលកយក្សស៊ូណាមី កម្ពស់១០ម៉ែត្រនៅទីនោះ ។ គ្រោះថ្នាក់នុយក្លេអ៊ែរចំបងនៅមជ្ឈមណ្ឌលនុយក្លេអ៊ែរហ្វូគូស៊ីម៉ាលេខ១ ស្ថិតនៅភាគឦសានជប៉ុនដែរ គឺការផ្ទុះកើតឡើងនាថ្ងៃទី១២ មីនា វេលាម៉ោង១៥និង៣៦នាទីម៉ោងក្នុងស្រុក ដែលតាមទូរទស្សន៍រដ្ឋ NHK ថា បណ្តាលឱ្យមនុស្សរបួសជាច្រើននាក់ក្នុងចំណោមនិយោជិត។ ក្នុងករណីមានពពកវិទ្យុសកម្ម វិទ្យុសកម្មនេះ នឹងអាចប៉ះពាល់ដល់ឧបទ្វីបកាំឆាត់ការ របស់រុស្ស៊ី យ៉ាងហោចណាស់ក៏រយៈពេល១៤ម៉ោងដែរ ។ ក្រុងមីណាមី សាន់រីគូ មានប្រជាជន១៧.០០០នាក់ អាជ្ញាធរនិយាយថា បាត់ដំណឹងពីមនុស្សប្រមាណជា១០.០០០នាក់ ។ ក្នុងទីក្រុងនេះ ហាក់ដូចជានៅសល់អគារតែ៣ប៉ុណ្ណោះ មន្ទីរពេទ្យមួយ និងទីតាំងរៀបការមួយកន្លែង ព្រមទាំងអគារមួយទៀត ក្រៅពីនោះត្រូវបំផ្លាញខ្ទេច ៕  |
| គ្រោះថ្នាក់ក្រឡាប់រថយន្តបឺសនៅក្រុងញូវយ៉កស្លាប់១៥នាក់ Posted: 12 Mar 2011 07:59 PM PST  មនុស្សយ៉ាងហោចណាស់១៥នាក់ បានស្លាប់បាត់បង់ជីវិត និងច្រើននាក់ទៀតរងរបួសនៅក្នុងគ្រោះថ្នាក់រថយន្តបឺសមួយក្នុងទីក្រុងញូវយ៉ក សហរដ្ឋអាមេរិកកាលពីល្ងាចថ្ងៃទី១២ មីនា កន្លងមក ។ រថយន្តបឺសនេះដឹកមនុស្ស៣០នាក់ ទៅកាន់ផ្ទះវិញពីកាស៊ីណូមួយ ហើយបានក្រឡាប់ទៅបុកបង្គោលស្លាកសញ្ញាធំមួយដែលដាក់នៅចិញ្ចើមថ្នល់ ។ អ្នកបើកបររថយន្តបឺសនេះដែលនៅរស់ពីឧប្បត្តិហេតុគួរឱ្យរន្ធត់នេះ និយាយប្រាប់ប៉ូលិសថា ខ្លួនបានបាត់បង់ម្ចាស់ការនៅពេលព្យាយាមគេចចេញពីរថយន្តកាំមីញ៉ុងដឹកសម្លៀកបំពាក់មួយគ្រឿងដែលបើកក្នុងទិសដៅផ្ទុយគ្នា ៕  |
| លោកយាយអាមេរិកម្នាក់អាយុ១១៤ឆ្នាំជាប់ឯតទគ្គកម្មពិភពលោកជាស្ត្រីអាយុវែងជាងគេ Posted: 12 Mar 2011 07:57 PM PST  លោកយាយ Besse Cooper អាយុ១១៤ឆ្នាំ ត្រូវបានផ្តល់តំណែងឯតទគ្គកម្មជាស្ត្រីមានអាយុច្រើនបំផុតនៅលើពិភពលោក ហើយទទួលបានការទទួលស្គាល់ជាផ្លូវការដោយអង្គការកំណត់ហេតុឯតទគ្គកម្មពិភពលោក (ហ្គី  |
| កងទ័ពលោកកាដាហ្វីវាយដណ្តើមយកបានជាបន្តបន្ទាប់នូវទីក្រុងដែលពួកបះបោរកាន់កាប់ Posted: 12 Mar 2011 07:51 PM PST  កងទ័ពរបស់មេដឹកនាំលីប៊ី លោកមូអាម៉ា កាដាហ្វី វាយដណ្តើមយកបានទីក្រុងជាប្រវត្តិសាស្ត្រមួយដែលកាន់កាប់ដោយពួកឧទ្ទាម ហើយឡោមព័ទ្ធវាយដណ្តើមយកទីក្រុងមួយទៀត រហូតធ្វើឱ្យមេដឹកនាំការបះបោរនៅក្នុងទីក្រុងបេនហ្គាហ្ស៊ី អំពាវនាវដល់យោធាបរទេសឱ្យជួយទប់ស្កាត់នូវអ្វីដែលខ្លួននិយាយថា នឹងបណ្តាលឱ្យមនុស្សជាច្រើនម៉ឺននាក់ត្រូវស្លាប់ ប្រសិនបើពួកបះបោរប្រឆាំងលោកកាដាហ្វីចាញ់ ។ ពួកឧទ្ទាមកាលពីថ្ងៃទី១២ មីនា បានអះអាងពីការដកថយចេញពីទីក្រុងប្រេង Ras Lanuf ដែលខ្លួនកាន់កាប់កាលពី២សប្តាហ៍មុន ចំណែកកងទ័ពបដិវត្តន៍ដែលមួយផ្នែកមានតែយុវជនស្ម័គ្រចិត្តពុំមានបទពិសោធន៍បានបង្ខំចិត្តដកថយដោយសារការបាញ់កាំភ្លើងធំ និងការទម្លាក់គ្រាប់បែកពីយន្តហោះ ។ ប្រធានក្រុមប្រឹក្សាបដិវត្តន៍លីប៊ី លោក Mustafa bdel Jalil អះអាងថា ប្រសិនបើកងកម្លាំងរបស់លោកកាដាហ្វី វាយដណ្តើមបានទីក្រុងធំបំផុតទី២ គឺក្រុងបេនហ្គាហ្ស៊ីរបស់លីប៊ីនេះ មនុស្សកន្លះលាននាក់នឹងត្រូវស្លាប់។  |
| រញ្ជួយដីដ៏ខ្លាំងនៅជប៉ុនអ្នកស្លាប់ និងបាត់ខ្លួនមានចំនួនជាង1.800នាក់ Posted: 12 Mar 2011 07:16 PM PST  ការរញ្ជួយដីដ៏ខ្លាំងមួយកម្រិត៨,៩រីស្ទ័រ ដែលកើតឡើងនៅប្រទេសជប៉ុនកាលពីថ្ងៃទី១១ មីនា កន្លងមក អ្នកស្លាប់ និងបាត់ខ្លួនមានចំនួនជាង១.៨០០នាក់ ។ បាតុភូតរញ្ជួយដីនេះញ៉ាំងឱ្យមានរលកស៊ូណាមីកម្ពស់ដល់១០ម៉ែត្រ ។  |
| ពិធីចែកអំណោយនិងប្រគល់ផ្ទះ២ខ្នងជូនជនពិការឈ្នះចលនា៣ល្អ Posted: 12 Mar 2011 07:11 PM PST   ខេត្តពោធិ៍សាត់ ៖ ព្រឹកថ្ងៃទី១០ មីនា ឆ្នាំ ២០១១ លោកអោត មុន្នី អភិបាលរងខេត្តពោធិ៍សាត់បានអញ្ជើញជាអធិបតីក្នុងពិធីចែកអំណោយដល់ជនចាស់ជរាក្រីក្រ ជនពិការគ្រួសារពលីចំនួន២០០នាក់ នៅស្រុកភ្នំក្រវាញ និងពិធីប្រគល់ផ្ទះទំហំ៥ម៉ែត្រ×៦ម៉ែត្រ ធ្វើអំពីឈើប្រក់ស័ង្កសីចំនួន២ខ្នង ដល់ជនពិការ២នាក់ ដែលមានស្នាដៃឆ្នើមក្នុងចលនាប្រឡងប្រណាំង ៣ល្អរបស់សមាគមអតីតយុទ្ធជនកម្ពុជា ។ លោកញ៉ឹក សារ៉េត ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តមានប្រសាសន៍ថា សម្តេចតេជោ ហ៊ុន សែន និង លោកជំទាវបណ្ឌិតប៊ុន រ៉ានី បានលើកស្ទួយអតីតយុទ្ធជន ព្រមទាំងបានផ្តល់អំណោយសប្បុរសធម៌ជាច្រើន ដូចជាសាងសង់តំបន់អភិវឌ្ឍន៍ជនពិការតាកែន កោះស្លា នៅខេត្តកំពត កំពង់ស្ពឺ និងខេត្តសៀមរាប ។ ផ្តល់ផ្ទះដល់អតីតយុទ្ធជនបានចំនួន៦៧ខ្នង គិតត្រឹមខែមិថុនា ឆ្នាំ២០១០ ដែលមួយខ្នងមានតម្លៃពី៣០០០ដុល្លារទៅ៥០០០ដុល្លារ និងផ្តល់កញ្ចប់ទស្សនកិច្ចទៅបរទេសចំនួន៥០នាក់ទៀតផង ។ ដោយឡែកនៅពោធិ៍សាត់រយៈពេល៣ឆ្នាំនេះ សមាគម អតីតយុទ្ធជនដែលមានស្នាដៃឆ្នើមចំណាត់ថ្នាក់លេខ១ចំនួន៣នាក់ លេខ២ចំនួន២នាក់ លេខ៣ ចំនួន២៥នាក់ និងលេខ៤ ចំនួន៣៥នាក់ ។ អ្នកលេខ១ ទទួលបានមេដាយមាសការងារ និងផ្ទះ១ខ្នង, លេខ២ មេដាយប្រាក់ការងារ និងកញ្ចប់ទស្សនកិច្ចទៅក្រៅប្រទេស១០០០ដុល្លារ លេខ៣ ទទួលបានប័ណ្ណសរសើររបស់សមាគម និងក្រសួងអមដោយទឹកប្រាក់២០០.០០០រៀល និងលេខ៤ទទួលបានលិខិតសរសើររបស់សមាគម និងក្រសួងអមដោយទឹកប្រាក់១០០.០០០រៀល។ ស្របជាមួយនឹងដំណើរការចលនាល្អ នេះ យើងបានអនុវត្តយ៉ាងប្រុងប្រយ័ត្នតាមលក្ខន្តិកៈ បេឡាមរណៈសង្គ្រោះរបស់អតីតយុទ្ធជនរហូតមកដល់ដំណាច់ឆ្នាំ២០១០នេះ សមាជិកសមា គមខេត្តបានទទួលមរណភាពចំនួន៦៧នាក់ហើយ។ សមាគមបានប្រគល់ថវិកាតាមការកំណត់ក្នុងលក្ខន្តិកៈ គឺសពម្នាក់៤.០០០.០០០រៀល ។ សរុបសពដែលបានប្រគល់ថវិកាមានចំនួន៣៦សព ស្មើនិងទឹកប្រាក់១៤៤.០០០.០០០រៀល ។ លោកអោក មុន្នី មានប្រសាសន៍ថា ការងារសង្គមកិច្ចមានភាពស្មុគស្មាញច្រើន និងជាបន្ទុកដ៏ធ្ងន់ធ្ងររបស់រាជរដ្ឋាភិបាល ។ មុខសញ្ញាអតីតយុទ្ធជនជាមុខសញ្ញាងាយរងគ្រោះដែលក្រសួង សង្គមកិច្ចបានយកចិត្តទុកដាក់បង្កើតជាសមាគមនៅឆ្នាំ២០០៧ ដែលមានសម្តេចតេជោ ហ៊ុន សែន នាយករដ្ឋមន្ត្រីជាប្រធាន លោកឧបនាយករដ្ឋមន្ត្រីទៀ បាញ់ អនុប្រធាន និងលោកអ៊ិត សំហេង ជាអគ្គលេខាធិការ ។ ការបង្កើតឡើងនូវសមាគមអតីតយុទ្ធជនកម្ពុជា គឺជាព្រឹត្តិការណ៍ ជាប្រវត្តិសាស្ត្រមួយថ្មីរបស់អតីតយុទ្ធជនដែលពុំធ្លាប់មាននៅកម្ពុជា ។ គោលបំណងនៃការបង្កើតសមាគមនេះ គឺដើម្បីលើកកម្ពស់តួនាទីអតីតយុទ្ធជននៅក្នុងសង្គម បំផុសស្មារតីសាមគ្គី ភាពជួយគ្នាទៅវិញទៅមក ពេលជួបការខ្វះខាត ឬទទួលគ្រោះថ្នាក់ផ្សេងៗ ព្រមទាំងបំផុសចលនា៣ល្អ សំដៅអភិវឌ្ឍន៍ជីវភាពរបស់អតីតយុទ្ធជន និងគ្រួសារក្នុងការអភិវឌ្ឍន៍ប្រទេសជាតិការពារបូរណភាពទឹកដី ។ គណៈអធិបតីបានចែកអំណោយដល់ចាស់ជរាក្រីក្រ ជនពិការ និងគ្រួសារពលីចំនួន២០០នាក់ ក្នុងម្នាក់ៗទទួលបានអង្ករ២៥គីឡូក្រាម សារុង១ ក្រមា១ និងថវិកា១០.០០០រៀល ។ បន្ទាប់មកបានធ្វើពិធីប្រគល់កូនសោផ្ទះចំនួន២ខ្នង ជូនជនពិការ២នាក់ គឺឈ្មោះឡាំ លាង រស់នៅភូមិប៉ែន ឃុំលាច ស្រុកភ្នំក្រវាញ និងលោកឱ តាំង រស់នៅភូមិក្រឡាញ់ ឃុំក្បាលត្រាច ស្រុកក្រគរដែលទទួលបានចំណាត់ថ្នាក់លេខ១ ក្នុងការចូលរួមប្រឡងប្រណាំងចលនា៣ល្អរបស់សមាគមអតីតយុទ្ធជនកម្ពុជា ៕  |
| Posted: 12 Mar 2011 06:34 PM PST ខេត្តកំពង់ស្ពឺ ៖ ការប្រទូស្តរ៉ាយគ្នាមួយបានបង្កឱ្យភាគីម្ខាងរងរបួស។ អ្វីដែលគួរកត់សំគាល់នោះ ភាគីជម្លោះគ្នានេះគឺជាក្រុមបុគ្គលិកអង្គការក្រៅរដ្ឋាភិបាល២ ដែលធ្វើសកម្មភាពនៅស្រុកឱរ៉ាល់ គឺអង្គការឃ្លាំមើលធនធានធម្មជាតិ និងអង្គការការពារបរិស្ថាន និងធម្មជាតិ។ ទោះបីជាបែបណាក្តី ប្រភពនៃជម្លោះគ្នានេះត្រូវសមត្ថកិច្ចស្រុកឱរ៉ាល់ឱ្យដឹងថា ផ្តើមចេញពីការចាប់ឈើដោយម្ខាងកាង ម្ខាងចាប់។ គេមិនដឹងថា សកម្មភាពបែបនេះជាការអនុវត្តហួសតួនាទីរបស់ខ្លួន ឬក៏បែបណានោះទេសម្រាប់ក្រុមបុគ្គលិកអង្គការទាំង២នេះ។ តាមប្រភពព័ត៌មានបានឱ្យដឹងថា នៅក្នុងស្រុកឱរ៉ាល់ មានអង្គការក្រៅរដ្ឋាភិបាលចំនួន២ដែលបានការអនុញ្ញាតពីអាជ្ញាធរដែនដីស្រុកឱ្យបោះទីតាំងនៅឃុំត្រពាំងជោរ គឺអង្គការឃ្លាំមើលធនធានធម្មជាតិ ដែលមានលោកឡុង ហៃ ជាប្រធាន និងអង្គការការពារបរិស្ថាន និងធម្មជាតិ ដែលមានលោកខាត់ សុខជា ជាប្រធាន។ អាជ្ញាធរស្រុកឱរ៉ាល់បានរិះគន់អង្គការទាំង២នេះថា ពុំមានលទ្ធភាពអ្វីធ្វើការទប់ស្កាត់ និងការពារតាមការងារស្នូលរបស់ខ្លួនទេ ប៉ុន្តែតែងបង្កជាភាពចម្រូងចម្រាស់ក្នុងរឿងកាងឈើដើម្បីផលប្រយោជន៍របស់ខ្លួនទៅវិញ។ មិនត្រឹមប៉ុណ្ណោះ អង្គការទាំងនេះតែងមានជម្លោះញឹកញាប់ជាមួយអាជ្ញាធរដែនដី ឬជាមួយអង្គការដូចគ្នាក្នុងការកាងឈ្មួញដឹកឈើ ដឹកអុសចេញពីព្រៃ ដែលផ្ទុយនឹងពាក្យស្លោករបស់ខ្លួនដែលដាក់ឈ្មោះថា «អង្គការឃ្លាំមើលធនធានធម្មជាតិ និងអង្គការការពារបរិស្ថាន និងធម្មជាតិ»។ មេបញ្ជាការកងរាជអាវុធហត្ថស្រុកឱរ៉ាល់ លោកអនុសេនីយ៍ឯក សោម ពុទ្ធតារា បានរៀបរាប់ពីសកម្មភាពការងាររបស់អង្គការទាំង២ថា ជាអង្គការធ្វើស្នាក់ការគ្រាន់តែចាំកាងឈ្មួញ ឬចាំយកលុយពីប្រជាពលរដ្ឋដឹកឈើ ដឹកអុសប៉ុណ្ណោះ។ ជាក់ស្តែងអង្គការទាំង២នោះម្ខាងកាងរថយន្ត២គ្រឿងដឹកឈើ ម្ខាងកាក់ឈើ ហើយក៏មានទំនាស់នឹងគ្នារហូតមានការប្រទូស្តរ៉ាយវាយតប់គ្នាបណ្តាលឱ្យភាគីម្ខាងរងរបួស។ ហេតុការណ៍នេះកើតឡើងកាលពីវេលាម៉ោង៧និង៣០នាទីយប់ ថ្ងៃទី៩ មីនា នៅភូមិចាន់ពីរ ឃុំត្រពាំងជោរ ស្រុកឱរ៉ាល់។ លោកសោម ពុទ្ធតារា បន្តថា ភាគីអង្គការឃ្លាំមើលធនធានធម្មជាតិ បានកាង និងនាំគោយន្តដឹកឈើឱ្យឈ្មួញ ហើយត្រូវអង្គការការពារបរិស្ថាន និងធម្មជាតិចាប់។ ពេលនេះអ្នករបួសបានដាក់ពាក្យបណ្តឹងទៅអាជ្ញាធរស្រុកឱរ៉ាល់ ដើម្បីដោះស្រាយ។ ទាំងអាជ្ញាធរដែនដី មន្ត្រីរាជការក្នុងស្រុកឱរ៉ាល់ បានរិះគន់អង្គការទាំង២នេះថា ពុំមានការងារធ្វើអ្វីក្រៅពីដាក់កុងត្រូលយកលុយពីរថយន្ត ឬអ្នកបររទេះ ឬគោយន្តដឹកឈើនោះទេ។ តាមព័ត៌មានថា ខាងអង្គការឃ្លាំមើលធនធានធម្មជាតិ បានវាយបុគ្គលិកអង្គការពារបរិស្ថាន និងធម្មជាតិម្នាក់បណ្តាលឱ្យរបួសធ្ងន់៕  |
| សូមជួយណែនាំម្ចាស់កុំដាក់ទណ្ឌកម្មខ្ញុំធ្ងន់ធ្ងរបែបនេះពេក Posted: 12 Mar 2011 06:27 PM PST  ខេត្តកំពត ៖ រថយន្តដឹកអីវ៉ាន់គ្រឿងទេសមួយគ្រឿងចេញពីច្រកទ្វារព្រំដែនវៀតណាម ទៅកាន់រាជធានីភ្នំពេញ តាមបណ្តោយផ្លូវជាតិលេខ៣៣ បានផ្ទុកទំនិញយ៉ាងសំពីងសំពោងមើលទៅឃើញតែអីវ៉ាន់ រីឯរថយន្តគេឃើញតែក្បាលបន្តិចប៉ុណ្ណោះ ។ ចំណែកសមត្ថកិច្ចប៉ូលិសចរាចរដែលយាមត្រួតពិនិត្យសណ្តាប់ធ្នាប់តាមផ្លូវវិញ ពុំបានណែនាំដល់ម្ចាស់រថយន្តទេ ដឹងតែពីឃាត់រថយន្តយកលុយពីអ្នកដឹកទៅវិញ ដែលការដឹកទំនិញសំពីងសំពោងយ៉ាងនេះ អាចបង្កគ្រោះថ្នាក់ដល់អ្នកធ្វើដំណើរតាមផ្លូវដូចគ្នាជាញឹកញាប់ ដោយសារបាំងនឹងទំនិញនេះ ។ បើពិនិត្យទៅលើអីវ៉ាន់ដែលផ្ទុកសំពីងសំពោងនៅលើរថយន្តនេះ មិនមែនទំនិញដែលមានទម្ងន់ធ្ងន់ទេ គឺសុទ្ធតែនំធុងស្រាលៗ ទើបម្ចាស់រថយន្តហ៊ានដឹកដល់ថ្នាក់នេះ ។ ប៉ុន្តែករណីដែលមហាជនទូទៅមានការចាប់អារម្មណ៍នោះ គឺសុវត្ថិភាពតាមផ្លូវដោយបាំងនឹងទំនិញសំពីងសំពោងនេះតែប៉ុណ្ណោះ ។ ប្រជាពលរដ្ឋជាច្រើនដែលធ្វើដំណើរនៅតាមដងផ្លូវ និយាយគ្រប់ៗមាត់ថា រថយន្តដឹកបែបនេះ ត្រូវប៉ាន់ប៉ូលិសចរាចរដែលយាមតាមផ្លូវ ។ ប្រជាពលរដ្ឋនិយាយថា ការផ្ទុកទំនិញសំពីងសំពោងហួសចំណុះបែបនេះ បើទោះបីរថយន្តវាមិនថ្ងូរដាក់ម្ចាស់មែន ក៏គួរខ្មាសភ្ញៀវអន្តរជាតិដែលគេមកលេងនៅស្រុកខ្មែរដែរ ៕  |
| លោកទេសរដ្ឋមន្ត្រី ចម ប្រសិទ្ធ សង់ប៉ុស្តិ៍យាមដល់សមត្ថកិច្ចការពារសុវត្ថិភាព Posted: 12 Mar 2011 05:20 PM PST   រាជធានីភ្នំពេញ ៖ ប៉ុស្តិ៍យាមគោលដៅ២៤ម៉ោង១កន្លែងត្រូវបានសម្ពោធប្រគល់ឱ្យប៉ូលិសនៃ អធិការដ្ឋាននគរបាលខណ្ឌដង្កោ ដើម្បីប្រើប្រាស់សម្រាប់ជាកន្លែងការពារសុវត្ថិភាពជូនប្រជាពលរដ្ឋតាមដងផ្លូវ ។ ពិធីសម្ពោធកាត់ខ្សែបូប្រគល់ប៉ុស្តិ៍យាមដល់ប៉ូលិសនោះ បានប្រព្រឹត្តទៅកាលពីព្រឹកថ្ងៃទី១១ មីនា ឆ្នាំ២០១១ ដែលមានទីតាំងស្ថិតនៅតាមបណ្តោយផ្លូវអូរដឹមកប់ស្រូវ ភូមិចែងម៉ែង សង្កាត់សំរោងក្រោម ខណ្ឌដង្កោ រាជធានីភ្នំពេញ ។ ប៉ុស្តិ៍យាមនោះ គឺជាអំណោយរបស់លោកទេសរដ្ឋមន្ត្រី ចម ប្រសិទ្ធរដ្ឋមន្ត្រីក្រសួងពាណិជ្ជកម្ម ហើយនៅក្នុងពិធីនោះលោករដ្ឋមន្ត្រី និងភរិយាបានអញ្ជើញទៅកាត់ខ្សែបូសម្ពោធដោយផ្ទាល់ ។ ក្នុងនោះដែរក៏មានការអញ្ជើញចូលរួមពីសំណាក់លោក សេង គន្ធ អភិបាលរងខណ្ឌដង្កោ លោកភួង ម៉ាឡៃ ស្នងការរងប៉ូលិសរាជធានីភ្នំពេញ លោកប៊ន សំអាត អធិការប៉ូលិសខណ្ឌ ព្រមទាំងលោកនាយ នាយរងប៉ូលិសប៉ុស្តិ៍ជាច្រើនរូបទៀត ។ លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងពាណិជ្ជកម្មបានមានប្រសាសន៍ថា នេះគឺជាការចូលរួមចំណែកការងារការពារសុវត្ថិភាពជាមួយនគរបាលជាតិ ព្រោះពេលនេះទោះបី ជាប្រទេសជាតិយើងមានសុខសន្តិភាពពេញលេញ ហើយក្តី ប៉ុន្តែនៅមានសកម្មភាពក្រុមក្មេងទំនើង និងក្រុមចោរប្លន់តែងតែធ្វើសកម្មភាពនៅឡើយ ដូច្នេះទើបលោកកសាងប៉ុស្តិ៍នោះឡើង ដើម្បីឱ្យកម្លាំងនគរបាលឈរជើងការពារល្បាតពួនស្ទាក់រក្សាសន្តិសុខសុវត្ថិភាពជូនប្រជាពលរដ្ឋ ។ លោកអធិការ ប៊ន សំអាត បានថ្លែងអំណរគុណយ៉ាងជ្រាលជ្រៅចំពោះលោករដ្ឋមន្ត្រី ចម ប្រសិទ្ធ និងភរិយាដែលបានគិតគូរយ៉ាងយកចិត្តទុកដាក់ពីទីជំរកសម្រាប់កងកម្លាំងប៉ូលិស ជាគោលដៅការពារសុវត្ថិភាព ហើយលោកក៏បានប្តេជ្ញាចិត្តថា នឹងដាក់កម្លាំងឈរជើងជាប់ជាប្រចាំរង់ចាំចេញអន្តរាគមន៍ពេលមានហេតុការណ៍កើតឡើង ៕  |
| អស់ឈើក្រាក់កាប់ឈើអុសរស់រាប់ពាន់ម៉ែត្រគូបធ្វើអាជីវកម្ម Posted: 12 Mar 2011 05:08 PM PST  ខេត្តកំពង់ស្ពឺ ៖ ឈើអុសរស់ត្រូវបានគេនាំគ្នាកាប់ធ្វើអាជីវកម្មយ៉ាងអនាធិបតេយ្យ និងដឹកជញ្ជូនតាមរថយន្តយ៉ាងគគ្រឹងគគ្រេងជារៀងរាល់ថ្ងៃដូចរដូវហែបុណ្យកឋិន ចេញពីស្រុកឱរ៉ាល់ តាមផ្លូវលេខ៤២ និងលេខ៥២។ ប្រជាពលរដ្ឋនៅភូមិអូរផ្តៅ ឃុំរស្មីសាមគ្គី ស្រុកឱរ៉ាល់ បានឱ្យដឹងថា ពួកគាត់នាំគ្នាកាប់ឈើរស់ដឹកជញ្ជូនពីព្រៃជិតៗភូមិតាមគោយន្ត ឬរទេះគោ មកកាត់តំរៀបដាក់តាមផ្លូវថ្នល់មុខផ្ទះសម្រាប់លក់យកប្រាក់ដោះស្រាយជីវភាពគ្រួសារ ។ ក្នុងមួយថ្ងៃបើមានគ្នាពី២ទៅ៣នាក់ អាចកាប់ និងដឹកបានប្រហែល៣ម៉ែត្រគូប។ បើគិតទៅអាចបានប្រាក់ប្រហែល៦ម៉ឺនរៀលដែរ តែក៏មានអ្នកខ្លះដែលយកប្រាក់គេមុន គឺបានតែត្រឹម១ម៉ែត្រគូប ១៥.០០០រៀលទៅ១៧.០០០រៀលប៉ុណ្ណោះ ។ លោកវ៉ែន លី មេភូមិអូរផ្តៅ និយាយថា ពលរដ្ឋក្នុងភូមិប្រហែលជាង១០០គ្រួសារ បានចាប់យករបរកាប់អុសស្ទើរតែទាំងអស់ ដោយសារឃើញគេរកបានក៏ចេះតែនាំគ្នាទៅរកតាមដែរទៅ។ កាលពីកន្លងទៅថ្មីៗនេះ មន្ត្រីសាលាខេត្ត បានចុះមកប្រកាសជាសាធារណៈជូនដល់ប្រជាពលរដ្ឋឱ្យបានដឹងថា គោលការណ៍ជាយុទ្ធសាស្ត្ររបស់សាលាខេត្តនាពេលខាងមុខនេះ នឹងបង្កើតដីតំបន់សម្រាប់រស់នៅ ដីតំបន់សម្រាប់វិនិយោគ ដីតំបន់សម្រាប់ព្រៃឈើសហគមន៍ ។ លោកថោង ភាព មន្ត្រីអង្គការការពារបរិស្ថាននិងធនធានធម្មជាតិ ដែលបំពេញបេសកកម្មក្នុងភូមិសាស្ត្រស្រុកឱរ៉ាល់ឱ្យដឹងថា ខាងអង្គ ការរបស់លោកក៏ធ្លាប់ចុះណែនាំប្រជាពលរដ្ឋអ្នកប្រកបរបរកាប់អុសនេះឱ្យផ្លាស់ប្តូរទៅរកមុខរបរផ្សេងដែរ ហើយលោកនឹងបន្តប្រឹងប្រែងសហការជាមួយអាជ្ញាធរមូលដ្ឋាន ព្រមទាំងមន្ត្រីជំនាញ ដើម្បីចុះទៅអប់រំដល់ប្រជាពលរដ្ឋឱ្យយល់ច្បាស់ពីផលប្រយោជន៍ព្រៃឈើ កុំឱ្យកាប់បំផ្លាញព្រៃឈើយ៉ាងអនាធិបតេយ្យបន្តទៀត ។ កោះសន្តិភាព មិនអាចសុំការបំភ្លឺពីមន្ត្រីជំនាញសង្កាត់រដ្ឋបាលព្រៃឈើ និងផ្នែករដ្ឋបាលព្រៃឈើប្រចាំស្រុកឱរ៉ាល់បានទេ ជុំវិញការកាប់ព្រៃឈើយ៉ាងអនាធិបតេយ្យនេះ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
