Koh Santipheap Daily |
- ធាតុអាកាសប្រែប្រួលប៉ុន្មានថ្ងៃនេះ មិនពាក់ព័ន្ធនឹងការឆេះមជ្ឈមណ្ឌលនុយក្លេអ៊ែរនៅប្រទេសជប៉ុនទេ
- ពលករខ្មែរត្រូវអាជ្ញាធរសៀមចាប់បញ្ជូនមកវិញមានចំនួនកើនឡើង
- តុលាការចេញដីកាឃុំខ្លួនជនសង្ស័យបីនាក់ប្រព្រឹត្តអនាចារលើអនីតិជន
- ចាប់ខ្លួនមេដឹកនាំប្រឆាំង7នាក់នៅបារ៉ែន
- អ្នកចម្រៀងអង្រួនអ្នកស្តាប់តាមរយៈបទបម្រើដល់សក្តានុពលទេសចរណ៍
- អនុវត្តសាលដីកាប្រពន្ធដើម និងកូនឈ្នះក្តី ប្រពន្ធចុងអស់ទ្រព្យសម្បត្តិ
- ឈ្មួញពីរនាក់កំពុងនាំចូលឆ្អឹងមាន់ខូចគុណភាពពីសៀមទាំងតោនៗ
- លីប៊ីគំរាមវាយប្រហារយន្តហោះ ព្រមទាំងនាវាស៊ីវិល និងយោធា បើមានការវាយប្រហាររបស់អន្តរជាតិ និងគំរាមវាយលុកបេនហ្គាហ្ស៊ី
- លោកអូបាម៉ា៖ វិទ្យុសកម្មដែលគ្រោះថ្នាក់មិនសាយភាយដល់អាមេរិកឡើយ
- ពលរដ្ឋកម្ពុជា៦នាក់រងរបួសធ្ងន់-ស្រាល ខណៈផ្ទុះមីន និង៩នាក់ទៀតរួចផុតពីរបួសស្នាម
- សម្តេចតេជោហ៊ុន សែន ដឹកនាំក្រុមមន្ត្រីជាន់ខ្ពស់អញ្ជើញដាក់កម្រងផ្កាគោរពវិញ្ញាក្ខន្ធនៅស្ថានទូតជប៉ុន
- កម្រិតវិទ្យុសកម្មដែលលេចធ្លាយនៅរោងចក្រនុយក្លេអ៊ែរហ្វូគូស៊ីម៉ាធ្លាក់ចុះវិញ
- វាយប្រហារដោយយន្តហោះគ្មានមនុស្សបើកនៅប៉ាគីស្ថានស្លាប់38នាក់
- ប៉ូលិសចាប់ខ្លួនជនសង្ស័យចំនួន២នាក់ ចែកចាយគ្រឿងញៀន
- ក្រុមប្រឹក្សាសន្តិសុខ អ.ស.ប អនុម័តតំបន់ហាមហោះហើរនៅលីប៊ី និងឱ្យធ្វើអន្តរាគមន៍យោធា
- IAEA ៖ ស្ថានការណ៍នៅរោងចក្រនុយក្លេអ៊ែរហ្វូគូស៊ីម៉ារបស់ជប៉ុនពុំធ្ងន់ធ្ងរពេកទេ
- កម្ពុជាស្ថិតនៅក្នុងចំណោម២២ប្រទេសដែលមានជំងឺរបេងធ្ងន់ធ្ងរ
- លោកឧបការីរងរដ្ឋមន្ត្រីការបរទេសអាមេរិកនឹងជួបពិភាក្សាបញ្ហាបំណុលជាមួយរដ្ឋមន្ត្រីក្រសួងសេដ្ឋកិច្ច
- អនាគតកូនកំលោះកូនក្រមុំ វិលត្រឡប់ពីសុំច្បាប់រៀបការ ជួបគ្រោះអកុសលស្លាប់និងរបួស
- រំលែកទុក្ខចំពោះមិត្ដជប៉ុន ស្ថានទូតជប៉ុនអនុញ្ញាតដល់សាធារណជនកម្ពុជាចូលសំដែងសមានចិត្ត
| Posted: 18 Mar 2011 12:54 AM PDT   រាជធានីភ្នំពេញ ៖ ប្រជាពលរដ្ឋកម្ពុជាទាំងក្នុងរាជធានីភ្នំពេញ និងនៅតាមបណ្តាខេត្ត នានា បានកើតក្តីមន្ទិល និងព្រួយបារម្ភពីគ្រោះថ្នាក់សុខភាពយ៉ាងខ្លាំង ខណៈបរិយាកាសក្នុងប្រទេសប៉ុន្មានថ្ងៃនេះ មានការប្រែប្រួលពីក្តៅមកត្រជាក់ ព្រមទាំងសង្ស័យថា ទទួលរងឥទ្ធិពលពីការផ្ទុះរេអាក់ទ័រនៃមជ្ឈមណ្ឌលនុយក្លេអ៊ែរបង្កឱ្យសាយភាយវិទ្យុសកម្មបំផ្លាញជីវិតមនុស្ស ប៉ុន្តែមន្ត្រីជំនាញក្រសួងធនធានទឹក និងឧតុនិយម បានច្រានចោលចំពោះការទទួលរងនូវឥទ្ធិពលវិទ្យុសកម្មនេះ ដោយលើកឡើងថា បើនិយាយពីរបបខ្យល់សម្រាប់ប្រទេសកម្ពុជាវិញ គឺមិនអាចទទួលវិទ្យុសកម្មនេះទេ ហើយការប្រែប្រួលអាកាសធាតុមកជាត្រជាក់ និងធ្លាក់ភ្លៀងប៉ុន្មានថ្ងៃនេះ គឺបណ្តាលមកពីជ្រលងសម្ពាធខ្ពស់រំកិលមកប៉ះជ្រលងសម្ពាធទាបតែប៉ុណ្ណោះ ។ លោកចាន់ យុត្ថា នាយកខុទ្ទកាល័យរដ្ឋមន្ត្រីក្រសួងធនធានទឹក និងឧតុនិយម បានមានប្រសាសន៍ឱ្យដឹងនាព្រឹកថ្ងៃទី១៨ មីនា ២០១១ ថា ស្ថានភាពធាតុអាកាសពីថ្ងៃទី១៣ ដល់ទី១៧ មីនា ២០១១ ព្រះរាជាណាចក្រកម្ពុជា កំពុងទទួលនូវចន្លោះឥទ្ធិពលពីជ្រលងសម្ពាធខ្ពស់ប្រទេសចិន និងកម្រិតសម្ពាធទាបពីភាគខាងក្រោមសមុទ្រចិនខាងត្បូង បង្កឱ្យផ្ទៃមេឃស្រទំនាពេលព្រឹក និងមានភ្លៀងផ្គរកក់ខែច្រើនថ្ងៃនៅតាមបណ្តាខេត្តមួយចំនួន និងរាជធានីភ្នំពេញ ក្នុងនោះសីតុណ្ហភាពអប្បបរមាមានការធ្លាក់ចុះជាងធម្មតាបន្តិច ។ ចាប់ពីថ្ងៃទី២០ មីនា តទៅ សីតុណ្ហភាពនឹងកើនឡើងវិញ តែភ្លៀងកក់ខែនឹងនៅតែបន្តមានជាហូរហែតាមបណ្តាខេត្តមួយចំនួន ជាពិសេសខេត្តនៅភាគទំនាបកណ្តាល និងវាលទំនាបភាគពាយ័ព្យ រួមនឹងតំបន់មាត់សមុទ្រ ទៀតផង ។ កំណត់សម្គាល់ ស្ថានភាពធាតុអាកាសខាងលើពុំមានពាក់ព័ន្ធ ឬកើតឡើងដោយសារព្រឹត្តិការណ៍នៃការផ្ទុះរោងចក្របរមាណូនៅជប៉ុននោះទេ ។ ស្ថានភាពធាតុអាកាសកន្លងមកនេះវាជាការប្រែប្រួលតាមធម្មជាតិ ដោយគ្រាន់តែថា វាកើតឡើងគាប់ជួនទៅនឹងព្រឹត្តិការណ៍នៅប្រទេសជប៉ុនតែប៉ុណ្ណោះ ។ លោកចាន់ យុត្ថា បានពន្យល់ថា ប្រជាពលរដ្ឋមានការព្រួយបារម្ភពីសារធាតុវិទ្យុសកម្មសាយភាយតាមខ្យល់បក់មកពីប្រទេសជប៉ុនចូលកម្ពុជា...ត្រង់នេះយើងសូមបញ្ជាក់ថា ចាប់ពីខែមីនានេះទៅ ប្រទេសកម្ពុជាមិនទទួលរបបខ្យល់មូសុងភាគឦសានឡើយ ដែលរបបខ្យល់មូសុងភាគឦសាននោះ គឺធ្វើដំណើរចេញពីតំបន់ស៊ីបេរី ប្រទេសរុស្ស៊ី ចូលមកតំបន់ទីបេប្រទេសចិន និងបន្តចូលកម្ពុជា និងប្រទេសជិតខាង...ដូច្នេះប្រសិនបើអ៊ីចឹងមែន គឺប្រទេសកម្ពុជាអាចទទួលរងនូវឥទ្ធិពលវិទ្យុសកម្មនុយក្លេអ៊ែរពីប្រទេសជប៉ុនខ្លះៗហើយ ប៉ុន្តែរបបខ្យល់បែបនេះ វាកើតមានមកក្នុងប្រទេសកម្ពុជា តែអំឡុងខែវិច្ឆិកា-ធ្នូ និងមករា ប៉ុណ្ណោះ ។ ផ្ទុយទៅវិញ សម្រាប់ខែមីនានេះ ប្រទេសកម្ពុជាកំពុងទទួលរបបខ្យល់ពីតំបន់ត្រូពិក មិនពាក់ព័ន្ធប្រទេសជប៉ុនទេ ហើយរបបខ្យល់ពីតំបន់ត្រូពិកនេះ បានបក់មកកាន់ប្រទេសកម្ពុជា ដោយមិនបាននាំយកមកជាមួយនូវសារធាតុវិទ្យុសកម្មពីការសាយភាយរោងចក្រនុយក្លេអ៊ែរហ្វូគូស៊ីម៉ានោះឡើយ។ គួររំលឹកថា គ្រោះរញ្ជួយដីដ៏ខ្លាំងក្លាមួយកម្រិត៨,៩រីស្ទ័រ បានកើតឡើងនៅទីក្រុងសេនដៃ ភាគឦសាន ប្រទេសជប៉ុន កាលពីថ្ងៃទី១១ មីនា ២០១១ ចម្ងាយជាង២៥០គីឡូម៉ែត្រ ពីទីក្រុងតូក្យូ បង្កឱ្យមានរលកយក្សស៊ូណាមី កម្ពស់ជាង១០ម៉ែត្រ វាយប្រហារបំផ្លាញហេដ្ឋារចនាសម្ព័ន្ធ ទ្រព្យសម្បត្តិ អគារទីក្រុង និងឆេះមជ្ឈមណ្ឌលនុយក្លេអ៊ែរហ្វូគូស៊ីម៉ា កំពុងសាយភាយវិទ្យុសកម្មធ្វើឱ្យមានការព្រួយបារម្ភយ៉ាងខ្លាំង ។ មនុស្សរាប់ពាន់នាក់បានស្លាប់ និងជាង១ម៉ឺននាក់បានបាត់ខ្លួន ហើយចំនួន១៤០.០០០នាក់ ដែលរស់នៅក្នុងតំបន់ក្បែរគ្រោះមហន្តរាយត្រូវអាជ្ញាធរតម្រូវឱ្យរស់នៅតែក្នុងផ្ទះ ដើម្បីការពារវិទ្យុសកម្មបំផ្លាញជីវិត...ចំណែកទីក្រុងតូក្យូដែលមានពលរដ្ឋប្រមាណ៣០លាននាក់ ក៏ត្រូវអាជ្ញាធរតម្រូវឱ្យប្រុងប្រយ័ត្នផងដែរ ៕  |
| ពលករខ្មែរត្រូវអាជ្ញាធរសៀមចាប់បញ្ជូនមកវិញមានចំនួនកើនឡើង Posted: 18 Mar 2011 12:47 AM PDT  ក្រុងប៉ោយបែត ៖ ក្នុងរយៈពេលប៉ុន្មានថ្ងៃចុងក្រោយនេះពលករចំណាកស្រុកដែលចូលទៅទឹកដីសៀមខុសច្បាប់តាមច្រករបៀងព្រំដែនត្រូវអាជ្ញាធរ និងសមត្ថកិច្ចសៀមចាប់បញ្ជូនត្រឡប់មកកម្ពុជាវិញ តាមច្រកទ្វារអន្តរជាតិប៉ោយប៉ែត មានការកើនឡើង។ ភាពគ្មានការថមថយនេះ ត្រូវបានមតិជាច្រើនរិះគន់ថា ដោយសារសមត្ថកិច្ចតាមបន្ទាត់ព្រំដែននៃច្រកមួយចំនួនគ្មានការទប់ស្កាត់ការឆ្លងដែន ព្រោះតែចង់បានផលប្រយោជន៍ផ្ទាល់ខ្លួន។ ពលករខុសច្បាប់ដែលត្រូវសមត្ថកិច្ចសៀមបញ្ជូនមកឱ្យសមត្ថកិច្ចប៉េអឹមអន្តោប្រវេសន៍កម្ពុជានាពេលបច្ចុប្បន្ន ក្នុងមួយថ្ងៃៗមិនក្រោម២០០នាក់នោះទេ ហើយថ្ងៃខ្លះក៏អាចមានរហូតដល់ទៅជិត៤០០នាក់ឯណោះ ។ ជាក់ស្តែងនៅថ្ងៃទី១៦ មីនា បើតាមប្រភពពីសមត្ថកិច្ចបានបង្ហើបថា ការដឹកបញ្ជូនពលករខុសច្បាប់មកពីទឹកដីសៀមមានរហូតដល់ទៅ៩រថយន្ត ដែលក្នុងមួយរថយន្តមិនក្រោម៥០នាក់នោះទេ នឹងពេលខ្លះក៏ដឹកមិនសូវពេញត្រឹម៣០ទៅ៤០នាក់ក៏មាន ហើយសមត្ថកិច្ចបង្ហើបឱ្យដឹងថា មានចំនួនជាង៣០០នាក់ សម្រាប់ថ្ងៃនោះ។ រីឯនៅព្រឹកថ្ងៃទី១៧ មីនា បើគិតត្រឹមម៉ោង៩ព្រឹក ពលករខុសច្បាប់ត្រូវសមត្ថកិច្ចសៀមចាប់បញ្ជូនមកឱ្យសមត្ថកិច្ចកម្ពុជាតាមច្រកទ្វារប៉ោយប៉ែត មានចំនួន៣រថយន្តបើគិតពីចំនួនមនុស្ស គឺមិនក្រោម១០០នាក់នោះទេ ។ ពលករដែលសៀមចាប់បញ្ជូនមកវិញទាំងនោះ ខណៈអ្នកយកព័ត៌មានព្យាយាមសួរនាំពួកគេពុំប្រាប់ពីអត្តសញ្ញាណទេ ប៉ុន្តែភាគច្រើនអះអាងថា ពួកខ្លួនចេញទៅតាមច្រករបៀងទៅទឹកដីសៀមដើម្បីរកការងារធ្វើតាមបន្ទាត់ព្រំដែន។ អ្នកខ្លះអះអាងថា ចូលទៅសៀមតាមច្រករបៀងនៅក្រុងប៉ោយប៉ែត ហើយមួយចំនួនធំប្រាប់ថា ចូលតាមច្រករបៀងក្នុងស្រុកម៉ាឡៃ ៕  |
| តុលាការចេញដីកាឃុំខ្លួនជនសង្ស័យបីនាក់ប្រព្រឹត្តអនាចារលើអនីតិជន Posted: 18 Mar 2011 12:42 AM PDT  រាជធានីភ្នំពេញ ៖ បុរសជនជាតិអាមេរិកម្នាក់ និងស្រ្តីជនជាតិខ្មែរពីរនាក់ ដែលជាប់សង្ស័យប្រព្រឹត្តអនាចារលើកុមារី ហើយត្រូវបានឃាត់ខ្លួន កាលពីថ្ងៃសុក្រកន្លងមក ខណៈពេលដែលធ្វើសកម្មភាពថតរូបភាពកុមារីម្នាក់នៅក្នុងបន្ទប់ផ្ទះសំណាក់ អិល អេស ផ្លូវលេខ៥៣ ភូមិទី៥ សង្កាត់ផ្សារថ្មីទី៣ ខណ្ឌដូនពេញ នោះ ត្រូវតុលាការរាជធានីភ្នំពេញ ចេញដីការបង្កាប់ឱ្យឃុំខ្លួននៅក្នុងពន្ធនាគារព្រៃស (ម១) កាលពីថ្ងៃទី១៧ មីនា ឆ្នាំ២០១១ ។ តាមព័ត៌មានពីនគរបាលផ្នែកនីតិវិធីនៃអធិការដ្ឋាននគរបាលខណ្ឌដូនពេញបានឱ្យដឹងថា សាលាដំបូងរាជធានីភ្នំពេញបានចេញដីកាបង្គាប់ឱ្យនគរបាលឃុំខ្លួនជនសង្ស័យឈ្មោះ MORROW JAMES ALLAN ភេទប្រុស អាយុ៤៦ឆ្នាំ ជនជាតិអាមេរិក ជាអ្នកទេសចរកាន់លិខិតឆ្លងដែនលេខ៧២០១៥៦៤៣០ មុនចាប់ខ្លួនស្នាក់នៅសណ្ឋាគារតារារង្សី សង្កាត់ផ្សារចាស់ ខណ្ឌដូនពេញ ជននេះត្រូវបានលោកឌុច គឹមសន ចៅក្រមស៊ើបសួរសាលាដំបូងរាជធានីភ្នំពេញ ចេញដីកាលេខ៦០៣ តព្រ ចុះថ្ងៃទី១៧ ខែមីនា ឆ្នាំ២០១១ ឱ្យឃុំខ្លួននៅពន្ធនាគារព្រៃស (ម១) ចោទពីបទទិញពេស្យាចារកុមារ អំពើអាសអាភាសប្រឆាំងនឹងអនីតិជនអាយុក្រោម១៥ឆ្នាំ នឹងរក្សាគ្រឿងញៀនហាមឃាត់ខុសច្បាប់។ ជនសង្ស័យឈ្មោះសាយ សារ៉េត ភេទស្រី អាយុ២៦ឆ្នាំ ជនជាតិខ្មែរ ទីលំនៅភូមិព្រែកព្នៅ សង្កាត់ព្រែកព្នៅ ខណ្ឌសែនសុខ រាជធានីភ្នំពេញ ដីកាឃុំខ្លួនលេខ៦០៤ តព្រ ចុះថ្ងៃទី១៧ ខែមីនា ឆ្នាំ២០១១ ចោទពីបទ «អំពើអូសទាញពេស្យាចារកុមារ និងបទល្មើសទាក់ទងពេស្យាចារកុមារ» និងជនសង្ស័យឈ្មោះចំរើន ចាន់ថន ភេទស្រី អាយុ២២ឆ្នាំ ស្នាក់នៅផ្ទះលេខ០៤Eo វិថីសុធារស សង្កាត់ទន្លេបាសាក់ ខណ្ឌចំការមន ចោទពីបទ «អំពើអូសទាញពេស្យាចារកុមារ» ។ នគរបាលផ្នែកនីតិវិធីបានរំលឹកថា កាលពីថ្ងៃទី១១ មីនាវេលាម៉ោង១០ព្រឹក នគរបាលប៉ុស្តិ៍រដ្ឋបាលផ្សារថ្មីទី៣ បានទទួលព័ត៌មានថា នៅក្នុងផ្ទះសំណាក់ អិល អេស ដែលមានទីតាំងលេខ០១សេ ផ្លូវលេខ៥៣ ភូមិទី៥ សង្កាត់ផ្សារថ្មីទី៣ ខណ្ឌដូនពេញ មានជនបរទេសនាំក្មេងស្រីជាអនីតិជនចូលបន្ទប់លេខ៣០២ ជាន់ទី៣។ យោងតាមបទបញ្ជារបស់អធិការនគរបាលខណ្ឌដូនពេញ បានបង្កើតគណៈកម្មការចំរុះមួយដោយមានការចូលរួមពីលោកឯក ឆេងហួត ព្រះរាជអាជ្ញារងអមសាលាដំបូងរាជធានីភ្នំពេញ លោកអភិបាលខណ្ឌដូនពេញ តំណាងស្ថានទូតអាមេរិកប្រចាំនៅកម្ពុជា ការិយាល័យនគរបាលប្រឆាំងការជួញដូរមនុស្ស និងការពារអនីតិជន និងសាលាសង្កាត់ផ្សារថ្មីទី៣ ធ្វើការឆែកឆេរបន្ទប់លេខ៣០២ ជាន់ទី៣ ក្នុងផ្ទះសំណាក់អិលអេស ឃាត់ខ្លួនបុរសជនជាតិអាមេរិកម្នាក់ និងស្រ្តីខ្មែរពីរនាក់ព្រមទាំងបានរំដោះកុមារីរងគ្រោះឈ្មោះសាយ សុខវិន អាយុ១២ឆ្នាំ ។ ជាមួយគ្នានោះដែរសមត្ថកិច្ចបានដកហូតរូបថតអាសអាភាសមួយចំនួនពាក់ព័ន្ធផលិតភាពយន្តរួមទាំងគ្រឿងញៀនមួយចំនួនទៀតផង៕  |
| ចាប់ខ្លួនមេដឹកនាំប្រឆាំង7នាក់នៅបារ៉ែន Posted: 18 Mar 2011 12:41 AM PDT  មេដឹកនាំប្រឆាំង៧នាក់ត្រូវចាប់ខ្លួនកាលពីថ្ងៃទី១៧ មីនា នៅបារ៉ែនក្រោយការបង្ក្រាបបាតុកម្មរបស់ពួកស៊ីអ៊ីត ដែលមានភាគច្រើនញ៉ាំងឱ្យមានការភ័យខ្លាចចំពោះជម្លោះតំបន់មួយ ។  |
| អ្នកចម្រៀងអង្រួនអ្នកស្តាប់តាមរយៈបទបម្រើដល់សក្តានុពលទេសចរណ៍ Posted: 18 Mar 2011 12:41 AM PDT   រាជធានីភ្នំពេញ ៖ រយៈពេល៣ឆ្នាំចុងក្រោយនេះប្រិយមិត្តទស្សនិកជនពិតជាបានឃើញនិងបានស្តាប់បទចម្រៀងមួយចំនួនដែលក្រសួងទេសចរណ៍ផលិត ហើយបានចាក់ផ្សាយតាមកញ្ចក់ទូរទស្សន៍នានា បំពេរអារម្មណ៍ប្រិយមិត្តឱ្យលន្លង់លន្លោចនោះ គឺបទ «ទេសចរណ៍ជីវៈចម្រុះ» និងបទ «ទេសចរណ៍ដើម្បីអ្នក អ្នកដើម្បីទេសចរណ៍» និងបទមួយចំនួនទៀតដែលបកស្រាយដោយកញ្ញា សុន ស្រីពេជ្រ ។ ប្រិយមិត្តពិតជាបានស្គាល់កញ្ញាសុន ស្រីពេជ្រ យ៉ាងច្បាស់នៅក្នុងកម្មវិធីប្រគំតន្ត្រីចុងសប្តាហ៍តាមស្ថានីយទូរទស្សន៍ ជាពិសេសនោះតាមរយៈបទចម្រៀងរបស់ក្រសួងទេសចរណ៍តែម្តង ។ កញ្ញា សុន ស្រីពេជ្រ ឆ្នាំនេះមានអាយុ២៦ឆ្នាំហើយ ត្រូវជាកូនលោកតាម៉ារី សុន ហៅសង់ ស៊ីស ។ នាងបានចូលប្រឡូកក្នុងវិស័យសិល្បៈចម្រៀងអស់រយៈពេល១០ឆ្នាំមកហើយ គឺចាប់ផ្តើមឡើងកាលពីឆ្នាំ២០០០ ដែលពេលនោះនាងគ្រាន់តែច្រៀងនៅក្នុងពិធីមង្គលការ ឬពិធីជប់លៀងផ្សេងៗនៅតាមបណ្តាខេត្ត ក្រុងនានាដែលគេជួលប៉ុណ្ណោះ។ ប៉ុន្តែក្រោយពីនាងច្រៀងបទចម្រៀងឱ្យក្រសួងទេសចរណ៍ ចាក់ផ្សាយតាមកញ្ចក់ទូរទស្សន៍នានាកាលពីអំឡុងឆ្នាំ២០០៨-២០០៩ មក ក៏មានការចាប់អារម្មណ៍និងគាំទ្រពីសំណាក់ប្រិយមិត្តជាច្រើន ធ្វើឱ្យរូបនាងមានកេរ្តិ៍ឈ្មោះល្បីរហូតមក ។ ក្រោយពីទទួលបានការគាំទ្រនូវទឹកដមសំនៀងរបស់នាងពីសំណាក់ប្រិយមិត្ត ធ្វើឱ្យកញ្ញា សុន ស្រីពេជ្រ មានការងារច្រើនស្ទើររកពេលសម្រាកគ្មាន ក្នុងនោះមានការងារសម្តែងថតកាយវិការខារ៉ាអូខេ និងច្រៀងថតសំឡេងចូលស៊ីឌីឱ្យផលិតកម្មរស្មីហង្សមាសជាដើម ហើយពេលនេះនាងកំពុងត្រៀមចេញវ៉ុលថ្មីសម្រាប់ចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ។ ភាពមមាញឹកក្នុងអាជីពបានធ្វើឱ្យនាងភ្លេចគិតពីរឿងស្នេហា ទោះបីជាពេលនេះនាងមានអាយុកាន់តែច្រើនហើយក្តី ។ ទាក់ទិននឹងរឿងស្នេហានាងបាននិយាយថា ទុកឱ្យព្រហ្មលិខិតជាអ្នកសម្រេចទៅចុះ ។ ជាចុងក្រោយកញ្ញាសុន ស្រីពេជ្រ បានឱ្យដឹងថា ឪពុករបស់នាងលោកតាម៉ារី សុន ហៅសង់ស៊ីស ដែលបានចូលមន្ទីរពេទ្យកាល់ម៉ែតធ្វើការវះកាត់ពោះវៀនដុះខ្នែងកាលពីថ្ងៃទី១០ មីនា កន្លងទៅនោះ ពេលនេះបានចាកចេញពីមន្ទីរពេទ្យត្រឡប់មកផ្ទះវិញហើយ ក៏ប៉ុន្តែមុខរបួសមិនទាន់ជាសះស្បើយនៅឡើយទេ៕  |
| អនុវត្តសាលដីកាប្រពន្ធដើម និងកូនឈ្នះក្តី ប្រពន្ធចុងអស់ទ្រព្យសម្បត្តិ Posted: 18 Mar 2011 12:29 AM PDT   ខេត្តកណ្តាល ៖ រឿងរ៉ាវក្តីក្តាំរវាងប្រពន្ធចុងជាមួយប្រពន្ធដើម និងកូនៗដែលបានអូសបន្លាយពេលជាយូរមកហើយ ក្នុងការដណ្តើមកេរមរតកមានដី និងលំនៅឋាន ស្ថិតនៅភូមិតាខ្មៅ សង្កាត់តាខ្មៅ ក្រុងតាខ្មៅ ត្រូវបានសមត្ថកិច្ចចម្រុះដឹកនាំដោយលោកជីវ ចាន់តារា ព្រះរាជអាជ្ញារងអមសាលាដំបូងខេត្តកណ្តាល ចុះអនុវត្តសាលដីការបស់សាលាឧទ្ធរណ៍ដើម្បីប្រគល់ឱ្យភាគីឈ្នះក្តី ។ ការអនុវត្តសាលដីកានេះបានធ្វើឡើងកាលពីព្រឹកថ្ងៃទី១៧ មីនា ។ មន្ត្រីអាជ្ញាធរបានឱ្យដឹងថា ដោយអនុវត្តតាមសាលដីការបស់សាលាឧទ្ធរណ៍ចុះថ្ងៃទី១២ ធ្នូ ឆ្នាំ២០០៨ សម្រេចបង្គាប់ឱ្យភាគីចាញ់ក្តីឈ្មោះលង គឹមអៀង ភេទស្រី ប្រគល់ដី និងផ្ទះសំណាក់យីហោហេង ហេង ដែលមានប័ណ្ណកម្មសិទ្ធិលេខ ក.ណ C1 1629 ចុះថ្ងៃទី២២ កក្កដា ឆ្នាំ១៩៩២ ដែលមានទីតាំងស្ថិតនៅភូមិតាខ្មៅ សង្កាត់តាខ្មៅ ក្រុងតាខ្មៅ ឱ្យទៅដើមចោទឈ្មោះនួន គង់, ជួន មុន្នី, ជួន វុទ្ធី, ជួន វត្ថា និងឈ្មោះជួន ពិសី ដែលមានទីលំនៅក្នុងភូមិក្រពើហា សង្កាត់ព្រែកឫស្សី ក្រុងតាខ្មៅ ។ ទាក់ទិនរឿងរ៉ាវរហូតកើតរឿងក្តីក្តាំគ្នានេះ ត្រូវបានលោកខូវ ចន្ថា មេធាវីដើមបណ្តឹងបានឱ្យដឹងថា តុលាការគ្រប់ជាន់ថ្នាក់ចាប់ពីសាលាដំបូងខេត្តកណ្តាល រហូតដល់សាលាឧទ្ធរណ៍បានសម្រេចក្តីឱ្យភាគីដើមចោទឈ្នះក្តី ព្រោះភាគីដើមចោទជាប្រពន្ធដើម និងកូនៗរបស់ឈ្មោះជួន វណ្ណៈ និងមានលិខិតបណ្តាំរបស់ជួន វណ្ណៈ ជាប្តី និងជាឪពុកប្រគល់ផ្ទះ និងដីឱ្យទៀត មុនពេលជួន វណ្ណៈ ស្លាប់ ។ លោកមេធាវីបានឱ្យដឹងទៀតថា ពីដើមឡើយឈ្មោះលង គឹមអៀង ចុងបណ្តឹងចាញ់ក្តីបានមកបម្រើការងារផ្ទះនៅក្នុងគ្រួសារជួន វណ្ណៈ និងប្រពន្ធឈ្មោះនួន គង់ ។ លុះក្រោយមកទៀតឈ្មោះលង គឹមអៀង និងជួន វណ្ណៈ បានស្រឡាញ់គ្នាដោយលួចលាក់ ហើយពេលរឿងនោះបែកធ្លាយដឹងដល់ឈ្មោះនួន គង់ ជាប្រពន្ធដើម ប្តី-ប្រពន្ធនេះបានលែងលះគ្នា និងធ្វើកិច្ចសន្យាប្រគល់ផ្ទះ និងទ្រព្យសម្បត្តិឱ្យឈ្មោះនួន គង់ ជាប្រពន្ធដើម និងកូនៗ៤នាក់ យ៉ាងស្របច្បាប់។ រហូតមកដល់អំឡុងឆ្នាំ២០០៧ ឈ្មោះជួន វណ្ណៈ បានស្លាប់ ហើយឈ្មោះលង គឹមអៀង មិនព្រមប្រគល់ផ្ទះ និងដីឱ្យទៅប្រពន្ធដើម និងកូនៗ៤នាក់តាមកិច្ចសន្យានោះទេ និងបែកគំនិតចង់បានទើបកើតជាជម្លោះក្តីក្តាំនេះឡើងអូសបន្លាយពេលជាង៤ឆ្នាំមកហើយ ហើយរាល់ការក្តីក្តាំត្រូវបានកាត់ក្តីឱ្យភាគីប្រពន្ធដើម និងកូនៗជាអ្នកឈ្នះ ទើបនៅថ្ងៃទី ១៧ មីនា កន្លងទៅនេះ សមត្ថកិច្ចចម្រុះបានចុះអនុវត្តសាលដីការបស់សាលាឧទ្ធរណ៍តាមនីតិវិធីច្បាប់ ប្រគល់ឱ្យភាគីឈ្នះក្តី គឺឈ្មោះនួន គង់ ជាប្រពន្ធដើម និងកូនៗ៤នាក់ទៀត ។ មានការកត់សម្គាល់ថា នៅក្នុងការចុះអនុវត្តសាលដីកានេះគេឃើញភាគីចាញ់ក្តីឈ្មោះលង គឹមអៀង និងក្រុមគ្រួសារបាននាំគ្នាយំស្រែក និងធ្វើការរារាំងសមត្ថកិច្ចមិនឱ្យអនុវត្ត ព្រមទាំងស្រែកថា អយុត្តិធម៌ និងបានគំរាមប្រើអំពើហិង្សាទៅលើសមត្ថកិច្ចចម្រុះទៀតផង ។ ពេលនោះសមត្ថកិច្ចបានចាប់ខ្លួនមនុស្ស៤នាក់ យកទៅកាន់ទីបញ្ជាកងរាជអាវុធហត្ថក្រុងតាខ្មៅ និងយកទ្រព្យសម្បត្តិមួយចំនួនរបស់ភាគីចាញ់ក្តីទៅរក្សាទុកនៅសាលាសង្កាត់តាខ្មៅ។ ក្រោយពីអនុវត្តសាលដីការបស់សាលាឧទ្ធរណ៍ចប់សព្វគ្រប់ នៅថ្ងៃដដែលអ្នកដែលត្រូវបានចាប់ខ្លួនសមត្ថកិច្ចបានដោះលែង និងប្រគល់ទ្រព្យសម្បត្តិឱ្យទៅភាគីចាញ់ក្តីវិញផងដែរ។ ទោះបីជាយ៉ាងណា ឈ្មោះលង គឹមអៀង បានស្រែកយំរៀបរាប់ថា អយុត្តិធម៌ណាស់ចំពោះរូបគាត់ ព្រោះទ្រព្យសម្បត្តិនៅក្នុងផ្ទះដែលគាត់ខំរកស៊ីមានបានក្រោយពីប្តីគាត់ស្លាប់ទៅ ត្រូវគេដកហូតយកទាំងអស់ គឺគាត់សល់តែខ្លួនទទេប៉ុណ្ណោះ ។ គាត់ក៏បានសំណូមពរដល់អង្គការសិទ្ធិមនុស្សក៏ដូចក្រុមអ្នកច្បាប់ផ្សេងៗមេត្តាជួយរកយុត្តិធម៌ដល់រូបគាត់ផង ៕  |
| ឈ្មួញពីរនាក់កំពុងនាំចូលឆ្អឹងមាន់ខូចគុណភាពពីសៀមទាំងតោនៗ Posted: 18 Mar 2011 12:22 AM PDT  ខេត្តបាត់ដំបង ៖ ប្រភពព័ត៌មានបានរាយការណ៍ពីតាមបណ្តាច្រកតំបន់ក្នុងស្រុកភ្នំព្រឹក ជាប់ព្រំដែនសៀមមកថា ការលួចនាំចូលម្ហូបអាហារខូចគុណភាព ពិសេសឆ្អឹង និងសាច់មាន់ពីប្រទេសសៀមចូលមកកម្ពុជាតាមច្រកភ្នំដី ស្រុកភ្នំព្រឹក កំពុងកើតមានពេញបន្ទុកពីសំណាក់ឈ្មួញទុច្ចរិតដែលគេសង្ស័យថា មានការបើកភ្លើងខៀវពីមន្ត្រីពាក់ព័ន្ធប្រចាំច្រកនេះ ។ ប្រភពព័ត៌មាននេះត្រូវគេដឹងថា បានបែកធ្លាយដោយសារតែការបង្ក្រាបរបស់មន្ត្រីជំនាញនៅច្រកភ្នំដី ដែលជាច្រកតំបន់ធ្វើឡើងតែលើអ្នករកស៊ីកំប៉ិកកំប៉ុកនាំចូលម្តងពី១០ទៅ២០គីឡូក្រាម រីឯពួកឈ្មួញរកស៊ីដឹកជញ្ជូនក្នុងទ្រង់ទ្រាយធំរាប់តោនបែរជាមន្ត្រីទាំងនោះបិទភ្នែកធ្វើមិនឃើញទៅវិញ ។ ស្ត្រីរកស៊ីនាំចូលឆ្អឹងមាន់ខូចគុណភាពពីសៀមម្នាក់សុំមិនប្រាប់ឈ្មោះបានទំលាយរឿងអាស្រូវនេះតាមទូរស័ព្ទថា មន្ត្រីកាំកុងត្រូល និងមន្ត្រីពាក់ព័ន្ធនៅច្រកភ្នំដីនេះ មិនដែលអើពើនឹងរទេះរុញរបស់ឈ្មួញ២នាក់ដែលនាំចូលឆ្អឹង សាច់មាន់ខូចគុណភាពទាំងតោនៗនោះទេ ប៉ុន្តែពួកមន្ត្រីទាំងនោះបែរជាមកគាបសង្កត់តែអ្នករកស៊ីតូចតាចម្តងបួនដប់គីឡូក្រាមទៅវិញ ។ ស្ត្រីរូបនេះបាននិយាយបែបក្តៅក្រហាយថា អ្នករកស៊ីតូចតាចគ្មានប្រាក់បង់ត្រូវគេបង្ក្រាប តែសម្រាប់ឈ្មួញរកស៊ីធំដុំមានប្រាក់សូកប៉ាន់ចង់ដឹកសម្ញែងកាត់ពីមុខប៉ុស្តិ៍តាមច្រកភ្នំដីនេះទាំងថ្ងៃ ក៏ពួកមន្ត្រីទាំងនោះមិនយកភ្នែកមើលដែរ ។ ស្ត្រីរូបនេះបានបញ្ជាក់ប្រាប់ថា បច្ចុប្បន្នឈ្មួញដែលរកស៊ីនាំចូលឆ្អឹងមាន់ខូចគុណភាពនេះធំជាងគេមាន២នាក់ គឺម្នាក់ឈ្មោះឆៃ ភេទប្រុស មានរថយន្តកាមរីពណ៌ស រស់នៅភូមិអូរ ឃុំពេជ្រចិន្តា ស្រុកភ្នំព្រឹក និងម្នាក់ទៀតឈ្មោះផល្លា ជាប្រពន្ធមន្ត្រីគយម្នាក់ មានរថយន្តកាមរីគូទប៉ោងពណ៌ស្ករ ។ ទាក់ទិននឹងការបែកធ្លាយរឿងអំពើពុករលួយខាងលើនេះ មន្ត្រីកាំកុងត្រូលដែលទទួលខុសត្រូវច្រកភ្នំដីនេះ លោកគឹម ប្រុស បានបំភ្លឺតាមទូរស័ព្ទថា គ្មានការនាំចូលសាច់មាន់ ឬឆ្អឹងមាន់ខូចគុណភាពក្នុងទ្រង់ទ្រាយធំដុំទេ ប៉ុន្តែលោកទទួលស្គាល់ចំពោះការលួចនាំចូលតិចតួចដែលបង្កប់តាមរយៈរុញ ។ មន្ត្រីរូបនេះបានបញ្ជាក់ថា លោកបានចាប់សាច់មាន់ទាំងនេះដុតកំទេចចោលស្ទើររាល់ថ្ងៃ ។ ចំពោះឈ្មួញធំៗ២នាក់ខាងលើនេះ លោកគឹម ប្រុស បានបដិសេធថា លោកមិនធ្លាប់ស្គាល់ទេ ។ លោកប៉ែន សេដ្ឋា ប្រធានការិយាល័យបសុពេទ្យមិនលើកទូរស័ព្ទដើម្បីបំភ្លឺរឿងនេះទេ កាលពីព្រឹកថ្ងៃទី១៧ មីនា។ បើតាមប្រភពថា ឈ្មួញ២នាក់នេះបានលួចនាំចូលសាច់មាន់ និងឆ្អឹងមាន់ខូចគុណភាពនេះក្នុង១សប្តាហ៍ម្តង ហើយម្តងៗមិនតិចជាង១,៥តោននោះទេ ដោយដឹកយកមកចែកចាយលើទីផ្សារខេត្តបាត់ដំបង និងខេត្តផ្សេងៗ៕  |
| Posted: 18 Mar 2011 12:19 AM PDT លោកមូអាម៉ា កាដាហ្វី កាលពីថ្ងៃទី១៧ មីនា បានថ្លែងតាមទូរទស្សន៍ថា ក្នុងករណីមានប្រតិបត្តិការយោធារបស់បរទេសលើដែនដីលីប៊ី រដ្ឋអំណាចលីប៊ីនឹងវាយប្រហារសងសឹកវិញលើបណ្តានាវា និងយន្តហោះស៊ីវិល ក៏ដូចជាយោធាក្នុងតំបន់មេឌីទែរ៉ាណេ ។ កងទ័ពដែលស្មោះត្រង់រដ្ឋាភិបាលនឹងទៅដល់ក្រុងបេនហ្គាហ្ស៊ីនាយប់នេះ ។ ប៉ុន្មានម៉ោងក្រោយការអនុម័តរបស់ អ.ស.ប សំដៅបញ្ឈប់ការបង្ក្រាបការបះបោរប្រទេសលីប៊ីបានព្រមានកាលពីថ្ងៃទី១៧ មីនា ប្រឆាំងនឹងរាល់ប្រតិបត្តិការយោធាបរទេសលើដែនដីខ្លួន ។ ប្រទេសនេះបានគំរាមកំហែងវាយប្រហារលើបណ្តាយន្តហោះ និងនាវាស៊ីវិល ព្រមទាំងយោធានៅមេឌីទែរ៉ាណេ ។  |
| លោកអូបាម៉ា៖ វិទ្យុសកម្មដែលគ្រោះថ្នាក់មិនសាយភាយដល់អាមេរិកឡើយ Posted: 17 Mar 2011 09:10 PM PDT  ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា ថ្លែងកាលពីថ្ងៃទី១៧ មីនា កន្លងមកថា រូបលោកមិនរំពឹងថា វិទ្យុសកម្មដែលបង្កគ្រោះថ្នាក់លេចធ្លាយចេញពីរោងចក្រនុយក្លេអ៊ែរដែលរងផលប៉ះពាល់ដោយការរញ្ជួយដីរបស់ជប៉ុននឹងមកដល់សហរដ្ឋអាមេរិកនោះទេ ។ លោកអូបាម៉ា ថ្លែងអះអាងដូច្នេះក្នុងសុន្ទរកថាមួយនៅសេតវិមាន ។ លោកប្រធានាធិបតីថ្លែងទៀតថា «យើងមិនរំពឹងថា កម្រិតវិទ្យុសកម្មដែលមានគ្រោះថ្នាក់សាយភាយដល់អាមេរិកនោះទេ មិនថានៅតំបន់ឆ្នេរសមុទ្រខាងលិចអាមេរិក រដ្ឋហាវ៉ៃ រដ្ឋអាឡាស្កា ឬទឹកដីអាមេរិក នៅមហាសមុទ្រប៉ាស៊ីហ្វិក» ។ លោកអូបាម៉ា ថ្លែងទៀតថា ឥឡូវនេះមជ្ឈ មណ្ឌលគ្រប់គ្រង និងទប់ស្កាត់ជំងឺ និងអ្នកជំនាញការសុខភាពសាធារណៈមិនបានណែនាំដល់ពលរដ្ឋអាមេរិកឱ្យចាត់វិធានការបង្ការលើសពីអ្វីដែលបានជូនដំណឹងនោះទេ ។ ផលប៉ះពាល់នៅម៉ាស៊ីនរេអាក់ទ័រនៃរោងចក្រនុយក្លេអ៊ែរហ្វូគូស៊ីម៉ា បង្កគ្រោះថ្នាក់ធ្ងន់ធ្ងរដល់មនុស្សដែលរស់នៅតំបន់ក្បែររោងចក្រនេះហើយសហរដ្ឋអាមេរិកបានផ្តល់ការណែនាំឱ្យជម្លៀសពលរដ្ឋរបស់ខ្លួន ដែលរស់នៅចម្ងាយ៨០គីឡូម៉ែត្រពីរោងចក្រនេះ ។ ជាមួយគ្នានេះ លោកអូបាម៉ា បានទទូចដល់ពលរដ្ឋអាមេរិក ដែលរស់នៅក្នុងប្រទេសជប៉ុនទាំងអស់ឱ្យតាមដានស្ថានការណ៍នៅក្នុងប្រទេសជប៉ុនឱ្យបានដិតដល់ក្រោមគោលការណ៍របស់រដ្ឋាភិបាលជប៉ុន ៕  |
| ពលរដ្ឋកម្ពុជា៦នាក់រងរបួសធ្ងន់-ស្រាល ខណៈផ្ទុះមីន និង៩នាក់ទៀតរួចផុតពីរបួសស្នាម Posted: 17 Mar 2011 09:09 PM PDT ព្រំដែនខេត្តឧត្តរមានជ័យ ៖ យ៉ាងហោចណាស់មនុស្ស៤នាក់បានរងរបួសធ្ងន់ និង២នាក់ទៀតរងរបួសស្រាល ដោយសារដើរជាន់មីនប្រភេទ៦៩ ផ្ទុះឡើងកក្រើក កាលពីវេលាម៉ោង៨និង៤០នាទីយប់ថ្ងៃទី១៧ មីនា ២០១១ ម្សិលមិញនេះ នៅចំណុចផែនទី២៥-៩៣ លើភ្នំដងរែក ស្ថិតក្នុងភូមិសាស្ត្រភូមិអូរត្រាវ ឃុំគន្ទ្រង ស្រុកឃុនហាន ខេត្តស៊ីសាកេត ប្រទេសថៃ ចម្ងាយ១៣គីឡូម៉ែត្រពីព្រំដែនកម្ពុជា ។ បើតាមអ្នកយកព័ត៌មានកោះសន្តិភាពប្រចាំខេត្តឧត្តរមានជ័យបានបញ្ជាក់ឱ្យដឹងថា បុរសទាំង៦នាក់ខាងលើ មាន១-ឈ្មោះស៊ឹម សេះ របួសដាច់ជើងទាំងពីរ ២-ឈ្មោះសេះ សាយ អ្នកទាំង២ជាឪពុក និងកូន របួសដាច់ជើងទាំងពីរ ៣-ឈ្មោះសាន លួន អាយុ១៦ឆ្នាំ របួសដាច់ជើងទាំងសងខាង ៤-ឈ្មោះហូយ កឺយ របួសបាក់ជើងខាងឆ្វេង ៥-ឈ្មោះញឹក របួសជើងឆ្វេងស្រាល និង៦-ឈ្មោះហេង ចំរើន របួសជើងឆ្វេងស្រាល ។ ប្រជាពលរដ្ឋខ្មែរទាំង៦នាក់នេះ រស់នៅក្នុងភូមិអភិវឌ្ឍន៍ ហៅភូមិសូន្យ៥ ស្ថិតក្នុងឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ។ សេចក្តីរាយការណ៍បានបញ្ជាក់ដែរថា ហេតុការណ៍នេះបានកើតឡើងខណៈពេលប្រជាពលរដ្ឋរងគ្រោះ៦នាក់ខាងលើនេះរួមជាមួយប្រជាពលរដ្ឋ៩នាក់ទៀត (ទាំងអស់១៥នាក់) ចូលទៅក្នុងទឹកដីថៃ ដើម្បីស៊ីឈ្នួលកាប់ឈើគ្រញូង និងអូសឈើឱ្យឈ្មួញដែលជួលពួកគេ ។ បច្ចុប្បន្នអ្នករបួសធ្ងន់ដាច់ជើង និងបាក់ជើងទាំង៤នាក់នោះ មិនដឹងពីវាសនាយ៉ាងណានោះទេ ព្រោះពួកគេទៅណាមិនរួច ហើយខណៈដែលរបួសមានសភាពធ្ងន់ធ្ងរ និងហូរឈាមច្រើននោះ អាជ្ញាធរថៃនៅមិនទាន់ចូលទៅយកពួកគេ ដើម្បីបញ្ជូនទៅខេត្តស៊ីសាកេត សង្គ្រោះនៅឡើយ ។ ជាមួយនេះដែរ ប្រជាពលរដ្ឋខ្មែរដែលរបួសស្រាល២នាក់នោះ ត្រូវបានប្រជាពលរដ្ឋខ្មែរផ្សេងទៀតបានគ្រាចូលមកដល់ដីខ្មែរបញ្ជូនទៅកាន់មន្ទីរពេទ្យហើយ ចំណែក៩នាក់ផ្សេងទៀតដែលមិនមានគ្រោះថ្នាក់នៅក្នុងការផ្ទុះមីននោះក៏បានចូលមកដល់ភូមិកំណើតវិញអស់ហើយដែរ ៕  |
| Posted: 17 Mar 2011 09:04 PM PDT រាជធានីភ្នំពេញ ៖ ក្រោយបញ្ចប់សម័យប្រជុំពេញអង្គប្រចាំសប្តាហ៍របស់គណៈរដ្ឋមន្ត្រីវេលាម៉ោង១១ព្រឹកថ្ងៃសុក្រ ទី១៨ មីនា ២០១១ សម្តេចតេជោនាយករដ្ឋមន្ត្រីហ៊ុន សែន បានដឹកនាំក្រុមមន្ត្រីជាន់ខ្ពស់នៃរាជរដ្ឋាភិបាល អញ្ជើញទៅស្ថានទូតជប៉ុនប្រចាំប្រទេសកម្ពុជា ដើម្បីដាក់កម្រងផ្កាគោរពវិញ្ញាក្ខន្ធដល់ប្រជាពលរដ្ឋជប៉ុនដែលស្លាប់ដោយសារការរញ្ជួយដី និងរលកយក្សស៊ូណាមី កាលពីថ្ងៃទី១១ មីនា កន្លងមក ។ សូមបញ្ជាក់ថា ស្ថានទូតជប៉ុនប្រចាំព្រះរាជាណាចក្រកម្ពុជា បានចេញសេចក្តីប្រកាសព័ត៌មានមួយកាលពីថ្ងៃទី១៦ មីនា ទាក់ទិននឹងគ្រោះមហន្តរាយដោយការរញ្ជួយដី និងរលកយក្សស៊ូណាមីបង្កឱ្យខូចខាតធ្ងន់ធ្ងរលើប្រទេសជប៉ុន កាលពីថ្ងៃទី១១ មីនា កន្លងមកនេះ ដោយក្នុងមនោសញ្ចេតនាជ្រាលជ្រៅរបស់ប្រជាពលរដ្ឋកម្ពុជាទាំងអស់ គឺមានការរន្ធត់ចិត្តពន់ពេកណាស់ចំពោះការរងគ្រោះដ៏ធំធេងនៅប្រទេសជប៉ុនដែលជាកល្យាណមិត្តដ៏ល្អរបស់កម្ពុជា ។ ទឹកភ្នែក និងការទួញសោករបស់ប្រជាជនជប៉ុន ក៏ជាទឹកភ្នែករបស់ប្រជាជនកម្ពុជាដែរ ដូច្នេះស្ថានទូតជប៉ុនបានអនុញ្ញាតឱ្យសាធារណជនចូលរួមដាក់កម្រផ្កា គោរពវិញ្ញាណក្ខន្ធ និងសរសេរក្នុងសៀវភៅរំលែកទុក្ខនៅស្ថានទូតជប៉ុន ដែលមានអាសយដ្ឋានលេខ១៩៤ មហាវិថីព្រះនរោត្តម តាមពេលវេលាគឺពីថ្ងៃទី១៦ ដល់ទី១៨ មីនា និងថ្ងៃទី២១ ដល់២៣ មីនា ចាប់ពីម៉ោង១០ដល់ម៉ោង១២ និងពីម៉ោង១៤ដល់ម៉ោង១៦ ។ សេចក្តីប្រកាសព័ត៌មានបន្តថា ស្ថានទូតជប៉ុនសូមថ្លែងអំណរគុណយ៉ាងជ្រាលជ្រៅចំពោះប្រជាជនកម្ពុជាដែលបានចូលរួមមរណៈទុក្ខ និងសន្តានចិត្តក្នុងការផ្តល់នូវការបរិច្ចាគជាថវិកា និងផ្កាសម្រាប់ជនរងគ្រោះដោយសារគ្រោះមហន្តរាយនេះ ៕  |
| កម្រិតវិទ្យុសកម្មដែលលេចធ្លាយនៅរោងចក្រនុយក្លេអ៊ែរហ្វូគូស៊ីម៉ាធ្លាក់ចុះវិញ Posted: 17 Mar 2011 08:43 PM PDT  ទីភ្នាក់ងារសារព័ត៌មានជប៉ុនក្យូដូ រាយការណ៍ថា កម្រិតវិទ្យុសកម្មនៅរោងចក្រនុយក្លេអ៊ែរហ្វូគូស៊ីម៉ា បានធ្លាក់ចុះវិញគួរឱ្យកត់សម្គាល់ចាប់តាំងពីព្រឹកថ្ងៃទី១៨ មីនា ទៅ ។ កម្រិតនៃការសាយភាយវិទ្យុសកម្មនេះត្រូវបានវាស់ដោយទីភ្នាក់ងារសុវត្ថិភាពឧស្សាហកម្មនុយក្លេអ៊ែរនៅម៉ាស៊ីនរេអាក់ទ័រលេខ១ និងម៉ាស៊ីនរេអាក់ទ័រលេខ២ ។ ទីភ្នាក់ងារសុវត្ថិភាពឧស្សាហកម្មនុយក្លេអ៊ែរឱ្យដឹងថា កម្រិតវិទ្យុសកម្មបានធ្លាក់ចុះវិញ ក្រោយពីកងទ័ពស្វ័យការពារជាតិជប៉ុនបានទម្លាក់ទឹកបញ្ចុះកំដៅម៉ាស៊ីនរេអាក់ទ័រ ដែលមានការផ្ទុះឆេះដែលការទម្លាក់ទឹកនេះធ្វើឡើងដោយការប្រើឧទ្ធម្ភាគចក្រ ។  |
| វាយប្រហារដោយយន្តហោះគ្មានមនុស្សបើកនៅប៉ាគីស្ថានស្លាប់38នាក់ Posted: 17 Mar 2011 08:43 PM PDT យោងតាមប្រភពព័ត៌មានមួយថា ការវាយប្រហារដោយយន្តហោះគ្មានមនុស្សបើកដែលគេសង្ស័យថា ជារបស់អាេមរិក បណ្តាលឱ្យស្លាប់មនុស្ស៣៨នាក់ កាលពីថ្ងៃទី១៧ មីនា កន្លងមក ក្រោយពីបើកការវាយប្រហារប្រឆាំងកិច្ចប្រជុំJIRGA មួយនៅតំបន់កុលសម្ព័ន្ធភ្នំដាច់ស្រយាលមួយរបស់ប្រទេសប៉ាគីស្ថាន ។ មន្ត្រីចារកម្ម២នាក់និយាយថា ការវាយប្រហារដោយយន្តហោះគ្មានមនុស្សបើកនោះគឺការបាញ់មីស៊ីល២គ្រាប់លើកិច្ចប្រជុំ Jirga នៅតំបន់ Data Khel នៃសង្កាត់វ៉ាហ្ស៊ីរីស្ថានខាងជើង ជាតំបន់អស្ថិរភាពមួយរបស់ប្រទេសប៉ាគីស្ថានស្ថិតនៅជាប់ព្រំដែនប្រទេសអាហ្វហ្គានីស្ថាន។  |
| ប៉ូលិសចាប់ខ្លួនជនសង្ស័យចំនួន២នាក់ ចែកចាយគ្រឿងញៀន Posted: 17 Mar 2011 08:41 PM PDT   ខេត្តបន្ទាយមានជ័យ ៖ ជនសង្ស័យចំនួន២នាក់ ពាក់ព័ន្ធក្នុងករណីចែកចាយគ្រឿងញៀន ត្រូវបានកម្លាំងប៉ូលិសក្រុងសិរីសោភ័ណ សហការជាមួយកម្លាំងការិយាល័យប្រឆាំងគ្រឿងញៀន បើកការស៊ើបអង្កេតស្រាវជ្រាវចាប់ខ្លួននៅវេលាម៉ោង១១ព្រឹកថ្ងៃទី១៥ មីនា នៅចំណុចភូមិសែសិន សង្កាត់អូរអំបិល ក្រុងសិរីសោភ័ណ ។ លោកវរសេនីយ៍ទោឆេង ឈួត នាយការិយាល័យប្រឆាំងគ្រឿងញៀន បានឱ្យដឹងថា ដោយអនុវត្តតាមបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ស្នងការនគរបាលខេត្ត និងការយកចិត្តទុកដាក់ពីមន្ត្រីជំនាញ ជាលទ្ធផលសមត្ថកិច្ចការិយាល័យជំនាញបានសហការជាមួយសមត្ថកិច្ចនគរបាលក្រុងសិរីសោភ័ណ ធ្វើការស៊ើបអង្កេតតាមវិធានការជំនាញកំណត់មុខសញ្ញា ឈានដល់ការចាប់ឃាត់ខ្លួនជនសង្ស័យចំនួន២នាក់ ដែលពាក់ព័ន្ធនឹងករណីចែកចាយគ្រឿងញៀនជាក់ស្តែង ឈ្មោះស៊ុន ចន្ថា ភេទប្រុស អាយុ២៧ឆ្នាំ មានទីលំនៅភូមិចាប់ឃាត់ខ្លួនខាងលើ ជាអ្នករត់ម៉ូតូឌុប ។ ក្នុងការឃាត់ខ្លួននោះសមត្ថកិច្ចដកហូតបានថ្នាំញៀនពណ៌ផ្កាឈូក មានអក្សរ WY លើគ្រាប់ថ្នាំម្ខាង ចំនួន២គ្រាប់ និងមធ្យោបាយជិះធ្វើសកម្មភាពម៉ូតូម៉ាកហុងដាឌ្រីម១គ្រឿង ពណ៌ខ្មៅ ពាក់ស្លាកលេខ 1B-1260 ទូរស័ព្ទដៃ២គ្រឿង ប្រាក់១៨០.០០០រៀល និង ប្រាក់អាមេរិក២១ដុល្លារ ។ ក្រោយពីសួរនាំជនសង្ស័យឈ្មោះស៊ុន ចន្ថា សមត្ថកិច្ចបានឈានដល់ការចាប់ឃាត់ខ្លួនស្ត្រីម្នាក់ទៀត ឈ្មោះវ៉ាន់ ចាន់ហេង អាយុ២៦ឆ្នាំ នៅភូមិជាមួយគ្នា តាមបទបញ្ជារបស់លោកតន់ សីហតេជៈ ព្រះរាជអាជ្ញានៃ សាលាដំបូងខេត្តបន្ទាយមានជ័យ។ ក្នុងប្រតិបត្តិការនេះ សមត្ថកិច្ចដកហូតបានប្រាក់ខ្មែរចំនួន៦៩.០០០រៀល ។ លោកឧត្តមសេនីយ៍ត្រីខេង ស៊ុម ស្នងការនគរបាលខេត្តបន្ទាយមានជ័យ បានមានប្រសាសន៍ថា តាមការសួរចម្លើយ ឈ្មោះស៊ុន ចន្ថា បានសារភាពថា រូបគេពិតជាបានចែកចាយគ្រឿងញៀនប្រាកដមែន ដោយលក់ក្នុង១ថ្ងៃពី៣០ទៅ៤០គ្រាប់ ការទិញដូរគឺទាក់ទងតាមរយៈទូរស័ព្ទ ប៉ុន្តែគេយកថ្នាំញៀនជាប់ខ្លួនតែ២ទៅ៣គ្រាប់ប៉ុណ្ណោះ ពេលលក់អស់រូបគេជិះម៉ូតូទៅទិញថ្នាំញៀនពីឈ្មោះវ៉ាន់ ចាន់ហេង លក់បន្តទៀត ។ លោកឧត្តមសេនីយ៍ស្នងការបានគូសបញ្ជាក់ថា ស្ត្រីឈ្មោះវ៉ាន់ ចាន់ហេង ពុំព្រមសារភាព និងប្រាប់សមត្ថកិច្ចពីកន្លែងដែលខ្លួនទុកលាក់ថ្នាំញៀននោះទេ ទោះបីជាឈ្មោះស៊ុន ចន្ថា បានសារភាពពីការទិញថ្នាំញៀនពីរូបគេក៏ដោយ តែទោះជាយ៉ាងណា សមត្ថកិច្ចការិយាល័យជំនាញបានកសាងសំណុំរឿងបញ្ជូនទៅសាលាដំបូងខេត្ត ទាំងជនសង្ស័យ និងវត្ថុតាង ៕  |
| ក្រុមប្រឹក្សាសន្តិសុខ អ.ស.ប អនុម័តតំបន់ហាមហោះហើរនៅលីប៊ី និងឱ្យធ្វើអន្តរាគមន៍យោធា Posted: 17 Mar 2011 08:16 PM PDT   ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី១៧ មីនា កន្លងមក បានអនុម័តដំណោះស្រាយមួយដែលអនុញ្ញាតឱ្យមានតំបន់ហាមហោះហើរនៅប្រទេសលីប៊ី ហើយបានអំពាវនាវឱ្យចាត់វិធានការដែលចាំបាច់ដោយរួមមានទាំងការប្រើកម្លាំងទ័ពផង ដើម្បីការពារជនស៊ីវិល ដែលកំពុងស្ថិតក្រោមការគំរាមកំហែងវាយប្រហារនៅប្រទេសអាហ្វ្រិកខាងជើងមួយនេះ ។ ដំណោះស្រាយនេះត្រូវបានអនុម័តដោយសំឡេងឆ្នោតគាំទ្រចំនួន១០ ក្នុងចំណោម១៥ប្រទេស ជាសមាជិកក្រុមប្រឹក្សាសន្តិសុខ ហើយក្នុងនោះបោះអនុប្បវាទដោយប្រទេសជាសមាជិកក្រុមប្រឹក្សាសន្តិសុខចំនួន៥ គឺប្រទេសអង់គ្លេស ចិន បារាំង រុស្ស៊ី និងសហរដ្ឋអាមេរិក។  |
| IAEA ៖ ស្ថានការណ៍នៅរោងចក្រនុយក្លេអ៊ែរហ្វូគូស៊ីម៉ារបស់ជប៉ុនពុំធ្ងន់ធ្ងរពេកទេ Posted: 17 Mar 2011 08:15 PM PDT  ទីភ្នាក់ងារថាមពលបរមាណូអន្តរជាតិ IAEA និយាយថា ស្ថានការណ៍នៅរោងចក្រថាមពលនុយក្លេអ៊ែរហ្វូគូស៊ីម៉ារបស់ប្រទេសជប៉ុននៅតែមានសភាពធ្ងន់ធ្ងរនៅឡើយ ប៉ុន្តែហាក់ដូចជាស្ថិតក្នុងកម្រិតមានស្ថិរភាព ។ ថ្លែងនៅក្នុងសន្និសីទកាសែតមួយស្តីអំពីបញ្ហានៅរោងចក្រនុយក្លេអ៊ែរជប៉ុនដែលរងផលប៉ះពាល់ដោយសារការរញ្ជួយដីដ៏ខ្លាំងកម្រិត៩រីស្ទ័រ លោក Graham Andrew ជាជំនួយការជាន់ខ្ពស់របស់ប្រធាន IAEA ថ្លែងថា ស្ថានការណ៍នៅរោងចក្រនុយក្លេអ៊ែរហ្វូគូស៊ីម៉ារបស់ជប៉ុន កាលពីថ្ងៃម្សិលមិញពុំមានភាពធ្ងន់ធ្ងរនោះទេ ។  |
| កម្ពុជាស្ថិតនៅក្នុងចំណោម២២ប្រទេសដែលមានជំងឺរបេងធ្ងន់ធ្ងរ Posted: 17 Mar 2011 08:10 PM PDT  រាជធានីភ្នំពេញ ៖ របាយការណ៍ស្តីពីជំងឺរបេងឆ្នាំ២០១០របស់ក្រសួងសុខាភិបាលបានឱ្យដឹងថា កម្ពុជាគឺជាប្រទេសមួយដែលស្ថិតនៅក្នុងចំណោមប្រទេសចំនួន២២ដែលមានជំងឺរបេងធ្ងន់ធ្ងរក្នុងពិភពលោក។ ចំនួនករណីរបេងបានកើនដល់៤១.៦២៨នាក់ ក្នុងឆ្នាំ២០១០ ហើយជំងឺរបេង អេដស៍ក៏នៅតែជាកង្វល់ដ៏ធំធេងសំរាប់ប្រទេសកម្ពុជា។ ទិសដៅជារួមរបស់កម្មវិធីជាតិសំរាប់ឆ្នាំ២០១១-២០១៥ គឺធានានូវសមធម៌ និងការទទួលយកបាននូវសេវារបេងជាសាកលប្រកបដោយគុណភាពរក្សាអត្រាជាសះស្បើយជំងឺរបេងសួតវិជ្ជមានបេកាឱ្យលើសពី៨៥ភាគរយ និងកាត់បន្ថយពាក់កណ្តាលនូវអត្រាប្រេវ៉ាឡង់ និងស្លាប់ដោយសារជំងឺរបេងគ្រប់សណ្ឋានទាំងអស់ដើម្បីចូលរួមចំណែកក្នុងការសំរេចគោលដៅអភិវឌ្ឍន៍សហស្សវត្សនៅឆ្នាំ២០១៥។ របាយការណ៍នោះត្រូវបានគេផ្សព្វផ្សាយនៅក្នុងសន្និបាតស្តីពីការងារកំចាត់រោគរបេងប្រចាំឆ្នាំលើកទី១៦ដែលធ្វើឡើងនៅមជ្ឈមណ្ឌលវប្បធម៌ភ្នំពេញកាលពីថ្ងៃទី១៧ និង១៨ មីនា ក្រោមអធិបតីភាពលោកសាស្ត្រាចារ្យអេង ហួត រដ្ឋលេខាធិការក្រសួងសុខាភិបាល។ លោកអេង ហួត បានថ្លែងថា ឆ្នាំ២០១០ កម្មវិធីជាតិកំចាត់រោគរបេងសំរេចបាននូវសមិទ្ធផលថ្មីៗ គួរឱ្យកត់សំគាល់ថែមទៀតដែលមានជាអាទិ៍ ការរក្សាបាននូវអត្រាជាសះស្បើយលើសពី៨៥% អត្រាស្រាវជ្រាវករណីជំងឺរបេងសួតវិជ្ជមានបេកាបាន៦៦% អត្រាគ្របដណ្តប់សេវាដូតស៍១០០%នៅថ្នាក់មណ្ឌលសុខភាព និងពង្រីកដូតស៍សហគមន៍បានដល់៨៧%នៅចុងឆ្នាំ២០១០ ។ ជាលទ្ធផលនាំឱ្យអត្រាឈឺ និងអត្រាស្លាប់ដោយសារជំងឺរបេងមានការចុះថយយ៉ាងខ្លាំងគួរឱ្យកត់សំគាល់។ ទន្ទឹមនឹងសមិទ្ធផលដែលទទួលបានគួរជាទីមោទនៈនេះក៏នៅមានការលំបាកមួយចំនួនដែលកម្មវិធីជាតិត្រូវពុះពារដើម្បីមានលទ្ធភាពសំរេចបានទិសដៅឆ្នាំ២០១០ និងឆ្នាំបន្តក៏ដូចជាតម្រង់ទិសសំដៅសំរេចបានគោលដៅអភិវឌ្ឍន៍សហស្សវត្សនៅដំណាច់ឆ្នាំ២០១៥។ ការលំបាកទាំងនោះមានជាអាទិ៍ ការដែលអត្រាប្រេវ៉ាឡង់ និងអាំងស៊ីដង់នៃជំងឺរបេងនៅខ្ពស់នៅឡើយ ធនធានដើម្បីធានាដំណើរការនៃសេវាដូតស៍ដែលមានស្រាប់ដ៏ច្រើនកន្លែង បញ្ហាធានាគុណភាព ធនធានដើម្បីពង្រីកអន្តរាគមន៍ថ្មីៗ ដូចជាការព្យាបាលករណីជំងឺរបេងស៊ាំនឹងថ្នាំ ការថែទាំព្យាបាលជំងឺរបេងកុមារ ការពង្រឹងការងារមន្ទីរពិសោធន៍ ព្រមទាំងការកសាងសមត្ថភាព និងការលើកទឹកចិត្តបុគ្គលិកជាដើម។ ដើម្បីសំរេចបានទិសដៅនេះចាំបាច់យើងទាំងអស់គ្នាត្រូវសហការជំនះដោះស្រាយឱ្យបានដើម្បីឆ្លើយតបទៅនឹងទំហំដ៏ធំនៃតម្រូវការរបស់ប្រជារាស្ត្រពាក់ព័ន្ធនឹងការប្រយុទ្ធនឹងជំងឺរបេង។ លោករដ្ឋលេខាធិការលើកឡើងថា សំរាប់ឆ្នាំ២០១១ចូរខិតខំធ្វើយ៉ាងណារក្សាឱ្យបាននូវអត្រាជាសះស្បើយលើសពី៨៥% និងពិសេសសំរេចការស្រាវជ្រាវករណីជំងឺរបេងគ្រប់សណ្ឋានឱ្យបានយ៉ាងតិច៤០.០០០ករណីស្របតាមទិសដៅថ្មីរបស់កម្មវិធីជាតិ និងអន្តរជាតិ ពោលគឺការទទួលបានសេវាជំងឺរបេងជាសកល។ ការងារនេះទាមទារឱ្យមានការចូលរួមយ៉ាងជិតស្និទ្ធបន្ថែមទៀតពីអាជ្ញាធរ និងសហគមន៍មូលដ្ឋាន ស្ថាប័នសុខាភិបាលពាក់ព័ន្ធផ្សេងទៀត ព្រមទាំងស្ថាប័នមិនមែនសុខាភិបាលផ្សេងទៀតផងដែរ។ ត្រូវជំរុញកសម្មភាពចលនាកៀងគរធនធានបន្ថែមឱ្យបានខ្លាំងក្លាដើម្បីអនុវត្តផែនការយុទ្ធសាស្ត្រប្រយុទ្ធនឹងជំងឺរបេងឆ្នាំ២០១១-២០១៥ឱ្យបានជោគជ័យ ៕  |
| Posted: 17 Mar 2011 07:28 PM PDT  រាជធានីភ្នំពេញ ៖ ថ្ងៃសុក្រ ទី១៨ មីនា នេះដែរ ឧបការីរងរដ្ឋមន្ត្រីការបរទេសអាមេរិក លោក Joseph Yun នឹងធ្វើការពិភាក្សាជាមួយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា ស្តីពីបញ្ហាដែលកម្ពុជាបានជំពាក់បំណុលអាមេរិកក្នុងរជ្ជកាលរបស់លោកសេនាប្រមុខលន់ នល់ ។ នេះបើយោងតាមលោកកុយ គួង អ្នកនាំពាក្យក្រសួងការបរទេសកម្ពុជា ដែលថ្លែងប្រាប់ក្រុមអ្នកកាសែតនៅក្រោយជំនួបរវាងលោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេសកម្ពុជា ជាមួយលោក Joseph Yun ឧបការីរងរដ្ឋមន្ត្រីការបរទេសអាមេរិក ធ្វើឡើងនៅទីស្តីការក្រសួងការបរទេសកាលពីថ្ងៃទី១៧ មីនា ។ នៅក្នុងជំនួបកាលពីថ្ងៃព្រហស្បតិ៍ ទី១៧ មីនា ម្សិលមិញនេះ បើតាមអ្នកនាំពាក្យក្រសួងការបរទេសកម្ពុជា លោកកុយ គួង បានបញ្ជាក់ឱ្យដឹងថា លោកប្រមុខការទូតហោ ណាំហុង បានលើកសំណើរបស់កម្ពុជាឱ្យអាមេរិកគិតគូរពី រឿងបំណុលឡើងវិញ ។ ដោយភាគីកម្ពុជាសុំឱ្យអាមេរិកគិតការប្រាក់លើបំណុលពី៣%ក្នុងមួយឆ្នាំ មកនៅត្រឹមការប្រាក់១%វិញ និងស្នើសុំឱ្យអាមេរិកបង្វិលបំណុល៧០% ទៅគម្រោងអភិវឌ្ឍន៍នៅក្នុងប្រទេសកម្ពុជា ហើយនៅសល់៣០% រដ្ឋាភិបាលកម្ពុជានឹងធ្វើការចរចាដើម្បីសងទៅអាមេរិកវិញ ។ លោកកុយ គួង បានបន្តថា បំណុលជាក់ស្តែងដែលកម្ពុជាជំពាក់អាមេរិកក្នុងសម័យលន់ នល់ គិតគូរឱ្យបានម៉ត់ចត់ក្នុងឆ្នាំ២០០៥ មានចំនួនតែ១៦២លានដុល្លារប៉ុណ្ណោះ តែអាមេរិកគិតពីការប្រាក់៣% ក្នុងមួយឆ្នាំ ហើយបូកបញ្ចូលអ្វីផ្សេងៗទៀត អាចឡើងដល់ជាង៣០០លានដុល្លារ ៕  |
| អនាគតកូនកំលោះកូនក្រមុំ វិលត្រឡប់ពីសុំច្បាប់រៀបការ ជួបគ្រោះអកុសលស្លាប់និងរបួស Posted: 17 Mar 2011 07:24 PM PDT       ខេត្តសៀមរាប ៖ ឧប្បត្តិហេតុគ្រោះថ្នាក់ចរាចរណ៍ដ៏រន្ធត់មួយបណ្តាលឱ្យនារីអនាគតកូនក្រមុំ និងក្មួយស្រីតូចអាយុ២ឆ្នាំស្លាប់ ចំណែកអនាគតកូនកំលោះបានរងរបួសធ្ងន់ ក្នុងហេតុការណ៍ម៉ូតូម៉ាកឌ្រីមC125 ពណ៌ខ្មៅ ស៊េរីឆ្នាំ ២០០៨ មួយគ្រឿង ត្រូវរថយន្តឈ្នួលម៉ាកកាមរីឆ្លាមពណ៌ពងមាន់ពាក់ស្លាកលេខ 2K-9801 បុកនៅវេលាម៉ោងប្រមាណ១ និង២០នាទី រសៀលថ្ងៃទី១៦ មីនា កន្លងទៅនេះ ។ តាមប្រភពពីកន្លែងកើតហេតុឱ្យដឹងថា ជនរងគ្រោះដែលស្លាប់ឈ្មោះបិញ សុថា អាយុ២២ឆ្នាំ ជាអនាគតកូនក្រមុំ និងក្មេងស្រីមិនស្គាល់ឈ្មោះអាយុ២ឆ្នាំ ត្រូវជាក្មួយជាអ្នករស់នៅឃុំដូនកែវ ស្រុកពួក ខេត្តសៀមរាប ។ គ្រោះថ្នាក់ចរាចរណ៍នេះកើតឡើង ខណៈពេល ដែលនាងក្រមុំឈ្មោះបិញ សុថា អាយុ២២ឆ្នាំ នោះបានជិះម៉ូតូដែលយុវជនជាគូដណ្តឹងឈ្មោះ ឆែម ឈឿត ជាអ្នកបើកបត់ចេញពីក្នុងផ្លូវបំបែកក្រវាត់ក្រុងឡើងមកទ្រូងថ្នល់ ។ ជាអកុសលចៃដន្យ ក៏ត្រូវរថយន្តតាក់ស៊ីធុនឆ្លាមខាងលើ ដែលមានផ្ទុកអ្នកដំណើរចំនួន៧នាក់ និងបើកក្នុងល្បឿនលឿនពីលិចទៅកើតសំដៅចូលក្រុងសៀមរាប បុកពេញទំហឹងប៉ើងចម្ងាយប្រមាណ៥០ម៉ែត្រ ។ ក្នុងហេតុការណ៍ខាងលើនេះ បណ្តាលឱ្យនារីជាអនាគតកូនក្រមុំ និងក្មួយស្រីអាយុ២ឆ្នាំរបស់នាងដែលជិះពីក្រោយផ្លោងធ្លាក់បោកក្បាលស្លាប់ រីឯយុវជនជាគូដណ្តឹង និងជាអនាគតកូនកំលោះរងរបួសធ្ងន់ត្រូវបានដឹកបញ្ជូនទៅសង្គ្រោះបន្ទាន់ក្នុងមន្ទីរពេទ្យ។ ក្រោយពេលកើតហេតុ អ្នកបើកបររថយន្តបានគេចខ្លួនបាត់ បន្សល់ទុកតែការភ្ញាក់ផ្អើលនៅកន្លែងកើតហេតុ ។ សាកសពជនរងគ្រោះត្រូវបានសមត្ថកិច្ចប៉ូលិសចរាចរផ្លូវគោកប្រគល់ឱ្យក្រុមគ្រួសារយកទៅធ្វើបុណ្យតាមទំនៀមទំលាប់ប្រពៃណី ឯរថយន្តនិងម៉ូតូត្រូវបានយកទៅរក្សាទុកបណ្តោះអាសន្ននៅស្នងការដ្ឋាននគរបាលខេត្ត ដើម្បីរង់ចាំការដោះស្រាយតាមផ្លូវច្បាប់ ។ ក្នុងហេតុការណ៍នេះដែរ អ្នកដំណើរដែលជិះក្នុងរថយន្តឈ្នួលនោះមិនមាននរណាម្នាក់រងរបួសនោះទេ ។ តាមប្រភពព័ត៌មានបានឱ្យដឹងថា ទាំងអនាគតកូនកម្លោះ និងកូនក្រមុំនេះគឺទើបតែវិលត្រឡប់មកពីសុំច្បាប់រៀបអាពាហ៍ពិពាហ៍ពីសាលាឃុំ ៕  |
| រំលែកទុក្ខចំពោះមិត្ដជប៉ុន ស្ថានទូតជប៉ុនអនុញ្ញាតដល់សាធារណជនកម្ពុជាចូលសំដែងសមានចិត្ត Posted: 17 Mar 2011 07:20 PM PDT     រាជធានីភ្នំពេញ ៖ ស្ថានទូតជប៉ុនប្រចាំព្រះរាជាណាចក្រកម្ពុជា បានចេញសេចក្តីប្រកាសព័ត៌មានមួយនៅថ្ងៃទី១៦ មីនា កន្លងទៅនេះ ទាក់ទិននឹងគ្រោះមហន្តរាយដោយការរញ្ជួយ និងរលកយក្សស៊ូណាមីដែលបានបណ្តាលឱ្យមានការខូចខាតដ៏ធ្ងន់ធ្ងរមកលើប្រទេសជប៉ុន កាលពីថ្ងៃទី១១ មីនា កន្លងមកនេះ ។ ក្នុងមនោសញ្ចេតនានៃប្រជាពលរដ្ឋកម្ពុជាទាំងអស់ គឺមានការរន្ធត់ក្នុងចិត្តជាពន់ពេកចំពោះការរងគ្រោះដ៏ធំធេងនៅប្រទេសជប៉ុនដែលជាកល្យាណមិត្តដ៏ល្អគ្មាន២របស់កម្ពុជា ។ ទឹកភ្នែក និងការទួញសោករបស់ប្រជាជនជប៉ុន ក៏ជាទឹកភ្នែករបស់ប្រជាជនកម្ពុជាដែរ ។ យោងតាមសេចក្តីប្រកាសព័ត៌មានបានសរសេរថា ស្ថានទូតជប៉ុនបានអនុញ្ញាតឱ្យសាធារណជនចូលរួមសរសេរក្នុងសៀវភៅរំលែកទុក្ខនៅស្ថានទូតជប៉ុន ដែលមានអាសយដ្ឋានលេខ១៩៤ មហាវិថីព្រះនរោត្តម តាមពេលវេលាគឺពីថ្ងៃទី១៦ ដល់ទី១៨ មីនា និងថ្ងៃទី២១ ដល់២៣ មីនា ចាប់ពីម៉ោង១០ដល់ម៉ោង១២ និងពីម៉ោង១៤ដល់ម៉ោង១៦ ។ សេចក្តីប្រកាសព័ត៌មានបន្តថា ស្ថានទូតជប៉ុនសូមថ្លែងអំណរគុណយ៉ាងជ្រាលជ្រៅចំពោះប្រជាជនកម្ពុជាដែលបានចូលរួមមរណៈទុក្ខ និងសន្តានចិត្តក្នុងការផ្តល់នូវការបរិច្ចាគជាថវិកា និងផ្កាសម្រាប់ជនរងគ្រោះដោយសារគ្រោះមហន្តរាយនេះ ។ ចំនួននៃការខូចខាត ការស្លាប់ និងការរងទុក្ខ គឺមិនអាចកាត់ថ្លៃបាន ។ ប៉ុន្តែទោះបីជាយ៉ាងណាក៏ដោយ ទឹកចិត្តដ៏កក់ក្តៅ និងសប្បុរសធម៌របស់ប្រជាជនកម្ពុជាក៏ដូចជាប្រជាជាតិផ្សេងទៀតជាច្រើន ជាកម្លាំងជំរុញទឹកចិត្តប្រជាជនជប៉ុនឱ្យកសាងឡើងវិញ នូវតំបន់ដែលទទួលរងនូវការបំផ្លិចបំផ្លាញ ។ ជារួម សមានចិត្តប្រជាជនកម្ពុជា គឺជាការបួងសួងសូមឱ្យវត្ថុស័ក្តិសិទ្ធិក្នុងលោកទាំងមូល ជួយដល់ប្រជាជាតិជប៉ុនឱ្យឆ្លងផុតគ្រោះអាក្រក់នេះឱ្យបានឆាប់ ហើយសង្ឃឹមថា ការនាំគ្នាជូតទឹកភ្នែកចំពោះប្រជាជាតិជប៉ុន គឺជាការបង្ហាញពីទឹកចិត្តដ៏បរិសុទ្ធមួយក្នុងនាមជាកល្យាណមិត្តដ៏ល្អបំផុតនេះ ។
កងទ័ពជប៉ុនកាលពីព្រឹកថ្ងៃទី១៧ មីនា បានប្រើឧទ្ធម្ភាគចក្រទម្លាក់ទឹកបញ្ចុះកំដៅចង្ក្រានរេអាក់ទ័រ ដើម្បីបញ្ចៀសគ្រោះមហន្តរាយនុយក្លេអ៊ែរនៅរោងចក្រថាមពលនុយក្លេអ៊ែរហ្វូគូស៊ីម៉ា ដែលមានការផ្ទុះឆេះដោយសារការរញ្ជួយដីដ៏ខ្លាំងកម្រិត៩រីស្ទ័រ បង្កឱ្យកើតមានរលកយក្សស៊ូណាមី ដែលវាយប្រហារភាគឦសានប្រទេសជប៉ុន កាលពីថ្ងៃទី១១ មីនា កន្លងមក ។ មន្ត្រីរដ្ឋាភិបាលជប៉ុន និងម្ចាស់រោងចក្រនុយក្លេអ៊ែរនោះនិយាយថា ការបញ្ចុះកំដៅម៉ាស៊ីនរេអាក់ទ័រទី៣ និងទី៤ ជាអាទិភាពចំបងមួយ ។ ជាមួយគ្នានេះ រដ្ឋមន្ត្រីការពារប្រទេសជប៉ុន លោក Toshimi Kitazawa និងលោកនាយករដ្ឋមន្ត្រីណាអូតូ កាន ថ្លែងថា បានសម្រេចចិត្តរួចហើយក្នុងការដោះស្រាយវិបត្តិ បើទោះបីជាមានការព្រួយបារម្ភអំពីកម្មករអាចរងប៉ះពាល់ដោយវិទ្យុសកម្មក៏ដោយ ។ លោក Kitazawa ថ្លែងប្រាប់អ្នកកាសែតថា យើងមិនអាចពន្យារពេលបេសកកម្មរបស់យើងបានទេ ។ កងទ័ពជប៉ុនបានប្រើឧទ្ធម្ភាគចក្រជាច្រើនគ្រឿងទម្លាក់ទឹកលើចង្ក្រានរេអាក់ទ័រ ដើម្បីបញ្ចុះកំដៅនៅម៉ាស៊ីនរេអាក់ទ័រទី៣ ដោយហោះហើរឆ្លងកាត់៤លើក រយៈពេលជិត២០នាទី រួចទម្លាក់ទឹកសមុទ្រ៧,៥តោន ក្នុងការហោះហើរឆ្លងកាត់មួយលើក ។ លោក Kitazawa ថ្លែងថា រថយន្តកាំមីញ៉ុងដែលបំពាក់ដោយកាណុងបាញ់ទឹកពិសេស១១គ្រឿង នឹងត្រូវបញ្ជូនទៅកាន់រោងចក្រនុយក្លេអ៊ែរនោះ ដើម្បីបាញ់ទឹកដាក់ចង្ក្រានរេអាក់ទ័រទី៣ ។ ដោយឡែកកាលពីថ្ងៃទី១៧ មីនា ផងដែរ វិស្វករមួយក្រុមមានផែនការស្តារថាមពលនៅរោងចក្រនុយក្លេអ៊ែរហ្វូគូស៊ីម៉ាឡើងវិញ ដោយប្រើបណ្តាញថាមពលពីខាងក្រៅ ។
ប្រឈមមុខនឹងការគ្មានលទ្ធភាពបញ្ឈប់គ្រោះមហន្តរាយដែលកំពុងកើតមាននៅឯមជ្ឈមណ្ឌលនុយក្លេអ៊ែរភាគខាងជើងជប៉ុន មនុស្សប្រមាណជា១៤០.០០០នាក់ ត្រូវបង្ខំចិត្តរស់នៅជាប់តែក្នុងផ្ទះ ។ ម្យ៉ាងទៀតវាជាប្រវត្តិសាស្ត្រដែលព្រះចៅអធិរាជជប៉ុន អាគីហ៊ីតូ ទ្រង់ថ្លែងទៅកាន់ប្រជាជនជប៉ុនដែលនោះបញ្ជាក់ពីទំហំធំធេងនៃគ្រោះមហន្តរាយលើកនេះ ព្រោះព្រះអង្គកម្រធ្វើអន្តរាគមន៍បែបនេះណាស់ ។ យោងតាមទីភ្នាក់ងារសន្តិសុខនុយក្លេអ៊ែរជប៉ុនថា កម្រិតវិទ្យុសកម្មបានថយចុះបន្តិចម្តងៗ នៅឯមជ្ឈមណ្ឌលនុយក្លេអ៊ែរហ្វូគូស៊ីម៉ា ដាយអ៊ីជី។ កម្រិតវិទ្យុសកម្មបានធ្លាក់ចុះពី 752 MICROSTEVETRS ក្នុងមួយម៉ោងកាលពីថ្ងៃទី១៦ មីនា មកនៅត្រឹម 338 MICROSIE-VERTS នាព្រឹកថ្ងៃទី១៧ មីនា ។ នេះជាកម្រិតមួយខ្ពស់ជាងធម្មតា ក៏ប៉ុន្តែពុំមានគ្រោះថ្នាក់ឡើយ ។ វិបត្តិនុយក្លេអ៊ែរគំរាមកំហែងដល់ការបាត់បង់ការត្រួតត្រានៅជប៉ុន ។ ភ្លើងឆេះថ្មីកើតមាននៅរេអាក់ទ័រទី៤នៃមជ្ឈមណ្ឌលហ្វូគូស៊ីម៉ា ដាយអ៊ីជី ដែលរងការបំផ្លាញកាលពី៥ថ្ងៃមុន ដោយការរញ្ជួយដី និងស៊ូណាមី ។ បុគ្គលិកមជ្ឈមណ្ឌលនេះត្រូវជម្លៀសចេញពីទីតាំងរយៈពេល១ម៉ោងនាព្រឹកថ្ងៃទី១៦ មីនា មកពីកម្រិតវិទ្យុសកកម្មឡើងខ្ពស់ ។ វិទ្យុសកម្មនេះមានខ្ពស់បំផុតរហូតដល់ឧទ្ធម្ភាគចក្ររបស់កងទ័ពពុំអាចហោះពីលើ ដើម្បីស្រោចទឹកលើរេអាក់ទ័រទី៣ ដែលជាការព្រួយបារម្ភរបស់អាជ្ញាធរ ។ ប៉ូលិសចង់ប្រើប្រាស់កាណុងបាញ់ទឹក ដើម្បីធ្វើឱ្យទីតាំងត្រជាក់ ។ នាយប់ថ្ងៃទី១៦ មីនា សភាពការណ៍នៅតែគ្រោះថ្នាក់ ទឹកក្នុងអាងស្តុករបស់រេអាក់ទ័រទី៤ត្រូវហួតអស់ ហើយញ៉ាំងឱ្យវិទ្យុសកម្មកាន់តែឡើងខ្ពស់ ។ និយោជិត១៨០នាក់ នៅធ្វើការក្នុងទីតាំងមានគ្រោះមហន្តរាយនៅឡើយ ។ ក្នុងតំបន់ក្បែរទីតាំងនេះ ប្រជាជនប្រមាណជា១៤០.០០០នាក់ ត្រូវស្នើឱ្យស្ថិតនៅតែក្នុងផ្ទះកុំចេញក្រៅ ។ ជាព័ត៌មានល្អមួយ ព្រោះរហូតមកទល់ពេលនេះ ខ្យល់នៅពីលើមជ្ឈមណ្ឌលហ្វូគូស៊ីម៉ា បានរុញធូលីវិទ្យុសកម្មឆ្ពោះទៅកាន់មហាសមុទ្រប៉ាស៊ីហ្វិក ហើយកម្រិតវិទ្យុសកម្មនៅក្រុងតូក្យូបានធ្លាក់មកនៅស្ទើរតែដល់កម្រិតធម្មតាវិញ ។
ទីក្រុងអ៊ីស៊ីណូម៉ាគី មានប្រជាជន១៦.០០០នាក់ស្ថិតនៅក្បែរឆ្នេរសមុទ្ររងការបំផ្លាញខ្ទេចដោយរលកយក្សស៊ូណាមី។ ទីក្រុងនោះជាទីក្រុងទី២ ដែលរាយការណ៍ពីមនុស្សបាត់ខ្លួន១០.០០០នាក់។ បន្ទាប់ពីទីក្រុងមីណាមី សាន់រីគូ ទីក្រុងអ៊ីស៊ីណូម៉ាគី ជាទីក្រុងទី២ស្ថិតនៅជាប់ឆ្នេរសមុទ្រជំរឿនឃើញអ្នកបាត់ខ្លួន១០.០០០នាក់ក្នុងចំណោមប្រជាជន១៦.០០០នាក់របស់ក្រុងនេះមុនពេលមានគ្រោះមហន្តរាយ។ ទីក្រុងមីណាមី សាន់រីគូ និងទីក្រុងអ៊ីស៊ីណូម៉ាគី ស្ថិតក្នុងតំបន់មីយ៉ាហ្ស៊ី ជាខេត្តមួយនៅភាគខាងកើតប្រទេសដែលមានមនុស្សស្លាប់ច្រើនបំផុត។ យោងតាមតុល្យការចុងក្រោយរបស់ប៉ូលិសជប៉ុនថា ការរញ្ជួយដី និងស៊ូណាមីបណ្តាលឱ្យចំនួនមនុស្សស្លាប់ដែលជំរឿនឃើញឡើងដល់៥.១៧៨នាក់ ហើយមនុស្ស២.២៨២នាក់រងរបួស។ អាជ្ញាធរគិតថា ចំនួនអ្នកស្លាប់នឹងមានលើសពី១០.០០០នាក់បើគិតពីចំនួនអ្នកបាត់ខ្លួន។ នៅទីក្រុងតូក្យូដោយសារខ្លាចវិទ្យុសកម្មហាងទំនិញ បារឬភោជនីយដ្ឋានទាំងឡាយដែលតាមធម្មតាមានមនុស្សច្រើនកុះករបែរជាស្ងាត់ជ្រងំ។ សាលារៀនជាច្រើនត្រូវបិទទ្វាររួចបណ្តាសហគ្រាសទុកឱ្យបណ្តានិយោជិតរបស់ខ្លួនស្ថិតនៅផ្ទះ។ ការគំរាមកំហែងដោយគ្រោះមហន្តរាយនុយក្លេអ៊ែរដែលប្រភពស្ថិតនៅចំងាយ២៥០គីឡូម៉ែត្រពីក្រុងតូក្យូធ្វើឱ្យសង្កាត់មួយចំនួននៃរដ្ឋធានីជប៉ុនដែលមានប្រជាជនជាង៣០លាននាក់ប្រែក្លាយទៅជាតំបន់ស្ងាត់។ អ្នកក្រុងតូក្យូមួយចំនួនបាននាំគ្នាចាកចេញពីរាជធានី។ គេសង្កេតឃើញមនុស្សបន្តកន្ទុយគ្នានៅព្រលានយន្តហោះចាំទិញសំបុត្រយន្តហោះ។ មនុស្សដទៃៗទៀតទិញរបស់របរស្តុកទុកក្នុងផ្ទះ ហើយសំងំមិនចេញទៅណា។ លោកកាហ្ស៊ុយស៊ី អារីសាវ៉ា អ្នករត់តាក់ស៊ីម្នាក់ដែលនៅរង់ចាំម៉ូយចាប់តាំងពីជាងមួយម៉ោងមកហើយក្បែរអគារខ្ពស់មួយនិយាយថា ចូរមើលចុះពុំមានរថយន្តរត់ចុះឡើងច្រើនដូចកាលពីមុនឡើយ។ ប្រទេសបារាំងបានសំរេចចិត្តធ្វើមាតុភូមិនិវត្តន៍និស្សិត និងសាស្រាចារ្យ ព្រមទាំងអ្នកស្រាវជ្រាវទាំងអស់របស់ខ្លួនដែលមានវត្តមាននៅប្រទេសជប៉ុនដែលមានសរុបប្រមាណជា៦០០នាក់។ សហគ្រាសអាមេរិកផលិតថ្នាំអ៊ីយ៉ូឌៀរដឺប៉ូតាស៊ីយ៉ូមគឺសហគ្រាស ANBEX កំពុងតែអស់ថ្នាំនេះពីឃ្លាំងស្តុកមកពីសេចក្តីត្រូវការខ្ពស់បណ្តាលមកពីគ្រោះថ្នាក់នុយក្លេអ៊ែរនៅជប៉ុន។ ការទិញថ្នាំនេះខ្លាំងបំផុត ពិសេសនៅតំបន់ឆ្នេរសមុទ្រភាគខាងលិចសហរដ្ឋអាមេរិក ហើយក៏មានសេចក្តីត្រូវការខ្ពស់ពីជប៉ុន កូរ៉េ និងជាទូទៅនៅអាស៊ី ។
តាមទីភ្នាក់ងារព័ត៌មានបរទេសកាលពីថ្ងៃទី១៧ មីនា បានចុះផ្សាយដោយយោងលើប្រព័ន្ធផ្សព្វផ្សាយ NHK របស់ជប៉ុនថា ចំនួនអ្នកស្លាប់បាត់បង់ជីវិតជាចុងក្រោយពីហេតុការណ៍រញ្ជួយដី និងស៊ូណាមីដ៏ខ្លាំងក្លានៅភាគឦសានប្រទេសជប៉ុន បានកើនឡើងដល់៥.១៧៨នាក់ និងយ៉ាងតិច៩.០០០នាក់បាត់ខ្លួន រួមទាំងរងរបួស២.២៨៥នាក់ ។ ដោយឡែក នៅខេត្តមីយ៉ាងី តែមួយមានអ្នកស្លាប់ចំនួន២.២៤៤នាក់ និង២.៣៦២នាក់បាត់ខ្លួន ។ ចំណែកនៅខេត្តអ៊ីវ៉ាតេ មានអ្នកស្លាប់ចំនួន១.៥៤៥នាក់ និង៣.៨១៤នាក់ បាត់ខ្លួន ។ នៅខេត្តហ្វូគូឈីម៉ា មានអ្នកស្លាប់ចំនួន៥៣៣នាក់ និងបាត់ខ្លួន២.៩១៩នាក់ នៅក្រុងតូក្យូ មានអ្នកស្លាប់ចំនួន៧នាក់ និងខេត្តអ៊ីបារ៉ា គឺមាន១៩នាក់។ ក្រៅពីអ្នកស្លាប់បាត់បង់ជីវិត នៅមានប្រជាជនជាង៣៤៤.០០០នាក់ទៀតត្រូវភៀសខ្លួនទៅកាន់កន្លែងស្នាក់នៅបណ្តោះអាសន្នដែលមានប្រហែល២.៤០០កន្លែង ។ ចំណែកប្រជាជនរស់នៅក្បែររោងចក្រអគ្គិសនីនុយក្លេអ៊ែរ ហ្វូគូឈីម៉ា ដាយអ៊ីជី ដែលខូចខាតដោយសាររញ្ជួយដី បានជម្លៀសទៅកាន់ខេត្តនីអ៊ីង៉ាតា និងខេត្តយ៉ាម៉ាង៉ាតា ដែលនៅក្បែរគ្នាដើម្បីគេចពីគ្រោះថ្នាក់ ។ ស្របពេលជាមួយគ្នានេះ រដ្ឋាភិបាលជប៉ុន បានចាប់ផ្តើមបាញ់ទឹកពីឧទ្ធម្ភាគចក្រ និងរថយន្តទៅលើចង្ក្រានរ៉េអាក់ទ័រលេខ៣ និងលេខ៤ ដើម្បីកាត់បន្ថយសីតុណ្ហភាព ។ ទោះជាយ៉ាងណារថភ្លើងដែលចេញទៅចំណតយន្តហោះណារីតា បើកសេវាកម្មជាប្រក្រតី ក្នុងអំឡុងពេលពីថ្ងៃទី១៧-២១ មីនា ។
IATA បានបញ្ជាក់នៅក្នុងរបាយការណ៍ប្រចាំខែថា «ភាពជ្រួលច្របល់នៅប្រទេសជប៉ុន លីប៊ី និងប្រទេសនៅទ្វីបអាហ្វ្រិកខាងជើង នឹងធ្វើឱ្យការធ្វើដំណើរក្នុងភូមិភាគនេះធ្លាក់ចុះក្នុងរវាងខែកុម្ភៈ និងខែមីនា» ។ សមាគមដឹកជញ្ជូនតាមផ្លូវអាកាសអន្តរជាតិ បានក្រើនរំលឹកថា ខណៈពេលទីផ្សារហោះហើរនៅជប៉ុន ប្រហែល៦-៧% នៃការធ្វើដំណើរដោយសំបុត្រយន្តហោះមានតម្លៃខ្ពស់ ព្រោះមានការរញ្ជួយដី និងស៊ូណាមី កាលពីពេលថ្មីៗកន្លងមក អាចបង្កឱ្យមានផលប៉ះពាល់ដ៏ធ្ងន់ធ្ងរដល់អ្នកធ្វើដំណើរ ៕  |
| You are subscribed to email updates from Koh Santepheap Daily To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
