VOA News: ព័ត៌មាន: “ច្រករបៀងសេដ្ឋកិច្ចផ្តល់ផលប្រយោជន៍និងក្តីកង្វល់” plus 3 more |
- ច្រករបៀងសេដ្ឋកិច្ចផ្តល់ផលប្រយោជន៍និងក្តីកង្វល់
- ក្រុមអ្នកតាមដានទទូចឲ្យប្រើប្រាស់សម្បទាននយោបាយដោះស្រាយរឿងបណ្តេញលោក សម រង្ស៉ីពីសភា
- សហរដ្ឋអាមេរិកនៅបន្តហាមការសុំកូនចិញ្ចឹមពីកម្ពុជា
- អ្នកវិភាគថាការជំទាស់របស់វៀតណាមអាចប៉ះពាល់ផែនការទំនប់វារីអគ្គិសនីរបស់ឡាវ
| ច្រករបៀងសេដ្ឋកិច្ចផ្តល់ផលប្រយោជន៍និងក្តីកង្វល់ Posted: 18 Mar 2011 02:00 PM PDT ប្រទេសកម្ពុជាកំពុងបង្កើតច្រករបៀងសេដ្ឋកិច្ចមួយទៅតាមគំនិតផ្តួចផ្តើមរបស់បណ្តាប្រទេសក្នុងមហាអនុតំបន់ទន្លេមេគង្គប្រយោជន៍គឺដើម្បីជំរុញសេដ្ឋកិច្ចរបស់ខ្លួនឲ្យបានប្រសើរឡើង។ ប៉ុន្តែ ការធ្វើពាណិជ្ជកម្មនិងការវិនិយោគឆ្លងកាត់ព្រំដែននេះបាននាំមកនូវទាំងការអភិវឌ្ឍផងទាំងការព្រួយបារម្ភផងសម្រាប់ប្រជាសហគមន៍ជនបទនៃប្រទេសនេះ។ ប្រទេសកម្ពុជាកំពុងព្យាយាមស្ថាបនាហេដ្ឋារចនាសម្ព័ន្ធរបស់ខ្លួនបន្ថែមទៀតជាពិសេសគឺបណ្តាញផ្លូវថ្នល់នៅតាមជនបទ ដើម្បីភ្ជាប់ខ្លួនទៅនឹងបណ្តាប្រទេសនៅក្នុងមហាអនុតំបន់ទន្លេមេគង្គរួមមានថៃ ឡាវ និងវៀតណាមជាដើម។ ការភ្ជាប់ខ្លួនទៅក្នុងតំបន់នេះគឺដើម្បីបង្កើតច្រករបៀងសេដ្ឋកិច្ចដ៏ធំមួយប្រយោជន៍គឺទាញយកផលចំណេញពីវិស័យទេសចរណ៍ ពាណិជ្ជកម្មនិងការវិនិយោគឆ្លងកាត់ព្រំដែននៅក្នុងមហាអនុតំបន់ទន្លេមេគង្គនេះ។ តួយ៉ាង ប្រជាពលរដ្ឋមួយចំនួនដែលរស់នៅក្នុងស្រុកប្រាសាទសំបូរក្នុងខេត្តកំពង់ធំនេះ កំពុងទទួលបានផលចំណេញនេះជាបណ្តើរៗហើយ បន្ទាប់ពីផ្លូវមួយខ្សែចូលមកកាន់តំបន់រម្មណីយ៍ដ្ឋានទេសចរណ៍នេះ ត្រូវបានកែលម្អឡើងវិញនៅពេលថ្មីៗនេះ។ អ្នកស្រី គង់ សុភី គឺជាម្ចាស់ភោជនីយដ្ឋានមួយនៅក្នុងតំបន់ប្រាសាទសំបូរព្រៃគុហ៍នេះ។ «កាលពីផ្លូវលំបាក ភ្ញៀវអត់សូវមក ដល់ឥឡូវផ្លូវគេធ្វើស្រួលអញ្ចេះទៅ ភ្ញៀវគេមកច្រើន មកច្រើនទៅ ខ្ញុំលក់ដូរក៏ដាច់ដែរ»។ ផលប្រយោជន៍នៃការកសាងឬស្តារហេដ្ឋារចនាសម្ព័ន្ធផ្លូវថ្នល់ជនបទនេះ ក៏ត្រូវបានបន្ទរផងដែរដោយលោក តែម ប៊ុនតេង ជាអ្នកនាំភ្ញៀវនៅក្នុងតំបន់ទេសចរណ៍នេះ។ «ប្រជាជននៅទីនេះ គំនិតនីមួយៗគឺនៅសហគមន៍ខ្ញុំផ្ទាល់ គាត់ចង់ឲ្យផ្លូវហ្នឹងល្អ ពីព្រោះបើផ្លូវហ្នឹងគ្រលុក វាធ្វើឲ្យភ្ញៀវជួនកាលគាត់ចង់មកអត់បានមក ហើយទី២ អ្នកដែលមកទីនេះ ជិះឡានមក វាកោសឡានគាត់ឬក្រុមហ៊ុនឡានធំៗ កោសឡានគាត់ក្រពិតអស់អីទៅ គាត់ត្រូវការបកត្រឡប់ទៅវិញ ម្ល៉ោះហើយបើផ្លូវកាន់តែល្អ ភ្ញៀវមកកាន់តែច្រើន សហគមន៍របស់ខ្ញុំក៏ទទួលផលបានច្រើន»។ អ្នកស្រី អ៊ីនហ្គ្រីដ អូវស្តេហ្គិន(Ingrid Overstegen) គឺជាអ្នកទេសចរណ៍មកពីប្រទេសហុល្លង់ មានប្រសាសន៍ថា៖ «វាមានសារៈសំខាន់ណាស់ ដោយសារទីនេះគឺជាកន្លែងទេសចរណ៍ដ៏គួរឲ្យទាក់ទាញបំផុតមួយនៅក្នុងប្រទេសកម្ពុជា។ អ្នកទេសចរណ៍ចង់មកមើលទីនេះ ហើយពួកគេនាំយកលុយចូលមកប្រទេសរបស់អ្នក ។ អញ្ចឹង វាជាការប្រសើរណាស់សម្រាប់សេដ្ឋកិច្ចប្រទេសរបស់អ្នក»។ ក្រុមអ្នកសេដ្ឋកិច្ចលើកឡើងថា ការភ្ជាប់បណ្តាញផ្លូវជនបទទៅទីក្រុងនិងឆ្លងកាត់ព្រំដែននេះ នឹងសម្រួលដល់ការចេញចូលរបស់ប្រជាជននៅក្នុងមហាអនុតំបន់ទន្លេមេគង្គនេះ។ ជាលទ្ធផល ចលនានេះនឹងជួយជំរុញដល់កំណើនសេដ្ឋកិច្ឋរបស់ប្រទេសនៅក្នុងតំបន់នេះទាំងមួល។ លោក អាជុន ហ្គោសស្វាមី(Arjun Goswami) នាយកផ្នែកសហការនិងប្រតិបត្តិការនៃធនាគារអភិវឌ្ឍន៍អាស៊ី មានប្រសាសន៍នៅក្នុងបទសម្ភាសន៍ផ្តាច់មុខមួយជាមួយVOA ផ្នែកខេមរភាសានៅឯសន្និសីទមហាអនុតំបន់ទន្លេមេគង្គសម្រាប់ការអភិវឌ្ឍច្រករបៀងសេដ្ឋកិច្ចភាគខាងត្បូងដែលធ្វើក្នុងទីក្រុងភ្នំពេញ កាលពីសប្តាហ៍មុន។ «មានសក្តានុពលយ៉ាងធំធេងខាងវិស័យទេសចរណ៍និងកសិកម្ម។ ឥឡូវវិស័យទាំងពីរនេះទាក់ទងនឹងបម្លាស់ទីរបស់ប្រជាជនឬបម្លាស់ទីនៃទំនិញនិងផលិតផលកសិកម្មឆ្លងកាត់ព្រំដែនពីប្រទេសមួយទៅប្រទេសមួយគឺអាស្រ័យទៅលើការគ្រប់គ្រងធនធានធម្មជាតិឲ្យបានល្អប្រសើរ»។ ប៉ុន្តែ ទន្ទឹមនឹងផលវិជ្ជមានទាំងនេះ ពាណិជ្ជកម្មនិងការវិនិយោគឆ្លងកាត់ព្រំដែនក្នុងច្រករបៀងសេដ្ឋកិច្ចរបស់មហាអនុតំបន់ទន្លេមេគង្គនេះ ក៏នាំមកនូវទុក្ខកង្វល់សម្រាប់ប្រជាសហគមន៍មូលដ្ឋានមួយចំនួនផងដែរ ជាពិសេសទាក់ទងទៅនឹងបញ្ហារំលោភយកដីធ្លីនិងការផ្តល់សម្បទានសេដ្ឋកិច្ចដល់ក្រុមហ៊ុនឯកជនដើម្បីអភិវឌ្ឍដំណាំកសិឧស្សាហកម្មជាដើម។ ជាក់ស្តែង ប្រជាពលរដ្ឋប្រមាណ៥០០នាក់មកពីខេត្តចំនួន៤ដែលព័ទ្ធជុំវិញតំបន់ព្រៃឡង់រួមមានខេត្តព្រះវិហារ ស្ទឹងត្រែង ក្រចេះ និងខេត្តកំពង់ធំនេះ បានប្រមូលផ្តុំគ្នានៅក្នុងវេទិការសាធារណៈមួយក្នុងស្រុកសណ្តាន់កាលពីថ្ងៃសុក្រសប្តាហ៍មុន ដើម្បីសម្តែងក្តីព្រួយបារម្ភរបស់ពួកគេចំពោះការកាប់ព្រៃឈើដែលពួកគេពឹងអាស្រ័យសម្រាប់ជីវភាពរស់នៅប្រចាំថ្ងៃរបស់ពួកគេអស់រយៈពេលជាច្រើនជំនាន់មកហើយនោះ។ លោក រស់ សៀនវ័យ៧៧ឆ្នាំ គឺជាអ្នកភូមិម្នាក់នៅទីនេះ មានប្រសាសន៍ថា៖ «នៅសល់២០ក្រុងខេត្តទៀត ក៏ស្គាល់ច្បាស់ដែរថាដីនេះចុះក្នុងប្រវត្តិសាស្ត្រថានៅស្រុកខ្មែរគ្មានព្រៃឯណាទៀតទេ មានតែព្រៃឡង់ហ្នឹងហើយដែលសេសសល់បន្តិច តើអ្នកលោកចង់បំផ្លាញឲ្យអស់ឬអី ហើយឲ្យរាស្ត្រនៅឯណា? យកទៅឲ្យក្រុមហ៊ុនសុទ្ធតែរាប់លានហិកតា ប្រជារាស្ត្រជាម្ចាស់ និងកូនចៅរបស់ឯងអត់ៗចុះ ឲ្យបានគេពីក្រៅមកអភិវឌ្ឍ អភិវឌ្ឍយកទៅណាទៀត បើរាស្ត្រយំថ្ងូរដូចនៅបឹងកក់ អា៤.២០០គ្រួសារកំពុងហូរទឹកភ្នែកនេះ»។ យ៉ាងតិចមានក្រុមហ៊ុនវិនិយោគទុនវៀតណាមចំនួន២ដែលទទួលបានសម្បទានព្រៃឡង់នេះពីរដ្ឋាភិបាលកម្ពុជា ក្នុងគោលបំណងយកដីដាំដំណាំកៅស៊ូ។ លោក Arjun Goswami នៃធនាគារអភិវធ្ឍន៍អាស៊ីមានប្រសាសន៍ថា៖ «ជាការណ៍ពិតណាស់ប្រទេសដែលមានធនធានធម្មជាតិតែងតែចង់ប្រើប្រាស់ធនធានទាំងនោះដើម្បីកំណើនសេដ្ឋកិច្ចរបស់ខ្លួន ហើយប្រទេសដទៃទៀតក៏ចង់ទទួលបានសិទ្ធិប្រើប្រាស់ធនធានទាំងនោះដែរ។ បញ្ហាគឺមិនមែនជាការព្យាយាមបញ្ឈប់ប្រទេសទាំងនោះទេ តែជាការធ្វើយ៉ាងណាឲ្យប្រាកដថាហានិភ័យទាំងឡាយត្រូវបានកាត់បន្ថយឲ្យបានល្អបំផុត»។ ជាការណ៍ពិតណាស់ ប្រសិនបើការព្រួយបារម្ភរបស់ប្រជាជនត្រូវបានដោះស្រាយប្រកបដោយប្រសិទ្ធភាព នោះច្រករបៀងសេដ្ឋកិច្ចក្នុងមហាអនុតំបន់ទន្លេមេគង្គនឹងក្លាយជាពរជ័យសម្រាប់ប្រជាពលរដ្ឋទាំងនេះ។ តែផ្ទុយទៅវិញ ប្រសិនបើកង្វល់របស់ពួកគេត្រូវគេធ្វើមិនដឹងមិនឮនោះការភ្ជាប់បណ្តាញផ្លូវដើម្បីជំរុញវិនិយោគឆ្លងព្រំដែននេះ នឹងប្រែក្លាយទៅជាបណ្តាសាសម្រាប់សហគមន៍មូលដ្ឋានជាក់ជាពុំខាន៕ This posting includes an audio/video/photo media file: Download Now |
| ក្រុមអ្នកតាមដានទទូចឲ្យប្រើប្រាស់សម្បទាននយោបាយដោះស្រាយរឿងបណ្តេញលោក សម រង្ស៉ីពីសភា Posted: 18 Mar 2011 01:43 PM PDT ភ្លាមៗបន្ទាប់ពីលោក សម រង្ស៉ី ត្រូវបានសភាបញ្ចប់បុព្វសិទ្ធិរបស់លោកជា អ្នកតំណាងរាស្ត្រទាក់ទិននឹងរឿងដកតម្រុយបង្គោលព្រំដែន មន្ត្រីគណបក្សនយោបាយ និងអ្នកវិភាគបានអះអាងថា ការបំពេញចិត្តនយោបាយគណបក្សកាន់អំណាច ការសុំទោស និងសម្បទាននយោបាយ គឺជាដំណោះស្រាយនយោបាយចុងក្រោយមួយសម្រាប់មេដឹកនាំគណបក្សជំទាស់ លោកសម រង្សីក្នុងការទទួលបានមកវិញនូវបុព្វសិទ្ធតំណាងរាស្រ្ត ហើយនឹងការវិលត្រឡប់ចូលមក ប្រឡូកនយោបាយក្នុងប្រទេសកម្ពុជាវិញ។ ក៏ប៉ុន្តែគេពុំបានបញ្ជាក់ចំៗថា សម្បទាននយោបាយ ឬការបំពេញចិត្តគណបក្សកាន់អំណាច ឬការសុំទោសនោះធ្វើដោយរបៀបណាទេ ក្នុងករណីលោក សម រង្ស៉ី។ លោក កឹម សុខាប្រធានគណបក្សសិទ្ធិមនុស្សដែលជាគណបក្សជំទាស់បានអះអាងថា៖ «ឱកាសកន្លងមកគឺទាល់តែទៅសុំទោសគេ ឬក៏ទៅធ្វើបំពេញបំណងអីឲ្យផល ប្រយោជន៍ទៅគណបក្សកាន់អំណាច អាហ្នឹងបានអាចមកបាន បើតាមយើងឃើញកន្លងមកនេះ ការសម្របសម្រួលនយោបាយ»។ លោក កឹម សុខាថ្លែងដូច្នេះដោយយោងថាព្រះអង្គម្ចាស់នរោត្តម រណឫទ្ធិ អតីតនាយករដ្ឋមន្ត្រីទី១ និងលោក សម រង្ស៉ីផ្ទាល់ ដែលត្រូវជាប់ចោទក្រោយតុលាការកាត់ទោសរួចហើយត្រូវបានលើកលែងទោសដោយ ព្រះមហាក្សត្រក្រោយពីមានការបំភ្លឺជាលិខិតឬសុំទោសដល់លោកនាយករដ្ឋមន្ត្រីហ៊ុន សែន។ ទោះបីជាលោក កឹម សុខា មិនបានបញ្ជាក់ពីបញ្ហាអ្វីដែលនាំទៅដល់ការលើកលែងទោសសម្រាប់អ្នកនយោបាយទាំងពីរមែនតែគេនៅចាំបានថាសម្បទានរឿងបែងចែកអំណាចក្រោយការបោះឆ្នោត និង ការកែប្រែច្បាប់រដ្ឋធម្មនុញ្ញមួយចំនួនដែលមានប្រយោជន៍ដល់គណបក្សគ្រប់គ្រងប្រទេស ជាការសម្របសម្រួលនយោបាយ ហើយបាននាំឲ្យឥស្សរជននយោបាយបានរួចខ្លួនដែរ។ មេដឹកនាំគណបក្សជំទាស់ដ៏ធំជាងគេក្នុងប្រទេសកម្ពុជាគឺលោក សម រង្ស៊ីកំពុង និរទេសខ្លួននៅក្រៅប្រទេសត្រូវសភាបញ្ចប់បុព្វសិទ្ធិសមាជិកសភាដែលប្រជាពលរដ្ឋបានបោះឆ្នោតជូនលោក ក្រោយដែលតុលាការកំពូលកាលពីដើមខែ មិនា បានកាត់ទោសលោកកំបាំងមុខឲ្យជាប់គុក ២ឆ្នាំបន្ថែមពីលើទោស ១០ ឆ្នាំ ដែលតុលាការក្រុងបានកាត់ទោសលោកទាក់ទងនឹងរឿងដកបង្គោលព្រំដែន និងផ្សព្វផ្សាយឯកសារក្លែងក្លាយ។ អ្នកវិភាគនៅក្នុងប្រទេសកម្ពុជាបង្ហាញពីក្តីបារម្ភអំពីការអនុវត្តប្រជាធិបតេយ្យ និងរបបសេរីនិយម ពហុបក្ស លាយឡំ ជាមួយនឹងការរំពឹងទុកថានឹងមានដំណោះស្រាយផ្នែកនយោបាយដើម្បីបញ្ចប់រឿងរ៉ាវក្តីក្តាំនេះ។ លោកស្រី ជា វណ្ណាតអ្នកវិភាគឯករាជ្យនិងជាអតីតនាយិកាមជ្ឈមណ្ឌលអភិវឌ្ឍសង្គម បានអះអាងដោយក្តីសង្ឃឹមថាដំណោះស្រាយនយោបាយ និងត្រូវកើតមាននៅ ក្នុងលក្ខខណ្ឌនៃវិធីយ៉ាងម៉េចដែលត្រូវដោះស្រាយ និងលក្ខខណ្ឌនៃ ពេលវេលាផងដែរ។ «ហើយខ្ញុំយល់ឃើញថា បញ្ហាមានមកដោះស្រាយមានហើយ គ្រាន់តែថាតើ រកដំណោះស្រាយឲ្យត្រូវទៅតាមចំណង់ចំណូលចិត្តគូភាគីទាំងសងខាងហ្នឹងរបៀបយ៉ាងណា ហើយនៅពេលណា?»។ លោកស្រីបានបន្ថែមជាមួយនឹងការលើកយកឧទាហរណ៍ មួយនៃដំណោះស្រាយផ្នែកនយោបាយនេះគឺពឹងផ្អែកលើសម្បទានផ្នែកនយោបាយទៅវិញទៅមករវាងគណបក្សជំទាស់និងគណបក្សកាន់អំណាច។ «ឧទាហរណ៍មានតែការធ្វើសម្បទានគ្នាទៅវិញទៅមកទៅ ដាក់លក្ខខណ្ឌទៅ លក្ខខណ្ឌអញ្ចេះៗ បើថាចង់រួបរួមគ្នាមកវិញ។ ហើយទទួលយក បានទេលក្ខខណ្ឌហ្នឹង តើទទួលយក បានទេលក្ខខណ្ឌហ្នឹង។ បើទទួលយកបាន ហ្នឹងក៏ជានានឹងគ្នាវិញទៅ ហើយបើទទួលយកមិនបានទេ ក៏បន្តបញ្ហារបៀបអញ្ចឹងតទៅមុខទៀតទៅ»។ លោក ញ៉ឹក ប៊ុនឆៃ អគ្គលេខាធិការគណបក្សហ្វ៊ុនស៊ីនប៉ិចបានយល់ស្របដែរ ថាដំណោះស្រាយនយោបាយជាជម្រើសសម្រាប់លោក សម រង្ស៊ីដូចករណីពីមុន ដែរ ក្រោយពីដំណើរការផ្លូវច្បាប់បានបញ្ចប់នោះ។ «ពីលើកមុនគាត់ធ្លាប់មានហើយតើ មានការសុំទោសស្អីៗអញ្ចឹងទៅ គាត់ធ្លាប់ មានបញ្ហានោះម្តងហើយ មានការសម្របសម្រួលទៅ គាត់អាចត្រឡប់មកធ្វើ ការងារបានវិញ»។ លោក សម រង្ស៉ីធ្លាប់បានបញ្ជាក់ថាលោកមិនសុំទោសទេ ព្រោះលោកគ្រាន់តែ បំពេញតួនាទីជាអ្នកតំណាងរាស្ត្រ។ តែលោកអះអាងថាលោកនឹងខិតខំរកដំណោះស្រាយផ្នែកនយោបាយទាំងថ្នាក់ជាតិនិងអន្តរជាតិព្រោះលោក សម រង្ស៊ី បានសង្កត់ធ្ងន់ថាអ្វីដែលលោកបានធ្វើទាក់ទងនឹងការដកបង្គោលព្រំដែនកាលពីឆ្នាំ ២០០៩នៅខេត្តស្វាយរៀងជាប់ព្រំដែនវៀត ណាមគឺ ក្រោយពេលប្រជាពលរដ្ឋខ្មែរដែលខ្លាចបាត់បង់កម្មសិទ្ធ មកប្តឹងរូបលោកជាអ្នកតំណាងរាស្ត្រ ពីការដែលឃើញតម្រុយបង្គោលពំ្រដែន បោះចូលដល់ដីស្រែរបស់ពួកគាត់។ «រឿងដែលខ្ញុំបានចូលរួមនេះគឺជារឿងជាតិ គឺជាទឹកដីរបស់ប្រជារាស្ត្រខ្មែរ គឺជា ទឹកដីរបស់ប្រទេសកម្ពុជា ខ្ញុំចេញមុខការពារផលប្រយោជន៍ជាតិដូច្នេះរឿងជាតិ គឺជារឿងនយោបាយ ដើម្បីរកដំណោះស្រាយនយោបាយទាល់តែមានការស្រុះ ស្រួលគ្នាមិនត្រឹមតែថ្នាក់ជាតិទេ ថ្នាក់អន្តរជាតិថែមទៀតពីព្រោះរឿងនេះគឺវាប៉ះពាល់ប្រទេសជិតខាង មានប្រទេសវៀត ណាម គាត់ បានបង្ខិតព្រំដែន ចូលមកប្រទេសកម្ពុជា ខ្ញុំបានចេញមុខប្រឆាំងយួនឈ្លានពាន»។ ប្រទេសវៀត ណាមធ្លាប់បដិសេធថាមិនបានបង្ខិតព្រំដែននិងឈ្លានពានទឹកដី កម្ពុជាទេដោយបានអះអាងថាគណៈកម្មាធិការព្រំដែននៃប្រទេសទាំងពីរកំពុងធ្វើកិច្ចការវាស់វែង។ មន្ត្រីវៀត ណាមធ្លាប់បានរិះគន់លោក សម រង្ស៉ីថានិយាយ មួលបង្កាច់។ លោក ជៀម យាបអ្នកតំណាងរាស្ត្រគណបក្សប្រជាជនកម្ពុជាជាគណបក្សគ្រប់ គ្រងប្រទេសបានអះអាងថា លោកមិនដឹងពីការណ៍ដែលត្រូវដោះស្រាយរឿង ករណីលោក សម រង្ស៉ីនេះតាមរយៈនយោបាយឬយ៉ាងណាទេ ព្រោះលោកថ្លែងថាការដកបង្គោលព្រំដែន ការផ្សព្វផ្សាយឯកសារព្រំដែនមិនមែនជារឿងនយោបាយទេ។ លោកធ្លាប់អះអាងថាការសម្របសម្រួលផ្នែកនយោបាយ ធ្វើទៅបានគឺអាស្រ័យលើលោក សម រង្ស៉ីខ្លួនលោកក្នុងការធ្វើទំនាក់ទំនង ជាមួយនិងលោក នាយករដ្ឋមន្ត្រីហ៊ុន សែនដែលជាអ្នកមានសិទ្ធិធ្វើឲ្យមានការលើកលែងទោស ពីព្រះមហាក្សត្រ។ ទោះជាយ៉ាងណាក៏ដោយលោក សម រង្ស៉ីបានចាត់ទុកថាការបញ្ចប់អភ័យឯក សិទ្ធិសភារបស់លោកឬ បណ្តេញតំណាងរាស្ត្រដោយសាររឿងព្រំដែននេះគឺជារឿងខុសច្បាប់ធ្ងន់ធ្ងរដែល ពលរដ្ឋបានបោះឆ្នោតឲ្យ។ លោក សម រង្ស៉ីចាត់ទុកថាជាដំណាក់កាលធ្ងន់ធ្ងរដែលនឹងត្រូវមានប្រតិកម្មខ្លាំងពីសហគមន៍អន្តរជាតិហើយគណបក្សរបស់លោកនឹងកាន់តែរឹងមាំ។ «រដ្ឋាភិបាលសព្វថ្ងៃគណបក្សប្រជាជនឃើញថាចេញក្រឡាសារ ជាមនុស្សអត់ យល់ច្បាប់ អត់យល់គោលការណ៍ប្រជាធិបតេយ្យ ជាន់ឈ្លីរដ្ឋធម្មនុញ្ញ ដែលជា ច្បាប់កំពូលនៃប្រទេសជាតិ។ វាចូលដល់ដំណាក់កាលហ្នឹងខ្ញុំជឿថានឹងមាន ប្រតិកម្មខ្លាំង ដូចកាលគេដេញខ្ញុំចេញពីរដ្ឋសភាកាលពីឆ្នាំ១៩៩៥ ទីបញ្ចប់ខ្ញុំវិល ទៅរដ្ឋសភាដដែល ហើយវិលទៅខ្លាំងជាងមុនទៀត។ ដេញម្នាក់ចូលទៅវិញ ១៥នាក់។ លើកនេះដេញម្នាក់ចូលទៅវិញ៥០នាក់។ ខ្ញុំជឿជាក់ថានៅឆ្នាំ២០១៣ នេះគឺនឹងមានការប្រែប្រួល ហើយគណបក្សសម រង្ស៉ីគឺកាន់តែខ្លាំងឡើងថែម ទៀតបាទ»។ លោក ថ្លែងពីកំណើននៃសំឡេងឆ្នោតដែលគណបក្សលោកបានទទួលអាសនៈ ក្នុងរដ្ឋសភា។ សមាជិកសភាគណបក្សសម រង្ស៉ីមានចំនួន២៦រូប ក្នុងរដ្ឋសភា ក្រោយការបោះឆ្នោតឆ្នាំ២០០៨ ដែលគេចាត់ទុកថាជាដៃគូប្រជែងផ្នែកនយោ បាយដ៏សំខាន់របស់គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែនទទួលបានចំនួន៩០អាសនៈ ក្នុងចំណោមអាសនៈសរុបចំនួន១២៣។ ប្រតិកម្មដោយផ្ទុះសំណើចតិចៗចំពោះអត្ថាធិប្បាយរបស់លោក សម រង្ស៉ី លោក ជៀម យាបអ្នក តំណាងរាស្ត្រគណបក្សប្រជាជនកម្ពុជា និងជាគណបក្សគ្រប់ គ្រងប្រទេសបានអះអាងថាអ្វីដែលសភាបានបញ្ចប់បុព្វសិទ្ធិតំណាងរាស្រ្តរបស់លោក សម រង្ស៉ីគឺជាការធ្វើទៅតាមច្បាប់ មិនមែនបារម្ភពីប្រជាប្រិយ៍ភាពគណបក្ស សម រង្ស៉ីទេ។ ដោយមានប្រតិកម្មពីសហគមន៍អន្តរជាតិមិនធ្ងន់ធ្ងរនៅឡើយទាក់ទងករណីក្តីក្តាំមេដឹកនាំគណបក្សជំទាស់លោកសម រង្ស៉ី ដែលឈានដល់ការបញ្ចប់ បុព្វសិទ្ធិ សភានេះ បានបង្កឱ្យមានក្តីព្រួយបារម្ភយ៉ាងខ្លាំងពីក្រុមអ្នកវិភាគនិងអ្នកឃ្លាំមើលនយោបាយក្នុងប្រទេសកម្ពុជាជាពិសេស វត្តមានរបស់លោក សម រង្ស៉ីដែល មានកម្លាំងប្រហាក់ប្រហែលអាចប្រកួតប្រជែងជាមួយនឹងគណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែនក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅឆ្នាំ២០១២ និង ការបោះឆ្នោតជាសកលនៅឆ្នាំ២០១៣។ តាមច្បាប់បោះឆ្នោតជនដែលមានពិរុទ្ធភាពដូចលោក សម រង្ស៉ីពេលនេះពុំអាចចូលរួមឈរឈ្មោះឲ្យគេបោះឆ្នោតបានទេ៕ This posting includes an audio/video/photo media file: Download Now |
| សហរដ្ឋអាមេរិកនៅបន្តហាមការសុំកូនចិញ្ចឹមពីកម្ពុជា Posted: 18 Mar 2011 09:57 AM PDT ប្រទេសកម្ពុជាប្រកាសនៅថ្ងៃសុក្រនេះថានឹងអនុវត្តច្បាប់ស្តីពីការសុំកូនចិញ្ចឹមទៅបរទេសចាប់ពីថ្ងៃទី១ ខែមេសាខាងមុខនេះ ប៉ុន្តែសហរដ្ឋអាមេរិកមិនទាន់បានកំណត់ថ្ងៃខែដើម្បីបន្តឡើងវិញនូវការសុំកូនចិញ្ចឹមពីប្រទេសកម្ពុជា។ មន្ត្រីរដ្ឋាភិបាលបាននិយាយថាច្បាប់នេះមានគោលដៅទប់ស្កាត់ការជួញដូរមនុស្សនិងការរត់ពន្ធកុមារ។ លោកស្រីឯកអគ្គរដ្ឋទូតស៊ូសាន ហ្សាកុប (Susan Jacobs) ទីប្រឹក្សាពិសេសសម្រាប់បញ្ហាកុមារបានធ្វើទស្សនកិច្ចនៅកម្ពុជាពីថ្ងៃទី១៧ដល់ថ្ងៃទី១៨ខែមិនានេះដើម្បីចូលរួមប្រជុំស្វែងរកការណ៍ពិតស្តីពីការសុំកូនចិញ្ចឹមទៅបរទេស។ លោកស្រីបានជួបជាមួយមន្ត្រីរដ្ឋាភិបាលនិងតំណាងអង្គទូតនានាដើម្បីពិភាក្សាការអនុវត្តប្រកាសនិងកម្រិតនៃការគោរពតាមអនុសញ្ញាក្រុងឡាអេស្តីពីការសុំកូនចិញ្ចឹម។ លោកកុយ គួង អនុរដ្ឋលេខាធិការនិងជាអ្នកនាំពាក្យក្រសួងការបរទេសបានថ្លែងថាលោកឡុង វិសាលោ រដ្ឋលេខាធិការក្រសួងការបរទេសបានជម្រាបលោកស្រី ស៊ូសាន ហ្សាកុបអំពីការចាប់ផ្តើមអនុវត្តច្បាប់ស្តីពីការស្មុំកូនអន្តរប្រទេសរបស់ប្រទេសកម្ពុជាចាប់ពីថ្ងៃទី១ ខែមេសាខាងមុខនេះ។ ច្បាប់ស្មុំកូនអន្តរប្រទេសនេះបានបញ្ជាក់ថាប្រទេសជាភាគីអនុសញ្ញាក្រុងឡាអេត្រូវចុះកិច្ចព្រមព្រៀងស្តីពីការសុំកូនចិញ្ចឹមជាមួយក្រសួងសង្គមកិច្ចហើយប្រទេសមិនមែនជាភាគីអនុសញ្ញាក្រុងឡាអេត្រូវចុះកិច្ចព្រមព្រៀងជាមួយក្រសួងការបរទេសកម្ពុជា។ ច្បាប់នេះបានចែងថាអ្នកសុំកូនជាប្តីប្រពន្ធត្រូវមានអាយុយ៉ាងតិច៣០ឆ្នាំនិងយ៉ាងច្រើនបំផុត៤៥ឆ្នាំហើយកុមារដែលត្រូវសុំយកទៅចិញ្ចឹមត្រូវមានអាយុក្រោមប្រាំបីឆ្នាំ។ ប៉ុន្តែការសុំកូនចិញ្ចឹមដោយសាច់ញាតិក្មេងនោះអាចមានអាយុក្រោម១៨ឆ្នាំ។ ច្បាប់នេះបានបញ្ជាក់ថាអ្នកសុំកូនចិញ្ចឹមត្រូវជាមនុស្សមិនធ្លាប់ត្រូវបានផ្តន្ទាទោសឬកំពុងត្រូវបានប្តឹងអំពីកំហុសទាក់ទងនឹងកិរិយាមារយាទ ឬ ការប្រព្រឹត្តិបទល្មើសឧក្រិដ្ឋឬមជ្ឈិមណាមួយនៅក្នុងប្រទេសកំណើតរបស់ខ្លួនឬប្រទេសលំនៅដ្ឋានអចិន្ត្រៃយ៍ឬប្រទេសដែលខ្លួនស្នាក់នៅចុងក្រោយ។ ច្បាប់ស្មុំកូនអន្តរប្រទេសនេះបានបន្តថាអ្នកសុំកូនចិញ្ចឹមត្រូវតែជាអ្នកមានសមត្ថភាពផ្តល់ការថែរក្សាសមស្របនិងការគាំទ្រចាំបាច់ដល់កូនសុំហើយត្រូវបានអនុញ្ញាតឱ្យសុំបានលុះត្រាតែពួកគេគ្មានកូនឬមានកូនតែម្នាក់នៅក្នុងបន្ទុក។ អ្នកសុំកូនអាចសុំបានតែម្នាក់ប៉ុណ្ណោះលើកលែងតែកុមារដែលមានបងប្អូនបង្កើតអាចអនុញ្ញាតឱ្យសុំច្រើននាក់បាន។ លោកកុយ គួង បានបញ្ជាក់ថាជនបរទេសដែលប្រទេសរបស់ខ្លួនបានចុះកិច្ចព្រមព្រៀងជាមួយប្រទេសកម្ពុជានិងមានទីភ្នាក់ងារនៅក្នុងប្រទេសកម្ពុជាហើយ ជននោះត្រូវតែដាក់ពាក្យសុំកូនចិញ្ចឹមតាមរយៈទីភ្នាក់ងារបស់ប្រទេសខ្លួន។ «យើងទប់ស្កាត់សំខាន់ការជួញដូរមនុស្សនិងការរត់ពន្ធក្មេងហើយយើងធ្វើយ៉ាងណាឱ្យក្មេងដែលទៅរស់នៅម្តាយចិញ្ចឹមនៅបរទេស នោះមានជីវភាពរស់នៅសមរម្យ ពិតជាបានរស់នៅក្នុងលក្ខណៈថ្លៃថ្នូរនិងមានសុភមង្គលពិតប្រាកដ»។ លោកស្រីឯកអគ្គរដ្ឋទូតស៊ូសាន ហ្សាកុប បានបញ្ជាក់នៅក្នុងសេចក្តីថ្លែងការណ៍នៅថ្ងៃសុក្រនេះថាសហរដ្ឋអាមេរិកសង្ឃឹមថានឹងបានធ្វើការជាមួយរដ្ឋាភិបាលកម្ពុជានៅពេលដែលប្រទេសកម្ពុជាបង្កើតប្រព័ន្ធសុខុមាលភាពកុមារហើយនឹងធ្វើការពិនិត្យយ៉ាងហ្មត់ចត់លើបទបញ្ញត្តិសម្រាប់អនុវត្តទាក់ទងនឹងច្បាប់ថ្មីស្តីពីការសុំកូនចិញ្ចឹមទៅបរទេសនៅពេលបទបញ្ញាត្តិទាំងនេះចេញ។ លោកស្រីឯកអគ្គរដ្ឋទូតបានថ្លែងសរសើររដ្ឋាភិបាលកម្ពុជាចំពោះជោគជ័យសម្រេចបានកន្លងមកក្នុងការបង្កើនការការពារដល់កុមារងាយរងគ្រោះ។ រដ្ឋសភាកម្ពុជាបានអនុម័តច្បាប់ស្តីពីការសុំកូនចិញ្ចឹមដែលមាន៥៨មាត្រានៅចុងឆ្នាំ២០០៩៕ This posting includes an audio/video/photo media file: Download Now |
| អ្នកវិភាគថាការជំទាស់របស់វៀតណាមអាចប៉ះពាល់ផែនការទំនប់វារីអគ្គិសនីរបស់ឡាវ Posted: 18 Mar 2011 08:06 AM PDT ពួកមន្រ្តីវៀតណាមកំពុងរិះគន់ផែនការចម្រូងចម្រាសរបស់រដ្ឋាភិបាលឡាវដើម្បីស្ថាបនាទំនប់ទឹកនៅទន្លេមេគង្គ។ ពួកអ្នកវិភាគនិយាយថាការជំទាស់ពីប្រទេសវៀតណាមហើយនិងប្រទេសផ្សេងៗទៀតនៅទន្លេមេគង្គខាងក្រោមអាចបង្ខំឲ្យប្រទេសឡាវកាត់បន្ថយការប្រាថ្នាដ៏លើសលប់នៃវារីអគ្គិសនីរបស់ខ្លួន។ ទំនប់វារីអគ្គិសនី សាយ៉ាប៊ូរី (Xayaburi) ដែលមានតម្លៃជាប្រាក់៣.៥០០លានដុល្លារជាទំនប់ទឹកទីមួយនៃទំនប់ទឹក១២ដែលគេគ្រោងសាងសង់នៅទន្លេមេគង្គក្រោម។ ក្រុមហ៊ុនមួយរបស់ថៃនឹងស្ថាបនាទំនប់ទឹកនោះ ហើយថៃនឹងទិញអគ្គិសនីស្ទើរតែទាំងអស់នៃអគ្គិសនី១.២៦០មេហ្គាវ៉ាត់ដែលនឹងផលិតដោយទំនប់វារីអគ្គិសនីនោះ។ ពួកមន្រ្តីឡាវនិយាយថាទំនប់ទឹកមេគង្គដែលបានស្នើនោះនឹងកាត់បន្ថយភាពក្រីក្រហើយនឹងទ្រទ្រង់សេដ្ឋកិច្ចរបស់ប្រទេសដែលឥតមានជាប់សមុទ្រនេះ។ ក៏ប៉ុន្តែមន្រ្តីវៀតណាមនិយាយថាទំនប់ទឹកនោះនឹងធ្វើឲ្យមានគ្រោះថ្នាក់ដល់ការផ្គត់ផ្គង់ទឹកនិងគំរាមកំហែងការនេសាទត្រីនៅចរន្តទឹកខាងក្រោមនៃទន្លេមេគង្គ។ អត្ថាធិប្បាយកាលពីពេលថ្មីៗនេះរបស់ពួកមន្រ្តីវៀតណាមបានបន្ទរការព្រមានពីពួកអ្នកបរិស្ថានថាទន្លេមេគង្គនឹងធ្វើឲ្យខូចបរិស្ថាននិងគំរាមកំហែងការចិញ្ចឹមជីវិតរបស់មនុស្សដែលរស់នៅជិតទន្លេនោះ។ ពួកអ្នកវិភាគ និយាយថាសម្ពាធនយោបាយពីវៀតណាមនិងប្រទេសជិតខាងរបស់ខ្លួននៅទន្លេមេគង្គខាងក្រោមដូចជាប្រទេសថៃនិងកម្ពុជា អាចបង្ខំឲ្យប្រទេសឡាវពន្យាពេលឬកែប្រែផែនការរបស់ខ្លួនដល់ការប្រើប្រាស់លំហូររបស់ទន្លេមេគង្គ។ លោក ហ្វ៊ីលី្លព ហឺស្ហ (Philip Hirsch) ជាសាស្រ្តាចារ្យមុខវិជ្ជាបរិស្ថានវិទ្យានៅសាកលវិទ្យាល័យក្រុងស៊ីដនី បានប្រាប់វីអូអេសំឡេងសហរដ្ឋអាមេរិកថាក្នុងចំណោមបណ្តាប្រទេសនៅទន្លេមេគង្គខាងក្រោមទាំងអស់ ប្រទេសវៀតណាមជាប្រទេសដែលបានរិះគន់ជាសាធារណៈខ្លាំងជាងគេពីការប្រាថ្នាវារីអគ្គិសនីដ៏លើសលប់របស់ឡាវ។ «សំណួរគួរឲ្យចាប់អារម្មណ៍ ដែលខ្ញុំគិតថាជាការពិបាកបំផុតសម្រាប់មនុស្សគ្រប់ៗគ្នាឆ្លើយនោះ គឺថាតើប្រទេសទាំងពីរនោះគឺវៀតណាមនិងឡាវ ដែលមានការជិតស្និទ្ធគ្នាបំផុត នឹងដកខ្លួនចេញពីអ្វីដែលនៅពេលនេះហាក់ដូចជាមានការជំទាស់យ៉ាងខ្លាំងលើជំហរអំពីទំនប់ទឹកសាយ៉ាប៊ូរីនោះ»។ វៀតណាមនិងឡាវជារដ្ឋមានគណបក្សតែមួយ ហើយលោក ហឺស្ហ មានប្រសាសន៍បន្តទៀតថា វៀតណាមជាធម្មតាមានឥទ្ធិពលលើនយោបាយរបស់ឡាវនៅខាងក្រោយឆាក។ ក៏ប៉ុន្តែលោកហឺស្ហ និយាយទៀតថា ការរិះគន់សំណើទំនប់ទឹកសាយាបូរី ដោយពួកមន្រ្តីជាន់ខ្ពស់វៀតណាមនាពេលថ្មីៗនេះ បានធ្វើឡើងជាសាធារណៈ។ ប្រទេសទាំងអស់៤នៅទន្លេមេគង្គខាងក្រោមនឹងមើលយ៉ាងដិតដល់ពីអនុសាសន៍ស្តីពីទំនប់ទឹកនោះដែលត្រូវគេរំពឹងនឹងធ្វើឡើងនៅខែនេះដោយគណៈកម្មាធិការរួមគ្នានៃគណៈកម្មការទន្លេមេគង្គ (MRC) ដែលជាអង្គការ សម្រាប់ឲ្យយោបល់ដែលបានត្រូវបង្កើតនៅឆ្នាំ១៩៩៥ដើម្បីធ្វើឲ្យប្រសើរឡើងនូវការអភិវឌ្ឍប្រកបដោយចីរភាពមួយនៅតាមបណ្តោយដងទន្លេមេគង្គដែលមានប្រវែង៤.៩០០គីឡូម៉ែត្រ។ ក៏ប៉ុន្តែ លោកហឺស្ហ ចង្អុលបង្ហាញថាគណៈកម្មការទន្លេមេគង្គ (MRC) មិនមានអំណាចបង្ខំឲ្យប្រទេសឡាវបោះបង់ចោលផែនការរបស់ខ្លួនសម្រាប់សាងសង់ទំនប់ទឹកសាយាបូរី និងទំនប់ទឹកផ្សេងៗទៀតនៅទន្លេមេគង្គទេ។ «គណៈកម្មការទន្លេមេគង្គ (MRC) មិនមែនជាស្ថាប័ននិយ័តកម្មទេ។ វាមិនមែនជាទីភ្នាក់ងារខ្លាំងទេ វាជាគណៈកម្មការមួយដែលជានិច្ចកាលធ្វើការងារដោយព្យាយាមធ្វើឲ្យសម្រេចការមូលមតិគ្នាហើយប្រសិនបើយើងពិនិត្យរកមើលបទបញ្ញត្តិពីគណៈកម្មការ MRC ខ្ញុំគិតថាយើងកំពុងមើលទិសដៅខុស»។ លោកហឺស្ហនិយាយទៀតថាប្រទេសថៃ បានប្តេជ្ញានៅជាអព្យាក្រឹត្យនៅក្នុងការចរចារបស់គណៈកម្មការ MRC ដែលដាក់ការទទួលខុសត្រូវលើពួកមន្រ្តីវៀតណាមនិងកម្ពុជាដើម្បីឆ្លើយតបដល់សំណើទំនប់ទឹកសាយាបូរីនៅក្នុងការពិភាក្សាជាមួយសមភាគីឡាវរបស់ពួកគេ។ លោក ទ្រិញ ឡេ ង្វៀន (Trinh Le Nguyen) ជានាយកប្រតិបត្តិនៃអង្គការមិនមែនរដ្ឋាភិបាល PanNature របស់វៀតណាម។ លោកប្រាប់ VOA សំឡេងសហរដ្ឋអាមេរិកថា ទោះបីប្រទេសឡាវបានសម្រេចចិត្តចុងក្រោយលើទំនប់ទឹកសាយាបូរីនិងទំនប់ផ្សេងៗទៀតនៅទន្លេមេគង្គក៏ដោយ វៀតណាមអាចគាបសង្កត់ឡាវដោយការគម្រាមកំហែងមិនធ្វើការវិនិយោគទុនក្នុងគម្រោងវារីអគ្គិសនីនានានៅពេលអនាគត។ «វៀតណាមអាចសម្រេចមិនវិនិយោគទុនឬទិញអ្វីពីប្រទេសឡាវ។ វាជាមធ្យោបាយមួយដែលពួកគេអាចមានអំណាចខ្លះ»។ នៅខែតុលា ការសិក្សាឯករាជ្យមួយដែលឧបត្ថម្ភឡើងដោយគណៈកម្មការ MRCបានផ្តល់អនុសាសន៍ដល់ប្រទេសនានានៅទន្លេមេគង្គខាងក្រោមឲ្យពន្យាពេលការសម្រេចចិត្តលើគម្រោងវារីអគ្គិសនីសម្រាប់រយៈពេល១០ឆ្នាំ ដោយព្រមានថាទំនប់វារីអគ្គិសនីនឹងធ្វើឲ្យកាន់តែធ្ងន់ធ្ងរឡើងដល់អសន្តិសុខម្ហូបអាហារនិងបណ្តាលឲ្យមានការប៉ះពាល់ដ៏ធ្ងន់ធ្ងរហើយនឹងពុំអាចទប់ទល់បានដល់បរិស្ថាន។ ចិនដែលមានព្រំដែនជាមួយប្រទេសឡាវនៅភាគខាងជើង ប្រតិបត្តិការទំនប់ទឹករួចទៅហើយចំនួន៤នៅទន្លេមេគង្គខាងលើ៕ ប្រែសម្រួលដោយ ជឹង ប៉ូជីន This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
