VOA News: ព័ត៌មាន: “ព័ត៌មានអន្តរជាតិវីអូអេ ៣ មករា យប់” plus 4 more |
- ព័ត៌មានអន្តរជាតិវីអូអេ ៣ មករា យប់
- អ្នកភូមិបុរីកីឡា និងប៉ូលិសរងរបួសក្នុងការប៉ះទង្គិចគ្នា
- លោកហ៊ុន សែនយល់ព្រមឲ្យធ្វើរូបសំណាកលោកជា វិជ្ជា
- រដ្ឋសភាអនុម័តច្បាប់លទ្ធកម្មសាធារណៈ ដោយអវត្តមានគណបក្សប្រឆាំង
- ព័ត៌មានអន្តរជាតិវីអូអេ ៣ មករា ព្រឹក
| ព័ត៌មានអន្តរជាតិវីអូអេ ៣ មករា យប់ Posted: 03 Jan 2012 09:48 AM PST សហរដ្ឋអាមេរិក៖ ក្រុមអ្នកកាន់ការប្រជុំគណបក្សសាធារណរដ្ឋក្នុងរដ្ឋអៃយូវ៉ា (Iowa) នឹងបើកកិច្ចប្រជុំពិសេសហៅ កូកិស (Caucus) នៅថ្ងៃអង្គារនេះ ដែលជាវិធានការលើកដំបូងដើម្បីជ្រើសរើសយកបេក្ខជនដែលអាចតទល់នឹងប្រធានាធិបតី បារ៉ាក់ អូបាម៉ា ក្នុងការបោះឆ្នោតប្រធានាធិបតីនៅខែវិច្ឆិកា។ ប៉ាឡេស្ទីន អ៊ីស្រាអែល៖ ក្រុមអ្នកចរចាប៉ាឡេស្ទីននិងអ៊ីស្រាអែលត្រូវកំណត់នឹងជួបប្រជុំគ្នានៅក្នុងប្រទេសហ្ស៊កដានី (Jordan) ក្នុងគោលបំណងចាប់ផ្តើមឡើងវិញនូវកិច្ចចរចាសន្ដិភាពដែលបានជាប់គាំងកាលពីលើកមុន។ ស៊ីរី៖ ប្រទេសបារំាងបានបញ្ចេញការព្រួយបារម្ភរបស់ខ្លួនចំពោះស្ថានការណ៍ក្រុមអ្នកតាមឃ្លាំមើលរបស់សម្ព័ន្ធអារ៉ាប់ (Arab League) ដែលកំពុងអនុវត្ដបេសកកម្មនៅក្នុងប្រទេសស៊ីរី។ អេហ្ស៊ីប៖ ពលរដ្ឋអេហ្ស៊ីបបានចាប់ផ្ដើមបោះឆ្នោតជាចុងក្រោយបង្អស់ ដើម្បីជ្រើសតាំងសមាជិកតំណាងរាស្រ្ដក្នុងរដ្ឋសភាថ្នាក់ក្រោម។ សហរដ្ឋអាមេរិក៖ លោកខឺត ខែមប៊ែល (Kurt Campbell) ឧបការីរដ្ឋមន្ដ្រីការបរទេស ស.រ.អ. បានធ្វើដំណើរមកដល់ទីក្រុងប៉េកាំងនៅថ្ងៃអង្គារនេះ ហើយនេះជាទស្សនកិច្ចលើកទីមួយរបស់មន្ដ្រីជាន់ខ្ពស់អាមេរិកាំងចាប់តាំងពីមេដឹកនាំកូរ៉េខាងជើង គីម ជុងអ៊ីល បានទទួលមរណភាពមក។ អាហ្វហ្គានីស្ថាន៖ ការដាក់គ្រាប់បែកផ្ទុះដោយអត្ដឃាតជននៅក្នុងខេត្ដភាគខាងត្បូងប្រទេសអាហ្វហ្គានីស្ថានបានសម្លាប់មនុស្សយ៉ាងតិច៤នាក់ រួមមានកុមារនិងមន្ដ្រីប៉ូលិស។ ឥណ្ឌា៖ មន្ដ្រីថ្នាក់ខ្ពស់ឥណ្ឌានៃរដ្ឋកាស្មៀរ (Kashmir) នៅថ្ងៃអង្គារនេះបានរិះគន់កងកម្លាំងសន្ដិសុខ ដែលបានបាញ់សម្លាប់និស្សិតជំទង់ម្នាក់នៅពេលមានការតវ៉ាប្រឆាំងនឹងការផ្តាច់ភ្លើងនៅរដូវរងារខ្លាំង។ ភូមា៖ នៅថ្ងៃអង្គារនេះ ប្រទេសភូមាបានចាប់ផ្ដើមដោះលែងអ្នកទោសដែលជាផ្នែកមួយនៃកម្មវិធីលើកលែងទោសតាមបញ្ជារបស់រដ្ឋាភិបាល។ ក៏ប៉ុន្តែមានសកម្មជនខ្លះនិយាយថា អ្នកទោសនយោបាយខ្លះ មិនទាន់ត្រូវបានដោះលែងនៅឡើយទេ។ អ៊ីរ៉ង៖ ប្រទេសអ៊ីរ៉ង និយាយថា នាវាផ្ទុកយន្ដហោះរបស់ស.រ.អ.មិនគួរវិលត្រឡប់មករកតំបន់ឈូងសមុទ្រពែកស៍ (Persian Gulf) វិញទេ ក្នុងថ្ងៃដែលរដ្ឋាភិបាលទីក្រុង តេហេរ៉ង់បានបញ្ចប់សមយុទ្ធលើទឹកជិតតំបន់យុទ្ធសាស្រ្ដនៅច្រកសមុទ្រហរម៊ូស (Strait of Hormuz)។ ម៉ាឡេស៊ី៖ ប៉ូលីសនៃប្រទេសម៉ាឡេស៊ីបានចេញសេចក្ដីព្រមានដល់សកម្មជនមិនឲ្យទៅចូលរួមក្នុងការប្រមូលផ្ដុំគ្នានៅពេលខាងមុខថ្មីៗនេះដើម្បីគាំទ្រមេដឹកនាំគណបក្សជំទាស់លោកអង់វារ អ៊ីប្រាហ៊ិម (Anwar Ibrahim)។ នីហ្សេរីយ៉ា៖ ក្រុមបាតុករនៅក្នុងប្រទេសនីហ្សេរីយ៉ា បាននាំគ្នាដើរលើផ្លូវដើម្បីធ្វើការប្រឆាំងនឹងសេចក្ដីសម្រេចរបស់រដ្ឋាភិបាលដែលបញ្ចប់កម្មវិធីជំនួយប្រេងដល់អតិថិជន បណ្ដាលឲ្យតម្លៃប្រេងសាំងឡើងខ្ពស់ដល់យ៉ាងខ្លាំងក្នុងប្រទេសសម្បូរទៅដោយប្រេងកាតមួយនេះ។ <!--AV--> This posting includes an audio/video/photo media file: Download Now |
| អ្នកភូមិបុរីកីឡា និងប៉ូលិសរងរបួសក្នុងការប៉ះទង្គិចគ្នា Posted: 03 Jan 2012 09:07 AM PST ក្រុមមន្ត្រីសិទ្ធិមនុស្ស និងសាក្សីឃើញផ្ទាល់ភ្នែកបាននិយាយថា យ៉ាងតិចមានប្រជាពលរដ្ឋ១២នាក់ត្រូវបានចាប់ខ្លួនភ្លាមៗ និងប្រមាណជិត២០នាក់ផ្សេងទៀតបានទទួលរងរបួស នៅក្នុងការប៉ះទង្គិចគ្នាដោយអំពើហិង្សាមួយ នៅសហគមន៍បុរីកីឡា កណ្តាលទីក្រុងភ្នំពេញ នៅព្រឹកថ្ងៃអង្គារនេះ។ ការប៉ះទង្គិចគ្នានេះបានកើតមានឡើង ដោយសារតែក្រុមហ៊ុនផានអ៊ីម៉ិចរបស់លោកស្រីស៊ុយ សុផានបានប្រើប្រាស់កម្លាំងសមត្ថកិច្ចច្រើនរាប់រយនាក់ ប្រដាប់ដោយអាវុធ ខែល ដំបងឆក់ និងរថយន្តពន្លត់អង្គីភ័យ បានទៅបណ្តេញប្រជាពលរដ្ឋដោយបង្ខំឲ្យចេញពីសហគមន៍បុរីកីឡា។ ក្រុមអាជ្ញាធរសមត្ថកិច្ចបានប្រើប្រាស់ខែល រថយន្តបាញ់ទឹកនិងបាញ់កាំភ្លើងឧស្ម័នបង្ហូរទឹកភ្នែក ដាក់ក្រុមប្រជាពលរដ្ឋដែលឈរកាន់ដំបង ព្រមទាំងដុតកង់ឡានឆេះសន្ធោសន្ធៅ ក៏ប៉ុន្តែក្នុងខណៈពេលនោះ ប្រជាពលរដ្ឋបានតបតមកវិញ ដោយគប់ដុំថ្ម លាយឡំនឹងសំបកដប ដាក់សមត្ថកិច្ចទៀតផង។ មន្ត្រីប៉ូលិស ដែលសមត្ថកិច្ចបានអះអាងថា ឈ្មោះភួង ម៉ាឡៃ ស្នងការរងប៉ូលិសក្រុងភ្នំពេញ និងលោកសយ ចាន់ឌី មេបញ្ជាការប៉េអឹមខណ្ឌ៧មករា បានរងរបួសបែកក្បាលហូរឈាម ដោយសារតែត្រូវដុំថ្មរបស់ប្រជាពលរដ្ឋ។ ចំណែកឯប្រជាពលរដ្ឋឈ្មោះរឿង ស្រីពៅ និងប្អូនប្រុសឈ្មោះសុខ ហេង អាយុ១៣ឆ្នាំ សិស្សសាលានៅវត្តព្រះពុទ្ធមានបុណ្យ បានរងរបួសបែកក្បាល ហើយបានចោទប្រកាន់ថា សមត្ថកិច្ចបានប្រើប្រាស់អំពើហិង្សាវាយដំមកលើពួកគេ។ ប្អូនប្រុសសុខ ហេងបានថ្លែងប្រាប់អ្នកសារព័ត៌មានយ៉ាងដូច្នេះថា៖ «នៅមិននៅ គាត់ក៏មកចាប់ខ្ញុំ។ ខ្ញុំអាយុ១៣ឆ្នាំ។ ខ្ញុំឈ្មោះសុខ ហេង។ ខ្ញុំរៀននៅសាលាវត្តព្រះពុទ្ធ»។ ក្រុមប្រជាពលរដ្ឋត្រូវបានសមត្ថកិច្ចចាប់ខ្លួនម្តងមួយៗ ចេញពីសហគមន៍បុរីកីឡា ក្រោយពីការប៉ះទង្គិចគ្នាបានចប់។ ប្រជាពលរដ្ឋជាច្រើន ដែលមានរបួសចំផ្ទៃមុខ និងបែកក្បាល ត្រូវបានបណ្តើរចេញ ដោយមានសមត្ថកិច្ចចាប់ក្រៀកយ៉ាងអែន។ «ខ្ញុំឥតដឹងរឿងផង។ ខ្ញុំមកឈរមើលគេ។ បែកមាត់ហ្នឹង គេវ៉ៃ។ ប៉ូលិសគាត់វៃ។ ខ្ញុំគិតថា សាហាវណាស់។ ខ្ញុំឥតបានបាញ់ប៉ូលិសផង»។ ចំណែកឯមន្ត្រីយោធាបីរូបផ្សេងទៀតត្រូវបានកងរាជអាវុធហត្ថក្រុងភ្នំពេញចាប់បញ្ជូនទៅការិយាល័យរបស់ខ្លួន។ «គេថា ទៅជួបមេគេ នៅសាលាខណ្ឌ នៅឯអង្គរក្ស។ អាហ្នឹង គេចង់សួរ ថាយើងមកហ្នឹងមានមូលហេតុអ្វី?» អ្នកស្រីភួង ថាវី អាយុ៣៦ឆ្នាំ នៅក្រុមទី១២ សង្កាត់វាលវង់ ខណ្ឌ៧មករា បានស្រែកទ្រហោយំ នៅពេលដែលផ្ទះរបស់អ្នកស្រីត្រូវបានអាជ្ញាធរវាយកម្ទេចឲ្យរាបដល់ដី។ «ខណ្ឌ និងប្រធានភូមិ និងក្រុមហ៊ុនគាត់អ្នកដឹង។ គាត់អង្វរពួកខ្ញុំឲ្យរើចេញមក។ រើចេញមក រងចាំការដោះស្រាយ។ ឥឡូវនេះ តើនេះជាវិធីដោះស្រាយរបស់ពួកគាត់ឬ?» លោកហ៊ី ព្រូ ស្នងការរងប៉ូលិសក្រុងភ្នំពេញ និងលោកកើត ឆែ នាយករងរដ្ឋបាលសាលារាជធានីភ្នំពេញ ដែលមានវត្តមាននៅកន្លែងកើតហេតុនោះ បានបដិសេធមិនធ្វើអត្ថាធិប្បាយណាមួយដល់អ្នកសារព័ត៌មានទេ។ «ខ្ញុំឥតដឹងទេ។ ទៅសួរមេបញ្ជាការគេទៅ! ខ្ញុំវាក្តាប់អត់បាន។ ពួកខ្ញុំអត់និយាយទេ»។ លោកចាន់ សាវ៉េត មន្ត្រីផ្នែកស៊ើបអង្កេតរបស់សមាគមសិទ្ធិមនុស្សអាដហុកបានមានប្រសាសន៍ថា ការបង្ក្រាបរបស់អាជ្ញាធរប៉ូលិសនេះ បានរំលោភទៅលើសិទ្ធិមនុស្ស និងរំលោភទៅលើសិទ្ធិលំនៅដ្ឋាន។ «អ្វីដែលជាការមើលឃើញជាក់ស្តែង យើងឃើញថា កម្លាំងដែលមកធ្វើនេះ វាហាក់បីដូចជាមានចេតនាយកឈ្នះ យកចាញ់តែម្តង។ មិនមែនជារឿងដោះស្រាយទេ»។ ការប៉ះទង្គិចរហូតឈានទៅដល់ការប្រើប្រាស់អំពើហិង្សានេះបានកើតឡើង ក្រោយពីក្រុមប្រជាពលរដ្ឋបានចោទប្រកាន់ថា កុ្រមហ៊ុនផានអ៊ីម៉ិចរបស់លោកស្រីស៊ុយ សុផានមិនបានសាងសង់អគារពីរបន្ថែមទៀតតាមអនុសាសន៍របស់លោកនាយករដ្ឋមន្ត្រីហ៊ុន សែន ដែលតម្រូវឲ្យក្រុមហ៊ុននេះសាងសង់១០អគារនៅសហគមន៍បុរីកីឡា។ ប្រជាពលរដ្ឋប្រមាណជាង៣០០គ្រួសារ នៅតែអះអាងថា ពួកគេខ្វះទីជម្រក ដោយសារតែក្រុមហ៊ុនផានអ៊ីម៉ិចមិនបានសាងសង់ឲ្យគ្រប់ចំនួនទៅតាមការកំណត់របស់លោកនាយករដ្ឋមន្ត្រីហ៊ុន សែន។ ចំណែកឯប្រជាពលរដ្ឋ៥០គ្រួសារផ្សេងទៀត ដែលបានទទួលសំណងដី១ឡូ និងទឹកប្រាក់ប្រមាណ៥០ម៉ឺនរៀលគឺស្មើជាង១០០ដុល្លារសហរដ្ឋអាមេរិកជាថ្នូរនឹងការចាកចេញនោះ បានទៅរស់នៅភ្នំបាត ជាង២០គីឡូម៉ែតពីទីក្រុងភ្នំពេញ។ លោកស្រី ស៊ុយ សុផាន ប្រធានក្រុមហ៊ុនផានអ៊ីម៉ិច ធ្លាប់បានប្រាប់វីអូអេសម្លេងសហរដ្ឋអាមេរិកថា ក្រុមហ៊ុនបានសាងសង់៨អគារ គឺគ្រប់គ្រាន់សម្រាប់ប្រជាពលរដ្ឋរស់នៅសហគមន៍បុរីកីឡានេះហើយ៕ This posting includes an audio/video/photo media file: Download Now |
| លោកហ៊ុន សែនយល់ព្រមឲ្យធ្វើរូបសំណាកលោកជា វិជ្ជា Posted: 03 Jan 2012 08:12 AM PST ក្រុមកម្មករនឹងទទួលបានរូបសំណាក«វីរបុរស»របស់ពួកគេគឺលោកជា វិជ្ជា ដែលត្រូវឃាតកររកមុខមិនឃើញបាញ់សម្លាប់កាលពីប្រាំពីរឆ្នាំមុន។ លោកនាយករដ្ឋមន្ដ្រីហ៊ុន សែនទើបតែសម្រេចកាលពីថ្ងៃទី៣១ ខែធ្នូ ហើយត្រូវបានផ្សព្វផ្សាយជាសាធារណៈនៅថ្ងៃអង្គារនេះ ដោយបញ្ជាឲ្យសាលារាជធានីភ្នំពេញជួយចាត់ចែងរៀបចំកសាងទៀតផង។ កាលពីថ្ងៃទី៣១ ខែធ្នូ លោកជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជាដែលឡើងជំនួសបងប្រុសរបស់លោក បានផ្ញើលិខិតមួយទៅកាន់លោកនាយករដ្ឋមន្ដ្រីហ៊ុន សែន ដើម្បីស្នើសុំការអនុញ្ញាតធ្វើការសាងសង់រូបសំណាកលោកជា វិជ្ជា សម្រាប់រំឭកវិញ្ញាណក្ខន្ធ និងសម្រាប់រំឭកគុណ ដោយសារតែចាប់តាំងពីមរណភាពរបស់លោកជា វិជ្ជាមក មិនទាន់មានទីតាំងសមរម្យណាមួយសម្រាប់ធ្វើពិធីបុណ្យរំឭកខួបរូបគាត់នោះទេ។ លោកហ៊ុន សែន នៅថ្ងៃដដែលនោះ បានសរសេរចារដោយផ្ទាល់ដៃលើសំណើនោះថា លោក«យល់ព្រម» ហើយលោកឲ្យលោកអភិបាលក្រុងភ្នំពេញ កែប ជុតិមាជួយកសាង ដោយជជែកពិភាក្សាជាមួយមេដឹកនាំសហជីពសេរីកម្មករនៃព្រះរាជាណាចក្រកម្ពុជាគឺលោកជា មុន្នី។ លោកជា មុន្នីបានសម្ដែងការរីករាយនៅពេលដែលលោកបានទទួលជោគជ័យក្នុងការស្នើសុំនេះ។ «នេះគឺជាការស្នើសុំរបស់កម្មករកម្មការិនីជារៀងរាល់ឆ្នាំ។ ដូច្នេះអ្វីដែលលោកនាយករដ្ឋមន្ត្រីបានផ្តល់គឺសម្រាប់ខាងសហជីពសូមថ្លែងអំណរគុណនិងអរគុណយ៉ាងជ្រាលជ្រៅចំពោះលោកនាយករដ្ឋមន្ត្រីហ៊ុន សែន»។ លោកជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវឃាតករដើរចូលបាញ់សម្លាប់យ៉ាងកៀកបំផុតនៅជាប់ជញ្ជាំងវត្តលង្កា ក្បែរវិមានឯករាជ្យ ក្រុងភ្នំពេញ កាលពីថ្ងៃទី២២ ខែមករា ឆ្នាំ២០០៤។ រដ្ឋាភិបាលបានខកខានក្នុងការស្វែងរកចាប់ខ្លួនឃាតករ សម្រាប់មរណភាពនៃអតីតមេដឹកនាំសហជីពដែលបានធ្វើការតស៊ូយ៉ាងខ្លាំងក្លាដើម្បីសេរីភាព ការដំឡើងប្រាក់ខែ និងការគោរពសិទ្ធិកម្មករ។ ក្រុមកម្មករបានហៅការស្លាប់របស់លោកជា វិជ្ជា ថាជាការបាត់បង់«វីរបុរស»របស់ពួកគេ។ នៅក្នុងលិខិតផ្ញើរទៅកាន់លោកនាយករដ្ឋមន្ដ្រីហ៊ុន សែន លោកជា មុន្នីស្នើសុំទីតាំងទំហំមួយម៉ែត្រក្រឡានៅលើសួនច្បារខាងលិចវិមានឯករាជ្យដែលស្ថិតនៅចម្ងាយប្រមាណ៥០ម៉ែត្រពីទីកន្លែងសម្លាប់លោកជា វិជ្ជា។ លោកជា មុន្នីបញ្ជាក់បន្ថែមថា លោកមិនទាន់ដាក់សំណើណាមួយទៅកាន់សាលារាជធានីភ្នំពេញដើម្បីពន្លឿនការសាងសង់រូបសំណាកបងប្រុសរបស់លោកនោះទេ។ លោកកើត ឆែ នាយរងរដ្ឋបាលសាលារាជធានីភ្នំពេញ មានប្រសាសន៍ថា លោកមិនទាន់ដឹងពីបញ្ហានេះទេ។ ជាមួយគ្នានេះ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យមានប្រសាសន៍ថា លោកនៅតែទាមទារឲ្យលោកនាយករដ្ឋមន្ដ្រីខ្មែរជំរុញការស៊ើបអង្កេតស្វែងរកឃាតករពិតប្រាកដដែលបានសម្លាប់លោកជា វិជ្ជា។ ជនជាប់សង្ស័យក្នុងឃាតកម្មបិទមុខនេះចំនួនពីរនាក់គឺ ប៊ន សំណាង និងសុខ សំអឿន ត្រូវបានចាប់ឃាត់ខ្លួនយកមកផ្ដន្ទាទោសដាក់ក្នុងពន្ធនាគារជាច្រើនឆ្នាំ ប៉ុន្ដែក្រោយមកតុលាការខ្មែរបានដោះលែងពួកគេជាបណ្ដោះអាសន្ន បន្ទាប់ពីមានគំនាបជាច្រើនលើកឡើងថា ជនសង្ស័យទាំងពីរនេះគ្រាន់តែជាឃាតករដែលគេប្រឌិតជាខែលតែប៉ុណ្ណោះ។ លោកអំ សំអាត ប្រធានការិយាល័យគ្រប់គ្រងបច្ចេកទេសស៊ើបអង្កេតរបស់អង្គការការពារសិទ្ធិមនុស្សលីកាដូ លើកឡើងដែរថា រដ្ឋាភិបាលត្រូវរកឃាតករពិតឲ្យឃើញ។ «ប៉ុន្តែអ្វីដែលនៅជាបញ្ហាគឺទាក់ទងនឹងឃាតករសប្បនិម្មិតហ្នឹង គឺនៅតែមិនទាន់បានបញ្ចប់ឲ្យបានចប់សព្វគ្រប់ហ្នឹង ណា៎។ ធ្វើយ៉ាងណា ដើម្បីស្វែងរកឃាតករពិតប្រាកដហ្នឹងយកមកផ្តន្ទាទោសតាមច្បាប់»។ លោកឧត្តមសេនីយ៍ឯកខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា ក្រុមសមត្ថកិច្ចកំពុងរង់ចាំដីកាបង្គាប់ពីតុលាការ ដើម្បីចាត់វិធានការបន្ដលើសំណុំរឿងឃាតកម្មលើអតីតមេដឹកនាំសហជីពសេរីកម្មករដ៏ល្បីល្បាញនោះ៕ This posting includes an audio/video/photo media file: Download Now |
| រដ្ឋសភាអនុម័តច្បាប់លទ្ធកម្មសាធារណៈ ដោយអវត្តមានគណបក្សប្រឆាំង Posted: 03 Jan 2012 08:38 AM PST ដោយគ្មានវត្តមានរបស់តំណាងរាស្រ្តគណបក្សប្រឆាំង រដ្ឋសភាបានអនុម័តនីតិកម្មដ៏មានសារៈសំខាន់ថ្មីមួយនៅថៃ្ងអង្គារនេះ សំដៅធានាឲ្យមានតម្លាភាព គណនេយ្យភាព និងជំនឿទុកចិត្តក្នុងលទ្ធកម្មសាធារណៈ។ ច្បាប់លទ្ធកម្មសាធារណៈនេះបានធើ្វឡើង បន្ទាប់ពីក្រុមហ៊ុនឯកជនបានរអ៊ូរទ្រាំអំពីភាពមិនប្រក្រតីនៃដំណើរការដេញថៃ្លរបស់ក្រសួងស្ថាប័នរដ្ឋមួយចំនួន។ លោកជៀម យាប ប្រធានគណៈកម្មការសេដ្ឋកិច្ច ហិរញ្ញវត្ថុ និងសវនកម្មនៃរដ្ឋសភា បានថែ្លងនៅក្នុងសម័យប្រជុំសភាថា៖ «យើងជៀសវាងធើ្វយ៉ាងម៉េចកុំឲ្យបុគ្គលទាំងឡាយធើ្វនំអត់ម្សៅបំបាត់ កេងប្រវ័ញ្ច កេងបន្លំរដ្ឋយើងបាន»។ សមាជិកសភាចំនួន៨៤រូប ដែលមានវត្តមាននៅក្នុងសម័យប្រជុំសភា បានបោះឆ្នោតគាំទ្រសេចក្តីព្រាងច្បាប់នេះដោយគ្មានការពិភាក្សា ឬការកែសម្រួល។ អ្នកសម្របសម្រួលសម័យប្រជុំនេះប្រកាសថា៖ «អង្គសភាបានអនុម័តសេចក្តីព្រាងច្បាប់ស្តីពីលទ្ធកម្មសាធារណៈទាំងមូល ដោយមានសំឡេងគាំទ្រ៨៤លើ៨៤»។ លោកគាត ឈន់ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានថែ្លងក្នុងសម័យប្រជុំសភាថា រដ្ឋសភាបានផ្តល់នូវឧបករណ៍ថ្មីមួយទៀតសមស្របតាមពេលវេលាសម្រាប់កំណែទម្រង់ហិរញ្ញវត្ថុសាធារណៈដំណាក់កាលទីពីរ។ លោកគាត ឈន់បានបន្ថែមថា ការអនុម័តច្បាប់នេះមិនគ្រាន់តែពង្រឹងជំនឿទុកចិត្តលើការគ្រប់គ្រងថវិកាប៉ុណ្ណោះទេ ប៉ុនែ្តវាបង្កើននូវគណនេយ្យភាពហិរញ្ញវត្ថុសាធារណៈ។ «អត្ថបទច្បាប់នេះនឹងជាឧបករណ៍ដ៏សំខាន់មួយទៀតសម្រាប់រាជរដ្ឋាភិបាលធ្វើកិច្ចការលទ្ធកម្មសាធារណៈដោយតម្លាភាព គណនេយ្យភាព និងការជឿទុកចិត្តបានដើម្បីប្រឆាំងនឹងអី្វដែលជាបាតុភូតនាំឲ្យមានការខាតបង់ដល់ថវិការបស់រដ្ឋ។ រដ្ឋសភាបានផ្តល់នូវសញ្ញាមួយដ៏ខ្លាំងចំពោះរដ្ឋាភិបាលក្នុងការប្រឹងប្រែងបន្តកំណែទម្រង់ផ្នែកហិរញ្ញវត្ថុសាធារណៈ ក៏ដូចជាកំណែទម្រង់នៅគ្រប់ការដ្ឋានទាំងអស់ និងការដ្ឋានអភិវឌ្ឍន៍ដទៃទៀត»។ លោកយឹម សុវណ្ណ អ្នកនាំពាក្យគណបក្សសម រង្ស៊ី បានថែ្លងថា សេចក្តីព្រាងច្បាប់នេះបានទុកផ្លូវសម្រាប់ឲ្យមន្រ្តីមានអំណាចប្រព្រឹត្តអំពើពុករលួយដោយសារដីសម្បទានធំៗ និងរ៉ែ ដែលមានតម្លៃរាប់រយលានដុល្លារ មិនត្រូវបានដាក់នៅក្នុងច្បាប់លទ្ធកម្មនេះទេ។ «បើគ្មានគណបក្សប្រឆាំងនោះទេ បើគ្មានមតិប្រឆាំងនោះទេ សភាគ្មានអំណាច។ ហើយគ្មានតុល្យភាពរវាងអំណាចរបស់រដ្ឋាភិបាលនិងអំណាចរបស់រដ្ឋសភានឹងកាន់តែចុះខ្សោយទៅៗ គ្មានការកែសម្រួល និងគ្មានការត្រួតពិនិត្យ។ នៅពេលដែលច្បាប់យកទៅអនុវត្តគ្មានប្រសិទិ្ធភាព នៅពេលដែលច្បាប់ធើ្វគ្រាន់តែជាការបិទបាំងនូវទង្វើពុករលួយរបស់អ្នកមានអំណាច ប្រជាពលរដ្ឋជាអ្នករងគ្រោះ។ យើងនឹងនៅបន្តការបាត់បង់ថវិកាមួយឆ្នាំៗ រាប់រយលានដុល្លារ ដោយសារតែអំពើពុករលួយ»។ លោកកឹម សុខា ប្រធានគណបក្សសិទិ្ធមនុស្ស បានថែ្លងថា គណបក្សសិទិ្ធមនុស្សគាំទ្រនូវខ្លឹមសារច្បាប់លទ្ធកម្មសាធារណៈនេះ ប៉ុន្តែគណបក្សសិទិ្ធមនុស្សព្រួយបារម្ភចំពោះការអនុវត្តច្បាប់នេះជាក់ស្តែង។ «ច្បាប់ព្រឹកមិញល្អ ប៉ុន្តែយើងបារម្ភក្នុងការអនុវត្តដែលប៉ះពាល់ ប្រកាន់បក្ខពួក ប្រើប្រាស់អំណាចបុគ្គលពីលើមក។ អាហ្នឹងហើយជាឧបសគ្គនូវការអនុវត្តច្បាប់ទៅវិញទេ»។ លោកគាត ឈន់បានបញ្ជាក់ថា អ្នកប្រព្រឹត្តអំពើពុករលួយនឹងទទួលទោសតាមច្បាប់ប្រឆាំងអំពើពុករលួយ និងក្រមព្រហ្មទណ្ឌ ហើយច្បាប់នេះបានធើ្វឡើងយោងតាមច្បាប់ប្រឆាំងអំពើពុករលួយដែលតម្រូវឲ្យមន្រ្តីប្រឆាំងអំពើពុករលួយមានសមត្ថកិច្ចស៊ើបអង្កេតលើបទល្មើសពុករលួយ។ លោកគាត ឈន់បានបន្តថា អង្គភាពរដ្ឋផ្សេងទៀត ដែលបានដឹងអំពីបទល្មើសពុករលួយទាំងឡាយ ត្រូវប្តឹងទៅអង្គភាពប្រឆាំងអំពើពុករលួយអំពីរឿងហេតុនៃបទល្មើសទាំងនេះ៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ៣ មករា ព្រឹក Posted: 02 Jan 2012 09:13 PM PST អេហ្ស៊ីប៖ រដ្ឋអាជ្ញាអេហ្ស៊ីបនឹងជជែកវែកញែកលើកចុងក្រោយរបស់ខ្លួននៅក្នុងការកាត់ទោសអតីតប្រធានាធិបតីហូស្ន៊ី មូបារ៉ាក់។ ការកាត់ទោសអាចនឹងចាប់ផ្តើមនៅថ្ងៃអង្គារនៅតុលាការក្នុងរដ្ឋធានីគែរ។ លោកមូបារ៉ាក់ ត្រូវរងការចោទប្រកាន់ពីអំពើពុករលួយនិងការពាក់ព័ន្ធក្នុងការស្លាប់ពួកបាតុករប្រឆាំងរដ្ឋាភិបាលរាប់រយនាក់ក្នុងអំឡុងពេលនៃបាតុកម្មកាលពីឆ្នាំទៅ ដែលបានទម្លាក់មេដឹកនាំដ៏យូរអង្វែងចេញពីតំណែង។ លោកមិនសារភាពទទួលកំហុសនោះទេ។ កូនប្រុស២នាក់របស់លោកនិងអតីតរដ្ឋមន្រ្តីក្រសួងមហាផ្ទៃនិងមន្រ្តីជាន់ខ្ពស់ក្នុងជួរប៉ូលីសជាចុងចោទរួមដៃ។ កូរ៉េខាងត្បូង៖ ប្រធានាធិបតីកូរ៉េខាងត្បូង លី ម្យុងបាក់ និយាយថាគាត់មានឱកាសដើម្បីធ្វើឲ្យមានទំនាក់ទំនងកាន់តែប្រសើរឡើងជាមួយកូរ៉េខាងជើង តែលោកព្រមានថាកូរ៉េខាងជើងត្រូវបញ្ចៀសការបង្កហេតុនានា។ សហរដ្ឋអាមេរិក៖ អ្នកប្រកួតប្រជែងតំណែងបេក្ខជនប្រធានាធិបតីសហរដ្ឋអាមេរិកខាងគណបក្សសាធារណរដ្ឋកំពុងធ្វើយុទ្ធនាការណ៍នៅនាទីចុងក្រោយនៅក្នុងរដ្ឋ អាយអូវ៉ាភាគកណ្តាល មុនពេលការធ្វើការសាកល្បងការបោះឆ្នោតលើកដំបូងនៅថ្ងៃអង្គារដើម្បីជ្រើសរើសបេក្ខជនចូលរួមការបោះឆ្នោតថ្នាក់ជាតិនៅខែវិច្ឆិកា។ សហរដ្ឋអាមេរិក៖ ភាពអត់ការងារធ្វើនៅក្នុងសហរដ្ឋអាមេរិក បានប្រសើរឡើងកាលពីឆ្នាំទៅ តែនៅតែខ្ពស់ជាងកម្រិតធម្មតា ហើយបានក្លាយជាបញ្ហានយោបាយដ៏សំខាន់មួយមុនពេលបោះឆ្នោតប្រធានាធិបតីនៅខែវិច្ឆិកា។ អឺរ៉ុប៖ អេស្ប៉ាញបានព្រមានកាលពីថ្ងៃច័ន្ទថាឱនភាពរបស់រដ្ឋាភិបាលកាលពីឆ្នាំទៅ អាចច្រើនជាងតួលេខដែលខ្លួនបានព្យាករណ៍កាលពីប៉ុន្មានថ្ងៃមុន។ ប៉ាគីស្ថាន៖ អង្គការណាតូសង្ឃឹមថានឹងផ្សះផ្សារទំនាក់ទំនងជាមួយប៉ាគីស្ថានយ៉ាងឆាប់រហ័សដើម្បីបើកផ្លូវផ្គត់ផ្គង់ដ៏សំខាន់សម្រាប់កងទ័ពរបស់ខ្លួនដែលកំពុងប្រយុទ្ធនៅអាហ្វហ្គានីស្ថានដែលជាប្រទេសជិតខាងឡើងវិញ។ អ៊ីរ៉ង់៖ រូបិយប័ណ្ណរបស់អ៊ីរ៉ង់បានធ្លាក់ចុះដល់កម្រិតទាបបំផុតបើប្រៀបធៀបនឹងដុល្លាអាមេរិក២ថ្ងៃបន្ទាប់ពីប្រធានាធិបតីសហរដ្ឋអាមេរិក បារ៉ាក់ អូបាម៉ា បានចុះហត្ថលេខាលើច្បាប់ដាក់ទណ្ឌកម្មសេដ្ឋកិច្ចថ្មីដែលអាចមានផលប៉ះពាល់ធនាគារកណ្តាលនិងប្រព័ន្ធហិរញ្ញវត្ថុរបស់អ៊ីរ៉ង់។ ស៊ីរី៖ ប្រធានសម្ព័ន្ធអារ៉ាប់ និយាយថាពួកអ្នកលួចឆ្មក់បាញ់និងការបាញ់ប្រហារតបតគ្នានៅតែជាការគម្រាមកំហែងនៅក្នុងទីក្រុងនានានៅស៊ីរី ទោះបីមានវត្តមានពួកអ្នកឃ្លាំមើលរបស់សម្ព័ន្ធអារ៉ាប់ក៏ដោយ។ តូកគី៖ ការផ្ទុះគ្រាប់បែកនៅព្រឹកនេះក្នុងតំបន់ភាគកណ្តាលតួកគីបានសម្លាប់កម្មករនៅឃ្លាំងផ្ទុកគ្រាប់រំសេវ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
