VOA News: ព័ត៌មាន: “អាជ្ញាធរ៖ គ្រោះថ្នាក់ចរាចរណ៍នៅកម្ពុជាកើនឡើងបណ្តាលមកពីកត្តាមនុស្សនិងថ្នល់” plus 3 more |
- អាជ្ញាធរ៖ គ្រោះថ្នាក់ចរាចរណ៍នៅកម្ពុជាកើនឡើងបណ្តាលមកពីកត្តាមនុស្សនិងថ្នល់
- ធម្មយាត្រាទៅបូជនីយដ្ឋានជើងឯកបួងសួងសុំយុត្តិធម៌សម្រាប់ជនរងគ្រោះ
- អ្នកច្បាប់សុំឱ្យមានយុត្តិធម៌ក្នុងពេលផ្លាស់ប្តូរចៅក្រមពេលខាងមុខ
- ចៅក្រមស៊ើបអង្កេតបដិសេធសំណើសុំបន្តការស៊ើបអង្កេតរឿងក្តី០០៣
| អាជ្ញាធរ៖ គ្រោះថ្នាក់ចរាចរណ៍នៅកម្ពុជាកើនឡើងបណ្តាលមកពីកត្តាមនុស្សនិងថ្នល់ Posted: 07 Jun 2011 02:15 PM PDT នៅដើមឆ្នាំនេះ គ្រោះថ្នាក់ចរាចរណ៍មានចំនួន២០០១ករណី គឺបានកើនឡើងបើប្រៀបធៀបទៅ និងរយៈពេលដូចគ្នាកាលពីឆ្នាំទៅ។ នេះបើតាមសម្តីរបស់លោក ពៅ ម៉ាលី អគ្គនាយករងនៃអគ្គនាយកដ្ឋានដឹកជញ្ជូន ដែលបានមានប្រសាសន៍នៅក្នុងសិក្ខាសាលាស្តីអំពីយុទ្ឋនាការអប់រំសាធារណៈអំពីសុវត្ថិភាពចរាចរណ៍នៅថ្ងៃអង្គារនេះ។ លោកថ្លែងថា នៅក្នុងរយៈពេលប្រាំខែដើមឆ្នាំ២០១១នេះ យ៉ាងតិចមានមនុស្សចំនួន៨០១នាក់បានបាត់បង់ជីវិតដោយសារគ្រោះថ្នាក់ចរាចរណ៍។លោកបានមានប្រសាសន៍ទៀតថា៖ «យើងនាំគ្នាចុះទៅពិនិត្យ វាពាក់ព័ន្ធទៅនឹងកត្តាមនុស្សផង កត្តាផ្លូវថ្នល់ផង ដោយសារគាត់មានការធ្វេសប្រហែស ។ អញ្ចឹងទៅ វានាំឲ្យមានបញ្ហាហ្នឹងកើតឡើង»។ របាយការណ៍ប្រចាំឆ្នាំ២០១០របស់ប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ផ្លូវគោកបានឲ្យដឹងថា មានជនរងគ្រោះបានបាត់បង់ជីវិតដោយសារគ្រោះថ្នាក់ចរាចរណ៍ចំនួន១.៨១៦នាក់ និងអ្នករងរបួសធ្ងន់ចំនួន៦.៧១៨នាក់។ ជនរងគ្រោះដែលបានស្លាប់បាត់បង់ជីវិតកើនឡើងពីរដង នៅក្នុងរយៈពេលប្រាំឆ្នាំកន្លងទៅនេះ។ អាត្រាស្លាប់ចំនួន១១នាក់ បើធ្វើការប្រៀបធៀបជាមួយនឹងយានយន្ត ដែលបានចុះបញ្ជីចំនួន ១០.០០០គ្រឿង ដែលកត្តានេះបានធ្វើឲ្យកម្ពុជាក្លាយជាប្រទេសមួយ ដែលមានអត្រាមរណៈដោយគ្រោះថ្នាក់ចរាចរណ៍ខ្ពស់នៅក្នុងតំបន់អាស៊ី។ នៅក្នុងរបាយការណ៍ដដែលបានឲ្យដឹងថា មូលហេតុចម្បង ដែលនាំឲ្យមានគ្រោះថ្នាក់ចរាចរណ៍ គឺកត្តាមនុស្ស ដែលបើកបរដោយមានទទួលទានជាតិស្រវឹង និងប្រជែងគ្នា។ អ្នកប្រើប្រាស់ម៉ូតូជាយុវជនវ័យក្មេង។ អ្នកថ្មើរជើងគឺជាអ្នកដែលប្រឈមនឹងគ្រោះថ្នាក់ចរាចរណ៍ច្រើនជាងគេ។ លោក ពៅ ម៉ាលី បានមានប្រសាសន៍ថា នៅក្នុងទីក្រុងភ្នំពេញអត្រាគ្រោះថ្នាក់ចរាចរណ៍បានថយចុះ ក៏ប៉ុន្តែបានកើនឡើងនៅតាមបណ្តាខេត្តមួយចំនួន ដូចជាខេត្តព្រះស៊ីហនុ និងនៅខេត្តកំពង់ធំជាដើម។ លោកបានប្រាប់វីអូអេខ្មែរយ៉ាងដូច្នេះថា៖ «វាលក្ខណៈជាគ្រួសារ។ ឧទាហរណ៍ ដូចជានៅកំពង់សោម នៅពេជ្រនិល នៅកំពង់ធំ។ វាម្តងៗ អស់ច្រើន ក៏ប៉ុន្តែចំនួនគ្រោះថ្នាក់វានៅតិចទេ ដោយសារដូចជាគាត់ទៅការថ្ងៃមុនអស់២២នាក់ នៅកំពង់ សោម ជ្រោះពេជ្រនិលមួយគ្រួសារ ហើយនៅខាងកំពង់ធំជាង១០នាក់ដែរ»។ របាយការណ៍ប្រចាំឆ្នាំរបស់ប្រព័ន្ធព័ត៌មានជនរងគ្រោះបានឲ្យដឹងថា គ្រោះថ្នាក់ចរាចរណ៍បានធ្វើឲ្យកម្ពុជាបានខាតបង់ថវិកាចំនួន២៧៩លានដុល្លារអាមេរិកក្នុងឆ្នាំ២០១០កន្លងទៅនេះ៕ This posting includes an audio/video/photo media file: Download Now |
| ធម្មយាត្រាទៅបូជនីយដ្ឋានជើងឯកបួងសួងសុំយុត្តិធម៌សម្រាប់ជនរងគ្រោះ Posted: 07 Jun 2011 02:12 PM PDT ព្រះសង្ឃព្រះពុទ្ធសាសនា និងពុទ្ធបរិស័ទប្រមាណ២៥០នាក់ បានដង្ហែធម្មយាត្រាទៅកាន់មជ្ឈមណ្ឌលប្រល័យពូជសាសន៍ជើងឯកនៅថ្ងៃអង្គារនេះ ដើម្បីបួងសួងសុំយុត្តិធម៌ និងសន្តិភាពសម្រាប់ជនរងគ្រោះ ដែលបានបាត់បង់ជីវិតនៅក្នុងរបបខ្មែរក្រហម។ ព្រះសង្ឃប្រមាណ២០០អង្គ មកពីប្រទេសជប៉ុន ភូមា ថៃ និងពុទ្ធបរិស័ទ ប្រមាណ៥០នាក់បានដង្ហែធម្មយាត្រាចេញពីមជ្ឈមណ្ឌលចតុទិសសង្គហ ដែលមានចម្ងាយប្រមាណ៣គីឡូម៉ែត្រ ពីមជ្ឈមណ្ឌលប្រល័យពូជសាសន៍ជើងឯក។ វាលពិឃាតជើងឯកគឺជាសារមន្ទីរដ៏ធំមួយនៅភាគនិរតីនៃទីក្រុងភ្នំពេញ។ វាលពិឃាតនោះជាទីតាំងសម្លាប់បុរស ស្ត្រី និងកុមារប្រមាណ១៧.០០០នាក់ ដែលត្រូវបានបញ្ចូនចេញពីមន្ទីរស-២១ ដោយពួកខ្មែរក្រហម។ មជ្ឈមណ្ឌលប្រល័យពូជសាសន៍ជើងឯកគឺនៅតែជាកន្លែងគួរឱ្យស្អប់ខ្ពើម និងទុក្ខសោកដោយមានស្តូបតម្កល់លលាដ៍ក្បាលជនរងគ្រោះនៃរបបខ្មែរក្រហមជាង៨.០០០នាក់ ដែលដាក់តម្រៀបតាមអាយុ និងភេទ។ នៅជុំវិញស្តូបដែលត្រូវបានសង់សម្រាប់សម្តែងទុក្ខចំពោះអ្នកស្លាប់ និងគោរពវិញ្ញាណក្ខន្ធដល់អ្នកស្លាប់ទាំងនោះ ក៏មានរណ្តៅសាសពជាច្រើនផងដែរ។ ធម្មយាត្រានេះបានធ្វើឡើងខណៈដែលសាលាក្តីខ្មែរក្រហមគ្រោងនឹងបើកសវនាការបឋមលើសំណុំរឿងលេខ០០២ ដែលពាក់ព័ន្ធនួន ជា អតីតប្រធានរដ្ឋសភាខ្មែរក្រហម ខៀវ សំផន អតីតប្រធានរដ្ឋខ្មែរក្រហម អៀង សារី អតីតរដ្ឋមន្ត្រីការបរទេសខ្មែរក្រហម និងអៀង ធីរី អតីតរដ្ឋមន្ត្រីក្រសួងសង្គមកិច្ចខ្មែរក្រហមនៅចុងខែមិថុនានេះ។ លោកសឹង គា ប្រធានចតុទិសសង្គហកម្ពុជា បានថ្លែងថា ធម្មយាត្រាមកកាន់បូជនីយដ្ឋានជើងឯកនេះរំលឹកវិញ្ញាណក្ខន្ធអ្នកស្លាប់នៅក្នុងរបបខ្មែរក្រហម និងអ្នកស្លាប់ដោយសារសង្គ្រាម គ្រោះធម្មជាតិ ការសម្លាប់នៅជុំវិញពិភពលោក។ លោកសឹង គា បានបញ្ជាក់ថា ព្រះសង្ឃ និងពុទ្ធបរិស័ទបានធ្វើសមាធិ សូត្រធម៌ និងបួងសួង ដើម្បីយុត្តិធម៌ និងសន្តិភាពសម្រាប់ប្រជាពលរដ្ឋខ្មែរដែលបានស្លាប់នៅក្នុងរបបខ្មែរក្រហម។ លោកបានប្រាប់វីអូអេខ្មែរថា៖ «យើងធ្វើតាមការសម្តែងព្រះធម៌ ធ្វើយ៉ាងណាឱ្យយើងមានយុត្តិធម៌ ដើម្បីឱ្យមានភាពស្ងាប់ស្ងាត់ ទាំងអ្នករស់នៅនឹងទទួលបានយុត្តិធម៌ពីការកាត់ក្តីខ្មែរក្រហម និងសូមឱ្យអ្នកដែលស្លាប់ទៅបានស្ងប់ចិត្តពីការកាត់ទោសខ្មែរក្រហម»។ ព្រះតេជគុណ ប្រាក់ សារ៉េត គង់នៅវត្តឧណ្ណាលោម បានមានសង្ឃដីកាថា ការធ្វើធម្មយាត្រានេះ មានគោលបំណងឧទ្ទិសផល្លានិសង្ឃជូនចំពោះវិញ្ញាណក្ខន្ធអ្នកស្លាប់នៅក្នុងជំនាន់ខ្មែរក្រហម។ ព្រះតេជគុណ ប្រាក់ សារ៉េត បានបញ្ជាក់ថា ការកាត់ទោសមេដឹកនាំខ្មែរក្រហម តាមរយៈតុលាការដែល កំពុងតែធ្វើការវិនិច្ឆ័យ ដើម្បីរកឱ្យឃើញស ខ្មៅ ឬដើម្បីបញ្ជាក់ថា អ្នកដែលបានធ្វើអំពើអាក្រក់ហើយ មិនអាចគេចរួចអំពីចំណងនៃច្បាប់បានឡើយ។ «សម័យនោះមនុស្សប្រមាណ២០.០០០នាក់ត្រូវបានសម្លាប់នៅវាលពិឃាតជើងឯក។ ចំណុចសំខាន់ ដែលព្រះសង្ឃធ្វើធម្មយាត្រាមកកាន់កន្លែងវាលជើងឯកនេះសំខាន់ណាស់ក្នុងគោលបំណង ដើម្បីឧទ្ទិសផល្លានិសង្ឃជូនដល់អ្នក ដែលបានស្លាប់ទៅក្នុងជំនាន់ប៉ុល ពត ទូទាំងប្រទេសកម្ពុជា ក៏ដូចជាទូទាំងពិភពលោកដែរ»។ របបខ្មែរក្រហម ត្រូវបានបន្ទោសចំពោះការសម្លាប់ប្រជាពលរដ្ឋខ្មែរអស់ជិត២.០០០.០០០នាក់ រវាងពីឆ្នាំ១៩៧៥ ដល់ឆ្នាំ១៩៧៩ ដោយវិធីបង្អត់ចំណីអាហារ ការបង្ខំឱ្យធ្វើធ្ងន់ហួសកម្លាំង ការប្រហារជីវិត ដោយគ្មានការជំនុំជម្រះ និងជំងឺជាដើម៕ This posting includes an audio/video/photo media file: Download Now |
| អ្នកច្បាប់សុំឱ្យមានយុត្តិធម៌ក្នុងពេលផ្លាស់ប្តូរចៅក្រមពេលខាងមុខ Posted: 07 Jun 2011 02:12 PM PDT រយៈពេលនៃការផ្លាស់ប្តូរតំណែងនិងការដាក់ឲ្យមន្ត្រីយុត្តិធម៌ចូលនិវត្តន៍បានឈានមកដល់ហើយ។ តាមសេចក្តីរាយការណ៍ខ្លះឲ្យដឹងថា មានមន្ត្រីមួយចំនួននឹងមិនត្រូវធ្វើការផ្លាស់ប្តូរទេ បើទោះបីជាពេលវេលាផ្លាស់ប្តូរបានមកដល់តាមកំណត់ច្បាប់ក៏ដោយ។ មុនពេលកិច្ចប្រជុំ ឧត្តមក្រុមប្រឹក្សានៃអង្គចៅក្រមដែលត្រូវគេគ្រោងនឹងប្រព្រឹត្តទៅនៅថ្ងៃពុធនេះ ក្រុមអ្នកច្បាប់មួយចំនួនក្នុងប្រទេសកម្ពុជាបានទទូចសុំឲ្យមាន តម្លាភាព និង យុត្តិធម៌ចំពោះការសម្រេចផ្លាស់តំណែងធ្វើការនិងការដាក់ឲ្យចូល និវត្តន៍ចៅក្រមនិងព្រះរាជអាជ្ញាទូទាំងប្រទេស។ ការផ្លាស់ទីកន្លែងរៀងរាល់បួនឆ្នាំម្តងតាមគោលការណ៍សម្រេចដំបូងត្រូវគេរាយ ការណ៍មកថា បានអនុវត្តយ៉ាងតិចពីរដងហើយមកទល់ពេលនេះ។ សម្រាប់ការផ្លាស់ប្តូរជុំទី៣ នូវចៅក្រមនិងព្រះរាជអាជ្ញាជាថ្មី រួមនឹងការសម្រេចដាក់ឲ្យ ចូលនិវត្តន៍ផង គឺត្រូវរង់ចាំការសម្រេចរបស់កិច្ចប្រជុំឧត្តមក្រុមប្រឹក្សានៃអង្គចៅក្រម ដែលបានពន្យាពេលប្រជុំជាច្រើនខែមកហើយនោះ។ អ្នកច្បាប់និងមន្ត្រីយុត្តិធម៌ ខ្លះបានអះអាងថា ចៅក្រមនិងព្រះរាជអាជ្ញាជាច្រើននាក់ធ្វើការនៅតុលាការ ខេត្ត ក្រុងសំខាន់ៗមួយចំនួននឹងមិនត្រូវគេផ្លាស់ទេ។ ហើយការចូលនិវត្តន៍ក៏មិនអាចកើតមានដែរចំពោះមន្ត្រីតុលាការជាច្រើន ទោះបីដល់អាយុកំណត់ក្តី។ លោក សុខ សំអឿន នាយកអ្នកច្បាប់ការពារសិទ្ធិកម្ពុជាបានអះអាងថាជាទូទៅ លោកសង្កេតឃើញចៅក្រមនិងព្រះរាជអាជ្ញាផ្លាស់ទៅកន្លែងផ្សេងតែក្រោយមកអ្នកខ្លះក៏វិលចូលដល់កន្លែងដើមវិញ ជាពិសេសកន្លែងដែលគេចង់បានជាងគេគឺតុលាការក្រុងភ្នំពេញ។ «ហេតុដូច្នេះបើសិនចង់ឲ្យរក្សាការផ្លាស់ប្តូរហ្នឹងជួយការពារដល់ឯករាជ្យភាពរបស់ចៅក្រម សំខាន់បំផុតឧត្តមក្រុមប្រឹក្សានៃអង្គចៅក្រមត្រូវរឹងមាំមិនអាច រក្សាទុកអ្ហេរ អ្នកនេះល្អសម្រាប់បក្ស ឬក៏អ្ហេអ្នកនេះល្អសម្រាប់រដ្ឋអីហ្នឹងគឺថា មិនអាចធ្វើអញ្ចឹងបានទេត្រូវតែធ្វើការផ្លាស់ប្តូរជាទៀងទាត់តែម្តង។ហើយកន្លងមកវាអាចមានបញ្ហាថាចុះបើប្រធានតុលាការផ្លាស់ទៅយ៉ាងម៉េច? បើសិនជាអញ្ចឹង ប្រធានតុលាការយើងអាចផ្លាស់តាមប្រធានតុលាការទៅមិនមែនមាន ន័យថា ប្រធានតុលាការក្រុងភ្នំពេញហ្នឹងពូកែជាងគេល្អជាងគេ មិនមែនអញ្ចឹង ទេគឺថាប្រធានតុលាការគឺឋានៈស្មើគ្នា គឺមានការផ្លាស់ប្តូរគ្រប់ខេត្តគ្រប់អីអញ្ចឹង ទៅ។ ហើយធ្វើឲ្យមានការទៀងទាត់ កុំឲ្យមកកន្លែងដដែល»។ លោក សុខ សំអឿនបានអះអាងថាលោកមិនសូវខ្វល់បារម្ភនឹងការចូលនិវត្តន៍ ប៉ុន្មានទេ ដោយលោកមើលឃើញពីសារៈសំខាន់នៃចៅក្រមចាស់ៗ មានបទ ពិសោធខ្ពស់ មិនកោតខ្លាចនិងសម្ពាធណាមួយ។ «ដូច្នេះចំពោះរឿងការចូលនិវត្តន៍ចៅក្រម ខ្ញុំដូចជាមិនសូវជាបញ្ហាសំខាន់ទេ។តែបើយើងដាក់លក្ខខណ្ឌថា បើអ្នកឯងមិនចូលនិវត្តន៍ទេ គឺថាបានត្រឹមធ្វើចៅ ក្រមកាត់ក្តី ហើយមិនអាចធ្វើជាប្រធានបានទេ។បើសិនជាអញ្ចឹងខ្ញុំថាល្អដែរ ព្រោះយើងក៏យើងត្រូវការពួកគាត់ដែលមានបទពិសោធ ហើយដែលកាន់តែចាស់ទុំ ហើយដូចថាកាន់តែយុត្តិធម៌ហ្នឹង នៅជួយរកយុត្តិធម៌ ផ្តល់យុត្តិធម៌ឲ្យប្រជាពលរដ្ឋក៏បានដែរតែប្រការសំខាន់គឺត្រូវមានលក្ខខណ្ឌខ្លះកុំឲ្យនៅតែធ្វើធំ រហូត។ហើយយកល្អគឺថា អ្នកឯងចៅក្រមតុលាការកំពូលក៏ដោយ បើសិនជា ចូលនិវត្តន៍ហើយ មកចៅក្រមថ្នាក់ក្រោម ព្រោះបើគាត់នៅស្រឡាញ់វិជ្ជាជីវៈ អាហ្នឹង អូខេ គាត់ប្រាកដជាខំប្រឹងធ្វើឲ្យសេចក្តីសម្រេចរបស់គាត់ល្អប្រសើរ»។ ដោយសារគេគិតថាជាកន្លែងល្អជាងគេផងនោះ តុលាការក្រុងភ្នំពេញជាកន្លែងដែលក្រុមព្រះរាជអាជ្ញានិងចៅក្រម និងមន្ត្រីយុត្តិធម៌ទូទាំងប្រទេសសំឡឹង មើលមិនដាក់ភ្នែកពីការផ្លាស់ប្តូរ ពីការចូលនិវត្តន៍ ពីការដាក់ចៅក្រម និងព្រះរាជ អាជ្ញាថ្មីឲ្យបម្រើការ។ ចៅក្រមនិងព្រះរាជអាជ្ញាក្រុងភ្នំពេញមួយចំនួនត្រូវគេមើលឃើញថានៅតែបន្ត បំពេញមុខនាទីកន្លែងដដែលទោះដល់ពេលផ្លាស់តំណែង នឹងដល់អាយុចូល និវត្តន៍ក្តី។ ដោយឡែកចៅក្រម និងព្រះរាជអាជ្ញានៅខាងភាគឦសានវិញត្រូវ គេរាយការណ៍មកថា ត្រូវគេផ្លាស់ប្តូរទៅកាន់តែតំបន់ភាគឦសានដដែលៗ ដូចគ្នានឹងខេត្តដាច់ស្រយាលមួយចំនួនដែរ។ លោក កៅ សុផា មេធាវីមួយរូបបានអះអាងថាការផ្លាស់តំណែងតុលាការសម្រាប់ ចៅក្រម និងព្រះរាជអាជ្ញាមានការរើសអើង។ លោកបានថ្លែងថាស្ថាប័នតុលាការគួរត្រូវធ្វើយ៉ាងណាឲ្យមានគំរូផ្នែកយុត្តិធម៌ដើម្បីពលរដ្ឋមានការជឿទុកចិត្ត។ លោកបានចោទសួរ ថាបើតុលាការខ្លួនឯងមិនយុត្តិធម៌ផងតើឲ្យប្រជាពលរដ្ឋ ជាង១០លាននាក់ជឿយ៉ាងម៉េចបាន? «សួរថាឲ្យប្រជាពលរដ្ឋគិតយ៉ាងម៉េចនៅពេលដែល «ច្បាប់» ពួកខាងតុលាការធ្វើខ្លួនឯងថា អាយុ៦០ឆ្នាំចូលនិវត្តន៍ ហើយថាបួនឆ្នាំឲ្យមានការផ្លាស់ប្តូរពីកន្លែង មួយទៅកន្លែងមួយ។ហើយស្រាប់តែពេលនេះឃើញថាអ្នកខ្លះក៏ផ្លាស់ទៅអ្នកខ្លះក៏មិនបានផ្លាស់ទៅ។ អញ្ចឹងធ្វើឡើង ឃើញថាវាអត់ស្មើភាព។បើអត់ស្មើភាព យើងឃើញថាវាអត់មានយុត្តិធម៌ក្នុងសង្គម»។ ថ្លែងក្នុងលក្ខខណ្ឌពុំឲ្យប្រាប់ឈ្មោះដោយខ្លាចការស្តីបន្ទោស មន្ត្រីយុត្តិធម៌និង មន្ត្រីតុលាការបាន អះអាងថាក្រសួងយុត្តិធម៌បានធ្វើរបាយការណ៍ដាក់ជូន គណៈរដ្ឋមន្ត្រីអំពីឈ្មោះចៅក្រមនិងព្រះរាជអាជ្ញាដែលត្រូវផ្លាស់ប្តូរកន្លែងធើ្វការ នោះជាច្រើនខែហើយ ដោយស្នើឈ្មោះចៅក្រមនិងព្រះរាជ្ញអាជ្ញាជាច្រើនដែលត្រូវផ្លាស់ប្តូរ។ មន្ត្រីដដែលបានអះអាងថា ការសម្រេចគឺស្ថិតនៅលើគណៈរដ្ឋមន្ត្រីថាត្រូវបន្ថែមប៉ុន្មាន ផ្លាស់ប្តូរប៉ុន្មាន ផ្លាស់នរណា ទុកនរណា ផ្លាស់ទៅ ទីណាជាដើម មុនពេលធ្វើបញ្ជីឈ្មោះចុងក្រោយស្នើទៅកាន់កិច្ចប្រជុំឧត្តម ក្រុមប្រឹក្សានៃអង្គចៅក្រម។ មន្ត្រីដដែលពុំបានបញ្ជាក់ពីបញ្ជីឈ្មោះចូលនិវត្តន៍ នៃមន្ត្រីតុលាការនោះទេ។ ទោះជាយ៉ាងណាក៏ដោយ ឧត្តមក្រុមប្រឹក្សានៃអង្គចៅក្រមដ៏មានឥទ្ធិពលត្រូវគេរាយការណ៍មកថាគ្រោងនឹងបើកកិច្ចប្រជុំសម្ងាត់នៅថ្ងៃ៨ ខែមិថុនាដើម្បីសម្រេច កិច្ចការ ទាក់ទងនឹងការផ្លាស់ប្តូរចៅក្រមនិងព្រះរាជអាជ្ញា ឬអាចជជែកពីការចូល និវត្តន៍ផងដែរ។ ការដាក់ពិន័យចៅក្រមនិងព្រះរាជអាជ្ញាមួយចំនួនដែលប្រព្រឹត្តល្មើស ក៏ត្រូវគេរំពឹងថានឹងពិភាក្សាសម្រេចផងដែរក្នុងកិច្ចប្រជុំពេញអង្គ ដែលគេចាត់ទុកថាចាំតែសម្រេចតាមអ្វីដែលក្រុមប្រឹក្សាវិន័យបានសម្រេចជាមុននោះ។ សមាជិកឧត្តមក្រុមប្រឹក្សាមាន៩រូប ភាគច្រើនមកពីតុលាការទាំង៣ថ្នាក់របស់ ប្រទេស។ ព្រះមហាក្សត្រជាព្រះរាជប្រធានស្ថាប័ននេះដែលមានសិទ្ធិដាក់ ទោសទណ្ឌ ពិន័យលើមន្ត្រីយុត្តិធម៌ទូទាំងប្រទេសនិងផ្លាស់ប្តូរ។ អ្នកច្បាប់ និង ក្រុមមន្ត្រីតុលាការមួយចំនួនបាននិយាយថាព្រះរាជអាជ្ញានិងចៅ ក្រមនៃតុលាការក្រុងភ្នំពេញមួយចំនួនដែលធ្វើការលើសពី៦ឆ្នាំទៅ១១ឆ្នាំមិន ត្រូវគេផ្លាស់ប្តូរទេ តែអ្នកទើបធ្វើការបានបួនឆ្នាំយ៉ាងតិចពីរនាក់ត្រូវគេគ្រោងនឹង ធ្វើការផ្លាស់ប្តូរក្នុងកិច្ចប្រជុំនៅថ្ងៃពុធនេះ។ នៅឧត្តមក្រុមប្រឹក្សានៃអង្គ ចៅក្រមក៏ដូចគ្នាដែរ មានសមាជិកមួយចំនួនដែលដល់អាយុចូលនិវត្តន៍ហើយ តែនៅបន្តការងារជាសមាជិកឧត្តមក្រុមប្រឹក្សាផងនិងជាមន្ត្រីតុលាការជាន់ខ្ពស់ផង។ ក្រុមអ្នកច្បាប់បានចោទសួរផងដែរថា ចុះបើពួកគេកាត់ក្តីខុសតើនរណាជាអ្នកដាក់ទោស និងពិន័យរូបគាត់ ដោយឡែកបើឧត្តមក្រុមប្រឹក្សាចង់កោះប្រជុំ ដើម្បីដាក់ឲ្យចូលនិវត្តន៍ឬផ្លាស់ប្តូរ សមាជិកនៃស្ថាប័នឧត្តមក្រុមប្រឹក្សា តើសមាជិកនៃស្ថាប័ននេះត្រូវគិតយ៉ាងណា? «ព្រោះអីសមាជិកឧត្តមក្រុមប្រឹក្សាមួយចំនួនក៏គាត់ដល់អាយុចូលនិវត្តន៍ដែរ។ ហើយសមាជិកឧត្តមមួយចំនួនក៏គាត់ត្រូវដល់ពេលវេលាដែលត្រូវផ្លាស់ប្តូរដែរ។ អញ្ចឹងហើយវាជាបញ្ហាមួយជាចំណោទដែរ អញ្ចឹងបើគាត់ធ្វើជា អាប៊ីត (អាជ្ញាកណ្តាល) ផងអ្នកទាត់បាល់ផងប្រហែលជាគាត់មិនអាចលើកដៃ ឬក៏គាត់មិនអាចសម្រេចថាឲ្យគាត់ចូលនិវត្តន៍ ឲ្យគាត់ផ្លាស់ប្តូរទេ។ នេះជាចំណុចលំបាក»។ លោកមេធាវីកៅ សុផា ដែលនិយាយពីការណ៍ដែលមានកិច្ចប្រជុំតិចតួចរបស់ឧត្តមក្រុមប្រឹក្សានៃអង្គចៅក្រមបានទទូចថាការធ្វើច្បាប់សហលក្ខន្តិកៈចៅក្រមនិងព្រះរាជអាជ្ញា និងការកែប្រែច្បាប់ប្រព្រឹត្តទៅនៃឧត្តមក្រុមប្រឹក្សានៃអង្គចៅក្រមជារឿងចាំបាច់ក្នុងការកែទម្រង់ប្រព័ន្ធតុលាការ។ លោកសុផា និងអ្នកច្បាប់ដទៃទៀតស្តីបន្ទោសរដ្ឋាភិបាលពីការខកខានចំពោះការមិនរៀបចំការបោះឆ្នោត ដែលចូលរួមដោយចៅក្រមនិងព្រះរាជអាជ្ញាទូទាំងប្រទេសដើម្បីជ្រើសរើស សមាជិកឧត្តមក្រុមប្រឹក្សានៃអង្គចៅក្រមបីនាក់ក្នុងចំណោម៩នាក់។ ក្រុមអ្នកច្បាប់ក៏បានស្តីបន្ទោសផងដែរថារដ្ឋាភិបាលមិនកាត់ផ្តាច់សមាជិកឧត្តមក្រុមប្រឹក្សាផ្សេង ទៀតពីប្រធាន និងព្រះរាជអាជ្ញានៅតុលាការទាំងបីថ្នាក់។ ហើយមិនបានធ្វើ ច្បាប់សហលក្ខន្តិកៈសម្រាប់ចៅក្រមព្រះរាជអាជ្ញាដែលមានសេចក្តីព្រាងឡើង ជាង១០ឆ្នាំមកហើយនោះដែរ។ លោក បណ្ឌិត ឡៅ ម៉ុងហៃអតីតអ្នកសា្រវជ្រាវជាន់ខ្ពស់នៃគណៈកម្មការសិទ្ធិ មនុស្សអាស៊ីបានថ្លែងថា ការពន្យាការធ្វើច្បាប់សហលក្ខន្តិកៈចៅក្រមនិងព្រះ រាជអាជ្ញានាំឲ្យមានការសង្ស័យលើការអនុវត្តន៍ច្បាប់ នីតិរដ្ឋក្នុងប្រទេសកម្ពុជា និងប៉ះពាល់ដល់ការកាត់ក្តីប្រកបដោយយុត្តិធម៌។ «ដូច្នេះការពន្យាអញ្ចឹងទៅខ្ញុំថាធ្វើឲ្យមានការងឿងឆ្ងល់អំពីលក្ខណៈច្បាប់របស់ តុលាការខ្មែរយើងហ្នឹង។ រួចប្រព័ន្ធតុលាការដឹងស្រាប់ហើយជាប្រព័ន្ធសម្រាប់ អនុវត្តច្បាប់ រកយុត្តិធម៌ទៅតាមច្បាប់។ដូច្នេះវាមានការមន្ទិលសង្ស័យ ខ្ញុំមិន មែនថាខុសច្បាប់ទេ ប៉ុន្តែវាអត់ទាន់មានលក្ខណៈច្បាប់ត្រឹមត្រូវ»។ លោកម៉ុង ហៃ ថ្លែងថាច្បាប់សហលក្ខន្តិកៈមន្ត្រីរាជការស៊ីវិលត្រូវគេធ្វើរួចហើយ។ ច្បាប់នោះត្រូវគេយកមកអនុវត្តន៍តាំងពីទសវត្សរ៍១៩៩០។ ហើយច្បាប់សហលក្ខន្តិកៈចៅក្រមនិងព្រះរាជអាជ្ញាដ៏មានសារៈសំខាន់បំផុតផងនោះ គួធ្វើឲ្យបានចប់នៅពេលជាមួយគ្នានោះដែរ។ ក្រុមមន្ត្រីតុលាការមួយចំនួនបានអះអាងថា ការពន្យាពេលប្រជុំឧត្តមក្រុមប្រឹក្សានៃអង្គចៅក្រម ឬធ្វើច្បាប់សហលក្ខន្តិកៈ ចៅក្រម និងព្រះរាជអាជ្ញាអាចបង្កការលំបាកដល់ក្រុមចៅក្រម និងព្រះរាជអាជ្ញា រឿងបើកប្រាក់ខែដោយសារការគ្មានការសម្រេច និងព្រះរាជក្រិត។ ក្រុមមន្រ្តី ដដែលនិយាយថាការណ៍គ្មានកិច្ចប្រជុំគ្មានព្រះរាជក្រិតចេញអាចនាំឲ្យមានការគៃបន្លំប្រាក់ខែអ្នកដែលត្រូវចូលនិវត្តន៍។ មន្ត្រីដែលត្រូវចូលនិវត្តន៍ក៏មិនដឹងថា តើពួកគេត្រូវធ្វើការបន្តរហូតដល់ពេលណា គេបើកប្រាក់ខែចូលនិវត្តន៍ដោយរបៀបណា។ មន្ត្រីទទួលបន្ទុកឧត្តមក្រុមប្រឹក្សានៃអង្គចៅក្រមនិងរដ្ឋមន្ត្រីក្រសួងយុត្តិធម៌ពុំ អាចទាក់ទងបានដើម្បីអត្ថាធិប្បាយបំភ្លឺនោះទេ។ អ្នកទទួលទូរស័ព្ទបានប្រាប់ថា លោកមិនបាននៅ។ អ្នកនាំពាក្យក្រសួងយុត្តិធម៌ លោក យៃ ណារិនវិញបានអះ អាងថាលោកទើបតែចូលកាន់ការថ្មី។ លោកបង្វែរសំនួរទៅមន្ត្រីផ្សេង និង ក្រសួងទីស្តីការគណៈរដ្ឋមន្ត្រី។ ថ្លែងការពារកំណែទម្រង់របស់រដ្ឋាភិបាល លោក ស៊ុយ ម៉ុងលាង អគ្គលេខាធិការនៃក្រុមប្រឹក្សាកំណែទម្រង់ច្បាប់និងប្រព័ន្ធយុត្តិធម៌ បានអះអាង ថា អ្នកចូលនិវត្តន៍គឺត្រូវបានការបើកប្រាក់ខែ មិនមានបញ្ហាអ្វីទេ ព្រោះក្រសួង យុត្តិធម៌បានរៀបចំកិច្ចការងារនេះហើយ។ លោកបានទទួលស្គាល់ថាការអនុវត្តន៍ខ្លះ មានការចន្លោះប្រហោង នោះជារឿង ធម្មតា។ លោកបានបន្ថែមថាកិច្ចការកំណែទម្រង់ច្បាប់និងប្រព័ន្ធយុត្តិធម៌ដែល រដ្ឋាភិបាល កំពុងធ្វើបន្តគឺមិនអាចបំពេញចិត្តអ្នករិះគន់បានទេ ក៏ប៉ុន្តែអះអាងថា នឹងមាន ប្រយោជន៍សម្រាប់រយៈពេលវែង៕ This posting includes an audio/video/photo media file: Download Now |
| ចៅក្រមស៊ើបអង្កេតបដិសេធសំណើសុំបន្តការស៊ើបអង្កេតរឿងក្តី០០៣ Posted: 07 Jun 2011 02:12 PM PDT សហចៅក្រមស៊ើបអង្កេតសាលាក្តីខ្មែរក្រហម លោកយូ ប៊ុនឡេង និងលោក ស៊ីហ្កហ្វ្រ៊ិដ ប៊្លុង្គ (Siegfrid Blunk) នៅថ្ងៃអង្គារនេះបានច្រានចោលសំណើចំនួនពីររបស់សហព្រះរាជអាជ្ញាបរទេស គឺសំណើសុំឲ្យមានការស៊ើបអង្កេតបន្ថែមនៅក្នុងសំណុំរឿង០០៣ និងសំណើសុំឲ្យមានការពន្យាពេលក្នុងការទទួលពាក្យស្នើសុំតាំងខ្លួន ជាដើមបណ្តឹងរដ្ឋប្បវេណីរបស់ជនរងគ្រោះនៅក្នុងសំណុំរឿងដ៏ចម្រូងចម្រាស់នេះ។ កាលពីខែឧសភាសហព្រះរាជអាជ្ញាបរទេសលោកអ៊ែនឌ្រូ ខេលី (Andrew Cayley) បានថ្លែងជាសាធារណៈដោយស្នើសុំឲ្យសហចៅក្រមស៊ើបអង្កេតធ្វើការស៊ើបអង្កេតបន្ថែមទៀតនៅក្នុងសំណុំរឿង០០៣នេះ ដោយលោកយល់ថា សហចៅក្រមស៊ើបអង្កេតមិនបានធ្វើការស៊ើបអង្កេតពេញលេញនៅឡើយ។ នៅក្នុងសេចក្តីថ្លែងការណ៍នោះលោកអ៊ែនឌ្រូ ខេលី បានបង្ហាញទីតាំងឧក្រិដ្ឋកម្ម ដែលសាធារណៈ ជនមិនធ្លាប់បានឮពីមុនមកនៅក្នុងការស៊ើបអង្កេតសំណុំរឿង០០៣នេះ រួមទាំងសើ្នសុំឲ្យមានការនាំខ្លួនជន សង្ស័យមកសួរចម្លើយជាដើម។ នៅក្នុងសេចក្តីថ្លែងការណ៍ដដែលនោះសហព្រះរាជអាជ្ញាសញ្ជាតិអង់គ្លេសក៏បានស្នើសុំឲ្យសហចៅក្រមស៊ើបអង្កេតធ្វើការពន្យាពេលទទួលពាក្យស្នើសុំតាំងខ្លួនជាដើមបណ្តឹងរដ្ឋប្បវេណីសម្រាប់ជនរងគ្រោះបន្ថែមទៀត ដោយសារតែលោកបង្ហាញថា រយៈពេលកំណត់ឈប់ទទួលពាក្យ ស្នើសុំនោះខ្លីពេក។ នៅក្នុងសេចក្តីថ្លែងការណ៍របស់ខ្លួននៅថ្ងៃនេះ សហចៅក្រមស៊ើបអង្កេតលើកឡើងថា សំណើរបស់ សហព្រះរាជអាជ្ញាបរទេសមិនត្រឹមត្រូវតាមទំរង់ច្បាប់នោះទេ។ សហចៅក្រមស៊ើបអង្កេតសំអាងថា វិធានផ្ទៃ ក្នុងមិនបានទុកចន្លោះណាមួយសម្រាប់សហព្រះរាជអាជ្ញាធ្វើកិច្ចការជាលក្ខណៈបុគ្គលនោះទេ លើកលែងតែ មានការផ្ទេរអំណាច។ ម្យ៉ាងវិញទៀត ពុំមានការខ្វែងគំនិតគ្នារវាងសហព្រះរាជអាជ្ញាទាំងពីរនោះទេ។ នៅក្នុងការឆ្លើយឆ្លងជាមួយវីអូអេខ្មែរតាមសារអេឡិចត្រូនិចពីប្រទេសអង់គ្លេសនៅថ្ងៃនេះ លោកអ៊ែនឌ្រូ ខេលី បានប្រកាសថា លោកនឹងប្តឹងឧទ្ឋរណ៍ប្រឆាំងនឹងការសម្រេចរបស់សហចៅក្រមទាំងពីរ។ លោកខេលីមានប្រសាសន៍ថា សហចៅក្រមស៊ើបអង្កេតធ្លាប់បានទទួលសំណើរបស់លោកដូចគ្នានេះពីមុនមក ហើយសហចៅក្រមក៏មិនដែលលើកមកចោទជាសំណួរនោះដែរ។ លោកឡាស អលសិន (Lars Olsen) មន្រ្តីផ្នែកទំនាក់ទំនងកិច្ចការច្បាប់របស់សាលាក្តីខ្មែរក្រហម មានប្រសាន៍ថា លោក អ៊ែឌ្រូ ខេលី អាចប្តឹងឧទ្ឋរណ៍បាន។ ក្រុងអង្គការសង្គមស៊ីវិលធ្លាប់បានប្រតិកម្មចំពោះចំណាត់ការរបស់ក្រុមសហចៅក្រមស៊ើបអង្កេតនៅក្នុងសំណុំរឿង០០៣ និង០០៤ដែលរដ្ឋាភិបាល និងភាគីជាតិក្នុងសាលាក្តីខ្មែរក្រហមមិនចង់ឲ្យកើតមាន ហើយក្រុមអង្គការក្រៅរដ្ឋាភិបាល បានអំពាវនាវដល់ប្រទេសផ្តល់ជំនួយធ្វើអន្តរាគមន៍នៅក្នុងរឿងនេះ។ លោកសុខ សំអឿន នាយកប្រតិបត្តិអង្គការក្រុមអ្នកច្បាប់ការពារសិទ្ឋិកម្ពុជាបានថ្លែងថា ការបដិសេធសំណើរបស់សហព្រះរាជអាជ្ញាអន្តរជាតិនៅក្នុងការសុំពន្យាពេលការដាក់ពាក្យស្នើសុំតាំងខ្លួនជាដើមបណ្តឹង រដ្ឋប្បវេណីគឺជាការរំលោភទៅដល់ជនរងគ្រោះ។ លោកបានប្រាប់វីអូអេខ្មែរថា៖ «អ្នករងគ្រោះធ្វើម៉េចត្រៀមខ្លូនឯងដាក់ចូលពាក្យបណ្តឹងបាន។ ដូច្នេះរឿងបញ្ហាដែលមិនពន្យាអ្នករងគ្រោះកំពុងតែរំលោភសិទ្ឋិរបស់អ្នករងគ្រោះក្នុងរបបខ្មែរក្រហម»។ លោកអ៊ែនឌ្រូ ខេលី បានប្តឹងឧទ្ធរណ៍រួចទៅហើយ កាលពីថ្ងៃទី២៧ខែឧសភាប្រឆាំងនឹងបញ្ជារបស់ សហចៅក្រមស៊ើបអង្កេតទាំងពីររូប ដែលបង្គាប់ឲ្យលោកដកចេញភាគខ្លះនៃសេចក្តីថ្លែងការណ៍ជាសាធារណៈរបស់លោកទាក់ទងនឹងសំណុំរឿង០០៣៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
