VOA News: ព័ត៌មាន: “ប៉ូលិសប្រើធម៌ក្តៅចាប់ក្រុមម៉ាហ្វីយ៉ាចិននៅស្រុកខ្មែរ” plus 1 more |
| ប៉ូលិសប្រើធម៌ក្តៅចាប់ក្រុមម៉ាហ្វីយ៉ាចិននៅស្រុកខ្មែរ Posted: 09 Jun 2011 02:02 PM PDT ជនជាតិចិនដីគោកចំនួន១៦៦នាក់ និងស្រ្ដីជនជាតិវៀតណាមម្នាក់ ត្រូវបានចាប់ខ្លួននៅក្នុងប្រតិបត្តិការឆ្មក់ចាប់ទ្រង់ទ្រាយធំមួយរបស់ក្រុមនគរបាលក្រសួងមហាផ្ទៃនៅថ្ងៃព្រហស្បតិ៍នេះ។ លោកឧត្តមសេនីយ៍គាត ចន្ទ័ថារិទ្ធ អ្នកនាំពាក្យក្រសួងមហាផ្ទៃមានប្រសាសន៍ថាជនជាតិចិនទាំងនោះគឺ ជាក្រុមឧក្រិដ្ឋជនឆ្លងដែនហើយបានយកប្រទេសកម្ពុជាធ្វើជាទីតាំង ដើម្បីធ្វើការគំរាមដល់ជនរងគ្រោះនៅក្រៅប្រទេស។ «ពួកនេះធ្វើសកម្មភាពប្រើប្រាស់ប្រព័ន្ធអ៊ីនធឺណិត VOIP ដើម្បីទាក់ទងគំរាមទៅស្រុកក្រៅគំរាមជំរិតទារប្រាក់ជារបៀបឧក្រិដ្ឋកម្មឆ្លងដែនជារបៀបអង្គការចាត់តាំង»។ នៅក្នុងចំណោមជនសង្ស័យទាំងនោះ ៦៨នាក់ត្រូវបានឃាត់ខ្លួននៅខណ្ឌផ្សេងៗនៅក្នុងរាជធានីភ្នំពេញ ៣៨នាក់ឃាត់ខ្លួននៅខេត្តព្រះសីហនុ និងនៅក្រុងបាវិត ខេត្តស្វាយរៀង ក្រុមនគរបាលឃាត់ខ្លួនជនជាតិចិនសរុបចំនួន៦១នាក់។ មានស្ដ្រីសរុបចំនួន៤៩នាក់នៅក្នុងចំណោមអ្នកដែលត្រូវចាប់ឃាត់ខ្លួន។ មន្ដ្រីអ្នកនាំពាក្យក្រសួងមហាផ្ទៃដដែលបានបញ្ជាក់ថា នេះគឺប្រតិបតិ្ដការមានលក្ខណៈអន្ដរជាតិ ហើយត្រូវបានធ្វើឡើងព្រមគ្នានៅថ្ងៃតែមួយក្នុងប្រទេសថៃ កោះតៃវ៉ាន់ឥណ្ឌូណេស៊ី និង ម៉ាឡេស៊ី បន្ទាប់ពីមានបណ្ដឹងពីជនរងគ្រោះ។លោកឧត្តមសេនីយ៍គាត ចន្ទ័ថារិទ្ធ បញ្ជាក់ថា ក្រុមជនទាំងនេះ បានចូលមកកាន់ប្រទេសកម្ពុជាក្នុងឋានៈជាអ្នកទេសចរ ហើយបានសម្ងំប្រើប្រាស់បណ្ដាញអ៊ីនធឺណិតនៅក្នុងផ្ទះសម្រាប់ប្រព្រឹត្តឧក្រិដ្ឋកម្ម។ «ក្នុងថ្ងៃតែមួយ នៅតៃវ៉ាន់ គឺឃាត់១៤១នាក់ នៅថៃ៥នាក់ ឥណ្ឌូនេស៊ី១៣០នាក់ ម៉ាឡេស៊ី៣៧នាក់»។ នេះគឺជាប្រតិបត្តិការដ៏ធំបំផុតមួយ ដែលក្រុមមន្ដ្រីកម្ពុជាអះអាងថា ដើម្បីចាប់ក្រុមជនសង្ស័យនៅក្នុងបណ្ដាញឧក្រិដ្ឋកម្មឆ្លងដែននោះ។ កាលពីប៉ុន្មានឆ្នាំមុនក្រុមអាជ្ញាធរកម្ពុជាបានរកឃើញជនជាតិចិន ដែល ត្រូវគេលាក់ខ្លួននៅកន្លែងផ្សេងៗគ្នានៅក្នុងទីក្រុងភ្នំពេញសម្រាប់នាំទៅប្រទេសទីបី។ លោកឧត្តមសេនីយ៍ គាត ចន្ទ័ថារិទ្ធ បញ្ជាក់បន្ថែមថា ជនដែលត្រូវចាប់ខ្លួនកំពុងស្ថិតនៅក្រោមការគ្រប់គ្រងនិងសួរចម្លើយរបស់ប៉ូលិសអន្ដោប្រវេសន៍នៅក្បែរព្រលានយន្ដហោះអន្ដរជាតិក្រុងភ្នំពេញ។ លោកមានប្រសាសន៍ថាវានៅមិនទាន់ច្បាស់នៅឡើយថាជនជាតិចិនទាំងនេះ នឹងត្រូវបញ្ជូនចេញពីប្រទេសកម្ពុជាភ្លាមៗ ឬក៏ត្រូវធ្វើការស៊ើបអង្កេតបន្ថែមដើម្បីកាត់ទោសមុននឹងបណ្ដេញចេញពីប្រទេសកម្ពុជា។ នៅមិនទាន់មានការបង្ហាញប្រតិកម្មណាមួយពីស្ថានទូតចិនប្រចាំទីក្រុងភ្នំពេញនៅឡើយទេ។ ក្រុមមន្ដ្រីសិទ្ធិមនុស្សមិនបានតាមឃ្លាំមើលការចាប់ខ្លួនជនជាតិចិនខាងលើនោះឡើយ។ លោក កឹម សុខា ប្រធានគណបក្សសិទ្ធិមនុស្ស ដែលជាគណបក្សជំទាស់មួយនៅក្នុងប្រទេសកម្ពុជាមានប្រសាសន៍ថា លោកគាំទ្រការធ្វើប្រតិបត្តិការបង្រ្កាបបទឧក្រិដ្ឋ ក៏ប៉ុន្ដែលោកហាក់ដូចជាមានការសង្ស័យអំពីការគោរពសិទ្ធិមនុស្ស។ «បើសិនហ្នឹងជាជនទុច្ចរិតមែន គេគាំទ្រប្រតិបត្តិការរបស់រដ្ឋាភិបាល ប៉ុន្តែសុំធ្វើយ៉ាងម៉េចឲ្យតាមមានការគោរពសិទ្ធិមនុស្សតាមច្បាប់ត្រឹមត្រូវ»។ លោកកុយ គួង អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា មានប្រសាសន៍ថា លោក មិនទាន់បានទទួលដំណឹងពីការចាប់ខ្លួននោះទេ៕ This posting includes an audio/video/photo media file: Download Now |
| ប៉ូលិសនិងប្រជាពលរដ្ឋប៉ះទង្គិចគ្នានៅតាមផ្លូវជាតិលេខ៤ Posted: 09 Jun 2011 09:31 AM PDT អ្នកភូមិច្រើនរាប់រយនាក់នៅក្នុងខេត្តកំពង់ស្ពឺ និងខេត្តកណ្តាលបានប៉ះទង្គិចគ្នាយ៉ាងខ្លាំងក្លាជាមួយនគរបាលនៅថ្ងៃព្រហស្បតិ៍នេះ ដើម្បីការពារដីស្រែរបស់ពួកគាត់ពីការរំលោភយកដោយក្រុមហ៊ុនឯកជនតាមរយៈអំណាចសាលដីការបស់តុលាការកំពូល។ ជម្លោះដីធ្លីចំនួន៦៥ហិចតានេះ បានកើតឡើងតាំងពីឆ្នាំ២០០៤រវាងក្រុមហ៊ុនឯកជន និងប្រជាពលរដ្ឋចំនួន៨៨គ្រួសារនៅក្នុងភូមិចំនួនប្រាំ ដូចជាភូមិស្តុកស្លាបក្នុងឃុំភ្នំតូច ភូមិពោក្នុងឃុំដំណាក់រាំង ស្រុកឧត្តុង្គ ខេត្តកំពង់ស្ពឺ និងភូមិចំនួនបីក្នុងឃុំទួលព្រិច ស្រុកអង្គស្នួល ខេត្តកណ្តាលតាំងពីឆ្នាំ២០០៤ ហើយតុលាការ កំពូលបានសម្រេចប្រគល់ដីជម្លោះនេះទៅឱ្យក្រុមហ៊ុននៅថ្ងៃទី៣១ ខែធ្នូ ឆ្នាំ២០០៩។ កងកម្លាំងនគរបាលប្រមាណ៣០០នាក់ប្រដាប់ដោយកាំភ្លើង ដំបងឆក់ ខែល បានចុះអនុវត្តសាលដីការបស់ តុលាការកំពូលចុះនៅថ្ងៃទី៣១ ខែធ្នូ ឆ្នាំ២០០៩ ប៉ុន្តែអ្នកភូមិប្រមាណ៥០០នាក់ប្រដាប់ដោយដំបង កាំបិត ពូថៅ និងជំពាមកៅស៊ូបានរារាំងអាជ្ញាធរមិនឱ្យអនុវត្តសាលដីកានេះរហូតដល់មានការស៊ើបអង្កេតច្បាស់លាស់សិន នេះបើយោងតាមសាក្សីឃើញផ្ទាល់ភ្នែក។ ក្នុងការប៉ះទង្គិចដោយអំពើហិង្សានេះ អ្នកភូមិចំនួនប្រាំពីរនាក់ បានទទួលរងរបួសធ្ងន់ដោយការវាយ នឹង ដំបងឆក់ និងគ្រាប់កាំភ្លើងរបស់នគរបាលដែលបានបាញ់ឡើងទៅលើមេឃ ហើយនគរបាលបីនាក់ក៏បាន ទទួលរងរបួសជាទម្ងន់ដោយការវាយនឹងដំបងនិងកាប់នឹងពូថៅ។ ដោយឃើញមានអំពើហិង្សាបែបនេះ នគរបាលបានដកថយ នេះបើតាមការអះអាងរបស់មន្ត្រីសិទ្ធិមនុស្ស និងនគរបាល។ លោកសាន នៀន អាយុ៤០ឆ្នាំ នៅភូមិពោ ឃុំដំណាក់រាំង ស្រុកឧត្តុង្គ ខេត្តកំពង់ស្ពឺ បាននិយាយថាអាជ្ញាធរ បានប្រើអំពើហិង្សាមកលើអ្នកភូមិ ហើយអ្នកភូមិបាននាំគ្នាតបនឹងអាជ្ញាធរវិញ។ «ជាអំពើមួយដ៏ឃោរឃៅ ហើយព្រៃផ្សៃបំផុត ខ្ញុំមិនដែលជួបប្រទះ។ ដីនេះប្រជាពលរដ្ឋអត់ឱ្យដាច់ខាត។ ទោះបីជាដំណាក់កាលស្លាប់ទាំងអស់គ្នា ក៏ប្រជាពលរដ្ឋសុខចិត្តស្លាប់នៅលើដីរបស់គាត់។ គាត់មិនសុខចិត្តឱ្យទៅគេ។ ប្រជាពលរដ្ឋសុខចិត្តស្លាប់នៅលើដីស្រែនៅក្នុងខ្ទមកំសត់របស់គាត់នៅលើដីនេះ»។ លោកកែវ អឿន អធិការនគរបាលស្រុកឧត្តុង្គ ខេត្តកំពង់ស្ពឺ បានបញ្ជាក់ថា ប្រជាពលរដ្ឋបានវាយមកលើសមត្ថកិច្ច ដែលបានធ្វើរបួសធ្ងន់ដល់នគរបាលពីរនាក់ និងកងរាជអាវុធហត្ថម្នាក់ នៅពេលដែលកងកម្លាំង នគរបាល កំពុងអនុវត្តសាលដីការបស់តុលាការកំពូល។ «ប្រជាពលរដ្ឋមកវាយមកលើសមត្ថកិច្ចរបស់ខ្ញុំតែម្តង។ ប្រជាពលរដ្ឋភាគច្រើនមានដំបង ដាវ កាំបិត ជំពាម បាញ់មកលើសមត្ថកិច្ច»។ លោកអ៊ំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូដែលបានចុះទៅឃ្លាំមើលនៅកន្លែង កើតហេតុ បានថ្លែងថាវាជាអំពើហិង្សាដែលមិនគួរកើតមាន។ «ការអនុវត្តសាលដីកានេះមិនបានពិចារណាឱ្យដិតដល់ទៅលើទស្សនកម្មដែលកើតឡើង ទើបបង្កឱ្យមាន អំពើហិង្សា និងរបួសទាំងសងខាងនេះ។ ទង្វើនេះជាការសោកស្តាយជាទីបំផុតដែលយើងអាចបញ្ចៀស បាន ប៉ុន្តែយើងមិនបញ្ចៀស យើងនៅតែព្យាយាមក្នុងការអនុវត្តដែលបង្កឱ្យមានអំពើហិង្សា និងរបួសទាំង សងខាងនេះ»។ លោកយី សុខសាន្ត អនុប្រធានផ្នែកត្រួតពិនិត្យមើលស្ថានភាពសិទ្ធិមនុស្សនៅសមាគមសិទ្ធិមនុស្ស អាដ ហុក ដែលបានចុះទៅដល់កន្លែងកើតហេតុ បានបញ្ជាក់យ៉ាងដូច្នេះថា៖ «ការដោះស្រាយដោយប្រើអំពើហិង្សានេះមិនមានលទ្ធផលល្អសម្រាប់ប្រជាពលរដ្ឋ និងក្រុមហ៊ុនទេ។ អញ្ចឹងមើលទៅ វាធ្វើឱ្យប៉ះពាល់ដល់ការគោរពសិទ្ធិមនុស្ស។ ប្រជាពលរដ្ឋ ប្រើប្រាស់ប្រដាប់អាវុធរបស់គាត់ ដូចជា ព្រនង់ កាំបិត ពូថៅ ដើម្បីទប់ទល់ជាមួយអាជ្ញាធរដែលមាន កាំភ្លើង ហើយករណីនេះ ខ្ញុំយល់ថាអាជ្ញាធរគួរធ្វើការដោះស្រាយដោយសន្តិវិធីល្អជាងការប្រើអំពើហិង្សា»។ របាយការណ៍របស់សមាគមសិទ្ធិមនុស្សអាដហុក បានចេញផ្សាយកាលពីថ្ងៃព្រហស្បតិ៍ថា គិតពីដើមឆ្នាំ ២០១១រហូតដល់បច្ចុប្បន្ន សមាគមសិទ្ធិមនុស្សអាដហុក បានរកឃើញថាយ៉ាងហោចណាស់ ក៏មានប្រជាពលរដ្ឋក្រីក្រក្នុងទំនាស់ដីធ្លីចំនួន១២៤នាក់ត្រូវបានតុលាការចេញដីកាកោះ និងចោទប្រកាន់ពីបទព្រហ្មទណ្ឌក្នុងនោះ មាន៣៦នាក់ត្រូវបានចាប់ខ្លួន ១៨នាក់កំពុងជាប់ឃុំឃាំងក្នុងពន្ធនាគារ និង៨៨នាក់កំពុងរត់គេចខ្លួនពីការតាមចាប់របស់តុលាការ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
