VOA News: ព័ត៌មាន: “អ៊ីរ៉ង់ទាត់ចោលទណ្ឌកម្មថ្មីរបស់ស.រ..អ.” plus 5 more |
- អ៊ីរ៉ង់ទាត់ចោលទណ្ឌកម្មថ្មីរបស់ស.រ..អ.
- ព្រះរាជអាជ្ញាអន្តរជាតិថារឿងក្តីបន្ថែមត្រូវតែមាន
- រញ្ជួយដីនៅហ្វីលីពីនសម្លាប់មនុស្ស៤៣នាក់
- អ្នកកាសែតអាមេរិកាំងយករូបថតពីរបបខ្មែរក្រហមដាក់តាំងពិព័រណ៍នៅកម្ពុជាជាលើកដំបូង
- ខ្មែរជាអ្នកចងក្រងឯកសារខ្មែរក្រហម មិនមែនវៀតណាមទេ៖ ឆាំង យុ
- ខ្មាន់កាំភ្លើងពីរនាក់នៅខេត្តក្រចេះត្រូវបានចាប់ខ្លួន
| អ៊ីរ៉ង់ទាត់ចោលទណ្ឌកម្មថ្មីរបស់ស.រ..អ. Posted: 07 Feb 2012 11:55 AM PST អ៊ីរ៉ង់បានទាត់ចោលការដាក់ទណ្ឌកម្មពី ស.រ.អ. ដែលតម្រង់ទៅរករដ្ឋាភិបាលរបស់ខ្លួន និងធនាគារកណ្ដាល ហើយបានហៅវិធានការទាំងនេះថា «សង្រ្គាមផ្លូវចិត្ដ»។ រ៉ាមីន មេម៉ានផារ៉ាស (Ramin Mehmanparast) អ្នកនាំពាក្យកាបរទេសអ៊ីរ៉ង់ ថ្លែងនៅថ្ងៃអង្គារនេះថា អ៊ីរ៉ងមិនមានពាក់ព័ន្ធខាងហិរញ្ញវត្ថុណាមួយជាមួយ ស.រ.អ. ទេ ហើយការដាក់ទណ្ឌកម្មនោះ មិនមានប្រសិទ្ធភាពឡើយ។ សេចក្ដីថ្លែងការរបស់លោកបានធ្វើឡើង មូយថ្ងៃក្រោយពីប្រធានាធិបតី បារ៉ាក់ អូបាម៉ាបានលាតត្រដាងបទបញ្ជានីតិប្រតិបត្ដិឲ្យធនាគារ ស.រ.អ. នូវអំណាចថ្មីដើម្បីបង្កកទ្រព្យសម្បត្ដិអ៊ីរ៉ង់នៅក្នុងកុងធានាគារ។ ព័ត៌មានអន្តរជាតិសំខាន់ៗផ្សេងទៀត៖ ថៃ៖ ពួកជនប្រដាប់អាវុធបានបាញ់សម្លាប់ជនស៊ីវិលពីរនាក់ នៅក្នុងខេត្ដភាគខាងត្បូងនៃប្រទេសថៃ កាលពីថ្ងៃអង្គារនេះ។ ប៉ូលិសនិយាយថា រឿងនេះកើតឡើង ខណៈដែលយោធាបានការពារ កិច្ចទប់ស្កាត់ការបះបោរអស់រយៈពេល៨ឆ្នាំ នៅក្នុងតំបន់ភាគខាងត្បូង ដែលមានជនជាតិអ៊ីស្លាមភាគច្រើនរស់នៅមួយនេះ។ ស.រ.អ.៖ ក្រសួងមហាផ្ទៃ ស.រ.អ. ថ្លែងថា នឹងបញ្ជូនអ្នកការទូតថ្នាក់ខ្ពស់ពីរនាក់ទៅកាន់តំបន់អាស៊ីភាគខាងត្បូងនៅចុងខែនេះ ដើម្បីសួរយោបល់ពីមេដឹកនាំរដ្ឋាភិបាល និងមេដឹកនាំសង្គមស៊ីវិល អំពីរឿងពាក់ព័ន្ធនឹងការអប់រំ និងការជួញដូរមនុស្សព្រមទាំងដំណើរការនៃការទទួលខុសត្រូវ និងការផ្សះផ្សាគ្នា។ ភូមា៖ ស.រ.អ. បានបន្ធូរការដាក់ទណ្ឌកម្មមកលើប្រទេសភូមា ដោយសារតែរដ្ឋាភិបាលគាំទ្រដោយយោធារបស់ប្រទេសនេះ បានចាប់ផ្ដើមការកែទម្រង់តាមបែបប្រជាធិបតេយ្យ។ ស៊ីរី៖ សកម្មជនស៊ីរីនិយាយថា ការបាញ់ទម្លាក់គ្រាប់ផ្លោងដ៏ធ្ងន់ធ្ងរ បានចាប់ផ្ដើមឡើងវិញមកលើប្រជុំតំបន់បះបោរនៃក្រុងហូម (Homs) មូយថ្ងៃក្រោយពីជនស៊ីវិលជិត១០០នាក់នៅទូទាំងប្រទេសស្លាប់ ក្នុងការវាយបង្រ្កាបមកលើការបះបោរមហាជនប្រឆាំងនឹងប្រធានាធិបតី បាស្សា អាល់ អាសាដ (Bashar Al Assad)។ ស.រ.អ.៖ បេក្ខជនប្រធានាធិបតី លោក មីត រ៉ូមនី (Mitt Romney) សង្ឃឹមថា លោកនឹងពង្រឹងភាពនាំមុខគេ ក្នុងការតែងតាំងរបស់គណបក្សសាធារណរដ្ឋ ដោយសារមានការគំាទ្រខ្លាំងនៅក្នុងកិច្ចប្រជុំកូកិស (caucuses) នៅថ្ងៃអង្គារក្នុងរដ្ឋ កូឡូរាដូ (Colorado) និង មិនីសូតា (Minnesota)។ ហ្វីលីពីន៖ ក្រុមអ្នកជួយសង្រ្គោះនៅក្នុងប្រទេសហ្វីលីពីន បានបន្ដកិច្ចការរុករកមនុស្សបាត់ខ្លួនជាង១២នាក់ ក្រោយពីមានការរញ្ជួយដី ដែលបណ្ដាលឲ្យបាក់ដី និងរញ្ជួដីបន្ដដ៏ខ្លាំងធ្ងន់ធ្ងរ កាលពីថ្ងៃអង្គារ។ សិង្ហបុរី៖ ក្រុមហ៊ុនអាកាសយាន្ដ សិង្ហបុរី និយាយកាលពីថ្ងៃអង្គារនេះថា តំបន់អូស្ត្រាលីហៅ អូស្ត្រាលី ហ្គោល ខូស (Australia Gold Coast) ជាទិសដៅទីពីរនៃផ្លូវទៅកាន់តំបន់នោះ។ ស.រ.អ.៖ អ្នកបើកបរតាក់ស៊ីដើមកំណើតបាគីស្ថាន នៅក្នុងទីក្រុង ឆីកាហ្គោ (Chicago) បានសារភាពកំហុស ថាបានបញ្ជូនថវិកាជួយបណ្ដាញភេរវកម្ម អាលកៃដា (al-Qaeda) រ៉ាចា ឡារៀប ខាន (Raja Lahraib Khan)។ អេហ្ស៊ីប៖ មេដឹកនាំយោធាប្រទេសអេហ្ស៊ីប បានពន្លឿនកិច្ចការរៀបចំការបោះឆ្នោតជ្រើសតាំងប្រធានាធិបតី ក្រោយពីមានការតវ៉ាទាមទារឲ្យពន្លឿនការផ្ទេរអំណាចពីយោធាឲ្យទៅមេដឹកនាំស៊ីវិល។ <!--AV--> This posting includes an audio/video/photo media file: Download Now |
| ព្រះរាជអាជ្ញាអន្តរជាតិថារឿងក្តីបន្ថែមត្រូវតែមាន Posted: 07 Feb 2012 01:49 AM PST ទោះជាសំណុំរឿងបន្ថែម០០៣ និង០០៤ កំពុងមានភាពចម្រូងចម្រាស់ក្តី លោក អានឌ្រូ ខាលី សហព្រះរាជអាជ្ញាសាលាក្តីកាត់ទោសមេដឹកនាំខ្មែរក្រហមបានអះអាងថា សហចៅក្រមស៊ើបអង្កេតមានភារកិច្ចបន្តនីតិវិធីតាមច្បាប់ជាចាំបាច់ដើម្បីស៊ើបអង្កេតរឿងក្តីទាំងពីរនេះ។ លោក អាន ឌ្រូ ខាលីថ្លែងប្រាប់វីអូអេតាមរយៈអ៊ីម៉េលថា៖ «សហចៅក្រមស៊ើបអង្កេតមិនអាចបដិសេធ ឬទាត់ចោលការចោទប្រកាន់បានទេ លើកលែងតែពុំមានបទឧក្រិដ្ឋត្រូវបានប្រព្រឹត្ត។ ជនដៃដល់មិនទាន់ត្រូវបានបង្ហាញអត្តសញ្ញាណ ឬទីកន្លែង ភស្តុតាងគ្រប់គ្រាន់ក៏ទេដែរ»។ សំណុំរឿង០០៣និង០០៤ ដែលរដ្ឋាភិបាលកម្ពុជាមិនចង់ឲ្យកើតមាននោះបាន ក្លាយជារឿងប្រទាញប្រទង់គ្នាជាថ្មីទៀតរវាងសហចៅក្រមស៊ើបអង្កេតជាតិ និង អន្តរជាតិក្រោយពីសហព្រះរាជអាជ្ញាដាក់ជូនដីការបញ្ជូនរឿងស៊ើបសួរទៅកាន់ សហចៅក្រមស៊ើបអង្កេតកាលពីឆ្នាំ២០០៨ តែមិនត្រូវបានបំពេញគ្រប់លក្ខណៈនៃការស៊ើបអង្កេត។ សហចៅក្រមស៊ើបអង្កេតអន្តរជាតិ ឡរ៉ិន កាស្ព័រ អាសឺម៉េត (Laurent Kasper Ansermet) ដែលលោកអគ្គលេខាធិការអង្គការសហប្រជាជាតិ បាន គី មូន (Ban Ki-Moon) តែងតាំងជំនួសលោក ស៊ីហ្គហ្វ៊ិក ប៊្លុង្គ (Siegefried Blunk) ដែលបានលាលែងកាលពីខែតុលាឆ្នាំទៅនោះ មិនត្រូវរដ្ឋាភិបាលកម្ពុជាតែងតាំងតាមច្បាប់ភ្លាមៗដូចពេលមុនទេ។ លោកត្រូវបានសហភាគីរបស់លោក គឺលោក យូ ប៊ុនឡេង បន្ទោសក្នុងសេចក្តីប្រកាសព័ត៌មានកាលពីពេលថ្មីៗនេះថា គ្មាននិតិសម្បាទាគ្រប់គ្រាន់ ឬមិនទាន់មានលក្ខណជាចៅក្រមពេញលេញ នៅពេលលោកចេញសេចក្តីប្រកាសព័ត៌មានសុំឲ្យសហចៅក្រមជាតិផ្តល់ព័ត៌មានឲ្យបានគ្រប់គ្រាន់អំពីដំណើរការវិវត្តន៍នៃសំណុំរឿង០០៣ និង០០៤។ លោក សហព្រះរាជអាជ្ញា អាន់ឌ្រូ ខាលី ថ្លែងថាទៀតថា៖ «តុលាការនឹងនៅតែមានការជឿជាក់ប្រសិនបើគ្រប់ភាគីពាក់ព័ន្ធអនុវត្តច្បាប់ និងនិតិវិធី។ បើដំណើរការត្រូវបានបង្អាក់ដើម្បីបញ្ចប់ដោយរបៀបផ្សេងនោះ វានឹងប៉ះពាល់ជាអវិជ្ជាមានដល់កេរដំណែលរបស់តុលាការ»។ អ្នកសង្កេតការណ៍ និងអ្នកវិភាគខ្លះនិយាយថា សំណុំរឿងបន្ថែម០០៣និង០០៤ នៅមានឧបសគ្គបន្ថែមទៀតដែលពិបាកនឹងដំណើរការទៅមុខបានហើយ អាច នឹងត្រូវបានទាត់ចោលដោយភាគីកម្ពុជានៅពេលដែលសហចៅក្រមស៊ើប អង្កេតបម្រុងរបស់អង្គការសហប្រជាជាតិមិនត្រូវបានតែងតាំងឲ្យពេញសិទ្ធិ។ ឧបសគ្គទាំងនោះអាចបណ្តាលឲ្យអង្គបុរេជំនុំជម្រះច្រានចោលបណ្តឹងលើ ភាពខ្វែងគំនិតគ្នាទាំងឡាយរបស់លោកសហចៅក្រមស៊ើបអង្កេតកម្ពុជា 0និង សហចៅក្រមស៊ើបអង្កេតបម្រុងរបស់អង្គការសហប្រជាជាតិដោយឈរលើហេតុផលថាសហចៅក្រមស៊ើបអង្កេតបម្រុងរបស់អង្គការសហប្រជាជាតិមិនមានលក្ខណៈសម្បត្តិពេញលេញជាចៅក្រម។ បញ្ហាមួយទៀតអាចធ្វើឲ្យសហចៅក្រមស៊ើបអង្កេតកម្ពុជាមិនអាចចេញដីកានាំខ្លួនជនសង្ស័យ ឬអនុវត្តនីតិវិធីតុលាការរួមគ្នាក្នុងសំណុំរឿងបន្ថែមបានជាមួយនឹងសហចៅក្រមបម្រុងបានទេ។ បញ្ហានេះគេគិតថា អាចនឹងមានការច្រានចោលបទចោទរបស់សហព្រះរាជអាជ្ញាផងដែរទាក់ទងនឹងសំណុំរឿងបន្ថែមនេះ។ តែអ្នកវិភាគ និងអ្នកសង្កេតការណ៍ខ្លះនិយាយថាបញ្ហានេះអាចត្រូវបានដោះស្រាយ ទាល់តែអង្គការសហប្រជាជាតិប្តូរចៅក្រម។ មន្ត្រីអង្គការសហប្រជាជាតិបានប្រកាសហើយថាអង្គការសហប្រជាជាតិមិនប្តូរចៅក្រមថ្មីទេ ក្រៅពីបញ្ជាក់ថាលោកចៅក្រម កាស្ព័រ អាសឺមិត មានសិទ្ធិគ្រប់គ្រាន់ក្នុងការស៊ើបអង្កេតសំណុំរឿងបន្ថែម០០៣ និង០០៤។ អ្នកស្រី អាន ហេដេល អ្នកជំនាញផ្នែកច្បាប់នៃមជ្ឈមណ្ឌលឯកសាកម្ពុជាបាន អះអាងថាលោកស្រីកំពុងរង់ចាំមើលដំណើរការវិវត្តន៍ទៅមុខរបស់សាលាក្តី។ លោកស្រីបន្ថែមថាសំណុំរឿង០០៣ ត្រូវបិទ ហើយបទចោទត្រូវបានបដិសេធតែសំណុំរឿង០០៤ នៅបើកចំហរ។ «សំណួរគឺថា តាមច្បាប់ ទោះបីជាសហចៅក្រមស៊ើបអង្កេតចង់ចាប់ផ្តើមការស៊ើបអង្កេតឡើងវិញក៏ដោយ ក៏វិធានច្បាប់មានលក្ខណៈទន់ខ្សោយក្នុងរឿងនេះ»។ អ្នកសង្កេតការណ៍ផ្សេងទៀតអះអាងក្នុងលក្ខខណ្ឌមិនឲ្យបញ្ចេញឈ្មោះថា គេពិបាកនឹងស្វែងរកការសហការនៅដំណាក់កាលនាំខ្លួន ចាប់ខ្លួនជនសង្ស័យដើម្បីស៊ើបអង្កេតបន្តនៅពេលប្រទេសសាម៉ីមិនយល់ព្រម។ លោក ភីធ័រ ម៉ាហ្គៃអឺ (Peter Maguire) សាស្ត្រចារ្យអាមេរិកម្នាក់ និងជាអ្នកនិពន្ធសៀវភៅខ្មែរក្រហម Facing Death in Cambodia បានថ្លែងថាសាលាក្តីកាត់ទោសខ្មែរក្រហម ជាសាលាក្តីធ្វើតាមនយោបាយមិនមែនធ្វើតាមច្បាប់ទេ។ «ជាច្រើនឆ្នាំហើយដែលលោកនាយករដ្ឋមន្ត្រីហ៊ុន សែនបានបញ្ជាក់យ៉ាងច្បាស់ជាឧឡារិកថា សំណុំរឿង០០២ប្រឆាំងនឹងមេដឹកនាំជាន់ខ្ពស់ខ្មែរក្រហម ជាសំណុំរឿងចុងក្រោយ តែយ៉ាងណាក៏ដោយ អង្គការសហប្រជាជាតិមិនទទួលស្គាល់ការសម្រេចចិត្តនយោបាយម្ចាស់ប្រទេសទេ»។ ថ្លែងប្រាប់វីអូអេតាមទូរស័ព្ទកាលពីថ្ងៃព្រហស្បតិ៍អ្នកស្រីអ៊ឹម ចែម ជនជាប់ សង្ស័យក្នុងសំណុំរឿង០០៤បានសាទរប្រសិនបើមានការទម្លាក់ចោល សំណុំរឿងបន្ថែម០០៣ និង០០៤ ដែលមានជនសង្ស័យ៥នាក់ជាអតីតកម្មាភិបាលខ្មែរក្រហម។ «លើកលែង លែងមានឈ្មោះ ០០៣ /០០៤ ហ្នឹង ជាអារម្មណ៍ខ្ញុំរីករាយណាស់។ ហើយក៏គ្មានគិតអីពាក់ព័ន្ធនឹងនយោបាយពីមុនកន្លងមកទេ»។ «ការពិតទាំងអស់គ្នាត្រូវអនុវត្តនយោបាយផ្សះផ្សារបង្រួបបង្រួមជាតិឲ្យល្អ ដើម្បី សុវត្ថិភាព ដើម្បីសុខសន្តិភាពក្នុងសង្គមកម្ពុជាយើងពីព្រោះសុខសន្តិភាព របស់យើងគ្មាននរណាជាងយើងទេដែលគិតគូរ។ ហើយបើជាមានទុក្ខមាន លំបាកទៀតក៏គ្មាននរណាមកជួយទទួលយើងដែរ»។ សាលាក្តីខ្មែរក្រហមកំពុងកាត់ទោសអតីតមេដឹកនាំជាន់ខ្ពស់ក្នុងសំណុំរឿង០០២ ដែលមានជនជាប់ចោទ៣នាក់គឺ នួន ជា ប្រធានរដ្ឋសភា ខៀវ សំផន ប្រមុខរដ្ឋ និង អៀង សារីរដ្ឋមន្ត្រីការបរទេសខ្មែរក្រហម ពីបទឧក្រិដ្ឋជាច្រើន ដែលទាក់ ទងនឹងការស្លាប់ពលរដ្ឋខ្មែរប្រហែល១លាន៧សែននាក់៕ This posting includes an audio/video/photo media file: Download Now |
| រញ្ជួយដីនៅហ្វីលីពីនសម្លាប់មនុស្ស៤៣នាក់ Posted: 06 Feb 2012 11:36 PM PST ហ្វីលីពីន៖ មន្ត្រីហ្វីលីពីននិយាយថាមានការររញ្ជួយផែនដីដ៏ខ្លាំងមួយនៅភាគកណ្តាល ប្រទេស ដែលបណ្តាលឲ្យមនុស្សយ៉ាងតិចណាស់៤៣នាក់ស្លាប់ ព្រមទាំងនាំឲ្យមានការខូចខាតជាច្រើននិងមានដាច់ចរន្តអគ្គិសនីផងដែរ។ ក្រុមអ្នកស្រាវជ្រាវភូគព្ភសាស្ត្រសហរដ្ឋអាមេរិកឈ្មោះថា Geological Survey និយាយថាការរញ្ជួយផែនដីដែលមានកម្លាំង៦,៨បានកើតមានទ្បើងកាលពីព្រឹកថ្ងៃច័ន្ទនៅក្នុងជម្រៅ២០គ.ម.។ ការរញ្ជួយផែនដីនេះមានចំនុចស្នូលនៅក្នុងច្រកសមុទ្រចង្អៀតមួយនៅទល់មុខកោះនេហ្ក្រូស។ សហរដ្ឋអាមេរិក៖ បានបិទស្ថានទូតរបស់ខ្លួនក្នុងប្រទេសស៊ីរីហើយបានដកពួកអ្នកការទូតទាំងអស់ដែលនៅសេសសល់ចេញពីប្រទេសនេះដោយនិយាយយោងដល់ស្ថានភាពសន្តិសុខដែលកាន់តែអាក្រក់ទៅ។ចំណាត់ការនេះបានធ្វើទ្បើងនៅពេលដែលកងកម្លាំងរដ្ឋាភិបាលបានបង្កើនការបាញ់កាំជ្រួចrocket និងកាំភ្លើងត្បាល់ដាក់ក្រុង ហូម Homs ដែលកំពុងតែមានចលាចល។ ភូមា៖ គណៈកម្មការរៀបចំការបោះឆ្នោតនៃប្រទេសភូមាបានអនុញ្ញាតជាផ្លូវការឲ្យលោកស្រីអោង សានស៊ូជីមេដឹកនាំក្រុមប្រឆាំងឈរឈ្មោះក្នុងការបោះឆ្នោតក្នុងពេលខាងមុខនេះ។ គេយល់ឃើញថាវិធានការនេះជាជំហានសំខាន់មួយឆ្ពោះទៅកាន់ការកែទម្រង់ប្រជាធិបតេយ្យរបស់ប្រទេស។ កូរ៉េខាងជើង៖ បណ្តាញផ្សាយព័ត៌មានកូរ៉ខាងត្បូងរាយការណ៍ថាកូរ៉េខាងជើងកំពុងអភិវឌ្ឍយន្តហោះវាយប្រហារគ្មានមនុស្សបើក ដោយប្រើបច្ចេកវិជ្ជាអាមេរិកាំងនាំចូលពីតំបន់មជ្ឈឹមបូព៌ា។ សេចក្តិរាយការណ៍ផ្សាយដោយទីភ្នាក់ងារព័ត៌មានយុនហាប់ Yonhap បានឲ្យថាយន្តហោះគ្មានមនុស្សបើកនេះយកគំរូមូលដ្ឋានលើយន្តហោះគ្មានមនុស្សបើកធុន MQM-107D Streaker target drones ដែលគេមានជំនឿថាបានទៅដល់ក្រុង ព្យុងយ៉ាង Pyongyang តាមរយៈប្រទេសស៊ីរី។ ទីបេត៍៖ ចិនបានព្រមានដល់ពួកមន្ត្រីក្នុងដែនដីទីបេត៍ថាពួកគេត្រូវតែថែរក្សាស្ថិរភាពនៅមុនខួបឆ្នាំទីបួននៃកុបកម្មដ៏ប្រល័យក្នុងធានី ឡាសាLhasa នៃដែនដីទីបេត៍។ អាជ្ញាធរចិនបានបង្កើនកិច្ចការពារសន្តិសុខក្នុងដែនដីទីបេត៍និងខេត្តដែលនៅជិតខាងក្រោយមានការដុតខ្លួនឯងជាបន្តបន្ទាប់និងមានបាតុកម្មមួយៗប្រឆាំងនឹងការគ្រប់គ្រងរបស់ចិន។ ប៉ាឡេស្ទីន៖ ពួកមេដឹកនាំនៃចលនានៅប៉ាលេស្ទីនPalestine ឈ្មោះថា ហ្វាតា Fatah និងហាម៉ាស Hamas ដែលជាគូប្រជែងគ្នាបានប្រកាសថាពួកគេបានព្រមព្រៀងគ្នាបង្កើតរដ្ឋាភិបាលឯកភាពបណ្តោះអាសន្នមួយដឹកនាំដោយលោក ម៉ាមូដ អាបាសMahmoud Abbas ដែលជាប្រធាននៃអាជ្ញាធរ ប៉ាលេស្ទីនPalestine។ អឺរ៉ុប៖ ប្រទេសអាល្លឺម៉ង់និងប្រទេសបារាំងបានបង្ខំប្រទេសក្រិកដែលមានវិបត្តិហិរញ្ញវត្ថុឲ្យសម្រេចកិច្ចព្រមព្រៀងឲ្យបានឆាប់រហ័សដើម្បីកាត់បន្ថយបំណុលរបស់ខ្លួននិងដាក់កំហិតវិធានការត្បឹតត្បៀតចំណាយដែលគ្មានប្រជាប្រិយភាពកាន់តែខ្លាំងឡើង។ ស៊ូដង់៖ ពួកឧទ្ទាមស៊ូដង់បាននិយាយថា«ក្នងពេលឆាប់ៗនេះ"ពួកគេនឹងដោះលែងពួកកម្មករចិន២៩នាក់ដែលបានត្រូវចាប់ពង្រត់ក្នុងរដ្ឋ កូដូហ្វាន់Kordofan ខាងត្បូងកាលពីជាងមួយសប្តាហ៍មុននេះ»។ <!--AV--> This posting includes an audio/video/photo media file: Download Now |
| អ្នកកាសែតអាមេរិកាំងយករូបថតពីរបបខ្មែរក្រហមដាក់តាំងពិព័រណ៍នៅកម្ពុជាជាលើកដំបូង Posted: 06 Feb 2012 10:05 PM PST រូបថតដ៏កម្រអំពីទិដ្ឋភាពនានាក្នុងរបបខ្មែរក្រហម និងខ្សែអាត់សំឡេងនៃបទសម្ភាសជាមួយមេដឹកនាំកំពូលរបស់របបនេះ នឹងត្រូវដាក់តាំងបង្ហាញដល់សាធារណជនខ្មែរជាលើកដំបូងនៅសប្តាហ៍ក្រោយនេះនៅឯមជ្ឈមណ្ឌលធនធានសោតទស្សន៍បុប្ផាណាក្នុងទីក្រុងភ្នំពេញ។ រូបថតទាំងនោះត្រូវបានថតនៅចុងឆ្នាំ១៩៧៨ដោយអ្នកកាសែតអាមេរិកាំង និងជាអ្នកនិពន្ធដ៏ល្បីឈ្មោះម្នាក់គឺលោកស្រីអេលីហ្សាបែត ប៊ែកខឺដែលរបបខ្មែរក្រហមបានអញ្ជើញឱ្យទៅមើលពីអ្វីដែលរបបនេះចាត់ទុកថា ការរីកចម្រើនតាមទិសដៅបដិវត្តន៍របស់គេ និងអ្នកស្រីជួយទប់ស្កាត់ការចូលឈ្លានពានដោយកងទ័ពវៀតណាម។ មានរូបភាពជាច្រើនដែលលោកស្រីអេលីហ្សាបែត ប៊េកខឺបានថតដោយមានការរៀបចំជាស្រេចពីអ្នកជូនដំណើរ និងរូបភាពខ្លះត្រូវលោកស្រីគេចចេញពីការតាមឃ្លាំមើលនិងទៅថតដោយខ្លួនឯង។ លោកស្រី ប៊េកខឺបញ្ជាក់ថា ឯកសារដែលយកទៅដាក់តាំងពិព័រណ៍គឺដូចគ្នានឹងឯកសារនៅសាកលវិទ្យាល័យវ៉ាស៊ីនតោន ហើយលោកស្រីបានពន្យល់បន្ថែមពីការសម្រេចចិត្តប្រគល់ឯកសារឱ្យទៅមជ្ឈមណ្ឌលបុប្ជាណាដាក់បង្ហាញនោះ។ លោកស្រីពន្យល់ថា លោកស្រីធ្វើដូច្នេះក្នុងគោលបំណងចង់ឱ្យសាធារណជនខ្មែរអាចមើលឃើញដោយសេរី និងស្តាប់អតីតមេដឹកនាំនិយាយដោយខ្លួនឯង៖ «ខ្ញុំមិនចង់ឱ្យឯកសារនេះស្ថិតតែនៅក្នុងបណ្ណាល័យនិងតុលាការទេ។ ខ្ញុំចង់ឱ្យពលរដ្ឋកម្ពុជាអាចដើរមកមើលដោយខ្លួនឯងបាន»។ សៀវភៅកត់ត្រាខ្សែអាត់សំឡេង និងរូបថតដែលលោកស្រីអេលីហ្សាបែត ប៊េកខឺប្រមូលបានក្នុងពេលលោកស្រីធ្វើការនៅកម្ពុជានោះ ត្រូវបានលោកស្រីប្រគល់ជាលើកដំបូងទៅឱ្យសាកលវិទ្យាល័យវ៉ាស៊ីនតោនក្នុងរដ្ឋស៊ីអាថលរក្សាទុក ព្រោះលោកស្រីធ្លាប់សិក្សានៅទីនោះ ហើយដឹងថា គេមានបណ្ណាល័យល្អនិងកម្មវិធីសិក្សាពីតំបន់អាស៊ី។ ក្នុងបណ្តាឯកសារទាំងនោះ ក៏មានទាំងរូបថតកាលពីលោកស្រីធ្វើជាអ្នករាយការណ៍ព័ត៌មានអំពីសង្គ្រាមនៅកម្ពុជាក្នុងសម័យលន់ នល់ផងដែរ។ មួយចំណែកខ្លះនៃឯកសារនេះក៏ត្រូវប្រគល់ទៅឱ្យសាលាក្តីខ្មែរក្រហមប្រើប្រាស់ក្នុងការកាត់ទោសមេដឹកនាំខ្មែរក្រហមដែរ។ លោកស្រីប៊េកខឺក៏ធ្លាប់ធ្វើជាអ្នកកាសែត Washington Post និង The New York Times និងបាននិពន្ធសៀវភៅស្តីពីរបបខ្មែរក្រហមដែលមានចំណងជើងថា «នៅពេលដែលសង្គ្រាមបានរលត់ទៅ» ប៉ុន្តែលោកស្រីបញ្ជាក់ថា បើបានចូលមកមើលឯកសារទាំងនេះហើយគឺពលរដ្ឋខ្មែរមិនចាំបាច់មើលសៀវភៅរបស់លោកស្រីទេ។ «តើគេចាំបាច់រកសៀវភៅខ្ញុំធ្វើអ្វី? ពួកគេមិនចាំបាច់ស្វែងរកសៀវភៅខ្ញុំទេ។ ខ្ញុំចង់ឱ្យពួកគេដើរចូលមក ហើយស្តាប់សំឡេងខ្សែអាត់ដែលខ្ញុំរៀបរាប់ ហើយស្តាប់ឮសម្តីប៉ុល ពត។ គឺអាចចូលបានដោយសេរី»។ ក្នុងរូបថតដែលត្រូវដាក់តាំងពិព័រណ៍ ដែលលោកស្រីប៊េកខឺបង្ហាញឱ្យវីអូអេបានឃើញមានរូបភាពស្ងាត់ជ្រងំនៃទីក្រុងភ្នំពេញ។ ទីធ្លាជុំវិញផ្សារថ្មីទាំងមូលឃើញមានតែមនុស្សម្នាក់ជិះកង់កញ្ចាស់មួយឆ្លងកាត់ ហើយអគារធំៗត្រូវបិទទ្វារ លំនៅដ្ឋានគ្មានមនុស្សរស់នៅ ហើយមានតែក្រុមកងសន្តិសុខប្រដាប់ដោយអាវុធនៅយាមការពារ។ «វាគឺជាកន្លែងចម្លែក។ រូបភាពទាំងនេះមើលទៅហាក់ដូចជាមិនចម្លែកទេ ប៉ុន្តែពេលនោះ គឺជាប្រទេសកម្ពុជាមួយដែលគ្មានមនុស្ស។ កម្ពុជាត្រូវមានមនុស្សសើចសប្បាយ មនុស្សទទួលទានអាហារ មនុស្សរាំលេង មនុស្សបួងសួងសូត្រធម៌។ តែអត់មានអញ្ចឹងទាល់តែសោះ។ គឺគ្មានអ្វីទាល់តែសោះ។ គឺជាការបាត់បង់នូវជីវិតពិតប្រាកដ»។ ក្រៅពីនោះមានរូបថតញញឹមពព្រាយរបស់មេដឹកនាំជាន់ខ្ពស់គឺប៉ុល ពត និងអៀង សារី រដ្ឋមន្ត្រីការបរទេស ក្នុងពេលជួបសម្ភាសជាមួយនឹងអ្នកកាសែត។ ក៏មានរូបថតដែលបង្ហាញពីសកម្មភាពធ្វើការនៅវាលស្រែ ចំការ ការដ្ឋានទំនប់ទឹក រោងសិប្បកម្មនិងគ្រួសារគម្រូដែលមានឪពុក ម្តាយនិងកូនតូចៗពីរនាក់ឈរនៅមុខផ្ទះឈើប្រក់ក្បឿងបង្ហាញទឹកមុខញញឹម។ លោកស្រីយល់ថា រូបទាំងនេះគឺជាការរៀបចំជាមុនដោយរបបខ្មែរក្រហម ដោយសាររាល់ដំណើរពីកន្លែងមួយទៅកន្លែងមួយគឺត្រូវយាមកាមយ៉ាងតឹងរឹងជាប់ជានិច្ច។ ពិព័រណ៍នេះមានឈ្មោះថា «ដំណើរដ៏គ្រោះថ្នាក់របស់អ្នករាយការណ៍ព័ត៌មាន ទៅកាន់របបកម្ពុជាប្រជាធិបតេយ្យ» ហើយនឹងត្រូវបើកសម្ពោធនៅល្ងាចថ្ងៃទី០៩ខែកុម្ភៈ ដោយបើកឱ្យពលរដ្ឋខ្មែរទូទៅចូលទស្សនាដោយឥតគិតថ្លៃរហូតដល់ថ្ងៃទី២៩ខែកុម្ភៈ។ លោកស្រីអេលីហ្សាបែត ប៊េកខឺក៏នឹងចូលរួមក្នុងពិធីសម្ពោធបើកផងដែរ។ លោកស្តានីស្លាស ទូហ្សេ អ្នកគ្រប់គ្រងគម្រោងនៃមជ្ឈមណ្ឌលធនធានសោតទស្សន៍បុប្ផាណា បានបញ្ជាក់ប្រាប់វីអូអេក្នុងបទសម្ភាសន៍តាមទូរស័ព្ទថា លោកបានជ្រើសយករូបភាពចំនួន២៥មកផ្តិតពង្រីកឱ្យធំ សម្រាប់ដាក់តាំងក្នុងសាល មានរូបភាពប្រហែល៤០ទៀតត្រូវដាក់ជារូបភាពបញ្ចាំងលើអេក្រង់កុំព្យូទ័រនិងទូរទស្សន៍ ហើយសំឡេងសម្ភាសដាក់ក្នុងកំព្យូទ័រដោយមានកាសពាក់ត្រចៀកដើម្បីស្តាប់ឮបាន។ សំឡេងរបស់លោកស្រីអេលីហ្សាបែត ដែលរៀបរាប់ពីរូបភាពទាំងនោះ ត្រូវបានគេថតទុកដើម្បីឱ្យអ្នកចូលទស្សនាស្តាប់បាន។ លោកស្តានីស្លាសបញ្ជាក់បន្ថែមថា៖ «រូបថតទាំង២៥គឺតំណាងឱ្យដំណើររបស់លោកស្រីអេលីហ្សាបែត ដែលយើងជ្រើសរើសជាមួយលោកស្រី ហើយវាមានប្រធានបទចំនួន៥ គឺមានទីក្រុងគ្មានមនុស្សនៅពីព្រោះ ដូចលោកដឹងហើយថា ពួកខ្មែរក្រហមបានបណ្តេញអ្នកក្រុងទាំងអស់ឱ្យទៅរស់នៅជនបទ។ ដូច្នេះទីក្រុងភ្នំពេញទាំងមូលគ្មានប្រជាពលរដ្ឋរស់នៅ។ ដូច្នេះវាជាការគួរឱ្យចាប់អារម្មណ៍ក្នុងការបង្ហាញរូបភាពទាំងនេះដែលគ្មានមនុស្សនៅតាមផ្លូវ។ ក៏មានរូបថតជាច្រើននៅឯជនបទដែលយើងអាចមើលឃើញមនុស្សដើរនៅតាមវាលស្រែ ឬក៏នេសាទត្រី ឬក៏សាងសង់ផ្លូវ ហើយជាការគួរឱ្យចាប់អារម្មណ៍ដែរដែលឃើញពួកគេស្លៀកពាក់ខ្មៅទាំងអស់ ហើយបង់កក្រម៉ា។ ហើយមានរូបភាពដទៃទៀតទាក់ទងនឹងកងយោធា។ យើងអាចឃើញទាហានខ្មែរក្រហម។ ក៏មានរូបថតមេដឹកនាំខ្មែរក្រហម ដូច្នេះយើងអាចឃើញប៉ុល ពត ឬក៏អៀង សារី»។ បន្ទាប់ពីពិព័រណ៍ផ្លូវការចប់ទៅ រូបភាពខ្សែអាត់សំឡេងនិងឯកសារផ្សេងៗទៀតនឹងត្រូវបន្តរក្សាទុកក្នុងបណ្ណាសារអចិន្រ្តៃយ៍របស់មជ្ឈមណ្ឌលបុប្ផាណាសម្រាប់ឱ្យអ្នកចូលទស្សនាអាចស្រាវជ្រាវបានគ្រប់ពេល៕ This posting includes an audio/video/photo media file: Download Now |
| ខ្មែរជាអ្នកចងក្រងឯកសារខ្មែរក្រហម មិនមែនវៀតណាមទេ៖ ឆាំង យុ Posted: 06 Feb 2012 05:56 PM PST នាយកមជ្ឈមណ្ឌលឯកសារកម្ពុជាលោក ឆាំង យុ បានអះអាងនៅថ្ងៃច័ន្ទនេះថា វៀតណាមមិនមែនជាអ្នករៀបចំចងក្រងឯកសារខ្មែរក្រហមទេ។ ក៏ប៉ុន្ដែការប្រមូលនូវឯកសារផ្សេងៗ តម្រូវឲ្យមានការអនុញ្ញាតពីវៀតណាម ដែលមានអំណាចនៅកម្ពុជាក្រោយពីរបបខ្មែរក្រហមត្រូវបានផ្ដួលរំលំ។ លោក ឆាំង យុ បានថ្លែងយ៉ាងដូច្នេះនៅពេលដែលលោកបញ្ចប់ការផ្ដល់សក្ខីកម្មទៅលើឯកសារ ដែលមជ្ឈមណ្ឌលបានផ្ដល់ឲ្យសាលាក្ដីខ្មែរក្រហម។ សហមេធាវីការពារក្ដីរបស់ នួន ជា គឺលោក សុន អរុណ និង លោក ចាស្ព័រ ប៉ៅ (Jasper Pauw) បានចោទសួរ លោក ឆាំង យុ ពីលទ្ធភាពថាតើវៀតណាមដែលបានចូលរួមផ្ដួលរំលំរបបពួកកុម្មុយនិស្ដខ្មែរក្រហមអាចមានលទ្ធភាពបង្កើត ឬក៏ចងក្រងឯកសារទាក់ទងទៅនឹងរបបខ្មែរក្រហមដែរឬទេ។ នាយកមជ្ឈមណ្ឌលឯកសារកម្ពុជា លើកឡើងថា លោកបានដឹងថា មានជំនាញការវៀតណាមជួយសហការខ្លះនៅក្នុងការប្រមូលនៅឯកសារនានា ក៏ប៉ុន្ដែភាគច្រើនគឺជាបុគ្គលិកខ្មែរដែលជាអ្នកដើរប្រមូលឯកសារទាំងអស់នោះ។ «គឺខ្មែរយើងទេ ដែលជាអ្នកដើរប្រមូលឯកសារ គឺមិនមែនវៀតណាមទេ។ ប៉ុន្ដែដោយសារវៀតណាមកាន់កាប់កន្លែងមួយចំនួនគឺយើងត្រូវសុំការអនុញ្ញាតពីគេ»។ ក្រុមមេធាវីការពារជនជាប់ចោទ អៀង សារី ដែលជាអតីតរដ្ឋមន្ដ្រីការបរទេសខ្មែរក្រហម នួន ជា ដែលជាអតីតប្រធានសភាខ្មែរក្រហម ខៀវ សំផន ដែលជាអតីតប្រមុខរដ្ឋ បានចោទសួរលោកឆាំង យុ ចាប់តាំងពីថ្ងៃពុធ សប្ដាហ៍មុនស្តីពីយថាភាព ឬភាពជាក់ច្បាស់អាចជឿទុកចិត្តបាននៃឯកសារមួយចំនួននៅក្នុងចំណោមឯកសារចំនួនប្រមាណជា ៥ម៉ឺនឯកសារ ដែលមជ្ឈមណ្ឌលបានប្រគល់ជូនសាលាក្ដីខ្មែរក្រហម។ ឯកសារទាំងនោះត្រូវបានយកទៅប្រើជាឯកសារភស្ដុតាងក្នុងការកាត់ទោសជនជាប់ចោទទាំងបីនាក់នៅក្នុងសំណុំរឿង០០២នេះ។ លោក ឆាំង យុ បានរៀបរាប់ថា លោកបានប្រមូលឯកសារពីបញ្ញាជន ពីអ្នកស្រាវជ្រាវជាន់ខ្ពស់បរទេស ពីក្រសួងមហាផ្ទៃ ពីគុកទួលស្លែង និងពីបណ្ណាសារដ្ឋានជាតិជាដើម។ ឯកសារដែលលោកប្រមូលបានសរុបជិតមួយលានឯកសារ។ លោកបញ្ជាក់ក្នុងការផ្ដល់សក្ខីកម្មកាលពីសប្ដាហ៍មុនថា ឯកសារទាំងនោះគឺជាឯកសារពិតប្រាកដដែលអាចទុកចិត្តបាន។ លោក ឆាំង យុ រំលឹកថាវៀតណាមប្រាកដជាមិនមានពេលវេលា និងលទ្ធភាពប្រឌិតឯកសារទាំងនោះទេ។ «លោកអង្គុយសរសេរដប់ឆ្នាំ ១លានឯកសារ ខ្ញុំគិតថា ប្រទេសវៀតណាមគ្មានពេលទេ ហើយក៏សរសេរមិនចេញដែរ។ ជាពិសេសក្នុងភាសាមួយចំនួនគឺជាពាក្យដែលលំបាកសូម្បីតែខ្មែរយើងក្មេងៗកម្ពុជាជំនាន់ក្រោយក៏មិនយល់ផង»។ សហមេធាវីបរទេសរបស់នួន ជា បានចោទសួរសំណួរមួយចំនួនដែលមិនទាក់ទងទៅនឹងឯកសាររបស់មជ្ឈមណ្ឌលរបស់លោក ឆាំង យុ ជាពិសេសសំណួរដែលពាក់ព័ន្ធនឹងលោក ជា ស៊ីម ប្រធានគណបក្សប្រជាជនកម្ពុជាស្តីពីសកម្មភាពរបស់គាត់នៅក្នុងសម័យខ្មែរក្រហម ក៏ប៉ុន្ដែត្រូវសហព្រះរាជអាជ្ញាបរទេសចាត់ទុកថា គឺជាសំណួរចាកប្រធាន ហើយបានស្នើឲ្យអង្គជំនុំជម្រះសាលាដំបូងទាត់ចោល។ លោក ឆាំង យុ នៅក្នុងការផ្ដល់សក្ខីកម្មនៅថ្ងៃនេះ ក៏បានបញ្ជាក់ផងដែរថា ឯកសារក្នុងសម័យខ្មែរក្រហមមួយចំនួនត្រូវបានបំផ្លាញចោលដោយពួកខ្មែរក្រហមខ្លួនឯង ត្រូវបំផ្លាញមុនការចូលមកជួយរៀបចំការបោះឆ្នោតជាលើកដំបូងរបស់អង្គការសហប្រជាជាតិនៅកម្ពុជា នៅដើមទសវត្សរ៍១៩៩០ ហើយការបំផ្លាញឯកសារទាំងនោះមួយចំនួនមានលក្ខណៈ «ចេតនានយោបាយ»៕ This posting includes an audio/video/photo media file: Download Now |
| ខ្មាន់កាំភ្លើងពីរនាក់នៅខេត្តក្រចេះត្រូវបានចាប់ខ្លួន Posted: 06 Feb 2012 06:06 PM PST បួនថ្ងៃបន្ទាប់ពីលោកនាយករដ្ឋមន្ត្រីហ៊ុន សែន បញ្ជាឲ្យចាប់ខ្លួនសន្តិសុខចំការកៅស៊ូ TTYចំនួនពីរនាក់ដែលបានបាញ់ប្រជាពលរដ្ឋ អាជ្ញាធរនគរបាលបានចាប់ខ្លួនជនសង្ស័យទាំងពីរនាក់ចេញពីទីកន្លែងក្រុមហ៊ុន ហើយបានប្រគល់ខ្លួនទៅឲ្យតុលាការខេត្តក្រចេះ។ លោក គេត សុជាតិ ចៅក្រមស៊ើបសួរនៃតុលាការខេត្តក្រចេះ បានមានប្រសាសន៍នៅថ្ងៃច័ន្ទនេះថា ជនសង្ស័យទាំងពីររូបដែលរួមមានកែ សុវណ្ណា អាយុ៤០ឆ្នាំ ពិន គឹមឡេង អាយុ២៦ឆ្នាំ ត្រូវបានចោទប្រកាន់ពីបទប្រើប្រាស់អំពើហិង្សាដោយមានស្ថានទម្ងន់ទោសតាមមាត្រាទី២១៨ និងពីបទប្រើប្រាស់អាវុធខុសច្បាប់តាមមាត្រាទី២០ នៃច្បាប់គ្រប់គ្រងអាវុធជាតិផ្ទុះ។ លោកបានមានប្រសាសន៍ថាតុលាការបានសម្រេចឃុំខ្លួនជនសង្ស័យទាំងពីរនាក់នៅពន្ធនាគារខេត្តក្រចេះដើម្បីរង់ចាំការជម្រះទោស។ ក៏ប៉ុន្តែលោកមិនទាន់បានបញ្ជាក់ថាតុលាការនឹងបើកសវនាការកាត់ទោសនៅពេលណាទេ។ «ដោយសារតែនៅក្នុងដំណាក់កាលស៊ើបសួរអីញ្ចឹង យើងមិនដឹងថាត្រូវចំណាយអស់រយៈពេលប៉ុន្មានទេ ប៉ុន្តែរឿងនេះប្រហែលជាត្រូវឆាប់ធ្វើចប់ទេ ដោយសារតែវាមានសញ្ញាណច្បាស់លាស់មួយចំនួន។ ហើយដល់ពេលចប់ យើងនឹងបញ្ជូនទៅជំនុំជម្រះហើយ»។ កាលពីថ្ងៃអង្គារសប្តាហ៍មុននេះ លោកនាយករដ្ឋមន្ត្រីហ៊ុន សែន បានចេញបញ្ជាដោយផ្ទាល់មាត់ឲ្យក្រុមហ៊ុនចម្ការកៅស៊ូ TTY របស់លោកឧកញ៉ា ណា ម៉ារ៉ាឌី ប្រគល់ខ្លួនសន្តិសុខក្រុមហ៊ុនចំនួនពីរនាក់ ដែលជាប់ពាក់ព័ន្ធលើការបាញ់ប្រហារប្រជាពលរដ្ឋទៅឲ្យសមត្ថកិច្ច។ លោក ហ៊ុន សែន ក៏បានដាក់បញ្ជាទៀតថាប្រសិនបើក្រុមហ៊ុនTTY មិនបានប្រគល់ខ្លួនសន្តិសុខទាំងពីរនោះទេ លោកឧកញ៉ា ណា ម៉ារ៉ាឌី អាចប្រឈមមុខនឹងការចាប់ខ្លួន។ លោក ចាន់ សាវ៉េត មន្ត្រីផ្នែកស៊ើបអង្គេតរបស់សមាគមសិទ្ធិមនុស្សអាដហុក បានស្វាគមន៍ការចាប់ខ្លួនជនសង្ស័យតាមបញ្ជារបស់លោកនាយករដ្ឋមន្ត្រីហ៊ុន សែន។ ក៏ប៉ុន្តែលោកមិនចង់ឃើញឲ្យមានវប្បធម៌នេះទេ។ លោកបានមានប្រសាសន៍ថា សមត្ថកិច្ចត្រូវតែហ៊ានចាប់ខ្លួនជនសង្ស័យ ដែលរំលោភច្បាប់មិនចាំបាច់បទបញ្ជារបស់លោកនាយករដ្ឋមន្ត្រីហ៊ុន សែន ទេ។ «អាជ្ញាធរសមត្ថកិច្ចស្រុកយើងដូចជាមិនសូវមានឆន្ទៈគ្រប់គ្រាន់ដើម្បីធ្វើការស៊ើបអង្គេតស្រាវជ្រាវកម្ចាត់បទល្មើសហ្នឹងទេ។ ពួកគាត់តែងតែប្រើប្រាស់រូបភាព ដែលគេហៅថាធ្វើតាមបញ្ជា ដល់ពេលគាត់ឥតយកគោលការណ៍ច្បាប់មកអនុវត្តឲ្យបានពេញលេញ»។ កាលពីថ្ងៃទី១៨ ខែមករា កន្លងទៅនេះ សន្តិសុខចម្ការកៅស៊ូ TTY របស់លោកឧកញ៉ាណា ម៉ារ៉ាឌី បានធ្វើការបាញ់រះដោយកាំភ្លើងអាកា៤៧ ទៅលើក្រុមប្រជាពលរដ្ឋ ដែលទាមទារឲ្យបញ្ឈប់គ្រឿងចក្រដែលមកឈូសឆាយផលដំឡូងមីរបស់ពួកគាត់នៅស្រុកស្នួល ខេត្តក្រចេះ។ មានប្រជាពលរដ្ឋយ៉ាងតិចបួននាក់ ដែលរួមមានអ្នកស្រី នេត្រ រតនា លោកម៉ុង ទូច ហៅអូ លោកលី គ្រីយ៉ា និងលោកលី អីសា បានទទួលរងរបួសដោយអំពើហិង្សានោះ។ អ្នកស្រីនេត្រ រតនា អាយុ២៣ឆ្នាំ ជនរងគ្រោះមួយរូប ដែលបានរងរបួសដោយសារការបាញ់ប្រហារនេះ បាននិយាយថាការចាប់ខ្លួនជនសង្ស័យយកមកផ្តន្ទាទោសមិនទាន់ឲ្យអ្នកស្រីបានស្ងប់ចិត្តទេ។ អ្នកស្រីបាននិយាយថា អ្នកស្រីចង់ឲ្យអាជ្ញាធរស្រាវជ្រាវចាប់ខ្លួនអ្នកបញ្ជានៅពីក្រោយខ្នងមកផ្តន្ទាទោសតាមច្បាប់បន្ថែមទៀត។ «អេកូមនៅកន្លែង គ្នាគាត់ស្រែកមកនៅកន្លែងហ្នឹង ពួកខ្ញុំស្តាប់បាន។ បញ្ជាកូនចៅគាត់ហ្នឹងថាឲ្យបាញ់ប្រជាពលរដ្ឋហ្នឹងម្តងទៅ។ អាណាខ្លាំងជាងគេ ឲ្យបាញ់ឲ្យងាប់តែម្តងទៅ។ ទុកឲ្យគាត់ជាអ្នកដោះស្រាយ»។ ក្រុមហ៊ុនចម្ការកៅស៊ូ TTY នេះបានទទួលដីសម្បទានសេដ្ឋកិច្ចពីរដ្ឋាភិបាលសម្រាប់ដាំដើមកៅស៊ូនៅលើផ្ទៃដីទំហំជិតមួយម៉ឺនហិចតា នៅស្រុកស្នួល ខេត្តក្រចេះ។ ក៏ប៉ុន្តែក្រុមហ៊ុននេះត្រូវបានប្រជាពលរដ្ឋបានចោទប្រកាន់ថា បានប៉ះពាល់ដល់ដីចម្ការរបស់ពួកគេប្រមាណជិត៥០០គ្រួសារ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
