VOA News: ព័ត៌មាន: “ភាពមិនប្រក្រតីនៅមានទោះយុទ្ធនាការបោះឆ្នោតអាណត្តិនេះល្អជាងមុន” plus 1 more |
| ភាពមិនប្រក្រតីនៅមានទោះយុទ្ធនាការបោះឆ្នោតអាណត្តិនេះល្អជាងមុន Posted: 01 Jun 2012 10:48 PM PDT អង្គការសង្គមស៊ីវិលដែលតាមឃ្លាំមើលដំណើរការបោះឆ្នោត និងគណៈកម្មាធិការជាតិរៀបចំការបោះឆ្នោតបានសន្និដ្ឋានដូចៗគ្នាថា ដំណើរការឃោសនារកសំឡេងឆ្នោតសម្រាប់គណបក្សនយោបាយទាំង១០ សម្រាប់ការបោះឆ្នោតក្រុមប្រឹក្សាឃុំសង្កាត់អាណត្តិទី៣នេះ មានលក្ខណៈល្អប្រសើរច្រើន បើប្រៀបធៀបមួយថ្ងៃទៅនឹងអាណត្តិមុនៗ។ ក៏ប៉ុន្តែនៅតែមានភាពមិនប្រក្រតីបានកើតឡើងលើគណបក្សនយោបាយ ជាពិសេសគណបក្សជំទាស់។ គណៈកម្មាធិការដើម្បីការបោះឆ្នោតដោយសេរី និងយុត្តិធម៌ ដែលហៅកាត់ថាខាំហ្វែ្រល បានចេញសេចក្តីថ្លែងការណ៍របស់ខ្លួនថា នៅក្នុងឆ្នាំ២០០២ បានកើតឡើងចំនួន១០ករណីនៅក្នុងមួយថ្ងៃ។ ឆ្នាំ២០០៧ បានកើតឡើងចំនួន ៨ករណីនៅក្នុងមួយថ្ងៃ ហើយឆ្នាំ២០១២នេះ មានតែ៦ករណីប៉ុណ្ណោះ ដែលបានកើតឡើងនៅក្នុងមួយថ្ងៃ។ ក៏ប៉ុន្តែឥទ្ធិពលទាំងនេះពុំទាន់បានវាស់វែងទំហំបាននៅឡើយទេ ដែលករណីទាំងនេះរួមមានការហែកខិតបណ្ណ ការទិញសន្លឹកឆ្នោត ការរំខានក្នុងការឃោសនា ការទម្លាក់ស្លាកគណបក្សនយោបាយដែលសរុបប្រមាណចំនួន ១០០ករណី។ អង្គការខំហ្វ្រែលបានសង្កេតឃើញថា មានចំនួនអំពើហិង្សាចំនួនពីរករណី ដែលនៅក្នុងនោះមានមួយករណីក្មេងស្ទាវមួយក្រុមបានវាយទៅលើស្ត្រី ដែលជាសកម្មជនគណបក្សសម រង្ស៊ី នៅក្នុងខេត្តបាត់ដំបង និងមួយករណីទៀត ស្រ្តីដែលជាភរិយារបស់គណបក្សគ្រប់គ្រងអំណាចបានវាយទៅលើស្ត្រីដែលមកពីគណបក្សហ៊្វុនស៊ិនប៉ិចនៅក្នុងខេត្តបាត់ដំបង។ នេះបើតាមការបញ្ជាក់របស់លោក ធន់ សារ៉ាយ ប្រធានគណៈកម្មាធិការនាយកនៃអង្គការខំហ្វ្រែល។ លោក ធន់ សារ៉ាយ បានមានប្រសាសន៍ទៀតថា បើទោះបីជាមានការថយចុះនៃអំពើហិង្សាក៏ដោយ ក៏ប៉ុន្តែលោកបានរកឃើញមានចំនួនឈ្មោះប្រមាណ ១លាន ៥សែននាក់ ត្រូវបានលុបចេញពីបញ្ជីគណៈកម្មាធិការជាតិរៀបចំការបោះឆ្នោត។ «នៅក្នុងថ្ងៃបោះឆ្នោតនេះ យើងនឹងមានការបារម្មណ៍ច្រើន ដល់អ្នកដែលរកឈ្មោះមិនឃើញ ហើយអ្នកដែលបាត់ឈ្មោះ។ អញ្ចឹងរឿងបញ្ជីបោះឆ្នោតនេះ គឺជារឿងមួយដែលធំជាងគេនៅក្នុងការត្រៀមរៀបចំការបោះឆ្នោតនេះ»។ លោកទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោតបានថ្លែងប្រាប់នៅក្នុងអង្គសន្និសីទព័ត៌មាននៅថ្ងៃសុក្រនេះថា បើគិតចាប់ពីឆ្នាំ២០០៨ រហូតមកដល់ឆ្នាំ២០១២នេះគជប បានលុបឈ្មោះប្រមាណជាង ៧៦ម៉ឺននាក់តែប៉ុណ្ណោះ។ «គឺឆ្នាំ២០០៨ យើងលុបឈ្មោះប្រមាណតែ ១៦ម៉ឺននាក់ទេ ពីបញ្ជីបោះឆ្នោត។ ឆ្នាំ២០០៩ យើងលុបឈ្មោះ ១៦ម៉ឺននាក់ពីបញ្ជីបោះឆ្នោត។ ឆ្នាំ២០១០ យើងលុប ១៧ម៉ឺននាក់ពីបញ្ជីបោះឆ្នោត។ ឆ្នាំ២០១១នេះ យើងលុបពី ២៧ម៉ឺននាក់ពីបញ្ជីបោះឆ្នោត។ អញ្ចឹងបូកទាំងកន្ទុយៗទេ យើងលុបអស់តែ ៧៦ម៉ឺននាក់ទេ។ ហេតុអីបានជាបាត់ឈ្មោះពីបញ្ជីបោះឆ្នោតរហូតដល់ ១លាន ៥សែននាក់»។ គណបក្សនយោបាយចំនួន១០ ដែលបានឃោសនារកសំឡេងឆ្នោតកាលពីថ្ងៃទី១៨ រហូតមកដល់ថ្ងៃសុក្រទី១ ខែមិថុនានេះ។ រយៈពេល១៥ថ្ងៃ នៃដំណើរការបោះឆ្នោត បានបញ្ចប់។ លោក ហង្ស ពុទ្ធា នាយកប្រតិបត្តិនៃអង្គការនិចហ្វិចបានមានប្រសាសន៍ថាមុនដំណើរការឃោសនាបោះឆ្នោតមានភាពមិនប្រក្រតីមួយចំនួនពាក់ព័ន្ធនឹងការបាញ់ប្រហារកម្មករនៃខេត្តស្វាយរៀង ឃាតកម្មទៅលើលោកឈុត វុទ្ធី សកម្មជនការពារព្រៃឈើ ឃាតកម្មទៅលើកុមារី ហេង ចន្ថា នៅក្នុងខេត្តក្រចេះ និងការចាប់ប្រជាពលរដ្ឋចំនួន ១៥នាក់នៅក្នុងតំបន់បឹងកក់ដាក់ពន្ធនាគារ។ លោកបានមានប្រសាសន៍ថា ភាពមិនប្រក្រតីធំៗ ទាំងបួននេះ អាចនឹងធ្វើឲ្យមានផលប៉ះពាល់នឹងភ័យខ្លាចដល់ប្រជាជនមុនការបោះឆ្នោត។ «មួយទៀត យើងក៏សង្កេតឃើញថាមានការបំភ័ន្តព័ត៌មាន ដោយប្រកាសថាបក្សជំទាស់ហ្នឹងថាបានចុះចូលអស់ហើយ។ អញ្ចឹងនៅចាំអីទៀត ត្រូវចូលឲ្យអស់តែម្តងទៅ។ មួយទៀតការបំភ័ន្តព័ត៌មានថាបើសិនជាមិនបោះឆ្នោតឲ្យគណបក្សកាន់អំណាចទេ គឺថាសង្គមអស្ថេរភាព»។ រយៈពេល១៥ថ្ងៃ នៃយុទ្ធាការឃោសនារកសំឡេងឆ្នោតបានកន្លងផុតទៅនេះ គណៈកម្មាធិការជាតិរៀបចំការបោះឆ្នោតបានទទួលពាក្យបណ្តឹងនៅទូទាំងប្រទេសចំនួន ៧៦បណ្តឹង ក្នុងនោះបណ្តឹងដែលកំពុងដោះស្រាយមាន ៧បណ្តឹង ការចារបដិសេធ៤បណ្តឹង ការដកបណ្តឹង៥បណ្តឹង ការផ្សះផ្សារជាគ្នាចំនួន ៣៦បណ្តឹង ការផ្សះផ្សារគ្នាមិនជាគ្នាចំនួន ១៥បណ្តឹង និងជូនដំណឹងបដិសេធចំនួន៤បណ្តឹង៕ This posting includes an audio/video/photo media file: Download Now |
| គណបក្សប្រឆាំងថាខ្លួនត្រូវបានរំខានពេលឃោសនាបោះឆ្នោត Posted: 02 Jun 2012 07:11 AM PDT មន្ដ្រីជាន់ខ្ពស់គណបក្សសិទ្ធិមនុស្សមួយរូបបានចោទប្រកាន់ថា ក្រុមសកម្មជនរបស់គណបក្សប្រជាជនកម្ពុជា បានតាមរំខានជាច្រើនដល់សកម្មភាពឃោសនាបោះឆ្នោតនៅថ្ងៃចុងក្រោយរបស់ខ្លួននៅថ្ងៃសុក្រនេះ។ លោកអ៊ូ ប៊ុនរិទ្ធ តំណាងរាស្ដ្ររបស់គណបក្សសិទ្ធិមនុស្សប្រចាំខេត្តកណ្ដាលមានប្រសាសន៍ថា លោកបានដឹកនាំការឃោសនាទ្រង់ទ្រាយធំមួយដែលមានសកម្មជនសរុបចំនួន៣០០នាក់ នៅក្នុងស្រុកពញ្ញាឮ ខេត្តកណ្ដាល។ លោកអះអាងថា ក្បួនឃោសនានោះត្រូវបានរំខានដោយក្រុមអ្នកឃោសនាមកពីគណបក្សកាន់អំណាច ហើយលោកត្រូវបង្ខំចិត្តបញ្ឈប់យុទ្ធនាការ ក្រោយបន្ទាប់ពីធ្វើសកម្មភាពបានជាងបីម៉ោង។ «ពេលណាទៅកន្លែងណា គាត់ទៅកន្លែងហ្នឹង។ គាត់បិទផ្លូវយើង។ យើងហែលឆ្លងទៅស្ពានព្រែកក្តាម គាត់ឆ្លងទៅដែរទៅ។ ហើយហួសព្រែកក្តាម ត្រឡប់មកវិញ គាត់ត្រឡប់មកដែរ។ គប់ដបគោជល់មកលើសកម្មជនយើង។ កាលពីព្រឹកមិញ ក៏មានសកម្មជនយើងរាយការណ៍មកថា គាត់ដាក់ម៉េក្រូចេញមកពីផ្ទះហ្នឹង ក៏មានគណបក្សប្រជាជនមកទាញខ្សែម៉េក្រូផ្តាច់មិនឲ្យចាក់ម៉េក្រូ។ ខ្ញុំក៏ឮជេរមកខ្ញុំផ្ទាល់។ ខ្ញុំស្តាប់ ឮក៏មានការជេរមកខ្ញុំអញ្ចឹង»។ លោកអ៊ូ ប៊ុនរិទ្ធ បានបញ្ជាក់ថា លោកមានអន្ដរាគមន៍ពីគណៈកម្មការបោះឆ្នោតឃុំ និងស្រុកពញ្ញាឮដែរ ប៉ុន្ដែនៅតែមិនអាចទប់ស្កាត់ការរារាំងទាំងនោះទេ។ ទោះជាយ៉ាងណាលោកតូច សត្ថា អនុប្រធានគណៈកម្មាការរៀបចំការបោះឆ្នោតខេត្តកណ្ដាលមានប្រសាសន៍ថា បានហៅហេតុការណ៍ទាំងនោះថា ជាការស្ទះចរាចណ៍ដោយចៃដន្យពេលមានក្បួនឃោសនានយោបាយ។ «ក្បួនហ្នឹងវាទៅ វាចង្អៀត ស្ទះចរាចរណ៍។ អញ្ចឹងទៅពួកខ្ញុំ ទៅធ្វើអន្តរាគមន៍អាចបញ្ជៀសឲ្យមួយទៅសិន អញ្ចឹងបានជាមួយទៅទៀត។ អញ្ចឹងទៅយើងត្រូវដោះស្រាយទៅភ្លាមៗ បន្ទាប់ពីទទួលបានដំណឹងរួច»។ គណបក្សនយោបាយចំនួនដប់ បានចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃទី៣ ខែមិថុនានេះ។ ការឃោសនាបោះឆ្នោតរយៈពេល១៥ថ្ងៃរបស់ពួកគេនឹងត្រូវបញ្ចប់នៅម៉ោង១២ យប់ថ្ងៃសុក្រនេះ។ គណបក្សទាំងអស់បាននាំគ្នាបង្កើតសកម្មភាពឃោសនាផ្តាច់ព្រ័ត្តនៅទឹកចុងក្រោយនេះ។ នៅក្នុងក្រុងភ្នំពេញក្រៅពីការដង្ហែរក្បួនតាមដងផ្លូវ ក៏មានការចាក់ភ្លេងនៅតាមចំណុចមួយចំនួនរបស់គណបក្សធំៗ ខ្លះដែរ។ ដោយឡែកគណបក្សតូចៗបានដាក់បញ្ជីឈ្មោះបេក្ខជន និងផ្តោតការឃោសនាជាពិសេសនៅតាមបណ្ដាខេត្ត។ មន្ដ្រីគណបក្សសិទ្ធិមនុស្សផ្សេងទៀតបានឲ្យដឹងថា មានក្រុមក្មេងស្ទាវប្រមាណជាប្រាំពីរទៅប្រាំបីនាក់បានស្ទាក់ និងគុបដុំថ្មទៅលើក្បួនដង្ហែរគណបក្សខ្លួនក្នុងសង្កាត់ព្រែកប្រា រាជធានីភ្នំពេញ។ ដំណាលគ្នានោះក្រុមក្មេងស្ទាវបានធាក់ក្រុមអ្នកដង្ហែរក្បួនដែលកំពុងតែជិះម៉ូតូផងដែរ។ មនុស្សពីរនាក់បានរងរបួសក្នុងនោះម្នាក់បានបែកក្បាល និងត្រូវបញ្ជូនទៅកាន់គ្លីនីក។ មន្ដ្រីដដែលនោះជឿថា ក្មេងស្ទាវទាំងនោះទំនងជាកូនរបស់ប្រធានភូមិនៅទីនោះ។ ប៉ុន្តែលោកលន់ ឆេងកៃ ប្រធានគណៈកម្មការបោះឆ្នោតរាជធានីភ្នំពេញ មានប្រសាសន៍ថា លោកបានទទួលស្គាល់ថា មានអំពើហិង្សាបែបនោះកើតឡើងមែន។ ដោយឡែកក្មេងទាំងនោះគឺជាក្មេងស្ទាវហិតកាវ។ ហើយពួកគេបានរត់គេចខ្លួនបាត់អស់ក្រោយពីបង្កអំពើហិង្សា៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
