VOA News: ព័ត៌មាន: “ការពិភាក្សាស្តីអំពីការដកទ័ពពីដំបន់ជម្លោះព្រះវិហារនឹងត្រូវបានធ្វើឡើង” plus 2 more |
- ការពិភាក្សាស្តីអំពីការដកទ័ពពីដំបន់ជម្លោះព្រះវិហារនឹងត្រូវបានធ្វើឡើង
- ជនរងគ្រោះជម្លោះដីធ្លីទាមទារឲ្យដោះលែងតំណាងរបស់គេ១៥រូប
- ៤៦ភាគរយនៃពលរដ្ឋអេហ្ស៊ីប៥០លាននាក់ចេញទៅបោះឆ្នោតសារជាថ្មី
| ការពិភាក្សាស្តីអំពីការដកទ័ពពីដំបន់ជម្លោះព្រះវិហារនឹងត្រូវបានធ្វើឡើង Posted: 28 May 2012 07:00 PM PDT កម្ពុជា និងថៃបានឈានទៅដល់កិច្ចព្រមព្រៀងថា នៅខែមិថុនាខាងមុខនេះ នឹងបើកកិច្ចប្រជុំរដ្ឋមន្ត្រីការពារជាតិរវាងប្រទេសទាំងពីរដើម្បីដោះស្រាយបញ្ហាជម្លោះព្រំដែនដ៏រ៉ាំរ៉ៃនៅតំបន់ប្រាសាទព្រះវិហារ។ ការលើកឡើងនេះបានធ្វើឡើងនៅក្នុងខណៈពេលដែលមានការគ្នាមួយរវាងលោកនាយករដ្ឋមន្ត្រីហ៊ុន សែន ជាមួយនឹងសមភាគីរបស់លោកគឺលោក ស៊ុគុមពល សុវណ្ណាថាត (Sukumpol Suwanatat) រដ្ឋមន្ត្រីការពារជាតិថៃ។ លោកអៀង សុផាលែ្លត ជំនួយការផ្ទាល់របស់លោកនាយករដ្ឋមន្ត្រីហ៊ុន សែន បានថ្លែងប្រាប់ក្រុមអ្នកកាសែត បន្ទាប់ពីកិច្ចប្រជុំនោះថាប្រទេសទាំងពីរបានព្រមព្រៀងគ្នាថា នឹងបើកកិច្ចប្រជុំមួយនៅក្នុងខែមិថុនា។ លោកអៀង សុផាលែ្លត បានស្រង់សម្តីលោកនាយករដ្ឋមន្ត្រីមកអះអាងថាដល់ពេលវេលាហើយដែលថៃនឹងកម្ពុជាត្រូវគោរពតាមសេចក្តីសម្រេចរបស់តុលាការក្រុងឡាអេហើយ។ លោកអៀង សុផាលែ្លត បានបញ្ជាក់ទៀតថា ភាគីថៃក៏បានយល់ព្រមចំពោះការលើកឡើងនេះ និងបានបង្ហាញពីឆន្ទៈរបស់ខ្លួនថា ចង់បញ្ចប់បញ្ហាជម្លោះព្រំដែនដ៏រ៉ាំរ៉ៃមួយនេះ។ «ឥណ្ឌូនេស៊ីក៏បានត្រៀមខ្លួនជាស្រេចក្នុងការដើរតួជាអ្នកសង្កេតការណ៍។ ជាការឆ្លើយតបឯកឧត្តម ស៊ុគុមពល សុវណ្ណាថាត បានគោរពយល់ស្របជាមួយនឹងប្រសាសន៍សម្តេចហ៊ុន សែន»។ កាលពីថ្ងៃទី១៨ ខែកក្កដា ឆ្នាំ២០១១ តុលាការក្រុងឡាអេ បានចេញសេចក្តីសម្រេចមួយឲ្យប្រទេសទាំងពីរត្រូវតែដកកងទ័ពចេញពីតំបន់ជម្លោះនៃប្រសាទព្រះវិហារ ហើយអនុញ្ញាតឲ្យអ្នកសង្កេតការណ៍នៃឥណ្ឌូនេស៊ីចូលបំពេញការងាររបស់ខ្លួននៅតំបន់មានជម្លោះនោះ។ រហូតមកដល់ពេលនេះ អស់រយៈពេលជិតមួយឆ្នាំហើយ ពុំមានសញ្ញាណាមួយដែលបង្ហាញពីការដកកងទ័ពរវាងប្រទេសទាំងពីរចេញពីតំបន់ប្រសាទព្រះវិហារនោះទេ។ ក្នុងជំនួបគ្នាមួយរវាងលោកឧបនាយករដ្ឋមន្ត្រីទៀ បាញ់ រដ្ឋមន្ត្រីការពារជាតិកម្ពុជានិងរដ្ឋមន្ត្រីការពារជាតិថៃ កាលពីព្រឹកថ្ងៃចន្ទ ប្រទសទាំងពីរនឹងព្រមព្រៀងគ្នាបង្កើតក្រុមការងាររួមគ្នាមួយ ដើម្បីពន្លឿនផែនការដកកងទ័ពចេញពីតំបន់ប្រាសាទព្រះវិហារ។ លោក ស៊ុគុមពល សុវណ្ណាថាត រដ្ឋមន្ត្រីការពារជាតិថៃ បានថ្លែងតាមរយៈអ្នកបកប្រែថាភាពយឺតយ៉ាវនៃការដកកងទ័ពនេះមិនមែនជាផលល្អដល់ថៃទេ។ «ថៃបានកត់សម្គាល់ឃើញយ៉ាងច្បាស់លាស់ហើយថា ដំណើរការយឺតយ៉ាវនេះ វាឥតផ្តល់ផលល្អដល់ប្រទេសថៃនោះទេ»។ ថៃ និងកម្ពុជាមានបញ្ហាជម្លោះព្រំដែន ជាពិសេសនៅតំបន់ប្រាសាទព្រះវិហារចាប់តាំងពីឆ្នាំ២០០៨ ដែលបានបណ្តាលឲ្យកងទ័ពទាំងសងខាងស្លាប់ និងរងរបួស។ នៅក្នុងបរិបទជម្លោះព្រំដែននេះដែរលោក លាង ជាង លី (Laing Guang Lie) រដ្ឋមន្ត្រីការពារជាតិចិនក្នុងអំឡុងដំណើរទស្សនកិច្ចរបស់លោកចំនួនបួនថ្ងៃ មកកម្ពុជា ចិនបានសម្រេចផ្តល់ថវិកាចំនួន ១២០លានយន់ គឺស្មើនឹងប្រមាណ២០លានដុល្លារសហរដ្ឋអាមេរិក ដើម្បីជួយពង្រឹងវិស័យយោធាកម្ពុជា។ ចិនបានសន្យាថានឹងហ្វឹកហ្វឺនគ្រូបង្គោលយោធាដើម្បីបន្តការសិក្សានៅចិន៕ This posting includes an audio/video/photo media file: Download Now |
| ជនរងគ្រោះជម្លោះដីធ្លីទាមទារឲ្យដោះលែងតំណាងរបស់គេ១៥រូប Posted: 28 May 2012 06:39 PM PDT អ្នកភូមិបឹងកក់ និងប្រជាពលរដ្ឋសហគមន៍ន៍បុរីកីឡាសរុបប្រមាណជា ២០០នាក់ បានធ្វើការតវ៉ានៅព្រឹកថ្ងៃចន្ទនេះ នៅមុខរដ្ឋសភាជាតិក្រុងភ្នំពេញដើម្បីស្វែងរកអន្តរាគមន៍ពីប្រធានសភាជាតិលោក ហេង សំរិន ឲ្យមានការដោះលែងសមាជិកសហគមន៍បឹងកក់ចំនួន១៥នាក់។ ក្រុមអ្នកតវ៉ាបានដើរចម្ងាយប្រមាណ ១០០ម៉ែត្រ ពីកន្លែងប្រមូលផ្តុំឆ្ពោះទៅកាន់មុខមន្ទីររដ្ឋសភាដៃកាន់បដាពណ៌ខៀវមានសរសេរអក្សរបញ្ឈប់អំពើហិង្សា ទាមទារឲ្យដោះលែងសមាជិកសហគមន៍ពួកគេ និងខ្លះទៀតដៃកាន់ផ្កាឈូកពណ៌ក្រហម ស ជាបាច់តូចៗ ដោយមានបិទបន្ទះក្រដាសតូចមួយសរសេរជាសារស្នើឲ្យមានការដោះលែងជនទាំង១៥នាក់នេះដែរ។ ពួកគេបានហៅការទាមទារនៅថ្ងៃនេះ គឺជាយុទ្ធនាការតវ៉ាដែលនឹងឈានទៅរកធ្វើការតវ៉ា នៅទូទាំងប្រទេសដើម្បីបញ្ចប់ការប្រើអំពើហិង្សាលើក្រុមប្រជាពលរដ្ឋ និងដោះលែងអ្នកភូមិបឹងកក់។ <!--AV--> ប្រជាពលរដ្ឋទាំង១៥នាក់ ក្នុងនោះមានបុរសម្នាក់ ត្រូវចាប់ខ្លួនយ៉ាងហិង្សាដោយអាជ្ញាធរនគរបាលរាជធានីភ្នំពេញ ហើយត្រូវសាលាដំបូងរាជធានីភ្នំពេញផ្តន្ទាទោស១៣នាក់ក្នុងចំណោមនោះឲ្យជាប់ពន្ធនាគារម្នាក់ចំនួនពីរឆ្នាំប្រាំមួយខែ និងពីរនាក់ទៀតត្រូវឃុំខ្លួនបណ្ដោះអាសន្ន។ លោក ឡេង ប៉េងឡុង អគ្គលេខាធិការរដ្ឋសភា មិនអាចទាក់ទងបានទេ ដោយសារតែលោកមិនលើកទូរស័ព្ទ។ រីឯលោក ប៉ែន បញ្ញា ប្រធានគណកម្មការសិទ្ធិមនុស្ស និងទទួលពាក្យបណ្ដឹងរបស់រដ្ឋសភាដែលជាគណៈកម្មការទទួលញ្ញត្តិរបស់ប្រជាពលរដ្ឋបឹងកក់ និងសហគមន៍បុរីកីឡា កាលពីព្រឹកមិញ លោកប៉ែន បញ្ញា បានផ្តាច់ទូរសព្ទទៅវិញ បន្ទាប់ពីបានទទួលទូរសព្ទវីអូអេសំឡេងសហរដ្ឋអាមេរិកជាខេមរភាសាបានបន្តិច។ យ៉ាងណាក៏ដោយស្រ្តីតំណាងក្រុមប្រជាពលរដ្ឋដែលបានយកញ្ញត្តិទៅដាក់គណៈកម្មការរបស់ លោកប៉ែន បញ្ញា នោះបានស្រង់សម្តីមន្ដ្រីមួយរូបថា គណៈកម្មការនេះនឹងជូនដំណឹងមកក្រុមប្រជាពលរដ្ឋវិញនៅសប្ដាហ៍ក្រោយ។ «រឿងហ្នឹងគឺពាក់ព័ន្ធទៅដល់ក្រសួងយុត្តិធម៌។ អញ្ចឹងគាត់ថា គាត់ហ្នឹងជួយឲ្យដំណឹងយើងក្នុងរយៈពេលមួយអាទិត្យទៀត។ ខ្ញុំក៏សូមអំពាវនាវដល់សម្តេចនាយករដ្ឋមន្ត្រីហ៊ុន សែន លោកជុំទាវប៊ុនរ៉ានី។ កាលពីសម័យប៉ុលពត ក៏លោកជំទាវធ្លាប់បែកបាក់ព្រាត់កូន ព្រាត់ប្តីជាទីស្រឡាញ់ដែរ។ លោជំទាវប្រាកដជាយល់នូវការឈឺចាប់នូវការបែកបាក់»។ លោក ហេង សំអ៊ន អគ្គលេខាធិការនៃសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធមានប្រសាសន៍ថា ក្រុមប្រជាពលរដ្ឋ និងសមាគមរបស់លោកនឹងធ្វើការតវ៉ាតទៅទៀត ប្រសិនបើមិនមានការដោះលែងអ្នកភូមិបឹងកក់នោះទេ។ «ចាប់ពីថ្ងៃនេះទៅយើងនឹងបន្តរហូត ហើយវានឹងកាន់តែធំទៅៗ រហូតដល់មានការដោះលែងអ្នកបឹងកក់ទាំង១៥នាក់ ទើបយើងបញ្ចប់យុទ្ធនាការរបស់យើង»។ ដោយឡែកមន្ដ្រីខាងលើនេះបានប្រាប់ប្រជាពលរដ្ឋសហគមន៍បុរីកីឡាថា ពួកគេធ្វើញ្ញត្តិដដែលៗ ដូចមុនដែរ។ ក្រុមប្រជាពលរដ្ឋសហគមន៍បឹងកក់ និងបុរីកីឡាបានយកផ្កាឈូកដែលពួកគេកាន់នោះទៅដាក់ពីមុខខ្លោងទ្វារផ្លូវចូលរដ្ឋសភា។ នៅទីនោះហើយដែលលោក ដួង ឆឺត ប្រជាពលរដ្ឋអ្នកភូមិបឹងកក់បានកោរសក់ដើម្បីបួងសួងឲ្យមានការដោះលែងប្រជាពលរដ្ឋទាំង ១៥នាក់ មានការសូត្រធម៌សុំសិល្ប៍ប្រាំបន្ទាប់ពិធីកោរសក់នេះរួច។ ដើមហេតុនៃការចាប់ខ្លួនជនទាំង ១៥នាក់ ក្នុងនោះមានស្ដ្រីអ្នកតវ៉ាយ៉ាងសកម្មក្នុងសហគមន៍បឹងកក់ចំនួនបីនាក់យ៉ាងតិច បន្ទាប់ក្រុមអ្នកតវ៉ាជួយគាំទ្រដល់លោកដួង ឆឺត នេះ ក្នុងការប៉ុនប៉ងសាងសង់ផ្ទះរបស់គាត់ឡើងវិញលើដីរបស់គាត់ដែលត្រូវឈូសឆាយកម្ទេច។ លោក ដួង ឆឺត ថ្លែងដោយទឹកមុខស្លេកស្លាំង។ «បើខ្ញុំស្លាប់ទៅឲ្យបងប្អូនជួយមើលប្រពន្ធកូនខ្ញុំផង។ ខ្ងុំពិបាកណាស់ ខ្ញុំរស់ព្រឹកល្ងាចយប់ថ្ងៃ នឹកឃើញតែរឿងសម្លាប់ខ្លួន ព្រោះថារស់នៅវាវេទនាពេក»។ លោក អំ សំអាត ប្រធានការិយាល័យគ្រប់គ្រងបច្ចេកទេសស៊ើបអង្កេតរបស់អង្គការការពារសិទ្ធិមនុស្សលីកាដូ លើកឡើងថា សាលារាជធានីភ្នំពេញកំពុងដើរបញ្ច្រាសនឹងបទបញ្ជារបស់លោកនាយករដ្ឋមន្ដ្រីហ៊ុន សែន។ «សម្តេចនាយកធ្លាប់លើកឡើងហើយថា មិនឲ្យប្រជាពលរដ្ឋណាមួយជាប់ពន្ធនាគារដោយសារការតវ៉ារឿងដីធ្លីទេ។ ផ្ទុយទៅវិញសាលាក្រុងភ្នំពេញ កំពុងតែអនុវត្តផ្ទុយពីគោលការរបស់រាជរដ្ឋាភិបាល»។ លោកសុន ឆ័យ តំណាងរាស្ដ្រមណ្ឌលក្រុងភ្នំពេញរបស់គណបក្សជំទាស់សម រង្ស៊ី មានវត្តមានក្នុងការតវ៉ារបស់អ្នកភូមិបឹងកក់នោះដែរ។ លោកបានថ្កោលទោសដល់ការផ្តន្ទាទោសលើអ្នកភូមិបឹងកក់ពីសំណាក់តុលាការក្រុងភ្នំពេញ។ This posting includes an audio/video/photo media file: Download Now |
| ៤៦ភាគរយនៃពលរដ្ឋអេហ្ស៊ីប៥០លាននាក់ចេញទៅបោះឆ្នោតសារជាថ្មី Posted: 28 May 2012 07:06 PM PDT គណៈកម្មការរៀបចំការបោះឆ្នោតបាននិយាយថាមានមនុស្ស៤៦ភាគរយនៃប្រជារាស្ត្រអេហ្ស៊ីប៥០លាននាក់ដែលមានសិទ្ធិបោះឆ្នោតបានទៅបោះឆ្នោត។ កាលពីថ្ងៃច័ន្ទពួកមន្ត្រីរៀបចំការបោះឆ្នោតក្នុងប្រទេសអេហ្ស៊ីបបានបញ្ជាក់លទ្ធផលនៃការបោះឆ្នោតប្រធានាធិបតីដែលនាំឱ្យមានការបោះឆ្នោតជាថ្មីរវាងបេក្ខជននៃអង្គភាពអ៊ីស្លាមនិយម Muslim Brotherhood និងបេក្ខជនម្នាក់ទៀតដែលមានចំណងទាក់ទងខ្លាំងជាមួយការគ្រប់គ្រងរបស់លោកអតីតប្រធានាធិបតី ហូស៊្នី មូបារ៉ាក់Hosni Mubarak។ ការរាប់សន្លឹកឆ្នោតនៃការបោះឆ្នោតប្រធានាធិបតីដោយសេរីទីមួយនៃប្រទេសអេហ្ស៊ីបកាលពីសប្តាហ៍មុនបង្ហាញថាលោកម៉ូហាមេដ មរស៊ី Mohammed Morsi នៃអង្គភាព Muslim Brotherhood បានទទួលសន្លឹកឆ្នោតគាំទ្រច្រើនជាងគេហើយលោក អាមេដ ស្ហាហ្វីគAhmed Shafiqអតីតនាយករដ្ឋមន្ត្រីនិងជាអ្នកមិនយកសាសនាចម្បងបានទទួលសន្លឹកឆ្នោតគាំទ្រច្រើនបំផុតទីពីរ។ ពួកមន្ត្រីទាំងនេះបានបញ្ជាក់ភាពពិតប្រាកដអំពីលទ្ធផលជំហានដំបូងដែលបានត្រូវផ្សព្វផ្សាយកាលពីសប្តាហ៍មុន។ ការបោះឆ្នោតជាថ្មីដែលនឹងប្រព្រឹត្តទៅនៅថ្ងៃទី១៦និងទី១៧ខែមិថុនានឹងផ្តល់ឱ្យប្រជារាស្ត្រអេហ្ស៊ីបនូវជម្រើសមួយរវាងពួកបេក្ខជនមកពីមាគ៌ានយោបាយផ្សេងគ្នា។ លោក មរស៊ីMorsi បានទទួលសន្លឹកឆ្នោតគាំទ្រ៥លាន៧សែន៦ម៉ឺន៤ពាន់៩រយ៥២ សន្លឹកគឺច្រើនជាងលោក ស្ហាហ្វិកShafiqបន្តិច ដែលបានទទួលសន្លឹកឆ្នោតគាំទ្រ៥លាន៥សែន៥ពាន់៣រយ២៧សន្លឹក។ គណៈកម្មការរៀបចំការបោះឆ្នោតបាននិយាយថាមានមនុស្ស៤៦ភាគរយនៃប្រជារាស្ត្រអេហ្ស៊ីប៥០លាននាក់ដែលមានសិទ្ធិបោះឆ្នោតបានទៅបោះឆ្នោត។ ស៊ីរី៖ លោកខូហ្វ៊ី អាណាន់Kofi Annan ប្រេសីតសន្តិភាពអន្តរជាតិកំពុងស្ថិតក្នុងប្រទេសស៊ីរីដើម្បីជួយស្រោចស្រង់ផែនការសន្តិភាពមួយដែលលោកសារភាពថាមិនត្រូវបាន«អនុវត្តឲ្យទូលំទូលាយ»ខណៈដែលក្រុមសកម្មជនសិទ្ធិមនុស្សរាយការណ៍អំពីការវាយលុកមួយរបស់កងកម្លាំងរដ្ឋាភិបាលទៅលើក្រុងហាម៉ា Hama នាប៉ែកកណ្តាលប្រទេសដែលបានបណ្តាលឱ្យមនុស្សយ៉ាងតិចណាស់៣៤នាក់ស្លាប់។ កេនយ៉ា៖ លោកនាយករដ្ឋមន្ត្រី រ៉ៃឡា អូឌីហ្កាRaila Odinga នៃប្រទេសកេនយ៉ា Kenya បានមានប្រសាសន៍ថាការផ្ទុះមួយនៅកណ្តាលក្រុង ណៃរូប៊ីNairobi កាលពីថ្ងៃចន្ទជាសកម្មភាពភេរវកម្មមួយដែលផ្ទុយពីពួកប៉ូលីសដែលបានបន្ទោសការផ្ទុះនេះថាបណ្តាលមកពីការប៉ះចរន្តខ្សែភ្លើង។ ស.រ.អ.៖ លោកប្រធានាធិបតីស.រ.អ.បារ៉ាក់អូបាម៉ាបានសម្តែងគារវកិច្ចដល់ពួកទាហានជើងចាស់របស់ប្រទេសជាតិនិងគ្រួសាររបស់ពួកគេនៅក្នុងឱកាសបុណ្យទិវារំលឹកវិញ្ញាណក្ខ័ន្ធយុទ្ធជននៅពេលដែលសហគមន៍នៅទូទាំងប្រទេសអាមេរិកបានរៀបចំពិធីបុណ្យនេះដោយខ្លួនឯង។ វ៉ាទីកង់៖ អាជ្ញាធរវិមានវ៉ាទីកង់បានបដិសេធរបាយការណ៍ដែលថាមានបព្វជិតCardinal ម្នាក់ដែលគេមិនប្រាប់ឈ្មោះមានទាក់ទិននឹងរឿងអាស្រូវធ្ងន់ធ្ងរមួយអំពីការលេចឯកសាររបស់សម្តេចប៉ាបដែលបង្ហាញអំពីការប្រយុទ្ធដណ្តើមអំណាចក្នុងកម្រិតខ្ពស់បំផុតនៃអង្គការព្រះវិហារគ្រឹស្តសាសនានិកាយកាតូលិកCatholic។ ជប៉ុន៖ លោកអតីតនាយករដ្ឋមន្ត្រីជប៉ុន ណាអូតូ កាន់Naoto Kan បានមានប្រសាសន៍ជម្រាបសភាជប៉ុនឱ្យបោះបង់ចោលថាមពលបរមាណូ ហើយលោកបានមានប្រសាសន៍ដែរថាក្នុងឋានៈលោកជាប្រមុខរដ្ឋាភិបាលលោកទទួលខុសត្រូវជាផ្នែកដល់មហន្តរាយបរមាណូដែលបានបណ្តាលមកពីការរញ្ជួយផែនដីនិងមហារលកសមុទ្រស៊ូណាមីtsunami កាលពីឆ្នាំទៅមិញ។ អាហ្វហ្កានិស្ថាន៖ ពួកមន្ត្រីអូតង់បាននិយាយថាសមាជិកពីរនាក់នៃក្រុមចម្រុះបានស្លាប់នៅក្នុងគ្រោះថ្នាក់ធ្លាក់ឧទ្ធម្ភាគចក្រមួយក្នុងផ្នែកខាងកើតនៃប្រទេសអាហ្វហ្កានិស្ថានកាលពីថ្ងៃចន្ទ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
