VOA News: ព័ត៌មាន: “ហេឡូវីអូអេពិសេស ២៥ ឧសភា ២០១២៖ ដំណើរការឃោសនាបោះឆ្នោតថ្នាក់មូលដ្ឋាននិងភាពមិនប្រក្រតី” plus 5 more |
- ហេឡូវីអូអេពិសេស ២៥ ឧសភា ២០១២៖ ដំណើរការឃោសនាបោះឆ្នោតថ្នាក់មូលដ្ឋាននិងភាពមិនប្រក្រតី
- ស្ថានភាពសិទ្ធិមនុស្សចុះថយនៅអាស៊ី
- បក្សរាជានិយមពីររួមគ្នាវិញមុនការបោះឆ្នោត
- អ្នកបឹងកក់១៣នាក់ជាប់ទោសរហូតដល់ពីរឆ្នាំកន្លះក្នុងការតវ៉ាដីធ្លី
- ព្រះសង្ឃជាសកម្មជនសិទ្ធិមនុស្សរងការបង្ខំឲ្យបញ្ឈប់សកម្មភាពរបស់ខ្លួន
- ហេឡូវីអូអេ ២៤ ឧសភា ២០១២៖ ដំណើរការបោះឆ្នោតនៅកម្ពុជានិងការឃោសនាបោះឆ្នោតថ្នាក់មូលដ្ឋាន
| ហេឡូវីអូអេពិសេស ២៥ ឧសភា ២០១២៖ ដំណើរការឃោសនាបោះឆ្នោតថ្នាក់មូលដ្ឋាននិងភាពមិនប្រក្រតី Posted: 25 May 2012 11:39 AM PDT <!--AV--> មន្ត្រីគណៈកម្មាធិការជាតិរៀបចំការបោះឆ្នោត (គជប) ព្រមានថា មន្ត្រីរាជការ កងកម្លាំងប្រដាប់អាវុធដែលចូលរួមក្នុងយុទ្ធនាការបោះឆ្នោតនឹងត្រូវប្រឈមមុខនឹងទណ្ឌកម្ម និងពិន័យ។ នេះជាការអះអាងរបស់លោក កែវ ផល្លា ប្រធាននាយកដ្ឋានច្បាប់និងវិវាទកម្មនៃគណៈកម្មាធិការជាតិរៀបចំការបោះឆ្នោតដែល បានថ្លែងក្នុងកម្មវិធីហេឡូវីអូអេពិសេសកាលពីយប់ថ្ងៃសុក្រទី២៥ ខែឧសភា ឆ្នាំ២០១២។ «បើសិនជាយើងស្រាវជ្រាវឃើញថា គាត់ជាមន្ត្រីរាជការឬក៏កងកម្លាំងប្រដាប់ អាវុធហើយចូលរួមសកម្មភាពសកម្មក្នុងនយោបាយ ឬក៏ឃោសនាហ្នឹងគឺថា គ.ជ.ប.មានសមត្ថកិច្ចក្នុងការផាកពិន័យ។ ហើយយើងអាចជូនឈ្មោះទៅស្ថាប័នរបស់គាត់ដើម្បីដាក់ពិន័យទណ្ឌកម្មបន្ត។ ពីព្រោះយើងមានសមត្ថកិច្ចតាមច្បាប់។ ហើយបើសិនគាត់ប្រព្រឹត្តបទល្មើសទាក់ទងនឹងបណ្តឹងអាជ្ញាដូចជាព្រហ្មទណ្ឌអី អាហ្នឹងទៅតុលាការយោធា បើសិនជាកងកម្លាំងឬតុលាការធម្មតាអញ្ចឹងទៅ បើសិនជាមន្ត្រីរាជការ»។ តែលោក គល់ បញ្ញា នាយកប្រតិបត្តិនៃអង្គការឃ្លាំមើលការបោះឆ្នោតហៅកាត់ថា ខុមហ្រែល បានថ្លែងថា បញ្ហាគឺរឿងអនុវត្តកិច្ចការទប់ស្តាត់និងវិធានការ ផ្សេងៗប្រឆាំងនឹងមន្ត្រីរាជការដែលមិនស្ថិតនៅជាអព្យាក្រឹត្យជារឿងពិបាក។លោកអះអាងថានៅមានមន្ត្រីខ្លះចូលរួមក្នុងយុទ្ធនាការបោះឆ្នោតសកម្មភាពនយោបាយប្រឆាំងនឹងបក្សមួយទៀត។ «ហើយដូចមន្ត្រីរាជការ រឿងការរំលោភច្បាប់បោះឆ្នោត ច្បាប់គណបក្ស ច្បាប់សហលក្ខន្តិកៈមន្ត្រីរាជការ ច្បាប់សហលក្ខខន្តិក:កងយោធពលខេមរភូមិន្ទ នៅតែមានការរំលោភអញ្ចឹង។ តែយើងរកឃើញថា អត់មានអ្នកចាត់វិធានការលើមន្ត្រីនគរបាល កងយោធពលខេមរភូមិន្ទដែលចេញ ទៅឃោសនាប្រឆាំងនឹងគណបក្សផ្សេងទេ។ វាអត់អាចឃើញមានការដោះស្រាយ។ ទាំងហ្នឹងដែល ជាបញ្ហានៅជាទំនាស់នៅមានជាបណ្តឹង។ ហើយវាប៉ះពាល់ដល់ភាពស្មើភាពគ្នានិង យុត្តិធម៌ក្នុងការបោះឆ្នោត បើអត់មានការដោះស្រាយរឿងហ្នឹងទេ»។ មាន៣៥បណ្តឹងដែលកើតឡើងក្នុងពេលឃោសនាបោះឆ្នោត។ ៨បណ្តឹងជា បណ្តឹងទាក់ទងនឹងការគំរាមកំហែងដែលបានដោះស្រាយចប់៕ មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| ស្ថានភាពសិទ្ធិមនុស្សចុះថយនៅអាស៊ី Posted: 25 May 2012 01:58 AM PDT ក្រសួងការបរទេសស.រ.អ. ឲ្យដឹងថាស្ថានភាពសិទ្ធិមនុស្សបានចុះថយនៅក្នុងប្រទេសចិន ហើយថាប្រទេសវៀតណាមក៏បន្ដដាក់កម្រិតយ៉ាងតឹងរឹងទៅលើសិទ្ធិផ្នែកនយោបាយហើយនឹងសេរីភាពក្នុងការបញ្ចេញមតិដែរ។ ទន្ទឹមនឹងនេះ ក្រសួងកាឋរបរទេសកោតសរសើរចំពោះការគោរពសិទ្ធិមនុស្សនៅប្រទេសភូមាដែលល្អជាងមុននៅក្នុងការដោះលែងអ្នកទោសនយោបាយរាប់រយនាក់ហើយនឹងការចូលរួមក្នុងការបោះឆ្នោត របស់អតីតស្ថ្រីជាប់ឃុំឃាំង ដ៏មានឈ្មោះល្បីលោកស្រីអង់ សានសូជីដែលជាមេដឹកនាំប្រជាធិបតេយ្យ។ ស.រ.អ៖ លោកស្រីរដ្ឋមន្ដ្រីក្រសួងការបរទេសស.រ.អ. ហ៊ីល្លីរី គ្លីនតុន និយាយថាឆ្នាំ២០១១ជាឆ្នាំជ្រួលច្របល់និងសំខាន់សម្រាប់ជនណាដែលសិទ្ធិមនុស្សមានហានិភ័យនៅជុំវិញពិភពលោក ហើយនឹងសម្រាប់ជនណាដែលខិតខំប្រឹងប្រែងរ៉ាប់រងឲ្យរដ្ឋាភិបាលគោរពសិទ្ធិមនុស្ស ដោយមានព្រិត្ដិការណ៍ជាច្រើនបានកើតឡើងពីការបដិវត្ដន៍នៅមជ្ឈឹមបូព៌ាទៅដល់កាកែទម្រង់នៅប្រទេសភូមាចាប់ផ្ដើមដោយសិទ្ធិមនុស្ស។ ចិន៖ គេរាយការណ៍មកថាបងប្រុសរបស់លោកឆិន កុងឆិន (Cheng Guangcheng) សកម្មជនចិនពិការភ្នែកបានរត់ចេញពីភូមិដែលមានការយាមរឹងមាំដែលស្ថិតនៅភាគឦសានប្រទេសចិនហើយ ដើម្បីស្ថែងរកយបល់ផ្នែកច្បាប់អំពីវិធីការពារកូនប្រុសរបស់លោកពីអ្វីដែលលោកនិយាយថាជាការចៅទក្នុងបទឧក្រិដ្ឋកម្មដើម្បីសងសឹក។ ភូមា៖ ក្រោយពីបានថ្កោលទោសការរំលោភសិទ្ធិមនុស្សនៅប្រទេសភូមាជាច្រើនឆ្នាំមក ក្រសួងការបរទេសស.រ.អ.បានយកការកែទម្រង់នៅក្នុងពិភពលោកដែលមានប្រជាពលរដ្ឋបះបោរ កែទម្រង់ប្រទេសភូមាគួរធ្វើជាឧទាហរណ៍ឲ្យដល់សង្គមបិទជិតដូចជាប្រទេសកូរ៉េខាងជើង។ល។ អ៊ូរ៉ង់៖ ប្រទេសមានអំណាចប្រាំមួយធ្វើការចរចាគ្នាជាមួយប្រទេសអ៊ូរ៉ង់នៅទីក្រុងបាកហាត (Baghdad)ហើយព្រមព្រៀងគ្នាធ្វើការចរចាគ្នាមួយលើកទៀតនៅទីក្រុងម៉ូស្គូនៅខែក្រោយដើម្បីខិតខំប្រឹងប្រែងដោះស្រាយកង្វល់របស់អន្ដរជាតិអំពីកម្មវិធីនុយគ្លេអ៊ែររបស់ប្រទេសអ៊ីរ៉ង់។ ស.រ.អ.៖ និយាយថាក្រុមអ្នកជំនាញខាងប្រព័ន្ធធ៊ិនធឺណិត ខិតខំប្រឹងប្រែងទប់ស្កាត់ការឃោសនាអកុសលរបស់ពួកអាល់កៃដាតាមប្រព័ន្ធអ៊ិនធឺណិតដែលដាក់ផ្សាយតាមគេហទំព័ររបស់កុលសម្ព័ន្ធយេមែន។ បូសនៀ៖ អតីតស្នងការប៉ូលិសសឺប បូសនៀ (Serbe Bosnia)ម្នាក់ដែលត្រូវជាប់ចោទក្នុងបទដើរតួនាទីសំខាន់មួយនៅក្នុងការសម្លាប់ក្រុមជនជាតិ បូសនៀ អ៊ីស្លាម (Bosnie Islam)នៅឆ្នាំ១៩៩៥បានអាជ្ញាធរបញ្ជូនទៅប្រទេសកំណោះតរបស់គាត់វិញ។ <!--AV--> This posting includes an audio/video/photo media file: Download Now |
| បក្សរាជានិយមពីររួមគ្នាវិញមុនការបោះឆ្នោត Posted: 24 May 2012 09:42 PM PDT គណបក្សរាជានិយមចំនួនពីរគឺគណបក្សនរោត្តម រណឫទ្ធិនិងគណបក្សហ៊្វុនស៊ិនប៉ិច នៅថ្ងៃព្រហស្បតិ៍នេះបានចុះកិច្ចព្រមព្រៀងចងសម្ព័ន្ធភាពគ្នាឡើងវិញបន្ទាប់ពីបានខ្វែងគំនិតខាងផ្លូវនយោបាយអស់រយៈពេលជាងប្រាំមួយឆ្នាំ។ ការសម្រេចចងសម្ព័ន្ធគ្នាឡើងវិញរវាងគណបក្សរាជានិយមទាំងពីរនេះបានធ្វើឡើងនៅឯវិមានសន្តិភាពដែលជាអគាររបស់រដ្ឋាភិបាលក្រោមការសម្របសម្រួលពីលោកនាយករដ្ឋមន្ត្រីហ៊ុន សែន ខាងគណបក្សប្រជាជនកម្ពុជា។ <!--IMAGE-RIGHT--> ការសម្របសម្រួលនេះបានធ្វើឡើងនៅក្នុងពេលដែលគណបក្សនយោបាយកំពុងធ្វើយុទ្ធនាការឃោសនារកសំឡេងឆ្នោតបានពាក់កណ្តាលផ្លូវសម្រាប់ការចូលរួមប្រកួតប្រជែងបោះឆ្នោតក្រុមប្រឹក្សាឃុំ-សង្កាត់ដែលគ្រោងនឹងធ្វើឡើងនៅថ្ងៃទី៣ ខែមិថុនា ខាងមុននេះ។បន្ទាប់ពីបានចុះកិច្ចព្រមព្រៀងជាមួយគ្នាដែលធ្វើឡើងដោយគណបក្សនរោត្តម រណឫទ្ធិដែលតំណាងដោយសម្តេចក្រុមព្រះនរោត្តម រណឫទ្ធិ និងលោកញ៉ឹក ប៊ុនឆៃ ខាងភាគីគណបក្សហ៊្វុនស៊ិនប៉ិចរួចមក ព្រះអង្គម្ចាស់នរោត្តម រណឫទ្ធិបានមានព្រះបន្ទូលប្រាប់ក្រុមអ្នកកាសែតនៅឯអគារវិមានសន្តិភាពថា គណបក្សទាំងពីរបន្ទាប់ពីចុះកិច្ចព្រមព្រៀងនឹងឈានទៅដល់ការបង្កើតគណបក្សថ្មីមួយខាងមុខនេះ ដោយដាក់ឈ្មោះថាគណបក្សហ៊្វុនស៊ិនប៉ិច។ ព្រះអង្គបានមានបន្ទូលថាគណបក្សហ៊្វុនស៊ិនប៉ិចថ្មី នឹងត្រូវបង្កើតឡើងក្រោយការបោះឆ្នោតក្រុមប្រឹក្សាឃុំសង្កាត់ សម្រាប់ការចូលរួមការបោះឆ្នោតជាសកលនៅក្នុងឆ្នាំ២០១៣។ ព្រះអង្គបានបញ្ជាក់ថាគណបក្សហ៊្វុនស៊ិនប៉ិចថ្មី គ្រោងនឹងធ្វើសមាជនៅពេលខាងមុខ ដោយសម្រេចគាំទ្រព្រះអង្គជាប្រធានគណបក្ស ហើយលោកញឹក ប៊ុនឆៃ ជាអនុប្រធានគណបក្ស។ «ដែលមានការបង្រួបបង្រួមគិតពីខ្លួនឯងឲ្យខ្លាំងជាកម្លាំងជាតិជាមុនសិន។ ក៏ប៉ុន្តែសូមរំលឹកជូន ដោយសារតែរឿងយើងបែកបាក់គ្នាហ្នឹងហើយ បានមានឈាមរាជានិយមខ្លះ អញ្ជើញទៅគណបក្សប្រជាជន អញ្ជើញទៅគណបក្សសម រង្ស៊ី អញ្ជើញទៅគណបក្សកឹម សុខា។ ដូច្នេះទិសដៅរបស់ខ្ញុំ មិនមែនទៅធ្វើឲ្យគណបក្សណាខ្សោយទេ។ ទិសដៅរបស់ខ្ញុំថ្ងៃនេះ ដែលជាប្រវត្តិសាស្ត្រ គឺធ្វើម៉េចពង្រឹងឡើងវិញនូវកម្លាំងរាជានិយម»។ បន្ទាប់ពីមានបក្សប្រហារក្នុងគណបក្សហ៊្វុនស៊ិនប៉ិច កាលពីថ្ងៃទី១៨ ខែតុលា ឆ្នាំ២០០៦ ព្រះអង្គម្ចាស់នរោត្តម រណឫទ្ធិ បានភៀសព្រះកាយចេញពីប្រទេសកម្ពុជា រហូតឈានទៅដល់បង្កើតគណបក្សថ្មីមួយដោយដាក់ឈ្មោះព្រះអង្គផ្ទាល់ខ្លួនឯង គឺគណបក្សនរោត្តម រណឫទ្ធិ។ លោកញ៉ឹក ប៊ុនឆៃ ប្រធានប្រតិបត្តិគណបក្សហ៊្វុនស៊ិនប៉ិច បានមានប្រសាសន៍ថាលោកមានការសប្បាយរីករាយ ដោយបានឃើញគណបក្សរាជានិយមទាំងពីរបានរួបរួមគ្នានៅក្នុងរង្វង់គ្រួសារតែមួយ។ លោកបានមានប្រសាសន៍ថាគណបក្សទាំងពីរ នឹងមិនបែកគ្នាទេ នៅពេលអនាគត។ «ការបែកបាក់ហ្នឹង យើងវាឃើញគ្នាហើយថាជូរចត់ណាស់។ ហើយរាជានិយម វាចុះខ្សោយ។ យើងខ្ញុំរីករាយណាស់ ដែលថ្ងៃនេះអ្នករាជានិយមបានរួបរួមគ្នាជាកម្លាំងមួយធំ។ ជាចំណែករួបរួមនៅក្នុងសង្គមជាតិ ដើម្បីយើងធ្វើយ៉ាងណាឲ្យឱកាសនៅក្នុងការអភិវឌ្ឍប្រទេសជាតិ ឲ្យមានការរីកចម្រើន»។ លោកបណ្ឌិត ឡៅ ម៉ុងហៃ អ្នកវិភាគឯករាជ្យមួយរូបបានយល់ឃើញថា ការរួបរួមគ្នារវាងគណបក្សទាំងពីរ ដោយសារតែគណបក្សប្រជាជនកម្ពុជាចង់ឃើញគណបក្សទាំងពីររស់នៅក្រោមដំបូលឆ័ត្ររបស់ខ្លួន។ លោកបានបញ្ជាក់ថាគណបក្សទាំងពីរ នឹងមិនទទួលបានសំឡេងការគាំទ្រពីប្រជាពលរដ្ឋទេ បើទោះបីជាមានការរួបរួមគ្នាក៏ដោយ។ «បើតាមប្រវត្តិពីមុនៗ មកហ្នឹងបក្សហ្នឹង ដូចជាវាសនាក៏មិនជាល្អ ដូចហែកមេឃឡើងវិញដែរ។ ព្រោះអាចប្រជាជនគាត់យល់ថា វាដដែលៗ ហើយគាត់ថាបោះឆ្នោតខាតតែសំឡេង។ ដូច្នេះបោះឆ្នោតឲ្យគណបក្សកាន់អំណាចតែម្តងទៅ»។ លោកកឹម សុខា ប្រធានគណបក្សសិទ្ធិមនុស្សបានមានប្រសាសន៍ថា នេះគឺជាកលល្បិចមួយរបស់គណបក្សប្រជាជនកម្ពុជាដែលគេត្រូវការគណបក្សរាជានិមយទាំងពីរ ឲ្យជួយបំបែកសំឡេងនៅក្នុងមូលដ្ឋាន។ «ជម្រើសរបស់គាត់គឺមានតែមួយទេ រវាងហ៊្វុនស៊ិនប៉ិច ហើយរណឫទ្ធិ មានតែថយខ្លួនឲ្យឆ្ងាយពីគណបក្សប្រជាជនកម្ពុជាមករួមជាមួយអ្នកដែលប្រឆាំងនិងអ្នកដែលប្រជាធិបតេយ្យទាំងអស់គ្នានេះ។ អាហ្នឹងទើបគាត់មានវាសនាអនាគតនយោបាយទៅមុខទៀត។ ហើយបើសិនជាគាត់ទៅជ្រកក្រោមដំបូលគេ ត្រឹមបម្រើយុទ្ធសាស្ត្រគេ គឺអត់មានអីដែលត្រូវជីវិតនយោបាយតទៅទៀតទេ»។ គណបក្សនរោត្តម រណឫទ្ធិ និងគណបក្សហ៊្វុនស៊ិនប៉ិច ដែលកើតចេញពីរាជានិយមតែមួយបានថយចុះសំឡេងពី ៥៨អាសនៈ កាលពីឆ្នាំ១៩៩៣ មកនៅត្រឹមតែ ២អាសនៈដូចគ្នាតែប៉ុណ្ណោះកាលពីឆ្នាំ២០០៨ បន្ទាប់ពីគណបក្សទាំងពីរបានពុះបំបែកចេញជាពីរ៕ This posting includes an audio/video/photo media file: Download Now |
| អ្នកបឹងកក់១៣នាក់ជាប់ទោសរហូតដល់ពីរឆ្នាំកន្លះក្នុងការតវ៉ាដីធ្លី Posted: 24 May 2012 07:49 PM PDT សាលាដំបូងរាជធានីភ្នំពេញបានសម្រេចផ្តន្ទាទោសស្ត្រីអ្នកតវ៉ានៅសហគមន៍បឹងកក់ចំនួន ១៣នាក់ នៅក្នុងការកាត់ទោសមួយយ៉ាងតក់ក្រហល់នៅរសៀលថ្ងៃព្រហស្បតិ៍នេះឲ្យជាប់ពន្ធនាគារម្នាក់ៗ ចំនួនពីរឆ្នាំ៦ខែ។ ហើយបន្ទាប់មកពួកគេត្រូវបញ្ជូនភ្លាមៗទៅកាន់ពន្ធនាគារព្រៃស ព្រមជាមួយគ្នានេះ អាជ្ញាធរបានចាប់ខ្លួនប្រជាពលរដ្ឋនៅតំបន់បឹងកក់ចំនួនពីរនាក់បន្ថែមទៀតនិងចាប់ខ្លួនព្រះតេជគុណលួន សាវ៉ាត់ ដែលបានថតក្រុមប្រជាពលរដ្ឋអ្នកតវ៉ានៅខាងមុខតុលាការ។ ប្រជាពលរដ្ឋទាំង ១៣នាក់នៅក្នុងនោះមានអ្នកស្រីទេព វន្នី និងសកម្មជនអ្នកតវ៉ាទំនាស់ដីធ្លីយ៉ាងខ្លាំងក្លាពីរនាក់ផ្សេងទៀត ត្រូវបានចោទប្រកាន់ពីបទចូលកាន់កាប់ដោយខុសច្បាប់លើអចលនវត្ថុនៃនីតិសាធារណៈតាមច្បាប់ភូមិបាលនិងបទប្រឆាំងមន្ត្រីសាធារណៈតាមក្រមព្រហ្មទណ្ឌ។ ប្រជាពលរដ្ឋទាំង ១៣នាក់ ត្រូវបានចាប់ខ្លួនដោយហិង្សាកាលពីថ្ងៃអង្គារនៅពេលដែលពួកគេបានជួយសង់ផ្ទះឲ្យអ្នកភូមិម្នាក់ដែលផ្ទះនោះត្រូវបានកម្ទេចចោលដោយគ្មានដំណោះស្រាយ។ អ្នកភូមិបឹងកក់ម្នាក់បានដួលសន្លប់បន្ទាប់ពីបានឃើញប្រជាពលរដ្ឋទាំង ១៣នាក់ត្រូវបានដឹកជញ្ជូនទៅកាន់មន្ទីរឃុំឃាំង។ លោកអំ សំអាត ប្រធានគ្រប់គ្រងការិយាល័យបច្ចេកទេសស៊ើបអង្កេតនៃអង្គការការពារសិទ្ធិមនុស្សលីកាដូដែលបានចូលរួមនៅក្នុងការកាត់ទោសនៅរសៀលនេះមានប្រសាសន៍ថា ប្រជាពលរដ្ឋបានបដិសេធការចោទប្រកាន់របស់តុលាការនៅក្នុងសវនាការ។ «ជនរងគ្រោះទាំង១៣នាក់ បានបដិសេធការចោទប្រកាន់របស់ព្រះរាជអាជ្ញា។ ហើយមួយទៀត យើងក៏ឃើញវីដេអូខ្លីបដែលបង្ហាញ គេអះអាងថាមានរូបទាំង ៧នាក់។ ប៉ុន្តែវីដេអូនេះបានចាក់តែបន្តិចទេ។ យើងឥតបានទាន់ដឹងជានរណា ប៉ុន្តែយើងមិនទាន់បានឃើញវត្តមាននៃអ្នកទាំង ១៣នាក់ទេនៅក្នុងខ្សែវីដេអូទេ»។ លោកអំ សំអាត យល់ឃើញថា ការផ្តន្ទាទោសនេះមិនអាចបញ្ចប់ជម្លោះដីធ្លីដ៏រ៉ាំរ៉ៃនៅសហគមន៍បឹងកក់នោះទេ។ ដោយឡែកលោកអ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជាយល់ឃើញថា អ្នកភូមិបឹងកក់បានទទួលរងគ្រោះពីរជាន់ គឺការរងគ្រោះទី១ ដោយសារការយកដីធ្លីរបស់ពួកគេទៅប្រគល់ឲ្យក្រុមហ៊ុនវិនិយោគទុន ស៊ូកាគូអ៊ីន របស់ព្រឹទ្ធសមាជិកមកពីគណបក្សប្រជាជនកម្ពុជា និងការរងគ្រោះមួយទៀត ដោយសារតែការផ្តន្ទាទោសដោយតុលាការមិនមានហេតុផលសមស្រប។ ស្ត្រីម្នាក់និងបុរសម្នាក់នៃសហគមន៍បឹងកក់ ដែលត្រូវចាប់ខ្លួនបន្ថែមនៅរសៀលនេះ ទំនងជាត្រូវបញ្ជូនទៅកាន់តុលាការនៅថ្ងៃស្អែក។ រីឯព្រះតេជគុណលួន សាវ៉ាត ជ័យលាភីពានរង្វាន់សិទ្ធិមនុស្សត្រូវបានបង្ខាំងនៅក្នុងវត្តបុទុមវតី ក្នុងទីក្រុងភ្នំពេញ ហើយមិនទាន់ត្រូវបានចាប់ផ្សឹកនៅឡើយមកទល់នឹងយប់នេះ។ នាយកប្រចាំអង្គការ Human Rights Watch ប្រចាំតំបន់អាស៊ី លោក Phil Robertson បានអំពាវនាវឲ្យ រដ្ឋាភិបាលខ្មែរបញ្ឈប់ការវាយសំពងប្រជាពលរដ្ឋដែលធ្វើការតវ៉ាដោយសន្តិវិធី និងសម្តែងមតិរបស់ពួកគេ៕ This posting includes an audio/video/photo media file: Download Now |
| ព្រះសង្ឃជាសកម្មជនសិទ្ធិមនុស្សរងការបង្ខំឲ្យបញ្ឈប់សកម្មភាពរបស់ខ្លួន Posted: 24 May 2012 07:07 PM PDT ព្រះសង្ឃពុទ្ធសាសនាដែលជាសកម្មជនការពារសិទ្ធិ មនុស្សមួយអង្គ មានសង្ឃដិកាថា ព្រះអង្គត្រូវបានបង្ខំឲ្យយល់ព្រមលើកិច្ចសន្យាបញ្ឈប់សកម្មភាពរបស់ព្រះអង្គក្នុងការការពារសិទ្ធិមនុស្សតទៅទៀត បន្ទាប់ពីព្រះអង្គបានចូលរួមយ៉ាងសកម្មជាមួយអ្នកភូមិក្នុងការតវ៉ាចំពោះការរំលោភដីធ្លីនិងសិទ្ធិរស់រានរបស់ពួកគេ។ ភិក្ខុ លួន សាវ៉ាតមានសង្ឃដិកាថា ព្រះអង្គត្រូវបានបង្ខំឲ្យចុះកិច្ចសន្យាបញ្ឈប់សកម្មភាពរបស់ព្រះអង្គជាមួយក្រុមអ្នកភូមិដែលតវ៉ារឿងដីធ្លីរបស់ពួកគេតទៅទៀត។ «កិច្ចសន្យាហ្នឹងជារឿងធ្ងន់ធ្ងរ ព្រោះវាមិនមែនប៉ះពាល់ត្រឹមអាត្មាទេ វាប៉ះពាល់ទាំងអស់គ្នាហ្នឹង»។ <!--AV--> ភិក្ខុលួន សាវ៉ាត ដែលជាសកម្មជនការពារសិទ្ធិមនុស្សដ៏សកម្មមួយរូប ត្រូវបានក្រុមអាជ្ញាធរប៉ូលិសនិងមន្រ្តីសង្ឃចាប់ព្រះកាយទាំងបង្ខំ បន្ទាប់ពីព្រះអង្គបានចូលរួមជាមួយក្រុមអ្នកភូមិបឹងកក់និងថតរូបការតវ៉ារបស់ពួកគេប្រឆាំងនឹងការចាប់ខ្លួនអ្នកភូមិនេះចំនួន១៣នាក់យកមកជំនុំជម្រះទោសនៅតុលាការក្រុងភ្នំពេញកាលពីព្រឹកម៉ិញ។ អាជ្ញាធរបានបិទគ្រប់ច្រកចេញចូលនៅក្នុងវត្តបុទុមវតីនេះ ចាប់តាំងពីពេលនាំខ្លួនភិក្ខុលួន សាវ៉ាតមកដល់ទីនេះ។ ភិក្ខុលួន សាវ៉ាតមានសង្ឃដិកាថា ពុំមានការបង្ខំផ្សឹកព្រះអង្គទេរហូតមកទល់នឹងយប់ថ្ងៃព្រហស្បតិ៍នេះ ប៉ុន្តែព្រះអង្គបានហៅការចាប់ខ្លួនរបស់ព្រះអង្គថា ទង្វើមួយដែលហួសពីពណ៌នាបាន។ «ទង្វើហ្នឹងវាគួរឲ្យអស់សំណើចផង គួរឲ្យលើសពីការនិយាយ»។ ជាសកម្មជនមកពីខេត្តសៀមរាបដែលទទួលបានពានរង្វាន់ការពារសិទ្ធិមនុស្សផងនោះ ភិក្ខុលួន សាវ៉ាតតែងតែចូលរួមក្នុងសកម្មភាពថតនិងចងក្រងឯកសារជាវីដេអូស្តីពីការតវ៉ារបស់អ្នកភូមិបឹងកក់និងសហគមន៍រងផលប៉ះពាល់ពីការរំលោភដីធ្លីនិងការបណ្តេញចេញពីលំនៅដ្ឋានដោយបង្ខំនៅតាមបណ្តាខេត្តផ្សេងៗទៀត។ កាលពីឆ្នាំមុន ភិក្ខុលួន សាវ៉ាតត្រូវបានសម្តេចសង្ឃនៅកម្ពុជាហាមប្រាមមិនឲ្យស្នាក់នៅក្នុងវត្តអារាមនានាក្នុងប្រទេសឡើយ ដោយសារការចូលរួមយ៉ាងសកម្មរបស់ព្រះអង្គក្នុងសកម្មភាពតវ៉ារឿងដីធ្លី។ មន្ត្រីសង្ឃជាន់ខ្ពស់កម្ពុជាបានលើកឡើងថា ទង្វើរបស់ព្រះអង្គគឺប្រាសចាកពីគោលការណ៍របស់ព្រះពុទ្ធសាសនា។ ប៉ុន្តែភិក្ខុលួន សាវ៉ាតអះអាងថា សកម្មភាពរបស់ព្រះអង្គក្នុងការការពារសិទ្ធិមនុស្សនិងប្រឆាំងការរំលោភយកដីធ្លីរបស់ប្រជាពលរដ្ឋនេះគឺត្រឹមត្រូវតាមការទូន្មានប្រៀនប្រដៅរបស់ព្រះពុទ្ធ ហើយព្រះអង្គនៅតែប្តេជ្ញាបន្តសកម្មភាពនេះតទៅទៀត៕ This posting includes an audio/video/photo media file: Download Now |
| ហេឡូវីអូអេ ២៤ ឧសភា ២០១២៖ ដំណើរការបោះឆ្នោតនៅកម្ពុជានិងការឃោសនាបោះឆ្នោតថ្នាក់មូលដ្ឋាន Posted: 24 May 2012 03:13 PM PDT ក្រុមអ្នកសង្កេតការណ៍បោះឆ្នោតនៅកម្ពុជាអះអាងថា មានបរិយាកាសល្អចំពោះការចាប់ផ្តើមដំណើរការឃោសនាបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់។ នេះជាការអះអាងរបស់លោក ពុទ្ធា ហង្ស នាយកប្រតិបត្តិនៃគណៈកម្មាធិការអព្យាក្រិត្យនិងយុត្តិធម៌ ដើម្បីការបោះឆ្នោតដោយសេរីនិងត្រឹមត្រូវនៅកម្ពុជា (និកហ្វិច)។ នៅក្នុងកម្មវិធីហេឡូវីអូអេកាលពីយប់ថ្ងៃព្រហស្បតិ៍ ទី២៤ ខែមិថុនា ឆ្នាំ២០១២ ដែលពិភាក្សាអំពីដំណើរការបោះឆ្នោតនៅកម្ពុជានិងការឃោសនាបោះឆ្នោតថ្នាក់មូលដ្ឋាននោះ លោក ពុទ្ធា ហង្ស អះអាងថា ទោះជាគ្មានអំពើហិង្សានិងភាពមិនប្រក្រតីកើតឡើងពេលនេះមែន តែតាមការកត់សម្គាល់របស់លោកគឺថា ភាពតានតឹងនិងបញ្ហានានាច្រើនកើតឡើងនៅចុងបញ្ចប់នៃការឃោសនារយៈពេល១៥ថ្ងៃគឺមុនថ្ងៃបោះឆ្នោតនៅថ្ងៃទី៣ខែមិថុនា ឆ្នាំ២០១២។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី២១ ខែឧសភា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
