VOA News: ព័ត៌មាន: “អ៊ឺរ៉ុបចង់ឲ្យក្រិចបន្តនៅក្នុងតំបន់ប្រើប្រាស់ប្រាក់អឺរ៉ូ” plus 2 more |
- អ៊ឺរ៉ុបចង់ឲ្យក្រិចបន្តនៅក្នុងតំបន់ប្រើប្រាស់ប្រាក់អឺរ៉ូ
- សកម្មជនព្រៃឈើមកសហរដ្ឋអាមេរិកដើម្បីទាក់ទាញការគាំទ្រ
- អង្គការមួយបង្កើតបណ្ណាល័យនៅក្នុងពន្ធនាគារកម្ពុជា
| អ៊ឺរ៉ុបចង់ឲ្យក្រិចបន្តនៅក្នុងតំបន់ប្រើប្រាស់ប្រាក់អឺរ៉ូ Posted: 21 May 2012 02:20 AM PDT ពួកប្រមុខនៃក្រុមប្រទេស G-8 ដែលមានឧស្សាហកម្មនាំមុខគេក្នុងពិភពលោកបាននិយាយថាការឧបត្ថម្ភផ្ចុងផ្តើមការលូតលាស់និងការងារជា"ការចាំបាច់"របស់ពួកគេនៅពេលដែលពួកគេស្វះស្វែងធ្វើឱ្យសេដ្ឋកិច្ចនៃប្រទេសពួកគេលូតលាស់ជាថ្មីទ្បើងវិញនៅក្នុងការប្រឈមមុខនឹងវិបត្តិជំពាក់បំណុលក្នុងទ្វីបអឺរ៉ុប។កាលពីថ្ងៃសៅរ៍ ពួកមេដឹកនាំនៃក្រុមប្រទេស G-8 ក៏បានសម្តែងបំណងរបស់ពួកគេចង់ឱ្យប្រទេសក្រិកឋិតនៅក្នុងតំបន់ប្រើប្រាស់ប្រាក់អឺរ៉ូនិងធ្វើតាមការសន្យារបស់ផងខ្លួន។ លោកស្រី អែនជឺឡា ម៉ាក់ខែល (Angela Merkel) អធិការបតីនៃប្រទេសអាល្លឺម៉ង់ដែលប្រទេសជាតិរបស់លោកស្រីបានជំរុញឱ្យមានវិធានការចំណាយត្បិតត្បៀតសម្រាប់ប្រទេសមានប្រាក់បំណុលច្រើនដូចជាប្រទេសក្រិកជាដើម បានមានប្រសាសន៍ថាពួកមេដឹកនាំទាំងអស់បានយល់ស្របគ្នាថាវិន័យខាងសារពើពន្ធត្រូវតែមានតុល្យភាពជាមួយកិច្ចខិតខំប្រឹងប្រែងដើម្បីលើកទឹកចិត្តការលូតលាស់។ ចិន៖ សកម្មជនចិន ឆិន កុងឆិន (Chen Guangcheng) និងភរិយានិងកូនពីរនាក់របស់លោកបានធ្វើដំណើរចាកចេញពីប្រទេសចិនហើយតាមយន្តហោះមួយគ្រឿងដែលហោះមកកាន់ស.រ.អ.។ការចាកចេញរបស់សកម្មជនពិការភ្នែករូបនេះកំណត់ការបញ្ចប់ជម្លោះខាងការទូតមួយខែរវាងប្រទេសជាតិទាំងពីរដែលបានកើតមានទ្បើងក្រោយការរត់គេចខ្លួនរបស់លោក ឆិន ពីការជាប់ឃុំឃាំងនៅក្នុងផ្ទះ។ សហរដ្ឋអាមេរិក៖ បាតុករបីនាក់ដែលបានត្រូវចាប់ខ្លួននៅពេលមានកិច្ចការពារសន្តិសុខតឹងរ៉ឹងនៅមុនការប្រជុំសន្និសីទកំពូលនៃអង្គការអូតង់ក្នុងក្រុង Chicago បានត្រូវចោទប្រកាន់ពីបទប្រព្រឹត្តភេរវកម្មពីព្រោះមានគ្រឿងផ្ទុះ។ ស៊ីរី៖ ចំនួនមនុស្សស្លាប់បានកើនទ្បើងនៅក្រោយការបំផ្ទុះគ្រាប់បែកអត្តឃាតមួយទៀតដែលយកពួកយោធារបស់រដ្ឋាភិបាលស៊ីរីជាទីដៅនៃការវាយប្រហារ។នៅពេលនេះមានមនុស្ស៩នាក់បានបាត់បង់ជីវិតហើយជាង១០០នាក់ទៀតបានត្រូវរបួសនៅក្រោយអ្នកវាយប្រហារអត្តឃាតម្នាក់បានបំផ្ទុះគ្រាប់បែកក្នុងទ្បានមួយគ្រឿងនៅក្នុងក្រុង ដែរ អឺល សូ (Deir el-Zour) នាផ្នែកខាងកើតនៃប្រទេសស៊ីរីកាលពីថ្ងៃសៅរ៍។ ថៃ៖ ក្រុមបាតុកររាប់ម៉ឺននាក់បានប្រមូលផ្តុំគ្នាក្នុងរាជធានីបាងកកនៃប្រទេសថៃដើម្បីកំណត់ខួបឆ្នាំទីពីរនៃការប៉ះទង្កិចគ្នាដ៏ប្រល័យរវាងក្រុមយោធាថៃនិងអ្វីដែលហៅថាពួកបាតុករអាវក្រហម។ អាហ្វហ្គានីស្ថាន៖ អាជ្ញាធរនៃប្រទេសអាហ្វហ្កានិស្ថានបាននិយាយថាអ្នកដាក់គ្រាប់បែកអត្តឃាតម្នាក់បានបំផ្ទុះខ្លួនឯងនៅឯកន្លែងប៉ូលីសឆែកឆេរមួយក្នុងខែត្រ Khost នាប៉ែកខាងកើតប្រទេសកាលពីថ្ងៃសៅរ៍នាំឱ្យមនុស្ស១៣នាក់ស្លាប់ហើយធ្វើឱ្យមនុស្សយ៉ាងតិចណាស់៦នាក់់ទៀតត្រូវរបួស។ This posting includes an audio/video/photo media file: Download Now |
| សកម្មជនព្រៃឈើមកសហរដ្ឋអាមេរិកដើម្បីទាក់ទាញការគាំទ្រ Posted: 21 May 2012 01:48 AM PDT សកម្មជនព្រៃឈើក្នុងសហគមន៍ព្រៃឡង់និងជនជាតិភាគតិចកម្ពុជាបាននាំយកក្តីកង្វល់របស់ពួកគេមកដល់សហរដ្ឋអាមេរិកដើម្បីសុំឱ្យមានអន្តរាគមន៍ពីសហគមន៍អន្តរជាតិលើការកាប់បំផ្លាញព្រៃឈើនៅក្នុងប្រទេសកម្ពុជានិងផលប៉ះពាល់ដល់ជនជាតិដើមភាគតិចដែលរស់នៅភាគឥសាន្តប្រទេស។ លោកស្រីផូគ ហុងជនជាតិកួយដែលជាអ្នកដឹកនាំក្រុមនោះបានបញ្ជាក់ប្រាប់វីអូអេថាសកម្មភាពកាប់បំផ្លាញព្រៃឈើដោយក្រុមហ៊ុនដែលទទួលបានដីសម្បទានពីរដ្ឋាភិបាលមានទំហំធំនិងបានប៉ះពាល់ដល់ជីវភាពរស់នៅរបស់ប្រជាពលរដ្ឋនិងវប្បធម៌របស់ជនជាតិដើម។ «វាប៉ះពាល់ច្រើនមែនទែនហើយក្នុងតំបន់ព្រៃឡង់ជាក់ស្តែងវាបាត់មុខរបររបស់គាត់ប្រចាំថ្ងៃគឺទីមួយជ័រដែលចម្បងបំផុតនិងរុករកអនុផលពីព្រៃឈើរបស់ពួកគាត់ដូចជាការបោចផ្តៅរើសជ័របោចវល្លិអីអញ្ចឹងដែលជាមុខរបររបស់ពួកគាត់ប្រចាំថ្ងៃ។ ជាពិសេសជនជាតិដើមភាគតិច»។ សម្រាប់លោក សាមឿន វុទ្ធី ជនជាតិព្រៅនៅខេត្តស្ទឹងត្រែងយល់ថាដំណើរមកសហរដ្ឋអាមេរិកគឺជាការតស៊ូនឹងគម្រោងអភិវឌ្ឍន៍វារីអគ្គិសនីដែលបានប៉ះពាល់បរិស្ថានដ៏ល្អរបស់អ្នកស្រុកដើមនិងដើម្បីរក្សាតម្លៃពលរដ្ឋសហគមន៍របស់លោកដែលមិនព្រមធ្វើជាកម្មករក្រុមហ៊ុនដែលមកអភិវឌ្ឍហើយសន្យាផ្តល់ការងារឱ្យនោះទេ។ «ជនជាតិដើមភាគតិចបានមើលឃើញថាការផ្តល់សម្បទានដីធ្វើវិនិយោគហ្នឹងមិនបម្រើដល់ផលប្រយោជន៍សហគមន៍ជនជាតិភាគតិចនៅតំបន់នោះទេព្រោះ ជាប្រពៃណីគាត់មិនចូលចិត្តនៅរបៀបនៃការស៊ីឈ្នួលគេទេដោយសារជាប្រពៃណីគាត់ចង់មានសិទ្ធិសេរីភាពរុករកផលអនុផលព្រៃឈើមកចិញ្ចឹមជីវិត។ គាត់ចង់ទៅធ្វើថ្ងៃណាចង់ទៅថ្ងៃណាបានថ្ងៃនោះជនជាតិភាគតិចរបស់ខ្ញុំមិនត្រូវការការត្រួតត្រានិងបញ្ជាធ្វើនេះធ្វើនោះទេ»។ ជាការផ្តល់កិត្តិយសដល់សកម្មជនទាំងនោះអង្គការលើកលែងទោសអន្តរជាតិ (Amnesty International) បានរៀបចំពិធីសំណេះសំណាលមួយក្នុងការិយាល័យរបស់ពួកគេដល់សមាជិកនិងអ្នកគាំទ្រសិទ្ធិមនុស្សនៅរដ្ឋធានីវ៉ាស៊ីនតោន។ កម្មវិធីដូចដែលមាននៅល្ងាចថ្ងៃព្រហស្បតិ៍នេះគឺជាឱកាសមួយផ្តល់ឱ្យសកម្មជនបានលើកឡើងពីក្តីកង្វល់របស់ពួកគេដោយផ្ទាល់ទៅដល់ឆាកអន្តរជាតិឱ្យបានដឹងឮ។ សកម្មជនទាំងនោះ បញ្ជាក់ប្រាប់អ្នកចូលរួមស្តាប់ថាការដោះស្រាយនៅថ្នាក់ជាតិហាក់មិនទទួលលទ្ធផលអ្វីដែលជាទីសង្ឃឹមទេដោយសារមន្ត្រីពាក់ព័ន្ធនានាមិនចាត់ទុកថាវាជាបញ្ហាសំខាន់ដែលគេត្រូវយកចិត្តទុកដាក់ឡើយ។ ពួកគេស្នើឡើងថាមធ្យោបាយល្អគឺនៅមុនរាល់មានការផ្តល់ដីសម្បទានម្តងៗរដ្ឋាភិបាលគួរតែមានការពិគ្រោះពិភាក្សាជាមួយសហគមន៍មូលដ្ឋានពីកន្លែងដែលអាចអភិវឌ្ឍបានជៀសវាងការបំផ្លាញព្រៃនិងតំបន់សក្តិសិទ្ធិរបស់ពួកគាត់។ លោក ព្រហ្ម ស៊ុនណូរ៉ា សកម្មជននៃសមាគមការពារសិទ្ធិមនុស្សមួយនៅសហរដ្ឋអាមេរិកដែលបានមកចូលរួមស្តាប់បទបង្ហាញរបស់សកម្មជនព្រៃឈើទាំងនោះបានលើកសរសើរចំពោះសេចក្តីក្លាហានរបស់ពួកគេ ក្នុងការហ៊ានមកលើកយកក្តីកង្វល់មកដល់ឆាកអន្តរជាតិហើយលោកបានស្នើសុំថាសហគមន៍អន្តរជាតិមិនត្រូវនៅធ្វើគថ្លង់ទៀតទេ។ «យើងកំពុងតែអំពាវនាវសព្វថ្ងៃនេះគឺថាជំរុញខាងរដ្ឋាភិបាលអាមេរិកាំងហើយនឹងអង្គការសហប្រជាជាតិ។ មានតែពីរអង្គការហ្នឹងទេដែលធំដែលអាចយើងជំរុញទៅឱ្យមានប្រសិទ្ធភាពក្នុងការដែលខំប្រឹងប្រែងរក្សាព្រៃឡង់ ថែរក្សាសិទ្ធិមនុស្ស ពីព្រោះនេះគឺជារឿងសិទ្ធិមនុស្សមួយដែរ គឺថាអ្នកដែលនៅកន្លែងព្រៃឡង់ហ្នឹងគឺថាគ្នាខំការពាររបស់គ្នាហើយអ្នកដែលទៅអភិវឌ្ឍហ្នឹងគឺរំលោភសិទ្ធិមនុស្សអ្នកកាន់កាប់ព្រៃឡង់ហ្នឹងគឺជាការរំលោភសិទ្ធិមនុស្ស»។ អង្គការការរស់រាននៃវប្បធម៌ឱ្យដឹងថានៅក្នុងប្រទេសកម្ពុជា មានអ្នកភូមិប្រហែលជា២០០.០០០នាក់ដែលភាគច្រើនជាជនជាតិកួយកំពុងខិតខំប្រឹងប្រែងទប់ស្កាត់ការបំផ្លាញព្រៃឡង់ដែលជាព្រៃដ៏ធំមួយនៅជ្រោយឥណ្ឌូចិន។ លោកស្រី ក្លៅឌៀ វ៉ាន់ដឺម៉េដ អ្នកសម្របសម្រួលកម្មវិធីអាស៊ីអាគ្នេយ៍នៃអង្គការលើកលែងទោសអន្តរជាតិយល់ថារដ្ឋាភិបាលកម្ពុជាត្រូវតែស្វែងរកវិធីល្អក្នុងការជួយដល់សកម្មភាពពួកគេជាជាងបង្រ្កាប។ «អង្គការលើកលែងទោសមានការព្រួយបារម្ភលើបញ្ហានៅទូទាំងប្រទេសកម្ពុជាដែលមានបញ្ហាបណ្តេញមនុស្សចេញដោយបង្ខំនិងបញ្ហាដទៃផ្សេងទៀត ប៉ុន្តែការបណ្តេញមនុស្សចេញដោយបង្ខំគឺជាការរំលោភសិទ្ធិមនុស្សពិតប្រាកដមួយលើច្បាប់សិទ្ធិមនុស្សអន្តរជាតិហើយជាលទ្ធផលអង្គការលើកលែងទោសអន្តរជាតិយល់ឃើញថានោះ ជាបញ្ហាដ៏ធំនៅប្រទេសកម្ពុជាហើយលោកស្រី ហុងគឺជាផ្នែកមួយដែលរងបញ្ហាទាំងអស់នោះ»។ ជាឱកាសដោយកម្រក្រុមសកម្មជនទាំងនោះបាននាំយកក្តីកង្វល់របស់ពួកគេមកឱ្យស្ថានទូតកម្ពុជានៅសហរដ្ឋអាមេរិកបានដឹងផងដែរ។ លោកហែម ហេងឯកអគ្គរាជទូតកម្ពុជាប្រចាំនៅសហរដ្ឋអាមេរិកបានបញ្ជាក់ថាប្រាប់តំណាងប្រជាពលរដ្ឋទាំងនោះថាលោកគាំទ្រចំពោះសហគមន៍នានាក្នុងការខិតខំប្រឹងប្រែងការពារព្រៃឈើហើយលោកបានថ្លែងការពាររាជរដ្ឋាភិបាលកម្ពុជាថាកំពុងមានវិធានការទប់ស្កាត់ជនល្មើសបំផ្លាញព្រៃឈើទាំងឡាយ។ «ខ្ញុំជម្រាបបងប្អូនថាមកទីនេះបើបានជាមកហើយយើងដើរជួបជាមួយនឹងអ្នកនេះអ្នកនោះដូច្នេះសូមរក្សាសូមនិយាយនូវការណ៍ពិត គឺមិនមែនរាជរដ្ឋាភិបាលមិនការពារព្រៃឈើទេ រាជរដ្ឋាភិបាលបានចេញលិខិតបទដ្ឋាននានាជាច្រើនដើម្បីការពារព្រៃឈើដូច្នេះការដែលបំផ្លាញព្រៃឈើនោះគឺជាបុគ្គលជាឯកជនហើយរាជរដ្ឋាភិបាលកំពុងតែមានវិធានការដើម្បីនឹងពិនិត្យមើលនូវសម្បទានសេដ្ឋកិច្ចទាំងឡាយដែលមិនអនុវត្តទៅតាមលក្ខន្តិកៈ ដែលបានចុះ ជាមួយនឹងរាជរដ្ឋាភិបាល»។ សកម្មជនទាំងនោះ បានជួបជាមួយនឹងមន្ត្រីអង្គការសហប្រជាជាតិនៅបូរីញ៉ីវយ៉កហើយមានគម្រោងជួបមន្ត្រីក្រសួងការបរទេសសហរដ្ឋអាមេរិកនៅថ្ងៃសុក្រនេះ៕ This posting includes an audio/video/photo media file: Download Now |
| អង្គការមួយបង្កើតបណ្ណាល័យនៅក្នុងពន្ធនាគារកម្ពុជា Posted: 21 May 2012 01:47 AM PDT អង្គការអប់រំស៊ីប៉ាគ្រោងនឹងបង្កើតបណ្ណាល័យនៅក្នុងពន្ធនាគារនៅក្នុងខេត្តក្រុងចំនួនប្រាំពីរនៅឆ្នាំ២០១២នេះ ដែលជាផ្នែកមួយនៃគម្រោងអភិវឌ្ឍចំណេះដឹងដល់ពិរុទ្ធជន។ នេះបើផ្អែកទៅតាមមន្ត្រីជាន់ខ្ពស់ក្រសួងមហាផ្ទៃ និងអ្នកទទួលខុសត្រូវរបស់អង្គការបារាំងមួយនេះដែលបានឲ្យដឹងកាលពីពេលថ្មីៗនេះ។ នៅក្នុងចំណោមពន្ធនាគារទាំងប្រាំពីរមានមណ្ឌលអប់រំកែប្រែទី៣ ក្រុងភ្នំពេញ ពន្ធនាគារខេត្តកណ្តាល ខេត្តព្រៃវែង កំពង់ចាម កំពង់ធំ ពន្ធនាគារខេត្តបន្ទាយមានជ័យ និងពន្ធនាគារខេត្តកោះកុង។ លោក ហុក សុទ្ធិ នាយកអង្គការអប់រំស៊ីប៉ាមានប្រសាសន៍ថា ការបង្កើតបណ្ណាល័យនៅក្នុងពន្ធនាគារនេះគឺជាជំនួយទៅដល់អ្នកទោសដើម្បីឲ្យពួកគេងាយធ្វើសមាហរណកម្មទៅក្នុងសង្គមវិញ។ «ដោយសារតែបណ្ណាល័យជាមធ្យោបាយមួយដើម្បីផ្តល់ការអប់រំទៅដល់មនុស្ស។ ហើយយើងគិតថា អ្នកដែលនៅជាប់ឃុំនៅក្នុងពន្ធនាគារ គាត់មានឱកាសតិចជាងយើងដែលនៅខាងក្រៅដែលទទួលបានការអប់រំ។ អញ្ចឹងខ្ញុំគិតថាអ្វីដែលជាកត្តាសំខាន់ គឺយើងចូលរួមចំណែកធ្វើឲ្យអ្នកដែលជាប់ឃុំហ្នឹង គាត់ទួលបានការអប់រំបន្ថែម។ ហើយការអប់រំនោះនឹងចូលរួមចំណែកធ្វើយ៉ាងណា នៅពេលដែលគាត់ចេញត្រឡប់មកវិញគឺគាត់មានឱកាសច្រើននៅក្នុងការធ្វើសមាហរណកម្មដោយចូលទៅរស់នៅធម្មតាវិញនៅក្នុងសង្គមជាតិ»។ អង្គការស៊ីប៉ាកាលពីឆ្នាំ២០១០ បានបង្កើតបណ្ណាល័យនៅក្នុងមណ្ឌលកែប្រែទី១ ឬ គុកព្រៃស ដែលជាជំហានសាកល្បង។ មួយឆ្នាំក្រោយមក ក្រោមការជួយគាំទ្ររបស់ឧត្តមស្នងការអង្គការសហប្រជាជាតិសម្រាប់សិទ្ធិមនុស្សនៅកម្ពុជា អង្គការនេះ បានពង្រីកបណ្ណាល័យចំនួនបីទៀតនៅមណ្ឌលកែប្រែទី២ ឬម៉២ នៅព្រៃសដដែល នៅពន្ធនាគារនៅខេត្តបាត់ដំបង និងខេត្តសៀមរាប។ លោក ហុក សុទ្ធិ មានប្រសាសន៍ថា សៀវភៅជាង២ម៉ឺនក្បាលត្រូវបានដាក់តម្កល់នៅក្នុងបណ្ណាល័យទាំងបួននេះ។ «មានច្រើនផ្នែក មានផ្នែកអប់រំទូទៅ មានផ្នែកអក្សរសិល្បិ៍ រឿងជារឿងប្រលោមលោក។ មានសៀវភៅពាក់ព័ន្ធទៅនឹងច្បាប់ ពាក់ព័ន្ធទៅនឹងកសិកម្ម ពាក់ព័ន្ធទៅនឹងសិទ្ធិមនុស្ស ពាក់ព័ន្ធទៅនឹងសិទ្ធិអីផ្សេងៗច្រើន ដើម្បីផ្តល់ជាចំណេះដឹងទូទៅមួយ។ ពិតជាមានវិទ្យាសាស្ត្រ អំពីរបៀបជួសជុលកុំព្យូទ័រ ឬក៏ របៀបធ្វើទូរស័ព្ទដៃអី មានច្រើនដែរ»។ យោងតាមកិច្ចព្រមព្រៀងជាមួយក្រសួងមហាផ្ទៃអង្គការអប់រំស៊ីប៉ានឹងត្រូវបង្កើតបណ្ណាល័យនៅក្នុងពន្ធនាគារទាំង២៦ នៅទូទាំងប្រទេសកម្ពុជាចាប់ពីពេលនេះ រហូតទៅដល់ឆ្នាំ២០១៤។ គម្រោងបីឆ្នាំទៅមុនទៀតនេះនឹងត្រូវចំណាយទឹកប្រាក់ចំនួន៥០ម៉ឺនដុល្លារសហរដ្ឋអាមេរិក ហើយមួយផ្នែកធំនឹងត្រូវគាំទ្រជំនួយពីសហភាពអ៊ឺរ៉ុប។ លោក គ្រីស្ទៀន ប្រូវូស្ត (Christian Provoost) តំណាងប្រតិភូរសហភាពអ៊ឺរ៉ុបនៅកម្ពុជាមានប្រសាសន៍ថា ការឧបត្ថម្ភបណ្ណាល័យនៅក្នុងពន្ធនាគារគឺជាផ្នែកមួយនៃការគាំទ្រទៅដល់សិទ្ធិមនុស្ស។ «យើងចាត់ទុកថា សហភាពអឺរ៉ុបគាំទ្រដល់ការអភិវឌ្ឍន៍នីតិរដ្ឋហើយពិតហើយសហភាពអឺរ៉ុបគាំទ្រជាខ្លាំងការគោរពសិទ្ធិមនុស្សនៅកម្ពុជា។ យើងគិតថា គេត្រូវយល់ពីផ្នែកមួយចំនួនរបស់ប្រទេសកម្ពុជា ដែលនៅទីនោះនីតិរដ្ឋ និងសិទ្ធិមនុស្សមិនត្រូវបានអនុវត្តនោះទេ ហើយនោះវាទាក់ទងនឹងពន្ធនាគារទាំង២៦របស់ប្រទេសកម្ពុជា»។ នាយឧត្តមសេនីយ៍ សំ សួគា អគ្គនាយករងនៃនាយកដ្ឋានពន្ធនាគាររបស់ក្រសួងមហាផ្ទៃមានប្រសាសន៍នៅក្នុងសិក្ខាសាលាស្តីពីការអភិវឌ្ឍបណ្ណាល័យនៅក្នុងពន្ធនាគារកាលពីថ្ងៃទី៨ ខែឧសភា ថាបណ្ណាល័យនេះបានជួយទៅដល់ការអប់រំទណ្ឌឌិតជាច្រើន។ «សាវាកម្មបណ្ណាល័យពន្ធនាគារគឺជាផ្នែកមួយនៃកម្មវិធីអប់រំកែប្រែ និងស្តារនីតិសម្បទាដែលជាកិច្ចការសំខាន់ និងរួមចំណែកយ៉ាងសកម្មនៅក្នុងការអភិវឌ្ឍក្របខណ្ឌគោលនយោបាយកំណែទម្រង់ពន្ធនាគារ។ ការអនុវត្តជាក់ស្តែងកន្លងមក បានធ្វើឲ្យសេវាអប់រំកែប្រែនៅពន្ធនាគារមានការរីកចម្រើន នឹងកែលម្អជាបន្តបន្ទាប់»។ អនុប្រធានពន្ធនាគារម្នាក់មកពីខេត្តពោធិ៍សាត់ក៏បានផ្តោតពីសារៈសំខាន់ដូចគ្នានេះដែរ។ «មានបណ្ណាល័យ អាចជួយកាត់បន្ថយហិង្សារបស់អ្នកទោសហ្នឹង ឲ្យកែប្រែខ្លួនឲ្យបានល្អ ឲ្យជាមនុស្សនៅក្នុងសង្គមដូចគេវិញ។ មានចំណុចវិជ្ជាមានច្រើនជាងអវិជ្ជមាន។ វាជួយបានច្រើននៅក្នុងការកែប្រែមនុស្ស ព្រោះមនុស្សខ្លះច្រើននៅជនបទអវិជ្ជាមិនសូវមានចំណេះដឹងទេ»។ នៅក្នុងពន្ធនាគារទាំង២៦នៅកម្ពុជាមានអ្នកទោសជាង ១៥.០០០នាក់។ ទណ្ឌឌិតត្រូវគេកំណត់សេរីភាពតាមទម្ងន់បទល្មើសដែលគេបានប្រព្រឹត្ត។ លោក ហុក សុទ្ធិ នាយកអង្គការអប់រំស៊ីប៉ា មានប្រសាសន៍ថា នៅតាមពន្ធនាគារអ្នកទោសស្រាលអាចចេញចូលទៅអានសៀវភៅនៅក្នុងបណ្ណាល័យបានច្រើនជាងអ្នកទោសឧក្រិដ្ឋធ្ងន់ធ្ងរ។ ប៉ុន្តែអ្នកទោសធ្ងន់អាចខ្ចីសៀវភៅចល័ត នៅក្នុងអគារឃុំឃាំ ខណៈពេលដែលអ្នកទោសធ្ងន់ទាំងនោះ មិនត្រូវអនុញ្ញាតឲ្យចេញចូលនៅក្នុងបណ្ណាល័យ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
