VOA News: ព័ត៌មាន: “ហ្វីលីពីនចោទប្រទេសចិនថាបញ្ជូននាវាថែមទៀតចូលតំបន់ជម្លោះ” plus 4 more |
- ហ្វីលីពីនចោទប្រទេសចិនថាបញ្ជូននាវាថែមទៀតចូលតំបន់ជម្លោះ
- ឱសថក្លែងក្លាយប្រឆាំងជំងឺគ្រុនចាញ់ត្រូវបានឃើញជាញឹកញាប់នៅទ្វីបអាហ្វ្រិកនិងអាស៊ី
- លោក ម៉ម សូណង់ផ្អាកការធ្វើដំណើរទៅប្រទេសខ្មែរ ក្រោយពីមានព័ត៌មានថា រដ្ឋាភិបាលគ្រោងចាប់ខ្លួនលោក
- សមត្ថកិច្ចប្រដាប់អាវុធចូលឆែកផ្ទះសាច់ញាតិជនសង្ស័យពីបទអបគមន៍
- សមត្ថកិច្ចចាប់អ្នកភូមិបឹងកក់ក្នុងពេលបង្ក្រាបការទាមទារដំណោះស្រាយដីធ្លី
| ហ្វីលីពីនចោទប្រទេសចិនថាបញ្ជូននាវាថែមទៀតចូលតំបន់ជម្លោះ Posted: 23 May 2012 07:21 AM PDT ប្រទេសហ្វីលីពីនចោទប្រកាន់ប្រទេសចិនថា កំពុងបញ្ជូនកងនាវារបស់រដ្ឋាភិបាលនិងនាវានេសាទបន្ថែមទៀតចូលទៅក្នុងតំបន់ជម្លោះក្នុងសមុទ្រចិនខាងត្បូង។ នេះគឺជាចំណាត់ការមួយដែលរដ្ឋាភិបាលក្រុងម៉ានីលនិយាយថា ធ្វើឱ្យកើនឡើងការប្រឈមមុខគ្នាដែលមានរយៈពេលពីរខែមកហើយ។ លោក Raul Hernandez អ្នកនាំពាក្យក្រសួងការបរទេសហ្វីលីពីនបាននិយាយកាលពីថ្ងៃពុធថាមាននាវាចិនជិត១០០គ្រឿងបានចូលមកក្នុងតំបន់ Scarborough។ លោកបានបន្ថែមថា គេសង្កេតឃើញថា នាវាខ្លះក្នុងចំណោមនោះមកនេសាទត្រីបើទោះបីជាមានការប្រកាសហាមឃាត់នាពេលថ្មីៗនេះដោយប្រទេសទាំងពីរក៏ដោយ។ លោក Hernandez បានអំពាវនាវឱ្យប្រទេសចិនដកកងនាវាជាបន្ទាន់ ដោយនិយាយថា ទីក្រុងម៉ានីលបានដាក់ពាក្យតវ៉ាជាផ្លូវការមួយទៅស្ថានទូតចិនចំពោះការបង្កើនកងទ័ពនេះហើយ។ លោកមានប្រសាសន៍ថា ការចរចាកំពុងតែបន្តមានដើម្បីដោះស្រាយជម្លោះនេះ។ ប្រទេសចិននិងហ្វីលីពីនបានដាក់បំរាមដោយឡែកៗពីគ្នាកាលពីសប្តាហ៍មុនលើការនេសាទក្នុងតំបន់នោះ ដើម្បីជាការព្យាយាមកាត់បន្ថយភាពតានតឹងលើតំបន់ថ្មក្រោមទឹកនោះ ដោយសារប្រទេសទាំងពីរបានទាមទារកម្មសិទ្ធិ។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> អេហ្ស៊ីប៖ មានពលរដ្ឋអេហ្ស៊ីបរាប់លាននាក់បានឈរតម្រង់ជួរយ៉ាងវែងនៅថ្ងៃពុធនេះដើម្បីបោះឆ្នោតជាលើកដំបូងជ្រើសរើសប្រធានាធិបតី ចាប់តាំងពីលោកប្រធានាធិបតីហ៊ូស្នី មូបារ៉ាក់ (Hosni Mubarak) បានលាឈប់ពីតំណែងកាលពីឆ្នាំមុនដោយសារតែមានការតវ៉ាយ៉ាងច្រើនសន្ធឹកសន្ធាប់។ ស៊ីរី៖ ក្រុមសកម្មជននិយាយថា កងកម្លាំងទ័ពស៊ីរីបានបាញ់ផ្លោងដាក់ទីតាំងក្រុមប្រឆាំងក្នុងទីក្រុង Rastan ហើយមានមនុស្សយ៉ាងហោចណាស់៦នាក់បានស្លាប់ក្នុងការបះបោរប្រឆាំងរដ្ឋាភិបាលនៅកន្លែងជាច្រើនក្នុងផ្ទៃប្រទេស។ សេដ្ឋកិច្ចអាស៊ី៖ ធនាគារពិភពលោកនិយាយថា ការរីកលូតលាស់សេដ្ឋកិច្ចក្នុងចំណោមប្រទេសកំពុងអភិវឌ្ឍនៅតំបន់អាស៊ីបូព៌ានៅតែមានកម្រិតខ្លាំងដដែល ប៉ុន្តែបានធ្វើការព្រមានថា បណ្តាប្រទេសទាំងនោះត្រូវកាត់បន្ថយការពឹងពាក់លើការនាំចេញដោយសារតែការថយចុះនៃសេដ្ឋកិច្ចពិភពលោកនៅបន្តកើតឡើង។ ប៉ាគីស្ថាន៖ មន្ត្រីស៊ើបការណ៍សម្ងាត់របស់ប្រទេសប៉ាគីស្ថាននិយាយថា ការវាយប្រហារដោយយន្តហោះស៊ើបការណ៍ដ្រូន (drone) របស់សហរដ្ឋអាមេរិកបានសម្លាប់ជនសង្ស័យជាសកម្មជនយោធាបួននាក់ក្នុងភាគពាយ័ព្យប្រទេសប៉ាគីស្ថាន។ អ៊ីរ៉ង់៖ ការចរចារវាងក្រុមប្រទេសមហាអំណាចពិភពលោកនិងប្រទេសអ៊ីរ៉ង់បានចាប់ផ្តើមហើយក្នុងទីក្រុងបាកដាដក្នុងកិច្ចខិតខំប្រឹងប្រែងចរចាឱ្យមានកិច្ចព្រមព្រៀងលើជម្លោះទាក់ទងនឹងកម្មវិធីអាវុធបរិមាណូដ៏ចម្រូងចម្រាស់របស់ប្រទេសអ៊ីរ៉ង់។ អឺរ៉ុប៖ ក្រុមមេដឹកនាំនៃក្រុមប្រទេសចំនួន២៧ដែលរួមគ្នាបង្កើតសហភាពអឺរ៉ុបនឹងជួបប្រជុំគ្នានៅទីក្រុងព្រុចសែលប្រទេសប៊ែលហ្ស៊ិកនៅថ្ងៃពុធនេះ ក្នុងកិច្ចប្រជុំកំពូលមួយដែលមានគោលបំណងដោះស្រាយវិបត្តិប្រាក់បំណុលដែលកំពុងគំរាមកំហែងដល់ការស្ថិតស្ថេរនៃសហភាពអឺរ៉ុប។ ព័ត៌មានចុងក្រោយអំពីយុទ្ធនាការបោះឆ្នោតនៅអាមេរិក៖ <!--AV--> This posting includes an audio/video/photo media file: Download Now |
| ឱសថក្លែងក្លាយប្រឆាំងជំងឺគ្រុនចាញ់ត្រូវបានឃើញជាញឹកញាប់នៅទ្វីបអាហ្វ្រិកនិងអាស៊ី Posted: 23 May 2012 01:16 AM PDT ការសិក្សាស្រាវជ្រាវថ្មីមួយឲ្យដឹងថាការសំបូរហូរហៀរនៃឱសថប្រឆាំងនឹងជំងឺគ្រុនចាញ់ក្លែងបន្លំឬគ្មានគុណភាពនៅទូទាំងទ្វីបអាហ្វ្រិកនិងទ្វីបអាស៊ីកាលពីទសវត្សរ៍មុនបណ្តាលឲ្យមានការប្រថុយប្រថានយ៉ាងខ្លាំង លើការប្រឹងប្រែងប្រយុទ្ធប្រឆាំងនឹងជំងឺចម្លងតាមមូសនេះ។ របាយការណ៍របស់វិទ្យាស្ថានសុខភាពជាតិនៃស.រ.អ.បាននិយាយថាការវិភាគទិន្នន័យដែលប្រមូលពី២១ប្រទេសក្នុងផ្នែកខាងត្បូងនៃសមុទ្រខ្សាច់សាហារ៉ាបង្ហាញឲ្យឃើញថា៣៥ភាគរយនៃឱសថប្រឆាំងនឹងជំងឺគ្រុនចាញ់បានធ្លាក់ក្នុងការត្រួតពិនិត្យសាកល្បងជាតិគីមីពីព្រោះថ្នាំទាំងនេះត្រូវបានគេផលិតមិនបានល្អ ចំណែកឯ២០ភាគរយទៀតជាថ្នាំក្លែងក្លាយ។ នៅក្នុងការធ្វើវិភាគស្រដៀងគ្នាមួយនៃឱសថគ្រុនចាញ់មួយចំនួនដែលបានត្រូវប្រមូលពី៧ប្រទេសក្នុងទ្វីបអាស៊ីអាគ្នេយ៍ការស្ទង់ប្រមាណបានរកឃើញថាចំនួន៣៥ភាគរយបានធ្លាក់ក្នុងការត្រួតពិនិត្យសាកល្បងជាតិគីមី ជិតពាក់កណ្តាលបានត្រូវវេចខ្ចប់មិនត្រឹមត្រូវហើយ៣៦ភាគរយជាថ្នាំក្លែងក្លាយ។ ប៉ាគីស្ថាន៖ មន្ត្រីប៉ាគិស្ថានបាននិយាយថាពួកជនប្រដាប់អាវុធដែលគេមិនស្គាល់អត្តសញ្ញាណបានបាញ់កាំភ្លើងទៅលើការប្រជុំមហាជនមួយក្នុងក្រុងកំពង់ផែ ការ៉ាជីKarachi នាប៉ែកខាងត្បូងប្រទេសកាលពីថ្ងៃអង្គារបណ្តាលឱ្យមនុស្សយ៉ាងតិចណាស់១០នាក់ស្លាប់ហើយនាំឱ្យមានការធ្វើកុប្បកម្មផងដែរ។ អ៊ីរ៉ង់៖ នាយកនៃទីភ្នាក់ងារបរមាណូអន្តរជាតិបាននិយាយថាលោករំពឹងថាប្រទេសអ៊ីរ៉ង់នឹងចុះហត្ថលេខាលើកិច្ចព្រមព្រៀងមួយ«ក្នុងពេលឆាប់ៗនេះ»ដើម្បីអនុញ្ញាតឱ្យមានអធិការកិច្ចនៅក្នុងទីតាំងដែលគេសង្ស័យថាត្រូវបានប្រើប្រាស់នៅក្នុងកម្មវិធីសម្ងាត់ផលិតអាវុធបរមាណូ។ ស.រ.អ៖ រ៉ុក្កែតមួយដែលបានត្រូវរចនានិងកសាងដោយក្រុមហ៊ុនឯកជនមួយបានត្រូវបង្ហោះដោយជោគជ័យដើម្បីបំពេញបេសកកម្មជាប្រវត្តិសាស្ត្រក្នុងការបញ្ជូនយានផ្ទុកគ្រឿងផ្គត់ផ្គង់ទៅកាន់ស្ថានីយ៍អវកាសអន្តរជាតិ។ ស្ថានីយ៍ទូរទស្សន៍បានចាប់យករូបភាពការបង្ហោះដោយឥតខ្ចោះនៃយានអវកាស ឈ្មោះថាដ្រាហ្គនDragon នៅពីលើរ៉ុក្កែត ហ្វាលខន ណាញFalcon-9 របស់ស្ពេស អ៊ិក Space X ពីជ្រោយ កាណាវេរ៉ាល់Canaveral រដ្ឋហ្លរីដាFlorida កាលពីព្រឹកថ្ងៃអង្គារនៅមុនពេលថ្ងៃរះ។ គេបានឃើញពួកអ្នកត្រួតត្រាបេសកកម្ម ស្ពេស អ៊ិកSpace X ទះដៃអបអរសាទរនិងឱបគ្នានៅពេលគេដឹងថាយានអវកាសនិងរ៉ុក្កែតបានទៅដល់តារាវិថីហើយបន្ទះថាម ពលពន្លឺព្រះអាទិត្យបានបើកនិងមានដំណើរការល្អ។ សូម៉ាលី៖ កងកម្លាំងគាំទ្រទៅខាងរដ្ឋាភិបាលក្នុងប្រទេសសូម៉ាលីបានប្រឹងប្រែងវាយយកមកវិញនូវសំបុកមួយរបស់ពួកជនសកម្មប្រយុទ្ធនៅជិតជំរុំជនភៀសខ្លួនធំមួយនៅខាងក្រៅរដ្ឋធានី ម៉ូហ្កាឌីស៊ូMogadishu។ ស.រ.អ៖ រ៉ុក្កែត SpaceX ដែលបានត្រូវបង្ហោះកាលពីព្រឹកថ្ងៃអង្គារមានផ្ទុកលើសពីគ្រឿងផ្គត់ផ្គង់សម្រាប់ស្ថានីយ៍អវកាសអន្តរជាតិ វាមានផ្ទុកចំណែកធាតុរបស់មនុស្សប្រមាណ៣០០នាក់ដោយមានរួមបញ្ចូលទាំងធាតុរបស់តារាភាពយន្តម្នាក់ដែលគេបានស្គាល់ថាដើរមុខនាទីរបស់លោកក្នុងខ្សែកុន Star Trek និងភាពយន្តភាគតាមទូរទស្សន៍។ កូរ៉េខាងជើង៖ ប្រទេសកូរ៉េខាងជើងបានព្រមានថាខ្លួននឹងបន្តអភិវឌ្ឍកម្មវិធីបរមាណូរបស់គេប៉ុន្តែបាននិយាយថាខ្លួនគ្មានបំណងចាត់«វិធានការយោធាមួយដូចជាការពិសោធន៍បរមាណូ»នោះទេ។ <!--AV--> This posting includes an audio/video/photo media file: Download Now |
| Posted: 23 May 2012 12:52 AM PDT ព្រះសង្ឃសូត្រមន្តជយន្តោ ហើយបានប្រទានយ័ន្តរំដោះគ្រោះឲ្យលោកម៉ម សូណង់ដូ ក្រោយពីលោកបានប្រាប់ពុទ្ធបរិស័តខ្មែរនៅវត្តធម្មរង្សីរដ្ឋVirginiaថា លោកត្រូវផ្អាកការធ្វើដំណើរទៅប្រទេសកម្ពុជាវិញ ក្រោយពីមានព័ត៌មានថា រដ្ឋាភិបាលគ្រោងចាប់ខ្លួនលោកនៅពេលលោកទៅដល់មាតុភូមិវិញនៅចុងខែនេះ។ លោកម៉ម សូណង់ដូនិយាយថា៖ «ដំណឹងដែលគេនឹងចាប់ខ្ញុំពេលចូលទៅស្រុកខ្មែរវិញហ្នឹង គឺដំណឹងហ្នឹងខ្ញុំមិនអាចថា ពិតបានទេ គ្រាន់តែជាពាក្យចចាមអារាម។ប៉ុន្តែពាក្យចចាអារាមហ្នឹងវាច្បាស់លាស់ពេក។ ត្រូវតែខ្ញុំចាត់វិធានការទប់ស្កាត់គឺការបំភ្លឺរបស់ខ្ញុំ។ ការបំភ្លឺកុំឲ្យយល់ខុស កុំឲ្យភ្លេចថា ខ្ញុំជាអ្នកសារព័ត៌មាន»។ លោកម៉ម សូណង់ដូពន្យល់ពីហេតុផលដែលលោកលើកពេលធ្វើដំណើរនេះយ៉ាងដូច្នេះថា៖ «ហើយដល់ពេលខ្ញុំឮថា គេចង់ចាប់ខ្ញុំ ខ្ញុំផ្អាកដំណើរ។ មិនមែនខ្ញុំខ្លាចចូលគុកទេ។បើសិនជាខ្ញុំទៅគេចាប់ខ្ញុំ ខ្ញុំអត់អាចវិលត្រឡប់មកវិញធ្វើបទសម្ភាសន៍ជាមួយលោកសួន សេរីរដ្ឋាដែលខ្ញុំគ្រោងទុកទេ។ហេតុដូច្នេះ ខ្ញុំផ្អាក។ ពេលណាដែលខ្ញុំធ្វើបទសម្ភាសន៍រួចហើយ ខ្ញុំនឹងវិលទៅប្រទេសជាតិវិញណា៎»។ <!--AV--> លោកម៉ម សូណង់ដូបន្ថែមថា លោកត្រូវយកព័ត៌មានពិតថា តើលោកសួន សេរីរដ្ឋានិយាយពិតឬភូតកុហក់ នៅពេលលោកអះអាងថា តុលាការឧកិ្រដ្ឋកម្មអន្តរជាតិនឹងកោះហៅលោកនៅខែក្រោយឲ្យទៅបំភ្លឺអំពីពាក្យបណ្តឹងដែលលោកដាក់ប្តឹងលោកនាយករដ្ឋមន្ត្រីមន្ត្រីហ៊ុន សែន។ «ខ្ញុំចង់ដឹងថា លោកសួន សេរីរដ្ឋាភរឬក៏មិនភរ?ហេតុដូច្នេះការណ៍ដែលលោកសួនសេរីរដ្ឋាប្រកាសក្នុងពិភពលោកហ្នឹងឲ្យដឹងថា គាត់នឹងប្តឹង ហើយគាត់បានប្តឹងហើយគេនឹងកោះហៅគាត់នៅថ្ងៃទី៦ហ្នឹង។ ដូច្នេះជាដំណឹងមួយមានសារៈសំខាន់សម្រាប់ខ្មែរយើងទាំងអស់គ្នា»។ លោកម៉ម សូណង់ដូធ្លាប់ជាប់ពន្ធនាគារទាក់ទងនឹងការផ្សាយព័ត៌មានអំពីការបះបោរបំផ្លាញស្ថានទូតថៃ និងរឿងព្រំដែនជាមួយប្រទេសវៀតណាម។ លោកប្រកាសការតាំងចិត្តរបស់លោកថា៖ «ពេលយើងតាំងខ្លួនបម្រើជាតិគឺត្រូវយើងគ្រោងទុកឲ្យហើយថា ថ្ងៃណាមួយត្រូវគេចាប់ដាក់គុកឬថ្ងៃណាមួយគេនឹងសម្លាប់យើងចោល។ អាហ្នឹងយើងត្រូវដឹងអញ្ចឹងតែម្តង។ ព្រះសម្មាសម្ពុទ្ធបានសម្តែងថា ជីវិតវាមិនទៀង តែស្លាប់វាទៀង។ អ្នកណាក៏ត្រូវស្លាប់ដែរ។ហេតុដូច្នេះខ្ញុំត្រូវជ្រើសរើសការស្លាប់របស់ខ្ញុំ។ បើខ្ញុំស្លាប់ក្នុងករណីដែលខ្ញុំបម្រើជាតិ ការពារជាតិ ការពារទឹកដីមាតុភូមិ ការពារអនាគតសម្រាប់កូនចៅខ្មែរ។ បើសិនជាខ្ញុំស្លាប់របៀបហ្នឹងគឺជាកិត្តិយសរបស់ខ្ញុំមួយដែលកើតជាកូនខ្មែរ»។ លោកសួន សេរីរដ្ឋា ប្រធានចលនាអំណាចពលរដ្ឋខ្មែរត្រូវរដ្ឋាភិបាលចោទប្រកាន់ពីបទបង្កចលនាហិង្សា ក្រោយពីលោកចូលរួមជាមួយចលនាអាវលឿងថៃកាលពីឆ្នាំទៅ។ លោកម៉ម សូណង់ដូនិយាយថា លោកគ្រាន់តែចូលរួមយកព័ត៌មានអំពីលោកសួន សេរីរដ្ឋាប៉ុណ្ណោះ ហើយសង្កេតឃើញថា ចលនាអំណាចប្រជាជននេះមិនមែនជាលចនាប្រដាប់អាវុធទេ។ លោកតាន់ វិបុល អនុប្រធានអង្គការខ្មែរអាមេរិកាំងដើម្បីលទ្ធិប្រជាធិបតេយ្យ ថ្លែងថា លោកនឹងតាមដានពាក្យចរចាមអារាមអំពីគម្រោងចាប់លោកម៉ម សូណង់ដូ ប្រធានវិទ្យុសំបុកឃុំនេះ។ លោកសម្តែងក្តីសង្ឃឹមថា៖ «នឹងធ្វើអ្វីដែលយើងអាចធ្វើបានដើម្បីការពារសិទ្ធិសេរីភាពអ្នកសារព័ត៌មានជាពិសេស។ សង្ឃឹមថា រដ្ឋាភិបាលមិនធ្វើដូច្នេះទេ»។ ពុទ្ធបរិស័ទខ្មែរជាង២០នាក់ដែលសំណេះសំណាលជាមួយលោកម៉ម សូណង់ដូបានប្រមូលបច្ច័យជូនលោក ហើយប្រមូលបច្ច័យខ្លះទៀតផ្ញើទៅគ្រួសារលោកឈុត វុទ្ធីសម្មជនព្រៃឈើដែលគេបាញ់សម្លាប់ថ្មីៗនេះ។ ពួកគាត់សង្ឃឹមថា លុយសប្បុរសនេះនឹងទៅដល់គ្រួសារលោកឈុត វុទ្ធី ហើយវានឹងមិនជាប់ឃុំទេ បើលោកម៉ម សូណង់ដូត្រូវរដ្ឋាភិបាលឃាត់ខ្លួនដូចពាក្យចរចាមអារាមមែន ក៏ដោយ៕ This posting includes an audio/video/photo media file: Download Now |
| សមត្ថកិច្ចប្រដាប់អាវុធចូលឆែកផ្ទះសាច់ញាតិជនសង្ស័យពីបទអបគមន៍ Posted: 22 May 2012 08:19 PM PDT ក្រុមសមត្ថកិច្ចចម្រុះដែលរួមមានប៉ូលិស និងមន្ត្រីយោធាប្រមាណជិត៥០នាក់ ប្រដាប់ដោយអាវុធស្វ័យប្រវត្តិគ្រប់ដៃ កាលពីយប់ថ្ងៃច័ន្ទ រហូតឈានទៅដល់ព្រឹកថ្ងៃអង្គារនេះ បានឡោមព័ទ្ធផ្ទះអ្នកស្រីប៊ុន ធឿន បងស្រីបង្កើតរបស់លោកប៊ុន រដ្ឋា ដែលសមត្ថកិច្ចស្វែងរកចាប់ខ្លួនពីបទបង្កើតអបគមន៍ខុសច្បាប់នៅក្នុងខេត្តក្រចេះ។ ការឡោមព័ទ្ធនេះបានធ្វើឡើងអស់រយៈពេលជាច្រើនម៉ោង ក៏ប៉ុន្តែសមត្ថកិច្ចមិនបានសម្រុកចូលភ្លាមៗទេ ដោយពុំមានដីកាចុះឆែកឆេរ។ អ្នកស្រីប៊ុន ធឿន អាយុ៣៣ឆ្នាំ បងស្រីបង្កើតរបស់លោកប៊ុន រដ្ឋា បានថ្លែងប្រាប់វីអូអេសម្លេងសហរដ្ឋអាមេរិកតាមរយៈទូរស័ព្ទមកថា សមត្ថកិច្ចបានធាក់ទ្វារ និងអង្រន់បង្អួច ព្រមទាំងបញ្ចាំងពិលចូលក្នុងផ្ទះរបស់អ្នកស្រី ដែលធ្វើឲ្យសមាជិកនៅក្នុងផ្ទះមានការភិតភ័យយ៉ាងខ្លាំង។ អ្នកស្រីបានមានប្រសាសន៍ទៀតថាសមត្ថកិច្ចមិនបានរកឃើញភ័ស្តុងតាងអ្វីទេ បន្ទាប់ពីបានឆែកឆេរផ្ទះរបស់អ្នកស្រីអស់ប្រមាណជាជិតមួយម៉ោង។ «គេមិនបានសួរអ្វីផង គ្រាន់តែថា ពុកខ្ញុំហ្នឹងមានទោស។ គេថា ទោសហ្នឹងមិនជាធំប៉ុន្មានទេ ប៉ុន្តែប៊ុន រដ្ឋា ហ្នឹងគឺខ្លាំង។ គេថា ពុកខ្ញុំរត់អញ្ចឹង អត់ត្រូវទេ គួរតែប្រគល់ខ្លួនឲ្យសមត្ថកិច្ច។ អញ្ចឹងខ្ញុំមិនដឹងថាម៉េចទេ ព្រោះខ្ញុំមិនដែលទាក់ទងគាត់ផង»។ លោកប៊ុន រដ្ឋា អតីតសមាជិកសមាគមអ្នកប្រជាធិបតេយ្យរបស់លោកម៉ម សុណង់ដូ ព្រមទាំងឪពុករបស់គាត់ លោកប៊ុន ឆន និងប្រជាពលរដ្ឋចំនួនបីនាក់ផ្សេងទៀត ត្រូវបានកម្លាំងសមត្ថកិច្ចតាមប្រមាញ់ស្វែងរកចាប់ខ្លួនពីបទសង្ស័យថា បង្កើតតំបន់អបគមន៍ខុសច្បាប់ នៅក្នុងខេត្តក្រចេះ។ លោកឧត្តមសេនីយ៍ត្រីឆាយ គឹមសុន ស្នងការប៉ូលិសខេត្តកំពង់ចាម បានមានប្រសាសន៍ថា ជនសង្ស័យទាំងប្រាំនាក់ ដែលសមត្ថកិច្ចកំពុងស្វែងរកចាប់ខ្លួន រួមមានលោកប៊ុន រដ្ឋា លោកប៊ុន ឆន ឪពុករបស់លោកប៊ុន រដ្ឋា សុខ តុង ឆ័ត្រ សារឿន និងម៉ា ឆាង។ លោកបានមានប្រសាសន៍ថាមូលហេតុដែលសមត្ថកិច្ចបានចុះឆែកឆេរផ្ទះបងស្រីរបស់លោកប៊ុន រដ្ឋា នៅស្រុមមេម៉ត់ ខេត្តកំពង់ចាម ដោយសមត្ថកិច្ចសង្ស័យថា មានជនសង្ស័យមួយចំនួនក្នុងចំណោមប្រាំនាក់ ដែលសមត្ថកិច្ចកំពុងស្វែងរកចាប់ខ្លួននោះ មកសម្ងំលាក់ខ្លួននៅទីនោះ។ «ពេលឥតឃើញ គឺកម្លាំងសមត្ថកិច្ចគាត់ដកចេញដែរ។ គេធ្វើកំណត់ហេតុឆែកឆេរតែម្តង»។ យ៉ាងតិចមានប្រជាពលរដ្ឋចំនួនប្រាំពីរនាក់ត្រូវបានអាជ្ញាធរខេត្តក្រចេះចាប់ខ្លួន ក្រោយពីមានការបង្រ្កាបដោយបង្ហូរឈាមនៅក្នុងខេត្តក្រចេះរួចមក។ កាលពីថ្ងៃទី១៦កន្លងទៅនេះ សមត្ថកិច្ចចម្រុះដោយបូករួមទាំងប្រើប្រាស់ឧទ្ធម្ភាគចក្រចំនួនពីរគ្រឿង ផង បានចុះបង្ក្រាបទីតាំងប្រជាពលរដ្ឋមួយកន្លែងនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ ដោយបានចោទប្រកាន់ថា ក្រុមប្រជាពលរដ្ឋបានបង្កើតតំបន់អបគមន៍ខុសច្បាប់ ដែលដឹកនាំដោយលោកប៊ុន រដ្ឋា។ យ៉ាងតិចមានកុមារីមា្នក់ឈ្មោះហេង ចន្ថា អាយុ១៤ឆ្នាំ ត្រូវបានសមត្ថកិច្ចបាញ់សម្លាប់ភ្លាមៗនៅនឹងកន្លែងក្នុង ខណៈពេលចូលបង្ក្រាបនោះ។ ពុំមានមន្ត្រីសមត្ថកិច្ចណាម្នាក់ត្រូវបានចាប់ខ្លួន ឬក៏នាំយកមកកាត់ទោសនៅឡើយទេ ក្រោយពីបានបាញ់សម្លាប់ប្រជាពលរដ្ឋនៅក្នុងខេត្តក្រចេះ៕ This posting includes an audio/video/photo media file: Download Now |
| សមត្ថកិច្ចចាប់អ្នកភូមិបឹងកក់ក្នុងពេលបង្ក្រាបការទាមទារដំណោះស្រាយដីធ្លី Posted: 22 May 2012 07:28 PM PDT ក្រុមប៉ូលិស និងកងរាជអាវុធហត្ថបានចាប់ក្រៀក និងចាប់សែងដៃ សែងជើងក្រុមអ្នកតវ៉ានៅសហគមន៍បឹងកក់ម្នាក់ម្តងៗ នៅព្រឹកថ្ងៃអង្គារនេះ រួចរុញទម្លាក់ពួកគេចូលទៅក្នុងរថយន្ត និងបើកឆ្ពោះទៅកាន់ស្នងការដ្ឋានប៉ូលិសរាជធានីភ្នំពេញ។ មនុស្សបីនាក់យ៉ាងតិចបានដួលសន្លប់ក្នុងការបង្រ្កាបនេះ។ ប្រជាពលរដ្ឋសរុបចំនួន១៣នាក់ត្រូវបានចាប់ខ្លួន ក្នុងពេលដែលពួកគេបានទាមទារដោយសន្តិវិធីឲ្យអាជ្ញាធរសាលារាជធានីភ្នំពេញពន្លឿនការដោះស្រាយជម្លោះដីធ្លីរបស់ពួកគេជាមួយនឹងក្រុមហ៊ុនស៊ូកាគូអ៊ីនរបស់លោកឧកញ៉ា ឡាវ ម៉េងឃីន សមាជិកព្រឹទ្ធសភារបស់គណបក្សប្រជាជនកម្ពុជាកំពុងកាន់អំណាច។ មានស្រ្តីចំនួនពីរនាក់បានសន្លប់នៅពេលដែលមានការចាប់ខ្លួនយ៉ាងប្រតាយប្រតប់ បន្ទាប់ពីពួកគេត្រូវវាយដំ និងឆក់នឹងដំបងឆក់។ ក្នុងចំណោមអ្នកត្រូវចាប់ខ្លួន មានអ្នកស្រីទេព វន្នី ហេង មុំ និងអ្នកស្រីតុល ស្រីពៅ ដែលសុទ្ធសឹងជាអ្នកតវ៉ានាំមុខយ៉ាងក្លៀវក្លារបស់ប្រជាសហគមន៍បឹងកក់។ ប្រជាពលរដ្ឋសហគមន៍បឹងកក់សរុបប្រាណជា៥០នាក់ កាលពីព្រឹកមិញនេះបាននាំគ្នាប៉ុនប៉ងជួយសង់ផ្ទះមួយរបស់អ្នកស្រី សែន ទូចឡើងវិញ។ អ្នកស្រីជាជនរងគ្រោះម្នាក់ក្នុងសហគមន៍នេះ។ ក្នុងខណៈនោះ កងប៉ូលិស កងរាជអាវុធហត្ថ និងកងសណ្ដាប់ធ្នាប់របស់សាលារាជធានីភ្នំពេញប្រមាណជាង១០០នាក់ ប្រដាប់ដោយដំបងឆក់ ខែលបង្រ្កាបបាតុកម្ម និងគ្រាប់បែកផ្សែង បានចាប់ប្រទាញយកឈើសម្រាប់ដាំសរសរផ្ទះ ហើយក្រុមសណ្ដាប់ធ្នាប់របស់សាលារាជធានីភ្នំពេញ បានតាមកញ្ឆក់យកបដាររបស់ក្រុមបាតុករ។ បុរសជាស្វាមីរបស់ស្រ្តីម្ចាស់ផ្ទះបានដួលសន្លប់ភ្លាមៗ ពេលមានការបង្រ្កាប។ អ្នកស្រី សែន ទូចបញ្ជាក់ថា ប្តីរបស់គាត់ដួលសន្លប់ដោយសារកំហឹង។ «យើងជាម្ចាស់ដី យើងឆ្អែតខ្លាំងពេកទៅ ក៏រ៉ាយរ៉ាប់ប្រាប់គាត់ទៅ គាត់រុញ រុញច្រាន ហើយគាត់ (ប្តី)ខឹងខ្លាំងក៏សន្លប់ទៅ។ ខ្ញុំសម្រេចធ្វើផ្ទះឥឡូវយកឈើខ្ញុំទៅអស់»។ វីអូអេបានព្យាយាមទាក់ទងលោកឧត្តមសេនីយ៍ទូច ណារុថ ស្នងការនគរបាលរាជធានីភ្នំពេញ តែមិនអាចទំនាក់ទំនងបានទេ ដោយសារតែទូរស័ព្ទរបស់លោករោទិ៍ជាច្រើនដង ហើយគ្មានអ្នកទទួល។ ដោយឡែកលោកកើត ឆែ នាយករងរដ្ឋបាលសាលារាជធានី ភ្នំពេញមិនធ្វើអត្ថាធិប្បាយតាមទូរស័ព្ទនោះទេ។ ទោះជាយ៉ាងណា បើយោងតាមក្រុមមន្ដ្រីឃ្លាំមើលការរំលោភសិទ្ធិមនុស្ស ដែលបានចូលជួបជនរងគ្រោះដោយផ្ទាល់នៅកន្លែងឃុំឃាំងបណ្ដោះអាសន្ន បានឲ្យដឹងថា ប្រជាពលរដ្ឋទាំងនោះអាចប្រឈមនឹងការចោទប្រកាន់ ហើយស្នងការដ្ឋាននគរបាលរាជធានីភ្នំពេញគ្រោងនឹងបញ្ជូនពួកគេទៅកាន់តុលាការសាលាដំបូងរាជធានីភ្នំពេញនៅថ្ងៃស្អែក។ ហើយប៉ូលិសបានសួរចម្លើយពួកគាត់ម្តងមួយៗ នៅរសៀលនេះ។ លោកអំ សំអាត ប្រធានការិយាល័យគ្រប់គ្រងបច្ចេកទេសស៊ើបអង្កេតលីកាដូ មានប្រសាសន៍ថា ការចាប់ខ្លួននេះមិនមែនជាដំណោះស្រាយទេ។ «ទោះជាយើងបង្រ្កាប យើងចាប់បន្តទៀតក៏ដោយ ក៏បញ្ហានេះមិនចប់ទេ។ វាអាចរីករាលដាលទៅប្រសិនបើយើងមិនដោះស្រាយបញ្ហាដីធ្លីនេះឲ្យបានចប់។ ហើយប្រជាពលរដ្ឋកាន់តែធ្ងន់ធ្ងរទៅគឺប្រជាពលរដ្ឋនៅតំបន់បឹងកក់ហ្នឹងឯង»។ ក្រុមប្រជាពលរដ្ឋដែលបានឃើញការចាប់ខ្លួនអ្នកភូមិបឹងកក់បានសម្តែងប្រតិកម្មក្នុងរង្វង់ពួកគាត់។ រដ្ឋាភិបាលបានជួលដីនៃសហគមន៍បឹងកក់សរុបចំនួន១៣៣ហិចតាសម្រាប់រយៈពេល៩៩ឆ្នាំ ឲ្យដល់ក្រុមហ៊ុនស៊ូកាគូអ៊ីនអភិវឌ្ឍសំណង់ទំនើប និងមណ្ឌលពាណិជ្ជកម្ម។ ប្រជាពលរដ្ឋចំនួនជាង៤០០០គ្រួសារត្រូវបានបណ្ដេញចេញប្រកបដោយភាពហិង្សា។ ធនាគារពិភពលោកបានដាក់សម្ពាធឲ្យរដ្ឋាភិបាលដោះស្រាយវិបត្តិនេះឲ្យបានត្រឹមត្រូវបំផុតជាមួយក្រុមប្រជាពលរដ្ឋ។ ក្រោយមកលោកនាយករដ្ឋមន្ដ្រីហ៊ុន សែនបានសម្រេចកាត់ដីចំនួនជាង១២ហិចតាសម្រាប់ធ្វើការបែងចែកដល់ប្រជាពលរដ្ឋដែលនៅសេសសល់ជាង៧០០គ្រួសារ។ ប៉ុន្ដែប្រជាពលរដ្ឋ៩៤គ្រួសារក្នុងចំណោមនោះ ត្រូវបានអាជ្ញាធរសាលារាជធានីភ្នំពេញបដិសេធមិនផ្តល់ចំណែកដី ឲ្យទេ ដោយចោទថា ប្រជាពលរដ្ឋទាំងនោះរស់លើចំណីដីរបស់ក្រុមហ៊ុន។ ប៉ុន្ដែក្រុមប្រជាជនបានច្រានចោលការចោទប្រកាន់នេះ។ «មានដីខ្លួនឯង គេបូមពន្លិចហើយ ហើយគេមកចាប់ចង់ទៀត។ តើវាសាហាវប៉ុណ្ណា? អស់លោកជួយមើល? បូមពន្លិចបំបិទភ័ស្តុតាង ហើយចោទថា ដីទឹក។ ផ្ទះវីឡាធំៗ បូមពន្លិចបំបិទភ័ស្តុតាង ហើយ នឹងយកអេស្កាវទ័រមកកាវឲ្យខ្ទេច»។ កាលពីថ្ងៃច័ន្ទប្រជាពលរដ្ឋសហគមន៍បឹងកក់បានធ្វើការតវ៉ារួចម្តងហើយ នៅមុខសាលារាជធានីភ្នំពេញ ហើយមន្ដ្រីទទួលខុសត្រូវបានប្រាប់ពួកគេថា នឹងលើកយកបញ្ហាពួកគេមកដោះស្រាយក្រោយការបោះឆ្នោតជ្រើសរើសឃុំសង្កាត់ថ្ងៃទី៣ មិថុនា។ ប្រជាពលរដ្ឋមួយចំនួនបានបញ្ជាក់ថា ការសន្យានេះបានភ្ជាប់ជាមួយនឹងលក្ខខណ្ឌថា ពួកគេត្រូវតែបោះឆ្នោតឲ្យគណបក្សប្រជាជនកម្ពុជា៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
