VOA News: ព័ត៌មាន: “លោក សានតូរុម ឈ្នះការបោះឆ្នោតបឋមក្នុងរដ្ឋអាឡាបាម៉ានិងមីស៊ីស៊ីពី” plus 3 more |
- លោក សានតូរុម ឈ្នះការបោះឆ្នោតបឋមក្នុងរដ្ឋអាឡាបាម៉ានិងមីស៊ីស៊ីពី
- និស្សិតខ្មែរ៖ មហាគ្រោះធម្មជាតិនៅជប៉ុនជាបទពិសោធន៍ដ៏«កម្រ»មួយ
- មេធាវីការពារខៀវ សំផនបដិសេធឯកសាររបស់ព្រះរាជអាជ្ញា
- ជនរងគ្រោះដាក់ពាក្យប្តឹងលោក ឈូក បណ្ឌិតពីបទមនុស្សឃាត
| លោក សានតូរុម ឈ្នះការបោះឆ្នោតបឋមក្នុងរដ្ឋអាឡាបាម៉ានិងមីស៊ីស៊ីពី Posted: 14 Mar 2012 09:17 AM PDT បេក្ខជនប្រធានាធិបតីនៃគណបក្សសាធារណរដ្ឋ លោក រីក សានតូរុម (Rick Santorum) បានយកជ័យជម្នះក្នុងការបោះឆ្នោតបឋមនៅក្នុងរដ្ឋអាឡាបាម៉ា (Alabama) និង មីសីសីពី (Mississippi) រដ្ឋភាគខាងត្បូង កាលពីថ្ងៃអង្គារដោយបានពង្រឹងគោលជំហររបស់លោកជាអ្នកអភិរក្សនិយម ប្រសើរជាងលោក មិត រូមនី (Mitt Romney) ដែលនាំមុខការប្រកួតយកតំណែងតែងតាំងជាបេក្ខជនប្រធានាធិបតីរបស់គណបក្ស។ <!--IMAGE-LEFT--> លោក សានតូរុម បានយកជ័យជម្នះក្នុងរដ្ឋអភិរក្សនិយមដ៏ខ្លំាងក្លា ហើយ លោក មិត រូមនី ជាប់លេខពីរ រួច ញូត ហ្គីងរីជ (Newt Gingrich) ជាប់លេខបី។ លោក សាននតូរុម អតីត ព្រឹទ្ធសមាជិកពី រដ្ឋផេនីសីលវ៉ានៀ (Pennsylvania) ថ្លែងប្រាប់ក្រុមអ្នកគាំទ្ររបស់លោក ថា ការឃោសនារបស់លោក ធ្វើឡើងដោយជនសាមញ្ញដែលធ្វើកិច្ចការវិសាមញ្ញ។ នេះជាយុទ្ធនាការចេញពីសាមញ្ញជន សម្រាប់តំណែងប្រធានាធិបតី។ អ្នកដែលប្រយុទ្ធតស៊ូខ្លាំង នៅក្នុងយុគបណ្ដាញព័ត៌មានពេលនេះដោយជនសមញ្ញទូទាំងប្រទេសនេះអាចធ្វើអ្វីពិសេសអស្ចារ្យ។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> កម្ពុជា៖ ប្រទសកម្ពុជាបានរៀបចំឲ្យមានការដេញថ្លៃជាអន្ដរជាតិមកលើវត្ថុបុរាណខ្មែរដោយមានការគាំទ្រពីគ្រឹះស្ថានវត្ថុវិចិត្រសិល្បៈដ៏ល្បីឈ្មោះមួយគឺ គ្រីស្ទី (Christie)។ វត្ថុបុរាណខ្មែរមានតម្លៃខ្ពស់ដែល គេតាមស្វែងរកចង់បាន។ ស.រ.អា៖ លោកស្រីរដ្ឋមន្ដ្រីការបរទេស ហីឡារី គ្លីនតុន ថ្លែងថាទំនាក់ទំនងយុទ្ធសាស្រ្ដរបស់ស.រ.អា ទៅកាន់តំបន់អាស៊ីប៉ាស៊ីហ្វិកជាអាទិភាពខ្ពស់បំផុតខណៈដែលស.រ.អា បានប្រែប្រួលពី កិច្ចប្រឹងប្រែងយោធាចេញពី អ៊ីរ៉ាក់ និងអាហ្វហ្គានីស្ថាន។ ស.រ.អា/អាហ្វហ្គានីស្ថាន៖ រដ្ឋមន្ដ្រីការបរទេសស.រ.អា លោក ឡេអុន ផានេតា (Leon Panetta) ថ្លែងថា អំពើឃោរឃៅកាលពីពេលថ្មីៗនេះ រាប់ទាំងការបាញ់សម្លាប់ឥតរើសមុខនៅក្រៅទីក្រុង កាន់ដាហារ (Kandahar) ប្រព្រឹត្ដដោយទាហានអាមេរិកាំងម្នាក់ នឹងមិនរារាំងស.រ.អា មិនឲ្យបន្ដបេសកម្មរបស់ខ្លួននៅក្នុងប្រទេសអាហ្វហ្គានីស្ថានទេ។ ស៊ីរី៖ អង្គការ Amnesty International ថ្លែងថាពលរដ្ឋស៊ីរីដែលបានត្រូវចាប់ឃុំដោយអាជ្ញាធរ ក្នុងអំឡុងពេលធ្វើការបះបោរប្រឆាំងរបបគ្រប់គ្រងរបស់ប្រធានាធិបតីលោក បាស្សា អាល់ អាសដាដ (Bashar al Assad) បានរងគ្រោះពីការធ្វើទារុណកម្មដ៏រាលដាលដែលអាចចាត់ជាបទឧក្រិដ្ឋកម្ម ប្រឆាំងមនុស្សជាតិ។ ចិន៖ នាយរករដ្ឋមន្ដ្រីចិន បានថ្លែងសង្កត់ធ្ងន់លើសេចក្ដីត្រូវការឲ្យមានការកែទម្រង់នយោបាយ ក្នុងគោលបំណងនឹងធ្វើឲ្យរឹងមាំដល់ការលូតលាស់សេដ្ឋកិច្ច ហើយចៀសវាងការគំរាមមកពីអស្ថិរភាពសង្គម។ សេចក្ដីថ្លែងការណ៍នេះ ប្រហែលជាសន្និសិទកាសែតចុងក្រោយបង្អស់ របស់លោកមុននឹងលោកចូលនិវត្ដន៍នៅក្នុងឆ្នាំក្រោយ។ ចិន៖ សភារបស់ប្រទេសចិន បានអនុម័តមកលើច្បាប់ឧក្រិដ្ឋកម្មមួយ ដែលមានគោលដៅនឹងបណ្តឹងមកលើអំណាចប៉ូលិសក្នុងការចាប់ឃុំដោយសម្ងាត់មកលើជនសង្ស័យ។ ស.រ.អា៖ លោកស្រីរដ្ឋមន្ដ្រីការបរទេសស.រ.អ ហ៊ីឡារី រូដាម គ្លីនតុន បានថ្លែងរំឭកប្រាប់អ្នកការទូតស.រ.អា អំពីភាពចាំបាច់ក្នុងការគាំទ្រសង្គមស៊ីវិល និងអង្គការការពារសិទ្ធិមនុស្សដែលកំពុងត្រូវបានទិតៀនដោយរដ្ឋាភិបាលនៃមជ្ឈឹមបូព៌ា និងតំបន់អាហ្វ្រិកខាងជើង។ ស្វ៊ីស៖ រថយន្ដក្រុងមួយគ្រឿងដឹកអ្នកទេសចរជាតិ បែលហ្ស៊ិក (Belgique) មកផ្ទះវិញពីទីកន្លែងលេងស្គី បានក្រឡាប់នៅក្នុងផ្លូវរូងភ្នំ បណ្ដាលឲ្យមនុស្ស ២៨នាក់ស្លាប់ រួមទាំងក្មេង ២២នាក់ នៅក្នុងប្រទេសស្វ៊ីស។ បង់ក្លាដែស៖ ចំនួនមនុស្សស្លាប់ពីគ្រោះថ្នាក់លិចសាឡាងនៅតំបន់ភាគខាងត្បូងប្រទេសបង់ក្លាដែសកើនដល់១០៥នាក់។ <!--AV--> This posting includes an audio/video/photo media file: Download Now |
| និស្សិតខ្មែរ៖ មហាគ្រោះធម្មជាតិនៅជប៉ុនជាបទពិសោធន៍ដ៏«កម្រ»មួយ Posted: 14 Mar 2012 08:17 AM PDT <!--IMAGE-RIGHT--> នៅក្នុងអំឡុងព្រឹត្តិការណ៍រញ្ជួយផែនដីនិងរលកយក្សស៊ូណាមិនៅប្រទេសជប៉ុនកាលពីឆ្នាំមុន អ្នកនាង ទា ស៊ាងហួង និស្សិតខ្មែរម្នាក់ដែលរៀនជំនាញភាសាជប៉ុននិងភាសាចិននៅទីក្រុងតូក្យូ បានបាត់ដំណឹងមួយរយៈក្នុងពេលនាងធ្វើដំណើរកម្សាន្តនៅក្រុងសេនដៃ (Sendai) ដែលជាកន្លែងទទួលរងផលប៉ះពាល់ខ្លាំងជាងគេពីការរញ្ជួយផែនដីនិងរលកស៊ូណាមិ។ នៅពេលនោះ វីអូអេបានសម្ភាសន៍អ្នកនាងស៊ាងហួងនៅភ្លាមៗក្រោយពេលប្រព័ន្ធទូរស័ព្ទបានដំណើរការវិញ។ នៅក្នុងឱកាសខួបមួយឆ្នាំនៃព្រឹត្តិការណ៍គ្រោះមហន្តរាយនៅជប៉ុនកាលពីថ្ងៃទី១១ខែមីនានេះ លោក សឹង សុផាត នៃវីអូអេ បានជួបសម្ភាសន៍អ្នកនាង ទា ស៊ាងហួង ជាថ្មីដើម្បីសាកសួរពីស្ថានភាពប្រទេសជប៉ុនក្នុងពេលបច្ចុប្បន្ន និងចំណាប់អារម្មណ៍របស់អ្នកនាងស៊ាងហួងនៅពេលជិតត្រឡប់ទៅប្រទេសកម្ពុជាវិញ។ តទៅនេះជាកិច្ចសម្ភាសន៍ទាំងស្រុងតាមប្រព័ន្ធ Skype៖ <!--AV--> This posting includes an audio/video/photo media file: Download Now |
| មេធាវីការពារខៀវ សំផនបដិសេធឯកសាររបស់ព្រះរាជអាជ្ញា Posted: 13 Mar 2012 08:02 PM PDT ក្រុមមេធាវីការពារឲ្យអតីតប្រមុខរដ្ឋនៃរបបកម្ពុជាប្រជាធិបតេយ្យ ខៀវ សំផន បានប្រឆាំងនឹងការប្រើប្រាស់ឯកសារជាមូលដ្ឋានសម្រាប់ការកាត់ទោសក្នុងសំណុំរឿង០០២។ ការជំទាស់នៅពេលដែលក្រុមមេធាវីការពារជនជាប់ចោទលើកឡើងថា ឯកសារជាច្រើនដែលស្នើដោយភាគីសហព្រះរាជអាជ្ញាមិនអាចជឿជាក់បាន និងមិនជាប់ទាក់ទងទៅនឹងបរិបទនៃការកាត់ទោសនៅដំណាក់កាលដំបូងនេះទេ។ ដំណាក់កាលដំបូងត្រូវផ្ដោតទៅលើការជម្លៀសចេញដោយបង្ខំ និងការធ្វើទុក្ខបុកម្នេញលើប្រជាជនកម្ពុជា នៅពេលដែលពួកខ្មែរក្រហមចាប់ផ្តើមកាន់អំណាច។ លោក គង់ សំអុន សហមេធាវីកម្ពុជារបស់ ខៀវ សំផន បានលើកឡើងថា ឯកសារជាច្រើនមានការជាប់ពាក់ព័ន្ធទៅនឹងការកាត់ទោសដំណាក់កាលក្រោយហើយក្រុមស្មាក្ដីរបស់ជនជាប់ចោទខៀវ សំផន នឹងមិនយកមកពិនិត្យនូវឯកសារទាំងនោះទេ។ «ដូចជាអង្គហេតុដែលជាប់ពាក់ព័ន្ធទៅនឹងសហការ អង្គហេតុពាក់ព័ន្ធទៅនឹងការដ្ឋាន ពាក់ព័ន្ធទៅនឹងមន្ទីរសន្តិសុខ កន្លែងសម្លាប់មនុស្ស ឬអង្គហេតុពាក់ព័ន្ធទៅនឹងការផ្លាស់ប្តូរលំនៅប្រជាពលរដ្ឋ ដែលត្រូវយកទៅដាក់នៅក្នុងដំណាក់កាលទី៣ មិនត្រូវលើកយកដេញដោលនៅក្នុងពេលជំនុំជម្រះនៅពេលដំបូងនេះទេ»។ សហមេធាវីសញ្ជាតិបារាំង លោកស្រី អង់តា ហ្គីសេ (Anta Guissé) បានច្រានចោលឯកសារជាខ្សែអាត់សំឡេង និងឈុតវីដេអូរបស់ក្រុមអ្នកជំនាញរួមទាំងឯកសារមួយចំនួនទៀត ដែលលោកស្រីគិតថាមិនមានភាពគួរឲ្យជឿជាក់បានក្នុងនោះមានទាំងឯកសារពីមជ្ឈមណ្ឌលឯកសារកម្ពុជារបស់លោក ឆាំង យុ និងឯកសារ ដែលផ្ដល់ដោយប្រទេសវៀតណាម និងប្រទេសស៊ុយអែត។ កាលពីថ្ងៃច័ន្ទម្សិលម៉ិញនេះ ក្រុមមេធាវីការពាររបស់នួន ជា អតីតប្រធានសភាខ្មែរក្រហម និងមេធាវីរបស់អៀង សារី អតីតឧបនាយករដ្ឋមន្ដ្រី និងជារដ្ឋមន្ដ្រីការបរទេសខ្មែរក្រហមបានធ្វើការប្រឆាំងជំទាស់យ៉ាងខ្លាំងក្លាទៅលើការប្រើប្រាស់ឯកសារនោះដែរ។ យ៉ាងណាក៏ដោយក្រុមសហព្រះរាជអាជ្ញា បានធ្វើការការពារឯកសាររបស់ខ្លួនដោយបកស្រាយមួយចំណុចម្ដងមួយចំណុចម្ដងនូវការជំទាស់របស់ក្រុមមេធាវី នៃជនជាប់ចោទទាំងបី។ លោក វ៉េង ហួត សហព្រះរាជអាជ្ញាកម្ពុជាបានសំអាងថា ឯកសារនីមួយៗ ដែលស្នើដោយការិយាល័យសហព្រះរាជអាជ្ញាមានភាពជាប់ពាក់ព័ន្ធទៅនឹងអង្គសេចក្តីនៃការជំនុំជម្រះ នៅពេលនេះ។ «ព័ត៌មានទាំងអស់នេះ វាលើសពីគ្រប់គ្រាន់ទៅទៀត ដើម្បីកំណត់ពីភាពពាក់ព័ន្ធ ភាពជឿទុកចិត្តបាន និងយថាភាពនៃឯកសារទាំងអស់ ដែលយើងខ្ញុំបានស្នើឡើងសម្រាប់សវនាការ ក្នុងដំណាក់កាលដំបូងនេះ»។ ជាមួយគ្នានេះដែរសហព្រះរាជអាជ្ញាអន្ដរជាតិ លោក តារីក អាប់ឌុលឡាក់ (Tarik Abdulhak) បានការពារបន្ថែមលើ ឯកសាររបស់សហព្រះរាជអាជ្ញាទាក់ទងទៅនឹងរចនាសម្ព័ន្ធនៃរបបកម្ពុជាប្រជាធិបតេយ្យ តួនាទីរបស់ជនជាប់ចោទក្នុងការបង្កើតរបបនេះនិងតួនាទីរបស់ពួកគេក្នុងការដឹកនាំរដ្ឋាភិបាល វិសាលភាពនៃអំណាចរបស់ពួកគេ រួមទាំងប្រព័ន្ធទំនាក់ទំនងការងាររបស់ជនជាប់ចោទ។ កាលពីថ្ងៃច័ន្ទអង្គជំនុំជម្រះសាលាដំបូងរបស់សាលាក្ដីខ្មែរក្រហម បានបង្ហាញថា ជនជាប់ចោទអៀង សារី ខៀវ សំផន និង នួន ជា មានតួនាទីជាក់លាក់ព្រមទាំងមានការប្រាស្រ័យទាក់ទងការងារគ្នាជាប្រព័ន្ធច្បាស់លាស់ទៀតផង។ ក៏ប៉ុន្ដែជារឿយៗ ខៀវ សំផន និង នួន ជា បានបញ្ជាក់ថា ពួកខ្លួនមានតួនាទីដាច់ដោយឡែកពីគ្នាហើយមិនអាចជ្រៀតជ្រែក ឬដឹងពីការងារ នៃមេដឹកនាំខ្មែរក្រហមដទៃទៀតទេ។ រីឯ អៀង សារី បន្ដរក្សាសិទ្ធិមិនឆ្លើយតបទៅនឹងសំណួរនានាក្នុងពេលសវនាការ៕ This posting includes an audio/video/photo media file: Download Now |
| ជនរងគ្រោះដាក់ពាក្យប្តឹងលោក ឈូក បណ្ឌិតពីបទមនុស្សឃាត Posted: 13 Mar 2012 06:36 PM PDT ជនរងគ្រោះចំនួនពីររូប ក្នុងចំណោមជនរងគ្រោះចំនួនបីរូប ដែលបានទទួលរងរបួសដោយសារតែអំពើការបាញ់ប្រហារកាលពីខែកុម្ភៈ បានទាមទារសំណងជំងឺចិត្តចំនួនជិត១០ម៉ឺនដុល្លារសហរដ្ឋអាមេរិក និងទាមទារឲ្យនាំខ្លួនជនសង្ស័យទៅផ្តន្ទាទោសតាមច្បាប់។ នេះបើតាមពាក្យបណ្តឹងពីរច្បាប់ដាច់ដោយឡែកៗពីគ្នាដែលវីអូអេបានទទួល។ កម្មការិនីទាំងពីររូប គឺកញ្ញា ប៊ុន ចិន្តា អាយុ២១ឆ្នាំ រស់នៅភូមិព្រៃផ្តៅ សង្កាត់ច្រកម្ទេស និងកញ្ញា នុត សាខន អាយុ២៣ឆ្នាំ រស់នៅភូមិស្វាយគុយ នៅថ្ងៃអង្គារនេះ បានសម្រេចដាក់ពាក្យបណ្តឹងជាផ្លូវការទៅកាន់តុលាការខេត្តស្វាយរៀង ប្តឹងប្រឆាំងជំទាស់ទៅនឹងលោក ឈូក បណ្ឌិត អតីតអភិបាលក្រុងបាវិតពីបទមនុស្សឃាត។ នៅក្នុងពាក្យបណ្តឹងនោះបានទាមទារឲ្យលោក ឈូក បណ្ឌិត ផុ្តល់សំណងជំងឺចិត្តពីរ ៤៥.០០០ដុល្លារ រហូតដល់ ៥០.០០០ ដុល្លារសហរដ្ឋអាមេរិកក្នុងម្នាក់ៗ។ ចំណែកឯអ្នកស្រី កែវ នា ដែលរងរបួសស្រាលដោយអំពើបាញ់ប្រហារនេះ មិនបានដាក់ពាក្យបណ្តឹងទេបន្ទាប់ពីបានទទួលប្រាក់ចំនួន ១.០០០ ដុល្លារសហរដ្ឋអាមេរិក ជាថ្នូរមិនដាក់ពាក្យប្តឹង។ កញ្ញា ប៊ុន ចិន្តា ដែលបានទទួលរងរបួសធ្ងន់ធ្ងរជាងគេ ក្នុងចំណោមកម្មការិនីចំនួនបីនាក់នោះ បានមាននិយាយថា លោក ឈូក បណ្ឌិត គឺជាជនសង្ស័យ ដែលបានប្រព្រឹត្តអំពើបាញ់ប្រហារមកលើកញ្ញា និងកម្មករផ្សេងៗទៀត។ កញ្ញាបាននិយាយថា កញ្ញាចង់បានសំណងនេះ ដើម្បីយកមកព្យាបាលរបួស និងនាំខ្លួនជនសង្ស័យទៅផ្តន្ទាទោសតាមច្បាប់។ «ខ្ញុំចង់ឲ្យអ្នកដែលបាញ់ខ្លួនខ្ញុំ ត្រូវបានគេចាប់ខ្លួន។ បើគេចាប់បាន អស់ចិត្តហើយខ្ញុំ»។ លោក ឈូក បណ្ឌិត អតីតអភិបាលក្រុងបាវិត ត្រូវបានគេដកហូតចេញពីមុខតំណែងឲ្យមកបម្រើការងារនៅសាលាខេត្តស្វាយរៀងវិញ។ លោកគឺជាជនសង្ស័យតែម្នាក់គត់ ដែលជាប់ពាក់ព័ន្ធ នឹងការបាញ់ប្រហារដ៏មិនញញើតដៃទៅលើក្រុមកម្មករដែលបានតវ៉ាកាលពីខែកុម្ភៈ។ កញ្ញា នុត សាខន កម្មការិនីម្នាក់ទៀតដែលបានទទួលរងរបួសបាននិយាយថា មានប្រធានភូមិមកចរចាមកឲ្យកញ្ញាចំនួន ១.០០០ ដុល្លារសហរដ្ឋអាមេរិក ដើម្បីបញ្ចប់ពាក្យបណ្តឹង ក៏ប៉ុន្តែកញ្ញាមិនព្រមទទួលទេ។ «ខ្ញុំចង់ឲ្យគាត់ធ្វើម៉េច ធ្វើទៅ។ ខ្ញុំមិនហ៊ានទេ តែខ្ញុំសូមតែលុយព្យាបាលខ្លួនខ្ញុំ។ ចង់គាត់រកយុត្តិធម៌យ៉ាងម៉េចធ្វើទៅ។ ខ្ញុំសូមតែលុយ»។ លោក ហ៊ីង ប៊ុនជា ព្រះរាជអាជ្ញានៃតុលាការខេត្តស្វាយរៀងបាននិយាយថា លោកបានទទួលពាក្យបណ្តឹងរបស់កម្មកររងគ្រោះនោះហើយ។ លោកបានមានប្រសាសន៍ថា លោកកំពុងពិនិត្យពាក្យបណ្តឹងនេះដើម្បីចាត់វិធានការតាមផ្លូវតុលាការ។ «យើងចាត់ការបន្ត ពីព្រោះរឿងនេះនៅក្នុងរឿងតែមួយ។ ទោះបីគាត់មិនប្តឹង ក៏នៅចាត់ការតាមនីតិវិធីអយ្យការ ត្រូវតែដំណើរការទៅ។ គ្រាន់តែថា គាត់ជាដើមបណ្តឹង គាត់ដាក់មកគេនឹងពិចារណា»។ លោក នុត បូពិណ្ណារ័ត្ន អ្នកសម្របសម្រួលអង្គការលីកាដូប្រចាំខេត្តស្វាយរៀង បាននិយាយថា តុលាការត្រូវតែចាំបាច់រកយុត្តិធម៌ដល់ជនរងគ្រោះ។ «បញ្ហានេះ យើងថាទោះបីយ៉ាងណា តុលាការចាំបាច់ត្រូវតែរកយុត្តិធម៌ឲ្យជនរងគ្រោះ។ ហើយអ្វីដែលយើងជឿជាក់ផងនោះ គឺជនរងគ្រោះ គាត់បានដាក់ពាក្យបណ្តឹង ក្នុងនាមគាត់ជាដើមបណ្តឹងរដ្ឋប្បវេណី»។ តុលាការខេត្តស្វាយរៀង គ្រោងនឹងកោះហៅលោក ឈូក បណ្ឌិត ឲ្យចូលមកបំភ្លឺនៅក្នុងតុលាការនៅថ្ងៃទី១៦ ខាងមុខនេះ ពាក់ព័ន្ធនឹងការសង្ស័យបាញ់កម្មករបីនាក់ឲ្យរងរបួស។ ប្រសិនណា តុលាការរកឃើញថា មានទោសកំហុស លោក ឈូក បណ្ឌិត អាចនឹងប្រឈមមុខនឹងការជាប់ពន្ធនាគាររយៈពេល១០ឆ្នាំ រហូតដល់២០ឆ្នាំ តាមក្រមព្រហ្មទណ្ឌថ្មី៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
