VOA News: ព័ត៌មាន: “មន្ត្រីចារកិច្ចកំពូលម្នាក់របស់ប្រទេសកម្ពុជាបានទទួលមរណភាព” plus 5 more |
- មន្ត្រីចារកិច្ចកំពូលម្នាក់របស់ប្រទេសកម្ពុជាបានទទួលមរណភាព
- មន្ត្រីប្រទេសអនុតំបន់ទន្លេមេគង្គរកមធ្យោបាយប្រឆាំងការជួញដូរមនុស្ស
- នួន ជាទទួលស្គាល់គោលនយោបាយខ្លះ តែនៅតែទាមទារឯកសារដើម
- អតីតអ្នករស់នៅបុរីកីឡាបានធ្វើការប្រមូលផ្តុំតវ៉ាឈានដល់ថ្ងៃទី២ហើយ
- អ.ស.ប.និងរដ្ឋាភិបាលរងការរិះគន់ថារាំងស្ទះដល់ដំណើរការរកយុត្តិធម៌
- ព័ត៌មានអន្តរជាតិវីអូអេ ១១ មករា ព្រឹក
| មន្ត្រីចារកិច្ចកំពូលម្នាក់របស់ប្រទេសកម្ពុជាបានទទួលមរណភាព Posted: 11 Jan 2012 12:57 PM PST នាយកកិច្ចការចារកិច្ចគឺឧត្តមសេនីយ៍ឯក ម៉ុល រឿប បានទទួលមរណភាពនៅថ្ងៃពុធនេះដោយសារជំងឺ។ លោកម៉ុល រឿប អគ្គមេបញ្ជាការរងនៃកងយោធពលខេមរភូមិន្ទ បានទទួល ភារកិច្ចជានាយកទីចាត់ការចារកិច្ចយោធាតាំងពីឆ្នាំ១៩៩៧ បន្ថែមពីលើមុខនាទី ជាទីប្រឹក្សាផ្ទាល់របស់លោកនាយករដ្ឋមន្ត្រីហ៊ុន សែន។ លោកមុល រឿបត្រូវគេ អះអាងឲ្យដឹងថា មានជំងឺថ្លើម ទឹកនោមផ្អែម ហើយបានស្លាប់នៅក្នុងមន្ទីរពេទ្យ មួយក្នុងទីក្រុងភ្នំពេញនៅព្រឹកថ្ងៃពុធនេះ។ លោកឧត្តមសេនីយ៍ឯកឈុំ សុជាតិ អ្នកនាំពាក្យក្រសួងការពារជាតិកម្ពុជា បាន ថ្លែងថា លោកឧត្តមសេនីយ៍ម៉ុល រឿប អាយុ៦០ឆ្នាំ បានស្លាប់ដោយសារជំងឺរ៉ាំរ៉ៃរបស់លោក។ លោកបានអះអាងថា មរណភាពរបស់លោកម៉ុល រឿបជាការ បាត់បង់អ្នកតស៊ូម្នាក់ដែលអង់អាច និងធ្លាប់តស៊ូដើម្បីប្រទេសជាតិ។ «នេះជាការបាត់បង់មួយដ៏ធំធេង ដែលកងយោធពលខេមរភូមិន្ទយើងមានការសោកស្តាយជាពន់ពេក»។ ក្រុមមន្ត្រីយោធាកំពូលៗនឹងធ្វើពិធីគោរពវិញ្ញាណក្ខន្ធនៅថ្ងៃស្អែកនៅកន្លែងតម្កល់សពក្នុងនាយកដ្ឋានចារកិច្ច ក្នុងខណ្ឌសែនសុខ រាជធានីភ្នំពេញ៕ This posting includes an audio/video/photo media file: Download Now |
| មន្ត្រីប្រទេសអនុតំបន់ទន្លេមេគង្គរកមធ្យោបាយប្រឆាំងការជួញដូរមនុស្ស Posted: 11 Jan 2012 08:28 AM PST បណ្តាប្រទេសនៅក្នុងអនុតំបន់ទន្លេមេគង្គបានប្រមូលផ្តុំគ្នាក្នុងទីក្រុងភ្នំពេញនៅថៃ្ងពុធនេះដើម្បីរិះរកមធ្យោបាយឲ្យកាន់តែមានប្រសិទិ្ធភាព ដើម្បីពង្រឹងកិច្ចសហប្រតិបតិ្តការអន្តរជាតិលើការស៊ើបអង្កេត និងការផ្តន្ទាទោសពួកជួញដូរមនុស្ស។ អ្នកចូលរួមចំនួន៤៥នាក់មកពីប្រទេសចំនួនប្រាំមួយនៅក្នុងអនុតំបន់ទន្លេមេគង្គ រួមមានប្រទេសកម្ពុជា ប្រទេសចិន ប្រទេសឡាវ ប្រទេសភូមា ប្រទេសថៃ និងប្រទេសវៀតណាម បានចាប់ផ្តើមពិភាក្សាលើប្រធានបទសំខាន់បី នៅក្នុងសិក្ខាសាលារយៈពេលបីថ្ងៃ គឺកិច្ចសហប្រតិបតិ្តការក្រៅផ្លូវការរវាងនគរបាលនៃប្រទេសក្នុងអនុតំបន់ទន្លេមេគង្គ កិច្ចសហប្រតិបតិ្តការផ្លូវការលើផ្នែកច្បាប់ពាក់ព័ន្ធនឹងករណីជួញដូរមនុស្ស និងតួនាទីរបស់ទីភ្នាក់ងារជួយគាំពារជនរងគ្រោះ។ លោកស្រី Lisa Rende Taylor ប្រធានទីប្រឹក្សាបចេ្ចកទេសនៃអង្គការសហប្រជាជាតិ UNIAP បានប្រាប់ក្រុមអ្នករាយការណ៍ព័ត៌មាន នៅក្នុងពេលសម្រាកពិសាកាហ្វេថា តាមការប៉ាន់ស្មាន ប្រជាពលរដ្ឋកម្ពុជាជាង២០០០០នាក់ត្រូវបានគេជួញដូរក្នុងមួយឆ្នាំៗ ហើយតួលេខនេះមានលក្ខណៈស្រដៀងគ្នានឹងបណ្តាប្រទេសក្នុងតំបន់។ លោកស្រី Lisa Rende Taylor បានបញ្ជាក់យ៉ាងដូច្នេះថា៖ «ការជួញដូរមនុស្សនៅកម្ពុជាមានទម្រង់ច្រើនយ៉ាងណាស់។ ដូច្នេះ វាពិបាក មិនអាចគូរទម្រង់តាមតែវិធីមួយប៉ុណ្ណោះទេ។ មានករណីជួញដូរផ្លូវភេទជាច្រើន ព្រមទាំងមានករណីជួញដូរពលកម្មជាច្រើន»។ ការសិក្សារបស់អង្គការសហប្រជាជាតិ UNIAP ក្នុងឆ្នាំ២០០៨ ឆ្នាំ២០០៩ និង២០១០បានរកឃើញថា មានការជួញដូរមនុស្សពីប្រទេសកម្ពុជាទៅប្រទេសថៃច្រើនរាប់រយពាន់នាក់ ដើម្បីស្វែងរកការងារធើ្វ។ លោកស្រី Lisa Rende Taylor បានលើកឡើងថា ប្រជាពលរដ្ឋខែ្មរទាំងនេះអាចនឹងត្រូវគេជួញដូរ និងធើ្វអាជីវកម្មដោយងាយស្រួល។ លោកអង្គ វង្សវឌ្ឍានា រដ្ឋមន្រ្តីក្រសួងយុត្តិធម៌ បានថែ្លងបើកសិក្ខាសាលានេះថា ការឆ្លើយតបថ្នាក់តំបន់ដើម្បីប្រយុទ្ធប្រឆាំងនឹងការជួញដូរមនុស្សគឺជាជម្រើសដ៏មានប្រសិទិ្ធភាពយ៉ាងពិតប្រាកដ។ «ផែនការសកម្មភាពអនុតំបន់ទី៣ ដែលបានចាប់ផ្តើមពីឆ្នាំ២០១១ រហូតដល់ឆ្នាំ២០១៣ ទាមទារឲ្យរដ្ឋជាសមាជិកកំណត់អំពីភាពខ្វះចន្លោះក្នុងការឆ្លើយតប នាពេលបច្ចុប្បន្ន ចំពោះការជួញដូរមនុស្សក្នុងមហាអនុតំបន់ និងចាត់វិធានការដោះស្រាយភាពខ្វះចន្លោះទាំងនោះឲ្យបានប្រសិទិ្ធភាព។ សិក្ខាសាលានាពេលនេះគឺជាឧបករណ៍មួយក្នុងជំហាន ដែលកំពុងអនុវត្តដើម្បីកំណត់ការវិវត្ត ដែលបានធ្វើកន្លងមកក្នុងកិច្ចសហប្រតិបតិ្តការដើម្បីប្រឆាំងអំពើជួញដូរមនុស្ស និងកំណត់វិស័យដែលគួរពង្រឹងបន្ថែម»។ លោកឧត្តមសេនីយ៍ទោ ជីវ ផល្លី អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃដែលបានចូលរួមក្នុងសិក្ខាសាលានេះ បានថែ្លងប្រាប់ក្រុមអ្នករាយការណ៍ព័ត៌មានក្រៅកិច្ចប្រជុំថា ការជួញដូរមនុស្សឆ្លងដែនទៅធើ្វជាអ្នកនេសាទនៅប្រទេសថៃមានសភាពស្ងាត់ ប៉ុន្តែអាជ្ញាធរកម្ពុជានៅតែខំប្រឹងប្រែងទប់ស្កាត់ករណីជួញដូរមនុស្សនេះ។ «សិក្ខាសាលានេះគឺមានសារៈសំខាន់សម្រាប់កិច្ចសហប្រតិបតិ្តការអន្តរជាតិទាក់ទិនទៅនឹងប្រទេសនៅក្នុងអនុតំបន់ទន្លេមេគង្គ ហើយក្នុងការជួយគ្នាទៅវិញទៅមកទាក់ទងទៅនឹងការជួយជនរងគ្រោះ និងការផ្តន្ទាទោសជនល្មើស។ យើងមិនចង់ឲ្យមាននិទណ្ឌភាពក្នុងការជួញដូរមនុស្សនេះទេ»។ ពលករខ្មែរជាង៦០នាក់ ដែលត្រូវបានជួញដូរឲ្យទៅធើ្វជាអ្នកនេសាទនៅប្រទេសថៃ ត្រូវបានបញ្ជូនមកកាន់ប្រទេសកម្ពុជាវិញកាលពីចុងឆ្នាំ២០១១ បន្ទាប់ពីបានឆ្លងដែនខុសច្បាប់ចូលទៅក្នុងប្រទេសឥណ្ឌូនេស៊ី និងត្រូវបានចាប់ខ្លួនដោយអាជ្ញាធរឥណ្ឌូនេស៊ី៕ This posting includes an audio/video/photo media file: Download Now |
| នួន ជាទទួលស្គាល់គោលនយោបាយខ្លះ តែនៅតែទាមទារឯកសារដើម Posted: 11 Jan 2012 07:40 AM PST នួន ជា អតីតបងធំទីពីរនៃរបបខ្មែរក្រហមបានសារភាពនៅថ្ងៃពុធនេះថា ខ្មែរក្រហមបានបង្កើតកងសន្ដិសុខពិសេសដែលសុទ្ធសឹងតែជាកុមារមិនទាន់គ្រប់អាយុសម្រាប់ការពារពួកកម្មាភិបាលនៅក្នុងពេលកំពុងតស៊ូប្រដាប់អាវុធនៅក្នុងព្រៃ។ នួន ជាបានលើកឡើងយ៉ាងដូច្នេះ នៅពេលដែលសហព្រះរាជអាជ្ញារងអាមេរិកកាំង លោកដែល លីហ្ស៊ាក់ (Dale Lysak) បានចោទសួរដេញដោលពីមូលហេតុនៃការជ្រើសរើសកុមារឲ្យធ្វើជាអ្នកការពារផ្នែកសន្ដិសុខ និងការកកើតនៃចលនាប្រដាប់អាវុធ។ ក៏ប៉ុន្ដែអតីតប្រធានសភាខ្មែរក្រហមអាយុ៨៥ឆ្នាំ រូបនេះ បានបដិសេធថា ពួកកុមារទាំងនេះមិនមែនជាក្របខ័ណ្ឌយោធានោះទេ។ «ជាកងការពារកម្មាភិបាលពីដើម ជាកងសម្រាប់ជូនកម្មាភិបាលដើរធ្វើការងារ គ្មានអាវុធអីៗទេ។ ដូច្នោះមិនមែនកងយោធានោះទេ។ កុមារក្មេងអស់នេះ វាឃ្វាលគោផង ហើយវាជួយមើលកម្មាភិបាលផង។ ជាកូនចៅរបស់គេ បងប្អូនរបស់គេ។ គេការពារបងប្អូនគេ។ បើតាមខ្ញុំចាំ អាយុពី១៤ ១៥ឆ្នាំ»។ អង្គុយនៅលើរទេះរុញ នួន ជា ដែលបាក់ធ្មេញស្ទើរតែគ្មានសល់មួយគ្រាប់បានបង្ហាញការខឹងច្រឡោតចំពោះការចោទសួររបស់សហព្រះរាជអាជ្ញាអាមេរិកាំងម្ដងៗ រួមទាំងធ្វើការវាយបកទៅលើសហព្រះរាជអាជ្ញាដដែលនេះថា សហព្រះរាជអាជ្ញារងមិនដែលស្គាល់អ្នកក្រ។ នួន ជាបានបដិសេធមិនផ្ដល់ចម្លើយទៅលើឯកសារជាច្រើន ហើយបានធ្វើការទាមទារសារជាថ្មីម្តងទៀត ឲ្យសហព្រះរាជអាជ្ញាផ្ដល់នូវឯកសារដើមជូនគាត់។ យោងតាមលោក Dale Lysak នៅឆ្នាំ១៩៦៦ ពួកខ្មែរក្រហមបានលើកទិសដៅមួយថា ត្រូវតែកម្ទេច និងផ្ដួលរំលំ«ពួកចក្រព័ត្តិអាមេរិក» និងវណ្ណៈជិះជាន់ទាំងអស់ ហើយមានតែចលនាតស៊ូប្រដាប់អាវុធ និងគោលការណ៍នយោបាយទេ ទើបសម្រេចគោលការណ៍នេះបាន។ ក៏ប៉ុន្ដែនួន ជាបានបដិសេធដោយនិយាយថា ពួកខ្មែរក្រហមមានគោលការណ៍តស៊ូធ្វើនយោបាយច្រើនជាងការតស៊ូតាមប្រដាប់អាវុធ។ នួន ជាក៏បានបដិសេធផងដែរគឺមិនព្រមផ្ដល់ចម្លើយថា តើអ្នកណាជាអ្នកសម្រេចជ្រើសរើសកងសន្ដិសុខកុមារទេ ហើយបានបដិសេធមិនព្រមបង្ហាញគោលនយោបាយខ្មែរក្រហមនៅក្នុងការកំណត់គោលដៅសត្រូវរបស់បក្សកុម្មុយនិស្ដរបស់ពួកខ្មែរក្រហមទេ។ ក៏ប៉ុន្ដែនួន ជាបានបង្ហើបថា អ្នកដែលរំខានកិច្ចការផ្ទៃក្នុងនៃចលនាតស៊ូ និងអ្នកដែលត្រូវគេសង្ស័យថា បានផ្ដល់ដំណឹងដល់ការទម្លាក់គ្រាប់បែកបេ៥២ [B-52]គឺជាសត្រូវរបស់ខ្មែរក្រហម។ សូមបញ្ជាក់ថា នួន ជាគឺជាជនជាប់ចោទតែម្នាក់គត់នៅក្នុងចំណោមជនជាប់ចោទបីនាក់នៅក្នុងសំណុំរឿង០០២ ដែលត្រូវបាននាំយកមកកាត់ទោស ហើយត្រូវសួរដេញដោលក្នុងរយៈពេលពីរថ្ងៃជាប់ៗគ្នានេះ។ ដោយឡែក លោកក្លាន ហ្វ៊ីត ដើមបណ្ដឹងរដ្ឋប្បវេណី និងជាអតីតកម្មាភិបាលខ្មែរក្រហមមកពីខេត្តរតនគីរី បានបញ្ចប់ការផ្ដល់សក្ខីកម្មរបស់ខ្លួននៅថ្ងៃនេះដែរ៕ This posting includes an audio/video/photo media file: Download Now |
| អតីតអ្នករស់នៅបុរីកីឡាបានធ្វើការប្រមូលផ្តុំតវ៉ាឈានដល់ថ្ងៃទី២ហើយ Posted: 11 Jan 2012 09:01 AM PST ក្រុមប្រជាពលរដ្ឋជិត១០០នាក់ អតីតអ្នករស់នៅតំបន់បុរីកីឡា បានធ្វើការប្រមូលផ្តុំតវ៉ាឈានដល់ថ្ងៃទី២ ដើម្បីឲ្យរដ្ឋាភិបាលកម្ពុជាជួយធ្វើអន្តរាគមន៍ឲ្យក្រុមហ៊ុនផានអ៊ីម៉ិចរបស់លោកស្រីស៊ុយ ស៊ីផានផ្តល់ទីជម្រកដល់ពួកគេឡើងវិញ និងដោះលែងអ្នកភូមិចំនួនប្រាំបីនាក់ដែលកំពុងជាប់ឃុំឃាំង ឲ្យមានសេរីភាព។ ការតវ៉ានៅថ្ងៃពុធនេះបានធ្វើឡើងនៅក្បែរអគារសាលាក្រុងភ្នំពេញ ដោយក្រុមអ្នកតវ៉ាបានស្រែកតាមឧគ្ឃោសនស័ព្ទបំពងសម្លេង និងកាន់បដាជាច្រើនផ្ទាំង។ ក្រុមអ្នកតវ៉ា និងអាជ្ញាធរប៉ូលិសបានឈានទៅដល់ការផ្ទុះអំពើហិង្សាសារជាថ្មីម្តងទៀត ដោយសារតែអាជ្ញាធរប៉ូលិសបានព្យាយាមរុញច្រានមិនឲ្យប្រជាពលរដ្ឋតវ៉ា។ ក៏ប៉ុន្តែក្រុមអ្នកស្រុកបានប្រឆាំងជំទាស់។ ក្រុមមន្ត្រីសិទ្ធិមនុស្ស និងសាក្សីឃើញផ្ទាល់ភ្នែកបាននិយាយថាយ៉ាងតិចមានក្រុមបាតុករម្នាក់បានដួលសន្លប់នៅក្នុងការប៉ះទង្គិចគ្នានោះ ក៏ប៉ុន្តែពុំមានអ្នកទទួលរងរបួសទេ។ អ្នកស្រីខៀវ ឡៃ អាយុ៤៨ឆ្នាំ ដែលបានដឹងខ្លួនឡើងវិញក្រោយពីបានដួលសន្លប់នោះ បាននិយាយថា អ្នកស្រីត្រូវបានកម្លាំងប៉ូលិសរុញច្រានពេញទំហឹង រហូតដល់អ្នកស្រីបានដួលលើថ្នល់កៅស៊ូជាមួយនិងអ្នកភូមិផ្សេងទៀត។ អ្នកស្រីបាននិយាយថា អ្នកស្រីត្រូវបានក្រុមបាតុករជួយធ្វើចលនាដង្ហើម និងកោសខ្យល់ រហូតដល់អ្នកស្រីបានដឹងខ្លួនឡើងវិញ។ «ដំបូងបង្អស់ ខ្ញុំឃើញគេច្រានកូនក្មេង ខ្ញុំក៏កន្រ្តាក់កូនក្មេងមក។ ខ្ញុំចូលទៅកន្ត្រាក់ហ្នឹង គេរុញខ្ញុំថែមទៀត ហើយខ្ញុំរើសស្បែកជើងខ្ញុំ។ គេឥតឲ្យខ្ញុំចូល។ គេរុញខ្ញុំច្រានដួល ប្រទាញប្រទង់លើគ្នាហ្នឹង រួចខ្ញុំវាខ្សោយបេះដូងផង ខ្ញុំគាំងទៅ»។ ក្រុមអាជ្ញាធរបានហៅរថយន្តពេទ្យដើម្បីសង្គ្រោះបន្ទាន់ ក៏ប៉ុន្តែនៅពេលដែលរថយន្តមកដល់ប្រជាពលរដ្ឋបានបដិសេធមិនឲ្យដឹកជនរងគ្រោះទៅកាន់មន្ទីរពេទ្យទេ។ ក្នុងការតវ៉ានៅថ្ងៃពុធនេះ ក្រុមបាតុករមិនដើរក្បួនដូចថ្ងៃអង្គារទេ ដោយឈរស្រែកនៅនឹងកន្លែងតែប៉ុណ្ណោះ។ «ពួកយើងទាំងអស់គ្នាមកទាមទារ ដើម្បីឲ្យក្រុមហ៊ុនសាងសង់ផ្ទះឲ្យយើង»។ កុមារីហេង យូ អាយុ១០ឆ្នាំ រៀននៅសាលាបឋមសិក្សាបាក់ទូក ដែលកំពុងឈរកាន់បដាជាមួយនិងបាតុករផ្សេងទៀត បាននិយាយថា ប្អូនស្រីលែងមានអារម្មណ៍នៅក្នុងការសិក្សាហើយ ក្រោយពីផ្ទះសម្បែងបានបាត់បង់។ «ព្រោះអីខ្ញុំបានបាត់បង់ផ្ទះ កាលពីថ្ងៃទី២៣ គេរុះចោល។ ខ្ញុំឥតបានរៀនសូត្រទេ ហើយខ្ញុំខានទៅរៀនច្រើនថ្ងៃដែរហើយ»។ លោកអំ សំអាត មន្ត្រីផ្នែកស៊ើបអង្កេតរបស់សមាគមសិទ្ធិមនុស្សលីកាដូបានបញ្ជាក់ថា សាលាក្រុងភ្នំពេញ និងរដ្ឋាភិបាលត្រូវតែផ្តល់ទីជម្រកដល់ពួកគេឡើងវិញក្រោយពីបានបាត់បង់កាលពីសប្តាហ៍មុន។ «សាលាក្រុងត្រូវតែដោះស្រាយជូនប្រជាពលរដ្ឋ ជាពិសេសគឺទាក់ទងទៅនឹងអគារទាំង១០។ ប៉ុន្តែសង់តែ៨អញ្ចឹង ទើបធ្វើឲ្យប្រជាពលរដ្ឋមួយចំនួនគាត់មិនមានផ្ទះសម្បែងក្នុងការស្នាក់នៅ ដោយសារតែការសង់អគារមិនគ្រប់នេះ»។ លោកស្រីស៊ុយ ស៊ីផាន ប្រធានក្រុមហ៊ុនផានអ៊ីម៉ិច បានចោទប្រកាន់ប្រជាពលរដ្ឋថា ក្រុមប្រជាពលរដ្ឋមិនមានឯកសាររស់នៅពិតប្រាកដទេ។ អ្នកស្រីបានបញ្ជាក់ថា ការសាងសង់ប្រាំបីអគារ គឺគ្រប់គ្រាន់សម្រាប់ប្រជាពលរដ្ឋរស់នៅហើយ៕ This posting includes an audio/video/photo media file: Download Now |
| អ.ស.ប.និងរដ្ឋាភិបាលរងការរិះគន់ថារាំងស្ទះដល់ដំណើរការរកយុត្តិធម៌ Posted: 10 Jan 2012 04:44 PM PST ក្រុមអ្នកឃ្លាំមើលសាលាក្តីខ្មែរក្រហមបានស្តីបន្ទោសដល់អង្គការសហប្រជាជាតិ និងក្រុមប្រទេសអ្នកផ្តល់ជំនួយ និងរដ្ឋាភិបាលកម្ពុជា ថាបានធ្វើឲ្យមានឧបសគ្គ ដល់ការស្វែងរកយុត្តិធម៌ជូនជនរងគ្រោះ ជាពិសេសសំណុំរឿងបន្ថែម។ សំណុំរឿង០០៣និង០០៤ ដែលរដ្ឋាភិបាលកម្ពុជាមិនចង់ឲ្យកើតមាននោះបានក្លាយជារឿងប្រទាញប្រទង់គ្នាជាថ្មីទៀតរវាងសហចៅក្រមស៊ើបអង្កេតជាតិនិងអន្តរជាតិ។ សហចៅក្រមស៊ើបអង្កេតអន្តរជាតិ ឡូរ៉ង់ កាស្ពែរ អង់ស៊ែរមេ (Laurent Kasper Ansermet) ដែលលោកអគ្គលេខាធិការអ.ស.ប. បាន គីមូន (Ban Ki-Moon) បានតែងតាំងជំនួសលោក ស៊ីកហ្វ្រីដ ប៊្លុង្គ (Siegfried Blunk) ដែលបានលាលែងកាលពីខែតុលាឆ្នាំទៅនោះ មិនត្រូវរដ្ឋាភិបាលកម្ពុជាស្នើតែងតាំងតាមច្បាប់ភ្លាមៗដូចពេលមុនទេ។ លោកសហចៅក្រមស៊ើបអង្កេតបម្រុងរូបនេះត្រូវសហភាគីរបស់លោកគឺ លោកយូ ប៊ុនឡេង នៃភាគីកម្ពុជាស្តីបន្ទោសក្នុងសេចក្តីប្រកាសព័ត៌មានកាលពីថ្ងៃច័ន្ទថា គ្មាននិតីសម្បទាគ្រប់គ្រាន់ឬមិនទាន់មានលក្ខណៈជាចៅក្រមពេញលេញនៅពេលលោកចេញសេចក្តីប្រកាសព័ត៌មានសុំឲ្យសហចៅក្រមជាតិផ្តល់ព័ត៌មានឲ្យបានគ្រប់គ្រាន់អំពីដំណើរការវិវត្តន៍នៃសំណុំរឿង០០៣និង០០៤។ ក្រុមអ្នកឃ្លាំមើលសាលាក្តីខ្មែរក្រហមបានចាត់ទុកថា ភាពអសកម្មរបស់អ.ស.ប. និងក្រុមប្រទេសអ្នកផ្តល់ជំនួយ ហើយនឹងការណ៍ដែលរដ្ឋាភិបាលមិនបានស្នើ តែងតាំងសហចៅក្រមស៊ើបអង្កេតថ្មី ជាការអាក់ខានដល់ការស្វែងរកយុត្តិធម៌ ជូនជនរងគ្រោះ ជាពិសេសធ្វើឲ្យសំណុំរឿង០០៣ និង០០៤ត្រូវជាប់គាំង។ លោកស្រី ឃ្លែរ ដាហ្វ៊ី (Clair Duffy) អ្នកឃ្លាំមើលសាលាក្តីខ្មែរក្រហមនៃអង្គការច្បាប់របស់សហរដ្ឋអាមេរិក ដែលមានមូលដ្ឋាននៅក្នុងទីក្រុងញូវយ៉កហៅកាត់ថា OSJI បានអះអាងថា អ.ស.ប.និងក្រុមប្រទេសអ្នកផ្តល់ជំនួយត្រូវតែជំរុញឲ្យភាគីកម្ពុជាតែងតាំងលោកសហចៅក្រម Laurent Kasper Ansermet ជាប្រញាប់ដើម្បីធ្វើការចំពោះសំណុំរឿងបន្ថែមដែលគេដឹងថាសំណុំរឿង០០៣និង០០៤ ដែលមានអតីតមេដឹកនាំខ្មែរក្រហម៥នាក់ទៀត។ «បញ្ហាពិតជាក់ស្តែងក្នុងរឿងនេះគឺថា អ.ស.ប.និងប្រទេសអ្នកផ្តល់ជំនួយបន្តរក្សាជំហរស្ងប់ស្ងៀមជាសារធារណៈរបស់ខ្លួនចំពោះរឿងរ៉ាវទាំងនេះដែលកំពុងកើតឡើង»។ លោក Martin Nesirky អ្នកនាំពាក្យរបស់លោកអគ្គលេខាធិការអ.ស.ប. មិនធ្វើ អត្ថាធិប្បាយអំពីការខ្វែងគំនិតគ្នារវាងសហចៅក្រមស៊ើបអង្កេតក្នុងសាលាក្តី កាត់ទោសខ្មែរក្រហមតែបានអះអាងយ៉ាងខ្លីប្រាប់វីអូអេកាលពីថ្ងៃច័ន្ទថា លោកបានដឹងពីរឿងរ៉ាវវិវត្តន៍នោះហើយ។ លោកស្រី Clair Duffy នៃអង្គការ OSJI បានចោទប្រកាន់រដ្ឋាភិបាលកម្ពុជាថា បានបង្អាក់ការតែងតាំងលោកសហចៅក្រមអ.ស.ប. Laurent Kasper Ansermet ជាផ្លូវការ ដែលធ្វើឲ្យលោកចៅក្រមរូបនេះគ្មានតួនាទីច្បាស់លាស់ មិនដឹងថាត្រូវ ធ្វើអ្វីនិងមិនធ្វើអ្វីនោះទេ។ «ពីព្រោះពេលនេះ អ្វីដែលកំពុងកើតឡើងគឺសំណុំរឿង០០៣និង០០៤មិនអាច ដំណើរការទៅមុខបាន»។ លោកស្រី Andrea Evans ជានាយិកាផ្នែកច្បាប់នៃអង្គការសិទ្ធិមនុស្សមួយក្នុង សហរដ្ឋអាមេរិកហៅថា The Center for Justice and Accountability (CJA)។ អង្គការអ្នកស្រីបានជួយដល់ជនរងគ្រោះជាច្រើននាក់ពីស.រ.អ.ដើម្បីប្តឹងជនជាប់ចោទក្នុងសំណុំរឿង០០២ដែលកំពុងបន្តត្រូវកាត់ទោស។ លោកស្រី Evans បានអះអាងថា ជារឿងសំខាន់ណាស់ដែលសហចៅក្រមស៊ើបអង្កេតបញ្ចប់កិច្ចការដ៏មានសារៈសំខាន់ និងការស៊ើបអង្កេតរបស់ខ្លួនក្នុងសំណុំរឿង០០៣និង០០៤។ «ប្រសិនបើការស៊ើបអង្កេតមិនដំណើរការ វានឹងផ្តល់សញ្ញាដល់ជនរងគ្រោះនិង អ្នករួចជីវិតថា នយោបាយនិងការជ្រៀតជ្រែកផ្នែកនយោបាយអាចបំបាត់យុត្តិធម៌។ រឿងនោះអាចនឹងជាការប្រមាថដល់អ្នករួចជីវិតដែលរង់ចាំជាង៣០ឆ្នាំ ដើម្បីទទួលយុត្តិធម៌កម្រិតណាមួយនោះ។ វាក៏ជារឿងអាចធ្វើឲ្យខូចខាត ដល់កេរ្តិ៍តំណែលនៃសាលាក្តីកាត់ទោសខ្មែរក្រហម និងខូចខាតដល់កិច្ចខិតខំប្រឹងប្រែងដែលបានធ្វើឡើងក្នុងការនាំខ្លួនជនល្មើសនៃបទឧក្រិដ្ឋឃោរឃៅ នៃរបបខ្មែរក្រហមមកកាត់ទោសពីបទដែលគេបានប្រព្រឹត្ត»។ សំណុំរឿង០០៣និង០០៤មានជនសង្ស័យ៥នាក់ជាកម្មាភិបាលខ្មែរក្រហម ថ្នាក់កណ្តាលដែលសហព្រះរាជអាជ្ញាអន្តរជាតិបានចោទប្រកាន់ជាបឋមថាមាន ជាប់ពាក់ព័ន្ធនឹងបទឧក្រិដ្ឋកម្មធ្ងន់ធ្ងរនានានៅសម័យខ្មែរក្រហមហើយគួរត្រូវនាំខ្លួនមកឃុំឃាំងនិងចោទប្រកាន់ហើយស៊ើបអង្កេត។ ជនសង្ស័យទាំង៥នាក់នោះ មានលោក ស៊ូ ម៉េត យឹម ទិត មាស មុត អោម អាន និង អ្នកស្រីអ៊ឹម ចែម។ នេះបើតាមឯកសារសម្ងាត់ដែលវីអូអេទទួលបានបន្ទាប់ពីត្រូវបណ្តាញផ្សាយព័ត៌មានបរទេសផ្សព្វផ្សាយលើប្រព័ន្ធអ៊ីនធឺណិត។ ជនសង្ស័យ៣នាក់ក្នុងចំណោម៥នាក់ដែលវីអូអេបានជួបជាបន្តបន្ទាប់ថ្មីៗនេះគឺលោក មាស មុត តាអាន និងអ្នកស្រីអ៊ឹម ចែមបានចេញមុខបកស្រាយហើយបដិសេធការចោទប្រកាន់របស់សហព្រះរាជអាជ្ញាបរទេស។ សំណុំរឿងទាំងនេះបានដាក់ដល់សហចៅក្រមស៊ើបអង្កេតតាំងពីឆ្នាំ២០០៨ម្ល៉េះដើម្បីបន្តនីតិវិធីដូចជានាំខ្លួនមកឃុំចោទប្រកាន់តែមិនឃើញមាននីតិវិធីដូច្នោះកើតឡើងទេ។ សហចៅក្រមស៊ើបអង្កេតបរទេសលោក Siegfried Blunk បានដាក់ពាក្យលាឈប់ដោយចោទប្រកាន់ថា មានការជ្រៀតជ្រែកនយោបាយ ពីរដ្ឋាភិបាលកម្ពុជា។ មន្ត្រីរដ្ឋាភិបាលបានបដិសេធដោយចាត់ទុកថាជារឿងមិនចុះសម្រុងផ្ទៃក្នុងរបស់សហចៅក្រម។ លោក Peter Maguire សាស្ត្រាចារ្យនៃមហាវិទ្យាល័យមួយក្នុងប្រទេសអាមេរិក ហើយជាអ្នកសរសេរសៀវភៅអំពីខ្មែរក្រហម Facing Death in Cambodia បានទទួលស្គាល់ថា ក្រុមប្រទេសអ្នកផ្តល់ជំនួយជាធម្មតារក្សាជំហរស្ងប់ស្ងៀម។ ប្រទេសអ្នកផ្តល់ជំនួយទទួលយកអ្វីដែលរដ្ឋាភិបាលកម្ពុជាប្រាប់ ក៏ដូចជាអ.ស.ប.ដែរ។ លោកបានបញ្ជាក់ថា សំណុំរឿង០០៣និង០០៤ រដ្ឋាភិបាលកម្ពុជាបានសម្រេចចិត្តខាងនយោបាយច្បាស់ហើយថា មិនបន្តដំណើរការជំនុំជម្រះ។ «ហើយអ.ស.ប.គ្មានជម្រើសអ្វីក្រៅតែពីទទួលយករឿងនោះ។ ដូច្នេះគំនិតនេះ ទាំងអស់គ្នានឹងចាត់ទុកថាជាការសម្រេចចិត្តផ្លូវច្បាប់ដែលមិនទាក់ទងនឹងរឿងនយោបាយ។ ហើយនោះជារឿងអស់សំណើចដែលខ្ញុំមិនអាចទទួលយកបានទេ»។ ទោះជាយ៉ាងណាក៏ដោយលោក Marguire អះអាងថា ជារឿងដ៏សំខាន់ពេល នេះគឺសាលាក្តីខ្មែរក្រហមត្រូវបញ្ចប់សំណុំរឿង០០២ដែលមានអតីតមេដឹកនាំធំៗ មាន នួន ជា ខៀវ សំផន អៀង សារី ជាដើមនោះ។ លោក Marguire បានលើកយកពាក្យប្រៀបធៀបរបស់លោកមកបញ្ជាក់តាមសម្តីដើមរបស់លោកថា «ដូចខ្ញុំប្រាប់កូនរបស់ខ្ញុំថា ញ៉ាំបាយឲ្យអស់ពីចានសិន មុនទៅរកបង្អែម» ដែលពាក្យនេះមានន័យថា ត្រូវកាត់ទោសសំណុំរឿង០០២ឲ្យចប់សិន មុនចាប់ផ្តើមសំណុំរឿងបន្ទាប់ទៀត៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ១១ មករា ព្រឹក Posted: 10 Jan 2012 10:31 PM PST ចិន៖ តួលេខពាណិជ្ជកម្មថ្មីដែលបានចេញផ្សាយដោយរដ្ឋាភិបាលចិនបង្ហាញថាការរីកលូតលាស់សេដ្ឋកិច្ចក្នុងប្រទេសដែលមានសេដ្ឋកិច្ចធំទី២របស់ពិភពលោកនេះ កំពុងបង្អន់ល្បឿន។ ឥណ្ឌូណេស៊ី៖ ការរំជួយផែនដីដ៏ខ្លាំងមួយបានកើតមានឡើងនៅផ្ទៃទឹកនៃឆ្នេរសមុទ្រភាគខាងលិចកោះស៊ូម៉ាត្រារបស់ឥណ្ឌូណេស៊ី។ ការសិក្សាភូគព្ភសាស្រ្តសហរដ្ឋអាមេរិក បានប្រាប់ឲ្យដឹងថាការរញ្ជួយផែនដីដែលមានកម្លាំង7,3 បានវាយប្រហារកាលនៅថ្ងៃអង្គារនៅជម្រៅដី២៩គីឡូម៉ែត្រ ដែលនៅចម្ងាយ៤២៣គីឡូម៉ែត្រ នៅខេត្តបានដា អាឆេនៃកោះស៊ូម៉ាត្រា។ ភូមា៖ លោកស្រីអោង សានស៊ូជី មេដឹកនាំប្រឆាំងប្រទេសភូមា បានបញ្ជាក់ថាលោកស្រី នឹងឈរឈ្មោះបោះឆ្នោតសភាពិសេសនៅក្នុងការបោះឆ្នោតមួយដែលគេរំពឹងនឹងធ្វើនៅខែមេសាខាងមុខ។ ឥណ្ឌា ៖ ឥណ្ឌានិងអ៊ីស្រាអែលបានសន្យាធ្វើកិច្ចសហប្រតិបត្តិការកាន់តែធំឡើងនៅក្នុងពាណិជ្ជកម្មនិងការប្រយុទ្ធប្រឆាំងភេរវកម្ម។ សហរដ្ឋអាមេរិក៖ ពួកបេក្ខជនប្រធានាធិបតីខាងគណបក្សសាធារណរដ្ឋកំពុងបង្កើនការដាក់សម្ពាធលើអតីតអភិបាលរដ្ឋម៉ាសាឈូសេត គឺលោកមិត រមនី ដែលជាបេក្ខជននាំមុខគេក្នុងការបោះឆ្នោតនៅរដ្ឋញូវហាំស្ហៀរ។ អ៊ីរ៉ង់៖ រដ្ឋមន្រ្តីក្រសួងរតនាគារសហរដ្ឋអាមេរិក លោកធីម៉ូធី ហ្កាយធ័របានអញ្ជើញទៅដល់ទីក្រុងហើយដើម្បីពិភាក្សាដែលមានគោលបំណងជំរុញឲ្យពួកមន្រ្តីចិនគាំទ្រការដាក់ទណ្ឌកម្មរបស់សហរដ្ឋអាមេរិកប្រឆាំងឧស្សាហកម្មប្រេងរបស់អ៊ីរ៉ង់។ អ៊ីតាលី ៖ ក្រុមហ៊ុនសេវាកម្មហិរញ្ញវត្ថុដ៏សំខាន់មួយប្រាប់ឲ្យដឹងថាអ៊ីតាលី ប្រឈមមុខនឹងការកាត់ពិន្ទុឥណទាននៅពេលឆាប់ៗខាងមុខនេះ តែក្រុមហ៊ុននោះ មិនមានផែនការបញ្ចុះពិន្ទុឥណទានកំពូលរបស់បារាំងទេ។ ស៊ីរី៖ ប្រធានាធិបតីស៊ីរី បាសា អាល់អាសាដ បានសន្យាបង្ក្រាបលើពួកភេរវជនដោយប្រើកណ្តាប់ដៃ ហើយកំពុងស្តីបន្ទោសការឃុបឃិតរបស់បរទេសចំពោះការងើបបះបោរប្រឆាំងរដ្ឋាភិបាលរយៈពេល១០ខែនៅក្នុងប្រទេសរបស់លោក។ ប៉ាគីស្ថាន៖ ពួកមន្រ្តីប៉ាគីស្ថាន និយាយថាការផ្ទុះគ្រាប់មួយគ្រាប់នៅជិតព្រំដែនជាមួយប្រទេសអាហ្វហ្គានីស្ថានបានសម្លាប់មនុស្សយ៉ាងហោចណាស់ក៏៣៥នាក់និងធ្វើឲ្យមនុស្ស៦០នាក់ទៀតបានរងរបួសនៅក្នុងការវាយប្រហារដ៏ប្រល័យបំផុតមួយនៅក្នុងតំបន់ពាយ័ព្យអស់រយៈពេលប៉ុន្មានខែមកនេះ។ <!--AV--> This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
