VOA News: ព័ត៌មាន: “មេដឹកនាំខ្មែរក្រហមមិនផ្តល់ចម្លើយ ធ្វើឲ្យសវនាការចប់ទាំងតក់ក្រហល់” plus 4 more |
- មេដឹកនាំខ្មែរក្រហមមិនផ្តល់ចម្លើយ ធ្វើឲ្យសវនាការចប់ទាំងតក់ក្រហល់
- អង្គការសិទ្ធិមនុស្សបារម្ភអំពីការចាប់អ្នកភូមិបុរីកីឡា៣៨នាក់ឃុំឃាំង
- ហេឡូវីអូអេ៖ ការបណ្តេញពលរដ្ឋពីលំនៅដ្ឋានដោយបង្ខំក្នុងប្រទេសកម្ពុជា
- ព័ត៌មានអន្តរជាតិវីអូអេ ១២ មករា ព្រឹក
- ភរិយាសពលោកជា វិជ្ជាអបអរសាទរការធ្វើរូបសំណាកប្តីរបស់អ្នកស្រី
| មេដឹកនាំខ្មែរក្រហមមិនផ្តល់ចម្លើយ ធ្វើឲ្យសវនាការចប់ទាំងតក់ក្រហល់ Posted: 12 Jan 2012 01:13 PM PST ការបដិសេធមិនផ្ដល់ចម្លើយក្នុងសវនាការពីសំណាក់ ខៀវ សំផន អតីតប្រមុខរដ្ឋខ្មែរក្រហម បានធ្វើឲ្យដំណើរការកាត់ទោសក្នុងសំណុំរឿង០០២ ត្រូវផ្អាកនៅមុនពេលកំណត់នៅថ្ងៃព្រហស្បតិ៍នេះ។ ក៏ប៉ុន្ដែអ្នកឃ្លាំមើលដំណើរការកាត់ទោសពួកអតីតមេដឹកនាំខ្មែរក្រហមយល់ថា ការណ៍នេះមិនមែនជាមូលហេតុគួរឲ្យព្រួយបារម្ភនោះទេ។ លោកចៅក្រមនិល ណុន ប្រធានអង្គជំនុំជម្រះសាលាដំបូង បានប្រកាសភ្លាមៗនៅរសៀលនេះ ដោយលើកពេលការកាត់ទោសទៅថ្ងៃច័ន្ទសប្ដាហ៍ក្រោយ ដោយសារតែខៀវ សំផនមិនព្រមឆ្លើយចំពោះសំណួរនានា និងពិសេសសំណួររបស់ចៅក្រមសញ្ជាតិបារាំង លោកJean-Marc Lavergue។ «ដោយហេតុលោកខៀវ សំផនបានរក្សាសិទ្ធិនៅស្ងៀមមិនឆ្លើយតប ដូច្នេះកិច្ចដំណើរការពិភាក្សាដេញដោលនៅថ្ងៃនេះ លឿនលើសពីផែនការ ពេលវេលាដែលបានគ្រោងទុក។ ដូច្នេះអង្គសវនាការគឺត្រូវចប់ត្រឹមប៉ុណ្ណេះ»។ អតីតប្រមុខរដ្ឋនៃរបបកម្ពុជាប្រជាធិបតេយ្យបានលើកឡើងថា អ្វីៗដែលទាក់ទងនឹងកាលប្រវត្តិជាទូទៅនៃរបបដែលខ្លួនធ្លាប់កាន់អំណាចនោះ ខ្លួនបានបកស្រាយកាលពីខែធ្នូរួចទៅហើយ។ «ខ្ញុំអត់មានអីនឹងឆ្លើយទេ ពីព្រោះខ្ញុំបានជម្រាបហើយថា ខ្ញុំមិនទាន់ឆ្លើយសំណួរទេ»។ ខៀវ សំផនគឺជាអតីតមេដឹកនាំខ្មែរក្រហមទីពីរ ដែលបានបដិសេធមិនឆ្លើយតបនឹងសំណួរដេញដោលក្នុងអំឡុងពេលកាត់ទោសក្នុងសប្ដាហ៍នេះ។ នួន ជា អតីតប្រធានសភាខ្មែរក្រហម មិនព្រមឆ្លើយនឹងសំណួរនានារបស់សហព្រះរាជអាជ្ញារងអន្តរជាតិរហូតមកទល់ថ្ងៃនេះ ដោយសារតែសហព្រះរាជអាជ្ញាបរទេសបានយកឯកសារចម្លងធ្វើជាគោល។ ប៉ុន្ដែលោកចៅក្រមនិល ណុនបានបង្គាប់ឲ្យមានការចោទសួរបន្ដ បើទោះបីជានួន ជា បានបដិសេធមិនឆ្លើយតបសំណួរមួយចំនួនក៏ដោយ។ ដោយឡែក អៀង សារី អតីតរដ្ឋមន្ដ្រីការបរទេសខ្មែរក្រហម បានប្រកាសតាំងតែពីដំបូងទីម៉្លេះថា ខ្លួននឹងមិនឆ្លើយសំណួរណាមួយក្នុងការកាត់ទោសនេះទេ។ ដោយឡែកអៀង ធីរិទ្ធ ដែលជាអតីតរដ្ឋមន្ដ្រីក្រសួងសង្គមកិច្ចជាប់ចោទក្នុងសំណុំរឿង០០២ នេះដែរ ត្រូវតុលាការរកឃើញថា មានបញ្ហាសុខភាពធ្ងន់ធ្ងរ ហើយត្រូវបន្ដធ្វើការព្យាបាលមួយរយៈថែមទៀត។ អតីតមេដឹកនាំកំពូលខ្មែក្រហមទាំងបីនាក់ជាប់ចោទពីបទឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ និងបទប្រល័យពូជសាសន៍ទាក់ទងនឹងការស្លាប់របស់ប្រជាពលរដ្ឋកម្ពុជាយ៉ាងតិច១,៧លាននាក់ចន្លោះពីឆ្នាំ១៩៧៥ និងឆ្នាំ១៩៧៩។ លោកបណ្ឌិត ឡៅ ម៉ុងហៃ អ្នកវិភាគឯករាជ្យ ដែលបានតាមដានការកាត់ទោសដោយផ្ទាល់មានប្រសាសន៍ថា ការណ៍ដែលអតីតមេដឹកនាំខ្មែរក្រហមមិនឆ្លើយនឹងសំណួរផ្សេងៗក្នុងការកាត់ទោសនោះគឺជាការបង្ហាញការលាក់លៀមមួយផ្នែកទាក់ទងនឹងឧក្រិដ្ឋកម្មដែលបានកើតឡើង។ «កាលណាមិនសហការមានន័យថា មានអ្វីលាក់លៀមខ្លះ ឬក៏ចង់ឲ្យមានការលំបាកដល់ដំណើរការតុលាការ។ ក៏ប៉ុន្ដែមិនមែនជាឧបសគ្គឲ្យរាំងស្ទះទេ»។ នៅក្នុងការកាត់ទោសបីថ្ងៃមកនេះ សហព្រះរាជអាជ្ញាបរទេសចោទសួរច្រើនលើនួន ជាទាក់ទងនឹងកំណើតនៃការងើបឡើងបះបោររបស់ពួកខ្មែរក្រហម ការបង្កើតរចនាសម្ព័ន្ធដឹកនាំ ការបែងចែកការទទួលខុសត្រូវ ការបែងចែកតំបន់គ្រប់គ្រង កិច្ចប្រជុំរបស់បក្សកុម្មុយនិស្ដកម្ពុជារបស់ពួកខ្មែរក្រហម ការបង្កើតកងសន្ដិសុខពិសេស និងការបង្កើតមន្ទីរឃុំឃាំងជាដើម។ ភាគច្រើននៃចម្លើយរបស់ នួន ជា គឺគាត់មិនដឹង ឬគាត់មិនចងចាំនូវព្រឹត្តិការណ៍មួយចំនួន គាត់មិនស្គាល់កន្លែងជាដើម។ នួន ជាក៏បានអះអាងថា គាត់មិនដឹងពីការសម្រេចបង្កើតមន្ទីរឃុំឃាំងនៅមុនពួកខ្មែរក្រហមឡើងកាន់អំណាចទេ ប៉ុន្ដែបានទទួលស្គាល់ថា មានការតាមស៊ើបអង្កេត និងបោសសម្អាតខ្មាំងផ្ទៃក្នុងចាប់តាំងពីក្នុងចលនាតស៊ូក្នុងព្រៃម្ល៉េះ៕ This posting includes an audio/video/photo media file: Download Now |
| អង្គការសិទ្ធិមនុស្សបារម្ភអំពីការចាប់អ្នកភូមិបុរីកីឡា៣៨នាក់ឃុំឃាំង Posted: 12 Jan 2012 05:28 AM PST នៅថ្ងៃព្រហស្បតិ៍នេះ អង្គការសិទិ្ធមនុស្សអន្តរជាតិ AMNESTY INTERNATIONAL និងសម្ព័ន្ធអង្គការសង្គមស៊ីវិលក្នុងស្រុក បានអំពាវនាវឲ្យអាជ្ញាធរទីក្រុងភ្នំពេញដោះលែងអ្នកភូមិបុរីកីឡាចំនួន៣៨នាក់ជាបន្ទាន់ដែលត្រូវបានចាប់ខ្លួនអំពីរឿងជម្លោះដីធ្លី។ ការអំពាវនាវនេះបានធើ្វឡើង បន្ទាប់ពីអ្នកភូមិបុរីកីឡា៣០នាក់ ដែលរួមមានស្រ្តី២៤នាក់ និងកុមារ៦រូប ត្រូវបានឃុំខ្លួននៅមជ្ឈមណ្ឌលសង្គមកិច្ចព្រៃស្ពឺ កាលពីថ្ងៃព្រហស្បតិ៍ ហើយ៨នាក់ទៀតកំពុងជាប់ឃុំនៅពន្ធនាគារព្រៃស និងនៅពន្ធនាគារ PJ (ប៉ូលិសព្រហ្មទណ្ឌ) ដែលត្រូវបានចាប់ខ្លួនកាលពីសបា្តហ៍មុន។ អង្គការ AMNESTY INTERNATIONAL បានសម្តែងការព្រួយបារម្ភចំពោះការចាប់ខ្លួនអ្នកតវ៉ាដោយសន្តិភាពចំនួន៣០នាក់ ដែលឥឡូវនេះត្រូវបានឃុំខ្លួននៅមជ្ឈមណ្ឌលសង្គមកិច្ចព្រៃស្ពឺ។ ក្នុងសេចក្តីថ្លែងការណ៍រួម សម្ព័ន្ធអង្គការមិនមែនរដ្ឋាភិបាលក្នុងស្រុកបានហៅការឃុំខ្លួនអ្នកភូមិបុរីកីឡានៅមជ្ឈមណ្ឌលសង្គមកិច្ចព្រៃស្ពឺនេះ ជាការខុសច្បាប់។ អង្គការ AMNESTY INTERNATIONAL ក៏បានអំពាវនាវឲ្យអាជ្ញាធរទីក្រុងភ្នំពេញដោះលែងអ្នកភូមិបុរីកីឡា៨នាក់សម្រាប់ធើ្វការស៊ើបអងេ្កតបន្ថែមទៀត ហើយកងសន្តិសុខដែលគេរកឃើញថា ទទួលខុសត្រូវចំពោះការប្រើកម្លាំងជ្រុលហួសហេតុ គួរត្រូវព្យួរការងារ និងផ្តន្ទាទោស។ អង្គការ AMNESTY INTERNATIONAL បានទទូចឲ្យក្រុមអាជ្ញាធរធ្វើការស៊ើបអង្កេតឲ្យបានពេញលេញ និងឯករាជ្យនៅក្នុងការបណ្តេញប្រជាពលរដ្ឋប្រមាណ៣០០គ្រួសាររស់នៅសហគមន៍បុរីកីឡាក្នុងទីក្រុងភ្នំពេញកាលពីថ្ងៃទី៣ ខែមករា រួមទាំងមូលហេតុដែលនាំឲ្យមានការបណ្តេញកើតឡើង និងការប្រើកម្លាំងជ្រុលហួសហេតុយ៉ាងជាក់ស្តែងរបស់កងសន្តិសុខ។ អង្គការ AMNESTY INTERNATIONAL បានបញ្ជាក់ក្នុងសេចក្តីថ្លែងការណ៍ថា គ្មានអ្នកឃ្លាំមើលសិទិ្ធមនុស្សណាម្នាក់ត្រូវអនុញ្ញាតឲ្យចូលទៅសួរសុខទុក្ខស្រី្ត និងកុមារ៣០នាក់ នៅក្នុងមជ្ឈមណ្ឌលសង្គមកិច្ចព្រៃស្ពឺ ជាកន្លែងដែលអាជ្ញាធរបានឃុំអ្នកគ្មានផ្ទះសម្បែង អ្នកប្រើគ្រឿងញៀន និងស្រ្តីរកស៊ីផ្លូវភេទ និងជាកន្លែងដែលគេបានរាយការណ៍ថា អ្នកជាប់ឃុំត្រូវបានរំលោភផ្លូវភេទ សម្លាប់ និងគំរាមកំហែងដោយអំពើហិង្សា។ កាលពីថ្ងៃទី៣ ខែមករា ផ្ទះរបស់អ្នកភូមិបុរីកីឡាប្រមាណ៣០០គ្រួសារត្រូវបានបំផ្លាញដោយកម្មករក្រុមហ៊ុនដែលទទួលបានដីនៅក្នុងឆ្នាំ២០០៣។ កងសន្តិសុខបានបាញ់ឧស្ម័នបង្ហូរទឹកភ្នែក និងគ្រាប់ជ័រប្រឆាំងនឹងអ្នកភូមិ ហើយអ្នកភូមិបានគប់ដុំថ្ម ដំបង និងដបទឹកដាក់កងសន្តិសុខ។ ក្នុងអំឡុងការប៉ះទង្គិចគ្នានេះ មនុស្សជាង៦០នាក់ត្រូវបានគេរាយការណ៍ថា បានរងរបួស។ អ្នកស្រីសន ទូច អាយុ៤១ឆ្នាំនៅភូមិ១២ ក្នុងសហគមន៍បុរីកីឡា បានថ្លែងថា៖ «ខ្ញុំសូមអំពាវនាវដល់សម្តេចហ៊ុន សែន សូមឲ្យជួយដោះលែងអ្នកភូមិបុរីកីឡា៣៨នាក់ ដែលត្រូវបានចាប់ឃុំខ្លួនដោយគ្មានទោសកំហុសអី្វទេ ហើយជួយប្រជាពលរដ្ឋទាំងអស់គ្នាឲ្យបានទីជម្រកនៅកន្លែងក្នុងបុរីកីឡានេះ»។ លោកកើត ឆែ នាយករងរដ្ឋបាលនៃសាលារាជធានីភ្នំពេញ មិនបានធើ្វសេចក្តីអត្ថាធិប្បាយទេ ដោយបញ្ជាក់ថា លោកមិនទាន់បានទទួលសេចក្តីថ្លែងការណ៍របស់អង្គការ AMNESTY INTERNATIONAL នេះនៅឡើយទេ។ លោកឡាវ ម៉ុងហៃ អ្នកវិភាគនយោបាយឯករាជ្យ បានថ្លែងថា រដ្ឋាភិបាលគួរតែពិនិត្យពិចារណាលើសេចក្តីថ្លែងការណ៍របស់អង្គការ AMNESTY INTERNATIONALឲ្យបានដិតដល់ ហើយអាជ្ញាធរមិនគួរចាប់ឃុំឃាំងអ្នកភូមិបុរីកីឡាទាំងនេះទេ។ «ភារកិច្ចរបស់រដ្ឋត្រូវដោះស្រាយរឿងហ្នឹង។ ខ្ញុំមើលទៅឃើញដូចទិដ្ឋភាពហ្នឹងមិនខុសឆ្ងាយពីការជន្លៀសឆ្នាំ១៩៧៥។ វាគ្រាន់តែការជន្លៀសនេះខ្នាតតូចប៉ុណ្ណោះ ហើយជន្លៀសគ្នាយកទៅចាក់ចោលអញ្ចឹង ដូចនៅភ្នំបាត។ ការបណ្តេញចេញនេះដូចជាមានភាពឃោរឃៅខ្លាំង»។ លោក ឡាវ ម៉ុងហៃ បានលើកឡើងថា បញ្ហាជម្លោះដីធ្លី និងការបណ្តេញចេញនៅកម្ពុជាបានធើ្វឲ្យជនរងគ្រោះដែលមានជីវភាពក្រីក្រស្រាប់កាន់តែក្រីក្រថែមទៀត៕ This posting includes an audio/video/photo media file: Download Now |
| ហេឡូវីអូអេ៖ ការបណ្តេញពលរដ្ឋពីលំនៅដ្ឋានដោយបង្ខំក្នុងប្រទេសកម្ពុជា Posted: 12 Jan 2012 02:18 PM PST អ្នកភូមិបូរីកីឡាយ៉ាងតិច៣៨នាក់ត្រូវចាប់ខ្លួនជាបន្តបន្ទាប់ ក្រោយពីមានការប៉ះទង្គិចគ្នាជាមួយអាជ្ញាធរពេលតវ៉ានិងមិនព្រមរើចេញពីលំនៅដ្ឋាន។ ហើយអ្នកភូមិជាច្រើនរយគ្រួសារផ្សេងទៀតត្រូវអាជ្ញាធរនិងក្រុមហ៊ុនផានអ៊ីម៉ិចបណ្តេញចេញពីលំនៅដ្ឋានដោយពុំផ្តល់សំណង ទោះបីជាពួកគេមានឯកសារបញ្ជាក់លំនៅដ្ឋានពីអាជ្ញាធរក៏ដោយ។ អ្នកស្រី សន ទូច តំណាងពលរដ្ឋក្នុងភូមិ បូរីកីឡានិងអ្នកស្រី មូរ សុខហួរ អ្នកតំណាងរាស្ត្រនៃគណបក្សសមរង្ស៉ី បានចូលរួមជាវាគ្មិននៃកម្មវិធីហេឡូវីអូអេនៅថ្ងៃព្រហស្បតិ៍ ទី១២ ខែមករា ឆ្នាំ២០១២។ វាគ្មិនទាំងពីរបានអំពាវនាវឲ្យប្រមុខរដ្ឋាភិបាលជួយដោះស្រាយចំពោះការបណ្តេញចេញដោយបង្ខំ ហើយដោះស្រាយសំណងសមរម្យជូនពលរដ្ឋរងគ្រោះ។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី១២ ខែមករា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| ព័ត៌មានអន្តរជាតិវីអូអេ ១២ មករា ព្រឹក Posted: 11 Jan 2012 10:57 PM PST ស៊ីរី៖ លោកប្រធានាធិបតីស៊ីរី បាសា អាល់ អាសាដ បានចេញបង្ហាញខ្លួនដោយកម្រមួយ ហើយបានប្រាប់ក្រុមអ្នកគាំទ្រជាច្រើនពាន់នាក់នៅទីក្រុង ដាម៉ាស ថារដ្ឋាភិបាលលោក នឹងមានជ័យជំនះលើអ្វីដែលលោកហៅថា «ការរួមគំនិតធ្វើអំពើអាក្រក់» មួយនៅពីក្រោយការបះបោរ១០ខែរបស់ក្រុមប្រឆាំង។ អ៊ីរ៉ង់៖ បណ្តាញព័ត៌មានអ៊ីរ៉ង់និយាយថា ការផ្ទុះគ្រាប់បែកមួយនៅក្រុង តេហេរ៉ង់បានសម្លាប់សាស្ត្រាចារ្យសាកលវិទ្យាល័យម្នាក់ ដែលបានធ្វើការជាអ្នកវិទ្យាសាស្រ្តម្នាក់លើកម្មវិធីនុយគ្លេអ៊ែររបស់អ៊ីរ៉ង់ផង។ នីហ្សេរីយ៉ា៖ មេដឹកនាំម្នាក់នៃក្រុមសកម្មប្រយុទ្ធ នីហ្សេរីយ៉ា ឈ្មោះ បូកូ ហារ៉ាម បានសន្យានៅក្នុងខ្សែវីដេអូថ្មីមួយតាមអ៊ីនធឺណេតថានឹងមានការវាយប្រហារច្រើនទៀត។ សហរដ្ឋអាមេរិក៖ អតីតអភិបាលរដ្ឋម៉ាសាឈូសេត លោកមីត រមនី បានលើកយុទ្ធនាការឃោសនាលោកទៅកាន់រដ្ឋការ៉ូលីណាខាងត្បូង ដើម្បីពង្រឹងកិច្ចប្រឹងប្រែងរបស់លោកក្នុងការធានាឲ្យបានទទួលការតែងតាំងរបស់គណបក្សសាធារណរដ្ឋ។ ប៉ាគីស្ថាន៖ មន្រ្តី ប៉ាគីស្ថាននិយាយថា ការវាយប្រហារមួយដោយយន្តហោះឥតអ្នកបើករបស់អាមេរិកបានសម្លាប់ មនុស្សបួននាក់ដែលគេសង្ស័យថាជាជនសកម្មប្រយុទ្ធនៅក្នុងភាគពាយ័ព្យនៃប្រទេស នៅជិតព្រំដែនជាមួយអាហ្វហ្គានីស្ថាន ដែលការវាយប្រហារបែបនេះកើតឡើងជាលើកទីមួយក្នុងពេលពីរខែកន្លងទៅ។ <!--AV--> This posting includes an audio/video/photo media file: Download Now |
| ភរិយាសពលោកជា វិជ្ជាអបអរសាទរការធ្វើរូបសំណាកប្តីរបស់អ្នកស្រី Posted: 12 Jan 2012 07:19 AM PST ភរិយាសពលោកជា វិជ្ជា មេដឹកនាំសហជីពកម្មករដ៏ល្បីល្បាញ គឺអ្នកស្រីជា គឹមនី អបអរសាទរចំពោះការដែលរដ្ឋាភិបាលកម្ពុជាបានផ្តល់រូបសំណាក «វីរបុរស» ជូនស្វាមីរបស់អ្នកស្រី ដោយបានទទូចផងដែរថា រដ្ឋាភិបាលកម្ពុជាចាំបាច់ត្រូវចាប់ខ្លួនឃាតករ ដែលបាញ់សម្លាប់ប្តីអ្នកស្រីមកផ្តន្ទាទោសតាមច្បាប់។ «ប្រពន្ធកូនសព្វថ្ងៃនេះរង់ចាំទាមទារយុត្តិធម៌ ព្រោះអីរឿងរ៉ាវទាំងអស់ហ្នឹងដែលស្លាប់បាត់បង់ទៅហ្នឹងវាយូរហើយ ហើយគ្មានទាន់រកឃាតករអីឃើញទេ»។ នេះជាការ អះអាងរបស់អ្នកស្រីជា គឹមនី តាមទូរស័ព្ទពីប្រទេសហ្វាំងឡង់ជាកន្លែងដែលអ្នកស្រីនិងកូន២នាក់កំពុងជ្រកកោនផ្នែកនយោបាយបន្ទាប់ពីគេបាញ់ស្លាប់លោកជា វិជ្ជា។ អ្នកស្រីបានអះអាងថា ទុក្ខសោក ការស្តាយចំពោះការបាត់បង់ស្វាមីនៅដក់ជាប់ក្នុងអារម្មណ៍ជានិច្ចដែលមិនអាចរសាយចិត្តបាន។ «អ្វីដែលខ្ញុំជួបប្រទះ អ្វីដែលខ្ញុំឃើញគឺវាសាហាវបំផុតសម្រាប់រូបនាងខ្ញុំ សម្រាប់ប្តីខ្ញុំនិងកូនខ្ញុំ។ ខ្ញុំមិនអាចបំភ្លេចបានទេ។ សព្វថ្ងៃខ្ញុំនៅចងចាំ។ ខ្ញុំនៅមានជីវិត ខ្ញុំនឹងទាមទារ រកយុត្តិធម៌ឲ្យឃើញ»។ លោកជា វិជ្ជា មេដឹកនាំសហជីពសេរីកម្មករនៃព្រះរាជាណាចក្រកម្ពុជាដែលជាជើងឯកខាងការស្វែងរកសិទ្ធិសេរីភាពជូនកម្មករ ដោះស្រាយវិវាទរវាងកម្មករ និងថៅកែរោងចក្រ ដឹកនាំបាតុកម្មទាមទារឲ្យរដ្ឋាភិបាលដោះស្រាយប្រាក់ខែកម្មករ និងសុខទុក្ខជូនកម្មករនោះ ត្រូវបានឃាតករមិនស្គាល់មុខបាញ់សម្លាប់កាលពីថ្ងៃ២២ មករាឆ្នាំ២០០៤ នៅជិតវត្តលង្កា ក្នុងរាជធានីភ្នំពេញ។ តែឃាតករមិនត្រូវគេរកឃើញនៅឡើយទេក្នុងរយៈពេល៨ឆ្នាំនេះ។ លោកឧត្តមសេនីយ៍ឯកគាត ចាន់ថារិទ្ធ ប្រធានសេនាធិការ និងជាអ្នកនាំពាក្យនគរបាលជាតិ បានអះអាងថា សំណុំរឿងលោកជា វិជ្ជា លោកមិនមានព័ត៌មានអ្វីថ្មីទេ តែលោកថ្លែងថា ជាទូទៅ អាជ្ញាធរប៉ូលិសនៅតែបន្តរកជនដៃដល់មកផ្តន្ទាទោសតាមច្បាប់ ពេលមានឃាតកម្ម ហើយក៏មិនដែលបិទសំណុំរឿងឡើយ។ «យើងអត់ដែលចោលទេ។ មិនដែលថា មនុស្សស្លាប់មួយទាំងមូល ឧទាហរណ៍សូម្បីតែលោកជា វិជ្ជា ឬក៏អ្នកណាមួយផ្សេងទៀតក៏ដោយ។ មនុស្សស្លាប់ យើងរកឃាតករមិនឃើញ យើងអត់មានសិទ្ធិអីទៅបិទសំណុំរឿងទេ មានតែជំរុញការរកបន្ថែម។ គ្រាន់តែលទ្ធផលរកមិនទាន់ឃើញ។ យើងនៅតែបន្តខិតខំរកឲ្យឃើញ»។ អាជ្ញាធរបានចាប់ខ្លួនជនសង្ស័យពីរនាក់គឺប៊ន សំណាង និងសុខ សំអឿនហើយឃុំខ្លួនពួកគេក្នុងគុកអស់រយៈពេល៥ឆ្នាំ។ តែតុលាការកំពូល កាលពីចុងខែធ្នូឆ្នាំ២០០៨ បានសម្រេចដោះលែងពួកគេទាំងពីរបណ្តោះអាសន្នក្រោយពីរកឃើញថា ជនទាំងពីរមិនមែនជាឃាតករសម្លាប់លោកជា វិជ្ជាពិតប្រាកដ។ ទន្ទឹមគ្នានឹងពេលដែលក្រុមគ្រួសាររង់ចាំអាជ្ញាធរស្វះស្វែងរកឃាតករពិតដែលបានសម្លាប់លោកជា វិជ្ជានោះ លោកនាយករដ្ឋមន្ត្រីហ៊ុន សែនកាលពីថ្ងៃទី៣១ធ្នូ ឆ្នាំ២០១១ បានផ្តល់ការយល់ព្រមចំពោះសំណើស្នើសុំរបស់កម្មករ និងសហជីពសេរីកម្មករផង ដែលសុំឲ្យមានការផ្តល់ទីតាំង និងរូបសំណាកសពលោកជា វិជ្ជា។ លោកហ៊ុន សែនបានធ្វើចំណារផ្ទាល់ដៃរបស់លោកថា «យល់ព្រម»លើលិខិតរបស់លោកជា មុន្នី ប្អូនប្រុសរបស់លោក ជា វិជ្ជា ដែលបន្តវេនជាប្រធានសហជីពសេរីកម្មករបច្ចុប្បន្ន។ នៅក្នុងលិខិតរបស់លោកជា មុន្នីនោះ លោកបានស្នើជាថ្មីបន្ថែមលើការស្នើសុំជាយូរឆ្នាំមកហើយនោះ ជូនទៅលោកនាយករដ្ឋមន្ត្រីហ៊ុន សែនដើម្បីសាងសង់រូបសំណាកលោកជា វិជ្ជានៅទីតាំងសមរម្យណាមួយសម្រាប់រំឭកវិញ្ញាណក្ខន្ធ សម្រាប់រំឭកគុណ ធ្វើពិធីបុណ្យរំឭកខួបតាមប្រពៃណី។ លោកជា មុន្នីដែលនៅតែទទូចឲ្យអាជ្ញាធរចាប់ខ្លួនឃាតករមកផ្តន្ទាទោសនោះ អះអាងថា ការសម្រេចរបស់រដ្ឋាភិបាលជារឿងមានសារៈសំខាន់ណាស់សម្រាប់កម្មករ កម្មការិនី និងជាការទទួលស្គាល់ដល់ការទាមទាររបស់កម្មករ និងកម្មការិនី។ «ការដែលរដ្ឋាភិបាលបានសម្រេចឲ្យនេះ សម្រាប់ខ្ញុំមានន័យថា គឺជាការមើលឃើញថា រដ្ឋាភិបាលចង់បាននូវសន្តិភាព ចង់បាននូវការចូលរួមពីសង្គមស៊ីវិលជាមួយរដ្ឋាភិបាល។ នោះគឺថា ជជែកគ្នា ខុសនិងត្រូវគឺដាក់លើតុជជែកគ្នា»។ ការជជែកគ្នារឿងការសាងសង់នេះនឹងធ្វើបន្ត ក្រោយពីមានសេចក្តីសម្រេច របស់រដ្ឋាភិបាល គឺស.ជ.ណ ដែលណែនាំឲ្យសាលក្រុងភ្នំពេញពិភាក្សារឿងសាងសង់ទីតាំង រូបសំណាកលោកជា វិជ្ជាជិតវត្តលង្កា រាជធានីភ្នំពេញនោះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
