VOA News: ព័ត៌មាន: “អាស៊ានគ្រោងនឹងប្រកាសសេចក្តីថ្លែងការណ៍សិទ្ធិមនុស្សរបស់ខ្លួននៅក្នុងឆ្នាំនេះ” plus 10 more |
- អាស៊ានគ្រោងនឹងប្រកាសសេចក្តីថ្លែងការណ៍សិទ្ធិមនុស្សរបស់ខ្លួននៅក្នុងឆ្នាំនេះ
- ចៅក្រមតុលាការខ្មែរក្រហមប៉ះទង្គិចគ្នាធ្ងន់ៗ ម្តងទៀត
- អ្នកភូមិបុរីកីឡាប្រឈមនឹងការលំបាកនៅទីតាំងថ្មី
- ព័ត៌មានអន្តរជាតិវីអូអេ ៩ មករា យប់
- ហេឡូវីអូអេ៖ ការត្រៀមខ្លួនរបស់យុវជនខ្មែរសម្រាប់ទីផ្សារការងារក្នុងសហគមន៍អាស៊ាន
- ក្បួនដង្ហែរនៃការគោរពវិញ្ញាណក្ខន្ធសពលោកជា វិជ្ជាខួបលើកទី៧
- អាជ្ញាធរខ្មែរប្រមូលខិតប័ណ្ណរិះគន់ថា ថ្ងៃ៧ខែមករាជាថ្ងៃឃាតករយួនបន្តសម្លាប់ខ្មែរ
- ហេឡូវីអូអេ៖ ផលប្រយោជន៍នៃការជ្រើសរើសមេដឹកនាំល្អចេញពីការបោះឆ្នោត
- រថយន្ដម៉ាកអង្គររបស់កម្ពុជាប្រើអាគុយនឹងឈានចូលក្នុងទីផ្សារនៅពាក់កណ្ដាលឆ្នាំ ២០១២
- ហេឡូវីអូអេ៖ ការអនុវត្តនីតិវិធីច្បាប់ចាប់ឃុំខ្លួនមនុស្សនិងតួនាទីមេធាវីនៅកម្ពុជា
- ព័ត៌មានអន្តរជាតិវីអូអេ ៩ មករា ព្រឹក
| អាស៊ានគ្រោងនឹងប្រកាសសេចក្តីថ្លែងការណ៍សិទ្ធិមនុស្សរបស់ខ្លួននៅក្នុងឆ្នាំនេះ Posted: 09 Jan 2012 02:21 PM PST រដ្ឋជាសមាជិកអាស៊ានបានប្តេជ្ញាថា នឹងសម្រេចឲ្យបាននូវសេចក្តីថ្លែងការណ៍ស្តីពីសិទ្ធិមនុស្សអាស៊ាននៅក្នុងឆ្នាំ២០១២នេះ ប្រយោជន៍ដើម្បីពង្រឹងការគោរពសិទ្ធិមនុស្សនៅក្នុងតំបន់ ពិសេសគឺចង់ឲ្យពលរដ្ឋអាស៊ានទាំងអស់មានសិទ្ធិដូចៗគ្នា នេះបើតាមការអះអាងរបស់មន្ត្រីសិទ្ធិមនុស្សរបស់រដ្ឋាភិបាលកម្ពុជា។ លោកទេសរដ្ឋមន្ត្រី ឱម យិនទៀង ប្រធានគណៈកម្មាធិការសិទ្ធិមនុស្សកម្ពុជា និងជាប្រធានរបស់គណៈកម្មការសិទ្ធិមនុស្សអន្តររដ្ឋាភិបាលសិទ្ធិមនុស្សអាស៊ានបានឲ្យដឹងថា សេចក្តីព្រាងសេចក្តីថ្លែងការណ៍នោះត្រូវបានអនុម័តរួចហើយនឹងចាប់ផ្តើមពិភាក្សាគ្នាឲ្យចេញជារូបរាងមួយវគ្គម្តងៗនៅក្នុងកិច្ចប្រជុំរបស់គណៈកម្មការអន្តររដ្ឋាភិបាលសិទ្ធិមនុស្សអាស៊ាន នៅខែក្រោយនៅលេខាធិការដ្ឋានអាស៊ាន នាក្រុងហ្សាកាតា ប្រទេសឥណ្ឌូណេស៊ី បន្ទាប់មកក៏នឹងមានការប្រជុំ៧ដងទៀតដើម្បីធ្វើឲ្យសម្រេចនូវគោលបំណងនេះ។ គណៈកម្មការអន្តររដ្ឋាភិបាលសិទ្ធិមនុស្សអាស៊ាន កាលពីថ្ងៃទី០៨ និងទី០៩ ខែមករានេះ បានបើកកិច្ចប្រជុំលើកទី១១របស់ខ្លួននៅក្នុងខេត្តសៀមរាប ប្រទេសកម្ពុជា ដើម្បីពិនិត្យមើលការរីកចម្រើននានាចំពោះការអនុវត្តវិស័យសិទ្ធិមនុស្សនៅក្នុងតំបន់នេះ ហើយវាក៏ជាកិច្ចប្រជុំលើកទីមួយផងដែររបស់ គណៈកម្មការនេះស្តីអំពីសេចក្តីថ្លែងការណ៍សិទ្ធិមនុស្សអាស៊ាន។ លោកទេសរដ្ឋមន្ត្រីឱម យិនទៀង ប្រធានគណៈកម្មាធិការសិទ្ធិមនុស្សកម្ពុជា មិនបានបញ្ជាក់អំពីកាលបរិច្ឆេទពិតប្រាកដនៃការប្រកាសសេចក្តី ថ្លែងការណ៍នោះទេដោយលោកបានថ្លែងថា៖ «សេចក្តីថ្លែងការណ៍នោះវាជាបញ្ហាមួយសំខាន់តម្រូវឲ្យរដ្ឋាភិបាលប្រទេសមួយៗទទួលស្គាល់ ហើយប្រតិបត្តិតាម។ អាស៊ានប្រកាន់យកគោលការណ៍consensus (ការមូលមតិគ្នា) ការយល់ស្របជាទូទៅ មួយជំទាស់ក៏មិនបានដូច្នេះគោលការណ៍នេះវាលំបាក»។ កាលពីចុងសប្តាហ៍មុន ក្រុមអង្គការសង្គមស៊ីវិលទទួលបន្ទុកផ្នែកសិទ្ធិមនុស្សមួយចំនួនក្នុងប្រទេសកម្ពុជា បានសម្តែងនូវក្តីបារម្ភរបស់ខ្លួនចំពោះ សេចក្តីថ្លែងការណ៍ស្តីពីសិទ្ធិមនុស្សអាស៊ាននេះ ក្រែងថា មិនមានខ្លឹមសារស្របទៅតាមស្តង់ដារអន្តរជាតិ និងមិនមានលក្ខណៈល្អប្រសើរជាងសេចក្តីប្រកាសស្តីពីសិទ្ធិមនុស្សជាសកលរបស់អង្គការសហប្រជាជាតិ។ លោកទេសរដ្ឋមន្ត្រីឱម យិនទៀង ប្រធានគណៈកម្មាធិការសិទ្ធិមនុស្ស កម្ពុជាបានហៅកង្វល់យ៉ាងដូច្នោះថា ជារឿងមិនសមរម្យ និងខុសឆ្គង។ «រដ្ឋជាសមាជិកអាស៊ានបានអនុម័ត បានចុះហត្ថលេខាជារដ្ឋហត្ថលេខីនៃសេចក្តី ថ្លែងការណ៍សកល ដូច្នេះហើយការថ្លែងការណ៍សិទ្ធិមនុស្សអាស៊ានរបស់យើង គឺជាការបង្ហាញនូវឆន្ទៈ និងការអនុវត្តនូវមាគ៌ាសិទ្ធិមនុស្សជាសកល យ៉ាងជាក់ស្តែង។ ដូចនេះយើងអត់មានតិចជាងមុនឬលើសមុនទេគឺយើង ធ្វើឲ្យជាក់ស្តែងជាងមុន ប្រាកដនិយមជាងមុន។ វាមិនមែនជាការយកសេចក្តីថ្លែងការណ៍សិទ្ធិមនុស្សអាស៊ាន ទៅប្រៀបធៀបជាមួយថ្លែងការណ៍របស់អឺរ៉ុប អាហ្រ្វិក ឬអង្គការសហប្រជាជាតិឯណាគឺជាការធ្វើឲ្យជាក់ស្តែង ដូច្នេះពាក្យថាស្តង់ដារវាអត់មានកន្លែងយកមកនិយាយក្នុងចំណុចហ្នឹងទេ»។ លោកបានថ្លែងថា សេចក្តីថ្លែងការណ៍សិទ្ធិមនុស្សសកលរបស់អង្គការ សហប្រជាជាតិមានតម្លៃសម្រាប់ពិភពលោកទាំងមូល ដូច្នេះសេចក្តីថ្លែងការណ៍សិទ្ធិមនុស្សអាស៊ាននឹងមានតម្លៃជាក់ស្តែងសម្រាប់រដ្ឋជាសមាជិកអាស៊ាន។ លោកឱម យិនទៀងបានឲ្យដឹងដែរថា សេចក្តីថ្លែងការណ៍សិទ្ធិមនុស្សអាស៊ាន មុននឹងប្រកាសក៏នឹងមានការធ្វើសិក្ខាសាលាពីរដងផងដែរ ដើម្បីពិគ្រោះនិងទទួលយកនូវមតិនានាពីសង្គមស៊ីវិលនិងស្ថាប័នពាក់ព័ន្ធនានា៕ This posting includes an audio/video/photo media file: Download Now |
| ចៅក្រមតុលាការខ្មែរក្រហមប៉ះទង្គិចគ្នាធ្ងន់ៗ ម្តងទៀត Posted: 09 Jan 2012 02:02 PM PST សហចៅក្រមស៊ើបអង្កេតបម្រុងអន្តរជាតិលោក Laurant Kasper-Ansermet ដែលកំពុងរង់ចាំការតែងតាំងជាផ្លូវការ និងសហចៅក្រមស៊ើបអង្កេតជាតិ លោកយូ ប៊ុនឡេង បានប៉ះទង្គិចគ្នាធ្ងន់ៗម្តងទៀតនៅថ្ងៃច័ន្ទនេះ នៅជុំវិញការស៊ើបអង្កេតសំណុំរឿងបន្ថែម០០៣ និង០០៤។ នៅក្នុងសេចក្តីប្រកាសព័ត៌មានខ្លីមួយ លោកLaurant Kasper-Ansermet បានបង្ហាញថា លោកមានការសោកស្តាយ ដែលលោកយូ ប៊ុនឡេងមិនយល់ព្រមជាមួយរូបលោកនៅក្នុងការបញ្ចេញព័ត៌មានចំពោះសាធរណជន ទាក់ទងទៅនឹងការរីកចម្រើន នៅក្នុងសំណុំរឿង០០៣ និង០០៤។ ការប៉ះទង្គិចនៅក្នុងសំណុំរឿងដូចគ្នានេះបានកើតឡើងម្តងហើយកាលពីដើមខែធ្នូកន្លងទៅ។ ប្រភពនានានៅក្នុងសាលាក្តីខ្មែរក្រហមបង្ហាញថា សហចៅក្រមបម្រុងអន្តរជាតិចង់បង្ហាញពីការស៊ើបអង្កេតបន្តនៅក្នុងសំណើរឿងទាំងពីរនេះដល់ប្រជាពលរដ្ឋកម្ពុជា។ ក៏ប៉ុន្តែសហចៅក្រហមស៊ើបអង្កេតជាតិបានជំទាស់នៅក្នុងរឿងនេះ។ លោកឡាស់អលសិន អ្នកនាំពាក្យសាលាក្តីខ្មែរក្រហមខាងភាគីអង្គការសហប្រជាជាតិ ទទួលស្គាល់ថា មានការខ្វែងគ្នាដូច្នេះមែន។ លោកមានប្រសាសន៍នៅក្នុងនាមសហចៅក្រមស៊ើបអង្កេតបម្រុងអន្តរជាតិថា សហចៅក្រមស៊ើបអង្កេតបម្រុងអន្តរជាតិបានចម្លងសេចក្តីប្រកាសព័ត៌មានមួយចំនួនស្នើដល់លោកយូ ប៊ុនឡេង កាលពីល្ងាចថ្ងៃសុក្រសប្តាហ៍មុនទាក់ទងទៅនឹងសំណុំរឿង០០៣ និង០០៤។ ក៏ប៉ុន្តែលោកយូ ប៊ុនឡេងមិនយល់ស្របនោះទេ។ ភ្លាមៗ នៅថ្ងៃនេះ លោកយូ ប៊ុនឡេង សហចៅក្រមស៊ើបអង្កេតជាតិ បានធ្វើសេចក្តីថ្លែងការណ៍តប ដោយលោកហៅលោកLaurant Kasper-Ansermet ថា បានវាយសំពងរូបលោកពីក្រោយខ្នង ហើយលោកLaurant Kasper-Ansermet មិនទាន់មាននីតិសម្បទាផ្លូវច្បាប់សម្រាប់ធ្វើសេចក្តីសម្រេចណាមួយជាមួយរូបលោកនោះទេ។ កង្វះនីតិសម្បទាផ្លូវច្បាប់ ដែលគេមើលឃើញថា ដោយសារតែលោក Laurant Kasper-Ansermet មិនទាន់ត្រូវបានតែងតាំងជាសហចៅក្រមអន្តរជាតិជាផ្លូវការដោយព្រះមហាក្សត្រនោះទេ។ លោកយូ ប៊ុនឡេងបន្ថែមថា ដៃគូ ដែលមិនទាន់មានភាពស្មើគ្នារបស់លោក ខ្វះការយោគយល់ ហើយបានដើរតួជាអ្នកកាសែត ជាជាងបម្រើតួនាទីជាមន្ត្រីតុលាការ។ វាទំនងជាការឈ្លោះប្រកែកគ្នាឡើងវិញ នៅពេលដែលសហចៅក្រមស៊ើបអង្កេតទាំងពីរចាប់ផ្តើមជជែកគ្នាទៅដល់សំណុំរឿង០០៣ និងសំណុំរឿង០០៤ ដែលរដ្ឋាភិបាលកម្ពុជាធ្លាប់ប្រឆាំងជំទាស់ជាញឹកញាប់។ ក៏ប៉ុន្តែលោកឡាស់អលសិនបានពោលថាការឈ្លោះប្រកែកគ្នាយ៉ាងណានោះត្រូវសេចក្តីប្រកាសព័ត៌មាននៃភាគីទាំងពីរបានបង្ហាញរួចជាស្រេចទៅហើយ។ ដោយឡែកលោកនេត្រ ភក្រ្តា អ្នកនាំពាក្យសាលាក្តីខ្មែរក្រហមខាងភាគីកម្ពុជា មានប្រសាសន៍ថា នោះគឺជាការប្រត្តិបត្តិទៅតាមកន្លងច្បាប់តែប៉ុណ្ណោះ។ «មិនមែនមានន័យថា គឺជាការខ្វែងគំនិតគ្នា ឬមួយគឺជាការឈ្លោះគ្នារវាងសហចៅក្រមស៊ើបអង្កេតទាំងពីរនោះទេ។ ជាការបកស្រាយច្បាប់ ហើយជាការអនុវត្តទៅតាមវិធានផ្ទៃក្នុង ដែលសហចៅក្រមស៊ើបអង្កេតជាតិ គាត់មានសិទ្ធិនៅក្នុងការឆ្លើយតប»។ កាលពីប៉ុន្មានខែមុន សហចៅក្រមស៊ើបអង្កេតសញ្ជាតិអាល្លឺម៉ង់ លោក Siegfried Blunkបានលាលែងពីការងារ បន្ទាប់ពីផ្ទុះរឿងចម្រូងចម្រាសនៅក្នុងការស៊ើបអង្កេតសំណុំរឿងទាំងពីរគឺ០០៣ និង០០៤។ លោកឆាំង យុ នាយកមជ្ឈមណ្ឌលឯកសារកម្ពុជាយល់ថា បញ្ហាចុងក្រោយបង្ហាញថាសហចៅក្រមស៊ើបអង្កេតទាំងពីរនៅក្នុងសាលាក្តីខ្មែរក្រហមមិនមានការសហការគ្នានោះទេ។ លោកឆាំង យុមានប្រសាសន៍ថា គួរតែមានការស៊ើបអង្កេតពីអង្គការសហប្រជាជាតិ និងពីសាលាក្តីទាំងមូលទៅលើការិយាល័យសហចៅក្រមស៊ើបអង្កេត។ «ចាំបាច់ត្រូវតែមានការស៊ើបអង្កេតទៅលើការិយាល័យចៅក្រមស៊ើបអង្កេតនេះទាំងមូលតែម្តង ព្រោះរឿងនេះជារឿងដែលកើតឡើងតភ្ជាប់ពីរឿងមុន ដែលចៅក្រមលោកបានលាលែង។ អញ្ចឹងបើសិនជាយើងមិនដោះស្រាយទេ វានៅតែបន្តរហូត ហើយវាបង្កឲ្យរាំងស្ទះដំណើរការនៃការស៊ើបអង្កេតនានា នៅក្នុងអង្គតុលាការទាំងមូល»។ លោកអង្គលេខាធិការអង្គការសហប្រជាជាតិ ប៉ានគីមូនបានស្នើឈ្មោះ លោកLaurant Kasper-Ansermet ទៅដល់ឧត្តមក្រុមប្រឹក្សាអង្គចៅក្រមដើម្បីតែងតាំងរូបលោកជំនួសលោកSiegfried Blunk។ ក៏ប៉ុន្តែនៅមិនទាន់មានការតែងតាំងជាផ្លូវការណាមួយទេ រហូតមកទល់ពេលនេះ។ ភាគចម្រូងចម្រាសនៅថ្ងៃនេះកើតឡើងស្របពេលដែលអង្គជំនុំជម្រះសាលាដំបូងរបស់សាលាក្តីខ្មែរក្រហមបង្គាប់ឲ្យក្រុមគ្រូពេទ្យ និងអ្នកជំនាញការពិនិត្យទៅលើសុខភាពរបស់ជនជាប់ចោទអៀង ធីរិទ្ធឡើងវិញដើម្បីរក្សាទុករូបគាត់នៅក្នុងការកាត់ទោសសំណុំរឿង០០២។ សាលាដំបូងធ្លាប់បានសម្រេចដោះលែងអៀង ធីរិទ្ធ ដោយសារតែបញ្ហាសុភាពធ្ងន់ធ្ងរ។ ក៏ប៉ុន្តែអង្គជំនុំជម្រះតុលាការកំពូលបានសម្រេចផ្ទុយពីនេះ៕
This posting includes an audio/video/photo media file: Download Now |
| អ្នកភូមិបុរីកីឡាប្រឈមនឹងការលំបាកនៅទីតាំងថ្មី Posted: 09 Jan 2012 10:14 AM PST កាលពីសប្តាហ៍មុន អាជ្ញាធរខ្មែរបានបណ្តេញប្រជាពលរដ្ឋខ្មែរដោយបង្ខំ ចេញពីតំបន់បុរីកីឡា ដើម្បីយកទីតាំងធ្វើការអភិវឌ្ឍរបស់ក្រុមហ៊ុនផានអ៊ីម៉ិច។ ប្រជាពលរដ្ឋ ដែលត្រូវបានបណ្តេញចេញដោយបង្ខំនោះ ត្រូវបានដឹកជញ្ជូនចេញឲ្យទៅរស់នៅតំបន់ភ្នំបាត នៅក្នុងភូមិស្រះពោធិ៍ ឃុំផ្សារដែក ស្រុកពញាឮ ខេត្តកណ្តាល ចម្ងាយប្រមាណជិត៥០គីឡូម៉ែតពីទីក្រុងភ្នំពេញ។ ក្រោយពីត្រូវបានបណ្តេញចេញដោយបង្ខំ និងបានតាំងទីលំនៅថ្មី នៅលើទឹកដី ដែលគ្មានដើមឈើ ប្រព័ន្ធទឹក ភ្លើង សេវាសុខភាព និងសាលារៀនគ្រប់គ្រាន់ ក្រុមប្រជាពលរដ្ឋបានប្រឈមមុខនឹងការបណ្តេញចេញជាលើកទី២ ដោយសារតែចំនួនប្រជាពលរដ្ឋលើសតាមការកំណត់។ យោងតាមមន្ត្រីសិទ្ធិមនុស្សលីកាដូ បានឲ្យដឹងថា មានប្រជាពលរដ្ឋសរុបចំនួន១៩៦គ្រួសារត្រូវបានបណ្តេញចេញពីបុរីកីឡា ហើយបានមករស់នៅតំបន់ភ្នំបាត។ លោកស្រី ស៊ុយ ស៊ីផាន ជាប្រធានក្រុមហ៊ុនផានអ៊ីម៉ិច និងជាដើមចមនៃការបណ្តេញប្រជាពលរដ្ឋចេញដោយបង្ខំពីតំបន់បុរីកីឡាសម្រាប់យកទីតាំងធ្វើការអភិវឌ្ឍ។ លោកស្រីបាននិយាយប្រាប់ក្រុមអ្នកសារព័ត៌មាននៅថ្ងៃច័ន្ទនេះថា លោកស្រីទទួលស្គាល់ប្រជាពលរដ្ឋ ដែលមកតាំងទីលំនៅទីនេះតែ៧៨គ្រួសារតែប៉ុណ្ណោះ ហើយសម្រាប់អ្នកដែលនៅសេសសល់ លោកស្រីមិនទទួលស្គាល់ទេ។ លោកស្រីបានមានប្រសាសន៍ថា លោកស្រីបានផ្តល់ថវិកាចំនួន២០០០០រៀល គឺស្មើនឹង៥ដុល្លារសហរដ្ឋអាមេរិកក្នុងម្នាក់ៗឲ្យប្រជាពលរដ្ឋធ្វើជាសោហ៊ុយចាកចេញពីកន្លែងភ្នំបាត។ «មានឯកសារគ្រប់គ្រាន់ គឺមានតែ៧៨គ្រួសារទេ។ អញ្ចឹងមួយរយជាងហ្នឹង សុទ្ធតែកូនចៅប្រជាពលរដ្ឋដែលបានផ្ទះថ្មីនៅបុរីកីឡាហ្នឹង លោភលន់ចង់បានដីមួយកន្លែងទៀត។ បានផ្ទះហើយ ចង់បានដីមួយទៀត។ អញ្ចឹងហើយមកបន្លំនៅទីហ្នឹង»។ បើតាមគោលការណ៍របស់ក្រុមហ៊ុនផានអ៊ីម៉ិច ក្រុមហ៊ុនគ្រោងនឹងផ្តល់ថវិកាចំនួន៥០ម៉ឺនរៀល គឺស្មើនឹងជាង១០០ដុល្លារសហរដ្ឋអាមេរិក និងផ្តល់ដីមួយឡូត៍ ទំហំបួនម៉ែតគុណនឹងដប់ពីរម៉ែត (៤x១២ម) នៅលើផ្ទៃដីសរុប ដែលមានទំហំ១៨៣០០ម៉ែតការ៉េ នៅតំបន់ភ្នំបាត។ ប្រជាពលរដ្ឋ ដែលត្រូវបានបណ្តេញចេញកាលពីសប្តាហ៍មុន បានថ្លែងប្រាប់វីអូអេសម្លេងសហរដ្ឋអាមេរិកថា ឥឡូវនេះក្រុមហ៊ុនបានកាត់ដីបន្ថែមទៀត ដោយផ្តល់ដោយពួកគេតែបួនម៉ែតគុណនឹងប្រាំបីម៉ែត (៤x៨ម) តែប៉ុណ្ណោះ នៅក្នុងមួយគ្រួសារ។ ចំណែកឯថវិកា៥០ម៉ឺនរៀល ពួកគេពុំទទួលបានទេ។ កំពុងតែអង្គុយដុសកំសៀវដាំទឹក នៅក្បែរតង់ធ្វើពីក្រណាត់ចាស់ៗ លោកពុធ ស៊ីណាត អាយុ៤៧ឆ្នាំ អតីតប្រជាពលរដ្ឋនៅតំបន់បុរីកីឡា បាននិយាយថា លោកពុំទាន់បានដីពិតប្រាកដសម្រាប់ស្នាក់នៅនៅឡើយទេ។ «ខ្ញុំឥតទាន់ដឹងច្បាស់ផង។ ថាមកនេះ គេឲ្យមកសិនទៅ។ ចាំក្រុមហ៊ុនគេដោះស្រាយឲ្យ ក្រោយពេលដែលគេឈូសឆាយរួចហើយ។ គេបង្ខំឲ្យយើងចេញមក អ្នកខ្លះឥតបានដឹងស្អីបន្តិចផង»។ នៅលើដីទំហំជាងមួយហិចតា នៅតំបន់ភ្នំបាត ប្រជាពលរដ្ឋបានចងតង់កៅស៊ូ និងកន្ទេលដើម្បីស្នាក់នៅ។ ពួកគេភាគច្រើនទទួលទានដំណេក ផ្ទាល់ដី ដោយក្រាលកៅស៊ូក្រណាត់ចាស់ៗ និងក្រាលបន្ទះក្តារជាដើម ដោយពុំមានគ្រែសម្រាប់ស្នាក់នៅគ្រប់គ្រាន់ទេ។ ក្រុមហ៊ុនផានអ៊ីម៉ិចរបស់អ្នកស្រីស៊ុយ ស៊ីផានបានបុកអណ្តូងតែពីរប៉ុណ្ណោះ សម្រាប់ប្រជាពលរដ្ឋជាង១០០គ្រួសារស្នាក់នៅទីនោះ។ ក្រុមប្រជាពលរដ្ឋកំពុងប្រឈមមុខនឹងបញ្ហាខ្វះទឹកប្រើប្រាស់ និងជម្ងឺឆ្លង។ កុមារភាគច្រើន មានជម្ងឺផ្តាសាយ ដោយសារតែអាកាសធាតុក្តៅនៅពេលថ្ងៃនិងត្រជាក់នៅពេលយប់។ អ្នកស្រីឌិន ស៊ីដេត អាយុ២៥ឆ្នាំកំពុងបីកូនអាយុ៨ខែនៅនឹងដៃ ក្រោមសំពត់តង់កៅស៊ូចាស់ៗ នៅតំបន់ភ្នំបាត។ អ្នកស្រីបាននិយាយថា កូនរបស់អ្នកស្រី ក៏ដូចជាអ្នកភូមិដទៃផ្សេងទៀត កំពុងតែឆ្លងជម្ងឺគ្រប់ៗគ្នា។ អ្នកស្រីបាននិយាយថា អាជ្ញាធរមិនបានផ្តល់ថ្នាំពេទ្យដល់ពួកគេទេ មានតែអង្គការលីកាដូតែប៉ុណ្ណោះ ដែលបានផ្តល់ថ្នាំពេទ្យដល់ពួកគេ បន្ទាប់ពីការបណ្តេញចេញ។ «វាពិបាកដែរហ្នឹង។ ខ្ញុំមានកូនតូច ពូ! ឥឡូវកូនយំធ្វើទុក្ខ ហើយដីហុយ ដីអីអញ្ចឹងពូ! ហើយណាមួយបន្ទប់ទឹកឥតមាន ហើយទឹកអី ប្រើទឹកអណ្តូង។ ប្រើទឹកអណ្តូង។ កូនតាំងពីមកទីនេះគឺឈឺភ្នែកទៀត»។ លោកញឹប ចាន់ ប្រធានឃុំផ្សារដែក បាននិយាយថា ក្រុមហ៊ុនផានអ៊ីម៉ិចទើបតែមកទិញដីនៅតំបន់ភ្នំបាតនេះ នៅក្នុងអំឡុងខែវិច្ឆិកា ឆ្នាំ២០១១។ លោកបានមានប្រសាសន៍ថា អាជ្ញាធរមានមណ្ឌលសុខភាពនៅក្បែរនោះ ហើយប្រជាពលរដ្ឋអាចទទួលសេវាព្យាបាលជម្ងឺបាន នៅពេលណាដែលពួកគេឈឺ។ «កន្លងទៅហ្នឹង ខ្ញុំបានប្រាប់ជម្រាបជូនគាត់ដែរ។ ពាក់ព័ន្ធនឹងសុខភាពអីហ្នឹង យើងមានមណ្ឌលសុខភាពអីដែរ។ បាទ! វាគ្រាន់តែគាត់ទៅមកប៉ុន្មានថ្ងៃអញ្ចឹង យើងមិនទាន់ចាត់ចែង ថាម៉េចៗទេ»។ លោកអំ សំអាត មន្ត្រីផ្នែកស៊ើបអង្កេតរបស់សមាគមសិទ្ធិមនុស្សលីកាដូ បានមានប្រសាសន៍ថា បន្ទាប់ពីត្រូវបានបណ្តេញចេញពីបុរីកីឡា ប្រជាពលរដ្ឋបានប្រឈមមុខនឹងកង្វះស្បៀងអាហារ កង្វះទឹកសម្រាប់បរិភោគ ជម្រក ហើយកុមារភាគច្រើនកំពុងប្រឈមមុខនឹងជម្ងឺផ្សេងៗ។ «ការបណ្តេញចេញមក ហើយនៅនេះគ្មានហេដ្ឋារចនាសម្ព័ន្ធទាំងអស់ ហើយពេលដែរមកនៅ គឺមិនទាន់បានបែងចែកដីធ្លីសម្រាប់ពួកគាត់សម្រាប់ការរស់នៅនោះទេ។ អញ្ចឹងយើងឃើញថា ការដែលអភិវឌ្ឍរបៀបនេះគឺវាប្រឈមមុខនឹងគ្រោះថ្នាក់ធ្ងន់ធ្ងរណាស់សម្រាប់ប្រជាពលរដ្ឋ»។ ក្រុមហ៊ុនផានអ៊ីម៉ិច ដែលដឹកនាំដោយលោកស្រីស៊ុយ ស៊ីផាន នៅថ្ងៃច័ន្ទនេះ បានចុះចែកអង្គរ នឹងចែកតង់កៅស៊ូដល់ប្រជាពលរដ្ឋ ក៏ប៉ុន្តែក្រុមប្រជាពលរដ្ឋបាននិយាយថា ពួកគេត្រូវការជម្រកស្នាក់នៅសមរម្យ បន្ទាប់ពីការបណ្តេញចេញពីទីតាំងចាស់៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ៩ មករា យប់ Posted: 09 Jan 2012 09:40 AM PST ស.រ.អា៖ លោកស្រី ហ្គាប្រីអេល ហ្គីហ្វហ្វដ (Gabrielle Giffords) សមាជិកាសភាស.រ.អា បានដឹកនាំពិធីដុតទៀនមួយនៅក្នុងក្រុង ធូសុន (Tucson) នៃរដ្ឋអារីហ្សូណា (Arizona) នាប៉ែកនិរតីនៃស.រ.អ.ដើម្បីកំណត់ខួបមួយឆ្នាំនៃការបាញ់កាំភ្លើងដ៏ខ្លាំងក្លាមួយដែលបានបណ្តាលឲ្យមនុស្ស៦នាក់ស្លាប់ ហើយបណ្តាលឱ្យលោកស្រីមានរបួសធ្ងន់ធ្ងរ។ ភូមា៖ ប្រេសិតជាន់ខ្ពស់ស.រ.អាពីរនាក់ បានអញ្ជើញទៅដល់ប្រទេសភូមាហើយ ដើម្បីធ្វើការចរចាជាមួយពួករដ្ឋមន្រ្តីរដ្ឋាភិបាលអំពីកម្មវិធីហិរញ្ញវត្ថុខ្នាតតូច និងបញ្ហាជួញដូរមនុស្ស។ លោក ដេរិក មិចឆែល (Derek Mitchell) ប្រេសិតពិសេសស.រ.អា ទទួលបន្ទុកកិច្ចការប្រទេសភូមា និងលោក លូអីស ដឹ បាកា (Luis Cde Baca) ប្រេសិតស.រ.អាទទួលបន្ទុកបញ្ហាជួញដូរមនុស្សនឹងជួបជាមួយរដ្ឋាភិបាលស៊ីវិលថ្មីរបស់ភូមា។ ម៉ាឡេស៊ី៖ តុលាការជាន់ខ្ពស់នៃប្រទេសម៉ាឡេស៊ី (Malaysia) បានកាត់ក្តីឲ្យមេដឹកនាំគណបក្សប្រឆាំង លោក អានវ៉ា អ៊ីប្រាហ៊ីម (Anwar Ibrahim) រួចខ្លួនពីបទរំលោភសេពសន្ធវៈ។ ចៅក្រមបានសម្រេចនៅថ្ងៃចន្ទនេះថា DNA ដែលបានត្រូវប្រើដោយពួកព្រះរាជអាជ្ញាជាភ័ស្តុតាងដែលមិនអាចជឿទុកចិត្តបានទេ។ ចៅក្រមរូបនេះក៏បាននិយាយដែរថាគ្មានភ័ស្តុតាងដែលគួរឱ្យជឿគ្រប់គ្រាន់ដែលបញ្ជាក់ថាលោក អានវ៉ា បានប្រព្រឹត្តសេពសន្ធវៈជាមួយអតីតសហការីប្រុសម្នាក់របស់លោកនោះទេ។ ស៊ិរី៖ ពួករដ្ឋមន្ត្រីការបរទេសនៃសម្ព័ន្ធអារ៉ាប់បានអំពាវនាវដល់ប្រទេសស៊ិរីឲ្យគោរពតាមកិច្ចព្រមព្រៀងរបស់ខ្លួនដើម្បីបញ្ឈប់អំពើហិង្សាប្រឆាំងនឹងក្រុមបាតុករ ហើយពួកគេបានយល់ព្រមបង្កើនចំនួនពួកអ្នកសង្កេតការដែលអនុលោមទៅតាមផែនការនេះ។ អ៊ីរ៉ង់៖ តុលាការអ៊ីរ៉ង់មួយបានកាត់ទោសប្រហារជីវិតបុរសជនជាតិអាមេរិកាំងម្នាក់ពីបទចារកម្មឲ្យទីភ្នាក់ងារស៊ើបការសម្ងាត់ស.រ.អ. ហៅកាត់ថា ស៊ីអាយអេ (CIA)។ទីភ្នាក់ងារព័ត៌មាន ហ្វាស (Fars) ពាក់កណ្តាលផ្លូវការនៃប្រទេសអ៊ីរ៉ង់បានផ្សាយនៅថ្ងៃចន្ទនេះថា ការកាត់ទោសប្រឆាំងនឹង លោក អាមៀរ ម៉ាហ្សេអ៊ី ហេកម៉ាទី (Amir Mirzaei Hekmati) គឺទាក់ទិននឹងការពាក់ព័ន្ធរបស់គាត់ជាមួយទីភ្នាក់ងារសម្ងាត់ ស៊ីអាយអេ និងកិច្ចសហប្រតិបត្តិការរបស់គាត់ជាមួយ«ប្រទេសជាសត្រូវ»មួយនេះ៕ This posting includes an audio/video/photo media file: Download Now |
| ហេឡូវីអូអេ៖ ការត្រៀមខ្លួនរបស់យុវជនខ្មែរសម្រាប់ទីផ្សារការងារក្នុងសហគមន៍អាស៊ាន Posted: 09 Jan 2012 09:19 AM PST នៅសល់តែបីឆ្នាំទៀតប៉ុណ្ណោះ សហគមន៍អាស៊ាននឹងលេចរូបរាងឡើង។ តើយុវជនខ្មែរអាចទាញយកផលប្រយោជន៍ពីភាពជាប្រធានអាស៊ានរបស់កម្ពុជានៅឆ្នាំនេះ និងរៀបចំខ្លួនយ៉ាងដូចម្តេច ឲ្យបានល្អប្រសើរសម្រាប់ទីផ្សារការងារក្នុងសហគមន៍ដែលមានប្រទេស១០ចូលរួមគ្នានៅឆ្នាំ២០១៥? សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី០៩ ខែមករា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| ក្បួនដង្ហែរនៃការគោរពវិញ្ញាណក្ខន្ធសពលោកជា វិជ្ជាខួបលើកទី៧ Posted: 09 Jan 2012 08:44 AM PST អស់រយៈពេល៦ឆ្នាំកន្លងផុតមកហើយដែលសហជីពសេរីកម្មកររបស់លោកជា មុន្នីតែងតែដើរដង្ហែរក្បួនដោយសន្តិវិធីចេញពីទីស្នាក់ការរបស់ខ្លួនដើម្បីយកកម្រងផ្កាទៅដាក់គោរពវិញ្ញាណក្ខន្ធដល់សពលោកជា វិជ្ជាបងប្រុសរបស់លោកដែលត្រូវបានឃាដករបាញ់សម្លាប់កាលពីខែមករាឆ្នាំ២០០៤ នៅក្បែរតូបលក់កាសែតមួយជិតវត្តល័ង្កា។ ឆ្នាំនេះជាខួបលើកទី៧នៃការស្លាប់បាត់បង់ជីវិតរបស់លោកជា វិជ្ជា។ សម្រាប់លោកជា មុន្នី ប្រធានសហជីពសេរីកម្មករដែលបានឡើងកាន់កាប់មុខតំណែងបន្ទាប់ពីបងប្រុសរបស់លោក បាននិយាយថា ឆ្នាំនេះលោកបានប្តូរពីការដើរក្បួនដង្ហែរមកធ្វើដំណើរតាមរថយន្តនិងម៉ូតូវិញដើម្បីដាក់កម្រងផ្កាគោរពវិញ្ញាណក្ខន្ធដល់បងប្រុសរបស់លោក។ លោកបានមានប្រសាសន៍ថា ការផ្លាស់ផ្តូរជំហរនេះដោយសារតែអំឡុងពេលនេះគណបក្សនយោបាយកំពុងឃោសនាបោះឆ្នោតព្រឹទ្ធសភា។ «បាទ ជាការណ៍ពិតហើយ នៅជិតការបោះឆ្នោតហ្នឹងគឺគេហាមការដើរហែក្បួន។ យើង ជាទូទៅ ខ្ញុំឲ្យថា មានការអនុវត្តច្បាប់។ យើងស្វាគមន៍ឲ្យមានការអនុវត្តច្បាប់ទាំងអស់គ្នា មិនប្រកាន់ថា សហជីព ឬក៏សង្គមស៊ីវិល ឬក៏គណបក្សនយោបាយទេ ឲ្យតែគោរពទាំងអស់គ្នាយើងខ្ញុំគោរពតាម»។ មន្ត្រីតំណាងសហជីពសេរីកម្មករ និងមន្ត្រីសាលាក្រុងភ្នំពេញ កាលពីដើមសប្តាហ៍នេះ បានជួបប្រជុំពិភាក្សាគ្នាស្តីពីការដើរក្បួនដង្ហែរគោរពវិញ្ញាណក្ខន្ធរបស់លោកជា វិជ្ជា។ លោកកើត ឆែ នាយករងរដ្ឋបាលនៃសាលាក្រុងភ្នំពេញ បានមានប្រសាសន៍ថា ភាគីទាំងពីរបានព្រមព្រៀងគ្នាថា នឹងមិនដើរក្បួនដង្ហែរដូចសព្វមួយដងទេ។ «បាទ មានក្នុងកំណត់ហេតុហើយ។ យើងនិយាយគ្នាក្នុងកំណត់ហេតុថានេះជាការព្រមព្រៀង»។ បើទោះបីជាមិនដើរក្បួនដង្ហែរដូចសព្វមួយដងក៏លោកជា មុន្នីបានបញ្ជាក់ថា លោកគ្រោងនឹងដឹកនាំក្រុមសហជីពប្រមាណ១០០នាក់ដើម្បីដាក់កម្រងផ្កាគោរពវិញ្ញណក្ខន្ធដល់សពលោក ជា វិជ្ជា។ លោកជា មុន្នីនៅតែទទូចដល់រដ្ឋាភិបាលឲ្យស្វែងរកឃាដករពិតប្រាកដមកផ្តន្ទាទោសតាមច្បាប់។ លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ ធ្លាប់បានមានប្រសាសន៍ថា ក្រសួងនៅមិនទាន់បានបិទសំណុំរឿងនៃការស៊ើបអង្កេតរបស់ខ្លួននៅឡើយ។ លោកនាយករដ្ឋមន្ត្រីហ៊ុន សែន កាលពីថ្ងៃទី៣១ខែធ្នូកន្លងទៅនេះ បានយល់ព្រមលើចំណារលិខិតមួយរបស់លោកជា មុន្នីនៅក្នុងថ្ងៃតែមួយឲ្យសាងសង់រូបសំណាកលោកជា វិជ្ជា អតិតប្រធានសហជីពសេរីកម្មករដើម្បីគោរពវិញ្ញាណក្ខន្ធនិងការចងចាំគុណូបការៈរបស់លោកជា វិជ្ជា។ ទីស្តីការគណៈរដ្ឋមន្រ្តី កាលពីថ្ងៃទី៣ខែមករានេះ បានចេញសេចក្តីជូនដំណឹង ឬសជណលេខ០៣ ដោយបានបញ្ជាក់ពីការយល់ព្រមរបស់លោកនាយករដ្ឋមន្ត្រីហ៊ុន សែន តាមសំណើរបស់លោកជា មុន្នី។ គណៈរដ្ឋមន្ត្រីក៏បានតម្រូវឲ្យលោកកែប ជុតិមា អភិបាលក្រុងភ្នំពេញរៀបចំកសាងរូបសំណាកដោយពិភាក្សាជាមួយលោកជា មុន្នី។ លោកជា វិជ្ជា អតិតប្រធានសហជីពសេរីកម្មករដ៏ល្បីល្បាញ ត្រូវបានឃាដករចូលបាញ់សម្លាប់យ៉ាងជិតបំផុត កាលពីថ្ងៃទី២២ខែមករាឆ្នាំ២០០៤នៅក្នុងខណៈពេលដែលលោកកំពុងតែអង្គុយអានកាសែតនៅក្បែរវត្តល័ង្កាកណ្តាលទីក្រុងភ្នំពេញ។ បន្ទាប់ពីមានការបាញ់សម្លាប់លោកជា វិជ្ជា អាជ្ញាធររដ្ឋាភិបាលបានចាប់ខ្លួនជនសង្ស័យចំនួនពីររូបគឺលោកប៊ន សំណាង និងលោកសុខ សំអឿនយកមកកាត់ទោសឲ្យជាប់ពន្ធនាគារក្នុងម្នាក់ៗរយៈពេល២០ឆ្នាំ។ លោកប៊ន សំណាងនិងលោកសុខ សំអឿនត្រូវបានតុលាការកំពូលដោះលែងឲ្យនៅក្រៅឃុំកាលពីឆ្នាំ២០០៩ បន្ទាប់ពីមានការរិះគន់ថា ជនជាប់ចោទទាំងពីរជាឃាដករសិប្បនិម្មិត៕ This posting includes an audio/video/photo media file: Download Now |
| អាជ្ញាធរខ្មែរប្រមូលខិតប័ណ្ណរិះគន់ថា ថ្ងៃ៧ខែមករាជាថ្ងៃឃាតករយួនបន្តសម្លាប់ខ្មែរ Posted: 09 Jan 2012 09:07 AM PST អាជ្ញាធរខ្មែរនៅថ្ងៃសៅរ៍នេះបានរឹបអូសខិតប័ណ្ណជាច្រើន រាប់រយសន្លឹកដែលត្រូវបានជនមិនស្គាល់មុខយកទៅបាចកណ្តាលទីក្រុងភ្នំពេញ។ ស្របពេលនិងគណបក្សគ្រប់គ្រងអំណាចរបស់ប្រទេសកម្ពុជាកំពុងប្រារព្ធខួបលើកទី៣៣នៃថ្ងៃជ័យជំនះ៧មករា។ ថ្ងៃ៧មករាឆ្នាំ១៩៧៩គឺជាថ្ងៃដែលគណបក្សប្រជាជនកម្ពុជាបានចាត់ទុកថាប្រទេសកម្ពុជាត្រូវបានរំដោះទាំងស្រុងចេញពីរបបគ្រប់គ្រងដោយពួកខ្មែរក្រហម ចន្លោះពីឆ្នាំ១៩៧៥ដល់ឆ្នាំ១៩៧៩ ហើយជាថ្ងៃកំណើតទី២របស់ប្រជាពលរដ្ឋខ្មែរទូទាំងប្រទេស ដែលបានរស់រានមានជីវិតឡើងវិញ។ ក៏ប៉ុន្តែនៅក្នុងខិតប័ណ្ណដែលVOA សំឡេងសហរដ្ឋអាមេរិកបានទទួលដែលមានរូបសញ្ញាអង្គរវត្តកំពូលបីនិងមានផ្កាយបីជាសម្គាល់ ព្រមទាំងបានសរសេរអក្សរថា «សំឡេងខ្មែរជាតិនិយម»បានដាក់ចំណងជើងថា«ថ្ងៃ៧ខែមករាជាថ្ងៃឃាដករយួនបន្តសម្លាប់ខ្មែរជាលើកទីពីរ»។ ខិតប័ណ្ណនេះបានរៀបរាប់និងវាយប្រហារយ៉ាងខ្លាំងៗទៅលើរបបគ្រប់គ្រងរបស់លោកនាយករដ្ឋមន្រ្តីហ៊ុន សែន និងទាមទារឲ្យឈប់គាំទ្ររបបថ្ងៃ៧ខែមករា ដោយសារតែថ្ងៃ៧ខែមករាបានធ្វើឲ្យខ្មែរស្លាប់ជាបន្តបន្ទាប់ ដូចជាលោកជា វិជ្ជា សម ប៊ុនធឿន និងសកម្មជនគណបក្សសម រង្ស៊ីជាដើម។ ខិតប័ណ្ណទាំងនេះត្រូវបានអាជ្ញាធរខ្មែរប្រទះឃើញនៅវេលាទៀបភ្លឺឈានដល់ថ្ងៃសៅរ៍នេះនៅមុខវត្តបុទម ផ្សារអូរឫស្សី និងទល់មុខផ្ទះលោកនាយករដ្ឋមន្ត្រីហ៊ុន សែន នាវិមានឯករាជ្យ។ គណបក្សប្រជាជនកម្ពុជាបានប្រារព្ធខួប៧ខែមករាយ៉ាងអធឹកអធមនៅទីស្នាក់ការកណ្តាលគណបក្សរបស់ខ្លួនកណ្តាលទីក្រុងភ្នំពេញ។ លោកជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជាបានមានប្រសាសន៍ថា ថ្ងៃនេះជាថ្ងៃប្រវត្តិសាស្រ្តដែលបានផ្ដួលរំលំរបបប៉ុល ពត ឲ្យប្រជាពលរដ្ឋខ្មែរបានរស់រានមានជីវិតទាន់ពេលវេលានិងអនាគតប្រកបទៅដោយក្តីសង្ឃឹម។ គណបក្សប្រឆាំងនៅក្នុងប្រទេសកម្ពុជាដែលរួមមានគណបក្សសម រង្ស៊ី និងគណបក្សសិទ្ធិមនុស្សបានចេញសេចក្តីថ្លែងការណ៍ដាច់ដោយឡែកៗពីគ្នា ដោយបានប្រឆាំងជំទាស់ថ្ងៃ៧ខែមករា។ ពីប្រទេសបារាំង លោកសម រង្ស៊ី មេដឹកនាំគណបក្សប្រឆាំង បានសរសេរតាមសារអេឡិចត្រូនិក ឬអ៊ីមែលមកថា មានតែជនក្បត់ជាតិ ឬក៏ពួកលក់ខ្លួនឲ្យជនក្បត់ជាតិ ឬក៏ការចាញ់ឃោសនាពួកជនក្បត់ជាតិតែប៉ុណ្ណោះដែលអបអរសាទរថ្ងៃ៧មករា។ លោកសម រង្ស៊ីបានបញ្ជាក់ថា ព្រឹត្តិការណ៍នៅក្នុងប្រទេសកម្ពុជារយៈពេល៤០ឆ្នាំកន្លងទៅនេះគឺសុទ្ធតែជាឆាកល្ខោនដែលយួនបានរៀបចំដើម្បីបន្តយោបាយវាតទីរបស់គេ។ គណបក្សសិទ្ធិមនុស្សវិញបាននិយាថាថ្ងៃ១៧ខែមេសាឆ្នាំ១៩៧៥និងថ្ងៃជ័យជំនះ៧ខែកមរាឆ្នាំ១៩៧៩សុទ្ធតែបានមកពីការជួយឧបត្ថម្ភដោយគណបក្សកុម្មុយនីស្តវៀតណាម មកលើគណបក្សកុម្មុយនីស្តខ្មែរទាំងពីរក្រុមដែលកើតចេញពីកុម្មុយនីស្ត ហូជីមីញតែមួយ។ លោកប៉ែន សុវណ្ណ អតីតនាយករដ្ឋមន្ត្រីនៅក្នុងរបបសាធារណរដ្ឋប្រជាមានិតកម្ពុជា បច្ចុប្បន្នលោកជាប្រធានគណៈកម្មាធិការវិន័យគណបក្សសិទ្ធិមនុស្ស បាននិយាយថា ដោយសារតែថ្ងៃ៧ខែមករាបានធ្វើឲ្យបូរណភាពទឹកដីកម្ពុជាបាត់បង់ និងប្រជាពលរដ្ឋខ្មែរជាច្រើននាក់បានស្លាប់ដោយសារតែផែនការក៥។ «បាទ ខ្ញុំឃើញថា ៧មករារហូតមកដល់សព្វថ្ងៃនេះ បើនិយាយពីការឈឺចាប់របស់ប្រជាពលរដ្ឋនៅតែមានអញ្ចឹង។ ទី១គឺបាត់បូរណភាពទឹកដី បាត់អធិបតេយ្យភាព ប្រជាពលរដ្ឋបាត់សិទ្ធិអំណាច ហើយដីធ្លី ដែលរដ្ឋាភិបាលប្រគល់ឲ្យក្រុមហ៊ុនយួននោះគឺមានរាប់សែនហិកតាទៅហើយ»។ លោកផៃ ស៊ីផាន អ្នកនាំពាក្យនិងជារដ្ឋលេខាធិការទីស្តីការគណៈរដ្ឋមន្ត្រីបានជំទាស់ទៅនឹងការចោទប្រកាន់មកលើរដ្ឋាភិបាលជុំវិញថ្ងៃ៧ខែមករា។ «និយាយបំភ្លៃប្រវត្តិសាស្រ្ត។ បើគេនិយាយថ្ងៃ៧ខែមករាជាថ្ងៃរបស់កងទ័ពវៀតណាមមកឈ្លានពានយើងអាចនិយាយបានថា នៅពេលដែលកងទ័ពរបស់សហរដ្ឋអាមេរិកចូលទៅឈ្លានពាននៅប្រទេសអ៊ីរ៉ាក់ប្រជាជាតិអ៊ីរ៉ាក់ម៉េចមិននាំគ្នាវាយប្រហារសហរដ្ឋអាមេរិកថា ជាអ្នកឈ្លានពានដែរទៅ»។ វីអូអេបានព្យាយាមទាក់ទងមន្ត្រីស្ថានទូតវៀតណាមប្រចាំប្រទេសកម្ពុជាដើម្បីសុំការឆ្លើយតប តែមិនអាចសុំទំនាក់ទំនងបានទេ នៅថ្ងៃសៅរ៍នេះ៕ This posting includes an audio/video/photo media file: Download Now |
| ហេឡូវីអូអេ៖ ផលប្រយោជន៍នៃការជ្រើសរើសមេដឹកនាំល្អចេញពីការបោះឆ្នោត Posted: 09 Jan 2012 07:53 AM PST ការបោះឆ្នោតក្នុងប្រទេសកម្ពុជាជាបន្តបន្ទាប់ នៅពេលខាងមុខជាឱកាសមួយដើម្បីឲ្យប្រជាពលរដ្ឋខ្មែរជ្រើសរើសមេដឹកនាំល្អៗ។ បច្ចុប្បន្ននេះមិនដូចជាពេលកន្លងមក ដែលមេដឹកនាំត្រូវគេចាប់ដាក់ឲ្យកាន់អំណាចនោះទេ។ នេះជា អត្ថាធិប្បាយរបស់លោកបណ្ឌិត ឡៅ ម៉ុងហៃ អ្នកវិភាគឯករាជ្យក្នុងប្រទេសកម្ពុជាពេលលោកធ្វើជាវាគ្មិននៃកម្មវិធីហេឡូវីអូអេ នៅរាត្រីថ្ងៃព្រហស្បតិ៍ទី៥ខែមករាឆ្នាំ២០១២ ដែលពិភាក្សាអំពីប្រធានបទស្តីពីផលប្រយោជន៍នៃការ ជ្រើសរើសមេដឹកនាំល្អចេញពីការបោះឆ្នោត។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី០៥ ខែមករា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| រថយន្ដម៉ាកអង្គររបស់កម្ពុជាប្រើអាគុយនឹងឈានចូលក្នុងទីផ្សារនៅពាក់កណ្ដាលឆ្នាំ ២០១២ Posted: 09 Jan 2012 09:49 AM PST រថយន្ដម៉ាកអង្គរ ដែលជាប្រភេទរថយន្ដប្រើអាគុយរបស់កម្ពុជាជាលើកដំបូងគ្រោងនឹងឈានចូលក្នុងទីផ្សារនៅពាក់កណ្ដាលឆ្នាំ ២០១២ នេះ។ ហើយក្នុងពេលនេះមានក្រុមហ៊ុនបស្ចឹមប្រទេសចំនួនបួនបានបង្ហាញការចាប់អារម្មណ៍លើរថយន្ដរបស់កម្ពុជានេះ។ ក្រុមហ៊ុនក្នុងស្រុកមួយដែលមានឈ្មោះថា ហេងអភិវឌ្ឍន៍ ដែលចាប់ដៃគូជាមួយនឹងក្រុមហ៊ុនជូលាងអ៊ីនធើប្រាយចំកាត់ (Chau Leong Enterprise (group) Co,Ltd)មកពីហុងកុងសម្រាប់ផលិតរថយន្ដម៉ាកអង្គរនេះ បានអះអាងថា ខ្លួនកំពុងសាងសង់រោងចក្រផលិត និងដំឡើងរថយន្តនៅក្នុងខេត្តកណ្ដាល។ ហើយការសាងសង់រោងចក្រនឹងត្រូវចប់សព្វគ្រប់នៅក្នុងអំឡុងខែមិនា ឬខែមេសា។ លោកស្រី សៀង ចាន់ហេង អគ្គនាយិកាក្រុមហ៊ុនហេង អភិវឌ្ឍន៍មានប្រសាសន៍ថា រថយន្ដម៉ាកអង្គរចំនួនបួនប្រភេទនឹងចេញបង្ហាញខ្លួនក្នុងពេលឆាប់ៗនេះ។ «និយាយរួមរោងចក្រធ្វើអស់ហើយ គ្រាន់តែនៅចាប់ដំឡើងមកផ្សារដំឡើងប្រក់តែប៉ុណ្ណោះទេ។ ឡានគឺថា ក្នុងខែទី៦នៃឆ្នាំ២០១២ យើងចេញ៤ម៉ូឌែល។ និយាយរួមឧបករណ៍យើងមានទាំងអស់។ យើងមានចាប់ផ្គុំបញ្ចូល។ យើងសព្វថ្ងៃកំពុងតែសារ៉េគ្រឿងអាគុយនិងកែសម្រួលសំបកវាខាងក្រៅបន្តិច»។ ថ្វីបើអ្វីៗភាគច្រើនកំពុងស្ថិតក្នុងគម្រោង លោកស្រីសៀង ចាន់ហេងបានឲ្យដឹងបន្តថា រហូតមកដល់ពេលនេះមានក្រុមហ៊ុនចំនួន៤មកពីសហរដ្ឋអាមេរិក កាណាដា អូស្រ្តាលី និងនូវែសឺឡង់ បានមកទាក់ទងសម្រាប់នាំចូលផ្តាច់មុខទៅប្រទេសទាំងនោះ។ ក្រុមហ៊ុនហេង អភិវឌ្ឍន៍ និងក្រុមហ៊ុនជូលាងអ៊ីនធើប្រាយចំកាត់ (Chau Leong Enterprise (group) Co,Ltd) បានចុះហត្ថលេខាកាលពីចុងខែមិនាឆ្នាំ២០១១កន្លងទៅសម្រាប់ធ្វើការវិនិយោគរួមគ្នា ដើម្បីបង្កើតរថយន្ដអង្គរដែលដើរដោយថាមពលអគ្គិសនី ឬជារថយន្ដប្រើអាគុយ។ ហើយការវិនិយោគនេះគ្រោងនឹងបង្កើនដើមទុនពីចំនួន២០លានដុល្លារអាមេរិកនៅក្នុងដំណាក់កាលដំបូងដល់ចំនួន២០០លានដុល្លារ នៅពេលដែលការផលិតមានការរីកចម្រើន។ រថយន្ដនេះត្រូវបានបង្កើតឡើងដោយលោកញាន ផល្លឹក ដែលជាពលរដ្ឋខ្មែរម្នាក់បានប្រឹងប្រែងតស៊ូស្រាវជ្រាវដោយខ្លួនឯងដើម្បីផលិតរថយន្តតាមការស្រមៃរបស់ខ្លួន។ លោកញាន ផល្លឹកបញ្ជាក់ថា រថយន្តដែលគ្រោងនឹងផលិតចេញក្នុងរយៈពេលប៉ុន្មានខែទៀតនេះមានប្រភេទរថយន្ត២កៅអី មានទំហំបណ្តោយចាប់ពី៣,៣ម៉ែត្រទៅ៣,៥ម៉ែត្រ ទទឹងប្រហែលជា១,៦ម៉ែត្រនិងកម្ពស់ប្រមាណជា១,៤ ម៉ែត្រ។ «ខ្ញុំធ្វើទ្វារគឺបើកខាងលើត្រង់ ហើយយើងធ្វើឡាន៤ម៉ូឌែលនិងធ្វើខុសគ្នាទាំងអស់ អត់ដូចគ្នាទេ។ ហើយទ្វារយើងប្រើស្គេនក្រយៅដៃ បញ្ជេះកុងតាក់ ក៏យើងប្រើក្រយៅដៃដែរ»។ លោកញាន ផល្លឹកបានសារភាពថា រោងចក្រដំឡើងរថយន្ដក្នុងស្រុកមួយនេះមិនទាន់មានការបំពាក់ការត្រួតពិនិត្យលក្ខណៈបច្ចេកទេសដោយខ្លួនឯងនៅឡើយទេ ដូច្នេះក្រុមហ៊ុននឹងត្រូវការចាំបាច់ជួលវិស្វករបរទេស។ តាមគម្រោង រោងចក្រផលិតនិងដំឡើងរថយន្ដអង្គរនេះអាចស្រូបយកកម្លាំងកម្មករជំហានដំបូងប្រមាណជា៣០០នាក់ និងអាចផលិតរថយន្ដធុន ២កៅអី ៤កៅអីបានចំនួនពី៥០០ទៅ១០០០គ្រឿងក្នុងមួយឆ្នាំ ដោយមានតម្លៃទាបបំផុត ចន្លោះពី៥០០០ដុល្លារទៅ១០០០០ដុល្លារក្នុងមួយគ្រឿង។ ជំហានដំបូងក្រុមហ៊ុនចម្រុះនេះនឹងផលិតត្រឹមតែប្រភេទរថយន្តធុនពីរកៅអី ដែលអាចបើកបរក្នុងល្បឿន៨០គីឡូម៉ែត្រក្នុងមួយម៉ោង និងប្រភេទបួនកៅអី ដែលអាចបើកបរក្នុងល្បឿន១២០គីឡូម៉ែត្រក្នុងមួយម៉ោង។ រថយន្ដនេះអាចបើកបរបានចម្ងាយប្រមាណជា៥០០គីឡូម៉ែត្រ ហើយក្នុងករណីដែលរថយន្ដចុះខ្សោយថាមពល ឬអស់ថាមពលអាគុយ គេអាចបញ្ចូលភ្លើងអាគុយឡើងវិញដែលនឹងត្រូវប្រើរយ:ពេលពី៣ ទៅ៦ម៉ោង។ ក៏ប៉ុន្ដែលោកញានផល្លឹកធ្លាប់បានឲ្យដឹងថា រថយន្តប្រើប្រាស់ដោយថាមពលអាគុយនេះនឹងផ្ដល់ផលចំណេញផ្នែកថវិកាប្រមាណជា៨០ភាគរយបើធៀបទៅនឹងរថយន្តប្រើដោយប្រេងឥន្ធនៈ ក្នុងការបើកបរចម្ងាយ១០០គីឡូម៉ែត្រដូចគ្នា។ ទោះជាយ៉ាងនេះក្ដី បញ្ហាប្រឈមមួយសម្រាប់រថយន្ដនេះគឺប្រទេសកម្ពុជាមានបណ្ដាញអគ្គិសនីគ្របដណ្ដប់នៅទូទាំងប្រទេស ទើបតែបានប្រមាណជាង២០ភាគរយតែប៉ុណ្ណោះ ដូច្នេះការស្វែងរកការបញ្ចូលភ្លើងនៅពេលដែលថាមពលអាគុយរថយន្ដចុះខ្សោយនឹងក្លាយជាកង្វល់មួយសម្រាប់អ្នកប្រើប្រាស់។ ក៏ប៉ុន្តែលោកញាន ផល្លឹកបានមានប្រសាសន៍ថា នៅពេលអនាគតក្រុមហ៊ុននឹងបង្កើតស្ថានីយ៍បញ្ចូលភ្លើងអាគុយនៅគ្រប់ទីកន្លែងដើម្បីឲ្យមានភាពងាយស្រួលក្នុងការសាកបញ្ចូលភ្លើង។ ប្រទេសកម្ពុជាគឺជាប្រទេសត្រូវគេមើលឃើញថា តម្លៃប្រេងឥន្ធន:ខ្ពស់ជាងប្រទេសជិតខាង និងមានការប្រែប្រួលយ៉ាងឆាប់រហ័ស។ នៅប្រទេសកម្ពុជាមានរថយន្ដចុះបញ្ជីផ្លូវការសរុបចំនួនជាង៤០០០០០ គ្រឿង។ នេះបើតាមការបញ្ជាក់របស់លោកព្រាប ច័ន្ទវិបុល ប្រធាននាយកដ្ឋានដឹកជញ្ជូនផ្លូវគោកនៃក្រសួងគមនាគមន៍និងដឹកជញ្ជូន។ លោកព្រាប ច័ន្ទវិបុលបន្ថែមថា ក្នុងចំណោមរថយន្ដទាំងនោះ រថយន្ដមួយចំនួនប្រើថាមពលប្រេងសាំង និងថាមពលអាគុយ ទើបនឹងចាប់ផ្ដើមមានការនិយម ក៏ប៉ុន្ដែនៅមិនទាន់មានប្រភេទរថយន្តប្រើប្រាស់អាគុយសុទ្ធនៅឡើយទេ៕ This posting includes an audio/video/photo media file: Download Now |
| ហេឡូវីអូអេ៖ ការអនុវត្តនីតិវិធីច្បាប់ចាប់ឃុំខ្លួនមនុស្សនិងតួនាទីមេធាវីនៅកម្ពុជា Posted: 09 Jan 2012 06:49 AM PST មេធាវីនិងមន្ត្រីអង្គការសិទ្ធិមនុស្សបកស្រាយអំពីនីតិវិធីចាប់ខ្លួន ឃុំខ្លួនមនុស្សនិងតួនាទីរបស់មេធាវី នៅក្នុងប្រទេសកម្ពុជា។ ការបកស្រាយនេះធ្វើឡើងនៅ ក្នុងកម្មវិធីហេឡូវីអូអេ បន្ទាប់ពីមានព័ត៌មានដែលមេធាវីម្នាក់ត្រូវគេសង្ស័យថាមានការចាប់ខ្លួនពីអាជ្ញាធរដោយខុសច្បាប់មួយរយៈពេលខ្លី ព្រោះតែភារកិច្ចផង ហើយនិងការអះអាងពីការមានកម្រិតរឿងនិយាយស្តីផង។ លោក សុខ សំអឿន នាយកនៃក្រុមអ្នកច្បាប់ការពារសិទ្ធិកម្ពុជា និងលោកចាន់ សាវ៉េតជាមន្ត្រីស៊ើប អង្កេតនៃអង្គការសិទ្ធិមនុស្សអាដហុកជាវាគ្មិន។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី០២ ខែមករា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| ព័ត៌មានអន្តរជាតិវីអូអេ ៩ មករា ព្រឹក Posted: 08 Jan 2012 09:28 PM PST ទីបេត៍៖ សេចក្តីរាយការណ៍មកពីដែនដីទីបេត៍និយាយថាព្រះសង្ឃទីបេត៍មួយអង្គទៀតបានសុគតកាលពីថ្ងៃអាទិត្យ ក្រោយពីបានដុតខ្លួនឯងនៅក្នុងស្រុកដារីនៃតំបន់អាំដូ។ របាយការណ៍ទាំងនេះឲ្យដឹងថានៅមុនពេលឡាម៉ា សូប៉ាទុលគុដុតខ្លួន ព្រះអង្គបានមានសង្ឃដីកាថាព្រះអង្គធ្វើដូច្នេះដើម្បីរំឮកដល់ជនជាតិទីបេត៍ទាំងអស់ដែលបានស្លាប់ចាប់តាំងពីឆ្នាំ២០០៩មកដើម្បីសេរីភាពនៃដែនដីទីបេត៍និងការវិលត្រទ្បប់មកវិញនៃសម្តេចដាឡៃ ឡាម៉ា មេដឹកនាំសាសនាទីបេត៍ដែលបានរត់ភៀសព្រះអង្គទៅឥណ្ឌា នៅពេលមានការបះបោរបរាជ័យកាលពីឆ្នាំ១៩៥៩ប្រឆាំងនឹងការគ្រប់គ្រងរបស់ចិន។ អ៊ីរ៉ង់៖ លោកប្រធានាធិបតីអ៊ីរ៉ង់ ម៉ាមូដ អាម៉ាឌីននេចាដ បានចេញដំណើរកាលពីថ្ងៃអាទិត្យដើម្បីបំពេញទស្សនកិច្ច៥ថ្ងៃនៅក្នុងទ្វីបអាមេរិកទ្បាទីន ដែលពួកមន្ត្រីអាមេរិកបានហៅថាជាសញ្ញាមួយនៃការអស់សង្ឃឹមសម្រាប់ប្រទេសនេះដែលបានទទួលការដាក់ទ័ណ្ឌកម្មធ្ងន់ធ្ងរដោយសារកម្មវិធីបរមាណូចម្រូងចម្រាស់របស់ផងខ្លួន។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
-by+Heng+reasmey-voa+khmer.jpg){kind=link}
