VOA News: ព័ត៌មាន |
| Posted: 04 Dec 2011 12:04 AM PST ព័ត៌មានចុងក្រោយបំផុត៖ អេហ្ស៊ីប៖ លទ្ធផលខ្លះៗនៃការបោះឆ្នោតជុំទីមួយ ដើម្បីជ្រើសរើសសភាតំណាងរាស្ត្រក្នុងប្រទេសអេហ្ស៊ីប (Egypt) បានឱ្យដឹងថា គណបក្សអ៊ីស្លាមនានាបាននាំមុខដោយសំឡេងឆ្នោត ៦៥% ដែលជាចំនួនសំឡេងឆ្នោតច្រើនខ្លាំងលើសពីការប៉ាន់ស្មានទុក ដែលជំរុញឱ្យក្រុមនិយមសេរីស្ថិតនៅក្នុងភាពការពារខ្លួន។ ស៊ីរី៖ បក្សសម្ព័ន្ធអារ៉ាប់ កាលពីថ្ងៃសៅរ៍បានរាំងខ្ទប់ទ្រព្យសម្បត្ដិរបស់មន្ដ្រីជាន់ខ្ពស់ស៊ីរី ១៩នាក់ ហើយហាមជនទាំងនោះមិនឱ្យធ្វើដំណើរចូលទៅក្នុងបណ្តាប្រទេសអារ៉ាប់ថែមទៀត។ ទុយនីស៊ី៖ ជនជាតិទុយនីស៊ី (Tunisia) និយមអ៊ីស្លាម និងក្រុមមិននិយមសាសនារាប់ពាន់នាក់បានមកប្រមូលផ្ដុំគ្នានៅជិតអគាររដ្ឋសភា ក្នុងរដ្ឋធានី ទុយនីស កាលពីថ្ងៃសៅរ៍ ដើម្បីសម្ដែងការតវ៉ារបស់ខ្លួន តទល់នឹងក្រុមជំទាស់។ រុស្សី៖ ពលរដ្ឋរុស្សីបាននាំគ្នាទៅបោះឆ្នោត កាលពីថ្ងៃអាទិត្យនេះ ដើម្បីជ្រើសតាំងតំណាងរាស្រ្ដក្នុងសភា ដែលមានការចោទប្រកាន់ពីបទលួចបន្លំសន្លឹកឆ្នោត និងការគំរាមកំហែងមកលើក្រុមអ្នកសង្កេតការណ៍។ កុងហ្គោ៖ គណបក្សប្រឆាំងដ៏ធំនៃសាធារណរដ្ឋប្រជាធិបតេយ្យកុងហ្គោ បានថ្លែងថា ខ្លួននឹងបដិសេធមិនទទួលស្គាល់លទ្ធផលឆ្នោតមុននេះ ដែលបានផ្ដល់ជ័យជម្នះដល់ប្រធានាធិបតីបច្ចុប្បន្ន លោក ចូសេប កាបីឡា (Joseph Kabila) ដោយទទួលបានសំឡេងឆ្នោតប្រហែល ៥០%។ អាមេរិក៖ ពាណិជ្ជករ លោក ហ៊ឺមណា ខេន (Hermna Cain) បានផ្អាកយុទ្ធនាការឃោសនានយោបាយរបស់លោកដើម្បីទទួលបានបេក្ខភាពក្នុងការប្រជែងយកតំណែងប្រធានាធិបតី ស.រ.អ. (US) តាមរយៈការតែងតាំងពីគណបក្សសាធារណរដ្ឋ បន្ទាប់ពីមានការចោទប្រកាន់លើរូបលោកពីបទប៉ុនប៉ងរំលោភផ្លូវភេទ និងភាពមិនស្មោះត្រង់ចំពោះភរិយារួចមក។ អាហ្វហ្គានីស្ថាន៖ លោក រីយ៉ាន ក្រកឃឺ (Ryan Crocker) ឯកអគ្គរដ្ឋទូតស.រ.អ.ប្រចាំនៅប្រទេសអាហ្វហ្គានីស្ថាន បានថ្លែងថា អវត្ដមានរបស់ប្រទេសបាគីស្ថាននៅក្នុងសន្និសីទអន្ដរជាតិស្តីពីប្រទេសអាហ្វហ្គានិស្ថាន (Afghanistan) នៅពេលខាងមុខនេះ ពិតជាគួរឲ្យសោកស្ដាយ តែវានឹងមិនបណ្តាលឲ្យប៉ះពាល់ដល់ការលូតលាស់ទៅមុខរបស់ប្រទេសនេះឡើយ ឬ ក៏មិនអាចធ្វើឲ្យមានការផ្លាស់ប្ដូរលទ្ធផលនៃកិច្ចប្រជុំនោះទេ។ អាហ្វហ្គានីស្ថាន៖ អង្គការអូតង់បាននិយាយថា ទាហានរបស់ខ្លួនបានស្លាប់បាត់បង់ជីវិតក្នុងការផ្ទុះគ្រាប់បែកមួយ នៅតំបន់ភាគខាងកើតនៃប្រទេសអាហ្វហ្គានីស្ថាន (Afghanistan) កាលពីថ្ងៃសៅរ៍កន្លងទៅ។ គេមិនបានប្រាប់ឲ្យដឹងអំពីសញ្ជាតិរបស់ទាហានដែលបានស្លាប់ទាំងនោះទេ។ អាល្លឺម៉ង់៖ អាជ្ញាធរនៃក្រុងកូប្លេនស៍ (Koblenz) នៃប្រទេសអាល្លឺម៉ង់ភាគខាងលិច បានចេញបញ្ជាឲ្យជន្លៀសប្រជាពលរដ្ឋប្រមាណជា ៤៥.០០០ នាក់ ចេញពីតំបន់ ដើម្បីអាចឱ្យគេដោះគ្រាប់បែកពីរគ្រាប់នាជំនាន់សង្គ្រាមលោកលើកទីពីរ ដែលគេបានរកឃើញនៅក្នុងទន្លេ រ៉ែន (Rhine)។ ព័ត៌មាននៅពេលមុននេះ៖ <!--IMAGE-RIGHT--> អឺរ៉ុប៖ នាយករដ្ឋមន្ត្រីអ៊ីតាលី ម៉ារីអូ ម៉នធី បានជួបជាមួយពួកមេដឹកនាំគណបក្សកាលពីថ្ងៃសៅរ៍ដើម្បីប្រមែប្រមូលការគាំទ្រដល់វិធានការចំណាយត្បិតត្បៀតដែលលោកបានស្នើ នៅពេលដែលទ្វីបអឺរ៉ុបកំពុងប្រឈមមុខនឹងវិបត្តិបំណុល។ កញ្ចប់វិធានការដែលគេមានជំនឿថា មានរួមបញ្ចូលការកាត់បន្ថយចំណាយ ការដំទ្បើងពន្ធដារនិងការបង្កើនអាយុចូលនិវត្តន៍នឹងគ្រោងអនុម័តនៅក្នុងជំនួបប្រជុំរបស់គណៈរដ្ឋមន្ត្រីរបស់ប្រទេសអ៊ីតាលីនៅថ្ងៃច័សន្ទខាងមុខនេះ។ អ៊ីរ៉ាក់៖ ការផ្ទុះគ្រាប់បែកក្នុងទ្បានមួយគ្រឿងនៅទីក្រុងបាដាដត្រូវបានលោកនាយករដ្ឋមន្ត្រីអ៊ីរ៉ាក់ ណររី អាល់ ម៉ាលីគី ថាជាការប៉ុនប៉ងមួយដើម្បីធ្វើឃាតលោក នៅក្នុងការបំផ្ទុះគ្រាប់បែកកាលពីថ្ងៃច័ន្ទ បានបណ្តាលឱ្យមនុស្សយ៉ាងតិចណាស់មួយម្នាក់ស្លាប់និងមានមនុស្សមួយចំនួនទៀតត្រូវរបួស។ រុស្ស៊ី៖ អ្នកស្រី លីយ៉ា ស៊ីបាណូវ៉ា មេដឹកនាំអង្គការ កូឡូ (Golos) ត្រូវបានឃាត់ខ្លួនចំនួន១២ម៉ោង នៅឯអាកាសយានដ្ឋាន Sheremetyevo ក្រោយពីអ្នកស្រីបានប្រកែកមិនព្រមប្រគល់ កំព្យុទ័រយួរដៃទៅឱ្យពួកមន្ត្រីសន្តិសុខដែលបាននិយាយថាពួកគេចង់ពិនិត្យមើលរកកម្មវិធីកុំព្យូទ័រខុសច្បាប់នៅក្នុងម៉ាស៊ីយួរដៃនោះ។ ស៊ីរី៖ មានមនុស្សយ៉ាងតិច២៣នាក់ត្រូវបានស្លាប់នៅក្នុងចលនាប្រឆាំងនឹងរដ្ឋាភិបាលស៊ីរី។ យោងតាមអង្គការអង្កេតសិទ្ធមនុស្សស៊ីរីបានឲ្យដឹងថាការសា្លប់ភាគច្រើនកើតមានឡើងនៅក្នុងតំបន់អ៊ីតលីប នៅជិតព្រំដែនប្រទេសតួកគី។ កុងហ្គោ៖ គណៈកម្មការជាតិរៀបចំការបោះឆ្នោតឯករាជ្យកុងហ្គោបាននិយាយប្រាប់វីអូអេកាលពីថ្ងៃសុក្រថាប្រធានាធិបតី Joseph Kabila បាននាំមុខលោក Etienne Tshisekedi ដែលជាអ្នកប្រជែងធំជាងគេរបស់លោក។ ប៉ុន្តែ ការរាប់សន្លឹកឆ្នោតយ៉ាងច្របូកច្របល់នៅកុងហ្គោធ្វើឲ្យមានការចោទសួរអំពីភាពសុក្រឹត និងភាពសេរីរបស់ការបោះឆ្នោត។ ទន្ទឹមនឹងនេះ ការបោះឆ្នោតនេះមានការអំពាវនាវឲ្យទុកជាមោឃៈ ដោយសារតែមានភាពមិនប្រក្រតីនិងបញ្ហាខាងភ័ស្តុភារ។ អេហ្ស៊ីប៖ នៅក្នុងការចេញផ្សាយលទ្ធផលដំបូងនៃការបោះឆ្នោតសភាក្នុងដំណាក់ការទីមួយ បានបង្ហាញឲ្យឃើញថា គណបក្សសេរីភាព និងយុត្តិធ៌មរបស់ពួក Muslim Brotherhood បានទទួលការគាំទ្រច្រើនជាងគេនៅក្នុងការបោះឆ្នោតកាលពីថ្ងៃច័ន្ទនិងថ្ងៃអង្គារ។ ក្រុមអ៊ីស្លាមនិយម អាលនរ សាឡាហ្វី (al-Nour Salafi) ដែលជាពួកអភិរក្សនិយមមានការគាំទ្រថ្នាក់ទីពីរ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
