VOA News: ព័ត៌មាន: “អ្នករាយការណ៍ពិសេសរបស់អ.ស.ប.អំពីសិទ្ធិមនុស្សធ្វើទស្សនកិច្ចអំពីការបោះឆ្នោត” plus 4 more |
- អ្នករាយការណ៍ពិសេសរបស់អ.ស.ប.អំពីសិទ្ធិមនុស្សធ្វើទស្សនកិច្ចអំពីការបោះឆ្នោត
- លោកស្រី មួរ សុខហួរ បញ្ជូនពាក្យបណ្តឹងឲ្យម៉ាឡេស៊ីស៊ើបអង្កេតករណីពលការិនីខ្មែរស្លាប់
- ការកាត់ទោសនួន ជា បងធំទី២របស់ខ្មែរក្រហមចាប់ផ្តើម
- ព័ត៌មានអន្តរជាតិ៖ ០៥ ធ្នូ
- កម្ពុជាងាកទៅស្និទ្ធនឹងចិនខណៈពេលមិត្តភក្តិចិនងាកមកសិ្នទ្ធនឹងអាមេរិក
| អ្នករាយការណ៍ពិសេសរបស់អ.ស.ប.អំពីសិទ្ធិមនុស្សធ្វើទស្សនកិច្ចអំពីការបោះឆ្នោត Posted: 05 Dec 2011 04:05 PM PST លោក សុរិយា ប្រាសាទស៊ូប៊ែឌី (Surya Subedi) អ្នករាយការណ៍ពិសេសរបស់អង្គការសហប្រជាជាតិស្តីអំពីស្ថានភាពសិទ្ធិមនុស្ស បានមកដល់កម្ពុជាហើយនៅថ្ងៃនេះ នៅក្នុងដំណើរទស្សនកិច្ចលើកទី៦របស់លោក នេះបើតាមការបញ្ជាក់របស់អ្នកស្រី Zeo Latumbo មន្ត្រីផ្នែកទំនាក់ទំនង និងព័ត៌មាននៃការិយាល័យឧត្តមស្នងការអ.ស.ប.ទទួលបន្ទុកសិទ្ធិមនុស្ស។ នៅក្នុងសេចក្តីប្រកាសព័ត៌មានរបស់ការិយាល័យឧត្តមស្នងការអ.ស.ប.ទទួលបន្ទុកសិទ្ធិមនុស្សប្រចាំប្រទេសកម្ពុជាបានឲ្យដឹងថា លោកសុរិយា ប្រាសាទស៊ូប៊ែឌី នឹងបំពេញទស្សនកិច្ចប្រទេសកម្ពុជារយៈពេលប្រាំពីរថ្ងៃ ដោយចាប់ផ្តើមពីថ្ងៃទី៥រហូតដល់ថ្ងៃទី១១ខាងមុខនេះ ហើយដំណើរទស្សនកិច្ចរបស់លោកលើកនេះ លោកសុរិយា ប្រាសាទស៊ូប៊ែឌីនឹងផ្តោតសំខាន់ទៅលើកិច្ចការបោះឆ្នោត។ លោកសុរិយាគ្រោងនឹងជួបមន្ត្រីជាន់ខ្ពស់សំខាន់ៗរបស់រដ្ឋាភិបាលមួយចំនួន មន្ត្រីនៃគណៈកម្មាធិការរៀបចំការបោះឆ្នោត គណបក្សប្រឆាំង និងក្រុមអង្គការសង្គមស៊ីវិលមួយចំនួន ដែលតាមឃ្លាំមើលការរំលោភសិទ្ធិមនុស្ស។ លោកសុរិយាបានមានប្រសាសន៍នៅក្នុងសេចក្តីប្រកាសព័ត៌មានរបស់ខ្លួនថា នៅក្នុងអំឡុងពេលទស្សនកិច្ចរបស់លោកលើកនេះ លោកនឹងធ្វើការវិភាគទៅលើប្រព័ន្ធបោះឆ្នោត ហើយនឹងបញ្ហាទាំងឡាយដែលពាក់ព័ន្ធទៅនឹងការគោរពសិទ្ធិមនុស្ស។ លោកបានប្រសាសន៍ថា លោកនឹងបន្តតាមដានករណីនេះតទៅទៀតជាពិសេសស្ថានភាពសិទ្ធិមនុស្សនៅប្រទេសកម្ពុជា។ លោកយឹម សុវណ្ណ អ្នកតំណាងរាស្ត្រគណបក្សប្រឆាំង បានមានប្រសាសន៍ថា សមាជិកគណបក្សប្រឆាំងប្រមាណពីបីទៅបួននាក់នឹងជួបលោកសុរិយា ប្រាសាទស៊ូប៊ែឌី នៅថ្ងៃពុធខាងមុខនេះ។ លោកបានអះអាងថា លោកនឹងលើកយកបញ្ហាវិវាទដីធ្លីនិងជំរុញឲ្យលោកសុរិយា ប្រាសាទស៊ូប៊ែឌីជួយប្រាប់គ.ជ.ប. ឲ្យផ្លាស់ប្តូររចនាសម្ព័ន្ធរបស់គ.ជ.ប.។ «ឲ្យគ.ជ.បឯករាជ្យ អព្យាក្រឹត្យមិនលម្អៀងទៅគណបក្សណា។ ប្រធានគណៈកម្មាធិការគ.ជ.បនេះ វាត្រូវតែមានការជ្រើសតាំងសារជាថ្មី ដោយមានការឯកភាពពីគ្រប់គណបក្សនយោបាយ ដែលគ្មានអាសនៈនៅក្នុងរដ្ឋសភា»។ លោកធន សារ៉ាយ ប្រធានសមាគមសិទ្ធិមនុស្សអាដហុក បានមានប្រសាសន៍ថា អង្គការសង្គមស៊ីវិលជាច្រើននឹងជួបជាមួយលោសុរិយា ប្រាសាទស៊ូប៊ែឌី នៅពេលបាយថ្ងៃត្រង់មួយនៅថ្ងៃពុធ។ លោកបានមានប្រសាសន៍ថា គ.ជ.ប. គួរតែមានសមាសភាពចម្រុះដល់ថ្នាក់មូលដ្ឋានដើម្បីជៀសវាងការរិះគន់ថា គ.ជ.ប. ធ្វើការមិនឯករាជ្យ និងមិនត្រឹមត្រូវ។ «យើងចង់បានគណៈកម្មាធិការមួយឯករាជ្យគឺមិនមានតំណាងគណបក្សនៅក្នុងហ្នឹងទេ ដូចប្រទេសដទៃទៀតដែរ។ ក៏ប៉ុន្តែរឿងនេះយើងស្នើជាច្រើនលើកច្រើនសារហើយ តែមិនមានការគាំទ្រទាំងពីគណបក្សកាន់អំណាច និងគណបក្សមិនកាន់អំណាចផងដែរ ព្រោះមិនទុកចិត្តឯករាជ្យនេះ»។ លោកទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត បានមានប្រសាសន៍ថា គ.ជ.ប.បើកចំហឲ្យលោកសុរិយា សួរសំណួរទាំងឡាយដែលពាក់ព័ន្ធនឹងការបោះឆ្នោត នៅពេលដែលមានជំនួបមួយជាមួយនឹងគ.ជ.ប. នៅថ្ងៃពុធ។ លោកបានមានប្រសាសន៍ថា គ.ជ.ប. ធ្វើការទៅតាមច្បាប់។ អ្វីដែលជាការវាយតម្លៃឯករាជ្យ ឬមិនឯករាជ្យ គឺអាស្រ័យទៅលើអ្នកវាយតម្លៃតែប៉ុណ្ណោះ។ «តាមពិតទៅ គ.ជ.ប.គ្រាន់តែជាអ្នកអនុវត្តតាមច្បាប់ ដោយហេតុថា គ.ជ.ប.ត្រូវបានបង្កើតដោយច្បាប់បោះឆ្នោត ហើយភារកិច្ចហ្នឹងត្រូវបានកំណត់ដោយច្បាប់បោះឆ្នោត។ អញ្ចឹងការចង់បានណាមួយនោះមិនមែនជាបំណង ឬឆន្ទៈរបស់ គ.ជ.ប.ទេ»។ ប្រទេសកម្ពុជានឹងរៀបចំការបោះឆ្នោតព្រឹទ្ធសភា នៅអំឡុងខែមករានេះ និងការបោះឆ្នោតក្រុមប្រឹក្សាឃុំសង្កាត់គ្រោងនឹងធ្វើនៅខែមិថុនាខាងមុខនេះផងដែរ៕ This posting includes an audio/video/photo media file: Download Now |
| លោកស្រី មួរ សុខហួរ បញ្ជូនពាក្យបណ្តឹងឲ្យម៉ាឡេស៊ីស៊ើបអង្កេតករណីពលការិនីខ្មែរស្លាប់ Posted: 05 Dec 2011 03:45 PM PST លោកស្រី មួរ សុខហួរ តំណាងរាស្ត្រគណបក្សប្រឆាំង បានបញ្ជូនពាក្យបណ្តឹងជាផ្លូវការជាលើកដំបូងទៅកាន់គណៈកម្មាធិការសិទ្ធិមនុស្សនៃរដ្ឋសភារបស់ប្រទេសម៉ាឡេស៊ីនៅថ្ងៃច័ន្ទនេះ ដើម្បីទាមទារឱ្យមានការស៊ើបអង្កេតទៅលើករណីពលការិនីខ្មែរស្លាប់។ ពៅ និច អាយុ១៨ឆ្នាំ ដែលត្រូវបានបញ្ជូនឱ្យទៅបម្រើការតាមផ្ទះនៅប្រទេសម៉ាឡេស៊ី ក្នុងខែសីហា ឆ្នាំ២០១១ បានស្លាប់ដោយគេអះអាងថា បានលេបថ្នាំខុស។ ពៅ និច ដែលជាពលការិនីខ្មែរបម្រើការតាមផ្ទះម្នាក់ក្នុងចំណោម១១នាក់ បានស្លាប់នៅប្រទេសម៉ាឡេស៊ី ក្នុងឆ្នាំ២០១១នេះ។ លោកស្រីមួរ សុខហួរ តំណាងរាស្ត្រគណបក្សសម រង្ស៊ី បានថ្លែងប្រាប់សន្និសីទកាសែតនៅវិមានរដ្ឋសភាថា នេះគឺជាផ្នែកមួយនៃបញ្ហាដ៏ធំធេងជុំវិញការរំលោភបំពានសិទ្ធិមនុស្សលើពលការិនីខ្មែរបម្រើការតាមផ្ទះនៅប្រទេសម៉ាឡេស៊ី ហើយភាពមិនច្បាស់លាស់នៃការស្លាប់នេះទាមទារឱ្យមានការស៊ើបអង្កេតតាមពាក្យបណ្តឹងនៃការរំលោភបំពានសិទ្ធិមនុស្សនេះ។ <!--IMAGE-RIGHT--> «ខ្ញុំសូមឱ្យគណៈកម្មាធិការសិទ្ធិមនុស្សនៃប្រទេសម៉ាឡេស៊ីធ្វើការស៊ើបអង្កេត (ករណីស្លាប់នេះ) ទៅតាមកាតព្វកិច្ចរបស់ខ្លួន និងសូមផ្តល់នូវរបាយការណ៍ឱ្យច្បាស់លាស់ពីការស្លាប់នៃករណីនេះ។ ខ្ញុំ ក្នុងនាមជាតំណាងរាស្ត្រ បានជួបឪពុកម្តាយសព ហើយឪពុកម្តាយសពដាក់ពាក្យបណ្តឹង។ ខ្ញុំត្រូវតែបន្តពាក្យបណ្តឹងនេះទៅគណៈកម្មាធិការនេះ»។ ពលការិនីខ្មែរបម្រើការតាមផ្ទះនៅប្រទេសម៉ាឡេស៊ីបានទទួលរងការធ្វើទារុណកម្ម ការបរិភោគមិនគ្រប់គ្រាន់ ការរំលោភផ្លូវភេទ ការបង្ខំឱ្យធ្វើការគ្មានថ្ងៃឈប់សម្រាក និងការបើកប្រាក់ខែមិនបានពេញលេញ។ លោកស្រីមួរ សុខហួរបានបញ្ជាក់ថា លោកស្រីបានផ្ញើរពាក្យបណ្តឹងដំបូង ជូនទៅលោក Muhammad Sha' ani Bin Abdullah ប្រធានគណៈកម្មាធិការសិទ្ធិមនុស្សសភាម៉ាឡេស៊ីតាមអ៊ីម៉ែល និងតាមប្រៃសណីយ៍នៅថ្ងៃនេះ។ វីអូអេបានព្យាយាមទាក់ទងសុំអត្ថាធិប្បាយពីលោក Muhammad តែមិនអាចទាក់ទងបានទេ។ មន្ត្រីព័ត៌មានស្ថានទូតម៉ាឡេស៊ីប្រចាំកម្ពុជាបានបដិសេធមិនព្រមធ្វើការអត្ថាធិប្បាយទេ។ លោកជីវ ផល្លី អនុប្រធាននាយកដ្ឋានប្រឆាំងការជួញដូរមនុស្ស និងការការពារអនីតិជននៃក្រសួងមហាផ្ទៃ បានថ្លែងថា បន្ទាប់ពីបានទទួលពាក្យបណ្តឹងរបស់គ្រួសារសព នាយកដ្ឋានរបស់លោកបានស្នើសុំទៅស្ថានទូតកម្ពុជាប្រចាំនៅម៉ាឡេស៊ី ឲ្យសហការជាមួយអាជ្ញាធរម៉ាឡេស៊ី ដើម្បីបញ្ជាក់ឡើងវិញអំពីមូលហេតុនៃការលេបថ្នាំស្លាប់នេះបណ្តាលមកពីកត្តាអ្វី ហើយថ្នាំអ្វីដែលសពបានលេប។ «យើងជួយគាត់ដើម្បីរកការណ៍ពិត ប៉ុន្តែការណ៍ដែលជួយហ្នឹង យើងអត់មានវិសាលភាពពង្រីកអំណាចយើងទៅស៊ើបអង្កេតនៅប្រទេសម៉ាឡេស៊ីបានទេ។ ការធ្វើការស៊ើបអង្កេតរបស់យើងស្នើសុំទៅស្ថានទូត (កម្ពុជាប្រចាំនៅម៉ាឡេស៊ី) ហើយសុំឱ្យស្ថានទូតជួយទំនាក់ទំនងជាមួយខាងអាជ្ញាធរនៅប្រទេសម៉ាឡេស៊ី នៅទីតាំងដែលគាត់បានស្លាប់ ដើម្បីរក ថាតើការស្លាប់របស់គាត់ពិតជាស្លាប់ដោយលេបថ្នាំ រឿងរ៉ាវមុនលេបថ្នាំ កត្តាអ្វីខ្លះ ដែលនាំឱ្យគាត់លេបថ្នាំស្លាប់»។ លោកអាន ប៊ុនហាក់ ប្រធានសមាគមភ្នាក់ងារជ្រើសរើសពលករកម្ពុជា បានថ្លែងថា លោកបានសាទរដល់សកម្មភាពរបស់រដ្ឋាភិបាល និងតំណាងរាស្ត្រគណបក្សប្រឆាំង សំដៅជំរុញស្វែងរកមូលហេតុពិតនៃការស្លាប់ពលការិនីខ្មែរបម្រើការតាមផ្ទះនៅម៉ាឡេស៊ីដែលជាសញ្ញាវិជ្ជមានឆ្ពោះទៅការពារសិទ្ធិរបស់ពលការិនីខ្មែរ។ «យើងស្វាគមន៍ចំពោះអ្វី ដែលជាការចង់ដឹង ចង់ឮរបស់លោកជំទាវមួរ សុខហួរ ប៉ុន្តែករណីនេះ ខ្ញុំគិតថា មិនមែនមានតែលោកជំទាវម្នាក់ឯងនោះទេ ដែលយកចិត្តទុកដាក់។ យើងក៏បានទាមទារឱ្យគេជួយផ្តល់ជូនឯកសារមួយចំនួនទៀតដើម្បីបំពេញបន្ថែមទៅលើអ្វីដែលជាចម្ងល់ដែរ»។ ពលការិនីខ្មែរបម្រើការតាមផ្ទះចំនួន១១នាក់បានស្លាប់នៅប្រទេសម៉ាឡេស៊ីក្នុងឆ្នាំ២០១១នេះ ដោយមានការអះអាងថា ការស្លាប់នេះបានបណ្តាលមកពីជំងឺ និងការសម្លាប់ខ្លួន។ ប៉ុន្តែអង្គការសង្គមស៊ីវិល និងគណបក្សប្រឆាំងសង្ស័យថា ការសម្លាប់នេះអាចបណ្តាលមកពីមូលហេតុផ្សេង។ លោកស្រី មួរ សុខហួរបានបញ្ជាក់ថា លោកស្រីនឹងធ្វើពាក្យបណ្តឹងមួយករណីម្តងមួយករណីម្តងអំពីការស្លាប់នេះ៕ This posting includes an audio/video/photo media file: Download Now |
| ការកាត់ទោសនួន ជា បងធំទី២របស់ខ្មែរក្រហមចាប់ផ្តើម Posted: 05 Dec 2011 01:48 PM PST កាលពីថ្ងៃច័ន្ទ តុលាការគាំទ្រដោយអ.ស.ប.កាត់ទោសអតីតមេដឹកនាំខ្មែរក្រហម ដែលកំពុងស៊ើបអង្កេតចលនាដ៏ប្រល័យរបស់របបគ្រប់គ្រងខ្មែរក្រហម បានចាប់ផ្ដើមស្ដាប់សេចក្ដីថ្លែងការណ៍បង្ហាញភ័ស្ដុតាងប្រឆំាងអតីតមេដឹកនាំខ្មែរក្រហមបីនាក់។ ជនជាប់ចោទបីនាក់ក្នុងការកាត់ក្ដីតុលាការដែលគេរង់ចាំយូរនេះ បានបដិសេធការចោទប្រកាន់ពីបទប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្រ្គាម។ សវនាការនៅតុលាការកាលពីថ្ងៃច័ន្ទ គឺផ្តោតលើនួន ជា មេដឹកនាំមនោគមវិជ្ជារបស់របបគ្រប់គ្រងខ្មែរក្រហម ហើយដែលគេស្គាល់ថា ជាបងធំទីពីរ។ ក្នុងសវនាការទាំងពេលព្រឹក និងពេលល្ងាច នួន ជា ដែលជាមេដឹកនាំធំទី២បន្ទាប់ពីខ្មោចប៉ុល ពតនោះ បានទិតៀនខ្លាំងក្លាប្រឆាំងប្រទេសវៀតណាម ដូចគាត់ធ្លាប់ធ្វើជា ទៀងទាត់ ជាច្រើនឆ្នាំមកហើយ។ គាត់បានស្ដីបន្ទោសប្រទេសជិតខាងទិសខាងកើតគឺវៀតណាមពីបទឧក្រិដ្ឋកម្ម ដែលខ្លួនគាត់ និងចុងចោទជាច្រើននាក់ទៀតត្រូវចោទប្រកាន់នោះ។ គាត់ថ្លែងថា មនុស្សទូទៅយល់ខុស ដោយចោទថា ខ្មែរក្រហមអាក្រក់។ «អ្វីៗទាំងអស់នៅក្រោមការត្រួតត្រារបស់វៀតណាម ចេញពីទីចាត់ការនៃទីក្រុងហាណូយ ពីទីក្រុងហូជីមិញ។ ហេតុដូច្នេះ ឧក្រិដ្ឋកម្មទាំងនោះ មានឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ និងអំពើប្រល័យពូជសាសន៍ គឺមិនមែនខ្មែរជាអ្នកប្រព្រឹត្តទេ គឺវៀតណាមទេ ដែលជាអ្នកសម្លាប់ខ្មែរ»។ នេះជាវោហាសាសន៍ដែលគេធ្លាប់ឮចេញពីមាត់ជនម្នាក់នេះដែលនៅតែបន្ដបដិសេធការទទួលខុសត្រូវផ្ទាល់ខ្លួនក្នុងនយោបាយដែលបានប្រល័យជីវិតមនុស្សប្រមាណ១,៧លាននាក់ ឬប្រមាណម្នាក់ក្នុងចំណោម៤នាក់នៃពលរដ្ឋកម្ពុជា ទាំងអស់។ ក្រៅពីដាក់កំហុសទៅលើវៀតណាម និងអ្វីដែលគេហៅថា "ខ្មាំង" របស់បដិវត្ដន៍ពីទសវត្សរ៍១៩៦០ដល់ទសវត្ស១៩៧០នោះ នួន ជាបានថ្លែងប្រាប់តុលាការអំពីការរំឭករបស់គាត់ពេលជាយុវវ័យ នៅក្រោមរបបគ្រប់គ្រងអនានិគមនិយមអស់រយៈពេលពីរទសវត្សរ៍។ «កាលពីខ្ញុំនៅតូច រស់នៅក្រោមអនានិគមបារាំង ខ្ញុំឃើញផ្ទាល់ភ្នែកនូវការបំពានមកលើពលរដ្ឋខ្មែរប្រព្រឹត្ដដោយបារាំង។ ជនជាតិខ្មែរបានត្រូវគេវាយដំ ហើយចាប់ដាក់គុក។ ខ្ញុំក៏បានឃើញផ្ទាល់ភ្នែកនូវការធ្វើបាបមកលើពលរដ្ឋខ្មែរដទៃដែរ ដោយចាត់ទុក ដូចជាទាសករ»។ គាត់និយាយថា ការសម្រេចចិត្តរបស់គាត់គឺបណ្តាលមកពីអំពើអយុត្តិធម៌ទាំងនោះ។ នួន ជានិយាយថា គាត់យល់ពីគម្រោងការរបស់វៀតណាមមកលើប្រទេសកម្ពុជា ពេលគាត់ទៅរៀននៅហាណូយក្នុងដើមទសវត្ស១៩៥០។ គាត់និយាយថា ពេលនោះគាត់ដឹងថា វៀតណាមចង់ត្រួតត្រាកម្ពុជា។ «ខ្ញុំសោកសា្តយដោយឮដូច្នោះ ពីព្រោះខ្ញុំប្រយុទ្ធយ៉ាងលំបាកប្រឆាំងនឹងបារាំងដើម្បីបានឯករាជ្យ ប៉ុន្តែតើជាឯករាជ្យក្រោមការត្រួតត្រារបស់ប្រទេសមួយទៀតឬ?» នួន ជាគឺជាចុងចោទម្នាក់គត់ថ្លែងនៅតុលាការនៅថ្ងៃច័ន្ទនេះ។ ខៀវ សំផន អតីតប្រមុខរដ្ឋនឹងនិយាយលើកក្រោម ក្រោយពីសវនាការកាត់ទោសនួន ជាបានបញ្ចប់។ ចុងចោទទីបី គឺអៀង សារី អតីតរដ្ឋមន្ត្រីការបរទេស និយាយថា គាត់នឹងមិនផ្តល់ចម្លើយទេ។ ដោយសារតែសំណុំរឿងនេះស្មុគស្មាញ ដូចជាចុងចោទចាស់ជរា អាយុជាង៨០ឆ្នាំ និងមានបញ្ហាសុខភាព ដូច្នេះការកាត់ទោសនោះត្រូវបែងចែកជាការកាត់ទោសដោយឡែកបន្តបន្ទាប់គ្នា។ មានន័យថា តុលាការអាចសម្រេចទោស ពេលដំណើរការនេះកំពុងបន្ត ហើយធ្វើដូច្នេះគេអាចកាត់បន្ថយកង្វល់ដែលខ្លាចចុងចោទស្លាប់ មុនតុលាការចេញសាលក្រមកាត់ទោស ដូចការកាត់ទោស Slobodan Milosevic អតីតប្រធានាធិបតីរបស់ស៊ែប។ ការកាត់ទោសមួយវគ្គដំបូងនេះនឹងពិនិត្យមើលការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ដូចការបណ្តេញប្រជាជនដោយបង្ខំ គឺព្រឹត្តិការណ៍ចំនួន២ក្នុងឆ្នាំ១៩៧៥ ពេលខ្មែរក្រហមចូលកាន់កាប់ប្រទេសកម្ពុជា ដេញប្រជាជនចេញពីទីក្រុង។ ហើយក្រោមមក ក្នុងឆ្នាំនោះដែរ គេបានបង្ខំមនុស្សច្រើនលាននាក់ទូទាំងប្រទេសឲ្យធ្វើការដោយបង្ខំក្នុងជំរំពលកម្ម។ ប៉ុន្តែនួន ជាទំនងជាបន្តបន្ទោសអ្នកផ្សេងចំពោះការស្លាប់ទាំងនោះ។ «ខ្ញុំមិនចង់ឲ្យជំនាន់ក្រោយយល់ខុសអំពីប្រវត្តិសាស្ត្រទេ។ ខ្ញុំមិនចង់ឲ្យគេគិតថា ខ្មែរក្រហមអាក្រក់ ខ្មែរក្រហមជាឧក្រិដ្ឋជន ទេ។ វាមិនពិតទេ»។ ការកាត់ទោសមួយវគ្គដំបូងនេះទំនងជាស៊ីពេល២ឆ្នាំ។ បើមានការកាត់ទោសវគ្គផ្សេងទៀតគឺទាក់ទងនឹងបទចោទប្រកាន់អំពីប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ៕ ប្រែសម្រួលដោយ អូ ធួក This posting includes an audio/video/photo media file: Download Now |
| Posted: 04 Dec 2011 08:15 PM PST ព័ត៌មានចុងក្រោយបំផុត៖ កម្ពុជា៖ អតីតមេដឹកនាំរបបខ្មែរក្រហមលេខពីរដ៏ឃោរឃៅនៃប្រទេសកម្ពុជានិយាយថា គាត់និងពួកសមមិត្តរបស់គាត់មិនមែនជា«មនុស្សអាក្រក់»ទេ។ នៅថ្ងៃច័ន្ទនេះ នួនជា បាននិយាយប្រាប់តុលាការឧក្រិដ្ឋកម្មសង្គ្រាមគាំទ្រដោយអ.ស.ប.ថា គាត់មិនចង់ឱ្យ«មនុស្សជំនាន់ក្រោយ» «យល់ច្រទ្បំអំពីប្រវត្តិសាស្ត្រ» ហើយមានជំនឿថាពួកខ្មែរក្រហមជា«ឧក្រិដ្ឋជន»។ រុស្ស៊ី៖ គណបក្សកាន់អំណាចរបស់លោកនាយករដ្ឋមន្ត្រីរុស្ស៊ី Vladimir Putin បានខាតបង់យ៉ាងច្រើននៅក្នុងការបោះឆ្នោតសភា ហើយការណ៍នេះបានធ្វើឱ្យបុរសដែលធ្លាប់មានឥទ្ធិពលខ្លាំងក្នុងវិស័យនយោបាយប្រទេសរុស្ស៊ីជាងមួយទសវត្សរ៍កន្លងមកទទួលបានការថយចុះនៃសំឡេងភាគច្រើន។ អាហ្វហ្គានីស្ថាន៖ សន្និសីទសាកលមួយស្តីពីអនាគតនៃប្រទេសអាហ្វហ្គានីស្ថានបានចាប់បើកការប្រជុំនៅក្នុងក្រុង Bonn នៃប្រទេសអាល្លឺម៉ង់ហើយ។ នៅថ្ងៃច័ន្ទនេះពួកប្រតិភូមកពីប្រទេសជាង៨០ បានផ្តោតការយកចិត្តទុកដាក់លើការរៀបចំមាគ៌ាមួយសម្រាប់ប្រទេសដែលខ្ទិចខ្ទាំដោយសារសង្គ្រាមនេះ នៅក្រោយពេលដែលក្រុមទាហានប្រយុទ្ធអន្តរជាតិចាកចេញពីប្រទេសនេះក្នុងឆ្នាំ២០១៤។ ក៏ប៉ុន្តែប្រទេសប៉ាគីស្ថានដែលត្រូវបានចាត់ទុកថាមានសារៈសំខាន់ដល់ស្ថិរភាពនៃប្រទេសអាហ្វហ្គានីស្ថាន បែរជាធ្វើពហិការមិនចូលរួមក្នុងការប្រជុំនេះទេ ហើយទង្វើនេះជាការឆ្លើយតបនឹងការវាយប្រហារឆ្លងកាត់ព្រំដែនរបស់អង្គការអូតង់កាលពីចុងខែមុនដែលបានបណ្តាលឱ្យទាហានប៉ាគីស្ថាន២៤នាក់ស្លាប់។ កូតឌីវ័រ៖ អតីតប្រធានាធិបតី កូតឌីវ័រLaurent Gbagbo នឹងចេញបង្ហាញខ្លួននៅចំពោះមុខតុលាការឧក្រិដ្ឋកម្មអន្តរជាតិនៅថ្ងៃច័ន្ទនេះ ដើម្បីប្រឈមនឹងការចោទប្រកាន់៤ទាក់ទងនឹងឧក្រិដ្ឋកម្មប្រឆាំងមនុស្សជាតិដែលកើតចេញពីមុខនាទីរបស់លោកនៅក្រោយការបោះឆ្នោតកាលពីឆ្នាំទៅមិញ។ ព័ត៌មាននៅពេលមុននេះ៖ <!--IMAGE-RIGHT--> បង់ក្លាដែស៖ ប៉ូលីសបង់ក្លាដែសបានប្រើដំបងនិងគ្រាប់បែកផ្សែងកាលពីថ្ងៃអាទិត្យដើម្បីបំបែកហ្វូងបាតុករដែលបានចូលរួមក្នុងកូដកម្មមួយថ្ងៃរបស់ក្រុមប្រឆាំងនៅក្នុងរដ្ឋធានីដាក្កា។ មន្ត្រីសន្តិសុខរាប់ពាន់នាក់បានត្រូវដាក់ពង្រាយនៅទូទាំងទីក្រុងនេះ នៅក្នុងការប៉ុនប៉ងមួយដើម្បីថែរក្សារបៀបរៀបរយ នៅពេលដែលសាលារៀននិងហាងលក់ទំនិញបានបិទទ្វារនៅក្នុងការធ្វើកូដកម្មនេះ។ របាយការណ៍ពីរដ្ឋធានីនិយាយថាពួកអ្នកគាំទ្រក្រុមប្រឆាំងនិងពួកអ្នកទ្រទ្រង់រដ្ឋាភិបាលមានរបួសនៅក្នុងការរុញច្រានជាមួយក្រុមប៉ូលីស។ គណបក្សជាតិនិយមបង់ក្លេដេស ជាគណបក្សប្រឆាំងបានចាត់ចែងឱ្យមានកូដកម្មនេះ ជាការតវ៉ាប្រឆាំងនឹងសេចក្តីសម្រេចចិត្តរបស់រដ្ឋាភិបាលក្នុងការបែងចែករដ្ឋធានីដាក្កាជាតំបន់រដ្ឋបាលពីរ។ អ៊ីរ៉ង់៖ បណ្តាញផ្សាយព័ត៌មានអ៊ីរ៉ង់បានរាយការណ៍ថាកងទ័ពអ៊ីរ៉ង់បានបាញ់ទម្លាក់យន្តហោះចារកម្មសហរដ្ឋអាមេរិកគ្មានមនុស្សបើកបរមួយគ្រឿងក្រោយពីវាត្រូវគេចោទថាបានរំលោភចូលដែនអាកាសនៃប្រទេសអ៊ីរ៉ង់។ រុស្ស៊ី៖ ពលរដ្ឋរុស្ស៊ីបានចូលរួមបោះឆ្នោតនៅថ្ងៃអាទិត្យនៅទូទាំងតំបន់នៅម៉ោង៩ ក្នុងការបោះឆ្នោតសភា ដែលគេបានរំពឹងថានឹងធ្វើឱ្យខ្សោយដល់ការក្តាប់អំណាចរបស់គណបក្សគ្រប់គ្រងប្រទេសរបស់លោកពូទីន ក្នុងរដ្ឋឌុយម៉ា ដែលជាសភាជាន់ទាប។ ស៊ីរី៖ សម្ព័ន្ធអារ៉ាប់បានទុកពេលវេលាឱ្យស៊ីរីត្រឹមថ្ងៃអាទិត្យដើម្បីឆ្លើយតបនឹងសំណើបញ្ជូនក្រុមអ្នកសង្កេតការណ៍ចូលទៅក្នុងប្រទេសដែលមានអំពើហិង្សាមួយនេះនិងវាជាផ្នែកមួយនៃផែនការដើម្បីបញ្ឈប់ការបង្ក្រាបក្រុមបាតុកររបស់យោធានៅទីនោះ។ តួកគី៖ នៅពេលជាមួយគ្នានេះ ទីភ្នាក់ងារព័ត៌មាន Reuters បានផ្សាយកាលពីថ្ងៃអាទិត្យថាមានពួកប៉ូលីសសម្ងាត់យ៉ាងតិចណាស់១២នាក់បានរត់ចោលជួរចេញពីសំណង់អាគារសំរាប់ក្រុមស៊ើបការសម្ងាត់នៅក្នុងក្រុង Idlib នៅជិតព្រំដែនតួកគី។ This posting includes an audio/video/photo media file: Download Now |
| កម្ពុជាងាកទៅស្និទ្ធនឹងចិនខណៈពេលមិត្តភក្តិចិនងាកមកសិ្នទ្ធនឹងអាមេរិក Posted: 04 Dec 2011 08:35 PM PST ប្រទេសក្នុងតំបន់មួយចំនួនថ្មីៗនេះបានងាកបែរពីការធ្វើទំនាក់ទំនងជិតដិត ជាមួយប្រទេសចិនកុម្មុយនីស្តទៅរកទំនាក់ទំនងជាមួយប្រទេសកាន់លទ្ធិប្រជាធិបតេយ្យក្នុងពិភពលោកដូចជាសហរដ្ឋអាមេរិក។ តែកម្ពុជាបច្ចុប្បន្ននេះរិតតែបង្កើនទំនាក់ទំនងជាមួយប្រទេសចិនទៅវិញ។ ក្រុមអ្នកវិភាគមួយចំនួនក្នុងសហរដ្ឋអាមេរិក បាននិយាយថា កម្ពុជាត្រូវការពឹងអាងធនធានសេដ្ឋកិច្ចចិននិងនយោបាយមហាអំណាចចិនដើម្បីរស់រានហើយនឹងទប់ទល់ឥទ្ធិពលប្រទេសវៀតណាម។ លោក រីឆាដ សូឡូម៉ុង (Richard Solomon) អតីតអនុរដ្ឋមន្ត្រីការបរទេស សហរដ្ឋអាមេរិក បានលើកយកប្រទេសភូមាដែលធ្លាប់ជិតដិតជាមួយចិនតែបានងាកបែរទៅរកសហរដ្ឋអាមេរិកនៅសប្តាហ៍ថ្មីៗនេះ ហើយកូរ៉េខាងជើងបានបើកចំហរខ្លាំងជាងមុនក្នុងទំនាក់ទំនងជាអន្តរជាតិ។ លោកបានដាក់សំណួរពីការសម្រេចចិត្តនៃប្រទេសកម្ពុជា។ «ដូច្នេះតើរដ្ឋាភិបាលលោកហ៊ុន សែននឹងធ្វើអ្វី? កម្ពុជាពឹងផ្អែកជាសំខាន់លើទំនាក់ទំនងជាមួយចិនសម្រាប់ការអភិវឌ្ឍសេដ្ឋកិច្ច ហើយនឹងការការពារប្រឆាំង នឹងសម្ពាធរបស់វៀតណាមផងដែរបើតាមខ្ញុំសន្និដ្ឋាន»។ ថ្លែងទៅកាន់កិច្ចប្រជុំពិភាក្សានៅក្នុងសាកលវិទ្យាល័យ ប៊ឺកលី រដ្ឋកាលីហ្វ័រញ៉ា ប៉ុន្មានថ្ងៃថ្មីៗនេះអំពីបញ្ហា២០ឆ្នាំក្រោយសន្ធិសញ្ញាទីក្រុងប៉ារីស លោក Solomon បានបន្ថែមថា៖ «ប្រទេសកម្ពុជាជាច្រើនសតវត្សរ៍ហើយបានព្យាយាមរក្សាឯករាជ្យភាពនិងភាពរស់រានដោយការព្យាយាមតស៊ូក្នុងបរិយាកាសអន្តរជាតិដ៏មហាស្មុគស្មាញនេះ»។ ប្រទេសកម្ពុជាទទួលរងឥទ្ធិពលពីវៀតណាមនិងចិនយ៉ាងខ្លាំងចុងក្រោយក្នុង ពេលដែលប្រទេសទាំងពីរចិន និងវៀតណាមកំពុងមានវិវាទរវាងគ្នារឿងព្រំដែនទឹក។ វៀតណាមធ្លាប់ឈ្លានពានកម្ពុជាដើម្បីបណ្តេញកងទ័ពខ្មែរក្រហមក្នុងថ្ងៃទី៧ ខែមករា ឆ្នាំ១៩៧៩។ ក៏ប៉ុន្តែវៀតណាមទទួលរងការរិះគន់ពីការរំលោភយកទឹកដីកម្ពុជាហើយធ្វើឲ្យពលរដ្ឋខ្មែរមួយចំនួនធំបង្ហាញការមិនពេញចិត្តនិងភ្លេចពីការជួយរបស់វៀតណាម ទោះបីជាវៀតណាមបានបដិសេធពីការមិនបានប៉ះពាល់ទឹកដីកម្ពុជាយ៉ាងណាក្តី។ វៀតណាមរងការចោទប្រកាន់ផងដែរអំពីឥទ្ធិពលរបស់ខ្លួនលើក្រុមមន្ត្រីកម្ពុជាបច្ចុប្បន្នដែលអ្នកវិភាគចាត់ទុកថានោះក៏ជាបញ្ហាដែរ។ ចំណែកឯប្រទេសចិនដែលធ្លាប់គាំទ្ររបបខ្មែរក្រហម ដែលជារបបកាប់សម្លាប់ពលរដ្ឋខ្មែរស្លូតត្រង់ជិត២លាននាក់នោះ បានក្លាយជាប្រទេសផ្តល់ ជំនួយធំជាងគេនៅឆ្នាំចុងក្រោយនេះដោយបានផ្តល់ជំនួយដល់កម្ពុជាជាង ១,០០០ លានដុល្លារគឺស្មើឬច្រើនជាងជំនួយប្រទេសផ្តល់ជំនួយផ្សេងៗសម្រាប់ កម្ពុជា។ លោកសាស្ត្រាចារ្យ ចូអែល ប្រីងលី (Joel Brinkley) នៃសាកលវិទ្យាល័យ Stanford ក្នុងរដ្ឋកាលីហ្វ័រញ៉ាបានថ្លែងថាពលរដ្ឋកម្ពុជាពិតជាមានការរីករាយនឹងការផ្តល់ជំនួយចិនរាប់ពាន់លានដុល្លារ សម្រាប់អភិវឌ្ឍប្រទេសដូចជាការកសាងផ្លូវ ស្ពានតែលោកប្រមើលមើលឃើញថាកម្ពុជានឹងត្រូវសងចិនវិញ។ «ប៉ុន្តែប្រទេសចិនមិនមែនផ្តល់ជំនួយទៅកម្ពុជាក្នុងនាមជាអង្គការសប្បុរសធម៌ដ៏ធំនោះទេ។ ចិនចង់បានអ្វីត្រឡប់មកវិញដែរ»។ លោកសាស្ត្រាចារ្យ Joel Brinkley បានអះអាងថាអ្វីដែលចិនចង់បាននោះគឺទំនងជាធនធានធម្មជាតិកម្ពុជាជាច្រើនដូចជាប្រេងក្នុងឈូងសមុទ្រ រ៉ែជាច្រើនប្រភេទ ដែលចិននឹងប្រាប់កម្ពុជា។ លោក ប្រែដ អាដាម (Brad Adams) នាយកអង្គការសិទ្ធិមនុស្ស Human Rights Watch ប្រចាំតំបន់អាស៊ីនិយាយថាកំណើនឥទ្ធិពលចិនទាំងសេដ្ឋកិច្ចនិងនយោបាយមកលើកម្ពុជាជាបញ្ហាដោយសារការផ្តល់ជំនួយចិនមិនគិតពីលក្ខខណ្ឌនៃការធ្វើឲ្យប្រសើរឡើងនៃសិទ្ធិមនុស្ស ប្រជាធិបតេយ្យ និងការអនុវត្តច្បាប់នានា។ លោក Brad Adamsបានអះអាងថានេះហើយជាការលំបាកសម្រាប់ក្រុមប្រទេសអ្នកផ្តល់ជំនួយដទៃទៀតក្នុងការមានឥទ្ធិពលហើយនឹងចង់កែទម្រង់លើវិស័យនានាជាវិជ្ជមានសម្រាប់កម្ពុជា។ «ប៉ុន្តែខ្ញុំជឿថារដ្ឋាភិបាលកម្ពុជាមិនចង់ពឹងពាក់លើប្រទេសចិនតែមួយ។ ប្រជា ពលរដ្ឋកម្ពុជាមិនចង់បានរឿងដូច្នោះ។ ប្រជាពលរដ្ឋមិនចង់បាន ប្រទេសតែមួយ ដែលគេត្រូវពឹងពាក់នោះទេ»។ ថ្លែងមកកាន់វីអូអេផ្នែកខេមរភាសាក្នុងកិច្ចសម្ភាសមួយតាមរយៈទូរស័ព្ទ លោក ងួន ញ៉ិលអនុប្រធានទីមួយនៃរដ្ឋសភាប្រទេសកម្ពុជាពុំបានឆ្លើយបដិសេធ ឬទទួលយកពីការដែលកម្ពុជាជាប្រទេសពឹងពាក់ឬជិតដិតនឹងចិនតែមួយ នោះទេ។ តែលោកបានចោទជាសំណួរតបវិញថាប្រទេសជាច្រើនដែលជួយ កម្ពុជានោះមិនមែនបង្ហាញពីការជិតដិតនឹងប្រទេសទាំងនោះដែរឬ? «ប៉ុន្តែយើងសួរថា ចុះចិនឲ្យសហគមន៍អឺរ៉ុបឬមួយក៏សហរដ្ឋអាមេរិកខ្ចីលុយជាច្រើននោះ តើចិនជិតស្និទ្ធនឹងអាមេរិកដែរឬអត់? ទាល់តែឆ្លើយ នឹងសំណួរខ្ញុំអាហ្នឹងបានខ្ញុំនិយាយទៅរួច»។ ទោះជាយ៉ាងណាក៏ដោយលោក ងួន ញ៉ិលបានអះអាងថាកម្ពុជាធ្វើសមាហរណកម្មសាកលនិងក្នុងតំបន់ហើយកម្ពុជាជាសមាជិកមួយនៃអ.ស.ប។ លោក Solomon បច្ចុប្បន្នជានាយកវិទ្យាស្ថានសន្តិភាពសហរដ្ឋអាមេរិក (USIP)បានទទួលស្គាល់ថាចិនមានទំនាក់ទំនងកាន់តែជិតដិតជាងគេ ជាពិសេសជាងវៀតណាម ជាប្រទេសជិតខាងកម្ពុជាដែលមានទំនាក់ទំនងអាក្រក់ជាយូរហើយនោះ។ លោកថ្លែងថា ចិនក្លាយជាប្រទេសមានឥទ្ធិពលនិងកម្លាំងខ្លាំងអាចគាបសង្កត់លើប្រទេសវៀតណាមបើពលរដ្ឋកម្ពុជាមិនពេញចិត្តពីទង្វើអ្វីមួយ របស់វៀតណាមបច្ចុប្បន្ននេះ។ «ប្រទេសទាំងឡាយដែលអាចដាក់សម្ពាធលើវៀតណាមសព្វថ្ងៃនេះ ហើយ គាំទ្ររដ្ឋាភិបាលកម្ពុជារបស់លោក ហ៊ុន សែន គឺប្រទេសចិន»។ នៅពេលគេសួរថាតើលោកនាយករដ្ឋមន្ត្រីហ៊ុន សែនគ្រប់គ្រងដោយវៀតណាម លោក Solomon បានថ្លែងដោយពាក្យកំប្លែងថាលោក ហ៊ុន សែនគ្រប់គ្រង លោកហ៊ុន សែនខ្លួនគាត់។ ប្រទេសកម្ពុជាត្រូវគេចាត់ទុកថាជាប្រទេសក្រីក្រមួយក្នុងពិភពលោកហើយ មានពលរដ្ឋប្រមាណជិត៣០ភាគរយរស់នៅក្រោមបន្ទាត់នៃភាពក្រីក្រ។ កម្ពុជាពឹងផ្នែកជំនួយបរទេសច្រើនជាង១.០០០លានដុល្លារក្នុងមួយឆ្នាំៗ។ ក្រុមអ្នកវិភាគខ្លះទៀតបាននិយាយដែរថាការងាកបែរចេញពីចិននៃបណ្តា ប្រទេសអន់ថយទាំងសេដ្ឋកិច្ច ទាំងនយោបាយមួយចំនួនគឺដើម្បីការទទួលស្គាល់ជាអន្តរជាតិ។ ប្រទេសភូមានិងកូរ៉េខាងជើងដែលល្បីឈ្មោះអាក្រក់លើ ពិភពលោក ផ្នែករំលោភសិទ្ធិមនុស្ស ប្រជាធិបតេយ្យនិងការបិទសិទ្ធិសេរីភាព ពលរដ្ឋគ្រប់បែបយ៉ាងចង់បានការទទួលស្គាល់ជាអន្តរជាតិឡើងវិញពីប្រទេស លោកខាងលិចជាពិសេសសហរដ្ឋអាមេរិកក្រៅពីប្រាថ្នាចង់រួចផុតពីទណ្ឌកម្មនានាពីសហគមន៍អន្តរជាតិ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
