VOA News: ព័ត៌មាន: “មន្ត្រីវៀតណាម និងចិនមកទស្សនកិច្ចកម្ពុជាបន្តគ្នា ពេលមានការកាត់ទោសនួន ជា” plus 7 more |
- មន្ត្រីវៀតណាម និងចិនមកទស្សនកិច្ចកម្ពុជាបន្តគ្នា ពេលមានការកាត់ទោសនួន ជា
- អតីតកម្មាភិបាលខ្មែរក្រហម៖ ចលនាខ្មែរក្រហមរីកដោយសារការឈ្លានពាន
- នាយករដ្ឋមន្រ្តីហ៊ុន សែន លួងចិត្តវៀតណាមរឿងកាត់មេដឹកនាំខ្មែរក្រហម
- ជនរងគ្រោះពីអំពើហិង្សាផ្លូវភេទក្នុងរបបខ្មែរក្រហមចង់មានសំឡេងនៅតុលាការ
- ក្រុមអ្នកជំនាញថាកម្ពុជានៅមានសង្ឃឹមទាមទារឱ្យមានការផ្លាស់ប្តូរ
- ព័ត៌មានអន្តរជាតិវីអូអេ ០៧ ធ្នូ យប់
- ព័ត៌មានអន្តរជាតិវីអូអេ ០៧ ធ្នូ ព្រឹក
- ឡាវអាចប្រឈមនឹងការជំទាស់ដ៏ខ្លាំងពីរឿងសង់ទំនប់សាយ៉ាបូរី
| មន្ត្រីវៀតណាម និងចិនមកទស្សនកិច្ចកម្ពុជាបន្តគ្នា ពេលមានការកាត់ទោសនួន ជា Posted: 07 Dec 2011 02:59 PM PST កាលពីថ្ងៃអង្គារនេះ លោកនាយករដ្ឋមន្ត្រីហ៊ុន សែនបានហៅថា ការកាត់ទោសអតីតមេដឹកនាំជាន់ខ្ពស់ខ្មែរក្រហមថាជាផ្នែក មួយនៃការផ្តល់សច្ចធម៌ដល់ប្រទេសវៀតណាម។ លោកអ៊ាង សុផល្លែត អ្នកនាំពាក្យរបស់លោកនាកយករដ្ឋមន្ត្រី ហ៊ុន សែន បានថ្លែងប្រាប់ក្រុមអ្នកយកព័ត៌មានក្រោយពីជំនួបនៅទីស្តីការគណៈរដ្ឋមន្ត្រីយ៉ាងដូច្នេះថា៖ «ការកាត់ទោសអតីតមេដឹកនាំខ្មែរក្រហមនោះ រួមមាន លោកខៀវ សំផន លោក នួន ជា និងលោកអ៊ៀង សារី គឺជាសច្ចធម៌ប្រវត្តិសាស្ត្រសម្រាប់វៀតណាម។ ការកាត់ទោសរបបប៉ុល ពត គឺបញ្ជាក់ដល់ការជួយរបស់វៀតណាមមកដល់កម្ពុជាគឺមានភាពត្រឹមត្រូវ»។ <!--AV--> អ្នកនាំពាក្យនេះឲ្យដឹងថា លោកហ៊ុន សែនថ្លែងបែបនេះប្រាប់លោក ង្វៀន ផូត្រុង (Nguyen Phu Trong) អគ្គលេខាធិការនៃគណៈកម្មាធិការមជ្ឈឹមបក្សកុម្មុយនីស្តវៀតណាម ដែលបានមកបំពេញទស្សនកិច្ចជាផ្លូវការនៅកម្ពុជាពីថ្ងៃទី៦ ដល់ថ្ងៃទី៨ ខែធ្នូ។ ដំណើរទស្សនកិច្ចរបស់មេដឹកនាំជាន់ខ្ពស់វៀតណាមនេះបានកើតមានឡើងខណៈដែលលោកនួន ជា អតីតមេដឹកនាំជាន់ខ្ពស់ទីពីរនៃរបបខ្មែរក្រហមបន្ទាប់ពីប៉ុល ពត បានចោទថា ប្រទេសវៀតណាមបានសម្លាប់ប្រជាពលរដ្ឋខ្មែរ។ «ដូច្នេះនែ ទម្លាក់ឧក្រិដ្ឋប្រល័យពូជសាសន៍ ឧក្រិដ្ឋកម្មសង្គ្រាម អីៗអស់នេះ។ វាមិនមែនខ្មែរនឹងខ្មែរទេ។ យួននឹងខ្មែរ។ យួនអ្នកសម្លាប់ខ្មែរ។កុំយល់ថា ខ្មែរក្រហមវាអាក្រក់ ខ្មែរក្រហមប្រល័យពូជសាសន៍ ខ្មែរក្រហមឧក្រិដ្ឋកម្មសង្គ្រាម ខ្មែរក្រហមអីៗទាំងអស់។ វាអត់សោះ»។ ប៉ុន្តែមន្ត្រីស្ថានទូតវៀតណាមប្រចាំកម្ពុជា បានបដិសេធចោទប្រកាន់នេះ។ ដំណើរទស្សនកិច្ចរបស់លោកង្វៀន ផូត្រុងនេះផ្តោតលើការលើកកម្ពស់ការអនុវត្តកិច្ចព្រមព្រៀងនានាស្តីពីកិច្ចសហប្រតិបត្តិការ ថែរក្សាសន្តិភាព និងស្ថិរភាព។ ទស្សនកិច្ចមន្ត្រីវៀតណាមនេះធ្វើឡើងបន្ទាប់ពីទស្សនកិច្ចរបស់មន្ត្រីជាន់ខ្ពស់ប្រទេសចិនដែលជាសម្ព័ន្ធមិត្តជិតស្និទ្ធរបស់ខ្មែរក្រហម។ ប្រទេសវៀតណាមធ្លាប់ជាសម្ព័ន្ធមិត្តដ៏ជិតស្និទ្ធរបស់ខ្មែរក្រហម ហើយបានក្លាយជាសត្រូវនឹងគ្នា ពេលមានការកាប់សម្លាប់ប្រជាជនខ្មែរជិត២លាននាក់ក្នុងរបបខ្មែរក្រហម៕ This posting includes an audio/video/photo media file: Download Now |
| អតីតកម្មាភិបាលខ្មែរក្រហម៖ ចលនាខ្មែរក្រហមរីកដោយសារការឈ្លានពាន Posted: 07 Dec 2011 10:50 AM PST នៅថ្ងៃពុធនេះ សាក្សីសក្ដានុពលម្នាក់ដែលជាអតីតកម្មាភិបាលជាន់ខ្ពស់ខ្មែរក្រហមថ្លែងថា កម្ពុជាបានស្ថិតនៅក្នុងការឈ្លានពានដែលជំរុញឲ្យមានក្រុមបញ្ញាជនចូលរួមក្នុងចលនាកុម្មុយនីស្ដបែបម៉ៅនិយម។ លោក ឡុង នរិន្ទ អាយុ៧៣ ឆ្នាំអតីតកម្មាភិបាលជាន់ខ្ពស់ខ្មែរក្រហមដែលបានបម្រើការក្នុងក្រសួងការបរទេសជាមួយ អៀង សារី ចន្លោះពីខែមេសា ឆ្នាំ១៩៧៥ ដល់ខែមករា ឆ្នាំ១៩៧៩។ គាត់បានផ្ដល់សក្ខីកម្មនៅពេលដែលអង្គជំនុំជម្រះសាលាដំបូងរបស់សាលាក្ដីខ្មែរក្រហមកំពុងតែកាត់ទោសនួន ជា ខៀវ សំផន និងអៀង សារី ក្នុងសំណុំរឿង០០២នៅថ្ងៃនេះ។ លោក ឡុង នរិន្ទ បាននិយាយតាមការភ្ជាប់វីដេអូពីស្រុកម៉ាឡៃ ខេត្តបន្ទាយមានជ័យ ជាទីដែលគាត់កំពុងរស់នៅថា ការចូលរួមរបស់គាត់ក្នុងបក្សកុម្មុយនីស្ដគឺដើម្បីផ្ដួលរំលំការឈ្លានពានពីបរទេស។ «ចូលក្នុងបក្សហ្នឹង ដោយមិនដឹងខ្លួនទេ មែនទែនទៅ។ វាទាំងអស់គ្នាមែនទែនពីព្រោះប្រទេសយើងត្រូវគេឈ្លានពាន។ ត្រូវតែគេចូលរួមប្រយុទ្ធហើយ»។ លោក ឡុង នរិន្ទ បានទៅរៀនផ្នែកអប់រំ និងកីឡានៅប្រទេសឆេកូ ពីឆ្នាំ១៩៦០ ដល់ឆ្នាំ១៩៧០ គឺរយៈពេលដប់ឆ្នាំ។ គាត់បានអះអាងថា អតីតព្រះមហាក្សត្រសម្ដេចឪ នរោត្តម សីហនុ បានហៅរូបគាត់ឲ្យចូលរួមក្នុងចលនាតស៊ូនៅទីក្រុងប៉េកាំង ដែលមានអៀង សារី នៅទីនោះដែរ។ ទោះជាយ៉ាងណា ឡុង នរិន្ទ មិនបានបង្ហាញចំៗពីការឈ្លានពានរបស់បរទេសបែបណានោះទេ។ ក្រុមអតីតកម្មាភិបាលខ្មែរក្រហមបានចង្អុលដៃទៅរកវៀតណាមចំពោះការស្លាប់ប្រជាពលរដ្ឋកម្ពុជាយ៉ាងតិច១,៧លាននាក់ក្នុងពេលដែលពួកគេកាន់កាប់អំណាចពីឆ្នាំ១៩៧៥ ដល់ឆ្នាំ១៩៧៩។ នៅក្នុងការឆ្លើយក្នុងសវនាការ នួន ជា អតីតបងធំទី២ នៃរបបខ្មែរក្រហមបានចោទប្រកាន់ម្ដងហើយម្ដងទៀតលើវៀតណាមអំពីបញ្ហានេះ។ លោក ឡុង នរិន្ទ បានរៀបរាប់ថា ពួកកុម្មុយនីស្ដទ័ពព្រៃខ្មែរក្រហម បានបង្កើតស្ថានីយ៍វិទ្យុមួយ ដែលមានឈ្មោះថា វិទ្យុរណសិរ្សរួបរួមជាតិប្រជាធិបតេយ្យ ដែលវៀតណាមបានផ្ដល់ទីកន្លែងឲ្យធ្វើការផ្សាយចេញពីទីក្រុងហាណូយសម្រាប់បម្រើដល់ការតស៊ូប្រដាប់អាវុធនៅកម្ពុជា។ ថ្វីបើដូច្នេះមន្ដ្រីផ្លូវការស្ថានទូតវៀតណាម បានបដិសេធការចោទប្រកាន់របស់អតីតមេដឹកនាំខ្មែរក្រហមពីការជាប់ពាក់ព័ន្ធរបស់ទីក្រុងហាណូយ។ ឯកសាររបស់មជ្ឈមណ្ឌលឯកសារកម្ពុជាបានឲ្យដឹងថា វៀតណាម និងពួកខ្មែរក្រហមធ្លាប់ត្រូវរ៉ូវគ្នាក្នុងការជួយជ្រោមជ្រែងការតស៊ូរៀងៗខ្លួន ប៉ុន្ដែបានចាប់ផ្ដើមបែកបាក់គ្នាមុននឹងពួកខ្មែរក្រហមបានឡើងកាន់អំណាច។ លោក សុខ សំអឿន នាយកប្រតិបត្តិអង្គការក្រុមអ្នកច្បាប់ការពារសិទ្ធិកម្ពុជា មានប្រសាសន៍ថា ការលើកឡើងពីការជាប់ពាក់ព័ន្ធរបស់បរទេសនៃពួកអតីតមេដឹកនាំខ្មែរក្រហមអាចជាវិធីសាស្ដ្រស្វែងរកការសម្រាលទោស និងជាការព្យាយាមបង្ហាញពីភាពត្រឹមត្រូវនៃទ្រឹស្ដីកុម្មុយនីស្ដ បែបម៉ៅនិយម។ សូមបញ្ជាក់ថា អង្គជំនុំជម្រះសាលាដំបូងនៅថ្ងៃនេះ បានបន្ដបើកសវនាការដេញដោលវែកញែកលើឬសគល់នៃការកកើត នៃបក្សកុម្មុយនីស្ដពួកខ្មែរក្រហម។ ជនជាតិដើមភាគតិច លោក រ៉ូម៉ាម យន់ អតីតគណៈស្រុកអណ្ដូងមាស ខេត្តរតនគិរី នៅក្នុងរបបខ្មែរក្រហមក៏បានផ្ដល់សក្ខីកម្មនៅក្នុងការកាត់ទោសនៅថ្ងៃនេះដែរ។ លោក រ៉ូម៉ាម យន់ បានឆ្លើយហាក់ដូចជាមានការស្ដាយក្រោយថា គាត់បាន «ជ្រុលខ្លួន» នៅក្នុងបក្សកុម្មុយនីស្ដជាមួយពួកខ្មែរក្រហម ហើយការធ្វើបដិវត្តន៍របស់ពួកខ្មែរក្រហមបានបង្ហាញភាពស្អាតស្អំតែពីដំបូងមុនការឡើងកាន់អំណាចតែប៉ុណ្ណោះ៕ This posting includes an audio/video/photo media file: Download Now |
| នាយករដ្ឋមន្រ្តីហ៊ុន សែន លួងចិត្តវៀតណាមរឿងកាត់មេដឹកនាំខ្មែរក្រហម Posted: 07 Dec 2011 09:21 AM PST ក្រុមអ្នកវិភាគបាននិយាយនៅថ្ងៃពុធនេះថា ការដែលលោកនាយករដ្ឋមន្ត្រីថា ការកាត់ទោសអតីតមេដឹកនាំជាន់ខ្ពស់ខ្មែរក្រហម គឺជាការផ្តល់សច្ចធម៌ដល់វៀតណាមនោះគឺជាការលួងលោមវៀតណាម។ លោកនាយករដ្ឋមន្ត្រី ហ៊ុន សែន បានថ្លែងប្រាប់លោក ង្វៀន ភូត្រុង (Nguyen Phu Trong) អគ្គលេខាធិការនៃគណៈកម្មាធិការមជ្ឈឹមបក្សកុម្មុយនីសវៀតណាម កាលពីថ្ងៃអង្គារថា ការកាត់ទោសអតីតមេដឹកនាំខ្មែរក្រហមជាន់ខ្ពស់បីនាក់នេះគឺជាផ្នែកមួយនៃការផ្តល់សច្ចធម៌ដល់វៀតណាម ខណៈដែលលោក នួន ជា បានធ្វើការវាយប្រហារផ្ទួនៗទៅលើវៀតណាមថាបានប្រព្រឹត្តអំពើឃោរឃៅមកលើប្រជាពលរដ្ឋខ្មែរ។ <!--AV--> លោក ឡាវ ម៉ុងហៃ អ្នកវិភាគឯករាជ្យបានថ្លែងថាការលើកឡើងរបស់លោកនាយករដ្ឋមន្ត្រីហ៊ុន សែននេះ ក្នុងគោលបំណងធ្វើឲ្យវៀតណាមធូរចិត្តចំពោះការចោទប្រកាន់វៀតណាមពីការស្លាប់ប្រជាពលរដ្ឋខ្មែរនៅចុងទសវត្សរ៍ឆ្នាំ១៩៧០។ លោក ឡាវ ម៉ុងហៃ បានបន្ថែមថារដ្ឋាភិបាលកម្ពុជាបានបញ្ចោញជំហរការពារវៀតណាមពីការចោទប្រកាន់របស់អតីតមេដឹកនាំខ្មែរក្រហមជាន់ខ្ពស់នៅពេលមេដឹកនាំជាន់ខ្ពស់វៀតណាមមកទស្សនកិច្ចនៅកម្ពុជា។ «ការលើកឡើងរបស់លោកនាយករដ្ឋមន្ត្រីហ៊ុន សែន នេះចង់ការពារប្រទេសវៀតណាមថាអត់មានការពាក់ព័ន្ធនឹង(ការចោទប្រកាន់នេះ) ទេ ដើម្បីជាភ្ញៀវកិត្តិយសធ្វើទស្សនកិច្ចនេះគឺដើម្បីបញ្ជាក់ប្រាប់មេដឹកនាំវៀតណាមកុំឱ្យមានការព្រួយបារម្ភ ក្នុងកាលៈទេសៈមួយ ដែលមានការលើកឡើងនូវការចោទប្រកាន់វៀតណាម»។ លោក សុន ឆ័យ តំណាងរាស្ត្រគណបក្សសម រង្សី បានលើកឡើងថា ការចោទប្រកាន់វៀតណាម ដោយអតីតមេដឹកនាំខ្មែរក្រហមជាន់ខ្ពស់ជាផ្លូវការនៅក្នុងសាលាក្តីខ្មែរក្រហមនេះមិនត្រឹមតែបាក់មុខមាត់វៀតណាមប៉ុណ្ណោះទេ ប៉ុន្តែថែមទាំងជួយជំរុញឱ្យវៀតណាមបង្ហាញការពិតនៃការកាប់សម្លាប់ប្រជាពលរដ្ឋខ្មែរ។ «ប្រវត្តិសាស្ត្រមិនអាចបំភាន់ការពិតបានទេ។ ការសម្តែងមតិយោបល់ក្នុងឋានៈជានាយករដ្ឋមន្ត្រីគ្រាន់តែជាយោបល់បុគ្គលម្នាក់ដែលការកាត់សេចក្តី និងការស្រាវជ្រាវនានានឹងបង្ហាញការពិតនៅទីបញ្ចប់។ ការផ្តល់សច្ចធម៌ដល់វៀតណាម ខ្ញុំនិយាយថាវាគ្រាន់តែជាយោបល់ផ្ទាល់របស់គាត់។ អ្វីដែលជាសច្ចធម៌នោះមិនមែនជាការអះអាងរបស់បុគ្គលណាទេ។ វាស្ថិតនៅលើប្រវត្តិសាស្ត្រនៃសកម្មភាពជាក់ស្តែង»។ ពួកខ្មែរក្រហម និងបក្សកុម្មុយនីស្តវៀតណាមមានទំនាក់ទំនងល្អ ប៉ុន្តែទំនាក់ទំនងក្រោយឆ្នាំ១៩៧៣ បានធ្លាក់ចុះយ៉ាងខ្លាំងរហូតដល់ការចាប់ផ្តើមធ្វើសង្គ្រាមតាមព្រំដែនក្នុងខែមេសា ឆ្នាំ១៩៧៧។ នេះបើយោងតាមឯកសារ។ លោក នួន ជា ដែលជាអតីតមេដឹកនាំជាន់ខ្ពស់ទី២នៃរបបខ្មែរក្រហមបន្ទាប់ពីប៉ុល ពត បានស្តីបន្ទោសវៀតណាមចំពោះអំពើឃោរឃៅលើប្រជាពលរដ្ឋខ្មែរដោយលោកបានបញ្ជាក់ថា កងទ័ពវៀតណាមបានសម្លាប់ប្រជាពលរដ្ឋខ្មែរ។ លោកហោ ណាំហុង រដ្ឋមន្ត្រីក្រសួងការបរទេសកម្ពុជា បានថ្លែងប្រាប់ក្រុមអ្នករាយការណ៍ព័ត៌មានក្រោយពីជំនួបជាមួយលោក ផាម ប៊ីញ មីញ (Pham Binh Minh) ដែលជារដ្ឋមន្ត្រីការបរទេសវៀតណាមយ៉ាងដូច្នេះថា៖ «នេះជាការបកស្រាយរបស់គាត់។ ការពិត ជាការផ្សេង។ នេះជាការបកស្រាយរបស់ជន ដែលជាប់ចោទដោយអំពើប្រល័យពូជសាសន៍ និងអំពើឧក្រិដ្ឋកម្មប្រឆាំងនឹងមនុស្សជាតិ»។ មន្ត្រីស្ថានទូតវៀតណាមប្រចាំកម្ពុជាក៏បានបដិសេធការចោទប្រកាន់នេះដែរ៕ This posting includes an audio/video/photo media file: Download Now |
| ជនរងគ្រោះពីអំពើហិង្សាផ្លូវភេទក្នុងរបបខ្មែរក្រហមចង់មានសំឡេងនៅតុលាការ Posted: 07 Dec 2011 09:34 AM PST ក្រុមអ្នកច្បាប់ការពារសិទ្ធិកម្ពុជា បានរៀបចំកម្មវិធីមួយស្តីពីការស្តាប់សំឡេងការពិតរបស់ស្រ្តីនៅក្នុងរបបខ្មែរក្រហម ដែលមានរយៈពេលពីរថ្ងៃ ដើម្បីឲ្យក្រុមគ្រួសារជនរងគ្រោះដោយសារការរំលោភផ្លូវភេទ នៅក្នុងរបបខ្មែរក្រហម បានសម្តែងការឈឺចាប់របស់ខ្លួន ជាសាធារណៈ។ កម្មវិធីនេះ បានធ្វើឡើងស្របពេលនឹងសាលាក្តីខ្មែរក្រហមកំពុងដំណើរការកាត់ទោសពេញអង្គសេចក្តីលើមេដឹកនាំជាន់ខ្ពស់ខ្មែរក្រហមចំនួនបួនរូប ចំពោះសំណុំរឿង០០២ ដែលរួមមានមេមនោគមវិជ្ជា និងជាអតីតប្រធានរដ្ឋសភាគឺនួន ជា អតីតប្រមុខរដ្ឋនៅក្នុងរបបកម្ពុជាប្រជាធិបតេយ្យ ខៀវ សំផន អតីតរដ្ឋមន្ត្រីក្រសួងការបរទេស អៀង សារី ចំណែកឯកអៀង ធីរិទ្ធិ អតីតរដ្ឋមន្ត្រីក្រសួងសង្គមកិច្ច ត្រូវបានសាលាក្តីសម្រេចថាមិនមានកាយសម្បទាគ្រប់គ្រាន់ដើម្បីធ្វើការសាកសួរទេ។ មេដឹកនាំខ្មែរក្រហមកំពូលត្រូវបានជាប់ចោទពីបទឧក្រិដ្ឋកម្មសង្គ្រាម ឧក្រិដ្ឋកម្មប្រល័យពូជសាសន៍ និងឧក្រិដ្ឋកម្មប្រឆាំងនឹងមនុស្សជាតិ។ សាលាក្តីប្រល័យពូជសាសន៍សម្រាប់កាត់ទោសពួកអតីតមេដឹកនាំខ្មែរក្រហមមិនបានដាក់បញ្ចូលកម្មវិធីសម្រាប់ជនរងគ្រោះដោយសារការរំលោភផ្លូវភេទក្នុងរបបខ្មែរក្រហមក្នុងសវនាការសំណុំរឿង០០២ទេ។ លោក ដួង សាវន អ្នកសម្របសម្រួលកម្មវិធីគម្រោងហិង្សាផ្លូវភេទក្រោមរបបខ្មែរក្រហម របស់ក្រុមអ្នកច្បាប់ការពារសិទ្ធិកម្ពុជាបានបញ្ជាក់ថា នៅក្នុងសាលាក្តីខ្មែរក្រហមការរំលោភសេពសន្ថវៈក្រៅអាពាហ៍ពិពាហ៍ តុលាការមិនបានយកមកដេញដោលទេ គឺមានតែករណីមួយប៉ុណ្ណោះគឺរបស់កាំង ហ្គេចអ៊ាវ ហៅឌុច។ លោកបានមានប្រសាសន៍ថា ការរៀបចំវេទិកានេះគឺដើម្បីផ្តល់ឱកាសដល់ជនរងគ្រោះ ដែលត្រូវបានគេរំលោភផ្លូវភេទ ឬក៏ជួបហេតុការណ៍ផ្ទាល់បាននិយាយរឿងរ៉ាវរបស់ខ្លួនចេញមកក្រៅដើម្បីចែករំលែកបទពិសោធន៍ដល់សាធរណៈជន។ «សូមអំពាវនាវដល់ជនរងគ្រោះដ៏ទៃទៀត មានសេចក្តីក្លាយហាន ហើយចែករំលែកនូវព័ត៌មាននេះឡើង។ បើតាមបទពិសោធន៍ដែលគាត់និយាយចេញមកនេះ ហើយការនិយាយចេញមកនេះគឺធ្វើឲ្យអារម្មណ៍គាត់ធូរស្រាល ធូរស្បើយជាងការលាក់បាំងអាថកំបាំងនេះនៅជាមួយ»។ លោក អ៊ឹម សុភា ប្រធានកម្មវិធីផ្សព្វផ្សាយនៃអង្គភាពការពារជនរងគ្រោះរបស់សាលាក្តីខ្មែរក្រហមបាននិយាយថា រាល់ការផ្តល់សក្ខីកម្មទាំងឡាយគឺជាការសម្រេចចិត្តរបស់ចៅក្រមតែប៉ុណ្ណោះនៅការកំណត់ថាតើសាក្សីរូបណានឹងត្រូវយកទៅបំភ្លឺចំពោះបទឧក្រិដ្ឋដែលត្រូវបានចោទប្រកាន់នោះ។ «ការបង្ខំឲ្យរៀបការគឺជាបទល្មើសមួយនៅក្នុងបទល្មើសផ្សេងៗ ដែលត្រូវបានចោទនៅក្នុងហ្នឹង។ អញ្ចឹងខ្ញុំមិនអាចបញ្ជាក់បាន ថាតើតុលាការហ្នឹងតម្រូវឲ្យជនរងគ្រោះហ្នឹង រូបណាខ្លះដែលត្រូវទៅបំភ្លឺនៅក្នុងនីតិវិធីតុលាការដែលកំពុងប្រព្រឹត្តិទៅនោះ»។ មានជនរងគ្រោះអំពើហិង្សាផ្លូវភេទប្រមាណជាង៦០០នាក់បានដាក់ពាក្យបណ្តឹងទៅសាលាក្តីខ្មែរក្រហម។ នេះបើតាមការបញ្ជាក់របស់លោក អ៊ឹម សុភា។ អ្នកស្រី ព្រាប ភីន អាយុ៤៥ មកពីខេត្តព្រៃវែង បានមានប្រសាសន៍ថា អ្នកស្រីមានបងស្រីបង្កើតឈ្មោះសាដេត ត្រូវបានពួកខ្មែរក្រហមចាប់រំលោភ រួចហើយបង្ខំឲ្យអ្នកស្រីឈរមើលព្រឹត្តិការណ៍ទាំងនោះ។ អ្នកស្រីបានបញ្ជាក់ថា អ្នកស្រីមិនអាចបំភ្លេចរឿងរ៉ាវដ៏ជូរចត់ ក្នុងរបបខ្មែរក្រហមបានទេ ដែលបានប្រព្រឹត្តទៅលើក្រុមគ្រួសាររបស់អ្នកស្រី។ «ខ្ញុំមានតែរូបរាងកាយ តែចិត្តខ្ញុំឥតមាននៅនឹងខ្លួនទេ។ ខ្ញុំតក់ស្លុតទាំងអស់។ បើសិននឹងនឹកឃើញរឿងហ្នឹង ខ្ញុំខឹងណាស់។ បើសិនជាអាចថា យើងសងសឹកផ្ទាល់ដៃបាន វាមិនងាយចប់ទេ សាច់រឿងយើងហ្នឹង»។ លោក គង់ វណ្ណ ហៅចៅគិត អាយុ៥៤ឆ្នាំ មកពីស្រុកស៊ីធរកណ្តាល ខេត្តព្រៃវែង បាននិយាយថា បងស្រីរបស់លោកឈ្មោះគង់ សំអន អាយុ២៤ឆ្នាំ ត្រូវបានពួកខ្មែរក្រហមបួននាក់ចាប់រំលោភ រួចហើយសម្លាប់ចោល។ លោកបានបញ្ជាក់ថា ពួកមេដឹកនាំខ្មែរក្រហមសមនឹងទទួលទោសអស់មួយជីវិត។ «ខ្ញុំចង់ឲ្យទទួលខុសត្រូវ ថាខ្លួនបានធ្វើហើយ។ តើហេតុអីបានជាមិនទទួលខុសត្រូ? បាទ! ខ្ញុំចង់ដាក់ទោសទណ្ឌហ្នឹង មិនធម្មតា។ ខ្ញុំថាឥឡូវទោសទណ្ឌនៅក្នុងច្បាប់យើងមិនដល់ប្រហារជីវិត ក៏ដាក់ទោសអស់មួយជីវិតដែរ! បាទ! ព្រោះជីវិតជនរងគ្រោះច្រើនណាស់មិនមែនតែក្រុមគ្រួសារខ្ញុំ ម្នាក់។ ខ្ញុំ ក្រុមគ្រួសារខ្ញុំ មានគ្នារហូតដល់១១នាក់ អស់រលីងនៅសល់តែបួននាក់ទេ»។ យោងតាមសៀវភៅ «អំពើហិង្សាខាងផ្លូវភេទនៅក្នុងរបបកម្ពុជាប្រជាធិបតេយ្យ» បានឲ្យដឹងថា គោលនយោបាយផ្លូវភេទរបស់ពួកខ្មែរក្រហមរួមមានពេស្យាកម្មដោយបង្ខំ ការបង្ខំអាក្រាតកាយ ការចាប់រំលោភ ការមានផ្ទៃពោះដោយបង្ខំ ការកាត់អវយវៈផ្លូវភេទ និងអំពើហិង្សាផ្លូវភេទនៅក្នុងមន្ទីរឃុំឃាំងជាដើម៕ This posting includes an audio/video/photo media file: Download Now |
| ក្រុមអ្នកជំនាញថាកម្ពុជានៅមានសង្ឃឹមទាមទារឱ្យមានការផ្លាស់ប្តូរ Posted: 07 Dec 2011 01:46 AM PST វាគ្មិនមួយក្រុមបាននិយាយទៅកាន់ពលរដ្ឋខ្មែរអាមេរិកាំងកាលពីខែវិច្ឆិកាកន្លងទៅនេះ ដោយស្នើថាអនាគតកម្ពុជានៅមានសង្ឃឹមនៅឡើយក៏ប៉ុន្តែការផ្លាស់ប្តូរនានា នឹងត្រូវកើតឡើងតាមរយៈមធ្យោបាយអហិង្សាផ្សេងៗគ្នា។ ថ្លែងទៅកាន់ក្រុមមួយក្នុងកិច្ចពិភាក្សាក្នុងសាកលវិទ្យាល័យ ប៊ឺកលី រដ្ឋកាលីហ្វ័រញ៉ា លោក រីឆាដ សូឡូម៉ុង (Richard Solomon) អតីតអនុរដ្ឋមន្ត្រីក្រសួងការបរទេសសហរដ្ឋអាមេរិកមានប្រសាសន៍ថា នេះជាយុគ«សម័យថ្មី»នៃកិច្ចការអន្តរជាតិដែលបង្កើតឡើងដោយប្រព័ន្ធអ៊ិនធឺណិត និងប្រព័ន្ធទំនាក់ទំនងអេឡិកត្រូនិកផ្សេងៗទៀតដែលធ្វើឲ្យក្លាយជាមធ្យោបាយថ្មីនៃការផ្លាស់ប្តូរនៅកន្លែងនានាដូចជាប្រទេសកម្ពុជាជាដើម។ លោក Solomon ដែលជានាយកវិទ្យាស្ថានសន្តិភាពសរអា (United States Institute of Peace) ជាវាគ្មិននៃកិច្ចពិភាក្សាស្តីពីកិច្ចព្រមព្រៀងទីក្រុងប៉ារីសនិងស្ថានការណ៍ក្នុងប្រទេសកម្ពុជាបច្ចុប្បន្ន។ លោកបានថ្លែងទៅកាន់ក្រុមអ្នកចូលរួមដែលមានមនុស្សជាច្រើនបាននិយាយថាពួកគេស្រងាកចិត្តនឹងការរីកចម្រើនដែលរដ្ឋាភិបាលបានធ្វើបន្ទាប់ពីការចុះហត្ថលេខាលើសន្ធិសញ្ញាទីក្រុងប៉ារីសកាលពីថ្ងៃទី២៣ ខែតុលាឆ្នាំ១៩៩១។ «ក្តីសង្ឃឹមពិតប្រាកដដែលខ្ញុំឃើញគឺទាក់ទងខ្លាំងទៅលើឧទាហរណ៍ដែលកំពុងកើតឡើងនៅប្រទេសកាន់សាសនាអ៊ិស្លាម ដូចជាចលនាបដិវត្តន៍ក្នុងពិភពអារ៉ាប់។ មួយផ្នែកអាចដូចជាបដិវត្តន៍នៅប្រទេសភូមាដែលការផ្លាស់ប្តូរនោះ កើតឡើងដោយសារតែសម្ពាធពីមហាជន។ ប្រសិនបើមានការរៀបចំល្អនឹងអាចនាំឲ្យមានការផ្លាស់ប្តូរដ៏ធំធេងក្នុងរដ្ឋាភិបាល»។ លោកបានផ្តល់តម្លៃនៃបណ្តាញព័ត៌មានអេឡិកត្រូនិកទាក់ទងនឹងការផ្លាស់ប្តូរយ៉ាងដូច្នេះទៀតថា៖ «វាផ្តល់ឲ្យមានសំឡេងឮយ៉ាងខ្លាំងទៅកាន់មហាជននិងបណ្តាប្រទេសជាច្រើន។ ប្រព័ន្ធនេះអាចផ្តួលរំលំរដ្ឋាភិបាលអាក្រក់ដូចយើងដឹងហើយនៅក្នុងប្រទេស អេហ្ស៊ីប ក្នុងប្រទេសលីប៊ី ក្នុងប្រទេសទុយនេស៊ី និងបណ្តាប្រទេសដទៃទៀតដែលមានអ្នកដឹកនាំមហាពុករលួយ»។ បទសម្ភាស៍និងព្រឹត្តិការណ៍ផ្សេងទៀតទាក់ទងនឹងខួបនៃសន្ធិសញ្ញាទីក្រុងប៉ារីស៖ <!--AV--> <!--AV--> លោក ផៃ ស៊ីផាន អ្នកនាំពាក្យមួយរូបនៃរដ្ឋាភិបាលបានអះអាងថា ប្រទេសកម្ពុជានិងប្រទេសអារ៉ាប់និងប្រទេសផ្សេងៗទៀតដែលកំពុងមានបញ្ហាខុសគ្នាដូចមេឃនិងដី ទាំងប្រព័ន្ធនយោបាយ ការចូលរួមរបស់ប្រជាពលរដ្ឋក្នុងប្រព័ន្ធលទ្ធិប្រជាធិបតេយ្យសេរីពហុបក្ស។ «អាហ្នឹង យើងមិនអាច ប្រដូចជាមួយគេបានទេ។ យើងដឹងហើយនូវស្ថានភាពនេះ ទាំងទិសដៅបង្កឲ្យមានសេរីភាពដល់ប្រជាពលរដ្ឋនៅក្នុងការចូលរួមអភិវឌ្ឍសង្គមសេរីមួយ សង្គមលទ្ធិប្រជាធិបតេយ្យ ដែលអំណាចធំលើអំណាចរបស់ប្រជាពលរដ្ឋដែលលោកមានសិទ្ធិក្នុងការជ្រើសរើសអ្នកដឹកនាំគណបក្ស ដែលលោកទុកចិត្តហ្នឹងគឺយើងបានធ្វើជាបណ្តើរៗ»។ លោកបានទាញឲ្យមានការចាប់អារម្មណ៍ពីប្រវត្តិតស៊ូដើម្បីការផ្លាស់ប្តូរនៅកម្ពុជា តាមរយៈបរទេស និងចលនាតស៊ូដោយក្រុមខ្មែរក្រហមដែលកម្ពុជាធ្លាប់ជួបប្រទះ បានធ្វើឲ្យប្រទេសរងគ្រោះដល់បច្ចុប្បន្ន។ «បទពិសោធន៍កន្លងមកពីការបះបោរ អំពីឆ្លងកាត់អំពីការផ្លាស់ប្តូរអំណាចតាមរយៈហិង្សា មានការពិសោធន៍អំពីការបាត់បង់សិទ្ធិសេរីភាពប្រជាពលរដ្ឋទាំងស្រុង គឺនៅរបបប្រល័យពូជសាសន៍។ អាហ្នឹងជាការពិសោធន៍ដើមរបស់យើង។ ហើយការពិសោធន៍នៃសង្គ្រាមស៊ីវិលដែលធ្វើឲ្យយើងដើរថយក្រោយប្រៀបធៀបជាមួយ អ្នកជិតខាងជាបទពិសោធន៍មួយដ៏ត្រឹមត្រូវហើយជាការចារទុកនៅក្នុងចិត្តយើង ហើយយើងធ្វើដូចម្តេចឲ្យគេចផុតពីហ្នឹង។ នេះជាការពិសោធន៍គ្រឹះរបស់យើង»។ លោកបានបន្ថែមថា បញ្ហាដែលកើតឡើងនៅពិភពអារ៉ាប់និងប្រទេសដទៃទៀតហ្នឹងជាមេរៀនសម្រាប់កម្ពុជាក្នុងថ្ងៃអនាគត។ ចលនាបដិវត្តន៍នៅពិភពអារ៉ាប់ ឬហៅថា អារ៉ាប់ស្រ្ពីង (Arab Spring) ឃើញថាមានការដួលរលំជនផ្តាច់ការជាច្រើនដែលបានកាន់អំណាចជាច្រើនទសវត្សរ៍ហើយបានគាបសង្កត់លើបញ្ហាសិទ្ធិមនុស្សនិងលទ្ធិប្រជាធិបតេយ្យ។ លោក ប្រែដ អាដាម (Brad Adams) នាយកអង្គការ Human Rights Watch ប្រចាំតំបន់អាស៊ី ថ្លែងថា ប្រទេសកម្ពុជាកំពុងធ្វើដំណើរទៅកាន់ការដឹកនាំរដ្ឋដោយបក្សតែមួយ ដោយចាកចេញពីប្រជាធិបតេយ្យសេរី។ អំពើពុករលួយដ៏មហិមានៅតែជាក្តីបារម្ភ ដូចជាភាពលម្អៀងនៃប្រព័ន្ធយុត្តិធម៌និងស្ថាប័នគ្រប់គ្រងការបោះឆ្នោតដែរ។ «បញ្ហាទាំងនេះហើយជាអ្វីដែលធ្វើឲ្យមានប្រជាធិបតេយ្យ គឺថាត្រូវឲ្យស្ថាប័ន អស់នេះដំណើរការ ដោយឯករាជ្យដើម្បីផលប្រយោជន៍ពលរដ្ឋ»។ លោក Brad Adams បានបញ្ជាក់ថាពលរដ្ឋកម្ពុជាត្រូវកំណត់ជាមុនពេលមេដឹកនាំខ្លួនស្ថិតក្នុងអំណាចកំពុងកាន់អំណាចថាជាមេដឹកនាំប្រភេទណា? «តើលោក ហ៊ុន សែនជាជនផ្តាច់ការឬ? តើគាត់ជាអ្នកដឹកនាំប្រើអំណាចគាបសង្កត់ឬ? តើគាត់ជាមេដឹកនាំធ្វើឲ្យសេដ្ឋកិច្ចជឿនលឿន? តើគាត់ជាមេដឹកនាំរដ្ឋពុករលួយ? យើងត្រូវតែកំណត់ឲ្យបានច្បាស់លើបញ្ហាទាំងនេះ ខណៈពេលដែលគាត់កំពុងកាន់អំណាច មិនមែនបន្ទាប់ពីគាត់ចាកចេញពីអំណាចទេ»។ នៅក្នុងប្រទេសអេហ្ស៊ីប ពលរដ្ឋបានងើបឡើងប្រឆាំងនឹងប្រធានាធិបតីដែលកាន់អំណាចជាច្រើនឆ្នាំ។ លោកបានបន្តថា៖ «ហើយជារឿងដ៏គួរឲ្យអស់សំណើចគឺមុនពេលកើតបដិវត្តន៍ Arab Spring ក្រុមមេដឹកនាំទាំងនេះត្រូវគេគិតថាជាកម្លាំងនៃស្ថិរភាពហើយត្រូវគេផ្តល់កេរ្តិ៍ឈ្មោះខាងការធ្វើឲ្យមានសេដ្ឋកិច្ចរុងរឿងហើយជាសម្ព័ន្ធមិត្តល្អ។ តែក្រោយពីមេដឹកនាំទាំងនោះត្រូវគេបណ្តេញចេញពីអំណាច ថ្ងៃបន្ទាប់មក មេដឹកនាំទាំងនោះត្រូវគេឲ្យឈ្មោះថាជាជនផ្តាច់ការ»។ លោកនាយករដ្ឋមន្ត្រីហ៊ុន សែនមិនទទួលយកការប្រៀបធៀបលោកទៅនឹងមេដឹកនាំផ្តាច់ការនោះទេ។ នៅក្នុងសប្តាហ៍ថ្មីៗនេះលោកគំរាមចាត់វិធានការប្រឆាំងអ្នកណាដែលប្រៀបធៀបលោកទៅនឹងអតីតមេដឹកនាំលីប៊ី ម៉ូអាម៉ា ហ្កាដាហ្វី (Moammar Gaddafi) ដែលត្រូវសម្លាប់កាលពីខែមុនបន្ទាប់ពីមានការបះបោររបស់ប្រជាពលរដ្ឋស៊ីវិល។ ទោះជាយ៉ាងណាក៏ដោយ លោក Adams បានថ្លែងថា ការផ្លាស់ប្តូរក្នុងប្រទេសកម្ពុជាត្រូវតែកើតឡើងដោយមធ្យោបាយអហិង្សា។ «ដូច្នេះអំណាចអាចផ្លាស់ប្តូរតាមមធ្យោបាយជាច្រើន។ អាចផ្លាស់ប្តូរដោយសារមេដឹកនាំចាកចេញពីអំណាច។ លោកហ៊ុន សែន ហាក់ដូចជាមិនធ្វើដូច្នោះទេ។ ការផ្លាស់ប្តូរអាចកើតឡើងតាមរយៈការបោះឆ្នោតដែលសេរីនិងយុត្តិធម៌។ អាចផ្លាស់ប្តូរតាមរយៈបាតុកម្មតវ៉ាដោយមហាជន។ រឿងនេះយើងឃើញថាកើតមាននៅក្នុងប្រទេសជាច្រើនលើពិភពលោក។ ដូចលោកដឹងហើយគំនិតទាំងអស់នេះគឺហៅថាអំណាចប្រជាពលរដ្ឋ»។ លោក Adams បានលើកយកបញ្ហាផ្តួលរំលំរដ្ឋាភិបាលក្នុងប្រទេសហ្វីលីពីន កាលពីឆ្នាំ១៩៨៦មកធ្វើជាអំណះអំណាងដែរ។ «ដូច្នេះ លោកដឹងហើយគឺបញ្ហាស្រេចលើប្រជាពលរដ្ឋកម្ពុជាខ្លួនឯង តើត្រូវចាត់វិធានការដូចម្តេច។ អ្វីដែលខ្ញុំណែនាំឲ្យធ្វើគឺធ្វើតាមរយៈអហិង្សា។ អំពើហិង្សានឹងមិនអាចដោះស្រាយបញ្ហាបានទេ តែវានឹងអាចគ្រាន់តែជាការសម្លាប់ឬធ្វើឲ្យរបួសជនស្លូតត្រង់ ហើយនឹងនាំឲ្យមានមហន្តរាយដល់កម្ពុជា»។ បាតុកម្មដ៏ធំមួយចុងក្រោយប្រឆាំងនឹងលោកនាយករដ្ឋមន្ត្រីហ៊ុន សែនដែលកាន់អំណាច២៦ឆ្នាំ ហើយមានការបង្រ្កាបយ៉ាងឃោរឃៅគឺកើតឡើងក្នុងឆ្នាំ១៩៩៨ ដែលមានអ្នកគាំទ្រក្រុមប្រឆាំងត្រូវបាត់ខ្លួននិងត្រូវសម្លាប់។ លោក ចូអែល ប៊្រីងលី (Joel Brinkley) សាស្ត្រាចារ្យនៅសាកលវិទ្យាល័យ Stanford រដ្ឋកាលីហ្វ័រញ៉ា និងជាអ្នកនិពន្ធសៀវភៅកម្ពុជាក្នុងសម័យបច្ចុប្បន្ន និយាយថា សហគមន៍អន្តរជាតិចាំបាច់ត្រូវតែជំរុញឲ្យពលរដ្ឋមានអំណាចជាជាងផ្តោតការយកចិត្តទុកដាក់ទៅលើអ្នកនយោបាយគណបក្សជំទាស់។ «ខ្ញុំគិតថាជារឿងឥតតម្លៃក្នុងការធ្វើរបៀបដូច្នោះព្រោះកម្ពុជាមិនមែនជាប្រទេសមានប្រជាធិបតេយ្យ។ ហើយបេក្ខជនគណបក្សជំទាស់នឹងមិនឈ្នះឆ្នោតទេ។ ដូច្នេះតើមានតម្លៃអ្វីទៅ?» តែជំនួសទៅវិញ លោក Brinkley បានអះអាងថាសហគមន៍អន្តរជាតិគួរចំណាយលុយរបស់ខ្លួនដើម្បីជួយពលរដ្ឋឲ្យយល់ដឹងពីវិធីងើបឈរឡើងតទល់ជាមួយនឹងរដ្ឋាភិបាលដើម្បីទាមទារសិទ្ធិរបស់ពួកគេ។ លោកបានអះអាងបន្តថា ពលរដ្ឋកម្ពុជានៅឯជនបទមានក្តីសង្ឃឹមតិចតួចក្នុងការធ្វើឲ្យប្រសើរឡើងនូវជីវភាពរបស់ពួកគេលើបន្ថែមនឹងអ្វីដែលពួកគេមានរួចទៅហើយនោះ។ លោក សាស្ត្រាចារ្យ Brinkley សង្កត់ធ្ងន់ថា រឿងនេះហើយជាបញ្ហា។ លោក ងួន ញ៉ិល អនុប្រធានទីមួយនៃរដ្ឋសភានឹងជាមន្ត្រីជាន់ខ្ពស់នៃគណបក្សគ្រប់គ្រងប្រទេសបានថ្លែងថា ការដឹកនាំប្រទេសស្ថិតស្ថេរទៅបានដោយសារការសម្រេចរបស់ប្រជាពលរដ្ឋជាម្ចាស់ឆ្នោត។ «ឥឡូវយើងយកទៅប្រៀបធៀបជាមួយអារ៉ាប់ គេនិយាយពីរឿងផ្តាច់ការ រឿងកាន់អំណាចយូរ អីអញ្ចេះអញ្ចុះ។ ប៉ុន្តែនៅក្នុងប្រទេសប្រជាធិបតេយ្យមិនមែនគឺថាអាស្រ័យនឹងលទ្ធិបុគ្គលទេគឺអាស្រ័យនឹងប្រជាពលរដ្ឋដែលប្រគល់អំណាចក្នុងការបោះឆ្នោតតាមលទ្ធិប្រជាធិបតេយ្យ។ បើប្រជាជនប្រគល់អំណាចច្បាស់លាស់ហើយតើមានប្រជាជនឯណានឹងធ្វើបាតុកម្មទម្លាក់អំណាចដែលខ្លួនប្រគល់ឲ្យគេ។ នេះជាតថភាពនិងឡូស៊ិកនៃលទ្ធិប្រជាធិបតេយ្យ»។ លោកងួន ញ៉ិលបន្ថែមថា ការកាន់អំណាចនៅប្រទេសលីប៊ីជារឿងផ្ទុយពីប្រទេសកម្ពុជា។ លោកបានពន្យល់ថា៖ «ដូចនៅលីប៊ី វាខុសគ្នា។ ហ្កាដាហ្វីហ្នឹងគឺថាគាត់ឡើងកាន់អំណាចដោយការធ្វើរដ្ឋប្រហារ ហើយអត់មានបោះឆ្នោតទេក្នុងរយៈពេល ៤២ឆ្នាំ របស់ហ្កាដាហ្វី។ ដូច្នេះគឺថាគាត់ឡើងកាន់អំណាចដោយរដ្ឋប្រហារ ហើយពេលហ្នឹងគឺរហូតដល់រំលំរបបរាជានិយម។ រីឯរបបកម្ពុជាសព្វថ្ងៃនេះគឺថាជារបបផ្តល់នូវរាជានិយមទីពីរ តាមអ្វីដែលយើង ហៅថាហត្ថលេខី១៩ប្រទេសគិតទាំងមហាប្រទេសធំៗ នៅប៉ារីសដែលយកលទ្ធិប្រជាធិបតេយ្យ ឯកភាពជាតិនឹងផ្សះផ្សារជាតិជារឿងធំ នោះយើងអនុវត្តទៅតាមហ្នឹងអត់មានខុសឆ្គងអ្វីទេបាទ»។ លោក វ៉ាន់ ស សមាជិកស្ថានិកម្នាក់នៃគ្រឹះសម្ព័ន្ធខ្មែរក្នុងរដ្ឋកាលីហ្វ័រញ៉ាជាវាគ្មិនមួយរូបទៀតបានសម្តែងក្តីកង្វល់របស់លោកពីការណ៍ដែលពលរដ្ឋកម្ពុជានឹងបាត់បង់ក្តីសង្ឃឹម។ «ប្រទេសកម្ពុជានៅពេលមានសង្រ្គាម ពលរដ្ឋចង់បានសន្តិភាព។ ប៉ុន្តែសន្តិភាព ក្នុងឆ្នាំ១៩៩១ ដែលសហគមន៍អន្តរជាតិផ្តល់ឲ្យកម្ពុជា ឥឡូវនេះកំពុងស្ថិតក្នុងភាពគ្រោះថ្នាក់»។ ឆ្លើយតបនឹងសំណូមពរត្រួសៗរបស់ពលរដ្ឋខ្មែរអាមេរិកាំង លោក ស៊ូយ៉ា ស៊ុបឺឌី (Surya P Subedi) អ្នករាយការណ៍ពិសេស អង្គការសហប្រជាជាតិផ្នែកសិទ្ធិមនុស្សនៅកម្ពុជាបានជំរុញ ឲ្យពលរដ្ឋកម្ពុជាធ្វើកិច្ចការរួមគ្នាបន្តបញ្ជូនសារនៃក្តីសង្ឃឹមទៅកាន់ពលរដ្ឋនៅក្នុងប្រទេស៖ «ប្រទេសរបស់លោកអ្នក មានអនាគតល្អ។ លោកអ្នកត្រូវធ្វើការរួមគ្នា។ យើងទាំងអស់គ្នាត្រូវធ្វើការរួមគ្នា។ អ.ស.បនិងអង្គការអន្តរជាតិនឹងជួយលោកអ្នក។ ស្ថានភាពមិនល្អដូចជារឿងដែលគួរកើតមានទេ។ តែជាថ្មីម្តងទៀតទស្សនៈក្នុងជីវិតរបស់ខ្ញុំបង្ហាញថាការបង្កើតឲ្យមានការប្រែប្រួលតិចតួច វាប្រសើរជាងគ្មានការប្រែប្រួលព្រោះបើលោកអ្នកមិនធ្វើឲ្យប្រែប្រួលដ៏ធំទេ លោកអ្នកមិនអាចបោះបង់ចោលទេ។ ធ្វើឲ្យមានការប្រែប្រួលតិចតួចគឺធ្វើឲ្យមានការផ្លាស់ប្តូរដល់ជីវិតមនុស្សមួយចំនួន»។ ប្រទេសកម្ពុជានឹងធ្វើការបោះឆ្នោតជាសាកលនៅឆ្នាំ២០១៣ខាងមុខ។ ប៉ុន្តែ មេដឹកនាំគណបក្សជំទាស់ដ៏ធំជាងគេគឺលោកសម រង្ស៊ី ហើយជាដៃគូមានកម្លាំងប្រកួតប្រជែងនយោបាយជាមួយលោកនាយករដ្ឋមន្ត្រីហ៊ុន សែននោះកំពុងនិរទេសខ្លួននៅក្រៅប្រទេស ក្រោយពីមានការចោទប្រកាន់រឿងដកតម្រុយបង្គោលព្រំដែនកម្ពុជា វៀតណាមកាលពីចុងឆ្នាំ២០០៩។ លោក សម រង្ស៉ីកំពុងស្វះស្វែងរកការគាំទ្រជាអន្តរជាតិដើម្បីឲ្យមានកិច្ចប្រជុំប្រទេសហត្ថលេខីនៃកិច្ចព្រមព្រៀងទីក្រុងប៉ារីសដែរតែពុំទាន់មានការបញ្ជាក់ទេ។ សហគមន៍អន្តរជាតិចង់ឃើញលោកសម រង្ស៊ីត្រូវគេអនុញ្ញាតឲ្យមានការចូលរួមក្នុងការបោះឆ្នោតនៅពេលខាងមុខហើយធ្លាប់ទទូចចង់ឃើញការសម្របសម្រួលផ្នែកនយោបាយមួយ៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ០៧ ធ្នូ យប់ Posted: 07 Dec 2011 08:56 AM PST អាហ្វហ្គានិស្ថាន៖ ប្រធានាធិបតីហាមិឌ កាសៃបានវិលត្រឡប់មកប្រទេសអាហ្វហ្គានិស្ថានវិញក្រោយពីបានទម្លាក់ចោលទស្សនកិច្ចរបស់លោកទៅកាន់ប្រទេស អង់គ្លេស ព្រោះមានការវាយប្រហារដោយគ្រាប់ផ្ទុះពីរគ្រាប់នៅក្នុងប្រទេសអាហ្វហ្គានិស្ថាន ដែលបណ្ដាលឲ្យមនុស្សយ៉ាងតិច ៥៩ នាក់ស្លាប់។ ស៊ីរី៖ ប្រធានាធិបតីនៃប្រទេស ស៊ីរី លោក Bashar Al Ashad បានបដិសេធមិនព្រមទទួលខុសត្រូវចំពោះការសម្លាប់ក្រុមបាតុករប្រឆាំងរដ្ឋាភិបាលច្រើនពាន់នាក់។ លោកបាននិយាយប្រាប់ក្រុមនាក់កាសែតថា លោកមិនមែនជាអ្នកត្រួតត្រាកងកម្លាំង ដែលអនុវត្ដបទបញ្ជា ដ៏ឃោរឃៅដែលវាយបង្រ្កាបមកលើក្រុមបាតុករទេ។ អឺរ៉ុប៖ រដ្ឋមន្ដ្រីក្រសួងរតនាគារ សរអ លោក Timothy Geithner ថ្លែងថា លោកមានការជឿជាក់ថា សហភាពអឺរ៉ុប នឹងអាចរកមធ្យោបាយឃើញ ដើម្បីដោះស្រាយវិបត្ដិបំណុល ដែលជំរុញឲ្យមានភាពវិកវរនៅក្នុងទីផ្សារហិរញ្ញវត្ថុជុំវិញពិភពលោក។ អេហ៊្សីប៖ គណបក្ស Muslim Brotherhood នៃប្រទេស អេហ៊្សីប និយាយថាគណបក្សរបស់ខ្លួនបានទទួលសម្លេង ពីរភាគបី នៃកៅអីក្នុងរដ្ឋសភា ដែលទុកបម្រុងសម្រាប់បេក្ខជននៅក្នុងការបោះឆ្នោត វគ្គទីមូយរបស់សភាថ្នាក់ទាប។ ឥណ្ឌា៖ រដ្ឋាភិបាល ប្រទេសឥណ្ឌា បានផ្អាកផែនការមួយដែលគ្រោងបើកទ្វារ ផ្នែកពាណិជ្ជកម្មលក់វត្ថុរាយ ដល់ក្រុមហ៊ុនបរទេស ក្រោយពីមានការតវ៉ាជាច្រើនសប្ដាហ៍ហើយបណ្ដាលឲ្យរដ្ឋាភិបាលជាប់គាំង។ ថៃ៖ មេដឹកនាំរបស់ចលនាអាវក្រហមប្រទេសថៃដែលបានរត់គេច បានចូលខ្លួនមកឲ្យអាជ្ញាធរនៅក្នុងទីក្រុងបាងកក ដើម្បីតទល់នឹងការចោទប្រកាន់ពីបទធ្វើភេរវកម្ម ក្នុងការតវ៉ាប្រឆាំងរដ្ឋាភិបាលថៃកាលពីឆ្នាំមុន។ ហ្វីលីពីន៖ រដ្ឋាភិបាល ហ្វីលីពីន នឹងក្រុមបះបោរ ម៊ូស្លិម ធំសំខាន់មួយ បានព្រមព្រាងគ្នាបន្ដអាណត្ដិបេសកម្មសន្ដិភាពអន្ដរជាតិ ខណៈដែលការចរចារបន្ដ ក្នុងគោលដៅបញ្ចប់ការបះបោរច្រើនទសវត្សរ៍កន្លងមក។ ចិន៖ សរអ និង ចិន បានលាតត្រដាងបង្ហាញប្រព័ន្ធរុករកវិទ្យុសកម្មនៅឯផែសមុទ្រទីក្រុងសៀងហៃ ដែលជាផ្នែកមូយនៃកិច្ចប្រឹងប្រែងចៀសវាងមិនឲ្យមានការដឹកជញ្ជូនសម្ភារៈអាវុធនុយក្លេអ៊ែរ ខុសច្បាប់។ ជប៉ុន៖ នៅថ្ងៃពុធនេះ សរអ កត់សំគាល់ទិវាទុយ៌សជាខួបឆ្នាំ ទី៧០ នៃការវាយប្រហាររបស់ជប៉ុនមកលើផែសមុទ្រ Pearl Harbor ដែលជំរុញឲ្យសរអចូលប្រឡូកក្នុងសង្រ្គាមលោកលើកទីពីរ។ ប៉ាគិស្ថាន៖ ប្រធានាធិបតីនៃប្រទេសប៉ាគិស្ថាន លោក Asif Ali Zardani បានធ្វើដំណើរមកកាន់ក្រុង ឌូបៃ ដើម្បីព្យាបាលជម្ងឺបេះដូងហើយការធ្វើដំណើរនេះជំរុញឲ្យមានពាក្យចចាមអារាមថាលោកលាលែងពីតំណែង។ សហរដ្ឋអាមេរិក៖ នៅក្នុងរដ្ឋធានីវ៉ាស៊ិនតោន ការតវ៉ារយៈពេលមូយសប្ដាហ៍ និងការប្រម៉ូលផ្ដុំ រាលី ហៅថា Take Back the Capital បានបន្ដរហូតដល់ថ្ងៃពុធ ដោយក្រុមបាតុករផ្ដោតទៅលើ ក្រុមឡប៊ី អ្នកតំណាងក្រុមហ៊ុនដ៏មានឥទ្ធិពលខ្លាំង របស់សហគ្រាសអាមេរិកាំង។ <!--AV--> This posting includes an audio/video/photo media file: Download Now |
| ព័ត៌មានអន្តរជាតិវីអូអេ ០៧ ធ្នូ ព្រឹក Posted: 07 Dec 2011 12:49 AM PST ជប៉ុន៖ ក្រុមហ៊ុនផលិតចំណីអាហារជប៉ុននាំមុខមួយប្រាប់ឲ្យដឹងថាវិទ្យុសកម្ម សេស្យ៉ូមត្រូវបានគេរកឃើញនៅក្នុងម្សៅទឹកដោះគោសម្រាប់ទារក។ នេះជាជាការភ័យខ្លាចលើម្ហូបអាហារនាពេលថ្មីៗជាងគេនៅក្នុងប្រទេស ចាប់តាំងពីការកើតឡើងគ្រោះមហន្តរាយនុយក្លេអ៊ែរនៅរោងចក្រថាមពលភាគឦសាន ក្នុងក្រុងតូក្យូកាលពី៩ខែមុន។ រុស្ស៊ី៖ កងទ័ពរុស្ស៊ីបានយាមល្បាតកណ្តាលទីក្រុងម៉ូស្គូកាលពីថ្ងៃអង្គារ ក្នុងកិច្ចខិតខំមួយដើម្បីគំរាមមិនអោយមានការប្រឆាំងតវ៉ាកើនឡើងថែមទៀត មួយថ្ងៃបន្ទាប់ពីបាតុកររាប់ពាន់នាក់បានជួបជុំគ្នាដើម្បីប្រកាសឲ្យរំសាយលទ្ធផលការបោះឆ្នោតដែលពួកគេអះអាងថាមានការកេងបន្លំ។ សហរដ្ឋអាមេរិក៖ អ្នកប្រឆាំងនិងសកម្មជនមកពីទូទាំងសហរដ្ឋអាមេរិកបានបន្តជួបគ្នានៅទីលាន National Mall ក្នុងរដ្ឋធានីវ៉ាស៊ីនតោនដើម្បីតវ៉ា ដោយមានផែនការធ្វើរយៈពេលច្រើនថ្ងៃទៅកាន់សភានិងមេដឹកនាំរបស់ខ្លួន។ សកលលោក៖ អគ្គលេខាធិការអង្គការសហប្រជាជាតិបាន គីមូន កំពុងអំពាវនាវឲ្យមានចំណាត់ការពិតប្រាកដដើម្បីប្រយុទ្ធប្រឆាំងការផ្លាស់ប្តូរអាកាសធាតុដែលកំពុងមានផលប៉ះពាល់សកលលោកកាន់តែខ្លាំងឡើង។ ស៊ីរី៖ រដ្ឋមន្រ្តីក្រសួងការបរទេសសហរដ្ឋអាមេរិក ហ៊ីឡារី គ្លីនតុន បានជួបជាមួយពួកមេដឹកនាំគណបក្សប្រឆាំងស៊ីរីកាលពីថ្ងៃអង្គារ ពេលដែលសហរដ្ឋអាមេរិកបានប្រកាសថាឯកអគ្គរដ្ឋទូតរបស់ខ្លួនប្រចាំប្រទេសស៊ីរីនឹងវិលត្រឡប់ទៅកាន់ប្រទេសនោះ បន្ទាប់ពីការលាចេញពីតំណែងជាងមួយខែមុនដោយសារព្រួយបារម្ភខាងសន្តិសុខ។ អាហ្វហ្គានីស្ថាន៖ ការផ្ទុះគ្រាប់បែកភ្លោះបានធ្វើឲ្យសៅហ្មងថ្ងៃបុណ្យអាស្ស៊ុរ៉ារបស់ពួកនិកាយស្ហ៊ីអ៊ីត កាលពីថ្ងៃអង្គារ និងសម្លាប់មនុស្សជិត៦០នាក់ភាគច្រើនជានិកាយអ៊ីស្លាមស្ហ៊ីអ៊ីតក្នុងតំបន់កណ្តាលនិងខាងជើងប្រទេស។ អឺរ៉ុប៖ ទីភ្នាក់ងារឥណទានស្តង់ដា អេន ភួរ បច្ចុប្បន្នកំពុងគំរាមបញ្ចុះអត្រាវាយតម្លៃឥណទានទៅកាន់ប្រទេសដែលផ្តល់ប្រាក់ជួយសង្គ្រោះប្រទេសញាំញីដោយសារបំណុលនៅអឺរ៉ុប។ បែលហ្ស៊ិក៖ លោក អេលីយ៉ូ ឌី រុយប៉ូ មកពីគណបក្សសង្គមនិយមបានស្បថចូលកាន់តំណែងជានាយករដ្ឋមន្រ្តីថ្មីរបស់បែលហ្សិកបន្ទាប់ពីបញ្ចប់អវត្តមានរដ្ឋាភិបាលអចិន្រ្តៃយ៍រយៈពេល១ឆ្នាំកន្លះ។ អេហ្ស៊ីប៖ កំពុងធ្វើការបោះឆ្នោតជ្រើសរើសសភាជាតិជុំទី២នៅថ្ងៃទី២ ដោយគណបក្សអ៊ីស្លាមជាគូប្រកួតប្រជែងដែលចូលរួមប្រកួតដ៏ក្តៅគគុកបានទទួលសន្លឹកឆ្នោតកើនឡើងក្នុងក្រុងធំបំផុតពីរនិងខេត្តចំនួន៧ផ្សេងទៀត។ This posting includes an audio/video/photo media file: Download Now |
| ឡាវអាចប្រឈមនឹងការជំទាស់ដ៏ខ្លាំងពីរឿងសង់ទំនប់សាយ៉ាបូរី Posted: 06 Dec 2011 07:32 PM PST មន្ត្រីជាន់ខ្ពស់នៃគណៈកម្មាធិការជាតិទន្លេមេគង្គកម្ពុជា ព្រមានថា ប្រទេសជាសមាជិកនៃគណៈកម្មាការទន្លេមេគង្គអាចនឹងប្តឹងទៅតុលាការអន្តរជាតិ ប្រសិនបើប្រទេសឡាវនៅតែចចេសបន្តគម្រោងសាង់សង់ទំនប់វារីអគ្គីសនីសាយ៉ាបូរីទៀតនោះ។ ការព្រមាននេះត្រូវបានធ្វើឡើងខណៈដែលរដ្ឋមន្ត្រីនៃបណ្តាប្រទេសទន្លេមេគង្គក្រោម ត្រៀមសម្រេចចុងក្រោយលើគម្រោងសាងសង់ទំនប់ដ៏ចម្រូងចម្រាស់នោះនៅក្នុងសប្តាហ៍នេះ។ លោក វ៉ាត់ បុត្តកុសល អគ្គលេខាធិការរង នៃគណៈកម្មាធិការជាតិទន្លេមេគង្គកម្ពុជា មានប្រសាសន៍នៅក្នុងបទសម្ភាសន៍មួយជាមួយវីអូអេខ្មែរកាលពីថ្ងៃសុក្រថា ប្រទេសឡាវ អាចនឹងមានការប្តឹងផ្តល់គ្នាទៅតុលាការអន្តរជាតិលើបញ្ហាសង់ទំនប់។ «ប្តឹងផ្តល់ទី១គឺប្រទេសឡាវមិនអនុវត្តនូវកិច្ចព្រមព្រៀង។ ទី២មិនអើពើនឹងការព្រួយបារម្ភរបស់ប្រទេសជាសមាជិកហើយយើងមានអង្គការអន្តរជាតិច្រើនណាស់ដែលមិនគាំទ្របូកទាំងសហរដ្ឋអាមេរិកក៏មិនបានគាំទ្រដែរ។» <!--AV--> ការព្រមាននេះ ធ្វើឡើងនៅខណៈពេលដែលរដ្ឋមន្ត្រីធនធានទឹកនិងធនធានធម្មជាតិនៃបណ្តារប្រទេសទន្លេមេគង្គក្រោមទាំងបួនគឺកម្ពុជា វៀតណាម ថៃ និងឡាវ ត្រៀមជួបប្រជុំគ្នានៅក្នុងខេត្តសៀមរាប នៅថ្ងៃទី៨និង៩ ក្នុងសប្តាហ៍នេះ ដើម្បីសម្រេចចុងក្រោយថាតើត្រូវអនុញ្ញាតឲ្យមានការសាង់សង់ទំនប់វារីអគ្គីសនីដ៏ចម្រូងចម្រាស់នោះឬអត់។ កិច្ចព្រមព្រៀងមេគង្គឆ្នាំ១៩៩៥ កំណត់ឲ្យបណ្តាប្រទេសទាំងបួន ដែលជាសមាជិកនៃគណៈកម្មការទន្លេមេគង្គ ពិគ្រោះយោបល់គ្នាមុននឹងឈានទៅដល់ការសម្រេចឲ្យមានការសាងសង់ទំនប់វារីអគ្គីសនីណាមួយនៅលើដងទន្លេមេនៃទន្លេមេគង្គផ្នែកខាងក្រោម។ ទំនប់សាយ៉ាបូរីដែលស្ថិតនៅភាគខាងជើងប្រទេសឡាវគឺជាទំនប់ដំបូងគេក្នុងចំណោមទំនប់វារីអគ្គិសនីធំៗយ៉ាងតិចចំនួន១១ដែលគេគ្រោងនឹងសាងសង់កាត់ដងទន្លេមេគង្គក្រោម។ ទំនប់សាយ៉ាបូរីនឹងត្រូវសាងសង់ដោយក្រុមហ៊ុនថៃមួយឈ្មោះ Ch Karnchang ដោយគ្រោងផលិតថាមពលអគ្គិសនីកម្រិត១.២៦០មេហ្គាវ៉ាត់។ ៩៥%នៃថាមពលអគ្គិសនីដែលទំនប់នេះផលិតបាននឹងត្រូវលក់ទៅឲ្យប្រទេសថៃ។ នេះបើយោងតាមរបាយការណ៍របស់អង្គការទន្លេអន្តរជាតិ (International Rivers)។ ប៉ុន្តែ របាយការណ៍ក៏បង្ហាញផងដែរថា ទំនប់សាយ៉ាបូរីនេះ ប្រសិនបើត្រូវបានសាងសង់មែននោះនឹងធ្វើឲ្យខូចខាតប្រព័ន្ធអេកូឡូស៊ីនិងជីវចម្រុះនៅក្នុងទន្លេមេគង្គជារៀងរហូត។ ទំនប់នោះ ក៏នឹងធ្វើឲ្យបាត់បង់ពពួកពូជមច្ឆាយ៉ាងតិចចំនួន៤១ប្រភេទដោយរួមទាំងពូជត្រីរាជដែលកំពុងរងការវិនាសផុតពូជផងដែរ។ ការបាត់បង់នេះនឹងធ្វើឲ្យប៉ះពាល់ធ្ងន់ធ្ងរដល់ជីវភាពរស់នៅ របស់ប្រជាជនរាប់លាននាក់ ជាពិសេសប្រជាជនកម្ពុជាដែលរស់នៅពឹងអាស្រ័យទៅលើទន្លេមេគង្គនិងទន្លេសាប ដែលទទួលលំហូរទឹកពីទន្លេមេគង្គនេះ។ សហគមន៍ អង្គការនិងសកម្មជនការពារបរិស្ថានទាំងថ្នាក់ជាតិ តំបន់និងអន្តរជាតិបានជំទាស់ទៅនឹងការសាងសង់ទំនប់វារីអគ្គិសនីសាយ៉ាបូរីនេះ ដោយអំពាវនាវឲ្យមានការផ្អាកឬការលុបចោលគម្រោងសាង់សង់ទំនប់ដ៏ចម្រូងចម្រាស់មួយនេះ។ គណៈកម្មាធិការទំនាក់ទំនងកិច្ចការបរទេសនៃព្រឹទ្ធសភាសហរដ្ឋអាមេរិក កាលពីសប្តាហ៍មុន បានអនុម័តទៅលើសេចក្តីសម្រេចចិត្តរបស់ព្រឹទ្ធសមាជិកលោក Jim Webb ដោយអំពាវនាវឲ្យមានការការពារអាងទន្លេមេគង្គនិងឲ្យពន្យារពេលការសាងសង់ទំនប់លើដងទន្លេមេនៃទន្លេមេគង្គនេះ។ កម្ពុជា វៀតណាម និងថៃបានលើកឡើងនូវការព្រួយបារម្ភអំពីផលប៉ះពាល់ដែលអាចបណ្តាលមកពីការសាងសង់ទំនប់នោះ និងស្នើឲ្យប្រទេសឡាវពន្យាពេលសាងសង់ទំនប់នោះ ១០ឆ្នាំទៀត។ កញ្ញា អាម ត្រានដឹម (Ame Trandem) នាយកកម្មវិធីប្រចាំតំបន់អាស៊ីអាគ្នេយ៍នៃអង្គការទន្លេអន្តរជាតិបានមានប្រសាសន៍នៅក្នុងបទសម្ភាសន៍ជាមួយវីអូអេខ្មែរថា ប្រទេសឡាវគួរតែផ្អាកគម្រោងទំនប់នោះ ហើយធ្វើការសិក្សានិងពិគ្រោះយល់បល់បន្ថែមទៀតទៅតាមការស្នើសុំរបស់បណ្តាប្រទេសជិតខាងរបស់ខ្លួន ដើម្បីបញ្ចៀសភាពតានតឹងនៅក្នុងតំបន់ ដែលអាចឈានទៅដល់ការប្តឹងផ្តល់គ្នាដល់តុលាការអន្តរជាតិនោះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
