VOA News: ព័ត៌មាន: “អន្តរជាតិអំពាវនាវឲ្យថៃនិងឡាវលុបចោលផែនការសង់ទំនប់វារីអគ្គីសនី” plus 9 more |
- អន្តរជាតិអំពាវនាវឲ្យថៃនិងឡាវលុបចោលផែនការសង់ទំនប់វារីអគ្គីសនី
- សង្គមស៊ីវិលសុំឱ្យរដ្ឋាភិបាលទុកពេលឱ្យបានគ្រប់គ្រាន់ដើម្បីពិនិត្យសេចក្តីព្រាងច្បាប់អង្គការលើកទី៤
- ទិន្នផលស្រូវកើនទោះបីមានទឹកជំនន់
- សាក្សីបំភ្លឺពីការប្រមូលកម្លាំងរបស់ខ្មែរក្រហមនៅតំបន់ជនជាតិភាគតិច
- ហ៊ុន សែន៖ ការកាត់ទោសមេដឹកនាំខ្មែរក្រហមផ្តល់សច្ចធម៌ដល់វៀតណាម
- សៀវភៅបង្ហាញការបំពានផ្លូវភេទក្នុងរបបខ្មែរក្រហម
- ព័ត៌មានអន្តរជាតិវីអូអេ ០៦ ធ្នូ យប់
- នួន ជា ចោទវៀតណាមសម្លាប់ខ្មែរ ហើយអះអាងថាខ្មែរក្រហមគ្មានកំហុសទេ
- ហេឡូវីអូអេ៖ ជីវិត និងវិជ្ជាជីវៈនៃគ្រូឧត្តមសិក្សានៅកម្ពុជា
- ព័ត៌មានអន្តរជាតិ៖ ០៦ ធ្នូ
| អន្តរជាតិអំពាវនាវឲ្យថៃនិងឡាវលុបចោលផែនការសង់ទំនប់វារីអគ្គីសនី Posted: 06 Dec 2011 12:29 PM PST ការដាក់ពាក្យតវ៉ាអន្ដរជាតិមកពីប្រទេស ជាង ១០០ អំពាវនាវឲ្យរដ្ឋាភិបាលប្រទេសឡាវ និង ប្រទេសថៃ ទម្លាក់ចោលផែនការធំធេងនៃការស្ថាបនាទំនប់វារីអគ្គីសនី យ៉ាងធំមួយនៅតំបន់ភាគខាងក្រោមទន្លេមេគង្គ។ ក្រុមអ្នកតាក់តែងច្បាប់នៅសហរដ្ឋអាមេរិក កំពុងអំពាវនាវឲ្យគោរព យ៉ាងជាក់លាក់នូវបទដ្ឋានការពារបរិស្ថាននៃគម្រោងការ ដោយគេមានការភ័យខ្លាចថា នឹងធ្វើឲ្យប៉ះពាល់យូរអង្វែងដល់ប្រព័ន្ធបរិស្ថានរបស់ទន្លេសម្រាប់រយៈពេលយូរ។ ទំនប់វារីអគ្គីសនី សាយ៉ាប៊ូរី ដែលមានតម្លៃ ៣.៥០០ លានដុល្លារ ជា គម្រោងការទំនប់មួយក្នុងចំណោមទំនប់ ១១ នៃតំបន់ភាគខាងក្រោមទន្លេមេគង្គ ដែល ហូរកាត់ប្រទេសថៃ កម្ពុជានិង វៀតណាម។ តែក្រុមជំនាញបរិស្ថាន និយាយថា ទំនប់កម្លាំង ១.២៨០ មេហ្គាវ៉ាត់នោះនឹងធ្វើឲ្យប៉ះពាល់ធ្ងន់ធ្ងរយូរអង្វែងដល់បរិស្ថាន ជាពិសេស នៅកន្លែងខ្លះ ដូចជានៅតំបន់ដីសន្ដរនៃទន្លេមេគង្គរបស់ប្រទេសវៀតណាមដែលជាជង្រុកស្រូវរបស់ប្រទេសនោះ។ ក្រុមបរិស្ថានមួយ នៅ សរអ ហៅ International Rivers ថ្លែងថាមនុស្ស២២.៥៨០ នាក់ ពីប្រទេសជាង ១០០ បានចុះហត្ថលេខាលើពាក្យតវ៉ា ដែលអំពាវនាវឲ្យទម្លាក់ចោលគម្រោងការ ដោយសារតែគេមានការព្រួយបារម្ភខ្លាំងចំពោះអនាគត នៃតំបន់ភាគខាងក្រោមទន្លេមេគង្គ។ញត្ដិ តវ៉ា ធ្វើឡើង មួយសប្ដាហ៍បុណ្ណោះ មុនពេលដែលគណៈកម្មការទន្លេមេគង្គ ដែលមានសមាជិកប្រទេស កម្ពុជា ឡាវ ថៃ និង វៀតណាម នឹងជួបប្រជុំគ្នា ដើម្បីចេញសេចក្ដីសម្រេចចុងក្រោយបង្អស់មកលើគម្រោងការនោះ។ អ្នកសម្របសសម្រួលយុទ្ធនាការ សម្រាប់អង្គការ International Rivers ប្រចាំប្រទេសថៃ អ្នកស្រី Pianporn Deetes ថ្លែងថា ញត្ដិតវ៉ានោះគូសបញ្ជាក់អំពីការព្រួយបារម្ភ មកលើការប៉ះពាល់ពីសំណង់ទំនប់។ «ខ្ញុំចង់ឃើញអ្នកទទួលខុសត្រូវសំខាន់ៗនៃរដ្ឋាភិបាលថៃនិងឡាវ យល់ដឹងថា ពិភពលោកកំពុងតាមមើលយ៉ាងដិតដល់ ដោយគេឃើញមានមនុស្សដ៏ច្រើនសន្ធឹក មានចិត្ដចង់ការពារទន្លេមេគង្គ ហើយ ជីវិតមនុស្សរាប់លាននាក់ ពឹងផ្អែកមកលើទន្លេមេគង្គ ហើយគេចង់ឲ្យរដ្ឋាភិបាលទាំងនោះធ្វើសេចក្ដីសម្រេចត្រឹមត្រូវ ដោយមិនយោងទៅតាមមូលហេតុនយោបាយ។» គម្រោងការសម្រាប់ ទំនប់វារីអគ្គិសនីចំនួន ១១ ធំៗ នៅលើទន្លេមេគង្គ បានចាប់ផ្ដើមឡើងកាលពីឆ្នាំ ២០០៦។ នៅក្រោមកិច្ចសន្យាថា ប្រទេសថៃ នឹងទិញ ៩៥ភាគរយនៃភ្លើងអគ្គិសនី ចេញពីទំនប់សាយ៉ាបុរី។ ក្រសួងថាមពលរបស់ប្រទេសថៃ ថ្លែងថា គ្មានឃើញភ័ស្ដុតាងណាមួយដែលគាំទ្រការទាមទារ ថាមានការខូចខាតរយៈពេលយូរ មកលើទន្លេទេ។ តែក្រុមមន្ដ្រីនៃ ប្រទេសវៀតណាម និង កម្ពុជា គាំទ្រគំនិតរបស់ក្រុមជំនាញបរិស្ថាន ដោយសំអាងថាវានឹងធ្វើឲ្យខូចខាតធ្ងន់ធ្ងរដល់ទីជម្រករបស់ត្រី។ ក្នុងខែមេសា ប្រទេសទាំងឡាយ ដែលស្ថិតនៅក្រោមទន្លេមេគង្គ បានយល់ព្រមគ្នា សុំឲ្យផ្អាកការស្ថាបនាទំនប់ រង់ចាំការសិក្សាជ្រៅជ្រះ។ តែសេចក្ដីរាយការណ៍កាលពីពេលថ្មីៗនេះ ចង្អុលឲ្យឃើញសំណង់កំពុងដំណើរការនៅទីកន្លែងទំនប់ ធ្វើឡើងដោយ ក្រុមសំណង់ថៃ។ លោក Carl Thayer អ្នកស្រាវជ្រាវនៃសាកលវិទ្យាល័យ New South Wales ក្នុងប្រទេសអូស្រា្តលី ថ្លែងថាសេចក្ដីសម្រេចរបស់ រដ្ឋាភិបាលក្នុងការជំរុញឲ្យស្ថាបនាទំនប់ នឹង បណ្ដាលឲ្យមានភាពតានតឹងការទូត។ «ទាំងកម្ពុជា ទាំងវៀតណាម ពេលសួរយោបល់ បានចេញសេចក្ដីថ្លែងការណ៍បង្ហាញការព្រួយបាម្ភ ហើយប្រទេសទាំងពីរ ពេញចិត្ដខ្លាំងចំពោះការពន្យារពេលសំណង់ទំនប់។ រឿងសំខាន់មួយ ដែលយើងមិនទាន់និយាយ គឺ នឹងមានកំណត់ការទូតដ៏ហ្មត់ចត់ចំពោះ ប្រទេស ឡាវ ហើយខ្ញុំយល់ថាលោកអ្នកនឹងឃើញមានទស្សនកិច្ចថ្នាក់ខ្ពស់ពីទីក្រុងហាណូយទៅកាន់រដ្ឋធានីវៀងច័ន្ទ ដើម្បីសុំឲ្យមានការពន្យល់ដោយសារតែគេមានការព្រួយបារម្ភធំធេង។» លោក Thayer ថ្លែងថា ប្រទេសវៀតណាមនឹងពិនិត្យមើលប្រទេសអ្នកផ្ដល់ជំនួយថវិកាផ្ដល់ ឲ្យគណៈកម្មការទន្លេមេគង្គ មានរាប់បញ្ចូលសហរដ្ឋអាមេរិក អូស្រ្ដាលី និង ជប៉ុន ដើម្បីដាក់សម្ពាធការទូត មកលើប្រទេស ឡាវ និង ថៃ ឲ្យពន្យារពេលសំណង់ទំនប់។ ក្រុមអ្នកវិភាគបានអំពាវនាវឲ្យបញ្ឈប់គម្រោងការនោះរយៈពេល១០ឆ្នាំ ដើម្បីធ្វើការវាស់វែងជ្រាលជ្រៅមកលើការប៉ះពាល់ដល់ប្រព័ន្ធបរិស្ថាននៅលើទំនប់ សាយ៉ាប៊ូរី ផង និង សំណង់ទំនប់ដទៃដែលស្ថិតនៅតាមបណ្ដោយទន្លេមេគង្គ។ គណៈកម្មការទន្លេមេគង្គថ្នាក់រដ្ឋមន្រ្ដីត្រូវកំណត់ ជួបប្រជុំនៅក្នុងថ្ងៃទី ៧ ខែធ្នូ ក្នុងទីក្រុង សៀមរាប ប្រទេសកម្ពុជា៕ ប្រែសម្រួលដោយ អ៊ូ ធួក This posting includes an audio/video/photo media file: Download Now |
| Posted: 06 Dec 2011 10:43 AM PST ក្រុមអង្គការសង្គមស៊ីវិលក្នុងប្រទេសកម្ពុជាចង់ឱ្យរដ្ឋាភិបាលបញ្ចេញសេចក្តីព្រាងច្បាប់ចុងក្រោយស្តីពីការគ្រប់គ្រងសមាគមនិងអង្គការក្រៅរដ្ឋាភិបាល ហើយត្រូវទុកពេលវេលាឱ្យបានសមស្របដើម្បីឲ្យពួកគេធ្វើការសិក្សានិងផ្តល់អនុសាសន៍ដល់រដ្ឋាភិបាល។ ការទាមទារនេះកើតមានឡើងក្រោយពីក្រសួងមហាផ្ទៃកម្ពុជាបានបញ្ចប់សេចក្តីព្រាងច្បាប់លើកទីបួននៃច្បាប់ដ៏ចម្រូងចម្រាសមួយនេះ។ លោកស្រីពុង ឈីវកេក នាយិកាអង្គការសិទ្ធិមនុស្សលីកាដូ បានបញ្ជាក់ប្រាប់វីអូអេសំឡេងសហរដ្ឋអាមេរិកថា៖ «អង្គការមិនមែនរដ្ឋាភិបាលមិនទាន់បានទទួល(សេចក្តីព្រាងច្បាប់នេះ)ទេ។ ខ្ញុំមិនដឹងថា មានអង្គការណាផ្សឹងទៀតបានទទួលហើយឬនៅទេ។ ប៉ុន្តែក្រុម ដែលពួកខ្ញុំធ្វើការជាមួយហ្នឹង មិនទាន់បានទទួល(បានសេចក្តីព្រាងច្បាប់នេះ)ទេ។ ដូច្នេះយើងសូមសំណូមពរទៅរដ្ឋាភិបាលជាទទូចព្រោះថា សេចក្តីព្រាងច្បាប់ហ្នឹងជាច្បាប់សម្រាប់សមាគមនិងរដ្ឋាភិបាល ដូច្នេះអង្គការមិនមែនរដ្ឋាភិបាលចង់បានសេចក្តីព្រាងច្បាប់ទីបួនហ្នឹង ហើយសូមឱ្យរដ្ឋាភិបាល លោកមេត្តាទុកពេលឱ្យបានយូរបន្តិចដើម្បីឱ្យអង្គការមិនមែនរដ្ឋាភិបាលនាំគ្នា ជួបជុំគ្នាឱ្យបានច្រើនដង ហើយពិគ្រោះយោបល់ជាមួយគ្នាសិន មុននឹងយកសំណូមពរ យកអនុសាសន៍ទៅជួបជុំជាមួយរដ្ឋាភិបាល។ សូមមេត្តាកុំទុកពេលឱ្យពួកខ្ញុំតិចពេក»។ លោកសុខ សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា បានបញ្ជាក់ថា ពួកគេត្រូវការពេលវេលាយ៉ាងហោចណាស់ក៏មួយខែដែរដើម្បីធ្វើការសិក្សាឱ្យគ្រប់ជ្រុងជ្រោយដើម្បីអាចឱ្យច្បាប់នេះបម្រើបានដល់ផលប្រយោជន៍ទូទៅ។ «ពេលដែលក្រសួងមហាផ្ទៃបញ្ចប់ បិទសេចក្តីព្រាងច្បាប់របស់ខ្លួន ខ្ញុំគិតថា យ៉ាងហោចណាស់ក៏ទុកពេលឱ្យ NGO ហ្នឹងមួយខែដែរ ទើបអាចមានឱកាសជជែកគ្នាបាន»។ សេចក្តីព្រាងច្បាប់ស្តីពីការគ្រប់គ្រងសមាគមនិងអង្គការក្រៅរដ្ឋាភិបាលនេះទទួលរងការរិះគន់ជាច្រើនពីក្រុមអង្គការសង្គមស៊ីវិលជាតិ និងអន្តរជាតិ ព្រមទាំងប្រទេសម្ចាស់ជំនួយថា ច្បាប់នេះអាចជាការរឹតត្បិតដល់សេរីភាពក្នុងការបញ្ចេញមតិនិងប្រតិបត្តិការរបស់អង្គការសង្គមស៊ីវិល ហើយវាអាចធ្វើឱ្យសហគមន៍ផ្តល់ជំនួយធុញទ្រាន់ដែលជាការខូចខាតដល់កិច្ចអភិវឌ្ឍន៍នាពេលកន្លងមកដែលកម្ពុជាទទួលបាន។ សេចក្តីព្រាងច្បាប់នេះធ្លាប់ត្រូវបញ្ជូនទៅដល់គណៈរដ្ឋមន្រ្តីក្នុងពេលកន្លងមក ប៉ុន្តែត្រូវបានបញ្ជូនត្រឡប់មកវិញដើម្បីធ្វើការសិក្សាកែប្រែបន្ថែម ហើយសេចក្តីព្រាងច្បាប់នេះក៏រងការជំទាស់ខ្លាំងៗពីក្រុមអង្គការសង្គមស៊ីវិលនិងប្រទេសម្ចាស់ជំនួយផងដែរ។ លោកខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថា ឥឡូវនេះក្រុមការងាររបស់ក្រសួងបានធ្វើការកែប្រែចប់សព្វគ្រប់អស់ហើយ។ «យើងធ្វើចប់ហើយ ប៉ុន្តែយើងនឹងដាក់ឲ្យចូលរួមដើម្បីពិភាក្សាសិក្ខាសាលាមួយពេលទៀតមុននឹងបញ្ជូនទៅគណៈរដ្ឋមន្រ្តី»។ ប៉ុន្តែលោកខៀវ សុភ័គបានបន្ថែមថា នៅមិនទាន់កំណត់ពេលរៀបចំសិក្ខាសាលានេះនៅឡើយទេ។ ក្រុមអង្គការសង្គមស៊ីវិលយល់ថា ពេលវេលាសមស្របដែលអាចនឹងពិភាក្សាបានស៊ីជម្រៅលើសេចក្តីព្រាងច្បាប់នេះគឺយ៉ាងហោចណាស់នៅខែមករាឆ្នាំ២០១២ ព្រោះនៅខែធ្នូនេះមានកម្មវិធីជាច្រើនធំៗដែលក្រុមអង្គការសង្គមស៊ីវិលមួយចំនួន ជាពិសេសក្រុមដែលធ្វើការងារទាក់ទងនឹងបញ្ហាសិទ្ធិមនុស្ស កំពុងរៀបចំធ្វើគឺទិវាសិទ្ធិមនុស្សនៅថ្ងៃទី១០ខែធ្នូ និងអវត្តមានរបស់តំណាងសំខាន់ៗនៃអង្គការអន្តរជាតិដែលត្រូវសម្រាកចុងឆ្នាំសម្រាប់ពេលបុណ្យរបស់ពួកគេ។ នៅក្នុងកំណត់សម្គាល់មួយរបស់ក្រុមអង្គការសង្គមស៊ីវិលជូនទៅដល់ក្រុមប្រទេសម្ចាស់ជំនួយ ដែលវីអូអេសំឡេងសហរដ្ឋអាមេរិកបានទទួល បានបញ្ជាក់ពីជំហរជឿជាក់លើរដ្ឋាភិបាលកម្ពុជាក្នុងការរៀបចំច្បាប់មួយដែលបម្រើផលប្រយោជន៍ទូទៅ ជាពិសេសក្នុងសេចក្តីព្រាងលើកទីបួននេះ។ ប៉ុន្តែពួកគេនៅបន្តតាមដានលើបញ្ហាគន្លឹះមួយចំនួនដែលធ្វើឱ្យពួកគេព្រួយបារម្ភ ក្នុងនោះមានកង្វះនីតិវិធីក្នុងការការពារប្រឆាំងនឹងការបដិសេធក្នុងការចុះបញ្ជីឈ្មោះ តម្រូវការក្នុងការឱ្យមានតំណាក់កាលប្តឹងជំទាស់នឹងការបដិសេធការចុះបញ្ជី និងការប្រើប្រាស់ពាក្យពេចន៍ដែលមិនច្បាស់លាស់ក្នុងសេចក្តីព្រាងច្បាប់នេះដែលអាចនាំឱ្យមានការបកស្រាយតាមការយល់ឃើញផ្សេងៗដោយគ្មានមូលដ្ឋានត្រឹមត្រូវ។ យ៉ាងណាក៏ដោយ លោកខៀវ សុភ័គបានបញ្ជាក់ថា អ្វីដែលជាសំណូមពរនិងអនុសាសន៍កន្លងមករបស់អង្គការសង្គមស៊ីវិលត្រូវបានដាក់បញ្ចូលក្នុងសេចក្តីព្រាងច្បាប់ថ្មីនេះអស់ហើយ។ «និយាយរួម មតិដែលគេបានលើកឡើងទាំងប៉ុន្មាន យើងក៏បានប្រមូលផ្តុំមតិហ្នឹងយកមកកែសម្រួលឡើងវិញរួចហើយ»។ ប៉ុន្តែការអះអាងនេះនៅមិនទាន់ធ្វើឱ្យតំណាងអង្គការសង្គមស៊ីវិលមានទំនុកចិត្តទេ។ ពួកគេអះអាងថា កាលពីពេលរៀបចំសេចក្តីព្រាងច្បាប់នេះលើកទីបីក៏មានការលើកឡើងដូច្នេះដែរ ប៉ុន្តែចំណុចដែលដាក់បញ្ចូលបានខុសពីអ្វីដែលពួកគេរំពឹងទុក។ លោកអ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជាបានបញ្ជាក់ថា៖ «បើសិនជាអញ្ចឹងមែន ពួកខ្ញុំស្វាគមន៍។ ប៉ុន្តែបើតាមប្រសាសន៍កាលពីពួកខ្ញុំធ្វើសេចក្តីព្រាងទីពីរ គាត់ថា សេចក្តីព្រាងទីបីនឹងមានអ្វីដែលយើងខ្ញុំស្នើ។ ប៉ុន្តែពេលយើងឃើញសេចក្តីព្រាងពិតប្រាកដជាក់ស្តែងគឺយើងឃើញថា នៅមានការខ្វះខាតច្រើន។ អញ្ចឹងខ្ញុំថា រង់ចាំមើលសេចក្តីព្រាងទីបួនសិនមុននឹងខ្ញុំធ្វើការវិនិច្ឆ័យ ថាតើច្បាប់ហ្នឹងមានបញ្ចូលនូវការព្រួយបារម្ភឬក៏អនុសាសន៍របស់យើងឬក៏អត់»។ លោកអ៊ូ វីរៈក៏បានបន្ថែមទៀតថា ចំណុចទាក់ទងនឹងការចុះឈ្មោះអង្គការនិងសិទ្ធិរបស់រដ្ឋាភិបាលក្នុងការបិទអង្គការទាំងនោះជាចំណុចដ៏ធំដែលពួកគេនឹងតាមដានជាប់ជានិច្ច៖ «ជាទូទៅ ក្នុងលទ្ធិប្រជាធិបតេយ្យ គេចេញច្បាប់មួយថា អង្គការមានសិទ្ធិចុះឈ្មោះតែម្តងហើយក្រសួងអត់មានសិទ្ធិបដិសេធទេ។ ហើយបើក្នុងករណីដែលគេបំពេញទម្រង់ទ្រង់ទ្រាយបានហើយគឺត្រូវតែចុះឈ្មោះឱ្យគេ។ ប៉ុន្តែនៅក្នុងប្រទេសកម្ពុជា ក្រសួងមានអំណាចខ្លាំងពេកក្នុងការបដិសេធហើយការដែលបដិសេធបែបនេះនឹងធ្វើឱ្យអង្គការ ដែលមិនស្របទៅហ្នឹងឆន្ទៈរបស់រដ្ឋាភិបាល អាចរងគ្រោះដោយការរឹតត្បិតនានា រួមទាំងការមិនអនុញ្ញាតឱ្យចុះឈ្មោះផង។ បើសិនជាក្នុងកាលៈទេសៈដែលយើងមិនអាចត្រូវបានចុះឈ្មោះគឺយើងពិបាកក្នុងការដើរជាតួអង្គច្បាប់មួយហើយ។ បើសិនជាយើងអត់ក្លាយជាតួអង្គច្បាប់មួយទេគឺបានន័យថា យើងមានការលំបាកនៅក្នុងការងារ ក្នុងការតំណាងស្ថាប័ន ក្នុងការចរចាជាមួយម្ចាស់ជំនួយ និងក្នុងការជជែកជាមួយរដ្ឋាភិបាលជាដើម»។ អ្នកសង្កេតការណ៍ខ្លះយល់ថា អាចនឹងត្រូវចំណាយពេលយ៉ាងហោចណាស់ក៏ប្រាំមួយទៅប្រាំពីរខែទៀតដែរ មុននឹងច្បាប់នេះអាចនឹងត្រូវចេញបាន ព្រោះត្រូវឆ្លងកាត់ការពិនិត្យនៅគណៈរដ្ឋមន្រ្តីសភាជាតិនិងព្រឹទ្ធសភា។ ប៉ុន្តែពួកគេព្រួយបារម្ភថា វាអាស្រ័យលើចេតនារបស់រដ្ឋាភិបាល ព្រោះកន្លងមកមានច្បាប់ខ្លះត្រូវបានរដ្ឋាភិបាលបញ្ជូនទៅ ហើយចំណាយពេលខ្លីតែប៉ុណ្ណោះ ដោយមិនមានការពិភាក្សាដេញដោលច្រើន៕ This posting includes an audio/video/photo media file: Download Now |
| ទិន្នផលស្រូវកើនទោះបីមានទឹកជំនន់ Posted: 06 Dec 2011 09:47 AM PST បើទោះបីជាកម្ពុជាបានទទួលរងផលប៉ះពាល់យ៉ាងធ្ងន់ធ្ងរដោយសារតែទឹកជំនន់ កាលពីចុងឆ្នាំកន្លងទៅដែលបានបណ្តាលឲ្យខូចខាតដំណាំស្រូវរាប់ម៉ឺនហិកតាក៏ដោយ ក៏ក្រុមអ្នកជំនាញ និងក្រុមអ្នកប្រកបរបរស្រូវបាននិយាយថាស្រូវឆ្នាំនេះល្អប្រសើរ សម្រាប់ការនាំចេញទៅក្រៅប្រទេសជាងបណ្តាឆ្នាំកន្លងទៅ។ លោក ភូ ភួយ ប្រធានសមាគមរោងម៉ាស៊ីនកិនស្រូវកម្ពុជា បាននិយាយថា ថ្វើបើខេត្តមួយចំនួនទទួលរងនូវផលប៉ះពាល់ទឹកជំនន់ ក៏ប៉ុន្តែខេត្តដែលមិនទទួលរងផលប៉ះពាល់ដោយទឹកជំនន់ ផលស្រូវឆ្នាំនេះបានល្អប្រសើរច្រើន។ លោកបានបញ្ជាក់ថា ការនាំស្រូវទៅកាន់ប្រទេសជិតខាងល្អជាងមុនបើប្រៀបធៀបកាលពីឆ្នាំ២០១០ និងឆ្នាំ២០១១។ «យើងឧទាហរណ៍ ដូចជាការសល់ស្រូវរបស់ប្រទេសកម្ពុជា ដែលយើងក្រោយពីហូបចុក សល់បួនលាន នៅឆ្នាំ២០១១។ ហើយបើទោះបីជាឆ្នាំ២០១២នេះ វាខូចខាតមួយចំនួន អស់ឧទាហរណ៍ថា៥០ម៉ឺន ទៅ៧០ម៉ឺន ឬវាលើសទៅតិចតួចទៀតនោះ វាក៏នៅសល់បីលានតោនទៀតដែរ»។ ទិន្ន័យរបស់ក្រសួងកសិកម្ម ដែលបានចេញផ្សាយកាលពីខែវិច្ឆិកា បានឲ្យដឹងថាផ្ទៃដីប្រមាណ៣៦ម៉ឺនហិកតា ត្រូវបានប្រមូលផលគឺស្មើនឹង១៦ភាគរយ នៃផ្ទៃដីដាំស្រូវសរុប។ លោក ភូ ភួយ បានមានប្រសាសន៍ថា សព្វថ្ងៃនេះប្រជាពលរដ្ឋកំពុងតែប្រមូលផលនៅតំបន់ដែលមិនទទួលរងផលប៉ះពាល់ដោយទឹកជំនន់។ ចំណែកឯតំបន់ដែលរងគ្រោះដោយទឹកជំនន់ មានការខូចខាតយ៉ាងច្រើន។ លោកបានបញ្ជាក់ថា ស្រូវឆ្នាំនេះ សម្បូរហើយអ្វីដែលជាការព្រួយបារម្ភនោះ ខ្លាចក្រែងគ្មានប្រាក់ទិញស្រូវពីកសិករ។ លោកបានមានប្រសាសន៍ថា ស្រូវដែលមានគុណភាពខ្ពស់ បានកើនឡើងថ្លៃពី១តោនតម្លៃ៣៤៧ដុល្លារ ដល់៣៩៧ដុល្លារ។ លោកនាយករដ្ឋមន្ត្រីហ៊ុន សែន កាលពីថ្ងៃទី២៣ ខែវិច្ឆិកា កន្លងទៅនេះ បានប្រកាសថារដ្ឋាភិបាល នឹងបង្កើតការិយាល័យផ្តល់សេវាកម្មមួយ ដល់រោងម៉ាស៊ីនកិនស្រូវ និងអ្នកជំនួញនាំស្រូវចេញទាំងអស់ដើម្បីកាត់បន្ថយការិយាធិបតេយ្យក្នុងការជួយដល់កម្ពុជាឲ្យឈានទៅរកការនាំចេញស្រូវឲ្យបានរាប់លានតោន នៅក្នុងឆ្នាំ២០១៥។ លោក សេង ប៊ុនសួរ ប្រធានសមាគមរោងម៉ាស៊ីនកិនស្រូវខេត្តបាត់ដំបង បាននិយាយថា លោកបានទិញស្រូវប្រមាណ២៤ពាន់តោនពីកសិករ ហើយលោករំពឹងថា ការនាំចេញស្រូវឆ្នាំនេះ នឹងមានការកើនឡើងប្រមាណ២០ភាគរយ។ «ខ្ញុំនៅតំបន់ភ្នំសំពៅនេះ។ មើលទៅដូចជាឥតខ្វះទេស្រូវ។ ស្រូវច្រើន។ ស្រូវខ្ញុំឃើញល្អច្រើនណាស់ជាងឆ្នាំទៅមិញទៀត»។ លោក អ៊ួន សុផល ប្រធានបណ្តាញកសិករខេត្តតាកែវ បាននិយាយថា ការប្រមូលផលស្រូវឆ្នាំនេះ បានល្អប្រសើរដោយសារតែទឹកជំនន់បានបំផ្លាញផលស្រូវប្រមាណតែ២០ភាគរយតែប៉ុណ្ណោះ។ លោកបាននិយាយថា របាយទឹកភ្លៀងឆ្នាំនេះបានល្អប្រសើរចាប់ពីដើមឆ្នាំ រហូតដល់ចុងឆ្នាំ ហើយបច្ចុប្បន្ននេះ នៅក្នុងស្រែមួយចំនួនដែលកសិករកំពុងតែច្រូតកាត់នោះ នៅមានទឹកនៅក្នុងស្រែនៅឡើយ។ «ខ្ញុំគិតថា បើទោះបីជាបញ្ហាទឹកជំនន់ប៉ុណ្ណឹង ក៏មិនទាន់ប៉ះពាល់ធ្ងន់ធ្ងរសម្រាប់កម្ពុជាប៉ុន្មានដែរ។ វាគ្រាន់តែជាផ្នែកមួយតូចសម្រាប់កម្ពុជា។ បាទ! អីញ្ចឹង យើងនៅមានឱកាសច្រើនទៀត ហើយការនាំស្រូវចេញ ខ្ញុំគិតថាមិនខកខានដែរ ប៉ុន្តែគ្រាន់ថាបានប៉ុន្មាន ឥតទាន់វាយតម្លៃច្បាស់»។ លោក យ៉ង សាំងកុមា ប្រធានមជ្ឈមណ្ឌលសិក្សា និងអភិវឌ្ឍន៍កម្ពុជា ដែលហៅកាត់ថា CEDAC បាននិយាយថា នៅខេត្តកំពង់ធំ ព្រៃវែង និងសៀមរាប ដែលទទួលរងគ្រោះដោយទឹកជំនន់ធ្ងន់ធ្ងរជាងគេ ការប្រមូលផលស្រូវមិនបានល្អទេ ក៏ប៉ុន្តែសម្រាប់ទិន្ន័យនៅទូទាំងប្រទេស ស្រូវឆ្នាំនេះ មានលក្ខណៈល្អប្រសើរច្រើន។ «យ៉ាងក្នុងរយៈពេលចុងរដូវក្រោយវិញ ជំហានទិញស្រូវនៅស្រុកខ្មែរ ឥតច្រើនទេ ហើយណាមួយទៀតធ្វើម៉េច ឲ្យយើងមានស្រូវនៅក្នុងប្រទេសឲ្យបានច្រើន ដើម្បីទុកនាំអង្ករចេញ វាចំណេញជាង។ អាហ្នឹងជាបញ្ហាដែរយើងត្រូវគិតគូរឲ្យបានច្រើន»។ លោក គង់ ពុទ្ធារ៉ា ប្រធាននាយកដ្ឋានស្ថិតិ និងព័ត៌មាន របស់ក្រសួងពាណិជ្ជកម្ម បានមានប្រសាសន៍ថា រហូតមកដល់ពេលនេះ លោកមិនទាន់បានទិន្ន័យនៃការនាំស្រូវទៅក្រៅប្រទេស នៅឡើយទេ ក៏ប៉ុន្តែលោករំពឹងថា ការនាំចេញស្រូវឆ្នាំនេះ នឹងមានការកើនឡើង។ «កំណើនដូចយឺតបន្តិច ប្រៀបដូចជាទំនិញមួយដែលរដ្ឋាភិបាលជំរុញអីទេព្រោះអីអានេះស្រូវ។ គាត់លក់ជាមួយឈ្មួញវៀតណាម។ គាត់ទិញយក ទិញយកតែម្តងទៅប្រុយ»។ លោកបានមានប្រសាសន៍ថា មានតែវៀតណាម និងថៃ0តែប៉ុណ្ណោះដែលជាទីផ្សារធំបំផុត សម្រាប់ការនាំចេញស្រូវពីប្រទេសកម្ពុជា៕ This posting includes an audio/video/photo media file: Download Now |
| សាក្សីបំភ្លឺពីការប្រមូលកម្លាំងរបស់ខ្មែរក្រហមនៅតំបន់ជនជាតិភាគតិច Posted: 06 Dec 2011 08:02 AM PST អតីតអនុគណៈស្រុកនៃរបបកម្ពុជាប្រជាធិបតេយ្យរបស់ពួកខ្មែរក្រហម បានថ្លែងនៅថ្ងៃអង្គារនេះថា ក្រុមអតីតមេដឹកនាំជាន់ខ្ពស់ខ្មែរក្រហមបានយកតំបន់ជនជាតិភាគតិចធ្វើជាទីតាំងតស៊ូប្រដាប់អាវុធដោយសារតែជនជាតិភាគតិចមានការយល់ដឹងតិចតួច។ លោក ក្លាន ហ៊្វីត ជាអតីតអនុគណៈស្រុកនៃស្រុកអណ្ដូងមាស ខេត្តរនគីរី និងជាជនជាតិដើមក្រចក់។ គាត់គឺជាដើមបណ្ដឹងរដ្ឋប្បវេណីមួយរូបនៅក្នុងសំណុំរឿង ០០២។ លោក ក្លាន ហ៊្វីត បាននិយាយនៅក្នុងការកាត់ទោស នួន ជា ខៀវ សំផន និង អៀង សារី នៅរសៀលនេះថា អតីតមេដឹកនាំខ្មែរក្រហមទាំងបីបានដឹងពីភាពល្ងង់ខ្លៅរបស់ជនជាតិភាគតិចដែលជាអំណោយផលសម្រាប់ការបង្កើតមូលដ្ឋានតស៊ូនៅទីនោះ។ «ដោយសារគេក្ដាប់ (ដឹង) ខាងនោះ វាល្ងង់ល្ងិត អត់ដឹងថា ខ្មាំងអត់ដឹងថា បដិវត្តន៍»។ លោក ក្លាន ហ្វ៊ីត បានសារភាពថា គាត់ខ្លួនឯងមិនចេះអក្សរខ្មែរទេ ភាសាប្រើប្រាស់ប្រចាំថ្ងៃរបស់គាត់គឺជាភាសាជនជាតិក្រចក់។ លោកបញ្ជាក់ថា ពួកខ្មែរក្រហមបានមកអូសទាញរូបគាត់ឲ្យចូលក្នុងចលនាបដិវត្តន៍កុម្មុយនីស្ដដោយបញ្ចុះបញ្ចូលគាត់ឲ្យចូលតស៊ូប្ដូររបបមួយ វាយរំលំការជិះជាន់ និងការកេងប្រវ័ញ្ច។ ក៏ប៉ុន្ដែគាត់មិនបានយល់ថា អ្វីទៅជាបដិវត្តន៍នោះទេ។ «គេថា បើយើងធ្វើបដិវត្តន៍។ យើងឥតមានជីវិតរស់ទេ។ យើងធ្វើបដិវត្តន៍ហ្នឹងគឺដើម្បីរំដោះជាតិខ្លួនឯង។ មិនឲ្យខ្មាំងជិះជាន់។ ពួកសក្ដិភូមិកាន់កាប់រដ្ឋអំណាច សង្កត់សង្កិន។ ខ្ញុំមិនដឹងថាបក្សហ្នឹងវាយ៉ាងម៉េច មិនដឹងថ្ម មិនដឹងទឹក មិនដឹងឈើ។ ធ្វើបដិវត្តន៍កុម្មុយនីស្ដដោយសារនោះហើយធ្វើឲ្យមនុស្សងាប់ច្រើន។ សុទ្ធតែគណៈភូមិភាគ គេវាយចោលដែរ មិនដឹងរឿងអី»។ លោក ក្លាន ហ៊្វីត បានក្លាយទៅជាប្រធានភូមិខ្មែរក្រហម នៅក្នុងសម័យតស៊ូ និងទៅជាអនុគណៈស្រុកនៅឆ្នាំ១៩៧៦ គឺក្រោយពេលដែលពួកខ្មែរក្រហមឡើងកាន់អំណាច។ គាត់បានរៀបរាប់ថា អៀង សារី បានណែនាំរូបគាត់កុំឲ្យប្រើពាក្យយួន នៅក្នុងការហៅប្រទេសវៀតណាម ដើម្បីកុំឲ្យប៉ះពាល់ដល់មិត្តភាព ហើយត្រូវចាត់ទុកថា វៀតណាម និងឡាវ គឺជាប្រទេសបងប្អូន។ ក៏ប៉ុន្ដែក្រោយមក នៅពេលដែលពួកខ្មែរក្រហមឡើងកាន់អំណាច រូបគាត់ត្រូវខ្មែរក្រហមចាប់ខ្លួនដាក់គុក នៅឆ្នាំ១៩៧៨ ដោយចោទប្រកាន់ថា គឺជាអ្នកគាំទ្រវៀតណាម។ ជាមួយគ្នានោះ លោកបានទទួលវគ្គបណ្ដុះបណ្ដាល ផ្នែកទ្រឹស្តីនយោបាយពី នួន ជា ចំនួនពីរដង។ លោក ក្លាន ហ្វ៊ីត បន្ថែមថា តាមពិតពួកខ្មែរក្រហម បានចាប់ផ្ដើមបំបិតសេរីភាពជំនឿរបស់ប្រជាពលរដ្ឋជនជាតិភាគតិច នៅមុនពេលពួកគេឡើងកាន់អំណាច ហើយបានបង្កើតឲ្យមានសហករណ៍នៅឆ្នាំ១៩៧៦ និងបន្ទាប់មកជម្លៀសជនជាតិភាគតិចចេញ ពីភូមិកំណើតរបស់គេ។ លោក ក្លាន ហ៊្វីត បានបញ្ជាក់ថា នួន ជា អៀង សារី ប៉ុល ពត គឺជាមេដឹកនាំដំបូងក្នុងតំបន់១០១នៅក្នុងខេត្តរតនគិរី។ សូមបញ្ជាក់ថា ការកាត់ក្ដីក្នុងសំណុំរឿង ០០២ នៅថ្ងៃនេះ នួន ជា ត្រូវតុលាការអនុញ្ញាតឲ្យដកខ្លួន ពីបន្ទប់សវនាការ នៅពេលរសៀល បន្ទាប់ពីគាត់បានត្អូញត្អែរពីសម្ពាធឈាម និងបញ្ហាបេះដូង។ មុននឹងការចាកចេញពីបន្ទាប់សវនាការ នួន ជា បានអះអាងឡើងវិញថា ការធ្វើបដិវត្តរបស់ក្រុមខ្មែរក្រហមគឺដើម្បីបោសសម្អាត «កម្អែល អាណានិគមបារាំង និងកម្ចាត់ឈ្មួញនាយទុនសក្ដិភូមិ»។ នួន ជា បញ្ជាក់ពីនយោបាយស្អាតស្អំថា គោលការណ៍របស់ខ្មែរក្រហមគឺ «មិនមែនយកមនុស្សជាសត្រូវនោះទេគឺការប្រព្រឹត្តិរបស់គេត្រូវចាត់ទុកជាសត្រូវ»៕ This posting includes an audio/video/photo media file: Download Now |
| ហ៊ុន សែន៖ ការកាត់ទោសមេដឹកនាំខ្មែរក្រហមផ្តល់សច្ចធម៌ដល់វៀតណាម Posted: 06 Dec 2011 07:35 AM PST នៅថ្ងៃអង្គារនេះ លោកនាយករដ្ឋមន្ត្រីហ៊ុន សែន បានហៅថាការកាត់ទោសអតីតមេដឹកនាំជាន់ខ្ពស់ខ្មែរក្រហមថាជាផ្នែកមួយនៃការផ្តល់សច្ចធម៌ដល់ប្រទេសវៀតណាម។ លោកនាយករដ្ឋមន្ត្រី ហ៊ុន សែន បានលើកឡើងបែបនេះនៅក្នុងជំនួបជាមួយលោក ង្វៀន ផូត្រុង (Nguyen Phu Trong) អគ្គលេខាធិការនៃគណៈកម្មាធិការមជ្ឈឹមបក្សកុម្មុយនីស្តវៀតណាម ដែលបានមកបំពេញទស្សនកិច្ចជាផ្លូវការនៅកម្ពុជាពីថ្ងៃទី៦ ដល់ថ្ងៃទី៨ ខែធ្នូនេះ។ លោក អ៊ាង សុផល្លែត អ្នកនាំពាក្យរបស់លោកនាកយករដ្ឋមន្ត្រី ហ៊ុន សែន បានថ្លែងប្រាប់ក្រុមអ្នកយកព័ត៌មានក្រោយពីជំនួបនៅទីស្តីការគណៈរដ្ឋមន្ត្រីយ៉ាងដូច្នេះថា ៖ «ការកាត់ទោសអតីតមេដឹកនាំខ្មែរក្រហមនោះរួមមានលោកខៀវ សំផន លោក នួន ជា និងលោក អ៊ៀង សារី គឺជាសច្ចធម៌ប្រវត្តិសាស្ត្រសម្រាប់វៀតណាម។ ការកាត់ទោសនេះរបស់ប៉ុល ពត គឺបញ្ជាក់ដល់ការជួយរបស់វៀតណាមមកដល់កម្ពុជាគឺមានភាពត្រឹមត្រូវ»។ ដំណើរទស្សនកិច្ចរបស់មេដឹកនាំជាន់ខ្ពស់វៀតណាមនេះ បានកើតមានឡើងខណៈដែលលោកនួន ជា អតីតមេដឹកនាំជាន់ខ្ពស់ទីពីរ នៃរបបខ្មែរក្រហម បន្ទាប់ពីប៉ុល ពត បានស្តីបន្ទោសប្រទេសវៀតណាមចំពោះអំពើឃោរឃៅលើប្រជាពលរដ្ឋខ្មែរ ដោយលោកនួន ជា បានអះអាងថាកងទ័ពវៀតណាមបានសម្លាប់ប្រជាពលរដ្ឋខ្មែរ។ ប៉ុន្តែមន្ត្រីស្ថានទូតវៀតណាមប្រចាំកម្ពុជា បានបដិសេធចោទប្រកាន់នេះ។ មេដឹកនាំជាន់ខ្ពស់បក្សកុម្មុយនីស្តវៀតណាម រូបនេះបានជួបពិភាក្សាការងារជាមួយព្រះមហាក្សត្រ នរោត្តម សីហមុនី លោក ជា ស៊ីម ប្រធានព្រឹទ្ធសភា លោក ងួន ញិល អនុប្រធានរដ្ឋសភា និងលោកនាយករដ្ឋមន្ត្រីហ៊ុន សែន សំដៅពង្រឹងទំនាក់ទំនងទ្វេភាគីឆ្ពោះទៅរកការអភិវឌ្ឍសេដ្ឋកិច្ចសង្គម និងស្ថេរភាពរវាងប្រទេសទាំងពីរ។ ដំណើរទស្សនកិច្ចរបស់លោក ង្វៀន ផូត្រុង នេះ ផ្តោតលើការលើកកម្ពស់ការអនុវត្តកិច្ចព្រមព្រៀងនានាស្តីពីកិច្ចសហប្រតិបត្តិការប្រកបដោយប្រសិទ្ធិភាព និងថែរក្សាបរិយាកាសសន្តិភាព និង ស្ថិរភាពយូរអង្វែងសម្រាប់ការអភិវឌ្ឍសេដ្ឋកិច្ចសង្គម ព្រមទាំងធានាឯករាជ្យភាព និងអធិបតេយ្យភាពរបស់ប្រទេសនីមួយៗ។ លោក អ៊ាង សុផល្លែត បានថ្លែងថា លោកនាយករដ្ឋមន្ត្រីហ៊ុន សែន និងលោក ផូត្រុង បានព្រមព្រៀងគ្នាជំរុញសកម្មភាពពាណិជ្ជកម្មរវាងប្រទេសទាំងពីរ។ «(លោកផូត្រុង) បានស្នើសុំដល់រដ្ឋាភិបាលទាំងពីរពិនិត្យ និងជំរុញវិនិយោគរវាងប្រទេសទាំងពីរឱ្យទំហំពាណិជ្ជកម្មរវាងប្រទេសទាំងពីរបានឈានដល់ ៥.០០០លានដុល្លារអាមេរិក នៅឆ្នាំ២០១៥»។ លោក អ៊ាង សុផល្លែត បានបញ្ជាក់ថាលោកនាយករដ្ឋមន្ត្រីហ៊ុន សែន បានឯកភាពតាមការលើកឡើងរបស់លោកផូត្រុង។ ការធ្វើពាណិជ្ជកម្មរវាងប្រទេសទាំងពីរបានសម្រេចដល់១.៩០០លានដុល្លារអាមេរិក នៅក្នុងឆ្នាំ២០១០ ដែលត្រូវបានគ្រោងឡើងដល់២.៤០០លានដុល្លារអាមេរិក នៅក្នុងឆ្នាំ២០១១នេះ។ រហូតមកដល់ពេលនេះ ប្រទេសវៀតណាមមានគម្រោងចំនួន៩៨ នៅកម្ពុជាដោយមានទឹកប្រាក់២.២០០លានដុល្លារអាមេរិក នៅក្នុងវិស័យផ្សេងៗជាច្រើន រួមមានអាកាសចរណ៍ ដំណាំកៅស៊ូ និងធនាគារ៕ This posting includes an audio/video/photo media file: Download Now |
| សៀវភៅបង្ហាញការបំពានផ្លូវភេទក្នុងរបបខ្មែរក្រហម Posted: 06 Dec 2011 12:44 AM PST នៅពេលដែលព័ត៌មាននានា បានផ្សាយអំពីការចាប់រំលោភផ្លូវភេទក្នុងសម័យបច្ចុប្បន្ន ការរំលោភទាំងនេះមិនត្រូវបានឮទេនៅក្នុងរបបកុម្មុយនីស្ដបែបម៉ៅនិយមរបស់ពួកខ្មែរក្រហមនោះ។ វាជារបបមួយដែលត្រូវបានអះអាងថា អំពើអសីលធម៌ផ្លូវភេទនឹងត្រូវផ្ដន្ទាទោសធ្ងន់ធ្ងរបំផុតរហូតដល់សម្លាប់ចោល។ ការរំលោភផ្លូវភេទក្នុងរបបខ្មែរក្រហមបានកប់ជ្រៅក្នុងភាពសម្ងាត់អស់រយៈពេលបីទសវត្សរ៍មកហើយ។ ប៉ុន្ដែសៀវភៅដែលមានចំណងជើងថា «អាថ៌កំបាំងនៃហិង្សាផ្លូវភេទក្រោមរបបខ្មែរក្រហម» អាចក្លាយជាភ័ស្ដុតាងមួយដែលបំបែកអតីតកាលនោះ។ សៀវភៅនេះទើបនឹងបោះពុម្ពផ្សាយកាលពីខែមិថុនា ឆ្នាំ២០១១ ដោយអង្គការក្រុមអ្នកច្បាប់ការពារសិទ្ធិកម្ពុជាបន្ទាប់ពីស្រាវជ្រាវអស់រយៈពេលពីឆ្នាំ។ សៀវភៅកម្រាស់៦២ទំព័របានស្រង់សម្តីសាក្សីចំនួន១៨នាក់ដែលបានឃើញសាច់ញាតិរបស់ខ្លួនត្រូវពួកខ្មែរក្រហមចាប់រំលោភ ឬឃើញស្ដ្រីដទៃត្រូវពួកនោះចាប់រំលោភ និងអ្នកដែលបានរងការរំលោភផ្លូវភេទនេះដោយខ្លួនឯងផ្ទាល់។ ជនរងគ្រោះទាំងនោះកំពុងរស់នៅក្នុងរាជធានី និងខេត្តចំនួន១១គឺក្រុងភ្នំពេញ ពោធិ៍សាត់ បាត់ដំបង កោះកុង កំពង់ស្ពឺ តាកែវ កំពត កណ្ដាល ព្រៃវែង ស្វាយរៀង និងខេត្តកំពង់ចាម។ នេត សាវឿន ជាស្ដ្រីអភ័ព្ទម្នាក់ ដែលត្រូវស្រង់សម្តីក្នុងសៀវភៅនោះ។ អ្នកស្រុកស្វាយទៀប ខេត្តស្វាយរៀងរូបនេះត្រូវបានជម្លៀសចេញទៅកាន់ខេត្តពោធិ៍សាត់។ នៅចុងឆ្នាំ១៩៧៨ គាត់មានអាយុ ប្រហែល២២ឆ្នាំ ហើយត្រូវពួកខ្មែរក្រហមនាំខ្លួនជាមួយស្ដ្រី២៩នាក់ផ្សេងទៀត យកទៅ សម្លាប់ចោល។ អ្នកស្រីនេត សាវឿន រៀបរាប់ថា ស្រ្ដីដែលមានរូបរាងស្អាត ក្នុងចំណោមនោះសុទ្ធតែត្រូវបានរំលោភ រួចទើបវាយសម្លាប់ចោលនឹងផ្លែពូថៅ។ លុះដល់ពាក់កណ្ដាលអាធ្រាតទើបដល់វេនរូបគាត់ត្រូវយកទៅសម្លាប់។ អ្នកស្រី សាវឿន បញ្ជាក់ថា ឃាតករខ្មែរក្រហមចំនួនពីរនាក់ បានចាប់រំលោភគាត់ទាំងដៃរបស់គាត់ជាប់ចំណង។ បន្ទាប់មករូបគាត់ត្រូវពួកខ្មែរក្រហមកាប់ក្បាលចំនួនបីពូថៅដើម្បីសម្លាប់ចោល ហើយពួកគេក៏បានចាកចេញទៅ។ លុះជិតភ្លឺគាត់បានដឹងខ្លួនឡើងវិញ។ ខ្លួនរបស់គាត់អាក្រាត គ្មានសម្លៀកបំពាក់ និងប្រឡាក់ដោយឈាមពាសពេញ។ នៅជុំវិញខ្លួនគាត់គឺសុទ្ធសឹងជាសាកសពស្ដ្រី ដែលនាំយកទៅសម្លាប់ជាមួយគាត់។ លោក ដូង សាវ៉ន មេធាវីមួយរូបរបស់អង្គការក្រុមអ្នកច្បាប់ការពារសិទ្ធិកម្ពុជា និងអ្នកនិពន្ធសៀវភៅ "អាថ៌កំបាំងនៃហិង្សាផ្លូវភេទក្រោមរបបខ្មែរក្រហម" បានរៀបរាប់ថា ការរៀបរៀងសៀវភៅនេះឡើងគឺដើម្បីលាតត្រដាងការខ្វះចន្លោះមួយ ដែលគេមិនបានរំលឹកដល់។ «នៅក្នុងសម័យខ្មែរក្រហមហ្នឹងមានមនុស្សតិចតួចណាស់ដែលបាននិយាយ ឬក៏ដឹងរឿងហ្នឹង។ ជនរងគ្រោះខ្លួនឯងក៏មិនមានឱកាសនិយាយចេញមកសម្រាប់សាធារណជនបានដឹងដែរ។ ដូច្នេះយើងចងក្រងសៀវភៅនេះឡើងសម្រាប់ប្រយោជន៍មនុស្សទូទៅ និងក្មេងជំនាន់ក្រោយបានដឹងពីរឿងហិង្សាផ្លូវភេទនេះ»។ សៀវភៅនេះត្រូវបានចេញផ្សាយក្រោយពីបិទបញ្ចប់ការស៊ើបអង្កេតលើសំណុំរឿង០០២ ដ៏មានសារៈសំខាន់ ហើយមានជនជាប់ចោទជាមេដឹកនាំកំពូលខ្មែរក្រហម ដែលក្នុងនោះរួមមាន នួន ជា ខៀង សំផន អៀង សារី និងអៀង ធីរិទ្ធ។ យោងតាមសៀវភៅដដែលនេះ ការរំលោភផ្លូវភេទបានចាប់ផ្ដើមចាប់តាំងពីឆ្នាំ១៩៧៧ ហើយវាបន្ដរហូតដល់ខែមករា ឆ្នាំ១៩៧៩។ ស្រ្ដីខ្លះត្រូវគេប៉ុនប៉ងចាប់រំលោភសេពសន្ធវៈ រួចទើបសម្លាប់ចោល ខ្លះទៀតត្រូវរំលោភក្នុងពេលយកទៅសម្លាប់ និងមួយចំនួនទៀតទទួលរងការរំលោភផ្លូវភេទម្ដងហើយម្ដងទៀត ក្នុងអំឡុងដែលគាត់រស់នៅក្នុងសម័យខ្មែរក្រហម។ អ្នកស្រី លាង កន អាយុ៥៩ឆ្នាំដែលពេលនោះរស់នៅស្រុកដំណាក់ចង្អើរ ខេត្តកំពត បានទទួលរងអំពើហិង្សាបែបនេះនៅខែមករា ឆ្នាំ១៩៧៩។ ពេលព្រលប់មួយមានកងឈ្លបម្នាក់អាយុប្រហែលជា១៥ឆ្នាំ បានមកហៅគាត់ឲ្យទៅជួបមេរបស់គេ ហើយក្រោយមកគាត់ត្រូវពួកឈ្លបខ្មែរក្រហមចាប់សម្រាតខោអាវ និងរំលោភនៅក្នុងព្រៃ ដោយពួកឈ្លបក្មេងៗជាអ្នកចាប់ដៃ និងជើងរបស់គាត់។ នៅពេលនោះគាត់អាយុ២៦ឆ្នាំ ហើយគាត់បានទទួលរងការវាយដំយ៉ាងខ្លាំងនៅពេលដែលរូបគាត់បានព្យាយាមរើបម្រះ។ ពួកឈ្លបចំនួនបីនាក់ ដែលមានមាឌធំៗ អាយុប្រហែល៣០ឆ្នាំ បានចាប់រំលោភ គាត់រហូតដល់គាត់សន្លប់។ ជាអកុសលមួយថ្ងៃមុនថ្ងៃរំដោះគឺនៅថ្ងៃទី៦ ខែមករា អ្នកស្រី លាង កន ទទួលរងការរំលោភយ៉ាងព្រៃផ្សៃ ដោយកងឈ្លបពួកខ្មែរក្រហមចំនួនបីនាក់រហូតដល់សន្លប់ម្ដងទៀត។ របៀបរំលោភប្រព្រឹត្តិទៅដូចមុនដែរ។ ពួកកងឈ្លបចាប់ហែកអាវរបស់គាត់ និងសម្រាតខោ និងមួយចំនួនចាប់ដៃគាត់ និងសង្កត់ជើងរបស់គាត់។ ពេលនោះពួកខ្មែរក្រហមក៏បាននាំស្ដ្រីចំនួនបីនាក់ទៀតទៅជាមួយគាត់ដែរ ប៉ុន្ដែគាត់មិនបានដឹងថា ស្ដ្រីបីនាក់ទៀតនឹងជួបប្រទះរឿងអ្វីនោះទេ។ អ្នកស្រី លាង កន បច្ចុប្បន្នរស់នៅខេត្តកោះកុង។ ប៉ុន្ដែរឿងអាស្រូវនេះ ក្រៅពីរូបជនល្មើស និងជនរងគ្រោះផ្ទាល់ គ្មានអ្នកណាបានដឹងទេពីមុនមក។ ការលាក់រឿងនេះទុកហាក់ដូចជាធ្វើឲ្យគេមើលមិនឃើញថា ពួកកម្មាភិបាលខ្មែរក្រហមបានរំលោភលើគោលការណ៍ដ៏ផ្ដាច់ការរបស់ពួកគេ។ អ្នកនិពន្ធសៀវភៅ «អាថ៌កំបាំងនៃហិង្សាផ្លូវភេទក្រោមរបបខ្មែរក្រហម» លោក ដួង សាវន លើកឡើងថា ការរំលោភសេពសន្ធវៈគឺជារឿងដែលពិបាកហ្នឹងនិយាយចេញមកសម្រាប់ជនរងគ្រោះក្នុងសង្គមខ្មែរ។ «រឿងហិង្សាផ្លូវភេទមិនសូវមានអ្នកណានិយាយ ហើយជនរងគ្រោះខ្លួនឯង ពិបាកហ្នឹងនិយាយចេញការខ្មាសអៀនជារឿងមួយ ហើយការឈឺចាប់ក៏ជារឿងមួយដែរ។ ហើយគាត់ឈឺចាប់ផ្លូវកាយ ផ្លូវចិត្តដែលនៅជាមួយពួកគាត់ជានិច្ច។ តាមការស្រាវជ្រាវអំពើហិង្សានេះមានស្ទើរគ្រប់ខេត្តក្រុងទាំងអស់»។ អំពើហិង្សាផ្លូវភេទបែបនេះមិនស្ថិតក្នុងចំណាត់ការរបស់សាលាក្ដីខ្មែរក្រហមទេ។ ក្រុមចៅក្រមស៊ើបអង្កេតធ្លាប់បានបង្ហាញថា ការរំលោភផ្លូវភេទមិនមែនជាគោលនយោបាយរបស់របបកម្ពុជាប្រជាធិបតេយ្យទេ។ ក្រុមអង្គការសង្គមស៊ីវិល ធ្លាប់បានជំរុញឲ្យសាលាក្ដីខ្មែរក្រហមចាត់ទុកថា ការរំលោភផ្លូវភេទគឺជាឧក្រិដ្ឋកម្មធ្ងន់ធ្ងរមួយ ដែលប្រព្រឹត្តិឡើងក្នុងសម័យកម្ពុជាប្រជាធិបតេយ្យរបស់ពួកខ្មែរក្រហម។ ក្រុមអង្គការបានបន្ទោសថា សាលាក្ដីខ្មែរក្រហមបានខកខានក្នុងការស៊ើបអង្កេតករណីនេះ ក្នុងសំណុំរឿង០០១ ករណីឌុច។ ផ្ទុយទៅវិញការរំលោភផ្លូវភេទបានកើតមានឡើងក្នុងមន្ទីរឃុំឃាំងនោះ ដែលមានអ្នកទោសយ៉ាងតិច១២.៣៨០ ត្រូវបានធ្វើទារុណកម្ម និងសម្លាប់ចោល។ អ្នកស្រី ណាំ ម៉ុន ដែលបច្ចុប្បន្នកំពុងរស់នៅក្នុងខេត្តកំពង់ចាមគឺជាបុគ្គលិកចែកថ្នាំពេទ្យនៅមន្ទីរស២១ ហើយក្រោយមកគាត់បានក្លាយជាអ្នកទោសនៅទីនោះដែរ។ ម្ដាយឪពុក និងបងប្រុសរបស់គាត់ពីរនាក់ត្រូវសម្លាប់ក្នុងគុកទួលស្លែងនេះ។ គាត់ត្រូវសន្ដិសុខម្នាក់ដែលជាមនុស្សជំនិតរបស់ឌុច ប្រធានគុកទួលស្លែងចាប់រំលោភក្នុងបន្ទប់ឃុំឃាំងទាំងជើងម្ខាងរបស់គាត់ជាប់ខ្នោះ។ នៅពេលនោះគាត់អាយុ១៧ឆ្នាំ។ ជនប្រព្រឹត្តិបទល្មើសបានចូលក្នុងបន្ទប់ឃុំឃាំងនៅពេលយប់មួយម៉ោងប្រមាណជា៦ល្ងាច ហើយបានបញ្ជាឲ្យគាត់ដេកផ្ងា និងបន្ទាប់មកជននោះ ដែលមានអាយុប្រហាក់ប្រហែលរូបគាត់ដែរបានដោះខោអាវរបស់គាត់រួចក៏ចាប់ផ្ដើមរំលោភ។ អ្នកស្រី ណាំ ម៉ុន គឺជាសាក្សីម្នាក់ក្នុងសំណុំរឿង០០១ ករណី ឌុច។ គាត់បានជួបជាមួយអ្នករំលោភគាត់ម្ដងទៀតនៅពេលគាត់ផ្ដល់សក្ខីកម្មដល់សាលាក្ដីខ្មែរក្រហមនៅឆ្នាំ២០០៨។ ប៉ុន្ដែជនរូបនោះអះអាងថា មិនចំណាំរូបគាត់នោះទេ។ អ្នកស្រាវជ្រាវជនជាតិជប៉ុន លោកស្រី ណាកាវ៉ា កាស៊ូមិ ( Nakawa Kasumi) បានបង្ហាញក្នុងរបាយការណ៍នៅឆ្នាំ២០០៩ ថា យ៉ាងហោចណាស់មានស្ដ្រីកម្ពុជាចំនួន២សែននាក់ត្រូវបានបង្ខំឲ្យរៀបការនៅក្នុងសម័យខ្មែរក្រហម។ ហើយមានការរំលោភផ្លូវភេទជាក្រុម និងការបង្ខំឲ្យរួមភេទក្រោយពីការរៀបការដោយបង្ខំ។ សៀវភៅ «អាថ៌កំបាំងនៃហិង្សាផ្លូវភេទក្រោមរបបខ្មែរក្រហម» ក៏បានបង្ហាញការបង្ខំឲ្យរៀបការនៅមន្ទីរឃុំឃាំងចំនួនពីរគូដែរ។ គូស្វាមីភរិយាទាំងនោះត្រូវបង្ខំឲ្យរួមភេទ។ សៀវភៅក៏បានបង្ហាញពីការប៉ុនប៉ងរំលោភលើប្រជាពលរដ្ឋខ្មែរអ៊ីស្លាមផងដែរ។ ជនរងគ្រោះម្នាក់ៗក្នុងសៀវភៅបានរំលឹកការឈឺចាប់ និងភាពធូរស្បើយក្នុងអារម្មណ៍នៅពេលដែលពួកគាត់បានរំលឹកអនុស្សាវរីយ៍ នៃសុបិន្ដអាក្រក់ទាំងនោះ។ ប៉ុន្ដែលោក ដួង សាវន ហាក់ដូចជាខកចិត្តនៅពេលដែលតុលាការមិនទទួលយកបណ្ដឹងរបស់ជនរងគ្រោះក្នុងបទរំលោភនេះ។ «យើងមានជនរងគ្រោះដាក់ពាក្យបណ្ដឹងពីការរំលោភនេះ ចូលក្នុងសាលាក្ដី (ខ្មែរក្រហម) ដែរ ក៏ប៉ុន្ដែសាលាក្ដីមិនបានចោទប្រកាន់លើមេដឹកនាំជាន់ខ្ពស់ទាក់ទង នឹងការរំលោភនោះទេ។ មានតែការបង្ខំឲ្យរៀបការប៉ុណ្ណោះទេ ដែលសាលាក្ដីនេះយកមកពិចារណា។ ដូច្នេះវាធ្វើឲ្យប៉ះពាល់ដល់អារម្មណ៍ជនរងគ្រោះដែរ»។ ទោះជាយ៉ាងណាលោកនេត្រ ភក្ដ្រា អ្នកនាំពាក្យសាលាក្ដីខ្មែរក្រហមអះអាង ការរំលោភសេពសន្ធវៈ ស្ថិតក្នុងចង្កោមនៃឧក្រិដ្ឋកម្មប្រឆាំងមនុស្សជាតិដែរ ហើយតុលាការទំនងជាអាចពិចារណាជាមួយនឹងបទចោទ ដែលទាក់ទងនឹងការបង្ខំឲ្យរៀបការ។ ក្រុមស្ដ្រីរងគ្រោះពីការរំលោភបែបនេះចំនួនបីនាក់ និងបុរសម្នាក់ ដែលបានឃើញពួកខ្មែរក្រហមចាប់បងស្រីរបស់គាត់រំលោភ និងធ្វើទារុណកម្មផ្ទាល់នឹងភ្នែក ជនរងគ្រោះទាំងនេះនឹងជួបប្រជុំគ្នាជាលើកដំបូងនៅថ្ងៃទី៧ និងទី៨ ខែធ្នូនេះ ក្នុងទីក្រុងភ្នំពេញដើម្បីបង្ហាញពីបទពិសោធន៍ជូរចត់ដែលពួកគេបានជួបប្រទះ៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ០៦ ធ្នូ យប់ Posted: 06 Dec 2011 07:47 AM PST អាហ្វហ្គានិស្ថាន៖ ពួកមន្ត្រីអាហ្វហ្គានិស្ថាននិយាយថាមានមនុស្សយ៉ាងតិច ៤៨នាក់ រួមបញ្ចូលទាំងស្ត្រីនិងកុមារបានស្លាប់នៅក្នុងការវាយប្រហារដោយគ្រាប់បែកអត្តឃាតមួយទៅលើទីសក្ការបូជា Shi'ite នៅកណ្តាលក្រុង Kabul។ មានមនុស្សជាង១០០នាក់ក៏បានត្រូវរបួសផងដែរក្នុងហេតុការណ៍ផ្ទុះនេះ។ អឺរ៉ុប៖ លោកស្រីអធិការបតីអាល្លឺម៉ង់ Angela Merkel និងលោកប្រធានាធិបតីបារាំងNicolas Sarkozy បានជំរុញជាថ្មីលើការពង្រឹងកិច្ចសហប្រតិបត្តិការសេដ្ឋកិច្ចក្នុងតំបន់ប្រើប្រាស់ប្រាក់អឺរ៉ូ ក្រោយពីទីភ្នាក់ងារឥណទាន Standard and Poor's បាននិយាយថា ពួកគេប្រហែលបន្ថយអត្រារូបិយវត្ថុនៅទូទាំងតំបន់នោះ។ ទ្វីបអាស៊ី៖ ភាគហ៊ុនក្នុងទ្វីបអាស៊ីបានចុះថ្លៃនៅថ្ងៃអង្គារនេះក្រោយពីទីភ្នាក់ងារផ្តល់អត្រារូបិយវត្ថុ Standard and Poor's បាននិយាយថាពួកគេប្រហែលបន្ទាបអត្រាក្នុងប្រទេស១៥នៃតំបន់អឺរ៉ុបប្រសិនបើពួកមេដឹកនាំអឺរ៉ុបមិនអាចមានផែនការមួយដើម្បីដោះស្រាយវិបត្តិប្រាក់បំណុលក្នុងតំបន់ទេនោះ។ ស៊ីរី៖ សម្ព័ន្ធអារ៉ាប់និយាយថា ពួកគេកំពុងពិចារណាលើសំណើមួយរបស់ប្រទេសស៊ីរីដែលផ្តល់ការអនុញ្ញាតមានល័ក្ខខ័ណ្ឌ ឱ្យពួកអ្នកសង្កេតការណ៍ចួលទៅក្នុងប្រទេសដើម្បីពិនិត្យមើលការប្រព្រឹត្តតាមកិច្ចសន្យារបស់ខ្លួនមួយលើប្រធានបទបញ្ឈប់ការបង្ក្រាបចលនាបះបោរលម្អៀងទៅលទ្ធិប្រជាធិបតេយ្យដែលកើតឡើងអស់រយៈពេល៩ខែមកហើយ។ អេហ្ស៊ីប៖ ប្រទេសអេហ្ស៊ីប Egypt កំពុងស្ថិតក្នុងថ្ងៃទីពីរនៃការបោះឆ្នោតជាថ្មីរបស់ខ្លួន ដើម្បីជ្រើសរើសសាមាជិកសភាខណៈដែលគូប្រជែងគណបក្សអ៊ីស្លាមនិយមបានចូលរួមប្រកួតខ្លាំងទ្បើងៗដើម្បីប្រមូលសន្លឹកឆ្នោតគាំទ្រនៅក្នុងក្រុងធំបំផុតពីររបស់ប្រទេសនិងខេត្ត៧ផ្សេងទៀត។ <!--AV--> This posting includes an audio/video/photo media file: Download Now |
| នួន ជា ចោទវៀតណាមសម្លាប់ខ្មែរ ហើយអះអាងថាខ្មែរក្រហមគ្មានកំហុសទេ Posted: 05 Dec 2011 05:07 PM PST អតីតបងធំទី២នៃរបបខ្មែរក្រហម គឺនួន ជា បានអះអាងនៅថ្ងៃច័ន្ទនេះថា ការក្លាយខ្លួនជាជនកុម្មុយនីស្ដរបស់គាត់គឺដោយសារការឈឺចាប់និងការជិះជាន់ក្នុងសង្គម ហើយលោកបន្ដបកស្រាយថា ខ្មែរក្រហមគ្មានកំហុសនោះទេ។ នៅក្នុងការកាត់ក្ដីរបស់អង្គជំនុំជម្រះសាលាដំបូងនៃសាលាក្ដីខ្មែរក្រហមដោយផ្ដោតលើប្រវត្តិសាវតារនៃកំណើតបក្សកុម្មុយនីស្ដកម្ពុជា អតីប្រធានសភាខ្មែរក្រហមនេះបានរៀបរាប់ថា ខ្លួនបានបណ្ដុះគំនិតតស៊ូក្រោមការជិះជាន់ពីបារាំង និងពីខ្មែរដូចគ្នាក្រោមរបបអាណានិគមនិយមបារាំង។ «ដូច្នោះហើយបានជាខ្ញុំស្អប់ខ្ពើមនូវការជិះជាន់ សង្កត់សង្កិនរបស់អាណានិគមនិយមបារាំង និងរបស់ពួកម្ចាស់ដី អ្នកមានអំណាច ជាខ្មែរដូចគ្នា»។ <!--AV--> នៅក្នុងសវនាការ នួន ជាបានរៀបរាប់ពីការយល់ឃើញរបស់គាត់ក្នុងការចូលរួមក្នុងចលនាកុម្មុយនីស្ដដែលថា ចលនានេះនឹងជួយប្រឆាំង និងផ្ដួលរំលំនូវរបបដែលគាត់ស្អប់ខ្ពើមនោះ។ ទោះជាយ៉ាងណា នួន ជាបន្ដការរិះគន់លើប្រទេសវៀតណាមថា ប្រទេសវៀតណាមបានគ្រប់គ្រងចលនាបក្សកុម្មុយនីស្ដកម្ពុជា ហើយនួន ជាបានច្រានចោលការចោទប្រកាន់ពីបទឧក្រិដ្ឋនានាមកលើមេដឹកនាំខ្មែរក្រហម និងទាមទារឲ្យតុលាការបញ្ឈប់ការចោទប្រកាន់ទាំងនេះ។ «ដូច្នេះទម្លាក់ឧក្រិដ្ឋកម្មសង្រ្គាម សង្រ្គាមប្រល័យពូជសាសន៍ទាំងអស់នេះ(ពីព្រោះ) វាមិនមែនខ្មែរនិងខ្មែរទេ។ យួនអ្នកសម្លាប់ខ្មែរ។ កុំច្រឡំ។ កុំយល់ថា ខ្មែរក្រហមអាក្រក់ ខ្មែរក្រហមប្រល័យពូជសាសន៍ ខ្មែរក្រហមជាឧក្រិដ្ឋកម្មសង្រ្គាម។ វាអត់សោះ»។ នួន ជា និងអតីតមេដឹកនាំកំពូលខ្មែរក្រហមចំនួនបីនាក់ផ្សេងទៀត គឺ អៀង សារី អតីតឧបនាយករដ្ឋមន្ដ្រី និងជារដ្ឋមន្ដ្រីការបរទេស ខៀវ សំផន អតីតប្រមុខរដ្ឋខ្មែរក្រហម និងអៀង ធីរិទ្ធ ប្រពន្ធអៀង សារី អតីតរដ្ឋមន្ដ្រីក្រសួងសង្គមកិច្ចត្រូវចោទប្រកាន់ពីបទឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ និងបទប្រល័យពូជសាសន៍ សម្រាប់សំណុំរឿង០០២។ ប៉ុន្ដែអៀង ធីរិទ្ធ មិនត្រូវតុលាការសម្រេចថា ពុំមានកាយសម្បទាគ្រប់គ្រាន់សម្រាប់ចូលរួមការកាត់ទោសនោះទេ។ អតីតជនកុម្មុយនីស្ដម៉ៅនិយមទាំងនេះបានកាន់អំណាចពីខែមេសា ឆ្នាំ១៩៧៥ដល់ខែមករាឆ្នាំ១៩៧៩ ដែលមានប្រជាពលរដ្ឋកម្ពុជាស្លាប់ដោយការសម្លាប់ ដោយការបង្អត់អាហារ និងដោយពលកម្មធ្ងន់ធ្ងរ អស់យ៉ាងតិចចំនួន១,៧លាននាក់ ក្នុងអំឡុងពេលពួកគេកាន់អំណាចជិតបួនឆ្នាំនេះ។ នួន ជា ដែលមានអាយុ៨៥ឆ្នាំទៅហើយនៅឆ្នាំនេះ ធ្លាប់ចូលរួមក្នុងចលនាបក្សកុម្មុយនីស្ដនៅប្រទេសថៃ មុនមកចូលរួមដឹកនាំបក្សកុម្មុយនីស្ដកម្ពុជានៅស្រុកខ្មែរ។ នៅក្នុងចម្លើយទៅនឹងការចោទសួររបស់លោកស្រីចៅក្រម Sylvia Cartwright នួន ជាបានទទួលស្គាល់ថា ខ្លួនបានទៅរៀននយោបាយនៅប្រទេសវៀតណាមអស់រយៈពេលជាងមួយឆ្នាំក្នុងសម័យតស៊ូ មុនពេលក្រុមខ្មែរក្រហមឡើងកាន់អំណាច។ ប៉ុន្ដែបានបដិសេធថា មិនបានរៀនក្បួនសឹកពីប្រទេសវៀតណាមទេ។ អ្នកនាំពាក្យស្ថានទូតវៀតណាមធ្លាប់បានហៅសេចក្ដីអះអាងរបស់នួន ជាដែលថាវៀតណាមជាប់ពាក់ពន្ធ័នឹងការស្លាប់របស់ពលរដ្ឋកម្ពុជានោះថា គឺជាភូតកុហក។ ជនរងគ្រោះមួយចំនួន ដែលបានចូលរួមសវនាការនៅថ្ងៃនេះបានប្រតិកម្មដោយកំហឹងទៅនឹងការលើកឡើងរបស់នួន ជា ដោយសំអាងថា គាត់មិនទទួលខុសត្រូវចំពោះឧក្រិដ្ឋកម្ម ដែលបានកើតឡើង។ ដោយឡែក លោកហុង គឹមសួន មេធាវីមួយរូប តំណាងឲ្យដើមបណ្ដឹងរដ្ឋប្បវេណី មានប្រសាសន៍ថា នួន ជាមិនទាន់និយាយការណ៍ពិតនៅឡើយ៕ This posting includes an audio/video/photo media file: Download Now |
| ហេឡូវីអូអេ៖ ជីវិត និងវិជ្ជាជីវៈនៃគ្រូឧត្តមសិក្សានៅកម្ពុជា Posted: 05 Dec 2011 05:27 PM PST ធនធានមនុស្សគឺជាទ្រព្យសម្បត្តិមហាសាលរបស់ប្រទេស។ និន្នាការនៃការអភិវឌ្ឍក្នុងប្រទេសជឿនលឿននៅក្នុងសាកលលោកចាប់ផ្តើមពីការកសាងធនធានមនុស្ស។ ប្រទេសជប៉ុននិងកូរ៉េខាងត្បូងជាឧទាហរណ៍ ដែលក្រោយសង្គា្រមលោកលើកទីពីរ គេបានផ្តោតការយកចិត្តទុកដាក់លើការអភិវឌ្ឍវិស័យអប់រំ។ ដោយឡែកប្រព័ន្ធអប់រំនៅកម្ពុជាត្រូវបានរិះគន់ថា នៅមិនទាន់ឈានដល់បទដ្ឋានមួយដែលអាចទទួលយកបានទេ ដោយហេតុថា សិស្សានុសិស្សចាប់ផ្តើមការអប់រំរបស់គេពីបឋមសិក្សា ដោយឃើញអំពើពុករលួយរាល់ថ្ងៃតាមរយៈការបង្ខំឲ្យបង់ប្រាក់ប្រចាំថ្ងៃ ទិញរបស់របរនៅក្នុងថ្នាក់ដែលមិនគួរត្រូវទិញ ជួនកាលនិស្សិតអាចទទួលបានសញ្ញាប័ត្រដោយមិនចាំបាច់ធ្វើកិច្ចការដែលត្រូវធ្វើនៅតាមវិទ្យាស្ថានឧត្តមសិក្សាមួយចំនួន។ បញ្ហាទាំងនេះ មួយផ្នែកគឺកើតចេញពីជីវភាព និងវិជ្ជាជីវៈរបស់គ្រូនិងសាស្ត្រាចារ្យ។ កម្មវិធីសំឡេងជំនាន់ថ្មី (New Voices) ទី៣នេះ បានអញ្ជើញលោក តេង សុមង្គល បេក្ខជនបណ្ឌិតនៃសាកលវិទ្យាល័យមីណ្ណេសូតា សហរដ្ឋអាមេរិក មកចែករំលែកបទពិសោធន៍ការសិក្សារបស់លោក និងនិយាយអំពីប្រធានបទនិក្ខេបទបណ្ឌិតរបស់លោកដែលផ្តោតលើជីវិត និងវិជ្ជាជីវៈរបស់សាស្ត្រាចារ្យសាកលវិទ្យាល័យរដ្ឋ និងឯកជននៅប្រទេសកម្ពុជា។ ប្រធានបទ៖ ជីវិត និងវិជ្ជាជីវៈនៃគ្រូឧត្តមសិក្សានៅកម្ពុជា វាគ្មិន៖ តេង សុមង្គល បេក្ខជនបណ្ឌិត សាកលវិទ្យាល័យមីណេ្ណសូតា (University of Minnesota, U.S.A.) អ្នកសម្របសម្រួល៖ អ៊ឹម សុធារិទ្ធ វ៉ាស៊ីនតោន មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី០៥ ខែធ្នូ ឆ្នាំ២០១១៖ <!--AV--> This posting includes an audio/video/photo media file: Download Now |
| Posted: 06 Dec 2011 12:26 AM PST អង់គ្លេស៖ មន្រ្តីកីឡាអូឡាំពិកអង់គ្លេសបានបង្កើនថវិកាជិតពីរដងលើការងារសន្តិសុខក្នុងការប្រកួតកីឡារដូវក្តៅឆ្នាំ២០១២ក្នុងទីក្រុងឡុងដ៍។ ពួកមន្រ្តីនិយាយថា ពួកគេនឹងចំណាយប្រាក់បន្ថែម៤២៤លានដុល្លារដើម្បីបង្កើនបុគ្គលិកសន្តិសុខពី១ម៉ឺននាក់ទៅដល់២ម៉ឺន៣ពាន់៧រយនាក់។ បុគ្គលិកសន្តិសុខមានភារៈកិច្ចការពារទីកន្លែងកីឡាចំនួនមួយរយនៅពាសពេញប្រទេស។ ជប៉ុន៖ បានប្រាប់ឲ្យដឹងថាខ្លួននឹងប្រគល់ឯកសារប្រវត្តិសាស្រ្តរាជវាំងដែលនៅសល់ចំនួនរាប់វូលីមដែលបានគេលួចយកក្នុងដើមសតវត្សរ៍ទី២០នៅពេលដាក់បញ្ចូលឧបទ្វីបនោះជាប្រទេសឧបសម្ព័ន្ធទៅកូរ៉េខាងត្បូងវិញ។ អឺរ៉ុប៖ ប្រធានាធិបតីប្រទេសបារាំង នីកូឡា សាកូហ្ស៊ីនិងអធិការបរតីអាល្លឺម៉ង់អេនជេឡា ម៉ាកែល កំពុងអំពាវនាវឲ្យមានសន្ធិសញ្ញាសហភាពអឺរ៉ុបថ្មីមួយដើម្បីត្រួតត្រាការចំណាយ នៅក្នុងកិច្ចខិតខំប្រឹងប្រែងមួយដើម្បីបញ្ចប់វិបត្តិបំណុលអឺរ៉ុបនិងជួយសង្គ្រោះរូបីយប័ណ្ណអឺរ៉ូ។ អាហ្វហ្គានីស្ថាន៖ រដ្ឋមន្រ្តីក្រសួងការបរទេសអាមេរិក ហ៊ីឡារី គ្លីនតុន បានមានប្រសាសន៍ថាសហរដ្ឋអាមេរិកត្រៀមខ្លួនជាស្រេចហើយដើម្បីគាំទ្រអាហ្វហ្គានីស្ថាន តែប្រជាជាតិអាស៊ីខាងត្បូងមួយនេះ ត្រូវធ្វើកំណែទម្រង់ទទួលខុសត្រូវសន្តិសុខផ្ទាល់ខ្លួន ហើយនិងស្ថាបនាលទ្ធិប្រជាធិបតេយ្យផ្អែកលើនីតិរដ្ឋ។ រុស្ស៊ី៖ គណបក្សគ្រប់គ្រងអំណាចរបស់នាយកមន្រ្តីរុស្ស៊ី វ្ល៉ាឌីមៀ ពូទីន បានចាញ់យ៉ាងខ្លាំងគួរឲ្យភ្ញាក់ផ្អើលនៅក្នុងការបោះឆ្នោតសភា ដែលកាត់បន្ថយនូវសម្លេងភាគច្រើនដល់អ្នកនយោបាយរូបនេះដែលបានគ្រប់គ្រងនយោបាយក្នុងប្រទេសនោះអស់រយៈពេលជាងទសវត្សរ៍ ។ កូតឌីវ័រ៖ អតីតប្រធានាធិបតីកូដឺវ័រ ឡូរេន បាកបូ បានបង្ហាញខ្លួនជាលើកដំបូងនៅមុខតុលាការឧក្រិដ្ឋកម្មអន្តរជាតិ ហើយលោកប្រឈមមុខនឹងការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិដែលកើតពីអំពើហិង្សាដ៏ឃោរឃៅក្រោយការបោះឆ្នោត។ ស៊ីរី៖ សកម្មជនសិទ្ធិមនុស្សស៊ីរី និយាយថាមានមនុស្សយ៉ាងហោចណាស់ក៏១១នាក់បានស្លាប់ក្នុងអំពើហិង្សាកាលពីថ្ងៃច័ន្ទ នៅពេលដែលស៊ីរីបានប្រាប់ឲ្យដឹងថាខ្លួនបានធ្វើការឆ្លើយតបជាវិជ្ជមានដល់សម្ព័ន្ធអារ៉ាប់ដែលទាមទារឲ្យអនុញ្ញាតិឲ្យអ្នកសង្កេតការចូលក្នុងប្រទេសនោះ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
