VOA News: ព័ត៌មាន: “គុណប្រយោជន៍នៃការបដិបត្តិសមាធិ (ហេឡូវីអូអេ ២១ មិថុនា ២០១២)” plus 3 more |
- គុណប្រយោជន៍នៃការបដិបត្តិសមាធិ (ហេឡូវីអូអេ ២១ មិថុនា ២០១២)
- អង្គការក្លូបលវិតណេសថារដ្ឋាភិបាលទទួលខុសត្រូវការសម្លាប់មនុស្ស
- ក្រសួងការបរទេសបារាំងសូមឲ្យកម្ពុជាបំភ្លឺរឿងចាប់ជនជាតិបារាំងម្នាក់
- Golden Slumbersជាភាពយន្តឯកសារអំពីខ្សែភាពយន្តចាស់បញ្ចាំងនៅរដ្ឋកាលីហ្វញ៉ា
| គុណប្រយោជន៍នៃការបដិបត្តិសមាធិ (ហេឡូវីអូអេ ២១ មិថុនា ២០១២) Posted: 22 Jun 2012 01:19 PM PDT តើមនុស្សត្រូវធ្វើសមាធិដើម្បីអ្វី? តើសមាធិមានប្រយោជន៍អ្វីខ្លះដល់សង្គមព្រះសង្ឃនិងពុទ្ធបរិស័ទនៅក្នុងពិភពលោក? សមាធិជាអង្គធម៌មួយដែលព្រះសម្មាសម្ពុទ្ធ ឬព្រះបរមគ្រូនៃយើង ស្វែងយល់និងត្រាស់ដឹងមុនដំបូងបំផុតនៅលើរតនបល្ល័ង្កក្រោមម្លប់ពោធិព្រឹក្ស។ ក្រោយពីការត្រាស់ដឹង ព្រះសម្មាសម្ពុទ្ធបានប្រកាសនូវមាគ៌ាសម្រាប់សត្វលោកគោរពប្រតិបត្តិដើម្បីស្វែងរកសេចក្តីសុខឲ្យកើតមាននៅក្នុងខន្ធសណ្តានគ្រប់ៗគ្នា។ ចូលជាវាគ្មិននៅយប់នេះ មានព្រះតេជព្រះគុណ ទុំ វចនា ព្រះគ្រូធម្មាចារ្យនៅពុទ្ធមណ្ឌលវិបស្សនាធុរៈ និង ឧបាសិកា កឹម គិមយ៉ាង ជាអ្នកគ្រូបង្ហាត់សមាធិនៅភូមិផ្អាវស្រុកបាធាយ ខេត្តកំពង់ចាមនិងនៅពុទ្ធមណ្ឌលវិបស្សនាធុរៈ ដែលមានការពិសោធន៍ច្រើនឆ្នាំក្នុងការបង្ហាត់ការបដិបត្តិសមាធិ។ សូមស្តាប់សំឡេងទាំងស្រុងនៃកម្មវិធីហេឡូវីអូអេ ថ្ងៃទី ២១ មិថុនា ២០១២៖ <!--AV--> មធ្យោបាយចូលរួមសម្រាប់ប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| អង្គការក្លូបលវិតណេសថារដ្ឋាភិបាលទទួលខុសត្រូវការសម្លាប់មនុស្ស Posted: 21 Jun 2012 08:33 PM PDT រដ្ឋាភិបាលកម្ពុជា និងក្រុមហ៊ុនឯកជននៅកម្ពុជាជាប់ទាក់ទងក្នុងការសម្លាប់ជនរងគ្រោះក្នុងជម្លោះដីធ្លី និងការការពារព្រៃឈើ។ នេះបើផ្អែកតាមរបាយការណ៍របស់អង្គការការពារបរិស្ថានមួយរបស់ប្រទេសអង់គ្លេស ក្លូបលវិតណេសស (Global Witness)។ របាយការណ៍ដែលចេញផ្សាយកាលពីថ្ងៃពុធបង្ហាញថា ករណីសម្លាប់លោកឈុត វុទ្ធី ប្រធានអង្គការការពារធនធានធម្មជាតិដែលជាសកម្មជនការពារព្រៃឈើកម្ពុជាយ៉ាងខ្លាំងក្លាស្ថិតក្នុងចំណោមនោះដែរនិងការបាញ់សម្លាប់កុមារី ហេង ចន្ថា អាយុ១៤ឆ្នាំ ក្នុងបញ្ហាដីធ្លីក្នុងខេត្តក្រចេះ។ របាយការណ៍ស្តីពីជម្លោះដីធ្លី និងព្រៃឈើក្នុងពិភពលោកបានស្រង់តួលេខក្នុងរយៈពេលជាងមួយទសវត្សរ៍ចុងក្រោយបញ្ជាក់ថា «នៅប្រទេសកម្ពុជាជនរងគ្រោះប្រាំបួននាក់ ក្នុងចំណោម១១ករណីក្នុងនោះពីរករណីត្រូវសម្លាប់ក្នុងឆ្នាំ២០១២ បានបង្ហាញភស្តុតាងយ៉ាងរឹងមាំថា ការសម្លាប់ទាំងនោះត្រូវប្រព្រឹត្តដោយមានការជាប់ទាក់ទងជាមួយក្រុមហ៊ុន និងរដ្ឋាភិបាល»។ Global Witness បានលើកឡើងថារដ្ឋាភិបាលកម្ពុជាបរាជ័យក្នុងការប្រមូលពត៌មានពិស្តារជុំវិញការស្លាប់របស់លោកឈុត វុទ្ធី។ លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ដ្រីបានហៅរបាយការណ៍របស់អង្គការ Global Witness ថាគ្រាន់តែជាការចោទប្រកាន់មួយប៉ុណ្ណោះ។ «ជាការចោទប្រកាន់មួយរបស់មនុស្សមួយក្រុម ពីអ្នកដែលមិនជាអាជីព គឺមតិសង្ស័យរបស់គេតែប៉ុណ្ណោះ។ ក៏ប៉ុន្ដែរឿងនេះជារឿងដាច់ដោយឡែកពីគោលការណ៍នយោបាយរបស់រាជរដ្ឋាភិបាលដែលប្រព្រឹត្តិឡើងដោយសារឯកជនផ្ទាល់។ ដូច្នេះយើងឃើញថា បុគ្គលមួយចំនួនធំដែលប្រព្រឹតិ្តអំពើឧក្រិដ្ឋកម្មនោះតែងតែទទួលបាននូវទណ្ឌកម្មពីប្រពន្ធ័តុលាការរបស់កម្ពុជា»។ លោក ឈុត វុទ្ធី ត្រូវបានបាញ់សម្លាប់កាលពីថ្ងៃទី២៦ ខែមេសា នៅស្រុកមណ្ឌសីម៉ា ខេត្តកោះកុង បន្ទាប់ពីលោកបានទៅពិនិត្យការកាប់បំផ្លាញព្រៃឈើក្នុងក្រុមហ៊ុនមិនល្បីឈ្មោះមួយឈ្មោះ ធីមប៊ឺគ្រីន នៅក្នុងស្រុកនេះ។ លោកអ៊ិន រតនា មន្ដ្រីកងរាជអាវុធហត្ថម្នាក់បានស្លាប់ក្នុងព្រឹត្តិការនោះដែរ។ រដ្ឋាភិបាលបានបង្កើតគណៈកម្មាការចម្រុះមួយ ដើម្បីធ្វើការស៊ើបអង្កេតលើសោកនាដកម្មនេះហើយបន្ទាប់មកបានបិទការស៊ើបអង្កេតរបស់ខ្លួនទៅវិញ ក្នុងរយៈពេលមិនដល់មួយសប្ដាហ៍ផង។ កាលពីសប្ដាហ៍មុនចៅក្រមនៃតុលាការខេត្តកោះកុង បានបញ្ជាក់ថា ខ្លួនកំពុងបន្តធ្វើការស៊ើបសួរសាក្សីជុំវិញឃាតកម្មនេះនៅឡើយ។ លោកចាន់ សាវ៉េត អនុប្រធានផ្នែកស៊ើបអង្កេតការរំលោភសិទ្ធិមនុស្សរបស់អង្គការអាដហុកមានប្រសាសន៍ថា របាយការណ៍របស់អង្គការក្លូបលវិតណេ បានឆ្លុះបញ្ចាំងថា រដ្ឋាភិបាលមិនបានស៊ើបអង្កេតពេញលេញលើឃាតកម្មកន្លងមកនោះទេ។ លោកបានរៀបរាប់ថា ក្នុងចំណោមជនរងគ្រោះទាំងនោះមានសកម្មជនសហគមន៍ព្រៃឈើ អ្នកការពារដីធ្លី និងសកម្មជននៃសហជីពផងដែរ។ លោកចាន់ សាវ៉េត ចាត់ទុកថា វាមានសារៈសំខាន់ដែលរដ្ឋាភិបាលខ្មែរធ្វើការស៊ើបអង្កេតរឿងអស់ ទាំងនេះឲ្យបានពេញលេញ ដើម្បីជាការលើកស្ទួយសិទ្ធិមនុស្ស និងប្រព័ន្ធយុត្តិធម៌នៅកម្ពុជា។ មានមូលដ្ឋានក្នុងក្រុងឡុងដ៍ ក្លូបលវិតណេស លើកឡើងថា អំពើពុករលួយ និងអំពើហិង្សាក្នុងវិស័យព្រៃឈើនៅកម្ពុជាត្រូវបានចងក្រងជាឯកសារយ៉ាងច្រើន ប៉ុន្តែរដ្ឋាភិបាល និងប្រទេសម្ចាស់ជំនួយបរាជ័យក្នុងការលុបបំបាត់បញ្ហាទាំងនេះ។ របាយការណ៍របស់អង្គការក្លូបលវិតណេស ធ្វើឡើងស្របពេលដែលក្រុមមន្ដ្រីមកពីប្រទេសចំនួន១៣០ បានជួបប្រជុំគ្នាពីថ្ងៃទី២០ ដល់ថ្ងៃទី២២ ខែមិថុនានេះ នៅក្នុងក្រុង រីយ៉ូ ដឺ ចេណេរ៉ូ (Rio de Janeiro) ប្រទេសប្រេស៊ីល អំពីបញ្ហាបរិស្ថាន។ អង្គការដដែលបន្ថែមថា ក្នុងពិភពលោកយ៉ាងហោចណាស់មានមនុស្សស្លាប់ចំនួនម្នាក់ត្រូវបានសម្លាប់រៀងរាល់សប្ដាហ៍ដោយសារតែជម្លោះដីធ្លី ជម្លោះធនធានធម្មជាតិ និងព្រៃឈើ៕ This posting includes an audio/video/photo media file: Download Now |
| ក្រសួងការបរទេសបារាំងសូមឲ្យកម្ពុជាបំភ្លឺរឿងចាប់ជនជាតិបារាំងម្នាក់ Posted: 21 Jun 2012 07:43 PM PDT ក្រសួងការបរទេសបារាំងបានទាមទារឲ្យរដ្ឋាភិបាលកម្ពុជាបំភ្លឺអំពីមូលហេតុពិតប្រាកដ អំពីការចាប់ជនជាតិបារាំងមួយរូប ដែលសង្ស័យថាជាមនុស្សស្និទ្ធនឹងភរិយារបស់លោក បូ ស៊ីឡៃ (Bo Xilai) អ្នកនយោបាយដែលមានឈ្មោះមិនល្អនៅចិន។ កាលពីថ្ងៃទី១៣ ខែមិថុនា កន្លងទៅនេះ អាជ្ញាធកម្ពុជាបានចាប់ខ្លួនលោក ប៉ាទ្រិក ដេវីល្ល័រ(Patrick Devillers) អាយុ៥២ឆ្នាំ ជនជាតិបារាំង ហើយកំពុងត្រូវបានឃុំខ្លួនបណ្តោះអាសន្ននៅឯនាយកដ្ឋានអន្តរប្រវេសន៍នៃក្រសួងមហាផ្ទៃ។ នេះបើតាមការបញ្ជាក់ពីមន្ត្រីរដ្ឋាភិបាល។ លោក បឺណាដ វ៉ាឡឺរ៉ូ (Bernard Valero) អ្នកនាំពាក្យក្រសួងការបរទេសបារាំង កាលពីថ្ងៃពុធម្សិលមិញនេះ បានចេញសេចក្តីថ្លែងការណ៍មួយពីប្រទេសបារាំងមកថា បារាំងបានទទួលដំណឹងពីអាជ្ញធរកម្ពុជាអំពីការចាប់ខ្លួនលោក ប៉ាទ្រិក ដេវីល្ល័រ ដែលកំពុងស្នាក់នៅកម្ពុជា រួចហើយបានបញ្ជូនទៅឃុំឃាំងបណ្តោះអាសន្ន។ នៅក្នុងសេចក្តីថ្លែងការណ៍ជាភាសាបារាំង ហើយត្រូវបានបកប្រែក្រៅផ្លូវការបានឲ្យដឹងទៀតថា បារាំងបានតាមដានដិតដល់បំផុតចំពោះការចាប់ខ្លួននេះ ហើយយើងក៏បានធ្វើការយ៉ាងប្រុងប្រយ័ត្នផងដែរ ចំពោះការស៊ើបអង្កេតទាំងឡាយណាដែលធ្វើឡើងប្រឆាំងនឹងលោក ប៉ាទ្រិក ដេវីល្ល័រ ដោយគ្មានមូលហេតុច្បាស់លាស់នោះ។ រដ្ឋាភិបាលកម្ពុជាមិនបានបង្ហាញអំពីមូលហេតុពិតប្រាកដ ដែលនាំទៅរកការចាប់ខ្លួនជនជាតិបារាំងនេះទេ។ លោកឧបកនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានថ្លែងប្រាប់វីអូអេសំឡេងសហរដ្ឋអាមេរិកតាមរយៈទូរសព្ទថាការចាប់ខ្លួនលោក ប៉ាទ្រិក ដេវីល្ល័រ ដោយសារតែមានការស្នើសុំពីរដ្ឋាភិបាលនៃប្រទេសចិនថាជនសង្ស័យជាប់ពាក់ព័ន្ធបទល្មើសនៅចិន។ លោក ស ខេង មិនបានបញ្ជាក់ពីបទល្មើសអ្វីខ្លះ ដែលលោក ប៉ាទ្រិក ដេវីល្ល័រ បានប្រព្រឹត្តិនៅចិននោះទេ ដោយលោកគ្រាន់តែបានបញ្ជាក់ថារដ្ឋភិបាលកម្ពុជាបាននឹងកំពុងតែធ្វើការជាមួយនឹងភាគីដែលពាក់ព័ន្ធនឹងករណីនេះ។ «ខ្ញុំគិតថាមិនបញ្ជាក់អីទៀតទេ ព្រោះខ្ញុំបានធ្វើការជាមួយនឹងទូតបារាំងអស់ហើយ។ ក្រសួងការបរទេសក៏បានធ្វើការជាមួយនឹងទូតបារាំងដែរ ព្រោះថាកម្ពុជាយើងមានអនុសញ្ញា បត្យាប័នជាមួយនឹងភាគីចិនហ្នឹង។ ធម្មតាយើងត្រូវតែគោរពតាមហ្នឹង ព្រោះយើងបានចុះហត្ថលេខាជាមួយនឹងចិនទៅហើយ។ កាលណាគេស្នើឲ្យត្រូវឃាត់ខ្លួន យើងត្រូវតែធ្វើហើយ។ ប្រសិនបើបញ្ជូនទៅណា នេះគឺជាសេចក្តីសម្រេចរបស់កម្ពុជា។ ហើយបញ្ជូនទៅ ឬមិនបញ្ជូនទៅ នេះជារឿងមួយផ្សេងទៀត ប៉ុន្តែឥឡូវកំពុងតែនៅកម្ពុជា»។ ស្ថានកុងស៊ូលបារាំងប្រចាំកម្ពុជាបានទៅពិនិត្យជាញឹកញាប់ បន្ទាប់ពីមានការចាប់ខ្លួនលោក ប៉ាទ្រិក ដេវីល្ល័រ។ កាលពីថ្ងៃពុធ ម្សិលមិញនេះ រដ្ឋាភិបាលកម្ពុជាបានស្នើសុំឲ្យរដ្ឋាភិបាលចិនផ្តល់ភស្តុងតាងន្ថែមទៀត មុននឹងសម្រេចថា តើគួរតែធ្វើបត្យាប័នជនជាតិបារាំងរូបនេះ ទៅកាត់ទោសនៅចិន ឬ ក៏យ៉ាងណា។ លោកឧត្តមសេនីយ៍ឯកខៀវ សុភ័គ អ្នកនាំពាក្យក្រសួងមហាផ្ទៃមិនបានបញ្ជាក់ថាតើមកដល់ពេលនេះកម្ពុជាបានទទួលភស្តុងអ្វីខ្លះ ពីរដ្ឋាភិបាលចិននៅឡើយទេ ដោយគ្រាន់តែបានបញ្ជាក់ថា សមត្ថកិច្ចកំពុងតែធ្វើកិច្ចកាងារទាំងនេះហើយ។ «ទុកឲ្យសមត្ថកិច្ចគេធ្វើទៅ!» លោក ប៉ាទ្រិក ដេវីល្ល័រ ធ្លាប់បានមករស់នៅទីក្រុងភ្នំពេញ ហើយលោកក៏ជាម្ចាស់កម្មសិទ្ធិដីមួយកន្លែងនៅទីក្រុងកែប ដែលកន្លងមកលោកមិនធ្លាប់បានចោទប្រកាន់អ្វីទាំងអស់ពាក់ព័ន្ធនឹងបទឧក្រិដ្ឋ។ លោក ប៉ាទ្រិក ដេវីល្ល័រ ធ្លាប់មានទំនាក់ទំនងយ៉ាងជិតស្និទជាមួយនឹងលោកអ្នកស្រី ហ្គូ កៃឡៃ (Gu Kailai) ភរិយាលោក បូ ស៊ីឡៃ អតីតអ្នកនយោបាយប្រឆាំងនឹងរដ្ឋាភិបាលចិនមួយរូប ហើយលោកកំពុងជាប់ឃុំឃាំងពីបទធ្វើចារកម្មលើមន្ត្រីចិនជាន់ខ្ពស់ដោយខុសច្បាប់។ អ្នកស្រី ហ្គូ កៃឡៃ ត្រូវបានអាជ្ញាធរចាប់ខ្លួនកាលពីអំឡុងខែមេសា ពីបទសង្ស័យថាជាប់ពាក់ព័ន្ធនឹងការធ្វើឃាតលោកណេល ហេវូដ (Neil Heywood) ពាណិជ្ជករជនជាតិអង់គ្លេស៕ This posting includes an audio/video/photo media file: Download Now |
| Golden Slumbersជាភាពយន្តឯកសារអំពីខ្សែភាពយន្តចាស់បញ្ចាំងនៅរដ្ឋកាលីហ្វញ៉ា Posted: 21 Jun 2012 08:58 PM PDT «Golden Slumbers»ជាភាពយន្តឯកសារដែលនិយាយពីវិស័យភាពយន្តនៅកម្ពុជាត្រូវបានដាក់បញ្ចាំងឲ្យទស្សនាជុំវិញរដ្ឋកាលីហ្វញ៉ាកាលពីខែមុន ប៉ុន្តែប្រហែលទីកន្លែងដែលសំខាន់ជាងគេនោះគឺនៅទីក្រុងឡងប៊ិច។ ភាពយន្តឯកសារនេះស្រាវជ្រាវជុំវិញពីការបាត់បង់នូវវិស័យភាពយន្តខ្មែរនៅទសវត្សរ៍៦០និង៧០ដោយសារសង្គ្រាម។ រឿងនេះត្រូវបានដាក់បញ្ចាំងនៅទីក្រុងឡងប៊ិចកាលពីខែឧសភាក្នុងមហោស្រពភាពយន្តអាស៊ីបាស៊ីហ្វីកនៃទីក្រុង Los Angeles។ រឿងនេះនឹងត្រូវបញ្ចាំងជុំវិញពិភពលោក ប៉ុន្តែនៅទីក្រុងឡងប៊ិចជាកន្លែងដែលមានទស្សនជនភាគច្រើនជាជនជាតិខ្មែរទស្សនាជាលើកទីមួយ។ ផលិតករលោក ជូ ដាវី ដែលធំឡើងនៅប្រទេសបារាំង ហើយមានជីតារបស់លោកជាផលិតករនៅសម័យនោះផងដែរ ចង់ស្វែងយល់អំពីខ្សែភាពយន្តខ្មែរដែលបានផ្តល់ការកម្សាន្តដល់ទស្សនិកជនតាំងពីទសវត្សរ៍៦០ដល់សម័យសង្គ្រាម។ លោកជូ ដាវី ដែលជាផលិតករ បាននិយាយថា៖ «វាពិតជាពិសេសណាស់សម្រាប់ខ្ញុំក្នុងការមកបញ្ចាំងភាពយន្តឯកសារនៅទីនេះ ពីព្រោះមានប្រជាពលរដ្ឋខ្មែរអាមេរិកាំងច្រើន ហើយពួកគេដឹងអំពីរឿងនេះ។ ដូច្នេះការទទួលខុសត្រូវគឺខុសគ្នា»។ លោក ជូ ដាវី ចាត់ទុកថា ការទទួលខុសត្រូវខាងសិល្បៈនេះជារឿងសំខាន់។ ជាក់ស្តែង តាមរយៈភាពយន្តឯកសារ លោកបានព្យាយាមយ៉ាងខ្លាំងក្នុងសិក្សាពីវិស័យភាពយន្តថា តើវាមានន័យកម្រិតណាដល់ជនជាតិខ្មែរនៅជំនាន់ដែលវិស័យនោះមានកម្រិតខ្ពស់។ តាមរយៈសាច់រឿង Golden Slumber លោកបានជួបជាមួយអ្នកចាស់ៗដែលគាំទ្រវិស័យខ្សែភាពយន្តខ្មែរពីដើម។ លោកបានជួបអ្នកដែលឥឡូវនេះរស់នៅក្នុងរោងកុនចាស់ៗ និងបានជួបផលិតករផ្ទាល់ដើម្បីឲ្យដឹង ថាតើលោកបានបាត់បង់អ្វីខ្លះ។ លោកដាវីក៏បានបង្ហាញនូវខ្សែរភាពយន្តចាស់ខ្លីៗតែផ្តោតទៅលើការអវត្តមាននៃភាពយន្តទាំងនេះ។ លោកប្រាប់ថា លោកចង់រំលឹកអ្នកទស្សនាអំពីស្នាដៃដ៏អស្ចារ្យនៃរឿងចាស់ៗ។ ជូដាវី និយាយថា៖ «ខ្ញុំចង់ដឹង ថាតើពួកគេមានអារម្មណ៍បែបណា ពេលដែលពួកគេឃើញនូវខ្សែភាពយន្តចាស់នោះតាមរយៈភាពយន្តឯកសារនេះ»។ សម្រាប់ទស្សនិកជន ដូចជាលោកយស បូវណ្ណៈ ដែលធ្លាប់ជាតួកុនសម្តែងនាទសវត្សរ៍៨០ រឿង Golden Slumbers គឺពិតជារំឭកលោកទៅដល់កាលពីសម័យដែលវិស័យភាពយន្តខ្មែរមានភាពរីកចម្រើន។ យស បូវណ្ណៈ តួកុនខ្មែរសម័យទសវត្សរ៍៨០និយាយថា «កាលនោះឯងគឺខាងវិស័យភាពយន្តសិល្បៈទី៧គឺឡើងខ្លាំងណាស់។ ភាពយន្តមិនមែនធ្លាក់អញ្ចេះទេ។» ចាប់តាំងពីសង្រ្គាម វិស័យភាពយន្តខ្មែរមានភាពដុនដាប ប៉ុន្តែលោកយសបូវណ្ណៈបន្តថា សម័យមាសនោះនិងនៅឋិតថេររហូតដរាបណាខ្សែរភាពយន្តទាំងនេះនៅមានរូបរាង។ យស បូវណ្ណៈ បន្តថា «គេហៅថា ស្នាដៃអមតៈគឺយើងទទួលស្គាល់នៅក្នុងវប្បធម៌។ ដូចខ្ញុំនិយាយអញ្ចឹងថាវប្បធម៌យើងមានកម្រិតខ្ពស់បំផុតហើយ»។ Golden Slumbers និងបន្តបញ្ចាំងតាមមហោស្រពភាពយន្តជុំវិញពិភពលោក ហើយនឹងចេញលក់នៅសហរដ្ឋអាមេរិក។ លោកជូដាវីបានប្រាប់ថា លោកមានអារម្មណ៍រំភើបជាមួយនឹងការបញ្ចាំងតាមរោងកុននៅស្រុកបារាំងនាខែកញ្ញាខាងមុខនេះ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
