VOA News: ព័ត៌មាន: “ចំនួនដំរីព្រៃនៅកម្ពុជាធ្លាក់ចុះដោយសារការប្រម៉ាញ់ និងអស់ជម្រក” plus 3 more |
- ចំនួនដំរីព្រៃនៅកម្ពុជាធ្លាក់ចុះដោយសារការប្រម៉ាញ់ និងអស់ជម្រក
- រដ្ឋមន្ត្រីការបរទេសកូរ៉េខាងជើងនឹងចូលរួមការពិភាក្សាក្នុងតំបន់នៅខែកក្កដា
- សមរង្ស៊ី៖ គន្លឹះចូលស្រុកគឺត្រូវនិយាយជាមួយចៅហ្វាយលោកហ៊ុន សែន
- ពលរដ្ឋបឹងកក់ងាកមករកជំនឿអរូបិយ៍ដើម្បីជួយអន្តរាគមន៍
| ចំនួនដំរីព្រៃនៅកម្ពុជាធ្លាក់ចុះដោយសារការប្រម៉ាញ់ និងអស់ជម្រក Posted: 07 Jun 2012 09:08 PM PDT ចំនួនដំរីព្រៃនៅកម្ពុជាក៏ដូចជានៅប្រទេសអាស៊ីអគ្នេយ៍ផ្សេងទៀតបានធ្លាក់ចុះខ្លាំងច្រើនទសវត្សរ៍ថ្មីៗនេះ។ ពីមុន ការប្រមាញ់ជាសត្រូវរបស់ដំរី ហើយឥឡូវនេះការបំផ្លាញជម្រកដំរីគឺជាសត្រូវទី២។ ចំនួនដំរីរស់នៅក្នុងព្រៃប្រទេសកម្ពុជាបានធ្លាក់ចុះពីប្រហែល២ពាន់ក្បាលក្នុងឆ្នាំ១៩៩៥ មកសល់មិនដល់៤០០ក្បាលទេបច្ចុប្បន្ននេះ។ បញ្ហានេះមិនមែនមានតែនៅកម្ពុជាទេគឺមាននៅមានទូទាំងអាស៊ី ដែលសល់ដំរីតែ៤ម៉ឺនក្បាលប៉ុណ្ណោះ។ អង្គការអភិរក្សធម្មជាតិ International Union for Conversation of Natureចាត់ទុកថា ដំរីអាស៊ីរងគ្រោះជិតដាច់ពូជ ហើយចំនួនដំរីធ្លាក់ចុះជាង៥០%បីជំនាន់កន្លងមកនេះ។ ពីមុនការប្រមាញ់បានសម្លាប់ដំរីច្រើនបំផុត តែឥឡូវការបំផ្លាញជំម្រកដំរីនិងជម្លោះរវាងមនុស្សនិងដំរីបានគម្រាមផ្តាច់ពូជដំរី។ <!--AV--> លោក Nick Marx ប្រធានកម្មវិធីអភិរក្សដំរីនៅសួនសត្វភ្នំតាម៉ៅ។ គាត់ជាអ្នកអភិរក្សសត្វ។ គាត់និយាយថា៖ «ដំរីជាសត្វអស្ចារ្យ ឆ្លាត។ វារស់នៅជាសហគមន៍ ជាគ្រួសារ។ ដីរីចេះយំ ចេះកើតទុក្ខ ពេលបាត់បង់គ្នីគ្នា ជាទីស្រឡាញ់របស់វា។ យើងមិនត្រូវគិតថា មនុស្សជាសត្វលោកតែមួយគត់ត្រូវរស់នៅក្នុងពិភពលោកនេះទេ។ បើគ្មានដំរី ខ្លា និងសត្វផ្សេងទេ នោះពិភពលោកនេះជាកន្លែងមិនល្អ។ ខ្ញុំគិតថា គ្រប់ៗគ្នាគិតដូច្នេះ»។ ដោយសារអស់ជម្រក ដំរីត្រូវមកស៊ីដំណាំ។ ដូច្នេះជម្លោះមនុស្សនឹងដំរីកើតមានឡើង ដែលនាំឲ្យមានការសម្លាប់ដំរី។ លោកនៀង ធីជាអ្នកគ្រប់គ្រងកម្មវិធីអភិរក្សដំរីនៃអង្គការFauna & Flora អន្តរជាតិនៅភ្នំពេញ។ គាត់និយាយថា៖ «ជម្លោះមនុស្សនិងដំរីកើតមានច្រើន ដោយសារមនុស្សច្រើនទៅរស់នៅជិតព្រៃ។ គេដាំដំណាំ ធ្វើកសិកម្មនៅជិតជាយព្រៃ តំបន់ដំរីរស់នៅ។ ដូច្នេះ ដំរីមកស៊ីដំណាំ ហើយទំនាស់មនុស្ស និងដំរីកើតឡើង។ បើមិនដោះស្រាយបញ្ហានេះទេ នោះអ្នកភូមិនឹងសម្លាប់ដំរី»។ ជម្រកដំរីជាច្រើនត្រូវបាត់បង់ដោយសារក្រុមហ៊ុនអភិវឌ្ឍន៍និងការកាប់ឈើខុសច្បាប់ នាពេលប៉ុន្មានឆ្នាំថ្មីៗនេះ ហើយបញ្ហានេះកាន់តែធ្ងន់ធ្ងរឡើងៗ។ ដូច្នេះទំនាស់មនុស្សនិងដំរីមិនអាចចៀសរួចទេ។ ដំរីបំផ្លាញដំណាំ ផ្ទះសម្បែង និងសម្លាប់មនុស្ស ពេលវាត្រូវគំរាមកំហែង។ ដូច្នេះ មនុស្សយើងសម្លាប់ដំរី ដែលបំផ្លាញដំណាំ។ Nick Marx និយាយថា៖ «តាមពិត មនុស្សបង្កជម្លោះ ដោយចូលក្នុងព្រៃបំផ្លាញជម្រកដំរី ធ្វើឲ្យដំរីគ្មានកន្លែងរស់ ហើយទំនាស់ក៏កើនឡើង។ បើមិនរកដំណោះស្រាយទេ ជាលទ្ធផលគឺដំរីនឹងត្រូវមនុស្សចាប់ឬសម្លាប់។ យើងត្រូវចាប់សង្គ្រោះដំរី ដែលអាចរងគ្រោះដោយសារស្ថានការណ៍នេះ។ នេះជាវិធានការអវិជ្ជមាន តែជាការចំបាច់ដើម្បីកុំឲ្យគេសម្លាប់វា»។ សួនសត្វភ្នំតាម៉ៅសង្គ្រោះដំរី៥ក្បាលពីជម្លោះរវាងមនុស្សនឹងដំរី។ ដំរីនេះឈ្មោះឈូក។វាអាយុ៦ឆ្នាំ។ គេចាប់វា ព្រោះវាអាចមានប្រទុសរាយជាមួយមនុស្ស។ ដូច្នេះមន្ត្រីត្រូវចាប់វាទុកដើម្បីសង្គ្រោះ។ ឈូកពិការជើង ដោយសារជាប់អន្ទាក់។ ឥឡូវវាអាចដើរបានដោយសារជើងសិប្បនិមិត្ត។ Marx និយាយថា ដំរីនៅកម្ពុជា និងនៅប្រទេសអាស៊ីអាគ្នេយ៍អាចគង់វង្សបានអាស្រ័យលើវិធានការរបស់រដ្ឋាភិបាលក្នុងការការពារជម្រកវា។ «អនាគតរបស់ដំរីនៅកម្ពុជា និងនៅអាស៊ីអាគ្នេយ៍កំពុងនៅក្នុងដំណាក់កាលចាំបាច់។ ខ្ញុំមើលឃើញថា បើមនុស្សមានឆន្ទៈអភិរក្សព្រៃ និងដំរី នោះដំរីអាចរស់បាន។ បើរដ្ឋាភិបាលមិនមានឆន្ទៈនេះទេ ដំរីមិនអាចរស់បានទេ»។ ដោយសារចំនួនមនុស្សកើនឡើង ហើយព្រៃហិនហោចទៅៗ ដូច្នេះចំនួនដំរីព្រៃនឹងបន្តធ្លាក់ចុះ មិនអាចទប់ស្កាត់បាន៕ ដោយសារចំនួនមនុស្សច្រើនឡើងៗ ហើយព្រៃហិនហោចទៅៗ ហេតុនេះចំនួនដំរីព្រៃនឹងបន្តធ្លាក់ចុះ បើមិនមានការទប់ស្កាត់។ This posting includes an audio/video/photo media file: Download Now |
| រដ្ឋមន្ត្រីការបរទេសកូរ៉េខាងជើងនឹងចូលរួមការពិភាក្សាក្នុងតំបន់នៅខែកក្កដា Posted: 08 Jun 2012 03:41 AM PDT លោករដ្ឋមន្ត្រីនៃសាធារណរដ្ឋកូរ៉េខាងជើងគ្រោងនឹងមកបំពេញទស្សនកិច្ចនៅក្នុងប្រទេសកម្ពុជា នៅក្នុងខែកក្កដាខាងមុខនេះដើម្បីចូលរួមកិច្ចប្រជុំវេទិកាតំបន់សេដ្ឋកិច្ចអាស៊ាន។ នេះបើតាមការបញ្ជាក់របស់លោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេសកម្ពុជា។ លោកឧបនាយករដ្ឋមន្ត្រីហោ ណាំហុង បានដឹកនាំគណៈប្រតិភូកម្ពុជាទៅបំពេញទស្សនកិច្ចនៅក្នុងប្រទេសកូរ៉េខាងជើងកាលពីថ្ងៃទី៣ រហូតដល់ថ្ងៃទី៧ ខែមិថុនាកន្លងទៅនេះ។ នៅក្នុងដំណើរទស្សនកិច្ចនេះលោកហោ ណាំហុង បានជួបជាមួយនឹងលោក ប៉ាកលី ជុន (Pak Ui-chun) រដ្ឋមន្ត្រីការបរទេសនៃប្រទេសកូរ៉េខាងជើង និងលោកគីម យុង ណាម (Kim Yong-nam) ប្រធានរដ្ឋសភានៃប្រជាជនកូរ៉េខាងជើង។ លោកហោ ណាំហុង បានថ្លែងប្រាប់ក្រុមអ្នកកាសែតនៅឯព្រលានយន្តហោះភ្នំពេញអន្តរជាតិបន្ទាប់ពីលោកបានវិលត្រឡប់មកពីប្រទេសកូរ៉េខាងជើងនៅល្ងាចថ្ងៃព្រហស្បតិ៍នេះ។ លោកបានហៅដំណើរទស្សនកិច្ចនេះគឺជាការបង្កើតទំនាក់ទំនងទ្វេឡើងថែមទៀតរវាងប្រទេសកម្ពុជានិងប្រទេសដែលកាន់របបកុម្មុយនីស្តកូរ៉េខាងជើង។ លោកហោ ណាំហុង បានមានប្រសាសន៍ថាលោក ប៉ាកលី ជុន រដ្ឋមន្ត្រីការបរទេសនៃកូរ៉េខាងជើង នឹងមកបំពេញទស្សនកិច្ចនៅក្នុងប្រទេសកម្ពុជា ដើម្បីចូលរួមវេទិកាតំបន់អាស៊ាននៅក្នុងខែកក្កដា។ ប្រទេសកម្ពុជានៅក្នុងអំឡុងខែកក្កដាខាងមុខនេះនឹងមានរៀបចំវេទិកាតំបន់អាស៊ានដែលរួមមានបណ្តាប្រទេសចំនួន ២៧បានចូលរួម។ នៅក្នុងកិច្ចប្រជុំនោះ នឹងមានកិច្ចប្រជុំធំៗ ចំនួនបួន គឺការប្រជុំរដ្ឋមន្ត្រីការបរទេសអាស៊ានលើកទី៤២ កិច្ចប្រជុំជាមួយបណ្តាប្រទេសជាដៃគូ ក្រោយពីកិច្ចប្រជុំរដ្ឋមន្ត្រីការបរទេសអាស៊ាន កិច្ចប្រជុំវេទិកាអាស៊ានលើកទី១៩ និងកិច្ចប្រជុំរដ្ឋមន្ត្រីការបរទេសលើកទី២ នៃកិច្ចប្រជុំកំពូលអាស៊ានបូព៌ា ព្រមទាំងកិច្ចប្រជុំមេគង្គជប៉ុន កូរ៉េ និងបណ្តាប្រទេសផ្សេងៗទៀត។ លោក កុយ គួង អ្នកនាំពាក្យក្រសួងការបរទេសមិនបានដឹងថាកិច្ចប្រជុំវេទិការតំបន់អាស៊ាននឹងលើកយកបញ្ហាវិបត្តិនុយក្លេអ៊ែនៅឧបទ្វីបកូរ៉េខាងជើងយកមកពិភាក្សាទេ។ «ខ្ញុំមិនទាន់បានជ្រាបទេ។ ចាំមើលសេចក្តីជូនព័ត៌មានបន្តបន្ទាប់ទៀតពីរបៀបវារៈនៃកិច្ចប្រជុំហ្នឹង និងដឹងច្បាស់ថានឹងអាចមានអ្វីខ្លះ»។ វិបត្តិនុយក្លេអ៊ែនៃសាធារណរដ្ឋកូរ៉េខាងជើង បានបង្កឲ្យមានការព្រួយបារម្ភសន្តិសុខជាសាកល និងតំបន់ផងដែរដែលជំរុញឲ្យមានការពិភាក្សាជាសាកលដើម្បីជៀងវាងសង្គ្រាមនុយក្លេអ៊ែ។ ប្រទេសកូរ៉េខាងជើងធ្លាប់បានច្រានចោលការចរចា៦ភាគី ដែលដឹកនាំដោយសហរដ្ឋអាមេរិកបារាំង ចិន អង្គការសហប្រជាជាតិ កូរ៉េខាងត្បូង និងកូរ៉េខាងជើង។ សហរដ្ឋអាមេរិកនិងសហគមន៍អន្តរជាតិ បានបន្តដាក់ទណ្ឌកម្មសេដ្ឋកិច្ចដល់ប្រទេសកូរ៉េខាងជើងឡើងវិញបន្ទាប់ពីប្រទេសនេះបានបន្តកម្មវិធីអាវុធនុយក្លេអ៊ែរបស់ខ្លួន៕ This posting includes an audio/video/photo media file: Download Now |
| សមរង្ស៊ី៖ គន្លឹះចូលស្រុកគឺត្រូវនិយាយជាមួយចៅហ្វាយលោកហ៊ុន សែន Posted: 07 Jun 2012 06:53 PM PDT មេដឹកនាំគណបក្សជំទាស់ដែលកំពុងនិរទេសខ្លួននៅក្រៅប្រទេសហើយជាប់ពិរុទ្ធរឿង ព្រំដែនបានអះអាងថាលោកនឹងអាចវិលត្រឡប់ទៅកាន់ប្រទេសកម្ពុជាវិញដោយសុវត្ថិភាពដើម្បីចូលរួមការបោះឆ្នោតជាសាកលឆ្នាំ២០១៣ខាងមុខតាមរយៈការនិយាយជាមួយប្រទេសវៀតណាមដែលលោកសម រង្ស៉ីអះអាងថាមានឥទ្ធិពលលើ គណបក្សគ្រប់គ្រងប្រទេសកម្ពុជាសព្វថ្ងៃ។ ក្រុមអ្នកសង្កេតការណ៍និងមន្ត្រីរដ្ឋាភិបាលនិយាយថា ការវិលត្រឡប់របស់លោកសម រង្ស៉ីគឺត្រូវការសម្របសម្រួលនយោបាយមួយជាមួយគណបក្សគ្រប់គ្រងប្រទេសរបស់លោកនាយករដ្ឋមន្ត្រីហ៊ុន សែនឬទទួលទោសជាប់ពន្ធនាគារយ៉ាងតិច១០ឆ្នាំពីបទដកតម្រុយបង្គោលព្រំដែនកម្ពុជា វៀតណាម កាលពីឆ្នាំ២០០៩នៅខេត្តស្វាយរៀងដើម្បីជួយពលរដ្ឋទាមទារដីធ្លី។ តែលោក សម រង្ស៉ីច្រានចោលទាំងការទទួលយកទោសទណ្ឌនិងការចរចាជាមួយគណបក្សកាន់អំណាចនិងលោកនាយករដ្ឋមន្ត្រី ហ៊ុនសែន។ «ខ្ញុំមិនចាំបាច់និយាយជាមួយខ្ញុំគេទេ។ ខ្ញុំមិនចាំបាច់និយាយជាមួយខ្ញុំបម្រើគេទេ។ ខ្ញុំត្រូវនិយាយជាមួយចៅហ្វាយ។ ចៅហ្វាយហ្នឹងគឺប្រទេសវៀតណាម។ អ្នកដឹកនាំប្រទេសកម្ពុជាសព្វថ្ងៃគឺធ្វើតាមបញ្ជាប្រទេសវៀតណាម។ដូច្នេះខ្ញុំនិយាយជាមួយប្រទេសណាដែលគេមានឥទ្ធិពលលើប្រទេស វៀតណាមឲ្យគេគាបសង្កត់ប្រទេសវៀតណាមឲ្យគេទៅនិយាយជំរុញឲ្យចៅហ្វាយ ចៅហ្វាយយួន ដើម្បីឲ្យប្រទេសវៀតណាមហ្នឹងបញ្ជាមកគណបក្សប្រជាជនដើម្បីកុំឲ្យរករឿងគណបក្សសម រង្ស៉ីជាពិសេសកុំឲ្យរករឿងខ្ញុំសម រង្ស៉ីទៀតបើចង់ឲ្យការបោះឆ្នោតខាងមុខត្រូវគេទទួលស្គាល់»។ ក៏ប៉ុន្តែលោក ជៀម យាប មន្ត្រីជាន់ខ្ពស់គណបក្សប្រជាជនកម្ពុជានិងជាអ្នកតំណាងរាស្ត្រ បាន អះអាងថាការចូលឬមិនចូល ហើយការជួបឬមិនជួបជាមួយលោកនាយករដ្ឋមន្ត្រីហ៊ុន សែនជាសិទ្ធិរបស់លោក សម រង្សី តែការពឹងពាក់អន្តរាគមន៍ឬគំនាបពីប្រទេសប្រទេសក្រៅ ប្រទេស វៀតណាមនោះមិនអាចរួចទោសកំហុសដែលច្បាប់បានកំណត់ដែរ។ «អាហ្នឹង សូមអញ្ជើញទៅ! ព្រោះវៀតណាមគ្មានសម្ភាធអីមកលើគណបក្សប្រជាជនកម្ពុជាអីទេតាំងពីកងទ័ពវៀតណាមចេញទៅក្នុងឆ្នាំ១៩៨៩មកនោះ»។ លោក សមរង្ស៉ីបានព្រមានថាប្រសិនបើមានការរារាំងរូបលោកដោយសារការប្រើប្រាស់តុលាការ ហើយបន្លំយកឈ្នះឆ្នោត មិនមានគណបក្សជំទាស់ដែលមានកម្លាំងប្រកួតប្រជែងជាមួយគណបក្សគ្រប់គ្រងប្រទេស ពេលនោះ រដ្ឋាភិបាលក្រោយដែលកើតចេញពីការបោះឆ្នោត ២០១៣ក៏មិនត្រូវទទួលស្គាល់ជាអន្តរជាតិ តែក្លាយជារដ្ឋាភិបាលបាត់ភាពស្របច្បាប់។ លោក សម រង្សីអះអាងថា ប្រជាពលរដ្ឋនឹងងើបបះបោរប្រឆាំងនឹងរដ្ឋាភិបាលដែលគ្មានភាពស្របច្បាប់ពេលនោះ។ លោក អះអាងថានោះជាវិបត្តិធ្ងន់ធ្ងរដែលសហគមន៍អន្តរជាតិនិងអ្នកកាន់អំណាចត្រូវគិតឡើងវិញ។ លោក សម រង្សីពុំបានបញ្ជាក់ថាប្រទេសណាដែលលោកត្រូវពឹងពាក់ដើម្បីនិយាយ ជាមួយប្រទេស វៀតណាមទេតែលោក សម រង្ស៉ីថ្មីៗបានធ្វើដំណើរមកប្រទេសអាមេរិកដើម្បីជួបជាមួយ ក្រុមមន្ត្រី មួយចំនួនផងហើយនឹងចេញសេចក្តីថ្លែងការណ៍ដែលមើលឃើញពីការគាំទ្រចិនរឿងជម្លោះសមុទ្រចិន ខាងត្បូងផង និងលិខិតជូនពរពលរដ្ឋកម្ពុជាចិនពេលចូលឆ្នាំចិនកន្លងទៅផងដែរ។ លោកសម រង្ស៉ី អះអាងដែរថា លោកគ្រោងនឹងវិលទៅកាន់កម្ពុជាកន្លះឆ្នាំមុនការបោះឆ្នោតជាសាកល។ លោក Sean McIntosh អ្នកនាំពាក្យស្ថានទូតសរអាក្នុងប្រទេសកម្ពុជា បានអះអាងថាលោកពុំទាន់មានព័ត៌មានអ្វីពីស្ថានការណ៍វិលត្រឡប់របស់លោកសម រង្ស៉ីទេ។ «ប៉ុន្តែតាមការយល់ដឹងជាទូទៅគឺថា រដ្ឋាភិបាលសរអាលើកទឹកចិត្តឲ្យមានការ ចូលរួមដោយ បើកទូលាយ និងមានដំណើការនយោបាយក្នុងស្មារតីនៃលទ្ធិប្រជាធិបតេយ្យ»។ លោក គល់ បញ្ញានាយកប្រតិបត្តិនៃអង្គការឃ្លាំមើលការបោះឆ្នោតបានអះអាងថាវត្តមានគណបក្ស ជំទាស់លោក សម រង្សីជារឿងសំខាន់ដើម្បីឲ្យមានការប្រកួតប្រជែងដោយយុត្តិធម៌ ស្មើភាពគ្នា។ «ប្រជាជនយើងបោះឆ្នោតៗដោយបក្ស។ អញ្ចឹងគណបក្សភាគច្រើនពឹងលើថ្នាក់ដឹកនាំគណបក្ស កម្មវិធីនយោបាយគណបក្ស ហើយហ្នឹងរចនាសម្ព័ន្ធរបស់គណបក្សហ្នឹង។ ហើយបើគណបក្ស ហ្នឹងខ្វះអ្នកដឹកនាំអញ្ចឹងទៅវាដូចជាខ្វះផ្នែកសំខាន់មួយដែលធ្វើឲ្យមានការគាំទ្រគណបក្ស និង អាចមានលទ្ធភាពនិងសមត្ថភាពពេញលេញទៅប្រកួតប្រជែងជាមួយគណបក្សកាន់អំណាច»។ លោកថ្លែងថាករណីលោកសមរង្សីជាករណីនយោបាយ មិនមែនជាបទឧក្រិដ្ឋត្រូវជាប់គុកច្រវ៉ាក់ទេដែលលោកថាគួតែមានការអត់ឱនក្នុងចំណោមអ្នកនយោបាយដូចប្រទេសប្រជាធិបតេយ្យមួយចំនួនដែលគេទុកឲ្យប្រជាពលរដ្ឋ អ្នកបោះឆ្នោត ជាអ្នកសម្រេចពេលបោះឆ្នោត។ ទោះជាយ៉ាងណាក៏ដោយលោកថ្លែងថាប្រទេសកម្ពុជាជួបប្រទះរឿងរ៉ាវយ៉ាងដូច្នេះជាច្រើនលើកហើយតែក្រោយមកអាចសម្របសម្រួលគ្នាបានរវាងអ្នកនយោបាយខ្មែរ។ This posting includes an audio/video/photo media file: Download Now |
| ពលរដ្ឋបឹងកក់ងាកមករកជំនឿអរូបិយ៍ដើម្បីជួយអន្តរាគមន៍ Posted: 07 Jun 2012 06:46 PM PDT នៅពេលដែលការតវ៉ារបស់ពួកគេហាក់បីដូចជាមិនត្រូវបានយកចិត្តទុកដាក់ពីស្ថាប័នរដ្ឋមានសមត្ថកិច្ចក្រុមប្រជាពលរដ្ឋសហគមន៍បឹងកក់បានងាកមករកជំនួយពីជំនឿអរូបិយ៍ដើម្បីជួយដល់ពួកគេ គឺជួយឲ្យមានការដោះលែងសមាជិកសហគមន៍របស់ពួកគេចំនួន ១៥នាក់ ដែលត្រូវចាប់ខ្លួន និងផ្តន្ទាទោសដោយសាលាដំបូងរាជធានីភ្នំពេញកាលពីខែឧសភាកន្លងទៅនេះ រួមទាំងជួយឲ្យទំនាស់ដីធ្លីរបស់ពួកគេនឹងត្រូវដោះស្រាយក្នុងពេលខាងមុខ។ កាលពីថ្ងៃពុធប្រជាពលរដ្ឋសហគមន៍ក្រីក្រមួយនេះ ដោយមានការចូលរួមពីប្រជាពលរដ្ឋសហគមន៍បុរីកីឡាផងសរុបប្រមាណជា ៥០នាក់ បានទៅបន់ស្រន់នៅតូបអ្នកតាមួយក្នុងសហគមន៍របស់ពួកគេ។ ក្នុងតូបអ្នកតាដែលធ្វើអំពីស៊ីម៉ង់ត៍ខ្ពស់ផុតពីដីនៅជាប់នឹងផ្លូវដែលមានក្រាលកម្ចេចថ្មតូចល្អិត មានរូបសំណាកអំពីស៊ីម៉ង់ត៍ជាច្រើនតម្រៀបជាជួរ និងមានរូបសំណាកធំៗចំនួនពីរដែលក្រុមអ្នកភូមិបានហៅថា គឺជាតំណាងបារមីយាយម៉ៅ និងលោកតាប្រាក់។ អ្នកស្រីយ៉ោម បុប្ផា គឺជាតំណាងប្រជាពលរដ្ឋសហគមន៍បឹងកក់ម្នាក់ដែលតែងតែចូលរួមក្នុងការតវ៉ាយ៉ាងសកម្ម។ «ដោយសារយើងដាក់លិខិតគ្រប់កន្លែងហើយមិនមានការឆ្លើយតបមកវិញ ហើយម្សិលម៉ិញយើងបានព្យាយាមដាក់លិខិតនៅព្រះបរមរាជវាំងទៀតអត់ឃើញមានខាងព្រះបរមរាជវាំងចេញមកទទួលយើងទេ។ អញ្ចឹងយើងងាកមកវិញ មកជឿលើអបិយ៍ជំនឿ»។ <!--AV--> សហគមន៍បឹងកក់គឺជាសហគមន៍ធំចុងក្រោយគេត្រូវបណ្ដេញ។ ប្រជាពលរដ្ឋជាង ៤.០០០គ្រួសារ ភាគច្រើនគឺជាអ្នកក្រីក្រត្រូវបង្ខំឲ្យចាកចេញពីលំនៅដ្ឋានដែលពួកគេថាទទួលបានសំណងមិនសមរម្យ។ បន្ទាប់ពីមានសម្ពាធពីធនាគារពិភពលោកលោកនាយករដ្ឋមន្ដ្រីហ៊ុន សែន កាលពីខែសីហា ឆ្នាំ ២០១១ បានសម្រេចកាត់ដីពីក្រុមហ៊ុនចំនួន ១២,៤៤ហិកតាដើម្បីបែងចែកឲ្យប្រជាពលរដ្ឋជាង ៧០០គ្រួសារ ដែលបានតស៊ូយ៉ាងស្វិតស្វាញទាមទារឲ្យមានការអភិវឌ្ឍនៅនឹងកន្លែងសម្រាប់ពួកគេ។ ក៏ប៉ុន្ដែរហូតមកទល់ពេលនេះ ការបែងចែកដីធ្លីទៅតាមការសម្រេចនោះបាននាំឲ្យមានភាពស្មុគ្រស្មាញនិងកើតអំពើហិង្សាជាបន្ដបន្ទាប់។ ហើយការបែងចែកដីនេះ បានអូសបន្លាយយ៉ាងរ៉ាំរ៉ៃ។ ក្រុមប្រជាពលរដ្ឋដែលត្រូវបណ្ដេញចេញបានរួបរួមគ្នា និងបាននាំគ្នាតវ៉ានិងដាក់សំណើសុំអន្ដរាគមន៍ដល់រដ្ឋសភា ក្រសួងយុត្តិធម៌ និងតំណាងរដ្ឋាភិបាល រួមទាំងទាមទារដោយផ្ទាល់ជាមួយសាលារាជធានីភ្នំពេញ។ ប៉ុន្ដែនៅតែមិនបានលទ្ធផល។ នៅក្នុងពិធីបន់ស្រន់កាលពីថ្ងៃពុធ ក្រុមប្រជាពលរដ្ឋបានបួងឲ្យបារមីក្នុងតំបន់ដែលពួកគេរស់នៅនោះផ្តន្ទាទោសដល់អ្នកទទួលខុសត្រូវចំពោះការធ្វើទុកបុកម្នេញលើពួកគេ។ ពួកគេបានព្រលែងសត្វចាបចំនួន ១៥ក្បាលតំណាងឲ្យអ្នកភូមិបឹងកក់ ១៥នាក់ ដែលត្រូវបានចាប់ខ្លួននិងផ្តន្ទាទោស។ បន្ទាប់មកក្រុមអ្នកភូមិបឹងកក់ក៏បានយកអំបិលលាយម្ទេសបាចតាមផ្លូវ និងដុតជាការឧបកិច្ចជាមួយនឹងការបួងសួងរបស់គេ។ លោក ដួង គា សកម្មជនតវ៉ាម្នាក់ទៀតក្នុងសហគមន៍នេះ។ «យើងដើរតាមផ្លូវភ្លឺ គេមិនដែលជួយយើងទេ។ យើងមានតែដើរតាមផ្លូវងងឹតដើម្បីឲ្យគេជួយយើង។ ផ្លូវភ្លឺគេយកក្រដាសស្នាមរបស់យើងទៅ គេកិនកម្ចេចចោល គេដុតចោលហើយគេចាប់ចងពួកបងប្អូនខ្ញុំទៀត»។ ប្រជាពលរដ្ឋកម្ពុជាបានរស់នៅជាមួយនឹងជំនឿអរូបិយ៍ជាច្រើនតំណមកហើយ។ ការបន់ស្រន់ ការបួងសួង ជំនឿទៅលើវត្ថុសក្ដិសិទ្ធគឺជាមធ្យោបាយសំខាន់ទីពីរ ក្នុងដំណើរជីវិតរបស់ពួកគេបន្ទាប់ពីមធ្យោបាយដោះស្រាយចំពោះមុខ។ កាលពីប៉ុន្មានថ្ងៃមុនក្រុមអ្នកភូមិបឹងកក់ក៏បានបន់ស្រន់ដល់ព្រះអង្គដង្កាដែលគេជឿថា ជាបារមីសក្ដិសិទ្ធមួយនៅមុខព្រះបរមរាជវាំងក្រុងភ្នំពេញ។ លោក មឿន តុលា ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍មានប្រសាសន៍ថា ការប្រើប្រាស់ជំនឿរបស់ក្រុមប្រជាពលរដ្ឋគឺជាសញ្ញាបាត់បង់ការទុកចិត្តរបស់ពួកគេទៅលើស្ថាប័នរដ្ឋាភិបាល។ «កាលណាបើប្រជាពលរដ្ឋងាកមកប្រើជំនឿដើម្បីដោះស្រាយបណ្ដឹងរបស់គាត់នេះ មានន័យថា ប្រព័ន្ធតុលាការ ប្រព័ន្ធយុត្តិធម៌មានបញ្ហា។ ប្រហែលជាប្រជាពលរដ្ឋអស់ជំនឿលើប្រព័ន្ធយុត្តិធម៌នៅស្រុកខ្មែរ។ ប្រហែលជាប្រជាពលរដ្ឋអស់ជំនឿលើការដោះស្រាយរបស់អាជ្ញាធរ»។ នៅមិនទាន់មានសញ្ញាណាមួយថា ប្រជាពលរដ្ឋសហគមន៍បឹងកក់ទាំង១៥ នឹងត្រូវដោះលែងឲ្យមានសេរីភាពមកវិញនៅពេលណានៅឡើយ។ ក៏ប៉ុន្ដែក្រុមអ្នកភូមិនៅតែជឿថា ការបន់ស្រន់របស់ពួកគេអាចនឹងមានប្រសិទ្ធភាព៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
