VOA News: ព័ត៌មាន: “ហេឡូវីអូអេ ០៧ មិថុនា ២០១២៖ ជម្លោះដីធ្លីនិងវិធានការប្រឆាំងនឹងការតវ៉ា” plus 2 more |
- ហេឡូវីអូអេ ០៧ មិថុនា ២០១២៖ ជម្លោះដីធ្លីនិងវិធានការប្រឆាំងនឹងការតវ៉ា
- ចៅក្រមអាមេរិកថាតុលាការកម្ពុជានៅក្មេងខ្ចីនៅឡើយ
- គណបក្សប្រឆាំងពីររៀបចំចងសម្ព័ន្ធភាព
| ហេឡូវីអូអេ ០៧ មិថុនា ២០១២៖ ជម្លោះដីធ្លីនិងវិធានការប្រឆាំងនឹងការតវ៉ា Posted: 07 Jun 2012 01:16 PM PDT អ្នកវិភាគឯករាជ្យនៅកម្ពុជានិយាយថា រដ្ឋាភិបាលមិនគួរដោះស្រាយបញ្ហា ជម្លោះដីធ្លីដោយអំពើហិង្សាទេ ជាពិសេសដីធ្លីនៅបឹងកក់និងបូរីកីឡារាជធានី ភ្នំពេញ និងតំបន់ដទៃទៀត។ គេគួរពិចារណាពីប្រវត្តិសាស្ត្រដែលកើតបដិវត្តន៍ ដីធ្លី។ នេះជាការអះអាងរបស់លោកបណ្ឌិត ឡៅ ម៉ុងហៃ ដែលបានចូលរួមជា វាគ្មិននៃកម្មវិធីហេឡូវីអូអេកាលពីថ្ងៃព្រហស្បតិ៍ទី៧ ខែមិថុនា ឆ្នាំ២០១២ ស្តីពីប្រធានបទ «ជម្លោះដីធ្លីនិងវិធានការប្រឆាំងនឹងការតវ៉ា»។ លោក ឡៅ ម៉ុងហៃ បានកត់សម្គាល់ឃើញមានការប្រើប្រាស់អាវុធ កម្លាំងបង្រ្កាបយ៉ាងហិង្សាច្រើនជាងពេលមុននៅឆ្នាំនេះ ដែលលោកថាអំពើហិង្សាមិនមែនជាដំណោះស្រាយបញ្ហាទេ។ សូមស្តាប់សំឡេងទាំងស្រុងនៃកម្មវិធីហេឡូវីអូអេ ថ្ងៃទី ០៧ មិថុនា ២០១២៖ <!--AV--> មធ្យោបាយចូលរួមសម្រាប់ប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| ចៅក្រមអាមេរិកថាតុលាការកម្ពុជានៅក្មេងខ្ចីនៅឡើយ Posted: 06 Jun 2012 10:17 PM PDT ចៅក្រមសហព័ព័ន្ធអាមេរិកមួយរូបបានគូសបញ្ជាក់ថា «ប្រព័ន្ធតុលាការរឹងមាំ» គឺជាគ្រឹះយ៉ាងសំខាន់សម្រាប់ការកសាងលទ្ធិប្រជាធិបតេយ្យនៅក្នុងប្រទេសមួយ ហើយបានហៅប្រព័ន្ធតុលាការនៅប្រទេសកម្ពុជា គឺជាប្រព័ន្ធយុត្តិធម៌ដែលក្មេងខ្ចីខ្លាំង។ លោក ជែមស៍ វីន (James A.Wynn) ចៅក្រមនៃសាលាឧទ្ធរណ៍សហព័ន្ធរបស់សហរដ្ឋអាមេរិកមានប្រសាសន៍ក្នុងសន្និសីទព័ត៌មានក្នុងក្រុងភ្នំពេញកាលពីរសៀលថ្ងៃអង្គារថា ប្រជាធិបតេយ្យពឹងផ្អែកខ្លាំងណាស់លើប្រព័ន្ធតុលាការរឹងមាំ។ ប៉ុន្ដែលោកមានប្រសាសន៍ថា ប្រព័ន្ធតុលាការនៅប្រទេសកម្ពុជានៅមានភាពក្មេងខ្ចី។ «នេះគឺជាប្រព័ន្ធតុលាការមួយមានវ័យក្មេងមែនទែន។ មានការប្រឈមច្រើនណាស់»។ ការប្រឈមដែលលោកចៅក្រម ជែមស៍ វីន លើកឡើងរួមមានចំនួនមេធាវីដែលគណមេធាវីកម្ពុជាមានសមាជិកជាមេធាវីប្រមាណជាង ១០០នាក់ ការប្រឈមក្នុងការមានមេធាវីសមស្របសម្រាប់ជនក្រីក្រមកពីតំបន់ជនបទដែលអាចតតាំងក្នុងតុលាការ។ «ប៉ុន្ដែអ្វីដែលសំខាន់ជាងគេនោះ គឺការប្រឈមដែលថាតើប្រជាពលរដ្ឋមានជំនឿ និងទុកចិត្តលើប្រព័ន្ធតុលាការ ឬយ៉ាងណា។ ការប្រឈមនេះមាននៅគ្រប់ទីកន្លែងទាំងអស់»។ លោក ជែមស វីន អាយុ ៥៤ ឆ្នាំត្រូវអញ្ជើញដោយស្ថានទូតសហរដ្ឋអាមេរិកប្រចាំក្រុងភ្នំពេញឲ្យបំពេញទស្សនកិច្ចនៅកម្ពុជាពីថ្ងៃទី៤ ដល់ថ្ងៃទី៨ ខែមិថុនា។ ក្នុងដំណើរទស្សនកិច្ចនេះលោកនឹងត្រូវថ្លែងបាឋកថាដល់មន្ដ្រីច្បាប់កម្ពុជា ដូចជាចៅក្រម និងមេធាវីកំពុងបំពេញវិជ្ជាជីវៈដល់អង្គការក្រៅរដ្ឋាភិបាលដល់ក្រុមនិស្សិតច្បាប់ និងអ្នកយកព័ត៌មានផងដែរ។ លោកនឹងលើកឡើងពីប្រព័ន្ធយុត្តិធម៌ឯករាជ្យជាពិសេសប្រព័ន្ធតុលាការនៅសហរដ្ឋអាមេរិក និងការពិចារណាលើប្រព័ន្ធច្បាប់កម្ពុជាផងដែរ។ លោកចៅក្រម ជែមស៍ វីន មានប្រសាសន៍ថា ប្រព័ន្ធតុលាការជាផ្នែកមួយក្នុងការជួយឲ្យមានតុល្យភាពនៃអំណាចទាំងបីនៅក្នុងប្រទេសនីមួយៗគឺអំណាចនីតិបញ្ញត្តិ អំណាចនីតិប្រតិបត្តិ និងអំណាចតុលាការ។ ប៉ុន្ដែលោកវីន បានអធិប្បាយដោយប្រយោលនៅពេលដែលមានសំណួរទាក់ទងនិងការបណ្ដេចេញដោយបង្ខំដោយសារជម្លោះដីធ្លី និងការចាប់ខ្លួនរួមនឹងផ្តន្ទាទោសអ្នកភូមិបឹងកក់ចំនួន ១៥នាក់ដោយតុលាការកម្ពុជា។ លោកគ្រាន់តែមានប្រសាសន៍ថា សូម្បីនៅសហរដ្ឋអាមេរិកក៏មានការចោទប្រកាន់និងផ្តន្ទាទោសលើជនសង្ស័យខុសដែរ។ ប៉ុន្មានឆ្នាំកន្លងមកនេះមានបុគ្គលចំនួន២០០ ក្នុងចំណោមប្រជាពលរដ្ឋសហរដ្ឋអាមេរិកជាង ២០០លាននាក់ត្រូវតុលាការផ្តន្ទាទោសខុស ហើយក្រោយមកទើបរកឃើញថា ជនទាំងនោះគ្មានកំហុស។ ក៏ប៉ុន្ដែនៅសហរដ្ឋអាមេរិកមានការដោះស្រាយបានសមរម្យសម្រាប់បញ្ហានេះ ហើយធានាច្បាស់លាស់ថា ការរំលោភដូច្នេះមិនត្រូវកើតមាន។ លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្ដីការគណរដ្ឋមន្ដ្រីបានបកស្រាយលើទស្សនៈរបស់លោកចៅក្រមអាមេរិកដោយសំអាងថា សន្តិភាពនិងស្ថិរភាពគឺជាមូលដ្ឋាននៃប្រជាធិបតេយ្យ និងយុត្តិធម៌។ «បើគ្មានសន្ដិភាព គ្មានស្ថិរភាពទេ យើងពិបាកនឹងពង្រឹងប្រព័ន្ធយុត្តិធម៌ណាស់។ បន្ទាប់ពីសន្ដិភាព ស្ថិរភាពបានយើងអាចពង្រឹងបានប្រព័ន្ធយុត្តិធម៌។ អ្វីដែលគាត់ថាប្រព័ន្ធយុត្តិធម៌ក្មេងខ្ចីមិនខុសទេ។ ដោយសារដូច្នេះហើយបានប្រព័ន្ធយុត្តិធម៌ យើងត្រូវបានកែទម្រង់ដែលរាជរដ្ឋាភិបាលកំពុងធ្វើសព្វថ្ងៃ»។ ប្រព័ន្ធតុលាការកម្ពុជាបានទទួលរងការវាយប្រហាររិះគន់ជាច្រើនទសវត្សមកហើយអំពីអំពើពុករលួយ និងការលម្អៀងផ្នែកនយោបាយទៅរកគណបក្សកាន់អំណាច៕ This posting includes an audio/video/photo media file: Download Now |
| គណបក្សប្រឆាំងពីររៀបចំចងសម្ព័ន្ធភាព Posted: 06 Jun 2012 08:13 PM PDT ប្រធានគណបក្សសិទ្ធិមនុស្សបានអះអាងនៅថ្ងៃពុធនេះថា គណបក្សរបស់លោកនៅសប្តាហ៍ក្រោយនេះនឹងបង្កើតគណៈកម្មាធិការមួយដើម្បីចរចាជាមួយនឹងគណក្សសម រង្ស៊ី ក្នុងការរិះរកវិធីសាស្ត្ររួបរួមទៅជាគណបក្សតែមួយ។ ក្រោយពីការបោះឆ្នោតក្រុមប្រឹក្សាអាណត្តិទី៣ ដែលទើបតែបញ្ចប់កាលពីថ្ងៃអាទិត្យគណបក្សសម រង្ស៊ី និងគណបក្សសិទ្ធិមនុស្សបានសំឡឹងទៅរកការច្របាច់បញ្ចូលគ្នាទៅជាគណបក្សតែមួយ បន្ទាប់ពីគណបក្សទាំងពីរទទួលបានប្រធានក្រុមប្រឹក្សាឃុំសង្កាត់ប្រហាក់ប្រហែលគ្នា។ លោកកឹម សុខា បានបញ្ជាក់ថាគណៈកម្មាធិការនាយករបស់គណបក្សបានបើកកិច្ចប្រជុំនៅសប្តាហ៍ក្រោយនេះ។ លោកបានមានប្រសាសន៍ថាគណៈកម្មាធិការដែលគ្រោងនឹងបង្កើតថ្មីនេះ នឹងមានសមាជិកចំនួនបីទៅប្រាំនាក់តែប៉ុណ្ណោះ ដើម្បីទៅចរចាជាមួយនឹងគណបក្សសម រង្ស៊ី។ «យើងត្រៀមគោលការណ៍ដើម្បីចែកគ្នាខ្លះៗហើយ។ ក្រោយពីប្រកាសលទ្ធផលហើយ យើងនឹងជជែកគ្នាឲ្យគណៈកម្មាធិការជជែកគ្នា។ ប៉ុន្តែខ្ញុំចង់ឲ្យមានជួបជាមួយលោកសម រង្ស៊ី ផ្ទាល់ដើម្បីឲ្យដឹងពីទស្សនៈពិតប្រាកដរបស់គាត់ ចង់បានយ៉ាងម៉េច»។ គណបក្សសិទ្ធិមនុស្សកាលពីថ្ងៃអង្គារបានសរសេរលិខិតមួយច្បាប់ជូនគណបក្សសម រង្ស៊ី ដើម្បីកំណត់ពេលវេលាសមស្របណាមួយអាចជួបពិភាក្សាគ្នាដើម្បីឆ្ពោះទៅរកការរួបរួមរវាងគណបក្សទាំងពីរ។ លោកគង់ គាំ ប្រធានស្តីទីគណបក្សសម រង្ស៊ី បានសរសេរលិខិតឆ្លើយតបមកលោកកឹម សុខា ថា គណបក្សរបស់លោកបានទទួលលិខិតនេះរួចហើយ។ ហើយគណបក្សសម រង្ស៊ី នឹងបង្កើតគណៈកម្មាធិការចរចាគ្នាជាមួយនឹងគណបក្សសិទ្ធិមនុស្សក្នុងពេលឆាប់ៗនេះ។ លោកសម រង្ស៊ី ដែលកំពុងតែនិរទេសខ្លួននៅឯបរទេសបានសរសរលិខិតអំពាវនាវមួយឲ្យមានការរួបរួមគ្នារវាងអ្នកប្រជាធិបតេយ្យទាំងអស់ ដើម្បីអ្វីមួយដែលលោកសម រង្ស៊ី ចាត់ទុកថាក្នុងគោលបំណងដើម្បីផ្តួលរំលំគណបក្សគ្រប់គ្រងអំណាចរបស់លោកនាយករដ្ឋមន្ត្រីហ៊ុន សែន ដែលបានគ្រប់គ្រងប្រទេសអស់រយៈពេលជិត ៣០ឆ្នាំ។ លោកសម រង្ស៊ី បានបញ្ជាក់នៅក្នុងលិខិតនោះថាគោលបំណងនៃការរួបរួមគ្នា គឺដើម្បីការពារបូរណភាពទឹកដីឲ្យបានគង់វង្ស និងផ្តើមការពាររបបប្រជាធិបតេយ្យសេរីពហុបក្សពិតប្រាកដ។ លោកជាម យៀប អ្នកតំណាងរាស្ត្រ និងជាសមាជិកអចិន្ត្រៃយ៍នៃគណបក្សប្រជាជនកម្ពុជាបានមានប្រសាសន៍ថា លោកមិនមានជំនឿថាគណបក្សទាំងពីរអាចរួបរួមគ្នាបានទេ ដោយសារតែគណបក្សទាំងពីរត្រូវគ្នាតែថ្នាក់ដឹកនាំខាងលើតែប៉ុណ្ណោះ។ ចំណែកឯនៅថ្នាក់ដឹកនាំខាងក្រោម នៅខ្វែងគំនិតគ្នានៅឡើយ។ លោកជាម យៀប បានបញ្ជាក់ទៀតថាបើទោះបីជាគណបក្សទាំងពីររួបរួមគ្នាទៅជាគណបក្សតែមួយក៏មិនអាចផ្តួលរំលំគណបក្សប្រជាជនកម្ពុជាបានដែរ។ «គណបក្សប្រជាជនកម្ពុជា មិនមានការខ្លាចរអែងចំពោះការបញ្ជូលគ្នារវាងគណបក្សទាំងពីរនោះទេ ដោយសារតែគណបក្សនេះ យើងបានរៀបចំរឹងមាំនូវការងារតាំងពីថ្នាក់កណ្តាល រហូតទៅដល់ខេត្តក្រុង រាជធានី ស្រុកខណ្ឌ ឬក៏ឃុំសង្កាត់ ឬក៏ភូមិទូទាំងប្រទេស»។ បន្ទាប់ពីការបោះឆ្នោតក្រុមប្រឹក្សាឃុំសង្កាត់កាលពីថ្ងៃអាទិត្យ លទ្ធផលក្រៅផ្លូវការ បានបង្ហាញថាគណបក្សសិទ្ធិមនុស្សទទួលបានប្រធានក្រុមប្រឹក្សាឃុំសង្កាត់ចំនូន១៨ គណបក្សសម រង្ស៊ី ទទួលបាន ២២។ ចំណែកឯគណបក្សប្រជាជនកម្ពុជា របស់លោកនាយករដ្ឋមន្ត្រីហ៊ុន សែន បានកាន់កាប់ប្រធានក្រុមប្រឹក្សាឃុំសង្កាត់ជាច្រើនលើសលប់ប្រមាណ១៥៩២៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
