VOA News: ព័ត៌មាន: “មេដឹកនាំអាស៊ានបើកកិច្ចប្រជុំពីរថ្ងៃនៅកម្ពុជា” plus 6 more |
- មេដឹកនាំអាស៊ានបើកកិច្ចប្រជុំពីរថ្ងៃនៅកម្ពុជា
- ការសម្លាប់អ្នកទោសក្នុងគុកទួលស្លែងស្ថិតក្រោមបញ្ជារបស់នួន ជា៖ ឌុច
- ការបោះឆ្នោតនៅកម្ពុជា៖ វិមជ្ឈការនិងតួរនាទីរបស់មេឃុំចំពោះប្រជាពលរដ្ឋ
- មួយឆ្នាំបន្ទាប់ព្រឹត្តិការណ៍នៅហ៊្វូគូស៊ីម៉ា ថាមពលនុយក្លេអ៊ែរធ្វើឲ្យទ្វីបអ៊ឺរ៉ុបខ្វែងគំនិតគ្នា
- ប៊ីល គ្លីនតុនឲ្យដំបូន្មានដល់ប្រធានាធិបតីអូបាម៉ា
- កម្ពុជានិងចិនសន្យារក្សាសន្តិភាពនៅដែនសមុទ្រចិនខាងត្បូង
- វៀតណាមនិងហ្វ៊ីលីពីនលើកឡើងជម្លោះដែនសមុទ្រចិនក្នុងប្រជុំកំពូលអាស៊ាន
| មេដឹកនាំអាស៊ានបើកកិច្ចប្រជុំពីរថ្ងៃនៅកម្ពុជា Posted: 03 Apr 2012 10:58 AM PDT មេដឹកនាំប្រទេសទាំង១០នៃសមាគមប្រជាជាតិអាស៊ីអាគ្នេយ៍ (អាស៊ាន) កំពុងជួបប្រជុំគ្នានៅក្នុងរាជធានីភ្នំពេញ ក្នុងសន្និសីទកំពូលសម្រាប់រយៈពេល២ថ្ងៃដោយគេរំពឹងថានឹងដោះស្រាយបញ្ហាដ៏រសើបនៃជម្លោះលើដែនទឹកសមុទ្រនិងគម្រោងបាញ់បង្ហោះតារាសិប្បនិមិ្មតរបស់កូរ៉េខាងជើង។នាយករដ្ឋមន្ដ្រីខ្មែរ លោក ហ៊ុន សែន ដែលជាប្រធាននិងជាម្ចាស់ផ្ទះទទួលសមាគមអាស៊ាន បានផ្ដោតមកលើរឿងសេដ្ឋកិច្ច នៅពេលលោកបើកសម័យប្រជុំកាលពីថ្ងៃអង្គារ ដោយអំពាវនាវដល់ប្រទេសចូលរួមក្នុងសន្និសីទឲ្យខិតខំបង្រួញគម្លាតគ្នាដ៏ធំ រវាងប្រទេសអ្នកមាននិងប្រទេសអ្នកក្រ។ លោក ហ៊ុន សែន ថ្លែងថា៖ «នៅក្នុងតំបន់នេះ ទោះបីគម្លាតនៃការអភិវឌ្ឍក្នុងចំណោមប្រទេសអាស៊ានបានត្រូវគេមើលឃើញថាបានរួមក៏ដោយ តែគម្លាតនោះនៅតែធំដដែល។ នេះតម្រូវឲ្យមានកិច្ចប្រឹងប្រែងទ្វេជាពីរ ដើម្បីលើកដម្កើងការលូតលាស់ និងធ្វើឲ្យប្រសើរដល់ការចែករំលែកផលផ្លែផ្កានៃការលូតលាស់ ដល់ជាតិនិងតំបន់ ផងដែរក្នុងចំណោមប្រទេសសមាជិក។ របៀបវារៈនៃការចរចាបានសង្កត់មកលើគោលដៅនៃការបង្កើតទីផ្សារអាស៊ានមួយតាមបែបអឺរុប ដែលមានផ្សារសេដ្ឋកិច្ចតែមួយ ក្នុងរយៈពេល៣ឆ្នាំខាងមុខ។ តែប្រទេសចូលរួមបានសារភាពថា មេដឹកនាំប្រទេសមិនអាចជៀសវាងបានទេពីការចរចាគ្នាអំពីរឿងសន្ដិសុខចាំបាច់នានា។ ហ្វីលីពីនអំពាវនាវឲ្យអាស៊ានមានគោលជំហរឯកភាពមួយចំពោះបញ្ហាសមុទ្រចិនខាងត្បូង ទីភ្នាក់ងារព័ត៌មានបារាំង AFP រាយការណ៍ថា ប្រទេសសមាគមអាស៊ានត្រូវបង្ខំខ្លួនឲ្យប្រកាន់គោលជំហររួមអំពីការរៀបចំឲ្យមានក្រមសីលធម៌មួយ (Code of Conduct) ក្នុងគោលបំណងនឹងបន្ធូរភាពតានតឹងនៅតំបន់សមុទ្រចិនភាគខាងត្បូង។ នេះ បើតាមពាក្យរបស់ប្រធានាធិបតីហ្វីលីពីន លោក បេនិកណូ អាគីណូ (Benigno Aquino) ថ្លែងកាលពីថ្ងៃអង្គារនៅក្នុងរាជធានីភ្នំពេញ។ លោក អាគីណូ ថ្លែងប្រាប់មេដឹកនាំប្រទេសសមាជិកអាស៊ានថា គ្រឹះមូលដ្ឋាននៃក្រមសីលធម៌ត្រូវចាត់ទុកជារឿងផ្ទៃក្នុងរបស់ប្រទេសសមាជិករបស់ប្លុក។ នេះយោងទៅតាមសេចក្ដីថ្លែងការណ៍របស់ក្រសួងការបរទេសហ្វីលីពីន។ មេដឹកនាំនៃបណ្តាប្រទេសអាស៊ានបានអំពាវនាវឲ្យមានការដកហូតចេញការដាក់ទណ្ឌកម្មសេដ្ឋកិច្ចមកលើប្រទេសភូមា ក្រោយពីមានការបោះឆ្នោតជាប្រវត្ដិសាស្រ្ដ ដែលលោកស្រី អ៊ុងសានសូជី មេដឹកនាំចលនាលទ្ធិប្រជាធិបតេយ្យបានទទួលជ័យជម្នះដ៏លើសលុប។ រដ្ឋមន្ដ្រីការបរទេសឥណ្ឌូនេស៊ីដែលកាន់មុខនាទីជាប្រធានសមាគមអាស៊ានកាលពីឆ្នាំមុន បានចេញសេចក្ដីអំពាវនាវដូច្នោះ កាលពីថ្ងៃអង្គារ ក្នុងកិច្ចប្រជុំអាស៊ាននាទីក្រុងភ្នំពេញ។ លោកមានប្រសាសន៍ថា៖ «រឿងមួយដែលយើងចាប់អារម្មណ៍ខ្លាំងនៅពេលនេះ គឺ ធានាថា ការដាក់ទណ្ឌកម្មនោះប្រឆាំងមីយ៉ានម៉ា ត្រូវដកហូតចេញឲ្យបានឆាប់រហ័ស។ នេះមានសារៈសំខាន់ណាស់ ជានិមិត្ដរូបជាផលប្រយោជន៍របស់ប្រទេសមួយដែលបានចាប់ផ្ដើមដំណើរការទៅរកការផ្លាស់ប្ដូរ ហើយនៅក្នុងដំណើរការនេះត្រូវទទួលយកការគាំទ្រ។ រដ្ឋមន្ដ្រីការបរទេសខ្មែរ លោក ហោ ណាំហុង ជាប្រធានអាស៊ានបច្ចុប្បន្ន ក៏បានអំពាវនាវដល់សហគមន៍អន្ដរជាតិឲ្យពិចារណាដកហូតចេញការដាក់ទណ្ឌកម្មមកលើប្រទេសភូមាផងដែរ។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> ចិន-អាមេរិក៖ អ្នកស្រាវជ្រាវល្បីឈ្មោះពីរនាក់ព្រមានថា យុទ្ធសាស្រ្ដមិនទុកចិត្ដគ្នាដ៏យូរអង្វែងរវាងស.រ.អ. និងចិន នឹងក្លាយទៅជារឿងធ្ងន់ធ្ងរ ទោះបីជាមានការពង្រីកការទាក់ទងគ្នាយ៉ាងលឿនក៏ដោយរវាងប្រទេសទាំងពីរ។ អាមេរិក៖ បេក្ខជនប្រធានាធិបតីនៃគណបក្សសាធារណរដ្ឋ លោក មិត រ៉មនី (Mitt Romney) ហាក់ដូចជាមានសម្ទុះក្នុងការដឹកមុខក្នុងការបោះឆ្នោតបឋមនៅថ្ងៃអង្គារនេះដើម្បីទទួលការតែងតាំងជាផ្លូវការជាបេក្ខជនប្រធានាធិបតី តទល់នឹងប្រធានាធិបតីបារ៉ាក់ អូបាម៉ា ក្នុងការបោះឆ្នោតជាតិនៅខែវិច្ឆិកា។ ម៉ិកស៊ិក-អាមេរិក៖ ប្រធានាធិបតី បារ៉ាក់ អូបាម៉ា ថ្លែងថា អំពើហឹង្សាពាក់ព័ន្ធនឹងគ្រឿងញៀននៅក្នុងប្រទេសម៉ិកស៊ិក អាចបណ្តាលឲ្យមានអ្វីដែលលោកហៅថា«ការប៉ះពាល់កាន់តែធ្ងន់ធ្ងរ» ដល់ទំនាក់ទំនងអាមេរិក-ម៉ិកស៊ិក។ ស៊ូដង់ខាងត្បូង៖ អគ្គលេខាធិការអ.ស.ប. លោក បានគីមូន បានអំពាវនាវដល់ក្រុមមេដឹកនាំប្រទេសស៊ូដង់ និងស៊ូដង់ខាងត្បូង ឲ្យជួបប្រជុំគ្នាឲ្យបានឆាប់រហ័ស ដើម្បីដោះស្រាយភាពតានតឹងរវាងប្រទេសទាំងពីរ តែកិច្ចប្រជុំកំណត់នៅថ្ងៃអង្គារបានត្រូវលុបចោល។ ម៉ាលី៖ ក្រុមប្រឹក្សាសន្ដិសុខអសបនឹងបើកឲ្យមានកិច្ចប្រជុំគ្រាអាសន្នជាបន្ទាន់អំពីរឿងនៅក្នុងប្រទេសម៉ាលីនៅថ្ងៃអង្គារនេះ ខណៈដែលមេដឹកនាំយោធាអ្នកធ្វើរដ្ឋប្រហារ កំពុងកាន់ក្ដោបអំណាច ហើយប្រទេសនៃតំបន់អាហ្វ្រ៊ិកខាងលិចដាក់ទណ្ឌកម្មការទូតនិងហិរញ្ញវត្ថុមកលើប្រទេសនោះ។ ឥណ្ឌា៖ ស.រ.អ.នឹងផ្ដល់ប្រាក់រង្វាន់រហូតដល់១០លានដុល្លារ ដល់រណាដែល រកឃើញជនជាតិបាគីស្ថានម្នាក់ ដែលត្រូវចោទថាជាអ្នករៀបចំផែនការវាយប្រហារដ៏ប្រល័យដោយភេរវជនក្នុងឆ្នាំ២០០៨ នៅក្នុងក្រុងមុមបៃ (Mumbai) ប្រទេសឥណ្ឌា។ ស៊ីរី៖ ក្រុមមួយរបស់អសបនឹងធ្វើដំណើរទៅដល់ប្រទសស៊ីរីក្នុងរយៈពេល៤៨ម៉ោងដើម្បីវែកញែកអំពីការដាក់រាយកងកម្លាំងការពារសន្ដិសុខ ក្នុងគោលបំណងបំបាត់អំពើឃោរឃៅធ្វើឡើងដោយការវាយបង្រ្កាបរបស់រដ្ឋាភិបាលស៊ីរី មកលើសកម្មជនអ្នកប្រឆាំងរដ្ឋាភិបាល។ វៀតណាម៖ កាកបាទក្រហមរបស់ប្រទេសវៀតណាមបានបើកយុទ្ធនាការអប់រំសាធារណជន ដើម្បីប្រយុទ្ធប្រឆាំងការរាលដាលជំងឺនៅដៃ ជើង និងមាត់ នៅក្នុងប្រទេសនេះ។ <!--AV--> This posting includes an audio/video/photo media file: Download Now |
| ការសម្លាប់អ្នកទោសក្នុងគុកទួលស្លែងស្ថិតក្រោមបញ្ជារបស់នួន ជា៖ ឌុច Posted: 03 Apr 2012 08:13 AM PDT ឌុច បានផ្តល់ពត៌មានកាន់តែច្រើនថែមទៀត នៅថ្ងៃព្រហស្បតិ៍នេះ ប្រឆាំងនឹង នួន ជា បងធំទី២នៃរបបខ្មែរក្រហម ដែលធ្លាប់បានប្រកែកថា ខ្លួនមិនស្ថិតក្នុងអំណាចបញ្ជានៃការចាប់និងកាប់សម្លាប់ប្រជាពលរដ្ឋកម្ពុជានោះទេ។ នៅក្នុងការផ្តល់សក្ខីកម្មក្នុងសវនាការដោយអង្គជំនុំជម្រះសាលាដំបូងនៃសាលាក្ដីខ្មែរក្រហម ឈានដល់ថ្ងៃទី៧ ឌុច បានបញ្ជាក់ថា នួន ជា ដាក់បញ្ជាឲ្យសម្លាប់អ្នកទោសក្នុងគុកទួលស្លែងឲ្យអស់មុនពេលដែលកងទ័ពវៀតណាមចូលរំដោះដល់ទីក្រុងភ្នំពេញ នៅថ្ងៃទី៧ ខែមករា ឆ្នាំ ១៩៧៩។ មានអ្នកទោសយ៉ាងតិចចំនួន១២៣៨០នាក់ត្រូវបានធ្វើទារុណកម្មយ៉ាងព្រៃផ្សៃ និងសម្លាប់ចោល នៅក្នុងគុកទួលស្លែង។ «បងនួនឲ្យគេហៅខ្ញុំទៅធ្វើការ។ ខ្ញុំក៏ទៅ។ គាត់ថា មិត្តបញ្ចេញពួកហ្នឹងឲ្យអស់ទៅ។ ថ្ងៃដែលបងនួន ហៅខ្ញុំទៅហ្នឹង បើមិនថ្ងៃទី១ គឺថ្ងៃទី៣ គឺមុនរយៈពេល ដែលខ្ញុំចេញពីភ្នំពេញបួនថ្ងៃ។ ដូច្នេះប្រហែលជាថ្ងៃបញ្ចប់ផែនការបញ្ចេញអ្នកទោសឲ្យអស់ យកទៅកម្ទេចហ្នឹងហើយ»។ ឌុចបានឆ្លើយតបទៅនឹងសំណួររបស់សហព្រះរាជអាជ្ញារងអន្ដរជាតិ លោក វីលាម ស៊្មីត (William Smith) ថា ប៉ុល ពត ដែលជាបងធំទី១ បានបញ្ជាឲ្យខ្លួនបញ្ឈប់ការសួរចម្លើយដោយទារុណកម្មលើអ្នកទោស។ ក៏ប៉ុន្ដែបីថ្ងៃក្រោយមក នួន ជាបានជំទាស់នឹងបញ្ជានេះ។ ហើយ ឌុច ក៏បន្ដការអនុវត្តនូវទារុណកម្មបន្ដទៀតក្នុងការជម្រិតទាញយកចម្លើយពីអ្នកទោស។ ទារុណកម្មក្នុងគុកទួលស្លែង ឬមន្ទីរ ស ២១មានជាអាទិ៍ ការវាយនឹងរំពាត់ខ្សែតី ឆក់ខ្សែភ្លើង ដកក្រចក ជ្រមុជក្នុងទឹក ព្យួរជើងឡើងលើជាដើម។ ឌុចបានបញ្ជាក់បន្ថែមទៀតថា ខ្លួនបានអនុវត្តតាមផែនការរបស់ នួន ជា។ «គឺយើងខ្ញុំធ្វើការជាមួយបងទី២គឺបង នួន នេះ រួចហើយខ្ញុំមកបញ្ជាស២១ក្នុងឋានៈខ្ញុំជាប្រធាន»។ ឌុច ត្រូវបានកាត់ទោសក្នុងសំណុំរឿង០០១ ហើយត្រូវផ្តន្ទាទោសឲ្យជាប់ពន្ធនាគារអស់មួយជីវិត។ គាត់បាននិយាយថា គាត់បានដឹងតិចតួចពីមន្ទីរឃុំឃាំងបឹងត្របែក។ ប៉ុន្ដែទទួលស្គាល់ថា មានអ្នកទោសនៅទីនោះត្រូវបញ្ជូនមកកាន់គុកទួលស្លែង និងមានអ្នកទោសជាច្រើនទៀតត្រូវចាប់បញ្ជូនពីក្រសួងនានាទៅឃុំឃាំងក្នុងគុកទួលស្លែងផងដែរ។ កាំង ហ្គិចអ៊ាវ ហៅ ឌុច បានលើកឡើងថា គាត់មិនបានដឹងពីព័ត៌មានច្រើនអំពីអៀង សារី នៅក្នុងក្រសួងការបរទេសនោះទេ។ ហើយគាត់បានឃើញអៀង សារី ដោយផ្ទាល់តែពីរដងគត់ នៅក្នុងរបបកម្ពុជាប្រជាធិបតេយ្យ គឺឃើញអៀង សារី ជាចុងក្រោយនៅថ្ងៃទី៦ ខែមករា ឆ្នាំ ១៩៧៩។ ដោយឡែកសហព្រះរាជអាជ្ញារងអន្ដរជាតិ លោក វីលាម ស្ម៊ីតបានចោទសួរតិចតួចទៅកាន់សាក្សីអំពីខៀវ សំផន។ ជនជាប់ចោទទាំងបីគឺ នួន ជា អតីតប្រធានសភាខ្មែរក្រហម អៀង សារី អតីតឧបនាយករដ្ឋមន្ដ្រី និងជារដ្ឋមន្ដ្រីការបរទេស និង ខៀវ សំផន អតីតប្រមុខរដ្ឋខ្មែរក្រហម កំពុងស្ថិតក្រោមការកាត់ទោស ចំពោះការចោទប្រកាន់ទាក់ទងនឹងការទទួលខុសត្រូវនៃការសម្លាប់រង្គាលទៅលើប្រជាពលរដ្ឋកម្ពុជាយ៉ាងតិច១,៧លាននាក់ ចន្លោះពីថ្ងៃទី១៧ មេសា ឆ្នាំ ១៩៧៥ ដល់ថ្ងៃទី ៦ មករា ឆ្នាំ ១៩៧៩៕ This posting includes an audio/video/photo media file: Download Now |
| ការបោះឆ្នោតនៅកម្ពុជា៖ វិមជ្ឈការនិងតួរនាទីរបស់មេឃុំចំពោះប្រជាពលរដ្ឋ Posted: 03 Apr 2012 06:13 AM PDT ប្រទេសកម្ពុជានឹងរៀបចំការបោះឆ្នោតជាបន្តបន្ទាប់ដើម្បីជ្រើសរើសតំណាងនៅថ្នាក់មូលដ្ឋាននិងថ្នាក់ជាតិ។ ក្នុងខែមិថុនាឆ្នាំនឹងមានការបោះឆ្នោតដើម្បីជ្រើសរើសក្រុមប្រឹក្សាឃុំសង្កាត់និងនៅឆ្នាំ២០១៣ខាងមុខនឹងមានការបោះឆ្នោតជាតិដើម្បីជ្រើសរើសអ្នកតំណាងរាស្រ្តនិងអ្នកដឹកនាំរដ្ឋាភិបាលថ្មី។ កម្មវិធីហេឡូវីអូអេនៅយប់នេះគឺជាការពិភាក្សាប្រចាំខែលើកទីមួយជាមួយលោក អ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជាលើប្រធានបទទាក់ទងនឹងការបោះឆ្នោតទាំងនេះ។ លោកអ្នកអាចស្តាប់និងចូលរួមកម្មវិធីនេះបាននៅរៀងរាល់ថ្ងៃច័ន្ទដើមខែរហូតដល់ការបោះឆ្នោតជាតិបញ្ចប់។ សម្រាប់ការពិភាក្សានៅក្នុងខែនេះយើងផ្តោតលើប្រធានបទ «ការបោះឆ្នោតនៅកម្ពុជា៖ វិមជ្ឈការនិងតួរនាទីរបស់មេឃុំចំពោះប្រជាពលរដ្ឋ»។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី ០២ ខែមេសា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| Posted: 03 Apr 2012 12:51 AM PDT ឧបទ្ទវហេតុកាលពីឆ្នាំមុននៅឯរោងចក្រអគ្គីសនីដើរដោយថាមពលនុយក្លេអ៊ែរហ៊្វូគូស៊ីម៉ា ដាអ៊ីឈី (Fukushima-Daichi) បានធ្វើឱ្យខ្វែងគំនិតគ្នាកាន់តែខ្លាំងឡើងថែមទៀតនៅទ្វីបអឺរ៉ុប ស្តីពីសុវត្ថិភាពនិងអនាគតនៃថាមពលនុយក្លេអ៊ែរ។ ប្រហែលជាគ្មានពេលណាទេដែលភាពខុសប្លែកគ្នាកាន់តែលេចឡើងកាន់តែច្បាស់រវាងមហាអំណាចធំបំផុតនៅក្នុងតំបន់ គឺប្រទេសបារាំង(France)និងអាល្លឺម៉ង់( Germany)។ <!--IMAGE-RIGHT--> វិបត្តិក្នុងតំបន់អឺរ៉ូ(eurozone) បានពង្រឹងទំនាក់ទំនងរវាងបារាំងនិងអាឡឺម៉ង់។ ប៉ុន្តែ វិបត្តិមួយទៀត ពោលគឺឧបទ្ទវហេតុនុយក្លេអ៊ែរ កាលពីឆ្នាំមុន នៅប្រទេសជប៉ុន កំពុងតែបានបែងចែកប្រទេសជិតខាងអឺរ៉ុប់ទាំងនោះហើយ។ លោកប្រធានាធិបតីបារាំង នីកូឡាស សាកូហ្ស៊ី (Nicolas Sarkozy) គឺជាអ្នកគាំទ្រយ៉ាងខ្លាំងក្លាចំពោះថាមពលនុយក្លេអ៊ែរ។ ក្នុងសុន្ទរកថាទាំងឡាយ ដែលដូចទៅនឹងសុន្ទរការនេះដែរ លោក ផ្តល់ទឡ្ហីករណ៍ថា ថាមពលនុយក្លេអ៊ែរ មានសារសំខាន់ណាស់ក្នុងការផ្តល់ការងារនិងថាមពលដែលមានតម្លៃទាប។ បារាំង គឺជាប្រទេសមួយក្នុងចំណោមបណ្តាប្រទេសផលិតថាមពលនុយក្លេអ៊ែរឈានមុខគេ នៅក្នុងពិភពលោក។ ប្រហែលជាបីភាគបួននៃចរន្តអគ្គីសនីនៅទីនេះ បានមកពីថាមពលនុយក្លេអ៊ែរ។ បារាំង ក៏បាននាំចេញថាមពលនុយក្លេអ៊ែរ និងបច្ចេកវិទ្យានេះផងដែរ។ ក្រុមហ៊ុនបារាំង កំពុងកសាងម៉ាស៊ីនរ៉េអាទ័រនុយក្លេអ៊ែរមួយនៅចក្រភពអង់គ្លេស ហើយកំពុងដេញថ្លៃ ដើម្បីសាងសង់ម៉ាស៊ីនរ៉េអាទ័រដទៃទៀតនៅប្រទេសអាហ្រ្វិកខាងត្បូង។ ប៉ុន្តែឧទ្ទវហេតុហ៊្វូគូស៊ីម៉ានេះ បានជំរុញឱ្យរដ្ឋាភិបាលអាល្លឺម៉ង់ ប្រកាសបិទចោលម៉ាស៊ីនរ៉េអាទ័រនុយក្លេអ៊ែរទាំងអស់ នៅត្រឹមឆ្នាំ២០២២ ជាជាងការបិទបន្តិចម្តងៗ។ <!--IMAGE-LEFT--> វិធានការរបស់អាល្លឺម៉ង់ ត្រូវបានធ្វើឡើងបន្ទាប់ពីមានការបាតុកម្មទ្រង់ទ្រាយធំប្រឆាំងនុយក្លេអ៊ែរ។ ការតវ៉ានេះ មិនបានកើតមានឡើងនៅបារាំងទេ។ លោក ល្វីស អ៊ីឆាវ៉ារី (Luis Echavarri) ជាអគ្គនាយករបស់ទីភ្នាក់ងារថាមពលនុយក្លេអ៊ែរ (Nuclear Energy Agency) ដែលមានមូលដ្ឋាននៅទីក្រុងប៉ារីស ដែលជាផ្នែកមួយនៃអង្គការសម្រាប់កិច្ចសហប្រតិបត្តិការនិងអភិវឌ្ឍន៍ (Organization for Economic Cooperation and Development (OECD))។ «តាមទស្សនៈរបស់ខ្ញុំ ភាពខុសប្លែកគ្នារវាងអាល្លឺម៉ង់និងបារាំងគឺជុំវិញប្រតិកម្មរបស់សង្គមទៅលើបញ្ហានុយក្លេអ៊ែរ។ ខ្ញុំគិតថា យើងត្រូវតែពិចារណាថា ស្ថានភាពសង្គមស្តីពីថាមពលនុយក្លេអ៊ែរនៅអាល្លឺម៉ង់ ពុំមានភាពល្អប្រសើរទេ ក្នុងរយៈពេលប៉ុន្មានពី២០ទៅ៣០ឆ្នាំកន្លងមក។ តែទោះជាយ៉ាងណា នៅប្រទេសបារាំង មានទស្សនៈមួយនៅក្នុងសង្គមដែលថាមពលនុយក្លេអ៊ែរ គឺជាប្រយោជន៍ដ៏សំខាន់បំផុតសម្រាប់ប្រទេសបារាំង។» ភាពខុសគ្នាទាំងនោះ ត្រូវបានឆ្លុះបញ្ចាំងនៅកន្លែងដទៃទៀត នៅទ្វីបអឺរ៉ុប។ «មានប្រទេសមួយចំនួនតូច ដូចជាអាល្លឺម៉ង់(Germany) អ៊ីតាលី(Italy) បែលហ្ស៊ិក(Belgium) និងស៊្វីស(Switzerland)ជាដើម ដែលកំពុងនិយាយយ៉ាងច្បាស់ថា ពួកគេបាននឹងបិទរោងចក្រអគ្គិសនីនុយក្លេអ៊ែររបស់គេនៅថ្ងៃណាមួយ ហើយពួកគេនឹងមិនកសាងបន្ថែមទៀតទេ។ ប៉ុន្តែ ក្នុងពេលដំណាលគ្នានេះ មានប្រទេសជាច្រើនទៀត ដែលបានថ្លែងថា ពួកគេនឹងបន្តដំណើរការរោងចក្រថាមពលនុយក្លេអ៊ែរដែលមានស្រាប់ នាពេលបច្ចុប្បន្ន ហើយលើសពីនេះទៀត ពួកគេនឹងកសាងបន្ថែមទៀត។» ប៉ុន្តែសូម្បីតែនៅប្រទេសបារាំង ព្រឹត្តិការណ៍នៅហ៊្វូគូស៊ីម៉ា បានបង្កឲ្យមានការព្រួយបារម្ភស្តីពីថាមពលនុយក្លេអ៊ែរ។ ការព្រួយបារម្ភទាំងនោះត្រូវបានលើកឡើងនៅក្នុងសាលប្រជុំរបស់សាលាក្រុង ជាពិសេស ខណៈដែល ឥឡូវនេះ ប្រទេសនេះ កំពុងត្រៀមរៀបចំការបោះឆ្នោតជ្រើសរើសប្រធានាធិបតី នៅខែមេសាខាងមុខនេះ។ លោកហ្រ្វង់ស្វ័រ ហូឡេន (Francois Hollande) បេក្ខជនមកពីគណបក្សសង្គមនិយម ដែលជាគូប្រជែងចម្បងរបស់លោក សាកូហ្ស៊ី (Sarkozy) ចង់កាត់បន្ថយការពឹងផ្អែករបស់បារាំង ទៅលើថាមពលនុយក្លេអ៊ែរ ប៉ុន្តែមិនបញ្ចប់ការពឹងផ្អែកទាំងស្រុងនោះទេ។ ប៉ុន្តែ លោក យ៉ាននីក រ៉ូស្សេឡេត (Yannick Rousselet) ដែលបានលើកបញ្ហានុយក្លេអ៊ែរនៅឯអង្គការហ្គ្រីនភីស (Greenpeace) របស់បារាំង ជឿថា នេះជាការចាប់ផ្តើមឆ្ពោះទៅរកការបញ្ចប់។ «ខ្ញុំគិតថា មានការផ្លាស់ប្តូរទស្សនៈជាច្រើន។ ពួកគេមិនគាំទ្រការបញ្ឈប់នៅថ្ងៃនេះទេ។ ប៉ុន្តែ ខ្ញុំគិតថា វាច្បាស់ណាស់ថា ឥឡូវនេះប្រជាពលរដ្ឋភាគច្រើនយល់ឃើញថា យើងត្រូវតែកាត់បន្ថយបន្តិចម្តងៗ។» លោក ប៊ឺដត្រេនដ៏ បែរ៍ (Bertrand Barre) ទីប្រឹក្សារបស់ក្រុមហ៊ុននុយក្លេអ៊ែរ អារីវ៉ា (Areva) របស់បារាំង មិនយល់ស្របទេ។ «ខ្ញុំគិតថា ប្រជាពលរដ្ឋនៅប្រទេសបារាំង មានសុវត្ថិភាព។ ប៉ុន្តែជាការពិតណាស់ថា បញ្ហានុយក្លេអ៊ែរ ក៏ដូចជាសកម្មភាពផ្សេងទៀតដែរ តែងតែមានហានិភ័យមួយដែលបន្សល់ទុកជានិច្ច។ ពាក្យថាគ្មានហានិភ័យសោះតែម្តង គឺគ្មានទេ។» លោក បែរ៍ និយាយថា ការសាកល្បងថ្មីៗរបស់សហភាពអឺរ៉ុប នឹងធ្វើឱ្យម៉ាស៊ីនរ៉េអាទ័រ កាន់តែមានលទ្ធភាពប្រសើរជាមុនក្នុងការទប់ទល់នឹងគ្រោះមហន្តរាយ។ នេះជាការលើកឡើងមួយ ដែលត្រូវបានច្រានចោលដោយអ្នករិះគន់ថាមពលនុយក្លេអ៊ែរ មានដូចជាលោក រ៉ូស្សេឡេត ជាដើម។ ភាគីទាំងពីរ ក៏ខ្វែងគំនិតគ្នាផងដែរ អំពីតម្លៃនៃការផលិតថាមពលនុយក្លេអ៊ែរ និងលទ្ធភាពនៃការពឹងផ្អែកទាំងស្រុងទៅលើថាមពលមិនចេះរីងស្ងួត ដូចជាថាមពលព្រះអាទិត្យនិងខ្យល់ជាដើម។ អ្វីដែលច្បាស់លាស់នោះគឺថា រយៈពេលមួយឆ្នាំបន្ទាប់ពីព្រឹត្តិការណ៍នៅហ៊្វូគូស៊ីម៉ា ថាមពលនុយក្លេអ៊ែរ នៅតែជាធាតុដ៏សំខាន់មួយនៃការថ្លឹងថ្លែងមើលពីថាមពលរបស់អឺរ៉ុប៕ ប្រែសម្រួលដោយ ឃួន ធារ៉ា This posting includes an audio/video/photo media file: Download Now |
| ប៊ីល គ្លីនតុនឲ្យដំបូន្មានដល់ប្រធានាធិបតីអូបាម៉ា Posted: 03 Apr 2012 12:10 AM PDT លោកអតីតប្រធានាធិបតីអាមេរិក ប៊ីល គ្លីនតុន បានផ្តល់ការណែនាំខ្លះសម្រាប់ជាប់ឆ្នោតជាថ្មីជូនលោកប្រធានាធិបតីបារ៉ាក់អូបាម៉ា ដោយលោកបានមានប្រសាសន៍ថាលោកអូបាម៉ាត្រូវការនិយាយឱ្យក្រុមអ្នកបោះឆ្នោតជឿថារដ្ឋបាលរបស់លោកបានប្រឈមមុខនឹងវិបត្តិសេដ្ឋកិច្ចអាមេរិកដែលបានរលំទៅហើយ។ ភូមា៖ កាលពីថ្ងៃច័ន្ទ លោកស្រីអោងសានស៊ូជី អ្នកជើងឯកខាងលទ្ធិប្រជាធិបតេយ្យបានប្រកាសអំពី«សម័យថ្មី»មួយសម្រាប់ភូមា ក្រោយពេលដែលលោកស្រីនិងពួកសមាជិកឯទៀតៗនៃគណបក្សលោកស្រីបានឈ្នះឆ្នោតយ៉ាងច្រើននៅក្នុងការបោះឆ្នោតសភាកាលពីថ្ងៃអាទិត្យ។ ស៊ីរី៖ លោកខូហ្វី អាណាន់ ប្រេសីតសន្តិភាពអន្តរជាតិបានមានប្រសាសន៍ថាប្រធានាធិបតីស៊ីរី បាសារ អាល់ អាសាដ បានយល់ព្រមចាប់ផ្តើមដកកងកម្លាំងពីកន្លែងតវ៉ារបស់ក្រុមប្រឆាំង ហើយនិងបញ្ចប់ការដកថយមិនឱ្យហួសពីថ្ងៃទី ១០ មេសាទេ។ ប៉ាគីស្ថាន ៖ តុលាការមួយនៅប៉ាគីស្ថានបានកាត់ទោសស្ត្រីមេម៉ាយបីនាក់របស់ខ្មោចអូសាម៉ា ប៊ីនឡាដិន Osama bin Laden ដែលជាមេដឹកនាំពួក អាល់ កៃដា និងកូនស្រីពីរនាក់របស់គាត់ពីបទរស់នៅក្នុងប្រទេសនេះដោយខុសច្បាប់ ហើយបានកាត់ទោសឱ្យពួកគេជាប់ឃុំឃាំង៤៥ថ្ងៃ។ តុលាការក៏បានបញ្ជាឱ្យបញ្ជូនពួកគេចេញពីប្រទេសផងដែរ។ ម៉ាលី៖ ពួកប្រទេសក្នុងប៉ែកខាងលិចនៃទ្វីបអាហ្វ្រិកបានដាក់កំហិតដាក់ទណ្ឌកម្មលើ ម៉ាលី ដែលនៅទីនោះពួកមេដឹកនាំរដ្ឋប្រហារបានសន្យាថានឹងធ្វើឱ្យមានការគ្រប់គ្រងស៊ីវិលវិញ តែរហូតមកដល់ពេលនេះនៅតែកាន់អំណាចតទៅទៀត។ សហរដ្ឋអាមេរិក៖ លោកប្រធានាធិបតី បារ៉ាក់ អូបាម៉ាបានសុំដល់ស៊ូដង់ខាងត្បូងឱ្យចៀសវៀងការប្រឈមមុខយោធាជាមួយប្រទេសស៊ូដង់នៅជិតខាង។ សហរដ្ឋអាមេរិក៖ លោកប្រធានាធិបតីបារ៉ាក់ អូបាម៉ាបានជួបជាមួយលោកនាយករដ្ឋមន្ត្រីកាណាដាលោកស្ទីផេន ហាផឹរ និងលោកប្រធានាធិបតីមិកស៊ីកូ លោកហ្វេលីព កាលដឹរ៉ុន នៅឯសេតវិមានកាលពីថ្ងៃច័ន្ទដើម្បីធ្វើការប្រជុំសន្និសីទកំពូលទ្វីបអាមេរិកខាងជើងដែលផ្តោតកាតរយកចិត្តទុកដាក់លើលើសេដ្ឋកិច្ចនិងសន្តិសុខក្នុងតំបន់។ ប៉ាគីស្ថាន៖ ពួកមន្ត្រីប៉ាគីស្ថានបាននិយាយថាពួកជនសកម្មប្រយុទ្ធរាប់សិបនាក់បានបើកការវាយប្រហារមួយទៅលើកន្លែងឆែកឆេរមួយរបស់ពួកយោធាប្រតិព័ទ្ធនៅប៉ាគីស្ថាន បណ្តាលឱ្យទាហានយ៉ាងតិចណាស់បីនាក់ស្លាប់។ អាហ្វហ្គានីស្ថាន៖ ពួកមន្ត្រីនៅក្នុងភាគខាងជើងអាហ្វហ្គានីស្ថានបាននិយាយថាការផ្ទុះគ្រាប់បែកពីរគ្រាប់បានបណ្តាលឱ្យមនុស្សយ៉ាងតិចណាស់២៣នាក់ត្រូវរបួស ដោយមានរួមបញ្ចូលទាំងបុគ្គលិកសន្តិសុខយ៉ាងហោចណាស់៧នាក់ផងដែរ។ <!--AV--> This posting includes an audio/video/photo media file: Download Now |
| កម្ពុជានិងចិនសន្យារក្សាសន្តិភាពនៅដែនសមុទ្រចិនខាងត្បូង Posted: 02 Apr 2012 05:58 PM PDT ប្រទេសកម្ពុជា និងចិនបានព្រមព្រៀងគ្នានៅថ្ងៃចន្ទនេះថា ក្រុងប៉េកាំង និងបណ្ដាប្រទេសដែលជាសមាជិកសមាគមប្រជាជាតិអាស៊ីអាគ្នេយ៍ ហៅថាអាស៊ាន ត្រូវតែរក្សាតំបន់ជម្លោះនៃសមុទ្រចិនខាងត្បូងឲ្យស្ថិតក្នុងសន្ដិភាព។ កិច្ចព្រមព្រៀងនេះធ្វើឡើងក្នុងសេចក្ដីថ្លែងការណ៍រួមរវាងកម្ពុជា និងចិន នៅចំពេលដែលប្រធានាធិបតីចិន លោក ហ៊ូ ជិនតាវ បញ្ចប់ដំណើរទស្សនកិច្ចរយៈពេលបួនថ្ងៃនៅកម្ពុជានៅថ្ងៃនេះ។ រដ្ឋមន្ដ្រីការបរទេសរបស់វៀតណាម និង ហ្វ៊ីលីពីនបានលើកពីចំណោទនៃជម្លោះនៅសមុទ្រចិនខាងត្បួងនេះ។ សេចក្ដីថ្លែងការណ៍រួមបានសរសេរថា ៖ «ប្រទេសចិន និងបណ្ដាប្រទេសអាស៊ានគួរតែប្រឹងប្រែងដើម្បីធ្វើកិច្ចសហប្រតិបត្តិការជាក់ស្ដែង ការពារសនិ្តភាព និងស្ថិរភាពនៅសមុទ្រចិនខាងត្បួង»។ <!--IMAGE-LEFT--> លោក ហោ ណាំហុង ដែលជារដ្ឋមន្ដ្រីការបរទេសកម្ពុជា បានថ្លែងប្រាប់អ្នកយកព័ត៌មានក្រោយពីកិច្ចប្រជុំរដ្ឋមន្ដ្រីការបរទេស នៃប្រទេសអាស៊ានទាំងដប់ក្នុងក្រុងភ្នំពេញកាលពីព្រឹកមិញថា ប្រទេសចិនកំពុងមានឆន្ទៈ ក្នុងការជជែករកដំណោះស្រាយជម្លោះនេះជាមួយសមាគមអាស៊ាន។ «ពេលចិនយល់ព្រមថានឹងត្រៀមពិភាក្សាពីបញ្ហាCOC ហើយ។ យើងគួរតែឆ្លៀតឱកាសនេះ ដើម្បីភិភាក្សាជាមួយចិន។ ខ្ញុំនិយាយម្ដងទៀតថា ពេលណាដែលចិនសម្តែងនូវឆន្ទៈ សម្តែងនូវការត្រៀមចូលរួម យើងគួរតែចាប់ផ្ដើមចរចាជាមួយចិន»។ <!--AV--> លោករដ្ឋមន្ដ្រីការបរទេសហ្វ៊ីលីពីន អលប៊ត ហ្វេ ដែល ឬោសារីយ៉ូ (Albert F. Del Rosario) បានថ្លែងប្រាប់អ្នកយកព័ត៌មានថា អាស៊ានត្រូវតាក់តែងក្រុមរួមមួយឲ្យរួចរាល់សិន សឹមទៅជជែកជាមួយប្រទេសចិន។ «យើងកំពុងតស៊ូមតិ ដើម្បីឲ្យមានការតាក់តែងសេចក្ដីព្រាងក្រុមច្បាប់មួយ មុននឹងយើងអង្គុយជជែកជាមួយប្រទេសចិន»។ ចិនគឺជាម្ចាស់ជំនួយដ៏ធំមួយសម្រាប់កម្ពុជា ហើយក៏ជាប្រទេសមួយដែលមានការបណ្ដាក់ទុនវិនិយោគធំជាងគេនៅកម្ពុជា។ ទំហំវិនិយោគរបស់ប្រទេសចិនកាលពីឆ្នាំ ២០១១ បានកើនដល់ជាង១.១០០ លានដុល្លារអាមេរិក។ ហើយបណ្ដូរពាណិជ្ជកម្មនៃប្រទេសទាំងពីរ កាលពីឆ្នាំកន្លងទៅ មានទំហំជាង២.៣០០ លានដុល្លារ ក្នុងនោះកម្ពុជានាំចេញទៅកាន់ប្រទេសចិនមានទំហំត្រឹមតែ ១៨៤ លានដុល្លារ តែប៉ុណ្ណោះ។ ក្នុងសេចក្ដីថ្លែងការណ៍រួមកម្ពុជាចិនដែលមានប្រាំបួនចំណុចនៅថ្ងៃនេះ ប្រទេសទាំងពីរបានប្ដេជ្ញាជំរុញបណ្ដូរពាណិជ្ជកម្មរវាងគ្នាឲ្យកើនដល់៥.០០០ លានដុល្លារនៅឆ្នាំ ២០១៧។ កិច្ចព្រមព្រៀងចំនួនដប់ត្រូវបានចុះហត្ថលេខាក្នុងអំឡុងដំណើរទស្សនកិច្ចរបស់លោក ហ៊ូ ជីនតាវ នេះដែលជាកិច្ចព្រមព្រៀងសេដ្ឋកិច្ច និងកិច្ចព្រមព្រៀងពាក់ពន្ធ័នឹងកិច្ចសហប្រតិបត្តិការផ្នែកបច្ចេកវិទ្យា។ ចិនបានផ្ដល់ជំនួយជិត៥០០លានយុន ឬ ស្មើនឹងជាង៧៥លានដុល្លារអាមេរិកដល់កម្ពុជា៕ This posting includes an audio/video/photo media file: Download Now |
| វៀតណាមនិងហ្វ៊ីលីពីនលើកឡើងជម្លោះដែនសមុទ្រចិនក្នុងប្រជុំកំពូលអាស៊ាន Posted: 02 Apr 2012 05:08 PM PDT សមាជិកសមាគមប្រជាជាតិអាស៊ីអាគ្នេយ៍ដែលត្រូវបានហៅកាត់ថា អាស៊ាននៅថ្ងៃចន្ទនេះ មានភាពតានតឹងក្នុងការពិភាក្សាអំពីជម្លោះដែនសមុទ្រចិនខាងត្បូងក្នុងខណៈពេលដែលប្រទេសជាសមាជិកអាស៊ានពីរគឺហ្វីលីពីន និងវៀតណាមដែលមានដែនសមុទ្រជាប់ជាមួយនឹងចិនបានលើកយកបញ្ហានេះនៅក្នុងកិច្ចប្រជុំរដ្ឋមន្ត្រីការបរទេសអាស៊ាន។ កិច្ចប្រជុំរដ្ឋមន្ត្រីការបរទេសអាស៊ានទាំងដប់គឺធ្វើឡើងដើម្បីឆ្ពោះទៅរកកិច្ចប្រជុំកំពូលអាស៊ាន ដែលគ្រោងនឹងចាប់ផ្តើមនៅថ្ងៃអង្គារ៍នេះ។ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា បានថ្លែងប្រាប់នៅក្នុងសន្និសីទព័ត៌មានបន្ទាប់ពីបញ្ចប់កិច្ចប្រជុំរដ្ឋមន្ត្រីការបរទេសអាស៊ាន នៅថ្ងៃចន្ទនេះថា ការពិភាក្សាលើសមុទ្រចិនខាងត្បូងនៅមិនទាន់ចប់សព្វគ្រប់ទេ ហើយរដ្ឋមន្ត្រីការបរទេសអាស៊ានទាំងអស់នឹងបន្តការពិភាក្សាគ្នាតទៅទៀត។ លោក ហោ ណាំហុង មិនបានបញ្ជាក់ថា ភាពតានតឹងនៃជម្លោះដែនសមុទ្រចិនខាងត្បូងនៅត្រង់ណាទេ។ ក៏ប៉ុន្តែលោកបានបញ្ជាក់ថា ប្រទេសដែលជាសមាជិកអាស៊ាន បានឈានទៅរកកិច្ចព្រមព្រៀងមួយដែលបង្កើតក្រមនីតិប្រតិបត្តិនៃដែនសមុទ្រចិនខាងត្បូង ហើយជំហររបស់ប្រទេសអាស៊ាន ចង់រកដំណោះស្រាយដោយសន្តិវិធី និងស្ថេរភាពក្នុងតំបន់។ «ខ្ញុំសូមថា មិនចាំបាច់ចូលលម្អិត ទាស់គ្នាចំណុចណាទេ។ ទាំងអស់គ្នាឯកភាពលើគោលការណ៍ដោះស្រាយហើយ គឺរក្សាសន្តិភាព និងស្ថិរភាពដែនសមុទ្រចិនខាងត្បូង។ ឯកភាពគ្នាដោះស្រាយបញ្ហាដោយសន្តិវិធី ឯកភាពគ្នា។ ដោះស្រាយបញ្ហាដោយគោលការណ៍ច្បាប់អន្តរជាតិ។ ឯកភាពទាំងអស់គ្នា។ ដោះស្រាយដោយគោលការណ៍អនុសញ្ញាអង្គការសហប្រជាជាតិឆ្នាំ១៩៥២ អំពីដែនសមុទ្រឯកភាពគ្នា។ ឯកភាពគ្នាឈានជាយថាហេតុ ជំហានជាយថាហេតុ ទៅតាក់តែងក្រមប្រណិបត្តិ OCO។ ហើយពេលខ្លះមិនទាន់ឯកភាព យើងក៏មិនទាន់ធ្វើការងារក្នុងស្មារតីសម្បទានទៅវិញទៅមក»។ កម្ពុជាមិនបានដាក់របៀបវារៈនៃជម្លោះដែនសមុទ្រចិនខាងត្បូងនៅក្នុងកិច្ចប្រជុំកំពូលអាស៊ានទេ។ ក៏ប៉ុន្តែមានតែប្រទេសពីរតែប៉ុណ្ណោះគឺហ្វីលីពីន និងវៀតណាមបានលើកយកបញ្ហានេះមកពិភាក្សានៅក្នុងកិច្ចប្រជុំរដ្ឋមន្ត្រីការបរទេសអាស៊ាន។ លោក អលប៊ត រដ្ឋមន្ត្រីក្រសួងការបរទេសហ្វីលីពីនបានចេញសេចក្តីថ្លែងការណ៍ដោយឯកត្តោភាគីមួយថាចង់ឲ្យជម្លោះដែនសមុទ្រចិនខាងត្បូងត្រូវតែដោះស្រាយដោយសន្តិវិធី និងស្ថិរភាពក្នុងតំបន់។ លោកបានប្រាប់ក្រុមអ្នកយកព័ត៌មានថា ចិនគួរតែត្រូវកោះអញ្ជើញឲ្យចូលរួមមកជជែកពិភាក្សាជាបឋមស្តីពីជម្លោះដែនសមុទ្រចិនខាងត្បូងនេះ។ លោក ម៉ាទី ណាតាឡេហ្កាវ៉ា (Marty Natalegawa) រដ្ឋមន្ត្រីការបរទេសឥណ្ឌូនេស៊ី បានថ្លែងប្រាប់ក្រុមអ្នកយកព័ត៌មានថា អាស៊ានកំពុងតែធ្វើការងារយ៉ាងសកម្មក្មុងការកំណត់ធាតុនីមួយៗនៃក្របខណ្ឌនីតិប្រតិបត្តិ។ លោកបានមានប្រសាសន៍ថា ចិនសព្វថ្ងៃបានត្រៀមខ្លួនរួចជាស្រេចនៅក្នុងការចូលរួម នៅក្នុងដំណើរការនេះ ហើយវាគឺជាការសំខាន់ណាស់ក្នុងការយល់ដឹងអំពីទស្សនៈរបស់ប្រទេសចិន។ «គឺជានីតិវិធីដែលមានសក្តានុពលមួយ ដែលថាប្រទេសអាស៊ាន បន្តបញ្ចប់ និងធ្វើឲ្យប្រាកដនូវទស្សនៈដូចគ្នា លើគម្រោងផែនការនេះ និងជាមួយគ្នានេះគឺជាផលចំណេញរបស់យើង ដែលយើងដឹងអំពីទស្សនៈរបស់ប្រទេសចិនទៅលើប្រធានបទនេះ»។ នៅក្នុងដំណើរទស្សនកិច្ចរបស់ប្រធានាធិបតីចិន ហ៊្វូ ជីនតាវ មកកាន់កម្ពុជា ចិននិងកម្ពុជាបានព្រមព្រៀងគ្នាថា បញ្ហាជម្លោះដែនសមុទ្រចិនខាងត្បូងគួរតែដោះស្រាយក្នុងក្របខណ្ឌអាស៊ាន ចិន។ ចិនមិនចង់ឲ្យយកបញ្ហានេះដោះស្រាយក្នុងក្របខណ្ឌលក្ខណៈអន្តរជាតិទេ។ នៅក្នុងពេលដែលមានកិច្ចប្រជុំរដ្ឋមន្រ្តីការបរទេសអាស៊ាន សមាជិកអាស៊ានទាំងអស់ បានអបអរសាទរចំពោះលទ្ធផលនៃការបោះឆ្នោតនៅក្នុងប្រទេសភូមា ដោយបានចាត់ទុកថា នេះគឺជាដំណើរការឆ្ពោះទៅរកលទ្ធិប្រជាធិបតេយ្យរបស់សហភាពមីយ៉ាន់ម៉ា។ លទ្ធផលក្រៅផ្លូវការបង្ហាញឲ្យឃើញថា បេក្ខជនទាំង៤៤រូបរបស់គណបក្សសម្ព័ន្ធជាតិ ដើម្បីលទ្ធិប្រជាធិបតេយ្យរបស់លោកស្រី អ៊ុង សានស៊ូជី បានជាប់ឆ្នោតជាអ្នកតំណាងរាស្ត្រទាំងអស់នៅក្នុងចំណោមអសនៈសភាដែលមាន៤៥អសនៈ៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
