VOA News: ព័ត៌មាន: “មេដឹកនាំប្រជាធិបតេយ្យភូមាសង្ឃឹមថាជ័យជម្នះការបោះឆ្នោតនឹងនាំមកនូវសករាជថ្មី” plus 2 more |
- មេដឹកនាំប្រជាធិបតេយ្យភូមាសង្ឃឹមថាជ័យជម្នះការបោះឆ្នោតនឹងនាំមកនូវសករាជថ្មី
- យុទ្ធនាការប្រឆាំងកូនីបង្កើតឲ្យមានបទអត្ថាធិប្បាយនិងការព្រួយបារម្ភយ៉ាងខ្លាំងក្លា
- មន្ត្រីអាស៊ាន និងអឺរ៉ុបចង់ឲ្យកិច្ចចរចាពាណិជ្ចកម្មសេរីកាន់តែប្រសើរ
| មេដឹកនាំប្រជាធិបតេយ្យភូមាសង្ឃឹមថាជ័យជម្នះការបោះឆ្នោតនឹងនាំមកនូវសករាជថ្មី Posted: 02 Apr 2012 09:03 AM PDT ជ័យលាភីលទ្ធិប្រជាធិបតេយ្យលោកស្រី អ៊ុងសាន ស៊ូជី Aung San Suu Kyi បានប្រកាស«សករាជថ្មី»មួយសម្រាប់ប្រទេសភូមានៅថ្ងៃច័ន្ទនេះ បន្ទាប់ពីគណបក្សរបស់លោកស្រីបានទទួលជ័យជម្នះយ៉ាងលើសលប់នៅក្នុងការបោះឆ្នោតសភាពាក់កណ្តាលអាណត្តិកាលពីថ្ងៃអាទិត្យ។ ទោះបីលទ្ធផលផ្លូវការអាចចំណាយពេលរាប់សិបថ្ងៃក៏ដោយ គណបក្សសម្ព័ន្ធជាតិដើម្បីលទ្ធិប្រជាធិបតេយ្យដែលជាគណបក្សប្រឆាំង និយាយថា ខ្លួនឈ្នះបានអាសនៈយ៉ាងហោចណាស់ក៏៤៣នៃអាសនៈសរុប៤៤ដែលខ្លួនបានប្រកួតប្រជែងយក។ អាសនៈនេះរួមទាំងអាសនៈ៤នៅក្នុងរដ្ឋធានីរដ្ឋបាលណៃពិដោ (Naypyitaw) ដែល មានប្រជាពលរដ្ឋស្ទើរតែទាំងអស់ជាបុគ្គលិករបស់រដ្ឋាភិបាលនិងបុគ្គលិកយោធា។លោកស្រី Aung San Suu Kyi បានប្រាប់អ្នកគាំទ្រនៅខាងក្រៅទីស្នាក់ការរបស់គណបក្ស NLD ក្នុងទីក្រុង Rangoon នៅថ្ងៃច័ន្ទនេះថាលោកស្រីសង្ឃឹមថាលទ្ធផលបោះឆ្នោតនឹងបង្ខំឲ្យរដ្ឋាភិបាលយកចិត្តទុកដាក់ចំពោះឆន្ទៈរបស់ប្រជាពលរដ្ឋសាមញ្ញ។ លោកស្រីថ្លែងថា៖ «យើងសង្ឃឹមថា នេះជាការចាប់ផ្តើមនៃសករាជថ្មីមួយដែលនឹងផ្តោតកាន់តែច្រើនឡើងទៅលើតួនាទីរបស់ប្រជាពលរដ្ឋនៅក្នុងកិច្ចការនយោបាយប្រចាំថ្ងៃនៅក្នុងប្រទេស»។ លោកស្រីអង់សានស៊ូជីជាចលករការផ្លាស់ប្តូរនយោបាយនៅភូមា ដំណើរផ្លាស់ប្តូររយៈពេល១៨ខែរបស់លោកស្រី Aung San Suu Kyi មេដឹកនាំនិយមលទ្ធិប្រជាធិបតេយ្យនៃប្រទេសភូមាពីអ្នកទោសនយោបាយទៅកាន់សមាជិកសភា ជាសញ្ញាមួយដែលគេមើលឃើញដ៏ខ្លាំងបំផុតនៃការផ្លាស់ប្តូរនៅក្នុងមាតុភូមិរបស់លោកស្រីថា រដ្ឋាភិបាលស៊ីវិលមានតែឈ្មោះស្វះស្វែងរកការជួសជុលចំណងទាក់ទងជាមួយប្រទេសលោកខាងលិច។ ជាកូនស្រីរបស់លោក Aung San វីរបុរសទាមទារឯករាជ្យដែលបានត្រូវធ្វើឃាតដោយគូប្រកួតប្រជែងខាងនយោបាយនៅក្នុងឆ្នាំ១៩៤៧ លោកស្រី Aung San Suu Kyi ដែលបានទទួលការសិក្សានៅសាកលវិទ្យាល័យអក់ស្វដ (Oxford) បានហក់ចូលក្នុងនយោបាយប្រទេសភូមានៅឆ្នាំ១៩៨៨ នៅពេលដែលលោកស្រីវិលត្រឡប់មកពីប្រទេសអង់គ្លេសវិញ។ ភ្លាមៗនោះ លោកស្រីបានក្លាយជាឥស្សរៈជនដ៏សំខាន់មួយនៅក្នុងចលនានិយមលទ្ធិប្រជាធិបតេយ្យដែលបានចាប់កំណើតនៅក្នុងប្រទេសនោះ ដោយលោកស្រីបានធ្វើសន្ទរកថាទៅកាន់មនុស្សប្រមាណកន្លះលាននាក់នៅឯការជួបប្រជុំនយោបាយមួយនៅក្នុងទីក្រុង Rangoon នៅពេលដែលពួកយោធាបានចាប់ផ្តើមបង្ក្រាបលើពួកប្រឆាំង។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> រុស្ស៊ី៖ ពួកមន្រ្តីគ្រោះអាសន្នរុស្ស៊ី និយាយថា មានមនុស្សយ៉ាងហោចណាស់ក៏៣១នាក់ដែរ បានស្លាប់នៅពេលដែលយន្តហោះដឹកអ្នកដំណើរមួយគ្រឿងបានធ្លាក់ហើយផ្ទុះមានអណ្តាតភ្លើងភ្លាមៗបន្ទាប់ពីចុះក្នុងតំបន់ផលិតប្រេងស៊ីបេរីនៅថ្ងៃច័ន្ទនេះ។ ម៉ាលី៖ មេដឹកនាំនៃតំបន់អាហ្រ្វិកមានផែនការធ្វើការប្រជុំក្នុងគ្រាអាស័ន្ននៅថ្ងៃច័ន្ទនេះស្តីពីស្ថានភាពនយោបាយក្នុងប្រទេសម៉ាលី ដែលមេដឹកនាំរដ្ឋប្រហារយោធាបានសន្យាធ្វើឲ្យមានច្បាប់ស៊ីវិលឡើងវិញ។ ប៉ាគីស្ថាន៖ ប្រធានាធិបតី Asif Ali Zardari នៃប្រទេសប៉ាគីស្ថាននឹងធ្វើដំណើរទៅកាន់ប្រទេសឥណ្ឌានៅសប្តាហ៍ក្រោយ ហើយលោកនឹងជួបនាយករដ្ឋមន្រ្តី Manmohan Singh នៃប្រទេសឥណ្ឌា។ អាមេរិកខាងជើង៖ លោកប្រធានាធិបតីសហរដ្ឋអាមេរិក បារ៉ាក់ អូបាម៉ា កំពុងរៀបចំសន្និសីទកំពូលជាមួយមេដឹកនាំនៃប្រទេសកាណាដានិងម៉ិកស៊ិកក្នុងរដ្ឋធានី វ៉ាស៊ីនតោន ដែលផ្តោតលើការរីកលូតលាស់សេដ្ឋកិច្ច សន្តិសុខ និងការផ្លាស់ប្តូរអាកាសធាតុ។ កូរ៉េខាងជើង៖ រូបភាពភាពថ្មីនៃទីកន្លែងបង្ហោះរ៉ុកកែតកូរ៉េខាងជើង ថតពីតារាវិទ្យាសាស្រ្ដសិប្បនិមិ្មតបង្ហាញឲ្យដឹងអំពីការរៀបចំដ៏មមាញឹកនៅលើទីកន្លែងបាញ់បង្ហោះយានអវកាសមួយ ដែលរដ្ឋាភិបាលទីក្រុងវ៉ាស៊ីនតោន យល់ថាជាលេសសម្រាប់លាក់បាំងការធ្វើតេស្តបាញ់បង្ហោះកំាជ្រួចមីស៊ីលរង្វង់ឆ្ងាយ។ ប៉ាគីស្ថាន៖ តុលាការប៉ាគីស្ថាន បានកាត់ទោសស្រ្ដីមេម៉ាយ បីនាក់ ជាអតីតប្រពន្ធ មេដឹកនាំអាលកៃដា អូសាមា បិន ឡាឌិន (Osama Bin Laden) និងកូនស្រីពីរនាក់ តាមបទចូលមករស់នៅក្នុងប្រទេសប៉ាគីស្ថានដោយខុសច្បាប់ ហើយបានដាក់ឲ្យជាប់ឃុំ ៤៥ថ្ងៃ។ តុលាការនោះក៏បញ្ជាឲ្យពួកគេចាកចេញពីប្រទេសប៉ាគីស្ថាន។ This posting includes an audio/video/photo media file: Download Now |
| យុទ្ធនាការប្រឆាំងកូនីបង្កើតឲ្យមានបទអត្ថាធិប្បាយនិងការព្រួយបារម្ភយ៉ាងខ្លាំងក្លា Posted: 02 Apr 2012 08:15 AM PDT ខណៈពេលដែលយុទ្ធនាការលើកកម្ពស់ការយល់ដឹងស្តីពីប្រព័ន្ធផ្សព្វផ្សាយសង្គម ដែលបង្កើតឡើងដោយសហរដ្ឋអាមេរិក ប្រឆាំងនឹងមេដឹកនាំចលនាឧទ្ទាមអ៊ុយហ្គាន់ដា(Uganda)មួយរូប ដែលត្រូវបានតាមចាប់ខ្លួន ទទួលបានជោគជ័យយ៉ាងធំធេង ទាក់ទងទៅនឹងការទាញចំណាប់អារម្មណ៍ យុទ្ធនាការនេះ ក៏បានបង្កើតឲ្យមានការធ្វើអត្ថាធិប្បាយយ៉ាងខ្លាំងក្លាដែរ ដែលការអត្ថាធិប្បាយមួយចំនួន បានក្លាយទៅជាមេរោគ តាមរបៀបផ្សេងៗគ្នា។ បទអត្ថាធិប្បាយពីសំណាក់ក្រុមមន្រ្តីរដ្ឋាភិបាល ក្រុមសកម្មជនសិទ្ធិមនុស្ស ក្រុមអ្នកស្រាវជ្រាវ និងប្រជាពលរដ្ឋសាមញ្ញ កំពុងតែបន្តយ៉ាងឆាប់រហ័ស នៅក្នុងរយៈពេលប៉ុន្មានថ្ងៃនេះបន្ទាប់ពីក្រុម កុមារអាថ៌កំបាំង (Invisible Children) របស់សហរដ្ឋអាមេរិក បានចេញផ្សាយខ្សែវីដេអូរយៈពេល២៩នាទី ដែលត្រូវបានទស្សនារាប់សិបលានដង។ វិធីសាស្រ្តដ៏មានប្រជាប្រិយមួយ ត្រូវបានបង្ហោះការឆ្លើយតបតាមខ្សែវីដេអូ នៅលើប្រព័ន្ធអ៊ីនធឺណិត។ អ្នកសរសេរអត្ថបទតាមអ៊ីនធឺណិតជាតិអ៊ុយហ្គាន់ដា លោកស្រី រ៉ូសេប៊ែល កាហ្គូម៉ាយ (Rosebell Kagumire) បានក្លាយទៅជាជនល្បីល្បាញមួយរូប ដែលផ្អែកលើសមត្ថភាពផ្ទាល់របស់លោកស្រី ដោយបានដាក់បញ្ចូលបទសម្ភាសន៍តាមប្រព័ន្ធផ្សព្វផ្សាយជាច្រើន និងបានទទួលសារអ៊ីម៉ែលរាប់ពាន់ ចាប់តាំងបង្ហោះខ្សែវីដេអូផ្ទាល់របស់លោកស្រី។ ដូចអ្នកដទៃទៀតដែរ លោកស្រី ត្អូញត្អែរស្តីពីថាតើខ្សែវីដេអូដែលត្រូវបានទស្សនាយ៉ាងទូលំទូលាយ មានអ្នកអត្ថាធិប្បាយជនជាតិអាមេរិកាំង ហើយតួអង្គសំខាន់ ដែលជាអ្នកផលិតខ្សែភាពយន្ត លោក ហ្សាសុន រ៉ូសស្សែល (Jason Russell) ដែលពណ៌នាខ្លួនឯងថាជាអ្នកធ្វើយុទ្ធនាការតាមខ្សែវីដេអូដើម្បីយុត្តិធម៌នៅក្នុងទ្វីប អាហ្រ្វិក (Africa) យ៉ាងដូចម្តេច។ លោកស្រី ថ្លែងថា៖ «នេះ ជាវីដេអូមួយទៀត ដែលខ្ញុំឃើញ អ្នកមកពីខាងក្រៅ ព្យាយាមក្លាយជាវីរបុរសមួយរូប ដែលបានជួយសង្រ្គោះកុមារអាហ្រ្វិក។ យើងបានឃើញសាច់រឿងទាំងនេះជាច្រើននៅប្រទេស អេត្យូពី (Ethiopia)។ អ្នកល្បីល្បាញ ចេញមកពីប្រទេស សូម៉ាលី (Somalia)។ វាមិនបានបញ្ចប់បញ្ហាទេ។ ខ្ញុំគិតថា យើងត្រូវការយុទ្ធនាការដ៏ឆ្លាតវៃនិងសមហេតុផល ដែលត្រូវបានរៀបចំឡើងសំដៅធ្វើការផ្លាស់ប្តូរគោលនយោបាយពិតប្រាកដ ជាជាងសាច់រឿងពោរពេញទៅដោយរូបារម្មណ៍ ដែលគ្រាន់តែព្យាយាមធ្វើឱ្យមនុស្សម្នាក់យំសោក ហើយនៅទីបញ្ចប់ យើងបំភ្លេចសាច់រឿងនោះចោលវិញ។» ចំពេលមានការរិះគន់ដែលកំពុងកើនឡើង អ្នកផលិតខ្សែភាពយន្តខ្លួនឯងបានបង្កើតវីដេអូថ្មីមួយ ដោយថ្លែងអំណរគុណដល់អ្នកទស្សនាទាំងអស់ និងឆ្លើយតបទៅនឹងការព្រួយបារម្ភមួយចំនួនដែរ។ លោក រ៉ូសស្សែល ក៏បានការពារវិធី ដែលលោកផលិតខ្សែភាពយន្តនេះផងដែរ។ ខ្សែភាពយន្ត បង្ហាញអំពីរបៀបដែលលោកអប់រំកូនប្រុសរបស់លោក អំពីថាតើកុមារផ្សេងៗទៀត ដូចជាទាហានកុមារដែលដើរត្រាច់ចររបស់កងទ័ព LRA និងជនរងគ្រោះរបស់ពួកគេ កំពុងត្រូវបានរំលោភបំពានយ៉ាងដូចម្តេចខ្លះ។ «យើងគ្រាន់តែចង់អរគុណអ្នកទាំងអស់គ្នា។ អរគុណចំពោះការជឿជាក់លើរឿងរ៉ាវ ដែលយើងដឹងថានឹងផ្លាស់ប្តូរពិភពលោក។ វានឹងផ្លាស់ប្តូរពិភពលោក។ ហើយយើងដឹងថា មានសំណួរជាច្រើននៅត្រង់ចំណុចនោះ។ យើងបានឃើញសំណួរទាំងនោះនៅលើប្រព័ន្ធអ៊ីនធឺណិត។ យើងបានអានសំណួរទាំងនោះ ហើយយើងបានផ្តល់ទំព័រថ្មីមួយនៅលើគេហទំព័ររបស់យើង ដែលបានឆ្លើយសំណួរទាំងនោះជាច្រើន។ ដូច្នេះ សូមចូលទៅកាន់គេហទំព័រនោះ ហើយអានដោយខ្លួនឯង សម្រាប់ចម្លើយយ៉ាងច្បាស់លាស់របស់យើង ពីព្រោះនេះមិនមែនជាចលនារបស់យើងទេ។ វាគឺជាឈ្មោះមួយតែប៉ុណ្ណោះ។ វាជាក្រុមកុមារអាថ៌កំបាំង ប៉ុន្តែវាជាចលនារបស់អ្នក។ អ្នកចាប់ផ្តើមចលនានេះដោយប្រើប្រាស់ថវិការរបស់អ្នក ហើយយើងនៅទីនេះដើម្បីបម្រើអ្នក។» ខ្សែភាពយន្តនេះ មានរូបភាពជាច្រើនស្តីពីសិស្សវិទ្យាល័យនៅសហរដ្ឋអាមេរិក ដែលបានធ្វើការតវ៉ា និងបានក្តាប់ដៃលើកឡើងយ៉ាងស្រុះគ្នា។ គេហទំព័រនេះ ក៏មានបណ្តាញតភ្ជាប់មួយចំនួនសម្រាប់ការបរិច្ចាគ ដែលការរួមចំណែកក្នុងកម្រិតតិចតូច ត្រូវបានលើកទឹកចិត្ត។ គេហទំព័រនេះ ក៏មានលក់អាវយឺត ខ្សែដៃ ក្រដាស់បិទ ឡេវអាវ ផ្ទាំងរូបភាព ដែលវត្ថុទាំងអស់នេះ អាចរកទិញបាននៅក្នុងអ្វីដែលត្រូវបានហៅថា បណ្តាញសម្រាប់ទិញសម្ភារៈ។ ខ្សែភាពយន្តនិងគេហទំព័រ អំពាវនាវដល់ជនជាតិអាមេរិកាំងក្មេងៗ ឲ្យធ្វើការបញ្ចុះបញ្ចូលក្រុមអ្នកច្បាប់របស់ពួកគេ ដូច្នេះ រដ្ឋាភិបាលអាមេរិកាំង អាចបន្តជំរុញការប្រយុទ្ធប្រឆាំងកងទ័ព LRA។ យុទ្ធនាការនេះ ក៏បានសុំឱ្យប្រជាពលរដ្ឋចូលរួមចំណែកនៅក្នុងយុទ្ធនាការតាមប័ណ្ណប្រកាស នៅថ្ងៃទី២០ខែមេសា ដោយបិទផ្ទាំងទាំងនោះឱ្យបានច្រើនតាមតែអាចធ្វើទៅបាន ដើម្បីអំពាវនាវឱ្យមានការចាប់ខ្លួនលោក កូនី នៅឆ្នាំនេះ។ កាលពីឆ្នាំមុន រដ្ឋបាលរបស់លោក អូបាម៉ា បានបញ្ជូនទីប្រឹក្សាយោធាចំនួន១០០នាក់ទៅកាន់ទ្វីបអាហ្រ្វិកកណ្តាល (Central Africa) ដើម្បីជួយកងទ័ព អ៊ុយហ្គាន់ដា និងកងកម្លាំងសន្តិសុខអាហ្រ្វិកផ្សេងទៀត ដើម្បីបោសសម្អាតកងទ័ព LRA។ ក្រុមនេះដែលឥឡូវនេះមានសមាជិករាប់រយនាក់តាមការប៉ាន់ស្មាន បន្តវាយប្រហារ ដែលភាគច្រើននៅក្នុងសាធារណរដ្ឋប្រជាធិបតេយ្យ កុងហ្គោ។ ក្រុមអ្នកជំនាញជឿជាក់ថា ពួកមេដឹកនាំរបស់ក្រុមនេះ ដែលរួមទាំងលោក កូនី ផងប្រសិនបើលោកនៅរស់នៅឡើយ កំពុងលាក់ខ្លួននៅតាមតំបន់ដាច់ស្រយាលនិងពិបាកក្នុងការធ្វើប្រតិបត្តិការនៅក្នុងតំបន់របស់សាធារណរដ្ឋអាហ្រ្វិកកណ្តាល។ ក្រុមនេះ ដែលពីមុនមានមូលដ្ឋាននៅភាគខាងជើង អ៊ុយហ្គាន់ដា បានធ្វើការវាយប្រហារមកលើជនស៊ីវិល ដែលរួមទាំងការបំផ្លាញមុខមាត់របស់ពួកគេ និងការចាប់ពង្រាត់កុមារអស់រយៈពេលជាងពីរទសវត្សរ៍។ អស់រយៈពេលជាច្រើនឆ្នាំមកហើយ វាជាគោលដៅពេញនិយមមួយរបស់ក្រុមសកម្មជនសហរដ្ឋអាមេរិកនិងក្រុមអ្នកតាក់តែងច្បាប់ ដែលចាប់អារម្មណ៍លើទ្វីបអាហ្រ្វិក។ នៅក្នុងឆ្នាំ២០០៥ តុលាការឧក្រិដ្ឋកម្មអន្តរជាតិ បានចេញដីការចាប់ខ្លួន ដើម្បីទុកឱ្យលោក កូនី ប្រឈមមុខនឹងបទចោទប្រកាន់ស្តីពីឧក្រិដ្ឋកម្មប្រឆាំងនឹងមនុស្សជាតិ ប៉ុន្តែ លោកបានគេចចេញពីការចាប់ខ្លួន ដែលរួមទាំងក្នុងអំឡុងពេលនៃកិច្ចប្រឹងប្រែងផ្នែកយោធា ដែលត្រូវបានជ្រោមជ្រែងដោយសហរដ្ឋអាមេរិក កាលពីឆ្នាំ២០០៨កន្លងទៅ។ លោក ម៉ាក ដ្រាមបល៍ (Mark Drumbl) សាស្រ្តាចារ្យច្បាប់នៃសាកលវិទ្យាល័យ វ៉ាស៊ីនតោន និងសាកលវិទ្យាល័យលី (Washington and Lee University) ក៏ព្រួយបារម្ភផងដែរអំពីទំហំនៃគោលដៅរបស់ខ្សែភាពយន្តដែលបានលើកឡើង ដែលគោលដៅនោះ គឺត្រូវធ្វើការចាប់ខ្លួន លោក កូនី។ លោក ដ្រាមបល៍ ជាអ្នកជំនាញផ្នែកទាហានកុមារ ដែលបានសរសេរសៀវភៅមួយ ដែលមានចំណងជើងថា «ការពិចារណាឡើងវិញអំពីទាហានកុមារ នៅក្រោមច្បាប់និងគោលនយោបាយអន្តរជាតិ»។ លោក ដ្រាមបល៍ មានប្រសាសន៍ថា៖ «ចុងបញ្ចប់នៃខ្សែភាពយន្ត គឺការចាប់ខ្លួន លោក ចូស្សែប កូនី។ ទោះជាយ៉ាងនេះក្តី ការចាប់ខ្លួន លោក ចូស្សែប កូនី និងការឃុំខ្លួនរូបលោក ដែលយើងអាចនិយាយបានថា ការចោទប្រកាន់រូបលោកនិងការផ្តន្ទាទោស ដោយតុលាការឧក្រិដ្ឋកម្មអន្តរជាតិ មិនមែនជាឱសថព្យាបាលរោគគ្រប់យ៉ាងនោះទេ។ វាមិនចាំបាច់បញ្ឈប់សកម្មភាពរបស់កងទ័ព LRA ទេ។ ហើយ វាក៏មិនចាំបាច់ផ្តល់យុត្តិធម៌ដល់ជនរងគ្រោះជាច្រើនដែរ។ ច្បាប់ព្រហ្មទណ្ឌ គ្រាន់តែជាចំណែកតូចមួយនៃការសន្ទនាស្តីពីយុត្តិធម៌ទាំងមូល។ ហើយ នៅទីបញ្ចប់ យើងមិនអាចជំនួសគោលការណ៍យុត្តិធម៌ដ៏ឧត្តុង្គឧត្តមរបស់លោកខាងលិច សម្រាប់អ្វីដែលសហគមន៍មូលដ្ឋានជាច្រើនប្រហែលជាចង់បានបំផុតនោះ គឺសន្តិភាព ស្ថិរភាព ការផ្សះផ្សា និងការបោះជំហានឆ្ពោះទៅមុខ ហើយខ្ញុំគិតថា យើងត្រូវតែប្រុងប្រយ័ត្នបំផុត។» ការរិះគន់ជាទូទៅផ្សេងៗទៀតទៅលើខ្សែភាពយន្តនេះ គឺថាការផ្តោតអារម្មណ៍លើការចាប់ខ្លួន លោក កូនី ប្រហែលជាធ្វើឱ្យស្ថានភាពមានលក្ខណៈយោធាកាន់តែខ្លាំងឡើងថែមទៀត ដោយមានជំនួយបន្ថែមដល់កងកម្លាំងសន្តិសុខ ដែលត្រូវបានស្គាល់ចំពោះការប្រព្រឹត្តអំពើរំលោភបំពាន ខណៈដែលការផ្តោតអារម្មណ៍ងាកចេញពីអាទិភាពផ្សេងៗ មានដូចជាការជំរុញឱ្យមានការអភិវឌ្ឍន៍និងអភិបាលកិច្ចដ៏ប្រសើរជាងមុន នៅតាមតំបន់រងផលប៉ះពាល់ដែលត្រូវបានបំភ្លេចចោល៕ ប្រែសម្រួលដោយ ឌី ខាំបូលី This posting includes an audio/video/photo media file: Download Now |
| មន្ត្រីអាស៊ាន និងអឺរ៉ុបចង់ឲ្យកិច្ចចរចាពាណិជ្ចកម្មសេរីកាន់តែប្រសើរ Posted: 02 Apr 2012 04:22 AM PDT លោក អឹវិន ឡយ (Irwin Loy) រាយការណ៍ពីក្រុងភ្នំពេញសម្រាប់វីអូអេថាលោកការ៉េល ដឹ ហ្គុច Karel De Gucht ស្នងការពាណិជ្ជកម្មនៃសហភាពអឺរ៉ុបបានសុំឱ្យមានចំណងទាក់ទងខាងសេដ្ឋកិច្ចជិតស្និទ្ធជាងមុនរវាងសហភាពអឹរ៉ុបនិង ប្លុកអាស៊ានដែលមានសមាជិក១០ប្រទេស។ នៅក្នុងសន្និសីទមួយនៃពួកមន្ត្រីសហភាពអឺរ៉ុបនិង អាស៊ាន កាលពីថ្ងៃអាទិត្យ លោកដឹ ហ្គុច បានសុំដល់ក្រុមប្រតិភូឱ្យធ្វើឱ្យមាន «ការរីកចំរើនជាក់លាក់» អំពីកិច្ចចរចាដើម្បីឱ្យមានកិច្ចព្រមព្រៀងពាណិជ្ជកម្មសេរីមួយរវាងតំបន់ទាំងពីរនេះ។ លោក ដឹ ហ្គុច និយាយថា «យើងត្រូវការឱ្យមានកិច្ចព្រមព្រៀងពាណិជ្ជកម្មទូលំទូលាយមួយក្នុងសតវត្សរ័ទី២១រវាងតំបន់យើងទាំងពីរ។ កិច្ចព្រមព្រៀងនេះគួរដោះស្រាយរបាំងទាំងឡាយដែលរារាំងការហូរនៃទំនិញ សេវាកម្មនិងការវិនិយោគរវាងតំបន់យើង។ ហើយការណ៍នេះមិនមែនមានន័យត្រឹមតែបំបាត់ពន្ធគយប៉ុណ្ណោះទេ តែត្រូវដោះស្រាយអំពីបទបញ្ញត្តិដែលរាំងស្ទះការដោះដូរទំនិញនិងសេវាកម្ម កែលម្អកិច្ចការពារកម្មសិទ្ធិបញ្ញានិងជម្រុញការចូលទីផ្សារសម្រាប់ការជួយផ្គត់ផ្គង់ទំនិញដល់រដ្ឋាភិបាល ដែលទាំងអស់នេះស្ថិតនៅក្នុងក្របខ័ណ្ឌឥទ្ធិពលច្បាប់។» លោកដឹ ហ្គុច Gucht និយាយថាក្នុងពេលឆាប់ៗនេះសហភាពអឺរ៉ុបនឹងចាប់ផ្តើមធ្វើកិច្ចចរចាអំពីកិច្ចព្រមព្រៀងពាណិជ្ជកម្មទ្វេភាគីជាមួយប្រទេសវៀតណាម។សហភាពអឺរ៉ុបបានចាប់ផ្តើមធ្វើការពិភាក្សារួចហើយជាមួយប្រទេសសិង្ហបុរីនិងម៉ាលេស៊ី។ប៉ុន្តែលោក ដឹ ហ្គុចDe Guchtបាននិយាយថាគោលដៅគឺធ្វើឱ្យមានកិច្ចព្រមព្រៀងពាណិជ្ជកម្មសេរីមួយជាមួយប្លុកអាស៊ាន bloc ASEAN ទាំងមូល។ <!--IMAGE-LEFT--> ភូមា៖ ក្រុមអ្នកគាំទ្រលោកស្រីអោងសានស៊ូជី មេដឹកនាំលទ្ធិប្រជាធិបតេយ្យភូមា ដែលបានចំណាយពេលច្រើនបំផុតក្នុង២ទសវត្សរ៍កន្លងទៅនេះស្ថិតនៅក្នុងការឃុំឃាំងក្នុងផ្ទះតាមបញ្ជារបស់ពួកយោធាបាននិយាយថាលោកស្រីបានឈ្នះឆ្នោតទទួលកៅអីមួយកាលពីថ្ងៃអាទិត្យនៅក្នុងសភាជាន់ទាបភូមា។ គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់ម្ចាស់ជ័យលាភីរង្វាន់ណូបែលរូបនេះបានប្រកាសជ័យជំនះនេះក្នុងរយៈពេលដ៏ខ្លី ក្រោយស្ថានីយ៍បោះឆ្នោតបានបិទទ្វារនៅក្នុងការបោះឆ្នោតនៅភូមាកាលពីយប់ថ្ងៃអាទិត្យ ដោយនិយាយថាលោកស្រីបានឈ្នះឆ្នោតក្នុងតំបន់ កាវមូ ដែលជាតំបន់ដាំស្រូវមួយនៅខាងត្បូងក្រុងរ៉ង់ហ្គូន ដោយយកជ័យជំនះលើបេក្ខជនប្រជែង២នាក់។ ពួកអ្នកឃើញហេតុការណ៍ដោយផ្ទាល់បាននិយាយថាពួកអ្នកគាំទ្រលោកស្រីរាប់រយនាក់បានអបអរសាទរ នៅពេលគេប្រកាសអំពីជ័យជំនះលោកស្រីនៅក្នុងក្រុងរ៉ង់ហ្គូន។ បើជ័យជំនះរបស់លោកស្រីអោងសានស៊ូជីបានត្រូវបញ្ជាក់ថាពិតមែន ជ័យជំនះនេះជាព្រឹត្តិការណ៍ធំមួយនៅក្នុងប្រទេសក្នុងទ្វីបអាស៊ីអាគ្នេយ៍នេះ ដែលបានស្ថិតនៅក្រោមការគ្រប់គ្រងយោធាជិតពាក់កណ្តាលសតវត្សរ៍រហូតដល់រដ្ឋាភិបាលស៊ីវិលថ្មីមួយទ្បើងមកកាន់អំណាចកាលពីឆ្នាំទៅមិញ។ លោកស្រីរដ្ឋមន្ត្រីក្រសួងការបរទេសអាមេរិកហ៊ីឡារី គ្លីនតុន ដែលបានមានប្រសាសន៍ពីក្រុងអ៊ីស្តង់ប៊ុល បានសម្តែងសុទិដ្ឋិនិយមដោយប្រុងប្រយ័ត្ន។ ស៊ីរី៖ ពួកអ្នកចូលរួមក្នុងសន្និសីទនៃ «ពួកមិត្តរបស់ប្រទេសស៊ីរី» កាលពីថ្ងៃអាទិត្យក្នុងក្រុងប្រទេសតួកគីនិយាយថាប្រទេសជាតិមួយចំនួនក្នុងតំបន់ឈូងសមុទ្រនឹងផលប្រាក់រាប់លានដុល្លារដល់ក្រុមប្រឹក្សាជាតិស៊ីរី ដែលជាក្រុមប្រឆាំងធំជាងគេដើម្បីបង់ប្រាក់បៀវត្សឱ្យដល់ពួកឧទ្ទាមដែលបានខិតខំព្យាយាមទម្លាក់ប្រធានាធិបតីស៊ីរី Bashar al-Assad ពីតំណែង។ ស៊ូដង់ខាងត្បូង៖ បានចោទប្រកាន់ស៊ូដង់ថាបានធ្វើសង្គ្រាម ហើយបានធ្វើឱ្យខកខានដល់កិច្ចចរចាសន្តិភាពរបស់សហភាពអាហ្វ្រិកដែលមានគោលដៅទប់មិនឱ្យមានកំណើនការប៉ះទង្គិចគ្នាតាមព្រំដែន។ រុស្ស៊ី៖ ពួកប៉ូលីសរុស្ស៊ីបាននិយាយថាពួកគេបានចាប់ខ្លួនពួកអ្នកគាំទ្រក្រុមប្រឆាំង៥៥នាក់នៅជិតទីលានក្រហមនៃក្រុងម៉ូស្គូដើម្បីបញ្ចៀសមិនឱ្យមានការធ្វើការប្រជុំមហាជនប្រឆាំងនឹងរដ្ឋាភិបាលដែលគ្មានការអនុញ្ញាតនៅទីនោះ។ ម៉ាលី៖ ព្រឹត្តិការណ៍ក្នុងប្រទេសម៉ាលីបានប្រែប្រួលយ៉ាងឆាប់រហ័សនៅពេលដែលពួកយោធាបាននិយាយថាពួកគេបានធ្វើឱ្យមានរដ្ឋធម្មនុញ្ញទ្បើងវិញ ហើយពួកឧទ្ទាមទួរេក បានបញ្ចប់ការវាយដណ្តើមយកក្រុងធំៗក្នុងភាគខាងជើងប្រទេស។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
