VOA News: ព័ត៌មាន: “តុលាការខ្មែរក្រហមប្រឈមមុខនឹងការបាត់បង់ការគាំទ្រពីភាគីកម្ពុជា” plus 3 more |
- តុលាការខ្មែរក្រហមប្រឈមមុខនឹងការបាត់បង់ការគាំទ្រពីភាគីកម្ពុជា
- អេស្ប៉ាញក៏ត្រូវការជំនួយសង្រ្គោះវិបត្តិហិរញ្ញវត្ថុ
- ប្រមុខដឹកនាំអាស៊ានជំរុញដំណោះស្រាយវិបត្តិអាវុធនុយក្លេអ៊ែរនៅឧបទ្វីបកូរ៉េ
- ហ៊ុន សែន៖បញ្ហារបៀបវារៈសមុទ្រចិនខាងត្បូងគ្មានឥទ្ធិពលពីចិនទេ
| តុលាការខ្មែរក្រហមប្រឈមមុខនឹងការបាត់បង់ការគាំទ្រពីភាគីកម្ពុជា Posted: 05 Apr 2012 07:27 AM PDT ក្រុមអ្នកសង្កេតការណ៍ដែលតាមដានមើលតុលាការឧក្រិដ្ឋកម្មខ្មែរក្រហមដែលកំពុងមានរឿងចម្រូងចម្រាសនិយាយថា ជម្លោះជាមួយនឹងរដ្ឋាភិបាលកម្ពុជាដែលកំពុងតែកើនឡើងទំនងជានឹងធ្វើឱ្យមិនមានការចោទប្រកាន់បន្ថែមទៀតដល់ជនសង្ស័យដែលនៅសេសសល់ទេ។ តុលាការដែលគាំទ្រដោយអង្គការសហប្រជាជាតិបានកាត់ទោសអតីតមេខ្មែរក្រហមម្នាក់រួចហើយឱ្យជាប់ពន្ធនាគារមួយជីវិត ហើយកំពុងដំណើរការកាត់ទោសសំណុំរឿងទីពីរប្រឆាំងនឹងមេដឹកនាំខ្មែរក្រហមកំពូលបីនាក់ដែលកំពុងរស់រានមានជីវិតនៅឡើយ។ ព័ត៌មានអន្តរជាតិសំខាន់ៗដទៃទៀត៖ <!--IMAGE-RIGHT--> ភូមា-អាមេរិក៖ សហរដ្ឋអាមេរិកកំពុងតែបន្ធូរបន្ថយទណ្ឌកម្មខ្លះដែលមានរយៈពេលយូរមកហើយលើប្រទេសភូមា ដោយក្តីសង្ឃឹមថានឹងអាចជួយលើកទឹកចិត្តឱ្យមានការកែទម្រង់បន្ថែមទៀត ក្រោយពីមានការបោះឆ្នោតដ៏ធំកាលពីថ្ងៃអាទិត្យកន្លងមកនេះនៅក្នុងប្រទេសអាស៊ីអាគ្នេយ៍មួយនេះ។ លោកស្រីរដ្ឋមន្ត្រីការបរទេសគ្លីនតុន និយាយកាលពីថ្ងៃពុធថា រដ្ឋបាលទីក្រុងវ៉ាស៊ីនតោននឹងតែងតាំងឯកអគ្គរដ្ឋទូតមួយរូបប្រចាំប្រទេសភូមា។ សហរដ្ឋអាមេរិកក៏នឹងបង្កើតទីភ្នាក់ងារអភិវឌ្ឍន៍អន្តរជាតិរបស់សហរដ្ឋអាមេរិក (USAID) ប្រចាំក្នុងប្រទេសនេះផងដែរដើម្បីគាំទ្រកិច្ចខិតខំប្រឹងប្រែងរបស់កម្មវិធីអភិវឌ្ឍន៍អង្គការសហប្រជាជាតិ (UNDP)។ ស៊ីរី៖ កងកម្លាំងការពារសន្តិភាពមួយក្រុមរបស់អង្គការសហប្រជាជាតិកំពុងតែធ្វើដំណើរទៅប្រទេសស៊ីរីដើម្បីពិភាក្សាអំពីលទ្ធភាពនៃការបង្កើតបេសកកម្មមួយត្រួតពិនិត្យមើលបទឈប់បាញ់គ្នា ក្នុងពេលជាមួយគ្នានេះដែរ ក្រុមសកម្មជនសិទ្ធិមនុស្សនិយាយថា កងទ័ពរបស់រដ្ឋាភិបាលបានប្រយុទ្ធគ្នាជាមួយពួកអ្នកបះបោរនៅក្នុងទីក្រុងជាច្រើននៅទូទាំងប្រទេស។ ស.រ.អា/កូរ៉េខាងជើង៖ អតីតប្រេសិតសហរដ្ឋអាមេរិកមួយរូបសម្រាប់ប្រទេសកូរ៉េខាងជើងនិយាយថា រដ្ឋបាលលោកអូបាម៉ាត្រូវតែបន្តទំនាក់ទំនងជាមួយរដ្ឋាភិបាលក្រុងព្យុងយ៉ាង បើទោះបីជាប្រទេសនេះនៅតែធ្វើការបាញ់បង្ហោះគ្រាប់រ៉ុក្កែតនៅខែនេះក៏ដោយ។ បាគីស្ថាន៖ អ្នកដាក់គ្រាប់បែកអត្តឃាតម្នាក់និងក្រុមខ្មាន់កាំភ្លើងមួយក្រុមបានបើកការវាយប្រហារកាលពីថ្ងៃព្រហស្បតិ៍នេះសំដៅលើក្រុមប៉ូលីសក្នុងទីក្រុងដ៏ធំជាងគេមួយរបស់ប្រទេសបាគីស្ថាន។ ប៉ូលិសនិយាយថា មានមនុស្សបីនាក់បានស្លាប់និងមនុស្ស១៣នាក់ទៀតរងរបួសនៅពេលដែលអ្នកដាក់គ្រាប់បែកអត្តឃាតម្នាក់បានបំផ្ទុះខ្លួនឯងនៅជិតរថយន្តដឹកមេប៉ូលិសស្រុក។ ចិន៖ ក្រុមលួចវាយប្រហារតាមប្រព័ន្ធអ៊ីនធឺណិតកម្រិតអន្តរជាតិដែលមានឈ្មោះហៅថា «ក្រុមអនាមិក» (Anonymous) និយាយថា ក្រុមខ្លួនបានវាយប្រហារគេហទំព័ររាប់រយរបស់ប្រទេសចិនដោយរួមទាំងគេហទំព័ររដ្ឋាភិបាលចិនជាច្រើនផងដែរដើម្បីជាការតវ៉ានឹងគោលនយោបាយរឹតត្បិតតឹងរ៉ឹងរបស់ប្រទេសចិនលើការប្រើប្រាស់អ៊ីនធឺណិត។ ចិន៖ ប្រទេសចិននិយាយថា ខ្លួននឹងអនុញ្ញាតឱ្យទេសចរទៅទស្សនាប្រជុំកោះនៅក្នុងសមុទ្រចិនខាងត្បូង។ នេះជាចំណាត់ការមួយដែលទំនងជានឹងធ្វើឱ្យមានការតានតឹងថែមទៀតនៅលើតំបន់ដែនសមុទ្រដ៏ធំល្វឹងល្វើយនេះ។ សេណេហ្គាល់៖ ប្រធានាធិបតីទើបនឹងជាប់ឆ្នោតថ្មីរបស់ប្រទេសសេណេហ្គាល់ លោក ម៉ាកឃី ស៉ល (Macky Sall) បានបង្ហាញឈ្មោះគណៈរដ្ឋមន្រ្តីដំបូងរបស់លោកតែក្នុងរយៈពេលពីរថ្ងៃប៉ុណ្ណោះបន្ទាប់ពីបានស្បថចូលកាន់មុខតំណែង។ <!--AV--> This posting includes an audio/video/photo media file: Download Now |
| អេស្ប៉ាញក៏ត្រូវការជំនួយសង្រ្គោះវិបត្តិហិរញ្ញវត្ថុ Posted: 05 Apr 2012 03:30 AM PDT នាយករដ្ឋមន្ដ្រីអេស្ប៉ាញ លោកម៉ារីយ៉ាណូ រ៉ាចូវ ថ្លែងថាវាសនាសេដ្ឋកិច្ចប្រទេសលោកមានការលំបាកខ្លាំង ហើយអេស្ប៉ាញ ប្រហែលត្រូវការជំនួយថវិកាអន្ដរជាតិដើម្បីសង្រ្គោះ។ មេដឹកនាំប្រទេសនោះថ្លែងដូច្នោះប្រាប់កិច្ចប្រជុំ គណបក្សប្រជាជន កាលពីថ្ងៃពុធថា នរណាដែលមិនយល់អំពីភាពធ្ងន់ធ្ងរនៃបញ្ហាសេដ្ឋកិច្ចជាតិជាជនល្ងង់ខ្លៅ។ លោកបានអធិប្បាយថា អេស្ប៉ាញត្រូវការជំនួយថវិកាដើម្បីសង្រ្គោះ ក្រោយពី សហភាពអឺរុបបានជួយសង្រ្គោះប្រទេស ក្រិក អៀឡង់និងព័រទុយហ្កាល់រួចមក។ <!--IMAGE-LEFT--> សហរដ្ឋអាមេរិក៖ យោធាអាមេរិកបានចេញបញ្ជាជាផ្លូវការឲ្យតុលាការយោធាបើកការកាត់ទោសជនសង្ស័យ៥នាក់ ដែលជាអ្នកផ្ដើមគំនិតរៀបចំផែនការវាយប្រហារភេរវកម្មមកលើអាមេរិកនៅថ្ងៃទី១១ កញ្ញា ២០០១ ដោយបានសម្លាប់មនុស្សជាង៣ពាន់នាក់។ មន្ដ្រីនៃក្រសួងការពារជាតិ នៃមន្ទីរប៉ង់តាហ្គោន ថ្លែងនៅថ្ងៃពុធនេះថាខាលីដ សៀក មហាម៉ាត់ និងជន៤នាក់ទៀតជាប់គុកនៅហ្កាន់តាណាម៉ូ បានត្រូវចោទប្រកាន់ពីបទភេរវកម្ម ដោយបានប្លន់យន្ដហោះការឃុបឃិតនិងឃាតកម្ម។ ប៉ាគីស្ថាន៖ រដ្ឋាភិបាលប៉ាគីស្ថានថ្លែងថា ខ្លួនត្រូវការភស្តុតាងជាក់លាក់ដើម្បីចាត់វិធានការប្រឆាំងអ្នកបង្កើតក្រុមសកម្មប្រយុទ្ធ ដែលគេចោទថាជាអ្នកទទួលខុសត្រូវក្នុងការវាយប្រហារមកលើក្រុងម៉ុមបៃនៅឆ្នាំ២០០៨ មួយថ្ងៃក្រោយពីរដ្ឋាភិបាលវ៉ាស៊ីនតោនប្រកាសឲ្យរង្វាន់១០លានដុល្លារដល់អ្នកណាមួយដែលផ្ដល់ព័ត៌មាននាំទៅរកចាប់ខ្លួននិង កាត់ទោសជននោះ។ ស៊ីរី៖ កងកម្លាំងស៊ីរីបានបើកការវាយប្រហារថ្មីមូយក្នុងកិច្ចប្រតិបត្ដិការយោធានៅតំបន់ជាច្រើនកាលពីថ្ងៃពុធ គឺមិនដល់មូយថ្ងៃផងក្រោយពីក្រុមឈានមុខរបស់អង្គការសហប្រជាជាតិត្រូវគេរំពឹងថានឹងមកដល់ដើម្បីបំពេញបេសកម្មរក្សាសន្ដិភាព។ សហរដ្ឋអាមេរិក៖ បេក្ខជនប្រធានាធិបតីនៃគណបក្សសាធារណរដ្ឋ លោក មិត រមនី បានផ្ដោតការយកចិត្ដទុកដាក់មកលើ ការតែងតាំងលោកជាបេក្ខជនប្រធានាធិបតី តាមផ្លូវការដោយគណបក្សរបស់លោកនិងរៀបចំការប្រយុទ្ធតទល់នឹងប្រធានាធិបតីបារ៉ាក់ អូបាមា ក្រោយពីលោកបានយកជ័យជំនះ ផ្ដាច់ព្រាត់ ក្នុងការបោះឆ្នោតបឋមកាលពីថ្ងៃអង្គារ។ សូម៉ាលី៖ ក្រុម សកម្មជនប្រយុទ្ធនៅក្នុងប្រទេស សុម៉ាលី អាល់ សាបាប់Al shabab ថ្លែងថា ខ្លួនជាអ្នកទទួលខុសត្រូវក្នុងការផ្ទុះគ្រាប់បែក នៅកណ្ដាលក្រុង រដ្ឋធានីនៃប្រទេស សុម៉ាលី កាលពីថ្ងៃពុធនេះ ដែលបានសម្លាប់មនុស្ស យ៉ាងតិច ៨ នាក់ រាប់ទាំងនាយកកីឡាបាល់ទាត់អូឡាំពិកច្រើននាក់ផងដែរ។ អាហ្វហ្គានីស្ថាន៖ មន្ដ្រីផ្លូវការនៅអាហ្វហ្គានីស្ថាននិយាយថា ជនអត្ដឃាតបានសម្លាប់មនុស្សយ៉ាងតិច១៣នាក់ ដោយរាប់ទាំងទាហានអាមេរិកាំង៣នាក់ផងដែរនៅតំបន់ភាគខាងជើងប្រទេស។ សហរដ្ឋអាមេរិក៖ ក្រុមព្យាករណ៍អាកាសធាតុអាមេរិកាំងបានទស្សទាយថារដូវខ្យល់ព្យុះកំបុតត្បូងឆ្នាំ២០១២នៅតំបន់អាត្លង់ទិចនឹងមានតិចជាងមធ្យម តែបានព្រមានថាប្រជាជនរស់នៅតាមបណ្ដោយឆ្នេរសមុទ្រត្រូវប្រុងខ្លួន មិនធ្វេសប្រហែស នៅរដូវខ្យល់ព្យុះនេះ ។ ស៊ូដង់ខាងត្បូង៖ និយាយថាខ្លួនបានបាញ់ទម្លាក់យន្ដហោះយោធារបស់ប្រទេស ស៊ូដង់ ខណៈដែលភាពតានតឹងកាន់តែកើនឡើងរវាងប្រទេសទាំងពីរ។ ម៉ាលី៖ បណ្តាគណបក្សនយោបាយធំជាងគេនៅម៉ាលីបានបដិសេធសេចក្ដីអំពាវនាវរបស់មេដឹកនាំរដ្ឋប្រហារយោធាឲ្យបើកសន្និបាតជាតិមូយដើម្បីដោះស្រាយបញ្ហាសន្ដិសុខ និងនយោបាយ។ ភូមា៖ សហរដ្ឋអាមេរិកបានប្រកាសផែនការនៃការធ្វើឲ្យប្រសើរដល់ទំនាក់ទំនងគ្នាជាមួយប្រទេសភូមា ក្រោយពីប្រទេសនោះបានបោះជំហានឆ្ពោះទៅរកលទ្ធិប្រជាធិបតេយ្យ នៅពេលមានការបោះឆ្នោតជ្រើសរើសតំណាងរាស្រ្ដកាលពីថ្ងៃអាទិត្យ។ <!--AV--> This posting includes an audio/video/photo media file: Download Now |
| ប្រមុខដឹកនាំអាស៊ានជំរុញដំណោះស្រាយវិបត្តិអាវុធនុយក្លេអ៊ែរនៅឧបទ្វីបកូរ៉េ Posted: 04 Apr 2012 09:21 PM PDT ប្រមុខដឹកនាំប្រទេសទាំងដប់នៃសមាគមប្រជាជាតិអាស៊ីអាគ្នេយ៍ (អាស៊ាន) នៅថ្ងៃពុធនេះបានជំរុញឲ្យមានការបន្ដដោះស្រាយវិបត្តិអាវុធនុយក្លេអ៊ែរនៅឧបទ្វីបកូរ៉េ ហើយបានអំពាវនាវឲ្យមានការចាប់ផ្ដើមចរចាឡើងវិញអំពីសំណុំរឿងនេះ។ ក្រោយពីកិច្ចប្រជុំកំពូលអាស៊ានរយៈពេលពីរថ្ងៃ ក្នុងទីក្រុងភ្នំពេញបានបិទបញ្ចប់នៅរសៀលនេះ លោកនាយករដ្ឋមន្ដ្រីខ្មែរ ហ៊ុន សែនបានថ្លែងក្នុងសន្និសីទសារព័ត៌មានថា ប្រមុខដឹកនាំប្រទេសអាស៊ានបា្រថ្នាចង់ឲ្យមានការដោះស្រាយដោយសន្ដិវិធីតាមរយៈការចរចាអំពីវិបត្តិនៅឧបទ្វីបកូរ៉េនោះ។ «យើងបានគូសបញ្ជាក់អំពីការបន្តកិច្ចខិតខំប្រឹងប្រែងប្រកបដោយសុឆន្ទៈ និង ដោយសន្តិវិធី ដើម្បីដោះស្រាយអាវុធនុយក្លេអ៊ែ ឧបទ្វីបកូរ៉េ ពិសេសតាមរយៈការអំពាវនាវឲ្យមានការចាប់ផ្តើមឡើងវិញ ដោយឆាប់រហ័សនូវកិច្ចចរចា៦ភាគី»។ កិច្ចចរចាប្រាំមួយភាគីរួមមានសហរដ្ឋអាមេរិក ជប៉ុន រុស្ស៊ី ប្រទេសកូរ៉េខាងត្បូង ប្រទេសចិន និងប្រទេសកូរ៉េខាងជើង។ វិបត្តិអាវុធនុយក្លេអ៊ែរនៅកូរ៉េខាងជើង បានអូសបន្លាយជាច្រើនឆ្នាំមកហើយ ដែលនាំឲ្យមានកង្វល់ជាខ្លាំងដល់សន្ដិសុខក្នុងតំបន់ និងក្នុងសកលលោក។ សហរដ្ឋអាមេរិកបានសម្រេចព្យួរជំនួយម្ហូបអាហារដល់ក្រុងព្យុងយ៉ាង បន្ទាប់ពីប្រទេសកុម្មុយនិស្តមួយនេះបានប្តេជ្ញាបន្ដធ្វើការបាញ់សាកល្បងនូវកាំជ្រួចវង់ប្រតិបត្តិការរយៈចម្ងាយឆ្ងាយចំនួនពីរគ្រាប់ នៅពាក់កណ្ដាលខែមេសានេះ។ លោកAlbert del Rosario រដ្ឋមន្ដ្រីការបរទេសហ្វីលីពីនបានប្រាប់ក្រុមអ្នកកាសែតមុននឹងសន្និសីទកាសែតថា ប្រទេសហ្វីលីពីនចង់ឲ្យកូរ៉េខាងជើងបញ្ឈប់ការបាញ់សាកល្បងគ្រាប់កាំជ្រួចមីស៊ីលនេះ។ «យើងអំពាវនាវឲ្យមានវិធានការជាអន្ដរជាតិដើម្បីបញ្ចុះបញ្ចូលប្រទេសកូរ៉េខាងជើងឲ្យបញ្ឈប់ការបាញ់សាកល្បងកាំជ្រួចរបស់ខ្លួន»។ លោកSurin Pitsuwan អគ្គលេខាធិការអាស៊ាន បានបញ្ជាក់ថា លោករដ្ឋមន្ដ្រីការបរទេសកម្ពុជា ហោ ណាំហុងនឹងធ្វើដំណើរទៅកាន់ប្រទេសកូរ៉េខាងជើងនៅមុនកិច្ចប្រជុំកំពូលនៃរដ្ឋមន្ដ្រីការបរទេសអាស៊ានក្នុងខែកក្កដា ឆ្នាំ២០១២នេះ ហើយលោកក៏នឹងត្រូវទៅកាន់ទីនោះដែរ។ លោកអគ្គលេខាធិការអាស៊ានបញ្ជាក់ថា លោកប្រមុខរដ្ឋាភិបាលខ្មែរបានជំរុញឲ្យប្រទេសកម្ពុជានិងថៃដើរតួសំខាន់ក្នុងការនាំក្រុងព្យុងយ៉ាងចូលក្នុងស្មារតីនៃវេទិកាតំបន់របស់សមាគមអាស៊ានឆ្នាំ២០០០។ វេទិកានេះផ្តោតលើការចរចារកដំណោះស្រាយនយោបាយ សន្ដិសុខ និងកិច្ចសហប្រតិបត្តិការនៃបណ្ដាប្រទេសក្នុងតំបន់អាស៊ីប៉ាស៊ីហ្វិក។ «លោកនាយករដ្ឋមន្ដ្រី ហ៊ុន សែនបាននិយាយយោងដល់ប្រទេសកម្ពុជា និងប្រទេសថៃ ដោយសុំឲ្យធ្វើការជាមួយគ្នាដើម្បីនាំប្រទេសកូរ៉េខាងជើង ចូលរួមចំណែកក្នុងស្មារតីនៃវេទិកាប្រចាំតំបន់របស់សមាគមអាស៊ានឆ្នាំ ២០០០ ហើយប្រទេសកម្ពុជានឹងជំរុញកិច្ចខិតខំប្រឹងប្រែងរបស់ខ្លួននិងដើម្បីឲ្យប្រាកដថា ក្នុងពេលនេះយើងអាចរួមចំណែកបានខ្លះក្នុងដំណោះស្រាយវិបត្តិនៅឧបទ្វីបកូរ៉េ»។ សូមបញ្ជាក់ថា កិច្ចប្រជុំកំពូលអាស៊ានរយៈពេលពីរថ្ងៃនេះបានសម្រេចអនុម័តលើសេចក្ដីថ្លែងការណ៍ស្ដីពីតំបន់អាស៊ាន គ្មានគ្រឿងញៀន នៅឆ្នាំ២០១៥ ជំរុញការយកចិត្តទុកដាក់ផ្នែកសន្ដិសុខ និងស្ថិរភាពក្នុងរង្វង់ប្រទេសជាសមាជិកទាំងដប់ និងការទប់ស្កាត់ការរីកសាយភាយអាវុធនុយក្លេអ៊ែរ។ ក្នុងបរិបថសន្ដិសុខនេះ លោកស្រី យីង ឡាក់ នាយករដ្ឋមន្ដ្រីប្រទេសថៃ បានប្រាប់អ្នកកាសែតថា ជម្លោះប្រដាប់អាវុធរវាងកម្ពុជា និងថៃនៅតាមតំបន់ព្រំដែនមិនត្រូវបានលើកមកជជែកក្នុងកិច្ចប្រជុំកំពូលអាស៊ានទេ។ ជាងនេះ ប្រទេសអាស៊ានទាំងដប់បានទទួលស្គាល់ថា ខ្លួនកំពុងមានបញ្ហាប្រឈមតទៅទៀតសម្រាប់ការបង្កើតសហគមន៍រួមមួយ តែមួយ នៅឆ្នាំ២០១៥។ ភាពប្រឈម មានដូចជាគម្លាតសេដ្ឋកិច្ចរវាងបណ្ដាប្រទេសជាសមាជិក ការសម្របសម្រួលគ្នាដើម្បីការអនុវត្តមានភាពស៊ីសង្វាក់ក្នុងគម្រោងការនានា ការកៀងគរហិរញ្ញវត្ថុ និងការប្រឈមក្នុងតម្រូវការចាំបាច់សម្រាប់ការសហការ ការពារសិទ្ធិពលករ និងការគ្រប់គ្រងគ្រោះមហន្តរាយ៕ This posting includes an audio/video/photo media file: Download Now |
| ហ៊ុន សែន៖បញ្ហារបៀបវារៈសមុទ្រចិនខាងត្បូងគ្មានឥទ្ធិពលពីចិនទេ Posted: 04 Apr 2012 06:49 PM PDT បញ្ហាជម្លោះនៃដែនសមុទ្រចិនខាងត្បូងបានឋិតនៅក្នុងរបៀបវារៈដ៏សំខាន់មួយ នៅក្នុងកិច្ចប្រជុំកំពូលអាស៊ានលើកទី២០ ដែលទើបនឹងបិទបញ្ចប់ក្នុងប្រទេសកម្ពុជា នៅព្រឹកថ្ងៃពុធនេះ។ មេដឹកនាំបណ្តាប្រទេសសំខាន់ៗ ទាំង១០ មកពីសមាគមប្រជាជាតិអាស៊ីអាគ្នេយ៍ បានមកជួបប្រជុំគ្នារយៈពេលពីរថ្ងៃ នៅក្នុងប្រទេសកម្ពុជាចាប់ពីថ្ងៃអង្គារ រហូតមកដល់ថ្ងៃពុធ។ បញ្ហាសមុទ្រចិនខាងត្បូងមិនត្រូវបានលើកយកមកនៅក្នុងរបៀបវារៈកិច្ចប្រជុំកំពូលអាស៊ានដំបូងទេ។ ក៏ប៉ុន្តែដោយសារតែមានបណ្តាប្រទេសមួយចំនួន នៅក្នុងសមាគមអាស៊ាន គឺប្រទេសហ្វីលីពីន និងប្រទេសវៀតណាម បានលើកយកបញ្ហានេះ នៅក្នុងកិច្ចប្រជុំថ្នាក់រដ្ឋមន្ត្រីក្រសួងការបរទេសអាស៊ាន ទើបនៅនាទីចុងក្រោយកម្ពុជាបានសម្រេចដាក់របៀបវារៈចូលទៅក្នុងកិច្ចប្រជុំកំពូលអាស៊ាន។ លោកនាយករដ្ឋមន្ត្រីហ៊ុន សែនបានថ្លែងប្រាប់នៅក្នុងអង្គសន្និសីទកាសែត ក្រោយពីបានបញ្ចប់កិច្ចប្រជុំកំពូលអាស៊ាននៅថ្ងៃពុធនេះថា កម្ពុជាមិនបានទទួលឥទ្ធិពលពីប្រទេសចិន ក្នុងបញ្ហាជម្លោះនៃដែនសមុទ្រចិនខាងត្បូងទេ។ លោកបានមានប្រសាសន៍ថា បញ្ហាដែនសមុទ្រចិនខាងត្បូងគឺជាដំណើរការមួយ មិនមែននៅក្នុងប្រទេសវៀតណាម ឥណ្ឌូនេស៊ី ប្រ៊ុយនេ ហើយឥតមាននៅក្នុងប្រទេសកម្ពុជាទេ។ លោកបានមានប្រសាសន៍ថា របៀបវារៈនៃបញ្ហាសមុទ្រចិនខាងត្បូង ត្រូវមានជារៀងរហូត ដ៏រាបណា ដល់ដំណាក់កាលនៃការកំណត់ក្រមនីតិប្រតិបត្តិ ដែលហៅកាត់ថា COC។ «គ្មានការរារាំងណាមួយពីចិនអំពីការពិភាក្សាគ្នាលើបញ្ហានេះទេ។ អ្វីដែលជាក្របខណ្ឌនៃការពិភាក្សានោះឋិតនៅត្រង់កម្រិតប៉ុណ្ណេះ។ វេទិកាសមុទ្រចិនខាងត្បូងគឺជាវេទិការវាងអាស៊ាន និងចិន។ មិនមានវេទិកាណាមកជំនួសបានទេ»។ មុនពេលដែលកម្ពុជាបានបើកកិច្ចប្រជុំកំពូលអាស៊ាន លោកប្រធានាធិបតីចិន ហ៊្វូ ជីនតាវបានមកទសន្សកិច្ចនៅក្នុងប្រទេសកម្ពុជារយៈពេលបួនថ្ងៃ ដោយបាននាំយកមកនូវជំនួយប្រមាណជិត៥០០លានយ៉ាន់ មកដល់ប្រទេសកម្ពុជា។ ប្រទេសចិន ក៏បានផ្តល់សម្ភារៈបច្ចេកទេសទំនើបៗដល់ប្រទេសកម្ពុជា ក្នុងការរៀបចំកិច្ចប្រជុំកំពូលអាស៊ានផងដែរ។ ការផ្តល់ថវិកា និងសម្ភារៈបច្ចេកទេសមកដល់ប្រទេសកម្ពុជាភ្លាមៗនេះ បានបង្កឲ្យមានការិះគន់ថា ទំនងជាសង្ស័យថា ការផ្តល់ជំនួយទាំងនេះ ជាថ្នូរមិនឲ្យកម្ពុជាដាក់របៀបវារៈ នៃជម្លោះដែនសមុទ្រចិនខាងត្បូង ចូលក្នុងកិច្ចប្រជុំកំពូលអាស៊ាន។ លោកនាយករដ្ឋមន្ត្រី ហ៊ុន សែនបានមានប្រសាសន៍ទៀតថា អាស៊ានមិនទាន់ចុះសម្រុងគ្នាទៅលើបញ្ហាសមុទ្រចិនខាងត្បូងទេ ហើយក៏មិនទាន់ដល់ចំណុចរួមនៃបញ្ហាដែលត្រូវជជែកគ្នាជាមួយចិនផងដែរ។ ប្រទេសចិនចង់ឲ្យដាក់បញ្ហាជម្លោះដែនសមុទ្រចិនខាងត្បូងនៅក្នុងក្របខណ្ឌអាស៊ានចិនតែប៉ុណ្ណោះ ដោយមិនចង់ដោះស្រាយបញ្ហានេះនៅក្នុងក្របខណ្ឌអន្តរជាតិទេ។ លោក Surapomg Tonijakchaikul រដ្ឋមន្ត្រីក្រសួងការបរទេសថៃ បានថ្លែងប្រាប់ក្រុមអ្នកកាសែតថា បញ្ហាជម្លោះដែនសមុទ្រចិនខាងត្បូង គួរតែជជែកគ្នារវាងចិន និងបណ្តាប្រទេស ដែលមានតំបន់ត្រួតស៊ីគ្នា។ ដូច្នេះ គេគួរតែដោះស្រាយបញ្ហានេះក្រៅទ្វេភាគី។ លោក Albert Del Rosario រដ្ឋមន្ត្រីក្រសួងការបរទេសហ្វីលីពីនបានមានប្រសាសន៍ថា គោលដៅរបស់លោកចង់ឲ្យបញ្ចប់នូវសេចក្តីព្រាងនៃក្រមនីតិប្រតិបត្តិ COC ស្តីពីបញ្ហាសមុទ្រចិនខាងត្បូង នៅក្នុងកិច្ចប្រជុំនៅក្នុងប្រទេសកម្ពុជាលើកក្រោយ។ «ជាការណ៍ពិត គោលជំហររបស់យើង គឺចង់ឲ្យមានការដោះស្រាយដោយសន្តិភាព ក្នុងក្របខណ្ឌតុលាការ ក៏ដូចជាថ្នាក់តំបន់។ ហើយចំណុចសំខាន់ថ្មី ដែលយើងបានលើកយកមកបង្ហាញ គឺជាសេចក្តីព្រាងនៃCOC។ ហើយនេះក៏ជាការបញ្ចូលនូវចំណុចធំៗមួយចំនួនទៀត។ បញ្ហានេះ គេគួរត្រូវបានធ្វើឡើងដោយកិច្ចការផ្ទៃក្នុងអាស៊ានជាមុនសិនគឺនៅមុនការកោះអញ្ជើញភាគីចិនឲ្យចូលរួម»។ លោក ម៉ាទី ណាតេឡាហ្គាវ៉ា រដ្ឋមន្ត្រីក្រសួងការបរទេសឥណ្ឌូនេស៊ី បានមានប្រសាសន៍ថា ការជជែកគ្នាថ្ងៃនេះគឺឈានទៅដល់ចំណុចវិជ្ជមានមួយ ហើយនៅក្នុងការជជែកអំពីក្រមនីតិវិធីប្រតិបត្តិ COC។ ហើយលោកចង់ឲ្យមានការចូលរួមពីភាគីចិន។ លោកបានមានប្រសាសន៍ថា ការជជែកដំបូងគួរតែធ្វើឡើងក្នុងក្របខណ្ឌអាស៊ានជាមុនសិន រួចហើយទើបអញ្ជើញប្រទេសចិនមកចូលរួម៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
