VOA News: ព័ត៌មាន: “នាយករដ្ឋមន្ត្រីចិនចូលគាល់និងថ្វាយព្រះពរ ព្រះមហាវីរក្សត្រខ្មែរសម្តេចនរោត្តមសីហនុពេលជិតចូលឆ្នាំចិន” plus 8 more |
- នាយករដ្ឋមន្ត្រីចិនចូលគាល់និងថ្វាយព្រះពរ ព្រះមហាវីរក្សត្រខ្មែរសម្តេចនរោត្តមសីហនុពេលជិតចូលឆ្នាំចិន
- មន្រ្តីមជ្ឈមណ្ឌលឯកសារកម្ពុជាបំភ្លឺអំពីឯកសាររបស់ខ្លួន
- ហេឡូវីអូអេ ២៣ មករា ២០១២៖ ផលប៉ះពាល់ផ្លូវចិត្តពីរបបខ្មែរក្រហមនិងវិធីព្យាបាល
- មន្ត្រីគណបក្សប្រជាជនជនកម្ពុជាជើងចាស់ ដែលធ្លាប់ជាសមាជិកបក្សកុម្មុនិស្តឥណ្ឌូចិន បានស្លាប់
- ចៅក្រមពីរនាក់ត្រូវចាប់ខ្លួន និងបញ្ជូនទៅតុលាការពីបទសង្ស័យថា ពុករលួយ
- ក្រុមកម្មករចូលរួមរំឭកខួបលើកទី៨ នៃការបាញ់សម្លាប់លោកជា វិជ្ជា
- កម្ពុជាព្យាយាមក្លាយជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអ.ស.ប.
- ព័ត៌មានអន្តរជាតិវីអូអេ ២៣ មករា យប់
- ព័ត៌មានអន្តរជាតិវីអូអេ ២៣ មករា
| Posted: 23 Jan 2012 12:01 PM PST លោក Wen Jiabao នាយករដ្ឋមន្ត្រីចិន បានចូលគាល់ព្រះមហាវីរក្សត្រខ្មែរនរោត្តមសីហនុ អគ្គមហេសី និងព្រះមហាក្សត្រនរោត្តមសីហមុនី នៅក្រុងប៉េកាំងនៅថ្ងៃសុក្រ ដើម្បីថ្វាយព្រះពរ ពេលបុណ្យចូលឆ្នាំចិន។ លោក Wen Jiabao ក៏បានថ្វាយព្រះពរ និងការទូលសួរសុខទុក្ខព្រះអង្គពីលោកប្រធានាធិបតី Hu Jintaoផងដែរ។ លោក Wen Jiabao រំឭកពីចំណងមិត្តភាពកម្ពុជាចិនច្រើនឆ្នាំផងដែរ។ លោកជឿជាក់ថា កម្ពុជានិងចិននឹងពង្រីកចំណងទាក់ទងថែមទៀត។ ព្រះមហាវីរក្សត្រនរោត្តមសីហនុក៏ប្រទានពរជនជាតិចិនពេលចូលឆ្នាំចិន ហើយបួងសួងឲ្យចំណងទាក់ទងកម្ពុជា-ចិនកាន់តែល្អក្នុងឆ្នាំថ្មី ឆ្នាំរោងនេះ។ ព្រះមហាវីរក្សត្រខ្មែរ ព្រះជន្ម៩០ព្រះវស្សា បានយាងចេញកម្ពុជាកាលពីថ្ងៃព្រហស្បតិ៍មកពិនិត្យព្រះសុខភាព តាមការយាងរបស់គ្រូពេទ្យចិន។ <!--AV--> អំឡុងបុណ្យខួប២០ឆ្នាំនៃការយាងនិវត្តចូលមាតុភូមិវិញរបស់ព្រះអង្គកាលពីថ្ងៃទី៣០ ខែតុលា អ្នកចូលរួមនេះនិយាយថា៖ «សូមជូនពរដល់ព្រះករុណា សម្តេចឲ្យមានព្រះជម្មយឺនយូរ ដើម្បីគ្រប់គ្រងកូនចៅដឹកនាំកូនចៅជារៀងរហូត»។ ក្នុងសុន្ទរកថាខួប២០ឆ្នាំនៃការយាងនិវត្តចូលមាតុភូមិវិញ ព្រះអង្គបានបង្ហាញព្រះទ័យមិនចង់យាងចេញពីកម្ពុជាទេ។ «អំណេះតទៅ ទោះបីឪនៅមានបញ្ហាសុខភាព បញ្ហាដែលត្រូវការពេទ្យចិនជារៀងរាល់ថ្ងៃ ទោះបីយ៉ាងនេះក្តី អំណេះតទៅសម្រេចឪ សម្តេចតា សម្តេចតាទួត សម្តេចតាលួត ព្រមទាំងសម្តេចម៉ែ សម្តេចយាយ យើងខ្ញុំបានសម្រេចជាដាច់ខាតថា អំណេះតទៅ មិនចេញពីប្រទេសទេ គឺថា នឹងឋិតនៅជាមួយកូនចៅ ចៅទួតក្នុងកម្ពុជរដ្ឋជាដរាបតរៀងទៅ»។ អ្នកចូលរួមបុណ្យខួបនេះម្នាក់ទៀតនិយាយថា៖ «ថ្ងៃនេះ សប្បាយចិត្តណាស់បានមកជួបសម្តេចឪ សូមឲ្យគាត់មានអាយុយឺនយូរថែរក្សាកូនចៅតទៅមុខទៀត»។ ថ្មីៗនេះ ព្រះអង្គបានប្តូរព្រះរាជបណ្តាំពីមិនឲ្យបុជាសពព្រះអង្គ មកឲ្យបូជាតាមប្រពៃណីជាតិវិញ៕ ប្រែសម្រួលដោយពិន ស៊ីសុវណ្ណ This posting includes an audio/video/photo media file: Download Now |
| មន្រ្តីមជ្ឈមណ្ឌលឯកសារកម្ពុជាបំភ្លឺអំពីឯកសាររបស់ខ្លួន Posted: 23 Jan 2012 08:47 AM PST លោកវ៉ាន់ថាន់ ពៅតារា នាយករងមជ្ឈមណ្ឌលឯកសារកម្ពុជា បានបញ្ជាក់ប្រាប់អង្គជំនុំជម្រះសាលាដំបូងនៃសាលាក្ដីខ្មែរក្រហមនៅថ្ងៃច័ន្ទនេះថា ឯកសារដែលប្រមូលយកមកផ្ដុំ តម្កល់ទុកនៅក្នុងមជ្ឈមណ្ឌលរបស់ខ្លួនមានប្រភពច្បាស់លាស់ និងត្រូវបានឆ្លងកាត់ការផ្ទៀងផ្ទាត់យ៉ាងហ្មត់ចត់ដើម្បីធានាអំពីភាពត្រឹមត្រូវរបស់ឯកសារនីមួយៗ។ «បានពិនិត្យទៅលើឯកសារ បានសួរនាំ បានកត់ត្រានូវប្រភពឯកសារទាំងនេះយ៉ាងត្រឹមត្រូវមុននឹងយើងធ្វើការទទួលឯកសារទាំងអស់នេះ»។ នៅក្នុងអំឡុងពេលកាត់ទោសអតីតពួកមេដឹកនាំកំពូលខ្មែរក្រហមចំនួនបីនាក់នៅក្នុងសំណុំរឿង០០២ គឺនួន ជា ខៀវ សំផន និងអៀង សារី កាលពីសប្ដាហ៍មុន ក្រុមមេធាវីការពារក្តីជនជាប់ចោទទាំងបីបានប្រឆាំងទៅនឹងឯកសារភស្ដុតាងជាច្រើន នៅក្នុងនោះមានឯកសារមកពីមជ្ឈមណ្ឌលឯកសារកម្ពុជា ផ្ដល់ជូនសាលាក្ដីខ្មែរក្រហមផងដែរ។ ក្រុមមេធាវីជនជាប់ចោទក៏បានទទូចឲ្យលោកឆាំង យុគ នាយកមជ្ឈមណ្ឌលឯកសារខ្មែរក្រហមដ៏ធំជាងគេនៅក្នុងប្រទេសកម្ពុជា ឲ្យចូលខ្លួនមកផ្ដល់សក្ខីកម្មដល់តុលាការដោយផ្ទាល់។ ក៏ប៉ុន្ដែសហព្រះរាជអាជ្ញាបានលើកទឡ្ហីករជាច្រើនប្រឆាំងទៅនឹងការទាមទាររបស់ក្រុមមេធាវីចុងចោទ។ នៅថ្ងៃនេះ លោកវ៉ាន់ថាន់ ពៅតារា ឆ្លើយតបទៅនឹងសំណួររបស់ចៅក្រមជំនុំជម្រះ និងសហព្រះរាជអាជ្ញារងបរទេស ដោយបញ្ជាក់ថា ឯកសារនៅក្នុងមជ្ឈមណ្ឌលឯកសារកម្ពុជាត្រូវបានប្រមូលពីរដ្ឋាភិបាល ពីប្រភពក្រៅប្រទេសដូចជាប្រទេសស៊ុយអែដ និងប្រទេសវៀតណាម និងស្ថាប័នឯកជន រួមទាំងបុគ្គលផ្សេងៗផងដែរ។ លោកពៅតារាបានបន្ថែមថា អ្នកជំនាញការពីប្រទេសវៀតណាមបានជួយរៀបចំចងក្រងឯកសារដែលនៅសេសសល់ពីរបបខ្មែរក្រហម ក្រោយពីពួកខ្មែរក្រហមដួលរលំពីអំណាចនៅខែមករា ឆ្នាំ១៩៧៩ ជាពិសេសឯកសារនៅក្នុងគុកទួលស្លែង។ មជ្ឈមណ្ឌលឯកសារកម្ពុជាដំណើរការជាលើកដំបូងក្រោមគម្រោងជួយឧបត្ថម្ភរបស់សាកលវិទ្យាល័យយែល(Yale) របស់សហរដ្ឋអាមេរិកនៅឆ្នាំ១៩៩៥។ សូមបញ្ជាក់ថា ការផ្ដល់សក្ខីកម្មរបស់មន្ដ្រីជាន់ខ្ពស់នៃមជ្ឈមណ្ឌលឯកសារកម្ពុជាធ្វើឡើងស្របពេលនឹងដំណើរទស្សនកិច្ចរបស់លោកដេវីដ ឆេហ្វើ (David Scheffer)នៃអ្នកជំនាញពិសេសរបស់អង្គការសហប្រជាជាតិទទួលបន្ទុកកិច្ចការកាត់ទោសពួកអតីតមេដឹកនាំជាន់ខ្ពស់ និងអ្នកទទួលខុសត្រូវជាន់ខ្ពស់របស់ខ្មែរក្រហម នៅប្រទេសកម្ពុជា មកដោះស្រាយបញ្ហាមិនចុះសម្រុងគ្នាមួយចំនួននៅក្នុងដំណើរការកាត់ទោស ជាពិសេសសម្រាប់ការតែងតាំងសហចៅក្រមស៊ើបអង្កេតថ្មី លោកឡូរ៉ង កាស្ពែ អង់សែម៉េ(Laurent Kasper-Ansermet) ដែលរដ្ឋាភិបាលខ្មែរប្រឆាំងជំទាស់។ នៅថ្ងៃនេះលោកដេវីដ ឆេហ្វើ បានជួបជាមួយនឹងមន្ដ្រីដឹកនាំសាលាក្ដីខ្មែរក្រហម ហើយលោកគ្រោងនឹងជួបសន្ទនាជាមួយលោក សុខ អាន ឧបនាយករដ្ឋមន្ដ្រី និងជារដ្ឋមន្ដ្រីទីស្ដីការគណៈរដ្ឋមន្ដ្រី ទទួលបន្ទុកកិច្ចការសាលាក្ដីខ្មែរក្រហម នៅថ្ងៃអង្គារ៍ស្អែកនេះ៕ This posting includes an audio/video/photo media file: Download Now |
| ហេឡូវីអូអេ ២៣ មករា ២០១២៖ ផលប៉ះពាល់ផ្លូវចិត្តពីរបបខ្មែរក្រហមនិងវិធីព្យាបាល Posted: 23 Jan 2012 11:35 AM PST ក្នុងការពិភាក្សាក្នុងកម្មវិធីហេឡូវីអូអេលោកវេជ្ជបណ្ឌិត កែវ សំ រៀបរាប់ខ្លះៗអំពីសៀវភៅរបស់លោកដែលទើបបានចេញផ្សាយនៅដើមខែមករានេះ។ សៀវភៅនេះមានចំណងជើងថា «ចេញពីភាពងងឹតទៅក្នុងសួននៃក្តីសង្ឃឹម» ដែលជាការរៀបរាប់ពីដំណើរជីវិតរបស់លោកឆ្លងកាត់របបខ្មែរក្រហម ហើយបានមករស់នៅលើទឹកដីសហរដ្ឋអាមេរិកនិងបានជួយដល់អតីតជនភៀសខ្លួនខ្មែរ និងសាសន៍ដទៃ។ មានប្រជាពលរដ្ឋខ្មែរក្នុងស្រុកក៏ដូចជានៅសហរដ្ឋអាមេរិកបានសរសេរសៀវភៅជាច្រើនអំពីឆាកជីវិតសោកសៅដែលបានឆ្លងកាត់របបខ្មែរក្រហម ការនិរាសព្រាត់ប្រាស់គ្រួសារ និងការបានមកនៅលើទឹកដីដែលសម្បូរសប្បាយ។ ប៉ុន្តែអ្វីដែលធ្វើឱ្យសៀវភៅរបស់លោកវេជ្ជបណ្ឌិត កែវ សំ ខុសប្លែកពីសៀវភៅទាំងនោះ គឺដោយសារលោកលើកយកពីជ្រុងនៃជំងឺផ្លូវចិត្តដែលប្រជាពលរដ្ឋខ្មែរជាច្រើនទទួលរងគ្រោះ តាមរយៈបទពិសោធផ្ទាល់ខ្លួនរបស់លោកដែលបានទទួលរងជំងឺនោះដែរ និងផ្តល់នូវវិធីក្នុងការព្យាបាល។ បច្ចុប្បន្នលោក កែវ សំ ជាវេជ្ជបណ្ឌិតខាងផ្នែកចិត្តសាស្រ្តនៅក្នុងរដ្ឋកាលី ហ្វញ៉ា។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី១៨ ខែមករា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| មន្ត្រីគណបក្សប្រជាជនជនកម្ពុជាជើងចាស់ ដែលធ្លាប់ជាសមាជិកបក្សកុម្មុនិស្តឥណ្ឌូចិន បានស្លាប់ Posted: 23 Jan 2012 08:40 AM PST ធ្លាប់មានប្រវត្តិតស៊ូជាយូរមកហើយ លោកជា សុទ្ធ មន្ត្រីជាន់ខ្ពស់ដ៏សំខាន់មួយរូបក្នុងគណបក្សប្រជាជនកម្ពុជា បានទទួលមរណភាពកាលពីថ្ងៃសៅរ៍សប្តាហ៍មុននេះ ក្នុងជន្មាយុ៨៦ឆ្នាំ។ នៅក្នុងសេចក្តីប្រកាសព័ត៌មានរបស់អគ្គលេខាធិការដ្ឋានរដ្ឋសភា បានឲ្យដឹងថា សពរបស់លោកជា សុទ្ធនឹងតម្កល់ទុកធ្វើបុណ្យនៅក្នុងគេហដ្ឋានរបស់លោកដែលមានទីតាំងនៅក្នុងសង្កាត់ទន្លេបាសាក់ ខណ្ឌចំការមន ក្រុងភ្នំពេញ ចាប់ពីថ្ងៃទី២១ រហូតដល់ថ្ងៃទី២៤ខាងមុននេះ។ នៅថ្ងៃទី២៥ វេលាម៉ោង៧ព្រឹក សពរបស់លោកនឹងត្រូវរំកិលចេញពីគេហដ្ឋានដង្ហែរឆ្ពោះទៅឈាបនដ្ឋាននៅមុខវត្តបុទមវតី កណ្តាលទីក្រុងភ្នំពេញ។ លោកចាស់ព្រឹទ្ធបុរសជា សុទ្ធ សមាជិកសភាមណ្ឌលភ្នំពេញខាងគណបក្សប្រជាជនកម្ពុជា ត្រូវបានដឹកទៅព្យាបាលនៅមន្ទីរពេទ្យមួយនៃប្រទេសសង្ហបុរី បន្ទាប់មកលោកបានស្លាប់បាត់បង់ជីវិតវេលាម៉ោង៥ និង១៥នាទីថ្ងៃសៅរ៍។ លោកផៃ ស៊ីផាន អ្នកនាំពាក្យ និងជារដ្ឋលេខាធិការនៃទីស្តីការគណៈរដ្ឋមន្ត្រីបានហៅការបាត់បង់ជីវិតរបស់លោកជា សុទ្ធ ថាជាការបាត់បង់ឥស្សរជនជាន់ខ្ពស់មួយរូបក្នុងជួរគណបក្សគ្រប់គ្រងអំណាច។ «គាត់បានបន្សល់នូវកិត្តិយសសម្រាប់ប្រជាជាតិ អ្វីដែលជាសេចក្តីថ្លៃថ្នូររបស់ប្រជាជាតិ ចាកចេញពីរបបប្រល័យពូជសាសន៍ ហើយគាត់គឺជាព្រឹទ្ធបុរសមួយដែលទទួលបានការគោរពពីគណបក្សប្រជាជន ហើយនឹងប្រជាពលរដ្ឋដទៃទៀត»។ លោកជា សុទ្ធគឺជាសមាជិកគណៈអចិន្ត្រៃយ៍ និងជាអ្នកកាន់ហិរញ្ញវត្ថុដ៏សំខាន់មួយក្នុងគណបក្សប្រជាជនកម្ពុជា។ លោកមានស្រុកកំណើតនៅខេត្តព្រៃវែង។ លោកបានចាប់កំណើតកាលពីថ្ងៃទី១៥ ខែសីហា ឆ្នាំ១៩២៨ ក្នុងត្រកូលកសិករមួយ។ កាសែតរស្មីកម្ពុជាបានចុះផ្សាយប្រវត្តិរបស់លោកជា សុទ្ធ ដែលបានកត់ត្រានៅក្នុងសៀវភៅកូនសោរកម្ពុជារបស់លោករ៉ា អ៊ូលហ្សេណា។ សៀវភៅនេះបានឲ្យដឹងថា លោកជា សុទ្ធបានចូលរួមនៅក្នុងខ្មែរឥស្សរៈនៅក្នុងឆ្នាំ១៩៤៨ ហើយនៅក្នុងឆ្នាំ១៩៥០ លោកបានចូលរួមនៅក្នុងបក្សកុម្មុនិស្តឥណ្ឌូចិន។ នៅក្នុងឆ្នាំ១៩៥១ លោកជានាយកខុទ្ទកាល័យរបស់គណៈកម្មាធិការដើម្បីរំដោះភូមិភាគបូព៌ា ហើយចាប់តាំងពីឆ្នាំ១៩៧០ លោកបានចូលរួមនៅក្នុងសកម្មភាពរណសិរ្សរំដោះជាតិខាងភាគីកុម្មុយនិស្ត។ លោកឌី ខាំបូលី អ្នកសរសេរសៀវភៅប្រវត្តិសាស្ត្រកម្ពុជារបស់មជ្ឈមណ្ឌលឯកសារកម្ពុជា DC-Cam បានឲ្យដឹងថា លោកជា សុទ្ធធ្លាប់បានទៅរៀននៅប្រទេសចិន និងធ្វើការនៅក្នុងវិទ្យុផ្សាយសម្លេងក្រុងប៉េកាំងរបស់ប្រទេសចិន។ «ពីឆ្នាំ១៩៧០ដល់ឆ្នាំ១៩៧៣ គាត់ធ្វើការនៅទីក្រុងហាណូយ។ ប៉ុន្តែធ្វើការឲ្យវិទ្យុផ្សាយសម្លេងភាសាខ្មែរពីទីក្រុងហាណូយជាផ្នែកមួយរបស់រណសិរ្សរួបរួមជាតិកម្ពុជា ដែលមានខ្មែរក្រហមនៅក្នុងហ្នឹងដែរ។ គាត់ធ្វើការជាមួយអៀង ធីរិទ្ធ នៅទីក្រុងហាណូយនៅពេលហ្នឹង»។ លោកឌី ខាំបូលីបាននិយាយទៀតថា លោកជា សុទ្ធបានរស់នៅប្រទេសវៀតណាមរហូតដល់ឆ្នាំ១៩៧៨ ហើយនៅក្នុងរបបខ្មែរក្រហមលោកគ្មានវត្តមាននៅក្នុងប្រទេសកម្ពុជាទេ។ នៅចុងឆ្នាំ១៩៧៨ លោកជា សុទ្ធបានចូលរួមជាមួយនឹងរណសិរ្សសាមគ្គីសង្គ្រោះជាតិកម្ពុជា ដែលមានសហការជាមួយប្រទេសវៀតណាមមកផ្តួលរំលំរបបគ្រប់គ្រងដោយពួកខ្មែរក្រហម៕ This posting includes an audio/video/photo media file: Download Now |
| ចៅក្រមពីរនាក់ត្រូវចាប់ខ្លួន និងបញ្ជូនទៅតុលាការពីបទសង្ស័យថា ពុករលួយ Posted: 23 Jan 2012 09:04 AM PST លោកឱម យ៉ិនទៀង ប្រធានអង្គភាពប្រឆាំងអំពើពុករលួយ បានមានប្រសាសន៍ប្រាប់វីអូអេសម្លេងសហរដ្ឋអាមេរិកនៅថ្ងៃសៅរ៍នេះ អង្គភាពរបស់លោកកំពុងសួរចម្លើយចៅក្រមចំនួនពីររូប ហើយនៅថ្ងៃអាទិត្យ លោកបញ្ជូនទៅកាន់តុលាការក្រុងដើម្បីបន្តធ្វើការសាកសួរពីបទសង្ស័យថា បានជាប់ពាក់ព័ន្ធនឹងអំពើពុករលួយ។ កាលពីថ្ងៃសុក្រ លោកចៅក្រម ហួត ហ៊ាង អាយុ៤២ឆ្នាំ និងអ្នកស្រីចៅក្រម ខូវ ចាន់ថូ អាយុ៤៧ឆ្នាំ អ្នកទាំងពីរជាចៅក្រមនៃតុលាការខេត្តកណ្តាល ត្រូវបានអង្គភាពប្រឆាំងអំពើពុករលួយចាប់ខ្លួននៅតុលាការខេត្តកណ្តាល រួចហើយបញ្ជូនមកសាកសួរនៅអង្គភាពប្រឆាំងអំពើពុករលួយ។ លោកឱម យ៉ិនទៀងបានមានប្រសាសន៍ថា ដើមចមដែលនាំទៅរកការចាប់ខ្លួនចៅក្រមទាំងពីរនេះ គឺដោយសារតែមានពាក្យបណ្តឹងពីជនរងគ្រោះមួយរូប ដែលបានប្តឹងចៅក្រមទាំងពីររូបថា បានគំរាមកំហែងទារប្រាក់ពីជនរងគ្រោះប្រមាណ៥០០០ដុល្លារសហរដ្ឋអាមេរិក ជាថ្នូរថា មិនចោទប្រកាន់ជនរងគ្រោះថា ជាជនល្មើសនៅក្នុងរឿងទំនាស់ដីធ្លីមួយ។ «អ្នករងគ្រោះម្នាក់ ហើយទារអ្នករងគ្រោះហ្នឹង៥០០០ [ដុល្លារ] បើសិនជាមិនឲ្យទេ គាត់នឹងប្រែក្លាយអ្នកនោះជាជនជាប់ចោទវិញ ដែលនឹងអាចបាត់បង់ទ្រព្យហ្នឹង»។ លោកឱម យ៉ិនទៀងមិនបានបញ្ជាក់ថា នៅមានជនសង្ស័យប៉ុន្មាននាក់ទៀតនៅក្នុងតុលាការខេត្តកណ្តាល ដែលប្រឈមមុខនឹងការចាប់ខ្លួនទេ ដោយលោកបានបញ្ជាក់ថា អាស្រ័យទៅនឹងចម្លើយសារភាពនៃចៅក្រមទាំងពីររូបនេះតែប៉ុណ្ណោះ។ លោកអ៊ីន វ៉ានវិបុល ប្រធានតុលាការខេត្តកណ្តាល បានបដិសេធមិនធ្វើអត្ថាធិប្បាយទេ ដោយលោកបាននិយាយថា លោកមិនទាន់ដឹងអំពីរឿងចាប់ខ្លួនចៅក្រមទាំងពីររូបនេះនៅឡើយ។ «ខ្ញុំមិនហ៊ានបកស្រាយយ៉ាងម៉េចទេ។ ខ្ញុំឥតទាន់ទទួលបានព័ត៌មាននោះទេ»។ ការចាប់ខ្លួនចៅក្រមទាំងពីររូបចុងក្រោយនៃតុលាការខេត្តកណ្តាលនេះ បានបង្កឲ្យមន្ត្រីអង្គការសង្គមស៊ីវិលសម្តែងការស្វាគមន៍យ៉ាងប្រយ័ត្នប្រយែង។ ក៏ប៉ុន្តែបានទទូចដល់អង្គភាពប្រឆាំងអំពើពុករលួយឲ្យបម្រើការងារទៅតាមឆន្ទៈរបស់ខ្លួន ដោយមិនប្រកាន់បក្ខពួកនិយម។ លោកចាន់ សាវ៉េត មន្ត្រីផ្នែកស៊ើបអង្កេតរបស់សមាគមសិទ្ធិមនុស្សអាដហុកបាននិយាយថា បើសិនជាការចាប់ខ្លួននេះប្រព្រឹត្តទៅតាមនីតិវិធីគឺជារឿងល្អប្រសើរមួយថា ស្ថាប័នប្រឆាំងអំពើពុករលួយកំពុងតែជម្រះបញ្ជីជាមួយនឹងស្ថាប័នតុលាការ។ លោកបានមានប្រសាសន៍ថា សមាគមអាដហុកកំពុងតែឃ្លាំមើលអំពីការចាប់ខ្លួននេះថា តើពាក់ព័ន្ធនឹងអំពើពុករលួយ ឬក៏មានសំណុំរឿងផ្សេងទៀត។ «យើងខ្ញុំមានការភ្ញាក់ផ្អើលផងដែរ នៅក្នុងបញ្ហាការចាប់ខ្លួននេះ។ គឺយើងគិតថាជាជំហ៊ានដំបូង គឺយើងថា ការគាំទ្រអំពីការអនុវត្តនៃការចាប់ខ្លួនមន្ត្រីតុលាការ ដើម្បីឲ្យស្ថានភាពនេះអាចហ្នឹងបង្ក្រាបបាន។ ប៉ុន្តែទោះជាយ៉ាងណា ក៏យើងទាមទារថា ស្ថាប័នប្រឆាំងនឹងអំពើពុករលួយនេះគឺត្រូវតែអនុឡោមទៅតាមនីតិវិធីច្បាប់ បញ្ជៀសការប្រកាន់បក្ខពួក ឬក៏ហេតុផលនយោបាយផ្សេងៗទៀត ដែលជាប់ពាក់ព័ន្ធនៅក្នុងរឿងកែទម្រង់របស់តុលាការនេះ»។ អង្គភាពប្រឆាំងអំពើពុករលួយធ្លាប់បានចាប់ខ្លួនលោកតុប ចាន់សិរីវុធ ព្រះរាជអាជ្ញាខេត្តពោធិសាត់ ហើយដែលត្រូវតុលាការផ្តន្ទាទោសឲ្យជាប់ពន្ធនាគាររយៈពេល១៩ឆ្នាំពីបទអំពើពុករលួយ៕ This posting includes an audio/video/photo media file: Download Now |
| ក្រុមកម្មករចូលរួមរំឭកខួបលើកទី៨ នៃការបាញ់សម្លាប់លោកជា វិជ្ជា Posted: 23 Jan 2012 09:08 AM PST ក្រុមកម្មករកាត់ដេរសម្លៀកបំពាក់ប្រមាណជាង៥០នាក់ ដែលដឹកនាំដោយសហជីពសេរីកម្មករកម្ពុជារបស់លោកជា មុន្នី បានចូលរួមរំឭកខួបលើកទី៨នៃការបាញ់សម្លាប់លោកជា វិជ្ជា មេដឹកនាំសហជីពសេរីកម្មករដ៏ល្បីល្បាញកាលពីឆ្នាំ២០0៤។ ការចូលរួមរបស់កម្មករដើម្បីគោរពវិញ្ញាណក្ខន្ធលើកនេះមានភាពខុសប្លែកពីបណ្តាឆ្នាំមុនៗ ដោយក្រុមកម្មករមិនបានដើរក្បួនដង្ហែដោយថ្មើរជើងទេ គឺបានធ្វើដំណើរតាមម៉ូតូ តាមរថយន្ត និងតាមម៉ូតូកង់បីខ្លះ ដោយគ្មានស្រែកឧគ្ឃោសនសព្ទបំពងសម្លេង និងគ្មានកម្លាំងសមត្ថកិច្ចឈរយាមកាមតាមផ្លូវមាំទាំទេ គឺមានចំនួនតិចតួចតែប៉ុណ្ណោះ។ ការគោរពវិញ្ញាណក្ខន្ធយ៉ាងស្ងាត់ស្ងៀមរបស់សហជីពសេរីកម្មករនេះបានធ្វើឡើងបន្ទាប់ពីលោកនាយករដ្ឋមន្ត្រីហ៊ុន សែនបានយល់ព្រមឲ្យសាងសង់រូបសំណាកលោកជា វិជ្ជា នៅលើសួនច្បារមួយកន្លែងក្បែរវត្តលង្កា ជាទីកន្លែងនៃការបាញ់សម្លាប់លោកជា វិជ្ជា។ លោកជា មុន្នី ប្រធានសហជីពសេរីកម្មករប្រចាំព្រះរាជាណាចក្រកម្ពុជា ដែលត្រូវជាប្អូនប្រុសបង្កើតលោកជា វិជ្ជា បានប្រាប់ក្រុមអ្នកកាសែតនៅកន្លែងគោរពវិញ្ញាណក្ខន្ធថា ការដើរក្បួនដង្ហែយ៉ាងស្ងាត់ស្ងៀមនេះ ដោយសារតែគោរពច្បាប់នៅពេលដែលកម្ពុជាកំពុងតែឃោសនាបោះឆ្នោតព្រឹទ្ធសភា។ «ដោយសារតែមានការប្រជុំពីរលើកជាមួយនឹង[សាលា]ក្រុងភ្នំពេញ ក្រុងភ្នំពេញគេថា មិនមានការហាមឃាត់ក្បួនរបស់សហជីពសេរីកម្មករមកដាក់កម្រងផ្កាទេ។ ហើយគេមិនឃាត់ឃាំងទេក្នុងការស្រែកក្នុងការអី ប៉ុន្តែយើងគោរពក្រមសីលធម៌មួយ ដោយសារតែឆ្នាំនេះគឺជាការបោះឆ្នោតព្រឹទ្ធសភា ហើយគជបបានហាមឃាត់»។ លោកគង់ គាំ ប្រធានស្តីទីគណបក្សសម រង្ស៊ី បានផ្តល់ថវិកាចំនួន១លានរៀលគឺស្មើនឹងប្រមាណជាង២០០ដុល្លារសហរដ្ឋអាមេរិកដល់លោកជា មុន្នី ដើម្បីឲ្យធ្វើរូបសំណាកលោកជា វិជ្ជា។ លោកគង់ គាំបានមានប្រសាសន៍ថា លោកគាំទ្រក្រុមគ្រួសារលោកជា វិជ្ជា ដើម្បីវែកមុខរកឃាតករពិតប្រាកដទៅផ្តន្ទាទោសតាមច្បាប់។ «ខ្ញុំគាំទ្រលោកជា មុន្នី គាំទ្រគ្រួសារសពលោកជា វិជ្ជា ហើយនឹងមជ្ឈដ្ឋានផ្សេងៗ ដែលថា រដ្ឋាភិបាលត្រូវតែបន្តវែកមុខរកឃាតករលើរូបជា វិជ្ជា ឲ្យបានពិតប្រាកដ»។ ចំណែកលោកស្រីមួរ សុខហួរ អ្នកតំណាងរាស្ត្រគណបក្សសម រង្ស៊ី បានចែកឌីស្ហថតចម្លងមួយដែលអ្នកស្រីបាននិយាយជាសាធារណៈថា នេះជាភស្តុតាងមួយបន្ថែមទៀត ដើម្បីឲ្យរដ្ឋាភិបាលធ្វើការស៊ើបអង្កេតស្វែងរកចាប់ខ្លួនឃាតករពិតប្រាកដមកកាត់ទោស។ «យើងដឹងហើយ រដ្ឋមិនទាន់ចាត់វិធានការផ្លូវច្បាប់ចាប់ឃាតករ និងអ្នកបញ្ជានោះទេ។ យើងជាពលរដ្ឋខ្មែរ យើងមិនអាចរស់នៅដោយមានសុវត្ថិភាពបានទេ។ ឥឡូវខ្ញុំសួរមែន រហូតមកដល់ពេលនេះ មិនទាន់ចាប់បានទេ»។ លោករ៉ុង ឈុន ប្រធានសហជីពសេរីកម្មករនៃកម្ពុជា និងជាប្រធានសមាគមគ្រូបង្រៀនឯករាជ្យកម្ពុជា បានមានប្រសាសន៍ថា សហជីពសេរីកម្មករ និងសមាគមគ្រូបង្រៀនរង់ចាំមើលថា ពេលណារដ្ឋាភិបាលផ្តល់យុត្តិធម៌ជូនលោកជា វិជ្ជា និងសាច់ញាតិក្រុមគ្រួសារសពរបស់លោក។ «ថ្ងៃនេះ គម្រប់ប្រាំបីឆ្នាំហើយមិនទាន់បានរកឃាតករពិតយកមកផ្តន្ទាទោសតាមច្បាប់។ បើយើងស្តាប់អ្នកនាំពាក្យក្រសួងមហាផ្ទៃ គ្រាន់តែយើងបន្តការស៊ើបអង្កេត។ សួរថា បន្តនៅពេលណា? ប៉ុន្តែអ្វីដែលយើបន្តមកដល់ពេលនេះឥតមានឃើញនូវលទ្ធផល នូវការប្រែប្រួលណាមួយសោះ»។ លោកជា វិជ្ជា អតីតមេដឹកនាំសហជីពសេរីកម្មករដ៏ល្បីល្បាញនៃព្រះរាជាណាចក្រកម្ពុជាត្រូវបានឃាតករដើរចូលបាញ់យ៉ាងកៀកបំផុត នៅពេលដែលលោកកំពុងតែអានកាសែតនៅតូបលក់កាសែតមួយជិតវត្តលង្កា កាលពីថ្ងៃទី២២ ខែមករា ឆ្នាំ២០០៤។ រយៈពេលប្រាំបីឆ្នាំបន្ទាប់ពីការបាញ់លោកជា វិជ្ជា មន្ត្រីអង្គការសង្គមស៊ីវិលបានទទូចឲ្យរដ្ឋាភិបាលចាប់ខ្លួនឃាត់ករពិតប្រាកដមកផ្តន្ទាទោសតាមច្បាប់។ ក៏ប៉ុន្តែមន្ត្រីក្រសួងមហាផ្ទៃធ្លាប់បានអះអាងថា សំណុំរឿងដ៏រសើបមួយនេះមិនទាន់បញ្ចប់ការស៊ើបអង្កេតនៅឡើយ។ លោកប៊ន សំណាង និងលោក សុខ សំអឿន ដែលក្រុមមន្ត្រីអង្គការសង្គមស៊ីវិលបានចាត់ទុកថា ជាឃាតករសប្បនិម្មិតនោះមិនមានវត្តមាននៅក្នុងពិធីរំឭកខួបការបាញ់សម្លាប់លោកជា វិជ្ជាឆ្នាំនេះទេ៕ This posting includes an audio/video/photo media file: Download Now |
| កម្ពុជាព្យាយាមក្លាយជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអ.ស.ប. Posted: 23 Jan 2012 08:38 AM PST លោករដ្ឋមន្រ្តីការបរទេសហោ ណាំហុងបានណែនាំឲ្យឯកអគ្គរាជទូតនិងអគ្គកុងស៊ុលកម្ពុជាផ្សព្វផ្សាយគោលនយោបាយការបរទេសរបស់ប្រទេសកម្ពុជា ដើម្បីទាក់ទាញការគាំទ្រពីអន្តរជាតិ ខណៈដែលប្រទេសកម្ពុជាស្វះស្វែងរក តំណែងជាសមាជិកមិនអចិន្រ្តៃយ៍ក្រុមប្រឹក្សាសន្តិសុខអង្គការសហប្រជាជាតិ។ នៅថ្ងៃច័ន្ទនេះ លោករដ្ឋមន្រ្តីការបរទេសហោ ណាំហុងបានណែនាំដល់ឯកអគ្គរាជទូត និងអគ្គកុងស៊ុលកម្ពុជាចំនួន៣៤រូបប្រចាំនៅបរទេស ឲ្យខំប្រឹងប្រែងបញ្ចុះបញ្ចូលប្រទេសទាំងនោះបោះឆ្នោតគាំទ្របេក្ខភាពរបស់ប្រទេសកម្ពុជាធើ្វជាសមាជិកមិនអចិន្រៃ្តយ៍ក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិឆ្នាំ២០១៣។ លោកហោ ណាំហុងបានលើកឡើងបែបនេះនៅក្នុងការជួបប្រជុំបិទទ្វារជាមួយឯកអគ្គរាជទូតចំនួន២៦រូប និងអគ្គកុងស៊ុលចំនួន៨រូបប្រចាំនៅប្រទេសនានាអំពីគោលនយោបាយការបរទេសសំខាន់ៗរបស់ប្រទេសកម្ពុជាទាក់ទងនឹងការបោះឆ្នោតនៅក្រុមប្រឹក្សាសន្តិសុខអង្គការសហប្រជាជាតិសម្រាប់បេក្ខភាពកម្ពុជាធើ្វជាសមាជិកមិនអចិន្រៃ្តយ៍ក្រុមប្រឹក្សាសន្តិសុខអង្គការសហប្រជាជាតិ ការបកស្រាយសាលក្រមឆ្នាំ១៩៦២ របស់តុលាការយុតិ្តធម៌អន្តរជាតិពាក់ព័ន្ធនឹងប្រាសាទព្រះវិហារ និងតំបន់ជុំវិញប្រាសាទ និងការធើ្វជាប្រធានអាស៊ានរបស់កម្ពុជានៅឆ្នាំ២០១២នេះ។ លោកកួយ គួង អ្នកនាំពាក្យក្រសួងការបរទេស បានថ្លែងថា ក្នុងឆ្នាំ២០១២នេះ អង្គការសហប្រជាជាតិនឹងធើ្វការបោះឆ្នោតសម្រេចអំពីបេក្ខភាពរបស់ប្រទេសកម្ពុជាជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិឆ្នាំ២០១៣-២០១៤។ លោកអ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជា បានថ្លែងថា បើកម្ពុជាអាចជាប់ឆ្នោតជាសមាជិកក្រុមប្រឹក្សាសន្តិសុខអង្គការសហប្រជាជាតិមែន វាមានសារៈសំខាន់ណាស់សម្រាប់កម្ពុជា ពីព្រោះសមាជិកក្រុមប្រឹក្សាសន្តិសុខអង្គការសហប្រជាជាតិគឺជាអ្នកសម្រេចគោលនយោបាយសន្តិសុខអន្តរជាតិសំខាន់ៗ ដូចជាការថ្កោលទោសប្រទេសជាសមាជិក ការដាក់ពង្រាយកងរក្សាសន្តិភាព និងការសម្រេចដាក់ទណ្ឌកម្មប្រឆាំងនឹងប្រទេសណាមួយ។ «ក្លាយទៅជាសមាជិកមួយរូបហ្នឹងគឺជាតួនាទីមួយដ៏សំខាន់ ជាការទទួលខុសត្រូវមួយដ៏សំខាន់ និងជាមុខមាត់មួយដ៏សំខាន់ណាស់សម្រាប់ប្រទេសកម្ពុជា ហើយក៏ជាអំណាចដ៏សំខាន់មួយដែរក្នុងការសម្រេចចិត្តហ្នឹង។ ដូច្នេះបើកម្ពុជាបានចូលជាសមាជិកមិនអចិន្រ្តៃយ៍ក្រុមប្រឹក្សាសន្តិសុខអង្គការសហប្រជាជាតិ វាមានសារៈសំខាន់ណាសម្រាប់ប្រទេសកម្ពុជា»។ លោកអ៊ូ វីរៈបានបញ្ជាក់ថា ប្រទេសកម្ពុជាមានសមត្ថភាពបំពេញតួនាទីជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិបាន ប៉ុន្តែកម្ពុជាអាចនឹងទទួលបរាជ័យដោយសារ រូបភាពនៃបញ្ហាសិទិ្ធមនុស្ស ដោយសារការបដិសេធការតែងតាំងសហចៅក្រមស៊ើបអង្កេតអន្តរជាតិ និងការគំរាមបិទការិយាល័យសិទិ្ធមនុស្សអង្គការសហប្រជាជាតិនៅកម្ពុជា ឬការមិនសហការជាមួយក្រុមប្រឹក្សាសិទិ្ធមនុស្សអង្គការសហប្រជាជាតិ។ «ខ្ញុំមើលទៅប្រទេសកម្ពុជាប្រហែលជាមិនអាចទទួលបានការបោះឆ្នោតជាប់ទេ។ ខ្ញុំមើលទៅបើសិនជាមើលពីរឿងឆាកនយោបាយ កម្ពុជាមានអ្នកគាំទ្រគឺអាចជោគជ័យ។ ក៏ប៉ុន្តែរដ្ឋាភិបាលយើងមិនបានបង្ហាញថា ប្រទេសកម្ពុជាជាសមាជិកដ៏ល្អនៃអង្គការសហប្រជាជាតិទេ ដូចជារឿងទាក់ទងសិទិ្ធមនុស្ស និងការទាត់ចោលចៅក្រមអន្តរជាតិ ដោយឧត្តមក្រុមប្រឹក្សានៃអង្គចៅក្រម»។ លោកឡាវ ម៉ុងហៃ អ្នកវិភាគនយោបាយឯករាជ្យ បានថ្លែងថា បើកម្ពុជាក្លាយជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិ កម្ពុជាទទួលបានកិត្តិយស។ ប៉ុន្តែកម្ពុជាត្រូវបង្កើនយុទ្ធនាការបញ្ចុះបញ្ចូលប្រទេសសមាជិកអង្គការសហប្រជាជាតិឲ្យគាំទ្រ។ «ឯកអគ្គរាជទូត និងកុងស៊ុលតំណាងប្រទេសខ្មែរទាំងមូល នៅបរទេសហ្នឹងគឺមានតួនាទីខំបញ្ចុះបញ្ចូលបន្ថែមទៀត ដើម្បីសុំសន្លឹកឆ្នោតពីគេ។ យើងចំណេញបានយល់ដឹង មានបទពិសោធន៍ ហើយគេទទួលស្គាល់គាំទ្រច្រើន ហើយយើងទុកចិត្តលើខ្លួនឯងកាន់តែច្រើនទៅៗ»។ សមាជិកអចិន្រៃ្តយ៍ក្រុមប្រឹក្សាសន្តិសុខអង្គការសហប្រជាជាតិមានប្រទេសចំនួន៥គឺសហរដ្ឋអាមេរិក ចិន រុស្ស៊ី បារាំង និងអង់គ្លេស ហើយសមាជិកមិនអចិន្រ្តៃយ៍មាន១០ប្រទេស៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ២៣ មករា យប់ Posted: 23 Jan 2012 06:51 AM PST ស៊ីរី៖ រដ្ឋាភិបាលប្រទេសស៊ីរីបានច្រានចោលផែនការមួយរបស់សម្ព័ន្ធអារ៉ាប់ ដែលឱ្យលោកប្រធានាធិបតី បាស្សា អាល់ អាសាដ (Bashar al-Assad) ផ្ទេរអំណាចទៅឲភូឈួយរបស់លោក ដោយចោទប្រកាន់សម្ព័ន្ធអារ៉ាប់ថាខិតខំព្យាយាមជ្រៀតជ្រែកក្នុងកិច្ចការផ្ទៃក្នុងរបស់ប្រទេសស៊ីរី។ ភូមា៖ ក្រុមសិទ្ធិមនុស្សមួយនិយាយថា ប្រទេសភូមាបានបង្ហាញសញ្ញានៃការកែទម្រង់ក្នុងឆ្នាំ២០១១ ក៏ប៉ុន្តែមិនបានដោះស្រាយ «ការរំលោភយ៉ាងធ្ងន់ធ្ងរ»នៅក្នុងប្រទេសទេ។ នៅក្នុងសេចក្តីរាយការណ៍ប្រចាំឆ្នាំមួយដែលបានត្រូវចេញផ្សាយកាលពីថ្ងៃអាទិត្យអង្គការ Human Rights Watch ដែលមានមូលដ្ឋានក្នុងបូរីញូវយ៉កបានសរសើរប្រទេសភូមាចំពោះការដោះលែងពួកអ្នកទោសនយោបាយរាប់រយនាក់ ក៏ប៉ុន្តែបានអំពាវនាវឱ្យមានដំណើរការឯករាជ្យមួយសម្រាប់ស្ទង់ប្រមាណមើលស្ថានភាពនិងកន្លែងរស់នៅរបស់ពួកអ្នកទោសនយោបាយឯទៀតៗ។ អ៊ីរ៉ង់៖ ក្រុមប្រទេសជាតិនៃសហភាពអឺរ៉ុបបានយល់ព្រមធ្វើ «ការរាំងខ្ទប់ខាងប្រេង» ប្រឆាំងនឹងការដឹកជញ្ជូនប្រេងអ៊ីរ៉ង់ទៅលក់ឯប្រទេសក្រៅ។ ស.រ.អ.៖ នាវាផ្ទុកយន្តហោះចម្បាំង ស.រ.អ. មួយគ្រឿងបានបើកកាត់ច្រកសមុទ្រហ៊ឺម៉ូស្ស (Hormuz) ចូលទៅក្នុងឈូងសមុទ្រភឺស (Perse) មួយខែក្រោយពីប្រទេសអ៊ីរ៉ង់បានព្រមាន ស.រ.អ. កុំឱ្យបញ្ជូននាវាដឹកយន្តហោះទៅកាន់ផ្លូវទឹកយុទ្ធសាស្ត្រនេះ។ លីប៊ី៖ អនុប្រធាននៃក្រុមប្រឹក្សាជាតិអន្តរកាលរបស់ប្រទេសលីប៊ី (Libya) បានចុះចេញពីតំណែងហើយ មួយថ្ងៃក្រោយពីពួកបាតុករប្រឆាំងនឹងរដ្ឋាភិបាលបានចូលលុកលុយក្នុងការិយាល័យរបស់អង្គការគ្រប់គ្រងប្រទេសនេះក្នុងក្រុង បេនហ្គាហ្ស៊ី (Benghazi) នាប៉ែកខាងកើតប្រទេស។ អឺរ៉ុប៖ សហភាពអឹរ៉ុបនិយាយថាខ្លួនបន្ធូរបន្ថយការហាមប្រាមមិនឱ្យធ្វើដំណើរប្រឆាំងនឹងមន្ត្រីកំពូលភូមា ក្រោយពីរដ្ឋាភិបាលភូមាបានធ្វើការកែទម្រង់នយោបាយ«ដ៏គួរឲ្យកត់សម្គាល់»។ រូបភាពនៃការប្រារព្ធពិធីបុណ្យចូលឆ្នាំចិននៅទូទាំងពិភពលោក៖
This posting includes an audio/video/photo media file: Download Now |
| ព័ត៌មានអន្តរជាតិវីអូអេ ២៣ មករា Posted: 22 Jan 2012 08:46 PM PST ចិន៖ បានរាយការណ៍អំពីមនុស្សទីពីរដែលបានស្លាប់ដោយសារជំងឺគ្រុនផ្តាសាយបក្សីក្នុងរយៈពេលតិចជាងមួយខែកាលពីថ្ងៃអាទិត្យ នៅក្រោយការស្លាប់នៃមនុស្សម្នាក់នៅវៀតណាមនិងក្មេងតូចម្នាក់នៅកម្ពុជា។ ពួកមន្ត្រីនិយាយថាអ្នកជំងឺថ្មីៗបំផុតនេះបានស្លាប់កាលពីថ្ងៃអាទិត្យនៅខេត្តគុយស៊ូ Guizhou នាផ្នែកនិរតីនៃប្រទេសចិន នៅក្រោយពីគាត់បានទៅសំរាកឯមន្ទីរពេទ្យកាលពីថ្ងៃទី៦ខែមករា។ គេរាយការណ៍ថាបុរសអាយុ៣៩ឆ្នាំរូបនេះគ្មានការប៉ះពាល់ដោយផ្ទាល់ជាមួយមាន់ទាទេ។
ភូមា៖ សមាជិកសំខាន់ម្នាក់នៃព្រឹទ្ធសភាអាមេរិកបាននិយាយថាសហរដ្ឋអាមេរិកពេញចិត្តនឹងការជឿនលឿនថ្មីៗនេះឆ្ពោះទៅកាន់ការកែទម្រង់ប្រជាធិបតេយ្យនៅ ភូមា តែលោកបានថ្លែងដែរថារដ្ឋាភិបាលស៊ីវិលថ្មីភូមាត្រូវតែធ្វើឲ្យប្រាកដប្រជាអំពីការបោះឆ្នោត «ដោយសេរីនិងយុត្តិធ៌ម» ក្នុងខែមេសាខាងមុខនេះ។ លោកចន ម៉ាកខេន John McCain សមាជិកជាន់ខ្ពស់នៃគណៈកម្មាធិការសេវាកម្មកងប្រដាប់អាវុធរបស់ព្រឹទ្ធសភាអាមេរិកបានមានប្រសាសន៍ដូចខាងលើកាលពីថ្ងៃអាទិត្យក្នុងក្រុងរ៉ង់ហ្គូន ក្រោយជំនួបជាមួយលោកប្រធានាធិបតី ធាន ស៊ាន Thein Sein និងការជួបដាច់ដោយឡែកពីគ្នាជាមួយលោកស្រីអោង សានស៊ូជី មេដឹកនាំក្រុមប្រឆាំងនិងជាអ្នកការពារលទ្ធិប្រជាធិបតេយ្យ។ ស៊ីរី៖ អារ៉ាប៊ី សាអូឌីត និយាយថាខ្លួនដកពួកអ្នកសង្កេតការរបស់ខ្លួនចេញពី ស៊ីរីជាការតវ៉ានឹងអ្វីដែលខ្លួនហៅថាជាបរាជ័យរបស់រដ្ឋាភិបាលស៊ីរីក្នុងការគោរពតាមផែនការរបស់សម្ព័ន្ធអារ៉ាប់ដើម្បីបញ្ឈប់ការបង្ក្រាបដ៏ឃោរឃៅលើការបះបោររបស់ក្រុមប្រឆាំងដែលមានរយៈពេល១០ខែមកហើយ។ លីប៊ី៖ អនុប្រធាននៃក្រុមប្រឹក្សាជាតិអន្តរកាលរបស់ប្រទេសលីប៊ីនិយាយថាលោកលាលែងចេញពីតំណែង មួយថ្ងៃក្រោយពីពួកបាតុករប្រឆាំងនឹងរដ្ឋាភិបាលបានចូលលុកក្នុងការិយាល័យរបស់អង្គការគ្រប់គ្រងប្រទេសនេះនៅក្នុងក្រុងបេងហ្កាហ្ស៊ី នាប៉ែកខាងកើតប្រទេស។ យេម៉ែន៖ ពួកមន្ត្រីយេម៉ែន និយាយថាលោកប្រធានាធិបតីអាលី អាប់ឌុលឡា សាឡេះ Ali Abdullah Saleh បានធ្វើដំណើរចាកចេញ ពីប្រទេសដើម្បីទៅព្យបាលរបួសនៅសហរដ្ឋអាមេរិក ដោយលោកបានសន្យាថានឹងវិលត្រទ្បប់ទៅកាន់ យេម៉ែនវិញដើម្បីបន្តដឹកនាំគណបក្សគ្រប់គ្រងប្រទេសរបស់លោក។ នីហ្សេរីយ៉ា៖ លោកប្រធានាធិបតីនីហ្សេរីយ៉ាហ្គោដឡាក់ ចូណាថាន Goodluck Jonathan ធ្វើដំណើរទៅកាន់ក្រុងកាណូ Kano នាប៉ែកខាងជើងប្រទេសកាលពីថ្ងៃអាទិត្យ នៅពេលដែលចំនួនមនុស្សស្លាប់ដោយសារការវាយប្រហារមានការសម្របសម្រួលកាលពីថ្ងៃសុក្រដោយពួកជនសកម្មប្រយុទ្ធបូកូ ហារ៉ាម Boko Haram នៅតែកើនទ្បើងច្រើនថែមទៀត។ សហរដ្ឋអាមេរិក៖ លោក មិត រមនី Mitt Romney ដែលជាអ្នកសង្ឃឹមថានឹងក្លាយទៅ ជាបេក្ខជនប្រធានាធិបតីខាងគណបក្សសាធារណរដ្ឋនិយាយថាលោកនឹងផ្សាយឲ្យដឹងអំពីឯកសារពន្ធដាររបស់លោកក្នុងពេលពីរឆ្នាំមុននេះនៅសប្តាហ៍នេះ ដោយលោកបាននិយាយថាវាជាកំហុសក្នុងការឃោសនាបោះឆ្នោតរបស់លោកដែលមិនបានធ្វើដូច្នេះកាលពីពេលមុន។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
