VOA News: ព័ត៌មាន: “មជ្ឈមណ្ឌលឯកសារកម្ពុជាការពារភាពត្រឹមត្រូវនៃឯកសាររបស់ខ្លួន” plus 5 more |
- មជ្ឈមណ្ឌលឯកសារកម្ពុជាការពារភាពត្រឹមត្រូវនៃឯកសាររបស់ខ្លួន
- ព័ត៌មានអន្តរជាតិវីអូអេ ២៤ មករា យប់
- ពលរដ្ឋក្រីក្រប្រារព្ធខួបទីបីនៃការបណ្តេញចេញពីលំនៅដ្ឋានដោយបង្ខំ
- កម្ពុជាបា្រប់ឱ្យអង្គទូតរក្សាអព្យាក្រិតក្នុងជម្លោះនៅ ចិននិងកូរ៉េ
- ព័ត៌មានអន្តរជាតិវីអូអេ ២៤ មករា ព្រឹក
- គេហទំព័រធំៗរបស់អាមេរិកប្រឆាំងនឹងច្បាប់រឹតបណ្តឹងប្រព័ន្ធអ៊ីនធឺណេត
| មជ្ឈមណ្ឌលឯកសារកម្ពុជាការពារភាពត្រឹមត្រូវនៃឯកសាររបស់ខ្លួន Posted: 24 Jan 2012 08:04 AM PST នាយករងមជ្ឈមណ្ឌលឯកសារកម្ពុជា លោកវ៉ាន់ថាន់ ពៅតារា នៅតែរក្សាសេចក្តីអះអាងនៅថ្ងៃអង្គារនេះ គឺភាពគួរឲ្យជឿទុកចិត្តបាននៃឯកសារមជ្ឈមណ្ឌលឯកសាររបស់លោក។ ឯកសារទាំងនោះមានចំនួនប្រមាណជា៥០ម៉ឺន ដែលត្រូវបានសាលាក្តីខ្មែរក្រហមយកប្រើប្រាស់សម្រាប់ជាភស្តុតាង នៅក្នុងការកាត់ទោសពួកអតីតមេដឹកនាំខ្មែរក្រហម។ លោក ពៅតារា មានប្រសាសន៍នៅរសៀលថ្ងៃនេះចំពោះការសួរដេញដោលរបស់សហមេធាវីកម្ពុជា លោក សុន អារុណ ការពារក្តីឲ្យជនជាប់ចោទនួន ជា អតីតប្រធានសភាខ្មែរក្រហម ថាមជ្ឈមណ្ឌលឯកសារកម្ពុជាបានផ្ទៀងផ្ទាត់រួចជាស្រេចពីយថាភាពរបស់ឯកសារ ឬភាពជាក់ច្បាស់នៃឯកសារមុននឹងទទួលយក នឹងប្រមូលឯកសារទាំងនោះយកមកទុក។ «នៅក្នុងការទទួលយកឯកសារនេះ យើងបានធ្វើយថាភាពឯកសារ គឺតាមរយៈការសួរនាំដូចដែលលោកមេធាវីបានសួរនេះតែម្តង»។ លោក វ៉ាន់ថាន់ ពៅតារា គឺជាសាក្សីដែលត្រូវបានកោះហៅដោយអង្គជំនុំជម្រះសាលាដំបូងនៃសាលាក្តីខ្មែរក្រហម ដើម្បីថ្លែងការពារឯកសារនានារបស់មជ្ឈមណ្ឌលឯកសារកម្ពុជា ដែលក្រុមមេធាវីការពារជនជាប់ចោទនៅក្នុងសំណុំរឿង០០២ បានតវ៉ាជំទាស់រួមមានមេធាវីនួន ជា ខៀវ សំផន និងមេធាវីរបស់អៀង សារី។ សហមេធាវីបរទេសរបស់នួន ជា លោក Jasper Peow បានចោទសួរផ្ទួនៗយ៉ាងរន្ថើនទៅលើលោកពៅតារា ពីការរក្សាឯកសារ និងពីការចងក្រងឯកសារនៅក្នុងគោលដៅជំរុញការចោទប្រកាន់ទៅលើកូនក្តីរបស់ផងខ្លួន។ ក៏ប៉ុន្តែលោកវ៉ាន់ថាន់ ពៅតារា បានព្យាយាមមិនបកស្រាយចំៗ ចំពោះសំណួរដែលធ្វើឲ្យលោក Jasper Peow ថ្លែងថាគាត់ពុំបានទទួលកិច្ចសហប្រតិបត្តិការពីមន្ត្រីនៃមជ្ឈមណ្ឌលឯកសារកម្ពុជានោះទេ។ ហើយលោកទទូចទាមទារឲ្យលោក ឆាំង យុ នាយកមជ្ឈមណ្ឌលនេះចូលខ្លួនមកផ្តល់សក្ខីកម្មបន្ថែមទៀត។ ដោយឡែកសហមេធាវីអន្តរជាតិការពារឲ្យអៀង សារី អតីតរដ្ឋមន្ត្រីក្រសួងការបរទេសខ្មែរក្រហមគឺលោក Michael KANAVAS បានជជីកសួរដេញដោលពីការកំណត់យថាភាពនៃឯកសារ។ ជាពិសេសទៅលើការវិភាគ ឬការវាយតម្លៃឯកសារនីមួយៗ។ ក៏ប៉ុន្តែការសួរដេញដោលនោះមិនធ្វើឲ្យនាយករងនៃមជ្ឈមណ្ឌលឯកសារកម្ពុជាប្តូរចម្លើយនោះទេ។ ក្រុមមេធាវីការពារក្តីជនជាប់ចោទបានទទូចកាលពីសប្តាហ៍មុនថាពួកខ្លួនមិនទទួលយកឯកសារមួយចំនួន ដែលផ្តល់ដោយមជ្ឈមណ្ឌលឯកសារកម្ពុជានោះទេ ល្គឹកណានាយកមជ្ឈមណ្ឌលនេះគឺលោក ឆាំង យុ មិនត្រូវបានកោះហៅឲ្យទៅចូលបំភ្លឺនៅលើឯកសារនោះ៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ២៤ មករា យប់ Posted: 24 Jan 2012 07:07 AM PST ស.រ.អ.៖ បេក្ខជននាំមុខគេ២នាក់ដើម្បីទទួលការតែងតាំងជាបេក្ខជនប្រធានាធិបតីខាងគណបក្សសាធារណរដ្ឋ បានធ្វើការវាយប្រហារគ្នាតាមពាក្យសំដីទៅវិញទៅមកយ៉ាងខ្លាំងក្លាក្នុងការជជែកដេញដោលគ្នាផ្សាយតាមទូរទស្សន៍ទូទាំងប្រទេសនៅរដ្ឋ ផ្លរ៉ាយដា (Florida) នាប៉ែកអាគ្នេយ៍ប្រទេសកាលពីថ្ងៃចន្ទ ប៉ុន្មានថ្ងៃមុនការបោះឆ្នោតបឋមដ៏សំខាន់នៅក្នុងរដ្ឋនេះ។ ស.រ.អ.៖ លោក ម៊ីត រ៉ូមនី (Mitt Romney) បេក្ខជនប្រធានាធិបតីខាងគណបក្សសាធារណរដ្ឋបានចេញផ្សាយឯកសារពន្ធដារសហព័ន្ធរបស់លោក ដែលបង្ហាញថាលោកមានប្រាក់ចំណូលជាង៤២លានដុល្លារក្នុងរយៈពេល២ឆ្នាំមុននេះ ហើយលោកបានបង់ពន្ធប្រមាណ៦លាន២សែនដុល្លារ។ អារ៉ាប់៖ ពួកសមាជិកនៃក្រុមប្រឹក្សាកិច្ចសហប្រតិបត្តិការក្នុងតំបន់ឈូងសមុទ្រភឺស (Perse) និយាយថាពួកគេដកពួកអ្នកសង្កេតការរបស់ពួកគេចេញពីប្រទេសស៊ីរី នៅក្រោយសេចក្តីសម្រេចចិត្តរបស់ប្រទេស អារ៉ាប៊ីសាអូឌីត (Arabie Saoudite) ដែលថាដកខ្លួនថយចេញពីបេសកកម្មសង្កេតការរបស់សម្ព័ន្ធអារ៉ាប់។ អ៊ីរ៉ាក់៖ គ្រាប់បែកដាក់ក្នុងទ្បាន៤គ្រឿងបានផ្ទុះនៅក្នុងតំបន់ដែលមានអ្នកស្រុកស៊ីអ៊ីត (Shi'ites) ភាគច្រើន នៃរដ្ឋធានីប្រទេសអ៊ីរ៉ាក់។ការផ្ទុះនេះបណ្តាលឱ្យមនុស្សយ៉ាងតិចណាស់១៣នាក់ស្លាប់ ហើយធ្វើឲមនុស្សជាង៧០នាក់ទៀតត្រូវរបួស។ <!--AV--> This posting includes an audio/video/photo media file: Download Now |
| ពលរដ្ឋក្រីក្រប្រារព្ធខួបទីបីនៃការបណ្តេញចេញពីលំនៅដ្ឋានដោយបង្ខំ Posted: 24 Jan 2012 07:25 AM PST បន្ទាប់ពីបានលើកសារុងពុម្ពមួយបង្ហាញជាសាធារណៈ អ្នកភូមិបឹងកក់បាននាំគ្នាហែកសារុងនោះជាចម្រៀកតូចៗ រួចហើយទម្លាក់ចោលនៅលើថ្នល់កៅស៊ូ។ អ្នកភូមិបឹងកក់បាននិយាយថា សារុងនេះគឺលោកកែប ជុតិមា បានផ្តល់ដល់អ្នកភូមិបឹងកក់កាលពីឆ្នាំ២០០៨ ជាមួយនឹងទឹកប្រាក់ចំនួន១០.០០០រៀល ស្មើនឹងជាង២ដុល្លារសហរដ្ឋអាមេរិកក្នុងមួយគ្រួសារ ដើម្បីឲ្យបោះឆ្នោតជូនគណបក្សប្រជាជនកម្ពុជា។ ពួកគេបាននិយាយថាមិនត្រូវការសារុងទេ គឺត្រូវការតែផ្ទះសម្បែងបន្ទាប់ពីបានបណ្តេញចេញដោយបង្ខំ។ «អានេះគេហៅថាសារុងថោកទាប មកបោកបញ្ឆោតប្រជាពលរដ្ឋ។ យកផ្ទះប្រជាពលរដ្ឋមកដូរសារុងមួយថោកទាបជាទីបំផុត។ សារុងមួយលុយមួយម៉ឺន ប៊ីចេងមួយកញ្ចប់។ ឥឡូវប្រជាពលរដ្ឋទាំងអស់ដឹងហើយ គឺចាញ់បោកហើយ»។ ក្រុមប្រជាពលរដ្ឋចំនួនប្រាំពីរសហគមន៍យ៉ាងតិច ដែលរួមមានសហគមន៍ដីក្រហម សហគមន៍ក្រុម៧៨ សហគមន៍បឹងកក់ សហគមន៍បុរីកីឡា សហគមន៍បឹងឈូក សហគមន៍៣៤៧ និងសហគមន៍ព្រែកតាណូ ត្រូវបានរដ្ឋាភិបាលប្រើប្រាស់កម្លាំងបណ្តេញចេញដោយបង្ខំឲ្យទៅរស់នៅឯជាយក្រុងភ្នំពេញ ដើម្បីយកដីទៅឲ្យក្រុមហ៊ុនឯកជនអភិវឌ្ឍ។ ឆ្នាំនេះគឺជាគម្រប់ខួបលើកទី៣ នៃការបណ្តេញចេញដោយបង្ខំនៅសហគមន៍ដីក្រហម ហើយសហគមន៍ទាំងប្រាំពីរបានចូលរួមដើម្បីរំលឹកខួបនៃការបណ្តេញចេញនេះ។ នៅក្នុងសារមួយច្បាប់ ដែលមានចំណងជើងថា «ថ្ងៃដែលមិនអាចបំភ្លេចបានរបស់សហគមន៍ដីក្រហម» បានឲ្យនិយាយថាទង្វើជម្លៀសប្រជាពលរដ្ឋចេញពីតំបន់ទីក្រុងភ្នំពេញ ធ្វើឲ្យពួកគេនឹកឃើញពីអតីតកាលក្នុងរបបខ្មែរក្រហម។ អ្នកស្រី រត្ន័ សុផល អាយុ៣២ឆ្នាំ រស់នៅសហគមន៍ដីក្រហម ហើយបច្ចុប្បន្នកំពុងតែរស់នៅតំបន់ដំណាក់ត្រយឹងបាននិយាយថាបន្ទាប់ពីបានបណ្តេញចេញជីវភាពរបស់អ្នកស្រីកាន់តែលំបាក។ «សព្វថ្ងៃមានម្តាយចាស់ជរា គាត់ឈឺ គាត់ជា។ ថ្ងៃណាក៏គាត់គិតអាណិតកូន សម្លាប់កង្កែប សម្លាប់ក្តាម។ ខ្ញុំនិយាយជារឿយៗមកហើយ ការលំបាកមិនដែលមាននរណាមកអើតមើលទេ គឺគ្រប់គ្នាទាំងអស់ អ្នកដែលគេបណ្តេញចេញទៅបីឆ្នាំ ហើយក៏ជាឱកាសមួយដែលខ្ញុំចង់និយាយប្រាប់ឲ្យដឹងថាពួកខ្ញុំហ្នឹង នៅទីនោះវេទនាណាស់។ អ្វីក៏គ្មាន បាតដៃទទេទាំងអស់»។ ប្រជាពលរដ្ឋរស់នៅសហគមន៍ដីក្រហម បានយកស្បែកជើងយកមកតម្រៀបលើថ្នល់កៅស៊ូដើម្បីឲ្យចេញជាពាក្យ«អភិវឌ្ឍន៍» នៅក្បែរកន្លែងដែលបានបណ្តេញចេញកាលពីបីឆ្នាំមុន។ លោក ចាន់ វិចិត្រ តំណាងប្រជាពលរដ្ឋសហគមន៍ដីក្រហម បាននិយាយថាការអភិវឌ្ឍរបស់រដ្ឋាភិបាលត្រូវតែគិតគូរជីវភាពរបស់ប្រជាជន។ «យើងរៀបស្បែកជើងចេញជាពាក្យអភិវឌ្ឍន៍នេះ គឺចង់ឲ្យផ្ងើសារមួយដល់រដ្ឋាភិបាលថារាល់ការអភិវឌ្ឍទាំងអស់ សូមឲ្យគិតទៅដល់ផលប្រយោជន៍ប្រជាពលរដ្ឋ។ សូមឲ្យគិតពីជីវភាពរបស់ប្រជាពលរដ្ឋ»។ លោក សៀ ភារម្យ នាយកប្រតិបត្តិនៃក្រុមការងារពិសេសសិទ្ធិលំនៅដ្ឋានបាននិយាយថា មានប្រជាពលរដ្ឋប្រមាណ៥២ភាគរយ ដែលជំពាក់បំណុលគេនៅក្នុងសហគមន៍ដែលមិនទាន់បណ្តេញចេញ។ ក៏ប៉ុន្តែនៅពេលដែលបណ្តេញចេញពីសហគមន៍ ប្រជាពលរដ្ឋបានជំពាក់បំណុលគេកើនឡើងរហូតដល់៧០ភាគរយ។ នេះជាផលប៉ះពាល់ដែលប្រជាពលរដ្ឋត្រូវប្រឈម។ «នៅពេលដែលពួកគាត់មិនទាន់បណ្តេញចេញ គឺពួកគាត់អត់ការងារធ្វើត្រឹមតែ៨,៤ភាគរយទេ ហើយក្រោយពីការបណ្តេញពួកគាត់ចេញទៅ គឺយើងឃើញថា កំណើននៃការឥតការងារធ្វើហ្នឹង គឺមានការកើនឡើងដល់ទៅ៣៥,៧ភាគរយ។ ដូច្នេះនេះគឺជាកំណើនមួយដ៏ខ្ពស់ណាស់ ហើយយើងអង្គការសង្គមស៊ីវិលក៏ដូចជាប្រជាពលរដ្ឋសហគមន៍ក្រីក្រនៅក្នុងរាជធានីភ្នំពេញ គឺមានការបារម្ភខ្លាំងណាស់»។ នៅក្នុងរបាយការណ៍របស់ក្រុមការងារពិសេសសិទ្ធិលំនៅដ្ឋាន បាននិយាយថានៅក្នុងទីក្រុងភ្នំពេញមាន៧៤សហគមន៍ ដែលមានប្រជាជនចំនួន១១.៩២២គ្រួសារ ដែលបានទទួលរងនូវការគំរាមកំហែងនិងការបណ្តេញចេញដោយបង្ខំកាលពីឆ្នាំ២០១១៕ This posting includes an audio/video/photo media file: Download Now |
| កម្ពុជាបា្រប់ឱ្យអង្គទូតរក្សាអព្យាក្រិតក្នុងជម្លោះនៅ ចិននិងកូរ៉េ Posted: 24 Jan 2012 07:07 AM PST នៅថ្ងៃអង្គារនេះ លោកនាយករដ្ឋមន្រ្តីហ៊ុន សែន បានណែនាំដល់ឯកអគ្គរាជទូត និងអគ្គកុងស៊ុលកម្ពុជាប្រចាំនៅបរទេសឲ្យប្រកាន់ជំហរអព្យាក្រឹត្យចំពោះបញ្ហាជម្លោះនៅសមុទ្រចិនខាងត្បូង និងនៅឧបទី្វបកូរ៉េ។ លោកនាយករដ្ឋមន្រ្តីហ៊ុន សែន បានលើកឡើងបែបនេះនៅក្នុងពេលជួបសំណេះសំណាលជាមួយឯកអគ្គរាជទូត២៦រូប និងអគ្គកុងស៊ុល៨រូប នៅទីស្តីការក្រសួងការបរទេស ដើម្បីណែនាំអំពីគោលនយោបាយការបរទេស និងសេដ្ឋកិច្ចរបស់ប្រទេសកម្ពុជា។ លោក កួយ គួង អ្នកនាំពាក្យក្រសួងការបរទេសកម្ពុជា បានដកស្រង់ប្រសាសន៍របស់លោកនាយករដ្ឋមន្រ្តីហ៊ុន សែន មកបញ្ចាក់ប្រាប់ក្រុមអ្នករាយការណ៍ព័ត៌មាន ក្រោយកិច្ចប្រជុំថាប្រទេសកម្ពុជាក្នុងនាមជាប្រធានអាស៊ានត្រូវដើរតួនាទីជាអ្នកសម្របសម្រួលបញ្ហាជម្លោះផ្សេងៗ នៅក្នុងតំបន់។ «កម្ពុជាយើងដើរតួជាអ្នកសម្របសម្រួល មិនមែនដើរតួកាន់ជើងម្ខាងទៅប្រឆាំងនឹងភាគីម្ខាងទៀតទេ។ ឧទាហរណ៍បញ្ហាជម្លោះនៅឧបទី្វបកូរ៉េ បញ្ហាជម្លោះនៅសមុទ្រចិនខាងត្បូង យើងដើរតួនាទីសំខាន់ ជាអ្នកសម្របសម្រួល ធើ្វយ៉ាងណាឲ្យបញ្ហាដោះស្រាយដោយសន្តិវិធី»។ លោក អ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជាបានថ្លែងថា វាជារឿងត្រឹមត្រូវចំពោះតួនាទីប្រធានអាស៊ានរបស់ប្រទេសកម្ពុជាដើរស្របនឹងគោលនយោបាយអព្យាក្រឹត្យរបស់ប្រទេសកម្ពុជា។ ប៉ុន្តែតួនាទីប្រធានអាស៊ានមិនអាចត្រឹមតែសម្របសម្រួលជម្លោះនៅសមុទ្រចិនខាងត្បូងប៉ុណ្ណោះទេ ប៉ុន្តែថែមទាំងលើកយកបញ្ហាជម្លោះនោះមកពិភាក្សាជាមួយ ប្រទេសជាសមាជិកដើម្បីធានាសន្តិសុខរួមសម្រាប់តំបន់អាស៊ាន។ «សមាជិកអាស៊ានចង់ឲ្យប្រទេសកម្ពុជាសម្របសម្រួលឲ្យ មានការជជែកគ្នាជារួមរវាងអាស៊ាន និងចិនអំពីជម្លោះហ្នឹង ប៉ុន្តែបើប្រទេសកម្ពុជាអត់ចង់លូកដៃក្នុងជម្លោះនៅសមុទ្រចិនខាងត្បូងហ្នឹងទេ សមាជិកអាស៊ានមិនសប្បាយចិត្តទេ។ ប៉ុន្តែបើកម្ពុជាលើកប្រធានបទហ្នឹងក្នុងការស្នើសុំជួបពិភាក្សាជាមួយចិន ប្រទេសចិនអត់សប្បាយចិត្តទេ ពីព្រោះប្រទេសចិនអត់ចង់ឲ្យអាស៊ានលូកដៃទេ។ ប្រទេសចិនចង់ឲ្យជជែកគ្នាទ្វេភាគី ពីព្រោះការជជែកទ្វេភាគី ប្រទេសចិនមានឥទិ្ធពលទៅលើប្រទេសនីមួយៗជាង។ ឧទាហរណ៍ ចិនជាមួយវៀតណាម ចិនមានឥទិ្ធពលជាង។ ចិនជាមួយហ្វីលីពីន ចិនមានឥទិ្វពលជាង។ ប៉ុន្តែប្រទេសទាំងអស់ហ្នឹងជជែកគ្នាក្នុងនាមអាស៊ាន គឺចិនប្រហែលជាប្រយ័ត្នខ្លួនបន្តិច។ អញ្ចឹង ចិនអត់ចង់ឲ្យអាស៊ានលូកដៃទេ»។ ក្នុងពេលសំណេះសំណាលនេះ លោកនាយករដ្ឋមន្រ្តីហ៊ុន សែន បានជំរុញឲ្យឯកអគ្គរាជទូត និងអគ្គកុងស៊ុល ស្វែងរកការគាំទ្របេក្ខភាពកម្ពុជាសម្រាប់តំណែងសមាជិកមិនអចិន្រៃ្តយ៍ក្រុមប្រឹក្សាសន្តិសុខអង្គការសហប្រជាជាតិ។ ចំណែកឯបញ្ហាជម្លោះព្រំដែនកម្ពុជា ថៃវិញ លោកនាយករដ្ឋមន្ត្រីហ៊ុន សែន បានបញ្ជាក់ថាកម្ពុជាព្យាយាមដោះស្រាយតាមផ្លូវច្បាប់ ការទូត និងនយោបាយ។ ក្នុងពេលជាមួយគ្នានេះ លោកនាយករដ្ឋមន្រ្តីហ៊ុន សែន ក៏បានជំរុញឲ្យឯកអគ្គរាជទូត និងអគ្គកុងស៊ុល ស្វែងរកទីផ្សារថ្មីៗបន្ថែមទៀត ជាពិសេសទីផ្សារនៅតំបន់អាស៊ាន តំបន់អាស៊ីខាងកើតនិងតំបន់មជ្ឈិមបូព៌ា ព្រមទាំងខំប្រឹងប្រែងទាក់ទាញអ្នកវិនិយោគឲ្យមកបណ្តាក់ទុននៅកម្ពុជានិងអ្នកទេសចរណ៍បរទេស៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ២៤ មករា ព្រឹក Posted: 24 Jan 2012 12:27 AM PST ភូមា៖ ក្រុមអង្គការការពារសិទ្ធិមនុស្សអន្ដរជាតិនិយាយថាភូមាបានបង្ហាញសញ្ញានៃការកែទម្រង់នៅឆ្នាំ២០១១ តែមិនបានដោះស្រាយបញ្ហាធ្ងន់ធ្ងរនៃការរំលោភលើសិទ្ធិមនុស្សទេ។ ក្នុងសេចក្ដីរាយការណ៍ផ្សព្វផ្សាយកាលពីថ្ងៃអាទិត្យ អង្គការឃ្លាំមើលសិទ្ធិមនុស្ស Human Rights Watch នៃទីក្រុងញូវ យ៉កបានឲ្យតម្លៃទៅរដ្ឋាភិបាលភូមាដែលបានដោះលែងអ្នកទោសនយោបាយជាច្រើនរយនាក់ តែបានអំពាវនាវឲ្យមានដំណើរការឯករាជ្យដើម្បីវាស់វែងស្ថានការណ៍និងទីកន្លែងរបស់អ្នកទោសដទៃ។ ជប៉ុន៖ ក្រុមអ្នកជំនាញពីអង្គការថាមពលបរិមាណូរបស់អង្គការសហប្រជាជាតិ បានចាប់ផ្ដើមធ្វើទស្សនកិច្ចមួយសប្ដាហ៍នៅជប៉ុន តាមសេចក្ដីស្នើសុំរបស់រដ្ឋាភិបាល ដើម្បីជួយធ្វើការវាស់វែងសុវត្ថិភាពនៅក្នុងរោងចក្រនុយក្លេអ៊ែរជប៉ុន។ អ៊ីរ៉ង់៖ សហភាពអឺរ៉ុបបានចេញច្បាប់ហាមប្រាមមិនឲ្យទិញប្រេងពីអ៊ីរ៉ង់ ហើយបានរំាងខ្ទប់ទ្រព្យសម្បត្ដិរបស់ធនាគារកណ្ដាលរបស់ប្រទេសនោះ។ នេះជាផ្នែកមូយនៃយុទ្ធនាការរបស់បស្ចិមប្រទេសដែលដាក់សម្ពាធ មកលើរដ្ឋាភិបាលទីក្រុងតេហេរ៉ង់ ដើម្បីឲ្យព្យួរកម្មវិធីនុយក្លេអ៊ែរដ៏ចម្រូងចម្រាស់មួយ។ កែនយ៉ា៖ តុលាការឧក្រិដ្ឋកម្មអន្ដរជាតិបានចេញដីកាកោះហៅឲ្យជនជាតិកែនយ៉ាល្បីឈ្មោះ៤នាក់មកឲ្យតុលាការកាត់ក្ដីពីបទចោទប្រកាន់ថា ជនទាំងនោះបានជួយរៀបចំបង្កើតអំពើឃោរឃៅអស់រយៈពេល៤ ឆ្នាំក្រោយពីការបោះឆ្នោតថ្នាក់ជាតិ។ ស៊ីរី៖ បានបដិសេធសេចក្ដីស្នើជាថ្មីរបស់សម្ព័ន្ធភាពអារ៉ាប់ដើម្បីបញ្ចប់ការបះបោររយៈពេល១០ខែប្រឆាំងរដ្ឋាភិបាលស៊ីរី។ សេចក្ដីស្នើដែលផ្ដើមគំនិត ទទួលការយល់ព្រមពីក្រុមរដ្ឋមន្ដ្រីការបរទេសនៃសម្ព័ន្ធភាពអារ៉ាប់ ក្នុងទីក្រុងគែរ កាលពីថ្ងៃអាទិត្យតម្រូវឲ្យប្រធានាធិបតីស៊ីរី គឺលោកបាសា អាល់ អាសាដ Bashar Al Assad បង្វែរអំណាចទៅឲ្យអនុប្រធានាធិបតីរបស់លោក ហើយអនុញាតឲ្យមានការបង្កើតរដ្ឋាភិបាលសាមគ្គីជាតិមូយ ចូលរួមដោយក្រុមប្រឆាំងក្នុងរយៈពេល ពីរខែបន្ទាប់។ អេហ្ស៊ីប៖ សភាជាន់ទាបថ្មីទើបបានត្រូវតែងតាំងនៅក្នុងប្រទេសអេហ្ស៊ីប បានបើកកិច្ចប្រជុំលើកដំបូង ដោយមានអ្នកតាក់តែងច្បាប់ភាគច្រើន មកពីគណបក្សអ៊ីស្លាមចាប់តាំងពីមានការបះបោរបណ្ដេញប្រធានាធិបតីកាន់អំណាចផ្ដាច់ការ ហ៊ុសនី មូបារ៉ាក់ចេញពីអំណាចកាលពីមូយឆ្នាំមុន ។ ប៉ាគីស្ថាន៖ យោធាបានច្រានចោលជាផ្លូវការនូវលទ្ធផលការស៊ើបអង្កេតរបស់សហរដ្ឋអាមេរិកអំពីការវាយប្រហារដោយយន្ដហោះ អូតង់ កាលពីឆ្នាំមុនដែលបណ្ដាលឲ្យស្លាប់ទាហានបាគីស្ថាន២៤នាក់នៅតាមព្រំដែនជាមួយអាហ្វហ្គានីស្ថាន។ រុស្ស៊ី៖ មន្ដ្រីរៀបចំការបោះឆ្នោតជាតិនិយាយថាមេដឹកនាំគណបក្សប្រឆាំងគឺលោក ហ្រ្គ៊ីហ្គោរី យ៉ាវលីនស្គី Grigory Yavlinsky បានត្រូវហាមឃាត់មិនឲ្យឈរឈ្មោះប្រកួតតទល់លោក វ្លាឌីមៀរ ពូទីន ដោយសារតែលោកមានបញ្ហាក្នុងការចុះឈ្មោះក្នុងបញ្ជីបោះឆ្នោត។ សហរដ្ឋអាមេរិក៖ ការប្រកួតដណ្ដើមយកបេក្ខភាពប្រធានាធិបតី នៃគណបក្សសាធារណរដ្ឋ បានវិលមកកាន់រដ្ឋហ្វ្លរីដា Florida ដែលមានមនុស្សរស់នៅច្រើនសន្ធឹក ដែលនឹងធ្វើការដេញដោលគ្នាជាលើកទី១៨រវាងបេក្ខជនសេសសល់នៅយប់ថ្ងៃច័ន្ទ។ <!--AV--> This posting includes an audio/video/photo media file: Download Now |
| គេហទំព័រធំៗរបស់អាមេរិកប្រឆាំងនឹងច្បាប់រឹតបណ្តឹងប្រព័ន្ធអ៊ីនធឺណេត Posted: 24 Jan 2012 01:22 PM PST ក្រុមអ្នកធ្វើការទាក់ទងនឹងសិទ្ធិសេរីភាពនិងការបញ្ចេញមតិក្នុងប្រទេសកម្ពុជាបានចូលរួមជាមួយ គេហទំព័រធំៗលើពិភពលោកនៅអាមេរិកដូចជា Wikipedia Google និង Facebook ដែលចាត់ទុកថា សេចក្តីស្នើច្បាប់ ឬសេចក្តីព្រាងច្បាប់បញ្ឈប់ការលួចថតចម្លងតាមប្រព័ន្ធអ៊ីនធឺណេតដែលក្រុមអ្នកតាក់តែងច្បាប់ស.រ.អាមួយចំនួនកំពុងរៀបចំនោះ ជាការបំបិទសេរីភាពលើប្រព័ន្ធអ៊ីនធឺណេត។ សេចក្តីព្រាងច្បាប់បញ្ឈប់ការលួចថតចម្លងតាមប្រព័ន្ធអ៊ីនធឺណិត ហៅថា Stop Online Piracy Act ហៅកាត់ថាសូប៉ា (SOPA) ត្រូវសមាជិកសភា និងសមាជិកព្រឹទ្ធសភាអាមេរិកមួយចំនួនតាក់តែងឡើងក្នុងគោលបំណងទប់ស្កាត់ការរំលោភលើកម្មសិទ្ធិបញ្ញា ទំនិញក្លែងក្លាយ និងហាមមិនឲ្យផ្សព្វផ្សាយពាណិជ្ជកម្មជាប្រព័ន្ធ ដោយបង្កើតឲ្យមានការបង់លុយ ហាមម៉ាស៊ីនស្រាវជ្រាវឯកសារឬ Search engines ដើម្បីភ្ជាប់ទៅកាន់គេហទំព័រផ្សេងទៀត។ សេចក្តីព្រាងច្បាប់នេះមានការដាក់ទោសព្រហ្មទណ្ឌផងដែរ។ តែម្ចាស់គេហទំព័រធំៗនៅស.រ.អានិងសកម្មជនសិទ្ធិមនុស្ស សកម្មជនផ្នែកសេរីភាពបញ្ចេញមតិនៅកម្ពុជា ចាត់ទុកសេចក្តីព្រាងច្បាប់នេះថានឹងនាំឲ្យមានការរឹតបន្តឹងសេរីភាពព័ត៌មានលើប្រព័ន្ធអ៊ីនធឺណេត។ លោក អ៊ូ វីរៈនាយកមជ្ឈមណ្ឌលសិទ្ធិមនុស្សកម្ពុជាបានអះអាងថាលោកគាំទ្រយុទ្ធនាការប្រឆាំង សេចក្តីព្រាងច្បាប់សូប៉ានេះ។ «សូប៉ា (SOPA)ហ្នឹងខ្ញុំមើលទៅរបៀបដែលសរសេរមានការប៉ះពាល់ដល់ការប្រើប្រព័ន្ធអ៊ីនធឺណេត លើពិភពលោក។ ហើយសម្រាប់ប្រទេសកម្ពុជានៅពេលណាប្រព័ន្ធអ៊ីនធឺណេតលើពិភពលោកមាន បញ្ហា វាអាចមានពាក់ព័ន្ធដល់ស្រុកខ្មែរដែរ។តែរឿងនេះជារឿងត្រឹមត្រូវសម្រាប់សិទ្ធិសេរីភាព អ៊ីនធឺណេតទូទៅ»។ តាមសេចក្តីព្រាងច្បាប់សូប៉ាក្រុមហ៊ុនអ៊ីនធឺណេតឬគេហទំព័រតាមប្រព័ន្ធអ៊ីនធឺណេតជាច្រើនដូចជា Wikipedia Google Facebook និង Youtube និងគេហទំព័រផ្សេងៗទៀតអាចត្រូវបិទទ្វារនិងរងការប្តឹងផ្តល់ ដោយសារតែការដាក់ឬភ្ជាប់រូបភាពវីដេអូជាកុនឬឯកសាររបស់ក្រុមហ៊ុនផ្សេងទៀត។ រដ្ឋាភិបាល នឹងមានអំណាចខ្លាំងក្លាដើម្បីបិទក្រុមហ៊ុនណាមួយ ឬឲ្យអាជ្ញាប័ណ្ណស្រេចចិត្ត។ លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកព័ត៌មានបានជំទាស់ ទៅនឹងការរិតត្បិត សេរីភាពលើប្រព័ន្ធអ៊ីនធឺណេត។ លោកយល់ថាការរំលោភបំពានច្បាប់នានាលើក្រុមហ៊ុន ឬកម្មសិទ្ធិ ឬជាបញ្ហាអ្វីផ្សេងទៀតនោះ គឺមានច្បាប់ផ្សេងៗសម្រាប់ដាក់ទោសទណ្ឌហើយ។ «អញ្ចឹងខ្ញុំគិតថាមានការព្រួយបារម្ភហើយតែយើងគិតថាយើងមានច្បាប់ដទៃទៀតដើម្បីការពារការ រំលោភទៅលើកម្មសិទ្ធិបញ្ញា។ អញ្ចឹងយើងមានច្បាប់មួយផ្សេងដោយឡែក។ អញ្ចឹងខ្ញុំគិតថាគួរតែ បើកទូលាយទៅ»។ លោកណារិទ្ធថ្លែងអះអាងបន្តថាសម្រាប់លោកៗគិតថាលោកអាចជួយបកទៅវិញគឺថាគួរធ្វើឲ្យអ្នកយក ព័ត៌មាន អ្នកដាក់ព័ត៌មានផ្សេងៗលើគេហទំព័រ វិបសាយ មានវិជ្ជាជីវៈខ្ពស់។ គេហទំព័រ Wikipedia Google និង facebook ដែលជាគេហទំព័រមានអ្នកចូលទស្សនាជាច្រើនរយ លាននាក់ក្នុងមួយខែ និង ផ្ទុកឯកសារជាច្រើនលាន ហើយប្រើប្រាស់សម្រាប់ការទាក់ទងយ៉ាងទាន់ ចិត្តតាមប្រព័ន្ធអេឡិកត្រូនិកដោយសេរីនោះ បានបិទគេហទំព័ររបស់ខ្លួនកាលពីថ្ងៃពុធរយៈពេល ២៤ម៉ោង ដោយដាក់ផ្ទៃពណ៍ខ្មៅដើម្បីប្រឆាំងទៅនឹងសេចក្តីព្រាងច្បាប់សូប៉ា(SOPA)។គេពុំឃើញមានគេហទំព័រក្នុងប្រទេសកម្ពុជាបានចូលរួមក្នុងយុទ្ធនាការរបស់ Wikipedia និង គេហទំព័រឬវិបសាយដទៃទៀតទេ។ ទោះជាយ៉ាងណាក៏ដោយលោក ផៃ ស៊ីផានអ្នកនាំពាក្យនៃទីស្តីការគណៈរដ្ឋមន្ត្រីកម្ពុជាបាន អះអាងថាការធ្វើច្បាប់នេះហាក់ដូចជាបង្កើនឧបសគ្គនៃការដឹង ការយល់និងការដោះស្រាយជីវភាពរបស់ ប្រជាពលរដ្ឋក្នុងលោកទាំងវិស័យបច្ចេកវិជ្ជានិងវិស័យអភិវឌ្ឍន៍សេដ្ឋកិច្ច។ «ខ្ញុំគាំទ្រការប្រឆាំងនេះឯងដើម្បីកុំឲ្យមានគម្លាតនៃបច្ចេកវិទ្យារវាងប្រជាជាតិអ្នកមានឬរវាងក្រុមហ៊ុន អ្នកមានដែលប្រើប្រាស់នូវបញ្ញាបារមីមនុស្សជាតិដែលមិនផ្តល់នូវអ្វីដែលជាលទ្ធភាពនិងជាសេចក្តី ត្រូវការរបស់មនុស្សជាតិ»។ លោក ផៃ ស៊ីផានអះអាងដែរថាប្រទេសអ្នកមានតែងតែធ្វើច្បាប់ដើម្បីការពារខ្លួនឯង ដែលមិនបម្រើឲ្យ មនុស្សជាតិទាំងអស់ក្នុងពិភពលោកតាមអ្វីដែលជាផែនការអភិវឌ្ឍន៍សហស្សវត្សរ៍របស់អ.ស.បនោះទេ។ សេចក្តីប្រកាសព័ត៌មានរបស់គេហទំព័រ Wikipedia ដែលវីអូអេទទួលបាននៅថ្ងៃនេះបានហៅសេចក្តីព្រាងច្បាប់ដែលស្នើដោយសមាជិកសភាអាមេរិកាំងខ្លះនោះថា ជាច្បាប់អាក្រក់ជាងជំងឺ ហើយធ្វើឲ្យខូចខាតដល់សេរីភាព និងភាពបើកចំហនៃប្រព័ន្ធអ៊ីនធឺណេត។ Wikipedia បានបន្ថែមថា៖ «សេចក្តីព្រាងច្បាប់សូប៉ានឹងបង្កើតគម្រោងសម្រាប់ការរិតត្បិត និងការគាបសង្កត់នៅពេល អនាគត»។ សេចក្តីព្រាងច្បាប់សូប៉ាត្រូវសមាជិកសភាមួយចំនួនផ្តួចផ្តើមឲ្យមានការគាំទ្រតាំងពីខែតុលាឆ្នាំ ២០១១។សេចក្តីព្រាងច្បាប់នេះត្រូវគេរាយការណ៍មកថាមានការគាំទ្រពីក្រុមហ៊ុនពាណិជ្ជកម្មជាច្រើន ដូចជាហូលីវូដជាដើម។ តែសេចក្តីព្រាងច្បាប់នេះត្រូវបានច្រានចោលពីក្រុមដែលស្រឡាញ់សេរីភាពបញ្ចេញមតិវិញ។បើតាមសេចក្តីប្រកាសព័ត៌មានរបស់ Wikipediaបានអំពាវនាវឲ្យពលរដ្ឋអាមេរិកាំងគ្រប់រដ្ឋ គ្រប់តំបន់ ទាក់ទងជាមួយនឹងសមាជិកសភា និងព្រឹទ្ធសភាប្រចាំរដ្ឋរបស់ខ្លួនកុំឲ្យគាំទ្រសេចក្តីស្នើច្បាប់សូប៉ា៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
