VOA News: ព័ត៌មាន: “គណៈកម្មការអន្តរជាតិប្រជុំរកយុទ្ធសាស្ត្រអភិរក្ស និងអភិវឌ្ឍអង្គរ” plus 6 more |
- គណៈកម្មការអន្តរជាតិប្រជុំរកយុទ្ធសាស្ត្រអភិរក្ស និងអភិវឌ្ឍអង្គរ
- ក្រុមហ៊ុនចិនចាប់ផ្តើមរុករកប្រេង និងឧស្ម័ននៅសមុទ្រកម្ពុជា
- ព័ត៌មានអន្តរជាតិវីអូអេ ១៤ ធ្នូ យប់
- សេចក្តីព្រាងច្បាប់អង្គការលើកទីបួននៅតែបង្កឧបសគ្គ
- រដ្ឋសភាគ្រោងប្រជុំដកអភ័យឯកសិទ្ធិតំណាងរាស្ត្រម្នាក់របស់គណបក្សប្រឆាំង
- នួន ជា៖ ខ្មែរក្រហមមិនមែនជាអាយ៉ងរបស់វៀតណាម
- ព័ត៌មានអន្តរជាតិវីអូអេ ១៤ ធ្នូ ព្រឹក
| គណៈកម្មការអន្តរជាតិប្រជុំរកយុទ្ធសាស្ត្រអភិរក្ស និងអភិវឌ្ឍអង្គរ Posted: 14 Dec 2011 12:15 PM PST គណៈកម្មការសម្របសម្រួលអន្តរជាតិសម្រាប់កិច្ចគាំពារនិងអភិវឌ្ឍន៍តំបន់អង្គរហៅកាត់ថាICCបានបើកកិច្ចប្រជុំប្រចាំឆ្នាំលើកទី១៨របស់ខ្លួននៅក្នុងខេត្តសៀមរាបដើម្បីរកយុទ្ធសាស្រ្តបន្ថែមទៀតក្នុងការអភិរក្ស និងអភិវឌ្ឍន៍រមនីយដ្ឋានប្រវត្តិសាស្រ្តអង្គរ។ កិច្ចប្រជុំលើកនេះដែលមានការចូលរួមដោយអ្នកជំនាញការជាតិ និងអន្តរជាតិប្រមាណ៣០០នាក់នោះផ្តោតសំខាន់ទៅលើការងារគ្រប់គ្រង និងបង្ការគ្រោះមហន្តរាយធម្មជាតិដែលបង្កឡើងដោយទឹក ដែលបញ្ហានេះបានធ្វើឲ្យមានការប៉ះពាល់ដល់តំបន់ប្រាសាទកាលពីជាងពីរខែមុន។ កិច្ចប្រជុំនេះ ក៏បានជជែកអំពីការបង្កើតផែនទីហានិភ័យមួយផងដែរដើម្បីជួយសង្គ្រោះប្រាសាទឲ្យបានទាន់ពេលវេលា។ លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តី ការគណៈរដ្ឋមន្ត្រី និងជាប្រធានអាជ្ញាធរអប្សរា បានមានប្រសាសន៍ថា បញ្ហាទឹកគឺជាកង្វល់មួយដ៏ធំ ហើយការជួបប្រទះគ្រោះធម្មជាតិជំនន់ទឹកភ្លៀងកាលពីពេលកន្លងមកនេះដែលបានធ្វើឲ្យប៉ះពាល់ដល់ប្រាសាទមួយចំនួននៅក្នុងតំបន់អង្គនោះគឺជាមេរៀនសម្រាប់ការវិភាគទៅពេលអនាគត។ លោកឧបនាយករដ្ឋមន្ត្រី សុខ អាន បានថ្លែងថា នឹងមានការបង្កើតក្រុមពិសេសមួយដើម្បីឆ្លើយតបទៅនឹងគ្រោះធម្មជាតិ ដែលអាចកើតឡើងជាយថាហេតុ។ «ហើយក្នុងពេលនេះនឹងបង្កើតក្រុមការងារពិសេសដែលគ្រប់គ្រងទៀងទាត់ ដែលអាចធ្វើអន្តរាគមន៍បន្ទាន់រាល់ពេលមានតម្រូវការ។ ដូច្នេះខ្ញុំសូមអាជ្ញាធរអប្សរាធ្វើឲ្យបានឆាប់រហ័សបំផុតក្នុងលក្ខណៈប្រសើរបំផុតនូវក្រុមការងារពិសេសនេះ។ ក្រុមការងារពិសេសនេះត្រូវមានលក្ខណៈអចិន្ត្រៃយ៍ ទទួលព័ត៌មានច្បាស់ មានមធ្យោបាយ និងមាន សមត្ថភាពប្រមែប្រមូលកម្លាំងឲ្យបានឆាប់រហ័សក្នុងករណីមានភាពចាំបាច់»។ លោក សុខ អាន បានមានប្រសាសន៍ទៀតថា ការគ្រប់គ្រងប្រកបដោយចេរភាពនៃរមនីយដ្ឋានបេតិកភណ្ឌពិភពលោក គឺទាមទារឲ្យមានសកម្មភាពទៀតទាត់ដែលមានការចូលរួមពីគ្រប់វិស័យ និងសហគមន៍ផងដែរ។ បន្ថែមលើការជជែកអំពីការងារគ្រប់គ្រងគ្រោះមហន្តរាយធម្មជាតិលើប្រាសាទបូរាណនោះ កិច្ចប្រជុំគណៈកម្មការសម្របសម្រួលអន្តរជាតិសម្រាប់កិច្ចគាំពារនិងអភិវឌ្ឍន៍តំបន់អង្គរបានអនុម័តអនុសាសន៍ជាច្រើនដែលបានលើកឡើងនៅក្នុងកិច្ចប្រជុំក្រុមបច្ចេកទេសកាលពីពាក់កណ្តាលឆ្នាំនេះ ដែលផ្តោតលើគម្រោងការងារអភិរក្ស និងអភិវឌ្ឍន៍រមនីយដ្ឋានប្រវត្តិសាស្ត្រអង្គរដែលជាសម្បត្តិបេតិកភណ្ឌពិភពលោក៕ This posting includes an audio/video/photo media file: Download Now |
| ក្រុមហ៊ុនចិនចាប់ផ្តើមរុករកប្រេង និងឧស្ម័ននៅសមុទ្រកម្ពុជា Posted: 14 Dec 2011 11:13 AM PST ក្រុមមន្ត្រីបាននិយាយនៅថ្ងៃពុធនេះថា ក្រុមហ៊ុនប្រេង និងឧស្ម័នដ៏ធំមួយរបស់ប្រទេសចិនបានចាប់ផ្តើមជីកអណ្តូងប្រេងកាតលើកទី១នៅក្នុងប្លុក F ក្នុងខែធ្នូនេះ។ ក្រុមហ៊ុនCNOOC ដែលជាក្រុមហ៊ុនប្រេង និងឧស្ម័នចិនដ៏ធំមួយបានទទួលការអនុញ្ញាតឲ្យរុករកប្រេង និងឧស្ម័ននៅក្នុងប្លុក F នៅឆ្នាំ២០០៧ដែលមានទំហំជាង៧.០០០គីឡូម៉ែត្រការ៉េ។ លោក លី ហ្វានរ៉ុង (Li Fanrong) នាយកប្រតិបត្តិនៃក្រុមហ៊ុន CNOOC បានជម្រាបលោកឧបនាយករដ្ឋមន្ត្រី សុខ អាន ថា ក្រុមហ៊ុនរបស់លោកនឹងជីកអណ្តូងលើកទី១របស់ខ្លួននៅក្នុងខែនេះនៅប្លុក F ដែលជាទង្វើមួយដែលភាគីទាំងពីរនិយាយថា ជាកិច្ចសហប្រតិបត្តិការទ្វេភាគី ជាប្រវត្តិសាស្ត្រ។ នេះបើយោងតាមលោកឯក ថា អ្នកនាំពាក្យនៃអង្គភាពព័ត៌មាន និងប្រតិកម្មរហ័សប្រចាំទីស្តីការគណៈរដ្ឋមន្ត្រី។ លោកឧបនាយករដ្ឋមន្ត្រី សុខ អាន បានស្វាគមន៍ចំពោះសេចក្តីសម្រេចចិត្តរបស់ក្រុមហ៊ុន និងស្នើសុំក្រុមហ៊ុនឲ្យជួយបណ្តុះបណ្តាលបច្ចេទេសជំនាញផ្នែករុករកប្រេង និងឧស្ម័ន ដល់មន្ត្រីអាជ្ញាធរប្រេងកាតជាតិកម្ពុជា។ «លោកឧបនាយករដ្ឋមន្ត្រី សុខ អាន បានថ្លែងថា រដ្ឋាភិបាលកម្ពុជាស្វាគមន៍ចំពោះដំណើរការរុករកធនធានរ៉ែប្រេងកាត និងឧស្ម័ន និងដំណើរការជីកអណ្តូងលើកទី១របស់ក្រុមហ៊ុន CNOOC នៅប្រទេសកម្ពុជា។ ក្រុមហ៊ុន CNOOC របស់ចិនមកធ្វើការជីកអណ្តូងលើកទី១នៅក្នុងប្លុក Fនេះ មានតម្លៃប្រមាណ២០លានដុល្លារអាមេរិក»។ លោក លី ហ្វានរ៉ុង បានយល់ព្រមជួយបណ្តុះបណ្តាលមន្ត្រីអាជ្ញាធរប្រេងកាតជាតិកម្ពុជាឲ្យយល់ដឹងពីការងារបច្ចេកទេស និងជំនាញរុករកប្រេងកាត។ «លោក លី ហ្វានរ៉ុង បានលើកឡើងថា នេះគឺជាថ្ងៃប្រវត្តិសាស្ត្រមួយទៀត ដែលកម្ពុជា និងសាធារណរដ្ឋប្រជាមានិតចិនបានទទួលតាមរយៈការបង្ហាញនូវទំនាក់ទំនងជាយុទ្ធសាស្ត្ររយៈពេលវែងរវាងប្រទេសទាំងពីរ»។ លោក យឹម សុវណ្ណ អ្នកនាំពាក្យគណបក្សសម រង្ស៊ី បាន ថ្លែងថាគណបក្សសម រង្ស៊ី មានការព្រួយបារម្ភអំពីការដែលរដ្ឋាភិបាលកម្ពុជាមិនទាន់មានច្បាប់ទាក់ទងនឹងការធ្វើអាជីវកម្មប្រេងកាត និងការគ្រប់គ្រងចំណូលប្រេងកាតនៅឡើយ។ «អ្នកដឹកនាំគ្មានឆន្ទៈនយោបាយ។ អ្នកដឹកនាំប្រព្រឹត្តអំពើពុករលួយហើយ។ ផលប្រយោជន៍នឹងបានទៅក្រុមហ៊ុន និងអ្នកដឹកនាំពុករលួយ ហើយផលប្រយោជន៍ធ្លាក់មកដល់ប្រជាពលរដ្ឋតិចតួចបំផុត»។ លោក ម៉ម សម្បត្តិ នាយកប្រតិបត្តិនៃសម្ព័ន្ធភាពកម្ពុជាដើម្បីតម្លាភាពចំណូលធនធាន បានថ្លែងថា នេះគឺជាជំហានវិជ្ជមានមួយឆ្ពោះទៅរកការធ្វើអាជីវកម្មប្រេងដែលអាចមានតម្លាភាព។ «ខ្ញុំគិតថា វាជាដំណើរការវិវត្តន៍មួយបន្ថែមទៀតពីព្រោះក្រុមហ៊ុន CNOOC នេះបានធ្វើការប៉ាន់ប្រមាណផលប៉ះពាល់បរិស្ថាននៅប្លុក F។ គេដំណើរការនៅប្លុកF ហើយបង្ហាញនូវទំហំថវិកានៃការរុករកប្រេង និងឧស្ម័ននៅប្លុកF ។ នេះគឺជាសក្តានុពលមួយផ្សេងទៀត សម្រាប់ការវិវឌ្ឍនៅក្នុងប្រទេសម្ពុជា»។ កម្ពុជាមានប្លុកសម្រាប់រុករកប្រេងកាត និងឧស្ម័នចំនួនប្រាំមួយកន្លែងនៅក្នុងសមុទ្រកម្ពុជាដែលគ្រប់គ្រងដោយក្រុមហ៊ុនចិន រុស្សី អាមេរិក បារាំង និងជប៉ុន។ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ១៤ ធ្នូ យប់ Posted: 14 Dec 2011 08:22 AM PST អេហ៊្សីប៖ ពលរដ្ឋអេហ៊្សីប បានចាប់ផ្ដើមធ្វើការបោះឆ្នោតសភាតំណាងរាស្ត្រជុំទីពីរ បន្ទាប់ពីការបោះឆ្នោតជុំទីមួយដែលបាននាំមុខដោយគណបក្សអ៊ីស្លាម។ មណ្ឌលបោះឆ្នោតបានបើកនៅក្នុងតំបន់ចំនួន៩ នៅថ្ងៃពុធនេះ រួមមានតំបន់ អាសវ៉ាន បេនីស៊ូអិហ្វ ហ្ស៊ីហ្សា អ៊ិសមេល្យ៉ា ស៊ូអេស និង សូហាហ្គ។ ស៊ីរី៖ ក្រុមសកម្មជនសិទ្ធិមនុស្សបាននិយាយថា កងកម្លាំងសន្ដិសុខស៊ីរី បានបាញ់ទៅលើរថយន្ដមួយគ្រឿងនៅក្នុងខេត្ដហាម៉ាភាគកណ្ដាលនៃប្រទេសដែលកំពុងមានការវឹកវរ បណ្ដាលឲ្យមនុស្ស៥នាក់ស្លាប់។ បាគីស្ថាន៖ លោក លេអន ប៉ាណិតតា រដ្ឋមន្ដ្រីក្រសួងការពារជាតិស.រ.អ បាននិយាយនៅថ្ងៃពុធនេះថា កងទ័ពចម្រុះដែលដឹកនាំដោយអ.ស.ប កំពុងតែឈ្នះសង្គ្រាមនៅក្នុងប្រទេសអាហ្វហ្គានីស្ថាន ស្របពេលដែលកងទ័ពបរទេសបន្ដផ្ទេរសន្ដិសុខនៃប្រទេសនេះទៅឲ្យកងកម្លាំងអាហ្វហ្គានីស្ថានវិញ គឺមុនថ្ងៃកំណត់នៅឆ្នាំ២០១៤។ អាមេរិក៖ គេរំពឹងថា រដ្ឋសភាស.រ.អ នៅចុងអាទិត្យនេះនឹងអនុម័តសេចក្ដីព្រាងច្បាប់មួយដែលនឹងបង្កកប្រាក់រហូតទៅដល់៧០០លានដុល្លារទៅឲ្យប្រទេសបាគីស្ថាន ពីព្រោះមានការភ័យខ្លាចថារដ្ឋាភិបាលបាគីស្ថានមិនបានធ្វើអ្វីឲ្យបានគ្រប់គ្រាន់ដើម្បីកម្ចាត់ការរីកសាយនៃគ្រាប់បែកបរមាណូ។ បែលហ្ស៊ិក៖ នៅក្នុងសន្និសីទកាសែតមួយ អាជ្ញាធរបានឲ្យដឹងថាមានមនុស្សពីរនាក់បានស្លាប់ និងប្រាំនាក់ផ្សេងទៀតបានរងរបួសជាទម្ងន់ក្នុងការវាយប្រហារមួយនៅក្នុងប្រទេសបែលហ្ស៊ិក ។ ប៉ូលិសប៊ែលហ្ស៊ិកបានឲ្យដឹងថា គេបានរកឃើញសពស្ដ្រីម្នាក់នៅក្នុងផ្ទះរបស់បុរសប្រដាប់អាវុធដែលបានបាញ់មនុស្សយ៉ាងតិចដប់នាក់នៅក្នុងទីក្រុងលីយ៊ែសនាភាគខាងកើតប្រទេស កាលពីថ្ងៃអង្គារ។ អាមេរិក៖ លោកប្រធានាធិបតី បារ៉ាក់ អូបាម៉ា នឹងធ្វើទស្សនកិច្ចនៅមូលដ្ឋានយោធាមួយនៅក្នុងរដ្ឋណរថ៍ការ៉ូឡាយណា (North Carolina) នាភាគអាគ្នេយ៍នៃស.រ.អ នៅថ្ងៃពុធខាងមុខនេះ ដែលនៅទីនោះ សេតវិមានបានឲ្យដឹងថា លោកនឹងថ្លែងអំណរគុណចំពោះកងទ័ព ដែលបានបំពេញភារកិច្ចនៅក្នុងប្រទេសអ៊ីរ៉ាក់។ <!--AV--> This posting includes an audio/video/photo media file: Download Now |
| សេចក្តីព្រាងច្បាប់អង្គការលើកទីបួននៅតែបង្កឧបសគ្គ Posted: 14 Dec 2011 10:24 AM PST សេចក្តីព្រាងច្បាប់អង្គការលើកទីបួន ដែលទើបបានចែកចាយ បានបន្ធូរបន្ថយខ្លះដល់ប្រតិបត្តិការរបស់អង្គការសង្គមស៊ីវិល ប៉ុន្តែនៅមានចំណុចច្រើនដែលបន្សល់ភាពមិនច្បាស់លាស់ដែលពួកគេនឹងបន្តទាមទារទៀត។ សេចក្តីព្រាងច្បាប់នេះត្រូវបានចែកចាយដល់អង្គការក្រៅរដ្ឋាភិបាលកាលពីថ្ងៃច័ន្ទ គឺផ្តល់ឱ្យតែអង្គការណាដែលរដ្ឋាភិបាលអញ្ជើញឱ្យចូលរួមក្នុងអង្គសិក្ខាសាលានៅថ្ងៃទី១៩ ខែធ្នូនេះដើម្បីពិភាក្សាគ្នាមុននឹងបញ្ជូនទៅគណៈរដ្ឋមន្រ្តី ពិនិត្យនិងសម្រេច។ លោកសុខ សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា បានបញ្ជាក់ថា សេចក្តីព្រាងច្បាប់នេះបានបន្ទន់ទៅតាមការស្នើសុំកន្លងមករបស់អង្គការក្រៅរដ្ឋាភិបាល។ ប៉ុន្តែលោកលើកឡើងថា មានការព្រួយបារម្ភមួយចំនួនទៀត ដូចជាមាត្រាទីប្រាំនៃសេចក្តីព្រាងច្បាប់នេះដែលចែងពីការបង្កើតអង្គការសមាគមដោយសេរី មិនចាំបាច់មានការជូនដំណឹងជាមុនទេ ប៉ុន្តែបែរជាកំណត់ថា អង្គការសមាគមនោះនឹងមិនទទួលបានសមត្ថភាពតាមផ្លូវច្បាប់ទេ បើគេមិនបានចុះបញ្ជី។ លោកបញ្ជាក់ថា លោកនឹងបន្តទាមទារចំណុចនេះ។ «យោងតាមបទពិសោធន៍របស់ខ្ញុំ ខ្ញុំគិតថា ប្រសិនបើអង្គការណាដែលក្នុងករណីដែលច្បាប់បានទទួលស្គាល់អត្ថិភាព ឬក៏វត្តមានរបស់អង្គការនៅពេលដែលគេបង្កើតហើយ បែបនេះ ដូច្នេះត្រូវតែបើកឱ្យអង្គការសមាគមនោះបើកដោយសេរី។ ហើយបើធ្វើទៅវាខុសច្បាប់ត្រង់ណាមួយ យើងដាក់ទណ្ឌកម្មតាមផ្លូវច្បាប់ទៅ។ ក៏ប៉ុន្តែមិនត្រូវបង្អាក់ដំណើរការទេ។ គេមិនទាន់ធ្វើផង យើងទៅបង្អាក់គេ។ ហើយក្នុងចំណុចនេះប្រហែលជាយើង អង្គការសង្គមស៊ីវិល ទាមទារឱ្យរដ្ឋាភិបាលបើកចំហចំណុចត្រង់ហ្នឹង»។ មានចំណុចគួរជាទីព្រួយបារម្ភមួយចំនួនទៀតដែលក្រុមអង្គការសង្គមស៊ីវិលសម្តែងឡើង ដែលរួមមានការគ្មានការការពារប្រឆាំងនឹងការបដិសេធខុសទំនងមិនព្រមចុះបញ្ជីឈ្មោះ និងការរំលាយអង្គការ។ មានចំណុចមិនច្បាស់លាស់ ថាតើក្រុមបណ្តាញសង្គមដែលធ្វើសកម្មភាពផ្សេងៗ ដូចជាប្រឆាំងការជួញដូរស្ត្រីជាដើម ត្រូវចូលក្នុងប្រភេទណាមួយ និងមានភាពមិនច្បាស់លាស់ក្នុងការកំណត់ ថាតើសហគមន៍មូលដ្ឋានដែលនៅតាមបណ្តាខេត្តនឹងត្រូវកំណត់ឱ្យធ្វើការតែក្នុងសង្កាត់ ឬឃុំដែលជាមូលដ្ឋានរបស់គេឬយ៉ាងណា។ លោកសុខ សំអឿនបញ្ជាក់ថា លោកនឹងទាមទារសុំឱ្យសហគមន៍មូលដ្ឋាននោះមានសិទ្ធិធ្វើការបានច្រើនជាងនេះ។ «ចំណុចហ្នឹងប្រហែលយើងទាមទារឱ្យរីក ឱ្យទូលាយបន្តិចដែរ កុំឱ្យកំណត់សកម្មភាពតែនៅក្នុងឃុំសង្កាត់ គឺអាចឱ្យធ្វើការបានក្នុងមួយខេត្ត»។ ក្រុមអង្គការសង្គមស៊ីវិលធ្លាប់បានទាមទាររយៈពេលមួយខែដើម្បីពិនិត្យច្បាប់នេះហើយយល់ថា ខែធ្នូនេះមិនមែនជាពេលវេលាសមស្របសម្រាប់ការពិភាក្សាឡើយ។ យ៉ាងណាក៏ដោយ លោកអ៊ូ វីរៈ នាយកនៃមជ្ឈមណ្ឌលសិទ្ធិមនុស្សកម្ពុជាបានសម្តែងការស្វាគមន៍ចំពោះសេចក្តីព្រាងច្បាប់នេះដែលលោកលើកឡើងថា មានការកែប្រែល្អច្រើន បើប្រៀបធៀបនឹងសេចក្តីព្រាងមុនៗ។ ប៉ុន្តែលោកសម្តែងការព្រួយបារម្ភលើចំណុចខ្លះដែលហាក់ដូចជាផ្តោតលើអង្គការអន្តរជាតិដែលធ្វើសកម្មភាពពាក់ព័ន្ធនឹងបញ្ហាសិទ្ធិមនុស្សនៅកម្ពុជា។ «ចំពោះខ្ញុំមើលទៅ ហាក់ដូចជាមានភាពទូលំទូលាយពេក ហើយអាចបកស្រាយក្នុងន័យមួយដើម្បីរឹតត្បិតអង្គការក្រៅរដ្ឋាភិបាលបរទេសណាដែលធ្វើការតវ៉ានិងតស៊ូមតិចំពោះបញ្ហារំលោភសិទ្ធិមនុស្សក្នុងប្រទេសកម្ពុជា។ ជាពិសេសអង្គការក្រៅរដ្ឋាភិបាលបរទេសដែលធ្វើការទាក់ទងនឹងបញ្ហាសិទ្ធិមនុស្សច្រើនតែចូលរួមតវ៉ានិងតស៊ូមតិទាក់ទងទៅនឹងការរំលោភមួយចំនួន ទាក់ទងនឹងគម្រោងADB ទាក់ទងរឿងផ្លូវរទេះភ្លើងដែល ADB ជួយឧបត្ថម្ភលុយ គឺមានអង្គការបរទេសមួយចំនួនដែលតវ៉ារឿងហ្នឹង ដែលទាក់ទងរឿងធនាគាពិភពលោក។ នៅគម្រោងបឹងកក់ក៏មានការចូលរួមពីអង្គការបរទេស។ ហើយបើសិនយើងមើលច្បាប់នេះគឺច្បាប់នេះផ្តល់អំណាចទូលំទូលាយដល់ក្រសួង រដ្ឋាភិបាល និងក្រសួងការបរទេសមែនទែន ក្នុងការរឹតត្បិតនូវសេរីភាពនិងការបំពេញការងាររបស់អង្គការក្រៅរដ្ឋាភិបាលបរទេស»។ យោងតាមប្រភពក្រៅផ្លូវការដែលវីអូអេទទួលបានបញ្ជាក់ឱ្យដឹងគឺមាត្រា១៧នៃច្បាប់នេះកំណត់ថា ក្រសួងការបរទេសកម្ពុជាមានសិទ្ធិលុបចោលអនុស្សរណៈនៃការយោគយល់គ្នាចំពោះអង្គការអន្តរជាតិណាដែលគេយល់ថា «ធ្វើសកម្មភាពប៉ះពាល់ដល់សន្តិភាព ស្ថិរភាពនិងសណ្តាប់ធ្នាប់សាធារណៈ ឬបង្កនូវភាពអន្តរាយដល់សន្តិសុខជាតិ ឯកភាពជាតិ វប្បធម៌ ប្រពៃណីទំនៀមទម្លាប់របស់សង្គមជាតិកម្ពុជា» ដែលនេះអាចជាការបើកផ្លូវឱ្យក្រសួងការបរទេសបញ្ឈប់សកម្មភាពរបស់អង្គការទាំងនោះតាមចិត្ត។ ចំណែកលោកស្រីពុង ឈីវកេក នាយិកាអង្គការលីកាដូក៏សម្តែងក្តីបារម្ភស្រដៀងគ្នានឹងក្រុមអង្គការដទៃទៀតដែរ ប៉ុន្តែនៅបន្តរក្សាជំហរដដែលថា មិនគួរមានច្បាប់នេះទេព្រោះក្រមរដ្ឋប្បវេណីដែលនឹងចូលជាធរមាននៅថ្ងៃទី២១ខែធ្នូនេះមានមាត្រាមួយចំនួនគ្របដណ្តប់លើសកម្មភាពរបស់អង្គការក្រៅរដ្ឋាភិបាលហើយ។ លោកស្រីយល់ថា បើអនុញ្ញាតឱ្យមានច្បាប់នេះ ហាក់ដូចជាត្រូវចាត់ទុកនិរាករណ៍មាត្រាមួយចំនួនក្នុងក្រមរដ្ឋប្បវេណីនោះ។ តាមប្រភពនានាឱ្យដឹងថា ចំនួនអ្នកដែលក្រសួងមហាផ្ទៃអញ្ជើញចូលរួមនៅថ្ងៃច័ន្ទសប្តាហ៍ក្រោយនេះនឹងមិនទូលំទូលាយទេ។ មិនមានមន្រ្តីក្រសួងមហាផ្ទៃនិងក្រសួងការបរទេសណាម្នាក់ដែលវីអូអេអាចទាក់ទងបានដើម្បីសុំសេចក្តីអត្ថាធិប្បាយទេ នៅថ្ងៃអង្គារនេះ៕ This posting includes an audio/video/photo media file: Download Now |
| រដ្ឋសភាគ្រោងប្រជុំដកអភ័យឯកសិទ្ធិតំណាងរាស្ត្រម្នាក់របស់គណបក្សប្រឆាំង Posted: 14 Dec 2011 07:43 AM PST រដ្ឋសភាកម្ពុជាគ្រោងនឹងដកអភ័យឯកសិទ្ធិតំណាងរាស្រ្តគណបក្សប្រឆាំងមួយរូបតាមការស្នើសុំរបស់តុលាការខេត្តកណ្តាល។ លោក ជាម យៀប ប្រធានគណៈកម្មការទី២ នៃរដ្ឋសភាខាងគណបក្សប្រជាជនកម្ពុជា បានមានប្រសាសន៍ថា នៅថ្ងៃព្រហស្បតិ៍ស្អែកនេះ គណៈកម្មាធិការអចិន្រ្តៃយ៍នៃរដ្ឋសភា នឹងកោះប្រជុំ ដើម្បីសម្រេចដកអភ័យឯកសិទ្ធិលោក ចាន់ ចេង នៃសមាជិកសភាតំណាងរាស្ត្រគណបក្សសម រង្ស៊ី។ លោក ចាន់ ចេង សមាជិកតំណាងរាស្ត្រគណបក្សសម រង្ស៊ីត្រូវបានលោក លឹម សុគន្ថា ចៅក្រមនៃតុលាការខេត្តកណ្តាលបានផ្ញើរបាយណ៍មួយទៅស្ថានប័នដែលពាក់ព័ន្ធកាលពីខែតុលាកន្លងទៅនេះអំពីភាពមិនប្រក្រតីមួយ ចំពោះលោកចាន់ ចេង ដោយសារតែលោកចៅក្រម បានមានប្រសាសន៍ថាលោក ចាន់ ចេងបានប្រើប្រាស់មធ្យោបាយដឹកជញ្ជូនជនដែលត្រូវចោទចេញពីពន្ធនាគារខេត្តកណ្តាល។ លោក ជាម យៀប បានមានប្រសាសន៍ថា ការដកអភ័យឯកសិទ្ធិសមាជិកសភាណាងរាស្ត្រមិនមែនជារឿងធំដុំទេ។ «ពាក្យថាអភ័យឯកសិទ្ធហ្នឹងឥតមានស្អី ដែលថាវាធំដំអីណាទេ។ វាដូចអាវក្រោះ ឬអាវភ្លៀងអញ្ចឹង ហើយគណៈអចិន្ត្រៃយ៍ ឬរដ្ឋសភាគឺជាអ្នកទទួលខុសត្រូវក្នុងការដកអាវភ្លៀងចេញ ដើម្បីឲ្យតុលាការគេមានលទ្ធភាព អញ្ជើញទៅសួរទៅតាមពាក្យបណ្តឹង»។ គម្រោងកោះប្រជុំនៃគណៈកម្មាធិការអចិន្ត្រៃយ៍នៃរដ្ឋសភា ក្នុងការដកអភ័យឯកសិទ្ធិសមាជិកសភាគណបក្សសម រង្ស៊ីនេះ នៅមិនទាន់ដឹងថា រដ្ឋសភា បានទទួលលិខិតស្នើសុំពីក្រសួងយុត្តិធម៌ ឬក៏យ៉ាងណានៅឡើយទេ។ លោក សំ ប្រជាមានិត នាយកខុទ្ទកាល័យក្រសួងយុត្តិធម៌បានមានប្រសាសន៍ថា លោកមិនទាន់បានដឹងថាក្រសួងយុត្តិធម៌ បានផ្ញើលិខិតទៅស្ថាប័នរដ្ឋសភាដើម្បីស្នើសុំឲ្យដកអភ័យឯកសិទ្ធិសមាជិកសភាតំណាងរាស្ត្រលោក ចាន់ ចេង នៅឡើយទេ។ «ខ្ញុំឥតបានដឹងផងព្រោះខ្ញុំទើបតែមកពីប្រជុំនៅឯទីក្រុងរ៉ូម ប្រទេសអ៊ីតាលី។ ទើបតែថ្ងៃហ្នឹង ខ្ញុំមកដល់»។ លោក ចាន់ ចេង សមាជិកសភាតំណាងរាស្ត្រខាងគណបក្សសម រង្ស៊ី បានបញ្ជាក់ថា លោកឥតជាប់ពាក់ព័ន្ធនឹងការផ្តល់មធ្យោបាយរំដោះលោកមាស ប៉េង ចេញពីពន្ធនាគារទេ។ លោកបានមានប្រសាសន៍ថា លោកបានផ្ញើលិខិតបំភ្នឺទៅរដ្ឋសភារួចហើយកាលពីថ្ងៃទី២១ ខែវិច្ឆិកា អំពីករណីរបស់លោក ហើយលោកស្នើសុំឲ្យរដ្ឋសភាពិចារណាឡើងវិញ មុននឹងសម្រេចកោះប្រជុំដកអភ័យឯកសិទ្ធិសមាជិកសភារបស់លោក។ «រឿងបញ្ហាដែលពាក់ព័ន្ធហ្នឹងរឿងគេចោទប្រកាន់ខ្ញុំផ្តល់មធ្យោបាយ ខ្ញុំឥតមានពាក់ព័ន្ធអីទេ ព្រោះអីរឿងនេះរបស់លោកមេធាវីជួង ជូងី ដែលជាអ្នកការពារសិទ្ធឲ្យលោកមាស ប៉េង ហើយគាត់បានឆ្លើយ នៅក្នុងលិខិតរបស់លោកមេធាវីហ្នឹងទៅជាមួយនឹងស្ថាប័នពាក់ព័ន្ធដែលផ្សេងៗហ្នឹងមកជាមួយហើយៗគាត់ក៏បានធ្វើពាក្យមួយទៅប្រធានរដ្ឋសភាពីថ្ងៃម៉ិញហ្នឹង ពីរឿងបញ្ហាហ្នឹង ខ្ញុំឥតមានពាក់ព័ន្ធអីទេ»។ លោក យឹម សុវណ្ណ អ្នកតំណាងរាស្រ្ត និងជាអ្នកនាំពាក្យរបស់គណបក្សប្រឆាំងបាននិយាយថា កម្ពុជាកំពុងធ្លាក់ចូលនៅក្នុងរបបផ្តាច់ការសារជាថ្មីដោយសារតែបច្ចុប្បន្ននេះ រដ្ឋាភិបាលបានប្រើប្រាស់ជាប្រព័ន្ធដើម្បីរំខានដល់ការបំពេញកាតព្វកិច្ចរបស់អ្នកតំណាងរាស្ត្រគណបក្សសម រង្ស៊ី។ «ការដែលបញ្ចប់ គ្មានហេតុផលបែបនេះគឺជារឿងមួយឃើញយ៉ាងច្បាស់ហើយថា ទោះជាគេធ្វើអ្វីមួយខុសច្បាប់ក៏ដោយ ឬមិនសមហេតុផលអីក៏ដោយ ឲ្យតែបានរំខានដល់គណបក្សសម រង្សី បង្អាក់បន្តុចដល់គណបក្សសម រង្ស៊ី។ អានេះគឺជារឿងមួយដែលអន្តរជាតិត្រូវតែចាប់អារម្មណ៍ បងប្អូនប្រជាពលរដ្ឋអ្នកស្រឡាញ់ប្រជាធិបតេយ្យទូទាំងប្រទេសកម្ពុជា ត្រូវតែចាប់អារម្មណ៍ថា គណបក្សកាន់អំណាចកំពុងធ្វើអ្វីៗនៅក្នុងប្រទេសនេះឲ្យចូលទៅក្នុងរបបផ្តាច់ការ»។ លោក លឹម សុគន្ថា ចៅក្រមនៃតុលាការខេត្តកណ្តាលបានមានប្រសាសន៍ថា លោកមិនបានប្តឹងលោកចាន់ ចេង ទេ គ្រាន់តែលោកបានប្តឹងទៅក្រសួងយុត្តិធម៌ ក្រសួងមហាផ្ទៃ និងរដ្ឋសភាថាលោកចាន់ ចេង បានចូលរួមនៅក្នុងព្រឹត្តិការណ៍នោះ ក្នុងការផ្តល់មធ្យោបាយដឹកជញ្ជូនដល់ជនដែលត្រូវចោទចេញពីពន្ធនាគារ។ «អ្វីដែលហេតុការណ៍កើតឡើងគឺដោយសារតែលោកមេធាវីហ្នឹង គាត់បានយកអ្នកទោសហ្នឹងទៅ ហើយលោកតំណាងរាស្ត្រ គាត់បានដាក់នៅក្នុងឡានគាត់ទៅ។ ខ្ញុំក៏រាយការណ៍ពីភាពអសកម្មទៅស្ថាប័នពាក់ព័ន្ធហ្នឹង បានវាកើតហេតុអីញ្ចឹងនោះ»។ កាលពីថ្ងៃទី២៣ ខែកញ្ញា កន្លងទៅនេះ លោកចៅក្រហម លឹម សុគន្ថា នៃតុលាការខេត្តកណ្តាលបានចោទប្រកាន់លោកមាស ប៉េង ជំទប់ទី២ ឃុំបន្ទាយដែក ស្រុកកៀនស្វាយ ខេត្តកណ្តាល ខាងគណបក្សសម រង្ស៊ី ពីបទផ្សំគំនិតប្រើប្រាស់អំពើហិង្សាដោយចេទនា លើអ្នកកាន់កាប់អចលនវត្ថុដោយសុចរិតតាមមាត្រាទី២៨នៃក្រមព្រហ្មទណ្ឌថ្មី។ ពេលលោកមាស ប៉េង ត្រូវបានបញ្ជូនទៅឃុំឃាំងនៅពន្ធនាគារខេត្តកណ្តាល មានការប៉ះទង្គិចពាក្យសម្តីគ្នា រវាងលោកជួង ជូងី មេធាវីការពារក្តី និងមន្ត្រីអនុរក្សពន្ធនាគារ។ លោក ជួង ជូងី មេធាវីការពារក្តីលោកមាស ប៉េង បាននិយាយថាមិនអាចមានការឃុំខ្លួនកូនក្តីរបស់លោកបានទេ ប្រសិនណាបើគ្មានដីកាសម្រេចឲ្យឃុំខ្លួនពីតុលាការ រួចហើយបានស្នើសុំឲ្យលោកចាន់ ចេង អ្នកតំណាងរាស្ត្រខាងគណបក្សសម រង្ស៊ី ដឹកកូនក្តីរបស់លោកមកផ្ទះវិញ។ លោក លឹម សុគន្ថា ចៅក្រមនៃតុលាការខេត្តកណ្តាលធ្លាប់បាននិយាយថា លោកបានចេញដីកាបង្គាប់ឲ្យឃុំខ្លួនត្រឹមត្រូវតាមច្បាប់៕ This posting includes an audio/video/photo media file: Download Now |
| នួន ជា៖ ខ្មែរក្រហមមិនមែនជាអាយ៉ងរបស់វៀតណាម Posted: 14 Dec 2011 06:57 AM PST អតីតបងធំទី២នៃរបបខ្មែរក្រហម នួន ជា បានបញ្ជាក់នៅក្នុងការកាត់ទោសនៅថ្ងៃពុធនេះថា ក្រុមមេដឹកនាំជាន់ខ្ពស់ និងគណបក្សកុម្មុយនីស្ដខ្មែរក្រហមមិនមែនជា «អាយ៉ង» របស់វៀតណាមទេ រហូតដល់ពួកគេឡើងកាន់កាប់អំណាចដោយចុងកាំភ្លើងថ្ងៃទី១៧ ខែមេសា ឆ្នាំ ១៩៧៥។ សេចក្ដីអះអាងនេះធ្វើឡើងបន្ទាប់ពីអតីតប្រធានសភាខ្មែរក្រហមអាយុ៨៥ រូបនេះ បានបន្ដធ្វើការចោទប្រកាន់ប្រទេសវៀតណាមជាបន្តបន្ទាប់ចាប់តាំងពីការកាត់ទោសនៅសប្ដាហ៍មុនថា ប្រទេសកុម្មុយនីស្ដមួយនេះបានជាប់ពាក់ព័ន្ធនឹងការសម្លាប់ប្រជាពលរដ្ឋកម្ពុជាចំនួនយ៉ាងតិច១,៧លាននាក់ ក្នុងសម័យកម្ពុជាប្រជាធិបតេយ្យដែលបានកាន់កាប់អំណាចជិតបួនឆ្នាំរហូតដល់ខែមករាឆ្នាំ១៩៧៩។ ឆ្លើយនឹងសំណួររបស់សហព្រះរាជអាជ្ញារងជនជាតិអាមេរិកាំង ដេល លីសាក (Dale Lysak )របស់អង្គជំនុំជម្រះសាលាដំបូងក្នុងការកាត់ទោសនៅថ្ងៃនេះ នួន ជា នៅក្នុងរង្វង់ក្រចកសេះបានបង្ហាញថា គណបក្សកុម្មុយនីស្ដកម្ពុជា និងមេដឹកនាំគណបក្សនេះដែលរួមមានរូបលោក មិនបានស្ថិតក្រោមអំណាចរបស់វៀតណាមទេ។ «កាលនោះមិនធ្វើជាអាយ៉ងរបស់វៀតណាមទេ ក៏ប៉ុន្តែមានកិច្ចការអីអាចមានការពិភាក្សាគ្នាខ្លះ។ ពីឆ្នាំ១៩៦០ រៀងរហូតមក បក្សកម្ពុជាមានមាគ៌ាយុត្តវិធីរបស់ឯង ដាច់ពីវៀតណាម។ យើងធ្វើសេចក្តីសម្រេចដោយខ្លួនយើង ប៉ុន្តែថា ឲ្យគេពេញចិត្ត គេមិនពេញចិត្តទេ»។ មន្ដ្រីផ្លូវការរបស់ស្ថានទូតវៀតណាមក៏ធ្លាប់បានច្រានចោលការចោទប្រកាន់របស់នួន ជា ដែលបានភ្ជាប់ការស្លាប់របស់ប្រជាពលរដ្ឋកម្ពុជាទៅនឹងវៀតណាមផងដែរ។ នៅក្នុងការផ្ដល់សក្ខីកម្មនៅរសៀលនេះ លោក ឡុង នរិន្ទ អតីតកម្មាភិបាលខ្មែរក្រហមក្នុងក្រសួងការបរទេសក្រោមការត្រួតត្រារបស់អៀង សារី បានលើកឡើងថា លោកមិនដឹងពីឥទ្ធិពលបរទេសលើការសម្លាប់ប្រជាពលរដ្ឋកម្ពុជានោះទេ។ នៅក្នុងសវនាការនោះ នួន ជា ក៏បានប្រកែកដោយអស់សំណើចចំពោះការចោទសួររបស់ចៅក្រមសាលាដំបូង (ហ្សង់ម៉ាក ឡាវែង (Jean-Marc Laveng) ថា ខ្លួនមិនមែនជាបងធំទី២នោះទេត្បិតពាក្យនេះគឺកា្លយមកពីអ្នកនិយមមនោគមវិជ្ជាវៀតណាម។ «ខ្ញុំសូមគោរពលោក។ ក្នុងបក្សកុម្មុយនីស្តកម្ពុជា គ្មានបងទី១ គ្មានបងទី២ គ្មានបងទី៣ទេ។ ក៏ប៉ុន្តែដែលហៅបងទី២នេះ វាជាប់ពីវប្បធម៌យួន»។ កាលពីថ្ងៃអង្គារ នួន ជា បានសារភាពថា គណបក្សកុម្មុយនីស្ដកម្ពុជារបស់ខ្មែរក្រហមមានផែនការទុកជាមុនក្នុងការបណ្ដេញប្រជាជនចេញពីក្រុងភ្នំពេញ។ នៅថ្ងៃនេះ នួន ជា បានអះអាងថា អៀង សារី អតីតរដ្ឋមន្ដ្រីការបរទេស និង ខៀវ សំផន អតីតប្រមុខរដ្ឋខ្មែរក្រហមមិនត្រូវបានជូនដំណឹងពីការសម្រេចនេះទេ។ ទាំងនួន ជា ទាំងលោក ឡុង នរិន្ទ សុទ្ធតែបានបង្ហាញពីព្រះរាជសកម្មភាពរបស់អតីតព្រះមហាក្សត្រខ្លះក្នុងចលនា និងមុខងាររបស់ព្រះអង្គជាប្រមុខរដ្ឋនៅជាមួយពួកខ្មែរក្រហម។ ក៏ប៉ុន្ដែលោកឡុង នរិន្ទ បញ្ជាក់ថា អតីតព្រះមហាក្សត្រក្នុងពេលនោះពុំមានអំណាចនោះទេ។ សូមបញ្ជាក់ថា ក្នុងសវនាការនៅថ្ងៃនេះ នួន ជា ដែលពាក់អាវរងារពណ៌ខ្មៅ បានចោទសួរទៅលោកឡុង នរិន្ទ ដែលផ្ដល់សក្ខីកម្មតាមការភា្ជប់ខ្សែវីដេអូ អំពីការជាប់ទាក់ទងនឹងឥទ្ធិពលកម្មាភិបាលខ្មែរក្រហមមួយចំនួន។ ក្រៅពីនោះ សាក្សីក៏បានបង្ហាញថា លោក គាត ឈន់ បច្ចុប្បន្នជាឧបនាយករដ្ឋមន្ដ្រីនិងជារដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុគឺជាមន្ដ្រីម្នាក់ក្នុងក្រសួងការបរទេសខ្មែរក្រហមដែរ៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ១៤ ធ្នូ ព្រឹក Posted: 13 Dec 2011 07:36 PM PST ម៉ាឡេស៊ី៖ ស៊ុលតង់អាប់ឌុល ហាលីម ម៉ូអាហ្សាម (Abdul halim muadzam) បានត្រូវតែងតាំងជាព្រះមហាក្សត្រថ្មីរបស់ម៉ាឡេស៊ី ជាព្រះរាជាស្របតាមធម្មនុញ្ញនិង មានព្រះជន្មាយុចំណាស់របស់ប្រទេស។ ស៊ុលតង់ អាបឌុល ហាលិម ក្នុងព្រះជន្ម៨៤ ព្រះវស្សាបានស្បថឡើងកាន់តំណែង តាមពិធីបុណ្យប្រពៃណីក្នុងព្រះបរមរាជវាំងនៃទីក្រុងគូឡាឡាំពួ កាលពីថ្ងៃអង្គារ ។ ភូមា៖ អាជ្ញាធរភូមាបានទទួលស្គាល់ជាផ្លូវការនូវគណបក្សប្រឆាំង គឺគណបក្សប្រជាធិបតេយ្យជាតិរបស់លោកស្រី អង់សាន ស៊ូជី ដោយអនុញាតឲ្យចូលរួមក្នុងដំណើរការនយោបាយមុនការបោះឆ្នោតជ្រើសរើសតំណាងរាស្រ្ដ។ បណ្ដាញព័ត៌មានរដ្ឋបាននិយាយកាលពីថ្ងៃអង្គារថា គណកម្មការរៀបចំការបោះឆ្នោតភូមាបានយល់ព្រមការដាក់ពាក្យរបស់គណបក្សសុំចុះឈ្មោះជាគណបក្សនយោបាយជាផ្លូវការ។ វៀតណាម៖ ព្រះសង្ឃសកម្មជនវៀតណាមមានព្រះជន្មាយុ៧១វស្សា មកពីអំបូរភាគតិច ត្រូវបានកាត់ទោសឲ្យជាប់គុក៥ឆ្នាំ ពីបទមានឯកសារនិងវីដេអូប្រឆាំងរដ្ឋាភិបាល។ ការកាត់ទោសព្រះអង្គ ង្វៀង វ៉ានលី ត្រូវបានផ្សាយកាលពីថ្ងៃអង្គារនៅរដ្ឋធានីហាណូយ។ នេះជាការចាប់ខ្លួនម្ដងទៀតបន្ទាប់ពីខែមេសា នៅពេលដែលប៉ូលីសបានរឹបអូសយកសៀវភៅមូយចំនួន ខ្សែអាត់ និងវីដេអូ ដែលចោទប្រកាន់រដ្ឋាភិបាលពីបទរំលោភសិទ្ធិមនុស្ស និង ការសង្កត់សង្កិនមកលើសេរីភាពសាសនា ។ ទីភ្នាក់ងារសារព័ត៌មានវៀតណាមនិយាយថាចុងចោទទទួលការចោទប្រកាន់ពីបទរំលោភលើសេរីភាពប្រជាធិបតេយ្យ និងបំផ្លាញប្រយោជន៍ជាតិ។ ស៊ីរី៖ សកម្មជនការពារសិទ្ធិមនុស្សស៊ីរីនិយាយថា ទាហានរត់ចោលជួរនៅក្នុងយោធាស៊ីរី បានសម្លាប់កងកម្លំាងការពារសន្ដិសុខរបស់រដ្ឋាភិបាល ពេលដែលទាហានរត់ចោលជួរទាំងនោះពួនស្ទាក់វាយប្រហារពួកគេ បន្ទាប់ពីយោធាស៊ីរីបានធ្វើការវាយឆ្មក់បណ្ដាលឲ្យជនស៊ីវិល១១នាក់ស្លាប់កាលពីព្រឹកថ្ងៃអង្គារ។ អ៊ីរ៉ង់៖ បានបដិសេធសេចក្ដីស្នើរបស់អាមេរិក ដែលសុំឲ្យបញ្ជូនមក វិញនូវ យន្ដហោះគ្មានអ្នកបើកដែលរដ្ឋាភិបាលទីក្រុងតេហេរ៉ង់ ដោយនិយាយថាបានបាញ់ទម្លាក់ជិតព្រំដែនជាមួយប្រទេសអាហ្វហ្គានីស្ថាននៅក្នុងខែនេះ។ រុស្ស៊ី៖ ប្រធានាធិបតីរុស្ស៊ី ឌីមេទ្រី មេដ្វេដេវ Dmitri Medvedev បានប្រកាសអំពីសម័យប្រជុំលើកទីមួយនៃសភាជាតិតែងតាំងថ្មី ទោះបីជាមានការតវ៉ាប្រឆាំងនៃ ការកេងបន្លំសន្លឹកឆ្នោត ក្នុងការបោះឆ្នោតរដ្ឋសភាកាលពីដើមខែនេះក៏ដោយ។ អាហ្វហ្គានីស្ថាន៖ រដ្ឋមន្ដ្រីការពារប្រទេសអាមេរិក លោក ឡេអន ប៉ាណេតា កំពុងធ្វើទស្សនកិច្ចអាហ្វហ្គានីស្ថាន ដើម្បីពិនិត្យមើលការលូតលាស់នៃកិច្ចប្រឹងប្រែងប្រឆាំងការបះបោរ ដោយលោកបានថ្លែងថា នេះជាចំណុចរបត់មួយនៅឆ្នាំនេះ ក្រោយពីការប្រយុទ្ធអស់រយៈពេលជាង មួយទសវត្សរ៍តទល់នឹងក្រុមតាលីបានមក។ ស៊ីរី៖ សមាជិកជាច្រើននាក់នៃក្រុមប្រឹក្សាសន្ដិសុខអង្គការសហប្រជាជាតិថ្លែងថា គេមានចិត្ដខ្វាយខ្វល់ចំពោះព័ត៌មានបង្ហាញក្នុងកិច្ចប្រជុំអគ្គស្នងការខាងកិច្ចការសិទ្ធិមនុស្ស ដែលថាចំនួនមនុស្សស្លាប់ក្នុងការបះបោរនៅស៊ីរីបានកើនឡើងលើសពី៥០០០នាក់។ បែលហ្ស៊ិក៖ មនុស្ស៤នាក់បានស្លាប់ហើយជាង៧៥នាក់ទៀតបានរងរបួសក្នុងការវាយប្រហាររបស់ជនប្រដាប់អាវុធម្នាក់នៅក្នុងក្រុងលៀច នៅភាគខាងកើតបែលហ្ស៊ិក។ ស្វ៊ីស៖ ក្រុមស្រាវជ្រាវរូបវិទ្យាស្វ៊ីសថ្លែងថា ខ្លួនបានពិនិត្យមើលបំណែកតូចបង្អស់នៃធាតុអាតូមិក ហៅថា Higgs Boson ដែលអ្នកវិទ្យាសាស្រ្ដមានជំនឿថា ជាប្លក មូលដ្ឋាននៃការកកើតភពផែនដី។ <!--AV--> This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
