VOA News: ព័ត៌មាន: “ហេឡូវីអូអេ៖ សារៈសំខាន់សម្រាប់យុវជនក្នុងការតាមដានការជំនុំជម្រះក្តីលើមេដឹកនាំខ្មែរក្រហម” plus 5 more |
- ហេឡូវីអូអេ៖ សារៈសំខាន់សម្រាប់យុវជនក្នុងការតាមដានការជំនុំជម្រះក្តីលើមេដឹកនាំខ្មែរក្រហម
- UNDPបានជំរុញឲ្យរដ្ឋាភិបាលកម្ពុជាបង្កើតកម្មវិធីធានារ៉ាប់រងខ្នាតតូច
- នួន ជា៖ ការបណ្ដេញប្រជាពលរដ្ឋចេញពីទីក្រុងគឺជាគោលការរបស់បក្សកុម្មុយនីស្ដកម្ពុជា
- ព័ត៌មានអន្តរជាតិវីអូអេ ១៣ ធ្នូ យប់
- តុលាការខ្មែរក្រហមសម្រេចមិនដោះលែងអ្នកស្រី អៀង ធីរិទ្ធ
- ព័ត៌មានអន្តរជាតិវីអូអេ ១៣ ធ្នូ ព្រឹក
| ហេឡូវីអូអេ៖ សារៈសំខាន់សម្រាប់យុវជនក្នុងការតាមដានការជំនុំជម្រះក្តីលើមេដឹកនាំខ្មែរក្រហម Posted: 13 Dec 2011 02:23 PM PST អតីតមេដឹកនាំខ្មែរក្រហមកំពូលត្រូវបានជឿជាទូទៅថាជាមនុស្សអាក្រក់ ប៉ុន្តែថ្មីៗនេះ ពួកគេបានព្យាយាមប្រាប់ជ្រុងម្ខាងនៃរឿងរបស់ពួកគេ ដោយនិយាយថា ពួកគេមិនមែនជាមនុស្សអាក្រក់ទេ។ ដូច្នេះ តើវាមានសារៈសំខាន់យ៉ាងដូចម្តេចសម្រាប់យុវជនក្នុងការតាមដានស្តាប់ការពន្យល់បកស្រាយរបស់អតីតមេដឹកនាំខ្មែរក្រហមទាំងនោះ? វាគ្មិន៖ លោក ឌី ខាំបូលី អ្នកនិពន្ធ សៀវភៅ ប្រវត្តិសាស្ត្រកម្ពុជាប្រជាធិបតេយ្យ និងលោក ហ៊ុយ វណ្ណៈ មន្ត្រីកិច្ចការសាធារណៈរបស់សាលាក្តីខ្មែរក្រហម សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី០៨ ខែធ្នូ ឆ្នាំ២០១១៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| UNDPបានជំរុញឲ្យរដ្ឋាភិបាលកម្ពុជាបង្កើតកម្មវិធីធានារ៉ាប់រងខ្នាតតូច Posted: 13 Dec 2011 12:23 PM PST នៅថ្ងៃអង្គារនេះ កម្មវិធីអភិវឌ្ឍន៍អង្គការសហប្រជាជាតិ (UNDP) បានជំរុញឲ្យរដ្ឋាភិបាលកម្ពុជាបង្កើតកម្មវិធីធានារ៉ាប់រងខ្នាតតូច និងកិច្ចការពារសង្គម សំដៅជួយកាត់បន្ថយភាពងាយរងគ្រោះរបស់ជនក្រីក្រ។ លោកស្រី Elena Tischenko នាយិកាការិយាល័យកម្មវិធីអភិវឌ្ឍន៍សហប្រជាជាតិ UNDPប្រចាំកម្ពុជា បានថ្លែងនៅក្នុងសិក្ខាសាលាថា ប្រជាពលរដ្ឋដែលមានប្រាក់ចំណូលទាបរស់នៅក្នុងបរិយាកាសគ្រោះថ្នាក់ និងងាយប្រឈមនឹងគ្រោះថ្នាក់ជាច្រើន។ លោកស្រី Tischenko បានលើកឡើងថា UNDP គាំទ្ររដ្ឋាភិបាលយ៉ាងពេញលេញឲ្យអនុវត្តយុទ្ធសាស្ត្រកិច្ចការពារសង្គមថ្នាក់ជាតិ។ ចំពោះបញ្ហានេះ វាចាំបាច់ពិចារណាយ៉ាងប្រុងប្រយ័ត្ននូវសក្តានុពលនៃការធានារ៉ាប់រងខ្នាតតូចថា ជាអត្ថន័យនៃការពង្រីកកិច្ចការពារសង្គមដល់ជនក្រីក្រ និងជនងាយរងគ្រោះនៅកម្ពុជាតាមលក្ខណៈភស្តុតាងជាក់ស្តែង។ ឯកសារសិក្សារបស់ UNDP បានបង្ហាញថា ចាប់តាំងពីខែមេសាឆ្នាំ២០១១មក ភាពជាដៃគូនេះបានគ្របដណ្តប់នូវការធានារ៉ាប់រងជាស្រេចចំពោះអតិថិជន ដែលមានប្រាក់ចំណូលទាបចំនួន៧៥០០នាក់លើគ្រោះថ្នាក់ និងសុខភាពផ្ទាល់ខ្លួនដោយបង់បុព្វលាភធានារ៉ាប់រង៦ដុល្លារអាមេរិកក្នុងមួយឆ្នាំ។ លោកអ៊ូ ប៊ុនឡុង រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានបដិសេធការអត្ថាធិប្បាយលើការសិក្សារបស់ UNDP នេះទេ ដោយបញ្ជាក់ថា៖ «ខ្ញុំចង់ឲ្យតម្រង់ទៅរកការធានារ៉ាប់រងសុខភាព និងជីវិត ពីព្រោះពីរនេះសំខាន់ណាស់។ រឿងតម្លៃខ្ញុំមិនអាចជំរាបជូនបានទេ ពីព្រោះវាជាផ្សារសេរី»។ លោកងី ច័ន្ទផល អនុប្រធានក្រុមប្រឹក្សាអភិវឌ្ឍន៍កសិកម្ម និងជនបទ បានបញ្ជាក់ប្រាប់ក្រុមអ្នករាយការណ៍ព័ត៌មានក្នុងពេលសម្រាកពិសារកាហ្វេថា ការសិក្សានេះគ្រាន់តែជាការសិក្សាមួយដើម្បីឆ្លុះបញ្ចាំងទៅលើស្ថានភាពរបស់កម្ពុជាប៉ុណ្ណោះ ហើយរដ្ឋាភិបាលនឹងស្វែងយល់ពីលទ្ធផលនៃការរកឃើញនេះ ហើយរដ្ឋាភិបាលនឹងបង្កើតគោលនយោបាយមួយដើម្បីរៀបចំផែនការសកម្មភាពស្តីពីការធានារ៉ាប់រងខ្នាតតូច និងកិច្ចការពារសង្គមនេះ។ «យើងគិតមើលប្រាំមួយដុល្លារអាមេរិកក្នុងមួយឆ្នាំជាប្រាក់វិភាគទាន ដើម្បីទទួលសេវាផ្សេងៗ។ ប្រាំមួយដុល្លារអាមេរិកស្មើនឹងជាង២០០០០រៀល។ បើគាត់មានជម្ងឺធ្ងន់ធ្ងរ គាត់អាចព្យាបាលជម្ងឺច្រើនជាងហ្នឹង។ គាត់ចំណេញ»។ លោកងី ច័ន្ទផលបានបន្ថែមថា ការធានារ៉ាប់រងខ្នាតតូចនេះសំដៅធានាជីវិត សុខភាព មុខរបរ និងធនធានសម្រាប់បង្កអាជីវកម្ម។ យុទ្ធសាស្ត្រជាតិស្តីពីការគាំពារសង្គមចំពោះជនក្រីក្រ និងជនងាយរងគ្រោះត្រូវបានប្រកាសដាក់ឲ្យអនុវត្តជាផ្លូវការកាលពីសប្តាហ៍មុន បន្ទាប់ពីរដ្ឋាភិបាលបានឯកភាពកាលពីខែមិនា ឆ្នាំ២០១១។ សន្ទស្សន៍នៃភាពក្រីក្របានធ្លាក់ចុះពី៤៧ភាគរយនៅឆ្នាំ១៩៩៣មកនៅត្រឹម២៦ភាគរយក្នុងឆ្នាំ២០១០។ លោកងី ច័ន្ទផលបានថ្លែងថា គ្រួសារនៅកម្ពុជាអាចប្រឈមនឹងភាពងាយរងគ្រោះធ្ងន់ធ្ងរ និងកំពុងប្រឈមនឹងវិបត្តិរបស់គ្រួសារនីមួយៗជាក់លាក់ និងវិបត្តិម៉ាក្រូសេដ្ឋកិច្ច។ ប្រជាពលរដ្ឋភាគច្រើនប្រកបរបរកសិកម្មចិញ្ចឹមជីវិតដែលពឹងផ្អែកលើកត្តាអាកាសធាតុ។ ការខូចខាតដំណាំនឹងបង្កឲ្យមានអសន្តិសុខស្បៀង ហើយជាកង្វល់ចម្បង។ ជម្ងឺ និងចំណាយខ្ពស់ ដែលពាក់ព័ន្ធនឹងសុខភាព គឺជាកត្តាសំខាន់ជំរុញឲ្យគ្រួសារនានាធ្លាក់ចូលទៅក្នុងភាពក្រីក្ររ៉ាំរ៉ៃ ឈប់ឲ្យកូនទៅសាលារៀន លក់មធ្យោបាយផលិតកម្ម។ ស្ថានភាពក្រីក្រ និងស្ថានភាពងាយរងគ្រោះរបស់ប្រជាពលរដ្ឋ ជាពិសេសការឡើងថ្លៃម្ហូបអាហារ និងវិបត្តិសេដ្ឋកិច្ចពិភពលោក បានប៉ះពាល់ដល់ប្រាក់ចំណូល និងលទ្ធភាពទទួលបានសេវាសំខាន់ៗ នាំឲ្យមានវិសមភាព និងភាពខុសគ្នាកាន់តែមានទំហំធំ៕ This posting includes an audio/video/photo media file: Download Now |
| នួន ជា៖ ការបណ្ដេញប្រជាពលរដ្ឋចេញពីទីក្រុងគឺជាគោលការរបស់បក្សកុម្មុយនីស្ដកម្ពុជា Posted: 13 Dec 2011 09:36 AM PST អតីតបងធំទី២នៃរបបខ្មែរក្រហមគឺនួន ជាបានសារភាពក្នុងសវនាការនៅថ្ងៃអង្គារនេះថា ការបណ្ដេញប្រជាពលរដ្ឋកម្ពុជាចេញពីទីក្រុងភ្នំពេញ គឺជាគោលការគិតទុករបស់បក្សកុម្មុយនីស្ដកម្ពុជារបស់ពួកខ្មែរក្រហម ហើយការបណ្ដេញចេញនេះគឺដើម្បីការពារសន្ដិសុខ និងដើម្បីបង្រៀនប្រជាពលរដ្ឋកម្ពុជាឲ្យចេះធ្វើការនៅទីជនបទ។ អតីតប្រធានសភាខ្មែរក្រហមពាក់វ៉ែនតាម៉្ញូបពណ៌ស បានឆ្លើយទៅនឹងសំនួររបស់លោកJean-Mare Levegu ចៅក្រមបារាំងនៃអង្គជំនុំជម្រះសាលាដំបូងថា រូបលោកនិងមេស្ថាបនិករបបកម្ពុជាប្រជាធិបតេយ្យគឺប៉ុល ពត និងអតីតមេដឹកនាំខ្មែរក្រហមដទៃទៀត បានពិភាក្សាគ្នា និងសម្រេចក្នុងកិច្ចប្រជុំមួយនៃគណបក្សកុម្មុយនីស្ដកម្ពុជានៅឆ្នាំ១៩៧៣ថា នៅពេលដែលក្រុមខ្មែរក្រហមឈ្នះសង្រ្គាមលើរបបសាធារណរដ្ឋរបស់លោកសេនាប្រមុខលន់ នល់ ប្រជាពលរដ្ឋក្រុងភ្នំពេញដែលបានកើនឡើងចំនួនប្រមាណបីលាននាក់នៅទសវត្សឆ្នាំ៧០ នឹងត្រូវបណ្ដេញចេញទាំងអស់។ «យើងត្រូវតែជម្លៀសប្រជាជនដែលនៅក្នុងទីក្រុងភ្នំពេញបណ្ដោះអាសន្ន ហើយចាំមើលសភាពការណ៍ថា តើវៀតណាមវ៉ៃយ៉ាងម៉េច? ហើយពេលនោះតើអាមេរិកលូកដៃចូលមកទៀត ឬយ៉ាងម៉េច?។ ដូច្នោះដើម្បីកុំឲ្យប្រជាជនបាត់បង់ជីវិត យើងត្រូវជម្លៀសប្រជាជន មកចែកគ្នានៅតាមជនបទនៅតាមសហករ»។ ពួកកងទ័ពព្រៃកុម្មុយនីស្ដបែបម៉ៅនិយមខ្មែក្រហម ដែលមានសម្លៀកបំពាក់ខ្មៅ បានចូលកាន់កាប់ទីក្រុងភ្នំពេញទាំងស្រុង នៅថ្ងៃទី១៧ ខែមេសា ឆ្នាំ១៩៧៥។ ក្រុមប្រជាពលរដ្ឋបានចុះមកតាមដងផ្លូវដើម្បីអបអរសាទរនឹងជ័យជំនះរបស់ពួកគេ ក៏ប៉ុន្ដែមិនបានប៉ុន្មានម៉ោងផង ពួកខ្មែរក្រហមបានប្រកាសបណ្ដេញប្រជាពលរដ្ឋចេញពីទីក្រុងភ្នំពេញភ្លាមៗ ដោយអះអាងថា ការចាកចេញពីលំនៅដ្ឋាននេះគឺសម្រាប់រយៈពេលតែបីថ្ងៃតែប៉ុណ្ណោះ។ យោងតាមសហព្រះរាជអាជ្ញាទាំងពីររូបរបស់សាលាក្ដីខ្មែរក្រហមលោកស្រីជា លាង និងលោកអេនឌ្រូ ខេលី ដែលបានថ្លែងចោទប្រកាន់ទៅលើជនសង្ស័យអតីតមេដឹកនាំកំពូលខ្មែរក្រហមទាំងបីនាក់ គឺនួន ជា ខៀវ សំផន និងអៀង សារី ក្នុងសំណុំរឿង០០២ សហព្រះរាជអាជ្ញាបានបង្ហាញថា ពួកខ្មែរក្រហមបានចាប់ផ្ដើមបាញ់សម្លាប់ប្រជាពលរដ្ឋកម្ពុជាភ្លាមៗ ក្នុងពេលដែលពួកគេបណ្ដេញប្រជាជនចេញពីទីក្រុងភ្នំពេញនោះ។ អ្នកដែលនៅរារែក និងរឹងទទឹងត្រូវសម្លាប់ភ្លាម។ យ៉ាងណាក៏ដោយ នួន ជា ដែលគេទទួលស្គាល់ថា ជាមេមនោគមវិជ្ជានៃសម័យប៉ុល ពត បានលើកឡើងថា គោលនយោបាយពួកខ្មែរក្រហមគឺត្រូវយកចិត្តទុកដាក់ទៅលើប្រជាជនបណ្ដេញចេញទាំងនេះ ហើយខ្មែរក្រហមបានរៀបចំជាតំបន់សម្រាប់ទទួលប្រជាពលរដ្ឋពីទីក្រុងភ្នំពេញ រួចជាស្រេច។ «ភូមិភាគពាយព្យ ដែលមានដីល្អ សម្រាប់បង្កបង្កើនផល ត្រូវយកមួយលានប្រាំសែននាក់។ និរតីក៏យកច្រើនដែរ។ ឯភូមិភាគណាដែលមិនសូវមានដីស្រែយកតិច ហើយមកនេះរួមគ្នាធ្វើ រួមគ្នាហូប ហើយរៀនសូត្រពីសហករនៅតាមជនបទ។ ប្រែក្លាយអ្នកដែលមិនចេះធ្វើពលកម្មឲ្យទៅជាអ្នកពលកម្ម។ ក៏ប៉ុន្ដែក្នុងសហករនេះ ខ្ញុំសូមជម្រាបថា មានពួកខូច មានពួកក្បត់ មានពួកសមាសភាពមិនល្អ បំផ្លាញសហករ»។ របបកម្ពុជាប្រជាធិបតេយ្យបានបង្កឲ្យប្រជាពលរដ្ឋកម្ពុជាស្លាប់អស់យ៉ាងតិចចំនួន១,៧លាននាក់ចន្លោះពេលដែលពួកគេកាន់កាប់អំណាចអស់រយៈពេលជិតបួនឆ្នាំរហូតទៅដល់ខែមករា ឆ្នាំ១៩៧៩។ ខៀវ សំផន និងអៀង សារីព្រមទាំងអៀង ធីរិទ្ធ ប្រពន្ធរបស់គាត់ ត្រូវចោទប្រកាន់ពីបទឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ និងបទប្រល័យពូជសាសន៍។ ក៏ប៉ុន្តែអៀង ធីរិទ្ធ មិនត្រូវតុលាការនាំខ្លួនមកកាត់ទោសនោះទេ ដោយសារបញ្ហាសុខភាពធ្ងន់ធ្ងរ។ នៅក្នុងការកាត់ទោសនៅថ្ងៃនេះ អង្គជំនុំជម្រះសាលាដំបូងបានហៅជនជាប់ចោទទាំងបីឲ្យចូលរង្វង់ក្រចកសេះម្នាក់ម្ដងៗដើម្បីចោទសួរ។ នួន ជាបានបន្តវាយប្រហារទៅលើប្រទេសវៀតណាមពីការជាប់ពាក់ព័ន្ធនឹងការស្លាប់របស់ប្រជាពលរដ្ឋកម្ពុជា ហើយជាមួយគ្នានេះ នួន ជាក៏បានបង្ហាញថា ប្រទេសចិនបានផ្គត់ផ្គង់អាវុធទៅដល់ចលនាតស៊ូរបស់ពួកខ្មែរក្រហម និងផ្ដល់ប្រេងឥន្ធនៈបង្ហូរចូលមកកាន់ខេត្តរតនគិរី។ ដោយឡែក អៀង សារី អតីតរដ្ឋមន្ដ្រីការបរទេសខ្មែរក្រហម បានបន្តបដិសេធមិនឆ្លើយសំនួររបស់តុលាការទេ។ នៅក្នុងសេចក្ដីថ្លែងការណ៍រយៈពេលជាងមួយម៉ោង ខៀវ សំផន អតីតប្រមុខរដ្ឋខ្មែរក្រហម បានលើកឡើងថា ខ្លួនបានចូលរួមចលនាតស៊ូជាមួយពួកខ្មែរក្រហម ដោយសារតែលក្ខខណ្ឌបង្ខំនៅក្នុងរបបដែលគ្រប់គ្រងដោយអតីតព្រះមហាក្សត្រនរោត្តមសីហនុ។ ខៀវ សំផន ដែលធ្លាប់លើកពីការមិនបានដឹង មិនបានឮអំពីការកាប់សម្លាប់ប្រជាពលរដ្ឋកម្ពុជា បាននិយាយយ៉ាងក្បោះក្បាយថា រូបគាត់មានតួនាទីខ្ពស់ ក៏ប៉ុន្ដែគ្រាន់តែជា«មុខតំណែងខ្យល់»តែប៉ុណ្ណោះ៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ១៣ ធ្នូ យប់ Posted: 13 Dec 2011 08:47 AM PST ស៊ីរី៖ ពួកសកម្មជនសិទ្ធិមនុស្សស៊ីរីបាននិយាយថា កងកម្លាំងសន្តិសុខរដ្ឋាភិបាលបានសម្លាប់មនុស្ស១១នាក់ និងធ្វើឱ្យរបួសមនុស្សរាប់សិបនាក់ផ្សេងទៀត នាភាគពាយ័ព្យនៃ ប្រទេសនេះ ស្របពេលដែល អ.ស.ប.បាននិយាយថាចំនួនមនុស្សស្លាប់ដោយសារចលាចលជាច្រើនខែកន្លងមកនេះបានទ្បើងដល់៥.០០០នាក់ហើយ។ អង្គការសហប្រជាជាតិ៖ សមាជិកជាច្រើននៃក្រុមប្រឹក្សាសន្តិសុខអ.ស.ប.បាននិយាយថា ពួកគេមានអារម្មណ៍សោកសៅជាខ្លាំង ដោយសារដំណឹងមួយដែលត្រូវបានបង្ហាញនៅក្នុងកិច្ចប្រជុំមួយរបស់ឧត្តមស្នងការអ.ស.ប. សម្រាប់សិទ្ធិមនុស្ស ដែលបានឱ្យដឹងថាចំនួនមនុស្សស្លាប់ដោយសារចលាចលក្នុងប្រទេសស៊ីរីបានកើនទ្បើងដល់៥.០០០នាក់ហើយ។ ភូមា៖ អាជ្ញាធរភូមាបានទទួលស្គាល់ជាផ្លូវការគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអោងសានស៊ូជី មេដឹកនាំប្រឆាំងដោយអនុញ្ញាតឱ្យគណបក្សនេះចូលជាថ្មីក្នុងដំណើរការនយោបាយទូទៅរបស់ប្រទេសនៅមុនការបោះឆ្នោតសភាក្នុងពេលខាងមុខនេះ។ អ៊ីរ៉ង់៖ ប្រទេសអ៊ីរ៉ង់បាននិយាយថាស.រ.អ.គួរតែទទួលស្គាល់ទោសកំហុសរបស់ខ្លួន នៅក្រោយពេលដែលមានយន្តហោះឈ្លបយកការណ៍របស់ស.រ.អ. មួយគ្រឿងបានធ្លាក់ក្នុងដែនដីនៃប្រទេសអ៊ីរ៉ង់នាដើមខែនេះ។ អ៊ីរ៉ាក់៖ លោកនាយករដ្ឋមន្ត្រី នូរី អាល ម៉ាលីគី (Nouri al-Maliki) នៃប្រទេសអ៊ីរ៉ាក់នឹងមានវត្តមាននៅសភាពាណិជ្ជកម្មស.រ.អ. នៅមួយថ្ងៃបន្ទាប់ពីបានជួបជាមួយលោកប្រធានាធិបតី បារ៉ាក់ អូបាម៉ា (Barack Obama) ដើម្បីគូសបញ្ជាក់អំពីរបៀបវារៈដ៏ទូលំទូលាយមួយសម្រាប់កិច្ចសហប្រតិបត្តិការនៅពេលក្រោយសង្គ្រាម។ <!--AV--> This posting includes an audio/video/photo media file: Download Now |
| តុលាការខ្មែរក្រហមសម្រេចមិនដោះលែងអ្នកស្រី អៀង ធីរិទ្ធ Posted: 13 Dec 2011 08:37 AM PST អង្គជំនុំជម្រះនៃតុលាការកំពូលរបស់សាលាក្តីខ្មែរក្រហម នៅព្រលប់ថ្ងៃអង្គារនេះ បានសម្រេចមិនដោះលែងលោកស្រីអៀង ធីរិទ្ធឲ្យនៅក្រៅឃុំទេ ព្រមទាំងបង្គាប់ឲ្យឃុំខ្លួនអ្នកស្រីបន្តរយៈពេលប្រាំមួយខែទៀត នៅក្នុងមន្ទីរឃុំឃាំងរបស់សាលាក្តីខ្មែរក្រហម ដើម្បីតាមដានសុខភាពរបស់អ្នកស្រី។ សេចក្តីប្រកាសព័ត៌មានដែលបានចេញផ្សាយនៅថ្មីៗនេះបានឲ្យដឹងថាអង្គជំនុំជម្រះរបស់តុលាការកំពូលបានបដិសេធសេចក្តីសម្រេចរបស់អង្គជំនុំជម្រះសាលាដំបូង ដែលបង្គាប់ឲ្យដោះលែងអ្នកស្រីអៀង ធីរិទ្ធឲ្យនៅក្រៅមន្ទីរឃុំឃាំងដោយឥតលក្ខខណ្ឌ។ សេចក្តីប្រកាសព័ត៌មានដដែលបានបញ្ជាក់ថា អង្គជំនុំជម្រះសាលាដំបូងត្រូវតែប្រើប្រាស់ឲ្យអស់លទ្ធភាពនូវវិធានការនានាដែលមានដើម្បីជួយដល់ជនជាប់ចោទឲ្យមានកាយសម្បទាគ្រប់គ្រាន់ ដើម្បីឲ្យគាត់អាចចូលរួមសវនាការបាន។ អង្គជំនុំជម្រះតុលាការកំពូលក៏បានបង្គាប់ឲ្យសាលាដំបូងព្យាយាមព្យាបាលបន្ថែមទៅលើជនជាប់ចោទ ដែលអាចជួយឲ្យសុខភាពស្មារតីរបស់ជនជាប់ចោទបានប្រសើរឡើង ហើយការព្យាបាលនេះត្រូវធ្វើឡើងនៅក្នុងមន្ទីរពេទ្យ ឬកន្លែងផ្សេងដែលសមស្របនៅក្នុងប្រទេសកម្ពុជា។ ជនជាប់ចោទត្រូវទទួលការត្រួតពិនិត្យពីជំនាញវេជ្ជសាស្ត្រផ្នែកវិកលចរិត និងផ្នែកចិត្តសាស្ត្រមិនឲ្យលើសរយៈពេលប្រាំមួយខែ។ ការសម្រេចរបស់អង្គជំនុំជម្រះរបស់តុលាការកំពូលរបស់សាលាក្តីខ្មែរក្រហម បានធ្វើឡើងនៅក្នុងអំឡុងពេលដែលសាលាក្តីនេះកំពុងតែធ្វើដំណើរការកាត់ទោសលើសំណុំរឿង០០២ ដែលមានជនជាប់ចោទចំនួនបួនរូប។ ក្រុមប្រជាពលរដ្ឋ និងអ្នករស់រានមានជីវិតក្រោយពីរបបខ្មែរក្រហមបានសាទរចំពោះសេចក្តីសម្រេចរបស់អង្គជំនុំជម្រះតុលាការកំពូល។ លោកជុំ ម៉ី អាយុ៨០ឆ្នាំ អ្នករស់រានមានជីវិតមួយរូបពីមន្ទីរឃុំឃាំងគុកទួលស្លែង បាននិយាយថា លោកសប្បាយរីករាយចំពោះសេចក្តីសម្រេចនេះ។ លោកបានមានប្រសាសន៍ថា លោកគាំទ្រឲ្យបន្តឃុំខ្លួនអ្នកស្រីអៀង ធីរិទ្ធបន្តទៀត ដើម្បីរកយុត្តិធម៌ដល់ជនរងគ្រោះ។ «យើងត្រូវឲ្យវេជ្ជបណ្ឌិតមកពិនិត្យគាត់សារជាថ្មី។ យើងមិនត្រូវដោះលែងគាត់ដោយឥតមានទោសអីទេ ព្រោះអីគាត់ពាក់ព័ន្ធនឹងការកាប់សម្លាប់ប្រជាជនជំនាន់ហ្នឹង បាទ»។ អ្នកស្រីជា ប៉ោហួយ អាយុ៧៣ឆ្នាំ កំពុងកាន់ក្រដាសមួយសន្លឹកដែលនិយាយអំពីជីវប្រវត្តិរបស់អ្នកស្រីអៀង ធីរិទ្ធ នៅសាលាក្តីខ្មែរក្រហម។ អ្នកស្រីបាននិយាយថា អ្នកស្រីអៀង ធីរិទ្ធមិនគួរត្រូវបានដោះលែងឲ្យនៅក្រៅឃុំទេ។ «តុលាការហ្នឹងដាក់ឲ្យវានៅមួយជីវិតអីញ្ចឹងទៅ។ ឥតឲ្យចេញសេរីដូចយើងទេ។ ប្រសិនបើដឹកចេញ [ខ្ញុំ] ឈរមុខឡានតែម្តង។ នាងឯងឥតចេញបានទេ។ ឡានអ្នកឯងហ៊ានបុកអញ។ បុកងាប់ចោលទៅ អញធ្លាប់នៅក្នុងជំនាន់អាពត មិនងាប់ផង។ សុខចិត្តស្លាប់»។ លោកហ៊ុយ វណ្ណៈ មន្ត្រីផ្នែកកិច្ចការសាធារណៈរបស់សាលាក្តីខ្មែរក្រហម បានមានប្រសាសន៍យ៉ាងដូច្នេះថា៖ «ខ្ញុំគ្មានអ្វីអត្ថាធិប្បាយបន្ថែមទៅលើសេចក្តីសម្រេចរបស់តុលាការកំពូលទេ ព្រោះអីនេះជាការសម្រេចរបស់តុលាការជាន់ខ្ពស់ ហើយសេចក្តីសម្រេចនេះ នឹងត្រូវតុលាការសាលាដំបូង ក៏ដូចជាផ្នែកពាក់ព័ន្ធយកទៅអនុវត្តន៍»។ សាលាដំបូងរបស់សាលាក្តីខ្មែរក្រហម កាលពីថ្ងៃទី៧ ខែវិច្ឆិកាកន្លងទៅនេះ បានសម្រេចដោះលែងអ្នកស្រីអៀង ធីរិទ្ធឲ្យនៅក្រៅឃុំដោយឥតលក្ខខណ្ឌ បន្ទាប់ពីតុលាការបានរកឃើញថា អ្នកស្រីពុំមានកាយសម្បទាគ្រប់គ្រាន់ដើម្បីចូលរួម ក៏ប៉ុន្តែសហព្រះរាជអាជ្ញាទាំងជាតិ និងអន្តរជាតិបានប្តឹងជំទាស់ការសម្រេចនេះ។ អ្នកស្រីអៀង ធីរិទ្ធ ហៅភា អាយុ៧៩ឆ្នាំ អតីតរដ្ឋមន្ត្រីក្រសួងសង្គមកិច្ច ត្រូវជាប់ចោទជាមួយនឹងលោកនួន ជា លោកខៀវ សំផន និងលោកអៀង សារី ពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មប្រល័យពូជសាសន៍ បន្ទាប់ពីមនុស្សប្រមាណមួយ១,២លាននាក់បានស្លាប់នៅក្នុងរបបដែលគ្រប់គ្រងដោយពួកខ្មែរក្រហម ចន្លោះពីឆ្នាំ១៩៧៥រហូតទៅដល់ឆ្នាំ១៩៧៩៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ១៣ ធ្នូ ព្រឹក Posted: 13 Dec 2011 04:32 AM PST កុងហ្គោ៖ ប្រធានាធិបតីកុងហ្គោ ជូសកាប៊ីឡា (Joseph Kabila) ថ្លែងក្នុងសន្និសីទសារព័ត៌មានមួយនៅទីក្រុងឃីនស្ហាសា នៅថ្ងៃច័ន្ទនេះថា លោកបានទទួលស្គាល់ថាមានកំហុសខ្លះនៅក្នុងការបោះឆ្នោតកាលពីខែមុន តែលោកច្រានចោលការសន្មត់របស់មជ្ឈមណ្ឌលខាតធឺដែលថាការបោះឆ្នោតនោះខ្វះជំនឿទុកចិត្ត។ សហរដ្ឋអាមេរិក៖ ប្រធានាធិបតីបារ៉ាក់ អូបាម៉ា ស្នើឲ្យអ៊ីរ៉ង់បញ្ជូនយន្តហោះឃ្លាំយកការណ៏សម្ងាត់ Drone របស់អាមេរិចមួយគ្រឿងដែលរដ្ឋាភិបាលក្រុងតេហេរ៉ង់ និយាយថាខ្លួនបានធ្វើឲ្យធ្លាក់ តាមរយៈការវាយប្រហារតាមប្រព័ន្ធអ៊ីនធើណែត។ សហរដ្ឋអាមរិក៖ កាលពីថ្ងៃច័ន្ទ តុលាការកំពូលអាមេរិក បានយល់ព្រមពិនិត្យមើលច្បាប់ចម្រូងចម្រាស់មួយ ដែលដៅទៅលើជនអន្តោប្រវេសន៍ខុសច្បាប់នៅរដ្ឋ អារីហ្សូណា ដែលស្ថិតនៅភាគនីរតី។ អ៊ីរ៉ាក់៖ ប្រធានាធិបតីបារ៉ាក់ អូបាម៉ា និងនាយករដ្ឋមន្ត្រីអ៊ីរ៉ាក់ ណូរី អាល ម៉ាលីគី (Nouri al-Maliki) បានរៀបចំរបៀបវារៈយ៉ាងទូលំទូលាយមួយ សម្រាប់សហប្រតិបត្តិការក្រោយសង្គ្រាម ដោយគ្មានកងទ័ពអាមេរិកតាំងនៅក្នុងប្រទេសអ៊ីរ៉ាក់ ដែលធ្វើឲ្យអ៊ីរ៉ាក់ជាប្រទេសមួយដែលមានអធិបតេយ្យភាព និង លទ្ធិប្រជាធិបតេយ្យមួយនៅមជ្ឈឹមបូព៌ាប្រទេស។ អ៊ឺរ៉ុប៖ ទីភ្នាក់ងារឲ្យពិន្ទុឥណ្ឌទានអន្តរជាតិ២ និយាយថា ក្រុមមេដឹកនាំអ៊ឺរ៉ុបគួរបំពេញកិច្ចការបន្ថែមទៀត ដើម្បីដោះស្រាយវិបត្តិសេដ្ឋកិច្ចដែលកើតចេញមកពីបំណុលយ៉ាងធំរបស់រដ្ឋាភិបាល។ ប៉ាគីស្ថាន៖ នាយករដ្ឋមន្ត្រីប៉ាគីស្ថាន យួស្សូវ រ៉ាហ្សា ខីឡានី (Yousuf Raza Gilani) បានថ្លែងប្រាប់ស្ថានីយទូរទស្សន៍ប៊ីប៊ីស៊ីថាប្រទេសរបស់លោកប្រហែលជាបន្តការឃាត់ឃាំងមិនឲ្យក្បួនយានយន្តរបស់អង្គការអូតង់ចូលទៅក្នុងប្រទេសអាហ្វហ្គានីស្ថានប៉ុន្មានសប្តាហ៍ថែមទៀត៕ <!--AV--> This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
