VOA News: ព័ត៌មាន: “ហេឡូវីអូអេ ៣០ មករា ២០១២៖ ការបោះឆ្នោតព្រឹទ្ធសភានីតិកាលទី៣” plus 4 more |
- ហេឡូវីអូអេ ៣០ មករា ២០១២៖ ការបោះឆ្នោតព្រឹទ្ធសភានីតិកាលទី៣
- សហមេធាវីរបស់នួនជា ព្យាយាមសាកសួរសាក្សីចម្រូងចម្រាសក្នុងសវនាការ
- ព័ត៌មានអន្តរជាតិវីអូអេ ៣០ មករា យប់
- គណបក្សប្រឆាំងទទួលបានអាសនៈ៩បន្ថែមទៀតក្នុងការបោះឆ្នោតព្រឹទ្ធសភា
- ព័ត៌មានអន្តរជាតិវីអូអេ ៣០ មករា ព្រឹក
| ហេឡូវីអូអេ ៣០ មករា ២០១២៖ ការបោះឆ្នោតព្រឹទ្ធសភានីតិកាលទី៣ Posted: 30 Jan 2012 09:13 AM PST ការបោះឆ្នោតព្រឹទ្ធសភាសម្រាប់នីតិកាលទីបីដែលជាការបោះឆ្នោតអសាកលបានបញ្ចប់ទៅកាលពីថ្ងៃអាទិត្យហើយមានតែគណបក្សពីរប៉ុណ្ណោះដែលចូលរួមប្រកួតគឺគណបក្សប្រជាជនកម្ពុជានិងគណបក្សសម រង្ស៊ីដែលជាគណបក្សប្រឆាំងដ៏ធំជាងគេបំផុតនៅក្នុងប្រទេសកម្ពុជា។ បើទោះបីជាទិដ្ឋភាពទូទៅត្រូវបានមន្រ្តីរៀបចំការបោះឆ្នោតវាយតម្លៃថាដំណើរការទៅបានល្អប៉ុន្តែគណៈកម្មាធិការជាតិរៀបចំការបោះឆ្នោតទួលបានពាក្យបណ្តឹងយ៉ាងហោចណាស់ក៏មួយដែរពីគណបក្សសម រង្ស៊ីទាក់ទងនឹងការបោះឆ្នោតនេះ។ លោក យឹម សុវណ្ណ អ្នកតំណាងរាស្ត្រនិងជាអ្នកនាំពាក្យគណបក្សសម រង្ស៊ី ចូលរួមពន្យល់បន្ថែមពីជំហររបស់គណបក្សសម រង្ស៊ី។ សូមស្តាប់សំឡេងទាំងស្រុងនៃកម្មវិធីហេឡូវីអូអេថ្ងៃទី៣០ ខែមករា ឆ្នាំ២០១២៖ <!--AV--> មធ្យោបាយចូលរួមពីប្រិយមិត្ត៖ ទូរស័ព្ទ ០១២ ៥១ ៥១ ៩៤ ហ្វេសប៊ុក facebook.com/voakhmer អ៊ីម៉េល hellovoa@voanews.com This posting includes an audio/video/photo media file: Download Now |
| សហមេធាវីរបស់នួនជា ព្យាយាមសាកសួរសាក្សីចម្រូងចម្រាសក្នុងសវនាការ Posted: 30 Jan 2012 08:21 AM PST ក្រុមចៅក្រមនិងព្រះរាជអាជ្ញាក្នុងអង្គជំនុំជម្រះសាលាដំបូងនៅថ្ងៃច័ន្ទនេះបានរារាំងមិនឲ្យសហមេធាវីអន្ដរជាតិនៃជនជាប់ចោទនួន ជា ធ្វើការចោទសួរដេញដោលលើសាក្សីសក្ដានុពលមួយរូបពាក់ព័ន្ធនឹងជនជាប់សង្ស័យចំនួនពីរនាក់ក្នុងសំណុំរឿង០០៤។ សំណុំរឿងនេះដែលកំពុងស្ថិតក្នុងភាពចម្រូងចម្រាសយ៉ាងរីករាលដាលរវាងភាគីកម្ពុជានិងភាគីអង្គការសហប្រជាជាតិ។ សហមេធាវីរបស់ នួន ជា លោក ម៉ាយឃើល ផេសម៉េន (Michael Pestman) បានព្យាយាមជជីកសួរលើសាក្សី គឺអ្នកស្រី ប្រាក់ យុត ពីតួនាទីរបស់តា អាន និងអ៊ឹម ចែម ដែលជាជនជាប់សង្ស័យក្នុងសំណុំរឿងបន្ថែមទៀតដែលសាលាក្ដីខ្មែរក្រហមមិនទាន់បញ្ចេញឈ្មោះជាផ្លូវការនៅឡើយ។ ការដេញតាមសួរនេះ ដែលលោក Pestman ចាត់ទុកថាទាក់ទងទៅនឹងសំណុំរឿង០០២ ដែលកូនក្ដីរបស់ខ្លួនស្ថិតនៅក្នុងនោះដែរ ប៉ុន្ដែលោកចៅក្រម និល ណុន ប្រធានអង្គជំនុំជម្រះសាលាដំបូង និងលោកស្រី ស៊ីលវៀ ខាតរ៉ាយ (Silvia Cartwright ) បានជំទាស់ថា សំណួររបស់លោកមិនជាប់ពាក់ព័ន្ធនឹងការកាត់ទោសសំណុំរឿង០០២ទេ។ «លោកមេធាវីយើងបានប្រាប់ហើយ សំណុំរឿង០០៣ និង០០៤ គឺជារឿងមួយដោយឡែក គេបាននិងរៀបចំដាច់ដោយឡែកហ្នឹងសំណុំរឿង០០២។ អង្គជំនុំជម្រះកំហិតការសួរដេញដោលត្រឹមតែវិសាលភាពពាក់ព័ន្ធជាមួយនឹងអង្គហេតុដែលត្រូវធ្វើសវនាការក្នុងសំណុំរឿង០០២»។ យ៉ាងណាក៏ដោយលោក ម៉ាយឃើល ផេសម៉េន បានអះអាងថា លោកចង់បង្ហាញពីការជ្រៀតជ្រែករបស់រដ្ឋាភិបាលក្នុងសំណុំរឿង០០២ ក្នុងការតាំងសំណួរលើសាក្សីរូបនេះ ប៉ុន្ដែលោកស្រីចៅក្រម ស៊ីលវៀ ខាតរ៉ាយ បានឆ្លើយតបថា លោក ផេសម៉េន មាននាទីត្រឹមតែតំណាងនិងការពារជនជាប់ចោទនួន ជា តែប៉ុណ្ណោះ ហើយបង្គាប់ឲ្យរូបលោកបន្ដសំណួរទាក់ទងនឹងកូនក្ដីរបស់ខ្លួនតទៅទៀត។ អ្នកស្រីប្រាក់ យុត អាយុ៦៧ឆ្នាំ គឺជាអតីតសមាជិកសភាខ្មែរក្រហម និងជាអតីតសមាជិកភូមិភាគនិរតី។ គាត់បានបញ្ជាក់ក្នុងការផ្ដល់សក្ខីកម្មនៅថ្ងៃនេះថា គាត់ធ្លាប់បានធ្វើការជាមួយ តា អាន ប៉ុន្ដែមិនបានពន្លេចព័ត៌មានអ្វីទាក់ទងនឹងជនជាប់សង្ស័យរូបនោះឡើយ។ ក្រុមសហមេធាវីបរទេសរបស់អតីតប្រធានសភាខ្មែរក្រហម បានព្យាយាមជាច្រើនលើកច្រើនសារក្នុងពេលកន្លងមកដើម្បីបង្ហាញថា រដ្ឋាភិបាលកម្ពុជាបានធ្វើការជ្រៀតជ្រែកលើសាលាក្ដីខ្មែរក្រហមដែលធ្វើឲ្យប៉ះពាល់ដល់យុត្តិធម៌កូនក្ដីរបស់ខ្លួន។ អង្គជំនុំជម្រះសាលាដំបូងរបស់សាលាក្ដីខ្មែរក្រហមកំពុងបន្ដកាត់ក្ដីជនជាប់ចោទបីនាក់ក្នុងសំណុំរឿងទីពីរ រួមមាន នួន ជា ខៀវ សំផន អតីតប្រមុខរដ្ឋខ្មែរក្រហម និងអៀង សារី អតីតរដ្ឋមន្ដ្រី ការបរទេស ក្រោមការចោទប្រកាន់ពាក់ព័ន្ធនឹងការសម្លាប់រង្គាល និងការស្លាប់របស់ប្រជាពលរដ្ឋកម្ពុជាយ៉ាងតិច១,៧លាននាក់ ក្នុងអំឡុងពេលដែលពួកគេកាន់កាប់អំណាចពីឆ្នាំ១៩៧៥ ដល់ឆ្នាំ ១៩៧៩។ នួន ជា នៅថ្ងៃនេះដែរ បានរៀបរាប់ឡើងវិញពីគោលការណ៍បង្កើតសហករណ៍ហូបបាយរួមថា គឺដើម្បីកាត់បន្ថយការចំណាយកម្លាំងពលកម្មសម្រាប់ចម្អិនអាហារនៅតាមគ្រួសារនិមួយៗ ហើយកម្លាំងពលកម្មទាំងនោះគឺត្រូវប្រមូលផ្ដុំលើការធ្វើកសិកម្ម។ នួន ជា ក៏បានឆ្លើយទៅនឹងសំណួររបស់សហព្រះរាជអាជ្ញារង លោក ដេល លីហ្ស៊ាក់ ដែរថា ការបង្កើតរបបហូបរួមគឺធ្វើតាមការចង់បានរបស់ប្រជាពលរដ្ឋកម្ពុជាភាគច្រើន។ ម្យ៉ាងវិញទៀត នួន ជា បញ្ជាក់ថា ពួកខ្មែរក្រហមបានអនុម័តផែនការជម្លៀសប្រជាពលរដ្ឋចេញពីទីក្រុងនិងពីទីប្រជុំជនមុនខ្លួនឡើងកាន់អំណាចដោយខ្លាចការវាយបករបស់សហរដ្ឋអាមេរិកដែល បានគាំទ្ររបបលោកសេនាប្រមុខលន់ ណុល និងដោយភ័យខ្លាចនឹងកងទ័ពវៀតណាមដែលពួកខ្មែរក្រហមជឿថា បានចូលបង្កប់ក្នុងក្រុងភ្នំពេញរួចទៅហើយ៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ៣០ មករា យប់ Posted: 30 Jan 2012 07:20 AM PST ស៊ីរី៖ រដ្ឋាភិបាលនៃប្រទេសស៊ីរីដែលជួបបញ្ហាចាក់ច្រែះនោះ បានការពាររដ្ឋធានីរបស់ខ្លួនពីពួកយុទ្ធជនឧទ្ទាមកាលពីថ្ងៃអាទិត្យ ដោយការដាក់ពង្រាយកងកម្លាំងសន្តិសុខនៅពាសពេញទីក្រុងនេះហើយមានពួកទាហានប្រមាណ២០០០នាក់គាំទ្រដោយកងរថក្រោះនិងរថពាសដែកបានធ្វើការវាយលុកមួយដើម្បីវាយយកតំបន់ជាយក្រុងមកវិញ។ អឺរ៉ុប៖ ពួកមេដឹកនាំអឺរ៉ុបបានកំណត់នឹងពិភាក្សាគ្នាអំពីបទបញ្ញត្តិថ្មីៗសម្រាប់ត្រួតពិនិត្យឱនភាពនិងមូលនិធិសង្គ្រោះមួយដែលបានស្នើឡើង នៅពេលដែលពួកគេធ្វើការរិះរកដំណោះស្រាយមួយសម្រាប់វិបត្តិប្រាក់បំណុលក្នុងទ្វីបនេះ។ ចិន៖ ទីភ្នាក់ងារព័ត៌មានផ្លូវការនៃប្រទេសចិនបានឱ្យដឹងថាកម្មករចិន២៩នាក់ដែលត្រូវបានចាប់ជំរិតដោយពួកឧទ្ទាមកាលពីថ្ងៃសៅរ៍នាភាគខាងត្បូងនៃប្រទេសស៊ូដង់នៅតែឋិតក្នុងការឃុំឃាំងនៅទ្បើយ ស្របពេលដែលបណ្តាញផ្សាយព័ត៌មានរបស់រដ្ឋនៃប្រទេសស៊ូដង់បាននិយាយថាពួកយោធាបានរំដោះកម្មករបាន១៤នាក់ហើយ។ អាហ្វហ្គានីស្ថាន៖ ពួកមន្ត្រីតាលីបង់បាននិយាយថាអ្នកចរចារបស់ពួកតាលីបង់អាហ្វហ្គានីស្ថាននឹងជួបប្រជុំជាមួយពួកមន្ត្រីស.រ.អា.នៅក្នុងប្រទេសកាតា ដើម្បីឱ្យមានកិច្ចពិភាក្សាជាលំដាប់មួយ ក្នុងគោលបំណងកសាងទំនុកចិត្តរវាងភាគីទាំងពីរមុនកិច្ចចរចាសន្តិភាពនៅពេលខាងមុខនេះ។ បាគីស្ថាន៖ ប្រទេសបាគីស្ថានបានដកបម្រាមធ្វើដំណើរលើអតីតឯកអគ្គរដ្ឋទូតរបស់ខ្លួនប្រចាំស.រ.អា.ហើយ ដែលបានឋិតនៅក្រោមការស៊ើបអង្កេតពីរឿងទាក់ទិនរបស់លោកជាមួយនឹងអនុស្សារណៈដ៏ចម្រូងចម្រាសមួយដែលត្រូវបានបញ្ជូនទៅកាន់រដ្ឋធានីវ៉ាស៊ីនតោន (Washington) ដើម្បីសុំជំនួយពីអាមេរិកក្នុងការរារាំងកុំឱ្យមានរដ្ឋប្រហារយោធាដូចដែលបានអះអាងមួយ។ This posting includes an audio/video/photo media file: Download Now |
| គណបក្សប្រឆាំងទទួលបានអាសនៈ៩បន្ថែមទៀតក្នុងការបោះឆ្នោតព្រឹទ្ធសភា Posted: 30 Jan 2012 08:30 AM PST គណៈកម្មការរៀបចំការបោះឆ្នោតខេត្តកំពង់ឆ្នាំង នៅថ្ងៃច័ន្ទនេះ បានទាត់ចោលពាក្យបណ្តឹងរបស់គណបក្សប្រឆាំងរបស់លោកសម រង្ស៊ីដែលទាមទារឲ្យរាប់សន្លឹកឆ្នោតឡើងវិញនៅក្នុងខេត្តកំពង់ឆ្នាំងបន្ទាប់ពីមានសំឡេងឆ្នោតមួយសន្លឹកខុសប្រក្រតីដែលធ្វើឲ្យគណបក្សគ្រប់គ្រងអំណាចបានកើនឡើងពី៣៣៦សំឡេងទៅជា៣៣៧សំឡេង។ លោកស្រី នួន ចាន់នី ប្រធានគណៈកម្មការរៀបចំការបោះឆ្នោតខេត្តកំពង់ឆ្នាំងបាននិយាយថា បន្ទាប់ពីបានប្រជុំពិភាក្សាលើបណ្តឹងរបស់គណបក្សសម រង្ស៊ី លោកស្រីបានចាត់ទុកថាពាក្យបណ្តឹងនេះមិនមានលក្ខណៈគ្រប់គ្រាន់តាមទម្រង់ច្បាប់ទេ។ «ពាក្យបណ្តឹងហ្នឹងមិនត្រឹមត្រូវទេ ពីព្រោះអី ជាក់ស្តែងយើងឃើញសន្លឹកឆ្នោតអញ្ចឹងមែន ហើយសន្លឹកឆ្នោតក៏អត់មានបាត់ទេ គ្រាន់តែស៊ន (គូរស្ទួន) តែនៅលើគំនូសនៅលើផ្ទាំងក្រដាសធំទេ តែអនុប្រធាននិងលេខាដែលគេកត់នៅលើទម្រង់១១-០៨នោះ គឺត្រឹមត្រូវរបស់គេ។ វាខុសតែបន្តិចប៉ុណ្ណឹងទេលោក។» គណបក្សប្រឆាំងរបស់លោកសម រង្ស៊ីបានដាក់ពាក្យបណ្តឹងមួយច្បាប់ទៅគណៈកម្មការរៀបចំការបោះឆ្នោតខេត្តនៅថ្ងៃច័ន្ទនេះដើម្បីស្នើសុំឲ្យរាប់សន្លឹកឆ្នោតឡើងវិញ បន្ទាប់ពីការរាប់សន្លឹកឆ្នោតកាលពីថ្ងៃអាទិត្យនៅក្នុងខេត្តកំពង់ឆ្នាំងបានបង្ហាញឲ្យឃើញថា គណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែនដែលកាន់អំណាចយូរ បានកើនឡើងលើសមួយសំឡេងបន្ថែមទៀត នៅពេលដែលរាប់សន្លឹកឆ្នោត។ ពោលគឺបានកើនឡើងពី៣៣៦សំឡេងទៅ៣៣៧សំឡេង ចំណែកឯគណបក្សសម រង្ស៊ីទទួលបាន៨៦សំឡេង។ លោកគួយ ប៊ុនរឿន អ្នកតំណាងរាស្ត្រទទួលបន្ទុកការបោះឆ្នោតរបស់គណបក្សសម រង្ស៊ីបាននិយាយថា មានសន្លឹកឆ្នោតមួយសំឡេង ដែលមានភាពមិនស្មើគ្នា (មិនស្រប) នឹងចំនួនសន្លឹកឆ្នោតដែលបានបោះ ក៏ដូចជាមិនស្មើគ្នានឹងចំនួនសន្លឹកឆ្នោតដែលគេបានរាប់។ លោកបានបញ្ជាក់ថា ការរកឃើញចំនួនឆ្នោតដែលបាត់បង់មិនបានបង្ហាញភ្នាក់ងាររបស់គណបក្សសម រង្ស៊ីដែលបានចូលរួមអង្កេតការណ៍ទេ។ «នេះជាភាពមិនប្រក្រតីមួយនៅក្នុងការរាប់សន្លឹកឆ្នោតដែលបង្ហាញឲ្យឃើញថាការិយាល័យរាប់សន្លឹកឆ្នោតមិនបានបំពេញតួនាទីទៅតាមការកំណត់អនុវត្តទៅតាមបទបញ្ជានិងច្បាប់ដែលបានកំណត់សម្រាប់ការបោះឆ្នោត»។ លោកគួយ ប៊ុនរឿនបានលើកឡើងទៀតថា លោកគ្រោងនឹងដាក់ពាក្យបណ្តឹងមួយករណីទៀតទៅគណៈកម្មាធិការជាតិរៀបចំការបោះឆ្នោតគ.ជ.ប. ប្រឆាំងជំទាស់ទៅនឹងអ្នកស្រីនួន ចាន់នី ប្រធានគណៈកម្មការរៀបចំការបោះឆ្នោតខេត្តកំពង់ឆ្នាំងដែលបានបង្កការលំបាកនៅក្នុងការិយាល័យបោះឆ្នោត។ លោកទេព នីថា អគ្គលេខាធិការនៃគណៈកម្មាធិការរៀបចំការបោះឆ្នោតបាននិយាយថា ការទៅកាន់ការិយាល័យបោះឆ្នោតគឺជារឿងរបស់គណៈកម្មការរៀបចំការបោះឆ្នោតដែលមានសិទ្ធិទៅត្រួតពិនិត្យមើលការរិយាល័យបោះឆ្នោត។ ក៏ប៉ុន្តែមិនមានសិទ្ធិបញ្ជាឬអនុវត្តន៍ការងារជំនួសការិយាល័យបោះឆ្នោតទេ។ «គ.ជ.ប.អនុវត្តមានច្បាប់ មាននីតិវិធី មានបទបញ្ជាផ្ទៃក្នុង មានក្រមសីលធម៌។ ហើយករណីនេះយើងនឹងពិនិត្យមើល»។ ប្រទេសកម្ពុជាបានរៀបចំការបោះឆ្នោតអសកលកាលពីថ្ងៃអាទិត្យដើម្បីជ្រើសរើសសមាជិកព្រឹទ្ធសភាដែលមានអាសនៈចំនួន៦១។ បន្ទាប់ការបោះឆ្នោតរយះពេលមួយថ្ងៃដោយមានការចូលរួមពីអ្នកតំណាងរាស្រ្តនិងសមាជិកក្រុមប្រឹក្សាឃុំសង្កាត់ លទ្ធផលបានបង្ហាញឲ្យឃើញក្រៅផ្លូវការថា គណបក្សប្រជាជនកម្ពុជាទទួលបាន៨.៨៨០សំឡេង គឺស្មើប្រមាណ៧៨,០១%។ ចំណែកឯគណបក្សសម រង្ស៊ីទទួលបាន២.៥០៣សំឡេង គឺស្មើនឹង២១,៩៩%។ យោងតាមលទ្ធផលនៃការបែងចែកអាសនៈក្រៅផ្លូវការរបស់មន្ត្រីគណបក្សទាំងពីរបានឲ្យដឹងថាគណបក្សប្រជាជនកម្ពុជាទទួលបាន៤៦អាសនៈ ចំណែកឯគណបក្សសម រង្ស៊ីបានកើនឡើងពី២អាសនៈទៅ១១អាសនៈ៕ This posting includes an audio/video/photo media file: Download Now |
| ព័ត៌មានអន្តរជាតិវីអូអេ ៣០ មករា ព្រឹក Posted: 29 Jan 2012 07:21 PM PST បារាំង៖ ប្រធានាធិបតី នីកូឡា សាកកូហ្សី (Nicolas Sarkozy) អំពាវនាវឱ្យមានការបង្កើនពន្ធដារលើទំនិញនិងសេវាកម្ម និងធ្វើការកាត់បន្ថយពន្ធដារលើប្រាក់បៀវត្សរ៍របស់ពួកនយោជក។ ភូមា៖ លោកស្រីអង សានស៊ូជី មេដឹកនាំលទ្ធិប្រជាធិបតេយ្យភូមាបានឃោសនាបោះឆ្នោតនៅខាងក្រៅរដ្ឋធានីរ៉ង់គូន ជាលើកដំបូងកាលពីថ្ងៃអាទិត្យ នៅមុនការបោះឆ្នោតខែមេសាដែលគេយល់ឃើញថាជាការសាកល្បងសំខាន់មួយអំពីការប្តេជ្ញារបស់រដ្ឋាភិបាលគាំទ្រដោយក្រុមយោធាក្នុងកំនែទម្រង់។ ស៊ីរី៖ មានអំពើហិង្សាមួយកើតឡើងរវាងពួកទាហានរដ្ឋាភិបាលនិងពួកសកម្មជនប្រឆាំងស៊ីរីលើតំបន់ជាយក្រុងមួយចំនួននៃក្រុងដាម៉ាស់ ដើម្បីបណ្តេញពួកឧទ្ទាមដែលបានខិតខំព្យាយាមបង្កើតទីតាំងមាំទាំមួយនៅជិតមជ្ឈមណ្ឌលនៃអំណាចរបស់ប្រធានាធិបតី បាសារ អាលអាសាទ (Bashar al-Assad)។ ស៊ូដង់ខាងត្បូង៖ បានបិទការផលិតប្រេងទាំងអស់នៅពេលដែលជម្លោះរបស់ខ្លួនជាមួយស៊ូដង់គ្មានបង្ហាញសញ្ញានៃការដោះស្រាយលើបញ្ហា ឬកិច្ចព្រមព្រៀងក្នុងការបែងចែកផលប្រយោជន៍ដែលបានពីផលិតកម្មប្រេង នៅពេលដែលប្រទេសស៊ូដង់ខាងត្បូងត្រួតត្រាជាង៧០ភាគរយនៃផលិតកម្មប្រេងរបស់ប្រទេសទាំងពីរ តែត្រូវការបំពង់ប្រេងដែលឆ្លងកាត់ប្រទេសស៊ូដង់ដើម្បីបញ្ជូនប្រេងទៅកាន់កំពង់ផែ។ អ៊ីរ៉ុង៖ ពួកអធិការបរមាណូអង្គការសហប្រជាជាតិបានចាប់ផ្តើមបេសកកម្មមួយនៅអ៊ីរ៉ង់ដើម្បីស៊ើបអង្កេតអំពីការចោទប្រកាន់ស្តីពីទំហំសម្ងាត់ខាងយោធានៃកម្មវិធីបរមាណូអ៊ីរ៉ង់។ សហរដ្ឋអាមេរិក៖ ពួកអ្នកធ្វើការចរចាតាលីបាន់ចំនួន៥រូបបាជួបជាមួយពួកមន្ត្រី អាមេរិកនៅកាតា ដើម្បីធ្វើការពិភាក្សាគ្នាមួយចំនួនដែលមានគោលដៅកសាងការទុកចិត្តគ្នានិងប្រុងប្រៀបរៀបចំភាគីទាំងពីរសម្រាប់កិច្ចចរចាសន្តិភាពក្នុងពេលខាងមុខ។ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
