VOA News: ព័ត៌មាន: “អ្នកជំនាញពិសេសរបស់អ.ស.ប.មានការតាំងចិត្ត និងសុទិដ្ឋិនិយមអំពីសាលាក្តីកាត់ទោសខ្មែរក្រហម” plus 2 more |
- អ្នកជំនាញពិសេសរបស់អ.ស.ប.មានការតាំងចិត្ត និងសុទិដ្ឋិនិយមអំពីសាលាក្តីកាត់ទោសខ្មែរក្រហម
- បារាំងជាប់ឃុំអាចកំណត់បត្យាប័នដោយខ្លួនឯង
- កម្ពុជាសុំឲ្យថៃឈប់ពង្រាយទ័ពនៅតំបន់គ្មានទ័ព
| អ្នកជំនាញពិសេសរបស់អ.ស.ប.មានការតាំងចិត្ត និងសុទិដ្ឋិនិយមអំពីសាលាក្តីកាត់ទោសខ្មែរក្រហម Posted: 05 Jul 2012 06:40 AM PDT នៅពេលសាលាក្តីកាត់ទោសមេដឹកខ្មែរក្រហមប្រឈមមុខឧបសគ្គជាច្រើន ដូចជាសហចៅក្រមនិងសហព្រះរាជអាជ្ញាអន្តរជាតិលាឈប់ពីការងារ និងកង្វះថវិកានោះ លោកបាន់គីមូន អគ្គលេខាធិការអ.ស.ប.បានតែងតាំងលោកDavid Scheffer ជាអ្នកជំនាញពិសេសក្នុងសាលាក្តីកាត់ទោសមេដឹកនាំខ្មែរក្រហម។ លោក David Scheffer បានសម្តែងការតាំងចិត្តដ៏មុះមុតក្នុងបេសកកម្មរបស់លោកនៅអង្គជំនុំជម្រះវិសាមញ្ញក្នុងតុលាការកម្ពុជាដើម្បី កាត់ទោសមេដឹកនាំរបបកម្ពុជាប្រជាធិបតេយ្យរបស់ខ្មែរក្រហម។ ថ្វីបើមានសហចៅក្រមនិងសហព្រះរាជអាជ្ញាអន្តរជាតិជាបន្តបន្ទាប់បានលាលែងពីការការងារនៅសាលាក្តីកាត់ទោសមេដឹកនាំខ្មែរក្រហមក្តី លោក David Schefferនៅបង្ហាញសុទិដ្ឋិនិយមប្រាប់វីអូអេ កាលពីពាក់កណ្តាលខែមិថុនានេះថា៖ «ករណីចៅក្រមស៊ើបអង្កេតពីរនាក់នេះ ខ្ញុំគិតថា ពិតជាមានបញ្ហា តែយើងត្រូវដោះស្រាយបញ្ហាទាំងនេះ។ នេះជាកិច្ចការលំបាក វែង ឆ្ងាយ តែមិនមែនជាឧបសគ្គដែលធ្វើឲ្យស្ទះដំណើរការសាលាក្តីនេះទេ។ វាជាមូលដ្ឋានដែលយើងត្រូវជំនះ។ យើងអាចជំនះឧបសគ្គនេះ ដោយដាក់មនុស្សថ្មីដែលអាចដោះស្រាយស្ថានការណ៍នេះមានប្រសិទ្ធិភាពជាងអ្នកមុន ហើយដែលអាចទទួលបានកិច្ចសហប្រតិបត្តិការពីរដ្ឋាភិបាលប្រសើរឡើង។ នេះជារបៀបដោះស្រាយបញ្ហា។ យើងបានឆ្លងកាត់ឧបសគ្គនេះ»។ លោកនិយាយថា ការលាឈប់របស់ចៅក្រមក្នុងការកាត់ទោសឧក្រិដ្ឋកម្មអន្តរជាតិ មិនមែនមានតែនៅតុលាការកាត់ទោសខ្មែរក្រហមទេ។ David Scheffer ជាអតីតសាស្ត្រាចារ្យច្បាប់នៅសាលាច្បាប់ North Western University School of Law រដ្ឋ Chicago និងអតីតឯកអគ្គរដ្ឋទូតគោរចរណ៍របស់ស.រ.អា.ពីឆ្នាំ១៩៩៧ដល់ឆ្នាំ២០០១ អំពីឧក្រិដ្ឋកម្មសង្គ្រាម។ លោកពន្យល់ថា តាមបទពិសោធន៍ ការកាត់ទោសឧក្រិដ្ឋកម្មសង្គ្រាមតែងតែមានបញ្ហា ដូចជានៅរវ៉ាន់ដា យូហ្គោស្លាវ សេរ៉ាលីអន និងនៅតុលាការឧក្រិដ្ឋកម្មអន្តរជាតិ។ មានការរិះគន់ថា តុលាការកាត់ទោសខ្មែរក្រហមឈានទៅរកបរាជ័យ ប៉ុន្តែលោកDavid Scheffer មិនយល់ដូច្នោះទេ។ «តែនៅទីបញ្ចប់ លោកឃើញថា តើតុលាការនេះធ្វើអ្វីខ្លះ? មានការកាត់ទោសឌុច។ ការកាត់ទោសមេដឹកនាំខ្មែរក្រហម ដែលជាសហការីកំពូលរបស់ប៉ុល ពតក្នុងទសវត្សរ៍១៩៧០នោះ គឺកំពុងដំណើរការ។ យើងត្រូវចាំមើលក្នុងពេលច្រើនឆ្នាំទៀត ទើបអាចសន្និដ្ឋានថា តុលារការនេះជោគជ័យឬបរាជ័យ»។ ពេលផ្សព្វផ្សាយសៀវភៅរបស់លោក ដែលសរសេរពីការកាត់ទោសឧក្រិដ្ឋកម្មធំៗ លោក David Schefferសង្ខេបពីខ្លឹមសារសំខាន់ៗក្នុងសៀវភៅរបស់លោកថា 'សៀវភៅAll The Missing Souls' និយាយពីប្រវត្តិការងាររបស់លោកទាក់ទងនឹងតុលាការនៅរវ៉ាន់ដា យូហ្កោស្លាវ សេរ៉លីអូន តុលាការកាត់ទោសមេដឹកនាំខ្មែរក្រហម តុលាការឧក្រិដ្ឋកម្មអន្តរជាតិ ដែលកាត់ទោសឧក្រិដ្ឋកម្មសង្គ្រាមធំៗទាំងនេះ។ លោកនិយាយថា៖ «សៀវភៅនេះសរសេរអំពីកិច្ចការទូត ប្រវិត្តិសាស្ត្រ រឿងរបស់មនុស្ស និងអំពីច្បាប់ដែលនាំឲ្យមានការបង្កើតតុលាការតុលាការឧក្រិដ្ឋកម្មសង្គ្រាមទាំង៥នេះ»។ លោក Maxwell Myman ជានិស្សិតអាមេរិកាំងចុះកម្មសិក្សានៅតុលាការកាត់ទោសមេដឹកនាំខ្មែរក្រហម។ ជីតារបស់លោកបានរួចជីវិតពីឧក្រិដ្ឋកម្មរបស់អ៊ិត្លែ។ «ដំណើរជីវិតមនុស្សយើងតែងមានកំហុស។ ដូច្នេះ ជាការចាំបាច់ដែលយើងត្រូវទទួលយកទស្សនៈ អ្នកជំនាញ មានបទពិសោធន៍ដើម្បីកែតម្រូវការខុសឆ្គងជាមួយគ្នា។ ខ្ញុំគិតថា ជារឿងសំខាន់ដែលយើងត្រូវរៀនសូត្រពីការតស៊ូរបស់គាត់ក្នុងការចរចាជាមួយរដ្ឋាភិបាលដើម្បីធានាថា យើងសម្រេចបានផលប្រយោជន៍ និងសម្រេចគោលដៅរួមគឺសន្តិភាព និងការទទួលខុសត្រូវ»។ តុលាការខ្មែរក្រហមស្ថិតក្នុងដំណើរការជំនុំជម្រះសំណុំរឿង០០២ កាត់ទោសមេដឹកនាំខ្មែរក្រហម មាននួនជា អតីតប្រធានរដ្ឋសភា ខៀវ សំផន អតីតប្រមុខរដ្ឋ អៀង សារី អតីតរដ្ឋ រដ្ឋមន្ត្រីការបរទេសនិងអៀង ធីរិទ្ធ អតីតរដ្ឋមន្ត្រីសង្គមកិច្ច។ ជនជាប់ចោទទាំងនេះសុទ្ធតែមានវ័យចំណាស់ តែលោក David Scheffer យល់ថា វាមិនមែនជាបញ្ហាទេ។ «ចុងចោទចាស់ៗមានច្រើនក្នុងពិភពលោក។ ជួនការគេស្លាប់មុនកាត់ទោស។ ករណីនេះមិនមែនមានតែនៅកម្ពុជាទេ។ លោកមីឡូសុវិចស្លាប់នៅបាល់កង់ មុនតុលាការយូហ្កោស្លាវសម្រេចទោស។ គាត់បានឆ្លងកាត់សវនាការជំនុំជម្រះទោសគាត់។ ដូច្នេះវ័យចំណាស់របស់ជនជាប់ចោទមិនមែនជាឧបសគ្គនៃដំណើរការកាត់ទោសទេ។ មេដឹកនាំទាំងនេះនៅរស់ មានសុខភាពអាចឡើងតុលាការបាន។ ដូច្នេះយើងត្រូវចាំមើលលទ្ធផលដំណើរការនេះសិន»។ បញ្ហាចម្រោងចម្រាស់ដែលនាំឲ្យចៅក្រមអន្តរជាតិលាលែងគឺការមុនចុះសម្រុងគ្នារវាងភាគីអ.ស.ប.និងភាគីកម្ពុជាអំពីសំណុំរឿង០០៣ និង០០៤៕ This posting includes an audio/video/photo media file: Download Now |
| បារាំងជាប់ឃុំអាចកំណត់បត្យាប័នដោយខ្លួនឯង Posted: 05 Jul 2012 01:34 AM PDT កម្ពុជាបានផ្លាស់ប្តូរជំហររបស់ខ្លួនដោយទុកលទ្ធភាពឲ្យជនជាតិបារាំងធ្វើការសម្រេចចិត្តដោយខ្លួនឯងថាតើគួរសម្រេចចិត្តធ្វើបត្យាប័នទៅប្រទេសបារាំង ឬក៏ប្រទេសចិន បន្ទាប់ពីអាជ្ញាធរកម្ពុជាបានចាប់ខ្លួនកាលពីខែមុន។ មន្ត្រីជាន់ខ្ពស់រដ្ឋាភិបាលកម្ពុជាធ្លាប់បានមានប្រសាសន៍ថានឹងមិនធ្វើបត្យាប័នជនជាតិបារាំងទៅកាន់ប្រទេសណាទេ ពោលគឺរក្សាទុកនៅកម្ពុជា។ លោកឧត្តមសេនីយ៍ឯកខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍នៅថ្ងៃអង្គារនេះថា ឥឡូវនេះកម្ពុជាបានទុកលទ្ធភាពឲ្យជនជាតិបារាំងធ្វើការសម្រេចចិត្តដោយខ្លួនឯងថាតើគួរបញ្ជូនទៅកាន់ប្រទេសណាមួយ។ លោកបានមានប្រសាសន៍ថាសុំឲ្យមានការយោគយល់ដល់កម្ពុជា ពីព្រោះប្រទេសបារាំងក៏ជាមិត្ត ហើយប្រទេសចិនក៏ជាមិត្តរបស់កម្ពុជាផងដែរ។ «បារាំង គាត់ការពារពលរដ្ឋរបស់គាត់អញ្ចឹងទៅ ឯចិនថាគាត់បើទៅក៏មិនមែនកាត់ទោសតាមច្បាប់ របស់ចិនអីទេ គាត់បានផ្តល់ជាសក្ខីកម្មនៅក្នុងច្បាប់ហ្នឹង។ ឥឡូវជំហរត្រង់ថា សាមីខ្លួនគាត់ចង់ទៅណា ធ្វើយ៉ាងម៉េច»។ កាលពីថ្ងៃទី១៣ ខែមិថុនា កន្លងទៅនេះរដ្ឋាភិបាលកម្ពុជាបានចាប់ខ្លួនលោក ប៉ាទ្រីក ដឺវីល្ល័រស៍ (Patrick Devillers) អាយុ៥២ឆ្នាំ ជនជាតិបារាំងដែលធ្លាប់មានទំនាក់ទំនងយ៉ាងជិតស្និតជាមួយនឹងលោក បូ ស៊ីឡៃ (Bo Xilai) អ្នកនយោបាយដែលមានឈ្មោះមិនល្អនៅក្នុងប្រទេសចិន។ ស្ថានទូតចិន និងស្ថានទូតបារាំងប្រចាំកម្ពុជា មិនអាចសុំការបំភ្លឺបានទេនៅថ្ងៃអង្គារនេះ។ ការចាប់ខ្លួនជនជាតិបារាំងរូបនេះ កម្ពុជាបានធ្វើឡើងតាមរយៈសំណើរមួយរបស់ចិនហើយបានបន្តឃុំខ្លួននៅនាយកដ្ឋានអន្តរប្រវេសន៍ក្រសួងមហាផ្ទៃ។ កម្ពុជាបានស្នើដល់ចិនឲ្យផ្តល់ភស្តុតាងដល់កម្ពុជាពាក់ព័ន្ធនឹងជនជាតិបារាំង ដែលត្រូវបានចោទថាបានប្រព្រឹត្តបទល្មើសនៅចិន។ ក៏ប៉ុន្តែភស្តុតាងដែលចោទប្រកាន់លោក ប៉ាទ្រីក ដឺវីល្ល័រស៍មិនទាន់ត្រូវបានបង្ហាញជាសាធារណៈទេ ចំណែកឯការចោទប្រកាន់ជាផ្លូវការពីរដ្ឋាភិបាលកម្ពុជា ក៏មិនទាន់ដឹងថាចោទប្រកាន់ពីបទអ្វីដែរ។ រដ្ឋាភិបាលបារាំងបានទាមទារឲ្យរដ្ឋាភិបាលកម្ពុជាបំភ្លឺអំពីមូលហេតុពិតប្រាកដនៃការចាប់ខ្លួនជនជាតិបារាំងរូបនេះ ដោយបានអះអាងថាបារាំងនឹងតាមដានដិតដល់បំផុតចំពោះការប្រឆាំងណាមួយដោយគ្មានមូលហេតុច្បាស់លាស់ទៅលើលោក ប៉ាទ្រីក ដឺវីល្ល័រស៍។ លោក ប៉ាទ្រីក ដឺវីល្ល័រស៍ ធ្លាប់បានរស់នៅទីក្រុងភ្នំពេញ ហើយលោកធ្លាប់មានកម្មសិទ្ធដីមួយកន្លែងនៅក្នុងទីក្រុងកែប ដែលកន្លងមកលោកមិនធ្លាប់មានការចោទប្រកាន់អ្វីទាំងអស់ពាក់ព័ន្ធពីបទឧក្រិដ្ឋ។ លោក ប៉ាទ្រីក ដឺវីល្ល័រស៍ ធ្លាប់មានទំនាក់ទំនងយ៉ាងជិតស្និតជាមួយនឹងលោកស្រី ហ្គោ ហ្គេឡៃ (Go Gailai) ភរិយារបស់លោក បូ ស៊ីឡៃ អតីតអ្នកទោសនយោបាយប្រឆាំងនឹងរដ្ឋាភិបាលចិនមួយរូប ហើយលោក បូ ស៊ីឡៃ កំពុងជាប់ឃុំឃាំងពីបទធ្វើចារកម្មលើមន្ត្រីចិនជាន់ខ្ពស់ដោយខុសច្បាប់។ អ្នកស្រី ហ្គោ ហ្គេឡៃ ត្រូវបានអាជ្ញាធរចាប់ខ្លួនកាលពីអំឡុងខែមេសាពីបទសង្ស័យថាជាប់ពាក់ព័ន្ធនឹងការធ្វើឃាតលោក ណេល ហេវូដ (Neil Heywood) ពាណិជ្ជករជនជាតិអង់គ្លេសមួយរូប៕ This posting includes an audio/video/photo media file: Download Now |
| កម្ពុជាសុំឲ្យថៃឈប់ពង្រាយទ័ពនៅតំបន់គ្មានទ័ព Posted: 04 Jul 2012 10:26 PM PDT កម្ពុជានៅថ្ងៃពុធនេះបានសរសេរលិខិតជាបន្ទាន់មួយទៅតុលាការក្រុងឡាអេ និងលិខិតកំណត់ទូតទៅស្ថានទូតថៃដើម្បីឲ្យបញ្ឈប់ការដាក់ពង្រាយកងទ័ពរបស់ថៃនៅតំបន់គ្មានកងទ័ពបណ្តោះអាសន្ន។ យោងតាមខ្លឹមសារនៃលិខិតចំនួនពីរច្បាប់ដាច់ដោយឡែកៗពីគ្នាទៅកាន់លោក ហ្វីលីព ឃូវ័ររុរ៍ (Philippe Couverur) ក្រឡាបញ្ជីតុលាការអន្តរជាតិទីក្រុងឡាអេ ប្រទេសហូឡង់ និងស្ថានទូតថៃប្រចាំកម្ពុជារបស់លោកហោ ណាំហុង រដ្ឋមន្ត្រីការបទេសកម្ពុជាបានបញ្ជាក់ថាការដាក់ពង្រាយកងទ័ពរបស់ថៃគឺជាការរំលោភទៅនឹងដីកាបង្គាប់ ចុះកាលពីថ្ងៃទី១៨ ខែកក្កដា ឆ្នាំ២០១១ របស់តុលាការយុត្តិធម៌អន្តរជាតិទីក្រុងឡាអ។ នៅក្នុងលិខិតនោះ លោកហោ ណាំហុង បានភ្ជាប់សកម្មភាពរបស់ថៃមួយចំនួនដូចជាការដាក់ពង្រាយលួសបន្លាបន្ថែមទៀតនៅទីតាំងដែលខ្លួនធ្លាប់បានដាក់កន្លងមក នៅភាគខាងជើងជណ្តើរដែកនៃច្រកចូលប្រសាទព្រះវិហារ ហើយសកម្មភាពនេះបានធ្វើឡើងចាប់តាំងពីថ្ងៃទី២៣ រហូតដល់ថ្ងៃទី២៥ ខែមិថុនា។ នៅថ្ងៃទី២៦ ខែមិថុនា មានស្នូរគ្រាប់កាំភ្លើងមួយគ្រាប់បានលាន់ឮចេញពីទីតាំងភាគីថៃ ហើយប្រាំនាទីក្រោយមកស្នូរគ្រាប់កាំភ្លើងមួយគ្រាប់ទៀតបានលាន់ឡើង។ លោកកុយ គួង អ្នកនាំពាក្យក្រសួងការបរទេសបានមានប្រសាសន៍ថាលិខិតនេះបានបញ្ជូនចេញពីកម្ពុជារួចហើយនៅថ្ងៃពុធនេះ។ ក៏ប៉ុន្តែលោកមិនទាន់ដឹងថាភាគីដែលពាក់ព័ន្ធ បានទទួលលិខិតនេះ ឬក៏យ៉ាងណានៅឡើយទេ។ លោកបានមានប្រសាសន៍ថា កម្ពុជាស្នើសុំឲ្យថៃគោរពដីកាបង្គាប់របស់តុលាការក្រុងឡាអេ។ «សូមបញ្ជាក់ដែរថាកម្ពុជាស្នើឲ្យប្រទេសថៃបញ្ឈប់សកម្មភាពទាំងនេះ ព្រោះថាសកម្មភាពទាំងនេះបានបង្កឲ្យមានភាពតានតឹងនៅក្នុងតំបន់គ្មានកងទ័ពនេះ។ ហើយស្នើឲ្យថៃគោរពដីកាបង្គាប់របស់តុលាការយុត្តិធម៌ក្រុងឡាអេនេះ»។ មន្ត្រីស្ថានទូតថៃប្រចាំទីក្រុងភ្នំពេញ មួយរូបដែលនិយាយនៅក្នុងលក្ខខណ្ឌសុំមិនបញ្ចេញឈ្មោះបានឲ្យដឹងថាលោកមិនទាន់ដឹងលិខិតកំណត់ទូតតវ៉ារបស់ភាគីកម្ពុជានៅឡើយ។ ក្រុមការងារចម្រុះកម្ពុជា-ថៃ កាលពីសប្តាហ៍មុន បានបើកកិច្ចប្រជុំចំនួនពីរថ្ងៃនៅក្នុងប្រទេសកម្ពុជា ដើម្បីរកដំណោះស្រាយវិបត្តិជំលោះព្រំដែននៃប្រទេសកម្ពុជា និងប្រទេសថៃ។ យោងតាមសេចក្តីថ្លែងការណ៍រួមគ្នារបស់កិច្ចប្រជុំភាគីទាំងពីរបានបញ្ជាក់អំពីភាពរីកចម្រើនតិចតួច ហើយភាគីទាំងពីរបានសន្យាថា នឹងធានាសុខសន្តិភាព និងសុវត្ថិភាពនៅតំបន់មានជម្លោះ។ កម្ពុជា និងថៃបានឈ្លោះទាស់ទែងដណ្តើមកាន់កាប់ដីមួយដុំនៅក្បែតំបន់ប្រាសាទព្រះវិហារ កាលពីអំឡុងខែកក្កដា ឆ្នាំ២០០៨ រហូតបានក្លាយទៅជាការប្រយុទ្ធបង្ហូរឈាមជាច្រើនលើក ដែលបានបណ្តាលឲ្យទាហាននៃភាគីទាំងសងខាងស្លាប់ និងរងរបួស៕ This posting includes an audio/video/photo media file: Download Now |
| You are subscribed to email updates from VOA News: ព័ត៌មាន To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
